МЦⷭ҇А ТОГО́ЖЕ ВЪ Ѕ҃І ДН҃Ь

ст҃а́гѡ а҆пⷭ҇ла и҆ є҆ѵⷢ҇али́ста матѳе́ѧ . =И҆ ст҃а́гѡ сщ҃енномч҃нка ѵ҆па́тїѧ , є҆пкⷭ҇па га́нгрьскагѡ . слꙋ́жба є҆мꙋ̀ пи́сана , по се́й слꙋ́жбѣ . Ве́черъ , на гдⷭ҇и возва́хъ , стⷯры , а҆пⷭ҇лꙋ , на́ ѕ҃ . гла́съ , д҃ . поⷣ . и҆́же зва́нныи свы́ше . И҆=спытꙋ́ѧи срⷣца̀ чл҃кѡмъ ,꙳ є҆гда̀ тво́й ,꙳ и҆́же ѡ҆́ бз҃ѣ нра́въ а҆пⷭ҇ле ,꙳ бжⷭ҇твенымъ провидѣ́нїемъ оу҆зрѣ̀ ,꙳ ѿ непра́вды и҆ ѿ́ мира тѧ̀ и҆зба́ви .꙳ тогда̀ и҆ всеми́рныи свѣ́тъ содѣ́ѧ ,꙳ вселе́ннѣй концы̀ просвѣща́ти ,꙳ и҆ ѡ҆блиста́ти повелѣ́въ ,꙳ є҆го́же и҆ бжⷭ҇твеное є҆ѵⷢ҇а́лїе ,꙳ сподо́бисѧ ꙗ҆́вѣ и҆сповѣ́дати .꙳ тогѡ̀ молѝ ,꙳ спастѝ и҆ просвѣти́ти дш҃а на́ша . И҆́же ѿ мы́тницы ,꙳ при́званъ на оу҆че́нїе ,꙳ є҆гда́ тѧ без̾нача́льное сло́во воз̾гласѝ ,꙳ послѣ́довати повелѣ́въ .꙳ и҆ прїѡ҆бще́нїе црⷭ҇твїѧ ѡ҆бѣща́въ .꙳ тогда̀ всебл҃же́нне всѧ̀ ѡ҆ста́вивъ ,꙳ и҆ смꙋще́нїѧ мѧте́жнагѡ ѿше́дъ ,꙳ томꙋ̀ крѣ́пкѡ послѣ́довалъ є҆сѝ .꙳ и҆ ны́нѣ бг҃ови́дче насыща́емь ,꙳ неи҆зрече́нныхъ є҆гѡ̀ видѣ́нїи ꙗ҆́снѡ .꙳ є҆го́же молѝ ,꙳ спастѝ и҆ просвѣти́ти дш҃а на́ша . Прⷪ҇ро́ческое нѣ́кое ꙗ҆́вѣ ,꙳ быстро̀ видѣ́нїе ,꙳ дре́вле тѧ̀ ст҃ы́и ка́мень оу҆зрѣ̀ ,꙳ на землѝ валѧ́ема ,꙳ преле́стнаѧ сокрꙋша́юща оу҆хищре́нїѧ .꙳ сло́во же премꙋ́дре в̾ є҆ди́номъ соста́вѣ ,꙳ свѣ́та тѧ̀ ми́рꙋ ꙳ и҆ проповѣ́дника ,꙳ пра́вдѣ и҆ и҆́стинѣ совершѝ .꙳ оу҆кра́шена зарѧ́ми ,꙳ трисл҃нчнагѡ свѣ́та всече́стне .꙳ є҆го́же молѝ ,꙳ спастѝ и҆ просвѣти́ти дш҃а на́ша . Пребжⷭ҇твеныѧ ,꙳ мꙋ́дрости слꙋга̀ .꙳ є҆гда̀ неприкоснове́нныи свѣ́тъ ꙳ прїи́де пло́тїю ,꙳ ꙗ҆́коже и҆зво́ли ,꙳ невѣ́дѣнїѧ разорѧ́ѧ ѡ҆мраче́нїѧ , тогда̀ призыва́емь послѣ́дова ,꙳ живоно́снымъ повелѣ́нїемъ .꙳ и҆ храни́тель бжⷭ҇твеныи бы́въ па́че смы́сла .꙳ цр҃ко́вныи бы́въ свѣти́льникъ ,꙳ матѳе́е хрⷭ҇то́во ѻ҆би́телище .꙳ є҆го́же молѝ ,꙳ спастѝ и҆ просвѣти́ти дш҃а на́ша . Ꙗ҆зы́кѡмъ ѻ҆́гненымъ пре́лесть попалѧ́ѧ ,꙳ ꙗ҆ви́лсѧ є҆сѝ всехва́льне ,꙳ матѳе́е премꙋ́дре ,꙳ оу҆тѣ́шителево прїе́мъ прише́ствїе ,꙳ сꙋщество́мъ тебѐ ѡ҆свѣща́ющꙋ .꙳ ѿ сю́дꙋ оу҆диви́лъ є҆сѝ всѧ́ко помышле́нїе ,꙳ слы́шащихъ слове́съ твои́хъ .꙳ к̾ лю́демъ гл҃авъ вели́чествїѧ вседержи́телѧ .꙳ и҆ ны́нѣ во всю̀ зе́млю и҆зы́де твоѐ вѣща́нїе ,꙳ бг҃одх҃нове́нне .꙳ є҆го́же молѝ ,꙳ всѧ̀ оу҆ще́дрити пою́щїѧ тѧ̀ .

сла́ва . гла́съ , д҃ . Зовꙋ́щꙋ хрⷭ҇тꙋ̀ ко оу҆че́нїю нбⷭ҇номꙋ , оу҆се́рднѡ послѣ́довалъ є҆сѝ бг҃опрїѧ́тне . всѐ оу҆пражне́нїе попече́нїѧ землена́гѡ є҆ди́ною ѡ҆ста́вль . досто́йнѣ бо го́рнѧгѡ црⷭ҇твїѧ ра́зꙋмъ бл҃гопоко́рнѣ воспрїи́мъ . до́лѣ ревни́тельнагѡ житїѧ̀ , и҆ сла́вы тще́тныѧ ѿстꙋпи́лъ є҆сѝ . благовѣ́стникъ ѿ мытарѧ̀ бы́въ . свѣ́тъ же и҆́же во тмѣ̀ сы́и , и҆ заблꙋ́ждьшимъ наста́вникъ спасе́нїю . ны́нѣ же моли́твеникъ всегѡ̀ ми́ра теплѣ́йшїи , и҆ тебѐ чтꙋ́щихъ матѳе́е храни́тель спасе́ныи .= и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . и҆́=же зва́нныи свы́ше . Нерыда́й менѐ мт҃и ,꙳ зрѧ́щи на крⷭ҇тѣ̀ ви́сима ,꙳ своегѡ̀ сн҃а и҆ бг҃а ,꙳ и҆́же на вода́хъ ѡ҆бѣ́сившаго зе́млю неѡ҆держи́мѡ ,꙳ и҆ всю̀ тва́рь созда́вшаго ,꙳ воста́нꙋ бо и҆ просла́влюсѧ ,꙳ и҆ а҆́дова црⷭ҇тва сокрꙋшꙋ̀ крѣ́постїю ,꙳ и҆ потреблю̀ є҆гѡ̀ си́лꙋ ,꙳ и҆ свѧ́заныѧ и҆зба́влю ѿ ѡ҆ѕлобле́нїѧ є҆гѡ̀ ,꙳ ꙗ҆́кѡ милосе́рдъ ,꙳ и҆ ѻ҆ц҃ꙋ своемꙋ̀ приведꙋ̀ , ꙗ҆́кѡ чл҃колю́бецъ .

На стихо́внѣ , во ѻ҆кта́и . сла́ва . гла́съ , ѕ҃ . И҆з̾ глꙋбины̀ ѕло́бы послѣ́днїѧ , к̾ неи҆зрече́ннѣй высотѣ̀ добродѣ́телей ꙗ҆́кѡ ѻ҆ре́лъ высокопа́рныи , пресла́внѡ восте́клъ є҆сѝ матѳе́е всехва́льне . покры́вшемꙋ нб҃са̀ добродѣ́телїю , и҆ ра́зꙋмомъ свои́мъ всю̀ зе́млю и҆спо́лньшꙋ хрⷭ҇тꙋ̀ послѣ́довавъ стопа́мъ . подо́бникъ ѻ҆́гненыи во все́мъ томꙋ̀ проꙗ҆ви́сѧ . бл҃говѣствꙋ́ѧ ми́ръ , живо́тъ и҆ спасе́нїе , повинꙋ́ющимсѧ бл҃гоче́стнѣ бжⷭ҇твенымъ повелѣ́нїемъ . в̾ ни́хже и҆ на́съ наста́ви , бл҃гоꙋгожда́ти зижди́телю , тебѐ оу҆бл҃жа́ющихъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . В=и́дѧщи тѧ̀ распина́ема , тебѐ хрⷭ҇тѐ ро́ждьшаѧ вопїѧ́ше , что̀ зри́мое сѐ , є҆́же ви́жꙋ та́инство сн҃е мо́й . ка́кѡ на́ древѣ оу҆мира́еши , пло́тїю повѣ́шенъ всѣ́хъ животѐ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , г҃ . А҆пⷭ҇ле ст҃ы́и матѳе́е , молѝ ми́лостиваго бг҃а , да грѣхо́въ ѡ҆ставле́нїе пода́стъ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .=

На оу҆́трени . ѻ҆́ба кано́на , во ѻ҆кта́и . и҆ а҆пⷭ҇лꙋ , на́ ѕ҃ . кано́нъ , гла́съ , д҃ . творе́нїе ѳеѡ́фаново . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́въ : Ст҃ы́и а҆пⷭ҇ле и҆ є҆ѵⷢ҇али́сте матѳе́е , молѝ бг҃а ѡ҆ на́съ .= Бога́тнѡ пода́ждь мѝ все́льшꙋютисѧ бл҃года́ть матѳе́е пресла́вне , и҆ слꙋгѡ̀ хрⷭ҇то́въ . да вопїю̀ свѣ́тлѡ проповѣ́даѧ , и҆ воспою̀ веселѧ́сѧ твоѧ̀ чꙋдеса̀ . =Ѿ =ню́дъ ѡ҆ста́вилъ є҆сѝ землены́хъ смꙋще́нїе . сло́ва ꙗ҆́кѡ оу҆слы́ша вопло́щшагосѧ гла́съ , и҆ бл҃года́ти ꙗ҆ви́сѧ строи́тель , и҆ проповѣ́датель бг҃опрїѧ́тенъ , бг҃обл҃же́нне а҆пⷭ҇ле . Самови́децъ бы́въ а҆пⷭ҇ле и҆ слꙋга̀ восїѧ́вшагѡ сло́ва превѣ́чнагѡ ѻ҆ц҃а . и҆ пред̾теча̀ , є҆гѡ̀ прише́ствїе бл҃говѣствꙋ́ѧ всѣ́мъ ꙗ҆зы́кѡмъ . =боⷢ҇ . Сме́рти потребле́нїе и҆ тлѝ раз̾рꙋше́нїе , жи́зни же ꙗ҆вле́нїе , бл҃говѣсти́лъ є҆сѝ мꙋ́дре . дв҃аѧ бо во оу҆тро́бѣ заче́нши непостижи́маго и҆ ми́ра ѡ҆бновѝ .

пѣ́снь , г҃ . і҆рмо́съ . Твоѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ совокꙋ́пльши дх҃о́венъ оу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы сподо́би . Твоѧ̀ а҆пⷭ҇лы сло́во бж҃їе свѣти́льники показа́лъ є҆сѝ живота̀ , мра́къ ѿгонѧ́ща многобо́жїѧ влⷣко . и҆ бжⷭ҇твеною тѝ сла́вою ми́ра просвѣща́юща . Твои́мъ ѡ҆гради́въ ѻ҆рꙋ́жїемъ матѳе́ѧ сла́внагѡ сп҃се . мꙋчи́телей крѣпча́йша сегѡ̀ содѣ́ѧ влⷣко . и҆ потреби́телѧ показа̀ , и҆́дольскїѧ льстѝ чл҃колю́бче . Ꙗ҆зы́ка твоегѡ̀ ѻ҆́гненагѡ вѣща́нїе , бѣсо́вскїѧ пожжѐ хра́мы , матѳе́е бг҃одх҃нове́нне . оу҆тѣшителе́въ ѻ҆рга́не , и҆́мъ же хрⷭ҇то́съ проповѣ́даетсѧ сло́во превѣ́чное . боⷢ҇ . Трꙋба̀ бг҃огла́сна , вѣща́ющи крѣ́пкѡ , просвѣтѝ лю́ди матѳе́ѧ бг҃омꙋ́драгѡ трⷪ҇чное сїѧ́нїе . па́че оу҆ма́ же воплоще́нїе сло́ва , и҆з̾ тебѐ пречⷭ҇таѧ .

сѣда́ленъ . гла́съ , и҃ . Во всѧ̀ концы̀ протечѐ мꙋ́дрыхъ тѝ глаго́лъ , ꙗ҆́кѡ вои́стинꙋ вѣща́нїе всехва́льне гдⷭ҇нь а҆пⷭ҇ле , бг҃овидѣ́нїе всѣ́мъ ꙗ҆́снѡ проповѣ́да ꙗ҆зы́кѡмъ . ѿ неразꙋ́мїѧ в̾ ра́зꙋмъ приведѐ . тѣ́мже и҆́дольское ѡ҆мраче́нїе ѿгна́въ , свѣ́тъ ра́зꙋма во тмѣ̀ сꙋ́щимъ восїѧ̀ , матѳе́е всехва́льне . молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ . Ꙗ҆́кѡ свѣти́льника свѣ́та и҆ оу҆ченика̀ . ꙗ҆́кѡ самови́дца сло́ва бжⷭ҇твенагѡ , всѝ хва́лимъ тѧ̀ гдⷭ҇нь а҆пⷭ҇ле . и҆́бо бл҃года́тныѧ своѧ̀ мре́жи простира́ѧ , слове́сныѧ ры́бы оу҆ловлѧ́еши повелѣ́нїемъ . тѣ́мже и҆ ꙗ҆зы́цы оу҆ловлѧ́хꙋсѧ си́лою дх҃о́вною наставлѧ́еми вѣ́рою , неботаи́нниче всехва́льне . молѝ хрⷭ҇та̀ бг҃а , грѣхо́въ ѡ҆ставле́нїе дарова́ти чтꙋ́щимъ любо́вїю ст҃ꙋ́ю па́мѧть твою̀ . сла́ва , и҆ ны́нѣ , боⷢ҇ . Ꙗ҆́кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище въ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ .= крⷭ҇тобоⷢ҇ . А҆́=гньца и҆ па́стырѧ и҆ и҆зба́вителѧ , а҆́гница зрѧ́щи на крⷭ҇тѣ̀ , восклица́ше слезѧ́щи . ми́ръ оу҆́бѡ ра́дꙋетсѧ прїе́млѧ тобо́ю и҆збавле́нїе . оу҆тро́ба же моѧ̀ гори́тъ зрѧ́щи твоѐ распѧ́тїе , є҆́же терпи́ши за милосе́рдїе млⷭ҇ти долготерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , оу҆милосе́рдисѧ и҆ да́рꙋй грѣхо́въ ѡ҆ставле́нїе , вѣ́рою воспѣва́ющимъ твоѧ̀ бжⷭ҇твенаѧ страда́нїѧ .

пѣ́снь , д҃ . і҆рмо́с̾ . Неи҆зслѣ́дномꙋ бж҃їю совѣ́тꙋ , є҆́же ѿ дв҃ы воплоще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вопїѧ́ше , сла́ва си́лѣ твое́й гдⷭ҇и . Соста́вномꙋ твоемꙋ̀ сло́вꙋ бж҃е наꙋче́нъ , мирскꙋ́ю мꙋ́дрость разрꙋшѝ бг҃ови́дныи оу҆чени́къ , велегла́снѡ зове́тъ тебѣ̀ , сла́ва си́лѣ твое́й гдⷭ҇и . Оу҆бл҃же́номꙋ бг҃омъ , кꙋ́ю похвалꙋ̀ принесе́мъ тебѣ̀ бг҃огла́се . немо́жетъ бо зе́мленъ сла́вныѧ тѝ бл҃года́ти , сло́вомъ и҆з̾рещѝ пречꙋ́дныи . Нескве́рнагѡ тѝ и҆ чⷭ҇тагѡ оу҆ма̀ ви́дѣвъ вы́шнїи , ꙗ҆́кѡ свѣщꙋ̀ на свѣ́щникъ высо́кїи сꙋ́щимъ во тмѣ̀ свѣтѧ́щꙋ , всѣ́мъ бг҃оꙗ҆вле́нне пред̾ложѝ . боⷢ҇ . Смире́ное є҆стество̀ земны́хъ , бл҃гослове́наѧ воз̾дви́гла є҆сѝ . ꙗ҆́кѡ вы́шнѧгѡ ро́ждьшаѧ крѣ́пость па́че є҆стества̀ всепѣ́таѧ ѻ҆трокови́це , ꙗ҆́коже матѳе́й наꙋчѝ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща . Бл҃года́ть прїе́мъ прест҃а́гѡ дх҃а , бжⷭ҇твеное ѻ҆би́телище показа́сѧ . бжⷭ҇твенѡ наꙋчи́въ бг҃оразꙋ́мїѧ свѣ́тꙋ , порꙋче́нъ повелѣ́нїѧ хрⷭ҇то́ва словесы̀ и҆з̾ложи́ти , ꙗ҆́кѡ самови́децъ бг҃ои҆збра́нныи . Ꙗ҆зы́къ тво́й тро́сть оу҆тѣ́шителева бы́сть , бжⷭ҇твеное и҆збавле́нїе даю́щи разꙋмѣ́вшимъ влⷣчество є҆гѡ̀ , и҆ сво́й ды́шꙋщи дш҃а́мъ ра́зꙋмъ нбⷭ҇ныи , ѽ матѳе́е прехва́льне . Сїѧ́юща чꙋдесы̀ и҆ и҆сцѣле́нїи бл҃года́тїю тѧ̀ хрⷭ҇то́съ посла̀ ми́рови бѣсо́вскꙋю попира́юща крѣ́пость . и҆ дш҃а просвѣща́юща вѣ́рныхъ , всѣ́хъ пою́щихъ тѧ̀ смире́нїю проповѣ́дника . боⷢ҇ . Дв҃ою родила̀ є҆сѝ сн҃а превѣ́чнаго , в̾ є҆стество̀ ѡ҆бо́лкшасѧ чл҃ческое , ꙗ҆́коже наꙋча́етъ бг҃огла́сныи на́съ , и҆ спа́сшаго сїѐ ѿ тлѧ̀ коне́чною бл҃госты́нею , и҆ дв҃ою пребы́сть .

пѣ́снь , ѕ҃ . і҆рмо́съ . Прїидо́хъ во глꙋбины̀ морскі́ѧ , и҆ потопи́ла мѧ є҆́сть бꙋ́рѧ мно́гихъ ми прегрѣше́нїи . но ꙗ҆́кѡ бг҃ъ , и҆з̾ тлѝ воз̾ведѝ живо́тъ мо́й многомлⷭ҇тиве . Бл҃говѣ́стникъ и҆з̾ мы́тницы ꙗ҆́кѡ послѣ́дова тебѣ̀ , претвори́сѧ бг҃огла́сныи , всеси́льною твое́ю всѣ́хъ содѣ́телю крѣ́постїю , матѳе́й всеи҆збра́нныи . Наставлѧ́етсѧ твои́мъ благовѣ́стїемъ дш҃епита́тельными словесы̀ , ꙗ҆зы́къ мно́жество , воз̾выша́емо к̾ добродѣ́тельнымъ высо́комꙋ верхꙋ̀ , ѽ матѳе́е всебл҃же́нне . Матѳе́ѡвыма оу҆ловлѧ́етсѧ бжⷭ҇твеными словесы̀ оу҆ченика̀ мре́жами , собо́рища вѣ́рꙋющихъ всегда̀ , къ твоемꙋ̀ разꙋмѣ́нїю бл҃года́телю наставлѧ́еми . боⷢ҇ . Дв҃ою ро́ждьшꙋю восписꙋ́ѧ , бл҃говѣствꙋ́етъ тебѐ всѧ́ческаѧ сотво́ршаго , без̾ сѣ́мене и҆ без̾ тлѧ̀ всенепоро́чнаѧ , матѳе́й приснопа́мѧтныи .

конда́къ . гла́съ , в҃ . Мыта́рское и҆́го ѿве́рглъ , пра́вды и҆́го воспрїѧ́лъ є҆сѝ , и҆ показа́сѧ кꙋпе́цъ предо́брыи , бога́тство прїе́мъ є҆́же с̾ вы́ше премꙋ́дрость . ѿ ню́дꙋ же проповѣ́да и҆́стинное сло́во . и҆ лѣни́выхъ воз̾дви́глъ є҆сѝ дш҃а написа́въ ча́съ сꙋ́дныи . и҆́косъ . Вра́жїе мꙋчи́тельство , нꙋ́дитъ мѧ̀ несы́тнѡ и҆ дш҃и мое́й всѧ̀ плоды̀ восхища́етъ , матѳе́е дрꙋ́же хрⷭ҇то́въ . но са́мъ пло́дъ мл҃твъ твои́хъ да́ждь мѝ , къ своемꙋ̀ слꙋже́нїю восхити́въ , и҆ ꙗ҆вѝ пѣвца̀ себѣ̀ ма́лаго , и҆ сказа́телѧ мно́гихъ тѝ и҆ вели́кихъ и҆справле́нїи . и҆ ко хрⷭ҇то́вѣ любвѝ , ка́кѡ всѧ̀ а҆́бїе ѡ҆ста́вивъ послѣ́довалъ є҆сѝ те́плѣ зва́вшемꙋ , пе́рвыи бы́въ бл҃говѣ́стникъ въ ми́рѣ , восписꙋ́ѧ ча́съ сꙋ́дныи .

пѣ́снь , з҃ . і҆рмо́съ . Непослꙋжи́ша тва́ри бг҃омꙋ́дрїи па́че зижди́телѧ , но ѻ҆́гненное преще́нїе , мꙋ́жески попра́вше ра́довахꙋсѧ пою́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Бы́лъ є҆сѝ пе́рвагѡ сїѧ́нїѧ бжⷭ҇твеное и҆з̾ѡ҆браже́нїе , ꙗ҆́кѡ оу҆чени́къ тогѡ̀ свѣтлостьмѝ распалѧ́емь . є҆мꙋ́же поѧ̀ гл҃аше , препѣ́тыи ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Ꙗ҆́кѡ слꙋга̀ сло́вꙋ всебл҃же́нне , въ бжⷭ҇твеныѧ ѻ҆би́тели , и҆дѣ́же хрⷭ҇то́съ ѻ҆бита́етъ ты̀ всели́сѧ . ꙗ҆́коже тѝ ѡ҆бѣща̀ пребжⷭ҇твеныи ѻ҆ц҃ъ на́шихъ бг҃ъ бл҃гослове́ныи . Недꙋ́зи матѳе́е ѿго́нѧтсѧ , и҆ ѿбѣга́етъ мно́жество бѣсо́вское твои́хъ дарова́нїй бжⷭ҇твенагѡ дх҃а . в̾ ни́хже поѧ́ше препѣ́тыи , ѻ҆ц҃ъ на́шихъ бж҃е бл҃гослове́нъ є҆сѝ . боⷢ҇ . Всепѣ́тꙋю дв҃ꙋ сказа́лъ є҆сѝ бжⷭ҇твеными тѝ словесы̀ , творца̀ всѣ́хъ ро́ждьшꙋю а҆пⷭ҇ле . є҆мꙋ́же всѝ пое́мъ , препѣ́тыи , ѻ҆ц҃ъ на́шихъ бж҃е бл҃гослове́нъ є҆сѝ .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Призира́нїемъ к̾ тебѣ̀ не ѡ҆сла́бнымъ матѳе́й сщ҃е́нныи ѡ҆божа́емь . положе́нїемъ же бы́въ , є҆стество́мъ є҆́же и҆ бы́лъ є҆́сть . вселе́ннꙋю влⷣко привлечѐ пѣ́ти тѧ̀ гдⷭ҇а , по́йте , и҆ превозноси́те є҆гѡ̀ во́ вѣки . Ꙗ҆́коже мо́лнїю вселе́ннѣй , сло́во бг҃огл҃иваго посла̀ . мра́къ оу҆́бѡ ѿгонѧ́ща , ꙗ҆зы́ки же просвѣща́юща . тѣ́мже и҆ пое́мъ гдⷭ҇а , по́йте , и҆ превозноси́те є҆гѡ̀ во́ вѣки . Сло́вомъ чи́стымъ и҆ видѣ́нїемъ , бг҃ъ с̾ тобо́ю бесѣ́довалъ є҆́сть . ве́щна оу҆́бѡ ꙗ҆́кѡ пресѣчѐ . к̾ семꙋ̀ прибли́жисѧ и҆ примѣси́сѧ сла́вне . тѣ́мже поѧ́ше , гдⷭ҇а по́йте дѣ́ла , и҆ превозноси́те є҆гѡ̀ во́ вѣки . боⷢ҇ . На бл҃годѣѧ́нїе чл҃кѡмъ сло́во воплоти́тисѧ и҆зво́ли . две́рь оу҆́бѡ дѣ́вства про́йде гдⷭ҇ь , и҆ бцⷣꙋ показа̀ . є҆мꙋ́же ны́нѣ зове́мъ , гдⷭ҇а по́йте , и҆ превозноси́те є҆гѡ̀ во́ вѣки .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃омъ просвѣща́емъ . да ликовствꙋ́етъ же , беспло́тныхъ оу҆мо́въ є҆стество̀ , почита́ѧ ст҃о́е торжество̀ бж҃їѧ мт҃ре . и҆ да пое́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Добро́ты разꙋ́мныѧ прїѧ́тъ оу҆вѧзе́нїе , бжⷭ҇твеныи а҆пⷭ҇ле . и҆ црⷭ҇твїѧ же бл҃голѣ́пнагѡ вѣнце́мъ оу҆краси́сѧ , десни́цею вседержи́телевою . и҆ свѣ́тишисѧ мꙋ́дре , со а҆́нг҃лы прⷭ҇то́лꙋ пред̾стоѧ̀ влⷣки хрⷭ҇та̀ , всебл҃же́нне . Дре́ва живо́тнагѡ досто́йнѡ полꙋчѝ , проповѣ́дникъ жива́гѡ бг҃а . бл҃говѣсти́въ живо́тъ ми́рови , бжⷭ҇твеное посѣще́нїе . и҆́бо са́домъ разꙋ́мнымъ нерастлѣ̀ оу҆́мъ . пребы́въ крѣ́покъ и҆ непоколеби́мъ , цр҃кви степе́нь всебл҃же́нне . Невѣ́стꙋ хрⷭ҇то́вꙋ бжⷭ҇твенѡ оу҆краси́лъ є҆сѝ бл҃говѣ́щенїемъ си , ꙗ҆́кѡ оу҆вѧзе́нїемъ цр҃ковь бг҃обл҃же́нне . и҆ ны́нѣ бжⷭ҇твенꙋю ти па́мѧть торжествꙋ́етъ свѣ́тлѡ . ю҆́же и҆зба́вити всѧ́кїѧ напа́сти молѝ , матѳе́е а҆пⷭ҇ле . боⷢ҇ . Нѣ́дръ не ѿстꙋ́пль без̾нача́льна роди́телѧ , сло́во без̾нача́льное , ꙗ҆́коже бл҃говѣствꙋ́етъ матѳе́й бг҃омт҃и , воплоти́сѧ и҆з̾ тебѐ чⷭ҇таѧ всепѣ́таѧ , в̾ чл҃чь ѻ҆́бразъ всеѡ҆бра́знѡ ве́сь ѡ҆дѣ́ѧвсѧ , и҆ тогѡ̀ прїе́мъ сво́йства .

свѣти́ленъ . Сказа̀ на́мъ бжⷭ҇твенаѧ чꙋдодѣѧ́нїѧ , сла́вныи хрⷭ҇то́ва є҆ѵⷢ҇а́лїѧ списа́тель матѳе́й бг҃опрїѧ́тныи . є҆го́же любо́вїю чтꙋ́ще , бл҃госочета́ннѡ воспое́мъ . сла́ва , и҆ ны́нѣ , боⷢ҇ . На тѧ̀ с̾ бг҃омъ надѣ́емсѧ пречи́стаѧ , и҆́же и҆з̾ тебѐ проше́дша с̾распина́емїи хрⷭ҇тꙋ̀ и҆́же к̾ немꙋ̀ мл҃твами тѝ , без̾ собла́знъ на́съ соблюдѝ .

На хвали́тѣхъ , стⷯры . гла́съ , д҃ . поⷣ . ꙗ҆́кѡ до́блѧ .= Слове́сною ти трꙋбо́ю ,꙳ чл҃ки совокꙋпи́лъ є҆сѝ ,꙳ в̾ бж҃їи ра́зꙋмъ прⷭ҇нопа́мѧтне .꙳ и҆ пре́лестнаѧ собра́нїѧ ,꙳ ѿ землѝ ѿгна́лъ є҆сѝ ,꙳ и҆ во є҆ди́нѡ вѣ́рныхъ совокꙋпле́нїе собра̀ .꙳ и҆ мл҃твами твои́ми ,꙳ ѿ тлѧ̀ и҆ бѣ́дъ и҆збавлѧ́еши ,꙳ и҆́же вѣ́рою соверша́ющихъ при́снѡ ,꙳ честнꙋ́ю ти па́мѧть . =двⷤа . И҆́же ꙗ҆зы́кѡмъ тѧ̀ ѻ҆́гненымъ ,꙳ ѡ҆гради́въ дх҃о́внымъ ,꙳ крѣ́пка показа́ тѧ борца̀ без̾бо́жїю а҆пⷭ҇ле ,꙳ хрⷭ҇то́съ бг҃ъ на́шъ .꙳ и҆́мже прїѧ́тъ свѣ́тлыѧ ,꙳ по́чести бл҃года́ти .꙳ є҆го́же молѝ ,꙳ ѿ тлѧ̀ и҆ бѣ́дъ и҆зба́вити ,꙳ вѣ́рою соверша́ющихъ прⷭ҇нѡ ,꙳ чⷭ҇тнꙋ́ю ти па́мѧть . вⷤ .

сла́ва . гла́съ , и҃ . Воспле́щемъ в̾ пѣ́снехъ дне́сь вѣ́рнїи , ѡ҆ па́мѧти чⷭ҇тна́гѡ а҆пⷭ҇ла и҆ є҆ѵⷢ҇али́ста матѳе́ѧ . то́й бо пове́рглъ и҆́го ѕлатомыта́рства , и҆ послѣ́дова хрⷭ҇тꙋ̀ . и҆ проповѣ́дникъ є҆ѵⷢ҇а́лїю бжⷭ҇твеныи бы́сть . тѣ́мже и҆зы́де проро́чески вѣща́нїе є҆гѡ̀ во вселе́ннꙋю . и҆ мо́литъ спасти́сѧ дш҃а́мъ на́шимъ . =и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . ѽ =пресла́вное чꙋ́до . Что̀ ви́димое чꙋ́до ,꙳ є҆́же ѻ҆чи́ма мои́ма ,꙳ зри́тсѧ ѽ влⷣко ,꙳ содержа́и всю̀ тва́рь ,꙳ на́ древѣ распина́ешисѧ ,꙳ и҆ оу҆мерщвѧ́ешисѧ всѣ́мъ даѧ́и жи́знь ,꙳ бцⷣа пла́чꙋщи глаго́лаше ,꙳ є҆гда̀ оу҆зрѣ̀ на крⷭ҇тѣ̀ ви́сима ,꙳ и҆́же и҆з̾ неѧ̀ неи҆зрече́ннѡ восїѧ́вша бг҃а и҆ чл҃ка .

На стихо́внѣ , во ѻ҆кта́и . сла́ва . гла́съ , в҃ . И҆́го ѡ҆ста́вль непра́вды , и҆ зла́то ѿве́рглъ лихои҆ма́нїѧ , и҆ и҆́гꙋ пра́ведномꙋ прири́щеши , неи҆стоща́емо бога́тство похища́еши . ꙗ҆́кѡ мꙋдроꙋ́мныи кꙋпе́цъ и҆з̾мѣни́въ вре́менными вѣ́чнаѧ и҆ погиба́ющими пребыва́ющаѧ . бг҃осїѧ́ннаго бо и҆ многоцѣ́ннаго би́сера стѧжа́въ . и҆ кесаре́ва кесаре́ви до́лꙋ влекꙋ́щаѧ мꙋдри́тельнаѧ ѡ҆ста́вилъ є҆сѝ , и҆ ве́сь цр҃ю бл҃гопоко́рнѣ послѣ́довавъ хрⷭ҇то́ви всю̀ тва́рь ѡ҆богати́лъ є҆сѝ , є҆ѵⷢ҇а́льскими бг҃огл҃аньми мꙋ́дре . но и҆спросѝ нн҃ѣ матѳе́е всече́стне , и҆́же тебѐ чтꙋ́щимъ спасе́нїе и҆ ве́лїю ми́лость .

и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . є҆гда̀ ѿ́ древа . На́древѣ крⷭ҇тнѣмъ тѧ і҆с҃е просте́рта , зрѧ́щи неи҆скꙋсобра́чнаѧ , пла́каше и҆ гл҃аше , ча́до моѐ , вскꙋ́ю ѡ҆ста́вилъ є҆сѝ менѐ ро́ждьшꙋю тѧ є҆ди́нꙋ . свѣ́те непристꙋ́пныи пребезнача́льнагѡ ѻ҆ц҃а , оу҆скорѝ и҆ просла́висѧ , ꙗ҆́кѡ да сла́вꙋ полꙋча́тъ бжⷭ҇твенꙋю , и҆́же бжⷭ҇твеныѧ стра́сти твоѧ̀ сла́вѧщїи .

На литꙋргі́и . проки́менъ , ѱл҃о́мъ дв҃довъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ . сти́хъ . нб҃са̀ повѣ́даютъ сла́вꙋ бж҃їю , творе́нїе же рꙋ́кꙋ є҆гѡ̀ возвѣща́етъ тве́рдь . а҆пⷭ҇лъ , к̾кори́нфомъ . заⷱ҇ , рл҃а .= а҆ллилꙋ́їѧ . и҆сповѣ́дѧтъ нб҃са̀ чꙋдеса̀ твоѧ̀ гдⷭ҇и , и҆́бо и҆́стинꙋ твою̀ в̾ цр҃кви ст҃ы́хъ . =є҆ѵⷢ҇а́лїе , ѿ =матѳе́ѧ . заⷱ҇ , л҃ . =прича́стенъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ .

Слꙋ́жба ст҃о́мꙋ сщ҃енномч҃нкꙋ ѵ҆па́тїю , є҆пкⷭ҇пꙋ га́нгрьскомꙋ . Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на́ ѕ҃ . гла́съ , и҃ . поⷣ . ѽ пресла́вное чꙋ́до . ѽ =пресла́вное чꙋ́до ,꙳ ꙗ҆́кѡ многого́рдыѧ оу҆мы̀ ,꙳ без̾стꙋ́днѡ мꙋдрѧ́щїѧсѧ ,꙳ посрами́лъ є҆сѝ бл҃же́нне ст҃лю .꙳ трⷪ҇ческимъ ра́зꙋмомъ ꙳ є҆́реси погꙋби́лъ є҆сѝ без̾бо́жїѧ .꙳ сто́лпъ бы́сть правовѣ́ренъ .꙳ и҆ оу҆чи́тель дх҃о́внѡ наставлѧ́ѧ на́съ ,꙳ на нбⷭ҇наѧ тече́нїѧ свои́ми проповѣ́данїи . Оу҆крѣ́пльсѧ си́лою хрⷭ҇то́вою ,꙳ пред̾ста̀ сꙋдѧ́щемꙋ без̾зако́нно .꙳ и҆ побѣдѝ мꙋчи́телѧ ,꙳ многостра́стныѧ мꙋ́ки терпѧ̀ .꙳ ѻ҆гне́мъ бо тѣ́ло твоѐ и҆ста́емо ,꙳ ꙗ҆́вльшесѧ невре́дно соблюда́емо ,꙳ ѡ҆чища́емо ѿ хрⷭ҇та̀ ꙳ ꙗ҆́кѡ ѕла́то въ горни́лѣ .꙳ ны́нѣ же ликꙋ́еши со а҆́нг҃лы водворѧ́ѧсѧ . Ѽле ди́вныи ст҃лю ѵ҆па́тїе ,꙳ ка́плѧми крове́й твои́хъ ,꙳ ꙗ҆́кѡ ѕвѣзда́ми небосїѧ́нными ꙳ на тве́рди цр҃ко́внѣй оу҆кра́шенъ бы́сть .꙳ ты́ бо ѿ дш҃и воз̾люби́лъ є҆сѝ хрⷭ҇та̀ .꙳ и҆́же тридне́вно и҆з̾ ме́ртвыхъ воскрⷭ҇ша проповѣ́да .꙳ є҆го́же ра́ди пострада́въ мно́гїѧ мꙋ́ки .꙳ и҆ црⷭ҇твꙋеши с̾ ни́мъ ꙳ молѧ́сѧ є҆мꙋ̀ заны̀ . ѽле па́че оу҆ма̀ моегѡ̀ оу҆́жасъ .꙳ немꙋ́дростїю бо хвалѧ́сѧ ,꙳ но любо́вїю вѣ́рною ,꙳ похва́льнꙋю пѣ́снь приношꙋ́ти ,꙳ сщ҃енномч҃нче ст҃лю ѵ҆патїе .꙳ кі́ѧ оу҆́бѡ досто́йны хвалы̀ принесꙋ̀ тебѣ̀ .꙳ ка́кѡ ли и҆з̾рекꙋ̀ мно́гаѧ твоѧ̀ страда́нїѧ .꙳ ты́ бо на землѝ ꙗ҆́кѡ а҆́нг҃лъ , на́ нб҃сѣхъ же моли́сѧ хрⷭ҇тꙋ̀ ,꙳ да спасе́тъ дш҃а на́ша .

сла́ва . гла́съ , ѕ҃ . Сїѧ́етъ дне́сь ꙗ҆́кѡ свѣ́тлое сл҃нце , чⷭ҇тно́е торжество̀ сла́внагѡ стрⷭ҇тоте́рпца хрⷭ҇то́ва ѵ҆па́тїѧ . и҆ собо́ръ вѣ́рныхъ весели́тсѧ , хвалѧ̀ пѣ́сньми хрⷭ҇та̀ бг҃а . и҆ собо́ръ без̾зако́нныхъ разрꙋши́сѧ , ви́дѧ стрⷭ҇тоте́рпческꙋю па́мѧть сла́вимꙋ . тогѡ̀ ны́нѣ пла́четсѧ вселꙋка́выи вра́гъ . мы́же є҆мꙋ̀ возопїе́мъ , ст҃лю хрⷭ҇то́въ ѵ҆па́тїе , моли́сѧ хрⷭ҇тꙋ̀ бг҃ꙋ ѡ҆ дш҃а́хъ на́шихъ .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невоспѣва́етъ твоегѡ̀ пречи́стагѡ ржⷭ҇тва̀ ; без̾лѣ́тныи бо ѿ ѻ҆ц҃а возсїѧ́въ сн҃ъ є҆диноро́дныи , то́й же ѿ тебѐ чⷭ҇тыѧ про́йде , несказа́ннѡ вопло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двою̀ лицꙋ̀ раздѣлѧ́емъ . но во двою̀ є҆стествꙋ̀ несмѣ́сно познава́емъ . тогѡ̀ молѝ чи́стаѧ и҆ всебл҃же́ннаѧ , поми́ловатисѧ дш҃а́мъ на́шим̾ . та́же , вы́ходъ . проки́менъ , дню̀ .

Ѿ при́тчей , чте́нїе .

Па́мѧть пра́веднагѡ с̾ похвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрость , и҆ сме́ртенъ и҆́же оу҆вѣ́дѣ ра́зꙋмъ . лꙋ́чше бо сїю̀ кꙋпова́ти , не́жели зла́та и҆ сребра̀ сокро́вища . честнѣ́йши бо є҆́сть ка́менїѧ многоцѣ́нна , все́же чⷭ҇тно́е , недосто́йнѡ є҆́сть є҆́й . долгота́ бо дні́й , и҆ лѣ́та живота̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бога́тство и҆ сла́ва . ѿ оу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . послꙋ́шайте оу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ моѧ̀ храни́тъ . и҆схо́ди бо моѝ , и҆схо́ди живота̀ , и҆ оу҆гото́ваетсѧ хотѣ́нїе ѿ́ гдⷭ҇а . сегѡ̀ ра́ди молю̀ ва́съ , и҆ пред̾лага́ю мо́й гла́съ сн҃ово́мъ чл҃ческимъ . ꙗ҆́кѡ а҆́зъ премꙋ́дрость всели́хъ , совѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й совѣ́тъ и҆ оу҆тверже́нїе , мо́й ра́зꙋмъ , моѧ́ же крѣ́пость . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃года́ть . разꙋмѣ́йте оу҆́бѡ неѕло́бивїи кова́рство , ненака́занїи же прилага́йте срⷣца̀ . послꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ оу҆сте́нъ мои́хъ пра́вдꙋ . ꙗ҆́кѡ и҆́стинѣ поꙋча́етсѧ горта́нь мо́й , ме́рзски же предо мно́ю оу҆стны̀ лжи́выхъ . с̾ пра́вдою всѝ гл҃ы оу҆́стъ мои́хъ , ни что́же в̾ ни́хъ стро́потно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ премꙋ́дрости соло́мони , чте́нїе .

=Ѿ =оу҆́стъ пра́веднагѡ и҆ска́плетъ премꙋ́дрость , оу҆стны́ же мꙋ́жь мꙋ́дрыхъ вѣ́дѧтъ дарова́нїѧ . оу҆ста̀ мꙋ́дрыхъ поꙋча́тсѧ премꙋ́дрости , пра́вда же и҆збавлѧ́етъ ѿ сме́рти . сконча́вшꙋжесѧ мꙋ́жꙋ пра́веднꙋ , неоу҆ма́литсѧ наде́жда . сн҃ъ бо пра́веденъ ражда́етсѧ в̾ живо́тъ , и҆ во бл҃ги́хъ свои́хъ , пло́дъ пра́ведныи ѡ҆бъе́млетъ . свѣ́тъ пра́веднымъ всегда̀ , и҆ ѿ́ гдⷭ҇а ѡ҆брѧ́щꙋтъ бл҃года́ть и҆ сла́вꙋ . ꙗ҆зы́къ мꙋ́дрыхъ до́браѧ вѣ́сть , и҆ в̾ срⷣцы и҆́хъ почі́етъ премꙋ́дрость . лю́битъ гдⷭ҇ь прпⷣбныѧ срⷣца̀ , прїѧ́тни же є҆мꙋ̀ всѝ непоро́чнїи в̾ пꙋ́ть . мꙋ́дрость гдⷭ҇нѧ , просвѣща́етъ лицѐ разꙋ́мнагѡ . варѧ́етъ бо жела́ющихъ ю҆̀ , пе́рвїе разꙋмѣ́тисѧ , и҆ оу҆до́бь оу҆́зритсѧ ѿ лю́бѧщимъ є҆ѧ̀ . оу҆́треневавыи к̾ не́й , не оу҆трꙋди́тсѧ , и҆ бдѧ̀ є҆ѧ̀ ра́ди , ско́рѡ беспеча́ли бꙋ́детъ . ꙗ҆́кѡ досто́йныѧ себѣ̀ та̀ ѡ҆б̾хо́дитъ и҆́щꙋщи . и҆ во стезѧ́хъ ꙗ҆влѧ́етсѧ и҆́мъ бл҃гопотре́бна . премꙋ́дрости не оу҆долѣ́етъ когда̀ ѕло́ба . си́хъ ра́ди и҆ рачи́тель бы́хъ добро́тѣ є҆ѧ̀ . и҆ возлюби́хъ сїю̀ и҆ в̾зыска́хъ ѿ ю҆́ности моеѧ̀ . и҆ по и҆ска́хъ невѣ́стꙋ в̾вестѝ себѣ̀ , ꙗ҆́кѡ всѣ́хъ влⷣка возлюбѝ ю҆̀ . оу҆чи́тельница бо є҆́сть бж҃їю ра́зꙋмꙋ , и҆ ѡ҆брѣта́тельница дѣ́ломъ є҆гѡ̀ . тоѧ̀ сꙋ́ть добрѝ нра́вы . цѣломꙋ́дрїю бо и҆ ра́зꙋмꙋ сїѧ̀ оу҆чи́тъ , пра́вдѣ же и҆ мꙋ́жествꙋ , и҆́хже потре́бнѣе ни что́же є҆́сть в̾ житїѝ чл҃кѡмъ . а҆́щели же и҆ мно́гомꙋ и҆мѣ́нїю хо́щетъ кто̀ , да вѣ́сть пе́рваѧ и҆ бꙋ́дꙋщаѧ раз̾смотри́ти . свѣ́сть и҆з̾ви́тїе слове́съ , и҆ рѣше́нїѧ гада́нїемъ . зна́менїѧ и҆ чꙋдеса̀ проразꙋмѣ́ти и҆з̾ бытїѧ̀ време́нъ и҆ лѣ́томъ , и҆ всѣ́мъ совѣ́тникъ є҆́сть бл҃гъ . ꙗ҆́кѡ без̾сме́ртїе є҆́сть в̾ не́й , и҆ бл҃гозва́нїе во ѡ҆бще́нїи слове́съ є҆ѧ̀ . сегѡ̀ ра́ди рѣ́хъ гдⷭ҇ви , и҆ помоли́хсѧ є҆мꙋ̀ , и҆ рѣ́хъ всѣ́мъ срⷣцемъ мои́мъ . Бж҃е ѻ҆ц҃ъ и҆ гдⷭ҇и млⷭ҇ти , сотвори́выи всѧ̀ сло́вомъ свои́мъ , и҆ мꙋ́дростїю свое́ю оу҆стро́ивыи чл҃ка , да владѣ́етъ надо всѣ́ми тобо́ю бы́вшими тварьмѝ , и҆ назира́етъ ми́ръ прпⷣбїемъ и҆ пра́вдою . да́ждь ми ѿ твои́хъ престо́лъ намѣ́стницꙋ премꙋ́дрость , и҆ не ѿлꙋчѝ менѐ ѿ ѻ҆́трокъ твои́хъ , ꙗ҆́кѡ а҆́зъ ра́бъ тво́й , и҆ сн҃ъ рабы̀ твоеѧ̀ . послѝ ю҆̀ ѿ ст҃а́гѡ жили́ща твоегѡ̀ , и҆ ѿ прⷭ҇то́ла сла́вы твоеѧ̀ , да прише́дши ко мнѣ̀ наꙋчи́тъ мѧ , что̀ оу҆го́дно є҆́сть пред̾ тобо́ю . и҆ наста́витъ мѧ в̾ ра́зꙋмъ , и҆ сохрани́тъ мѧ сла́вою свое́ю . помышле́нїѧ бо сме́ртныхъ всѝ оу҆жа́сни , и҆ затворе́на оу҆мышле́нїѧ и҆́хъ .

Ѿ премꙋ́дрости соло́мони , чте́нїе .

Похвалѧ́емꙋ пра́ведникꙋ , воз̾веселѧ́тсѧ лю́дїе . без̾сме́ртїе бо є҆́сть па́мѧть є҆гѡ̀ , ꙗ҆́кѡ ѿ́ гдⷭ҇а познава́етсѧ и҆ ѿ чл҃къ , и҆ оу҆го́дна гдⷭ҇ви дш҃а є҆гѡ̀ .= =возлюби́те оу҆́бѡ мꙋ́дрость , и҆ поживетѐ . восхощи́те є҆ѧ̀ , и҆ нака́зани бꙋ́дете . нача́ло бо є҆ѧ̀ любы̀ , и҆ соблюде́нїе зако́нꙋ . почти́те премꙋ́дрость , да во́ вѣки црⷭ҇твꙋете . возвѣщꙋ̀ ва́мъ , и҆ нескры́ю ѿ ва́съ та́инъ бж҃їихъ . ꙗ҆́кѡ то́й мꙋ́дрости наста́вникъ є҆́сть , и҆ мꙋ́дрыхъ и҆спра́витель , и҆ всѧ́кꙋ смы́слꙋ и҆ дѣ́лꙋ хитре́цъ , и҆ всѣ́мъ смы́сломъ наꙋчи́тъ мꙋ́дрость . є҆́сть бо в̾ не́й дх҃ъ разꙋ́менъ и҆ ст҃ъ , и҆ сїѧ́нїе свѣ́та присносꙋ́щнагѡ , и҆ ѻ҆́бразъ бл҃гости бж҃їѧ . та̀ и҆ дрꙋ́ги бж҃їѧ и҆ пррⷪ҇ки оу҆строѧ́етъ . бл҃голѣ́пнѣйши є҆́сть сл҃нца , и҆ па́че сотворе́нїѧ ѕвѣ́здъ свѣ́томъ сказа́ема ѡ҆брѣта́етсѧ пе́рвѣйши . та̀ оу҆гожда́ющимъ є҆́й ѿ болѣ́зней и҆збавлѧ́етъ , и҆ наста́витъ на стезѝ пра́вы , и҆ да́стъ и҆́мъ ра́зꙋмъ и҆мѣ́ти ст҃ы́хъ , и҆ сохрани́тъ ѧ҆̀ ѿ ловѧ́щихъ , по́двигъ крѣ́покъ пода́стъ и҆́мъ . да разꙋмѣ́ютъ всѝ ꙗ҆́кѡ си́льнѣйши є҆́сть всегѡ̀ бл҃гоче́стїе , и҆ непремо́жетъ ѕло́ба ни коли́же мꙋ́дрости , ни пре́йдетъ ѕлы́ѧ ѡ҆блича́ющи сꙋ́дъ . реко́ша же в̾ себѣ̀ помы́сливше непра́веднѡ , наси́льствꙋемъ пра́ведномꙋ , и҆ непощади́мъ преподо́бства є҆гѡ̀ , ни оу҆срами́мсѧ сѣди́нъ ста́рости многолѣ́тны , бꙋ́детъ бо на́мъ крѣ́пость зако́нꙋ . и҆ оу҆лови́мъ пра́веднаго , ꙗ҆́кѡ не оу҆го́денъ на́мъ є҆́сть , и҆ сопроти́витсѧ дѣло́мъ на́шимъ , и҆ поно́ситъ на́мъ ѿпаде́нїе зако́на , и҆ ѡ҆блича́етъ на́мъ согрѣше́нїѧ наказа́нїѧ на́шегѡ . возвѣща́етъ на́мъ ра́зꙋмъ и҆мѣ́ти бж҃їи , и҆ ѻ҆́трока гдⷭ҇нѧ себѐ и҆менꙋ́етъ , и҆ бы́сть на ѡ҆бличе́нїе помышле́нїемъ на́шимъ , и҆ тѧ́жекъ на́мъ є҆́сть . и҆ ви́димъ ꙗ҆́кѡ неподо́бнѡ и҆нѣ́мъ житїѐ є҆гѡ̀ , и҆ и҆змѣнены̀ стезѝ є҆гѡ̀ . въ порꙋга́нїе вмѣни́хомсѧ є҆мꙋ̀ , и҆ оу҆далѧ́етсѧ ѿ пꙋте́й на́шихъ ꙗ҆́кѡ ѿ нечисто́тъ , и҆ блажи́тъ послѣ́днѧѧ пра́ведныхъ . ви́димъ оу҆́бѡ а҆́ще словеса̀ є҆гѡ̀ и҆́стина сꙋ́ть , и҆ оу҆смо́тримъ сбытїѧ̀ є҆гѡ̀ . рꙋга́нїемъ и҆ мꙋ́кою и҆стѧ́жемъ є҆гѡ̀ . да разꙋмѣ́емъ кро́тость є҆гѡ̀ , и҆ и҆скꙋ́симъ без̾ѕло́бство є҆гѡ̀ , сме́ртїю без̾ѡ҆бра́зною ѡ҆сꙋ́димъ є҆гѡ̀ , бꙋ́детъ бо посѣще́нїе ѿ слове́съ є҆гѡ̀ . сїѧ̀ помы́слиша и҆ прельсти́шасѧ , ѡ҆слѣпи́ бо и҆́хъ ѕло́ба и҆́хъ , и҆ неразꙋмѣ́ша та́инъ бж҃їихъ . и҆ неразсꙋди́ша ꙗ҆́кѡ ты̀ є҆сѝ бг҃ъ є҆ди́нъ животꙋ̀ и҆мѣ́ѧи и҆ сме́рти вла́сть , и҆ спаса́ѧ во́ времѧ ско́рби , и҆ и҆збавлѧ́ѧи ѿ всѧ́кагѡ ѕла̀ , ще́дръ и҆ млⷭ҇тивъ даѧ̀ преподо́бнымъ свои́мъ бл҃года́ть , и҆ свое́ю мы́шцею го́рдымъ противлѧ́ѧсѧ .

На стихо́внѣ , стⷯры . гла́съ , а҃ . Ѽ ди́вное чꙋ́до , и҆сто́чникъ оу҆че́нїѧ на ѻ҆гнѝ и҆спека́етсѧ , и҆ лѣ́ствица на́ нб҃о ме́чь быва́етъ . весели́сѧ ѵ҆па́тїе , трⷪ҇цѣ побо́рникъ бы́въ красе́нъ . нѣ́сть и҆́нъ ꙗ҆́коже ты̀ ѿ землѝ ст҃ль бг҃опрїѧ́тенъ ѵ҆па́тїе . ра́дꙋисѧ , с̾ тобо́ю гдⷭ҇ь , подаѧ̀ ми́рови ве́лїю ми́лость .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ѽ ди́вное чꙋ́до , посѣка́тель є҆ресе́мъ на оу҆́ды растерза́етсѧ . и҆ ѡ҆кроплѧ́етсѧ кро́вїю цр҃кви хрⷭ҇то́ва дне́сь . ра́дꙋютсѧ земні́и ѡ҆ ст҃ѣ́й сла́вѣ твое́й красѧ́щесѧ . мꙋчи́тели посра́млени бы́ша , и҆ вѣ́ра до конца̀ оу҆пра́влена бы́сть . ѵ҆па́тїе ра́дꙋисѧ с̾ тобо́ю гдⷭ҇ь , подаѧ̀ ми́рови тобо́ю ве́лїю ми́лость .

сти́хъ : что̀ воз̾да́мъ гдⷭ҇ви ѡ҆ всѣ́хъ ,꙳ и҆́хже воз̾да́стъ ми . Ѽ ди́вное чꙋ́до , ре́вностїю бжⷭ҇твеною раз̾жиза́ѧсѧ ст҃лю , лю́таго ѕмі́ѧ оу҆дави́лъ є҆сѝ . по хрⷭ҇тѣ̀ кро́вїю страда́лъ є҆сѝ ѵ҆па́тїе . и҆ мно́ги к̾ бг҃ꙋ приве́лъ є҆сѝ . и҆ многого́рдыѧ врагѝ и҆спрове́рглъ є҆сѝ стрⷭ҇тоте́рпче , ра́дꙋисѧ с̾  тобо́ю гдⷭ҇ь , подаѧ̀ ми́рови тобо́ю ве́лїю ми́лость .

сла́ва . гла́съ , ѕ҃ . Чл҃че бж҃їи , вѣ́рныи ра́бе , слꙋго̀ гдⷭ҇нь , мꙋ́жꙋ жела́нїи , сосꙋ́де и҆збра́нныи , сто́лпе и҆ оу҆тверже́нїе цр҃кви , црⷭ҇твїю наслѣ́дниче , непремолчѝ вопїѧ̀ заны̀ ко́ гдⷭ҇ꙋ .

и҆ ны́нѣ , боⷢ҇ . Бцⷣе ты̀ є҆сѝ лоза̀ и҆́стиннаѧ , воз̾расти́вшаѧ на́мъ пло́дъ живо́тныи , тебѣ̀ мо́лимсѧ , моли́сѧ влⷣчце со сщ҃енномч҃нкѡмъ , поми́ловатисѧ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . И҆з̾воле́нїемъ бжⷭ҇твенагѡ ра́зꙋма впери́въ оу҆́мъ сво́й в̾ нбⷭ҇ныѧ ѻ҆би́тели . и҆ равноа́нг҃лѡмъ житїѐ пожи́въ на землѝ . сегѡ̀ ра́ди мч҃нїѧ красоты̀ вѣне́цъ на свое́мъ версѣ̀ оу҆тверди́въ , сщ҃енномч҃нче ѵ҆па́тїе , молѝ хрⷭ҇та̀ бг҃а спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . И҆́же ѿ́ вѣка оу҆тае́нное , и҆ а҆́нг҃лѡмъ несвѣ́до мое та́инство , тобо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи воплоща́емъ . и҆ крⷭ҇тъ во́лею на́съ ра́ди воспрїе́мъ , и҆́мъ же воскр҃сѝ первозда́ннаго , и҆ спасѐ ѿ сме́рти дш҃а на́ша .

На оу҆́трени , на бг҃ъ гдⷭ҇ь , тропа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , и҃ . И҆́дольскїѧ ле́сти низ̾ ложи́въ , сп҃совы стрⷭ҇ти жела́ѧ ѵ҆па́тїе сла́вне . ꙗ҆ви́сѧ ми́рови с̾ нб҃сѐ всѣ́мъ и҆сточа́ѧ чꙋдеса̀ , ꙗ҆зы́кѡмъ бы́сть бл҃же́нне оу҆чи́тель . тѣ́мъ твою̀ па́мѧть досто́йнѡ сла́вимъ , пѣ́сньми хва́лѧще тебѐ оу҆бл҃жа́емъ , ст҃лю ѵ҆па́тїе . молѝ хрⷭ҇та̀ бг҃а грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . =двⷤа . сла́ва , и҆ ны́нѣ , боⷢ҇ . Тебѐ и҆мѣ́ю застꙋ́пницꙋ пречⷭ҇таѧ , не оу҆бою́сѧ николи́же ѿ вра́гъ намѧ̀ воста́нїѧ , ꙗ҆́кѡ бг҃а ро́ждьши млⷭ҇тиваго . покры́и мѧ млⷭ҇тїю сѝ . и҆́бо к̾ твоемꙋ̀ застꙋпле́нїю прⷭ҇нѡ прибѣга́ю .

По в҃ , стихоло́гїи , сѣда́ленъ . гла́съ , д҃ . Восїѧ́въ ꙗ҆́коже сл҃нцꙋ зарѧ̀ , и҆ блиста́еши прпⷣбне всемꙋ̀ ми́рꙋ свѣ́тлѡ , оу҆че́нїи твои́ми бг҃огла́се ѵ҆па́тїе , свѣтоно́сне мч҃нкѡмъ похвало̀ . двⷤа . сла́ва , и҆ ны́нѣ , боⷢ҇ . Пречи́стѣи рꙋ́цѣ своѝ дв҃о мт҃и просте́рши , покры́й оу҆пова́ющїѧ натѧ̀ . и҆ сн҃ꙋ твоемꙋ̀ зовꙋ́щихъ , всѣ́мъ пода́ждь хрⷭ҇тѐ ми́лости твоѧ̀ .

по хвали́те и҆́мѧ гдⷭ҇не , припѣ́въ : Велича́емъ тѧ̀ сщ҃енномч҃нче ѵ҆па́тїе , и҆ чте́мъ ст҃ꙋ́ю па́мѧть твою̀ . ты́ бо мо́лиши за на́съ хрⷭ҇та̀ бг҃а на́шегѡ . ѱл҃о́мъ и҆збра́нныи : оу҆слы́шите сїѧ̀ всѝ .

По полїєлеѡ́сѣ , сѣда́ленъ . гла́съ , и҃ . Премꙋ́дрости нбⷭ҇нѣй наꙋчи́всѧ , и҆ словесы̀ бжⷭ҇твеными оу҆краси́всѧ . ꙗ҆́кѡ дви́жимыѧ гꙋ́сли нбⷭ҇ныхъ пѣ́сней брѧца́ѧ . ѡ҆бличи́лъ є҆сѝ без̾зако́нныхъ царе́й нече́стїе , а҆́рїѧ же досто́йнѡ посрами́лъ є҆сѝ . тѣ́мъ пѣ́сньми воспѣва́емъ тѧ̀ . сїѧ́еши бо чꙋдесы̀ сщ҃енномч҃нче ѵ҆па́тїе . молѝ хрⷭ҇та̀ бг҃а грѣхо́въ ѡ҆ставле́нїе дарова́ти чтꙋ́щимъ любо́вїю ст҃ꙋ́ю па́мѧть твою̀ . вⷤ . сла́ва , и҆ ны́нѣ , боⷢ҇ . Ми́рꙋ цр҃и́це , цр҃ѧ породѝ хрⷭ҇та̀ бг҃а , є҆ди́ного милосе́рда , молѧ́щисѧ непреста́й ѿ грѣ́хъ и҆ напа́стей и҆з̾ба́витисѧ вопїю́щимъ тѝ . ра́дꙋисѧ мт҃и бж҃їѧ пречⷭ҇таѧ , чл҃кѡмъ спасе́нїе и҆ ѡ҆гражде́нїе .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . всѧ́ко дыха́нїе . =є҆ѵⷢ҇а́лїе , ѿ =лꙋкѝ . зача́ло , ѯ҃з . ѱало́мъ , н҃ .

сла́ва . моли́твъ ра́ди сщ҃енномч҃нка , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Чл҃че бж҃їи , вѣ́рныи ра́бе , слꙋго̀ гдⷭ҇нь , мꙋ́жꙋ жела́нїи , сосꙋ́де и҆збра́нныи , сто́лпе и҆ оу҆тверже́нїе цр҃кви , црⷭ҇твїю наслѣ́дниче , непремолчѝ вопїѧ̀ заны̀ ко́ гдⷭ҇ꙋ .

кано́нъ , творе́нїе ки́ръ і҆ѡ́сифа . гла́съ , д҃ . пѣ́снь , а҃ . і҆рмо́съ . Тристоѧ́ща крѣ́пкїи , рожде́исѧ ѿ дв҃ы , без̾стра́стїе во глꙋбинѣ̀ , дш҃и трича́стное потопѝ молю́сѧ . да тѝ ꙗ҆́кѡ в̾ тимпа́нѣ , во оу҆мерщве́ннѣмъ тѣлесѝ , побѣ́дное пою̀ воспѣва́нїе .

запѣ́въ : Ст҃ы́и сщ҃енномч҃нче ѵ҆па́тїе , молѝ бг҃а ѡ҆ на́съ .= Бжⷭ҇твенаго страда́льца мꙋ́драго ст҃лѧ , чꙋдесе́мъ и҆сто́чника , па́стырѧ до́браго , цр҃ко́вное оу҆тверже́нїе , пѣ́сньми велегла́снѡ , ꙗ҆́кѡ свѣти́льника всеми́рна , всѝ восхва́лимъ ра́дꙋющесѧ . Бжⷭ҇твенаѧ рѣка̀ , наводни́вшаѧ бл҃же́нне чи́стꙋю твою̀ дш҃ꙋ , и҆сточѝ на́мъ пречи́сты во́ды премꙋ́дре чꙋде́съ , то́ки и҆з̾сꙋша́юща мꙋ́тныхъ страсте́й ѵ҆па́тїе . Оу҆мертви́въ плотьскі́ѧ стра́сти воз̾держа́нїемъ , жи́знь и҆́стиннꙋю хрⷭ҇та̀ , на́съ ра́ди оу҆ме́рша ѵ҆па́тїе , и҆мѣ́лъ є҆сѝ внꙋ́трь в̾ дш҃и свое́й живꙋ́ща , и҆ всѧ̀ твоѧ̀ к̾ немꙋ̀ ше́ствїѧ направлѧ́юща . Срⷣце и҆ дш҃ꙋ , трⷪ҇цѣ сотворѝ нескве́рнꙋ цр҃квь . цр҃кви же сщ҃е́нны гдⷭ҇ви в̾ хвалꙋ̀ , прпⷣбне сщ҃енномч҃нче созда̀ . спасе́ныи бы́въ ѡ҆корми́тель ста́дꙋ твоемꙋ̀ . боⷢ҇ . С=п҃са и҆ бг҃а , ѿ чи́стыхъ тѝ крове́й воплоти́ла є҆сѝ чи́стаѧ , показа́вшаго на́мъ мꙋ́драго ст҃лѧ своегѡ̀ пречи́стаѧ , спаси́тельна и҆ те́пла застꙋ́пника , чꙋ́днаго вои́стинꙋ ѵ҆па́тїѧ .

катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . Немꙋ́дростїю ни си́лою , ни бога́тствомъ хва́лимсѧ , но твое́ю ѻ҆́ч҃ею соста́вною мꙋ́дростїю бж҃їею . ꙗ҆́кѡ нѣ́сть ст҃а па́че тебѐ чл҃колю́бче . Всѣ́мъ срⷣцемъ ко и҆сто́чникꙋ до́брымъ вмѣсти́сѧ . и҆́же ѿ тꙋ́дꙋ и҆з̾ дале́ча , бога́тными сїѧ́ѧ ѻ҆́ч҃е сщ҃е́нне , бжⷭ҇твеными свѣтлостьмѝ . Зако́ны бжⷭ҇твеными ѡ҆гражде́нъ , без̾зако́нныхъ собо́рища , си́лою ѻ҆́ч҃е бжⷭ҇твеною , потреби́лъ є҆сѝ є҆ресе́мъ . и҆ спа́слъ є҆сѝ ста́до твоѐ ѻ҆́ч҃е ѵ҆па́тїе . Ѿ вы́шнїѧ пресвѣ́тлыѧ свѣщѝ дх҃а , просвѣща́емь мꙋ́дре . но́щїю ходѧ́ща , свѣщи́ тѧ ꙗ҆ви́ша ѿ воды̀ ѡ҆зарѧ́юще . Ѻ҆ц҃ъ бжⷭ҇твеныхъ ли́къ , с̾не́мшисѧ бл҃же́нныи . и҆́же собра̀ хрⷭ҇то́съ , собо́ра пе́рвагѡ бл҃же́нне , ꙗ҆ви́лсѧ є҆сѝ оу҆давлѧ́ѧ безꙋ́мнаго а҆́рїѧ .= боⷢ҇ . И҆=зба́ви мѧ всѧ́кагѡ прило́га сопроти́внагѡ ѕмїина̀ , мт҃и дв҃о чи́стаѧ . и҆ срⷣце моѐ просвѣтѝ , вѣ́рою тѧ̀ сла́вѧща пренепоро́чнꙋю .

катава́сїѧ : Твоѧ̀ пѣвцы̀ .

сѣда́ленъ . гла́съ , а҃ . Восїѧ́лъ є҆сѝ в̾ ми́рѣ ст҃лю ѵ҆па́тїе , чꙋдесы̀ просвѣща́ѧ вѣ́рою приходѧ́щїѧ къ тебѣ̀ . и҆ пострада́въ же кро́вїю мꙋ́дре , мно́жае присво́исѧ хрⷭ҇то́ви . и҆ ликꙋ́еши со а҆́нг҃лы на́ нб҃сѣхъ ѡ҆ на́съ молѧ́сѧ . сла́ва оу҆крѣ́пльшемꙋ тѧ̀ бг҃ꙋ . сла́ва вѣнча́вшемꙋ тѧ̀ . сла́ва даю́щемꙋ тобо́ю всѣ́мъ и҆сцѣле́нїе .= вⷤ . сла́ва , и҆ ны́нѣ , боⷢ҇ . Р=ꙋ́цѣ своѝ бжⷭ҇твенѣи , и҆́ма же зижди́телѧ носи́ла є҆сѝ дв҃о пречи́стаѧ , вопло́щшасѧ бл҃гости ра́ди , просте́рши оу҆молѝ є҆гѡ̀ , и҆зба́вити ны̀ ѿ напа́стей , страсте́й же и҆ бѣ́дъ , восхвалѧ́ющихъ тѧ̀ любо́вїю , и҆ вопїю́щихъ ти . сла́ва все́льшемꙋсѧ в̾ тѧ̀ , сла́ва проше́дшемꙋ и҆з̾ тебѐ . сла́ва свобо́ждьшемꙋ на́съ ржⷭ҇тво́мъ свои́мъ .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вопїю́щїѧ , сла́ва хрⷭ҇тѐ си́лѣ твое́й . Неле́стно сло́во , и҆ оу҆че́нїе нескве́рно соблюда́ѧ , проповѣ́далъ є҆сѝ сло́во ѻ҆ц҃ꙋ соприсносꙋ́щно . а҆́рїѧ безꙋ́мнагѡ пре́лесть побѣ́ждь , сщ҃енномꙋ́чениче , чꙋдотво́рче достосла́вне . Го́рькїѧ ѿ го́ръ текꙋ́щїѧ во́ды , зна́менїемъ цѣльбы̀ то́кмѡ показа́лъ є҆сѝ . во́дꙋ жи́вꙋ стѧжа́въ в̾ срⷣцы свое́мъ , в̾ вѣ́чнꙋю ѻ҆́ч҃е жи́знь текꙋ́щꙋю . Сщ҃е́нствовавъ прпⷣбнѡ , сщ҃е́нство показа́въ свѣтлѣ́йшо кровьмѝ . ꙗ҆́кѡ за любо́вь и҆з̾лїѧ́вшисѧ , и҆з̾лїѧ́вшагѡ кро́вь честнꙋ́ю , за чл҃ческое и҆збавле́нїе . Не оу҆коснѣ́вши бл҃года́ть на тебѣ̀ , чꙋдеса̀ содѣва́ющи . бѣсо́мъ го́рькимъ преда́вши , тѧ̀ го́рькѡ и҆ без̾бо́жнѡ оу҆мори́вшїѧ , пребл҃же́нне мч҃нче хрⷭ҇то́въ сщ҃е́нне .= боⷢ҇ . Дарова́нїи твои́хъ стрꙋѝ , и҆ и҆сто́чницы и҆сцѣле́нїемъ , бжⷭ҇твенагѡ бога́тства па́жити подава́ютсѧ ѿ живонача́льныѧ дла́ни бг҃оневѣ́сто , ро́ждьшагосѧ ѿ твоеѧ̀ оу҆тро́бы вседержи́телѧ . =катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща .= Оу҆ма̀ превосхо́дитъ твоеѧ̀ бл҃гости достиже́нїе . ꙗ҆зы́къ и҆з̾рещѝ немо́жетъ , твои́хъ чꙋде́съ без̾мѣ́рныѧ пꙋчи́ны . мч҃нче ст҃лю и҆ па́стырю , га́грѧнѡмъ оу҆добре́нїе , и҆ свѣти́льниче всеѧ̀ тва́ри . Оу҆би́лъ є҆сѝ ѕмїѧ̀ , ѻ҆гню̀ преда́въ . показа́лъ є҆сѝ в̾ тебѣ̀ бжⷭ҇твенꙋю бл҃года́ть , бога́тнѡ все́льшꙋюсѧ . и҆ тѧ̀ пред̾ цр҃е́мъ и҆ всѣ́ми просла́вльшꙋю людьмѝ сщ҃е́нне . Печа́ть и҆ храни́телѧ сокро́вищꙋ , воѡ҆бразѝ ѻ҆́ч҃е твою̀ и҆ко́нꙋ . сїю̀ почита́ѧ , и҆ ꙗ҆́вѣ провозвѣща́ѧ , ꙗ҆́кѡ приноси́ма че́сть , на пе́рвыи ѻ҆́бразъ прехо́дитъ ѵ҆па́тїе . Вельмѝ под̾виза́всѧ и҆ просла́висѧ , чꙋдеса̀ соверша́ѧ сщ҃енноѡ҆бра́знѡ . недꙋ́ги ѿгонѧ̀ , прогонѧ́ѧ бѣ́сы , оу҆пражнѧ́ѧ си́хъ навѣ́ты . побѣжда́ѧ є҆ресе́мъ гꙋби́тельное ѕломы́слїе . боⷢ҇ . М=ꙋ́дрость родила̀ є҆сѝ бж҃їю соста́внꙋю , пречⷭ҇таѧ дв҃о бцⷣе , и҆́же ст҃ы́ѧ премꙋ́дры показа́вшꙋю . тѣ́мже ѕло́бы мꙋдреца̀ падѐ шата́нїе , и҆ лю́таѧ ѕлоꙋхищре́нїѧ .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Воз̾ше́лъ є҆сѝ на высотꙋ̀ добродѣ́телей ѵ҆па́тїе , и҆ пристꙋпи́лъ є҆сѝ бл҃же́нне к̾ честно́мꙋ и҆сто́чникꙋ , бжⷭ҇твеныхъ дарова́нїи , и҆ чꙋде́съ пꙋчи́нꙋ и҆сточи́лъ є҆сѝ . Вѣне́цъ тебѣ̀ ка́меней мета́нїѧ бы́ша , и҆ къ нбⷭ҇нѣй высотѣ̀ степе́ни ѻ҆́ч҃е и҆ лѣ́ствица . на ню́ же всѣ́дъ , и҆ бг҃ови присво́исѧ ꙗ҆снѣ́йше . И҆сцѣле́нїѧ твоѧ̀ ра́ка и҆сточа́етъ прⷭ҇нѡ . бл҃гослове́нїе же ѻ҆́ч҃е чⷭ҇тны́ѧ ти пе́рсти прїе́мъ , и҆звѣ́стнѡ ꙗ҆́кѡ пра́хъ и҆стнѣва́етъ ѡ҆ѕлобле́нїе . Зако́нно пострада́въ , и҆ ꙗ҆́кѡ мч҃нкъ почте́сѧ . во глꙋбо́цѣ же ста́рости , к̾ свои́мъ пре́йде ра́дꙋѧсѧ ѻ҆ц҃е́мъ , и҆ вѣне́цъ твои́мъ трꙋдо́мъ прїѧ́лъ є҆сѝ ѿ хрⷭ҇та̀ досто́йнѡ .= боⷢ҇ . Ѽ= чꙋ́до , всѣ́хъ чꙋде́съ новѣ́е , ꙗ҆́кѡ дв҃ца в̾ ложесна́хъ всѧ̀ содержа́щаго , неи҆скꙋсомꙋ́жнѡ заче́ньши не стꙋжи́ си .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , в҃ . Ри́мскомꙋ ѻ҆те́чествꙋ свѣти́льникъ , бг҃оза́рными лꙋча́ми концы̀ свѣтѧ̀ . ны́нѣ просвѣтѝ твоѐ пра́зднество пою́щїѧ ѵ҆па́тїе , просѧ̀ свы́ше ми́ра и҆ грѣхо́въ ѡ҆ставле́нїѧ . мл҃твами защити́ ны ѵ҆па́тїе многострада́льне . и҆́косъ . Оу҆ѧсни́въ оу҆́мъ сво́й мч҃нче , а҆́ки сл҃нце мꙋ́дре про́йде всю̀ вселе́ннꙋю зарѧ́ми бжⷭ҇твеными ѡ҆сщ҃а́ѧ . и҆ раз̾гна̀ є҆рети́ческїи мра́къ , сѵ́монѡва же волшебства̀ ѿме́ща , и҆ ле́сть прогна̀ бѣсо́вскꙋю ст҃е . и҆сполнѧ́ѧ ѡ҆ста́нки петра̀ и҆ па́вла . с̾ ни́ми же сподо́бисѧ прїѧ́ти бл҃года́ть дх҃о́внꙋю . є҆́й же и҆ на́съ сподо́би пою́щихъ тѧ̀ , ѵ҆па́тїе многострада́льне .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и оу҆би́въ , ꙗ҆́же без̾ пра́вды пра́ведныѧ оу҆ловлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гослове́нъ є҆сѝ .= Оу҆ста̀ ника́коже натѧ̀ ѿве́рзе по́лзаѧи ѕмі́й . раболѣ́пно же на ѻ҆́гнь и҆дѧ́ше , повинꙋ́ѧсѧ сла́вне стра́шномꙋ повелѣ́нїю . ѻ҆ц҃ъ на́шихъ вопїю́щꙋ , бж҃е бл҃гослове́нъ є҆сѝ . Кро́вными проли́тїемъ , є҆́же ѿ сле́зъ совокꙋ́пль , є҆ди́но ѿ ѻ҆бою̀ пи́ва мꙋ́дре соверши́лъ є҆сѝ . тебѣ̀ помина́ющꙋ пи́щномꙋ досточꙋ́дне пото́кꙋ во́ вѣки , мꙋ́ченикѡмъ похвало̀ . Въ поро́дꙋ честны́хъ болѣ́зней твои́хъ входѧ́ще бл҃же́нне , бл҃гоꙋха́емъ дш҃а , бл҃гово́нїе тѧ̀ хрⷭ҇тꙋ̀ вѣ́дꙋще , и҆ вопїе́мъ ѵ҆па́тїе . бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . боⷢ҇ . Н=еи҆скꙋсобра́чнаѧ чⷭ҇таѧ , без̾ сѣ́мене заче́ншаѧ ѻ҆ц҃ꙋ є҆диносꙋ́щна . и҆ ро́ждьши пло́тїю бг҃оневѣ́сто , ѿ ст҃ы́ѧ кро́ве своеѧ̀ . молѧ́щи непреста́й , спастѝ всѧ̀ ны̀ .

катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки .= Гла́съ тво́й со свѣ́томъ смѣше́нъ , и҆ бжⷭ҇твеными ѡ҆сїѧ́нъ свѣтлостьмѝ , тмꙋ̀ є҆́ресьскꙋю премꙋ́дре разорѝ . и҆ ко́ дни напра́ви правосла́вїѧ лю́ди пою́щїѧ , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Краснѣ́йшїи ꙗ҆́кѡ тро́сть ꙗ҆́вльсѧ , ꙗ҆зы́къ тво́й премꙋ́дре написа̀ зако́нъ и҆́же бл҃года́ти , всѧ̀ и҆́же на дска́хъ ве́тхїѧ погла́ждьши ѻ҆́бразы ѵ҆па́тїе . тѣ́мже тѧ̀ ꙗ҆́кѡ мꙋ́дра кни́жника , пѣсносло́вимъ во всѧ̀ вѣ́ки . Сто́лпъ ѻ҆́гненъ бжⷭ҇твеныи , къ высотѣ̀ нбⷭ҇нѣй взе́млемъ , забра́ло непрекло́нное , стѣна̀ неѡ҆бори́ма , цр҃ко́внаѧ же́ртва , ст҃лемъ степе́нь , мч҃нкѡмъ кра́снаѧ лѣ́пота , чꙋдоно́сныи ѵ҆па́тїи да почте́нъ бꙋ́детъ . Ви́дѣти сподо́бисѧ є҆го́же жела́ше , разрѣ́шшемсѧ и҆́стинною и҆ оу҆мышле́нїемъ . є҆ди́наче бо дыха́ющи и҆ кро́ви ка́плющи , к̾ жела́нїю послѣ́днемꙋ мч҃нче восте́клъ є҆сѝ . с̾ мч҃нческими и҆ прпⷣбныхъ ли́ки бжⷭ҇твеными , ликꙋ́ѧ во всѧ̀ вѣ́ки . боⷢ҇ . Мно́гими ѻ҆держи́ма бѣда́ми , и҆ молво́ю грѣха̀ потоплѧ́ема , къ без̾мо́лвномꙋ стремле́нїю , тишины́ мѧ дх҃а , бг҃ороди́тельнице чⷭ҇таѧ влⷣчце нн҃ѣ наста́ви . приста́нище бо є҆сѝ хрⷭ҇тїа́нѡмъ . тѣ́мже тѧ̀ пое́мъ во всѧ̀ вѣ́ки . =катава́сїѧ : Хва́лимъ блгⷭ҇ви́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Є҆́вва оу҆́бѡ недꙋ́гомъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прозѧбе́нїемъ прижи́тїѧ твоегѡ̀ , ми́рови бл҃гослове́нїе процвѣла̀ є҆сѝ . тѣ́мъ тѧ̀ всѝ велича́емъ . Ꙗ҆́кѡ шипо́къ , и҆ ꙗ҆́кѡ кри́нъ се́льныи слад̾коꙋха́ненъ ст҃лю . и҆ ꙗ҆́кѡ кипари́съ . мѵ́ро ꙗ҆́кѡ бжⷭ҇твено и҆ бл҃гово́нно , ра́ка твоѧ̀ бл҃гоꙋха́етъ чꙋдеса̀ . смра́дныѧ недꙋ́ги ѿгонѧ́щи , сщ҃енномч҃нче всече́стне . Собесѣ́дникъ ꙗ҆ви́сѧ прⷪ҇ро́кѡмъ , мч҃нкѡмъ же и҆ сщ҃е́нникѡмъ , и҆́же кро́вїю до́брѣ сконча́вшимсѧ . ст҃ы́хъ и҆ прпⷣбныхъ собо́ромъ , и҆ всѣ́мъ пра́веднымъ и҆́же ѿ́ вѣка , соприча́стникъ досточꙋ́дне . Па́мѧть твоѧ̀ дне́сь на́мъ восїѧ̀ свѣтлѣ́йши сл҃нца , свѣ́томъ невеще́ственымъ срⷣца̀ на́ша просвѣща́ющи , вѣ́рою тѧ̀ в̾ не́й бл҃жа́щихъ , и҆ моле́бнѡ восхвалѧ́ющїѧ тѧ̀ . Свѣ́томъ сѝ ѡ҆зарѝ на́ша ѵ҆па́тїе помышле́нїѧ , творѧ́щихъ твою̀ па́мѧть , бжⷭ҇твенꙋю и҆ свѣтоно́снꙋю . и҆зба́ви ѻ҆гнѧ̀ и҆ мꙋ́ки , и҆ всѧ́когѡ и҆скꙋше́нїѧ мольба́ми сѝ , бл҃гоче́стнѡ тѧ̀ бл҃жа́щїѧ .= боⷢ҇ . В=ознесѝ бл҃года́ть свою̀ чи́стаѧ . воз̾вели́чи мольбꙋ̀ , и҆ приведѝ чи́ны а҆́нг҃льскїѧ влⷣцѣ , а҆пⷭ҇лъ же и҆ пррⷪ҇къ ли́ки , и҆ всѧ̀ пра́ведники с̾ мч҃нки , ꙗ҆́кѡ да спасе́мсѧ чтꙋ́щїи тѧ̀ .

катава́сїѧ : Всѧ́къ зе́менъ .= Досто́йнѡ є҆́сть . свѣти́ленъ . Оу҆диви́сѧ всѧ́къ ра́зꙋмъ по́двигомъ страда́нїѧ твоегѡ̀ бл҃же́нне . ты́ бо въ пло́ти сы́и ꙗ҆́кѡ беспло́тенъ , многоразли́чныѧ мꙋ́ки терпѧ̀ хрⷭ҇та̀ ра́ди царѧ̀ нече́стїе ѡ҆бличи́лъ є҆сѝ , сегѡ̀ ра́ди хвала́ми тѧ̀ воспѣва́емъ . =два́жды . сла́ва , и҆ ны́нѣ , боⷢ҇ . Живо́тнагѡ са́да ѿ́расль многопло́дна процвѣтѐ на́мъ , и҆схода́тай нбⷭ҇нагѡ весе́лїѧ , и҆́з̾ чрева твоегѡ̀ пречⷭ҇таѧ . и҆з̾сꙋша́ющаго сады̀ без̾бо́жїѧ , и҆з̾ ко́рене бг҃оневѣ́сто .

На хвали́тѣхъ , стⷯры . гла́съ , а҃ . поⷣ . прехва́льнїи мч҃нцы .= Ꙗ҆́кѡ дре́во плодови́то мꙋ́дре ,꙳ во дво́рѣхъ бг҃а на́шегѡ ꙳ насажде́нъ ѵ҆па́тїе .꙳ и҆ всѧ̀ насади́лъ є҆сѝ дш҃а бжⷭ҇твеными плоды̀ ꙳ по́двигъ твои́хъ .꙳ и҆ нн҃ѣ к̾ бгꙋ ѿше́лъ є҆сѝ̀ .꙳ тѣ́мъ моли́сѧ ꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . двⷤа . До́брѣ воз̾дѣ́лавъ мꙋ́дре ꙳ да́нныи тѝ тала́нтъ ,꙳ и҆ въ ра́дость вше́лъ є҆сѝ гдⷭ҇а своегѡ̀ .꙳ и҆ ны́нѣ свѣ́та наслажда́ешисѧ ,꙳ и҆ ра́дости присносꙋ́щїѧ ꙳ и҆сполнѧ́ѧсѧ ,꙳ моли́сѧ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . М=ꙋче́нїѧ кро́вїю ,꙳ ѻ҆де́ждꙋ сщ҃е́нства своегѡ̀ мч҃нче ,꙳ свѣ́тлѡ оу҆краси́лъ є҆сѝ ꙳ и҆ в̾ нбⷭ҇нꙋю цр҃квь сведе́нъ бы́сть .꙳ и҆ со а҆́нг҃лы всегда̀ хрⷭ҇тꙋ̀ бг҃ꙋ ꙳ пред̾стоѧ̀ мꙋ́дре .꙳ є҆го́же и҆ нн҃ѣ молѝ ꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сла́ва . гла́съ , ѕ҃ . Бл҃гі́и ра́бе вѣ́рне , и҆ дѣ́лателю виногра́да хрⷭ҇то́ва , ты̀ тѧготꙋ̀ дневнꙋ́ю поне́слъ є҆сѝ , ты̀ да́ннаго тѝ тала́нта и҆спра́вилъ є҆сѝ . вни́ди в̾ ра́дость гдⷭ҇а своегѡ̀ ѵ҆па́тїе , и҆ проти́вꙋ трꙋдꙋ̀ твоемꙋ̀ мздꙋ̀ прїѧ́лъ є҆сѝ . тѣ́мъ нб҃са̀ со а҆́нг҃лы ра́дꙋютсѧ на па́мѧть твою̀ . с̾ ни́ми же и҆ мы̀ просвѣ́щшесѧ чꙋдесы̀ твои́ми , пра́зднество твоѐ сотворѧ́юще мо́лимъ тѧ̀ гл҃юще . ра́дꙋисѧ чꙋдотво́рче ѵ҆па́тїе , ѿ́ крове твоеѧ̀ и҆сточа́ѧ быстрины̀ спасе́ныѧ бжⷭ҇твенагѡ оу҆че́нїѧ . и҆ ѡ҆брѣ́тесѧ є҆ретико́мъ стра́шенъ , и҆ дꙋхо́мъ прогони́тель . тѣ́мъ пред̾стоѧ̀ со а҆́нг҃лы оу҆ прⷭ҇то́ла бл҃же́нне , моли́сѧ хрⷭ҇тꙋ̀ бг҃ꙋ ѡ҆ дш҃а́мъ на́шихъ . и҆ ны́нѣ , боⷢ҇ . Никто́же притека́ѧ къ тебѣ̀ , посра́мленъ ѿ тебѐ и҆схо́дитъ , прест҃а́ѧ дв҃о бцⷣе , но про́ситъ бл҃года́ть , и҆ прїе́млетъ дарова́нїе , къ поле́зномꙋ проше́нїю .

Славосло́вїе вели́кое , и҆ ѿпꙋ́стъ . =На литꙋргі́и , б=л҃же́нна , на и҃ . ѿ кано́на , пѣ́снь г҃ ѧ , и҆ ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃о́мꙋ . сла́ва , конда́къ ст҃о́мꙋ . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃о́мꙋ . конда́къ хра́мꙋ . сла́ва , ст҃о́мꙋ . и҆ ны́нѣ , конда́къ : застꙋ́пнице хрⷭ҇тїа́нѡмъ . проки́менъ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . а҆пⷭ҇лъ , къ є҆вре́ѡмъ . зача́ло , та҃і . а҆ллилꙋ́їѧ . і҆єре́и твоѝ ѡ҆блекꙋ́тсѧ въ пра́вдꙋ , и҆ преподо́бнїи твоѝ воз̾ра́дꙋютсѧ . є҆ѵⷢ҇а́лїе , ѿ і҆ѡа́нна . зача́ло , л҃ѕ . прича́стенъ , въ па́мѧть вѣ́чнꙋю бꙋ́детъ пра́ведникъ .