17 ноября: свт. Григория Чудотворца и прп. Никона Радонежского

МЦⷭ҇А ТОГО́ЖЕ ВЪ З҃І ДН҃Ь

и҆́же во ст҃ы́хъ ѻ҆ц҃а на́шегѡ григо́рїѧ чꙋдотво́рца . =И҆ прпⷣбнагѡ ѻ҆ц҃а на́шегѡ ни́кѡна , и҆гꙋ́мена честны́ѧ ѻ҆би́тели живонача́льныѧ трⷪ҇цы , оу҆ченика̀ се́ргїѧ чꙋдотво́рца . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и возва́хъ , стихѣ́ры , григо́рїю чꙋдотво́рцꙋ на́ ѕ҃ . гла́съ , и҃ . поⷣ . ч=то́ тѧ и҆менꙋ́емъ а҆пⷭ҇ле . Что́ тѧ нарекꙋ̀ григо́рїе ;꙳ влⷣкꙋ , ꙗ҆́кѡ стра́сти покори́лъ є҆сѝ оу҆мꙋ̀ .꙳ дѣ́лателѧ , ꙗ҆́кѡ пожа̀ премꙋ́дростныи пло́дъ ,꙳ и҆ бжⷭ҇твенагѡ видѣ́нїѧ сподоблѧ́ема .꙳ и҆ бг҃осло́вїемъ нбⷭ҇нымъ ѡ҆глаша́ема .꙳ ст҃лѧ сщ҃е́ннѣйша ,꙳ и҆ чꙋдотво́рца пречꙋ́днаго .꙳ молѝ спасти́сѧ дш҃а́мъ на́шимъ . Что́ тѧ нн҃ѣ нарекꙋ̀ григо́рїе ;꙳ потреби́телѧ крѣ́пка , без̾бо́жнагѡ ѕловѣ́рїѧ ,꙳ оу҆ставополо́жника бл҃гоче́стїѧ , и҆ оу҆чи́телѧ мꙋ́драго .꙳ смире́нїю же пода́телѧ ꙳ непобѣди́ма . ра́темъ разори́телѧ непоколеби́ма .꙳ в̾ гора́хъ пребыва́юща ,꙳ и҆ зрѧ́ща ꙗ҆́же во́ градѣхъ .꙳ молѝ спасти́сѧ дш҃а́мъ на́шимъ . Что́ тѧ нн҃ѣ провозвѣща́ю прпⷣбне ;꙳ под̾ража́телѧ а҆пⷭ҇лѡмъ ,꙳ ꙗ҆́кѡ чꙋдесе́мъ самотво́рца .꙳ рѣка́ма запреща́юща призыва́нїемъ хрⷭ҇то́вѣмъ ,꙳ и҆ є҆́зеро братоꙋбі́йственое и҆з̾сꙋша́юща .꙳ собо́ръ бг҃обо́рныи разорѧ́юща ,꙳ хрⷭ҇тїа́нскаѧ составле́нїѧ оу҆множа́юща и҆ просвѣща́юща .꙳ молѝ спасти́сѧ дш҃а́мъ на́шимъ . Что́ тѧ нн҃ѣ провоз̾глашꙋ̀ прпⷣбне ;꙳ наста́вника заблꙋ́ждьшимъ ,꙳ и҆ недꙋ́гꙋющимъ врача̀ .꙳ пода́телѧ тре́бꙋющимъ ѡ҆би́льна ,꙳ гони́телѧ бѣсо́мъ крѣпча́йша .꙳ поꙋсти́телѧ мч҃нческагѡ по́двига .꙳ пррⷪ҇ческими свѣтѧ́щасѧ бл҃года́тьми сла́вне .꙳ молѝ спасти́сѧ дш҃а́мъ на́шимъ .

сла́ва . гла́съ , ѕ҃ . Во глꙋбинꙋ̀ видѣ́нїѧ вше́дъ премꙋ́дренѣ , ст҃лю хрⷭ҇то́въ . бжⷭ҇твеное навы́че трⷪ҇чное ꙗ҆вле́нїе , дх҃о́мъ прови́дѧ неꙋкло́ннѡ , хрⷭ҇та̀ бг҃а на́шегѡ . чꙋде́съ бе́зднꙋ и҆сточа́еши на́мъ . мо́крое вода́мъ є҆стество̀ в̾ каменови́дно претвори́въ . и҆ тре́бищника льстѝ ѿлꙋчи́въ в̾ мра́чнаѧ . гони́телѧ повинꙋ́лъ є҆сѝ вѣ́ровати и҆́стинѣ . и҆ сто́лпъ бл҃гоче́стїѧ добродѣ́телемъ ꙗ҆ви́лсѧ є҆сѝ и҆́мъ . чꙋдесы̀ проро́къ нарече́сѧ . мы́же мо́лимъ тѧ̀ , непреста́й ѡ҆ на́съ сп҃са моли́ти спасти́сѧ дш҃а́мъ на́шимъ . и҆ нн҃ѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . З=рѧ́щи тѧ̀ распина́ема хрⷭ҇тѐ ро́ждьшаѧ ,꙳ вопїѧ́ше тѝ . что̀ зри́мое сѐ ,꙳ є҆́же ви́жꙋ ны́нѣ та́инство сн҃е мо́й ;꙳ ка́кѡ на́ древѣ оу҆мира́еши пло́тїю стра́ждꙋщи ,꙳ жи́зни пода́телю .

На стихо́внѣ , во ѻ҆кта́и . сла́ва . гла́съ , ѕ҃ . Мꙋ́дрость бж҃їѧ да́стътисѧ мꙋ́дре , по данїи́лꙋ . ꙗ҆́коже бо ѻ҆́номꙋ со́нїе , та́кѡ и҆ вѣ́ры та́инство ѿкры́сѧ тебѣ̀ . тѣ́мже молѝ прпⷣбне ѻ҆́ч҃е спасти́сѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . Пречⷭ҇таѧ ꙗ҆́кѡ ви́дѣ тѧ на крⷭ҇тѣ̀ ви́сѧща , рыда́ющи вопїѧ́ше мт҃рьски , сн҃е мо́й и҆ бж҃е мо́й , сла́дкое моѐ ча́до , ка́кѡ терпи́ши стра́сть и҆ оу҆ничиже́нїе .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Въ моли́твахъ бо́дрствꙋѧ , чꙋде́съ дѣѧ́нїю прилѣжа̀ , тезоимени́та стѧжа́въ и҆справле́нїѧ . но моли́сѧ хрⷭ҇тꙋ̀ бг҃ꙋ ѻ҆́ч҃е григо́рїе просвѣтѝ дш҃а на́ша , да не когда̀ оу҆́снемъ в̾ сме́рть . сла́ва , и҆ ны́нѣ , бг҃оро́дичеⷩ҇ . и҆лѝ , крⷭ҇тобг҃оро́диченъ .

На оу҆́трени . ѻ҆́ба кано́на , во ѻ҆кта́и . и҆ ст҃лю , на ѕ҃ . є҆мꙋ́же краегране́сїе сицево̀ : чꙋдодѣ́йственомꙋ григо́рїю , похвалꙋ̀ содѣва́ю . творе́нїе ѳеѡ́фаново . гла́съ , и҃ . пѣ́снь , а҃ . і҆рмо́съ . Воѡ҆рꙋже́на фараѡ́на погрꙋзѝ , чꙋдотворѧ́й дре́вле , мѡѷсе́йскїи же́ѕлъ крⷭ҇тоѡ҆бра́знѡ проразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша ходѧ́ща спасѐ , пѣ́снь бг҃ови воз̾сыла́юща .

запѣ́въ : Ст҃лю хрⷭ҇то́въ григо́рїе , молѝ бг҃а ѡ҆ на́съ . Твои́хъ чꙋде́съ во мнѣ̀ григо́рїе , бжⷭ҇твеное дѣ́йство , свѣ́тлѡ ѻ҆́ч҃е и҆ ны́нѣ покажѝ . ѿ глꙋбины̀ и҆збавлѧ́ѧ мѧ̀ прегрѣше́нїи бл҃же́нне , и҆ твое́ю просвѣща́ѧ свѣ́тлостїю , да досто́йнѡ воспою̀ тѧ̀ . Ꙗ҆́кѡ поспѣ́шникъ смы́шленъ и҆ мꙋ́дръ , дш҃е́вное бл҃горо́дїе , па́че плотьски́хъ сласте́й бл҃же́нне прои҆збра́въ . премꙋ́дростна повелѣ́нїѧ трꙋдолю́бнѡ собира́ѧ . и҆́м̾же ѻ҆на̀ пита́етсѧ григо́рїе бг҃ови приближа́ѧсѧ . Цѣломꙋ́дрїе сестрꙋ̀ стѧжа́въ , ꙗ҆́кѡ споспѣ́шницꙋ до́брыхъ . тѧ̀ ви́дѣ лю́тыи ѕмі́и григо́рїе , тебѣ̀ за́висть воз̾дви́же . є҆го́же посрамѝ ѻ҆́ч҃е долготерпѣ́нїемъ , женꙋ̀ стра́стїю , ѡ҆бъѧ́тꙋ ви́дѣвъ . На чꙋжде́й странѣ̀ жи́тельствꙋѧ прпⷣбне , всѣ́мъ че́стенъ добродѣ́телїю ꙗ҆ви́сѧ , бл҃гочести́въ и҆ бг҃олюби́въ . чꙋдодѣ́йства да́ръ ѿ́ бг҃а прїе́мъ , и҆́миже позна́нъ бы́сть бг҃огла́се . просїѧ̀ в̾ ми́рѣ ꙗ҆́кѡ сл҃нце . боⷢ҇ . И҆з̾ ко́рене чⷭ҇таѧ црⷭ҇кагѡ прозѧбла̀ є҆сѝ , и҆ цр҃ѧ хрⷭ҇та̀ бж҃їе сло́во , па́че оу҆ма̀ и҆ смы́сла воплоще́но породѝ и҆з̾ чⷭ҇тыхъ крове́й . сꙋгꙋ́ба є҆стество́мъ ꙗ҆влѧ́ема , и҆ є҆ди́нствꙋюща сꙋщество́мъ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмомъ , и҆ зе́млю на вода́хъ ѡ҆снова́выи . на ка́мени мѧ хрⷭ҇тѐ цр҃ко́внѣмъ оу҆твердѝ , ꙗ҆́кѡ нѣ́сть ст҃а , па́че тебѐ чл҃колю́бче . Ѡ҆чи́стивъ сво́й оу҆́мъ , страстна́гѡ треволне́нїѧ , и҆ премꙋ́драгѡ видѣ́нїѧ и҆спо́лненъ ꙗ҆ви́лсѧ є҆сѝ бл҃голѣ́пенъ . премꙋ́дростно ѻ҆би́телище , и҆ прⷪ҇ро́чества да́ромъ ѡ҆богати́сѧ григо́рїе . Съ бг҃одх҃нове́ннымъ писа́нїемъ бесѣ́довавъ требл҃же́нне , и҆ разли́чнагѡ житїѧ̀ ѻ҆́бразы и҆збра́въ ꙗ҆́вѣ . и҆ є҆ди́нъ добродѣ́тели ѻ҆́бразъ , в̾ себѣ̀ бг҃омꙋ́дре оу҆тверди́лъ є҆сѝ григо́рїе . Бг҃огл҃ивыи навы́къ , бжⷭ҇твенымъ та́йно наꙋче́нїемъ , та́инствомъ бг҃осло́вїѧ просвѣти́сѧ трⷪ҇цы є҆диносꙋ́щныѧ . є҆ди́но є҆сте́ствена сло́ва несозда́нна и҆ присносꙋ́щна . Бг҃омъ наста́вленъ , ꙗ҆́кѡ любо́вїю тогѡ̀ взыска́въ . чⷭ҇тꙋю бцⷣꙋ дв҃ꙋ , и҆ сн҃а гро́мова и҆мѣ́лъ є҆сѝ оу҆чи́телѧ , трⷪ҇чныи свѣ́тъ тѧ бг҃огл҃иве наꙋча́юща . боⷢ҇ . Же́злъ прозѧ́бшїи хрⷭ҇та̀ цвѣ́тъ нетлѣ́нныи , и҆ ѕлатꙋ́ю кади́льницꙋ , вси́ тѧ с̾вѣ́мы чⷭ҇таѧ . бжⷭ҇твенагѡ сꙋщества̀ носѧ́щꙋ на рꙋкꙋ̀ ѻ҆трокови́це оу҆́гль бг҃обл҃же́ннаѧ .

сѣда́ленъ . гла́съ , г҃ . Но́въ бы́сть мѡѷсе́й дѣ́лы . скрижа́ли вѣ́ры на горѣ̀ та́йнагѡ бг҃овидѣ́нїѧ прїи́мъ , законоположи́въ лю́демъ бл҃гоче́стїѧ , трⷪ҇чныѧ та́йны григо́рїе . тѣ́мже всѝ вѣ́рнїи чте́мъ па́мѧть твою̀ . просѧ́ще тобо́ю ве́лїю млⷭ҇ть . и҆́нъ , сѣда́ленъ . Оу҆ма́ тѧ бо́дрена цр҃квь ѡ҆брѣ́те ѻ҆́ч҃е , чꙋдодѣ́йствы оу҆краша́юща ю҆̀ всехва́льне . веще́ственое нестѡ́рїево раз̾дѣле́нїе , и҆ севи́рово без̾бо́жное смꙋще́нїе и҆з̾ѡ҆бличи́вша . чте́тъ вѣ́рнѡ па́мѧть твою̀ , просѧ́щи тобо́ю ве́лїю млⷭ҇ть .= сла́ва , и҆ ны́нѣ , боⷢ҇ . Бжⷭ҇твеное селе́нїе бы́сть сло́ва є҆ди́на пречⷭ҇таѧ мт҃и дв҃о , чистото́ю а҆́нг҃лы превосходѧ́щи . мене́ же па́че всѣ́хъ бре́нїе быва́ема , ѡ҆скверне́на плотьски́ми прегрѣше́нїи , мл҃твами си ѡ҆чи́сти бжⷭ҇твеными вода́ми , подаю́щи чⷭ҇таѧ ве́лїю млⷭ҇ть . =крⷭ҇тобоⷢ҇ . Нескве́рнаѧ а҆́гница , сло́вꙋ нетлѣ́ннаѧ дв҃а мт҃и на крⷭ҇тѣ̀ ви́дѣвши ви́сима , и҆́же и҆з̾ неѧ̀ без̾ болѣ́зни прозѧ́бшагѡ . мт҃рьски подо́бнѡ рыда́ющи взыва́ше , оу҆вы̀ мнѣ̀ ча́до моѐ , ка́кѡ стра́ждеши , хотѧ̀ и҆зба́вити ѿ страсте́й без̾че́стїѧ чл҃ка .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Зе́млю до́брꙋю ѻ҆́ч҃е бг҃омꙋ́дре взо́равъ , слове́сное бо сѣ́мѧ прїе́мъ стори́цею є҆ѵⷢ҇а́льски , мно́го сꙋгꙋ́бѣише є҆щѐ и҆ ны́нѣ григо́рїе приводѧ̀ оу҆че́нїемъ твои́мъ бг҃ови . пою́ща , си́лѣ твое́й сла́ва чл҃колю́бче . Ꙗ҆́кѡ мо́лнїѧ ѻ҆́ч҃е восїѧ́въ житїѐ твоѐ , бѣсо́вскꙋю ле́сть ѿгна̀ , свѣ́томъ твоеѧ̀ добродѣ́тели , тѣ́хъ мра́къ прикоснꙋ́тисѧ невоз̾мо́же . тѣ́мже храмокраси́тель , дш҃етлѣ́нною ле́стїю валѧ́всѧ ꙗ҆́коже ка́мень , просвѣща́етсѧ . Ѻ҆́блакъ свѣ́телъ бжⷭ҇твенагѡ видѣ́нїѧ сподо́бисѧ . зако́на же бг҃оначерта́ннагѡ ꙗ҆́кѡ мѡѷсе́й ѻ҆́ч҃е прїѧ́тъ . бг҃осло́вїѧ и҆спы́тное наꙋчи́сѧ . сегѡ̀ ра́ди законополо́жникъ хрⷭ҇то́вѣ цр҃кви показа́сѧ , бг҃омꙋ́дре григо́рїе . Виті́йскагѡ блѧдосло́вїѧ оу҆кло́ньсѧ . и҆ сло́вомъ ѻ҆́ч҃е бл҃года́тнымъ ѡ҆зари́всѧ , а҆пⷭ҇льскꙋю вои́стинꙋ вла́сть на бѣсы̀ прїѧ́тъ . твоеѧ́ бо ѿбѣ́гаетъ свѣтѧ́щїѧ зарѝ , и҆́же тмѣ̀ пред̾ста́тель григо́рїе . боⷢ҇ . Ковче́гъ тѧ̀ и҆з̾дале́ча проѡ҆бразова̀ , прїе́мшїи зако́нъ бг҃онапи́санныи , во́ чревѣ живонача́льное сло́во заче́ншꙋ , несказа́ннѡ всенепоро́чнаѧ , пита́ющаго бога́тнѡ дш҃а , вопїю́щихъ , си́лѣ твое́й сла́ва чл҃колю́бче .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Дѣ́ланїемъ слове́съ , ѡ҆лѧденѣ́вшаѧ срⷣца̀ ѡ҆гла́ди , и҆ бжⷭ҇твеное сѣ́мѧ в̾ нѧ̀ ст҃лю в̾ве́рже . и҆ пло́дъ многокра́сныи и҆зба́вителю , спасе́нїе вѣ́рнымъ бг҃огл҃иве приведѐ . Бж҃їи пред̾ста́тель , ре́вностїю распалѧ́емь пома́за тѧ̀ ѳеди́мъ неприше́дша ѻ҆́ч҃е . бг҃ови всѧ́ческаѧ вѣ́дѧщемꙋ бл҃гоче́стнѡ оу҆пова́въ , и҆ честно́мꙋ житїю̀ надѣ́ѧвсѧ бг҃огла́се григо́рїе . Стрꙋѧ́ми твои́хъ повелѣ́нїи , и҆́дольскаѧ раз̾жже́нїѧ оу҆гаси́лъ є҆сѝ . и҆ поꙋче́ньми твои́ми вѣ́рныѧ оу҆тверди́лъ є҆сѝ премꙋ́дре . воз̾ше́дъ на́ горꙋ ꙗ҆́кѡ самꙋ́илъ видѣ́нїи , и҆ ꙗ҆́кѡ дꙋ́бъ бы́въ тве́рдостїю . Сщ҃е́нниче бг҃омꙋ́дре , твои́ми мл҃твами лю́тыхъ мѧ̀ и҆збавлѧ́й , мои́хъ прегрѣше́нїи рꙋкописа́нїе ѻ҆́ч҃е раздерѝ . сщ҃е́нникъ сы́и , ѿ́ бг҃а вла́сть прїи́мъ ѡ҆ставлѧ́ти прегрѣше́нїѧ . боⷢ҇ . Оу҆краси́сѧ дв҃о , дв҃ьствеными тѝ пречⷭ҇тыми добро́тами . и҆ пе́рвыи є҆́ввѣ покры́ла є҆сѝ стꙋ́дъ ѕлоѡ҆бра́зныи . хрⷭ҇та̀ ро́ждьши , ѡ҆дѣѧ́нїе без̾сме́ртїѧ да́рꙋющагѡ , тебѐ чтꙋ́щимъ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Є҆́зеро чꙋдодѣ́йствꙋѧ , братоꙋбі́йственое и҆з̾сꙋши́лъ є҆сѝ , и҆ рѣчно́е оу҆стремле́нїе оу҆ста́вилъ є҆сѝ всемꙋ́дре , же́злъ водрꙋзи́лъ є҆сѝ . и҆́же в̾корени́сѧ а҆́бїе и҆ возрастѐ бжⷭ҇твенымъ манове́нїемъ . Ре́вность бж҃їѧ поѧ́стъ тѧ̀ всебога́те , нетерпѣ́ бо зрѣ́ти бг҃а оу҆карѧ́ема , лю́ди сꙋемꙋ́дреныѧ твои́ми моли́твами бг҃оглаго́ливе погꙋби́лъ є҆сѝ . Оу҆мертви́сѧ , восхотѣ̀ оу҆ничижи́ти тѧ̀ ѻ҆каѧ́нныи є҆вре́инъ ѕлочести́выи . бг҃ꙋ тѧ̀ прославлѧ́ющꙋ бг҃омꙋ́дре григо́рїе , тогѡ̀ повелѣ́нїи соверши́телѧ ꙗ҆влѧ́ѧ . боⷢ҇ . На́йде вседѣ́тельныи натѧ̀ дх҃ъ всенепоро́чнаѧ , и҆ сло́во бж҃їе в̾ тѧ̀ всели́сѧ . и҆ пло́ть бы́сть неи҆зрече́ннѡ , пребы́въ неи҆змѣ́ннѡ .

конда́къ . гла́съ , в҃ . Чꙋде́съ мно́гихъ прїе́мъ ѿ бг҃а дѣ́йство , зна́меньми стра́шными бѣ́сы оу҆страши́лъ є҆сѝ . и҆ недꙋ́ги ѿгна́лъ є҆сѝ ѿ чл҃къ премꙋ́дре григо́рїе . чꙋдотво́рецъ же и҆менꙋ́ешисѧ , зва́нїе ѿ дѣ́лъ прїе́мъ . =и҆́косъ . Ѿ =кꙋ́дꙋ начнꙋ̀ похвали́ти ѻ҆каѧ́нныи , зрѧ̀ мно́гїѧ и҆ пречꙋ́дныѧ ве́щи . а҆́ще ѡ҆ житїѝ прпⷣбнагѡ начнꙋ̀ , ѿ ню́дъ невозмогꙋ̀ . всѧ́кагѡ бо оу҆ма̀ превосхо́дитъ житїѐ є҆гѡ̀ бжⷭ҇твеное . а҆́ще ѿ чꙋде́съ , и҆ в̾ си́хъ про́чее постыждꙋ́сѧ , па́че песка́ бо сꙋ́ще . сегѡ̀ ра́ди нарече́сѧ чꙋдотво́рецъ , зва́нїе ѿ дѣ́лъ прїе́мъ .

пѣ́снь , з҃ . і҆рмо́съ . Бж҃їѧ схожде́нїѧ ѻ҆́гнь оу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́троцы , в̾ пещѝ ра́дованною ного́ю , ꙗ҆́кѡ во́ свѣтѣ ликова́хꙋ пою́ще , блгⷭ҇ве́нъ бг҃ъ ѻ҆ц҃ъ на́шихъ . Ѻ҆ц҃ъ похвале́нїе , и҆ оу҆чи́телемъ честносло́вїе , свѣти́льникъ цр҃ко́вныи бл҃гоче́стїѧ сто́лпъ непоколеби́мъ ты̀ ꙗ҆ви́сѧ григо́рїе . зовы́и , бл҃гослове́нъ бг҃ъ ѻ҆ц҃ъ на́шихъ . Восїѧ́въ чꙋдесы̀ , вселе́ннꙋю просвѣти́лъ є҆сѝ . сегѡ̀ ра́ди бг҃омꙋ́дре совокꙋ́пльшесѧ , тебѐ оу҆бл҃жа́емъ , твои́ми словесы̀ пита́ющесѧ , и҆ пою́ще , бл҃гослове́нъ бг҃ъ ѻ҆ц҃ъ на́шихъ . И҆сцѣле́нїѧ премꙋ́дре немощны́мъ всѣ́мъ и҆сточи́лъ є҆сѝ . и҆злїѧ́сѧ бо бл҃года́ть ѡ҆би́льнѣйшаѧ во оу҆стна́хъ твои́хъ чꙋдодѣ́йственаѧ , є҆ю́же взыва́ше , бл҃гослове́нъ бг҃ъ ѻ҆ц҃ъ на́шихъ . боⷢ҇ . Ны́нѣ всѧ̀ и҆спо́лнишасѧ свѣ́та бжⷭ҇твенагѡ тобо́ю пречⷭ҇таѧ . ты́ бо две́рь ꙗ҆ви́сѧ є҆ю́же ми́рови бг҃ъ бесѣ́дова . просвѣща́ѧ вѣ́рою зовꙋ́щихъ , бл҃гослове́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃очести́вымъ лю́тѣ раз̾жжѐ . си́лою же лꙋ́чшею спасе́ныхъ ви́дѣвъ , творцꙋ̀ и҆ и҆зба́вителю вопїѧ́ше , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Тобо́ю ѡ҆бога́щшесѧ трⷪ҇чнымъ сїѧ́нїемъ , є҆диносꙋ́щныѧ и҆ чⷭ҇тны́ѧ григо́рїе . твоѐ ны́нѣ торжество̀ соверша́юще , бл҃года́тїю чꙋдодѣ́йственою ѡ҆зари́тисѧ про́симъ , вопїю́ще , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Ꙗ҆́кѡ новоꙗ҆вле́нно зерца́ло прїе́мъ всебога́те сїѧ́нїѧ нача́льнагѡ бжⷭ҇тва̀ , ми́ръ просвѣти́лъ є҆сѝ , лꙋчѝ посыла́ѧ свѣ́та , пѣ́снь правосла́вїѧ пою́щимъ . дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Бг҃омъ покрыва́емь , бл҃гоче́стїю вина̀ бл҃гочести́вымъ соблюде́сѧ премꙋ́дре , в̾ горѣ̀ сокрыва́емь , ꙗ҆́кѡ законополо́жникъ дрꙋгі́и мѡѷсе́й . содѣ́телѧ и҆ и҆зба́вителѧ пѣ́ти наꙋча́ѧ . ѻ҆́троцы бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . боⷢ҇ . Свѣ́та незаходи́магѡ бы́сть ѻ҆би́тель пречⷭ҇таѧ , дв҃ьствеными добро́тами свѣтѧ́щи , и҆ всѧ̀ ѡ҆зарѧ́ющи , и҆́же бцⷣꙋ тѧ̀ и҆́стиннꙋю и҆сповѣ́дающихъ ѿ дш҃и , и҆ вопїю́щихъ , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки .

пѣ́снь , ѳ҃ . і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . И҆зѧ́щнагѡ житїѧ̀ сїѧ́ѧ свѣ́томъ , ны́нѣ свѣ́тꙋ вели́комꙋ пред̾стои́ши бг҃отво́рными чꙋдодѣ́йствы , ꙗ҆́кѡ побѣди́тель вѣнчава́емь прпⷣбне , ѻ҆́ч҃е ст҃лю чꙋдотво́рче григо́рїе бг҃омꙋ́дре . свѣти́ло цр҃ко́вное , правосла́внымъ оу҆добре́нїе . Напра́вити молѝ твои́ми оу҆че́нїи црⷭ҇кое ны́нѣ сщ҃е́нство , и҆ и҆збра́нїе и҆ ѡ҆сщ҃е́нїе ст҃лю , и҆́же вѣ́рнѡ ны́нѣ па́мѧть твою̀ соверша́ющихъ полꙋчи́ти вы́шнѧгѡ црⷭ҇тва , и҆ бжⷭ҇твенагѡ весе́лїѧ сподо́битисѧ оу҆молѝ . Побѣди́въ бѣсо́вскїѧ прило́ги , и҆ плотьска́ѧ покори́въ мꙋдрова́нїѧ . и҆ сщ҃е́нникъ неѕло́бивъ и҆ прпⷣбенъ бы́въ , в̾ пра́ведное ѡ҆дѣѧ́нїе ѡ҆дѣ́ѧнъ чꙋдотво́рче . пред̾стои́ши прⷭ҇то́лꙋ всѣ́хъ цр҃ѧ съ дерзнове́нїемъ всебл҃же́нне . боⷢ҇ . Ꙗ҆ви́сѧ ѽ дв҃о мт҃и бж҃їѧ , па́че є҆стества̀ ро́ждьши пло́тїю бл҃го́е сло́во , є҆́же ѻ҆ц҃ъ ѿ́ срⷣца своегѡ̀ ѿры́гнꙋ , пре́жде всѣ́хъ вѣ́къ ꙗ҆́кѡ бл҃гъ . є҆го́же ны́нѣ и҆ тѣле́съ вы́шша разꙋмѣва́емъ , а҆́ще и҆ в̾ тѣ́ло ѡ҆блече́сѧ .

свѣти́ленъ . Чꙋдесы̀ восїѧ́лъ є҆сѝ чꙋдотво́рче григо́рїе . слꙋжи́телѧ и҆́дольскаго и҆зба́вилъ є҆сѝ ѿ тлѧ̀ и҆ пре́лести бѣсо́вскїѧ , ка́мень под̾виза́въ повелѣ́нїемъ . є҆́зеро же и҆з̾сꙋши́въ , и҆ рѣкꙋ̀ оу҆ста́вилъ є҆сѝ . тѣ́мже тѧ всѝ согла́снѡ похвалѧ́емъ требл҃же́нне . боⷢ҇ . Ра́дꙋисѧ вѣ́рнымъ похвало̀ . ра́дꙋисѧ прпⷣбнымъ оу҆твержде́нїе . ра́дꙋисѧ пра́веднымъ сла́во . ра́дꙋисѧ свѣ́те сꙋ́щимъ во тмѣ̀ . ра́дꙋисѧ хра́ме прест҃ы́и . ра́дꙋисѧ бж҃їи раю̀ . ра́дꙋисѧ клѧ́твѣ разрѣше́нїе , бл҃гослове́наѧ мр҃і́е .

На стихо́внѣ , во ѻ҆кта́и . и҆ ст҃о́мꙋ , сти́хъ : гла́съ , д҃ . сщ҃е́нницы твоѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твоѝ возра́дꙋютсѧ . Ст҃льства и҆збра́нїе ѿ́ бг҃а прїе́мъ , и҆ въ бжⷭ҇твенꙋю ри́зꙋ с̾вы́ше ѡ҆дѣ́ѧвсѧ . пре́жде невѣ́рствїѧ сы́ны , ча́да свѣ́та и҆ наслѣ́дники показа́лъ є҆сѝ . бж҃їѧ бо премꙋ́дрость , бл҃года́тїю и҆з̾лїѧ́вшисѧ во оу҆стна́хъ твои́хъ . пресла́внымъ веще́мъ самотво́рче гдⷭ҇нь григо́рїе . тѣ́мже ны́нѣ в̾ па́мѧти твое́й моли́сѧ хрⷭ҇тꙋ̀ бг҃ꙋ ѡ҆ дш҃а́хъ на́шихъ . сла́ва . гла́съ , и҃ . Пресловꙋ́щагѡ в̾ чꙋдесѣ́хъ сщ҃е́нника , и҆ без̾дꙋ́шнаѧ стыдѧ́щесѧ пресла́внѡ прелага́хꙋсѧ . є҆́зеро бо ѡ҆лѧдинѣ̀ бра́тїю смирѧ́ющи . же́злъ же воз̾раста́ше , рѣкꙋ̀ ѡ҆бꙋзда́ющи . ка́мень сло́вомъ преложи́сѧ , приводѧ̀ невѣ́рныѧ к̾ твоемꙋ̀ разꙋмѣ́нїю . є҆го́же ра́ди пода́ждь бж҃е дш҃а́мъ на́шимъ ве́лїю ми́лость . =и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . ѽ =пресла́вное чꙋ́до . Что̀ ви́димое чꙋ́до ,꙳ є҆́же ѻ҆чи́ма мои́ма ,꙳ зри́тсѧ ѽ влⷣко ,꙳ содержа́и всю̀ тва́рь ,꙳ на́ древѣ распина́ешисѧ ,꙳ и҆ оу҆мерщвѧ́ешисѧ всѣ́мъ даѧ́и жи́знь ,꙳ бцⷣа пла́чꙋщи глаго́лаше ,꙳ є҆гда̀ оу҆зрѣ̀ на крⷭ҇тѣ̀ ви́сима ,꙳ и҆́же и҆з̾ неѧ̀ неи҆зрече́ннѡ восїѧ́вша бг҃а и҆ чл҃ка .

На литꙋргі́и , бл҃же́нна , на и҃ . ѿ кано́на , пѣ́снь г҃ ѧ , и҆ ѕ҃ ѧ .

проки́менъ , ѱл҃о́мъ дв҃довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ кори́нѳѡмъ . заⷱ҇ , рн҃а .= а҆ллилꙋ́їѧ . сщ҃е́нницы твоѝ ѡ҆блекꙋ́тсѧ в̾ пра́вдꙋ , и҆ прпⷣбнїи твоѝ воз̾ра́дꙋютсѧ . =є҆ѵⷢ҇а́лїе , ѿ =матѳе́ѧ . заⷱ҇ , л҃д , ѿ полꙋ̀ . прича́стенъ . в=̾ па́мѧть вѣ́чнꙋю бꙋ́детъ пра́ведникъ .

Прпⷣбномꙋ ни́кѡнꙋ чꙋдотво́рцꙋ . =На ма́лѣй вече́рни , на гдⷭ҇и возва́хъ , стⷯры . гла́съ , а҃ . поⷣ . прехва́льнїи мч҃нцы . Ѻ҆́ч҃е прпⷣбне ни́кѡне ,꙳ ѿ ю҆́ности своемꙋ̀ влⷣцѣ подо́бѧсѧ ,꙳ ди́вно житїѐ проше́лъ є҆сѝ .꙳ ѻ҆́бразъ всѣ́мъ добродѣ́телемъ собо́ю показꙋ́ѧ .꙳ чл҃колю́бїѧ бж҃їѧ бл҃года́ти ꙳ пꙋчи́нꙋ въ себѣ̀ и҆мѣ́ѧ .꙳ тѣ́мже моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю ми́лость . =двⷤа . Ѻ҆́ч҃е пребл҃же́нне ни́кѡне ,꙳ кто̀ по́двиги и҆ страда́нїѧ твоѧ̀ и҆сповѣ́сть ,꙳ ꙗ҆́же подъѧ́лъ є҆сѝ хрⷭ҇тꙋ̀ послѣ́дꙋѧ .꙳ не́далъ бо є҆сѝ сна̀ свои́ма ѻ҆чи́ма , нивѣ́ждома дрема́нїѧ .꙳ и҆́миже дш҃ꙋ свою̀ ѿ страсте́й свободи́лъ є҆сѝ ,꙳ слеза́ми непреста́нными ѡ҆чища́ѧ .꙳ и҆ ны́нѣ моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . Ѻ҆́ч҃е прпⷣбне ни́кѡне ,꙳ чистотꙋ̀ тѣле́снꙋю и҆ дш҃е́вное оу҆миле́нїе ,꙳ ѿ ю҆́ности своеѧ̀ сохрани́лъ є҆сѝ .꙳ и҆ ѻ҆чи́ма бг҃а зрѣ́ти сподо́бисѧ ,꙳ томꙋ̀ є҆ди́номꙋ слꙋжа̀ стра́хомъ и҆ тре́петомъ .꙳ наста́вникъ бы́въ своемꙋ̀ ста́дꙋ .꙳ тѣ́мже моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сла́ва . гла́съ , ѕ҃ . Прїиди́те и҆́нокъ мно́жество дне́сь , дх҃о́внѡ возвесели́мсѧ в̾ наро́читомъ пра́здницѣ . и҆́бо пресвѣ́тлаѧ па́мѧть ѻ҆ц҃а на́шегѡ наста̀ . в̾ ню́же соше́дшесѧ согла́снѡ воспое́мъ гл҃юще , ра́дꙋисѧ ни́кѡне пресла́вне , нбⷭ҇ныи чл҃че , и҆ земны́и а҆́нг҃ле , и҆ дх҃а ст҃а́гѡ ѻ҆би́телище . ра́дꙋисѧ на́мъ похвала̀ и҆ оу҆твержде́нїе , и҆ всеѧ̀ рꙋ́сскїѧ землѝ пресвѣ́тлыи свѣти́льниче . ра́дꙋисѧ ꙗ҆́кѡ трⷪ҇цѣ пред̾стоѧ̀ со а҆́нг҃лы . є҆ѧ́же непреста́ннѡ молѝ , дарова́ти дш҃а́мъ на́шимъ ми́ръ и҆ ве́лїю ми́лость .

и҆ ны́нѣ , боⷢ҇ . дневны́и .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ .= Д=о́мъ дх҃о́вныи ,꙳ бы́лъ є҆сѝ прпⷣбне ,꙳ ѕѣ́льнымъ поще́нїемъ ,꙳ ꙗ҆́кѡ бл҃гово́нными а҆рама́ты ,꙳ напаѧ́ѧ дш҃ꙋ свою̀ .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Дрема́нїѧ не́далъ є҆сѝ ,꙳ ѻ҆чи́ма свои́ма прпⷣбне ,꙳ до́ндеже дш҃ꙋ ѿ страсте́й свободи́лъ є҆сѝ .꙳ и҆ возмѣ́здїе ѡ҆брѣ́те ,꙳ со а҆́нг҃лы водворе́нїе .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ за́повѣдехъ є҆гѡ̀ восхо́щетъ ѕѣлѡ̀ . Бжⷭ҇твенымъ жела́нїемъ ,꙳ оу҆ѧзви́всѧ прпⷣбне ,꙳ житїѐ непоро́чнѡ проходѧ̀ ,꙳ до́ндеже дости́же ,꙳ црⷭ҇кагѡ прⷭ҇то́ла .

сла́ва . гла́съ , и҃ . И҆мѧ́ше бжⷭ҇твенаѧ твоѧ̀ дш҃а и҆ непоро́чнаѧ , дх҃а прест҃а́гѡ и҆сполне́нїе ѻ҆́ч҃е прпⷣбне ни́кѡне . ѿ ю҆́ности носѧ̀ соверше́нъ смы́слъ любо́вїю хрⷭ҇то́вою разгара́ѧсѧ , томꙋ̀ послѣ́довалъ є҆сѝ . держа́внѡ над̾ страстьмѝ воцр҃и́лсѧ є҆сѝ . ко́зни дѣ́монскїѧ низ̾ло́жъ пове́рже . по́двигъ тече́нїѧ своегѡ̀ соверши́лъ є҆сѝ . и҆ ны́нѣ во́ свѣтѣ невече́рнѣмъ водворѧ́ешисѧ трⷪ҇цѣ со а҆́нг҃лы пред̾стоѧ̀ , молѝ и҆зба́витисѧ ста́дꙋ твоемꙋ̀ ви́димыхъ и҆ неви́димыхъ вра́гъ . и҆ спасѝ дш҃а на́ша .

и҆ ны́нѣ , боⷢ҇ . дневны́и .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , а҃ . Послꙋша́нїю до́брыи рачи́тель бы́въ , прпⷣбне ни́кѡне приснопа́мѧтне . цр҃квь бо прекраснꙋ̀ ст҃ы́ѧ трⷪ҇цы , въ похвалꙋ̀ ѻ҆ц҃ꙋ своемꙋ̀ воз̾дви́же . тѣ́мже и҆ мы̀ ча́да твоѧ̀ любо́вїю вопїе́мъ тѝ , сла́ва да́вшемꙋ ти крѣ́пость , сла́ва вѣнча́вшемꙋ тѧ̀ . сла́ва дѣ́ющемꙋ тобо́ю всѣ́мъ и҆сцѣле́нїе .= сла́ва , и҆ ны́нѣ , боⷢ҇ . Г=аврїи́лꙋ провѣща́вшꙋ тѝ дв҃о , є҆́же ра́дꙋисѧ . и҆ со́ гласомъ воплоща́шесѧ всѣ́хъ влⷣка , в̾ тебѣ̀ ст҃ѣ́мъ кїѡ́тѣ , ꙗ҆́коже речѐ пра́ведныи дв҃дъ . ꙗ҆ви́сѧ простра́ннѣйши нб҃съ , поноси́вши зижди́телѧ своегѡ̀ . сла́ва все́льшемꙋсѧ в̾ тѧ̀ , сла́ва проше́дшемꙋ и҆з̾ тебѐ , сла́ва свободи́вшемꙋ на́съ ржⷭ҇тво́мъ твои́мъ .

та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , бл҃же́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на́ и҃ . гла́съ , ѕ҃ . поⷣ . в=сѐ оу҆пова́нїе . Ве́сь ѿ ю҆́ности гдⷭ҇ви возложи́сѧ ,꙳ ни́кѡне прпⷣбне ,꙳ земнꙋ́ю красотꙋ̀ и҆ сла́вꙋ ни во что́же вмѣни́въ .꙳ хрⷭ҇та̀ є҆ди́наго воз̾люби́лъ є҆сѝ ,꙳ и҆ тогѡ̀ крⷭ҇тъ на ра́мо взе́мъ ,꙳ бжⷭ҇твенѡ воѡ҆рꙋжи́всѧ .꙳ ла́вры вели́кагѡ се́ргїѧ дости́глъ є҆сѝ ,꙳ и҆ ѿ негѡ̀ посыла́емь быва́еши ,꙳ к̾ дх҃о́вномꙋ настоѧ́телю а҆ѳана́сїю ,꙳ и҆ та́мѡ жела́емыхъ тобо́ю ѿ негѡ̀ сподоблѧ́ешисѧ .꙳ и҆ ны́нѣ на́ нб҃сѣхъ со а҆́нг҃лы трⷪ҇цы пред̾стоѧ̀ ни́кѡне ѻ҆́ч҃е на́шъ ,꙳ молѝ спасти́сѧ дш҃а́мъ на́шимъ . Стра́шное хрⷭ҇то́во прише́ствїе ,꙳ в̾ срⷣцы си прїи́мъ ни́кѡне прпⷣбне ,꙳ разꙋ́мнѡ мимотекꙋ́щихъ житїѧ̀ оу҆стꙋпи́лъ є҆сѝ .꙳ и҆ сла́вꙋ маловре́меннꙋю презрѣ́въ ,꙳ молча́нїе воспрїѧ́лъ є҆сѝ .꙳ на земли́ бо мꙋ́жески подвиза́сѧ .꙳ и҆ пло́ть потща́лсѧ є҆сѝ покори́ти дх҃ови .꙳ дш҃ꙋ же и҆ оу҆́мъ ,꙳ ѿ страсте́й ѡ҆чи́стивъ .꙳ ревнова́въ житїю̀ вели́кагѡ се́ргїѧ .꙳ с̾ ни́мже ны́нѣ на́ нб҃сѣхъ прⷭ҇то́лꙋ влⷣцѣ всѣ́хъ пред̾стои́ши ,꙳ съ дерзнове́нїемъ молѧ́сѧ ѡ҆ дш҃а́хъ на́шихъ . Прпⷣбне ѻ҆́ч҃е ни́кѡне ,꙳ и҆́з̾млада возлюби́въ добро́тꙋ влⷣчню ,꙳ и҆ к̾ томꙋ̀ жела́нїе невозвра́тнѡ и҆мѣ́ѧ .꙳ ѻ҆те́чество и҆ ро́дъ ѡ҆ста́вилъ є҆сѝ .꙳ бога́тство и҆ сла́вꙋ возненави́дѣвъ ,꙳ хрⷭ҇тꙋ̀ є҆ди́номꙋ послѣ́довалъ є҆сѝ .꙳ равноа́нг҃льнѡ во ѻ҆би́тели прⷭ҇ты́ѧ трⷪ҇цы поживѐ .꙳ и҆ ѡ҆гра́дꙋ и҆́ночествꙋющимъ созда̀ ,꙳ и҆ ны́нѣ на́ нб҃сѣхъ ,꙳ со а҆́нг҃лы трⷪ҇цѣ пред̾стои́ши ,꙳ ни́кѡне прпⷣбне ,꙳ со дерзнове́нїемъ молѧ́сѧ ѡ҆ дш҃а́хъ на́шихъ .

и҆́ны стихѣ́ры . гла́съ , д҃ . поⷣ . и҆́же зва́нныи свы́ше .= Є҆гда̀ бжⷭ҇твеное раче́нїе ,꙳ на́йде натѧ̀ бл҃же́нне ни́кѡне ,꙳ тогда̀ мирска́ѧ мꙋдрова́нїѧ дале́че ѿри́нꙋвъ .꙳ к̾ бжⷭ҇твеномꙋ се́ргїю прите́клъ є҆сѝ .꙳ и҆ ѿ негѡ̀ наставлѧ́емь , посыла́ешисѧ в̾ монасты́рь , высо́кое нарица́емо ,꙳ к̾ тогѡ̀ оу҆ченикꙋ̀ а҆ѳана́сїю .꙳ и҆ та́мѡ ѻ҆́бразꙋ и҆́ноческомꙋ ,꙳ и҆ сщ҃е́нствꙋ сподоблѧ́ешисѧ .꙳ и҆ мно́гимъ добродѣ́телемъ ѻ҆́бразъ бы́въ .꙳ тѣ́мже мо́лимъ тѧ̀ ,꙳ молѝ прпⷣбне ,꙳ спастѝ и҆ просвѣти́ти дш҃а на́ша . Сꙋдо́мъ бж҃їимъ ,꙳ и҆ повелѣ́нїемъ вели́кагѡ ,꙳ па́ки ко ѻ҆ц҃ꙋ и҆ па́стырю ,꙳ в̾ монасты́рь прихо́диши .꙳ и҆ ѿ негѡ̀ с̾ вели́кою любо́вїю ѻ҆́ч҃е прїе́млешисѧ .꙳ ѿ ню́дꙋ же и҆ по преставле́нїи дх҃о́внагѡ си ѻ҆ц҃а ,꙳ па́стыремь ѿ негѡ̀ наставлѧ́ешисѧ ,꙳ то́йже ѻ҆би́тели ,꙳ и҆дѣ́же цр҃ковь прекраснꙋ̀ ,꙳ в̾ сла́вꙋ ст҃ы́ѧ трⷪ҇цы прпⷣбне ни́кѡне воз̾дви́гъ .꙳ є҆ѧ́же непреста́ннѡ ѡ҆ всѣ́хъ чтꙋ́щихъ тѧ̀ молѝ ,꙳ спастѝ и҆ просвѣти́ти дш҃а на́ша . Є҆гда̀ бжⷭ҇твеное наи́тїе ,꙳ на́йде натѧ̀ прпⷣбне ,꙳ тогда̀ мирска́ѧ возненави́дѣ ,꙳ и҆ хрⷭ҇тꙋ̀ прихо́диши .꙳ и҆ тогѡ̀ ꙗ҆ре́мъ взе́мъ ,꙳ по стопа́мъ бл҃же́ннагѡ се́ргїѧ и҆зво́ли ходи́ти ,꙳ и҆дѣ́же ѻ҆́бразъ мно́гимъ добродѣ́телемъ бы́въ ,꙳ и҆ мно́гимъ воздержа́нїемъ и҆ моли́твами ,꙳ подо́бникъ своемꙋ̀ ѻ҆ц҃ꙋ во все́мъ .꙳ тѣ́мже мо́лимъ тѧ̀ ,꙳ моли́сѧ прпⷣбне , спастѝ и҆ просвѣти́ти дш҃а на́ша . =сла́ва . гла́съ , в҃ . Жела́нїемъ бꙋ́дꙋщихъ прпⷣбне добродѣ́тельнѡ по́жилъ є҆сѝ . чистото́ю дш҃е́вною , спасе́ныѧ пꙋтѝ проше́лъ є҆сѝ . и҆ го́рдаго ѕмїѧ̀ воздержа́нїемъ оу҆би́лъ є҆сѝ . нбⷭ҇наѧ же во́инства оу҆диви́лъ є҆сѝ терпѣ́нїемъ свои́мъ , чи́стое прїѧ́телище дх҃ꙋ пречи́стомꙋ ѻ҆́ч҃е бы́лъ є҆сѝ . и҆ сегѡ̀ ра́ди ѿ вседѣ́тельныѧ десни́цы вѣнча́сѧ . и҆ чꙋде́съ дарова́нїи ѿ негѡ̀ сподо́бисѧ , молѝ спасти́сѧ дш҃а́мъ на́шимъ . и҆ ны́нѣ , боⷢ҇ . Пре́йде сѣ́нь зако́ннаѧ , бл҃года́ти прише́дши , ꙗ҆́коже бо кꙋпина̀ не с̾гара́ше , распала́ющисѧ . та́кѡ и҆ дв҃аѧ родила̀ є҆́сть , и҆ дв҃ою пребы́сть . в̾мѣ́стѡ столпа̀ ѻ҆́гненнагѡ , пра́ведное воз̾сїѧ̀ сл҃нце . в̾мѣ́стѡ мѡѷсе́ѧ хрⷭ҇то́съ , во спасе́нїе дш҃а́мъ на́шимъ . вы́ходъ . проки́менъ , дню̀ .

Ѿ премꙋ́дрости соло́мони , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ премꙋ́дрости соло́мони , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ помышле́нїе и҆́хъ пред̾ вы́шнимъ . сегѡ̀ ра́ди прїи́мꙋтъ црⷭ҇твїе бл҃голѣ́пїѧ , и҆ вѣне́цъ добро́ты ѿ рꙋкѝ гдⷭ҇ни . ꙗ҆́кѡ десни́цею покры́етъ и҆́хъ , и҆ мы́шцею защи́титъ и҆́хъ . прїи́метъ всѐ ѡ҆рꙋ́жїе ре́вности є҆гѡ̀ , и҆ воѡ҆рꙋже́но сотвори́тъ созда́нїе , в̾ ме́сть враго́мъ . и҆ ѡ҆блече́тъ ѧ҆̀ во бронѧ̀ пра́вды , и҆ возложи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непобѣди́мъ преподо́бїе . по ѡ҆стри́тъ же напра́сенъ гнѣ́въ во ѡ҆рꙋ́жїи . и҆ побо́ретъ с̾ ни́мъ ми́ръ на безꙋ́мныѧ . и҆ по́йдꙋтъ праволꙋ́чнѣ стрѣ́лы мо́лнїины , ꙗ҆́кѡ ѿ бл҃гокрꙋ́гла лꙋ́ка ѻ҆блако́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рости и҆спо́лнь , падꙋ́тъ гра́ды . вознегодꙋ́етъ на ни́хъ вода̀ морска́ѧ , рѣ́ки же потекꙋ́тъ жесточа́е . сопроти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хоръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлодѣѧ́нїе преврати́тъ престо́лы си́льныхъ . слы́шите оу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ конце́мъ землѝ . внꙋши́те содержа́щїи мно́жества , и҆ гордѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ не многолѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрость человѣ́кѡмъ . и҆ во́зрастъ ста́рости , житїѐ нескве́рно . бл҃гоꙋго́денъ бг҃ови бы́въ , воз̾лю́бленъ бы́сть . и҆ живы́и посредѣ̀ грѣ́шникъ , преста́вленъ бы́сть . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хоти , премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та мно́га , оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни положи́ша в̾ помышле́нїи такова́гѡ , ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

На литі́и , стихѣ́ры . гла́съ , а҃ . Дне́сь ликоствꙋ́етъ ра́достнѡ бжⷭ҇твенаѧ и҆ вели́каѧ ла́вра , и҆ хва́литсѧ твои́ми бг҃оꙋго́дными дѣѧ́нїи , и҆мѣ́ющи твоѧ̀ ст҃ы́ѧ мо́щи бл҃же́нне ни́кѡне , ѿ ни́хже ст҃ы́ню почерпа́емъ ѡ҆би́льнѡ . подава́ютъ бо здра́вїе с̾ вѣ́рою притека́ющимъ къ честнѣ́й ти ра́цѣ . тѣ́мже просвѣ́щшесѧ тобо́ю гл҃емъ , сподо́би и҆ на́съ сла́вѣ нбⷭ҇нѣй хрⷭ҇то́вѣ бл҃же́нне . и҆ своѐ ста́до сохранѧ́й , и҆ спасѝ дш҃а на́ша . гла́съ , в҃ . Па́мѧть твоѧ̀ во́ вѣки пребыва́етъ прпⷣбне ѻ҆́ч҃е ни́кѡне . и҆ кро́тость срⷣца твоегѡ̀ оу҆го́дниче хрⷭ҇то́въ бл҃же́нне просїѧ̀ , па́че сл҃нчнагѡ сїѧ́нїѧ , ѡ҆зарѧ́ющи вѣ́рныхъ срⷣца̀ . и҆́бо вои́стинꙋ честна́ѧ ра́ка бжⷭ҇твеныхъ моще́й твои́хъ , ꙗ҆́кѡ трꙋба̀ велегла́снѡ свидѣ́тельствꙋетъ . бл҃гоꙋха́ющи бл҃года́тїю прест҃а́гѡ дх҃а , и҆ прогонѧ́ющи мра́къ грѣхо́вныи . и҆ на́съ наꙋча́ющи бл҃годари́ти и҆ сла́вити бг҃а , тебѐ просла́вльшаго . гла́съ , г҃ . Ве́лїѧ сла́ва житїѧ̀ твоегѡ̀ ѻ҆́ч҃е на́шъ ни́кѡне . всѧ̀ ꙗ҆́же земна́ѧ ѡ҆ста́вивъ , є҆ди́наго хрⷭ҇та̀ воз̾люби́лъ є҆сѝ , и҆ томꙋ̀ слꙋжа̀ чи́стою со́вѣстїю , на землѝ а҆́нг҃льски поживѐ . бѣсо́вскаѧ выше́нїѧ разори́лъ є҆сѝ . воз̾ше́дъ на высотꙋ̀ нбⷭ҇нꙋю . бл҃же́нъ є҆сѝ , ꙗ҆́кѡ та́кѡ хрⷭ҇тꙋ̀ рабо́тавъ . тѣ́мже и҆ мы̀ тобо́ю пꙋ́ть живота̀ позна́вше , тѧ̀ непреста́ннѡ оу҆бл҃жа́емъ . сла́ва . гла́съ , в҃ . Прпⷣбне и҆ бг҃обл҃же́нне ѻ҆́ч҃е на́шъ ни́кѡне , гра́дъ живꙋ́щїи бж҃їи , вы́ше ра́зꙋма бл҃ги́хъ воспрїѧ́лъ є҆сѝ жела́нїѧ . а҆́нг҃льское житїѐ соверши́въ , и҆ ны́нѣ на́ нб҃сѣхъ водворѧ́ешисѧ , и҆спе́рва подо́бнꙋ добро́тꙋ ѻ҆́браза сохрани́въ . и҆ на подо́бствїе ꙗ҆́коже мо́щно восхо́дъ без̾па́костнѡ ѡ҆брѣ́тъ . и҆ бг҃ꙋ со дерзнове́нїемъ пред̾стоѧ̀ , зерца́ломъ разꙋ́мнымъ чи́стѡ зри́ши ст҃ꙋ́ю трⷪ҇цꙋ . за чтꙋ́щїѧ тѧ̀ вѣ́рою и҆ любо́вїю помоли́сѧ ѻ҆́ч҃е на́шъ ни́кѡне . и҆ нн҃ѣ , боⷢ҇ . Ѽ чꙋдесѝ но́вагѡ , па́че всѣ́хъ дре́внихъ чꙋде́съ , кто́ бо позна̀ мт҃рь бе́з̾мꙋжа ро́ждьшꙋю , и҆ на рꙋкꙋ̀ носѧ́щꙋ , и҆́же всю̀ тва́рь содержа́щагѡ . бж҃їе є҆́сть сло́во ро́ждьшесѧ . є҆го́же ꙗ҆́кѡ млⷣнца пречⷭ҇таѧ на рꙋкꙋ̀ свое́ю носи́вши , и҆ мт҃рьне дерзнове́нїе к̾ немꙋ̀ и҆мꙋ́щи , непреста́й молѧ́щи ѡ҆ чтꙋ́щихъ тѧ̀ , оу҆ще́дрити ми́ра , и҆ спастѝ дш҃а на́ша .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ .= Ѿ= ю҆́ности ѻ҆те́ческомꙋ житїю̀ ,꙳ поревнова́въ во все́мъ прпⷣбне .꙳ тѣ́мже ѡ҆ста́вилъ є҆сѝ всѧ̀ ,꙳ ꙗ҆́же в̾ ми́рѣ жите́йскаѧ мꙋдрова́нїѧ .꙳ молѧ̀ ѡ҆ на́съ чл҃колю́бца .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Послꙋша́нїе ѿ́ срⷣца жела́ѧ мꙋ́дре .꙳ ми́ра и҆ ꙗ҆́же в̾ не́мъ жите́йскихъ ѿрече́сѧ .꙳ и҆ сегѡ̀ ра́ди в̾ вы́шнихъ ,꙳ со а҆́нг҃лы хрⷭ҇тꙋ̀ пред̾стои́ши ,꙳ ѡ҆ всѣ́хъ молѧ́сѧ .

сти́хъ : что̀ воз̾да́мъ гдⷭ҇ви ѡ҆ всѣ́хъ ,꙳ и҆́хже воз̾да́стъ ми . А҆́ще и҆ ю҆́нъ тѣ́ломъ ,꙳ прпⷣбне ни́кѡне ,꙳ но многолѣ́тныхъ житїе́мъ превоз̾ ше́лъ є҆сѝ ,꙳ всѐ плотьско́е мꙋдрова́нїе ѿсѣ́къ .꙳ прпⷣбномꙋ послꙋша́нїю повинꙋ́лсѧ є҆сѝ .

сла́ва . гла́съ , и҃ . Помышлѧ́ѧ ѻ҆́но житїѐ , и҆ вѣ́къ пребыва́ющїи . тѣ́мже вѣ́къ се́й ꙗ҆́кѡ маловреме́ненъ ѡ҆ста́вилъ є҆сѝ , и҆ потща́лсѧ є҆сѝ тлѣ́ющими нетлѣ́ннаѧ стѧжа́ти . ѿ ню́дꙋ же и҆ тѣ́ло порабо́ти дх҃ови , да хрⷭ҇та̀ є҆ди́ного приѡ҆брѧ́щеши . є҆го́же молѝ спасти́сѧ всѣ́мъ , и҆́же любо́вїю сщ҃е́ннꙋю па́мѧть твою̀ в̾ пѣ́снехъ при́снѡ почита́ющимъ . и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твои́хъ ра́бъ мольбы̀ прїимѝ всенепоро́чнаѧ , всѣ́мъ подаю́щи ѡ҆чище́нїе прегрѣше́нїемъ . ны́нѣ на́ша моле́нїѧ прїе́мши , молѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , ст҃о́мꙋ , двⷤа . и҆ бцⷣе дв҃о ра́дꙋисѧ ,= аⷤ .=

На оу҆́трени , на бг҃ъ гдⷭ҇ь , тропа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , д҃ . Вѣ́къ и҆́же на землѝ , ꙗ҆́кѡ преходѧ́щїи возненави́дѣвъ бл҃же́нне . и҆ вѣ́къ ѻ҆́нъ ꙗ҆́кѡ непреходѧ́щїи ѿ́ срⷣца возлюби́въ , є҆мꙋ́же и҆ наслѣ́дникъ ꙗ҆ви́сѧ . ѡ҆ всѣ́хъ на́съ хрⷭ҇та̀ молѝ , прⷭ҇нѡ в̾ пѣ́снехъ прпⷣбне твою̀ па́мѧть почита́ющихъ . =два́жды . сла́ва , и҆ ны́нѣ , боⷢ҇ . Ѡ҆бнови́ла є҆сѝ чⷭ҇таѧ бжⷭ҇твенымъ ржⷭ҇тво́мъ свои́мъ , и҆стлѣ́вшее страстьмѝ земноро́дныхъ сꙋщество̀ ме́ртвеное . и҆ воз̾ста́вила є҆сѝ ѿ сме́рти к̾ жи́зни нетлѣ́нїѧ . тѣ́мже тѧ̀ по́ долгꙋ дв҃о пресла́внаѧ всѝ оу҆блажа́емъ , ꙗ҆́коже прорекла̀ є҆сѝ .

По в҃ , стихоло́гїи , сѣда́ленъ . гла́съ , в҃ . И҆́ноческое житїѐ ѿ́ срⷣца прпⷣбне воз̾люби́въ . и҆ сегѡ̀ ра́ди ми́ра и҆ ꙗ҆́же в̾ ми́рѣ воз̾ненави́дѣвъ бл҃же́нне ни́кѡне , и҆ дх҃о́вномꙋ си ѻ҆ц҃ꙋ послꙋша́нїемъ и҆́скренимъ вда́лсѧ є҆сѝ . с̾ ни́ми же гдⷭ҇ви моли́сѧ спасти́сѧ всѣ́мъ на́мъ . двⷤа . сла́ва , и҆ ны́нѣ , боⷢ҇ . Млрⷭ҇дїѧ сꙋ́щи и҆сто́чникъ , млⷭ҇ти сподо́би на́съ бцⷣе , при́зри на́ люди согрѣши́вшїѧ . ꙗ҆вѝ ꙗ҆́кѡ прⷭ҇нѡ си́лꙋ твою̀ , на тѧ́ бо оу҆пова́юще ра́дꙋисѧ вопїе́мъ ти , ꙗ҆́коже и҆ногда̀ гаврїи́лъ беспло́тнымъ а҆рхистрати́гъ .

По полїєлеѡ́сѣ , сѣда́ленъ . гла́съ , и҃ . Премꙋ́дрости и҆́з̾млада подо́бїю навы́къ . и҆ сегѡ̀ ра́ди всѧ̀ ꙗ҆́же в̾ ми́рѣ воз̾ненави́дѣвъ прпⷣбне , хрⷭ҇та̀ є҆ди́наго воз̾люби́лъ є҆сѝ . ѿ сю́дꙋ же дх҃о́вномꙋ си ѻ҆ц҃ꙋ , всеконе́чнѡ послꙋша́нїю вда́лсѧ є҆сѝ . ѿ него́же тоѧ́же ѻ҆би́тели па́стырь пресла́внѡ оу҆строѧ́ешисѧ , и҆ мно́гимъ въ добродѣ́тели ѻ҆́бразъ бы́въ . с̾ ни́мже моли́сѧ гдⷭ҇ви ни́кѡне прпⷣбне , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . два́жды . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ оу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи , и҆ ꙗ҆́кѡ млⷣнца дои́ши зижди́телѧ и҆ гдⷭ҇а . тѣ́мже а҆́нг҃льскїи собо́ръ и҆ чл҃ческїи ро́дъ , без̾преста́ни сла́вимъ прест҃о́е ржⷭ҇тво̀ твоѐ . и҆ согла́снѡ вопїе́мъ ти , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , воспѣва́ющимъ досто́йнѡ сла́вꙋ твою̀ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . всѧ́ко дыха́нїе . =є҆ѵⷢ҇а́лїе , ѿ =матѳе́ѧ . заⷱ҇ , м҃г . ѱало́мъ , н҃ .

сла́ва . мл҃твъ ра́ди прпⷣбнагѡ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Ѿ ю҆́ности прпⷣбне и҆зво́ли бг҃ꙋ рабо́тати . тогда̀ дх҃о́вное раче́нїе распалѝ дш҃ꙋ твою̀ , и҆ в̾ско́рѣ роди́телѧ ѡ҆ста́вивъ , вели́кагѡ ѻ҆ц҃а дости́глъ є҆сѝ . ѻ҆́нъ же ви́дѣвъ твоѐ дш҃е́вное жела́нїе , вма́лѣ и҆скꙋше́нїе налага́етъ , да тѧ̀ сотвори́тъ теплѣ́йша рачи́телѧ . ты́ же смире́нїе показꙋ́еши , рече́нагѡ ѻ҆ц҃е́мъ достиза́еши . и҆ ѿ негѡ̀ навы́че добродѣ́телемъ , ко ѻ҆ц҃ꙋ па́ки воз̾враща́ешисѧ , и҆ па́стыремъ поставлѧ́ешисѧ . и҆ ны́нѣ пребл҃же́нне ни́кѡне , пред̾стоѧ̀ прⷭ҇то́лꙋ всѣ́хъ цр҃ѧ , и҆спросѝ ми́ръ ми́рови , и҆ спасе́нїе дш҃а́мъ на́шимъ .

Кано́нъ , бцⷣѣ . гла́съ , д҃ . со і҆рмосо́мъ , на́ ѕ҃ . и҆ прпⷣбномꙋ , на и҃ . =Кано́нъ , прпⷣбномꙋ . творе́нїе пахо́мїѧ є҆рмона́ха , и҆́же ѿ ст҃ы́ѧ горы̀ . є҆мꙋ́же краегране́сїе сицево̀ : похвалꙋ̀ бл҃же́нномꙋ ни́кѡнꙋ содѣва́ю . гла́съ , д҃ . пѣ́снь , а҃ . і҆рмо́съ . Ѿ=ве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́в̾ : Прпⷣбне ѻ҆́ч҃е ни́кѡне , молѝ бг҃а ѡ҆ на́съ .= Премꙋ́дростїю ра́зꙋма оу҆краша́емь прпⷣбне ни́кѡне , ве́сь хрⷭ҇то́ви порабо́тивсѧ , к̾ немꙋ́ же жела́нїе своѐ и҆мы́и . є҆го́же молѝ спастѝ ѿ бѣ́дъ пою́щихъ тѧ̀ . =Ѡ҆ всѣ́хъ хрⷭ҇та̀ молѝ прпⷣбне ни́кѡне , и҆́же па́мѧть твою̀ любо́вїю пою́щихъ , и҆зба́витисѧ вѣ́чнагѡ мꙋче́нїѧ . да тебѐ всѝ ꙗ҆́кѡ тепла̀ пред̾ста́телѧ пѣ́сньми велича́емъ . Хрⷭ҇то́ви ве́сь порабо́тивсѧ прпⷣбне ни́кѡне , и҆ к̾ немꙋ̀ всѐ жела́нїе и҆мы́и . и҆ тогѡ̀ ра́ди любвѐ ми́ра с̾ жела́ньми є҆гѡ̀ ѿре́ксѧ . сегѡ̀ ра́ди тѧ̀ всѝ пѣ́сньми оу҆бл҃жа́емъ ни́кѡне всебл҃же́нне . Всѐ своѐ жела́нїе к̾ бг҃ꙋ мꙋ́жески впери́въ , въ вы́шнихъ селе́нїе сотворѝ пресла́внѡ . тѣ́мже тѧ̀ пѣ́сньми бл҃же́нне ни́кѡне почита́емъ . А҆́ще и҆ далечѐ житїе́мъ но бли́зъ вѣ́рою и҆ любо́вїю , дх҃о́внагѡ своегѡ̀ настоѧ́телѧ . и҆ с̾ ни́мъ вкꙋ́пѣ пресла́внѡ чꙋдеса̀ твори́ши . вкꙋ́пѣ же и҆ бг҃ови пред̾стоитѐ , ѡ҆ всѣ́хъ на́съ молѧ́щесѧ . боⷢ҇ . Премꙋ́дрости вышемꙋ́дростныѧ прїѧ́телище бы́сть всенепоро́чнаѧ . сво́й бо хра́мъ ѿ твои́хъ пречⷭ҇тыхъ крове́й , чⷭ҇таѧ созда́ти бл҃гои҆зво́ли на спасе́нїе на́ше . катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . Твоѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ совокꙋ́пльши дх҃о́венъ оу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы сподо́би . Лю́ди всѧ̀ и҆́же тебѐ вѣ́дꙋщїѧ , и҆ застꙋпле́нїѧ твоегѡ̀ ча́юща непре́зри ѻ҆́ч҃е . но є҆ли́кѡ мо́щнѡ пред̾ста́тельствꙋй всѣ́мъ , поле́знаѧ просѧ̀ мл҃твами сѝ . Оу҆пова́нїе всѣ́мъ є҆сѝ , бл҃же́нне ни́кѡне и҆ прибѣ́жище ѡ҆ всѣ́хъ на́съ моли́сѧ , датѧ̀ любо́вїю всѝ воспѣва́емъ прⷭ҇нопа́мѧтне . Бжⷭ҇твенымъ жела́нїемъ прпⷣбне ни́кѡне раз̾жига́емь , мирскꙋ́ю красотꙋ̀ преѡ҆би́дѣлъ є҆сѝ , и҆́ноческое житїѐ воз̾люби́въ . тѣ́мже бы́сть прпⷣбнымъ є҆диножи́тель и҆ пра́веднымъ . боⷢ҇ . И҆сцѣле́нїй тѧ̀ и҆сто́чникъ , в̾ твою̀ оу҆тро́бꙋ вше́дъ показа̀ . мт҃и бж҃їѧ пречⷭ҇таѧ мою̀ оу҆́бѡ дш҃ꙋ и҆сцѣлѝ . катава́сїѧ : Твоѧ̀ пѣвцы̀ .

сѣда́ленъ . гла́съ , г҃ . Оу҆крѣплѧ́емь бжⷭ҇твеною си́лою прпⷣбне ни́кѡне , воз̾мо́глъ є҆сѝ ѡ҆скꙋдѣ́нїе ѿ без̾бо́жныхъ а҆га́рѧнъ и҆спо́лнити . цр҃ковь бо но́вꙋ и҆ ѻ҆би́тель краснѣ́йшꙋ па́че воз̾дви́же . тѣ́мже тѧ̀ всѝ оу҆бл҃жа́емъ . двⷤа . сла́ва , и҆ нн҃ѣ , боⷢ҇ . Бжⷭ҇твеное селе́нїе бы́сть сло́ва , є҆ди́на пречⷭ҇таѧ мт҃и дв҃о , чистото́ю а҆́нг҃лы превосходѧ́щи . и҆́же па́че всѣ́хъ менѐ пе́рсть бы́вша , ѡ҆скверне́на плотьски́ми согрѣше́ньми , ѡ҆чи́сти мл҃твъ свои́хъ бжⷭ҇твеными вода́ми , подаю́щи чⷭ҇таѧ ве́лїю млⷭ҇ть .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вопїю́щїѧ , сла́ва хрⷭ҇тѐ си́лѣ твое́й . Невозвра́тнѡ ше́ствовавъ в̾водѧ́щїи пꙋ́ть к̾ нбⷭ҇номꙋ гра́дꙋ ни́кѡне прпⷣбне . и҆дѣ́же наста́ви тѧ ст҃ы́и дх҃ъ , ѻ҆би́тель и҆мѣ́ѧ срⷣце твоѐ . Смире́нїе возносѧ́щее ни́кѡне бл҃же́нне въ срⷣцы и҆мѣ́лъ є҆сѝ . ѿ сю́дꙋ же тѧ̀ и҆ мы̀ мо́лимъ оу҆ще́дрити смире́нїе на́ше . Страстьмѝ разли́чными коле́блемыхъ , и҆ вѣ́рою притека́ющихъ , к̾ твоемꙋ̀ гро́бꙋ бл҃же́нне ни́кѡне , ст҃ы́мъ тѝ хода́тайствомъ всѣ́хъ посѣтѝ ми́лостивнѡ к̾ чл҃колю́бцꙋ . Мра́къ страсте́й ѿ́ срⷣца своегѡ̀ , ты̀ прпⷣбне ни́кѡне ѡ҆чи́стивъ , хрⷭ҇то́ва повелѣ́нїѧ вои́стинꙋ свѣ́тъ прїе́мъ , в̾ постѣ̀ просїѧ́лъ є҆сѝ оу҆мертви́въ тѣ́ло , дх҃омъ же ни́кѡне ѡ҆́жилъ є҆сѝ . боⷢ҇ . Ѡ҆чище́нїе всѣ́мъ земны́мъ , вѣ́рою молю̀ и҆ припа́даю , бл҃гослове́наѧ , мл҃твами сѝ сꙋдїю̀ и҆ сн҃а твоегѡ̀ млⷭ҇тива сотворѝ , ꙗ҆́кѡ да по́ долгꙋ сла́влю тѧ̀ . катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща . Оу҆́зкїи и҆ приско́рбныи пꙋ́ть ше́ствовалъ є҆сѝ прпⷣбне ни́кѡне , вос̾хожде́ньми бжⷭ҇твеными срⷣца своегѡ̀ , а҆́може ѻ҆ц҃а твоегѡ̀ наста́виша тѧ̀ моли́твы . Ѿ грѣхо́вныхъ болѣ́зней мѧ̀ ѡ҆блегчѝ ско́рбныхъ . и҆ срⷣца моегѡ̀ лю́тость оу҆толѝ . и҆ согрѣше́нїемъ ѡ҆ставле́нїе и҆спросѝ . и҆́маши бо послꙋ́шающа хрⷭ҇та̀ , чи́стыѧ ти мл҃твы .= Стра́сти тѣле́сныѧ воз̾держа́нїемъ ѻ҆́ч҃е оу҆вѧди́въ . ꙗ҆́кѡ дре́во многоплодови́то , пло́дъ чꙋ́денъ прино́сиши бг҃ови , своѧ̀ чꙋ́днаѧ и҆справле́нїѧ ни́кѡне прпⷣбне . Всесвѣ́тлыи свѣти́льникъ ꙗ҆ви́сѧ , ѡ҆зарѧ́ѧ пою́щїѧ тѧ , ни́кѡне прпⷣбне . и҆ сегѡ̀ ра́ди мо́лимъ тѧ̀ , вѣ́чнагѡ мꙋче́нїѧ и҆зба́ви на́съ пою́щихъ тѧ̀ . =боⷢ҇ . Оу҆ма̀ моегѡ̀ оу҆врачꙋ́й и҆з̾стꙋпле́нїе всенепоро́чнаѧ , и҆ и҆сцѣлѝ стра́сти дш҃е́вныѧ , и҆ оу҆ны́нїѧ тмꙋ̀ ѿженѝ . ꙗ҆́кѡ да восхвалю́ тѧ по достоѧ́нїю бцⷣе всепѣ́таѧ . катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Бжⷭ҇твеное сѐ и҆ всечⷭ҇тно́е соверша́юще пра́зднество , бг҃омꙋ́дрїи бж҃їѧ мт҃ре , прїиди́те рꙋка́ми воспле́щемъ , ѿ неѧ̀ ро́ждьшагосѧ вѣ́рою сла́вѧще . Своѐ срⷣце прпⷣбне ни́кѡне ст҃ѣ́й трⷪ҇цѣ жили́ще и҆ до́мъ со́здалъ є҆сѝ . всѝ и҆́же вѣ́рою притека́ющїи к̾ чⷭ҇тнѣ́й ти ра́цѣ , просвѣще́нїе и҆ ѡ҆сщ҃е́нїе и҆ ѡ҆чище́нїе , всебл҃же́нне ни́кѡне прїе́млемъ . Твоѧ̀ всебл҃же́нне ни́кѡне сщ҃е́нныѧ и҆ всест҃ы́ѧ мо́щи , во́ гробѣ лежа́ще недꙋ́ги оу҆врачꙋ́ютъ . бѣсо́вскїѧ же полкѝ попалѧ́ютъ всегда̀ . вѣ́рнымъ же и҆сточа́ютъ и҆сцѣле́нїѧ незави́стнаѧ , и҆́же тебѐ по достоѧ́нїю при́снѡ бл҃жа́щимъ . Ꙗ҆́кѡ ве́сь и҆́же хрⷭ҇то́ви приближа́ѧсѧ ꙗ҆снѣ́йши , помѧнѝ всѣ́хъ , и҆́же вѣ́рою помина́ющихъ тѧ ни́кѡне всече́стне , грѣхо́мъ проще́нїе оу҆ хрⷭ҇та̀ просѧ̀ , и҆ нбⷭ҇нагѡ црⷭ҇твїѧ воспрїѧ́тїе . боⷢ҇ . Є҆ди́на всѣ́мъ поможе́нїе помозѝ на́мъ бѣ́дствꙋющимъ . и҆ рꙋ́кꙋ пода́ждь , и҆ к̾ приста́нищꙋ в̾ведѝ спасе́нїѧ , ѻ҆трокови́це бг҃обл҃года́тнаѧ .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , д҃ . Дх҃о́вномꙋ сѝ настоѧ́телю ѻ҆́ч҃е ни́кѡне всѧ́чески прилѣпи́всѧ , и҆ ѿ негѡ̀ наставлѧ́емь во все́мъ хрⷭ҇то́ви порабо́тивсѧ . и҆́нокѡмъ бы́сть чинонача́льникъ , и҆ прпⷣбнымъ сожи́тель . с̾ ни́ми же хрⷭ҇та̀ бг҃а молѝ непреста́ннѡ ѡ҆ всѣ́хъ на́съ . и҆́косъ . Ка́кѡ воз̾могꙋ̀ воспѣ́ти твоѧ̀ и҆справле́нїѧ , и҆лѝ и҆зрещѝ трꙋды̀ твоѧ̀ , и҆́миже трꙋди́лсѧ є҆сѝ по ѻ҆ц҃ѣ свое́мъ , а҆́ще не ты̀ пода́си мѝ сло́во недосто́йномꙋ рабꙋ̀ своемꙋ̀ . ты́ бо бы́сть по ѻ҆ц҃ѣ и҆́нокѡмъ нача́льникъ . с̾ ни́ми же хрⷭ҇та̀ бг҃а молѝ непреста́ннѡ ѡ҆ всѣ́хъ на́съ .

пѣ́снь , з҃ . і҆рмо́съ . Непослꙋжи́ша тва́ри бг҃омꙋ́дрїи па́че зижди́телѧ , но ѻ҆́гненное преще́нїе , мꙋ́жески попра́вше ра́довахꙋсѧ пою́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Всѣ́хъ текꙋ́щихъ вре́менныхъ страсте́й прпⷣбне ни́кѡне ѿрази́въ . всю́ бо наде́жꙋ к̾ бг҃ꙋ стѧжа́въ . є҆го́же ра́ди дѣ́йствꙋеши пресла́внаѧ чꙋдеса̀ . Твоеѧ̀ дш҃и тве́рдое и҆ бл҃гостоѧ́нїе ра́зꙋма , прпⷣбне ни́кѡне , ни ка́ко же лꙋка́выи воз̾мо́же соврати́ти . бг҃ꙋ помога́ющꙋ тѝ досточꙋ́дне . Ми́рови оу҆мертви́сѧ , бꙋ́дꙋщїи живо́тъ наслѣ́дꙋѧ ѻ҆́ч҃е , и҆сцѣле́нїемъ бжⷭ҇твенꙋю бл҃года́ть и҆сточа́еши , пою́щимъ , бл҃гослове́нъ бг҃ъ ѻ҆ц҃ъ на́шихъ . Нельсти́внѡ навы́къ , пре́жде тебѐ бы́вшихъ ѻ҆ц҃ъ , по́стническомꙋ житїю̀ прпⷣбне . но тѣ́хъ житїе́мъ пожи́въ бг҃обл҃же́нне , воспѣва́ѧ , бл҃гослове́нъ бг҃ъ ѻ҆ц҃ъ на́шихъ . боⷢ҇ . Гл҃ѡмъ проро́ческимъ послѣ́дꙋюще дв҃о , бцⷣꙋ тѧ̀ и҆сповѣ́дꙋемъ . роди́ бо ѻ҆троча̀ всѣ́хъ дре́внѣйше , є҆мманꙋ́илъ нарица́емыи . є҆мꙋ́же зове́мъ , бл҃гослове́нъ бг҃ъ ѻ҆ц҃ъ на́шихъ . катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Мꙋ́жествовавъ , побѣди́лъ є҆сѝ страстна́ѧ взыгра́нїѧ всѧ̀ . оу҆́мъ просвѣще́нъ и҆мѣ́ѧ воз̾мо́глъ є҆сѝ ꙗ҆́же ви́дѣ ѻ҆ц҃а творѧ́ща , сїѧ̀ дѣ́тели и҆спо́лнити . тѣ́мже тѧ̀ всѝ оу҆бл҃жа́емъ , ни́кѡне всеблаже́нне . Мы́слїю ѡ҆чище́ною , премꙋ́дре ни́кѡне бг҃ꙋ приближа́ѧсѧ , всѣ́мъ всѧ́къ бы́въ , да хрⷭ҇та̀ приѡ҆брѧ́щеши . тѣ́мже в̾ нбⷭ҇ныѧ ѡ҆би́тели всели́всѧ прпⷣбне , дерзнове́ннѡ зри́ши ст҃ꙋ́ю трⷪ҇цꙋ . ю҆́же непреста́ннѡ молѝ , спастѝ всѣ́хъ , и҆́же правосла́внѡ тѧ̀ почита́ющихъ . Серпо́мъ моли́твенымъ ѻ҆́ч҃е ни́кѡне страстна́ѧ те́рнїѧ и҆ссѣ́къ , и҆ воз̾дѣ́лавъ воз̾держа́нїѧ ра́ломъ дш҃е́внꙋю зе́млю , в̾ве́рглъ є҆сѝ сѣ́мена бл҃гоче́стїѧ в̾ не́й . тѣ́мже и҆сцѣле́нїѧ плоды̀ пожина́еши . Добродѣ́телемъ тѧ прїѧ́телище , нарица́емъ пребл҃же́нне . ꙗ҆́кѡ молча́нїю дрꙋ́га , и҆ бдѣ́нїю дѣ́лателѧ . и҆ ѻ҆́бразъ цѣломꙋ́дрїѧ , и҆ моли́твѣ жили́ще некра́домо . и҆ чꙋдесе́мъ сокро́вище . и҆ мл҃твеника почита́ющимъ па́мѧть твою̀ ни́кѡне бл҃же́нне . боⷢ҇ . Мт҃и бж҃їѧ всенепоро́чнаѧ , дꙋшѝ моеѧ̀ , ꙗ҆́звы и҆сцѣлѝ . сла́сти оу҆толѝ пло́ти моеѧ̀ . ѡ҆мраче́ное срⷣце моѐ просвѣтѝ , и҆ оу҆мирѝ оу҆́мъ мо́й , ѿ всѧ́кагѡ вре́да и҆ вра́жїихъ мѧ и҆зба́ви напа́стей . катава́сїѧ : Хва́лимъ блгⷭ҇ви́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃омъ просвѣща́емъ . да ликовствꙋ́етъ же , беспло́тныхъ оу҆мо́въ є҆стество̀ , почита́ѧ ст҃о́е торжество̀ бж҃їѧ мт҃ре . и҆ да пое́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Сле́зъ твои́хъ проли́тїемъ грѣхо́вныи ѻ҆́гнь погаси́лъ є҆сѝ . без̾стра́стїѧ же во́дꙋ , и҆ и҆сцѣле́нїи чи́стагѡ пи́ва пою́щимъ и҆сточа́еши , бл҃же́нне ни́кѡне досточꙋ́дне . Ра́ка и҆дѣ́же лежи́тъ ст҃о́е тѣ́ло твоѐ прпⷣбне ни́кѡне . чꙋдесе́мъ бл҃года́ть и҆сточа́етъ , просвѣща́ющи на́ша дш҃а и҆ тѣлеса̀ . и҆ ѡ҆богаща́ѧ пред̾ста́телѧ тѧ̀ те́пла , и҆ застꙋ́пника и҆мꙋ́щихъ . Дне́сь с̾ на́ми собо́ри а҆́нг҃лъ и҆ прпⷣбныхъ веселѧ́тсѧ , в̾ па́мѧть твою̀ бл҃же́нне ни́кѡне . с̾ ни́ми же помина́й на́съ чтꙋ́щихъ тѧ̀ вѣ́рнѡ , досточꙋ́дне . Оу҆ста́ви сщ҃е́нными тѝ моли́твами , воз̾двиза́емое наны̀ смꙋще́нїе , и҆ чл҃къ всѣ́хъ ѡ҆ѕлобле́нїе . ꙗ҆́кѡ и҆мы́и дерзнове́нїе ко влⷣцѣ и҆ бг҃ꙋ на́шемꙋ ни́кѡне досточꙋ́дне . боⷢ҇ . Ѽ па́че оу҆ма̀ чꙋде́съ твои́хъ . бж҃їе бо сло́во воплоти́вшеесѧ є҆ди́наго родила̀ є҆сѝ , па́че є҆стества̀ мт҃и дв҃о , всѧ́ческаѧ бжⷭ҇твенымъ сѝ хотѣ́нїемъ мꙋ́дрѣ держа́ща и҆ ѡ҆кормлѧ́юща . катава́сїѧ : Всѧ́къ зе́менъ .= Досто́йнѡ є҆́сть . свѣти́ленъ . Ст҃ы́ни хра́мъ бы́лъ є҆сѝ прпⷣбне , по бжⷭ҇твеномꙋ прича́стїю ра́йскїи граждани́нъ . в̾ не́мже пита́ешисѧ невоз̾бра́ннѡ дре́ва разꙋ́мнаго и҆ нетлѣ́нныѧ сла́вы . па́мѧть творѧ̀ ни́кѡне прпⷣбне , ѡ҆ и҆́же вѣ́рою хва́лѧщихъ тѧ̀ ѻ҆́ч҃е бг҃омꙋ́дре . =два́жды . сла́ва , и҆ ны́нѣ , боⷢ҇ . Ра́дꙋисѧ вѣ́рнымъ похвало̀ . ра́дꙋисѧ прпⷣбнымъ оу҆твержде́нїе . ра́дꙋисѧ правосла́внымъ сла́во . ра́дꙋисѧ свѣ́те сꙋ́щимъ во тмѣ̀ . ра́дꙋисѧ хра́ме прест҃ы́и . ра́дꙋисѧ бж҃їи раю̀ . ра́дꙋисѧ клѧ́твѣ разрѣше́нїе , бл҃гослове́наѧ мр҃і́е .

На хвали́тѣхъ , стихѣ́ры . гла́съ , ѕ҃ . поⷣ . всѐ оу҆пова́нїе . Вели́каѧ и҆справле́нїѧ ,꙳ по́стническихъ по́двигъ , вели́кагѡ ѻ҆ц҃а вои́стинꙋ чꙋ́днагѡ се́ргїѧ ,꙳ ни́кѡне бл҃же́нне ,꙳ привлеко́ша тѧ̀ жела́ннѣ ,꙳ по́стническомꙋ сосло́вїю .꙳ и҆ ди́внѡ добродѣ́телемъ є҆гѡ̀ воѡ҆бра́жьсѧ ,꙳ томꙋ̀ сожи́тїемъ .꙳ и҆ сострада́лецъ по́двигѡмъ до́блественъ ,꙳ ꙗ҆́кѡ оу҆чени́къ є҆мꙋ̀ и҆́стиненъ .꙳ оу҆чи́тель же хꙋдо́женъ тогѡ̀ ча́дѡмъ .꙳ и҆ ны́нѣ моли́сѧ прпⷣбне ,꙳ поми́ловатисѧ дш҃а́мъ на́шимъ . вⷤ . Мно́жество по́двигъ ,꙳ и҆ пото́въ твои́хъ по́стническихъ ,꙳ раз̾дражи́ша сопоста́та пра́ведныхъ .꙳ наведе́ бо ꙗ҆зы́ки раскопа́ти жили́ще чⷭ҇тно́е .꙳ но поты̀ прпⷣбнагѡ вели́кагѡ се́ргїѧ , во́ вѣки сїѧ́ютъ пре́д̾ бг҃омъ .꙳ тѣ́мже тобо́ю па́че оу҆твердѝ ,꙳ и҆ бо́льше сїѐ распространѝ .꙳ но мо́лимъ тѧ̀ прпⷣбне ,꙳ подви́гнꙋвъ вели́каго на мл҃твꙋ ,꙳ воз̾бранѧ́й при́снѡ ва́рваръ стремле́нїе ,꙳ и҆ никогда́же попꙋстѝ ѡ҆бори́ти ,꙳ ни́кѡне бл҃же́нне . Дре́во добровѣ́тно ,꙳ сѣ́нно и҆ бл҃гопло́дно ,꙳ на вода́хъ прекра́снѡ живо́тныхъ ,꙳ вои́стинꙋ насажда́емо .꙳ пита́ѧ приходѧ́щїѧ и҆ ѡ҆сѣнѧ́ѧ ѡ҆палѧ́емыѧ ,꙳ ты̀ є҆сѝ ѻ҆́ч҃е прпⷣбне ,꙳ напоѧ́емь оу҆че́нїи се́ргїѧ ,꙳ и҆́миже пита́ѧ своѧ̀ оу҆ченикѝ .꙳ тѣ́мже мо́лимъ тѧ̀ , ѡ҆сѣнѝ лю́ди ,꙳ застꙋпа́ѧ ѿ ꙗ҆зы́ческихъ наше́ствїи ,꙳ низ̾лага́ѧ и҆́хъ пре́жде воста́нїѧ .꙳ на́съ же в̾ ми́рѣ соблюдѝ ,꙳ ни́кѡне твои́ми мл҃твами . сла́ва . гла́съ , в҃ . Па́мѧть пра́ведника , ра́дость боѧ́щимсѧ гдⷭ҇а . хвала́ бо є҆гѡ̀ сла́дость вѣ́рнымъ є҆́сть . бл҃же́нъ бо вои́стинꙋ є҆го́же и҆збра̀ и҆ прїѧ́тъ гдⷭ҇ь . тѣ́мже мы̀ веселѧ́щесѧ почита́емъ па́мѧть прпⷣбнагѡ . є҆мꙋ́же ны́нѣ в̾ па́мѧть є҆гѡ̀ молѧ́щесѧ , ꙗ҆́кѡ и҆мꙋ́щꙋ дерзнове́нїе ѡ҆ побѣ́дѣ , на́мъ на ꙗ҆зы́ки проти́вныѧ . и҆ низ̾ложи́ти востаю́щїѧ непра́веднѡ . пода́ти же ми́ра ми́рови , и҆ цр҃квамъ є҆диномы́слїе . и҆ дш҃а́мъ на́шимъ ве́лїю млⷭ҇ть . и҆ ны́нѣ , боⷢ҇ . Всѐ оу҆пова́нїе моѐ , к̾ тебѣ̀ возлага́ю мт҃и бж҃їѧ , сохрани́ мѧ во свое́мъ си кро́вѣ . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . ѿ кано́на , прпⷣбномꙋ , пѣ́снь г҃ ѧ , и҆ ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃о́мꙋ . сла́ва , конда́къ ст҃о́мꙋ . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃о́мꙋ . конда́къ хра́мꙋ . сла́ва , ст҃о́мꙋ . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ= гала́тѡмъ . заⷱ҇ , сг҃і . а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , в̾ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =матѳе́ѧ . заⷱ҇ , і҃ . =прича́стенъ . в̾ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>