18 ноября: свв. мчч. Платона и Романа

МЦⷭ҇А ТОГО́ЖЕ ВЪ И҃І ДН҃Ь

ст҃ы́хъ мч҃нкъ платѡ́на и҆ рѡма́на . =Ве́черъ , на гдⷭ҇и возва́хъ , стⷯры . ст҃о́мꙋ платѡ́нꙋ . гла́съ , и҃ . поⷣ . ѽ =пресла́вное чꙋ́до . И҆спо́лнь до́блїѧ мꙋ́дрости ,꙳ оу҆до́въ ѿрѣ́занїе ,꙳ и҆ ѿсѣче́нїе тѣлесѐ ,꙳ и҆ ѻ҆́гнь непостоѧ́нныи ,꙳ гла́дъ и҆ сме́рть ,꙳ мꙋ́жественымъ нра́вомъ претерпѣ́лъ є҆сѝ .꙳ вѣ́чнѡ пред̾лежа́щꙋю тѝ сла́вꙋ ,꙳ ѡ҆жида́ѧ непреста́ющꙋю ,꙳ и҆ пред̾зрѧ̀ вѣ́чнꙋющее бл҃же́нство . Всѧ́ко прев̾ше́дъ чꙋ́вство ,꙳ и҆ к̾ вы́шнѣй жи́зни ,꙳ преложи́въ мы́сль .꙳ по́мысломъ бг҃омꙋ́дрымъ ,꙳ и҆ дш҃е́ю великомꙋ́дреною ,꙳ хꙋ́дость и҆ смире́нїе воспрїе́мъ ,꙳ ви́димыхъ небре́гъ .꙳ тѣ́мже стрꙋ́жемь и҆ ѻ҆гне́мъ пали́мь за хрⷭ҇та̀ мч҃нче ,꙳ до́блественѣ претерпѣ́лъ є҆сѝ . Всѧ́ко вра́жїе наше́ствїе ,꙳ и҆ гони́телей оу҆стремле́нїѧ ,꙳ разрꙋши́лъ є҆сѝ бл҃года́тїю .꙳ побѣ́днымъ вѣнце́мъ ,꙳ оу҆вѧзе́сѧ всебога́те .꙳ нетлѣ́ннагѡ весе́лїѧ ,꙳ и҆ неи҆з̾глаго́ланнагѡ сподоблѧ́емь бжⷭ҇твенагѡ сїѧ́нїѧ ,꙳ и҆дѣ́же ны́нѣ бѣ̀ ,꙳ грѣхо́въ и҆спросѝ ѡ҆ставле́нїе хва́лѧщимъ тѧ̀ .

и҆́ны , стⷯры . ст҃о́мꙋ рѡма́нꙋ . гла́съ , д҃ . поⷣ . ꙗ҆́кѡ до́блѧ . Посто́мъ раз̾жиза́емь ,꙳ страда́нїемъ наѡ҆щрѧ́емь ,꙳ и҆ мно́гими мꙋ́ками оу҆мꙋча́емь ,꙳ ме́чь бы́въ ѡ҆бою́дꙋ ѻ҆́стръ ,꙳ с̾сѣка́ѧ ѡ҆полче́нїѧ бѣсо́вскаѧ рѡма́не .꙳ страда́льцемъ оу҆добре́нїе .꙳ бжⷭ҇твенаѧ похвало̀ .꙳ честно́е цр҃кви оу҆краше́нїе ,꙳ свое́ю кро́вїю сконча́вшихсѧ всехва́льне . Растѧза́емь и҆ стрꙋ́жемь ,꙳ и҆ в̾ темни́цѣ затворѧ́емь ,꙳ и҆ ꙗ҆зы́къ сла́вне ѿє́млемь ,꙳ и҆ че́люсти сокрꙋша́емы .꙳ и҆ коне́цъ бл҃же́нныи лю́тою оу҆да́вою ,꙳ страстоте́рпче прїе́млѧ .꙳ непоколеби́мь и҆ непрекло́ненъ ꙗ҆ви́сѧ ,꙳ дѣ́йствомъ рѡма́не бжⷭ҇твенагѡ дх҃а .꙳ тѣ́мже вѣ́рою восхвалѧ́емъ тѧ̀ . Виті́йствꙋетъ младе́нецъ ,꙳ и҆ оу҆дивлѧ́етъ безꙋ́мныѧ .꙳ и҆ чⷭ҇тны́ми противле́нїи оу҆краша́етсѧ .꙳ и҆ конча́нїемъ просвѣща́етсѧ .꙳ ѡ҆богаща́етсѧ бл҃госла́вїемъ ст҃ы́хъ страда́лецъ .꙳ и҆́хже ре́вность стѧжа̀ достобл҃же́нне ,꙳ рѡма́не доблемꙋ́дре .꙳ с̾ ни́ми же разрѣше́нїе долго́въ всѣ́мъ на́мъ ,꙳ низ̾посла́ти моли́сѧ .

сла́ва . гла́съ , ѕ҃ . Стра́шныѧ и҆ пресла́вныѧ побѣ́ды гдⷭ҇и мч҃нка твоегѡ̀ . и҆́бо рыбаре́й поревнова́въ дерзнове́нїю . и҆ мрежеплете́нымъ бг҃осло́вїемъ , платѡ́ново блѧдосло́вїе , и҆ и҆стори́ческое басносло́вїе , словесы̀ и҆ дѣ́лы посрамѝ . ко́жею ѡ҆дира́емь и҆ главо́ю оу҆сѣка́емь . проли́тїемъ кро́ве є҆гѡ̀ , врага̀ оу҆дави́въ . но ѽ мч҃нкѡмъ оу҆добре́нїе . и҆́же со дерзнове́нїемъ проповѣ́давъ и҆́мѧ хрⷭ҇то́во вели́кое , и҆спросѝ чꙋдотво́рче платѡ́не всебл҃же́нне , пода́ти дш҃а́мъ на́шимъ ве́лїю млⷭ҇ть .

и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . З=рѧ́щи тѧ распина́ема хрⷭ҇тѐ тебѐ ро́ждьшаѧ , вопїѧ́ше тѝ , что̀ зри́мое сѐ , є҆́же ви́жꙋ ны́нѣ та́инство сн҃е мо́й . ка́кѡ на́ древѣ оу҆мира́еши , пло́тїю стра́ждꙋщи жи́зни пода́телю .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Страстьмѝ ст҃ы́хъ ꙗ҆́же по тебѣ̀ прїѧ́ша , оу҆моле́нъ бꙋ́ди гдⷭ҇и , и҆ всѧ̀ на́ша болѣ́зни и҆ стрⷭ҇ти и҆сцѣлѝ , чл҃колю́бче мо́лимъ тѧ̀ . сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . є҆ди́нъ кано́нъ , во ѻ҆кта́и . и҆ ст҃ы́мъ , два̀ . кано́нъ , ст҃о́мꙋ платѡ́нꙋ . є҆мꙋ́же краегране́сїе сицево̀ : твои́хъ похвале́нїи платѡ́не пою̀ простра́нство . гла́съ , и҃ . пѣ́снь , а҃ . і҆рмо́съ . Воѡ҆рꙋже́на фараѡ́на погрꙋзѝ , чꙋдотворѧ́й дре́вле , мѡѷсе́йскїи же́ѕлъ крⷭ҇тоѡ҆бра́знѡ проразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша ходѧ́ща спасѐ , пѣ́снь бг҃ови воз̾сыла́юща .

запѣ́въ : Ст҃ы́и мч҃нче платѡ́не , молѝ бг҃а ѡ҆ на́съ .= Вѣ́чнагѡ црⷭ҇твїѧ сла́вне , чистѣ́йшꙋю проходѧ̀ ширинꙋ̀ . ѿ всѧ́кїѧ ско́рби и҆ напа́стныѧ тѣсноты̀ , пою́щїѧ тѧ̀ спаса́й , невоз̾вра́тнѡ ше́ствꙋюща , к̾ нбⷭ҇нѣй стезѝ в̾водѧ̀ . Ѡ҆гражде́нъ бл҃гочести́вымъ ѻ҆рꙋ́жїемъ , сто́лпъ непоколеби́мь ꙗ҆ви́сѧ платѡ́не . свирѣ́пїе ра́нъ претерпѣ́лъ є҆сѝ , и҆ болѣ́зненыѧ тѣсноты̀ подъѧ́лъ є҆сѝ , бжⷭ҇твеною бл҃года́тїю простира́ѧсѧ . Ю҆́ношеское показа́въ противле́нїе , ме́ртвенꙋю и҆ тлѣ́ннꙋю де́белость , страда́нїемъ ѿве́рглъ є҆сѝ , премꙋ́дре , и҆ в̾ нетлѣ́ннꙋю ри́зꙋ ѡ҆дѣ́ѧвсѧ , ра́дꙋѧсѧ влⷣцѣ пред̾стои́ши . =боⷢ҇ . Воплоще́на ѻ҆ц҃ꙋ собезнача́льна и҆ съ присносꙋ́щна є҆диноро́дна сло́ва , па́че оу҆ма̀ родила̀ є҆сѝ бл҃гослове́наѧ пречⷭ҇таѧ бцⷣе . сегѡ̀ ра́ди пра́во мꙋ́дрствꙋюще проповѣ́даемъ и҆̀ , и҆ всече́стнѡ и҆менꙋ́емъ .

дрꙋгі́и , кано́нъ , ст҃о́мꙋ рѡма́нꙋ . є҆мꙋ́же краегране́сїе сицево̀ : страда́льческими тѧ̀ вѣнцы̀ похвалѧ́ю рѡма́не . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стопа́ми дре́вле ше́ствовавъ і҆и҃ль , крⷭ҇тоѡбра́зно мѡѷсе́ѡвыма рꙋка́ма , а҆мали́ковꙋ си́лꙋ в̾ пꙋсты́ни побѣди́лъ є҆́сть .

запѣ́в̾ : Ст҃ы́и мч҃нче рѡма́не , молѝ бг҃а ѡ҆ на́съ .= Незаходи́мыми лꙋча́ми сїѧ́ѧ трⷪ҇чными ꙗ҆́снѡ , и҆ съ страстоте́рпческими ли́ки просвѣща́емь , просвѣще́нїе ми послѝ , тмꙋ̀ страстнꙋ́ю ѿгонѧ́ѧ бг҃опрїѧ́тными тѝ рѡма́не мл҃твами . Мо́рѧ и҆́дольскагѡ волне́нїемъ не ѡ҆бꙋрева́емь , ꙗ҆́кѡ на хрⷭ҇то́вѣ ка́мени оу҆тве́рждьсѧ . треволне́нїѧ разрѣши́лъ є҆сѝ , тишино́ю бжⷭ҇твенагѡ дх҃а , многомѧте́жнагѡ без̾бо́жїѧ . Цвѣ́тника ꙗ҆́кѡ бл҃госла́вна и҆ бл҃гопло́дна , цр҃ковь хрⷭ҇то́вꙋ гобзꙋ́ющꙋ всѣ́ми бл҃ги́ми рѡма́не соблю́лъ є҆сѝ ѿ во́лкъ непристꙋ́пнꙋ , твои́мъ оу҆че́нїемъ оу҆твержда́ѧ сїю̀ . =боⷢ҇ . Поми́ловасѧ тобо́ю всенепоро́чнаѧ є҆стество̀ чл҃ческое вои́стинꙋ . творе́цъ бо и҆з̾ тебѐ вопло́щьсѧ , па́че сло́ва и҆ смы́сла . за ны̀ на сме́рть приведе́сѧ , и҆збавлѧ́ѧ ѿ а҆́да на́съ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмомъ , и҆ зе́млю на вода́хъ ѡ҆снова́выи . на ка́мени мѧ хрⷭ҇тѐ цр҃ко́внѣмъ оу҆твердѝ , ꙗ҆́кѡ нѣ́сть ст҃а , па́че тебѐ чл҃колю́бче . Ꙗ҆́коже нетлѣ́ннаѧ и҆́скра в̾ пла́мень лю́тыи терпѣли́во всебл҃же́нне вни́де . бл҃гоче́стїѧ ꙗ҆́вствено , ре́вностїю распала́емь , и҆ ѻ҆гне́мъ бжⷭ҇твенымъ ѡ҆зарѧ́емь вѣ́рою . Побѣди́въ па́че є҆стества̀ бѣсо́вскїѧ слꙋгѝ терпѣ́нїемъ же крѣ́пкихъ мꙋ́къ болѣ́зни подъѧ́тъ . а҆́нг҃лѡмъ с̾се́льникъ , и҆ вѣнцено́сецъ ꙗ҆ви́сѧ платѡ́не бг҃омꙋ́дре бл҃же́нне . На землѝ ѡ҆ хрⷭ҇тѣ̀ всебл҃же́нне подвиза́всѧ , нбⷭ҇ныѧ да́ры прїе́мъ , и҆ вѣнцы̀ ѿ негѡ̀ приснопребыва́ющїѧ , в̾ чи́стѣ мѣ́стѣ раѧ̀ вселѧ́емь . боⷢ҇ . Две́ри свѣ́та , свѣ́тлыми дх҃о́вными зарѧ́ми оу҆кра́шена бг҃омт҃и сꙋ́щи . тобо́ю бо к̾ на́мъ сло́во сни́де , просвѣща́ѧ всѧ̀ бжⷭ҇твенымъ свѣ́томъ пою́щїѧ тѧ̀ .

и҆́нъ , і҆рмо́съ . Весели́тсѧ ѡ҆ тебѣ̀ цр҃кви твоѧ̀ хрⷭ҇тѐ зовꙋ́щи , ты́ ми крѣ́пость гдⷭ҇и , и҆ прибѣ́жище и҆ оу҆тверже́нїе . Ѕвѣ́рѧ разꙋ́мнаго пра́щею оу҆би́въ рѡма́не словесы̀ свои́ми . ста́до хрⷭ҇то́во спа́слъ є҆сѝ , ѿ и҆́дольскагѡ вре́да нетлѣ́ннѡ . Возмога́ѧ ѻ҆рꙋ́жїемъ крⷭ҇тнымъ , прило́ги вра́жїѧ воз̾врати́лъ є҆сѝ . и҆ не́мощь и҆́хъ ѡ҆бличѝ рѡма́не премꙋ́дре достобл҃же́нне . Низ̾ложи́лъ є҆сѝ вра́жїѧ сокрꙋши́въ че́люсти рѡма́не сла́вне , за хрⷭ҇та̀ бл҃же́нне лани́тѣ стрꙋ́жемѣ приснопа́мѧтне . боⷢ҇ . Є҆стество́мъ є҆ди́нъ бг҃ъ , сло́во ѻ҆́ч҃ее и҆ сро́дное дх҃ꙋ , пло́тїю ѿ тебѐ ѡ҆дѣ́ѧвсѧ землены́ѧ ѡ҆божи́въ бг҃омт҃и .

сѣда́ленъ , ст҃о́мꙋ платѡ́нꙋ . гла́съ , и҃ . По́двиги широты̀ мч҃нче мꙋ́дре простира́ѧсѧ вѣ́рою всесла́вне , вра́жїѧ оу҆тѣсни́въ ко́зни погꙋби́лъ є҆сѝ . и҆ до́брѣ соверши́въ тече́нїе бжⷭ҇твеное , ра́йскꙋю широтꙋ̀ ра́дꙋѧсѧ дости́глъ є҆сѝ . тѣ́мже цр҃ковь простра́нствомъ бл҃гоче́стїѧ сїѧ́ющи дне́сь , пра́зднꙋетъ па́мѧть твою̀ . и҆ вопїе́тъ тѝ бл҃же́нне , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ , ст҃о́мꙋ рѡма́нꙋ . гла́съ , д҃ . По́стнически лꙋка́ваго попра́въ , и҆ страда́льчески мч҃нче хрⷭ҇то́въ просла́висѧ . претерпѣ́въ мꙋ́жески сверше́нымъ оу҆мо́мъ , тѣ́мже причте́сѧ лико́мъ мч҃нческимъ , и҆ вѣ́чнꙋющее црⷭ҇тво стѧжа́въ . в̾ не́мже ликꙋ́ѧ , помѧнѝ на́съ , соверша́ющихъ вѣ́рою па́мѧть твою̀ . сла́ва , и҆ нн҃ѣ , боⷢ҇ . По́ бз҃ѣ к̾ твоемꙋ̀ бцⷣе прири́щꙋ смире́ныи бжⷭ҇твеномꙋ покро́вꙋ , припа́даю и҆ молю́сѧ , поми́лꙋй чⷭ҇таѧ , ꙗ҆́кѡ превзыдо́ша главꙋ̀ мою̀ грѣсѝ . и҆ бою́сѧ влⷣчце мꙋ́къ и҆ оу҆страша́юсѧ . мольбꙋ̀ сотворѝ чⷭ҇таѧ к̾ сн҃ꙋ своемꙋ̀ , ѿ си́хъ и҆зба́вити мѧ̀ . крⷭ҇тобоⷢ҇ . И҆́же ѿ без̾нача́льна ѻ҆ц҃а рожде́на , ꙗ҆́же в̾ послѣ́днѧѧ тѧ̀ пло́тїю ро́ждьшаѧ , на крⷭ҇тѣ̀ ви́сѧща зрѧ́щи хрⷭ҇тѐ , оу҆вы̀ мнѣ̀ любе́зныи і҆с҃е вопїѧ́ше . ка́кѡ сла́вимыи ꙗ҆́кѡ бг҃ъ ѿ а҆́нг҃лъ , ѿ без̾зако́нныхъ нн҃ѣ чл҃къ сн҃е мо́й распина́ешисѧ хотѧ̀ . пою́ тѧ долготерпѣли́ве .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Примѣси́всѧ ве́сь любо́вїю созда́телѧ своегѡ̀ , нечꙋ́ѧше болѣ́зни тѣле́сныѧ . страстнꙋ́ю пло́ть и҆ ме́ртвенꙋю , и҆ ко́жныѧ ри́зы совле́къ . и҆ весе́лїѧ и҆ спасе́нїѧ ѡ҆дѣ́ѧвсѧ платѡ́не во ѻ҆дѣѧ́нїе . Ст҃ль бжⷭ҇твеныи ꙗ҆ви́сѧ , ꙗ҆́кѡ непоро́чно ѻ҆вча̀ мꙋ́жескїи по́лъ и҆ соверше́ное , всесожже́нїе мч҃нче , себѐ , и҆́же за всѣ́хъ закала́емомꙋ хрⷭ҇тꙋ̀ прине́съ и҆з̾ба́вителю . дш҃ꙋ бо раз̾же́гъ влⷣчнею любо́вїю , ѡ҆ сожига́емѣй пло́ти небре́глъ є҆сѝ . Ю҆́ношамъ тре́мъ и҆́же въ вавѷлѡ́нѣ подража́ѧ , всеснѣ́днагѡ ѻ҆гнѧ̀ не оу҆боѧ́лсѧ є҆сѝ . но крѣ́пкѡ ю҆́ношески тогѡ̀ претерпѣ́въ пла́мень , непостоѧ́нныи . тѣ́мже тѧ̀ росода́вецъ со ѻ҆́нѣми досто́йнѡ , прїѧ́тъ в̾ черто́гъ сла́вы . боⷢ҇ . Ꙗ҆́кѡ и҆з̾ ко́рене црⷭ҇кагѡ сꙋ́щи , всѣ́хъ ѡ҆блада́ющаго , сло́во бж҃їе породила̀ є҆сѝ на́мъ пло́ть бы́вша , и҆ пребы́вша непремѣ́нна . тѣ́мже тѧ̀ бцⷣꙋ и҆́стинно , сꙋ́щꙋю дв҃ꙋ сла́вимъ .

и҆́нъ , і҆рмо́съ . Воз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свое́мъ , досто́йнѡ взыва́ющи , сла́ва си́лѣ твое́й гдⷭ҇и . Направлѧ́емь ꙗ҆́кѡ лѣ́ствицею на́ древо вознесе́сѧ бл҃же́нне . неи҆з̾гл҃анною добро́тою . и҆ пребыва́ющїи ли́къ пости́глъ є҆сѝ , мч҃нче рѡма́не достосла́вне . Совле́ксѧ ме́ртвеныѧ ѻ҆де́жи в̾ мꙋ́кахъ бл҃же́нне . и҆ спасе́нїѧ въ свѣ́тлꙋю ри́зꙋ , свѣ́тлѡ всесла́вне мч҃нче рѡма́не ѡ҆блече́сѧ . Оу҆мꙋ́дривсѧ в̾ дх҃нове́нїемъ оу҆тѣ́шителѧ ѻ҆́трочища ꙗ҆зы́къ , тѧ̀ гдⷭ҇а сла́вы , творца̀ проповѣ́да всѣ́мъ чл҃колю́бче , и҆ бг҃а спастѝ могꙋ́щаго . боⷢ҇ . Бл҃гослове́нъ дв҃о пло́дъ твоегѡ̀ чре́ва , и҆́мже и҆зба́влени бы́хомъ клѧ́твы сме́ртныѧ всѧ̀ ѻ҆те́чествїѧ ꙗ҆зы́къ . и҆ тобо́ю бл҃гослове́нїи ꙗ҆́кѡ животꙋ̀ пое́мъ тѧ̀ хода́таицꙋ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Дрема́нїѧ свои́ма вѣ́ждама , и҆ сна̀ свои́ма ѻ҆чи́ма не́далъ є҆сѝ мч҃нче , до́ндеже сно́мъ бл҃же́ннымъ , и҆ подо́бнымъ , бг҃а лю́бѧщимъ возлю́бленымъ оу҆снꙋ́лъ є҆сѝ бл҃же́нне мече́мъ в̾ главꙋ̀ оу҆сѣка́емь . Ꙗ҆́кѡ в̾ чꙋже́мъ тѣлесѝ всебл҃же́нне , ты̀ стражда̀ подвиза́сѧ . ꙗ҆́кѡ стра́ждꙋщимъ и҆нѣ́мъ ви́децъ бы́въ ты̀ пострада́въ . бжⷭ҇твенымъ бо раче́нїемъ раз̾же́гсѧ , пред̾лежа́щїѧ мꙋ́ки неꙋбоѧ́лсѧ є҆сѝ сла́вне . Бога́тство ѡ҆брѣ́тъ неѿє́млемо и҆ сла́вꙋ неꙋвѧда́ющꙋ , в̾ нбⷭ҇ныхъ ѻ҆би́телехъ со а҆́нг҃лы ликоствꙋ́еши . и҆ нетлѣ́ннагѡ без̾сме́ртїѧ в̾ причаще́нїи бы́въ преи҆зѧ́щне . боⷢ҇ . Разрѣше́нїе грѣхо́въ , твои́ми мл҃твами пода́ждь рабо́мъ твои́мъ . и҆з̾бавлѧ́ющи си́хъ и҆скꙋше́ней и҆ бѣ́дъ и҆ скорбе́й , и҆ хꙋ́льныхъ є҆рети́къ ѡ҆держа́нїѧ , дв҃о бцⷣе всепѣ́таѧ .

и҆́нъ , і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Стрꙋѧ́ми страда́льческими крове́й твои́хъ , потопи́лъ є҆сѝ мо́ре без̾бо́жїѧ . рѣ́ки же и҆сцѣле́нїѧ рѡма́не и҆сточи́лъ є҆сѝ . Ꙗ҆́кѡ да́ръ и҆з̾бра́нныи , же́ртвꙋ ꙗ҆́кѡ непоро́чнꙋ прине́слъ є҆сѝ влⷣцѣ рѡма́не , бг҃осло́вствꙋѧ млⷣнца закала́ема . Оу҆ро́дство вра́жїе премꙋ́дростїю ст҃а́гѡ дх҃а оу҆ѧзви́лъ є҆сѝ . оу҆ѧзви́въ своѐ тѣ́ло ра́нами , рѡма́не всесла́вне . боⷢ҇ . Потреби́ла є҆сѝ клѧ́твꙋ , ꙗ҆́кѡ ра́дость ро́ждьши . и҆ ѡ҆божи́ла є҆сѝ чл҃ки твои́мъ ржⷭ҇тво́мъ , дв҃о мр҃і́е неи҆скꙋсобра́чнаѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Вы́шши страсте́й мꙋче́нїѧ бы́въ , плотна́ѧ рѣ́занїѧ претерпѣ́лъ є҆сѝ сла́вне . хрⷭ҇та́ бо помо́щника и҆ содѣ́телѧ и҆мѧ́ше и҆ споспѣ́шника . Дш҃е́внымъ ра́зꙋмомъ , бл҃голѣ́пїе созда́телѧ взира́ѧ всегда̀ . и҆ разꙋмѣва́ѧ добро́тꙋ неи҆зрече́ннꙋю , ви́димыхъ хꙋ́дость небре́глъ є҆сѝ . боⷢ҇ . Ꙗ҆́кѡ ѡ҆дш҃евле́ныи ковче́гъ законополо́жника вмѣсти́ла є҆сѝ . ꙗ҆́коже хра́мъ ст҃ы́и прїѧ́тъ ст҃а́гѡ , бы́вша чл҃ка , на бл҃годѣѧ́нїе чл҃кѡмъ всебл҃же́ннаѧ .

и҆́нъ , і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Ме́ртвость и҆ тлю̀ строга́нїемъ ѿложи́въ , живота̀ нетлѣ́ннагѡ въ добро́тꙋ ѡ҆дѣ́ѧвсѧ мч҃нче , оу҆кра́шенъ свѣтлостьмѝ рѡма́не дх҃о́вными незаходѧ́щими . И҆сточи́въ ꙗ҆́кѡ кро́вныѧ то́ки оу҆че́нїѧ ѿрѣ́заныи тѝ ꙗ҆зы́къ . и҆́ми же непогиба́ющее наслѣ́дова страстоте́рпче , бл҃же́нство прⷭ҇нѡ пребыва́ющее . Премꙋ́дрости пото́къ жада́въ , и҆́спилъ є҆сѝ совѣ́томъ ро́ждьшїѧ , оу҆ста̀ бг҃осло́вна младе́нца , мече́мь к̾ животꙋ̀ преше́дша неконча́емомꙋ . боⷢ҇ . Ско́рое прибѣ́жище бꙋ́ди ми пречⷭ҇таѧ , наси́лїѧ и҆збавлѧ́ющи мѧ , и҆ страстна́гѡ стꙋда̀ и҆зима́ющи , и҆ к̾ бжⷭ҇твенѣй стезѝ направлѧ́ющи бг҃омт҃и .

конда́къ . гла́съ , г҃ . Ст҃а́ѧ па́мѧть твоѧ̀ вселе́ннꙋю весели́тъ , созыва́ющи вѣ́рныѧ всѧ̀ в̾ честны́и хра́мъ тво́й . и҆дѣ́же ны́нѣ ра́достїю совокꙋ́пльшесѧ , пое́мъ в̾ пѣ́снехъ и҆ свѣ́тлостѣхъ платѡ́не , и҆ вопїе́мъ ти , ꙗ҆зы́ческагѡ наше́ствїѧ , и҆зба́ви гра́дъ сво́й ст҃е . и҆́косъ . Є҆́ллинское ѡ҆ста́вль сꙋ́етное преда́нїе хрⷭ҇то́вѣхъ оу҆чени́къ поле́знаѧ повелѣ́нїѧ возлю́бль ѕѣлѡ̀ платѡ́нъ бг҃омꙋ́дрыи . тѣ́мже и҆ ꙗ҆ви́сѧ всѣ́мъ на по́льзꙋ , и҆ наде́жа вѣ́ры во ѻ҆те́чествѣ , є҆мꙋ́же и҆́мѧ а҆гкѵ́ра вѣ́рнѡ нарица́етсѧ , до́брѣ бо тогѡ̀ воспита́вши . и҆звѣ́стнꙋ вѣ́рꙋ на врагѝ , и҆ застꙋ́пника те́пла въ ра́тѣхъ ѡ҆брѣта́етъ всегда̀ , вопїю́щи , ꙗ҆зы́ческаго наше́ствїѧ и҆зба́ви гра́дъ сво́й ст҃е .

пѣ́снь , з҃ . і҆рмо́съ . Бж҃їѧ схожде́нїѧ ѻ҆́гнь оу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́троцы , в̾ пещѝ ра́дованною ного́ю , ꙗ҆́кѡ во́ свѣтѣ ликова́хꙋ пою́ще , блгⷭ҇ве́нъ бг҃ъ ѻ҆ц҃ъ на́шихъ . Зако́ннѡ пострада́вша , и҆ врагѝ своѧ̀ попра́вша , побѣ́днымъ вѣнце́мъ законополо́жникъ тебѐ вѣнча̀ , велегла́снѡ вопїю́ща и҆ гл҃юща , блгⷭ҇ве́нъ бг҃ъ ѻ҆ц҃ъ на́шихъ . Преста́висѧ ра́дꙋѧсѧ к̾ присножела́емомꙋ тебѣ̀ дре́вле . є҆го́же пречⷭ҇тѣй стрⷭ҇ти , спасе́нїю чл҃кѡмъ винѣ̀ бы́вши подо́бѧсѧ , поѧ́ше , блгⷭ҇ве́нъ бг҃ъ ѻ҆ц҃ъ на́шихъ . Оу҆диви́шасѧ всѧ̀ нбⷭ҇ныѧ си́лы , терпѣ́нїю твоегѡ̀ страда́нїѧ и҆ чл҃цы тогда̀ зрѧ́ще . па́че є҆стества́ бо вопїѧ́ше оу҆сѣка́емь . блгⷭ҇ве́нъ бг҃ъ ѻ҆ц҃ъ на́шихъ . боⷢ҇ . И҆збавлѧ́емїи пречⷭ҇таѧ бжⷭ҇твенымъ ржⷭ҇тво́мъ дв҃ьства твоегѡ̀ , оу҆́зъ сме́ртныхъ , и҆ клѧ́твы первозда́ннагѡ а҆да́ма , тѧ̀ бцⷣе мꙋ́дрствꙋюще зове́мъ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Въ пещѝ а҆враа́мскїѧ си дѣ́ти перси́дстѣй , любо́вїю бл҃говѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Оу҆да́вою твое́ю страстоте́рпче , оу҆дави́въ ѕмїѧ̀ , ѡ҆брѣ́те живо́тъ вои́стинꙋ пресла́вне рѡма́не . зовы́и всегда̀ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Свѣ́та незаходи́магѡ лꙋча́ми ѡ҆зарѧ́емь , пла́мень высо́кїи оу҆гаси́лъ є҆сѝ рѡма́не . проро́ческимъ дарова́нїемъ оу҆краша́емь . и҆ с̾ мч҃нческими ли́ки сочета́емь зовы́и , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Ꙗ҆́кѡ ѿ са́да многоцвѣ́тнагѡ , ма́терьними оу҆че́нїи , шипо́къ бл҃гоꙋха́нныи младе́нечь во́зрастъ , мч҃нческою кро́вїю напоѧ́емь хрⷭ҇то́ви нетлѣ́ннѡ прино́ситсѧ . боⷢ҇ . Впа́дшихъ во глꙋбинꙋ̀ грѣхо́внꙋю всепѣ́таѧ , є҆ди́на бг҃а ро́ждьшаѧ без̾ сѣ́мене и҆зведѝ на́съ пою́щїѧ тѧ̀ . бл҃гослове́на ты̀ в̾ жена́хъ всенепоро́чнаѧ влⷣчце .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃очести́вымъ лю́тѣ раз̾жжѐ . си́лою же лꙋ́чшею спасе́ныхъ ви́дѣвъ , творцꙋ̀ и҆ и҆зба́вителю вопїѧ́ше , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Свѣ́тлѡ по́двиги оу҆́бѡ под̾виза́всѧ всехва́льне , свѣтлѣ́йше же мно́гѡ бл҃госла́вїе хрⷭ҇то́съ тебѣ̀ дарова̀ , и҆ вѣ́чно пребыва́ющее . в̾ нбⷭ҇ныѧ тѧ̀ ѻ҆би́тели всели́въ , оу҆се́рднѡ пою́ща . сщ҃е́ннїи по́йте лю́дїе , и҆ превозноси́те хрⷭ҇та̀ во́ вѣки . Ꙗ҆́кѡ моле́бника вѣ́рна , ꙗ҆́кѡ застꙋ́пника теплѣ́йша , всѣ́хъ цр҃е́ви и҆ творцꙋ̀ тва́ри тѧ̀ ны́нѣ пред̾лага́емъ . заны̀ моли́сѧ , мч҃нческимъ тѝ дерзнове́нїемъ пред̾стоѧ̀ всебл҃же́нне , и҆ вопїѧ̀ , сщ҃е́ннїи по́йте лю́дїе , и҆ превозноси́те хрⷭ҇та̀ во́ вѣки . Прїѧ́ти сподо́бисѧ црⷭ҇тво недви́жимо свое́ю дѣ́тельною вѣ́рою , ꙗ҆́коже тебѣ̀ да́ти ѡ҆бѣща̀ нело́жныи бг҃ъ . за него́же тѣ́ло ѻ҆гню̀ и҆ мꙋ́камъ преда́въ , зовы́и , сщ҃е́ннїи по́йте лю́дїе , и҆ превозноси́те хрⷭ҇та̀ во́ вѣки . боⷢ҇ . Сло́во бж҃їе без̾нача́льное , и҆ ѻ҆ц҃ꙋ с̾разꙋмѣва́емѡ , и҆́же ѿ небытїѧ̀ ѻ҆́ч҃имъ совѣ́томъ всѧ̀ соста́вльшаго бг҃олѣ́пнѡ родила̀ є҆сѝ , пло́ть бы́вша заны̀ чл҃ки . тѣ́мже тѧ̀ бцⷣꙋ правосла́внѡ мꙋ́дрствꙋюще , хрⷭ҇та̀ превозно́симъ во́ вѣки .

и҆́нъ , і҆рмо́съ . Рꙋ́цѣ распросте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ оу҆гаси́ша добродѣ́телїю поѧ́савшесѧ , и҆́же бл҃гоче́стїѧ люби́тели ѻ҆́троцы взыва́юще , бл҃гослови́те всѧ̀ дѣ́ла гдⷭ҇нѧ гдⷭ҇а . Глаго́лѡмъ послꙋ́шникъ хрⷭ҇то́вѣмъ бы́лъ є҆сѝ сла́вне . дш҃ꙋ свою̀ поло́жь за ста́до своѐ , оу҆се́рднѡ за негѡ̀ оу҆давлѧ́емь . мꙋ́чимь и҆ стрꙋ́жемь и҆ оу҆ранѧ́емь вопїѧ́ше , бл҃гослови́те всѧ̀ дѣ́ла гдⷭ҇нѧ гдⷭ҇а . Вои́стинꙋ оу҆ста̀ твоѧ̀ и҆ ꙗ҆зы́къ ра́дости и҆ весе́лїѧ и҆спо́лнисѧ , бл҃гословѧ̀ бг҃а непреста́ннѡ . ѿрѣ́занъ бо и҆ кро́вїю ка́пли , зако́нъ вѣ́ры на́мъ рѡма́не полага́етъ , вопїѧ̀ , бл҃гослови́те всѧ̀ дѣ́ла гдⷭ҇нѧ гдⷭ҇а . боⷢ҇ . Сло́во ро́ждьши ѻ҆́ч҃ее , бжⷭ҇твенымъ дх҃омъ , дв҃ою пребы́сть бг҃ороди́тельнице без̾мꙋ́жнаѧ превозше́дши є҆сте́ственыѧ зако́ны ржⷭ҇тво́мъ сѝ . тѣ́мже ра́дꙋющесѧ пое́мъ , бл҃гослови́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схожде́нїѧ , ꙗ҆́кѡ вы́шнїи во́лею сни́де да́же и҆ до́ плоти . ѿ дв҃ческагѡ бо чре́ва бы́въ оу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Прїиди́те оу҆́бѡ бг҃овѣнча́ннаго мч҃нколю́бцы воспое́мъ мч҃нка , просте́ршаго бл҃гоче́стїе , своегѡ̀ ро́ждїѧ . и҆́бо лозы̀ живота̀ са́дъ бы́въ , пло́дъ и҆зно́ситъ , оу҆миле́нїѧ на́мъ вино̀ точа́щь . Честна̀ пре́д̾ бг҃омъ мч҃нческаѧ ꙗ҆ви́сѧ сме́рть . прⷭ҇носꙋ́щагѡ бо и҆ неги́блемагѡ быва́етъ хода́тай , и҆́стиннагѡ живота̀ . и҆ жре́бїй нетлѣ́нныи и҆ сла́вꙋ без̾сме́ртнꙋю , и҆ бога́тное подае́тъ воз̾даѧ́нїе . Ве́сь сво́й живо́тъ мч҃нче вседержи́телю бг҃ови пре́далъ є҆сѝ , ꙗ҆́кѡ бл҃гоꙋго́днꙋ жи́вꙋ же́ртвꙋ принесѐ . тѣ́мже пи́щи па́че оу҆ма̀ ꙗ҆́вѣ сподо́бисѧ . но молѝ и҆зба́витисѧ и҆скꙋше́нїй пою́щимъ тѧ̀ . боⷢ҇ . Спаси́ мѧ мт҃и бж҃їѧ , ро́ждьшаѧ хрⷭ҇та̀ сп҃са моегѡ̀ бг҃а и҆ чл҃ка , сꙋгꙋ́ба є҆стество́мъ а҆ не соста́вомъ . є҆диноро́дна оу҆́бѡ ѿ ѻ҆ц҃а , и҆з̾ тебе́ же пе́рвенца все́й тва́ри . тѣ́мже тѧ̀ всѝ при́снѡ велича́емъ .

и҆́нъ , і҆рмо́съ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Всѐ твоѐ жела́нїе мч҃нче ко влⷣцѣ просте́рлъ є҆сѝ . и҆ многови́дныѧ ра́ны претерпѣ́въ рѡма́не сла́вне , сла́вы неи҆з̾гл҃анныѧ полꙋчѝ , и҆ бл҃же́ннагѡ наслажде́нїѧ . Сѐ вмѣ́стѡ болѣ́зни , пи́ща тебѐ пото́ка да́стсѧ мч҃нче , вѣне́цъ носѧ́щꙋ ти рѡма́не , и҆ ѿ́ крове багрѧни́цꙋ и҆мꙋ́щꙋ . ꙗ҆́кѡ шипо́къ бл҃гоꙋха́ющь и҆ неꙋвѧда́ющь , младе́нецъ закла́нъ бы́сть , хрⷭ҇та̀ ра́ди . боⷢ҇ . Ты̀ нача́ло роди́тельныѧ клѧ́твы , землены́ѧ дв҃о и҆зба́вила є҆сѝ , и҆ ѿве́рзе на́мъ жи́знь є҆де́ма , ржⷭ҇тво́мъ твои́мъ па́че є҆стества̀ . тѣ́мже веселѧ́щесѧ тѧ̀ бцⷣе велича́емъ .

свѣти́ленъ . Жесто́кꙋю ше́ствовалъ є҆сѝ в̾ пꙋте́хъ бжⷭ҇твенꙋю стезю̀ , къ широтѣ̀ взы́де нбⷭ҇нагѡ црⷭ҇твїѧ платѡ́не . мч҃нкѡмъ сла́во , свѣ́томъ сїѧ́ѧ нетлѣ́нныѧ трⷪ҇цы . тѣ́мже сла́вѣ непреста́ющей прича́щьсѧ , чтꙋ́щїѧ тѧ̀ помѧнѝ бл҃же́нне . боⷢ҇ . Ꙗ҆́кѡ застꙋ́пницꙋ нера́тнꙋ , и҆ пред̾гра́дїе вои́стинꙋ пред̾лага́ю покро́въ тво́й бцⷣе дв҃о . хода́таицꙋ же к̾ бг҃ꙋ , и҆зба́витисѧ влⷣчце мꙋ́ки вѣ́чныѧ , и҆ к̾ жи́зни нетлѣ́ннѣй тобо́ю причасти́тисѧ нбⷭ҇нагѡ црⷭ҇твїѧ .

<< Previous

Contents

Next >>