19 ноября: св. прор. Авдея

МЦⷭ҇А ТОГО́ЖЕ ВЪ Ѳ҃І ДН҃Ь

ст҃а́гѡ прⷪ҇рка а҆вдѣ́ѧ . и҆ ст҃а́гѡ мч҃нка варлаа́ма . =И҆ ст҃ы́хъ прпⷣбныхъ ѻ҆ц҃ъ на́шихъ пꙋсты́нныхъ жи́телѣй в̾ постѣ̀ просїѧ́вшихъ , варлаа́ма и҆ і҆ѡаса́фа , в̾ вели́цѣй землѝ глаго́лемѣй и҆нді́и . слꙋ́жба и҆́мъ пи́сана по се́й слꙋ́жбѣ .=

Ве́черъ , на гдⷭ҇и возва́хъ , стⷯры , прⷪ҇ркꙋ . гла́съ , а҃ . поⷣ . прехва́льнїи мч҃нцы . Прїѧ́телище дх҃а ,꙳ свѣ́тлое а҆вдѣ́е бы́въ .꙳ и҆ ѿ негѡ̀ просвѣща́емь бг҃ови́дне ,꙳ прⷪ҇рчествїѧ ѻ҆́бразы ,꙳ и҆ бꙋ́дꙋщихъ проꙋвѣ́дѣнїи ,꙳ и҆ ра́зꙋмомъ и҆́стиннымъ ѡ҆богати́лсѧ є҆сѝ .꙳ и҆ нн҃ѣ моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . И҆́миже воѡ҆бража́етсѧ бг҃ъ ,꙳ пе́рвыми сво́йствы ,꙳ и҆ сꙋ́ществеными оу҆каза́нїи ,꙳ сегѡ̀ сла́внїи ,꙳ честні́и прⷪ҇ро́цы ,꙳ причаще́нїемъ и҆ бл҃года́тїю ,꙳ второ́е по́ дарꙋ причаща́ютсѧ .꙳ просвѣща́ющꙋ гдⷭ҇ви оу҆го́дники своѧ̀ ,꙳ тогѡ̀ свѣ́тлостїю . Незаходи́магѡ и҆сполнѧ́емь свѣ́та ,꙳ и҆ сла́вꙋ ви́дѧ ,꙳ па́че оу҆ма̀ и҆ смы́сла .꙳ и҆ пред̾стоѧ̀ влⷣцѣ всѣ́хъ ,꙳ ꙗ҆́кѡ прⷪ҇ро́къ сла́вныи ,꙳ и҆ бжⷭ҇твеныи бг҃овѣща́тель бы́въ .꙳ тогѡ̀ молѝ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

и҆́ны , стихѣ́ры , ст҃о́мꙋ варлаа́мꙋ . гла́съ , д҃ . поⷣ . ꙗ҆́кѡ до́блѧ . Столпа̀ твердѣ́йши ,꙳ и҆ мѣ́ди крѣпча́йши ,꙳ и҆ желѣ́за си́льнѣйши ,꙳ ѿстꙋпа́етъ бо жго́мо .꙳ и҆ а҆́бїе разрꙋша́емо си́хъ ко́еждо ѻ҆гне́мъ ,꙳ тѣ́хъ нꙋ́ждею побѣжда́емо .꙳ тебѣ́ же непрекло́ннѡ десни́ца просте́рта ,꙳ оу҆́глїемъ жго́ма ,꙳ пресла́внѡ преѡ҆долѣ̀ всемꙋ́дре . Сщ҃е́нникъ ꙗ҆́коже бы́въ ,꙳ бг҃ови пред̾стоѧ̀ ,꙳ и҆ к̾ томꙋ̀ приходѧ̀ ,꙳ нечꙋже́ю кро́вїю , свое́ю же па́че .꙳ и҆ рꙋко́ю мч҃нческою ,꙳ бл҃гово́нїѧ кади́ло прине́слъ є҆сѝ .꙳ не бѣсо́вскимъ прелесте́мъ ,꙳ хрⷭ҇то́ви же сп҃сꙋ и҆ влⷣцѣ ,꙳ и҆ при́снѡ црⷭ҇твꙋющемꙋ . Ст҃лѧ приносѧ́ща ,꙳ и҆ а҆́гньца приводѧ́ща ,꙳ того́же ѡ҆бою́дꙋ тѧ̀ всехва́льне ,꙳ ра́достнѡ и҆менꙋ́емъ ,꙳ ꙗ҆́кѡ сꙋ́ща ѡ҆боѐ себѐ самого̀ бг҃ови .꙳ ꙗ҆́кѡ всенепоро́чно заколе́нїе ,꙳ всѐ сже́гъ ѻ҆́гненымъ мꙋче́нїемъ .꙳ є҆го́же молѝ спастѝ чтꙋ́щихъ ,꙳ при́снѡ всесла́внꙋю па́мѧть твою̀ . сла́ва , и҆ ны́нѣ , боⷢ҇ . Тꙋ́чами дх҃о́вными ,꙳ бцⷣе пречⷭ҇таѧ ,꙳ моѐ помышле́нїе ѡ҆росѝ ,꙳ ка́плю ро́ждьшаѧ хрⷭ҇та̀ неи҆змѣ́рнꙋю .꙳ без̾зако́нїѧ землены́хъ ,꙳ щедро́тами и҆збавлѧ́юща .꙳ и҆с̾сꙋшѝ и҆сто́чникъ страсте́й мои́хъ .꙳ и҆ пото́ка сподо́би мѧ пи́щи прⷭ҇нѡживо́тнагѡ ,꙳ моли́твами сѝ . крⷭ҇тобоⷢ҇ . А҆́гньца и҆ па́стырѧ ,꙳ на́ древѣ ꙗ҆́кѡ оу҆зрѣ̀ ,꙳ а҆́гница ро́ждьшаѧ рыда́ше ,꙳ и҆ мт҃рьски тебѣ̀ вѣща́ше ,꙳ сн҃е возжелѣ́нне ,꙳ ка́кѡ на́ древѣ крⷭ҇тнѣмъ ,꙳ воздви́жесѧ долготерпѣли́ве ;꙳ ка́кѡ рꙋ́цѣ своѝ и҆ но́зѣ своѝ сло́ве ,꙳ пригвоздѝ без̾зако́нники ,꙳ и҆ кро́вь свою̀ и҆злїѧ́лъ є҆сѝ влⷣко .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , мч҃нкꙋ . гла́съ , д҃ . Мч҃нкъ тво́й гдⷭ҇и варлаа́мъ во страда́нїи свое́мъ вѣне́цъ прїѧ́тъ нетлѣ́нныи ѿ тебѐ бг҃а на́шегѡ . и҆мѣ́ѧ бо крѣ́пость твою̀ непобѣди́мꙋю , мꙋ́чащихъ оу҆празднѝ , и҆ разрꙋшѝ бѣсо́мъ немощна́ѧ шата́нїѧ . тогѡ̀ мл҃твами хрⷭ҇тѐ бж҃е спасѝ дш҃а на́ша . сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . є҆ди́нъ кано́нъ , во ѻ҆кта́и . и҆ ст҃ы́мъ два̀ . кано́нъ , проро́кꙋ . є҆мꙋ́же краегране́сїе сицево̀ : прозорли́вомꙋ а҆вді́ю пою̀ сла́вꙋ . гла́съ , є҃ . пѣ́снь , а҃ . і҆рмо́съ . Спаси́телю бг҃ꙋ , в̾ мо́ри лю́ди немо́крыми стопа́ми наста́вльшꙋ , и҆ фараѡ́на съ вѡ́и пото́пльшꙋ , томꙋ̀ є҆ди́номꙋ воспое́мъ , ꙗ҆́кѡ просла́висѧ .

запѣ́в̾ : Ст҃ы́и прⷪ҇ро́че а҆вдѣ́е , молѝ бг҃а ѡ҆ на́съ .= Спаси́телю бг҃ꙋ прⷪ҇ро́чески пред̾стоѧ̀ ны́нѣ , со дерзнове́нїемъ моли́сѧ . свѣ́тлыми лꙋча́ми просвѣща́ти , вѣ́рою бг҃одохнове́нне тѧ̀ бл҃жа́щїѧ . И҆́же всѧ̀ ꙗ҆́вѣ проразꙋ́мнѡ зрѧ́и , твоегѡ̀ срⷣца немꙋ́тное и҆ чи́стое , и҆ свѣтоза́рное бл҃же́нне ви́дѧ , проро́ка бг҃опрїѧ́тна тѧ̀ поставлѧ́етъ . Видѣ́нїѧ ви́дѣвъ и҆́стиннаѧ , бг҃омъ тебѣ̀ и҆з̾ѧвлѧ́емаѧ . проповѣ́далъ є҆сѝ ѕловѣ́рїе бра́тне и҆ па́гꙋбꙋ лю́тꙋю , и҆ тѣ́хъ пра́ведное бл҃же́нне и҆с̾корене́нїе . =боⷢ҇ . Спа́сшїисѧ твои́мъ бг҃ороди́тельнице чи́стаѧ без̾сѣ́меннымъ ржⷭ҇тво́мъ , мо́лимъ тѧ̀ , мирскі́ѧ напа́сти и҆зба́ви на́съ . согла́снѡ зовꙋ́щїѧ пѣ́снь побѣ́днꙋю .

дрꙋгі́и , кано́нъ , мч҃нкꙋ . є҆мꙋ́же краегране́сїе сицево̀ : терпѣли́выѧ ти варлаа́ме пою̀ болѣ́зни . гла́съ , д҃ . пѣ́снь , а҃ . і҆рмо́съ . Воспою́ ти гдⷭ҇и бж҃е мо́й , ꙗ҆́кѡ и҆зведѐ лю́ди и҆з̾ рабо́ты є҆ги́петскїѧ . покры́ же ѻ҆рꙋ́жїе фараѡ́не и҆҆ си́лꙋ .

запѣ́въ : Ст҃ы́и мч҃нче варлаа́ме , молѝ бг҃а ѡ҆ на́съ .= Твоегѡ̀ страда́нїѧ свѣтлостьмѝ ѡ҆зарѧ́емь , на́съ вѣ́рою чтꙋ́щихъ па́мѧть твою̀ , соблюдѝ варлаа́ме моли́твами сѝ . Ѻ҆́гнь оу҆гаси́выи без̾бо́жїѧ , бл҃гоче́стїѧ и҆спы́тнагѡ , ѻ҆гне́мъ бг҃одх҃нове́ннымъ , да почте́тсѧ пѣ́сньми варлаа́мъ чꙋ́дныи . =Ѡ҆ бл҃гоче́стїи под̾виза́всѧ вѣнчено́сче варлаа́ме . вѣнце́мъ сла́вы досто́йнѡ почте́сѧ , десни́цею вседержи́телевою . Крѣ́пость тѝ дарова̀ влⷣка , на разли́чныѧ ра́ны всебога́те мч҃нче . сегѡ̀ ра́ди побѣди́лъ є҆сѝ без̾бо́жныхъ шата́нїе . боⷢ҇ . Лѣ́ствица ꙗ҆ви́сѧ нбⷭ҇наѧ , є҆ю́же сни́де к̾ на́мъ сло́во дв҃о . ю҆́же дре́вле прови́дѣ і҆а́кѡвъ пра́ѻ҆ц҃ъ тво́й .

пѣ́снь , г҃ . і҆рмо́съ . Си́лою крⷭ҇та̀ твоегѡ̀ хрⷭ҇тѐ , оу҆твердѝ моѐ помышле́нїе , ꙗ҆́кѡ пѣ́ти и҆ сла́вити , тридне́вное твоѐ воскрⷭ҇нїе . Во́дъ та́йныхъ рѣка̀ , ѿ пꙋчи́ны прои҆сходѧ̀ , даро́въ дх҃о́вныхъ бг҃овѣща́телю бы́лъ є҆сѝ . Хотѣ́нїемъ и҆ промышле́нїемъ бж҃їимъ , провозвѣща́ти хотѧ́щаѧ бы́ти пред̾ложи́сѧ достосла́вне . Просвѣща́емь бжⷭ҇твенымъ свѣ́томъ с̾ нб҃сѐ , провозвѣстѝ бꙋ́дꙋщее ꙗ҆зы́кѡмъ спасе́нїе всебл҃же́нне . боⷢ҇ . Всели́выисѧ сло́во в̾ тѧ̀ дв҃о мт҃и , спаса́етъ , и҆́же бцⷣꙋ мꙋ́дрствꙋющихъ тѧ̀ , хода́тайствомъ твои́мъ всенепоро́чнаѧ .

и҆́нъ , і҆рмо́съ . Лꙋ́къ си́льныхъ и҆знемо́же , а҆ не́мощнїи препоѧ́сашасѧ си́лою . сегѡ̀ ра́ди воз̾весели́сѧ , ѡ҆́ гдⷭ҇ѣ срⷣце моѐ . Ве́сь плотны́и сою́зъ , и҆ сочета́нїе твои́хъ оу҆до́въ разрꙋша́шесѧ . но крѣ́пость соблюде́сѧ твоеѧ̀ дш҃и неразрꙋши́ма . Оу҆стремле́нїе , бл҃гомо́щнѡ претерпѣ́лъ є҆сѝ , стрꙋ́жꙋщимъ тѝ ре́бра всебога́те . терпѣ́нїе ю҆́ношеское крѣ́пкѡ показа́въ . Кто̀ твоѐ крѣ́пкое и҆ си́льное , и҆ по́мысла неꙋкло́ннꙋю мꙋ́дрость , похвала́ми похва́литъ по достоѧ́нїю всебл҃же́нне . боⷢ҇ . Оу҆ста́висѧ тлѧ̀ сме́рти , и҆́же в̾ соста́вѣ пло́тїю , животꙋ̀ пречⷭ҇таѧ чл҃кѡмъ ꙗ҆́вльшꙋсѧ , и҆́з̾ чрева твоегѡ̀ бг҃оневѣ́стнаѧ .

сѣда́ленъ , проро́кꙋ . гла́съ , а҃ . Вели́кїи а҆вдѣ́й , бжⷭ҇твеными сїѧ́нїи оу҆́мъ свѣтови́дныи стѧжа́въ , повелѣва́етъ бꙋ́дꙋщаѧ дх҃омъ прест҃ы́мъ вѣща́ѧ . сегѡ̀ дне́сь бг҃омꙋ́дрено чтꙋ́ще , с̾верша́емъ сщ҃е́ннꙋю є҆гѡ̀ па́мѧть , срⷣца̀ просвѣща́ющꙋ . и҆́нъ , сѣда́лен̾ , мч҃нкꙋ . гла́съ , д҃ . И҆́же пла́мень без̾че́стїѧ оу҆гаси́въ , и҆ росо́ю бг҃оразꙋ́мїѧ в̾же́гъ вѣ́рныхъ срⷣца̀ , ны́нѣ да почте́тсѧ вѣ́рнѡ варлаа́мъ сла́вныи пѣ́сньми бжⷭ҇твеными . се́й бо посрамѝ и҆́дольскꙋю ле́сть , и҆ побѣ́дныи вѣне́цъ в̾зе́мъ , всѣ́мъ про́ситъ грѣхо́въ ѡ҆ставле́нїѧ . сла́ва , и҆ ны́нѣ , боⷢ҇ . И҆́же на прⷭ҇то́лѣ херꙋви́мстѣ сѣдѧ́и , и҆ в̾ нѣ́дрѣхъ ѻ҆́ч҃ихъ водворѧ́ѧсѧ , ꙗ҆́кѡ на прⷭ҇то́лѣ сѣди́тъ ст҃ѣ́мъ свое́мъ влⷣчце в̾ ло́нѣхъ твои́хъ . пло́тїю оу҆́бѡ ꙗ҆́кѡ бг҃ъ вои́стинꙋ воцр҃и́сѧ надовсѣ́ми ꙗ҆зы́ки , и҆ разꙋ́мнѡ ны́нѣ пое́мъ є҆мꙋ̀ . є҆го́же молѝ спастѝ рабы̀ своѧ̀ . крⷭ҇тобоⷢ҇ . И҆́же ѿ без̾нача́льна ѻ҆ц҃а рожде́на , ꙗ҆́же в̾ послѣ́днѧѧ тѧ̀ пло́тїю ро́ждьшаѧ , на крⷭ҇тѣ̀ ви́сѧща зрѧ́щи хрⷭ҇тѐ , оу҆вы̀ мнѣ̀ любе́зныи і҆с҃е вопїѧ́ше . ка́кѡ сла́вимыи ꙗ҆́кѡ бг҃ъ ѿ а҆́нг҃лъ , ѿ без̾зако́нныхъ нн҃ѣ чл҃къ сн҃е мо́й распина́ешисѧ хотѧ̀ . пою́ тѧ долготерпѣли́ве .

пѣ́снь , д҃ . і҆рмо́съ . Оу҆слы́шахъ слꙋ́хъ си́лы крⷭ҇та̀ , ꙗ҆́кѡ ра́й ѿве́рзесѧ и҆́мъ , и҆ возопи́хъ , сла́ва си́лѣ твое́й гдⷭ҇и . Проро́ческїи да́ръ жела́ѧ , ꙗ҆́кѡ пред̾ѡ҆чи́стивъ сѝ дш҃ꙋ , дх҃омъ ст҃ы́мъ прїе́мъ , и҆ возопи́лъ є҆сѝ , сла́ва си́лѣ твое́й гдⷭ҇и . Проро́къ вели́кїи , заре́ю свѣтода́тельною мо́лнїи ѡ҆зарѧ́емъ , просвѣща́ѧ на́съ зва́ти ти , сла́ва си́лѣ твое́й гдⷭ҇и . Невѣстокраси́тель ꙗ҆ви́сѧ всебл҃же́нне цр҃ко́вныи . ѿ сїѡ́на проповѣ́давъ сп҃са и҆зы́ти . є҆мꙋ́же зове́мъ , сла́ва си́лѣ твое́й гдⷭ҇и . боⷢ҇ . Собезнача́льное и҆ с̾прⷭ҇носꙋ́щное сло́во ѻ҆́ч҃ее родила̀ є҆сѝ чи́стаѧ бг҃олѣ́пнѡ . є҆мꙋ́же зове́мъ , сла́ва си́лѣ твое́й гдⷭ҇и .

и҆́нъ , і҆рмо́съ . Твоегѡ̀ на землѝ ꙗ҆вле́нїѧ хрⷭ҇тѐ бж҃е , проповѣ́даѧ пррⷪ҇къ прише́ствїе , с̾ весе́лїемъ вопїѧ́ше , сла́ва си́лѣ твое́й гдⷭ҇и . Виті́йское блѧдосло́вїе ѿри́нꙋвъ , оу҆че́нїемъ а҆пⷭ҇льскимъ прїе́мъ . и҆́стинꙋ сла́вне . свидѣ́тель и҆́стинныи бы́въ . И҆́же ѻ҆гнѧ̀ си́льнѣйши и҆зволе́нїе стѧжа́въ . мꙋчи́телей несмышле́нїе низ̾ложи́въ зове́ши , сла́ва си́лѣ твое́й гдⷭ҇и . Ѡ҆ хрⷭ҇тѣ̀ да́же до сме́рти дш҃е́ю терпели́ве , ѻ҆гне́ви и҆ мꙋ́камъ проти́вилсѧ є҆сѝ . велегла́снѡ поѧ̀ , сла́ва си́лѣ твое́й гдⷭ҇и . Си́льнѣйшимъ и҆зволе́нїемъ всебл҃же́нне ѡ҆бдержи́мь , пре́лесть попра́лъ є҆сѝ бг҃омꙋ́дренѡ , поѧ̀ , сла́ва си́лѣ твое́й гдⷭ҇и . боⷢ҇ . Вопло́щьсѧ ѿ дв҃ы беспло́тныи , на́ землю к̾ чл҃кѡмъ прїи́де . тѣ́мже вѣ́рою зове́мъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Оу҆́треннююще вопїе́мъ ти гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Оу҆́треневавъ къ гдⷭ҇ꙋ , прїѧ́тъ ѿ нб҃сѐ да́ръ дх҃а прест҃а́гѡ всехва́льне . Съ помо́щника житїѐ бжⷭ҇твеное стѧжа́въ , ви́дѣти сподо́бисѧ неви́димѡ разꙋмѣва́емаго . Восїѧ̀ тебѣ̀ свѣ́тъ всебл҃же́нне ꙗ҆́кѡ проро́кꙋ , и҆ тогѡ̀ сꙋпрꙋ́жница тебѣ̀ весе́лїе дарова́сѧ . боⷢ҇ . Хотѣ́нїемъ , всѧ́ческаѧ пречⷭ҇таѧ сотвори́выи , и҆з̾ тебѐ созда́сѧ є҆́же ѡ҆ на́съ пребжⷭ҇твеныи .

и҆́нъ , і҆рмо́съ . Воз̾сїѧ́выи свѣ́тъ и҆ просвѣще́й оу҆́тро , и҆ показа́выи де́нь , сла́ва ти сла́ва ти , і҆с҃е сн҃е бж҃їи . Показа́выи на́мъ свои́мъ стрⷭ҇те́мъ подо́бѧщасѧ мч҃нка , и҆ вопїю́ща , сла́ва ти сла́ва ти , і҆с҃е сн҃е бж҃їи . Терпѣ́нїю тѝ мно́гомꙋ , мзда̀ и҆ побѣ́ды вѣне́цъ и҆сплете́сѧ , сла́ва ти сла́ва ти зовꙋ́щꙋ , і҆с҃е сн҃е бж҃їи . Стрѣ́лы гл҃ъ твои́хъ в̾ срⷣца̀ вра́жїѧ воньзѐ , зовы́и , сла́ва ти сла́ва ти , і҆с҃е сн҃е бж҃їи . боⷢ҇ . Ст҃ꙋ́ю го́рꙋ бж҃їю , и҆ селе́нїе вы́шнѧгѡ мꙋ́дрствꙋюще тѧ̀ дв҃о . сла́ва ти сла́ва ти зове́мъ , і҆с҃е сн҃е бж҃їи .

пѣ́снь , ѕ҃ . і҆рмо́съ . Ѡ҆бы́де мѧ бе́здна , гро́бъ же ми ки́тъ бы́сть . а҆́зъ же возопи́хъ к̾ тебѣ̀ чл҃колю́бче , и҆ спасе́ мѧ десни́ца твоѧ̀ гдⷭ҇и . Си́лою дх҃о́вною зрѧ́ше проро́че бꙋ́дꙋщаѧ , ѻ҆́бразы прїе́млѧ бжⷭ҇твеныхъ лꙋ́чь , ꙗ҆́кѡ въ зерца́лѣ дш҃е́вною свѣ́тлостїю . Оу҆молѝ гдⷭ҇а проро́че всебл҃же́нне моли́твами сѝ , вѣ́рою соверша́ющимъ па́мѧть твою̀ , просѧ̀ прегрѣше́ней дарова́ти проще́нїе . боⷢ҇ . Всѧ́ческаѧ носѧ́и сло́вомъ бжⷭ҇твеною си́лою , ѡ҆бъѧ́тїи твои́ми но́ситсѧ неи҆скꙋсобра́чнаѧ . є҆го́же ны́нѣ молѝ спасти́сѧ дш҃а́мъ на́шимъ .

и҆́нъ , і҆рмо́съ . Возопи́лъ проѡбразꙋ́ѧ погребе́нїе тридне́вное , пррⷪ҇къ і҆ѡ́на в̾ ки́тѣ бг҃ꙋ молѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Да бїю́тсѧ десни́цею разж̾же́ною ли́ца бѣсо́вскаѧ . срⷣца́ же вѣ́рныхъ да взыгра́ютсѧ , и҆ беспло́тныхъ ли́цы свѣ́тлѡ да веселѧ́тсѧ . Оу҆краша́ютсѧ до́брыхъ тѝ по́двигъ побѣ́ды ѡ҆долѣ́нїѧ , и҆ страда́льческаѧ зрѧ́щихъ натрижне́нїѧ , перворожде́ныхъ и҆збра́нное и҆ свѣтоно́сное собо́рище . Воста́ните до́брїи ны́нѣ живопи́сцы , мч҃нка ѻ҆́бразъ ва́шими бл҃гоко́зньствы оу҆краси́те , подвигополо́жника ꙗ҆́вственѡ в̾ не́мъ начерта́юще . боⷢ҇ . Веселѧ́тсѧ ѡ҆ тебѣ̀ бг҃омт҃и всепѣ́таѧ , прама́тернїѧ , дре́внїѧ клѧ́твы ржⷭ҇тво́мъ тѝ и҆зба́вльшїисѧ , и҆ сме́ртнагѡ го́рькагѡ ѡ҆сꙋжде́нїѧ .

конда́къ , мч҃нкꙋ . гла́съ , д҃ . Ꙗ҆ви́сѧ преꙋдивле́нъ крѣ́постїю , всесожже́нїѧ лива́нъ бл҃гоꙋха́ненъ , себѐ принесѐ же́ртвꙋ хрⷭ҇то́ви , и҆ вѣне́цъ по́чести прїи́мъ варлаа́ме , прⷭ҇нѡ молѝ заны̀ страда́льче .

пѣ́снь , з҃ . і҆рмо́съ . Въ пещѝ ѻ҆́гненнѣй , пѣвцы̀ спа́слъ дѣ́ти , бл҃гослове́нъ бг҃ъ ѻ҆ц҃ъ на́шихъ . Па́че є҆стества̀ вои́стинꙋ прⷪ҇ро́къ твои́хъ сла́ва , бл҃гослове́ныи бж҃е ѻ҆ц҃ъ на́шихъ . Съ бг҃омъ ты̀ жи́ти сподо́бленъ пое́ши , бл҃гослове́нъ бг҃ъ ѻ҆ц҃ъ на́шихъ . Во проро́цѣхъ твои́хъ бжⷭ҇твенꙋю сѝ бл҃года́ть ꙗ҆влѧ́еши , бл҃гослове́ныи бж҃е ѻ҆ц҃ъ на́шихъ . боⷢ҇ . И҆зба́вленїи твои́мъ ржⷭ҇тво́мъ пречⷭ҇таѧ дв҃о , пое́мъ , бл҃гослове́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Ѻ҆те́ческїи бж҃е непосрамѝ на́съ , но да́рꙋй на́мъ со дерзнове́нїемъ вопи́ти ти , ѻ҆ц҃ъ на́шихъ бж҃е бл҃гослове́нъ є҆сѝ . Съ мч҃нки хрⷭ҇то́вы , ꙗ҆́кѡ непобѣди́мъ мч҃нкъ сподо́бисѧ хрⷭ҇то́ви велегла́снѡ зва́ти , бл҃гослове́нъ бг҃ъ ѻ҆ц҃ъ на́шихъ . Со свѣща́ми свѣ́тлыми в̾ бжⷭ҇твеныи черто́гъ вни́де хрⷭ҇то́съ , великомч҃нче зовы́и , бл҃гослове́нъ бг҃ъ ѻ҆ц҃ъ на́шихъ . Крѣпча́йшꙋ ѻ҆гнѧ̀ десни́цꙋ стѧжа́въ , пред̾ста́тель десны́и бы́сть своемꙋ̀ влⷣцѣ . зове́ши , бл҃гослове́нъ бг҃ъ ѻ҆ц҃ъ на́шихъ . боⷢ҇ . И҆зба́вленїи твои́мъ пречⷭ҇тымъ ржⷭ҇тво́мъ , воспѣва́емъ вѣ́рнїи непреста́ннѡ зовꙋ́ще , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . И҆з̾ ѻ҆ц҃а пре́жде вѣ́къ рожде́ннагѡ сн҃а и҆ бг҃а , и҆ в̾ послѣ́днѧѧ лѣ́та воплоще́нна ѿ дв҃ы мт҃ре , сщ҃е́ннїи по́йте , лю́дїе превозноси́те є҆гѡ̀ во́ вѣки . Бг҃омъ просвѣща́еми проро́цы , провоз̾вѣща́ютъ бꙋ́дꙋщихъ ра́зꙋмъ . бг҃омꙋ́дренѡ пою́ще , сщ҃е́ннїи по́йте лю́дїе , и҆ превозноси́те є҆гѡ̀ во́ вѣки . Ꙗ҆́коже зарѧ̀ въ пꙋчи́нѣ , во тмѣ̀ сꙋ́щїѧ просвѣти́лъ є҆сѝ , бжⷭ҇твеными лꙋча́ми , бг҃овѣща́телю , ѡ҆зарѧ́емь , зовы́й , сщ҃е́ннїи по́йте лю́дїе , и҆ превозноси́те є҆гѡ̀ во́ вѣки . боⷢ҇ . По бжⷭ҇твеномꙋ сꙋществꙋ̀ ѻ҆ц҃ꙋ̀ твоемꙋ̀ є҆диносꙋ́щне , и҆ на́мъ є҆диноесте́ственъ ꙗ҆ви́лсѧ є҆сѝ , воплоти́всѧ ѿ неискꙋсомꙋ́жныѧ мт҃ре . тѣ́мъ тѧ̀ пое́мъ , хрⷭ҇тѐ , и҆ благослови́мъ во всѧ̑ вѣ́ки . сщ҃е́ннїи по́йте лю́дїе , и҆ превозноси́те є҆гѡ̀ во́ вѣки .

и҆́нъ , і҆рмо́съ . Всѧ̀ дѣ́ла бж҃їѧ и҆ всѧ̀ тва́рь бл҃гослови́те гдⷭ҇а . прпⷣбнїи и҆ смире́нїи срⷣцемъ по́йте лю́дїе , и҆ превозноси́те є҆гѡ̀ во́ вѣки . Всѐ низ̾ло́жь вра́жїе ѻ҆рꙋ́жїе варлаа́ме достосла́вне , попали́лъ є҆сѝ и҆́дольскꙋю ле́сть , зовы́и , тѧ̀ превозно́симъ хрⷭ҇тѐ во́ вѣки . Оу҆кра́шенъ бл҃голѣ́пнѡ , хрⷭ҇то́ви пред̾ста̀ страда́льче приснопа́мѧтне . кро́вїю мч҃нческою ѡ҆червленꙋ̀ носѧ̀ багрѧни́цꙋ , и҆ влⷣкꙋ пое́ши во́ вѣки . Бл҃гоче́стїѧ ѻ҆гне́мъ ѡ҆заре́нъ , ꙗ҆́кѡ те́рнїе пожжѐ всѧ̀ бѣсо́вскаѧ мечта́нїѧ , зовы́и , тѧ̀ превозно́симъ хрⷭ҇тѐ во́ вѣки . боⷢ҇ . Бл҃гословѧ́щїи тѧ̀ вѣ́рнѡ , гдⷭ҇емъ блгⷭ҇вѧ́тсѧ всенепоро́чнаѧ . ражда́еши бо бл҃гословѧ́щагѡ влⷣкꙋ , є҆го́же превозно́симъ чи́стаѧ во всѧ̀ вѣ́ки .

пѣ́снь , ѳ҃ . і҆рмо́съ . Тѧ̀ па́че оу҆ма̀ и҆ словесѐ мт҃рь бж҃їю , в̾ лѣ́то без̾лѣ́тнагѡ неи҆зрече́ннѡ ро́ждьшꙋю , вѣ́рнїи є҆диномꙋ́дреннѡ , пѣ́сньми велича́емъ . Сло́вомъ бжⷭ҇твенымъ и҆ дѣѧ́нїемъ оу҆краша́емь , в̾пери́всѧ дх҃омъ прⷪ҇ро́че чꙋ́дныи , бꙋ́дꙋщаѧ зрѣ́ти сподо́бисѧ . И҆дѣ́же прⷪ҇ро́честїи ли́кове вселѧ́ютсѧ , и҆ ст҃ы́хъ свѣ́тлости , молѝ гдⷭ҇а спастѝ , вѣ́рою хва́лѧщаѧ тѧ̀ сла́вне . Ве́сь бг҃ови те́плѣ прилѣжа̀ , чи́стѡ бесѣ́довалъ є҆сѝ бжⷭ҇твеными ꙗ҆вле́нїи . и҆́хже ны́нѣ прїе́млеши всебл҃же́нне . боⷢ҇ . Тѧ̀ свѣ́тꙋ свѣти́льникъ пое́мъ чи́стаѧ . тѧ̀ и҆ скрижа́ль бл҃года́ти , сло́во воплоще́нное прїе́мшꙋ вѣ́дѧще велича́емъ .

и҆́нъ , і҆рмо́съ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Зако́нъ похвале́нїи побѣжда́етсѧ по́двигъ твои́хъ вели́чествомъ . є҆ди́нъ влⷣка хрⷭ҇то́съ тѧ просла́вити вѣ́сть , бжⷭ҇твеною свѣ́тлостїю . є҆го́же прилѣ́жнѡ молѝ ѡ҆ вѣ́рою пою́щихъ тѧ̀ . Всегѡ̀ себѐ гдⷭ҇ви же́ртвꙋ жи́вꙋ прине́съ . всегѡ̀ тогѡ̀ црⷭ҇твїѧ с̾наслѣ́дникъ ꙗ҆ви́сѧ и҆ прича́стникъ . и҆ с̾ ни́мъ ра́дꙋѧсѧ ны́нѣ црⷭ҇твꙋеши прⷭ҇нопа́мѧтне . За твою̀ сп҃се любо́вь , кро́вїю да́же и҆ до сме́рти , мечꙋ̀ и҆ ѻ҆гне́ви и҆ мꙋ́камъ бжⷭ҇твеныи мч҃нкъ проти́вльсѧ . є҆́же оу҆ тебѐ чл҃колю́бче без̾сме́ртїе прїе́мъ , наслажда́етсѧ . боⷢ҇ . Тѧ̀ застꙋ́пницꙋ ми́рꙋ и҆ бг҃омт҃рь дв҃ꙋ , всегѡ̀ живота̀ моегѡ̀ пред̾ста́тельницꙋ и҆ спасе́нїе , ра́дꙋѧсѧ пред̾лага́ю . ты́ бо бг҃а ро́ждьшаѧ , и҆ спастѝ мо́жеши пою́щїѧ тѧ̀ .

свѣти́ленъ . А҆вді́е проро́че , ликꙋ́й и҆ весели́сѧ , твои́хъ глаго́лъ зрѧ̀ сбытїѐ . тѣ́мже трⷪ҇цѣ пред̾стоѧ̀ , соверша́ющихъ свѣтоно́снꙋю ти па́мѧть помѧнѝ и҆ тебѐ чтꙋ́щихъ всебл҃же́нне . боⷢ҇ . И҆́же ѿ пречⷭ҇тыхъ чре́слъ твои́хъ , проше́дшаго бг҃а сло́ва неи҆зрече́ннѡ , дв҃о мт҃и ви́дѧщи распина́ема , взыва́ше , сла́ва неи҆зрече́нномꙋ тѝ смотре́нїю сп҃се мо́й , и҆́мже ми́ръ сво́й спаса́еши .

Слꙋ́жба ст҃ы́хъ прпⷣбныхъ ѻ҆ц҃ъ на́шихъ , пꙋсты́нныхъ жи́телѣй , в̾ постѣ̀ просїѧ́вшихъ варлаа́ма и҆ і҆ѡаса́фа . в̾ вели́цѣй землѝ гл҃емѣй и҆нді́и . =Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и возва́хъ , стихѣ́ры , на ѕ҃ . гла́съ , ѕ҃ . поⷣ . всѐ оу҆пова́нїе . =Ѿ ко́рене ца́рска ,꙳ прекрасна̀ вѣ́твь и҆з̾растѐ ,꙳ бл҃гоꙋха́нныи кри́нъ ,꙳ бл҃же́нныи цр҃ь і҆ѡаса́фъ .꙳ ѡ҆ и҆́же наказа́нїемъ ꙳ дх҃о́внагѡ наста́вника ,꙳ воз̾желѣ̀ ви́дѣти без̾цѣ́нныи би́серъ ,꙳ позна̀ въ трⷪ҇цѣ сла́вимаго бг҃а .꙳ и҆ тогѡ̀ за́повѣдемъ ,꙳ дѣ́латель и҆зрѧ́денъ показа́сѧ .꙳ и҆ ны́нѣ в̾ вы́шнихъ ликоствꙋ́ѧ ,꙳ молѧ́сѧ ѡ҆ дш҃а́хъ на́шихъ . Просвѣще́нныи дш҃е́ю варлаа́мъ ,꙳ цр҃ю і҆ѡаса́фꙋ гл҃аше ,꙳ позна́лъ є҆сѝ бг҃а творца̀ всѣ́хъ ,꙳ то́й да просвѣти́тъ тѝ ѻ҆́чи срⷣчнїи ,꙳ и҆ да́стъ ти дх҃ъ премꙋ́дрости и҆ ра́зꙋма .꙳ да оу҆вѣ́дати и҆́маши что̀ є҆́сть наде́жда зва́нїѧ є҆гѡ̀ .꙳ ꙗ҆́кѡ на послѣ́докъ ,꙳ и҆ роди́телю своемꙋ̀ ко спасе́нїю наста́вникъ бꙋ́деши .꙳ а҆́зъ же не и҆́мамъ ѡ҆ста́ти здѣ̀ ,꙳ но ѿхожꙋ̀ в̾ пꙋ́ть сво́й ,꙳ бг҃а наста́вника и҆мѣ́ѧ .꙳ воз̾водѧ́щаго мѧ̀ ко спасе́нїю . Оу҆слы́шавъ до́блественыи цр҃ь і҆ѡаса́фъ ,꙳ ѡ҆ разлꙋче́нїи словесѐ ,꙳ распали́всѧ дш҃е́ю ,꙳ лицѐ своѐ слеза́ми ѡ҆блива́ѧ ,꙳ ты̀ оу҆чи́телю дх҃о́вныи ,꙳ всѣ́хъ бл҃ги́хъ мои́хъ хода́таю ,꙳ па́ки ли ѡ҆ста́вити мѧ в̾ ми́рѣ се́мъ хо́щеши ;꙳ кто́ ми соверши́тъ тво́й чи́нъ оу҆чи́тельства ;꙳ кто́ ми бꙋ́детъ наста́вникъ ко спасе́нїю ;꙳ ты̀ менѐ к̾ бг҃ꙋ приве́лъ є҆сѝ .꙳ и҆ в̾ чинꙋ̀ сн҃о́внѣ наста́вника наста́вилъ є҆сѝ .꙳ и҆ тобо́ю надѣ́юсѧ ѿ хрⷭ҇та̀ прїѧ́ти ве́лїю млⷭ҇ть . сла́ва . гла́съ , ѕ҃ . Зарда́нꙋ и҆звѣ́стно оу҆вѣ́дѣвшꙋ , ко ѻ҆́трокꙋ оу҆чи́телево прилѣжа́нїе и҆ ко хрⷭ҇тꙋ̀ ѡ҆браще́нїе , мно́ги ско́рби и҆спо́лнисѧ дш҃а є҆гѡ̀ . ѕѣ́льнꙋю болѣ́знь себѣ̀ притворѝ . ни си́мъ воз̾мо́же оу҆таи́тисѧ , подро́бнꙋ царе́ви всѧ̀ и҆сповѣ́даѧ , и҆́мѧ варлаа́мово нари́четъ . то́й речѐ прельстѝ сн҃а твоегѡ̀ . ца́рь же ꙗ҆́кѡ ле́въ ѿ ꙗ҆́рости воз̾ревѣ̀ , в̾ма́лѣ сме́рти невкꙋсѝ . і҆ѡаса́фꙋ же беспреста́ни молѧ́щꙋсѧ , призыва́ѧ сп҃са дш҃а́мъ на́шимъ .

и҆ ны́нѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невоспѣва́етъ твоегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а возсїѧ́въ сн҃ъ є҆диноро́дныи , то́йже ѿ тебѐ чи́стыѧ про́йде , несказа́ннѡ вопло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двою̀ лицꙋ̀ раздѣлѧ́емъ . но во двою̀ є҆стествꙋ̀ несмѣ́сно познава́емъ . тогѡ̀ молѝ чⷭ҇таѧ и҆ всебл҃же́ннаѧ , поми́ловатисѧ дш҃а́мъ на́шимъ .= та́же , вы́ходъ . проки́менъ , дню̀ .=

Ѿ премꙋ́дрости соло́мони , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ помышле́нїе и҆́хъ пред̾ вы́шнимъ . сегѡ̀ ра́ди прїи́мꙋтъ црⷭ҇твїе бл҃голѣ́пїѧ , и҆ вѣне́цъ добро́ты ѿ рꙋкѝ гдⷭ҇ни . ꙗ҆́кѡ десни́цею покры́етъ и҆́хъ , и҆ мы́шцею защи́титъ и҆́хъ . прїи́метъ всѐ ѡ҆рꙋ́жїе ре́вности є҆гѡ̀ , и҆ воѡ҆рꙋже́но сотвори́тъ созда́нїе , в̾ ме́сть враго́мъ . и҆ ѡ҆блече́тъ ѧ҆̀ во бронѧ̀ пра́вды , и҆ возложи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непобѣди́мъ преподо́бїе . по ѡ҆стри́тъ же напра́сенъ гнѣ́въ во ѡ҆рꙋ́жїи . и҆ побо́ретъ с̾ ни́мъ ми́ръ на безꙋ́мныѧ . и҆ по́йдꙋтъ праволꙋ́чнѣ стрѣ́лы мо́лнїины , ꙗ҆́кѡ ѿ бл҃гокрꙋ́гла лꙋ́ка ѻ҆блако́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рости и҆спо́лнь , падꙋ́тъ гра́ды . вознегодꙋ́етъ на ни́хъ вода̀ морска́ѧ , рѣ́ки же потекꙋ́тъ жесточа́е . сопроти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хоръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлодѣѧ́нїе преврати́тъ престо́лы си́льныхъ . слы́шите оу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ конце́мъ землѝ . внꙋши́те содержа́щїи мно́жества , и҆ гордѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

Ѿ премꙋ́дрости соло́мони , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ не многолѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрость чл҃кѡмъ . и҆ во́зрастъ ста́рости , житїѐ нескве́рно . бл҃гоꙋго́денъ бг҃ови бы́въ , воз̾лю́бленъ бы́сть . и҆ живы́и посредѣ̀ грѣ́шникъ , преста́вленъ бы́сть . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хоти , премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та мно́га , оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни положи́ша в̾ помышле́нїи такова́гѡ , ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Н=а стихо́внѣ , стихѣ́ры . гла́съ , и҃ . поⷣ . ѽ =пресла́вное чꙋ́до . Царю̀ а҆вени́рꙋ къ сн҃ови гл҃ющꙋ ,꙳ воз̾лю́бленое моѐ ча́до ,꙳ че́сть бого́въ на́шихъ ѡ҆ста́вилъ є҆сѝ ,꙳ чꙋже́мꙋ бг҃ꙋ слꙋжи́ти и҆зво́лилъ є҆сѝ .꙳ почто̀ ча́до моѐ та́кѡ сотвори́лъ є҆сѝ ;꙳ а҆́зъ надѣ́ѧхсѧ вѣ́рою воспита́ти тѧ̀ ,꙳ и҆ прїѧ́телѧ бы́ти црⷭ҇твїю моемꙋ̀ ,꙳ ты́ же ча́до моѐ та́кѡ сотвори́лъ є҆сѝ ,꙳ галиле́ѧнинꙋ послѣ́дова .

сти́хъ : восхва́лѧтсѧ прпⷣбнїи во сла́вѣ ,꙳ и҆ воз̾ра́дꙋютсѧ на ло́жахъ свои́хъ . А҆́зъ ѿверго́хсѧ бѣсо́вскїѧ тмы̀ ,꙳ и҆ къ свѣ́тꙋ притеко́хъ бг҃оразꙋ́мїѧ .꙳ и҆́дольскꙋю пре́лесть ѡ҆ста́вивъ ,꙳ и҆ ко и҆́стинѣ прибли́жихсѧ ,꙳ и҆ хрⷭ҇тꙋ̀ рабо́тати и҆зво́лихъ .꙳ то́й бо на́ше ѡ҆сꙋжде́нїе дре́внее разрꙋшѝ ,꙳ и҆ є҆стество̀ на́ше на нб҃са̀ воз̾несѐ .꙳ и҆ црⷭ҇тво нбⷭ҇ное ѡ҆бѣща̀ всѣ́мъ ,꙳ лю́бѧщимъ є҆гѡ̀ вои́стинꙋ .

сти́хъ : мно́ги ско́рби пра́веднымъ ,꙳ и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . Царю̀ ꙗ҆́ростїю и҆ преще́нїемъ ст҃а́гѡ ѻ҆́трока ,꙳ оу҆страши́ти хотѧ́щꙋ ,꙳ приречѐ мно́гимъ мꙋ́камъ преда́мъ тебѐ ,꙳ и҆ ѕло́ю сме́ртїю оу҆морю́ тѧ .꙳ и҆ к̾ томꙋ̀ сн҃а тебѐ не нарекꙋ̀ ,꙳ но ꙗ҆́кѡ врага̀ и҆ ѿстꙋ́пника .꙳ и҆ та́кѡ прети́въ со́ гнѣвомъ ѿи҆́де .꙳ і҆ѡаса́фъ же в̾ пола́тꙋ в̾ше́дъ ,꙳ беспреста́ни бг҃ꙋ молѧ́шесѧ .

сла́ва . гла́съ , и҃ . Премꙋ́дрыи цр҃ь і҆ѡаса́фъ , на сꙋди́щи к̾ нахѡ́рꙋ гл҃аше , вѣ́си ли в̾ кі́ихъ ѡ҆брѣ́лъ мѧ є҆сѝ честѝ бого́въ , и҆ ѻ҆́ч҃а зако́на оу҆клони́тисѧ , и҆ невѣ́домомꙋ бг҃ꙋ рабо́тати наꙋчи́лъ є҆сѝ . и҆ а҆́ще побѣди́ши , просла́вишисѧ , и҆ а҆́зъ бꙋ́дꙋ сохранѧ́ѧ зако́нъ тво́й . а҆́ще ли побѣжде́нъ бꙋ́деши , срⷣце и҆ ꙗ҆зы́къ тво́й рꙋка́ма и҆зе́мъ , псо́мъ в̾ снѣ́дь с̾ про́чими оу҆́ды преда́мъ сїѧ̀ . да тебѐ ви́дѧ оу҆страша́тсѧ всѝ , непрельща́ти сыно́въ цр҃е́выхъ .

и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твои́хъ ра́бъ мольбы̀ прїимѝ всенепоро́чнаѧ , всѣ́мъ подаю́щи ѡ҆чище́нїе прегрѣше́нїемъ . ны́нѣ на́ша моле́нїѧ прїе́мши , молѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Ѿ дх҃о́внагѡ наста́вника наꙋчи́всѧ цр҃ю і҆ѡаса́фе бг҃а позна́лъ є҆сѝ . кр҃ще́нїемъ просвѣти́всѧ , лю́ди к̾ вѣ́рѣ ѡ҆братѝ . и҆ ѻ҆ц҃ꙋ своемꙋ̀ ѿ кꙋпѣ́ли прїи́мникъ бы́въ . црⷭ҇тво ѡ҆ста́вль , пꙋсты́ню дости́же . и҆ в̾ не́й трꙋдолю́бне под̾виза́сѧ . молѝ хрⷭ҇та̀ бг҃а со оу҆чи́телемъ сѝ варлаа́момъ , спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . И҆́же ѿ́ вѣка оу҆тае́нное , и҆ а҆́нг҃лѡмъ несвѣ́домое та́инство , тобо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи воплоща́емъ . и҆ крⷭ҇тъ во́лею на́съ ра́ди воспрїе́мъ , и҆́мъ же воскр҃сѝ первозда́ннаго , и҆ спасѐ ѿ сме́рти дш҃а на́ша .

На оу҆́трени , на бг҃ъ гдⷭ҇ь , тропа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , и҃ . Страстны́и мра́къ ѡ҆чи́стивъ , и҆ хрⷭ҇то́ва повелѣ́нїѧ ꙗ҆́кѡ вои́стинꙋ свѣ́тъ прїи́мъ , в̾ постѣ̀ просїѧ́лъ є҆сѝ . и҆ оу҆мертви́въ тѣ́ло , дх҃омъ ѡ҆́жилъ є҆сѝ . вра́жїѧ сѣ́ти попра́въ бл҃же́нне . тѣ́мъ и҆ вы́шнихъ беспло́тныхъ слꙋ́гъ соприча́стникъ бы́сть , дх҃а бл҃года́тїю . і҆ѡаса́фе ѻ҆́ч҃е на́шъ , молѝ хрⷭ҇та̀ бг҃а согрѣше́нїемъ ѡ҆ставле́нїе дарова́ти , пра́з̾днꙋющимъ любо́вїю ст҃ꙋ́ю па́мѧть твою̀ . =двⷤа . сла́ва , и҆ ны́нѣ , боⷢ҇ . Ꙗ҆́кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище въ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ .

По в҃ , стихоло́гїи , сѣда́ленъ . гла́съ , є҃ . По́стника гдⷭ҇нѧ пѣ́сньми почте́мъ , ꙗ҆́кѡ оу҆мертви́вша всѧ̀ прило́ги страсте́мъ , воздержа́нїемъ тве́рдымъ , и҆ крѣ́пкимъ терпѣ́нїемъ вои́стинꙋ , и҆ посрами́вша ѕѣлѡ̀ сопроти́внагѡ всю̀ горды́ню , и҆ нн҃ѣ молѧ́щасѧ гдⷭ҇ви , поми́ловатисѧ дш҃а́мъ на́шимъ . двⷤа . сла́ва , и҆ нн҃ѣ , боⷢ҇ . Стра́шно чꙋ́до зача́тїѧ , и҆ несказа́ненъ ѻ҆́бразъ ржⷭ҇тва̀ , в̾ тебѣ̀ позна́сѧ чⷭ҇таѧ прⷭ҇нѡ дв҃о . оу҆жаса́етъ мѝ оу҆́мъ , и҆ оу҆дивлѧ́етъ помышле́нїѧ . сла́ва твоѧ̀ бцⷣе всѣ́мъ простре́сѧ , на спасе́нїе дш҃а́мъ на́шимъ .

по хвали́те и҆́мѧ гдⷭ҇не , припѣ́въ : Оу҆бл҃жа́емъ тѧ прпⷣбне ѻ҆́ч҃е і҆ѡаса́фе , и҆ чте́мъ ст҃ꙋ́ю па́мѧть твою̀ , ты́ бо мо́лиши за на́съ хрⷭ҇та̀ бг҃а на́шего . ѱл҃о́мъ и҆збра́нныи : терпѧ̀ потерпѣ́хъ гдⷭ҇а .

По полїєлеѡ́сѣ , сѣда́ленъ . гла́съ , г҃ . Чиста̀ и҆ непоро́чна дш҃а бжⷭ҇твенагѡ ѻ҆́трока , ѡ҆полче́нїѧ вра́жїѧ не оу҆страши́сѧ . на по́двигъ мꙋ́жески оу҆крѣплѧ́ѧсѧ , свы́ше и҆збавле́нїѧ просѧ̀ . да неѡ҆скверни́тъ ѻ҆де́жды , ю҆́же ѿ ст҃а́гѡ кр҃ще́нїѧ прїѧ́тъ . да оу҆лꙋчи́тъ красотꙋ̀ и҆ сла́вꙋ хрⷭ҇то́вꙋ . два́жды . сла́ва , и҆ ны́нѣ , боⷢ҇ . Ко́ждо и҆дѣ́же спаса́етсѧ , в̾ пра́вдꙋ та́мѡ прибѣга́етъ . и҆ ко́е и҆́но таково̀ прибѣ́жище , ꙗ҆́кѡ твоѐ бцⷣе , покрыва́ющее дш҃а на́ша .

степе́нна , д҃ го гла́са . а҆нтиѳо́нъ , а҃ . проки́менъ , ѱл҃о́мъ дв҃довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . всѧ́ко дыха́нїе .

є҆ѵⷢ҇а́лїе , ѿ матѳе́ѧ . заⷱ҇ , м҃г . ѱало́мъ , н҃ .

сла́ва . мл҃твъ ра́ди прпⷣбнагѡ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Прпⷣбне ѻ҆́ч҃е , во всю̀ зе́млю и҆зы́де вѣща́нїе и҆справле́нїи твои́хъ . и҆́ми же на́ нб҃сѣхъ ѡ҆брѣ́те мздꙋ̀ трꙋдо́въ свои́хъ . дѣ́монскїѧ разори́лъ є҆сѝ по́лчища , и҆ а҆́нг҃льскїѧ дости́глъ є҆сѝ чи́ны . и҆́хже житїю̀ беспоро́ка поревнова́лъ є҆сѝ . дерзнове́нїе и҆мѣ́ѧ ко́ гдⷭ҇ꙋ , ми́ръ и҆спросѝ дш҃а́мъ на́шимъ .

Кано́нъ бцⷣѣ , со і҆рмосо́мъ , на́ ѕ҃ . гла́съ , и҃ . Во́дꙋ проше́дъ .= Кано́нъ , цр҃ю і҆ѡаса́фꙋ , на́ и҃ . пѣ́нїе моле́бное приношꙋ̀ . гла́съ , и҃ . пѣ́снь , а҃ . і҆рмо́съ . С=окрꙋ́шшемꙋ бра́ни мы́шцею свое́ю , и҆ прове́дшемꙋ і҆и҃лѧ сквозѣ̀ чермно́е мо́ре , воспое́мъ є҆мꙋ̀ ꙗ҆́кѡ и҆зба́вителю на́шемꙋ ꙗ҆́кѡ просла́висѧ .

запѣ́в̾ : Прпⷣбне ѻ҆́ч҃е і҆ѡаса́фе , молѝ бг҃а ѡ҆ на́съ .= Цр҃е́вы гл҃ы слы́шавъ нахѡ́ръ ѕѣлѡ̀ вострепета̀ , и҆ в̾ мѣ́стѡ раз̾враще́нїѧ и҆зречѐ бл҃гослове́нїе , ѡ҆блича́ѧ і҆ꙋде́ѧ и҆ є҆́ллины . проповѣ́даѧ же на землѝ хрⷭ҇то́во прише́ствїе , ꙗ҆́кѡ просла́висѧ . Рече́нїѧ нахѡ́ръ ѡ҆ зако́нѣ и҆зложѝ . виті́и же и҆ жрецы̀ посрами́шасѧ , и҆ ꙗ҆́кѡ без̾гла́сни ѡ҆брѣто́шасѧ . цр҃ю́ же і҆ѡаса́фꙋ дш҃е́ю веселѧ́щꙋсѧ , и҆ сла́вѧщꙋ бг҃а нбⷭ҇нагѡ , ꙗ҆́кѡ просла́висѧ . І҆ѡаса́фъ цр҃ь к̾ нахѡ́рꙋ речѐ , бл҃года́ть тѝ и҆сповѣ́дꙋю , ꙗ҆́кѡ по и҆́стинѣ побо́рникъ бы́лъ є҆сѝ . и҆ а҆́ще хрⷭ҇та̀ возлю́биши , жи́знь наслѣ́диши . ѡ҆браща́ющимсѧ бо к̾ немꙋ̀ , ѿверза́етъ врата̀ нбⷭ҇наѧ . =боⷢ҇ . А҆́ще и҆ недосто́йнѣ принесо́хъ тѝ таково́е слове́съ и҆зви́тїе , бг҃омꙋ́дрыи цр҃ю і҆ѡаса́фе , прїимѝ сїѧ̀ съ любо́вїю , и҆ принесѝ к̾ бг҃омт҃ри моле́нїе за мѧ̀ , да ми́лость ѡ҆брѧ́щꙋ въ дн҃ь стра́шнагѡ и҆спыта́нїѧ . катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . Оу҆тверди́сѧ се́рдце моѐ ѡ҆́ гдⷭ҇ѣ , воз̾несе́сѧ ро́гъ мо́й ѡ҆́ бз҃ѣ мое́мъ , разшири́шасѧ на врагѝ моѧ̀ оу҆ста̀ моѧ̀ , воз̾весели́хсѧ ѡ҆ спасе́нїи твое́мъ . Словесы̀ любе́зными цр҃ь нахѡ́ра наказа́въ . ѻ҆́нъ же с̾ пла́чемъ и҆ ра́достїю пꙋсты́ню дости́же , на вѣ́рꙋ ѡ҆брати́сѧ , и҆ кр҃ще́нїемъ просвѣти́сѧ . и҆ в̾мѣ́стѡ во́лка , ѻ҆вча̀ хрⷭ҇то́во ѡ҆брѣ́тесѧ . Ѳе́вда к̾ цр҃ю а҆вени́рꙋ гл҃аше , не оу҆бо́йсѧ царю̀ галиле́йскихъ мꙋдре́цъ . сі́и бо ско́рѡ и҆спадꙋ́тъ , не и҆́мꙋтъ пред̾ лице́мъ мои́мъ ста́ти , ни слове́съ проти́венъ гл҃ати . Пред̾ста́виша ѻ҆трокови́цы оу҆кра́шены , цр҃е́вꙋ сн҃ꙋ на послꙋже́нїе , да прельстѧ́тъ пра́веднаго ѻ҆́трока . ѻ҆́нъ же а҆́ще и҆ раз̾жже́нїе в̾ срⷣце плотьско́е прїи́мъ , мл҃твою же и҆ поще́нїемъ ѿ сѣ́ти ѻ҆́ноѧ и҆зба́вленъ бы́сть . боⷢ҇ . Напа́стьми мно́гими ѡ҆держи́мь , и҆з̾ глꙋбины̀ срⷣца вопїю́ ти . влⷣчце и҆зба́ви мѧ непотре́бнаго раба̀ твоегѡ̀ лю́тыхъ ѡ҆б̾стоѧ́нїи . и҆ тишинꙋ̀ пода́ждь срⷣцꙋ моемꙋ̀ .

катава́сїѧ : Твоѧ̀ пѣвцы̀ .

сѣда́ленъ . гла́съ , г҃ . Чиста̀ и҆ непоро́чна дш҃а бжⷭ҇твенагѡ ѻ҆́трока , ѡ҆полче́нїѧ вра́жїѧ не оу҆страши́сѧ . на по́двигъ мꙋ́жески оу҆крѣплѧ́ѧсѧ , свы́ше и҆збавле́нїѧ просѧ̀ . да неѡ҆скверни́тъ ѻ҆де́жды , ю҆́же ѿ ст҃а́гѡ кр҃ще́нїѧ прїѧ́тъ . да оу҆лꙋчи́тъ красотꙋ̀ и҆ сла́вꙋ хрⷭ҇то́вꙋ . двⷤа . сла́ва , и҆ ны́нѣ , боⷢ҇ . Ко́ждо и҆дѣ́же спаса́етсѧ , в̾ пра́вдꙋ та́мѡ прибѣга́етъ . и҆ ко́е и҆́но таково̀ прибѣ́жище , ꙗ҆́кѡ твоѐ бцⷣе , покрыва́ющее дш҃а на́ша .

пѣ́снь , д҃ . і҆рмо́съ . Проро́къ а҆вва́кꙋмъ , мы́сленныма ѻ҆чи́ма прови́дѣ гдⷭ҇и прише́ствїе твоѐ . тѣ́мже и҆ вопїѧ́ше , ѿ ю҆́га прїи́детъ бг҃ъ . сла́ва си́лѣ твое́й , сла́ва хрⷭ҇тѐ прише́ствїю твоемꙋ̀ . Є҆гда̀ посто́мъ и҆ мл҃твою тѣ́ло своѐ оу҆дрꙋчѝ , зри́тъ во снѣ̀ па́жить прекраснꙋ̀ , и҆ гра́да красотꙋ̀ недомы́слимꙋ . во є҆ди́номъ оу҆́глѣ жела́етъ пребыва́нїѧ . и҆ гла́съ слы́шитъ , подвиза́ющимсѧ сїѧ̀ оу҆гото́васѧ . Минꙋ́въ мѣ́ста ѻ҆́на свѣ́тлаѧ , зри́тъ мѣ́сто тмы̀ и҆спо́лнено , и҆ пе́щь стра́шнымъ пла́менемъ шꙋмѧ́щꙋю . и҆ гла́сꙋ гласѧ́щꙋ , сѐ мꙋче́нїе грѣ́шникѡмъ , и҆́же дѣ́лы скве́рными себѐ ѡ҆скверни́вшимъ . Лежа̀ на ѻ҆дрѣ̀ оу҆бꙋди́всѧ ѿ видѣ́нїѧ , сле́зы а҆́ки рѣ́ки и҆спꙋща́ше . и҆ ве́сь стра́хомъ ѡ҆бъѧ́тъ бы́въ . и҆ в̾ себѣ̀ раз̾сꙋжда́ѧ , ка́кѡ свѣ́тло пра́веднымъ воз̾даѧ́нїе , и҆ грѣ́шнымъ стра́шно мꙋче́нїе и҆ вопїѧ̀ хрⷭ҇то́ви , сла́ва си́лѣ твое́й гдⷭ҇и . боⷢ҇ . Бг҃а на рꙋкꙋ̀ носи́въ , и҆́же всѧ́ческаѧ рꙋко́ю содержа́щаго , ѽ дв҃о всебл҃гослове́наѧ . тогѡ̀ дв҃ою породи́въ , и҆ по ржⷭ҇твѣ̀ па́ки дв҃ою пребы́сть .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Гдⷭ҇и бж҃е на́шъ , ми́ръ да́ждь на́мъ . гдⷭ҇и бж҃е на́шъ , стѧжи́ ны . гдⷭ҇и , ра́звѣ бо тебѐ и҆но́гѡ незна́емъ , и҆́мѧ твоѐ и҆мѧнꙋ́емъ . Нездра́витъ тѝ сн҃ъ повѣ́даша цр҃ю . ѻ҆́нъ же ско́рѡ притечѐ , и҆ оу҆ми́льнѡ вопроша́ше , что́ ти бы́сть сн҃е мо́й люби́мыи . оу҆тѣ́хо ста́рости моеѧ̀ . что̀ та́кѡ лежи́ши на ѻ҆дрѣ̀ свое́мъ ни к̾ комꙋ́ же ни ма́лѡ бесѣ́дꙋѧ . Препѧ́лъ є҆сѝ сѣ́ть нога́мъ мои́мъ , вма́лѣ всели́ласѧ бы во а҆́дъ дш҃а моѧ̀ , а҆́ще не гдⷭ҇ь помо́глъ бы мѝ , и҆ показа́ ми пꙋ́ть ко спасе́нїю . и҆ к̾ томꙋ̀ невозмо́глъ бы є҆сѝ менѐ ви́дѣти жи́ва , и҆ сн҃а себѣ̀ и҆менова́ти . Рыда́нїе и҆ печа́ль с̾ го́рькимъ пла́чемъ сплета́ше цр҃ь . неꙋтоли́мь мѧте́жь и҆мѣ́ѧше речѐ в̾ себѣ̀ ча́до . не то́кмѡ бого́въ ѿстꙋпле́нїемъ , но и҆ живота̀ своегѡ̀ ѿрица́ешисѧ . боⷢ҇ . Неи҆з̾глаго́ланнѡ заче́нши бг҃а , и҆ па́че є҆стества̀ родила̀ є҆сѝ . сегѡ̀ молѝ всенепоро́чнаѧ , растлѣ́вша без̾мѣ́стными дѣѧ́нїи , поми́ловати мѧ̀ за неи҆зрече́ннꙋю млⷭ҇ть .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Ꙗ҆́кѡ во́ды морскі́ѧ чл҃колю́бче , во́лны жите́йскїѧ погрꙋжа́ютъ мѧ . тѣ́мъ ꙗ҆́кѡ і҆ѡ́на вопїю́ ти сло́ве , воз̾ведѝ ѿ тлѝ живо́тъ мо́й милосе́рде гдⷭ҇и . Шꙋ́ѧгѡ стоѧ́нїѧ и҆зба́витисѧ , и҆ десна́гѡ стоѧ́нїѧ сподо́битисѧ жела́ти , і҆ѡаса́фꙋ та́кѡ и҆́стинствꙋющꙋ . и҆ ни что́ же честѝ па́че хрⷭ҇то́вы любвѐ . се́бо и҆́стиннаѧ сла́дость и҆ весе́лїе , и҆ вѣ́чное пребыва́нїе . Оу҆́бѡ ѳе́вда глаго́лаше , почто̀ бого́въ ѿстꙋпи́лъ є҆сѝ , и҆ ѻ҆тца̀ царѧ̀ прогнѣ́валъ є҆сѝ ; сегѡ̀ ра́ди ѿ всѣ́хъ люде́й воз̾ненави́дѣнъ є҆сѝ . не бо́ѕи ли ѻ҆тца̀ твоегѡ̀ мл҃твы послꙋ́шавше , и҆ тебѐ є҆мꙋ̀ подарова́ша . Возопѝ цр҃ь і҆ѡаса́фъ , ѽ заблꙋже́нїѧ глꙋбино̀ , вавѷлѡ́нское сѣ́мѧ , столпотворе́нїѧ внꙋ́че , ѻ҆каѧ́нне чародѣ́ивыи ста́рче , почто̀ оу҆корѧ́еши спасе́нꙋю про́повѣдь хрⷭ҇то́ва прише́ствїѧ , є҆го́же сла́вы нб҃о и҆ всѧ̀ землѧ̀ и҆спо́лнишасѧ .= боⷢ҇ . Помозѝ влⷣчце , и҆ оу҆слы́ши гл҃ъ мо́й всенепоро́чнаѧ , и҆́же и҆з̾ глꙋбины̀ дш҃и приноша́ю ти , и҆ разрѣше́нїе долго́въ пода́ждь мѝ . =катава́сїѧ : Бжⷭ҇твеное сѐ и҆ всечестно́е .

конда́къ . гла́съ , и҃ . Вѣ́дыи твоѐ и҆з̾ младе́нства бл҃го́е и҆зволе́нїе , і҆ѡаса́фе є҆ди́нъ сердцевѣ́децъ бг҃ъ . и҆́бо ѿ црⷭ҇твїѧ земна́гѡ во и҆́ноческое пребыва́нїе приведы́и тѧ̀ , вели́комꙋ варлаа́мꙋ послѣ́довати сподо́би , с̾ ни́мже ны́нѣ го́рнїи і҆єрⷭ҇ли́мъ всесвѣ́тлыи ѻ҆те́чество и҆мѣ́ѧ . жела́емыѧ добро́ты , краснѡ̀ наслажда́ѧсѧ ст҃ы́ѧ трⷪ҇цы . мо́лимъ тѧ̀ црⷭ҇каѧ красото̀ , помина́й на́съ вѣ́рою чтꙋ́щихъ тѧ̀ . и҆́косъ . Дрꙋгі́и ѻ҆́ч҃е ꙗ҆ви́сѧ вра́чь и҆ пред̾ста́тель , недꙋ́гомъ ѡ҆держи́мыхъ ско́рбїю , варлаа́ме и҆ і҆ѡаса́фе чꙋ́дне и҆сцѣлѧ́ета всѣ́хъ вѣ́рныхъ притека́ющихъ под̾ бжⷭ҇твеныи покро́въ тво́й . тѣ́мъ и҆ ѿ на́съ слы́шиши , ра́дꙋисѧ ѻ҆ц҃а бл҃га́гѡ ко́рень . ра́дꙋисѧ мт҃ре бл҃гі́ѧ вѣ́твь . ра́дꙋисѧ и҆́же тѣ́хъ любо́вь ѿри́нꙋвыи . ра́дꙋисѧ и҆́же є҆ди́наго бг҃а прїе́мыи . ра́дꙋисѧ ꙗ҆́кѡ ѡ҆ста́вилъ є҆сѝ на землѝ во́инство . ра́дꙋисѧ ꙗ҆́кѡ низложи́лъ є҆сѝ ва́рварскꙋю горды́ню . ра́дꙋисѧ стѣна̀ и҆ храни́тель цр҃е́мъ бы́выи . ра́дꙋисѧ ѻ҆рꙋ́жїе и҆ сто́лпъ ми́рови ꙗ҆́вльсѧ . ра́дꙋисѧ ѻ҆гне́мъ поже́гъ ꙗ҆зы́чества . ра́дꙋисѧ свѣти́льниче сїѧ́ѧ чꙋдесы̀ . ра́дꙋисѧ наги́мъ мно́жицею покро́въ . ра́дꙋисѧ плѣне́нымъ и҆зба́вителю . помина́й на́съ вѣ́рою чтꙋ́щихъ тѧ̀ .

пѣ́снь , з҃ . і҆рмо́съ . Халдѣ́йскаѧ пе́щь ѻ҆гне́мъ распала́ема , прохлажда́шесѧ дх҃омъ бж҃їимъ застꙋпле́нїемъ , ѻ҆́троцы же поѧ́хꙋ , бл҃гослове́нъ бг҃ъ ѻ҆ц҃ъ на́шихъ . Сла́вꙋ же и҆ црⷭ҇тво и҆ ѻ҆́бласть всю̀ на́ двое раздѣ́льшемꙋ . ѻ҆́вꙋ себѣ̀ ѡ҆ста́вль , ѻ҆́вꙋ же врꙋча́етъ сн҃ови , цр҃е́мь є҆гѡ̀ поста́ви . кнѧ́зи же мно́ги и҆ страти́ги пре́давъ , любе́знѡ же и҆ че́стнѡ ѿпꙋстѝ є҆гѡ̀ на странꙋ̀ свою̀ . Непро́стѡ к̾ црⷭ҇твꙋ и҆дѧ́ше , но честны́и крⷭ҇тъ пред̾ ни́мъ ноша́хꙋ . вше́дъ же во́ градъ , на всѧ̀ столпы̀ ѻ҆́бразъ крⷭ҇та̀ водрꙋжа́ше , и҆ ка́пища разорѧ́ше . прекраснꙋ̀ цр҃ковь влⷣцѣ хрⷭ҇тꙋ̀ воз̾дви́же . и҆ всѣ́мъ собра́тисѧ к̾ не́й повелѣва́ше . са́мъ же прилѣ́жнѡ молѧ́шесѧ . Хрⷭ҇тꙋ̀ вѣ́ровати всѣ́хъ под̾рꙋ́чныхъ оу҆ча́ше . и҆з̾гна́ныѧ же ѻ҆ц҃е́мъ є҆пкⷭ҇пы , і҆єре́и и҆ мни́си ра́достнѡ срѣта́ше . и҆ свои́ми рꙋка́ми но́ги и҆́хъ ѡ҆мыва́ѧ , и҆ всѧ́ко промышле́нїе ѡ҆ ни́хъ творѧ́ше . и҆ оу҆се́рднѡ взыва́ше , препросла́вленыи бж҃е бл҃гослове́нъ є҆сѝ . боⷢ҇ . Оу҆́бѡ дре́вле і҆а́кѡвъ тѧ̀ прописа̀ . и҆са́їѧ же оу҆́глемъ дх҃а ѡ҆чи́щьсѧ . бг҃а є҆мманꙋ́ила ѿ оу҆тро́бы твоеѧ̀ роди́тисѧ прозна́менова . к̾ немꙋ́ же велегла́снѡ вопїѧ́ше , ѻ҆ц҃ъ на́шихъ бж҃е блгⷭ҇ве́нъ є҆сѝ . катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Покрыва́ѧй вода́ми превы́спреннѧѧ своѧ̀ , полага́ѧй мо́рю предѣ́лъ песо́къ , и҆ содержа́и зе́млю . тѧ̀ пое́тъ сл҃нце , тѧ̀ сла́витъ лꙋна̀ , тебѣ̀ прино́ситъ хвалꙋ̀ всѧ̀ тва́рь , ꙗ҆́кѡ содѣ́телю всѣ́мъ во́ вѣки . Оу҆́бѡ і҆ѡаса́фовъ до́мъ растѧ́ше , а҆вени́рѡвъ же оу҆малѧ́шесѧ . а҆́бїе ца́рь писа́нїемъ сы́на призыва́етъ . ѻ҆́нъ же ско́рѡ прише́дъ на вѣ́рꙋ ѻ҆тца̀ ѡ҆братѝ . и҆ ѿ кꙋпѣ́ли семꙋ̀ прїе́мникъ бы́въ . и҆ возопѝ ра́достнѡ , сла́влю тѧ̀ хрⷭ҇тѐ во́ вѣки всѧ̀ . Бы́сть чꙋ́до преди́вно , сы́нъ роди́телю своемꙋ̀ ѻ҆те́цъ ꙗ҆ви́сѧ . ѡ҆кре́стныѧ страны̀ просвѣща́хꙋсѧ . цр҃кви созида́хꙋсѧ . є҆пкⷭ҇пи и҆ і҆єре́и же́ртвꙋ бг҃ови приноша́хꙋ . пѣ́снь воспѣва́юще , и҆ сла́вѧще хрⷭ҇та̀ во́ вѣки всѧ̀ . Гдⷭ҇нею бл҃года́тїю ца́рь а҆вени́ръ веселѧ́шесѧ , всю̀ црⷭ҇кꙋю вла́сть сн҃ови предадѐ . са́мъ же в̾ молча́нїи пребыва́ше . в̾ толи́кꙋ глꙋбинꙋ̀ смире́нїѧ вложѝ себѐ , ꙗ҆́кѡ и҆ дре́внихъ превзы́ти бл҃говѣ́рїемъ . и҆ сла́вѧще хрⷭ҇та̀ во́ вѣки всѧ̀ . боⷢ҇ . И҆ны́ѧ по́мощи не и҆́мамы , ра́звѣ тебѐ влⷣчце . ты̀ крѣ́пость и҆ оу҆тверже́нїе . ты̀ похвала̀ и҆ ра́дованїе и҆ храни́тельница ми́рꙋ . к̾ тебѣ̀ прибѣга́юще спаса́емсѧ всѝ . катава́сїѧ : Хва́лимъ блгⷭ҇ви́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Тѧ̀ браконеи҆скꙋси́мꙋю мт҃рь бг҃а вы́шнѧгѡ , тѧ̀ па́че оу҆ма̀ ро́ждьшꙋю сло́во сꙋ́щагѡ бг҃а , и҆ вы́шшꙋ пречⷭ҇тыхъ си́лъ , немо́лчными славословле́нїи велича́емъ . Минꙋ́вшимъ дне́мъ нѣ́коимъ по кр҃ще́нїи , ца́рь а҆вени́ръ а҆́бїе в̾ недꙋ́гъ тѣле́сныи впадѐ . и҆ є҆гда̀ нача́тъ приближа́тисѧ коне́цъ житїѧ̀ є҆гѡ̀ , в̾ до́брѣмъ и҆сповѣ́данїи , и҆ те́плыми слеза́ми дш҃ꙋ свою̀ предадѐ . Ра́достными слеза́ми сы́нъ почита́ше ѻ҆тца̀ , не оу҆красѝ є҆гѡ̀ црⷭ҇кими ѻ҆де́ждами , но просты́мъ ѻ҆дѣѧ́нїемъ тѣ́ло є҆гѡ̀ покры̀ . на́д̾ гробомъ ста́въ , рꙋ́цѣ воздѣ́въ , бг҃ꙋ бл҃годаре́нїе воз̾сыла́ше , в̾ покаѧ́нїи тогѡ̀ прїи́мшꙋ . Къ лю́демъ гл҃аше сѣдѧ̀ на прⷭ҇то́лѣ црⷭ҇тѣмъ , ѻ҆те́цъ мо́й ца́рь а҆вени́ръ оу҆́мре , ꙗ҆́кѡ є҆ди́нъ ѿ ни́щихъ . ни что́ же є҆мꙋ̀ послѣ́дова , ни бога́тство , ни црⷭ҇каѧ сла́ва . вы́ же и҆збери́те себѣ̀ є҆го́же хо́щете , да црⷭ҇твꙋетъ над̾ ва́ми . боⷢ҇ . Лѣ́ствица і҆а́кѡвлѧ , є҆ю́же дре́вле а҆́нг҃лы ви́дѣ сходѧ́ща . гора̀ присѣ́ннаѧ , ѿ неѧ́ же ка́мень без̾ рꙋ́къ ѿсѣче́сѧ . и҆ две́рь нбⷭ҇наѧ , є҆ю́же гдⷭ҇ь є҆ди́нъ про́йде . є҆ди́на в̾ жена́хъ ты̀ є҆сѝ пречⷭ҇таѧ . катава́сїѧ : Всѧ́къ зе́менъ .= Досто́йнѡ є҆́сть .=

свѣти́ленъ . Црⷭ҇тво ѡ҆ста́вль , и҆ к̾ пꙋсты́ни оу҆стреми́сѧ . и҆ въ хра́минѣ оу҆бо́гагѡ ѡ҆бита̀ , црⷭ҇кꙋю ѻ҆де́ждꙋ совле́къ , оу҆бо́гомꙋ в̾да́стъ . коне́чнꙋю ми́лостыню в̾да́стъ хрⷭ҇тꙋ̀ въслѣ́дова . боⷢ҇ . Въ цр҃ковь твою̀ прибѣга́юще вопїе́мъ ти пречⷭ҇таѧ , пода́ждь на́мъ по́мощь и҆ лю́тыхъ и҆збавле́нїе , да прⷭ҇нѡ велича́емъ ржⷭ҇тво̀ твоѐ .

На хвали́тѣхъ , стⷯры , на д҃ . гла́съ , ѕ҃ . поⷣ . всѐ оу҆пова́нїе . Ѿ ко́рене ца́рска ,꙳ прекрасна̀ вѣ́твь и҆з̾растѐ ,꙳ бл҃гоꙋха́нныи кри́нъ ,꙳ бл҃же́нныи цр҃ь і҆ѡаса́фъ .꙳ ѡ҆ и҆́же наказа́нїемъ ꙳ дх҃о́внагѡ наста́вника ,꙳ воз̾желѣ̀ ви́дѣти без̾цѣ́нныи би́серъ ,꙳ позна̀ въ трⷪ҇цѣ сла́вимаго бг҃а .꙳ и҆ тогѡ̀ за́повѣдемъ ,꙳ дѣ́латель и҆зрѧ́денъ показа́сѧ .꙳ и҆ ны́нѣ в̾ вы́шнихъ ликоствꙋ́ѧ ,꙳ молѧ́сѧ ѡ҆ дш҃а́хъ на́шихъ .= двⷤа . П=росвѣще́нныи дш҃е́ю варлаа́мъ ,꙳ цр҃ю і҆ѡаса́фꙋ гл҃аше ,꙳ позна́лъ є҆сѝ бг҃а творца̀ всѣ́хъ ,꙳ то́й да просвѣти́тъ тѝ ѻ҆́чи срⷣчнїи ,꙳ и҆ да́стъ ти дх҃ъ премꙋ́дрости и҆ ра́зꙋма .꙳ да оу҆вѣ́дати и҆́маши что̀ є҆́сть наде́жда зва́нїѧ є҆гѡ̀ .꙳ ꙗ҆́кѡ на послѣ́докъ ,꙳ и҆ роди́телю своемꙋ̀ ко спасе́нїю наста́вникъ бꙋ́деши .꙳ а҆́зъ же не и҆́мамъ ѡ҆ста́ти здѣ̀ ,꙳ но ѿхожꙋ̀ в̾ пꙋ́ть сво́й ,꙳ бг҃а наста́вника и҆мѣ́ѧ .꙳ воз̾водѧ́щаго мѧ̀ ко спасе́нїю . Оу҆слы́шавъ до́блественыи цр҃ь і҆ѡаса́фъ ,꙳ ѡ҆ разлꙋче́нїи словесѐ ,꙳ распали́всѧ дш҃е́ю ,꙳ лицѐ своѐ слеза́ми ѡ҆блива́ѧ ,꙳ ты̀ оу҆чи́телю дх҃о́вныи ,꙳ всѣ́хъ бл҃ги́хъ мои́хъ хода́таю ,꙳ па́ки ли ѡ҆ста́вити мѧ в̾ ми́рѣ се́мъ хо́щеши ;꙳ кто́ ми соверши́тъ тво́й чи́нъ оу҆чи́тельства ;꙳ кто́ ми бꙋ́детъ наста́вникъ ко спасе́нїю ;꙳ ты̀ менѐ к̾ бг҃ꙋ приве́лъ є҆сѝ .꙳ и҆ в̾ чинꙋ̀ сн҃о́внѣ наста́вника наста́вилъ є҆сѝ .꙳ и҆ тобо́ю надѣ́юсѧ ѿ хрⷭ҇та̀ прїѧ́ти ве́лїю млⷭ҇ть .

сла́ва . гла́съ , ѕ҃ . Прпⷣбнїи ѻ҆ц҃ы , во всю̀ зе́млю и҆зы́де вѣща́нїе и҆справле́нїе ва́шихъ . тѣ́мъ на́ нб҃сѣхъ ѡ҆брѣто́ста мздꙋ̀ трꙋдо́въ свои́хъ . бѣсо́вскаѧ погꙋби́ла є҆ста̀ ѡ҆полче́нїѧ . и҆ а҆́нг҃льскїѧ дости́гла є҆ста̀ чи́ны , и҆́хже бо житїю̀ непоро́чнѡ поревнова́ла є҆ста̀ . дерзнове́нїе и҆мѣ́ета ко хрⷭ҇тꙋ̀ бг҃ꙋ , ми́ръ и҆спроси́та дш҃а́мъ на́шимъ . и҆ ны́нѣ , боⷢ҇ . Бцⷣе ты̀ є҆сѝ лоза̀ и҆́стиннаѧ , возрасти́вшаѧ на́мъ пло́дъ живо́тныи , тебѣ̀ мо́лимсѧ , моли́сѧ влⷣчце съ прпⷣбнымъ , поми́ловатисѧ дш҃а́мъ на́шимъ . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , пѣ́снь г҃ , и҆ ѕ҃ , на и҃ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃о́мꙋ . сла́ва , конда́къ ст҃о́мꙋ . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃о́мꙋ . конда́къ хра́мꙋ . сла́ва , ст҃о́мꙋ . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ= гала́тѡмъ . заⷱ҇ , сг҃і . а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , въ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =матѳе́ѧ . заⷱ҇ , і҃ . =прича́стенъ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>