2 ноября: свв. мчч. Акандина, Пигасия, Елпидифора и Анемподиста

МЦⷭ҇А ТОГО́ЖЕ ВО В҃ ДН҃Ь

ст҃ы́хъ мч҃нкъ а҆кѷнди́на , пѷга́сїѧ , а҆фѳо́нїѧ , и҆ є҆лпїдїфо́ра , и҆ а҆нем̾поди́ста . =Ве́черъ , на гдⷭ҇и возва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ . П=ѧточи́сленое сочета́нїе мч҃нкъ воспое́мъ ,꙳ мꙋ́драго а҆кѷнди́на ,꙳ и҆ пѷга́сїѧ и҆ є҆лпїдїфо́ра ,꙳ а҆фѳо́нїѧ и҆ а҆нем̾поди́ста ,꙳ до́блїѧ страда́льцы ,꙳ и҆ те́плыѧ застꙋ́пники ,꙳ и҆сточа́ющїѧ не преткнове́ннꙋю бл҃года́ть и҆ наде́жꙋ ,꙳ ѡ҆би́льно без̾бѣ́дїе ,꙳ бл҃гочести́вымъ подаю́ща . Ни гла́дъ ни бѣда̀ , ни живо́тъ нижѐ сме́рть ,꙳ ни коно́бнаѧ врѣ́нїѧ ,꙳ ни землены́ѧ про́пасти , нижѐ ѕвѣри́на оу҆ста̀ ,꙳ разлꙋчи́ти воз̾мого́ша ѿ любвѐ хрⷭ҇то́вы ,꙳ ва́ша терпѣнномꙋ́дреныѧ до́блести .꙳ к̾ немꙋ́ бо непреста́ннѡ взира́юще ,꙳ и҆ тогѡ̀ є҆ди́наго жела́юще ,꙳ враждꙋ́ющихъ побѣди́сте . Пи́щи насыща́ющесѧ ,꙳ и҆ свѣ́та и҆сполнѧ́еми ,꙳ и҆ живо́тъ вѣ́чныи наслѣ́дивше .꙳ к̾ ва́мъ прибѣга́ющїѧ ѿ бѣ́дъ и҆зба́вите ,꙳ и҆ оу҆́зъ и҆ темни́цы ,꙳ на мѣ́стѣ ѡ҆ѕлобле́нїѧ бг҃омꙋ́дрїи .꙳ къ бг҃ꙋ дерзнове́нїе и҆мꙋ́ще ,꙳ и҆ милосе́рдїе ꙗ҆влѧ́юще ,꙳ ꙗ҆́кѡ вои́стинꙋ хрⷭ҇топодража́теле .

сла́ва . гла́съ , ѕ҃ . Дне́сь пѧтоза́рныи мч҃нкъ ли́къ , ꙗ҆́кѡ свѣтоно́сныхъ ѕвѣ́здъ совокꙋпле́нїе , вѣ́рныхъ просвѣща́ющь , къ та́йномꙋ весе́лїю призва̀ . дне́сь и҆́же разꙋ́мнагѡ сл҃нца слꙋжи́теле , и҆ пе́р̾сскихъ потреби́теле преда́нїи , чꙋ́вственомꙋ сл҃нцꙋ прира́жшихсѧ . и҆ покланѧ́ющихсѧ ѻ҆гню̀ , наста́виша ко благоче́стїю . поче́рпше же ѡ҆би́льнѣ , страстоте́рпческꙋю и҆́хъ ча́шꙋ , и҆ є҆́же хрⷭ҇та̀ ра́ди и҆злїѧ́вшимсѧ кро́вемъ смѣси́ша , на́съ призыва́юще , бл҃гоче́стїѧ рачи́теле прїиди́те гл҃юще , по́двиги на́ша снѣди́те , и҆ вѣнцы̀ и҆ че́сти презри́те . претерпѣ́выи бо до конца̀ то́й спасе́тсѧ , хрⷭ҇то́съ и҆́стина и҆з̾речѐ . да ѻ҆́бщницы бꙋ́дете вѣнце́мъ на́шимъ , и҆ моли́твеники на́съ ко́ гдⷭ҇ꙋ и҆́мате .

и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . Л=юдьмѝ без̾зако́нными ,꙳ непра́веднѡ пригвожда́ема тѧ на́ древѣ ,꙳ дв҃аѧ чⷭ҇таѧ и҆ мт҃и твоѧ̀ зрѧ́щи .꙳ ꙗ҆́коже сѷмеѡ́нъ проречѐ ,꙳ оу҆тро́бꙋ є҆́й ѻ҆рꙋ́жїе сп҃се пробода́ше .

На стихо́внѣ , во ѻ҆кта́и . и҆ ст҃ы́мъ , сти́хъ : гла́съ , а҃ . ди́венъ бг҃ъ во ст҃ы́хъ свои́хъ ,꙳ бг҃ъ і҆и҃левъ . Лꙋчѝ восїѧ́вше мч҃нкъ пѧтоза́рныѧ , дв҃амъ равночи́слены . во ѡ҆браже́нїѧ бо и҆́хъ зрѧ́ще ѡ҆зарѧ́емсѧ , па́мѧтемъ и҆́хъ прїѡбща́ющесѧ . тѣ́мъ моли́твами и҆́хъ хрⷭ҇тѐ бж҃е без̾бѣ́днѣ спаса́й ѿ вра́гъ дш҃а на́ша . и҆ мольба́ми и҆́хъ нескꙋ́днꙋ жи́знь на́шꙋ соблюдѝ . ꙗ҆́кѡ и҆сточа́еши млⷭ҇ти твоѧ̀ бога́тыѧ непреста́ннѡ , без̾преткнове́нно тѧ сла́вѧщимъ . оу҆пова́нїе бо и҆мꙋ́тъ в̾ тѧ̀ . моли́твами и҆́хъ да́рꙋй дш҃а́мъ на́шимъ ве́лїю ми́лость .

сла́ва . гла́съ , в҃ . Прїиди́те воз̾ра́дꙋемсѧ гдⷭ҇ви , въ па́мѧть дне́сь страстоте́рпецъ , ѽ праз̾днолю́бцы . прїиди́те восхва́лимъ и҆́хъ та́йнѡ похвалѧ́юще . ра́дꙋисѧ а҆кѷнди́не . ра́дꙋисѧ пѷга́сїе . ра́дꙋисѧ а҆нем̾поди́сте . ра́дꙋисѧ є҆лпїдїфо́ре . ра́дꙋисѧ а҆фѳо́нїе , и҆́же ле́сть и҆́дольскꙋю въ про́пасть погрꙋ́жше . и҆ хрⷭ҇та̀ гдⷭ҇а посредѣ̀ по́двига ꙗ҆́снѡ проповѣ́давше . тѣ́мже всебл҃же́ннїи и҆ многострада́льнїи , непреста́ннѡ моли́тесѧ ѡ҆ дш҃а́хъ на́шихъ .

и҆ ны́нѣ , боⷢ҇ . и҆лѝ крⷭ҇тобоⷢ҇ . поⷣ . є҆гда̀ ѿ́ древа . На́ древѣ тѧ крⷭ҇тнѣмъ і҆с҃е , ра́спѧта зрѧ́щи не и҆скꙋсобра́чнаѧ пла́чꙋщи глаго́лаше , ча́до сла́дкое , вскꙋ́ю ѡ҆ста́ви менѐ ро́ждьшꙋю тѧ є҆ди́нꙋ , свѣ́те неприкоснове́нныи пребезнача́льнагѡ ѻ҆ц҃а . потщи́сѧ оу҆́бѡ и҆ просла́висѧ , ꙗ҆́кѡ да сла́вꙋ полꙋча́тъ бжⷭ҇твенꙋю , и҆́же твоѧ̀ стрⷭ҇ти бжⷭ҇твеныѧ сла́вѧщїи .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , в҃ . Стрⷭ҇тоте́рпцы гдⷭ҇ни , бл҃же́на землѧ̀ напи́вшисѧ кро́вїю ва́шею , и҆ ст҃і́и хра́ми прїе́мшїи тѣлеса̀ ва́ша . на сꙋди́щи бо врага̀ ѡ҆бличи́сте . и҆ хрⷭ҇та̀ со дерзнове́нїемъ проповѣ́дасте . тогѡ̀ ꙗ҆́кѡ бл҃га моли́те , спастѝ мо́лимъ вы̀ дш҃а на́ша . сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . . є҆мꙋ́же краегране́сїе сицево̀ : твои́ми мольба́ми мѧ свидѣ́тель мно́жество покрыва́й . творе́нїе ѳеѡ́фаново . гла́съ , д҃ . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́въ : Ст҃і́и мч҃нцы , моли́те бг҃а ѡ҆ на́съ .= Сл҃нца и҆мꙋ́ще пра́веднаго незаходи́ма хрⷭ҇та̀ бг҃а на́шегѡ , просвѣща́юща ва́съ ст҃і́и не веще́ственымъ свѣ́томъ . ѻ҆́блаки разори́те невѣ́дѣнїѧ моегѡ̀ . Без̾бѣ́дно ст҃і́и , без̾ претыка́нїѧ и҆сточа́юще бл҃года́ть , подава́ете приходѧ́щимъ вѣ́рою . всѧ́кꙋ бѣдꙋ̀ , и҆ всѧ́ко оу҆ны́нїе , и҆ бꙋ́рю и҆ мѧте́жь оу҆ставлѧ́юще . Крѣ́постїю непобѣди́мою препоѧ́савшесѧ ст҃і́и , пло́тныѧ не́мощи не помы́слисте . но без̾ боѧ́зни мꙋ́дрость ꙗ҆влѧ́юще , на ѻ҆́гнь и҆ мꙋче́нїе дерзнꙋ́ли є҆стѐ . =боⷢ҇ . Ты̀ є҆ди́на бг҃оневѣ́сто , в̾ вы́шнихъ сѣдѧ́щаго на рꙋкꙋ̀ носи́ла є҆сѝ пло́ть бы́вша . ты́ бо ѡ҆ба́висѧ ѿ всѣ́хъ вѣ́къ прїѧ́телище досто́йнѡ вседержи́телѧ .

пѣ́снь , г҃ . і҆рмо́съ . Немꙋ́дростїю ни си́лою , ни бога́тствомъ хва́лимсѧ , но твое́ю ѻ҆́ч҃ею соста́вною мꙋ́дростїю бж҃їею . ꙗ҆́кѡ нѣ́сть ст҃а па́че тебѐ чл҃колю́бче . Оу҆тве́рждьшесѧ хрⷭ҇то́вою си́лою всеи҆зѧ́щнѣ по́мысломъ крѣ́пкимъ , сквозѣ̀ ѻ҆́гнь и҆ во́дꙋ , стра́ждꙋще преи҆до́сте к̾ нбⷭ҇нымъ . Не раз̾сѣ́дною бꙋ́дꙋщихъ наде́ждею ствержда́еми настоѧ́щихъ болѣ́зней , мꙋ́жественымъ смы́сломъ , всесла́внїи мч҃нцы небрего́сте . Равномꙋ́дрствꙋюще тре́мъ ю҆́ношамъ всехва́льнїи , безꙋ́мїѧ пе́р̾сскагѡ ѻ҆́гнь оу҆гаша́юще ꙗ҆ви́стесѧ , росо́ю дх҃о́вною ѡ҆кроплѧ́еми . боⷢ҇ . Тѧ̀ застꙋпле́нїе небла́знено бг҃омт҃и стѧжа́вшїи , оу҆пова́нїе на тѧ̀ воз̾лага́юще спаса́емсѧ . и҆ к̾ тебѣ̀ прибѣга́юще сохранѧ́емсѧ .

сѣда́ленъ . гла́съ и҃ . Без̾бѣ́дно тече́нїе бл҃гочести́внѡ в̾ по́двизѣ стра́ждꙋще бл҃гочести́вїи наде́жею проидо́ша , вѣнцы̀ оу҆крѣплѧ́еми . сопроти́вныѧ бо до конца̀ погꙋби́вше , без̾па́костнѡ побѣ́дꙋ свою̀ соверши́ша . тѣ́мъ и҆ ѡ҆би́льнѡ просѧ́щимъ вѣ́рою и҆сточа́ютъ всегда̀ мно́жество и҆сцѣле́нїи . и҆́мже согла́снѡ возопїе́мъ , моли́те хрⷭ҇та̀ бг҃а грѣхѡ́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть ва́шꙋ . сла́ва , и҆ нн҃ѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ оу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи , и҆ ꙗ҆́кѡ млⷣнца дои́ши зижди́телѧ и҆ гдⷭ҇а . тѣ́мже а҆́нг҃льскїи собо́ръ и҆ чл҃ческїи ро́дъ , без̾преста́ни сла́вимъ прест҃о́е ржⷭ҇тво̀ твоѐ . и҆ согла́снѡ вопїе́мъ ти , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , воспѣва́ющим̾ досто́йнѡ сла́вꙋ твою̀ . крⷭ҇тобоⷢ҇ . А҆́гньца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀ , восклица́ше пла́чꙋщи , и҆ го́рькѡ вопїю́щи , ми́ръ оу҆́бѡ ра́дꙋетсѧ прїе́млѧ и҆збавле́нїе . оу҆тро́ба же моѧ̀ распала́етсѧ , ви́дѧщи твоѐ распѧ́тїе , є҆́же терпи́ши за бл҃гоꙋтро́бїе ми́лости , долготерпѣли́ве гдⷭ҇и . ми́лости пꙋчи́но , и҆ и҆сто́чниче неи҆счерпа́емыи , оу҆милосе́рдисѧ , и҆ да́рꙋй грѣхѡ́въ ѡ҆ставле́нїе , пою́щимъ вѣ́рою твоѧ̀ бжⷭ҇твенаѧ страда́нїѧ .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вопїю́щїѧ , сла́ва хрⷭ҇тѐ си́лѣ твое́й . Просвѣща́еми добро́тою и҆зѧ́щнагѡ страда́нїѧ , свѣ́тлїи свѣти́льницы мч҃нцы хрⷭ҇то́ви ꙗ҆ви́стесѧ . свѣ́тлѣйшими лꙋча́ми ѡ҆зарѧ́юще зовꙋ́щихъ , сла́ва хрⷭ҇тѐ си́лѣ твое́й . Ѡ҆чище́нїе кро́вь мч҃нкъ бы́сть , и҆ бл҃гово́нное вои́стинꙋ приноше́нїе бг҃ꙋ , без̾па́костнѡ даю́щи и҆ без̾бѣ́дно и҆сточа́ющи всѣ́мъ и҆сто́чникъ спасе́нїѧ . Разли́чныѧ напа́сти и҆ бѣ́днаѧ нахожде́нїѧ ва́шими моли́твами є҆́же ко хрⷭ҇тꙋ̀ ѿрази́сте , соверша́ющимъ оу҆се́рднѡ всесщ҃е́ннꙋю и҆ всепра́з̾дньственꙋю па́мѧть ва́шꙋ , досточꙋ́днїи . И҆спрове́ргше пре́лести и҆́дольское без̾бо́жїе , бг҃а всѣ́хъ , живо́тное дѣ́йство дѣ́лы ꙗ҆влѧ́юще , зва́ста преблаже́ннїи , сла́ва хрⷭ҇тѐ си́лѣ твое́й . боⷢ҇ . Крѣ́пкое тѧ̀ ѻ҆рꙋ́жїе на врагѝ пред̾лага́емъ , ско́рби всѧ́коѧ и҆ лю́тыхъ ѡ҆б̾стоѧ́нїи ѿрѣва́емъ вре́дъ . и҆ возмꙋще́нїи є҆рети́ческихъ мт҃и бж҃їѧ и҆збѣга́емъ .

пѣ́снь , є҃ . і҆рмо́съ . Нечести́вїи не оу҆́зрѧтъ сла́вы твоеѧ̀ хрⷭ҇тѐ , но мы́ тѧ є҆диноро́дне ѻ҆́ч҃ее заре́нїе сла́вы бж҃їѧ . ѿ́ нощи оу҆́треннююще , воспѣва́емъ тѧ милосе́рде . Са́мъ сѧ а҆фѳо́нїе приве́лъ є҆сѝ хрⷭ҇то́ви , крѣ́пцѣ мꙋчи́тельскꙋю сла́вне ѡ҆бличи́въ ѕло́бꙋ безбо́жїѧ , и҆ к̾ свѣ́тꙋ притечѐ вѣ́ры веселѧ́сѧ . Подо́бѧсѧ а҆фѳо́нїе стрⷭ҇ти хрⷭ҇то́ви , тогѡ̀ ра́ди твоѧ̀ глава̀ ѿсѣче́сѧ и҆зѧ́щнѣ . к̾ не и҆змѣ́нномꙋ бо весе́лїю потща́лсѧ є҆сѝ , и҆ к̾ без̾сме́ртномꙋ поко́ищꙋ . На недви́жимѣй наде́жи оу҆тверди́всѧ , и҆ кра́снаѧ и҆́же на землѝ ѡ҆плева́лъ є҆сѝ премꙋ́дре є҆лпїдїфо́ре . неꙋкло́нно бо ты̀ претечѐ по́прище страда́нїѧ . боⷢ҇ . Восїѧ́въ и҆з̾ тебѐ сл҃нце мы́сленое , свѣ́тлыѧ лꙋчѝ своегѡ̀ бжⷭ҇тва̀ всѣ́мъ прострѐ бцⷣе влⷣчце . тѣ́мъ всѝ тѧ̀ сла́вимъ .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Текꙋ́щихъ тлѣ́нныхъ презрѣ́вше , и҆ нетлѣ́нныхъ сподо́бистесѧ зрѣ́ти . и҆скꙋше́нїи оу҆́бѡ и҆зба́вите и҆ бѣ́дъ , вѣ́рою ва́съ призыва́ющихъ всехва́льнїи . Трⷪ҇цꙋ без̾нача́льнꙋю пресла́внїи мч҃нцы , лю́то свѧ́занныѧ , и҆ в̾ темни́цахъ не ѡ҆сла́бно держи́мыѧ , разрѣши́ти ва́шими мольба́ми оу҆милосе́рдꙋйте . По тебѣ̀ себѐ преда́вше на сме́рть , без̾сме́ртїе сп҃се мо́й до́блїи полꙋчи́вше . и҆ спаси́теле и҆́же в̾ бꙋ́ри и҆ напа́сти и҆ в̾ ско́рби бы́вше . боⷢ҇ . Расто́ргни мои́хъ прегрѣше́нїи рꙋкописа́нїе , и҆ ѿ ѡ҆держа́щїѧ мѧ печа́ли и҆ страсте́й разрѣше́нїе да́рꙋющи , и҆ соблюда́ющи вы́нꙋ не врежде́нна влⷣчце .

конда́къ . гла́съ , в҃ . Бл҃гочⷭ҇ти́выѧ и҆ бг҃оно́сныѧ мч҃нки , и҆́же на землѝ ѡ҆ста́вльшїѧ всѧ̀ , прїѧ́тъ ѧ҆̀ гдⷭ҇и в̾ наслажде́нїе бл҃ги́хъ твои́хъ покоѧ̀ , а҆кѷнди́на , и҆ пѷга́сїѧ , и҆ а҆нем̾поди́ста , с̾ ни́ми же и҆ а҆фѳо́нїѧ , и҆ є҆лпїдїфо́ра . є҆ди́нъ бо є҆сѝ бл҃гоꙋвѣ́тливъ .= и҆́косъ . Ѿ=ве́рзи ми оу҆ста̀ хрⷭ҇тѐ мо́й , воспѣ́ти и҆ похвали́ти че́стнѡ по́двиги страстоте́рпецъ твои́хъ гдⷭ҇и . сі́и бо всѧ̀ ѡ҆ста́вльше , и҆ воз̾лю́бльше тебѐ созда́телѧ всѣ́хъ . сꙋ́щаѧ на землѝ всѧ̀ ꙗ҆́кѡ тлѣ́юща вмѣни́ша . и҆ та́кѡ честны́и ѻ҆́бразъ живоно́снагѡ ти крⷭ҇та̀ сотвори́вше , оу҆се́рднѡ пред̾ста́ша цр҃е́ви , ꙗ҆́кѡ ѻ҆рꙋ́жницы мч҃нцы до́блїи . вопїю́ще ти , є҆ди́нъ є҆сѝ бл҃гоꙋвѣ́тливъ .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и оу҆би́въ , ꙗ҆́же без̾ пра́вды пра́ведныѧ оу҆ловлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гослове́нъ є҆сѝ . Ꙗ҆́кѡ и҆зба́ви и҆з̾ пла́мене трѝ бл҃гочести́выѧ ѻ҆́троки , си́це и҆ ны́нѣ страда́льцы , в̾ пещѝ ѻ҆́гненѣй сохрани́лъ є҆сѝ , вопїю́щихъ ти бг҃омꙋ́дренѡ . ѻ҆ц҃ъ на́шихъ бж҃е бл҃гослове́нъ є҆сѝ . Дае́ши ѡ҆би́льныѧ да́ры , и҆ чꙋдодѣѧ́нїе и҆сточа́еши , стрⷭ҇тоте́рпцы твои́ми хрⷭ҇тѐ . содѣва́ѧ и҆ дѣ́йствꙋѧ ꙗ҆́кѡ млрⷭ҇дъ . и҆ ꙗ҆влѧ́ѧ пою́щимъ тѧ̀ ѻ҆ц҃ъ на́шихъ бж҃е бл҃гослове́нъ є҆сѝ . Мно́жество мч҃нкъ , нело́жнѡ со́бранїи вѣ́рою , приведо́стесѧ хрⷭ҇тꙋ̀ . пресла́внѡ чꙋдесе́мъ ꙗ҆вле́нїе содѣва́юще , и҆ пою́ще ѻ҆ц҃ъ на́шихъ бж҃е бл҃гослове́нъ є҆сѝ . боⷢ҇ . И҆зба́вленїи тобо́ю пра́дѣднїѧ клѧ́твы , и҆ к̾ присносꙋ́щнѣй пи́щи преше́дше , ра́дꙋисѧ зове́мъ ти пресла́внаѧ влⷣчце , ꙗ҆́же бг҃а на́мъ воплоще́нна породѝ .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Бл҃гочестно́е мч҃нкъ торжество̀ ра́достно прїи́де , ми́ръ ѡ҆зарѧ́юще . всѧ̀ возвеселѝ , и҆ свѣ́тлѡ оу҆краша́ѧ вѣ́рою пою́щихъ . гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . На́ звѣ́рѧ и҆ ро́вы и҆ мꙋ́ки лю́тыѧ дерзнꙋ́сте преи҆зѧ́щнїи , и҆мꙋ́ще помо́щника непобѣди́ма сла́вы гдⷭ҇а . є҆мꙋ́же ны́нѣ зове́мъ , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Ва́съ до́блїѧ страда́льцы , а҆кѷнди́на , пѷга́сїѧ , и҆ а҆нем̾поди́ста . па́ки же а҆фѳо́нїѧ , и҆ приснопа́мѧтнаго є҆лпїдїфо́ра , и҆мꙋ́ще стѣ́нꙋ крѣ́пкꙋю , гдⷭ҇а пое́мъ и҆ превозно́симъ во́ вѣки . Вѣнце́мъ побѣ́ды оу҆краси́вшесѧ , и҆ добро́ты оу҆вѧзе́нїемъ свѣтѧ́щесѧ , зарѝ невече́рнѣй коне́цъ бл҃же́ннїи на́ нб҃сѣхъ прїѧ́ли є҆стѐ мч҃нцы . зовꙋ́ще , гдⷭ҇а по́йте дѣ́ла и҆ превозноси́те є҆гѡ̀ во́ вѣки . боⷢ҇ . Оу҆сты̀ и҆ ра́зꙋмомъ бцⷣꙋ мꙋ́дрствꙋюще пѣсносло́вимъ тѧ пренепоро́чнаѧ . породи́ бо пречⷭ҇таѧ пло́тїю ѡ҆бложе́на творца̀ и҆ бг҃а и҆ цр҃ѧ хрⷭ҇та̀ . тѣ́мъ тѧ дв҃о пое́мъ и҆ превозно́симъ во́ вѣки .

пѣ́снь , ѳ҃ . і҆рмо́съ . Є҆́вва оу҆́бѡ недꙋ́гомъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прозѧбе́нїемъ прижи́тїѧ твоегѡ̀ , ми́рови бл҃гослове́нїе процвѣла̀ є҆сѝ . тѣ́мъ тѧ̀ всѝ велича́емъ . Трꙋды̀ ва́ша на землѝ , нбⷭ҇ное весе́лїе прїѧ́тъ и҆дѣ́же мч҃нчестїи ли́кове и҆ бжⷭ҇твеныхъ во́инства , и҆ всѐ перворожде́ныхъ ра́дꙋетсѧ собо́рище всебл҃же́ннїи . Ѿ оу҆́зъ лю́тыхъ пребога́тїи и҆ бѣ́дъ и҆зба́вите всѣ́хъ , вѣ́рою ст҃о́е торжество̀ ва́ше пра́з̾днꙋющихъ . ми́ръ же и҆ тишинꙋ̀ просѧ́ще и҆ спасе́нїе бл҃же́ннїи . Бога́тымъ ѡ҆зарѧ́еми свѣ́томъ , и҆ бл҃года́тїю страстоте́рпецъ сїѧ́юще . согрѣше́нїемъ разрѣше́нїе и҆спроси́те , и҆ печа́ли кꙋ́пнѡ с̾ ва́ми под̾ви́гшимисѧ . и҆ спастѝ к̾ ва́мъ прибѣга́ющихъ , бл҃года́телѧ оу҆моли́те . боⷢ҇ . Є҆́вва оу҆́бѡ дре́ва живо́тнагѡ и҆з̾гна́на бы́сть , воз̾бранѧ́ема причаще́нїѧ . ты́ же дв҃о бцⷣе живо́тъ вѣ́чныи в̾вела̀ є҆сѝ , ми́рови живоно́сное дѣ́йство да́рꙋюща вѣ́рнымъ .

свѣти́ленъ . А҆кѷнди́на , и҆ пѷга́сїѧ , и҆ є҆лпїдїфо́ра вѣнча́емъ , со а҆фѳо́нїемъ пѣ́сньми , кꙋ́пнѡ и҆ а҆нем̾поди́ста . и҆́бо пе́р̾сскꙋю ле́сть ѡ҆бличи́вше сꙋемꙋ́дренꙋю , и҆ бїе́нїѧ и҆ ра́ны по хрⷭ҇тѣ̀ претерпѣ́вше , неи҆з̾рече́нныѧ сла́вы полꙋчи́ша . боⷢ҇ . Ра́дꙋисѧ бж҃їѧ пола́то . ра́дꙋисѧ горо̀ ѡ҆сѣнѧ́ема . ра́дꙋисѧ кꙋпино̀ не ѡ҆пали́маѧ . ра́дꙋисѧ прⷭ҇то́лѣ сла́вы . ра́дꙋисѧ бжⷭ҇твенаѧ трапе́зо . ра́дꙋисѧ рꙋ́чко всеѕлата́ѧ . ра́дꙋисѧ свѣ́щниче ѻ҆гнезра́чныи , ра́дꙋисѧ ле́гкїи ѻ҆́блаче дв҃о мт҃и мр҃і́е .

На стихо́внѣ , во ѻ҆кта́и . и҆ ст҃ы́мъ , сти́хъ : гла́съ , в҃ . мно́ги ско́рби пра́веднымъ ,꙳ и҆ ѿ всѣ́хъ и҆́хъ и҆з̾ба́витъ ѧ҆̀ гдⷭ҇ь . Кровьны́ми то́ки тѣ́лѡ ѡ҆багри́въ , без̾бѣ́днѣ про́йде пꙋ́ть мꙋче́нїѧ страстоте́рпче а҆кѷнди́не . тѣ́мъ и҆ крѣ́постїю бжⷭ҇твеною препоѧ́савсѧ , вра́жїѧ с̾сѣчѐ кознодѣѧ́нїѧ . хрⷭ҇та̀ бг҃а молѝ ѡ҆ на́съ спасти́сѧ дш҃а́мъ на́шимъ . сла́ва . гла́съ , д҃ . Пѧтоза́рнаѧ страда́лецъ свѣща̀ , ꙗ҆́кѡ в̾ лꙋжны́хъ древесѣ́хъ сѣки́ра , дв҃дски с̾сѣчѐ ле́сть вра́жїю , и҆сповѣ́давше хрⷭ҇та̀ пред̾ царѝ . непреста́ннѡ моли́тесѧ ѡ҆ дш҃а́хъ на́шихъ .

и҆ ны́нѣ , боⷢ҇ . и҆лѝ крⷭ҇тобоⷢ҇ . поⷣ . ꙗ҆́кѡ до́блѧ .= Н=а крⷭ҇тѣ̀ ꙗ҆́кѡ ви́дѣ тѧ , пригвожда́ема гдⷭ҇и , а҆́гница и҆ мт҃и твоѧ̀ дивлѧ́шесѧ . и҆ что̀ видѣ́нїе зовꙋ́щи , сн҃е воз̾желѣ́нныи , сїѧ̀ тебѣ̀ непокори́вїи лю́дїе без̾зако́ннїи воз̾да́ша , мно́гихъ твои́хъ чꙋде́съ наслади́вшїисѧ . но сла́ва неи҆з̾рече́нномꙋ , твоемꙋ̀ схожде́нїю влⷣко .

<< Previous

Contents

Next >>