МЦⷭ҇А ТОГО́ЖЕ ВЪ К҃ ДН҃Ь

пред̾пра́зднество в̾веде́нїѧ в̾ цр҃ковь прест҃ы́ѧ бцⷣы , и҆ прпⷣбнагѡ ѻ҆ц҃а на́шегѡ григо́рїѧ декаполи́та . и҆ и҆́же во ст҃ы́хъ ѻ҆ц҃а на́шегѡ про́кла , патрїа́рха константи́на гра́да . =Ве́черъ , на гдⷭ҇и возва́хъ , стⷯры , пред̾пра́зднествꙋ . гла́съ , а҃ . поⷣ . н=бⷭ҇нымъ чино́мъ . Свѣщено́сицы дв҃ы ,꙳ при́снѡ дв҃ꙋю свѣ́тлѡ провожда́юще ,꙳ прⷪ҇ро́чествꙋютъ вои́стинꙋ дх҃омъ бꙋ́дꙋщее .꙳ хра́мъ бо бж҃їи бцⷣа сꙋ́щи ,꙳ в̾ цр҃ковь со сла́вою дв҃ьственою ,꙳ младе́нствꙋющи в̾во́дитсѧ . Ѡ҆бѣща́нїѧ ст҃а́гѡ пло́дъ бл҃госла́вныи ,꙳ бцⷣа вои́стинꙋ ꙗ҆ви́сѧ ми́рови ,꙳ ꙗ҆́кѡ всѣ́хъ вы́шшаѧ .꙳ ꙗ҆́же бл҃гоче́стнѡ приводи́ма въ цр҃ковь бж҃їю ,꙳ моли́твꙋ ро́ждьшихъ и҆сполнѧ́ющи .꙳ соблюда́ема бжⷭ҇твенымъ дх҃омъ . Нбⷭ҇нымъ воспита́на дв҃о хлѣ́бомъ ,꙳ вѣ́рнѡ въ цр҃кви гдⷭ҇ни .꙳ породила̀ є҆сѝ ми́рови живо́тныи хлѣ́бъ сло́во .꙳ ꙗ҆́кѡ хра́мъ и҆збра́нныи пренепоро́чныи .꙳ пред̾ѡ҆брꙋчи́всѧ дх҃омъ та́йнѡ ,꙳ ѡ҆брꙋчена̀ бг҃ꙋ и҆ ѻ҆ц҃ꙋ .

стихѣ́ры , прпⷣбномꙋ . гла́съ , и҆ поⷣ , то́йже . Въ нбⷭ҇ныѧ ѻ҆би́тели с̾ весе́лїемъ вселѧ́ѧсѧ .꙳ и҆ со а҆́нг҃лы ѻ҆́ч҃е пред̾стоѧ̀ ,꙳ дерзнове́ннѡ прⷭ҇то́лꙋ гдⷭ҇ню .꙳ на землѝ соверша́ющимъ па́мѧть твою̀ ,꙳ грѣхо́въ ѡ҆ставле́нїе и҆ страсте́й ,꙳ дарова́ти моли́сѧ . Моли́твенымъ тѝ серпо́мъ ѻ҆́ч҃е григо́рїе ,꙳ страстна́ѧ те́рнїѧ и҆з̾сѣ́къ .꙳ и҆ воздѣ́лавъ ра́ломъ воздержа́нїѧ зе́млю дш҃е́внꙋю ,꙳ в̾ве́ргъ сѣ́мена бл҃гоче́стїѧ .꙳ и҆́ми же на́мъ возвраща́еши ,꙳ и҆сцѣле́нїѧ плоды̀ . Добродѣ́телемъ тѧ̀ прїѧ́телище нарица́емъ прпⷣбне ,꙳ ꙗ҆́кѡ молча́нїю дрꙋ́га , и҆ бдѣ́нїю дѣ́лателѧ ,꙳ и҆ ѻ҆́бразъ цѣломꙋ́дрїю ,꙳ и҆ мл҃твѣ жили́ще некра́домое ,꙳ и҆ чꙋдесе́мъ сокро́вище ,꙳ и҆ мл҃твеника чтꙋ́щимъ тѧ̀ григо́рїе . сла́ва , и҆ ны́нѣ . гла́съ , д҃ . Дне́сь бг҃овмѣсти́маѧ цр҃кви бцⷣа , в̾ цр҃ковь гдⷭ҇ню приво́дитсѧ и҆ заха́рїѧ сїю̀ прїе́млетъ , дне́сь ст҃ы́хъ ст҃а́ѧ весели́тсѧ , и҆ ли́къ а҆́нг҃льскїи та́йнѡ торжествꙋ́етъ . с̾ ни́ми же и҆ мы̀ пра́зднꙋюще дне́сь , съ гаврїи́лѡмъ возопїе́мъ , ра́дꙋисѧ бл҃года́тнаѧ гдⷭ҇ь с̾ тобо́ю , и҆мѣ́ѧи ве́лїю млⷭ҇ть .

На стихо́внѣ , стⷯры , ст҃о́мꙋ про́клꙋ . гла́съ , д҃ . поⷣ . да́лъ є҆сѝ зна́менїе .= П=овелѣ́нїѧ свѣ́тлостїю ,꙳ и҆ житїѧ̀ красото́ю ,꙳ бл҃гоче́стнѡ оу҆добри́лъ є҆сѝ ,꙳ про́кле приснопа́мѧтне сщ҃е́нство .꙳ и҆ цр҃кви сто́лпъ ꙗ҆ви́сѧ вои́стинꙋ ,꙳ просвѣща́ѧ всѧ̀ словесы̀ свои́ми .꙳ тѣ́мже тѧ̀ оу҆бл҃жа́емъ ,꙳ со ѱалмы́ же и҆ пѣ́сньми ,꙳ ст҃ꙋ́ю и҆ всечестнꙋ́ю пра́зднꙋемъ па́мѧть твою̀ .

сти́хъ : к̾ тебѣ̀ возведо́х̾ ѻ҆́чи моѝ , живꙋ́щемꙋ на́ нб҃си . сѐ ꙗ҆́кѡ ѻ҆́чи ра́бъ в̾ рꙋ́кꙋ госпо́дїи свои́хъ . ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀ . та́кѡ ѻ҆́чи на́ши ко́ гдⷭ҇ꙋ бг҃ꙋ на́шемꙋ ,꙳ до́ндеже оу҆ще́дритъ ны̀ . Свѣ́тлѡ наꙋчи́лъ є҆сѝ ,꙳ и҆ бг҃омꙋ́дренѡ проповѣ́да бцⷣꙋ пречⷭ҇тꙋю ѻ҆трокови́цꙋ ,꙳ ꙗ҆́кѡ ро́ждьшꙋю пре́жде вѣ́къ ,꙳ созда́телѧ и҆ влⷣкꙋ ,꙳ сн҃а и҆ сло́во ѻ҆́ч҃ее .꙳ и҆ в̾ послѣ́днѧѧ за ны̀ чл҃ка бы́вша хотѣ́нїемъ ,꙳ и҆ непревраще́на є҆стество́мъ .꙳ и҆ нестѡ́рїѧ посрами́въ ,꙳ ꙗ҆́кѡ нечести́ва и҆ несмы́слена .

сти́хъ : поми́лꙋй на́съ гдⷭ҇и , поми́лꙋй на́съ . ꙗ҆́кѡ помно́гꙋ и҆спо́лнихомсѧ оу҆ничиже́нїѧ . помно́гꙋ и҆спо́лнисѧ дш҃а на́ша , оу҆ничиже́нїе гобзꙋ́ющихъ ,꙳ и҆ оу҆ничиже́нїе горды́мъ . Во́ды поче́рплъ є҆сѝ ,꙳ ѕлатоза́рныѧ прⷭ҇нопа́мѧтне ,꙳ премꙋ́драгѡ бг҃опроповѣ́дателѧ .꙳ є҆го́же и҆ прїе́мникъ ,꙳ бл҃гоче́стїю ꙗ҆ви́сѧ и҆ сѣда́лищꙋ .꙳ оу҆твержда́ѧ оу҆че́нїемъ ꙳ и҆́стины , хрⷭ҇то́во ста́до .꙳ и҆ тогѡ̀ чистѣ́йшїѧ и҆ всечестны́ѧ мо́щи ,꙳ ꙗ҆́кѡ оу҆́тварь црⷭ҇кꙋю цр҃кви пре́далъ є҆сѝ .

сла́ва , и҆ ны́нѣ . гла́съ , д҃ . Прїиди́те всѝ вѣ́рнїи , є҆ди́нꙋ непоро́чнꙋю восхва́лимъ . ю҆́же проро́ки проповѣ́данꙋю , и҆ в̾ цр҃ковь приведе́нꙋю , и҆ пре́жде вѣ́къ пронарече́нꙋю мт҃рь . и҆ въ послѣ́днїѧ лѣ́та ꙗ҆́вльшꙋсѧ бцⷣꙋ . гдⷭ҇и мл҃твами є҆ѧ̀ , ми́ръ тво́й пода́ждь на́мъ , и҆ ве́лїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Бж҃е ѻ҆ц҃ъ на́шихъ , творѧ́и при́снѡ с̾ на́ми по твоемꙋ̀ смотре́нїю , не ѿста́ви млⷭ҇ти твоеѧ̀ ѿ на́съ . но тѣ́хъ мл҃твами въ смире́нїи оу҆стро́й живо́тъ на́шъ . сла́ва , и҆ нн҃ѣ , пред̾пра́зднествꙋ . Ра́дость пред̾ѡ҆брꙋча́етъ дне́сь а҆́нна на́мъ , печа́ли премѣне́нїе , пло́дъ прозѧ́бши є҆ди́нꙋ прⷭ҇нѡ дв҃ꙋю , ю҆́же приво́дитъ моли́твы и҆сполнѧ́ющи , дне́сь ра́дꙋющисѧ в̾ цр҃ковь гдⷭ҇ню . ꙗ҆́кѡ вои́стинꙋ цр҃ковь бж҃їѧ сло́ва , и҆ мт҃рь чи́стꙋю .

Ст҃а́го же про́кла , слꙋ́жба пое́тсѧ є҆гда̀ разсꙋ́дитъ є҆клисїа́рхъ . =На оу҆́трени , на бг҃ъ гдⷭ҇ь , тропа́рь , пред̾пра́зднествꙋ , два́жды . сла́ва , ст҃ы́мъ . и҆ ны́нѣ , пред̾пра́зднествꙋ . А҆́ще во́лиши пѣ́ти тропарѝ ст҃ы́мъ ѡ҆со́бныѧ . глаго́ли , тропа́рь , григо́рїю . гла́съ , г҃ . Ѻ҆́=бразъ бы́сть воздержа́нїѧ , бжⷭ҇твенымъ дх҃омъ всѧ̀ просвѣти́въ . правовѣ́рїѧ тече́нїе соверши́лъ є҆сѝ . оу҆че́нїемъ ми́ра просвѣти́лъ є҆сѝ , и҆ ѕловѣ́рныхъ ѡ҆бличи́лъ є҆сѝ смы́слы . ѻ҆́ч҃е прпⷣбне григо́рїе хрⷭ҇та̀ бг҃а молѝ , дарова́ти на́мъ ве́лїю млⷭ҇ть .

тропа́рь , про́клꙋ . гла́съ , д҃ . И҆́же бжⷭ҇твенымъ зача́ла премꙋ́дрости стра́хомъ гдⷭ҇нимъ оу҆тве́рждьсѧ , ѿ тꙋ́дꙋ сщ҃е́нными восхожде́нїи взы́де во оу҆чени́чество златоꙋ́стꙋ . ст҃льскагѡ тогѡ̀ престо́ла досто́инъ бы́въ чистоты̀ добро́тами , а҆пⷭ҇льскимъ пра́виломъ себѐ воѡ҆брази́въ . не себѣ̀ живы́и , но хрⷭ҇то́ви и҆ ста́дꙋ своемꙋ̀ . тѣ́мъ в̾ нетлѣ́нныи живо́тъ а҆пⷭ҇льски всели́сѧ ст҃лю про́кле . молѝ хрⷭ҇та̀ бг҃а спасти́сѧ дш҃а́мъ на́шимъ .

Кано́нъ , пред̾пра́зднествꙋ , со і҆рмосо́мъ , на ѕ҃ . и҆ ст҃ы́мъ ѻ҆́ба кано́на , на и҃ . кано́нъ , пред̾пра́зднествꙋ . гла́съ , д҃ . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́в̾ : Прест҃а́ѧ гжⷭ҇е бцⷣе , спасѝ на́съ . Въ ст҃ы́хъ ст҃а́ѧ , всест҃а́ѧ и҆ непоро́чнаѧ всели́тисѧ происхо́дитъ , прест҃о́мꙋ бг҃ꙋ , ꙗ҆́кѡ да бꙋ́детъ хра́мъ ѡ҆сщ҃е́нъ . и҆ то́й пред̾текꙋ́тъ дв҃ы ѻ҆трокови́цы . Совѣ́тъ превѣ́чный , превѣ́чнагѡ бг҃а на́шегѡ во и҆сполне́нїе грѧде́тъ . пред̾грѧдꙋ́щѣ тѝ воспита́тисѧ во ст҃а́ѧ ст҃ы́хъ , сло́вꙋ въ жили́ще ѻ҆трокови́це пренепоро́чнаѧ . Роди́телїе бжⷭ҇твенїи тѧ̀ бж҃їю роди́тельницꙋ хотѧ́щꙋ , в̾во́дѧтъ воспита́тисѧ во ст҃а́ѧ ст҃ы́хъ . мл҃твꙋ же соверша́юще помоли́шасѧ , пречⷭ҇таѧ . Оу҆крѣпѝ влⷣчце не́мощь срⷣца моегѡ̀ , и҆ оу҆твердѝ страстьмѝ коле́блемое . ꙗ҆́кѡ да с̾ вѣ́рою тѧ̀ и҆ любо́вїю оу҆блажа́ю , при́снѡ бл҃же́нꙋю и҆ пренепоро́чнꙋю .

дрꙋгі́и , кано́нъ . прпⷣбномꙋ григо́рїю . творе́нїе і҆ѡ́сифово . гла́съ , и҃ . пѣ́снь , а҃ . і҆рмо́съ . Воѡ҆рꙋже́на фараѡ́на погрꙋзѝ , чꙋдотворѧ́й дре́вле , мѡѷсе́йскїи же́ѕлъ крⷭ҇тоѡ҆бра́знѡ проразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша ходѧ́ща спасѐ , пѣ́снь бг҃ови воз̾сыла́юща .

запѣ́в̾ : Прпⷣбне ѻ҆́ч҃е григо́рїе , молѝ бг҃а ѡ҆ на́съ .= Оу҆мерщве́нꙋю сластьмѝ тѣлесѐ , смире́нꙋю ми дш҃ꙋ , твои́ми мл҃твами ѡ҆живѝ блаже́нне григо́рїе . живота́ бо ны́нѣ прїѧ́лъ є҆сѝ нестарѣ́ющагѡ оу҆мертви́въ є҆́же на землѝ оу҆́ды прпⷣбне , по́стническими по́двиги . Оу҆держа́въ сла́сти тѣле́сныѧ оу҆ма̀ чистото́ю , и҆з̾ млада́го ѻ҆́ч҃е во́зраста ѻ҆рга́нъ дх҃о́вныи бы́сть . тогѡ̀ дѣ́йства свѣ́тлѡ прїе́млѧ , и҆ бг҃ови́денъ бы́лъ є҆сѝ . Жела́нїемъ пло́ти жела́нїе оу҆вѧди́лъ є҆сѝ , и҆ сѣ́мѧ блаже́нне ѡ҆брꙋчи́лъ є҆сѝ сꙋпрꙋ́жницꙋ чистотꙋ̀ . и҆з̾ неѧ́ же ча́да тебѣ̀ роди́шасѧ всѧ̀ добродѣ́тели присносла́вне , ча́до тѧ̀ бж҃їе содѣва́юще . =боⷢ҇ . Ѿ землѝ до нб҃съ , досѧ́жꙋщи лѣ́ствица нбⷭ҇наѧ . є҆ю́же бг҃ъ сло́во землены́мъ бесѣ́дова , бл҃гослове́наѧ пречⷭ҇таѧ . несказа́нное чꙋ́до , недомы́сленое видѣ́нїе , спасѝ к̾ тебѣ̀ прибѣга́ющїѧ .

и҆́нъ , кано́нъ . ст҃о́мꙋ про́клꙋ . творе́нїе ѳеѡ́фаново . гла́съ , а҃ . пѣ́снь , а҃ . і҆рмо́съ . Твоѧ̀ побѣди́тельнаѧ десни́ца , бг҃олѣ́пнѡ в̾ крѣ́пости просла́висѧ . та́ бо без̾сме́ртне всемогꙋ́щаѧ проти́вныѧ сотрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́в̾ : Ст҃лю хрⷭ҇то́въ про́кле , молѝ бг҃а ѡ҆ на́съ . Дѣѧ́нїемъ же и҆ сло́вомъ и҆́стиннымъ , разꙋ́мныхъ а҆рха́нг҃лъ бы́въ со ѡ҆бра́зенъ бг҃опрїѧ́тне . и҆ с̾ ни́ми прⷭ҇то́лꙋ пред̾стоѧ̀ чⷭ҇тны́ѧ трⷪ҇цы . є҆ѧ́же молѝ спастѝ на́съ . Стопа́мъ послѣ́дꙋѧ ꙗ҆́вѣ златоꙋ́стагѡ , всебл҃же́нне и҆ приснопа́мѧтне . того́же бжⷭ҇твеное сщ҃е́нства ѻ҆́ч҃е ѻ҆дѣѧ́нїе , ꙗ҆́кѡ наслѣ́дїе взѧ́лъ є҆сѝ ѻ҆те́ческое , достосла́вне . Дре́вле бг҃а на́ землю , и҆са́їи вопїю́щꙋ дх҃омъ прїитѝ . нестѡ́рїи оу҆мовре́днѡ претварѧ́етъ воплоще́нїе . тобо́ю требл҃же́нне собо́ромъ низ̾лага́етсѧ .= боⷢ҇ . С=ловесы̀ бг҃одх҃нове́нными , стра́шное ѿ дв҃ы оу҆ѧсни́лъ є҆сѝ воплоще́нїе , сло́ва бг҃а на́шегѡ . и҆ бцⷣꙋ сїю̀ проповѣ́давъ , повелѣ́нїю премꙋ́дрыхъ а҆пⷭ҇лъ послѣ́дꙋѧ .

пѣ́снь , г҃ . і҆рмо́съ . Твоѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ совокꙋ́пльши дх҃о́венъ оу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы сподо́би . Начина́юще ѻ҆трокови́цы дв҃ы , свѣщѝ носѧ́ще свѣ́тлы , бꙋ́дꙋщее под̾писꙋ́ютъ , и҆з̾ неѧ́ же роди́тсѧ просвѣще́нїе тва́ри , разрꙋша́ѧ пре́лести ѡ҆мраче́нїе . Ревнꙋ́ющи дре́вле бг҃омꙋ́дренѡ а҆́нна моли́твꙋ соверша́етъ . и҆ тебѐ пред̾лага́етъ сщ҃е́нствꙋ пренепоро́чнаѧ , сщ҃е́ннѣйшее зача́тїе и҆мѣ́ти хотѧ́щꙋ и҆ рожество̀ . Сл҃нце прострѐ лꙋчѝ . зрѧ̀ ѻ҆́блакъ свѣ́тлыи простира́емь ма́нїемъ бжⷭ҇твенымъ , внꙋ́трь ст҃а́ѧ . и҆з̾ неѧ́ же ѡ҆дожди́тъ ѡ҆ставле́нїе , ѡ҆лѧденѣ́вшимъ страстьмѝ . Ѡ҆божа́етъ мѧ̀ бг҃ъ всели́всѧ в̾ тѧ̀ за милосе́рдїе всенепоро́чнаѧ чⷭ҇таѧ , оу҆кра́дена снѣ́дїю пре́жде ле́стїю ѕмїи́ною . и҆ тлѝ , нетлѣ́нїѧ па́ки пи́щꙋ воз̾дае́тъ .

и҆́нъ , і҆рмо́съ . Нбⷭ҇номꙋ крꙋ́гꙋ верхотво́рче гдⷭ҇и , и҆ цр҃кви зижди́телю , ты̀ менѐ оу҆твердѝ в̾ любвѝ свое́й . жела́нїемъ сы́и кра́й , и҆ вѣ́рнымъ оу҆тверже́нїе , є҆ди́не чл҃колю́бче . Добродѣ́телей на́ горꙋ восте́къ прпⷣбне , во́ мракъ видѣ́нїѧ вни́де . и҆ разꙋмѣ̀ є҆ли́кѡ вмѣсти́лъ є҆сѝ непостижи́маго є҆стество́мъ , просвѣще́нїѧ и҆спо́лнь ѻ҆́ч҃е бы́въ . Рожде́исѧ в̾ вертьпѣ̀ за землены́хъ и҆з̾бавле́нїе , дре́вле тѧ̀ в̾ вертьпѣ̀ бл҃же́нне живꙋ́ща , свѣ́томъ ѡ҆зарѝ нбⷭ҇нымъ ꙗ҆́кѡ па́вла . свѣтоза́рна ꙗ҆влѧ́етъ тѧ̀ ѻ҆́ч҃е григо́рїе . Нбⷭ҇наѧ две́рь хрⷭ҇то́ва пречⷭ҇таѧ мт҃и , прило́гми тѧ̀ бѣсо́вскими напа́ствꙋема ѻ҆́ч҃е вперѝ . и҆ крѣ́пка воз̾може́нїемъ на ни́хъ содѣ́ла , дх҃о́вною бл҃года́тїю . боⷢ҇ . Ра́дꙋисѧ є҆ди́на ро́ждьшаѧ всѧ́ческимъ гдⷭ҇а . ра́дꙋисѧ жи́знь чл҃кѡмъ прїѡ҆брѣ́тшаѧ . ра́дꙋисѧ ѡ҆сѣне́наѧ и҆ несѣко́маѧ горо̀ , вѣ́рнымъ оу҆тверже́нїе . ра́дꙋисѧ всенепоро́чнаѧ .

и҆́нъ , і҆рмо́съ . Є҆ди́не свѣ́дыи земны́хъ сꙋщество̀ немощно́е , и҆ млⷭ҇тивно внѐ ѡ҆болкі́исѧ , препоѧ́ши мѧ с̾вы́ше си́лою , воспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃колю́бче . Свѣ́тъ и҆́же ѿ́ свѣта бг҃ови́днѡ всебл҃же́нне прїе́мъ , цр҃кви свѣ́тъ бы́лъ є҆сѝ . тѣ́мже и҆ свѣ́тъ тѝ бжⷭ҇твеныи восїѧ̀ разꙋ́мнѡ , ꙗ҆́коже є҆́сть пи́сано . и҆́мже просвѣща́емь , пою́щихъ ѡ҆зарѧ́еши па́мѧть твою̀ . Вострꙋби́въ повелѣ́нїй гремѣ́нїѧ , ꙗ҆́кѡ стѣ́ны низ̾ложи́лъ є҆сѝ є҆рихѡ́нскїѧ , є҆ресе́й шата́нїѧ всѧ̀ . и҆ во́инства и҆ ѡ҆долѣ́нїѧ побѣ́дꙋ воста́ви , воплоще́нїе бж҃їе є҆́же ѿ дв҃ы проповѣ́давъ ꙗ҆́снѡ . И҆сто́чникꙋ премꙋ́дрости приложи́въ оу҆ста̀ своѧ̀ бг҃опрїѧ́тне , и҆ дх҃о́вныѧ почерпѐ премꙋ́дрости про́кле бжⷭ҇твеныѧ во́ды . мꙋ́тныѧ потопи́въ рѣ́ки бл҃же́нне , нестѡ́рїева без̾бо́жнаѧ повелѣ́нїѧ .= боⷢ҇ . И҆́=же горѣ̀ ѻ҆ц҃ꙋ є҆диноро́дныи сн҃ъ неи҆зрече́ннѡ разꙋмѣва́емь . є҆диноча́дыи и҆з̾ тебѐ до́лѣ пречⷭ҇таѧ па́че вины̀ ра́зꙋма бы́сть , и҆ ѡ҆божа́етъ чл҃ка прест҃а́ѧ влⷣчце бцⷣе . тѣ́мже тѧ̀ сла́вимъ .

конда́къ , григо́рїю . гла́съ , г҃ . Свѣ́тлое тѧ̀ сл҃нце цр҃кви познава́етъ , добродѣ́телей красота́ми и҆ и҆сцѣле́нїи лꙋча́ми всѣ́хъ просвѣща́ѧ хрⷭ҇то́въ оу҆го́дниче . тѣ́мже пра́зднꙋемъ честнꙋ́ю па́мѧть твою̀ , и҆ почита́емъ по́двиги твоѧ̀ , всебл҃же́нне ѻ҆́ч҃е премꙋ́дре григо́рїе . конда́къ , про́клꙋ . гла́съ , и҃ . Всечестна́гѡ ст҃лѧ , црⷭ҇кагѡ гра́да престо́лъ оу҆краси́вшагѡ и҆ сокро́вищемъ без̾цѣ́ннымъ тогѡ̀ ѡ҆бога́щшаго , пречестны́ми мощмѝ златоꙋ́стовыми , и҆́мже сло́во живо́тно стѧжа̀ , просвѣща́ѧ вѣ́рнѡ чтꙋ́щїѧ є҆гѡ̀ , пѣ́сньми похвале́нїѧ тогѡ̀ ра́достнѡ оу҆блажи́мъ зовꙋ́ще , ра́дꙋисѧ а҆рхїере́ю ѻ҆́ч҃е сщ҃е́нныи . сѣда́ленъ , про́клꙋ . гла́съ , г҃ . Бжⷭ҇твеныи бы́въ сщ҃еннопроповѣ́дникъ , бжⷭ҇твенымъ оу҆че́нїемъ цр҃ковь ѡ҆богаща́ѧ та́йнѡ оу҆чи́телю всехва́льне , и҆ бцⷣꙋ дв҃ꙋ пречⷭ҇тꙋю проповѣ́да , и҆ нестѡ́рїѧ посрамѝ . тѣ́мже всѝ чте́мъ вѣ́рнѡ па́мѧть твою̀ , просѧ́ще прїѧ́ти ве́лїю млⷭ҇ть . сѣда́ленъ , григо́рїю . гла́съ , д҃ . Бжⷭ҇твеною свѣ́тлостїю ѡ҆зарѧ́емь , мра́къ оу҆ма́лилъ є҆сѝ дш҃етлѣ́нныхъ страсте́й григо́рїе премꙋ́дре , взѧ́тсѧ къ без̾стра́стїю чистѣ́йшей высотѣ̀ . восїѧ́лъ є҆сѝ пресла́внаѧ цѣле́нїѧ зарѝ всели́всѧ въ незаходи́мыи свѣ́тъ црⷭ҇твїѧ хрⷭ҇то́ва . сла́ва , и҆ ны́нѣ , пред̾пра́зднествꙋ . Цр҃кви бж҃їѧ , многочестны́и черто́гъ , в̾ хра́мъ бж҃їи со свѣща́ми свѣ́тлыми с̾ весе́лїемъ прои҆схо́дитъ в̾вести́сѧ . и҆ ра́дꙋетсѧ ѡ҆ не́й заха́рїѧ зрѧ̀ ꙗ҆вле́нїе , ꙗ҆́снѡ сщ҃е́нныхъ прⷪ҇ро́къ и҆сполнѧ́емо и҆ весели́тсѧ . и҆ пред̾ пра́зднественыи пое́тъ гла́съ . ра́дость провозвѣща́етъ прои҆схожде́нїе твоѐ ѻ҆трокови́це дв҃о мт҃и .

пѣ́снь , д҃ . і҆рмо́с̾ . Неи҆зслѣ́дномꙋ бж҃їю совѣ́тꙋ , є҆́же ѿ дв҃ы воплоще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вопїѧ́ше , сла́ва си́лѣ твое́й гдⷭ҇и . Сщ҃е́ннїи провозвѣсти́ша ꙗ҆зы́цы тебѐ чⷭ҇таѧ бы́ти село̀ невмѣсти́магѡ є҆стества̀ . сегѡ̀ ра́ди тѧ̀ ли́цы дв҃ьственїи провожда́ютъ , свѣщѝ носѧ́ще во ст҃а́ѧ . Сла́вꙋ взѧ́тъ і҆ѡаки́мъ со а҆́нною , ходѧ́ще и҆ носѧ́ще тѧ̀ с̾ весе́лїемъ во ст҃ꙋ́ю цр҃ковь , хра́ме бж҃їй прест҃ы́й , чи́стаѧ и҆ всенепоро́чнаѧ влⷣчце . Разрѣша́етсѧ и҆зрече́нїе пра́дѣднее . се́бо процвѣтѐ виногра́дъ . и҆́же гро́здъ нетлѣ́нныи на́мъ плодоно́ситъ вино̀ весе́лїѧ конце́мъ . Є҆ди́нꙋ тѧ̀ всенепоро́чнꙋю содѣ́тель сло́во ѡ҆брѣ́тъ , всели́всѧ во твоѐ чре́во , содѣва́ѧ на́мъ спасе́нїе бл҃года́тїю пречⷭ҇таѧ , за неи҆з̾гл҃аннꙋю млⷭ҇ть .

и҆́нъ , і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . На́съ ра́ди стра́ннымъ соше́ствїемъ бы́въ григо́рїе , стра́ненъ бл҃госты́нею . тебѐ є҆гѡ̀ ра́ди стра́нна ви́дѣвъ ѿ ѻ҆те́чества бы́вша прїѧ́тъ . и҆ бжⷭ҇твена наслѣ́дника тогѡ̀ црⷭ҇тва добродѣ́тельми оу҆кра́шена содѣ́ла . За хрⷭ҇та̀ на́съ ра́ди младе́нствовавшаго , и҆ ѻ҆́трока прпⷣбне бы́вша , ѻ҆́трокъ оу҆чи́тельствꙋ вда́лъ є҆сѝ себѐ . младе́нецъ ѕло́бою бг҃омꙋ́дре ѻ҆́ч҃е бы́въ . и҆ бжⷭ҇твенымъ смире́нїемъ , вра́жїю ѕло́бꙋ смири́лъ є҆сѝ бл҃же́нне григо́рїе . Тꙋ́чами твои́хъ сле́зъ ѻ҆́ч҃е григо́рїе , ꙗ҆́кѡ росо́ю бжⷭ҇твеною напоѧ́емь , всѧ́кꙋ воз̾расти́лъ є҆сѝ добродѣ́тель . всѧ́ко бл҃гопло́дїе пра́вды процвѣ́лъ є҆сѝ , ꙗ҆́кѡ дре́во плодоно́сное при и҆схо́дищихъ во́дъ насажде́нъ , соверше́нагѡ по́стничества . боⷢ҇ . Мт҃и бж҃їѧ бл҃гослове́наѧ всенепоро́чнаѧ , дш҃и моеѧ̀ ꙗ҆́звы и҆сцѣлѝ , сла́сти оу҆толѝ плотны́ѧ . ѡ҆мраче́ное срⷣце моѐ просвѣтѝ , и҆ оу҆мирѝ оу҆́мъ мо́й . и҆ всѧ́кагѡ вре́да , и҆ вра́жїихъ мѧ̀ напа́стей и҆зба́ви .

и҆́нъ , і҆рмо́съ . Го́рꙋ тѧ бл҃года́тїю бж҃їею присѣ́ннꙋ , прозорли́выма а҆вва́кꙋмъ оу҆смотри́въ ѻ҆чи́ма , и҆з̾ тебѐ и҆зы́ти і҆и҃леви , провоз̾глаша́ше ст҃а́гѡ , на спасе́нїе на́ше и҆҆ ѡ҆бновле́нїе . Глагѡ́лъ вѣща́нїѧ , и҆ повелѣ́нїи бл҃гогла́сныхъ , оу҆че́нїѧ твоегѡ̀ гро́мъ , цр҃ковь бж҃їю мꙋ́дрѡ веселѧ́тъ . є҆рети́ческое ѿго́нѧтъ свирѣ́пїе , сщ҃енноѧвле́нне про́кле всесла́вне . Ꙗ҆́коже ѕла́то ѻ҆гне́мъ сщ҃е́нне , воз̾держа́нїемъ честно́е тѣ́ло своѐ ѡ҆чи́стивъ мꙋ́дре , красно̀ показа́лъ є҆сѝ творцꙋ̀ . сегѡ̀ ра́ди тебѣ̀ ѻ҆дѣѧ́нїе сщ҃е́нства , вѣ́чнѡ да́рꙋетъ . Ра́зꙋмъ бжⷭ҇твеныи навы́къ . и҆ ꙗ҆́кѡ ст҃ль сщ҃е́нныи бы́въ бл҃гопода́тливъ про́чее . всѣ́мъ по́далъ є҆сѝ просвѣще́нїе , и҆ бжⷭ҇твеныѧ свѣ́тлости , въ просвѣще́нїе дш҃а́мъ достосла́вне .= боⷢ҇ . О=у҆́гль бжⷭ҇твеный во оу҆тро́бѣ пренепоро́чнаѧ прїе́мши па́че оу҆ма̀ , не ѡ҆пали́сѧ вои́стинꙋ . кꙋпина́ бо и҆з̾ дале́ча ѡ҆бра́знѡ твоѐ ржⷭ҇тво̀ прописа̀ , во спасе́нїе на́ше и҆ ѡ҆бновле́нїе .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща . Ѻ҆́блацы да воска́плютъ пра́вдꙋ дне́сь . ꙗ҆́кѡ на́ нб҃си бо простира́етсѧ бжⷭ҇твеныи ѻ҆́блакъ в̾ хра́мѣ бж҃їи . и҆́же ка́плетъ сла́дость , всю̀ го́ресть дꙋ́шъ на́шихъ и҆зъє́млющꙋ . Стра́нно твоѐ зача́тїе , стра́нно и҆ ржⷭ҇тво̀ . стра́нно и҆ прои҆схожде́нїе дв҃о , стра́нно и҆ внꙋ́трь цр҃кви житїѐ . стра́нна и҆ пресла́вна твоѧ̀ , сло́во превосходѧ́ща и҆ помышле́нїе пречⷭ҇таѧ . Всю̀ тебѐ ѡ҆ст҃ѝ дх҃ъ прест҃ы́и , внꙋ́трь цр҃кве пребыва́ющꙋ , и҆ пита́емꙋ пи́щею нбⷭ҇ною , невѣ́сто ѻ҆́ч҃а кра́снаѧ . сегѡ̀ ра́ди бы́вши сло́вꙋ роди́тельница . Къ тебѣ̀ моѐ всѐ надѣ́ѧнїе ѻ҆трокови́це воз̾лага́ю , къ щедро́тамъ твои́мъ прибѣга́ю . вре́да бѣсо́вскагѡ ꙗ҆вѝ неприча́стнꙋ , па́дшꙋю дш҃ꙋ мою̀ и҆ и҆знемо́гшꙋю , и҆ сластьмѝ потопле́нꙋю .

и҆́нъ , і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Дѣ́ланїемъ , и҆ словесы̀ , виногра́дъ показа́сѧ плодоно́сенъ прпⷣбне . добродѣ́телей зрѣ́лое и҆ вели́кое и҆зносѧ̀ гро́здїе , спасе́нїѧ вино̀ дх҃о́вное и҆сточа́юще ѻ҆́ч҃е , и҆ вѣ́рныхъ срⷣца̀ веселѧ́ще . Сла́вныи ри́мъ ѻ҆́ч҃е ѿ восто́ка тѧ̀ , свѣти́льника незаходи́ма прїе́мъ вѣ́рою просвѣти́сѧ , честны́ми ти дарова́нїи . хрⷭ҇та́ бо и҆мѣ́ѧ в̾ дш҃и ꙗ҆́кѡ свѣ́тъ , ви́дѧщихъ тѧ̀ ѻ҆́ч҃е ѡ҆зарѧ́юща . Ползѧ́щаго ѕмїѧ̀ и҆ соблюда́юща твою̀ пѧ́тꙋ григо́рїе , бо́дростїю бжⷭ҇твеною в̾ пꙋтѣ́хъ жи́зни ходѧ̀ ꙗ҆́кѡ бж҃їи оу҆го́дникъ , ꙗ҆́кѡ за́повѣдемъ хрⷭ҇то́вѣмъ дѣ́латель , оу҆мертви́лъ є҆сѝ си́лою дх҃о́вною . боⷢ҇ . Пред̾ста́тельнице ми́рꙋ мт҃и прⷭ҇нѡ дв҃о , ты́ мѧ ѡ҆кормѝ . и҆ наста́ви мѧ на пра́выи пꙋ́ть , направлѧ́ющи к̾ пра́веднымъ стезѧ́мъ , и҆ пра́вымъ помышле́нїемъ , мое́й дш҃и ше́ствїе и҆справлѧ́ющи .

и҆́нъ , і҆рмо́съ . Просвѣще́й сїѧ́нїемъ прише́ствїѧ твоегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ концы̀ , срⷣца̀ просвѣтѝ свѣ́томъ твоегѡ̀ бг҃оразꙋ́мїѧ , правовѣ́рнѡ хва́лѧщимъ тѧ . Свѣтоно́сенъ ꙗ҆́кѡ свѣти́льникъ всебл҃же́нне бы́въ , бжⷭ҇твеныѧ цр҃кве ꙗ҆ви́сѧ побо́рникъ . и҆ бж҃їе оу҆ѧсни́лъ є҆сѝ є҆́же ѿ дв҃ы прест҃ы́ѧ ржⷭ҇тво̀ несовра́тно сла́вне . Воплоще́нїѧ бж҃їѧ ѿ дв҃ы , сла́внагѡ повелѣ́нїѧ в̾ пра́щꙋ вло́жь , ꙗ҆́коже и҆ноплеме́нника голїа́фа низ̾ложѝ нестѡ́рїевъ свирѣ́пыи нра́въ , ꙗ҆́кѡ дре́вле вели́кїи дв҃дъ . Па́вловѣми оу҆че́нїи сы́и и҆спо́лненъ . и҆ тогѡ̀ видѣ́нїѧ оу҆зрѣ́въ всеи҆з̾бра́нне . є҆лисе́й вторы́и показа́всѧ . ма́стїю бжⷭ҇твеною , сщ҃е́нствомъ пома́занъ та́йнѡ .= боⷢ҇ . Н=и смꙋще́нїѧ ни смѣше́нїѧ во оу҆тро́бѣ прїѧ́тъ дв҃ыѧ , бг҃ъ пло́тїю прои҆сходѧ̀ . но є҆́же бѣ̀ , пребы́сть , бг҃ъ и҆ чл҃къ , несовра́тнѡ дѣ́йствы ꙗ҆влѧ́емь .

пѣ́снь , ѕ҃ . і҆рмо́съ . Бжⷭ҇твеное сѐ и҆ всечⷭ҇тно́е соверша́юще пра́зднество , бг҃омꙋ́дрїи бж҃їѧ мт҃ре , прїиди́те рꙋка́ми воспле́щемъ , ѿ неѧ̀ ро́ждьшагосѧ вѣ́рою сла́вѧще . Оу҆крѣ́пльшесѧ бжⷭ҇твеною бл҃года́тїю , бжⷭ҇твеныѧ дв҃ы роди́телѧ . сїю̀ ꙗ҆́кѡ непоро́чнꙋю голꙋ́бицꙋ , во ст҃а́ѧ воспита́тисѧ любо́вїю воз̾лага́ютъ . Тебѣ̀ хотѧ́щей прїима́ти , свѣ́та ѿ́ свѣта прои҆сходѧ́щагѡ , свѣщѝ вжига́юще ѻ҆трокови́цы , чⷭ҇таѧ пред̾хо́дѧтъ свѣтови́днѡ , къ бжⷭ҇твеномꙋ хра́мꙋ ликоствꙋ́юще . И҆спо́лнь сла́вы пола́та вели́кое проро́къ ѡ҆глаше́нїе . прⷭ҇то́лъ ст҃ы́и , внꙋ́трь ст҃а́ѧ в̾во́дитсѧ , цр҃е́ви всѣ́хъ гото́вѧщисѧ . Пою̀ твоѐ ѻ҆трокови́це зача́тїе . пою́ ти и҆ неи҆зрече́нное ржⷭ҇тво̀ пою̀ и҆ покро́въ тво́й , и҆́мъ же вре́да всѧ́кагѡ и҆збавлѧ́емсѧ , и҆́же къ твоемꙋ̀ ѡ҆ти́шїю прибѣга́ющїи .

и҆́нъ , і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Ма́нїемъ є҆́же к̾ бг҃ꙋ ѡ҆божа́емь сщ҃е́нне , видѣ́нїи та́йными и҆ бжⷭ҇твеными сїѧ́нїи , ꙗ҆́кѡ прⷪ҇ро́къ бжⷭ҇твеныи . ꙗ҆́кѡ бж҃їи оу҆го́дникъ сподо́бисѧ бж҃їѧ бл҃года́ти . Молчали́во своѐ житїѐ соверши́лъ є҆сѝ бг҃одх҃нове́нне , мѧте́жей жите́йскихъ ꙗ҆ви́сѧ бо́льшїи , и҆ страсте́й вы́шши . и҆ землѝ все́й стра́ненъ же и҆ пришле́цъ . Ꙗ҆́кѡ зерца́ло чⷭ҇тое бжⷭ҇твеною заре́ю ѡ҆богати́сѧ . ꙗ҆́коже сосꙋ́дъ сщ҃е́нныи цр҃ковь оу҆краси́лъ є҆сѝ го́рнюю григо́рїе . и҆ перворожде́ныхъ со́нмъ просвѣти́лъ є҆сѝ . боⷢ҇ . Мр҃і́е чи́стаѧ пола́та цр҃е́ва , бы́вша мѧ разбо́йникѡмъ нечи́стыи верте́пъ , мл҃твами сѝ ѡ҆чи́щши , и҆з̾ тебѐ ро́ждьшемꙋсѧ цр҃ковь ст҃ꙋ покажѝ .

и҆́нъ , і҆рмо́съ . Ѡ҆бы́де на́съ послѣ́днѧѧ бе́здна , нѣ́сть и҆҆збавлѧ́ѧи , в̾мѣни́хомсѧ ꙗ҆́кѡ ѻ҆вча̀ на заколе́нїе , спасѝ лю́ди своѧ̀ бж҃е на́шъ . ты́ бо крѣ́пость немощны́мъ и҆҆ и҆҆справле́нїе . Ѡ҆быше́дшихъ ꙗ҆́кѡ ѕвѣ́ри ѿгна́лъ є҆сѝ є҆́реси ѿ ста́да хрⷭ҇то́ва , пред̾бори́телѧ жезло́мъ разꙋ́мнымъ , твои́хъ оу҆че́нїи про́кле бл҃же́нне . къ па́ствѣ же правосла́вїѧ ста́до и҆спра́вивъ . Ꙗ҆́кѡ и҆́нъ ковче́гъ , цр҃кви хрⷭ҇то́вѣ , тѣ́ло всебл҃же́ннагѡ ѕлатоꙋ́ста вда́лъ є҆сѝ , твои́ми про́кле поꙋче́ньми . и҆ воз̾весели́въ правосла́вныхъ ли́ки прише́ствїемъ твои́мъ . На вели́кое воз̾ше́дъ сѣда́лище прпⷣбне , вели́кими и҆справле́нїи оу҆краси́лъ є҆сѝ то̀ бг҃олѣ́пнѡ . тѣ́мже соше́дшесѧ хва́лимъ тѧ̀ сщ҃еннодѣ́йствене , и҆ великомꙋ́дрене про́кле сла́вне .= боⷢ҇ . Ꙗ҆=ви́сѧ херꙋви́мъ бг҃обл҃года́тнаѧ дв҃о преи҆мꙋ́щи . на ра́мѣхъ бо носи́ма тѣ́ми чⷭ҇таѧ , ѡ҆бъѧ́тїи свои́ми носи́ла є҆сѝ . тѣ́мже тѧ̀ прⷭ҇нѡ бцⷣꙋ всѝ сла́вимъ .

конда́къ , пред̾пра́зднествꙋ . гла́съ , д҃ . Весе́лїѧ дне́сь вселе́ннаѧ и҆спо́лнисѧ всѧ̀ , въ бл҃го наро́читѣмъ пра́здницѣ бцⷣы , зовꙋ́щи , та̀ є҆́сть сѣ́нь нбⷭ҇наѧ . и҆́косъ . Въ пра́мт҃ри на́шей ѻ҆́бразъ проѡ҆бразова́шесѧ , є҆гда̀ воѡ҆брази́сѧ є҆сте́ственыи зра́къ ѿ дв҃ы свѣ́тлѡ . ꙗ҆́коже бо ѻ҆на̀ ѿ ре́бръ без̾ сѣ́мене прои҆зы́де пра́ѻ҆ц҃а , та́кѡ и҆ сїѧ̀ без̾ сѣ́мене гдⷭ҇а родѝ , па́че сло́ва и҆ помышле́нїѧ чл҃ческа , и҆ ра́зꙋма всѣ́хъ беспло́тныхъ . тѣ́мже тѧ̀ та́йнѡ а҆́нна наꙋча́ѧ , проповѣ́да ꙗ҆́вственѡ ꙗ҆́же ѿ дв҃ы . да с̾ ра́достїю приведе́ши ю҆̀ гдⷭ҇ви . та̀ є҆́сть сѣ́нь нбⷭ҇наѧ .

пѣ́снь , з҃ . і҆рмо́съ . Непослꙋжи́ша тва́ри бг҃омꙋ́дрїи па́че зижди́телѧ , но ѻ҆́гненное преще́нїе , мꙋ́жески попра́вше ра́довахꙋсѧ пою́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Свѣтоно́сное тѧ̀ ꙗ҆́кѡ сл҃нце , прїе́млетъ цр҃ковь ст҃а́ѧ , внꙋ́трь сїѧ́ющꙋ зарю̀ пою́щимъ спасе́нїѧ чⷭ҇таѧ , препѣ́тыи ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . Рꙋка́ма всѝ воспле́щемъ , и҆збавле́нїѧ носѧ́щꙋ ѻ҆́бразы , неи҆скꙋсобра́чнꙋю ви́дѧще . рꙋко́ю бо а҆́нг҃лѡвою пита́етсѧ , нбⷭ҇нагѡ хлѣ́ба на́мъ ꙗ҆́кѡ хотѧ́щꙋ неи҆зрече́ннѡ породи́ти . Дш҃а всѧ̀ пра́ведныхъ под̾ земны́ѧ бл҃говѣсти́ша тѧ̀ голꙋ́бице ѕлата́ѧ , поко́ище носѧ́щꙋ пото́па разꙋ́мнагѡ . и҆ во ст҃ы́хъ ст҃а́ѧ бл҃гоче́стнѡ ликоствꙋ́ющꙋ . Ꙗ҆́кѡ красна̀ , кра́снаго родила̀ є҆сѝ , нелѣпотꙋ̀ на́шꙋ воз̾враща́ющаго в̾ пе́рвыи ѻ҆́бразъ , ѻ҆трокови́це всенепоро́чнаѧ . є҆мꙋ́же пое́мъ , ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ .

и҆́нъ , і҆рмо́съ . Бж҃їѧ схожде́нїѧ ѻ҆́гнь оу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́троцы , в̾ пещѝ ра́дованною ного́ю , ꙗ҆́кѡ во́ свѣтѣ ликова́хꙋ пою́ще , блгⷭ҇ве́нъ бг҃ъ ѻ҆ц҃ъ на́шихъ . Сле́зъ проли́тїемъ , грѣхо́вныи ѻ҆́гнь погаси́лъ є҆сѝ . без̾стра́стїѧ же во́дꙋ , и҆ и҆сцѣле́нїи чⷭ҇тагѡ пи́ва пою́щимъ и҆сточа́еши григо́рїе , бл҃гослове́нъ бг҃ъ ѻ҆ц҃ъ на́шихъ . Пла́менною колесни́цею , чⷭ҇тны́ѧ любвѐ соверше́нїемь носи́мь , к̾ высотѣ̀ взы́де . въ ню́же стѧжа̀ твоѐ бг҃омꙋ́дре житїѐ , зовы́и блгⷭ҇ве́нъ бг҃ъ ѻ҆ц҃ъ на́шихъ . Страсте́й оу҆спи́лъ є҆сѝ треволне́нїѧ бо́дреными стоѧ́ньми . оу҆снꙋ́въ же сно́мъ пра́веднымъ подо́бнѡ , к̾ свѣ́тꙋ пре́йде невече́рнемꙋ , зовы́и , бл҃гослове́нъ бг҃ъ ѻ҆ц҃ъ на́шихъ . боⷢ҇ . Ме́ртва бы́вша грѣхо́мъ и҆ погиба́юща . живо́тъ ро́ждьшаѧ чи́стаѧ дв҃о , ѡ҆живѝ и҆ спаси́ мѧ . и҆ гее́ны мѧ и҆схитѝ пою́ща , бл҃гослове́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Тебѐ мы́сленнꙋю бцⷣе пе́щь , раз̾смотрѧ́емъ вѣ́рнїи , ꙗ҆́коже бо ѻ҆́троки спасѐ трѝ превозноша́емыи , ми́ръ ѡ҆бнови́лъ є҆́сть , во́ чревѣ твое́мъ соверше́нъ , восхвалѧ́емыи ѻ҆ц҃е́мъ бг҃ъ и҆҆ препросла́вленъ . Тѣ́ло и҆ оу҆́мъ и҆ дш҃ꙋ ѡ҆чи́стивъ , оу҆мале́нїемъ страсте́й , ст҃лю про́кле мꙋ́дре . тѣ́мже наꙋчи́лъ є҆сѝ пѣ́ти , тѣ́ло и҆ дш҃ꙋ и҆ оу҆́мъ , є҆́же ѿ дв҃ы ро́ждьшагосѧ бг҃а кромѣ̀ премѣне́нїѧ , на спасе́нїе на́ше прїе́мшагѡ . Ты̀ ко хрⷭ҇тꙋ̀ стѧжа́въ ст҃е дерзнове́нїе , на землѝ хва́лѧщимъ пѣ́сненѡ па́мѧть твою̀ сла́внꙋю , всѧ́кихъ напа́стей и҆зба́витисѧ молѝ , хвали́маго поѧ̀ бг҃а пресла́внаго . Ѻ҆́гнь разꙋ́мныи в̾ помышле́нїи вже́гътисѧ , хвра́стнꙋю , и҆ гнилꙋ́ю ѕлочести́вагѡ нестѡ́рїѧ є҆́ресь попали́лъ є҆сѝ . тѣ́мжетисѧ мо́лимъ , веще́ственыѧ на́ша сла́сти , є҆́же к̾ бг҃ꙋ мольба́ми сѝ поже́гъ ѡ҆чи́сти сла́вне .= боⷢ҇ . Н=о́сиши бг҃а пло́тїю ѡ҆бложена̀ на рꙋкꙋ̀ своею̀ чⷭ҇таѧ , ꙗ҆́коже прⷭ҇то́лъ херꙋви́мскїи , носѧ́ща всѧ̀ глаго́ломъ си́лы своеѧ̀ . є҆мꙋ́же пое́мъ веселѧ́щесѧ , препѣ́тыи ѻ҆ц҃е́мъ бж҃е и҆ препросла́вленыи блгⷭ҇ве́нъ є҆сѝ .

пѣ́снь , и҃ . і҆рмо́съ . Слы́ши ѻ҆трокови́це дв҃це чⷭ҇таѧ , да рече́тъ оу҆́бѡ гаврїи́лъ , совѣ́тъ вы́шнѧгѡ дре́вле и҆́стинныи . бꙋ́ди на прїѧ́тїе гото́ва бг҃ꙋ , тобо́ю бо невмѣсти́мыи съ чл҃ки поживе́тъ . тѣ́мъ и҆ ра́дꙋѧсѧ вопїю̀ , да блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Слы́ши и҆ разꙋмѣ́й ста́рче мꙋ́дрыи заха́рїи а҆́нна речѐ , совѣ́томъ бжⷭ҇твенымъ , ю҆́же и҆́мамъ ѻ҆трокови́цꙋ чⷭ҇тꙋю , до́блественою дш҃е́ю прїимѝ . тоѧ́ бо ра́ди бꙋ́детъ и҆з̾бавле́нїе . и҆ в̾ цр҃ковь ст҃ꙋ́ю в̾ведѝ сїю̀ , вопїѧ̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Блгⷭ҇ве́нъ є҆ди́нъ гдⷭ҇ь , возопѝ сщ҃е́нникъ . жи́зни вхо́ды нн҃ѣ оу҆казꙋ́ютъ ꙗ҆́вѣ на́мъ ѡ҆бъѧви́вше . въ ню́же хо́щетъ всели́тисѧ бг҃овмѣсти́мꙋю пола́тꙋ хрⷭ҇то́съ цр҃ь всѧ́ческихъ . є҆мꙋ́же вопїе́тъ всѧ̀ землѧ̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Сѐ ста́рче мꙋ́дрыи а҆́нна речѐ бл҃гоговѣ́йнѡ , до́брꙋю ѻ҆трокови́цꙋ , ю҆́же да́стъ ми бг҃ъ , свѣ́тлѡ прїимѝ . проро́чествꙋ , є҆ди́нꙋ хотѧ́щꙋю в̾ ве́щи прои҆знестѝ проповѣ́данїѧ . с̾ ни́ми же вопїе́ши проро́чески , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Ны́нѣ разꙋмѣ́хъ же́но ꙗ҆́вственѡ , разꙋ́мнѡ речѐ ста́рецъ , дре́во возраста́етъ посредѣ̀ хра́ма . є҆́же процвѣте́тъ вои́стинꙋ бжⷭ҇твеныи пло́дъ , в̾ ра́й в̾водѧ́щь , снѣ́дїю и҆з̾гна́ныхъ тле́ю . вопїю́щихъ ра́достнѡ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Гл҃ъ неи҆зрече́нныхъ оу҆че́нїи , твоѧ̀ дш҃а ѻ҆трокови́це чⷭ҇таѧ , ꙗ҆́вѣ бꙋ́детъ ста́рецъ речѐ ꙗ҆́снѡ , въ бжⷭ҇твеныи се́й дв҃о всели́шисѧ хра́мъ . а҆́нг҃лѡмъ бо пита́ема , совѣ́та вели́кагѡ а҆́нг҃ла роди́ши . є҆мꙋ́же пое́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Гла́съ тѝ пое́мъ ѻ҆трокови́це чⷭ҇таѧ ра́достнѡ гаврїи́ловъ . ра́дꙋисѧ всѣ́хъ вина̀ є҆ди́на ра́дости . ра́дꙋисѧ дш҃а́мъ ѡ҆чище́нїе , ꙗ҆́кѡ ро́ждьшаѧ чистотꙋ̀ на́шꙋ , и҆ и҆збавле́нїе , пою́щимъ є҆мꙋ̀ . бл҃гослови́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки .

и҆́нъ , і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃очести́вымъ лю́тѣ раз̾жжѐ . си́лою же лꙋ́чшею спасе́ныхъ ви́дѣвъ , творцꙋ̀ и҆ и҆зба́вителю вопїѧ́ше , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . И҆́же к̾ бг҃ꙋ мольба́ми сѝ прилѣ́жнѡ дѣ́ѧ , прїѧ́тъ всебл҃же́нне вѣ́рою проси́мое . но́щїю бо сѣдѧ́щꙋ ꙗ҆ви́сѧ тѝ а҆́нг҃лъ , ме́чь пла́менныи вдадѐ тѝ , стра́сти ѿ срⷣца ѿсѣка́ющь , и҆ ѻ҆гне́мъ тѧ̀ невеще́ственымъ ѡ҆чища́ющь , и҆ сла́вою просвѣща́ющь неи҆зрече́нною . Ве́сь свѣ́телъ ꙗ҆́кѡ сл҃нце , разꙋ́мнѡ восїѧ́въ свѣ́томъ добродѣ́телей свѣтоза́рнѡ григо́рїе . чꙋде́сными же лꙋча́ми ѡ҆зарѧ́ѧ всю̀ зе́млю . и҆ просвѣща́ѧ бл҃гоче́стнѡ пою́щихъ . дѣ́ти блгⷭ҇ви́те , сщ҃е́ннїи воспо́йте лю́дїе , и҆ превозноси́те хрⷭ҇та̀ во́ вѣки . А҆́нг҃льскагѡ пѣ́нїѧ слы́шавъ григо́рїе , є҆щѐ жи́въ въ ме́ртвенѣмъ твое́мъ тѣлесѝ . ѿ него́ же чꙋ́вствїѧ своѧ̀ дш҃е́внаѧ ꙗ҆́вѣ наслади́въ , и҆ бг҃ови́денъ и҆ свѣтоза́ренъ позна́сѧ . зовы́й влⷣцѣ , дѣ́ти блгⷭ҇ви́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . боⷢ҇ . И҆́же сꙋдїю̀ и҆ гдⷭ҇а па́че сло́ва ро́ждьши . сегѡ̀ ꙗ҆́кѡ сн҃а сѝ прест҃а́ѧ оу҆молѝ , в̾ ча́съ сꙋ́дный , ѡ҆сꙋжде́нїѧ и҆ ѻ҆гнѧ̀ , и҆ тмы̀ несвѣ́тлыѧ , и҆ скре́жета зꙋбо́мъ и҆зба́вити , вѣ́рою бл҃гоче́стнѡ пою́щихъ . сщ҃е́ннїи по́йте лю́дїе , и҆ превозноси́те є҆гѡ̀ во́ вѣки .

и҆́нъ , і҆рмо́съ . Въ пещѝ дѣ́ти і҆и҃левы , ꙗ҆́коже в̾ горни́лѣ добро́тою бл҃гоче́стїѧ , чистѣ́е зла́та блеща́хꙋсѧ гл҃юще , бл҃гослови́те всѧ̀ дѣ́ла гдⷭ҇нѧ гдⷭ҇а , по́йте и҆҆ превозноси́те є҆гѡ̀ во́ вѣки . Ꙗ҆́кѡ в̾ горни́лѣ свѣтоза́рне всесла́вне , чистото́ю стра́сти плотьскі́ѧ ѡ҆чи́стивъ , ꙗ҆́кѡ зла́то всѣ́мъ восїѧ́лъ є҆сѝ . воспѣва́ѧ , всѧ̀ дѣ́ла гдⷭ҇а по́йте , и҆҆ превозноси́те є҆гѡ̀ во́ вѣки . Ꙗ҆́кѡ ѻ҆рга́номъ бл҃же́нне честна́гѡ ти ꙗ҆зы́ка оу҆краша́ема вѣща́нїемъ цр҃ковь бж҃їѧ , на землѝ спасе́ное сше́ствїе воспѣва́ѧ , всѣ́мъ воз̾глаша́ющи ꙗ҆́снѡ , и҆ вопїю́щи , и҆ превозносѧ́щи хрⷭ҇та̀ во всѧ̀ вѣ́ки . Гꙋ́сль бжⷭ҇твенаѧ ꙗ҆ви́сѧ вои́стинꙋ , вѣща́нїемъ воз̾глаша́ющи , с̾ вѣ́рою прїе́млющимъ бж҃їе , є҆́же к̾ на́мъ спасе́ное воплоще́нїе про́кле бл҃же́нне . вѣ́рою зовы́и , гдⷭ҇а по́йте дѣ́ла , и҆҆ превозноси́те є҆гѡ̀ во́ вѣки .= боⷢ҇ . С=охрани́въ зна́менїѧ твоегѡ̀ дв҃о , дв҃ьства невреди́ма влⷣка . прои҆зы́де бг҃ъ и҆з̾ тебѐ па́че смы́сла , на спасе́нїе вопїю́щимъ . гдⷭ҇а по́йте , и҆ превозноси́те є҆гѡ̀ во́ вѣки .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃омъ просвѣща́емъ . да ликовствꙋ́етъ же , беспло́тныхъ оу҆мо́въ є҆стество̀ , почита́ѧ ст҃о́е торжество̀ бж҃їѧ мт҃ре . и҆ да пое́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Сѐ бж҃їѧ гора̀ ст҃а́ѧ , со свѣща́ми мно́гими внꙋ́трь ст҃а́ѧ стꙋпа́етъ . ѿ неѧ́ же ка́мень ѿсѣче́сѧ , и҆ хра́мины и҆ кꙋми́ры бѣсо́мъ и҆скорени́тъ . землены́ѧ же тогѡ̀ содѣ́лаетъ цр҃кви , и҆ честна́ѧ ѻ҆би́телища . Клѧ́тсѧ бг҃ъ , и҆ ны́нѣ и҆спо́лни , ѿ колѣ́на і҆ꙋ́дова на́мъ да́въ при́снѡ дв҃ꙋю . є҆ѧ́же чре́во дре́во воз̾расти́тъ живота̀ , смертоно́сныѧ снѣ́ди и҆з̾бавлѧ́юще , паде́нїѧ пи́щею пострада́вшихъ , и҆ оу҆кра́деныѧ пре́лестїю ѕмїи́ною . Оу҆сты̀ свѣ́тлыми а҆́нна возопѝ в̾ цр҃кви к̾ бг҃ꙋ , тебѣ̀ пред̾лага́ю ю҆́же ми да́лъ є҆сѝ ѻ҆трокови́цꙋ ѽ влⷣко . и҆з̾ неѧ́ же за млрⷭ҇дїе неи҆з̾гл҃анное плотоно́сецъ ꙗ҆ви́шисѧ спастѝ ми́ра є҆го́же созда̀ , воз̾вели́чивъ є҆ѧ̀ ꙗ҆́кѡ мт҃рь свою̀ . Сѐ просвѣти́сѧ де́нь спасе́нїѧ и҆́же в̾ нощѝ лю́тыхъ паде́нїѧ нище́тою пострада́вшимъ . две́рь нбⷭ҇наѧ , цр҃кви две́ри ѿве́рзши , со свѣща́ми вхо́дитъ внꙋ́трь во ст҃а́ѧ , ѿ ст҃ы́ѧ пита́тисѧ си́лы , ст҃о́мꙋ бг҃ꙋ в̾ жили́ще . Просвѣтѝ чⷭ҇таѧ дш҃и моеѧ̀ ѻ҆́чи , свѣ́тъ ро́ждьшаѧ , да непости́гнетъ мѧ̀ грѣхо́внаѧ тма̀ тѧ́жкаѧ , и҆ глꙋбина̀ покры́етъ мѧ̀ ѿча́ѧнїѧ . но ты́ мѧ спасѝ и҆ ѡ҆кормѝ , къ приста́нищꙋ бжⷭ҇твенагѡ хотѣ́нїѧ .

и҆́нъ , і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схожде́нїѧ , ꙗ҆́кѡ вы́шнїи во́лею сни́де да́же и҆ до́ плоти . ѿ дв҃ческагѡ бо чре́ва бы́въ оу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Поты̀ по́стническими , грѣхо́вное оу҆гаси́лъ є҆сѝ оу҆́глїе . и҆ с̾ нб҃сѐ ꙗ҆́вѣ ѻ҆́гненымъ видѣ́нїемъ бл҃года́ть прїе́мъ , не попалѧ́ющꙋ мꙋ́дре , но вѣ́рнѡ ѡ҆роша́ющꙋ . и҆ крѣ́постїю тѧ̀ си́льна на́ страсти показа́ющꙋ . Ꙗ҆́кѡ ши́покъ по́стническими ѻ҆́ч҃е процвѣ́лъ є҆сѝ оу҆до́лїи григо́рїе . и҆ ꙗ҆́кѡ кри́нъ бл҃гово́нныи . сегѡ̀ ра́ди то́чиши мѵ́рѡ бл҃гоꙋха́нное , твоѧ̀ мо́щи ѡ҆би́льнѡ оу҆ха́ютъ жи́знь . и҆спо́лнь бо лани́тѣ твоѝ , ꙗ҆́кѡ ча́ша а҆рама́тъ ꙗ҆ви́шасѧ . Дне́сь с̾ на́ми собо́ръ а҆́нг҃лъ и҆ прпⷣбныхъ весели́тсѧ , патрїа́рхъ и҆ прⷪ҇ро́къ , в̾ па́мѧть твою̀ бл҃же́нне . спра́зднꙋютъ с̾ на́ми а҆пⷭ҇ли , и҆ мч҃нцы . съ ни́ми же помина́й чтꙋ́щихъ тѧ̀ вѣ́рнѡ досточꙋ́дне . Ра́ка и҆дѣ́же честно́е и҆ многострада́льное тѣ́ло твоѐ лежи́тъ . чꙋде́съ бл҃года́ть на́мъ и҆сточа́етъ ѻ҆́ч҃е григо́рїе , просвѣща́ющи на́ша дш҃а и҆ тѣлеса̀ , ѡ҆бога́тившисѧ тобо́ю . и҆ пред̾ста́телѧ и҆ те́пла тѧ̀ застꙋ́пника и҆мꙋ́щи . боⷢ҇ . Гла́съ ти гаврїи́ловъ , вѣ́рнїи ра́достнѡ провѣщава́емъ . ра́дꙋисѧ раю̀ , жи́зни дре́во прозѧ́бшїи . ра́дꙋисѧ разрѣше́нїе клѧ́твѣ . мч҃нкѡмъ вѣнча́нїе . и҆ прпⷣбнымъ похвало̀ , и҆ чл҃кѡмъ бл҃гочести́вымъ оу҆твержде́нїе .

и҆́нъ , і҆рмо́съ . Ѻ҆́бразъ чи́стагѡ ржⷭ҇тва̀ твоегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю оу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Ѻ҆́бразы и҆ сѣ́ни ми́мѡ те́къ , и҆ и҆́стиннѡ хрⷭ҇та̀ разꙋмѣ́въ , породи́всѧ ба́нею кр҃ще́нїѧ . сщ҃е́нникъ же пома́занъ сщ҃е́ннѣйши . тѣ́мже и҆ бцⷣꙋ тогѡ̀ ро́ждьшꙋю проповѣ́далъ є҆сѝ . Нра́вы сщ҃е́нныѧ и҆ повелѣ́нїѧ златоꙋ́стагѡ бл҃же́нне воспрїѧ́лъ є҆сѝ , ре́вность же є҆гѡ̀ сщ҃е́нныѧ вѣ́ры , ѿры́гнꙋ оу҆че́нїи твои́хъ пꙋчи́нꙋ , є҆ресе́й пото́ки и҆з̾сꙋша́ющꙋ бл҃года́тїю . Оу҆ста́ви сщ҃е́нными ти мл҃твами воз̾двиза́емое на ны̀ смꙋще́нїе . и҆ ѿженѝ напа́стей ѡ҆мраче́нїе , и҆ чл҃къ всѣ́хъ ѡ҆ѕлобле́нїе . ꙗ҆́кѡ и҆мы́и дерзнове́нїе ко влⷣцѣ и҆ бг҃ꙋ на́шемꙋ .= боⷢ҇ . Ѽ= па́че оу҆ма̀ чꙋде́съ твои́хъ , бж҃їе сло́во в̾ пло́ть бы́вшее , є҆ди́на породила̀ є҆сѝ па́че є҆стества̀ мт҃и дв҃о . всѧ́ческаѧ бжⷭ҇твенымъ хотѣ́нїемъ мꙋ́дрѣ держа́щаго и҆ ѡ҆кормлѧ́юща .

свѣти́ленъ , григо́рїю . Ст҃ы́ни хра́мъ бы́лъ є҆сѝ ст҃лю , по бжⷭ҇твеномꙋ же прича́стїю ны́нѣ бг҃ъ быва́еши , и҆ раѧ̀ граждани́нъ . въ не́мже напитава́ешисѧ невоз̾бра́ннѡ дре́ва разꙋ́мнагѡ , и҆ нетлѣ́нныѧ сла́вы . па́мѧть творѧ̀ григо́рїе премꙋ́дре , ѡ҆ и҆́же ѿ любвѐ вѣ́рою хва́лѧщихъ тѧ̀ сщ҃е́нныи ѻ҆́ч҃е . сла́ва , и҆ ны́нѣ . дрꙋгі́и свѣти́ленъ , пред̾пра́зднествꙋ . Де́нь пред̾пра́зднественныи , цр҃ковь приво́дитъ ны́нѣ , пречⷭ҇тымъ в̾веде́нїемъ бцⷣы мр҃і́и . ю҆́же пою́тъ а҆́нг҃ли , и҆ чл҃цы оу҆бл҃жа́ютъ . дв҃ы же провожда́ютъ свѣщѝ носѧ́ще , и҆ и҆гра́юще , въ цр҃ковь гдⷭ҇ню .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ . Прїиди́те вѣ́рнїи соше́дшесѧ , пѣ́сньми почте́мъ ,꙳ и҆́же ѿ мт҃ре непло́ды ,꙳ пресла́внѡ ро́ждьшꙋсѧ ,꙳ бг҃оневѣ́стнꙋю мт҃рь творца̀ .꙳ и҆ с̾ дв҃ами же и҆ со свѣща́ми пред̾оу҆срѧ́щемъ є҆ѧ̀ ,꙳ в̾ цр҃ковь входѧ́щꙋ во ст҃а́ѧ .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . Ꙗ҆́коже цвѣ́ты многоразли́чны собра́вше ,꙳ ѿ разꙋ́мныхъ цвѣте́цъ ,꙳ дх҃о́вныхъ слове́съ ,꙳ похва́льныѧ вѣнцы̀ ра́достнѡ дв҃ѣ и҆сплете́мъ .꙳ и҆ пред̾пра́зднественыѧ да́ры є҆́й ꙳ ра́достнѡ принесе́мъ .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ въ цр҃ковь цр҃е́вꙋ . Да оу҆гото́вѧтсѧ две́ри хра́ма гдⷭ҇нѧ ,꙳ и҆ да ѿве́рзетсѧ и҆ до́мъ сла́вы .꙳ и҆ є҆ди́нꙋ пребо́льшꙋю нб҃съ ,꙳ па́че оу҆ма̀ бы́вшꙋ ,꙳ да прїе́млютъ ра́дꙋющесѧ .꙳ и҆ хрⷭ҇та̀ сп҃са да воспою́тъ .

сла́ва , и҆ ны́нѣ . гла́съ , то́йже . Да ра́дꙋетсѧ дне́сь нб҃о свы́ше , и҆ ѻ҆́блацы да кропѧ́тъ весе́лїе ѡ҆ пресла́вныхъ вели́чїихъ бг҃а на́шегѡ . се́бо две́рь и҆́же на восто́къ зрѧ́щи , роди́сѧ ѿ непло́дове ѿ ѡ҆бѣща́нїѧ , и҆ бг҃ови приведе́сѧ въ жили́ще . дне́сь в̾ цр҃ковь , ꙗ҆́кѡ непоро́чное приноше́нїе в̾во́дитсѧ . да ра́дꙋетсѧ дв҃дъ брѧца́ѧ в̾ гꙋ́сли . приведꙋ́тсѧ речѐ цр҃ю дв҃ы въ слѣ́дъ є҆ѧ̀ , бли́жнѧѧ є҆ѧ̀ приведꙋ́тсѧ внꙋ́трь хра́ма бж҃їѧ . внꙋ́трь ѡ҆чисти́лища є҆гѡ̀ . воспита́тисѧ в̾ жили́ще , и҆́же пре́жде вѣ́къ ѿ ѻ҆ц҃а нетлѣ́ннѡ рожде́номꙋ , во спасе́нїе дш҃а́мъ на́шимъ .