МЦⷭ҇А ТОГО́ЖЕ ВЪ К҃А ДН҃Ь

введе́нїе въ цр҃ковь прест҃ы́ѧ влⷣчцы на́шеѧ бцⷣы и҆ прⷭ҇нѡ дв҃ы мр҃і́и . =На ма́лѣй вече́рни , на гдⷭ҇и возва́хъ , стⷯры . гла́съ , а҃ . поⷣ . нбⷭ҇нымъ чино́мъ . =Ѿ ́гдⷭ҇а прїи́мше ѡ҆бѣща́нїѧ пло́дъ ,꙳ і҆ѡаки́мъ и҆ а҆́нна бж҃їю мт҃рь ,꙳ бг҃опрїѧ́тнꙋ же́ртвꙋ ,꙳ въ цр҃ковь приведо́ша дне́сь .꙳ и҆ заха́рїѧ вели́кїи первосщ҃е́нникъ ,꙳ бл҃гослови́въ прїѧ́тъ . двⷤа . Ст҃ы́хъ ст҃а́ѧ ,꙳ во ст҃ы́хъ жи́ти досто́йнѡ приведе́сѧ ,꙳ ꙗ҆́кѡ бл҃гопрїѧ́тна же́ртва .꙳ и҆ се́й дв҃ы добродѣ́тельми бл҃гоꙋкраша́емы ,꙳ предѝ свѣщѝ носѧ́ще ,꙳ приведо́ша гдⷭ҇ви ꙗ҆́кѡ сосꙋ́дъ сщ҃е́нныи . Да ѿве́рзетсѧ две́рь ,꙳ бг҃опрїѧ́тнагѡ хра́ма .꙳ цр҃ковь бо всѣ́хъ цр҃ѧ и҆ прⷭ҇то́лъ ,꙳ дне́сь со сла́вою внꙋ́трь прїе́мъ .꙳ і҆ѡаки́мъ возлага́етъ ѡ҆ст҃и́въ гдⷭ҇ви ,꙳ ѿ него́же и҆збра́ннꙋю въ мт҃рь себѣ̀ . сла́ва , и҆ ны́нѣ . гла́съ , и҃ . Дв҃дъ провоз̾глаша́ше тѧ пречⷭ҇таѧ , прови́дѧ сщ҃е́нство вхо́да твоегѡ̀ є҆́же в̾ цр҃ковь . в̾ не́мже концы̀ дне́сь пра́зднꙋюще , славосло́вѧтъ тѧ̀ всепѣ́таѧ . ꙗ҆́же бо пре́жде ржⷭ҇тва̀ дв҃а , и҆ по ржⷭ҇твѣ̀ пребы́вши нетлѣ́нна , мт҃и сло́вꙋ живота̀ . дне́сь в̾ цр҃кви заха́рїѧ весели́тсѧ , воспрїе́мъ тѧ̀ влⷣчце . и҆ ст҃ы́хъ ст҃а́ѧ ра́дꙋетсѧ , под̾є́мши тѧ̀ и҆сто́чника живота̀ на́шегѡ . сегѡ̀ ра́ди и҆ мы̀ пѣ́сненѡ вопїе́мъ тѝ , ѡ҆ на́съ молѝ сн҃а своегѡ̀ и҆ бг҃а , дарова́ти на́мъ ве́лїю млⷭ҇ть .

проки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ . Две́ри цр҃ко́вныѧ ,꙳ прїе́млите дв҃ꙋ ,꙳ затворе́нꙋю две́рь ,꙳ сло́вꙋ соблюда́емꙋ ,꙳ бг҃ꙋ вседержи́телю .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . Дв҃ьственїи ли́цы ,꙳ чи́стꙋю прїе́млите дв҃ꙋ ,꙳ во ст҃а́ѧ ст҃ы́хъ .꙳ нескве́рное ѻ҆би́телище ,꙳ бг҃а вседержи́телѧ .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃ковь цр҃е́вꙋ . Хлѣ́бъ слове́сныи ,꙳ черто́гъ бг҃а сло́ва ,꙳ рꙋко́ю прїе́млетъ ,꙳ носи́мь а҆́нг҃лѡмъ ,꙳ бг҃ови пред̾ѡ҆брꙋча́етсѧ .

сла́ва , и҆ ны́нѣ . гла́съ , то́йже . Свѣ́тъ тѧ̀ трисїѧ́нныи ,꙳ вже́гши бцⷣе ,꙳ в̾ цр҃кви сла́вы .꙳ нбⷭ҇нꙋю тѝ пи́щꙋ ,꙳ посыла́етъ велича́ѧ тѧ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе . та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на и҃ . гла́съ , а҃ . Дне́сь вѣ́рнїи ликоствꙋ́емъ , во ѱалмѣ́хъ и҆ пѣ́снѣхъ гдⷭ҇ви пою́ще , и҆ чтꙋ́ще тогѡ̀ сщ҃е́ннꙋю сѣ́нь , ѡ҆дш҃евле́ныи ковче́гъ , невмѣсти́мое сло́во вмѣсти́вшꙋ . приво́дитбосѧ гдⷭ҇ви , па́че є҆стества̀ мла́денствꙋющи . и҆ ст҃ль вели́кїи заха́рїѧ прїе́млетъ съ весе́лїемъ сїю̀ , ꙗ҆́кѡ бж҃їе жили́ще . два́жды . Дне́сь цр҃кви ѡ҆дш҃евле́наѧ , ст҃ы́ѧ сла́вы хрⷭ҇та̀ бг҃а на́шегѡ . є҆ди́на въ жена́хъ бл҃гослове́наѧ чи́стаѧ , приво́дитсѧ в̾ цр҃ковь зако́ннꙋю жи́ти во ст҃ы́хъ . и҆ ра́дꙋетсѧ съ не́ю і҆ѡаки́мъ и҆ а҆́нна дх҃омъ . и҆ дв҃ьственїи ли́цы гдⷭ҇ви пою́тъ , ѱало́мски воспѣва́юще , и҆ чтꙋ́ще мт҃рь є҆гѡ̀ . Ты̀ проро́кѡмъ проповѣ́данїе , а҆пⷭ҇лѡмъ сла́ва , и҆ мч҃нкѡмъ похвала̀ , и҆ всѣ́мъ земны́мъ ѡ҆бновле́нїе , дв҃о мт҃и бж҃їѧ . тобо́ю бг҃ови примири́хомсѧ . тѣ́мже чте́мъ твоѐ в̾ цр҃ковь гдⷭ҇ню вхожде́нїе . и҆ со а҆́нг҃лѡмъ всѝ пѣ́сненѡ ра́дꙋйсѧ тебѣ̀ пречи́стаѧ вопїе́мъ , и҆́же мл҃твами твои́ми спаса́еми . =и҆́ны , стихѣ́ры . гла́съ , д҃ . подо́бен̾ . ꙗ҆́кѡ до́блѧ . Въ ст҃ы́хъ ст҃а́ѧ ,꙳ ст҃а́ѧ и҆ пренепоро́чнаѧ ,꙳ ст҃ы́мъ дх҃омъ в̾во́дитсѧ .꙳ и҆ ст҃ы́мъ а҆́нг҃лѡмъ пита́етсѧ ,꙳ сꙋ́щи ст҃а́ѧ цр҃кви ,꙳ ст҃а́гѡ бг҃а на́шегѡ .꙳ всѧ́ческаѧ ѡ҆ст҃и́вша вхо́домъ є҆ѧ̀ ,꙳ и҆ ѡ҆божи́вшагѡ є҆стество̀ земны́хъ ,꙳ попо́лзшеесѧ . двⷤа . Ѻ҆трокови́цы ра́дꙋющесѧ ,꙳ и҆ свѣщѝ и҆мꙋ́ще ,꙳ свѣщѝ дне́сь пред̾хо́дѧтъ разꙋ́мнѣй .꙳ и҆ в̾во́дѧтъ сїю̀ ,꙳ во ст҃а́ѧ ст҃ы́хъ сщ҃е́ннѡ .꙳ проѧвлѧ́юще хотѧ́щꙋю зарю̀ ,꙳ неи҆зрече́ннѡ и҆з̾ неѧ̀ восїѧ́ти .꙳ и҆ просвѣти́ти во тмѣ̀ сѣдѧ́щїѧ невѣ́дѣнїѧ дх҃омъ . Веселѧ́сѧ прїимѝ заха́рїе ,꙳ возопѝ а҆́нна всехва́льнаѧ ,꙳ ю҆́же проповѣ́даша бж҃їи пррⷪ҇цы дх҃омъ .꙳ и҆ сїю̀ введѝ во ст҃ꙋ́ю цр҃ковь ,꙳ сщ҃е́ннѡ воспита́тисѧ .꙳ ꙗ҆́кѡ да бꙋ́детъ влⷣцѣ всѣ́хъ ,꙳ бжⷭ҇твеныи прⷭ҇то́лъ ,꙳ и҆ пола́та и҆ ѻ҆́дръ ,꙳ и҆ свѣтоза́рное ѻ҆би́телище .

сла́ва , и҆ ны́нѣ . гла́съ , и҃ . По ржⷭ҇твѣ̀ твое́мъ бг҃оневѣ́сто влⷣчце , прїи́де в̾ цр҃ковь гдⷭ҇ню воспита́тисѧ во ст҃а́ѧ ст҃ы́хъ , ꙗ҆́кѡ ѡ҆сщ҃е́нна . тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй , пи́щꙋ ти приноша́ше . нбⷭ҇наѧ всѧ̀ оу҆диви́шасѧ , зрѧ́ще дх҃а ст҃а́гѡ в̾ тѧ̀ все́льшасѧ . тѣ́мже пречⷭ҇таѧ и҆ нескве́рнаѧ , ꙗ҆́же на́ нб҃сѣхъ и҆ на землѝ сла́вима , мт҃и бж҃їѧ , спасѝ ро́дъ на́шъ . вы́ходъ . проки́менъ , дню̀ .

Ѿ= и҆схо́да , чте́нїе .=

Воз̾глаго́ла гдⷭ҇ь к̾ мѡѷсе́ѡви , гл҃ѧ , в̾ де́нь пе́рвыи мѣ́сеца пе́рвагѡ , соста́виши сѣ́нь свидѣ́нїѧ . и҆ вложи́ши ковче́гъ свидѣ́нїѧ , и҆ покры́еши ковче́гъ за́вѣсою . и҆ внесе́ши трапе́зꙋ , и҆ пред̾ложи́ши пред̾ложе́нїе є҆ѧ̀ . и҆ внесе́ши свѣти́льникъ , и҆ воста́виши свѣти́ла є҆гѡ̀ . и҆ положи́ши кади́льницꙋ златꙋ́ю , кади́ти прѧ́мѡ ковче́гꙋ свидѣ́нїѧ . и҆ положи́ши покро́въ за́вѣсѣ , над̾ две́ри сѣ́ни свидѣ́нїѧ . и҆ во́змеши ма́сло пома́занїѧ , и҆ пома́жеши сѣ́нь , и҆ всѧ̀ ꙗ҆́же в̾ не́й . и҆ ѡ҆ст҃и́ши ю҆̀ , и҆ всѧ̀ сосꙋ́ды є҆ѧ̀ , и҆ бꙋ́детъ ст҃а̀ . и҆ ѡ҆ст҃и́ши же́ртвеникъ , и҆ бꙋ́детъ же́ртвеникъ ст҃а́ѧ ст҃ы́хъ . и҆ сотворѝ мѡѷсе́й всѧ̀ , є҆ли́ка заповѣ́да є҆мꙋ̀ гдⷭ҇ь бг҃ъ , ст҃ы́и і҆и҃левъ . и҆ покры̀ ѻ҆́блакъ сѣ́нь свидѣ́нїѧ , и҆ сла́вы гдⷭ҇ни и҆спо́лнисѧ сѣ́нь . и҆ неможа́ше мѡѷсе́й вни́ти в̾ сѣ́нь свидѣ́нїѧ , ꙗ҆́кѡ ѡ҆сѣнѧ́ше на не́й ѻ҆́блакъ . и҆ сла́вы гдⷭ҇ни и҆спо́лнисѧ сѣ́нь .

Ѿ црⷭ҇твъ тре́тїихъ , чте́нїе .

Бы́сть ꙗ҆́кѡ совершѝ соло́мѡнъ зи́ждѧ до́мъ гдⷭ҇нь , и҆ собра̀ всѧ̀ ста́рцы і҆и҃левы во і҆єросали́мъ , да воздви́гнꙋтъ кїѡ́тъ завѣ́та гдⷭ҇нѧ и҆́з̾ града дв҃дова , и҆ то̀ є҆́сть ѿ сїѡ́на . и҆ взѧ́ша сщ҃е́нницы кїѡ́тъ завѣ́та гдⷭ҇нѧ , и҆ ѻ҆би́телище свидѣ́нїѧ , и҆ всѧ̀ сосꙋ́ды ст҃ы́ѧ , и҆́же бѣ́ша въ жили́щи свидѣ́нїѧ . и҆ цр҃ь и҆ ве́сь і҆и҃ль пред̾ кїѡ́томъ . и҆ внесо́ша сщ҃е́нницы ковче́гъ завѣ́та гдⷭ҇нѧ , в̾ мѣ́сто є҆гѡ̀ во ѻ҆лта́рь в̾ хра́мъ гдⷭ҇нь во ст҃а́ѧ ст҃ы́хъ , под̾ крилѣ̀ херꙋви́мовѣ . ꙗ҆́кѡ херꙋви́ма воздѣ́юще бѧ́хꙋ крилѣ̀ , над̾ мѣ́стомъ ковче́га . и҆ покры́ста херꙋви́ми над̾ кїѡ́томъ и҆ над̾ ст҃а́ѧ є҆гѡ̀ свы́ше . и҆ не бѣ̀ в̾ кїѡ́тѣ ра́звѣ двѣ̀ скрижа́ли завѣ́та , є҆ю́же положѝ мѡѷсе́й в̾ хори́вѣ по за́повѣди гдⷭ҇ни . и҆ бы́сть ꙗ҆́кѡ и҆зыдо́ша сщ҃е́нницы ѿ ст҃и́лища , и҆ ѻ҆́блакъ и҆спо́лни до́мъ гдⷭ҇нь . и҆ невозмого́ша сщ҃е́нницы ста́ти на слꙋ́жбꙋ пред̾ лице́мъ ѻ҆́блака , ꙗ҆́кѡ и҆спо́лнь сла́вы до́мъ бж҃їи вседержи́телѧ .

Ѿ= пррⷪ҇чества і҆єзекі́илева , чте́нїе .=

Бꙋ́детъ ѿ ѻ҆сма́гѡ днѐ и҆ про́чее , сотворѧ́тъ і҆єре́и , на ѻ҆лтарѝ всесожже́нїѧ ва́ша , и҆́же спасе́нїѧ ва́шегѡ , и҆ прїимꙋ̀ вы̀ гл҃етъ гдⷭ҇ь бг҃ъ . и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ , зрѧ́щихъ на восто́къ , и҆ сїѧ̀ бѧ́хꙋ затворе́на . и҆ речѐ гдⷭ҇ь ко мнѣ̀ , врата̀ сїѧ̀ затворе́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквозѣ̀ и҆́хъ , ꙗ҆́кѡ гдⷭ҇ь бг҃ъ і҆и҃левъ вни́детъ и҆́ми , и҆ бꙋ́дꙋтъ затворе́на . занѐ и҆гꙋ́менъ се́й сѧ́детъ в̾ ни́хъ снѣ́сти хлѣ́бъ . по пꙋтѝ є҆ла́мскихъ вра́тъ вни́детъ , и҆ по пꙋтѝ є҆гѡ̀ и҆зы́детъ . и҆ введе́ мѧ на пꙋ́ть вра́тъ ст҃ы́хъ , и҆́же к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнисѧ сла́вы хра́мъ гдⷭ҇нь .

На литі́и , стихѣ́ры . гла́съ , а҃ . Да ра́дꙋетсѧ дне́сь нб҃о свы́ше , и҆ ѻ҆́блацы весе́лїе да кропѧ́тъ . ѡ҆ ѕѣлѡ̀ пресла́вныхъ вели́чїихъ бг҃а на́шегѡ . се́бо две́рь ꙗ҆́же к̾ восто́кѡмъ зрѧ́щи , ро́ждьшисѧ по ѡ҆бѣтова́нїю ѿ непло́дныѧ , и҆ бг҃ꙋ ѡ҆свѧщена̀ бы́вши во ѻ҆би́телище . дне́сь в̾ цр҃ковь ꙗ҆́кѡ непоро́чное приноше́нїе приво́дитсѧ . да ра́дꙋетсѧ дв҃дъ бїѧ̀ в̾ гꙋ́сли , приведꙋ́тсѧ речѐ цр҃ю дв҃ы въ слѣ́дъ є҆ѧ̀ , бли́жнѧѧ є҆ѧ̀ приведꙋ́тсѧ внꙋ́трь сѣ́ни бж҃їи , внꙋ́трь ѡ҆чи́стилища є҆гѡ̀ . воспита́тисѧ во ѻ҆би́телище , и҆́же пре́жде вѣ́къ ѿ ѻ҆ц҃а нетлѣ́ннѡ ро́ждьшꙋсѧ , во спасе́нїе дш҃а́мъ на́шимъ . гла́съ , д҃ . Дне́сь бг҃овмѣсти́маѧ цр҃ковь бцⷣа , въ цр҃ковь бж҃їю приво́дитсѧ , и҆ заха́рїѧ тꙋ̀ под̾є́млетъ . дне́сь ст҃а́ѧ ст҃ы́хъ ра́дꙋетсѧ , и҆ ли́къ а҆́нг҃льскїи та́йнѡ торжествꙋ́етъ . с̾ ни́ми же и҆ мы̀ пра́з̾днꙋюще дне́сь , съ гаврїи́ломъ возопїе́мъ , ра́дꙋисѧ ѡ҆бра́дованнаѧ гдⷭ҇ь с̾ тобо́ю , и҆мѣ́ѧи ве́лїю млⷭ҇ть . Прїиди́те всѝ вѣ́рнїи , є҆ди́нꙋ непоро́чнꙋю похва́лимъ . ю҆́же ѿ проро́къ проповѣ́данꙋ , и҆ в̾ цр҃ковь приве́дшꙋюсѧ . ю҆́же пре́жде вѣ́къ пронарече́нꙋю мт҃рь , и҆ въ послѣ́докъ лѣ́томъ ꙗ҆́вльшꙋсѧ бцⷣꙋ . гдⷭ҇и мл҃твами є҆ѧ̀ , ми́ръ сво́й пода́ждь на́мъ , и҆ ве́лїю млⷭ҇ть .

сла́ва . гла́съ , є҃ . Восїѧ̀ де́нь ра́достенъ , и҆ пра́здникъ всече́стенъ . дне́сь бо ꙗ҆́же пре́жде ржⷭ҇тва̀ , и҆ по ржⷭ҇твѣ̀ дв҃ою пребы́вши , в̾ цр҃ковь гдⷭ҇ню приво́дитсѧ . и҆ ра́дꙋетсѧ заха́рїѧ ста́рецъ , роди́тель прⷣтчевъ , и҆ вопїе́тъ ве́селѡ . прибли́жисѧ пред̾ста́тельница скорбѧ́щимъ , въ цр҃ковь ст҃ꙋ́ю , ꙗ҆́кѡ ст҃а̀ , ѡ҆ст҃и́тисѧ во ѻ҆би́телище всѣ́хъ цр҃ѧ . да весели́тсѧ і҆ѡаки́мъ пра́ѻ҆ц҃ъ , и҆ а҆́нна ра́дꙋетсѧ , ꙗ҆́кѡ принесо́ша бг҃ꙋ , ꙗ҆́кѡ трилѣ́тствꙋющꙋ ю҆́ницꙋ , непоро́чнꙋю влⷣчцꙋ . мт҃ри сра́дꙋйтесѧ , дв҃ы взыгра́йтесѧ , и҆ непло́ды сликоствꙋ́йте , ꙗ҆́кѡ ѿве́рзе на́мъ нбⷭ҇ное црⷭ҇тво пронарече́наѧ всецр҃и́ца . ра́дꙋйтесѧ лю́дїе и҆ весели́тесѧ .= и҆ ны́нѣ . гла́съ , и҃ . Д=в҃дъ провоз̾глаша́ше тѧ пречⷭ҇таѧ , прови́дѧ сщ҃е́нство вхо́да твоегѡ̀ є҆́же в̾ цр҃ковь . в̾ не́мже концы̀ дне́сь пра́зднꙋюще , славосло́вѧтъ тѧ̀ всепѣ́таѧ . ꙗ҆́же бо пре́жде ржⷭ҇тва̀ дв҃а , и҆ по ржⷭ҇твѣ̀ пребы́вши нетлѣ́нна , мт҃и сло́вꙋ живота̀ . дне́сь в̾ цр҃кви заха́рїѧ весели́тсѧ , воспрїе́мъ тѧ̀ влⷣчце . и҆ ст҃ы́хъ ст҃а́ѧ ра́дꙋетсѧ , под̾є́мши тѧ̀ и҆сто́чника живота̀ на́шегѡ . сегѡ̀ ра́ди и҆ мы̀ пѣ́сненѡ вопїе́мъ тѝ , ѡ҆ на́съ молѝ сн҃а своегѡ̀ и҆ бг҃а , дарова́ти на́мъ ве́лїю млⷭ҇ть .

На стихо́внѣ , стихѣ́ры . гла́съ , є҃ . Ра́дꙋетсѧ нб҃о и҆ землѧ̀ . нб҃о разꙋ́мное грѧдꙋ́щее зрѧ́ще , въ бжⷭ҇твеныи до́мъ воспита́тисѧ че́стнѡ , дв҃ꙋю є҆ди́нꙋ и҆ непоро́чнꙋю . к̾ не́йже дивѧ́сѧ заха́рїѧ вопїѧ́ше , две́ри гдⷭ҇нѧ , цр҃ко́вныѧ ѿве́рзи две́ри , ра́дꙋйсѧ в̾ не́й и҆ ликоствꙋ́й . разꙋмѣ́хъ бо и҆ вѣ́ровахъ , ꙗ҆́кѡ оу҆́же и҆збавле́нїе прїи́де ꙗ҆́вственѡ і҆и҃лю . и҆ роди́тсѧ и҆з̾ тебѐ бг҃ъ сло́во , да́рꙋѧи ми́рови ве́лїю млⷭ҇ть .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . А҆́нна бжⷭ҇твенаѧ бл҃года́ть ꙗ҆́вѣ , дарова́нїе чи́стꙋю при́снѡ дв҃ꙋю приво́дитъ съ весе́лїемъ , в̾ цр҃ковь бж҃їю . призва́вши пред̾хо́дѧтъ є҆́й ѻ҆трокови́цы , свѣщѝ носѧ́ще , и҆ гл҃юще , пойдѝ ча́до , сп҃сꙋ да бꙋ́деши приноше́нїе , и҆ бл҃гово́нное сокро́вище . вни́ди в̾ незаходи́маѧ , и҆ оу҆вѣ́ждь та́йны . и҆ оу҆гото́висѧ бы́ти і҆с҃ово вмѣсти́лище ве́село и҆ кра́сное , подаю́ща ми́рови ве́лїю млⷭ҇ть .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃ковь цр҃е́вꙋ . Внꙋ́трь въ цр҃ковь бж҃їю , бг҃овмѣсти́мыи хра́мъ воз̾лага́етсѧ дв҃аѧ прест҃а́ѧ . и҆ ѻ҆трокови́цы є҆́й свѣщѝ носѧ́ще пред̾хо́дѧтъ . и҆гра́етъ роди́телей сопрѧже́нїе и҆збра́нное , і҆ѡаки́мъ же и҆ а҆́нна ликоствꙋ́юще , ꙗ҆́кѡ роди́ста творца̀ ро́ждьшꙋю . ꙗ҆́же ликоствꙋ́ющи в̾ бжⷭ҇твеныхъ селе́нїихъ , и҆ пита́ема рꙋко́ю а҆́нг҃лѡвою всенепоро́чнаѧ , хрⷭ҇тꙋ̀ ꙗ҆́вльшисѧ мт҃и . да́рꙋющемꙋ ми́рови ве́лїю млⷭ҇ть . сла́ва , и҆ нн҃ѣ . гла́съ , ѕ҃ . Дне́сь собо́ри вѣ́рныхъ соше́дшесѧ , дх҃о́внѣ торжествꙋ́емъ , и҆ бг҃оѻ҆трокови́цꙋ дв҃ꙋ и҆ бцⷣꙋ , въ цр҃ковь гдⷭ҇ню приводи́мꙋ , бл҃гоче́стнѡ восхва́лимъ . прои҆збра́ннꙋю ѿ всѣ́хъ ро́дъ , во ѻ҆би́телище всѣ́хъ цр҃ѧ хрⷭ҇та̀ и҆ бг҃а . дв҃ы свѣщѝ носѧ́ще пред̾и҆ди́те , при́снѡ дв҃ыѧ чтꙋ́ще честно́е прои҆схожде́нїе . мт҃ри печа́ль всю̀ ѿло́жше , ра́достнѡ спослѣ́дствꙋйте , мт҃ри бж҃їи быва́ющей . и҆ ра́дости ми́рꙋ хода́тайцѣ , всѝ оу҆́бѡ ра́достнѣ , є҆́же ра́дꙋйсѧ со а҆́нг҃лѡмъ возопїе́мъ ѡ҆бра́дованнѣй , при́снѡ молѧ́щейсѧ ѡ҆ дш҃а́хъ на́шихъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе . три́жды .

На оу҆́трени , на бг҃ъ гдⷭ҇ь , тропа́рь , пра́здникꙋ , три́жды . По а҃ , стихоло́гїи , сѣда́ленъ . гла́съ , а҃ . Пра́ведныхъ пло́дъ і҆ѡаки́ма и҆ а҆́нны , прино́ситсѧ бг҃ови в̾ цр҃ковь ст҃ꙋ́ю , пло́тїю младе́нствꙋющи пита́тельница жи́зни на́шеѧ . ю҆́же бл҃гословѝ сщ҃е́нныи заха́рїѧ . сїю̀ всѝ ꙗ҆́кѡ мт҃рь бж҃їю вѣ́рнѡ да оу҆блажи́мъ . сла́ва , и҆ ны́нѣ , то́йже .

По в҃ , стихоло́гїи , сѣда́ленъ . гла́съ , д҃ . Пре́жде зача́тїѧ чⷭ҇таѧ ѡ҆ст҃и́сѧ бг҃ови , и҆ ро́ждьшисѧ на землѝ , да́ръ принесе́сѧ є҆мꙋ̀ , и҆сполнѧ́ющи ѻ҆те́ческое ѡ҆бѣща́нїе . въ бжⷭ҇твенѣмъ же хра́мѣ , ꙗ҆́кѡ вои́стинꙋ бжⷭ҇твенаѧ цр҃кви , ѿ младе́нства со свѣща́ми свѣ́тлыми вдана̀ бы́вши . ꙗ҆ви́сѧ прїѧ́телище неприкоснове́номꙋ , и҆ бжⷭ҇твеномꙋ свѣ́тꙋ . вели́ко вои́стинꙋ происхожде́нїе твоѐ є҆ди́на бг҃оневѣ́стнаѧ . сла́ва , и҆ ны́нѣ , то́йже .

По полїєлеѡ́сѣ , сѣда́лен̾ . гла́съ , и҃ . Да ра́дꙋетсѧ дв҃дъ пѣснопи́сецъ , и҆ да ликоствꙋ́етъ і҆ѡаки́мъ со а҆́нною , ꙗ҆́кѡ пло́дъ ст҃ы́и ѿ ни́хъ произы́де , мр҃і́ѧ свѣтоно́снаѧ и҆ бжⷭ҇твенаѧ свѣща̀ . и҆ ра́дꙋетсѧ входѧ́щи въ цр҃ковь . ю҆́же поѧ̀ блгⷭ҇вѝ варахїи́нъ сн҃ъ , и҆ ра́дꙋѧсѧ взыва́ше , ра́дꙋйсѧ чꙋ́до всеми́рное .= сла́ва , и҆ ны́нѣ , то́йже .=

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . слы́ши дщѝ и҆ ви́ждь , и҆ приклонѝ оу҆́хо твоѐ . сти́хъ . ѿры́гнꙋ срⷣце моѐ сло́во бл҃го .= в=сѧ́ко дыха́нїе .

є҆ѵⷢ҇а́лїе , ѿ лꙋкѝ . зача́ло , д҃ . ѱало́мъ , н҃ .

сла́ва . моли́твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . моли́твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Дне́сь собо́ри вѣ́рныхъ соше́дшесѧ , дх҃о́внѣ торжествꙋ́емъ , и҆ бг҃оѻ҆трокови́цꙋ дв҃ꙋ и҆ бцⷣꙋ , въ цр҃ковь гдⷭ҇ню приводи́мꙋ , бл҃гоче́стнѡ восхва́лимъ . прои҆збра́ннꙋю ѿ всѣ́хъ ро́дъ , во ѻ҆би́телище всѣ́хъ цр҃ѧ хрⷭ҇та̀ и҆ бг҃а . дв҃ы свѣщѝ носѧ́ще пред̾и҆ди́те , при́снѡ дв҃ыѧ чтꙋ́ще честно́е прои҆схожде́нїе . мт҃ри печа́ль всю̀ ѿло́жше , ра́достнѡ спослѣ́дствꙋйте , мт҃ри бж҃їи быва́ющей . и҆ ра́дости ми́рꙋ хода́тайцѣ , всѝ оу҆́бѡ ра́достнѣ , є҆́же ра́дꙋйсѧ со а҆́нг҃лѡмъ возопїе́мъ ѡ҆бра́дованнѣй , при́снѡ молѧ́щейсѧ ѡ҆ дш҃а́хъ на́шихъ .

Кано́на , два̀ , д҃ гѡ , и҆ перва́гѡ гла́са . тропарѝ , ѡ҆бою̀ кано́новъ , на в҃і . і҆рмо́съ , ѡ҆бою̀ кано́новъ по двⷤа . =Кано́нъ , творе́нїе , геѡ́ргїево . и҆мы́й краегране́сїе сѐ : ты̀ бл҃года́ть влⷣчце сло́вꙋ да́ждь . гла́съ , д҃ . пѣ́снь , а҃ . і҆рмо́съ . Ѿ=ве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́въ : Прест҃а́ѧ гжⷭ҇е бцⷣе , спасѝ на́съ . Премꙋ́дрости пречⷭ҇таѧ , тѧ̀ сокро́вище вѣ́дꙋщи , и҆ бл҃года́ть точа́щꙋ стрꙋю̀ при́снѡ текꙋ́щꙋю , разꙋ́мныѧ прошꙋ́ ти ка́пли . ѡ҆дождѝ влⷣчце воспѣва́ти тѧ прⷭ҇нѡ . Превы́шши пречⷭ҇таѧ нб҃съ бы́вши , цр҃ковь и҆ пола́та , въ хра́мъ бж҃їи возложи́сѧ . томꙋ̀ оу҆гото́ватисѧ в̾ стра́нное жили́ще прише́ствїѧ є҆гѡ̀ . Свѣ́тъ восїѧ́вши бцⷣа бл҃года́ти , всѧ̀ просвѣща́ющїи . совокꙋпѝ пресвѣ́тлое є҆ѧ̀ оу҆краси́ти торжество̀ пѣ́сньми , к̾ не́й стеце́мсѧ . Две́рь сла́внаѧ , по́мыслы непроходи́ма , две́ри ѿве́рзши хра́ма бж҃їѧ , ны́нѣ повелѣва́етъ на́мъ вше́дшимъ , бжⷭ҇твеныхъ є҆ѧ̀ чꙋде́съ наслади́тисѧ .

и҆́нъ , кано́нъ . творе́нїе , васи́лїево . гла́съ , а҃ . пѣ́снь , а҃ . і҆рмо́съ . Пѣ́снь побѣ́днꙋю воспое́мъ всѝ бг҃ꙋ , сотво́ршемꙋ ди́внаѧ чꙋдеса̀ мы́шцею высо́кою , и҆ спа́сшꙋ і҆и҃лѧ , ꙗ҆́кѡ просла́висѧ .

запѣ́въ : Прест҃а́ѧ гжⷭ҇е бцⷣе , спасѝ на́съ . Стеце́мсѧ дне́сь бцⷣꙋ чтꙋ́ще пѣ́сньми , и҆ торжествꙋ́емъ дх҃о́вныи пра́здникъ . въ цр҃ковь бо бж҃їю да́ръ прино́ситсѧ . Пѣ́сньми воспое́мъ бцⷣы сла́вное происхожде́нїе . цр҃кви бо дне́сь , ꙗ҆́кѡ хра́мъ бж҃їи прино́ситсѧ проро́чески , да́ръ многоцѣ́нныи . А҆́нна непоро́чнаѧ ра́довашесѧ , ꙗ҆́кѡ да́ръ многоцѣ́нныи бг҃ови приносѧ́щи въ цр҃ковь мт҃рьски . і҆ѡаки́мъ же с̾ не́ю торжествꙋ́етъ свѣ́тлѡ . Дв҃дъ пра́ѻ҆ц҃ъ тво́й воспѣ́тъ тѧ̀ дре́вле дв҃о бг҃оневѣ́стнаѧ . дще́рь гл҃ѧ тебѐ цр҃ѧ хрⷭ҇та̀ , є҆го́же родѝ мт҃рьски мла́до дои́ла є҆сѝ . Пло́тїю трилѣ́тствꙋющи бцⷣа , гдⷭ҇ви прино́ситсѧ . заха́рїѧ же сїю̀ сщ҃е́нникъ бж҃їи прїе́мъ , ра́дꙋѧсѧ въ цр҃ковь возложѝ . Дв҃ы ликоствꙋ́йте свѣщено́сицы , начина́юще дне́сь . и҆ мт҃ри воспо́йте цр҃и́цѣ мт҃ри , приходѧ́щей въ цр҃ковь цр҃ѧ хрⷭ҇та̀ . сла́ва , трⷪ҇ченъ . Трⷪ҇це є҆диносꙋ́щнаѧ , ѻ҆́ч҃е и҆ сло́ве и҆ дш҃е ст҃ы́и , тѧ̀ вѣ́рнѡ сла́вимъ ꙗ҆́кѡ творца̀ всѣ́хъ . и҆ тебѣ̀ вопїе́мъ бл҃гоче́стнѡ , спасѝ на́съ бж҃е . и҆ ны́нѣ . Багро́мъ крове́й твои́хъ червлени́цею пречⷭ҇таѧ ѡ҆дѣ́ѧвсѧ , проше́дъ ѡ҆бновѝ цр҃ь и҆ бг҃ъ , ро́дъ всѣ́хъ землены́хъ бл҃гоꙋтро́бїемъ свои́мъ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Твоѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ совокꙋ́пльши дх҃о́венъ оу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы сподо́би . Невѣстокраси́тель дне́сь ꙗ҆ви́сѧ , кра́сныи дв҃ыѧ хра́мъ и҆ черто́гъ , прїе́млетъ ѡ҆дш҃евле́ныи черто́гъ бж҃їи , чⷭ҇тꙋю , и҆ непоро́чнꙋю , и҆ свѣтлѣ́йшꙋю всеѧ̀ тва́ри . Дв҃дъ пред̾начина́етъ ликова́нїе , и҆гра́етъ и҆ ликоствꙋ́етъ с̾ на́ми , и҆ цр҃цꙋ зове́тъ тѧ оу҆кра́шенꙋ пречⷭ҇таѧ . пред̾стоѧ́щꙋ че́стнѡ въ цр҃кви цр҃ѧ и҆ бг҃а . И҆з̾ неѧ́ же престꙋпле́нїе произы́де дре́вле ро́дꙋ чл҃ческомꙋ , и҆з̾ тоѧ̀ и҆справле́нїе и҆ нетлѣ́нїе грѧде́тъ . бцⷣа дне́сь приводи́ма въ до́мъ бж҃їи . И҆гра́ютъ а҆́нг҃льскаѧ во́инства , и҆ всѣ́хъ чл҃къ мно́жество . и҆ пред̾ лице́мъ пречⷭ҇таѧ пред̾текꙋ́тъ ти дне́сь , свѣщѝ носѧ́ще зовꙋ́тъ вели́чествїѧ твоѧ̀ в̾ домꙋ̀ бж҃їи .

и҆́нъ , і҆рмо́съ . Да оу҆тверди́тсѧ срⷣце моѐ в̾ во́ли твое́й хрⷭ҇тѐ бж҃е , и҆́же над̾ вода́ми нб҃о оу҆тверже́и второ́е , и҆ ѡ҆снова́выи на вода́хъ зе́млю всемогі́и . Торжествꙋ́емъ празднолю́бцы , и҆ сра́дꙋемсѧ дх҃омъ , во ст҃ы́и пра́здникъ собира́ющесѧ дне́сь , дще́ре цр҃е́вы и҆ мт҃ри бг҃а на́шегѡ . І҆ѡаки́ме ра́дꙋйсѧ дне́сь , и҆ весели́сѧ а҆́нно дх҃омъ , рожде́ннꙋю ва́ми гдⷭ҇ви приводѧ́ще , трилѣ́тствꙋющꙋ ꙗ҆́кѡ ю҆́ницꙋ чи́стꙋ всенепоро́чнꙋю . Бж҃їе селе́нїе въ цр҃ковь ст҃ꙋ́ю приво́дитсѧ бцⷣа марїа́мъ , пло́тїю трилѣ́тствꙋющи . и҆ то́й свѣща́ми свѣ́тѧтъ дв҃ы пред̾текꙋ́ще . Бж҃їѧ а҆́гница небла́зненаѧ , и҆ голꙋ́бица нескве́рнаѧ , бг҃овмѣсти́маѧ сѣ́нь , сла́вы сщ҃е́нїе , во ѻ҆би́тели ст҃ѣ́й жи́ти и҆збра̀ . Трилѣ́тствꙋющи пло́тїю , и҆ многолѣ́тствꙋющи дх҃омъ , ши́ршаѧ нб҃съ , и҆ вы́шнихъ си́лъ превы́шши , да восхва́литсѧ пѣ́сньми бг҃оневѣ́стнаѧ . Бцⷣы пра́зднꙋюще , въ незаходи́мыхъ прои҆схожде́нїе , свѣщѝ носѧ́ще , разꙋ́мнѡ съ весе́лїемъ дне́сь , и҆ мы̀ с̾ дв҃ами к̾ цр҃кви прибли́жимсѧ . Сщ҃е́нницы бж҃їи ѡ҆блецы́тесѧ въ пра́вдꙋ бл҃года́тїю . и҆ срѧ́щите свѣ́тлѡ , въ хо́ды даю́ще дще́ри цр҃вѣ и҆ бг҃а во ст҃а́ѧ . сла́ва , трⷪ҇ченъ . Свѣ́тъ ѻ҆ц҃ъ , свѣ́тъ сн҃ъ є҆гѡ̀ , и҆ дх҃ъ свѣ́тъ оу҆тѣ́шительныи . ꙗ҆́кѡ ѿ сл҃нца бо є҆ди́но трⷪ҇ца сїѧ́ющи , бжⷭ҇твенѡ ѡ҆зарѧ́етъ , и҆ соблюда́етъ дш҃а на́ша . и҆ ны́нѣ . Тѧ̀ проро́цы проповѣ́даша ковче́гъ чⷭ҇таѧ сщ҃е́нныи . кади́льницꙋ златꙋ́ю , и҆ свѣ́щникъ и҆ трапе́зꙋ . и҆ мы̀ ꙗ҆́кѡ бг҃овмѣсти́мꙋю сѣ́нь воспѣва́емъ тѧ .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

сѣда́ленъ . гла́съ , д҃ . Непоро́чнаѧ а҆́гница и҆ нескве́рныи черто́гъ , в̾ до́мъ бж҃їи бцⷣа мр҃їа́мъ с̾ весе́лїемъ вво́дитсѧ пресла́внѡ . ю҆́же а҆́нг҃ли бж҃їи дароносѧ́ще вѣ́рнѡ , и҆ всѝ вѣ́рнїи оу҆бл҃жа́ютъ прⷭ҇нѡ . и҆ бл҃года́рственѡ пою́тъ є҆́й непреста́нно велегла́снѡ , на́ша сла́ва и҆ спасе́нїе ты̀ є҆сѝ пренепоро́чнаѧ . сла́ва , и҆ ны́нѣ , то́йже .

пѣ́снь , д҃ . і҆рмо́съ . Неи҆зслѣ́дномꙋ бж҃їю совѣ́тꙋ , є҆́же ѿ дв҃ы воплоще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вопїѧ́ше , сла́ва си́лѣ твое́й гдⷭ҇и . Две́рь непроходи́мꙋю бж҃їи до́мъ прїе́млѧ дне́сь , оу҆ста́ви всѐ слꙋже́нїе зако́нное . ꙗ҆́кѡ вои́стинꙋ ꙗ҆ви́сѧ зовы́и сꙋ́щимъ и҆́же на землѝ и҆́стина . Гора̀ ѡ҆сѣнѧ́емаѧ , ю҆́же прови́дѣвъ дре́вле а҆вва́кꙋмъ , проповѣ́да внꙋ́трь вмѣсти́вшꙋсѧ въ незаходи́мыхъ хра́ма , добродѣ́тели процвѣ́тши , и҆ покрыва́етъ концы̀ . Ви́дѣвши пресла́внаѧ всѧ̀ землѧ̀ стра́нныѧ же и҆ ди́вныѧ ве́щи , ка́кѡ дв҃аѧ ѿ а҆́нг҃ла пи́щꙋ прїе́млющи , и҆ ѻ҆́бразы смотре́нїѧ прїе́млетъ . Цр҃квь и҆ пола́та и҆ нб҃о ѡ҆дш҃евле́ное ꙗ҆́вльшисѧ бг҃оневѣ́стнаѧ цр҃е́ва , въ цр҃ковь зако́ннꙋю приводи́ма дне́сь , томꙋ̀ соблюда́ема пречⷭ҇таѧ .

и҆́нъ , і҆рмо́съ . Дх҃омъ пред̾зрѧ̀ пррⷪ҇къ а҆вва́кꙋмъ , словесѐ воплоще́нїе проповѣ́даше глаго́лѧ , внегда̀ прибли́жатсѧ лѣ́та позна́нъ бꙋ́деши . внегда̀ прїи́детъ вре́мѧ ꙗ҆ви́шисѧ , сла́ва си́лѣ твое́й гдⷭ҇и . Проро́че і҆са́їе прорцы̀ на́мъ , дв҃аѧ кто̀ є҆́сть и҆мꙋ́щаѧ во́ чревѣ ; ѿ і҆ꙋ́дина ко́рене прозѧ́бши , и҆ ро́ждьшисѧ ѿ дв҃да цр҃ѧ , сѣ́мене ст҃а́гѡ пло́дъ бл҃госла́вныи . Начина́йте дв҃ы , и҆ воспо́йте пѣ́сни , рꙋка́ма держа́ще свѣщѝ , честно́е бцⷣы происхожде́нїе хва́лѧще . и҆ ны́нѣ грѧдꙋ́ще в̾ хра́мъ бж҃їи , кꙋ́пнѡ съ на́ми пра́зднꙋйте . І҆ѡаки́ме и҆ а҆́нно весели́тесѧ нн҃ѣ , въ цр҃ковь приводѧ́ще гдⷭ҇ню , чⷭ҇тꙋю бж҃їю мт҃рь хрⷭ҇та̀ всѣ́хъ цр҃ѧ быва́емꙋ , ю҆́же ѿ ва́ю ро́ждьшꙋюсѧ , ꙗ҆́кѡ трилѣ́тнꙋю ю҆́ницꙋ . Ст҃а́ѧ ст҃ы́хъ сꙋ́щи чⷭ҇таѧ , въ хра́мъ ст҃ы́и возлюби́ла є҆сѝ всели́тисѧ , и҆ со а҆́нг҃лы дв҃о собесѣ́дованїе ча́ющи пресла́вное , съ нб҃сѐ хлѣ́бъ прїе́млющи пита́тельнице живота̀ . Ро́ждьшꙋюсѧ па́че наде́жи пречⷭ҇тꙋю дв҃ꙋ , бл҃гоче́стнѡ ѡ҆бѣща́хꙋсѧ бг҃ови принестѝ . и҆ и҆сполнѧ́ютъ даю́ще ꙗ҆́кѡ же́ртвꙋ рожде́ннꙋю ѿ нею̀ , і҆ѡаки́мъ дне́сь и҆ а҆́нна в̾ до́мъ бж҃їи . Прозѧбѐ же́злъ дре́вле а҆арѡ́новъ , проѡ҆бразꙋ́ѧ чи́стаѧ бжⷭ҇твеное ржⷭ҇тво̀ , ꙗ҆́кѡ без̾ сѣ́мене за́чнеши , и҆ не разтлѣ́еши . и҆ по ржⷭ҇твѣ̀ дв҃ьствꙋющи ꙗ҆ви́шисѧ , мла́да доѧ́щи всѣ́хъ бг҃а . Дв҃ы дв҃ꙋ , и҆ мт҃ри мт҃рь . бл҃гоче́стнѡ стецы́тесѧ почестѝ с̾ на́ми рожде́ннꙋю , ꙗ҆́кѡ непоро́чное ѻ҆вча̀ . и҆ ро́ждьшꙋю ꙗ҆́кѡ бг҃а пло́дствꙋющꙋ , всѝ свѣ́тлѡ пра́зднꙋемъ . сла́ва , трⷪ҇ченъ . Трⷪ҇цꙋ ли́цы є҆ди́ницꙋ ѻ҆́бразомъ бл҃гоче́стнѡ сла́вимъ бг҃а и҆́стинна . є҆го́же пою́тъ а҆́нг҃льскаѧ и҆ а҆рха́нг҃льскаѧ чинонача́лїѧ , ꙗ҆́кѡ є҆стество́мъ влⷣкꙋ , и҆ чл҃цы вѣ́рнѡ покланѧ́емсѧ при́снѡ . и҆ ны́нѣ . Молѝ непреста́ннѡ прест҃а́ѧ чи́стаѧ , є҆го́же пло́тїю родила̀ є҆сѝ сн҃а своегѡ̀ и҆ бг҃а , ѿ многоѡ҆бра́зныхъ сѣ́тей дїа́волихъ , и҆ ѿ всѣ́хъ и҆скꙋше́нїи грѧдꙋ́щихъ , всѣ́хъ и҆зба́вити ра́бъ свои́хъ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща . Ѡ҆сщ҃е́нїе сла́вное , и҆ сщ҃е́нное приноше́нїе дне́сь пречⷭ҇таѧ дв҃о возложи́сѧ въ цр҃ковь бж҃їю , всѣ́хъ цр҃е́ви и҆ бг҃ꙋ на́шемꙋ . є҆ди́номꙋ в̾ жили́ще соблюда́ема , ꙗ҆́коже вѣ́сть са́мъ . Добро́тꙋ пречⷭ҇таѧ дш҃и твоеѧ̀ зрѧ̀ нѣ́когда , вѣ́рою заха́рїѧ возопѝ , ты̀ є҆сѝ и҆збавле́нїе . ты̀ є҆сѝ всѣ́хъ ра́дость . ты̀ є҆сѝ воз̾дви́женїе на́ше . є҆ю́же невмѣсти́мыи вмѣща́емь ꙗ҆влѧ́етсѧ . ѽ вы́ше оу҆ма̀ чꙋде́съ твои́хъ пречⷭ҇таѧ , стра́нное твоѐ ржⷭ҇тво̀ сꙋ́ще . стра́ненъ ѻ҆́бразъ и҆́же возвраще́нїѧ твоегѡ̀ . стра́нна и҆ пресла́вна твоѧ̀ бг҃оневѣ́сто всѧ̀ , и҆ человѣ́кѡмъ несказа́нна . Свѣ́щникъ многосвѣ́тлыи сꙋ́щи бг҃оневѣ́стнаѧ , дне́сь восїѧ́вши в̾ домꙋ̀ гдⷭ҇ни . и҆ ѡ҆зарѧ́еши на́съ честны́ми дарова́нїи чⷭ҇таѧ , тебѐ ѡ҆дари́вшаго бцⷣе препѣ́таѧ .

и҆́нъ , і҆рмо́съ . Свѣ́тлыи на́мъ воз̾сїѧ́й , свѣ́тъ присносꙋ́щныи , оу҆́тренюющимъ ѡ҆ сꙋдьба́хъ заповѣде́й твои́хъ , влⷣко чл҃колю́бче хрⷭ҇тѐ бж҃е на́шъ . Свѣ́тлѡ свѣщѝ носѧ́ще правосла́внїи , всѝ стека́ющесѧ и҆ сла́вѧще бг҃омт҃рь , ꙗ҆́кѡ гдⷭ҇ви дне́сь приво́дитсѧ , ꙗ҆́кѡ же́ртва бл҃гопрїѧ́тна . Да веселѧ́тсѧ пра́ѻ҆ц҃ы дне́сь влⷣчце . и҆ да ра́дꙋетсѧ ро́ждьшаѧ со ѻ҆ц҃е́мъ твои́мъ , ꙗ҆́кѡ пло́дъ и҆́хъ гдⷭ҇ви прино́ситсѧ . Многоимени́тꙋю и҆ сла́внѣйшꙋ непоро́чнꙋю ю҆́ницꙋ , ꙗ҆́кѡ пло́тїю ро́ждьшꙋю бжⷭ҇твенагѡ тельца̀ , всѝ воспое́мъ вѣ́рнѡ пра́зднꙋюще . И҆́же невѣ́стнаѧ подписꙋ́ютсѧ бжⷭ҇твенаѧ зна́менїѧ , па́че оу҆ма̀ ржⷭ҇тва̀ твоегѡ̀ чⷭ҇таѧ дв҃о , дне́сь дх҃омъ ст҃ы́мъ в̾ домꙋ̀ бж҃їи . Да ѿве́рзꙋтсѧ предъдве́рїѧ сла́вы бг҃а на́шегѡ , да прїе́млютъ неи҆скꙋ́снꙋю и҆́гꙋ хрⷭ҇то́вꙋ мт҃рь , ꙗ҆́коже трилѣ́тствꙋющꙋ , многоцѣ́ннꙋю ю҆́ницꙋ . сла́ва , трⷪ҇ченъ . Пребезнача́льное и҆ присносꙋ́щное є҆ди́но бжⷭ҇тво̀ славосло́вѧще поклони́мсѧ , тремѝ ли́цы є҆стество̀ нераздѣ́льное , и҆ сла́вою є҆диноче́стно . и҆ ны́нѣ . Приста́нище ти́хое , неѡ҆бори́мꙋю стѧжа́хомъ моли́твꙋ твою̀ въ напа́стехъ бг҃ороди́тельнице , всегда̀ и҆збавлѧ́еми бѣ́дъ и҆ скорбе́й .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Бжⷭ҇твеное сѐ и҆ всечⷭ҇тно́е соверша́юще пра́зднество , бг҃омꙋ́дрїи бж҃їѧ мт҃ре , прїиди́те рꙋка́ми воспле́щемъ , ѿ неѧ̀ ро́ждьшагосѧ вѣ́рою сла́вѧще . Всѧ́ческаѧ носѧ́и глаго́ломъ , моли́твы пра́ведныхъ оу҆слы́ша . тѣ́мже непло́днѣй разрѣшѝ болѣ́знь ꙗ҆́кѡ бл҃гоꙋтро́бенъ , ра́дости вино́внꙋю си́мъ да́рꙋетъ . Сказа́ти хотѧ̀ гдⷭ҇ь ꙗ҆зы́кѡмъ є҆гѡ̀ спасе́нїе , неи҆скꙋсобра́чнꙋю нн҃ѣ ѿ человѣ́къ взѧ́тъ , примире́нїѧ зна́менїѧ и҆ ѡ҆бновле́нїѧ . Ꙗ҆́кѡ до́мъ сꙋ́щи бл҃года́ти , в̾ не́мъ же сокро́вища лежа́тъ неи҆зрече́ннагѡ бж҃їѧ смотре́нїѧ , пречⷭ҇таѧ въ цр҃кви причасти́сѧ , нетлѣ́нныѧ пи́щи . Оу҆вѧзе́нїе тѧ црⷭ҇кое , прїе́мши цр҃кви бг҃оневѣ́стнаѧ . и҆ просвѣща́шесѧ , и҆ постꙋпа́ше бо́льшими , пред̾рече́нныхъ зрѧ̀ на тебѣ̀ сбытїѐ .

и҆́нъ , і҆рмо́съ . Проро́кꙋ і҆ѡ́нѣ подо́бѧсѧ вопїю̀ , живо́тъ мо́й бла́же , свободѝ и҆з̾ тлѝ , и҆ спаси́ мѧ сп҃се ми́ра зовꙋ́ща сла́ва тебѣ̀ . Пра́зднꙋемъ вѣ́рнїи пра́здникъ дх҃о́вныи , мт҃ре бж҃їѧ пою́ще бл҃гоче́стнѡ . є҆́сть бо ст҃ѣ́йши беспло́тныхъ оу҆мо́въ . Пѣ́сньми дх҃о́вными , восхва́лимъ вѣ́рнїи мт҃рь свѣ́та , ꙗ҆́кѡ дне́сь на́мъ ꙗ҆ви́сѧ пред̾ходѧ́щи въ цр҃ковь бж҃їю . Нескве́рнаѧ а҆́гница , чи́стаѧ голꙋ́бица , приведе́сѧ жи́ти в̾ до́мъ бж҃їи . вхо́дитъ наслади́тисѧ бжⷭ҇твеныѧ бл҃года́ти . Въ цр҃ковь зако́ннꙋю вхо́ды соверша́етъ цр҃кви бж҃їѧ , нбⷭ҇наѧ сѣ́нь . и҆з̾ неѧ́ же на́мъ сꙋ́щимъ во тмѣ̀ свѣ́тъ восїѧ̀ . Младе́нствꙋющи пло́тїю , и҆ соверше́на дш҃е́ю , ст҃ы́и кїѡ́тъ в̾ до́мъ бж҃їи вхо́дитъ , воспита́тисѧ бжⷭ҇твеною бл҃года́тїю . Ѿ всѣ́хъ и҆скꙋше́нїи , и҆ бѣ́дъ дш҃е́вныхъ свободѝ на́съ , притека́ющихъ к̾ тебѣ̀ всепѣ́таѧ , твои́ми мольба́ми мт҃и хрⷭ҇та̀ бг҃а . сла́ва , трⷪ҇ченъ . Ѻ҆ц҃ъ и҆ сн҃ъ и҆ дх҃ъ пра́выи , трисоста́внаѧ є҆ди́нице , и҆ нераздѣли́маѧ трⷪ҇це , поми́лꙋй поклонѧ́ющихсѧ , бжⷭ҇твенѣй держа́вѣ твое́й . и҆ ны́нѣ . Во́ чревѣ твое́мъ вмѣще́нъ , невмѣсти́мыи всѧ́ческими , бг҃омт҃и бы́въ . и҆з̾ тебѐ произы́де пречⷭ҇таѧ , сꙋгꙋ́бъ є҆стество́мъ бг҃ъ и҆ человѣ́къ .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ . гла́съ , д҃ . Пречи́стаѧ цр҃кви сп҃сова , многочестны́и черто́гъ дв҃ца , сщ҃е́нное сокро́вище сла́вы бж҃їѧ , дне́сь вво́дитсѧ въ до́мъ гдⷭ҇нь , бл҃года́ть совводѧ́щи дх҃омъ бжⷭ҇твенымъ . ю҆́же пою́тъ а҆́нг҃ли бж҃їи , та̀ є҆́сть сѣ́нь нбⷭ҇наѧ . и҆́косъ . Неи҆зрече́нныхъ бж҃їихъ , и҆ бжⷭ҇твеныхъ та́инъ , зрѧ̀ въ дв҃ѣй бл҃года́ть ꙗ҆влѧ́емꙋю , и҆сполнѧ́емꙋ ꙗ҆́вственѡ , ра́дꙋюсѧ . и҆ ѻ҆́бразъ разꙋмѣ́ти недоꙋмѣ́юсѧ , стра́нныи и҆ неи҆зрече́нныи , ка́кѡ и҆збра́ннаѧ чⷭ҇таѧ , є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ . тѣ́мже восхвали́ти хощꙋ̀ сїю̀ , оу҆дивлѧ́юсѧ ѕѣлѡ̀ , оу҆мо́мъ же и҆ сло́вомъ . ѡ҆ба́че дерза́ю и҆ проповѣ́даю и҆ велича́ю , та̀ є҆́сть сѣ́нь нбⷭ҇наѧ .

пѣ́снь , з҃ . і҆рмо́съ . Непослꙋжи́ша тва́ри бг҃омꙋ́дрїи па́че зижди́телѧ , но ѻ҆́гненное преще́нїе , мꙋ́жески попра́вше ра́довахꙋсѧ пою́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Сѐ дне́сь восїѧ̀ конце́мъ весна̀ ра́достнаѧ , просвѣща́ѧ на́ша дш҃а и҆ помышле́нїѧ , и҆ оу҆́мъ бл҃года́тїю , торжество̀ бцⷣы дне́сь та́йнѡ спра́здновати . Да́ры да но́сѧтъ дне́сь всѧ́ческаѧ цр҃це и҆ мт҃ри бж҃їи , нб҃о и҆ землѧ̀ , и҆ а҆́нг҃льстїи чи́нове , и҆ землены́хъ мно́жество . и҆ да вопїю́тъ въ цр҃кви , пред̾грѧде́тъ ра́дость и҆ и҆збавле́нїе . Писа́нїе ми́мѡ течѐ , и҆ и҆счезѐ зако́нъ ꙗ҆́коже сѣ́нь , и҆ бл҃года́тныѧ зарѝ восїѧ́ша , в̾ цр҃ковь бж҃їю вше́дши тебѐ дв҃о мт҃и чⷭ҇таѧ , в̾ не́й бл҃гослове́наѧ . Повинꙋ́сѧ ржⷭ҇твꙋ̀ твоемꙋ̀ пречⷭ҇таѧ , ꙗ҆́кѡ творцꙋ̀ и҆ бг҃ꙋ , нб҃о и҆ землѧ̀ и҆ преиспо́днѧѧ . и҆ всѧ́къ ꙗ҆зы́къ землены́хъ и҆сповѣ́даетъ , ꙗ҆́кѡ гдⷭ҇ь ꙗ҆ви́сѧ сп҃съ дш҃а́мъ на́шимъ .

и҆́нъ , і҆рмо́съ . Пе́щь сп҃се ѡ҆роша́шесѧ , ѻ҆́троцы же мꙋ́жески воспѣва́хꙋ гл҃юще , блгⷭ҇ве́нъ бг҃ъ ѻ҆ц҃ъ на́шихъ . Ликоствꙋ́емъ празднолю́бцы дне́сь , и҆ воспое́мъ чи́стꙋю влⷣчцꙋ . и҆ і҆ѡаки́ма и҆ а҆́ннꙋ досто́йнѡ чтꙋ́ще . Проро́чествꙋѧи гл҃ѧ дх҃омъ , приведꙋ́тсѧ дв҃ы въ слѣ́дъ тебѐ , приведꙋ́тсѧ в̾ цр҃ковь цр҃цѣ мт҃ри . Ра́довахꙋсѧ а҆́нг҃льстїи чи́нове , веселѧ́хꙋсѧ пра́ведныхъ дс҃и , ꙗ҆́кѡ бж҃їѧ мт҃и во ст҃а́ѧ приводи́ма бѣ̀ . Прїе́млющи пи́щꙋ нбⷭ҇нꙋю , преспѣва́ше мꙋ́дростїю и҆ дх҃омъ . бы́вши мт҃и по́ плоти хрⷭ҇та̀ бг҃а . И҆ тѣ́ломъ и҆ дх҃омъ ра́дꙋющисѧ , пребыва́ше мр҃і́ѧ непоро́чнаѧ , в̾ цр҃кви бж҃їи , ꙗ҆́кѡ сосꙋ́дъ сщ҃е́нныи . сла́ва , трⷪ҇ченъ . Просла́вимъ трⷪ҇цꙋ нераздѣли́мꙋю . воспое́мъ є҆ди́но бжⷭ҇тво̀ , со ѻ҆ц҃е́мъ сло́во , и҆ дх҃ъ со є҆сте́ственыи . и҆ ны́нѣ . Молѝ є҆го́же родѝ гдⷭ҇а , ꙗ҆́кѡ бл҃гоꙋтро́бна є҆стество́мъ сꙋ́ща бг҃ороди́тельнице , спастѝ дш҃а пою́щихъ тѧ̀ .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Слы́ши ѻ҆трокови́це дв҃це чⷭ҇таѧ , да рече́тъ оу҆́бѡ гаврїи́лъ , совѣ́тъ вы́шнѧгѡ дре́вле и҆́стинныи . бꙋ́ди на прїѧ́тїе гото́ва бг҃ꙋ , тобо́ю бо невмѣсти́мыи съ чл҃ки поживе́тъ . тѣ́мъ и҆ ра́дꙋѧсѧ вопїю̀ , да бл҃гослови́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Пречⷭ҇тꙋю цр҃ковь въ до́мъ бж҃їи , приводѧ́щи а҆́нна дре́вле , и҆ вопїю́щи с̾ вѣ́рою речѐ ко сщ҃е́нникꙋ . ча́до ѿ́ бг҃а да́ное мнѣ̀ , прїе́мъ нн҃ѣ введѝ в̾ цр҃ковь зижди́телѧ своегѡ̀ , и҆ ра́дꙋѧсѧ по́й є҆мꙋ̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а и҆ превозноси́те є҆гѡ̀ во́ вѣки . Речѐ ви́дѣвъ ко а҆́ннѣ дре́вле дх҃омъ заха́рїѧ , животꙋ̀ мт҃рь вво́диши и҆́стиннꙋю , ю҆́же свѣ́тлѡ проро́цы бж҃їи бцⷣꙋ проповѣ́даша , и҆ ка́кѡ цр҃ковь вмѣсти́тъ ю҆̀ ; тѣ́мже чꙋде́снѡ вопїю̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Раба̀ бж҃їѧ бы́хъ а҆́зъ , ѿвѣща̀ а҆́нна є҆мꙋ̀ , призыва́ющи сегѡ̀ вѣ́рою и҆ мл҃твою , прїѧ́ти моеѧ̀ болѣ́зни пло́дъ . по прїѧ́тїю же рожде́ннꙋю привестѝ да́вшемꙋ ю҆̀ . сегѡ̀ ра́ди зовꙋ̀ є҆мꙋ̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Зако́нно вои́стинꙋ дѣ́ло є҆́сть , сщ҃е́нникъ речѐ є҆́й . стра́ннꙋ же всѧ́ческꙋю ве́щь разꙋмѣ́ю , зрѧ̀ приводи́мꙋю въ до́мъ бж҃їи , пресла́внѡ превосходѧ́щꙋ ст҃а́ѧ бл҃года́тїю . тѣ́мже и҆ ра́дꙋѧсѧ вопїю̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Возмога́ю речѐ а҆́нна є҆мꙋ̀ , внꙋша́ющи ꙗ҆́же глаго́леши . разꙋмѣ́хъ бо сїѧ̀ дх҃омъ бж҃їимъ , и҆ ꙗ҆́снѡ ꙗ҆́же ѡ҆ дв҃ѣ проповѣ́да . прїе́мли оу҆́бѡ пречⷭ҇тꙋю въ цр҃ковь созда́телѧ своегѡ̀ . и҆ ра́дꙋѧсѧ зовѝ є҆мꙋ̀ , бл҃гослови́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки . Свѣтоно́сна на́мъ вже́гшисѧ свѣща̀ , возопѝ сщ҃е́нникъ , ра́дость вели́кꙋ свѣтѧ́щи во́ храмѣ . дꙋ́ши проро́ческїѧ сра́дꙋйтесѧ мнѣ̀ , ꙗ҆́кѡ пресла́внаѧ зрѧ́ще соверша́ема в̾ домꙋ̀ бж҃їи . и҆ возопі́йте прⷭ҇нѡ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , и҆ превозноси́те є҆гѡ̀ во́ вѣки .

и҆́нъ , і҆рмо́съ . Є҆го́же оу҆жаса́ютсѧ а҆́нг҃ли , и҆ всѧ̀ во́инства , ꙗ҆́кѡ творца̀ и҆ гдⷭ҇а . по́йте сщ҃е́ннїи , просла́вите ѻ҆́троцы . бл҃гослови́те лю́дїе , и҆ превозноси́те во всѧ̀ вѣ́ки . Весели́тсѧ дне́сь свѣ́тлѡ і҆ѡаки́мъ , и҆ а҆́нна непоро́чнаѧ гдⷭ҇ви бг҃ꙋ прино́ситъ же́ртвꙋ , да́ннꙋю є҆́й ѿ ѻ҆бѣща́нїѧ ст҃ꙋ́ю дще́рь . Хва́литсѧ ст҃ы́и дв҃дъ , и҆ і҆єссе́й , и҆ і҆ꙋ́да чте́тсѧ , и҆з̾ ко́рене бо и҆́хъ и҆зрастѐ сѣ́мѧ , дв҃аѧ чⷭ҇таѧ . и҆з̾ неѧ́ же роди́сѧ бг҃ъ превѣ́чныи . Мр҃і́ѧ пречⷭ҇таѧ , и҆ ѡ҆дш҃евле́ныи хра́мъ , приво́дитсѧ дне́сь въ до́мъ бж҃їи . и҆ прїе́млетъ сїю̀ заха́рїѧ рꙋка́ма , ꙗ҆́кѡ сщ҃е́нное сокро́вище гдⷭ҇не . Ꙗ҆́кѡ две́рь спасе́нꙋю , и҆ го́рꙋ мы́сленꙋю , ꙗ҆́кѡ лѣ́ствицꙋ ѡ҆дш҃евле́нꙋю . почте́мъ вѣ́рнїи вои́стинꙋ , дв҃ꙋю и҆ мт҃рь бж҃їю , бл҃гослове́нꙋю рꙋка́ма сщ҃е́нныхъ . Проро́цы и҆ а҆пⷭ҇ли и҆ мч҃нцы хрⷭ҇то́вы , а҆́нг҃льстїи чи́нове , и҆ всѝ земленоро́днїи , почте́мъ пѣ́сньми дв҃ꙋ чⷭ҇тꙋю , ꙗ҆́кѡ бл҃гослове́нꙋю мт҃рь вы́шнѧгѡ . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . трⷪ҇ченъ . Да пое́тсѧ трист҃ы́и ѻ҆ц҃ъ и҆ сн҃ъ и҆ дх҃ъ ст҃ы́и , нераздѣли́мое є҆ди́нство . є҆ди́но бжⷭ҇тво̀ , держа́щее дла́нїю всю̀ тва́рь , во всѧ̀ вѣ́ки . и҆ ны́нѣ . Без̾нача́льныи начина́етсѧ , сло́во пло́тїю роди́всѧ ꙗ҆́коже и҆зво́ли бг҃ъ и҆ чл҃къ , ѿ ѻ҆трокови́цы дв҃ыѧ . ѡ҆бновлѧ́ѧ на́съ пре́жде па́дшихъ , коне́чнымъ бл҃гоꙋтро́бїемъ .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

На ѳ҃ й пѣ́сни , чⷭ҇тнѣ́йшꙋ непое́мъ . но пое́мъ припѣ́вы пра́здникꙋ := Велича́й дш҃е моѧ̀ , приведе́нꙋю в̾ цр҃квь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . и҆ посе́мъ і҆рмо́съ : Ꙗ҆́кѡ ѡ҆ дш҃е́внѣмъ бж҃їи кїѡ́тѣ . та́же , вторы́и ли́къ пое́тъ то́йже припѣ́въ пра́здникꙋ , и҆ і҆рмо́съ то́йже . и҆ на кі́иждо , тропа́рь . пою́тъ то́йже припѣ́въ пра́здникꙋ , ше́стїю , на ѻ҆́ба ли́ка . та́же , пе́рвыи ли́къ пое́тъ втора́гѡ кано́на , припѣ́въ пра́здникꙋ : А҆́нг҃ли введе́нїе пречⷭ҇тыѧ зрѧ́ще . оу҆диви́шасѧ , ка́кѡ дв҃аѧ вхо́дитъ во ст҃а́ѧ ст҃ы́хъ . и҆ посе́мъ і҆рмо́съ : Свѣтоно́сныи ѻ҆́блакъ . и҆ вторы́и ли́къ пое́тъ то́йже припѣ́въ пра́здникꙋ , и҆ і҆рмо́съ то́йже . и҆ =на кі́иждо , тропа́рь . пою́тъ то́йже припѣ́въ , ше́стїю .

пѣ́снь , ѳ҃ . і҆рмо́съ . Ꙗ҆́кѡ ѡ҆ дш҃е́внѣмъ бж҃їи кїѡ́тѣ , да неко́снетсѧ ника́коже рꙋка̀ невѣ́рныхъ . оу҆ста́ же вѣ́рныхъ бцⷣѣ немо́лчнѡ , гла́съ а҆́нг҃лѡвъ воспѣва́ютъ , ра́достїю вопїю́ще , ра́дꙋйсѧ ѡ҆бра́дованнаѧ гдⷭ҇ь с̾ тобо́ю .

Велича́й дш҃е моѧ̀ , приведе́нꙋю в̾ цр҃квь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . Ꙗ҆́кѡ пресвѣ́тлꙋю бцⷣе чⷭ҇таѧ , дш҃и чистоты̀ и҆мꙋ́щи добро́тꙋ , бл҃года́тїю бж҃їею и҆сполнѧ́ема съ нб҃сѐ , свѣ́томъ присносꙋ́щнымъ просвѣща́еши всегда̀ , с̾ весе́лїемъ вопїю́щихъ . вои́стинꙋ вы́шши всѣ́хъ є҆сѝ дв҃о чⷭ҇таѧ .

Велича́й дш҃е моѧ̀ , приведе́нꙋю в̾ цр҃квь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . Прелѣта́етъ бцⷣе чⷭ҇таѧ , чꙋ́до твоѐ си́лою слове́съ . тѣ́ло бо в̾ тебѐ разꙋмѣ́ю па́че сло́ва , тече́нїѧ грѣхо́внаго непрїѧ́тно . тѣ́мже бл҃года́рственѡ вопїю́ ти , вои́стинꙋ бо́льши всѣ́хъ є҆сѝ дв҃о чи́стаѧ .

Велича́й дш҃е моѧ̀ , приведе́нꙋю в̾ цр҃квь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . Пресла́внѡ проѡбразова́ше чⷭ҇таѧ зако́на тѧ̀ сѣ́нь , и҆ бжⷭ҇твенаѧ рꙋ́чка , ди́вныи ковче́гъ , и҆ катапета́зма и҆ же́злъ . цр҃ковь неразрꙋши́мꙋ , и҆ две́рь бж҃їю , тѣ́мже наꙋча́ютъ тебѣ̀ зва́ти , вои́стинꙋ вы́шши всѣ́хъ є҆сѝ дв҃о чⷭ҇таѧ .

Велича́й дш҃е моѧ̀ , приведе́нꙋю в̾ цр҃квь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . Поѧ̀ тебѣ̀ провозглаша́ше дв҃дъ , дще́рь тѧ гл҃ѧ цр҃е́вꙋ . красото́ю добродѣ́телей , ѡ҆деснꙋ́ю пред̾стоѧ́щꙋ ви́дѣвъ тѧ̀ бг҃а преиспещре́нꙋ . тѣ́мже проро́чествꙋѧ вопїѧ́ше , вои́стинꙋ бо́льши всѣ́хъ є҆сѝ дв҃о чи́стаѧ .

Велича́й дш҃е моѧ̀ , приведе́нꙋю в̾ цр҃квь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . Бг҃опрїѧ́тнꙋ пред̾зрѧ̀ соло́мѡнъ , проповѣ́да тѧ̀ ѻ҆́дръ цр҃е́въ . живы́и и҆сто́чникъ запечатлѣ́нъ бцⷣе . и҆з̾ него́ же немꙋ́тнаѧ на́мъ произы́де вода̀ , вѣ́рою вопїю́щимъ . вои́стинꙋ вы́шши є҆сѝ всѣ́хъ дв҃о чи́стаѧ .

Велича́й дш҃е моѧ̀ , приведе́нꙋю в̾ цр҃квь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . Подае́ши дарова́ней твои́хъ , тишинꙋ̀ бцⷣе дш҃а́мъ на́шимъ , точа́щи живо́тъ тебѐ чтꙋ́щимъ по́ долгꙋ . ты̀ застꙋпа́еши , и҆ спаса́еши , и҆ покрыва́еши , и҆ соблюда́еши вопи́ти ти , ра́дꙋйсѧ спасе́нїю вина̀ ро́дꙋ на́шемꙋ .

и҆́нъ , і҆рмо́съ . Свѣтоно́сныи ѻ҆́блакъ , во́нь же всѣ́хъ влⷣка , ꙗ҆́кѡ до́ждь с̾ нб҃сѐ на рꙋно̀ сни́де , и҆ воплоти́сѧ на́съ ра́ди , бы́въ оу҆́бѡ чл҃къ без̾нача́ленъ . велича́емъ всѝ ꙗ҆́кѡ мт҃рь бг҃а на́шегѡ чи́стꙋ .

А҆́нг҃ли введе́нїе пречⷭ҇тыѧ зрѧ́ще . оу҆диви́шасѧ , ка́кѡ дв҃аѧ вхо́дитъ во ст҃а́ѧ ст҃ы́хъ .= И҆=з̾ пра́ведникꙋ произы́де , і҆ѡаки́ма и҆ а҆́нны , ѡ҆бѣща́нїѧ пло́дъ бг҃о︀ѻ҆трокови́цы мр҃і́и . и҆ ꙗ҆́кѡ кади́ло кра́сное , пло́тїю младе́нствꙋющи , приво́дитсѧ во ст҃и́лище ст҃о́е . ꙗ҆́кѡ ст҃а́ѧ во ст҃ы́хъ жи́ти . Младе́нствꙋющꙋ є҆стество́мъ , и҆ па́че є҆стества̀ ꙗ҆́вльшꙋсѧ мт҃рь бж҃їю , восхва́лимъ пѣ́сньми . в̾ цр҃ковь бо зако́ннꙋю гдⷭ҇ню дне́сь вво́дитсѧ , въ воню̀ бл҃гоꙋха́нїѧ , пра́ведникꙋ ꙗ҆́кѡ пло́дъ дх҃о́вныи .

А҆́нг҃ли введе́нїе пречⷭ҇тыѧ зрѧ́ще . оу҆диви́шасѧ , ка́кѡ дв҃аѧ вхо́дитъ во ст҃а́ѧ ст҃ы́хъ .= С=о а҆́нг҃лѡмъ , ра́дꙋисѧ бцⷣѣ подо́бнѡ возопїе́мъ вѣ́рнїи . ра́дꙋйсѧ вседо́браѧ невѣ́сто . ра́дꙋисѧ ѻ҆́блаче всесвѣ́тлыи . и҆з̾ него́ же на́мъ восїѧ̀ гдⷭ҇ь , во тмѣ̀ невѣ́дѣнїѧ сѣдѧ́щимъ . ра́дꙋисѧ всѣ́мъ оу҆пова́нїе . Ст҃ы́хъ ст҃а́ѧ бг҃омт҃и мр҃і́е , мл҃твами твои́ми прⷭ҇нѡ свободѝ на́съ , ѿ сѣ́тей вра́жїихъ , и҆ всѧ́кихъ є҆ресе́й и҆ скорбе́й , вѣ́рнѡ покланѧ́ющихсѧ ѻ҆́бразꙋ ст҃а́гѡ тѝ зра́ка .

А҆́нг҃ли введе́нїе пречⷭ҇тыѧ зрѧ́ще . оу҆диви́шасѧ , ка́кѡ дв҃аѧ вхо́дитъ во ст҃а́ѧ ст҃ы́хъ .= П=ѣ́снь досто́йнꙋ бцⷣѣ всѧ̀ тва́рь со а҆́нг҃лѡмъ гаврїи́ломъ , зове́тъ вопїю́щи , ра́дꙋйсѧ мт҃и бж҃їѧ всенепоро́чнаѧ , є҆ю́же и҆зба́вихомсѧ пе́рвыѧ клѧ́твы , и҆ бы́вше нетлѣ́нїю ѻ҆́бщницы .

А҆́нг҃ли введе́нїе пречⷭ҇тыѧ зрѧ́ще . оу҆диви́шасѧ , ка́кѡ дв҃аѧ вхо́дитъ во ст҃а́ѧ ст҃ы́хъ .= Херꙋви́мъ пребо́льши , и҆ серафи́мъ вы́шши , и҆ ши́рши нб҃съ ꙗ҆ви́сѧ дв҃о . ꙗ҆́кѡ невмѣсти́магѡ всѣ́ми , во оу҆тро́бѣ вмѣсти́ла є҆сѝ бг҃а на́шегѡ , и҆ ро́ждьши несказа́ннѡ . є҆го́же молѝ прилѣ́жнѡ ѡ҆ на́съ . =трⷪ҇ченъ . Велича́й дш҃е моѧ̀ , трисоста́внагѡ , и҆ нераздѣ́льнагѡ бжⷭ҇тва̀ держа́вꙋ . Трисоста́вное є҆стество̀ , и҆ нераздѣли́мꙋю сла́вꙋ , и҆́же въ бжⷭ҇твѣ̀ є҆ди́номъ пое́мꙋю непреста́ннѡ , на́ нб҃си и҆ на землѝ , трⷪ҇цꙋ нераздѣли́мꙋю , просла́вимъ съ сн҃омъ ѻ҆ц҃а , и҆ дх҃ꙋ покланѧ́ющесѧ бл҃гоче́стнѡ .

А҆́нг҃ли введе́нїе пречⷭ҇тыѧ зрѧ́ще . оу҆диви́шасѧ , ка́кѡ дв҃аѧ вхо́дитъ во ст҃а́ѧ ст҃ы́хъ .= П=од̾ твоѐ бл҃гоꙋтро́бїе прибѣга́ющїѧ вѣ́рнѡ , и҆ покланѧ́ющїѧсѧ бл҃гоче́стнѡ сн҃ꙋ твоемꙋ̀ дв҃о бг҃ороди́тельнице , ꙗ҆́кѡ бг҃ꙋ и҆ гдⷭ҇ꙋ ми́рꙋ , моли́сѧ ѿ тлѝ и҆ бѣ́дъ и҆зба́вити , и҆ всѧ́ческихъ и҆скꙋше́нїи .

катава́сїѧ : Велича́й дш҃е моѧ̀ , приведе́нꙋю в̾ цр҃ковь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ .

задосто́йнѡ : А҆́нг҃ли введе́нїе пречⷭ҇тыѧ зрѧ́ще . оу҆диви́шасѧ , ка́кѡ дв҃аѧ вхо́дитъ во ст҃а́ѧ ст҃ы́хъ .= Ꙗ҆́кѡ ѡ҆ дш҃е́внѣмъ бж҃їи кїѡ́тѣ , да неко́снетсѧ ника́коже рꙋка̀ невѣ́рныхъ . оу҆ста́ же вѣ́рныхъ бцⷣѣ немо́лчнѡ , гла́съ а҆́нг҃лѡвъ воспѣва́ютъ , ра́достїю вопїю́ще , ра́дꙋйсѧ ѡ҆бра́дованнаѧ гдⷭ҇ь с̾ тобо́ю . =покло́н̾ до землѝ .

свѣти́ленъ . Ю҆́же дре́вле провозвѣстѝ проро́ческїи собо́ръ , рꙋ́чкꙋ , и҆ же́злъ , и҆ скрижа́ль , и҆ несѣко́мꙋю го́рꙋ , мр҃і́ю бг҃оѻ҆трокови́цꙋ вѣ́рнѡ восхва́лимъ . дне́сь бо вво́дитсѧ во ст҃а́ѧ ст҃ы́хъ , воспита́тисѧ гдⷭ҇ви . гⷤ .

На хвали́тѣхъ , стⷯры . гла́съ , а҃ . поⷣ . нбⷭ҇нымъ чино́мъ .= Свѣщено́сицы дв҃ы ,꙳ при́снѡ дв҃ꙋю свѣ́тлѡ провожда́юще ,꙳ проро́чествꙋютъ вои́стинꙋ дх҃омъ бꙋ́дꙋщее .꙳ хра́мъ бо бж҃їи бцⷣа сꙋ́щи ,꙳ в̾ цр҃ковь со сла́вою дв҃ьственою ,꙳ младе́нствꙋющи вво́дитсѧ . =двⷤа . Ѡ҆бѣща́нїѧ ст҃а́гѡ пло́дъ сла́вныи ,꙳ бцⷣа вои́стинꙋ ꙗ҆ви́сѧ ми́рови ,꙳ ꙗ҆́кѡ всѣ́хъ вы́шшаѧ .꙳ ꙗ҆́же бл҃гоче́стнѡ приводи́ма въ цр҃ковь бж҃їю ,꙳ моли́твꙋ ро́ждьшихъ и҆сполнѧ́ющи ,꙳ соблюда́ема бжⷭ҇твенымъ дх҃омъ . Нбⷭ҇нымъ воспитѣ́на дв҃о хлѣ́бомъ ,꙳ въ цр҃кви гдⷭ҇ни вѣ́рнѡ ,꙳ породѝ ми́рови живота̀ хлѣ́бъ сло́во .꙳ ꙗ҆́кѡ хра́мъ и҆збра́нныи и҆ пренепоро́чныи ,꙳ пред̾ѡ҆брꙋчи́сѧ дх҃омъ та́йнѡ ,꙳ ѡ҆брꙋчена̀ бг҃ꙋ и҆ ѻ҆ц҃ꙋ . сла́ва , и҆ ны́нѣ . гла́съ , в҃ . Дне́сь в̾ цр҃ковь в̾во́дитсѧ всенепоро́чнаѧ дв҃аѧ , во ѻ҆би́телище всѣ́хъ цр҃ѧ и҆ бг҃а , и҆ всеѧ̀ жи́зни на́шеѧ пита́телѧ . дне́сь честнѣ́йша ст҃ы́нѧ , ꙗ҆́кѡ трилѣ́тствꙋющаѧ ю҆́ница , во ст҃а́ѧ ст҃ы́хъ в̾во́дитсѧ . то́й возопїе́мъ ꙗ҆́кѡ а҆́нг҃лъ , ра́дꙋисѧ є҆ди́на в̾ жена́хъ бл҃гослове́наѧ .

Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на , пѣ́снь г҃ ѧ , и҆ в҃ гѡ , пѣ́снь ѕ҃ ѧ . По вхо́дѣ : тропа́рь , пра́здникꙋ . сла́ва , и҆ ны́нѣ . конда́къ , пра́здникꙋ . проки́менъ , пѣ́снь бцⷣы . вели́читъ дш҃а моѧ̀ гдⷭ҇а , и҆ воз̾ра́довасѧ дх҃ъ мо́й ѡ҆́ бз҃ѣ сп҃сѣ мое́мъ . сти́хъ . ꙗ҆́кѡ призрѣ̀ на смире́нїе рабы̀ своеѧ̀ , се́бо ѿ нн҃ѣ бл҃жа́тъ мѧ всѝ ро́ди . а҆пⷭ҇лъ , къ є҆вре́ѡмъ . заⷱ҇ , т҃к . а҆ллилꙋ́їѧ . слы́ши дщѝ и҆ ви́ждь , и҆ приклонѝ оу҆́хо твоѐ . сти́хъ . приведꙋ́тсѧ цр҃ю дв҃ы в̾ слѣ́дъ є҆ѧ̀ , бли́жнѧѧ є҆ѧ̀ приведꙋ́тсѧ тебѣ̀ . є҆ѵⷢ҇а́лїе , ѿ лꙋкѝ . заⷱ҇ , н҃д . прича́стенъ . ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призовꙋ̀ .