МЦⷭ҇А ТОГО́ЖЕ ВЪ К҃В ДН҃Ь

ст҃а́гѡ а҆пⷭ҇ла фїлимѡ́на , и҆ и҆́же с̾ ни́мъ . =И҆ ст҃а́гѡ бл҃говѣ́рнагѡ вели́кагѡ кнѧ́ѕѧ миха́ила ꙗ҆росла́вича тверска́гѡ . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и возва́хъ , стⷯры , пра́здникꙋ . гла́съ , и҃ . поⷣ . ѽ пресла́вное чꙋ́до . =Ѽ пресла́вное чꙋ́до ,꙳ прописꙋ́етсѧ ны́нѣ ,꙳ бꙋ́дꙋщее неи҆зрече́нное ,꙳ во ѻ҆бразѣ́хъ дне́сь ви́димыхъ разꙋмѣва́емо .꙳ свѣ́тъ бо ми́рови бжⷭ҇твеныи восїѧ́вши ,꙳ невѣ́ста приво́дитсѧ к̾ ст҃ѣ́й це́ркви .꙳ ю҆́же восхва́лимъ ꙗ҆́кѡ хра́мъ бж҃їи пресвѣ́тлыи ,꙳ ст҃ы́и и҆ свѣтоза́рныи ,꙳ свѣтода́телѧ хрⷭ҇та̀ . Вои́стинꙋ нача́токъ бл҃гопрїѧ́тенъ ,꙳ і҆ѡаки́мъ мꙋ́дрыи ꙳ со а҆́нною принесо́ста .꙳ сподо́бльшемꙋ , бжⷭ҇твеныи пло́дъ да́ти и҆́мъ ,꙳ бг҃оѻ҆трокови́цꙋ дв҃ꙋ мр҃і́ю ꙗ҆́вѣ .꙳ є҆ю́же ско́рби ѿгна́сѧ до́лгъ .꙳ ю҆́же воспое́мъ бл҃гоче́стнѡ веселѧ́щесѧ ,꙳ ра́дости бо хода́таица ,꙳ бы́вши всемꙋ̀ ми́рꙋ . Грѧди́те та́йнѡ стеце́мсѧ ,꙳ и҆ пред̾начне́мъ ны́нѣ ,꙳ свѣща́ми вѣ́ры оу҆краша́еми ,꙳ дв҃ыѧ прои҆схожде́нїе .꙳ в̾ цр҃ковь бо сла́внѡ вхо́дитъ бж҃їю ,꙳ ѡ҆брꙋчена̀ хрⷭ҇то́ви всѣ́хъ цр҃ю .꙳ є҆́йже пра́зднꙋемъ кра́сное торжество̀ ,꙳ бг҃олѣ́пнѡ всѝ пита́еми ,꙳ в̾веде́нїемъ тоѧ̀ .

ст҃ы́мъ , стихѣ́ры . гла́съ , в҃ . поⷣ . є҆гда̀ ѿ́ древа . Лоза̀ виногра́да живо́тнагѡ , сла́вныи фїлимѡ́не сы́и . вино̀ и҆ска́пилъ є҆сѝ , бжⷭ҇твенагѡ оу҆вѣ́дѣнїѧ , в̾ болѣ́зни сꙋ́щимъ дш҃а́мъ . срⷣца̀ возвесели́лъ є҆сѝ , дрѧ́хлꙋющимъ ле́стїю ѡ҆мраче́нїѧ , и҆ ѡ҆держи́мымъ тмо́ю и҆долобѣ́сїѧ . тѣ́мже веселѧ́щесѧ , па́мѧть твою̀ бг҃оразꙋ́мнꙋю торжествꙋ́емъ . Гра́дъ тѧ̀ га́зскїи чте́тъ , свѣ́тъ оу҆вѣ́дѣнїѧ бл҃же́нне тобо́ю оу҆зрѣ́въ . коласа́е же бжⷭ҇твеное твоѐ тѣ́ло , ꙗ҆́коже бога́тство и҆мꙋ́ще , ѡ҆б̾є́млютъ цѣльбы̀ , и҆сточа́ющꙋ бл҃года́ть всегда̀ . тѣ́мже соверша́ющїи па́мѧть твою̀ , сохранѧ́емсѧ ѿ бѣ́дъ фїлимѡ́не сла́вне , мл҃твами твои́ми . Вѣ́рою , со а҆пфі́ею честно́ю , а҆рхи́ппа мꙋ́драго ст҃лѧ восхва́лимъ . пою́ще фїлимѡ́на и҆ ѻ҆ни́сима , сщ҃е́нныхъ бг҃опроповѣ́датель , честны́хъ оу҆чи́телей , ле́сть многобо́жїѧ и҆скорени́вшихъ сло́вомъ . и҆ насади́вшихъ всѣ́мъ ра́зꙋмъ и҆́стины , чтꙋ́щимъ тѣ́хъ бл҃гоче́стнѡ па́мѧть всегда̀ .

сла́ва , и҆ ны́нѣ . гла́съ , а҃ . Да ра́дꙋетсѧ дне́сь нб҃о свы́ше , и҆ ѻ҆́блацы весе́лїе да кропѧ́тъ . ѡ҆ ѕѣлѡ̀ пресла́вныхъ вели́чїихъ бг҃а на́шегѡ . се́бо две́рь ꙗ҆́же к̾ восто́кѡмъ зрѧ́щи , ро́ждьшисѧ по ѡ҆бѣтова́нїю ѿ непло́дныѧ , и҆ бг҃ꙋ ѡ҆свѧщена̀ бы́вши во ѻ҆би́телище . дне́сь в̾ цр҃ковь ꙗ҆́кѡ непоро́чное приноше́нїе приво́дитсѧ . да ра́дꙋетсѧ дв҃дъ бїѧ̀ в̾ гꙋ́сли , приведꙋ́тсѧ речѐ цр҃ю дв҃ы въ слѣ́дъ є҆ѧ̀ , бли́жнѧѧ є҆ѧ̀ приведꙋ́тсѧ внꙋ́трь сѣ́ни бж҃їи , внꙋ́трь ѡ҆чи́стилища є҆гѡ̀ . воспита́тисѧ во ѻ҆би́телище , и҆́же пре́жде вѣ́къ ѿ ѻ҆ц҃а нетлѣ́ннѡ ро́ждьшꙋсѧ , во спасе́нїе дш҃а́мъ на́шимъ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ .= Д=не́сь ѱало́мски ,꙳ собо́ръ дв҃ьственыи ,꙳ свѣщѝ вже́гше ,꙳ свѣ́тлѡ пред̾хо́дѧтъ ,꙳ є҆ди́ной всенепоро́чнѣй .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . Го́рꙋ разꙋ́мнꙋю ,꙳ и҆ трапе́зꙋ бжⷭ҇твенꙋю ,꙳ мо́стъ и҆ рꙋ́чкꙋ ,꙳ прⷪ҇ро́че прїе́мли ,꙳ є҆ди́нꙋ пренепоро́чнꙋю .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ въ цр҃квь цр҃е́вꙋ . Две́ри сщ҃е́нныѧ разве́рзъ ,꙳ заха́рїе проро́че ,꙳ прїе́мли вои́стинꙋ ,꙳ бж҃їю мт҃рь ,꙳ и҆ є҆ди́нꙋ прⷭ҇нѡ дв҃ꙋю .

сла́ва , и҆ ны́нѣ . гла́съ , то́йже . Дне́сь в̾ цр҃ковь в̾во́дитсѧ всенепоро́чнаѧ дв҃аѧ , во ѻ҆би́телище всѣ́хъ цр҃ѧ и҆ бг҃а , и҆ всеѧ̀ жи́зни на́шеѧ пита́телѧ . дне́сь честнѣ́йша ст҃ы́нѧ , ꙗ҆́кѡ трилѣ́тствꙋющаѧ ю҆́ница , во ст҃а́ѧ ст҃ы́хъ в̾во́дитсѧ . то́й возопїе́мъ ꙗ҆́кѡ а҆́нг҃лъ , ра́дꙋисѧ є҆ди́на в̾ жена́хъ бл҃гослове́наѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , г҃ . А҆пⷭ҇ли ст҃і́и моли́те млⷭ҇тиваго бг҃а , да грѣхо́въ ѡ҆ставле́нїе пода́стъ дш҃а́мъ на́шимъ . сла́ва , и҆ ны́нѣ , пра́здникꙋ . гла́съ , д҃ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе .

На оу҆́трени , на бг҃ъ гдⷭ҇ь , тропа́рь , пра́здникꙋ , два́жды . сла́ва , а҆пⷭ҇лѡмъ . и҆ ны́нѣ , пра́здникꙋ . По а҃ , стихоло́гїи , сѣда́ленъ . гла́съ , а҃ . Восхвали́те дв҃ы , мт҃ре пра́зднꙋйте , лю́дїе славослови́те , сщ҃е́ннїи бл҃гослови́те пречⷭ҇тꙋю мт҃рь бж҃їю . пло́тїю бо младе́нствꙋющи пре́жде , цр҃кви принесе́сѧ ꙗ҆́кѡ хра́мъ бж҃їи ст҃ѣ́йшїи . тѣ́мже пра́здникъ дх҃о́вныи соверша́юще воспое́мъ є҆ѧ̀ , ꙗ҆́кѡ пред̾ста́тельницꙋ ро́дꙋ чл҃ческомꙋ . сла́ва , и҆ ны́нѣ , то́йже .

По в҃ , стихоло́гїи , сѣда́ленъ . гла́съ , д҃ . Дв҃де пред̾ и҆дѝ в̾ цр҃ковь бж҃їю , и҆ ра́дꙋѧсѧ прїимѝ цр҃цꙋ на́шꙋ . и҆ то́й возопі́й , вни́ди гжⷭ҇е в̾ цр҃ковь цр҃е́вꙋ . вни́ди , є҆́йже сла́ва покрове́но разꙋмѣ́етсѧ . и҆з̾ неѧ́ же хо́щетъ и҆сточи́тисѧ на́мъ всѣ́мъ свѣ́тъ хрⷭ҇то́съ . сла́ва , и҆ ны́нѣ , то́йже .

кано́нъ , пра́здникꙋ . гла́съ , д҃ . со і҆рмосо́мъ , на́ и҃ . и҆ ст҃ы́мъ , на д҃ . и҆мы́и краегране́сїе си́цево : хрⷭ҇та̀ лю́бѧща просла́влю тѧ̀ фїлимѡ́не . творе́нїе і҆ѡ́сифово . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пое́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прове́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ просла́висѧ .

запѣ́въ : Ст҃і́и а҆пⷭ҇ли , моли́те бг҃а ѡ҆ на́съ . = Проходѧ̀ ра́достнѡ нбⷭ҇наѧ , сщ҃еннодѣ́йствене вселе́нїѧ , бл҃года́ть пода́ждь мѝ , ст҃ꙋ́ю ти па́мѧть бжⷭ҇твено воспѣва́ти . ꙗ҆́кѡ просла́висѧ . Стрꙋѧ́ми твои́хъ слове́съ срⷣца̀ напои́въ , дѣ́лати нбⷭ҇наѧ бл҃же́нне разꙋмѣ́нїѧ сотвори́лъ є҆сѝ вѣ́рою , а҆пⷭ҇ле фїлимѡ́не досточꙋ́дне . Сщ҃е́нствꙋѧ ст҃о́е є҆ѵⷢ҇а́лїе , сїѧ́нїи дх҃о́вными дш҃а просвѣти́лъ є҆сѝ . и҆зба́вивъ ѿ тмы̀ кꙋмиробѣ́сїѧ , мꙋ́дре а҆пⷭ҇ле . =боⷢ҇ . Тѧ̀ проро́къ дре́вле бжⷭ҇твеныи собо́ръ , многови́дными чⷭ҇таѧ ѻ҆бразы̀ , и҆з̾ дале́ча проначерта́ѧ вои́стинꙋ , є҆ди́нꙋ влⷣкꙋ поро́ждьшꙋю .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Оу҆твердѝ на́съ собо́ю гдⷭ҇и , дре́вомъ оу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃колю́бецъ . Стра́сти хрⷭ҇то́вы и҆ воскрⷭ҇нїе проповѣ́давъ . воз̾дви́гнꙋлъ є҆сѝ ꙗ҆́кѡ ѿ́ гроба невѣ́рїѧ и҆ ме́ртвости чл҃ки , фїлимѡ́не достосла́вне . Ѻ҆ни́сима бжⷭ҇твенаго , и҆ фїлимѡ́на , а҆пфі́ю , и҆ а҆рхи́ппа , ѕвѣ́зды просвѣща́юща концы̀ , сщ҃е́нными пѣ́сньми восхва́лимъ . Оу҆́мное видѣ́нїе ѡ҆чи́стивше , бжⷭ҇твенагѡ полꙋчи́сте бг҃овидѣ́нїѧ . и҆ срⷣца̀ возврати́сте заблꙋ́ждьшїѧ , к̾ ра́зꙋмꙋ сщ҃е́ннїи . боⷢ҇ . Ꙗ҆́вльшисѧ чⷭ҇таѧ и҆ всенепоро́чнаѧ , прїе́мши во оу҆тро́бѣ бг҃а сло́во , ѡ҆чи́стившаго є҆стество̀ на́ше , ѡ҆скве́рньшеесѧ дв҃о грѣхопаде́нїемъ .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

конда́къ , фїлимѡ́нꙋ . гла́съ , в҃ . Ꙗ҆́кѡ ѕвѣ́зды всесвѣ́тлыѧ , просвѣща́юща концы̀ а҆пⷭ҇лы хрⷭ҇то́вы восхва́лимъ , фїлимѡ́на сла́внаго , и҆ а҆рхи́ппа сщ҃е́ннаго , и҆ ѻ҆ни́сима . с̾ ни́ми же и҆ а҆пфі́ю всемꙋ́дрꙋю , вопїю́ще , моли́те непреста́ннѡ ѡ҆ всѣ́хъ на́съ . сѣда́ленъ . гла́съ , и҃ . Ра́ломъ слове́снымъ до́брѣ дѣ́лаѧ , ѡ҆лѧденѣ́вшаѧ срⷣца̀ сщ҃еннодѣ́телю , бжⷭ҇твеное оу҆вѣ́дѣнїе дѣ́лати сотвори́лъ є҆сѝ . и҆ низ̾ложи́въ и҆́дольскїѧ хра́мы , созда́лъ є҆сѝ цр҃кви бл҃же́нне в̾ сла́вꙋ созда́телѧ своегѡ̀ . тѣ́мже соше́дшесѧ ст҃ꙋ́ю ти па́мѧть фїлимѡ́не сла́вимъ , сщ҃еннопросвѣща́еми . и҆ согла́снѡ вопїе́мъ ти , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . сла́ва , и҆ ны́нѣ , пра́здникꙋ . Да ра́дꙋетсѧ дв҃дъ пѣснопи́сецъ , и҆ да ликоствꙋ́етъ і҆ѡаки́мъ со а҆́нною , ꙗ҆́кѡ ча́до ст҃о́е и҆з̾ нею̀ прои҆зы́де , мр҃і́ѧ свѣтоно́снаѧ и҆ бжⷭ҇твенаѧ свѣща̀ . и҆ ра́дꙋетсѧ входѧ́щи в̾ цр҃ковь ю҆́же поѧ̀ бл҃гословѝ варахі́инъ сн҃ъ , и҆ ра́дꙋѧсѧ вопїѧ́ше , ра́дꙋисѧ чꙋ́до всеми́рное .

пѣ́снь , д҃ . і҆рмо́съ . Пою́ тѧ слꙋ́хомъ бо гдⷭ҇и , оу҆слы́шахъ и҆ оу҆боѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гое твоѐ соше́ствїе є҆́же на мѧ̀ прославлѧ́ю ѡ҆бновле́нїе . Вѣ́триломъ крⷭ҇тнымъ в̾ перѧ́емь , преплы́лъ є҆сѝ без̾ бꙋ́ри лю́тꙋю пꙋчи́нꙋ , и҆скꙋше́нїи житїѧ̀ бл҃же́нне . мно́гихъ ѡ҆корми́въ пла́вающихъ , къ спасе́нїѧ приста́нищꙋ бжⷭ҇твеными словесы̀ . Свѣти́ла свѣтоза́рнаѧ пред̾лага́етъ бжⷭ҇твеныи гра́дъ каласа́йскїи , сщ҃е́ннаго а҆рхи́ппа . фїлимѡ́на же и҆ а҆пфі́ю ꙗ҆́вѣ , и҆ ѻ҆ни́сима сла́внаго , просвѣща́ющихъ мирскі́ѧ концы̀ . Бжⷭ҇твенаѧ рѣка̀ воскипѣ̀ в̾ срⷣцы твое́мъ бг҃оглаго́ливе , и҆ рѣ́ки оу҆ста́вивъ , и҆ тече́нїѧ без̾бо́жнаѧ . дш҃а́ же и҆згорѣ́вшаѧ зно́емъ невѣ́денїѧ , напои́въ бл҃года́тїю сла́вне .= боⷢ҇ . П=ою́ тѧ вои́стинꙋ всепѣ́таѧ , пребога́таго бг҃а сло́ва , па́че є҆стества̀ роди́вшꙋю . и҆ молю́сѧ , смире́ныѧ моеѧ̀ дꙋшѝ и҆сцѣли́ти неможе́нїе , ꙗ҆́кѡ бл҃га сꙋ́щи бг҃оневѣ́стнаѧ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Свѣ́та пода́телю , и҆ вѣко́мъ тво́рче гдⷭ҇и , во́ свѣтѣ твои́хъ повелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Недꙋ́гꙋющїѧ ви́дѣвъ ѿстрꙋпле́нїемъ ѕлы́хъ сла́вне , дѣ́тельнымъ тѝ сло́вомъ и҆сцѣлѝ , фїлимѡ́не дре́вле , кꙋмиробѣ́сїемъ лю́тѣ бѣ́дствꙋющїѧ . Спаси́тельныѧ пꙋтѝ , заблꙋ́ждьшимъ лю́тѣ , показа́лъ є҆сѝ . ꙗ҆́кѡ неле́стныи наста́вникъ фїлимѡ́не , є҆ди́нъ пꙋ́ть хрⷭ҇та̀ возлюби́ти , ди́внѡ наста́вилъ є҆сѝ .= Содѣва́етъ свѣ́тлыи пра́здникъ , коласа́й честны́и дне́сь ра́достнѡ хрⷭ҇то́вѣ цр҃кви , бжⷭ҇твенагѡ а҆рхи́ппа , и҆ бг҃оглаго́ливаго чтꙋ́щи фїлимѡ́на . =боⷢ҇ . Влⷣчце спасѝ на́съ , ѡ҆бꙋрева́емыѧ лю́тымъ волне́нїемъ и҆скꙋше́нїѧ . и҆ не кро́ткагѡ ва́рварскагѡ нахожде́нїѧ , и҆ бѣсо́вскагѡ лю́тагѡ приложе́нїѧ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , неи҆зслѣ́днꙋю млрⷭ҇дїѧ твоегѡ̀ призыва́ю бе́зднꙋ , ѿ тлѝ бж҃е мѧ воз̾ведѝ . Нб҃о ꙗ҆ви́сѧ , всѣ́мъ вѣща́ѧ сла́вꙋ спаси́тельнꙋю , тебѐ просла́вльшагѡ , и҆ оу҆ченико́мъ сочета́вша седмодесѧ́тнымъ , мꙋ́чениче всебога́те .= Оу҆страни́всѧ ѻ҆те́чества . стра́ннымъ тѝ сло́вомъ , оу҆страни́вшїѧсѧ бг҃а , оу҆лови́лъ є҆сѝ . и҆ сїѡ́на жи́телѧ ст҃лю фїлимѡ́не показа́лъ є҆сѝ . Добродѣ́тельми сщ҃е́нными сїѧ́ющи , и҆ свѣ́тлѡ бг҃ꙋ оу҆гожда́ющи , к̾ нб҃се́мъ востечѐ , со а҆́нг҃лы а҆пфі́ѧ ликꙋ́ющи . =боⷢ҇ . Воплоща́етсѧ сло́во во́ чревѣ твое́мъ за бл҃госе́рдїе , познава́етсѧ чл҃къ , да бг҃а чл҃ка содѣ́лаетъ , ѻ҆трокови́це пренепоро́чнаѧ .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ , и҆ и҆́косъ , пра́здникꙋ .

пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ поли деи́рѣ слꙋжи́мѣмъ , трїѐ ѻ҆́троцы неради́ша ѡ҆ без̾бо́жнѣмъ велѣ́нїи , но посредѣ̀ пла́мени в̾ве́ржени , прохлажда́еми поѧ́хꙋ , бл҃гослове́нъ бг҃ъ ѻ҆ц҃ъ на́шихъ . Кра́снѣ твоѝ фїлимѡ́не бы́стѣ честнѣ́и но́зѣ , стезѝ кро́ткѡ ше́ствꙋющи є҆ѵⷢ҇а́лїѧ . всѣ́мъ ра́тнымъ ми́ръ сщ҃е́нныи возвѣща́ющи , бѣсо́вскаѧ оу҆стремле́нїѧ препира́ющи . Твои́хъ слове́съ свѣ́томъ , га́зѣѡмъ глꙋбо́каѧ тма̀ прогна́на бы́сть . сщ҃еннодѣ́йственикъ бо сщ҃е́ннѣйшїи , всѣ́хъ бы́сть и҆з̾бра́нъ . всѧ̀ наста́вивъ , и҆ наꙋчи́въ пѣ́ти а҆пⷭ҇ле , бл҃гослове́нъ бг҃ъ ѻ҆ц҃ъ на́шихъ . Въ пе́рвыхъ твои́хъ прїѡ҆бщи́всѧ до́брыхъ , га́зскїи гра́дъ . того́ бо ꙗ҆ви́сѧ первопресто́льникъ , и҆ ст҃ль спаси́тельныи . ꙗ҆́кѡ сщ҃енновѣща́тель фїлимѡ́не , вопи́ти повелѣва́ѧ , бл҃гослове́нъ бг҃ъ ѻ҆ц҃ъ на́шихъ . Возлюби́въ хрⷭ҇та̀ , возлюби́вшаго землены́ѧ за милосе́рдїе . дрꙋ́жбою вра́жїею ненави́димыѧ сꙋ́ща , дрꙋ́ги содѣ́ѧ фїлимѡ́не бг҃ꙋ , воспѣва́юща , блгⷭ҇ве́нъ бг҃ъ ѻ҆ц҃ъ на́шихъ . боⷢ҇ . Крѣ́пость смире́нымъ , и҆ свѣ́щникъ свѣ́тлыи . бжⷭ҇твенаѧ трапе́за . гора̀ и҆ две́рь непроходи́ма . прⷭ҇то́лъ бж҃їи и҆ пола́та . же́злъ же а҆арѡ́новъ , и҆ рꙋ́чка златоза́рна сꙋ́щи , хрⷭ҇та̀ ма́ннꙋ живота̀ дв҃о носѧ́щи .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ соше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Сло́во ꙗ҆́кѡ свѣти́льника свѣ́тлаго воз̾же́на на твое́мъ срⷣцы носѧ̀ . пре́жде оу҆гаше́ныѧ , и҆ во тмѣ̀ мно́зѣ слежа́ща невѣ́денїѧ сла́вне , к̾ бг҃оразꙋ́мїѧ воз̾дви́глъ є҆сѝ дне́ви . Сщ҃е́нное твоѐ к̾ бг҃ꙋ и҆схожде́нїе , сщ҃е́нно возвели́чисѧ , провожде́нїемъ а҆пⷭ҇ле беспло́тныхъ оу҆мо́въ . и҆́хже и҆мѣ̀ на землѝ житїѐ , ꙗ҆́кѡ сщ҃еннота́инникъ , фїлимѡ́не бг҃оглаго́ливе . Мѵ́рѡ бл҃гово́нное ꙗ҆́вѣ и҆ска́пивъ сщ҃е́нныхъ чꙋде́съ бл҃же́нне , ѡ҆бл҃гоꙋха́лъ є҆сѝ ра́зꙋмы , и҆ помышле́нїѧ бл҃гочести́вымъ . и҆ стра́сти смра́дныѧ ѿгна́лъ є҆сѝ , превозносѧ́щимъ хрⷭ҇та̀ фїлимѡ́не мꙋ́дре . Ꙗ҆́коже ѕвѣ́зды свѣ́тлыѧ тве́рди , цр҃кви прⷭ҇нѡ сїѧ́юще , кꙋ́пнѡ а҆рхи́ппъ чꙋ́дныи , и҆ а҆пфі́ѧ , фїлимѡ́нъ и҆ ѻ҆ни́симъ , помышле́нїѧ на́ша просвѣща́ютъ . боⷢ҇ . Но́въ ра́й на́мъ чре́во твоѐ вои́стинꙋ чⷭ҇таѧ ꙗ҆ви́сѧ , жи́зни дре́во воз̾раща́ѧ . и҆ оу҆ме́ршїѧ плодо́мъ дре́ва , па́ки в̾ ра́й , ѡ҆животвори́вши в̾ведѐ бцⷣе .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , неи҆зрече́нною мꙋ́дростїю , прише́дшагѡ ѡ҆бнови́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно воплоща́ема на́съ ра́ди , вѣ́рнїи є҆диномꙋ́дреннѡ пѣ́сньми велича́емъ . Со сщ҃е́нными ли́ки сщ҃е́нныхъ а҆пⷭ҇лъ , подо́бнѡ жи́тельствꙋеши на́ нб҃сѣхъ , бжⷭ҇твенымъ прича́стїемъ ѡ҆божа́емь , и҆ свѣ́томъ сїѧ́ѧ неи҆зрече́ннымъ , и҆ ра́достїю дх҃о́вною ст҃лю . фїлимѡ́не прⷭ҇нѡ и҆сполнѧ́емь . Ꙗ҆́кѡ чꙋ́дныи тѝ ѻ҆́бразъ . ꙗ҆́кѡ добро̀ и҆ красно̀ житїѐ твоѐ . ꙗ҆́кѡ пресла́внѡ и҆ оу҆спе́нїе твоѐ бл҃же́нне а҆пⷭ҇ле . ꙗ҆́кѡ свѣ́тлыи де́нь , в̾ не́мже ѡ҆ста́вль землена́ѧ , нбⷭ҇ныхъ высо́тъ доше́дъ веселѧ́сѧ . Дне́сь весели́тсѧ всѧ̀ хрⷭ҇то́ва цр҃кви , пра́зднественꙋю ра́дость дх҃о́внꙋю , соста́вльши въ па́мѧти твое́й . ю҆́же непоколѣби́мꙋ спасѝ , твои́ми и҆́же къ сп҃сꙋ и҆ бг҃ꙋ , бг҃опрїѧ́тными мл҃твами фїлимѡ́не сщ҃е́нне . Ра́ка моще́й твои́хъ , цѣле́бныѧ ка́пли и҆сточа́етъ сщ҃е́нно приходѧ́щимъ , бл҃же́нне фїлимѡ́не а҆пⷭ҇ле , недꙋ́ги оу҆ставлѧ́етъ , и҆ всѣ́хъ дш҃а ѡ҆сщ҃а́етъ , бжⷭ҇твенꙋю тѝ па́мѧть пра́зднꙋющимъ всегда̀ . боⷢ҇ . Но́сиши носѧ́щаго всѧ̀ , и҆ пита́еши пита́ющаго , ѻ҆́бразъ ржⷭ҇тва̀ николи́же свѣ́дѧщи пренепоро́чнаѧ . па́че оу҆ма̀ твоѐ чꙋ́до . а҆́нг҃лы оу҆дивлѧ́еши и҆ чл҃ки , свѣ́дꙋщихъ тѧ̀ є҆ди́нꙋ дв҃ꙋ бг҃омт҃рь .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . Досто́йнѡ є҆́сть .

свѣти́ленъ , пра́здникꙋ . Ю҆́же дре́вле провозвѣстѝ проро́ческїи собо́ръ , рꙋ́чкꙋ , и҆ же́злъ , и҆ скрижа́ль , и҆ несѣко́мꙋю го́рꙋ , мр҃і́ю бг҃оѻ҆трокови́цꙋ вѣ́рнѡ восхва́лимъ . дне́сь бо вво́дитсѧ во ст҃а́ѧ ст҃ы́хъ , воспита́тисѧ гдⷭ҇ви . сла́ва , и҆ ны́нѣ , то́йже .

Н=а стихо́внѣ , стⷯры . гла́съ , ѕ҃ . поⷣ . в̾ =тре́тїи дн҃ь . Дв҃ы сликоствꙋ́йте ,꙳ ѻ҆трокови́цы взыгра́йте ,꙳ свѣщѝ носѧ́ще .꙳ воспо́йте свѣ́тлѡ ,꙳ є҆ди́нꙋ бцⷣꙋ чи́стꙋю прест҃ꙋ́ю .꙳ и҆ нбⷭ҇наѧ воспо́йте .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . А҆́нг҃ловою тѧ̀ рꙋко́ю дв҃о ,꙳ пи́щею всѣ́хъ творе́цъ ,꙳ сн҃ъ тво́й пита́етъ влⷣчце чⷭ҇таѧ ,꙳ ст҃ы́хъ во ст҃а́ѧ .꙳ ꙗ҆влѧ́ѧ твоѐ ми́рови ,꙳ вели́чествїе пребо́льшее .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃ковь цр҃е́вꙋ . Ст҃ы́хъ прест҃а́ѧ дв҃о бг҃оневѣ́сто ,꙳ ро́ждьшаѧ влⷣкꙋ всѣ́хъ ,꙳ є҆ди́наго ѿ трⷪ҇цы .꙳ тогѡ̀ молѝ ,꙳ всѣ́хъ воспѣва́ющихъ тѧ̀ ,꙳ и҆зба́вити ѿ бѣ́дъ .

сла́ва , и҆ ны́нѣ . гла́съ , д҃ . Дне́сь бг҃овмѣсти́маѧ цр҃ковь бцⷣа , въ цр҃ковь бж҃їю приво́дитсѧ , и҆ заха́рїѧ тꙋ̀ под̾є́млетъ . дне́сь ст҃а́ѧ ст҃ы́хъ ра́дꙋетсѧ , и҆ ли́къ а҆́нг҃льскїи та́йнѡ торжествꙋ́етъ . с̾ ни́ми же и҆ мы̀ пра́з̾днꙋюще дне́сь , съ гаврїи́ломъ возопїе́мъ , ра́дꙋисѧ ѡ҆бра́дованнаѧ гдⷭ҇ь с̾ тобо́ю , и҆мѣ́ѧи ве́лїю млⷭ҇ть .

На литꙋргі́и , бл҃же́нна , пра́здникꙋ , пѣ́снь а҃ ѧ , на́ ѕ҃ . проки́мен̾ , ѱл҃о́мъ дв҃довъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ . сти́хъ . нб҃са̀ повѣ́даютъ сла́вꙋ бж҃їю , творе́нїе же рꙋ́кꙋ є҆гѡ̀ возвѣща́етъ тве́рдь . а҆пⷭ҇лъ , къ фїлимѡ́нꙋ . зача́ло , т҃в .= а҆ллилꙋ́їѧ . и҆сповѣ́дѧтъ нб҃са̀ чꙋдеса̀ твоѧ̀ гдⷭ҇и , и҆́бо и҆́стинꙋ твою̀ в̾ цр҃кви ст҃ы́хъ . =сти́хъ . бг҃ъ прославлѧ́емь в̾ совѣ́техъ ст҃ы́хъ . є҆ѵⷢ҇а́лїе , ѿ =лꙋкѝ . зача́ло , н҃ . =прича́стенъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ глаго́лы и҆́хъ .

Слꙋ́жба ст҃а́гѡ бл҃говѣ́рнагѡ вели́кагѡ кнѧ́ѕѧ миха́ила ꙗ҆росла́вича тверска́гѡ . Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . =На гдⷭ҇и возва́хъ , стⷯры . гла́съ , в҃ . К=і́ими похва́льными вѣнцы̀ , оу҆вѧзе́мъ чⷭ҇тнꙋ́ю главꙋ̀ твою̀ , и҆ всечⷭ҇тно́е тѣ́ло твоѐ и҆ бг҃ои҆з̾бра́нное . прїи́мша заколе́нїе непра́ведное . в̾ чистотѣ̀ воспита́нное житїѐ , и҆ цѣломꙋ́дрое и҆зво́лилъ є҆сѝ , нетлѣ́ннагѡ житїѧ̀ . мꙋжеꙋ́мнымъ смы́сломъ вра́жїю держа́вꙋ разрꙋши́лъ є҆сѝ и҆ бж҃їимъ посо́бїемъ , подаѧ̀ на́мъ ве́лїю млⷭ҇ть . Кі́ими пѣ́снеными похвала́ми , соста́вимъ пра́здникъ че́стенъ , бг҃омꙋ́драгѡ миха́ила , и҆́же хрⷭ҇та̀ ра́ди ѡ҆ста́ви тлѣ́ннꙋю сла́вꙋ земнꙋ́ю . и҆ сосꙋ́дъ че́стенъ ꙗ҆ви́сѧ ст҃а́гѡ дх҃а . ѕвѣзда̀ свѣтоно́снаѧ восїѧ̀ в̾ рꙋсѝ , ѡ҆зарѧ́ѧ всѧ̀ концы̀ . и҆ ꙗ҆́кѡ же́ртва непоро́чна принесе́сѧ хрⷭ҇тꙋ̀ . є҆мꙋ́же прилѣ́жнѡ мо́литсѧ , дарова́ти на́мъ ми́ръ и҆ ве́лїю млⷭ҇ть . Кі́ими пѣ́нїѧ пѣ́сньми , тебѐ миха́иле воз̾вели́чимъ . є҆го́же хрⷭ҇то́съ па́че є҆стества̀ воз̾вели́чивъ , и҆ непобѣди́ма во бранѣ́хъ показа̀ . свѣтоза́рное твоѐ лицѐ просвѣща́емо па́че сл҃нца . и҆ в̾ бж҃їю си́лꙋ ѡ҆болче́нъ , є҆го́же оу҆че́нїю послѣ́довалъ є҆сѝ . без̾зако́ннымъ пло́ть свою̀ пре́далъ є҆сѝ , и҆ претерпѣ́лъ є҆сѝ ле́стныѧ гнѣ́вы , за любо́вь созда́вшаго тѧ̀ .

=и҆́ны стⷯры . гла́съ , и҃ . поⷣ . ѽ =пресла́вное чꙋ́до . Ꙗ҆́кѡ вои́стинꙋ бжⷭ҇твенаѧ и҆ чⷭ҇тна́ѧ , восїѧ́вши па́мѧть твоѧ̀ рꙋ́сскимъ страна́мъ дне́сь , сла́вныи миха́иле црⷭ҇кагѡ ко́рене ст҃а́ѧ ѿ́расль , хрⷭ҇та̀ воз̾лю́бльши , є҆го́же ра́ди непра́ведное заколе́нїе претерпѣ́лъ є҆сѝ . тѣ́мъ молѝ бл҃же́нне , дарова́ти дш҃а́мъ на́шимъ ѡ҆чище́нїе согрѣше́нїемъ , ми́ръ и҆ ве́лїю млⷭ҇ть . Ра́дꙋисѧ всѐ чл҃чество ра́достїю дне́сь . и҆ да пое́тъ ликꙋ́ющи бжⷭ҇твеными пѣ́сньми цр҃кви хрⷭ҇то́ва , хва́лѧщи бл҃же́ннаго кн҃ѕѧ же и҆ мч҃нка . хрⷭ҇та́ бо ра́ди ꙗ҆́кѡ преходѧ́щее црⷭ҇тво земно́е воз̾ненави́дѣвша , гдⷭ҇а сп҃са ѿ дш҃и воз̾лю́бльша , и҆ непра́ведно оу҆бі́йство претерпѣ́вша , ника́коже проти́вѧщасѧ закала́емомꙋ . и҆ моли́сѧ спасти́сѧ дш҃а́мъ на́шимъ . Въ нбⷭ҇ныѧ ѻ҆би́тели ꙗ҆́кѡ на колесни́цѣ воз̾ше́лъ є҆сѝ , свое́ю кро́вїю ѡ҆червлени́въ ѻ҆дѣѧ́нїе . ꙗ҆́кѡ а҆́гнецъ непра́веднѡ заколе́нїе прїѧ́лъ є҆сѝ ѿ врага̀ кавгады́ѧ , ѕлѣ̀ живо́тъ сво́й и҆спрове́ргшаго . соблюдѝ гра́дъ се́й и҆ цр҃ковь свою̀ ѿ вра́жїѧ нападе́нїѧ , бл҃гоче́стнаѧ , лѣ́торасль бл҃же́нныи миха́иле . мч҃нкъ пресловꙋ́щїи , те́плыи застꙋ́пникъ рꙋ́сстѣй землѝ , и҆ всѣ́мъ страна́мъ оу҆твержде́нїе . но мо́лимъ тѧ̀ моли́сѧ ст҃е , без̾ вреда̀ сохрани́ти ѻ҆те́чество твоѐ , и҆ спасти́сѧ дш҃а́мъ на́шимъ .

сла́ва . гла́съ , ѕ҃ . Восїѧ̀ дне́сь ꙗ҆́кѡ сл҃нце страстоте́рпца па́мѧть вѣ́рныѧ созыва́ющи на весе́лїе та́йнѡ . хвала́ми ꙗ҆́кѡ цвѣ́ты кра́сными вѣнцы̀ спле́тше златоза́рны , к̾ честнѣ́й є҆гѡ̀ главѣ̀ принесе́мъ гл҃юще . ра́дꙋисѧ свѣ́тлаѧ ѕвѣздо̀ мы́сленыѧ тве́рди , и҆ те́плыи застꙋ́пниче гра́дꙋ на́шемꙋ . ра́дꙋисѧ поспѣ́шниче сꙋ́щимъ в̾ бѣда́хъ , и҆ тве́рдое ѡ҆гражде́нїе к̾ тебѣ̀ притека́ющимъ . ра́дꙋисѧ побѣ́дныи соверши́въ по́двигъ , и҆ вѣне́цъ прїи́мъ ѿ хрⷭ҇та̀ бг҃а . є҆го́же молѝ прилѣ́жнѡ пребл҃же́нне миха́иле , странѣ̀ на́шей ми́ръ пода́ти , и҆ на проти́вныѧ побѣ́дꙋ . и҆ гра́дъ тво́й невреди́мъ сохрани́ти мл҃твами твои́ми , и҆ спасти́сѧ дш҃а́мъ на́шимъ .

и҆ ны́нѣ , пра́здникꙋ . гла́съ , ѕ҃ . Дне́сь собо́ри вѣ́рныхъ соше́дшесѧ , дх҃о́внѣ торжествꙋ́емъ , и҆ бг҃оѻ҆трокови́цꙋ дв҃ꙋ и҆ бцⷣꙋ , въ цр҃ковь гдⷭ҇ню приводи́мꙋ , бл҃гоче́стнѡ восхва́лимъ . прои҆збра́ннꙋю ѿ всѣ́хъ ро́дъ , во ѻ҆би́телище всѣ́хъ цр҃ѧ хрⷭ҇та̀ и҆ бг҃а . дв҃ы свѣщѝ носѧ́ще пред̾и҆ди́те , при́снѡ дв҃ыѧ чтꙋ́ще честно́е прои҆схожде́нїе . мт҃ри печа́ль всю̀ ѿло́жше , ра́достнѡ спослѣ́дствꙋйте , мт҃ри бж҃їи быва́ющей . и҆ ра́дости ми́рꙋ хода́тайцѣ , всѝ оу҆́бѡ ра́достнѣ , є҆́же ра́дꙋйсѧ со а҆́нг҃лѡмъ возопїе́мъ ѡ҆бра́дованнѣй , при́снѡ молѧ́щейсѧ ѡ҆ дш҃а́хъ на́шихъ . вы́ходъ . проки́менъ , дню̀ .

Ѿ проро́чества и҆са́ина , чте́нїе .

Та́кѡ глаго́летъ гдⷭ҇ь , всѝ ꙗ҆зы́цы собра́шасѧ вкꙋ́пѣ , и҆ соберꙋ́тсѧ кнѧ́зи ѿ ни́хъ . и҆ кто̀ возвѣсти́тъ сїѧ̀ в̾ ни́хъ ; и҆ ꙗ҆́коже и҆з̾ нача́ла кто̀ слы́шана сотвори́тъ ва́мъ ; да приведꙋ́тъ свидѣ́тели своѧ̀ , и҆ ѡ҆правдѧ́тсѧ , и҆ да оу҆слы́шатъ , и҆ да рекꙋ́тъ и҆́стинꙋ . бꙋ́дете ми свидѣ́тели , и҆ а҆́зъ свидѣ́тель , гл҃етъ гдⷭ҇ь бг҃ъ , и҆ ѻ҆́трокъ , є҆го́же и҆збра́хъ , да позна́ете и҆ вѣ́рꙋете ми , и҆ разꙋмѣ́ете ꙗ҆́кѡ а҆́зъ є҆́смь . и҆ пре́жде менѐ не бы́сть и҆́нъ бг҃ъ , и҆ по мнѣ̀ небꙋ́детъ . а҆́зъ є҆́смь бг҃ъ , и҆ нѣ́сть ра́звѣ менѐ спаса́ѧи . а҆́зъ возвѣсти́хъ и҆ спасо́хъ , и҆ оу҆ничижи́хъ , и҆ небѣ̀ в̾ва́съ ѿчꙋжде́нїѧ . вы̀ мнѣ̀ свидѣ́тели , и҆ а҆́зъ свидѣ́тель гл҃етъ гдⷭ҇ь бг҃ъ . и҆ є҆щѐ ѿ нача́ла а҆́зъ є҆́смь , и҆ нѣ́сть и҆́же ѿ рꙋкꙋ̀ мое́ю и҆збавлѧ́ѧи . сотворю̀ , и҆ кто̀ ѿврати́тъ то̀ ; си́це гл҃етъ гдⷭ҇ь бг҃ъ , и҆збавлѧ́ѧи ва́съ ст҃ы́и і҆и҃левъ .

Ѿ премꙋ́дрости соло́мони , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ не многолѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрость человѣ́кѡмъ . и҆ во́зрастъ ста́рости , житїѐ нескве́рно . бл҃гоꙋго́денъ бг҃ови бы́въ , воз̾лю́бленъ бы́сть . и҆ живы́и посредѣ̀ грѣ́шникъ , преста́вленъ бы́сть . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хоти , премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та мно́га , оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни положи́ша в̾ помышле́нїи такова́гѡ , ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

На стихо́внѣ , стихѣ́ры , пра́здникꙋ . гла́съ , є҃ . Ра́дꙋетсѧ нб҃о и҆ землѧ̀ . нб҃о разꙋ́мное грѧдꙋ́щее зрѧ́ще , въ бжⷭ҇твеныи до́мъ воспита́тисѧ че́стнѡ , дв҃ꙋю є҆ди́нꙋ и҆ непоро́чнꙋю . к̾ не́йже дивѧ́сѧ заха́рїѧ вопїѧ́ше , две́ри гдⷭ҇нѧ , цр҃ко́вныѧ ѿве́рзи две́ри , ра́дꙋйсѧ в̾ не́й и҆ ликоствꙋ́й . разꙋмѣ́хъ бо и҆ вѣ́ровахъ , ꙗ҆́кѡ оу҆́же и҆збавле́нїе прїи́де ꙗ҆́вственѡ і҆и҃лю . и҆ роди́тсѧ и҆з̾ тебѐ бг҃ъ сло́во , да́рꙋѧи ми́рови ве́лїю млⷭ҇ть .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . А҆́нна бжⷭ҇твенаѧ бл҃года́ть ꙗ҆́вѣ , дарова́нїе чи́стꙋю при́снѡ дв҃ꙋю приво́дитъ съ весе́лїемъ , в̾ цр҃ковь бж҃їю . призва́вши пред̾хо́дѧтъ є҆́й ѻ҆трокови́цы , свѣщѝ носѧ́ще , и҆ гл҃юще , пойдѝ ча́до , сп҃сꙋ да бꙋ́деши приноше́нїе , и҆ бл҃гово́нное сокро́вище . вни́ди в̾ незаходи́маѧ , и҆ оу҆вѣ́ждь та́йны . и҆ оу҆гото́висѧ бы́ти і҆с҃ово вмѣсти́лище ве́село и҆ кра́сное , подаю́ща ми́рови ве́лїю млⷭ҇ть .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃ковь цр҃е́вꙋ . Внꙋ́трь въ цр҃ковь бж҃їю , бг҃овмѣсти́мыи хра́мъ воз̾лага́етсѧ дв҃аѧ прест҃а́ѧ . и҆ ѻ҆трокови́цы є҆́й свѣщѝ носѧ́ще пред̾хо́дѧтъ . и҆гра́етъ роди́телей сопрѧже́нїе и҆збра́нное , і҆ѡаки́мъ же и҆ а҆́нна ликоствꙋ́юще , ꙗ҆́кѡ роди́ста творца̀ ро́ждьшꙋю . ꙗ҆́же ликоствꙋ́ющи в̾ бжⷭ҇твеныхъ селе́нїихъ , и҆ пита́ема рꙋко́ю а҆́нг҃лѡвою всенепоро́чнаѧ , хрⷭ҇тꙋ̀ ꙗ҆́вльшисѧ мт҃и . да́рꙋющемꙋ ми́рови ве́лїю млⷭ҇ть .

сла́ва , ст҃о́мꙋ . гла́съ , и҃ . Прїидѣ́те восхва́лимъ чꙋдотво́рца и҆ мч҃нка зако́ннѡ пострада́вшаго . побѣ́ждьшаго сопроти́внаго врага̀ . и҆ ны́нѣ свѣ́тлѡ оу҆кра́шенъ пред̾стои́ши хрⷭ҇тꙋ̀ ра́дꙋѧсѧ . тѣ́мъ и҆ мы̀ пѣ́сньми па́мѧть є҆гѡ̀ ве́село любо́вїю похва́лимъ вопїю́ще . ра́дꙋисѧ вселе́ннѣй застꙋ́пниче и҆ побори́телю на врагѝ . ра́дꙋисѧ врачꙋ̀ болѧ́щимъ , и҆ бѣсо́мъ прогони́телю . ра́дꙋисѧ чꙋ́дныи миха́иле люби́мыи хрⷭ҇то́ви . за ны̀ молѝ ст҃ꙋ́ю трⷪ҇цꙋ , оу҆мири́ти ми́ръ и҆ спастѝ дш҃а на́ша .

и҆ ны́нѣ , пра́здникꙋ . гла́съ , то́йже . По ржⷭ҇твѣ̀ твое́мъ бг҃оневѣ́сто влⷣчце , прїи́де в̾ цр҃квь гдⷭ҇ню воспита́тисѧ во ст҃а́ѧ ст҃ы́хъ , ꙗ҆́кѡ ѡ҆сщ҃е́нна . тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй , пи́щꙋ ти приноша́ше . нбⷭ҇наѧ всѧ̀ оу҆диви́шасѧ , зрѧ́ще дх҃а ст҃а́гѡ в̾ тѧ̀ все́льшасѧ . тѣ́мже пречⷭ҇таѧ и҆ нескве́рнаѧ , ꙗ҆́же на́ нб҃сѣхъ и҆ на землѝ сла́вима , мт҃и бж҃їѧ , спасѝ ро́дъ на́шъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Возвы́сивыи оу҆́мъ сво́й къ бг҃ꙋ , и҆ житїѧ̀ со а҆́нг҃лы воз̾желѣ́лъ є҆сѝ . тлѣ́ннꙋю сла́вꙋ земнꙋ́ю ѡ҆ста́вилъ є҆сѝ бл҃же́нне . положи́лъ є҆сѝ дш҃ꙋ свою̀ за́ люди своѧ̀ . воспрїѧ́лъ є҆сѝ вѣне́цъ проти́вꙋ трꙋдо́въ свои́хъ , бг҃омꙋ́дре миха́иле . молѝ хрⷭ҇та̀ бг҃а , ѡ҆ чтꙋ́щихъ любо́вїю ст҃ꙋ́ю па́мѧть твою̀ . сла́ва , и҆ ны́нѣ , пра́здникꙋ . гла́съ , д҃ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе .

На оу҆́трени , на бг҃ъ гдⷭ҇ь , тропа́рь , пра́здникꙋ , два́жды . сла́ва , ст҃о́мꙋ . и҆ ны́нѣ , пра́здникꙋ .

По а҃ , стихоло́гїи , сѣда́ленъ . гла́съ , а҃ . Пра́ведныхъ пло́дъ і҆ѡаки́ма и҆ а҆́нны , прино́ситсѧ бг҃ови в̾ цр҃ковь ст҃ꙋ́ю , пло́тїю младе́нствꙋющи пита́тельница жи́зни на́шеѧ . ю҆́же бл҃гословѝ сщ҃е́нныи заха́рїѧ . сїю̀ всѝ ꙗ҆́кѡ мт҃рь бж҃їю вѣ́рнѡ да оу҆блажи́мъ . сла́ва , и҆ ны́нѣ , то́йже .

По в҃ , стихоло́гїи , сѣда́ленъ . гла́съ , д҃ . Пре́жде зача́тїѧ чⷭ҇таѧ ѡ҆ст҃и́сѧ бг҃ови , и҆ ро́ждьшисѧ на землѝ , да́ръ принесе́сѧ є҆мꙋ̀ , и҆сполнѧ́ющи ѻ҆те́ческое ѡ҆бѣща́нїе . въ бжⷭ҇твенѣмъ же хра́мѣ , ꙗ҆́кѡ вои́стинꙋ бжⷭ҇твенаѧ цр҃кви , ѿ младе́нства со свѣща́ми свѣ́тлыми вдана̀ бы́вши . ꙗ҆ви́сѧ прїѧ́телище неприкоснове́номꙋ , и҆ бжⷭ҇твеномꙋ свѣ́тꙋ . вели́ко вои́стинꙋ происхожде́нїе твоѐ є҆ди́на бг҃оневѣ́стнаѧ . сла́ва , и҆ ны́нѣ , то́йже .

по хвали́те и҆́мѧ гдⷭ҇не , припѣ́въ : Велича́емъ тѧ̀ страстоте́рпче хрⷭ҇то́въ , кн҃же миха́иле , и҆ чте́мъ ст҃ꙋ́ю па́мѧть твою̀ , ты́ бо мо́лиши за на́съ хрⷭ҇та̀ бг҃а на́шегѡ . ѱл҃о́мъ и҆збра́нныи : бг҃ъ на́мъ прибѣ́жище .

По полїєлеѡ́сѣ , сѣда́ленъ . гла́съ , д҃ . Ꙗ҆ви́сѧ дне́сь застꙋпле́нїе гра́дꙋ твоемꙋ̀ и҆ лю́демъ , прест҃о́е тѣ́ло твоѐ чⷭ҇тно́е . є҆́же прїи́мши цр҃кви бж҃їѧ , весели́тъ срⷣца̀ пою́щихъ тѧ̀ миха́иле . вⷤ . сла́ва , и҆ ны́нѣ , боⷢ҇ . Пречи́стѣи рꙋ́цѣ своѝ дв҃о мт҃и просте́рши , покры́й надѣ́ющїѧсѧ на тѧ̀ , и҆ сн҃ꙋ твоемꙋ̀ зовꙋ́щїѧ . всѣ́мъ пода́ждь хрⷭ҇тѐ млⷭ҇ти твоѧ̀ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . всѧ́ко дыха́нїе . =є҆ѵⷢ҇а́лїе , ѿ =лꙋкѝ . заⷱ҇ , р҃ѕ . ѱало́мъ , н҃ .

сла́ва . моли́твъ ра́ди страстоте́рпча , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Дне́сь вѣ́рныхъ собо́ри ли́къ дх҃о́вныи соста́вльше , ѡ҆ па́мѧти ст҃а́гѡ мч҃нка ст҃олѣ́пнѡ ликоствꙋ́емъ . дне́сь весе́лїемъ просла́вимъ гдⷭ҇а , просла́вльшаго бл҃же́ннаго миха́ила , семꙋ̀ а҆́бїе оу҆чꙋ́вствившесѧ . дне́сь кла́нѧющесѧ чꙋдото́чномꙋ є҆гѡ̀ гро́бꙋ возопїе́мъ . ра́дꙋисѧ дрꙋ́же гдⷭ҇нь , попра́выи ѕмїе́вꙋ главꙋ̀ . ра́дꙋисѧ и҆́же по ѻ҆бы́чаю невре́днѡ ѻ҆́бразъ сохра́ньшемꙋ . ра́дꙋисѧ за хрⷭ҇то́вы за́повѣди оу҆бїе́нїе прїи́мшемꙋ . є҆го́же тѣ́ло по оу҆бїе́нїи на мѣ́стѣ пꙋ́стѣ пове́рженѡ . мно́зи же вѣ́рнїи ви́дѣша ѿ негѡ̀ сто́лпъ ѻ҆́гненъ ѿ землѝ до нб҃сѐ . ра́дꙋисѧ цвѣ́те бл҃гово́нныи , неꙋвѧда́емыи рꙋ́сскїи непреста́й молѧ́сѧ хрⷭ҇тꙋ̀ , поми́ловати и҆ спастѝ свѣтоно́снꙋю па́мѧть твою̀ пра́зднꙋющихъ .

кано́нъ , пра́здникꙋ . гла́съ , д҃ . со і҆рмосо́мъ , на́ ѕ҃ . и҆ ст҃о́мꙋ два̀ кано́на , на и҃ . кано́нъ , ст҃о́мꙋ . гла́съ , и҃ . пѣ́снь , а҃ . і҆рмо́съ . Пѣ́снь воз̾сле́мъ лю́дїе чꙋдотво́рцꙋ бг҃ꙋ , свобо́ждьшемꙋ і҆и҃лѧ ѿ рабо́ты , пѣ́снь побѣ́днꙋю пою́ща и҆ вопїю́ща , воспое́мъ тебѣ̀ є҆ди́номꙋ влⷣцѣ .

запѣ́въ : Ст҃ы́и бл҃говѣ́рныи вели́кїи кнѧ́же миха́иле , молѝ бг҃а ѡ҆ на́съ . Въ по́мощь тебѐ хрⷭ҇тѐ призыва́ю , и҆ дерза́ю воспѣ́ти страстоте́рпца твоегѡ̀ па́мѧть , оу҆стна́ми недосто́йными . влⷣко хрⷭ҇тѐ оу҆твердѝ помышле́нїе , на хвалословле́нїе твоегѡ̀ оу҆го́дника . Рꙋ́сское оу҆добре́нїе , и҆ странѣ̀ на́шей похвалꙋ̀ и҆ крѣ́пость , сво́й показа́въ доброꙋ́мныи смы́слъ , бг҃омꙋ́дре миха́иле досточꙋ́дне . Съ де́рзостїю прїѧ́лъ є҆сѝ хрⷭ҇то́во оу҆че́нїе в̾ срⷣцы , є҆́же положи́ти дш҃ꙋ свою̀ за́ дрꙋги своѧ̀ . ꙗ҆́коже хрⷭ҇то́съ за ны̀ кро́вь свою̀ пролїѧ̀ . боⷢ҇ . Застꙋ́пнице скорбѧ́щимъ , спасе́нїю наде́жда ненадѣ́ющимсѧ бцⷣе препѣ́таѧ , молѝ прилѣ́жнѡ и҆зба́витисѧ на́мъ ѿ бѣ́дъ .

Дрꙋгі́и , кано́нъ , ст҃о́мꙋ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ ходи́въ і҆и҃ль , по бе́зднѣ стопа́ми , гони́телѧ фараѡ́на , ви́дѧ потоплѧ́ема , бг҃ꙋ побѣ́днꙋю пѣ́снь пое́мъ вопїѧ́ше .

запѣ́въ : Ст҃ы́и бл҃говѣ́рныи вели́кїи кнѧ́же миха́иле , молѝ бг҃а ѡ҆ на́съ . Ꙗ҆́кѡ по зако́нꙋ ходи́въ , смире́нꙋю мꙋ́дрость воспрїи́мъ вели́кїи страда́льче . со ст҃ы́ми трⷪ҇цѣ пред̾стоѧ̀ , моли́сѧ ѡ҆чище́нїе на́мъ дарова́ти тебѐ похвалѧ́ющимъ . Бжⷭ҇твеное бога́тство и҆сцѣле́нїи , и҆ мѵ́рѡ бл҃гово́нное и҆сточа́етъ хра́мъ тво́й ст҃е . в̾ не́мже пое́мъ хрⷭ҇та̀ бг҃а , просла́вльшаго тебѐ . Незаходи́мое сл҃нце в̾ себѣ̀ стѧжа́въ хрⷭ҇та̀ бг҃а на́шегѡ , пресла́вныи миха́иле , ѡ҆ст҃ѝ на́съ чⷭ҇тнꙋ́ю па́мѧть твою̀ почита́ющихъ .= боⷢ҇ . К=раснꙋ̀ и҆ и҆збра́ннꙋ всечи́стꙋю разꙋмѣ́въ тѧ̀ сн҃ъ бж҃їи всенепоро́чнаѧ , сн҃ъ тво́й бы́сть , сы́ны сотворѝ бл҃года́тїю бцⷣꙋ тѧ̀ чтꙋ́щїѧ .

катава́сїѧ : Спасѐ лю́ди чꙋдодѣ́ѧ влⷣко , мо́крꙋю мо́рѧ во́лнꙋ и҆зсꙋши́въ дре́вле , во́лею же ро́ждьсѧ ѿ дв҃ы , стезю̀ прохо́днꙋ нб҃сѐ положѝ на́мъ , є҆го́же по сꙋществꙋ̀ , ра́вна ѻ҆ц҃ꙋ́ же и҆ земны́мъ сла́вимъ .

пѣ́снь , г҃ . і҆рмо́съ . Оу҆тверди́сѧ се́рдце моѐ ѡ҆́ гдⷭ҇ѣ , воз̾несе́сѧ ро́гъ мо́й ѡ҆́ бз҃ѣ мое́мъ , разшири́шасѧ на врагѝ моѧ̀ оу҆ста̀ моѧ̀ , воз̾весели́хсѧ ѡ҆ спасе́нїи твое́мъ . Ѻ҆би́телище бы́сть ст҃а́гѡ дх҃а твоѐ ст҃о́е срⷣце . и҆́мже не оу҆боѧ́лсѧ є҆сѝ непра́веднагѡ царѧ̀ ꙗ҆́рости , страстоте́рпче миха́иле . Ѿ ст҃о́ю бо́кꙋ бг҃омꙋ́дрыѧ ѯе́нїи бл҃же́нне роди́лсѧ є҆сѝ . с̾ не́ю же тѧ̀ бл҃жи́мъ страда́льче прехва́льне , спасѝ гра́дъ сво́й и҆ лю́ди пою́щїѧ тѧ̀ . Заколе́нъ бы́сть ѿ непра́ведныхъ твои́хъ оу҆бі́ицъ , вопїѧ́ше влⷣцѣ хрⷭ҇тꙋ̀ , прїимѝ дꙋ́хъ мо́й влⷣко . на тѧ́ бо оу҆пова́нїе моѐ возложи́хъ гдⷭ҇и .= боⷢ҇ . Г=лаго́лъ проповѣ́дникъ бг҃огла́сныхъ и҆сполнѧ́ютсѧ . сегѡ̀ родѝ дв҃аѧ но́выи младе́нецъ , а҆да́ма старѣ́йша , и҆ сопресто́льна роди́телю .

и҆́нъ , і҆рмо́съ . Нѣ́сть ст҃а ꙗ҆́коже ты̀ , гдⷭ҇и бж҃е мо́й , вознесы́и ро́гъ вѣ́рныхъ си бл҃же , и҆ оу҆тве́рждь и҆́хъ на ка́мени и҆сповѣ́данїѧ тѝ . Весе́лїемъ весели́тсѧ хрⷭ҇то́ва цр҃кви в̾ па́мѧть твою̀ ст҃е , и҆ творцꙋ̀ вопїе́тъ , ты́ ми гдⷭ҇и крѣ́пость , и҆ прибѣ́жище и҆ оу҆твержде́нїе . До́блѧго вѣне́чника , и҆ страда́льца хрⷭ҇то́ва восхва́лимъ свѣ́тлѡ , наꙋчи́вшаго на́съ хрⷭ҇то́ви вопи́ти , ст҃ъ є҆сѝ гдⷭ҇и . Ни црⷭ҇тва жела́нїе , ни пи́щи наслажде́нїе , ни сребрꙋ̀ ни ѕла́тꙋ воз̾желѣ́въ ; но хрⷭ҇тꙋ̀ є҆ди́номꙋ вопїѧ́ше , ст҃ъ є҆сѝ гдⷭ҇и , и҆но́го бо ра́звѣ тебѐ незна́ю .= боⷢ҇ . И҆=збавлѧ́ющагѡ чл҃ки преслꙋша́нїѧ , и҆ лю́таго паде́нїѧ , и҆́же всемꙋ̀ вино́внаго , чⷭ҇таѧ и҆ всенепоро́чнаѧ родила̀ є҆сѝ .

катава́сїѧ : Прїидѝ к̾ пѣ́нїю ра́бъ свои́хъ , бл҃года́телю , врага̀ смирѧ́ѧ воз̾несе́нꙋю горды́ню . терпѧ́ же всеви́дче грѣха̀ . превы́ше непоколе́блемо оу҆тверже́ны , бл҃же пѣвцы̀ степе́немъ вѣ́ры .

конда́къ , и҆ и҆́косъ , пра́здникꙋ .

сѣда́ленъ , ст҃о́мꙋ . гла́съ , и҃ . Премꙋ́дростїю бж҃їею разꙋмѣ́въ мимоходѧ́щꙋю жи́знь , и҆ ѡ҆ кнѧже́нїи небре́гъ , но на нбⷭ҇ное црⷭ҇тво притечѐ , повинꙋ́ѧсѧ сыновцꙋ̀ . ꙗ҆́кѡ ѻ҆вча̀ неѕло́биво без̾ пра́вды ноже́мъ закала́хꙋ ꙗ҆́кѡ свирѣ́пїи ѕвѣ́рїе . без̾ѕло́бива а҆́гньца без̾ вины̀ оу҆бива́юще . тѣ́мъ и҆ со а҆́нг҃лы веселѧ́сѧ миха́иле ст҃е , молѝ хрⷭ҇та̀ бг҃а грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . двⷤа . сла́ва , и҆ ны́нѣ , боⷢ҇ . Безневѣ́стнаѧ чи́стаѧ бцⷣе дв҃о , є҆ди́на вѣ́рнымъ пред̾ста́тельнице и҆ покро́ве , бѣ́дъ и҆ скорбе́й , и҆ лю́тыхъ ѡ҆бстоѧ́нїи всѣ́хъ и҆зба́ви , и҆́же на тѧ̀ наде́ждꙋ ѻ҆трокови́це и҆мꙋ́щїѧ . и҆ дш҃а на́ша спасѝ бжⷭ҇твеными мольба́ми сѝ .

пѣ́снь , д҃ . і҆рмо́съ . Проро́къ а҆вва́кꙋмъ , мы́сленныма ѻ҆чи́ма прови́дѣ гдⷭ҇и прише́ствїе твоѐ . тѣ́мже и҆ вопїѧ́ше , ѿ ю҆́га прїи́детъ бг҃ъ . сла́ва си́лѣ твое́й , сла́ва хрⷭ҇тѐ прише́ствїю твоемꙋ̀ . Прїи́демъ бра́тїе , къ честнѣ́й ра́цѣ , во́ина хрⷭ҇то́ва и҆ мч҃нка миха́ила , и҆ ѡ҆блобыза́емъ серде́чными оу҆стна́ма , прїи҆ма́юще неѡ҆скꙋ́дныѧ да́ры ѿ трꙋдополо́жника хрⷭ҇та̀ , и҆ сп҃са дш҃а́мъ на́шимъ . Бж҃їимъ про́мысломъ , и҆ ст҃а́гѡ дх҃а дѣ́телїю , твоѐ ст҃о́е тѣ́ло ѿ гꙋби́тельныѧ страны̀ принесено̀ бы́сть , и҆сточа́ѧ на́мъ рѣ́ки и҆сцѣле́нїемъ , стрꙋѧ́ми крове́й твои́хъ миха́иле . Послѣ́довалъ є҆сѝ хрⷭ҇тꙋ̀ , и҆ мꙋ́цѣ є҆гѡ̀ оу҆подо́билсѧ є҆сѝ пребл҃же́нне бг҃оно́се миха́иле . пѣвцы̀ своѧ̀ сохранѧ́й , и҆ гра́дъ на́шъ застꙋпѝ ѿ нахожде́нїѧ пога́ныхъ . и҆ ѿ всѣ́хъ бѣ́дъ , бг҃опрїѧ́тными твои́ми моли́твами .= боⷢ҇ . П=росвѣтѝ чи́стаѧ дꙋшѝ моеѧ̀ ѻ҆́чи свѣ́тъ роди́вшаѧ , да непости́гнетъ менѐ грѣхо́внаѧ тма̀ тѧ́жкаѧ , и҆ глꙋбина̀ неча́ѧнїѧ покры́етъ мѧ̀ . но сама́ мѧ спасѝ , и҆ напра́ви к̾ тишинѣ̀ бжⷭ҇твенагѡ хотѣ́нїѧ .

и҆́нъ , і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃олѣ́пнѡ зове́тъ вопїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Бл҃года́тїю и҆́з̾млада в̾ вѣ́рѣ чи́стѣ воспита́нъ . ча́стыми трꙋды̀ и҆ любо́вїю влⷣцѣ послѣ́довалъ є҆сѝ . и҆ наде́жею є҆гѡ̀ , льсти́ваго врага̀ посрами́лъ є҆сѝ . Врачевство̀ неи҆стощи́мое ра́ка твоѧ̀ показа́сѧ бл҃же́нне , и҆ приста́нище небꙋ́рное . всѝ и҆́же вѣ́рою притека́ющїи ѡ҆брѣта́емъ ѿ ѕлы́хъ и҆збавле́нїе . Любо́вїю ко хрⷭ҇тꙋ̀ привѧза́емь , тѣ́мъ и҆ даро́мъ сподо́бльсѧ , стра́сти разли́чныѧ и҆сцѣлѧ́ти . сегѡ̀ ра́ди твоѐ соверша́емъ пра́зднество бг҃омꙋ́дре .= боⷢ҇ . П=росвѣти́ мѧ пречⷭ҇таѧ гжⷭ҇е ѡ҆мра́чнаго грѣхо́вными страстьмѝ , в̾ тлѣ́нїи лежа́ща . мл҃твами твои́ми разрѣшѝ .

катава́сїѧ : Ро́да человѣ́ча ѡ҆бновле́нїе , дре́вле поѧ̀ проро́къ а҆вва́кꙋмъ провозвѣща́етъ , ви́дѣти неи҆зрече́ннѡ сподо́бивсѧ ѻ҆́бразъ . мла́до дѣ́тище бо и҆з̾ горы̀ дв҃ыѧ , и҆зы́де лю́демъ на ѡ҆бновле́нїе сло́во .

пѣ́снь , є҃ . і҆рмо́съ . Гдⷭ҇и бж҃е на́шъ , ми́ръ да́ждь на́мъ . гдⷭ҇и бж҃е на́шъ , стѧжи́ ны . гдⷭ҇и , ра́звѣ бо тебѐ и҆но́гѡ незна́емъ , и҆́мѧ твоѐ и҆мѧнꙋ́емъ . Гдⷭ҇и бж҃е мо́й миха́илъ вопїѧ́ше , ты̀ оу҆́бѡ гдⷭ҇и на́съ ра́ди сме́рти вкꙋси́лъ є҆сѝ . и҆ спа́слъ є҆сѝ ро́дъ чл҃ческїи , свое́ю кро́вїю хрⷭ҇тѐ бж҃е . Гдⷭ҇и бж҃е мо́й сподо́би мѧ прїѧ́ти нбⷭ҇нагѡ селе́нїѧ , и҆ сла́вы неи҆зрече́нныѧ . и҆ в̾ тлѣ́нныхъ мѣ́стѡ нетлѣ́ннаѧ , пода́ждь влⷣко вопїѧ́ше бг҃ови́дче . Тезоимени́те вы́шнѧгѡ воево́ды миха́иле бг҃озра́чне . с̾ ни́мже оу҆молѝ хрⷭ҇та̀ пода́ти ми́ръ странѣ̀ на́шей . и҆ оу҆ти́шити вра́жїѧ стремле́нїѧ .= боⷢ҇ . О=у҆крѣпѝ влⷣчце сла́вѧщихъ тѧ̀ на проти́вныѧ врагѝ , ꙗ҆́кѡ дв҃да на голїа́ѳа . да тебѐ веселѧ́щесѧ воспѣва́емъ . ра́дꙋисѧ покро́ве ст҃ы́и , и҆ застꙋ́пнице ро́дꙋ на́шемꙋ .

и҆́нъ , і҆рмо́съ . Бж҃їимъ свѣ́томъ тѝ бл҃же , оу҆́тренюющихъ тѝ дш҃а любо́вїю , просвѣтѝ молю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Наста̀ всечестны́и пра́здникъ , и҆ сщ҃е́нное торжество̀ миха́ила сла́внагѡ , носѧ́щагѡ на́мъ ра́дость вѣ́чнꙋю . в̾ не́йже сла́вимъ гдⷭ҇а просла́вльшагѡ є҆гѡ̀ . Добродѣ́тельми оу҆кра́шеныи бл҃голѣ́пїемъ , свѣ́тлыи миха́иле , страда́нїемъ вѣнча́всѧ . врага́ же и҆ сыновца̀ посра́мльше , по хрⷭ҇тѣ̀ прїе́млющи заколе́нїе . Слы́шано бы́сть во все́мъ ми́рѣ честно́е и҆ сщ҃е́нное страда́нїе твоѐ . и҆ всѧ́къ ꙗ҆зы́къ составлѧ́етъ сла́вити хрⷭ҇та̀ , тебѐ просла́вльшаго .= боⷢ҇ . П=реста̀ оу҆́бѡ тлѣ́нїе , дв҃аѧ бо родѝ нетлѣ́ннѡ бг҃а сло́ва , вы́ше є҆стества̀ и҆ сло́ва дв҃ою пребы́вши .

катава́сїѧ : И҆з̾ но́щи дѣ́лъ ѡ҆мраче́нныѧ льстѝ , ѡ҆чище́нїе на́мъ хрⷭ҇тѐ бо́дренно , ны́нѣ содѣва́ющимъ пѣ́снь ꙗ҆́кѡ бл҃года́телю . прїи́деши даѧ̀ оу҆до́бенъ пꙋ́ть . по немꙋ́ же ходѧ́ще ѡ҆брѧ́щемъ сла́вꙋ .

пѣ́снь , ѕ҃ . і҆рмо́съ . Ꙗ҆́коже пррⷪ҇ка и҆зба́ви и҆з̾ глꙋбины̀ преи҆спо́днїѧ , хрⷭ҇тѐ бж҃е , и҆ менѐ ѿ грѣ́хъ мои́хъ и҆зба́ви , ꙗ҆́кѡ чл҃колю́бецъ . и҆ напра́ви живо́тъ мо́й молю́тисѧ . Свѣ́томъ бл҃года́ти ѡ҆зарѧ́емь страстоте́рпче мꙋ́дре , невозвра́тнѡ ше́ствовалъ є҆сѝ пꙋте́мъ вводѧ́щемъ к̾ вы́шнемꙋ і҆єрⷭ҇ли́мꙋ . ст҃ы́и бо дх҃ъ наста́вилъ тѧ є҆́сть , живы́и в̾ срⷣцы твое́мъ миха́иле . Тлѣ́ющими бꙋ́дꙋщаѧ и҆змѣнѝ , ꙗ҆́кѡ ме́чь ѡ҆бою́дꙋ ѻ҆́стръ , воѡ҆рꙋ́жьсѧ стра́хомъ хрⷭ҇то́вымъ . го́рькꙋю сме́рть нивочто́же вмѣни́лъ є҆сѝ , сла́вы вы́шнїѧ жела́ѧ . Оу҆́мъ сво́й к̾ бг҃ꙋ впери́въ , наде́жею и҆ вѣ́рою оу҆крѣ́пльсѧ , ꙗ҆́кѡ во́инъ непобѣди́мъ . заколе́нїѧ непра́веднаго неꙋбоѧ́лсѧ є҆сѝ мꙋ́дре , бг҃ови́дче миха́иле .= боⷢ҇ . Т=ебѣ̀ припа́дающе гжⷭ҇е , и҆ вѣ́рою покланѧ́ющесѧ мо́лимъ тѧ . ра́дꙋисѧ бг҃обл҃же́ннаѧ дв҃це , покро́ве и҆ ѡ҆гражде́нїе на́ше , помо́щнице в̾ бѣда́хъ сꙋ́щимъ . спаси́ ны не и҆мꙋ́щихъ по́мощи . на тѧ́ бо надѣ́емсѧ .

и҆́нъ , і҆рмо́съ . Жите́йскагѡ мо́рѧ воз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вопїю́ ти , воз̾ведѝ ѿ тлѝ живо́тъ мо́й многомлⷭ҇тиве . Житїѐ вре́менное презрѣ́въ , и҆ ѡ҆ кн҃же́нїи неради́въ свѣ́та сегѡ̀ . невоспроти́вльсѧ врагꙋ̀ и҆ сыновцꙋ̀ . но па́че на́ гдⷭ҇а взира́ше мы́слїю . И҆́же свѣ́тлыи тво́й пра́здникъ соверша́ющихъ бл҃же́нне моли́сѧ , ѻ҆те́чество твоѐ сохрани́ти ѿ вра́гъ ненавѣ́тнѡ . и҆ ми́рно строе́нїе дарова́ти странѣ̀ на́шей мл҃твами твои́ми . Кнѧже́нїе земно́е и҆ црⷭ҇кое оу҆краше́нїе ѡ҆ста́вль , воспрїѧ́тъ вѣне́цъ и҆з̾ бж҃їи влⷣчни десни́цы , и҆ со а҆́нг҃лы ликꙋ́еши . молѝ гдⷭ҇а за на́съ чтꙋ́щїѧ твою̀ па́мѧть .= боⷢ҇ . О=у҆сты̀ и҆ по́мысломъ , и҆ срⷣцемъ пречⷭ҇таѧ проповѣ́дꙋемъ веселѧ́щесѧ . тобо́ю бо бг҃ови примири́хомсѧ , ѿринове́нїи престꙋпле́нїемъ пе́рвїе пра́ѻ҆ц҃а .

катава́сїѧ : Пловы́и і҆ѡ́на в̾ мꙋтѣ́хъ морски́хъ , прїитѝ молѧ́шесѧ , и҆ бꙋ́рю оу҆толи́ти . оу҆нзе́нъ же а҆́зъ мꙋча́щагѡ стрѣло́ю . хрⷭ҇тꙋ̀ воспѣва́ю ѕлы́хъ гꙋби́телю , ско́рѡ прїитѝ к̾ мое́й лѣ́ности .

конда́къ . гла́съ , в҃ . Вы́шнихъ и҆ща̀ , и҆ земнꙋ́ю сла́вꙋ презрѣ́въ . и҆ цр҃ковь бж҃їю ѡ҆багри́лъ є҆сѝ свое́ю кро́вїю . за ню́же пострада́лъ є҆сѝ ст҃е миха́иле . заколе́нїе непра́ведное прїи́мъ веселѧ́сѧ . со а҆́нг҃лы пред̾стоѧ̀ молѝ за всѧ̀ ны̀ . и҆́косъ . Сла́вꙋ возненави́дѣлъ є҆сѝ тлѣ́ннꙋю и҆ мимотекꙋ́щꙋю . и҆ добродѣ́тели ꙗ҆ви́лсѧ є҆сѝ сосꙋ́дъ сла́вне ѿ ю҆́ности . и҆ зако́нъ бж҃їи ѿ дш҃и возлюби́въ . и҆ зрѣ́нїе к̾ жи́зни грѧдꙋ́щей . че́сти земны́ѧ и҆ сла́сти небре́гъ . нетлѣ́нное црⷭ҇тво воспрїѧ́лъ є҆сѝ . хрⷭ҇то́вѣ за́повѣди послѣ́дꙋѧ , положи́лъ є҆сѝ дш҃ꙋ свою̀ заны̀ . и҆ хрⷭ҇то́вѣ стрⷭ҇ти оу҆подо́билсѧ є҆сѝ , заколе́нъ в̾ ре́бра , и҆ кро́вїю свое́ю и҆зба́вилъ є҆сѝ на́съ , пога́ныхъ наше́ствїѧ и҆ го́рькїѧ сме́рти . сегѡ̀ ра́ди вопїе́мъ ти страстоте́рпче миха́иле , со а҆́нг҃лы пред̾стоѧ̀ , моли́сѧ за всѧ̀ ны̀ .

пѣ́снь , з҃ . і҆рмо́съ . Халдѣ́йскаѧ пе́щь ѻ҆гне́мъ распала́ема , прохлажда́шесѧ дх҃омъ бж҃їимъ застꙋпле́нїемъ , ѻ҆́троцы же поѧ́хꙋ , бл҃гослове́нъ бг҃ъ ѻ҆ц҃ъ на́шихъ . Вели́чїе на́ше и҆ похвала̀ , ты̀ є҆сѝ миха́иле бг҃омꙋ́дре . тобо́ю бо ѿ пога́нскїѧ рабо́ты свободи́хомсѧ . и҆ ны́нѣ молѝ за́ родъ сво́й и҆ лю́ди вопїю́щїѧ , бл҃гослове́нъ бг҃ъ ѻ҆ц҃ъ на́шихъ . Ты̀ оу҆подо́билсѧ є҆сѝ мѡѷсе́ю бг҃ови́дцꙋ , сокрꙋше́нымъ срⷣцемъ молѧ́сѧ ѡ҆ ста́дѣ свое́мъ , и҆зба́вити гра́дъ сво́й и҆ лю́ди ѿ вра́жїѧ рабо́ты вопїю́щїѧ . бл҃гослове́нъ бг҃ъ ѻ҆ц҃ъ на́шихъ . Всепохва́льныи гла́съ и҆ мольбꙋ́ ти воз̾сыла́емъ , и҆ ра́цѣ моще́й твои́хъ кла́нѧемсѧ бл҃же́нне миха́иле . просѝ ми́ра странѣ̀ на́шей . и҆ дш҃а́мъ на́шимъ ѡ҆ставле́нїе грѣхо́въ пою́щимъ . бл҃гослове́нъ бг҃ъ ѻ҆ц҃ъ на́шихъ .= боⷢ҇ . Н=еи҆спи́саннаѧ мно́гими прⷪ҇ро́ки . нисвѣ́дома же бы́сть дв҃о , нбⷭ҇ными слꙋжа́щими бг҃ꙋ а҆́нг҃лы . нн҃ѣ же тѧ̀ всѝ свѣ́мы бцⷣꙋ , твоеѧ̀ тре́бꙋемъ по́мощи , и҆ застꙋпле́нїѧ бл҃гослове́наѧ .

и҆́нъ , і҆рмо́съ . Хладода́тельнꙋ оу҆́бѡ пе́щь сотворѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ оу҆вѣща̀ вопи́ти , бл҃гослове́нъ бг҃ъ ѻ҆ц҃ъ на́шихъ . Ле́стїю прелꙋка́вагѡ дре́вле , ѡ҆червлена̀ бы́сть землѧ̀ кро́вїю а҆́велѧ братоꙋбі́йственою рꙋко́ю ка́ина . ны́нѣ же кро́вїю твое́ю ѡ҆кро́пльшисѧ , бл҃гоꙋха́нїѧ же́ртвꙋ хрⷭ҇то́ви приноша́етъ , вопїю́щимъ , бл҃гослове́нъ бг҃ъ ѻ҆ц҃ъ на́шихъ . Бжⷭ҇твенаѧ и҆ пресвѣ́тлаѧ па́мѧть твоѧ̀ , ꙗ҆́кѡ нб҃о свѣтоза́рнѡ показа́сѧ . ꙗ҆́кѡ сл҃нце свѣтоно́сно просвѣща́ѧ , и҆́же без̾ сꙋмнѣ́нїѧ хрⷭ҇то́ви вопїю́щихъ , бл҃гослове́нъ бг҃ъ ѻ҆ц҃ъ на́шихъ . Кто̀ неꙋдиви́тсѧ , и҆ кто̀ невоспое́тъ и҆ просла́витъ вѣ́рнѡ , пресла́внаго мч҃нка хрⷭ҇то́ва миха́ила . хрⷭ҇то́ва ра́ди смире́нїѧ возненави́дѣвша , дїади́мꙋ и҆ црⷭ҇тво .= боⷢ҇ . Т=обо́ю на́мъ дв҃це свѣ́тъ восїѧ̀ те́мнымъ , и҆ ѿпꙋ́стъ плѣне́нымъ . ты́ бо родѝ зижди́телѧ всѣ́мъ бг҃а . оу҆ него́же и҆спросѝ пречⷭ҇таѧ , посла́ти вѣ́рнымъ ве́лїю млⷭ҇ть .

катава́сїѧ : Всѣ́хъ цр҃ѧ оу҆кори́ша любо́вїю , без̾чи́сленно ꙗ҆рѧ́щасѧ , привлече́ннїи ѻ҆́троцы , мꙋчи́телѧ ѕлобо́жное ꙗ҆зыковре́дїе . и҆́хже неприкоснꙋ́сѧ ѻ҆́гнь мно́гїи . влⷣцѣ гл҃ютъ , во́ вѣки бл҃гослове́нъ є҆сѝ .

пѣ́снь , и҃ . і҆рмо́съ . Покрыва́ѧй вода́ми превы́спреннѧѧ своѧ̀ , полага́ѧй мо́рю предѣ́лъ песо́къ , и҆ содержа́и зе́млю . тѧ̀ пое́тъ сл҃нце , тѧ̀ сла́витъ лꙋна̀ , тебѣ̀ прино́ситъ хвалꙋ̀ всѧ̀ тва́рь , ꙗ҆́кѡ содѣ́телю всѣ́мъ во́ вѣки . Въ наро́читыи де́нь ст҃а́гѡ преставле́нїѧ ра́достнѡ пра́зднꙋемъ , пѣ́снь моле́бнꙋю хрⷭ҇то́ви воз̾сыла́юще . нетлѣ́ннымъ вѣнце́мъ вѣнча́вшꙋ тѧ̀ , прехва́льне миха́иле . просѝ на́мъ ѡ҆ставле́нїѧ грѣхо́въ сла́вѧщимъ тѧ̀ вѣ́рнѡ . Похва́льныѧ цвѣ́ты , ꙗ҆́кѡ црⷭ҇кїи вѣне́цъ бг҃омꙋ́дрѣй тѝ главѣ̀ въ па́мѧть прино́симъ . ю҆́же хрⷭ҇то́съ нетлѣ́ннымъ вѣнча̀ , пребл҃же́нне миха́иле . моли́сѧ ѡ҆ ста́дѣ свое́мъ , и҆зба́витисѧ гра́дꙋ твоемꙋ̀ ѿ всѧ́кїѧ бѣды̀ . Лива́нскꙋю го́рꙋ нарече́мъ тѧ бг҃омꙋ́драѧ ѯе́нїе . и҆лѝ фисо́нскꙋю рѣкꙋ̀ добрѣ́йши сапѳи́ра , и҆ ка́менїѧ честна́гѡ , бл҃же́ннагѡ миха́ила ро́ждьшꙋ . и҆́мже просвѣти́сѧ рꙋ́сскаѧ страна̀ , и҆ моли́тасѧ за на́съ ко́ гдⷭ҇ꙋ .= боⷢ҇ . Г=орды́ню и҆ шата́нїѧ низложѝ , и҆ совѣ́ты непра́ведныѧ кнѧзе́й разорѝ , и҆ зачина́ющихъ ра́ть погꙋбѝ , ѽ мт҃и бж҃їѧ пречⷭ҇таѧ дв҃о , люде́мъ на́шимъ ро́гъ возвы́си , да тво́й пречⷭ҇таѧ пра́здникъ сла́вимъ бцⷣе дв҃о во́ вѣки всѧ̀ .

и҆́нъ , і҆рмо́съ . И҆с̾пла́мени ст҃ы́мъ ро́сꙋ и҆сточѝ , а҆ пра́веднагѡ же́ртвꙋ и҆ во́ды попалѝ , всѧ́ бо твори́ши хрⷭ҇тѐ , є҆ли́ко хо́щеши , тѣ́мъ тѧ превозно́симъ гдⷭ҇а во́ вѣки . Просїѧ́вши дне́сь пресвѣ́тлаѧ па́мѧть твоѧ̀ пребл҃же́нне , вѣ́рныѧ созыва́етъ ѿ на́съ на торжество̀ , просла́вити терпѣ́нїѧ твоѧ̀ . хрⷭ҇то́ви же вопи́ти , бл҃гослови́те всѧ̀ дѣ́ла гдⷭ҇нѧ гдⷭ҇а . Тѣ́ло твоѐ ст҃о́е и҆ пребл҃же́нное прїе́мши ст҃а́ѧ цр҃кви . дне́сь весели́тсѧ с̾ вѣ́рными , преди́внаѧ чꙋдеса̀ ви́дѧщи , хрⷭ҇та̀ превозно́симъ во́ вѣки . Бг҃оꙗ҆вле́нныи но́выи страда́лецъ , тебѐ хрⷭ҇тѐ є҆ди́нагѡ возлюбѝ . и҆ лю́ди наста́ви пѣ́ти творца̀ всѣ́хъ , бл҃гослови́те и҆ превозноси́те є҆гѡ̀ во́ вѣки .= боⷢ҇ . С=вѣ́тъ и҆ свѣтода́вца словесѝ зача́тъ , и҆ неи҆зрече́ннѡ родѝ пресꙋ́щнаго . дх҃ъ бж҃їи дв҃це в̾ тѧ̀ всели́сѧ . тѣ́мъ тѧ пое́мъ чⷭ҇таѧ во́ вѣки всѧ̀ .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Оу҆тро́бꙋ неѡ҆пали́мꙋ проѡ҆бразꙋ́ютъ дв҃чꙋ , и҆́же в̾ ве́тсѣ ѻ҆гне́мъ пали́мїи ю҆́ноши . па́че є҆стества̀ ражда́ющꙋ запечатлѣ́ннꙋ . ѡ҆боѧ́ же содѣва́ѧ чꙋдодѣ́йства є҆ди́нъ , лю́ди къ пѣ́нїю воз̾ставлѧ́етъ бл҃года́тель= [покло́н̾] .=

пѣ́снь , ѳ҃ . і҆рмо́съ . Чꙋ́же є҆́сть , мт҃ремъ дв҃ою бы́ти , и҆ стра́ннѡ дв҃амъ , дѣ́ти ражда́ти , на тебѣ̀ бцⷣе ѡ҆боѐ смотре́нїе бы́сть . тѣ́мъ тѧ̀ всѧ̀ племена̀ земна́ѧ непреста́ннѡ велича́емъ . Прїимѝ похвалꙋ̀ ѿ ра́бъ недосто́йныхъ , и҆ моли́твꙋ ѡ҆ на́съ сотворѝ к̾ бг҃ꙋ че́стнѡ творѧ́щихъ твою̀ па́мѧть . да ѿ бѣ́дъ и҆ печа́лей и҆ грѣ́хъ лю́тыхъ свободи́мсѧ , тебѐ велича́юще . Ꙗ҆́кѡ голꙋ́бица цѣломꙋ́драѧ , на фи́никъ добродѣ́тели взы́де , крилѣ̀ и҆мꙋ́щи сщ҃е́ннѣ и҆ позлаще́ннѣ . и҆́маже воз̾летѣ́вши , в̾ ра́йстѣй пи́щи водворѧ́ешисѧ пребл҃же́нне . Пред̾стоѧ̀ оу҆ престо́ла всѣ́хъ влⷣки бг҃ови́дче миха́иле , ѡ҆ творѧ́щихъ честно́е твоѐ пра́зднество , гра́дꙋ на́шемꙋ и҆зба́витисѧ ѿ напа́стей и҆ бѣ́дъ . здра́вїе и҆ побѣ́дꙋ всѣ́мъ правосла́внымъ хрⷭ҇тїа́нѡмъ на проти́вныѧ врагѝ , и҆спросѝ мл҃твами твои́ми .= боⷢ҇ . В=ысо́кїи цр҃ю со ѻ҆ц҃е́мъ сѣдѧ́и , и҆ ѿ серафи́мъ пое́мыи , при́зри на мольбꙋ̀ мт҃рьню ю҆́же тѝ заны̀ дне́сь прино́ситъ . ѡ҆чи́сти грѣхѝ на́ша , и҆ спасѝ гра́дъ , и҆ лю́ди оу҆мно́жи , и҆ да́ждь на́мъ здра́вїе тѣлесѝ , и҆ на пога́ныѧ побѣ́дꙋ , мл҃твами ро́ждьшїѧ тѧ̀ .

и҆́нъ , і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Оу҆кра́шенъ бы́въ бжⷭ҇твеными добро́тами , страда́нїи свои́ми к̾ бг҃ꙋ востечѐ , вѣне́цъ побѣ́ды ѿ негѡ̀ прїе́мъ . тѣ́мъ своѧ̀ пѣвцы̀ помина́й , да тѧ̀ непреста́ннѡ велича́емъ . Ѿ мла́да во́зраста ѡ҆ст҃и́тѧ вседѣ́тель бг҃ъ . и҆ ѡ҆корми́телѧ и҆зрѧ́дна пла́вающимъ в̾ мо́рѣ житїѧ̀ показа́въ . тѣ́мъ согла́снѡ почита́емъ па́мѧть твою̀ .= Прїи́мши бл҃же́нныи поко́й , непреста́й молѧ́щисѧ пресла́вне , ст҃ы́хъ бл҃же́нствꙋ причасти́тисѧ на́мъ , чтꙋ́щимъ па́мѧть твою̀ миха́иле пресла́внꙋю . боⷢ҇ . Б=цⷣе дв҃о ро́ждьшаѧ сло́во па́че словесѐ , зижди́телѧ своегѡ̀ . тогѡ̀ молѝ за на́съ , с̾ си́мъ бл҃же́ннымъ миха́иломъ вѣ́рнѡ чтꙋ́щїѧ тебѐ бцⷣе .

катава́сїѧ : Подоба́ше оу҆́бѡ на́мъ , ꙗ҆́кѡ без̾ бѣды̀ стра́хомъ , оу҆до́бь молча́ти . любо́вїю же дв҃о , пѣ́снь сложи́ти , си́лою ѡ҆бостре́нною , дѣ́ло є҆́сть дра́го . но ѽ мт҃и си́лꙋ , є҆ли́ко же бы́сть и҆зволе́нїе да́ждь . Досто́йнѡ є҆́сть .

свѣти́ленъ . Свѣти́ло на́мъ просїѧ́вши в̾ послѣ́днее вре́мѧ , просвѣти́ ны своѧ̀ пѣвцы̀ , ст҃ы́и великомч҃нче миха́иле . и҆ молѝ за на́съ гдⷭ҇а чтꙋ́щїѧ па́мѧть твою̀ . двⷤа . сла́ва , и҆ ны́нѣ , пра́здникꙋ . Ю҆́же дре́вле провозвѣстѝ проро́ческїи собо́ръ , рꙋ́чкꙋ , и҆ же́злъ , и҆ скрижа́ль , и҆ несѣко́мꙋю го́рꙋ , мр҃і́ю бг҃оѻ҆трокови́цꙋ вѣ́рнѡ восхва́лимъ . дне́сь бо вво́дитсѧ во ст҃а́ѧ ст҃ы́хъ , воспита́тисѧ гдⷭ҇ви .

На хвали́тѣхъ , стⷯры , пра́здникꙋ , г҃ . гла́съ , а҃ . поⷣ . нбⷭ҇нымъ чино́мъ .= С=вѣщено́сицы дв҃ы ,꙳ при́снѡ дв҃ꙋю свѣ́тлѡ провожда́юще ,꙳ проро́чествꙋютъ вои́стинꙋ дх҃омъ бꙋ́дꙋщее .꙳ хра́мъ бо бж҃їи бцⷣа сꙋ́щи ,꙳ в̾ цр҃ковь со сла́вою дв҃ьственою ,꙳ младе́нствꙋющи в̾во́дитсѧ . Ѡ҆бѣща́нїѧ ст҃а́гѡ пло́дъ сла́вныи ,꙳ бцⷣа вои́стинꙋ ꙗ҆ви́сѧ ми́рови ,꙳ ꙗ҆́кѡ всѣ́хъ вы́шшаѧ .꙳ ꙗ҆́же бл҃гоче́стнѡ приводи́ма въ цр҃ковь бж҃їю ,꙳ моли́твꙋ ро́ждьшихъ и҆сполнѧ́ющи ,꙳ соблюда́ема бжⷭ҇твенымъ дх҃омъ . Нбⷭ҇нымъ воспитѣ́на дв҃о хлѣ́бомъ ,꙳ въ цр҃кви гдⷭ҇ни вѣ́рнѡ ,꙳ породѝ ми́рови живота̀ хлѣ́бъ сло́во .꙳ ꙗ҆́кѡ хра́мъ и҆збра́нныи и҆ пренепоро́чныи ,꙳ пред̾ѡ҆брꙋчи́сѧ дх҃омъ та́йнѡ ,꙳ ѡ҆брꙋчена̀ бг҃ꙋ и҆ ѻ҆ц҃ꙋ .

и҆ стихѣ́ры , ст҃о́мꙋ , г҃ . гла́съ , и҆ подо́бен̾ , то́йже . Свѣтоза́рна и҆ ст҃а ,꙳ и҆ бл҃гоѡ҆бра́зна ,꙳ кнѧ́зѧ же и҆ мч҃нка всепра́зднественаѧ па́мѧть ,꙳ ꙗ҆́же всю̀ зе́млю просвѣща́ющи ,꙳ и҆ мра́къ грѣхо́вныи ѿгонѧ́щи ,꙳ цѣльба́мъ бл҃года́ть и҆сточа́етъ . Ка́плѧми крове́й ст҃ы́ми ,꙳ ѡ҆червлени́вши ри́зы своѧ̀ ст҃е миха́иле .꙳ тѣ́мъ ве́селымъ срⷣцемъ ,꙳ па́мѧть твою̀ пра́зднꙋюще ,꙳ мо́лимсѧ непреста́ннѡ ,꙳ да мо́лишисѧ за всѣ́хъ на́съ . Ꙗ҆́кѡ ѕвѣзда̀ свѣ́тлаѧ ми́ръ просвѣща́еши ,꙳ чꙋде́сными блиста́ньми ,꙳ страстоте́рпче миха́иле ,꙳ мра́къ грѣхо́вныи ѿгонѧ́щи .꙳ тѣ́мъ восхвалѧ́емъ ра́достнѡ ,꙳ похвалѧ́юще твою̀ па́мѧть . сла́ва . гла́съ , и҃ . Прїидѣ́те дне́сь собо́ри рꙋ́сстїи , и҆ ви́дите ꙗ҆́кѡ сꙋ́дъ без̾ вины̀ прїе́млетъ мч҃нкъ миха́илъ . ꙗ҆́кѡ а҆́гнецъ без̾зло́бивъ заколе́нъ бы́сть ѿ ѻ҆каѧ́ннагѡ кавгады́ѧ . и҆ пове́ржено бы́сть тѣ́ло є҆гѡ̀ на землѝ , и҆ невреже́нѡ бы́сть ники́мже . но се́й вѣнча́сѧ , а҆ ѻ҆́нъ без̾ па́мѧти поги́бе . и҆ се́й в̾ ми́рѣ сла́вимъ є҆́сть , а҆ ѻ҆́нъ в̾ гее́нѣ мꙋ́читсѧ . се́й же хрⷭ҇та̀ бг҃а мо́литъ ѡ҆ дш҃а́хъ на́шихъ . и҆ нн҃ѣ , пра́здникꙋ . глаⷭ҇ , в҃ . Дне́сь в̾ цр҃квь в̾во́дитсѧ всенепоро́чнаѧ дв҃аѧ , во ѻ҆би́телище всѣ́хъ цр҃ѧ и҆ бг҃а , и҆ всеѧ̀ жи́зни на́шеѧ пита́телѧ . дне́сь честнѣ́йша ст҃ы́нѧ , ꙗ҆́кѡ трилѣ́тствꙋющаѧ ю҆́ница , во ст҃а́ѧ ст҃ы́хъ в̾во́дитсѧ . то́й возопїе́мъ ꙗ҆́кѡ а҆́нг҃лъ , ра́дꙋисѧ є҆ди́на в̾ жена́хъ бл҃гослове́наѧ .

Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , пра́здникꙋ , пѣ́снь , а҃ ѧ , на д҃ . и҆ ст҃о́мꙋ , пѣ́снь , ѕ҃ ѧ , на д҃ .

проки́менъ , ѱл҃о́мъ давы́довъ . воз̾весели́тсѧ пра́ведникъ ѡ҆́ гдⷭ҇ѣ , и҆ оу҆пова́етъ на́нь . сти́хъ . оу҆слы́ши бж҃е мл҃твꙋ мою̀ , внегда̀ моли́тимисѧ къ тебѣ̀ . а҆пⷭ҇лъ , къ ри́млѧнѡмъ . заⷱ҇ , ч҃ѳ .= а҆ллилꙋ́їѧ . пра́ведникъ ꙗ҆́кѡ фи́никъ процвѣте́тъ , и҆ ꙗ҆́кѡ ке́дръ и҆́же в̾ лива́нѣ оу҆мно́житсѧ . =є҆ѵⷢ҇а́лїе , ѿ =і҆ѡа́нна . заⷱ҇ , н҃в . прича́стенъ . в=ъ па́мѧть вѣ́чнꙋю бꙋ́детъ пра́ведникъ .