23 ноября: свт. Амфилохия Иконийского и свт. Григория Акраганского и св. благов. кн. Александра Невского

МЦⷭ҇А ТОГО́ЖЕ ВЪ К҃Г ДН҃Ь

и҆́же во ст҃ы́хъ ѻ҆ц҃а на́шегѡ а҆мѳилѡ́хїѧ , є҆пкⷭ҇па и҆коні́йскагѡ . =И҆ и҆́же во ст҃ы́хъ ѻ҆ц҃а на́шегѡ григо́рїѧ , є҆пкⷭ҇па а҆крага́нскагѡ . И҆ ст҃а́гѡ бл҃говѣ́рнагѡ вели́кагѡ кнѧ́ѕѧ а҆леѯа́ндра не́вскагѡ , влади́мирскагѡ и҆ новгоро́дскагѡ , нарече́ннагѡ во и҆́ноцѣхъ а҆леѯі́ѧ . слꙋ́жба є҆мꙋ̀ пи́сана , по се́й слꙋ́жбѣ .=

Ве́черъ , на гдⷭ҇и возва́хъ , стихѣ́ры , ст҃о́мꙋ а҆мѳилѡ́хїю . гла́съ , д҃ . поⷣ . да́лъ є҆сѝ зна́менїе .= Н=ра́въ самовла́стныи ,꙳ и҆ смы́слъ самодержа́вныи ,꙳ на́ страсти наслѣ́дивъ бо́льшемꙋ ,꙳ да́лъ є҆сѝ разꙋ́мнѡ всебл҃же́нне ,꙳ влⷣчествꙋѧ на го́ршее .꙳ мѣ́риломъ пра́веднымъ ѻ҆́ч҃е оу҆ра́внивъ .꙳ сегѡ̀ ра́ди оу҆го́дникъ бг҃овидѣ́нїю бы́сть ,꙳ бж҃їѧ разꙋмѣ́нїѧ ,꙳ ст҃лю бг҃одх҃нове́нне . Сѣ́ти сокрꙋши́лъ є҆сѝ ,꙳ и҆ ла́ѧнїѧ разрꙋши́лъ є҆сѝ є҆ресе́мъ прпⷣбне ,꙳ повелѣ́нїй пра́востїю ,꙳ и҆ бг҃осло́вїемъ и҆звѣстнѣ́йшимъ .꙳ раздѣле́нїѧ и҆збѣ́гъ ,꙳ и҆ ѕла́гѡ ѻ҆́ч҃е совокꙋпле́нїѧ .꙳ и҆ предѣ́лехъ в̾ ни́хъ же пребы́сть ,꙳ бл҃гоче́стныѧ на́шеѧ вѣ́ры ,꙳ трⷪ҇цꙋ проповѣ́далъ є҆сѝ , во є҆ди́номъ бжⷭ҇твѣ̀ . Хи́тростнѡ оу҆мꙋ́дривъ ,꙳ на землѝ црⷭ҇твꙋющаго .꙳ тогѡ̀ прете́клъ є҆сѝ сы́на непоклони́ма .꙳ разꙋ́мнѡ наꙋча́ѧ ,꙳ ꙗ҆́кѡ непоклонѧ́емꙋ и҆ презира́емꙋ сн҃ꙋ ,꙳ негодꙋ́етъ ѻ҆ц҃ъ теплѣ́йше .꙳ и҆́же сегѡ̀ пре́жде вѣ́къ роди́въ па́че смы́сла нестра́стнѡ ,꙳ ꙗ҆́кѡ беспло́тенъ .꙳ ꙗ҆́коже то́й вѣ́сть прпⷣбне .

=и҆́ны , стⷯры , ст҃о́мꙋ григо́рїю . гла́съ , и҃ . поⷣ . ѽ =пресла́вное чꙋ́до . Ѻ҆́ч҃е сщ҃е́нне григо́рїе ,꙳ ѿ пеле́нъ бг҃ови ,꙳ возложе́нъ прилѣпи́сѧ ,꙳ неѡ҆сла́бными манове́нїи всѧ̀ сотво́ршемꙋ .꙳ и҆ ю҆́же ѿ сегѡ̀ ѡ҆блиста́емь ,꙳ страстнꙋ́ю пре́йде но́щь .꙳ и҆ восїѧ̀ свѣ́тъ и҆сцѣле́ней и҆ чꙋдесе́мъ бл҃года́ть .꙳ ѿгонѧ́ѧ многолѣ́тныѧ недꙋ́ги ,꙳ и҆ преле́стныѧ дꙋ́хи . Ѻ҆́ч҃е чꙋ́дныи григо́рїе ,꙳ свѣтовидѣ́нїѧ оу҆ма̀ ,꙳ чи́стѡ ѡ҆блиста́емь .꙳ страсте́й оу҆спи́лъ є҆сѝ многово́лненое мо́ре .꙳ и҆ без̾стра́стїемъ лѣта́ѧ ,꙳ чи́стыми крилы̀ .꙳ пости́глъ є҆сѝ и҆дѣ́же неи҆зрече́нна добро́та ,꙳ и҆ недомы́слена .꙳ ѡ҆ на́съ всегда̀ молѧ̀ ,꙳ хва́лѧщихъ тѧ̀ . Ѻ҆́ч҃е ѻ҆ц҃е́мъ григо́рїе ,꙳ сщ҃е́нства пра́вило .꙳ цѣломꙋ́дрїѧ ѻ҆́бразъ .꙳ и҆́ночествꙋющимъ крѣ́пость .꙳ цр҃кви оу҆твержде́нїе ,꙳ любвѝ свѣти́льникъ .꙳ престо́лъ чꙋ́вства ,꙳ и҆сто́чникъ чꙋде́съ .꙳ и҆ ꙗ҆зы́къ ѻ҆гнедх҃нове́нныи ,꙳ оу҆ста̀ сладкоглаго́лива .꙳ сосꙋ́дъ бжⷭ҇твенагѡ дх҃а .꙳ и҆ разꙋ́мныи бы́сть ра́й бг҃обл҃же́нне .

сла́ва , и҆ ны́нѣ . гла́съ , д҃ . Прїиди́те всѝ вѣ́рнїи , є҆ди́нꙋ непоро́чнꙋю похва́лимъ . ю҆́же ѿ проро́къ проповѣ́данꙋ , и҆ в̾ цр҃ковь приве́дшꙋюсѧ . ю҆́же пре́жде вѣ́къ пронарече́нꙋю мт҃рь , и҆ въ послѣ́докъ лѣ́томъ ꙗ҆́вльшꙋсѧ бцⷣꙋ . гдⷭ҇и мл҃твами є҆ѧ̀ , ми́ръ сво́й пода́ждь на́мъ , и҆ ве́лїю млⷭ҇ть .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ . Да приведꙋ́тсѧ гл҃етъ бг҃оѻ҆ц҃ъ дв҃дъ ,꙳ цр҃ю дв҃ы в̾ цр҃ковь гдⷭ҇ню ,꙳ в̾ слѣ́дъ тебѐ дв҃о ,꙳ съ свѣ́тлыми свѣща́ми ликоствꙋ́юще .꙳ и҆ в̾ ст҃а́ѧ приводѧ́ще тѧ чⷭ҇таѧ ,꙳ ꙗ҆́кѡ ст҃ы́и ковче́гъ бж҃їи .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . Да оу҆гото́вѧтсѧ две́ри ,꙳ и҆ да ѿверза́ютсѧ хра́ма гдⷭ҇нѧ .꙳ и҆ до́мъ сла́вы ,꙳ и҆ є҆ди́нꙋ пребо́льшꙋю нб҃съ ,꙳ па́че оу҆ма̀ бы́вшꙋю , да прїе́млютъ ра́дꙋющесѧ ,꙳ и҆ хрⷭ҇та̀ сп҃са да воспою́тъ .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃квь цр҃е́вꙋ . Да ѿверза́ютсѧ две́ри бжⷭ҇твеныѧ цр҃кве .꙳ да прїе́млютъ внꙋ́трь нбⷭ҇нꙋю две́рь .꙳ и҆ да торжествꙋ́етъ чл҃ческое є҆стество̀ .꙳ и҆ да взыгра́ютъ а҆́нг҃ли .꙳ с̾пра́зднꙋюще ѡ҆боѝ кꙋ́пнѡ с̾ на́ми ,꙳ бг҃омт҃ре вхожде́нїе .

сла́ва , и҆ ны́нѣ . гла́съ , є҃ . Восїѧ̀ де́нь ра́достенъ , и҆ пра́здникъ всече́стенъ . дне́сь бо ꙗ҆́же пре́жде ржⷭ҇тва̀ , и҆ по ржⷭ҇твѣ̀ дв҃ою пребы́вши , в̾ цр҃ковь гдⷭ҇ню приво́дитсѧ . и҆ ра́дꙋетсѧ заха́рїѧ ста́рецъ , роди́тель прⷣтчевъ , и҆ вопїе́тъ ве́селѡ . прибли́жисѧ пред̾ста́тельница скорбѧ́щимъ , въ цр҃ковь ст҃ꙋ́ю , ꙗ҆́кѡ ст҃а̀ , ѡ҆ст҃и́тисѧ во ѻ҆би́телище всѣ́хъ цр҃ѧ . да весели́тсѧ і҆ѡаки́мъ пра́ѻ҆ц҃ъ , и҆ а҆́нна ра́дꙋетсѧ , ꙗ҆́кѡ принесо́ша бг҃ꙋ , ꙗ҆́кѡ трилѣ́тствꙋющꙋ ю҆́ницꙋ , непоро́чнꙋю влⷣчцꙋ . мт҃ри сра́дꙋйтесѧ , дв҃ы взыгра́йтесѧ , и҆ непло́ды сликоствꙋ́йте , ꙗ҆́кѡ ѿве́рзе на́мъ нбⷭ҇ное црⷭ҇тво пронарече́наѧ всецр҃и́ца . ра́дꙋйтесѧ лю́дїе и҆ весели́тесѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Бж҃е ѻ҆ц҃ъ на́шихъ , творѧ́и прⷭ҇нѡ с̾ на́ми по твоемꙋ̀ смотре́нїю , не ѿста́ви млⷭ҇ти твоеѧ̀ ѿ на́съ . но тѣ́хъ мл҃твами , в̾ смире́нїи оу҆стро́й живо́тъ на́шъ . сла́ва , и҆ нн҃ѣ , пра́здникꙋ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе .

На оу҆́трени , на бг҃ъ гдⷭ҇ь , тропа́рь , пра́здникꙋ , два́жды . сла́ва , ст҃ы́мъ . и҆ ны́нѣ , пра́здникꙋ .

По а҃ , стихоло́гїи , сѣда́ленъ . гла́съ , а҃ . Ст҃а́ѧ ст҃ы́хъ бцⷣе сꙋ́щи , досто́йнѡ приведе́сѧ жи́ти во ст҃а́ѧ . ꙗ҆́кѡ ѡ҆дш҃евле́нъ гдⷭ҇нь ковче́гъ , и҆ ст҃а́гѡ дх҃а вои́стинꙋ , вмѣсти́лище бжⷭ҇твеное дв҃о мт҃и . тѣ́мже всели́сѧ в̾ тѧ̀ , и҆́же ѻ҆ц҃ꙋ є҆диноро́дныи , и҆ ст҃о́мꙋ дх҃ꙋ соесте́ственыи , тво́й сн҃ъ неи҆скꙋсомꙋ́жнѡ , ѡ҆бг҃отвори́въ всѐ чл҃чество . сла́ва , и҆ ны́нѣ , то́йже .

По в҃ , стихоло́гїи , сѣда́ленъ . гла́съ , д҃ . Весе́лїѧ дне́сь вселе́ннаѧ всѧ̀ и҆спо́лнисѧ , въ бл҃гонаро́читѣмъ пра́здницѣ бцⷣы , зовꙋ́щи , та̀ є҆́сть сѣ́нь нбⷭ҇наѧ . сла́ва , и҆ ны́нѣ , то́йже .

По г҃ , стихоло́гїи , сѣда́ленъ . гла́съ , д҃ . Пре́жде зача́тїѧ чи́стаѧ , ѡ҆ст҃и́сѧ бг҃ови , и҆ ро́ждьшисѧ на землѝ , да́ръ принесе́сѧ є҆мꙋ̀ , и҆сполнѧ́ющи ѻ҆́ч҃ее ѡ҆бѣща́нїе . в̾ бжⷭ҇твенѣмъ же хра́мѣ , ꙗ҆́кѡ вои́стинꙋ бжⷭ҇твенаѧ цр҃кви , ѿ младе́нства со свѣща́ми свѣ́тлыми ѿдана̀ бы́вши , ꙗ҆ви́сѧ прїѧ́телище неприкоснове́нномꙋ и҆ бжⷭ҇твеномꙋ свѣ́тꙋ . ве́лїе вои́стинꙋ прои҆схожде́нїе твоѐ , є҆ди́на бг҃оневѣ́стнаѧ . сла́ва , и҆ ны́нѣ , то́йже .

Кано́нъ пра́здникꙋ , гла́съ , а҃ . со і҆рмосо́мъ , на́ ѕ҃ . і҆рмо́съ , по аⷤ . и҆ ст҃ы́мъ , два̀ кано́на , на и҃ . =Кано́нъ , ст҃о́мꙋ а҆мѳилѡ́хїю . и҆мы́и краегране́сїе си́цево : пре́лести гꙋби́телѧ пою̀ па́стырѧ . творе́нїе ѳеѡ́фаново . гла́съ , д҃ . пѣ́снь , а҃ . і҆рмо́съ . М=о́рѧ чермна́гѡ пꙋчи́нꙋ , немо́крыми стопа́ми дре́вле ше́ствовавъ і҆и҃ль , крⷭ҇тоѡбра́зно мѡѷсе́ѡвыма рꙋка́ма , а҆мали́ковꙋ си́лꙋ в̾ пꙋсты́ни побѣди́лъ є҆́сть .

запѣ́в̾ : Ст҃лю хрⷭ҇то́въ а҆мѳилѡ́хїе , молѝ бг҃а ѡ҆ на́съ . Словеса̀ нечести́выхъ є҆ресе́й и҆ ла́ѧнїѧ , правосла́вїѧ заре́ю просвѣще́нъ , оу҆до́бь разори́лъ є҆сѝ . в̾ не́й тебѐ чтꙋ́щихъ сщ҃енноѧвле́нне сохранѝ . И҆́же всѣ́хъ спасе́нїѧ прⷭ҇нѡ хотѧ́и гдⷭ҇ь , сщ҃е́ннагѡ тѝ ста́да , наста́вника сщ҃е́ннѡ пред̾лага́етъ , сло́вомъ и҆ житїе́мъ свѣтѧ́ща пребо́льшимъ ви́дѣвъ . Зако́ннѡ пострада́ти и҆з̾бра́въ по хрⷭ҇то́вѣ цр҃кви , всѣ́мъ ѻ҆рꙋ́жїемъ ѻ҆́ч҃е крⷭ҇тнымъ себѐ ѡ҆гради́лъ є҆сѝ , и҆ побѣди́тель бл҃года́тїю и҆ вѣне́чникъ ꙗ҆ви́сѧ сла́вне .= боⷢ҇ . С=ло́во ѻ҆́ч҃ее собезнача́льное , и҆ с̾прⷭ҇носꙋ́щное , и҆ тогѡ̀ сꙋщества̀ ѻ҆́бразъ , ро́ждьшагосѧ сꙋ́ща , и҆з̾ тебѐ воплоще́нна родила̀ є҆сѝ несказа́ннѡ браконеискꙋ́снаѧ .

и҆́нъ , кано́нъ , ст҃о́мꙋ григо́рїю . и҆мы́и краегране́сїе си́цево : чꙋдодѣ́йственомꙋ григо́рїю чꙋждꙋ́сѧ . творе́нїе і҆ѡ́сифово . гла́съ , и҃ . пѣ́снь , а҃ . і҆рмо́съ . Сокрꙋ́шшемꙋ бра́ни мы́шцею свое́ю , и҆ прове́дшемꙋ і҆и҃лѧ сквозѣ̀ чермно́е мо́ре , воспое́мъ є҆мꙋ̀ ꙗ҆́кѡ и҆зба́вителю на́шемꙋ ꙗ҆́кѡ просла́висѧ .

запѣ́въ : Ст҃лю хрⷭ҇то́въ григо́рїе , молѝ бг҃а ѡ҆ на́съ . Зарѧ́ми дх҃о́вными просвѣща́емь прⷭ҇нѡ , сщ҃е́нне григо́рїе , и҆ свѣтоза́рна свѣща̀ бы́въ . всего́ мѧ ѡ҆зарѝ мл҃твами сѝ , ꙗ҆́кѡ да пою́ тѧ . И҆́же прови́децъ всѣ́хъ , ѡ҆ бл҃года́ти оу҆́мъ тво́й , бг҃ода́нными сїѧ́ньми , ѿ пеле́нъ тѧ̀ ѡ҆свѣща́етъ , бжⷭ҇твеными добродѣ́тельми сїѧ́ти хотѧ́ща ѻ҆́ч҃е , и҆ чꙋдесы̀ .= Дрема́нїе ѿ крове́й оу҆ны́нїѧ ѿве́ргъ , свѣти́льникъ бо́дреныи ты̀ ꙗ҆ви́сѧ бг҃оно́се . показа́въ вещмѝ нарече́нїе твоѐ григо́рїе , и҆́стинствꙋюще . боⷢ҇ . Б=цⷣѣ тебѣ̀ в̾реснотꙋ̀ и҆́стиннѣй покланѧ́юсѧ . породи́ бо гдⷭ҇а несказа́ннѡ , в̾ два̀ сꙋщества̀ пречⷭ҇таѧ дв҃о , и҆ хотѣ́ньми разꙋмѣва́ема .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твоѧ̀ хрⷭ҇тѐ зовꙋ́щи , ты́ ми крѣ́пость гдⷭ҇и , и҆ прибѣ́жище и҆ оу҆тверже́нїе . Бжⷭ҇твенаѧ , и҆ свѣтоза́рнаѧ , твои́хъ повелѣ́нїи зарѧ̀ , погасѝ вра́жїе ѡ҆полче́нїе є҆рети́ческое , а҆мѳилѡ́хїе сла́вне . Во́дъ животворѧ́щихъ , ꙗ҆́кѡ рѣка̀ сы́и бж҃їѧ и҆спо́лнь , первосщ҃е́нникъ бы́въ . и҆́миже бл҃гочести́вїи , напоѧ́емсѧ . Бога́тыми лꙋча́ми просвѣща́емь , оу҆мы̀ напои́лъ є҆сѝ , та́йнымъ прпⷣбне твои́хъ оу҆че́нїи бл҃голѣ́пїемъ .= боⷢ҇ . С=вѣ́щникъ тѧ̀ свѣтоза́рныи , и҆ дш҃епита́тельнꙋю бл҃гоче́стїѧ трапе́зꙋ , и҆ кїѡ́тъ пречⷭ҇таѧ , всѝ вѣ́рнїи возвѣща́емъ .

и҆́нъ , і҆рмо́съ . Оу҆тверди́сѧ се́рдце моѐ ѡ҆́ гдⷭ҇ѣ , воз̾несе́сѧ ро́гъ мо́й ѡ҆́ бз҃ѣ мое́мъ , разшири́шасѧ на врагѝ моѧ̀ оу҆ста̀ моѧ̀ , воз̾весели́хсѧ ѡ҆ спасе́нїи твое́мъ . Сегѡ̀ ра́ди тво́й прїе́мъ ѻ҆́ч҃е трꙋ́дъ зижди́тель , ста́рцꙋ приведѐ тѧ въ пꙋсты́ню . оу҆ча́щꙋ тѧ̀ григо́рїе , всѧ́когѡ писа́нїѧ сказа́нїю . Всю̀ провожда́ѧ седми́цꙋ неꙗ҆ды́и ѻ҆́ч҃е , пита́шесѧ снѣ́дїю нбⷭ҇ною . твои́хъ сле́зъ дожде́мъ напоѧ́емь , и҆ бжⷭ҇твенѡ наслажда́емь . Ѿ ́бг҃а тебѣ̀ ст҃лю , простра́нство срⷣца даде́сѧ , и҆сточи́ бо бога́тно оу҆че́ней чистѣ́йша во́ды , срⷣца̀ вѣ́рныхъ напоѧ́юща .= боⷢ҇ . Г=л҃ы проповѣ́дникъ бг҃огла́сныхъ и҆спо́лнишасѧ . се́бо родѝ дв҃аѧ мла́до ѻ҆троча̀ , а҆да́ма дре́внѣйша , и҆ сопрⷭ҇то́льно роди́телю .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

конда́къ , и҆ и҆́косъ , пра́здникꙋ .

конда́къ , григо́рїю . гла́съ , и҃ . Ꙗ҆́кѡ добродѣ́телемъ оу҆чи́телѧ , и҆ ст҃лемъ оу҆краше́нїе , цр҃кви пою́щи тѧ сла́витъ григо́рїе . мл҃твами твои́ми пода́ждь чтꙋ́щимъ тѧ̀ любо́вїю , добродѣ́телемъ и҆справле́нїе , и҆ собла́знъ и҆збавле́нїе , ꙗ҆́кѡ непобѣди́мъ .

сѣда́ленъ . Ѿ пеле́нъ гдⷭ҇ви возложе́нъ , ꙗ҆́коже дре́вле пресла́вныи самꙋ́илъ . та́кожде зовꙋ́щꙋ тѧ̀ сп҃сꙋ оу҆слы́шалъ є҆сѝ , и҆ дш҃ꙋ ѡ҆чи́стивъ до́брымъ прилѣжа́нїемъ , сщ҃е́нства бл҃года́ть , досто́йнѡ взѧ́лъ є҆сѝ . тѣ́мже на па́жить бжⷭ҇твенагѡ ра́зꙋма наста́вивъ ста́до , цѣле́нїй восїѧ́лъ є҆сѝ дѣ́йства григо́рїе . молѝ хрⷭ҇та̀ бг҃а грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ . гла́съ , д҃ . Просвѣща́еши концы̀ в̾ твое́й па́мѧти мꙋ́дре . тѣ́ло твоѐ и҆сточа́етъ и҆сцѣле́нїй и҆сто́чникъ , а҆мѳилѡ́хїе сла́вне . тѣ́мже , и҆ не́мощи и҆збавлѧ́еши всѧ́кїѧ , вѣ́рою приходѧ́щихъ честно́мꙋ ти хра́мꙋ . сегѡ̀ ра́ди и҆ ны́нѣ молѝ спасти́сѧ на́мъ . сла́ва , и҆ ны́нѣ , пра́здникꙋ . Дв҃де предъи҆дѝ в̾ цр҃ковь бж҃їю , и҆ ра́дꙋѧсѧ прїимѝ цр҃цꙋ на́шꙋ . и҆ то́й возопі́й , вни́ди гжⷭ҇е в̾ цр҃ковь цр҃е́вꙋ . вни́ди , є҆́йже сла́ва та́йнѡ разꙋмѣва́етсѧ . и҆з̾ неѧ́же хо́щетъ на́мъ и҆сточи́тисѧ всѣ́мъ свѣ́тъ хрⷭ҇то́съ .

пѣ́снь , д҃ . і҆рмо́съ . Воз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свое́мъ , досто́йнѡ взыва́ющи , сла́ва си́лѣ твое́й гдⷭ҇и . А҆мѳилѡ́хїѧ бжⷭ҇твенагѡ , и҆ бг҃огл҃ивагѡ , сщ҃е́нное торжество̀ , бг҃омꙋ́дрїи прїиди́те вѣ́рою воспле́щемъ . тогѡ̀ оу҆че́нїемъ , и҆ бг҃осло́вїемъ оу҆крѣплѧ́еми . Невѣстово́дникъ бг҃оно́се , цр҃кве и҆́же ѡ҆ хрⷭ҇тѣ̀ бы́въ , добро́тою слове́сною сїю̀ оу҆краси́лъ є҆сѝ . и҆ красото́ю правосла́вїѧ просвѣти́лъ є҆сѝ . Бг҃осло́вныи ти ꙗ҆зы́къ и҆ бг҃огл҃ивыи , нача́льныѧ трⷪ҇цы , є҆ди́нꙋ честнꙋ́ю держа́вꙋ , всѣ́мъ оу҆ѧсни́лъ є҆́сть . и҆ є҆ди́но бжⷭ҇тво̀ честѝ в̾ тре́хъ соста́вѣхъ .= боⷢ҇ . Н=о́вꙋ сѣ́нь тѧ дв҃о разꙋмѣва́емъ , и҆ чи́стое ст҃и́лище всѣ́хъ бг҃а . того́ бо родила̀ є҆сѝ пло́тїю по соста́вꙋ , соше́дша пренепоро́чнаѧ .

и҆́нъ , і҆рмо́съ . Оу҆слы́шахъ гдⷭ҇и слꙋ́хъ тво́й и҆ оу҆боѧ́хсѧ , ꙗ҆́кѡ неи҆зрече́ннымъ совѣ́томъ бг҃ъ сы́и присносꙋ́щныи , ѿ дв҃ы произы́де вопло́щьсѧ . сла́ва схожде́нїю твоемꙋ̀ хрⷭ҇тѐ , сла́ва си́лѣ твое́й . Землѧ̀ ꙗ҆́кѡ добра̀ процвѣтѐ , стори́чествꙋющагѡ ѻ҆́ч҃е кла́са . и҆ серпо́мъ твои́хъ оу҆че́нїи пожа́лъ є҆сѝ . є҆рети́ческое ѕлочести́вое оу҆че́нїе . собо́рꙋ побо́рникъ ꙗ҆́вльсѧ , прпⷣбне григо́рїе . Нбⷭ҇ныи тѧ̀ причтѐ ст҃лѧ , бж҃їи оу҆го́дниче , показꙋ́ѧ до́брѣ наставлѧ́ти ста́до , є҆́же стѧжа̀ кро́вїю хрⷭ҇то́съ , прови́дѣвъ твоеѧ̀ дш҃и ѻ҆́ч҃е свѣ́тлость . Цр҃кви бж҃їѧ бы́сть , ѡ҆чищена̀ страстны́ѧ скве́рны . и҆ въ цр҃кви сщ҃е́ннѣй пред̾стоѧ̀ , дх҃а прише́ствїе прїѧ́тъ ꙗ҆́вѣ , видѣ́нїемъ чи́стыѧ голꙋ́бицы . хрⷭ҇тꙋ́ тѧ просла́вльшꙋ .= боⷢ҇ . Р=о́дъ чл҃ческїи спасе́нъ бы́сть , па́че оу҆ма̀ твои́мъ ржⷭ҇тво́мъ . и҆ сꙋ́щїи во тмѣ̀ и҆стлѣ́нїѧ , пречⷭ҇таѧ влⷣчце , ви́дѣвше свѣ́тъ восїѧ́вшїи , и҆́з̾ чрева твоегѡ̀ . вино́внаѧ на́шегѡ ѻ҆трокови́це ѡ҆бновле́нїѧ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Просвѣща́емь свѣ́томъ трисл҃нчнагѡ бжⷭ҇тва̀ , сѣ́лъ є҆сѝ на прⷭ҇то́лѣ ст҃льства , бг҃омꙋ́дре а҆мѳилѡ́хїе . двⷤа . Ра́достныи на́мъ пра́здникъ и҆ всеѡ҆сщ҃е́нныи прїи́де , бжⷭ҇твенагѡ и҆ мꙋ́драгѡ оу҆чи́телѧ , ми́ръ ѡ҆сщ҃а́ющь .= боⷢ҇ . Ѽ= всѣ́хъ вѣ́рныхъ бл҃голѣ́пное оу҆добре́нїе , пречⷭ҇таѧ бг҃омт҃и , дш҃и моеѧ̀ скве́рны ѡ҆мы́и , мл҃твами си .

и҆́нъ , і҆рмо́съ . Мра́къ дш҃и моеѧ̀ ѿженѝ свѣтода́вче хрⷭ҇тѐ бж҃е , зачалобы́тнꙋю тмꙋ̀ и҆згна́въ бе́здны , и҆ да́рꙋй ми свѣ́тъ повелѣ́нїи твои́хъ сло́ве , да оу҆́треннюѧ прославлѧ́ю тѧ̀ . Глаго́ломъ твои́мъ ѡ҆чища́еши смра́дныѧ не́мощи , прокаже́ннагѡ дре́вле , прише́дшагѡ къ тебѣ̀ вѣ́рою . ѿ бг҃а бо прїѧ́тъ бл҃года́ть чꙋдесе́мъ мꙋ́дре , ꙗ҆́коже є҆лисе́й бжⷭ҇твеныи , бг҃омꙋ́дре григо́рїе . Ѿве́рзлъ є҆сѝ мл҃твами сѝ , гꙋгни́вомꙋ оу҆ста̀ и҆ слꙋ́ха григо́рїе . цѣле́нїи всебл҃же́нне дѣ́йствомъ ѡ҆богати́сѧ , и҆ ѿры́гнꙋ бг҃осло́вїѧ глꙋбинꙋ̀ , мо́ре без̾бо́жїѧ и҆з̾сꙋша́ющꙋ . Земна́гѡ пристра́стїѧ ѡ҆чи́щьсѧ ѻ҆́ч҃е , ꙗ҆́кѡ пе́тръ первои҆збра́нныи во а҆пⷭ҇лѣхъ , сѣ́нїю свое́ю цѣле́нїе твори́ши . ѡ҆держи́мыѧ лю́тыми недꙋ́ги , си́лою бжⷭ҇твеною и҆сцѣлѧ́еши .= боⷢ҇ . Н=ѣ́дръ ѻ҆те́ческихъ неи҆стощи́въ , воплоще́нїемъ пренепоро́чнаѧ , в̾ твои́хъ нѣ́драхъ ви́дитсѧ держи́мь ꙗ҆́кѡ младе́нецъ . є҆го́же млⷭ҇тива сотворѝ , бл҃гоче́стнѡ тѧ̀ чтꙋ́щимъ , дв҃о бг҃оневѣ́стѡ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю .= Оу҆мертви́въ плотнꙋ́ю ни́зꙋ жела́ннꙋю мꙋ́дрость , без̾стра́стїѧ бл҃года́тїю ѡ҆дѣ́ѧвсѧ , ѻ҆́ч҃е сщ҃еннотаи́нниче , и҆ всечестны́ми оу҆че́нїи , трⷪ҇цꙋ проповѣ́далъ є҆сѝ . =двⷤа . Стра́хомъ ѡ҆гради́всѧ бжⷭ҇твенымъ бг҃опрїѧ́тне . и҆ дш҃ꙋ ѿ скве́рны чи́стꙋ содѣ́ѧвъ , бг҃осло́вїю ꙗ҆ви́сѧ сщ҃е́нныи ѻ҆рга́нъ прпⷣбне .= боⷢ҇ . Ч=и́стое и҆ ст҃о́е вѣ́дѧще ѻ҆би́телище цр҃ѧ сла́вы , и҆ цр҃ковь и҆ прⷭ҇то́лъ превы́шнѧгѡ , мо́лимъ , дш҃а на́ша спастѝ всепѣ́таѧ .

и҆́нъ , і҆рмо́съ . Ꙗ҆́коже пррⷪ҇ка и҆зба́ви и҆з̾ глꙋбины̀ преи҆спо́днїѧ , хрⷭ҇тѐ бж҃е , и҆ менѐ ѿ грѣ́хъ мои́хъ и҆зба́ви , ꙗ҆́кѡ чл҃колю́бецъ . и҆ напра́ви живо́тъ мо́й молю́тисѧ . Оу҆крѣплѧ́етсѧ ѻ҆трокови́ца тѣ́ломъ раз̾сла́бленаѧ , мл҃твою тѝ прпⷣбне , вѣ́рнѡ прише́дши к̾ тебѣ̀ . и҆ вино́внаго всѣ́хъ , велича́етъ хрⷭ҇та̀ . двⷤа . Ѕло́бою живꙋ́щїи , тѧ̀ неѕло́биваго а҆́гньца , ꙗ҆́кѡ свирѣ́пїи ѕвѣ́рїе восхи́тивше , темни́цею ѡ҆сꙋди́ша , сохранѧ́ема ѻ҆́ч҃е бжⷭ҇твеною бл҃года́тїю .= боⷢ҇ . О=у҆́мъ разꙋмѣ́ти недоꙋмѣ́етъ , вели́кое твоегѡ̀ ржⷭ҇тва̀ та́инство . бг҃а бо родила̀ є҆сѝ , чл҃ка бы́вша при́снѡ дв҃о , недоꙋмѣва́емаго .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ , а҆мѳилѡ́хїю . гла́съ , в҃ . Бжⷭ҇твеныи гро́мъ , и҆ трꙋба̀ дх҃о́внаѧ вѣ́рѣ насади́телю , и҆ ѿсѣка́телю є҆ресе́мъ , ст҃лю а҆мѳилѡ́хїе , трⷪ҇цѣ оу҆го́дниче вели́кїи , со а҆́нг҃лы пред̾стоѧ̀ прⷭ҇нѡ , молѧ́сѧ непреста́ннѡ ѡ҆ всѣ́хъ на́съ . и҆́косъ . Ѿ дх҃а ст҃а́гѡ премꙋ́дрыи ст҃ль хрⷭ҇то́въ вдохнꙋ́всѧ , цр҃ковь запечатлѣ̀ . и҆мы́и бо си́лѣ дѣ́йство , сла́вныи таи́нникъ , и҆ оу҆чи́тель вѣ́рѣ прїѧ́тенъ . оу҆слы́шавъ бл҃гочте́нїе бжⷭ҇твеныхъ писа́нїи , воѡ҆браже́нїѧ живоно́снагѡ и҆ честна́гѡ крⷭ҇та̀ творе́нїемъ , є҆ѵно́мїѧ ѿгна̀ . и҆ вѣ́рꙋ оу҆ѧсни́въ проповѣ́даѧ хрⷭ҇та̀ , и҆ молѧ̀ непреста́ннѡ ѡ҆ всѣ́хъ на́съ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃говѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Та́йнымъ бг҃овѣща́нїемъ твои́мъ прилѣжа́ще любо́вїю , а҆́рїева ѻ҆́ч҃е раздѣле́нїѧ бжⷭ҇тва̀ , и҆збѣга́юще , трⷪ҇цꙋ несозда́ннꙋю , и҆ є҆диносꙋ́щнꙋю вѣ́рою чте́мъ . Ѡ҆блича́ема оу҆че́нїемъ тѝ македо́нїѧ ѻ҆́ч҃е зрѧ́ще , дх҃а бл҃га́го , ѻ҆ц҃ꙋ же и҆ сн҃ꙋ спокланѧ́ема , и҆ собезнача́льна , вѣ́рою сла́вимъ . Сло́вомъ оу҆ѧсни́въ , па́че сло́ва сло́вꙋ воплоще́нїе , честѝ в̾ два̀ сꙋщества̀ є҆ди́наго бг҃а , бг҃омꙋ́дренѡ наꙋчи́лъ є҆сѝ . и҆ раздѣле́нїѧ и҆ смѣше́нїѧ бѣжа́ти , бг҃опрїѧ́тне . боⷢ҇ . Всѝ оу҆се́рднѡ бцⷣꙋ восхва́лимъ , прїиди́те вѣ́рою спа́сшїисѧ . и҆з̾ неѧ̀ ро́ждьшемꙋсѧ вседержи́телю , бл҃гослове́на ты в̾ жена́хъ . вопїю́щи всенепоро́чнаѧ .

и҆́нъ , і҆рмо́съ . А҆́нг҃лѡмъ ѻ҆́троки ѿ ѻ҆гнѧ̀ спасѐ , и҆ гремѧ́щꙋю пе́щь преложи́въ на́ хладъ , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . Чꙋдодѣ́йствꙋетъ зижди́тель , сꙋди́мꙋ ти бл҃же́нне . блꙋдна́ѧ бо жена̀ , оу҆стремле́нїемъ взѧта̀ бѣсо́вскимъ , всѣ́мъ показа́ тѧ чи́ста григо́рїе . Свѣтопода́тельнїи бжⷭ҇твенїи оу҆ченицы̀ сп҃совы , к̾ тебѣ̀ прише́дше прпⷣбне , свѧ́зана в̾ дре́вѣ разрѣша́ютъ , ра́достнѡ лобза́юще . Терпѣ́нїю ти ѻ҆́ч҃е влⷣка внима́ѧ чꙋдодѣ́йствы бо́льшими тѧ̀ сщ҃е́ннѡ оу҆краша́етъ , недꙋ́гомъ мра́къ ѿгонѧ́ще .= боⷢ҇ . М=т҃ролѣ́пнѡ всѣ́мъ родила̀ є҆сѝ зижди́телѧ , и҆ рꙋка́ма понесла̀ є҆сѝ , ꙗ҆́кѡ херꙋви́мскїи прⷭ҇то́лъ , содержа́щаго всѧ̀ , неи҆скꙋсобра́чнаѧ .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Рꙋ́цѣ распросте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ оу҆гаси́ша добродѣ́телїю поѧ́савшесѧ , и҆́же бл҃гоче́стїѧ люби́тели ѻ҆́троцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Оу҆краси́шасѧ пѣ́снено , оу҆ста̀ твоѧ̀ бг҃осло́вѧщаѧ ꙗ҆́снѡ , трⷪ҇цꙋ несозда́ннꙋ , и҆ без̾нача́льнꙋ , є҆диносꙋ́щнꙋ , несмꙋще́нꙋ , тремѝ соста́вы ѻ҆́ч҃е бг҃омꙋ́дре . є҆́йже вопїе́мъ , бл҃гослови́те всѧ̀ дѣ́ла гдⷭ҇нѧ гдⷭ҇а . Бога́тство тебѣ̀ и҆ сла́вꙋ честнꙋ́ю , соста́внаѧ премꙋ́дрость дадѐ , бл҃госло́вившꙋ тѝ премꙋ́дре бл҃гоче́стнѡ . и҆ є҆ресе́мъ низ̾ложи́вшꙋ горды́ню . и҆ любо́вїю пою́щꙋ ти , бл҃гослови́те всѧ̀ дѣ́ла гдⷭ҇нѧ гдⷭ҇а . И҆́же всѣ́мъ подаѧ́и живо́тъ , ꙗ҆́кѡ ст҃лѧ вѣ́рна , и҆ бг҃огл҃ива , в̾ цр҃ковь тѧ̀ прпⷣбне перворо́дныхъ в̾во́дитъ , сщ҃е́нствꙋюща та́йнѡ , и҆ вѣ́рнѡ пою́ща , бл҃гослови́те всѧ̀ дѣ́ла гдⷭ҇нѧ гдⷭ҇а .= боⷢ҇ . С=ѐ ны́нѣ ѡ҆скꙋдѣ̀ ꙗ҆́вѣ ѿ і҆ꙋ́дина колѣ́на кнѧ́зь и҆ во́ждь . ты́ бо пренепоро́чнаѧ родила̀ є҆сѝ , ꙗ҆́же томꙋ̀ пред̾лежа́хꙋ , ча́ѧнїе ꙗ҆зы́кѡмъ хрⷭ҇та̀ . є҆мꙋ́же пое́мъ , бл҃гослови́те всѧ̀ дѣ́ла гдⷭ҇нѧ гдⷭ҇а .

и҆́нъ , і҆рмо́съ . Покрыва́ѧй вода́ми превы́спреннѧѧ своѧ̀ , полага́ѧй мо́рю предѣ́лъ песо́къ , и҆ содержа́и зе́млю . тѧ̀ пое́тъ сл҃нце , тѧ̀ сла́витъ лꙋна̀ , тебѣ̀ прино́ситъ хвалꙋ̀ всѧ̀ тва́рь , ꙗ҆́кѡ содѣ́телю всѣ́мъ во́ вѣки . Ѿпꙋща́етсѧ ра́ны бѣсо́вскїѧ стра́шныѧ , моли́твою тѝ бл҃же́нне , ꙗ҆́же лꙋка́вствомъ без̾зако́нныхъ мꙋ́жь , ѡ҆клевета́вшаѧ тебѐ пра́веднаго ѻ҆трокови́ца . и҆ посредѝ собо́ра тѧ̀ прославлѧ́етъ , подвигополо́жникъ бг҃ъ , во всѧ̀ вѣ́ки . Те́мнагѡ ѡ҆мраче́нїѧ и҆сполнѧ́ютсѧ , и҆́же лꙋка́вствомъ на тѧ̀ поꙋчи́вшїисѧ ѻ҆́ч҃е . и҆ сїѧ́етъ твоѐ свѣтоза́рное житїѐ , пред̾ ѻ҆ц҃ы григо́рїе . въ и҆́хже прише́ствїи , оу҆́глїе держа̀ рꙋко́ю , чꙋдодѣ́йствова . Ꙗ҆́кѡ ѕвѣзда̀ свѣтлѣ́йшаѧ ꙗ҆ви́сѧ вои́стинꙋ , на высотѣ̀ ѻ҆́ч҃е цр҃ко́внѣй . ѡ҆зарѧ́еши на́съ добродѣ́тельми всегда̀ , и҆ чꙋде́съ лꙋча́ми , пою́щихъ твою̀ свѣтоно́снꙋю па́мѧть , ст҃лю бг҃омꙋ́дре григо́рїе .= боⷢ҇ . П=ресла́вное ржⷭ҇тво̀ твоѐ , помышле́нїѧ на́ша оу҆дивлѧ́етъ , є҆ди́на бл҃гослове́наѧ . бг҃ъ бо и҆з̾ тебѐ пло́ть прїѧ́тъ , и҆ є҆́же бѣ̀ пребы́сть бцⷣе , непревра́тенъ є҆стество́мъ . є҆го́же превозно́симъ во́ вѣки .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Є҆ди́но трисоста́вное є҆стество̀ прече́стнѡ бг҃осло́вивъ , всест҃ꙋ́ю трⷪ҇цꙋ бг҃онача́льнꙋю , непости́жимꙋю . нн҃ѣ ѿ неѧ̀ почте́нъ бы́сть , сщ҃енновѣща́телю а҆мѳилѡ́хїе . И҆мы́и къ бг҃ꙋ дерзнове́нїе , ꙗ҆́кѡ ст҃ль бг҃оно́се , сщ҃е́ннꙋю и҆ свѣтоно́снꙋю , соверша́ющихъ па́мѧть твою̀ всебл҃же́нне , всегда̀ помина́й своемꙋ̀ влⷣцѣ пред̾стоѧ̀ . Дава́еши мѝ незави́стнѡ бл҃года́ть , похвалы̀ тебѣ̀ бг҃омꙋ́дре спле́тшꙋ оу҆се́рдїемъ срⷣца , грѣхо́мъ разрѣше́нїе просѧ́щꙋ , ꙗ҆́кѡ ст҃ль вѣ́рнѣйшїи , прпⷣбне ѻ҆́ч҃е а҆мѳилѡ́хїе .= боⷢ҇ . А҆=да́мова оу҆́бѡ внꙋ́ка ꙗ҆ви́сѧ , бж҃їѧ же мт҃и позна́сѧ . ты́ бо ѿ́ вѣка ꙗ҆ви́сѧ , ст҃ѣ́йши всѧ́кїѧ тва́ри , бл҃гослове́наѧ пречⷭ҇таѧ . тѣ́мже тѧ̀ всѝ велича́емъ .

и҆́нъ , і҆рмо́съ . Бл҃гослове́нъ гдⷭ҇ь бг҃ъ і҆и҃левъ , воз̾дви́гнꙋвыи ро́гъ спасе́нїѧ на́мъ , в̾ домꙋ̀ дв҃довѣ ѻ҆́трока своегѡ̀ . в̾ ни́хже посѣтѝ на́съ восто́къ свы́ше , и҆ напра́вилъ ны̀ є҆́сть на пꙋ́ть ми́ренъ . Сѐ свѣ́тлое торжество̀ . сѐ па́мѧть сщ҃е́нна . сѐ бл҃года́ть всѣ́мъ соше́дшимсѧ вѣ́рнымъ , ѡ҆би́льнѡ цѣле́нїѧ точа́щи , пристꙋ́пимъ . и҆сточа́етъ бо на́мъ григо́рїева ра́ка , просвѣще́нїе прⷭ҇нотекꙋ́щее , и҆ без̾сме́ртїе . Ꙗ҆́кѡ рѣка̀ и҆спо́лнисѧ во́дъ хрⷭ҇то́вѣхъ . ꙗ҆́кѡ ма́слица ма́сло то́чиши живота̀ . ꙗ҆́кѡ фи́никъ возвы́сивсѧ григо́рїе . ꙗ҆́кѡ виногра́дъ , гро́здїе на́мъ добродѣ́телей твои́хъ но́сиши . ѿ ни́хже напоѧ́емсѧ вино́мъ нетлѣ́нїѧ . Да сра́дꙋетсѧ дне́сь на́мъ в̾ па́мѧти твое́й сщ҃е́нныхъ собо́ръ , и҆ прпⷣбныхъ мно́жество , и҆ всѣ́хъ а҆́нг҃лъ чи́нове . с̾ ни́ми же пред̾стоѧ̀ творцꙋ̀ , ѡ҆зарѧ́емь ѻ҆́ч҃е , помѧнѝ любо́вїю тѧ̀ пѣсносла́вѧщихъ .= Ѡ҆сщ҃е́нъ бы́сть ѻ҆́ч҃е сосꙋ́дъ хрⷭ҇то́въ цр҃кви сто́лпъ , и҆ приста́нище вѣ́рнымъ . и҆ ме́чь , пре́лести ѿсѣка́ющь . и҆сто́чникъ и҆сцѣле́нїй . и҆ глꙋбина̀ бжⷭ҇твеныхъ ра́зꙋмъ , и҆ свѣща̀ неꙋгаса́ющаѧ , и҆ па́стырь па́стыремъ . боⷢ҇ . С=вѣ́тъ ро́ждьшаѧ пречⷭ҇тый , восїѧ́вшїи ѿ ѻ҆ц҃а , просвѣти́ ми ѻ҆трокови́це дш҃ꙋ и҆ оу҆́мъ . далечѐ ѿ менѐ ѿгонѧ́щи тмꙋ̀ дв҃о страсте́й . да тѧ̀ оу҆блажа́ю приснобл҃же́ннꙋю , и҆ вѣ́рнымъ оу҆пова́нїе .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . Досто́йнѡ є҆́сть .

свѣти́ленъ , а҆мѳилѡ́хїю . Бг҃ъ положе́нїемъ бы́въ , в̾ без̾веще́ственѣ причаще́нїи бж҃їѧ є҆стества̀ всемꙋ́дре . ѿ а҆́нг҃лъ пома́завсѧ ст҃ль бжⷭ҇твеномꙋ при́чтꙋ . хода́тайствꙋѧ созда́телю и҆ созда́нїю бг҃опрїѧ́тне , а҆мѳилѡ́хїе ѻ҆́ч҃е . тѣ́мже твою̀ соверша́юще па́мѧть , тѧ̀ воспѣва́емъ , и҆збавлѧ́еми мл҃твами тѝ , ѿ тлѧ̀ и҆ напа́стей . сла́ва . свѣти́ленъ , григо́рїю . По́стнически житїѐ своѐ оу҆краси́въ мꙋ́дре ѻ҆́ч҃е . и҆ честнѣ́й григо́рїе хрⷭ҇то́вѣ цр҃кви , ст҃ль ꙗ҆ви́лсѧ є҆сѝ бл҃же́нне . правосла́вныхъ просвѣща́ѧ зарѧ́ми оу҆че́нїи твои́хъ , и҆ неи҆з̾гл҃анными чꙋдесмѝ . тѣ́мже твоѐ прест҃о́е оу҆спе́нїе соверша́ющимъ , и҆спросѝ мл҃твами твои́ми дш҃е́вное спасе́нїе . и҆ ны́нѣ . свѣти́ленъ , пра́здникꙋ . Ю҆́же дре́вле провозвѣстѝ проро́ческїи собо́ръ , рꙋ́чкꙋ , и҆ же́злъ , и҆ скрижа́ль , и҆ несѣко́мꙋю го́рꙋ , мр҃і́ю бг҃оѻ҆трокови́цꙋ вѣ́рнѡ восхва́лимъ . дне́сь бо вво́дитсѧ во ст҃а́ѧ ст҃ы́хъ , воспита́тисѧ гдⷭ҇ви .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ .= В=зѧ́тсѧ прегра́дїе средостѣ́нїѧ ,꙳ бжⷭ҇твенымъ вои́стинꙋ ,꙳ бцⷣа вхожде́нїемъ .꙳ и҆ до́льнѧѧ с̾ вы́шними ,꙳ ны́нѣ совокꙋпи́шасѧ .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . Воспѣ́ша дв҃ьственїи ли́цы ,꙳ бжⷭ҇твенꙋю пѣ́снь ,꙳ провожда́юще в̾ до́мъ бж҃їи ,꙳ свѣщено́сныѧ ,꙳ є҆ди́нꙋ всенепоро́чнꙋю .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃квь цр҃е́вꙋ . Внꙋ́трь ст҃и́лища ,꙳ ст҃ꙋ́ю ст҃ы́хъ ,꙳ бцⷣꙋ сꙋ́щꙋ ,꙳ ѽ заха́рїе прїе́мли ,꙳ во ст҃а́ѧ ст҃ы́хъ .

сла́ва , и҆ нн҃ѣ . гла́съ , ѕ҃ . Дне́сь собо́ри вѣ́рныхъ соше́дшесѧ , дх҃о́внѣ торжествꙋ́емъ , и҆ бг҃оѻ҆трокови́цꙋ дв҃ꙋ и҆ бцⷣꙋ , въ цр҃ковь гдⷭ҇ню приводи́мꙋ , бл҃гоче́стнѡ восхва́лимъ . прои҆збра́ннꙋю ѿ всѣ́хъ ро́дъ , во ѻ҆би́телище всѣ́хъ цр҃ѧ хрⷭ҇та̀ и҆ бг҃а . дв҃ы свѣщѝ носѧ́ще пред̾и҆ди́те , при́снѡ дв҃ыѧ чтꙋ́ще честно́е прои҆схожде́нїе . мт҃ри печа́ль всю̀ ѿло́жше , ра́достнѡ спослѣ́дствꙋйте , мт҃ри бж҃їи быва́ющей . и҆ ра́дости ми́рꙋ хода́тайцѣ , всѝ оу҆́бѡ ра́достнѣ , є҆́же ра́дꙋйсѧ со а҆́нг҃лѡмъ возопїе́мъ ѡ҆бра́дованнѣй , при́снѡ молѧ́щейсѧ ѡ҆ дш҃а́хъ на́шихъ .

На литꙋргі́и , проки́мен̾ , ѱл҃о́мъ дв҃дов̾ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ є҆вре́ѡмъ . зача́ло , тл҃д .= а҆ллилꙋ́їѧ . сщ҃е́нницы твоѝ ѡ҆блекꙋ́тсѧ в̾ пра́вдꙋ , и҆ прпⷣбнїи твоѝ воз̾ра́дꙋютсѧ . =є҆ѵⷢ҇а́лїе , ѿ =матѳе́ѧ . заⷱ҇ , р҃г . прича́стенъ . р=а́дꙋйтесѧ пра́веднїи ѡ҆́ гдⷭ҇ѣ .

Слꙋ́жба бл҃говѣ́рномꙋ вели́комꙋ кнѧ́ѕю а҆леѯа́ндрꙋ . =На ма́лѣй вече́рни , на гдⷭ҇и возва́хъ , стихѣ́ры . гла́съ , а҃ . поⷣ . прехва́льнїи мч҃нцы . =Ѿ бл҃гочести́вагѡ ко́рене ,꙳ ст҃опома́заннаѧ розга̀ прои҆зше́дъ ,꙳ пло́дъ прои҆знесѐ себѐ ,꙳ преподо́бїѧ и҆ пра́вдѣ .꙳ преми́рнѡ бл҃гоꙋха́ѧ , вѣ́рнѡ ѿ дш҃и чтꙋ́щихъ тѧ̀ .꙳ ѡ҆ ни́хже со а҆́нг҃лы хрⷭ҇тꙋ̀ моли́сѧ бл҃же́нне ,꙳ дарова́ти ми́ръ и҆ ве́лїю млⷭ҇ть . вⷤ . Земны́хъ всѣ́хъ воз̾гнꙋша́всѧ ,꙳ к̾ нбⷭ҇нымъ дх҃омъ прилѣпѝ себѐ .꙳ тѣ́мъ беспло́тныхъ ,꙳ подража́въ житїѐ ,꙳ со ст҃ы́ми всѣ́ми водвори́сѧ .꙳ с̾ ни́ми же прпⷣбне хрⷭ҇тꙋ̀ моли́сѧ ,꙳ па́мѧть твою̀ творѧ́щимъ ꙳ пода́ти ми́ръ , и҆ ве́лїю млⷭ҇ть . Бл҃гоче́стїемъ и҆ вѣ́рою ,꙳ пресвѣ́тлѡ оу҆кра́шенъ ,꙳ ꙗ҆́кѡ бл҃гочести́въ скипетроно́сецъ и҆ преи҆зрѧ́денъ ,꙳ и҆ преи҆мени́тъ прест҃ѣ́й трⷪ҇цѣ ,꙳ побо́рникъ бы́лъ є҆сѝ .꙳ ѿ неѧ́же просвѣти́всѧ ,꙳ чꙋде́съ свѣ́тъ ми́рꙋ ꙳ провозсїѧ́лъ є҆сѝ .꙳ и҆ моли́твеникъ ꙗ҆ви́сѧ ѡ҆ дш҃а́хъ на́шихъ . сла́ва . гла́съ , ѕ҃ . Прпⷣбне ѻ҆́ч҃е а҆леѯа́ндре , и҆́з̾ млада возлюби́въ хрⷭ҇та̀ . бг҃ои҆мени́тъ вѣнчено́сецъ бы́лъ є҆сѝ . прпⷣбїемъ и҆ пра́вдою свѣ́тлѡ оу҆кра́шенъ . млⷭ҇тынѧми же и҆ чистото́ю , простра́нное селе́нїе бы́сть дх҃ꙋ ст҃о́мꙋ . є҆мꙋ́же непреста́ннѡ моли́сѧ , ѡ҆ є҆́же сохрани́ти ѻ҆те́чество тѝ и҆ гра́дъ тво́й , ѿ пога́ныхъ неѡ҆бори́момъ бы́ти , и҆ сыново́мъ рꙋ́сскимъ спасти́сѧ . и҆ нн҃ѣ , пра́здникꙋ . гла́съ , и҃ . Дв҃дъ провоз̾глаша́ше тѧ пречⷭ҇таѧ , прови́дѧ сщ҃е́нство вхо́да твоегѡ̀ є҆́же в̾ цр҃ковь . в̾ не́мже концы̀ дне́сь пра́зднꙋюще , славосло́вѧтъ тѧ̀ всепѣ́таѧ . ꙗ҆́же бо пре́жде ржⷭ҇тва̀ дв҃а , и҆ по ржⷭ҇твѣ̀ пребы́вши нетлѣ́нна , мт҃и сло́вꙋ живота̀ . дне́сь в̾ цр҃кви заха́рїѧ весели́тсѧ , воспрїе́мъ тѧ̀ влⷣчце . и҆ ст҃ы́хъ ст҃а́ѧ ра́дꙋетсѧ , под̾є́мши тѧ̀ и҆сто́чника живота̀ на́шегѡ . сегѡ̀ ра́ди и҆ мы̀ пѣ́сненѡ вопїе́мъ тѝ , ѡ҆ на́съ молѝ сн҃а своегѡ̀ и҆ бг҃а , дарова́ти на́мъ ве́лїю млⷭ҇ть . проки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ .= Д=о́мъ ст҃а́гѡ дх҃а ,꙳ поспѣше́нїемъ бл҃года́ти ,꙳ а҆леѯа́ндръ ꙗ҆ви́сѧ .꙳ тѣ́мже ны́нѣ сше́дшесѧ ,꙳ томꙋ̀ воспое́мъ пѣ́снь .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ра́дꙋисѧ цр҃е́мъ рꙋ́сскимъ похвало̀ ,꙳ и҆ во́иномъ соблюде́нїе .꙳ ва́рваромъ побѣжде́нїе ,꙳ сирота́мъ и҆ вдови́цамъ застꙋ́пниче .꙳ и҆ гра́дꙋ на́шемꙋ оу҆твержде́нїе .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ за́поведѣхъ є҆гѡ̀ восхо́щетъ ѕѣлѡ̀ . Прїимѝ ны́нѣ пѣ́нїе ,꙳ люде́й твои́хъ бл҃же́нне .꙳ и҆ молѧ́щим̾тисѧ ,꙳ оу҆ хрⷭ҇та̀ и҆спросѝ ѿ грѣ́хъ и҆збавле́нїе ,꙳ да оу҆блажа́емъ тѧ при́снѡ .

сла́ва . гла́съ , и҃ . Бг҃омꙋ́дре а҆леѯа́ндре вели́кїи кнѧ́же , блаже́нъ є҆сѝ , ꙗ҆́кѡ бл҃же́нство наслѣ́дова . є҆го́же ра́ди всѧ̀ земна́ѧ презрѣ́въ , неѿло́жнѡ тогѡ̀ взыскꙋ́ѧ . ни́щихъ оу҆довли́лъ є҆сѝ . сирота́мъ пита́тель . плѣ́ннымъ свободи́тель бы́лъ є҆сѝ . тѣ́мъ в̾ нестарѣ́емꙋю ра́дость вни́де гдⷭ҇а своегѡ̀ . є҆мꙋ́же со а҆́нг҃лы пред̾стоѧ̀ , молѝ и҆́же вѣ́рою пою́щимъ тѧ̀ , гобзова́нїе щедро́тъ пода́ти , и҆ грѣ́хъ ѡ҆ставле́нїе . и҆ ны́нѣ , пра́здникꙋ . гла́съ , д҃ . Прїиди́те всѝ вѣ́рнїи , є҆ди́нꙋ непоро́чнꙋю восхва́лимъ . ю҆́же ѿ проро́къ проповѣ́данꙋ , и҆ в̾ цр҃ковь приве́дшꙋюсѧ . ю҆́же пре́жде вѣ́къ пронарече́ннꙋю мт҃рь , и҆ в̾ послѣ́докъ лѣ́томъ ꙗ҆́вльшꙋсѧ бцⷣꙋ . гдⷭ҇и мл҃твами є҆ѧ̀ , ми́ръ сво́й пода́ждь на́мъ , и҆ ве́лїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Ꙗ҆́кѡ бл҃гочести́вагѡ ко́рене , пречестна́ѧ ѿ́расль бы́сть бл҃же́нне а҆леѯа́ндре , ꙗ҆ви́ бо тѧ хрⷭ҇то́съ рꙋ́сстѣй землѝ но́ваго чꙋдотво́рца , ꙗ҆́кѡ нѣ́кое сокро́вище пресла́вно и҆ бг҃опрїѧ́тно . тѣ́мъ дне́сь соше́дшесѧ вѣ́рою и҆ любо́вїю , во ѱалмѣ́хъ и҆ пѣ́нїихъ ра́дꙋющесѧ сла́вимъ гдⷭ҇а , да́вшаго тѝ бл҃года́ть и҆сцѣле́нїемъ . є҆го́же молѝ сохрани́ти гра́дъ се́й , и҆ держа́вѣ сро́дникъ твои́хъ , є҆́же бг҃оꙋго́днѣ бы́ти , и҆ сыново́мъ рꙋ́сскимъ спасти́сѧ . сла́ва , и҆ ны́нѣ , пра́здникꙋ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе .= та́же , є҆ктенїѧ̀ ма́лаѧ . =и҆ ѿпꙋ́стъ .

На вели́цѣй вече́рни , бл҃же́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на и҃ . пра́здникꙋ , г҃ . и҆ а҆леѯа́ндрꙋ , є҃ . стихѣ́ры , а҆леѯа́ндрꙋ . гла́съ , в҃ . Кі́ими похва́льными вѣнцы̀ , вѣнча́емъ бл҃же́ннаго а҆леѯа́ндра ; кнѧзе́мъ правосла́внымъ похвалꙋ̀ . ди́внаго в̾ чꙋдесѣ́хъ , беспло́тнымъ сожи́телѧ . и҆сто́чника бжⷭ҇твеныхъ и҆сцѣле́нїи неи҆счерпа́емаго . рѣкꙋ̀ чꙋде́съ мно́гихъ , проли́тїе дарова́нїи дх҃о́вныхъ . є҆го́же ра́ди хрⷭ҇то́съ , землѝ рꙋ́сстѣй да́рꙋетъ ми́ръ и҆ ве́лїю млⷭ҇ть . =двⷤа . Кі́ими похва́льными вѣнцы̀ , оу҆вѧзе́мъ бл҃же́ннаго а҆леѯа́ндра ; бл҃гоче́стїѧ оу҆правле́нїе . є҆рети́ческихъ оу҆че́нїй ѡ҆бличе́нїе . цр҃кви свѣ́тлое оу҆краше́нїе . врача̀ премꙋ́драго и҆ бг҃опрїѧ́тна , и҆сцѣлева́юща недꙋ́ги и҆ болѣ́зни на́ша . є҆го́же ра́ди враго́мъ шата́нїѧ хрⷭ҇то́съ низложѝ , и҆мѣ́ѧи ве́лїю млⷭ҇ть . Кі́ими смире́ными оу҆стна́ми , воспое́мъ а҆леѯа́ндра премꙋ́драго . сл҃нца пресвѣ́тлаго . всечестны́ѧ трⷪ҇цы моли́твеника , печа́льнымъ оу҆тѣше́нїе , и҆ ѿча́ѧннымъ застꙋ́пника . похвалꙋ̀ землѝ рꙋ́сстѣй . рѣкꙋ̀ млⷭ҇ти вои́стинꙋ . и҆ больны́мъ врача̀ без̾мѣ́здна . смире́нїѧ хрⷭ҇то́ва подража́телѧ , подаю́щаго на́мъ ве́лїю млⷭ҇ть . Кі́ими дх҃о́вными пѣ́сньми , воспое́мъ пресла́внаго ; свѣти́льника незаходи́маго , сл҃нца мы́сленаго . пра́вдѣ пра́вило . весе́лїе землѝ рꙋ́сстѣй . крѣ́пость гра́дꙋ на́шемꙋ и҆ забра́ло . сирота́мъ пита́телѧ . ѡ҆би́димымъ застꙋ́пника . столпа̀ пресвѣ́тлаго , просвѣща́ющаго на́съ чꙋде́съ свѣтлостьмѝ , и҆ подаю́ща ве́лїю млⷭ҇ть .

сла́ва . гла́съ , ѕ҃ . Всѧ́къ гра́дъ и҆ страна̀ , сла́вномꙋ гра́дꙋ на́шемꙋ сра́дꙋйтесѧ . и҆ ѱало́мски воспле́щемъ рꙋка́ми вкꙋ́пѣ , дх҃о́вно торжество̀ дне́сь пра́зднꙋюще . сѐ оу҆́бѡ ди́вныи на́шъ вра́чь и҆ спаси́тель а҆леѯа́ндръ вели́кїи , нбⷭ҇нагѡ врачевства̀ цѣльбы̀ пред̾лага́етъ . и҆ къ непреста́ннымъ цѣльба́мъ ти́хѡ созыва́етъ . не хитростьмѝ чл҃ческими ни ѡ҆бѧза́нїемъ , но дѣ́йствомъ ст҃а́гѡ дх҃а , дш҃е́вное и҆ тѣле́сное и҆сцѣле́нїе , па́че є҆стества̀ подава́ѧ . є҆го́же и҆ прїе́млюще дово́льнѡ , всѧ́къ ро́дъ и҆ во́зрастъ сла́вимъ хрⷭ҇та̀ бг҃а , подаю́щаго на́мъ є҆гѡ̀ ра́ди ве́лїю ми́лость . и҆ ны́нѣ , пра́здникꙋ . гла́съ , и҃ . По ржⷭ҇твѣ̀ твое́мъ бг҃оневѣ́сто влⷣчце , прїи́де в̾ цр҃ковь гдⷭ҇ню воспита́тисѧ во ст҃а́ѧ ст҃ы́хъ , ꙗ҆́кѡ ѡ҆сщ҃е́нна . тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй , пи́щꙋ ти приноша́ше . нбⷭ҇наѧ всѧ̀ оу҆диви́шасѧ , зрѧ́ще дх҃а ст҃а́гѡ в̾ тѧ̀ все́льшасѧ . тѣ́мже пречⷭ҇таѧ и҆ нескве́рнаѧ , ꙗ҆́же на́ нб҃сѣхъ и҆ на землѝ сла́вима , мт҃и бж҃їѧ , спасѝ ро́дъ на́шъ . вы́ходъ . проки́менъ , дню̀ .

Ѿ премꙋ́дрости соло́мони , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ премꙋ́дрости соло́мони , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ помышле́нїе и҆́хъ пред̾ вы́шнимъ . сегѡ̀ ра́ди прїи́мꙋтъ црⷭ҇твїе бл҃голѣ́пїѧ , и҆ вѣне́цъ добро́ты ѿ рꙋкѝ гдⷭ҇ни . ꙗ҆́кѡ десни́цею покры́етъ и҆́хъ , и҆ мы́шцею защи́титъ и҆́хъ . прїи́метъ всѐ ѡ҆рꙋ́жїе ре́вности є҆гѡ̀ , и҆ воѡ҆рꙋже́но сотвори́тъ созда́нїе , в̾ ме́сть враго́мъ . и҆ ѡ҆блече́тъ ѧ҆̀ во бронѧ̀ пра́вды , и҆ возложи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непобѣди́мъ преподо́бїе . по ѡ҆стри́тъ же напра́сенъ гнѣ́въ во ѡ҆рꙋ́жїи . и҆ побо́ретъ с̾ ни́мъ ми́ръ на безꙋ́мныѧ . и҆ по́йдꙋтъ праволꙋ́чнѣ стрѣ́лы мо́лнїины , ꙗ҆́кѡ ѿ бл҃гокрꙋ́гла лꙋ́ка ѻ҆блако́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рости и҆спо́лнь , падꙋ́тъ гра́ды . вознегодꙋ́етъ на ни́хъ вода̀ морска́ѧ , рѣ́ки же потекꙋ́тъ жесточа́е . сопроти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хоръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлодѣѧ́нїе преврати́тъ престо́лы си́льныхъ . слы́шите оу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ конце́мъ землѝ . внꙋши́те содержа́щїи мно́жества , и҆ гордѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ не многолѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрость человѣ́кѡмъ . и҆ во́зрастъ ста́рости , житїѐ нескве́рно . бл҃гоꙋго́денъ бг҃ови бы́въ , воз̾лю́бленъ бы́сть . и҆ живы́и посредѣ̀ грѣ́шникъ , преста́вленъ бы́сть . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хоти , премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та мно́га , оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни положи́ша в̾ помышле́нїи такова́гѡ , ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

На литі́и , стихѣ́ры . гла́съ , г҃ . Землѧ̀ на́ша и҆ страна̀ бл҃же́нне , чꙋдеса̀ твоѧ̀ воз̾вѣща́ютъ , и҆ воспѣва́ютъ оу҆́бѡ всю́дꙋ . хрⷭ҇то́съ бо тѧ̀ на́мъ свѣти́льника показа̀ , просвѣща́юща дш҃а на́ша . гла́съ , д҃ . Цр҃и и҆ кнѧ́ѕи , вкꙋ́пѣ бога́тїи и҆ оу҆бо́зїи ра́дꙋйтесѧ , свѣ́тлое дне́сь торжество̀ пра́зднꙋюще ѻ҆́бщаго застꙋ́пника , бл҃же́ннагѡ а҆леѯа́ндра , воспѣва́йте оу҆́бѡ и҆́стиннїи без̾мо́лвницы , и҆ прості́и лю́дїе , ѻ҆́бщаго пред̾ста́телѧ и҆ помо́щника , и҆ моле́бника ѡ҆ дш҃а́хъ на́шихъ . гла́съ , є҃ . Бг҃опрїѧ́тне и҆ прпⷣбне а҆леѯі́е , ѿ ложе́снъ поро́дъ ст҃ъ бг҃ови нарекова́нъ є҆сѝ . бл҃ги́ми дѣ́лы свѣ́тлѡ оу҆краси́сѧ , ми́лостынѧми и҆ чистото́ю , сосꙋ́дъ ст҃о́мꙋ дх҃ꙋ бы́сть . и҆́мже дѣ́йствꙋеши пресла́внаѧ чꙋдеса̀ , с̾ вѣ́рою приходѧ́щимъ ко ст҃о́мꙋ ти гро́бꙋ . Бг҃овѣнча́нныи а҆леѯа́ндре , хрⷭ҇тїа́нѡмъ побо́рниче непобѣди́мыи . ѡ҆ ни́хже жи́въ сы́и дш҃ꙋ свою̀ полага́ѧ , си́це и҆ по сме́рти не ѿстꙋ́пнѡ ѻ҆те́чество сѝ сохранѧ́й . на а҆га́рѧнъ мл҃твами тѝ спосо́бствꙋѧ . Бг҃омꙋ́дре а҆леѯа́ндре прпⷣбне , є҆гда̀ рве́нїемъ бж҃їимъ раз̾же́гсѧ , в̾ зе́млю ше́ствовати невѣ́дꙋщихъ бг҃а , не ѿрица́шесѧ . и҆ та́мѡ прише́ствїемъ сѝ , без̾бо́жнагѡ царѧ̀ оу҆диви́лъ є҆сѝ . хрⷭ҇тои҆мени́тымъ же лю́демъ , тишинꙋ̀ и҆схода́тайствовалъ є҆сѝ . тѣ́мъ и҆ дне́сь къ бг҃ꙋ хода́тайствꙋй ѡ҆ на́съ да оу҆ще́дритъ ны̀ въ де́нь сꙋ́дныи .

сла́ва . гла́съ , в҃ . Прїиди́те бг҃ои҆мени́тїи собо́ри , бг҃опочте́нїи царѝ и҆ кнѧ́зи , кꙋ́пнѡ же со ст҃ли , и҆ хрⷭ҇толюби́вое мно́жество , свѣ́тлѡ соста́вльше ѱало́мскꙋю пѣ́снь , бжⷭ҇твеномꙋ семꙋ̀ вѣнцено́сцꙋ а҆леѯа́ндрꙋ , принесе́мъ рекꙋ́ще . ра́дꙋисѧ трⷪ҇цѣ побо́рниче великои҆мени́тыи . ра́дꙋисѧ лю́демъ на́шимъ похвало̀ бг҃овѣнча́н наѧ . ра́дꙋисѧ хрⷭ҇тїа́нѡмъ ро́гъ бг҃оно́сныи . ѡ҆ ни́хже хрⷭ҇тꙋ̀ молѧ́сѧ не ѡ҆скꙋдѣ́й , дарова́ти ми́ръ , и҆ ве́лїю млⷭ҇ть . и҆ ны́нѣ , пра́здникꙋ . гла́съ , є҃ . Восїѧ̀ де́нь ра́достенъ , и҆ пра́здникъ всече́стенъ . дне́сь бо ꙗ҆́же пре́жде ржⷭ҇тва̀ , и҆ по ржⷭ҇твѣ̀ дв҃ою пребы́вши , в̾ цр҃ковь гдⷭ҇ню приво́дитсѧ . и҆ ра́дꙋетсѧ заха́рїѧ ста́рецъ , роди́тель прⷣтчевъ , и҆ вопїе́тъ ве́селѡ . прибли́жисѧ пред̾ста́тельница скорбѧ́щимъ , въ цр҃ковь ст҃ꙋ́ю , ꙗ҆́кѡ ст҃а̀ , ѡ҆ст҃и́тисѧ во ѻ҆би́телище всѣ́хъ цр҃ѧ . да весели́тсѧ і҆ѡаки́мъ пра́ѻ҆ц҃ъ , и҆ а҆́нна ра́дꙋетсѧ , ꙗ҆́кѡ принесо́ша бг҃ꙋ , ꙗ҆́кѡ трилѣ́тствꙋющꙋ ю҆́ницꙋ , непоро́чнꙋю влⷣчцꙋ . мт҃ри сра́дꙋйтесѧ , дв҃ы взыгра́йтесѧ , и҆ непло́ды сликоствꙋ́йте , ꙗ҆́кѡ ѿве́рзе на́мъ нбⷭ҇ное црⷭ҇тво пронарече́наѧ всецр҃и́ца . ра́дꙋйтесѧ лю́дїе и҆ весели́тесѧ .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ . Ꙗ҆́кѡ ве́лїе сл҃нце ,꙳ ꙗ҆ви́сѧ бл҃же́нне вселе́ннѣй ,꙳ чꙋдесы̀ стра́шными просвѣща́ѧ ве́сь ми́ръ .꙳ тѣ́мъ всѝ соше́дшесѧ ,꙳ хрⷭ҇та̀ воспое́мъ ,꙳ спаса́ющаго на́съ ѿ бѣ́дъ мл҃твами твои́ми .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Свѣ́томъ сїѧ́ѧ ,꙳ бжⷭ҇твеныѧ бл҃года́ти ,꙳ и҆ чꙋдодѣ́йствꙋеши непреста́ннѡ .꙳ и҆ ны́нѣ молѝ хрⷭ҇та̀ бг҃а ,꙳ бл҃же́нне а҆леѯа́ндре ,꙳ и҆зба́вити ѿ бѣ́дъ дш҃а на́ша .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ за́поведѣхъ є҆гѡ̀ восхо́щетъ ѕѣлѡ̀ . Не ѿ ри́ма восїѧ́лъ є҆сѝ ,꙳ ни ѿ сїѡ́на бг҃омꙋ́дре .꙳ но въ рꙋ́сстѣй землѝ ꙗ҆ви́сѧ ,꙳ чꙋдотво́рецъ пресла́венъ .꙳ и҆сцѣле́нїе подава́ѧ неѡ҆скꙋ́днѡ ,꙳ всѣ́мъ приходѧ́щимъ с̾ вѣ́рою .

сла́ва . гла́съ , а҃ . Ра́дꙋисѧ и҆ весели́сѧ гра́де влади́миръ , и҆ свѣ́тлѡ торжествꙋ́й , и҆ ликꙋ́й хрⷭ҇то́ва цр҃кви , въ не́й же положено̀ чⷭ҇тно́е тѣ́ло бл҃же́ннагѡ а҆леѯа́ндра . тѣ́ло драго́е , тѣ́ло пресла́вное , тѣ́ло чꙋдеса̀ точа́ще , всѣ́мъ приходѧ́щимъ с̾ вѣ́рою . прїиди́те всѝ лю́дїе . прїиди́те вѣ́рнїи поклони́мсѧ , тецы́те и҆ собери́тесѧ , и҆ ѱало́мски тогѡ̀ воспое́мъ ра́дꙋющесѧ , и҆ ѡ҆блобыза́емъ че́стнѡ мо́щи ди́внагѡ врача̀ на́шегѡ . печа́льнымъ при́снꙋю оу҆тѣ́хꙋ . и҆ ѿча́ѧннымъ наде́ждꙋ . похвалꙋ̀ землѝ рꙋ́сстѣй . посо́бника на врагѝ и҆ всѣ́мъ чл҃кѡмъ застꙋ́пника , и҆ моли́твеника ѡ҆ спасе́нїи дш҃ъ на́шихъ . и҆ ны́нѣ , пра́здникꙋ . гла́съ , ѕ҃ . Дне́сь собо́ри вѣ́рныхъ соше́дшесѧ , дх҃о́внѣ торжествꙋ́емъ , и҆ бг҃оѻ҆трокови́цꙋ дв҃ꙋ и҆ бцⷣꙋ , въ цр҃ковь гдⷭ҇ню приводи́мꙋ , бл҃гоче́стнѡ восхва́лимъ . прои҆збра́ннꙋю ѿ всѣ́хъ ро́дъ , во ѻ҆би́телище всѣ́хъ цр҃ѧ хрⷭ҇та̀ и҆ бг҃а . дв҃ы свѣщѝ носѧ́ще пред̾и҆ди́те , при́снѡ дв҃ыѧ чтꙋ́ще честно́е прои҆схожде́нїе . мт҃ри печа́ль всю̀ ѿло́жше , ра́достнѡ спослѣ́дствꙋйте , мт҃ри бж҃їи быва́ющей . и҆ ра́дости ми́рꙋ хода́тайцѣ , всѝ оу҆́бѡ ра́достнѣ , є҆́же ра́дꙋйсѧ со а҆́нг҃лѡмъ возопїе́мъ ѡ҆бра́дованнѣй , при́снѡ молѧ́щейсѧ ѡ҆ дш҃а́хъ на́шихъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , ст҃о́мꙋ , двⷤа . и҆ пра́здникꙋ , аⷤ .

На оу҆́трени , на бг҃ъ гдⷭ҇ь , тропа́рь , пра́здникꙋ , два́жды . сла́ва , ст҃о́мꙋ . и҆ ны́нѣ , пра́здникꙋ .

По а҃ , стихоло́гїи , сѣда́ленъ . гла́съ , д҃ . Ра́дꙋисѧ ꙗ҆́кѡ вторы́и солꙋ́нь в̾ рꙋ́сстѣй землѝ , сла́вныи гра́де влади́мире . и҆ любе́зными пѣ́сньми вкꙋ́пѣ ликꙋ́й бжⷭ҇твенаѧ цр҃кви . въ не́йже пречестно́е тѣ́ло а҆леѯа́ндра премꙋ́драгѡ бл҃же́ннагѡ , подава́етъ разли́чнѡ всѣ́мъ и҆сцѣле́нїе . и҆ сегѡ̀ ра́ди вопїе́мъ к̾ немꙋ̀ , мл҃твами твои́ми бл҃же́нне и҆сцѣлѝ недꙋ́ги и҆ болѣ́зни на́ша . и҆ всѧ́ческихъ и҆зба́ви и҆скꙋше́нїи . вѣ́рою и҆ любо́вїю па́мѧть твою̀ восхвалѧ́ющихъ .= двⷤа . сла́ва , и҆ ны́нѣ , пра́здникꙋ . гла́съ , а҃ . Ст҃а́ѧ ст҃ы́хъ бцⷣе сꙋ́щи , досто́йнѡ приведе́сѧ жи́ти во ст҃а́ѧ , ꙗ҆́кѡ ѡ҆дш҃евле́нъ гдⷭ҇нь ковче́гъ , и҆ ст҃а́гѡ дх҃а вои́стинꙋ вмѣсти́лище бжⷭ҇твеное дв҃о мт҃и . тѣ́мже всели́сѧ в̾ тѧ̀ , и҆́же ѻ҆ц҃ꙋ є҆диноро́дныи , и҆ ст҃о́мꙋ дх҃ꙋ соесте́ственыи , тво́й сн҃ъ неи҆скꙋсомꙋ́жнѡ , ѡ҆бг҃отвори́въ всѐ чл҃чество . =и҆лѝ : боⷢ҇ . Оу҆диви́сѧ і҆ѡ́сифъ па́че є҆сте́ственое зрѧ̀ . и҆ внима́ше мы́слїю рꙋно́внагѡ дождѧ̀ , в̾ без̾сѣ́меннѣмъ зача́тїи твое́мъ бцⷣе . кꙋпинꙋ̀ ѻ҆гне́мъ неѡ҆палѧ́емꙋ . же́злъ а҆арѡ́новъ прозѧ́бшїи . и҆ свидѣ́тельствꙋетъ ꙗ҆́кѡ ѻ҆брꙋ́чникъ и҆ храни́тель , сщ҃е́нникѡмъ вопїѧ́ше , дв҃аѧ ражда́етъ , и҆ по ржⷭ҇твѣ̀ па́ки дв҃ою пребꙋ́детъ .

По в҃ , стихоло́гїи , сѣда́ленъ . гла́съ , г҃ . Благода́рнѡ зове́мъ всѝ , хрⷭ҇то́вꙋ оу҆го́дникꙋ ми́лостивомꙋ , незло́бивомꙋ и҆ кро́ткомꙋ , прилѣ́жнѡ молѧ́щесѧ любо́вїю , разрꙋшѝ бра́нь страсте́й на́шихъ , и҆ ѿженѝ бѣсо́вскаѧ мечта́нїѧ бл҃же́нне . и҆ молѝ хрⷭ҇та̀ бг҃а дарова́ти на́мъ ве́лїю млⷭ҇ть . два́жды . сла́ва , и҆ ны́нѣ , пра́здникꙋ . гла́съ , д҃ . Весе́лїѧ дне́сь вселе́ннаѧ всѧ̀ и҆спо́лнисѧ , в̾ бл҃гонаро́читѣмъ пра́здницѣ бцⷣы , зовꙋ́щи , та̀ є҆́сть сѣ́нь нбⷭ҇наѧ . и҆лѝ : боⷢ҇ . Красотѣ̀ дѣ́вства твоегѡ̀ . и҆ пресвѣ́тлѣй чистотѣ̀ твое́й гаврїи́лъ дивѧ́сѧ вопїѧ́ше тѝ бцⷣе , кꙋ́ю ти принесꙋ̀ похвалꙋ̀ досто́йнꙋ . что́ же нарекꙋ̀ тѧ̀ . недовѣ́мъ и҆ чꙋждꙋ́сѧ . тѣ́мже ꙗ҆́кѡ повелѣ́нѡ мѝ є҆́сть , вопи́ти , ра́дꙋисѧ ѡ҆бра́дованнаѧ .

по хвали́тѣ и҆́мѧ гдⷭ҇не , припѣ́въ : Оу҆блажа́емъ тѧ ст҃ы́и кнѧ́же а҆леѯа́ндре , и҆ чте́мъ ст҃ꙋ́ю па́мѧть твою̀ , ты́ бо мо́лиши за на́съ хрⷭ҇та̀ бг҃а на́шегѡ . ѱл҃о́мъ и҆збра́нныи : бл҃же́нъ мꙋ́жь .

По полїєлеѡ́сѣ , сѣда́ленъ . гла́съ , и҃ . Дх҃ъ ст҃ы́и тѧ̀ бл҃же́нне наста́ви , ѻ҆те́чествїе твоѐ пастѝ на па́житѣхъ спасе́ныхъ . и҆ хрⷭ҇то́съ свѣти́льника тѧ̀ показа̀ ꙗ҆́вѣ . сегѡ̀ ра́ди ликꙋ́й и҆ весели́сѧ со дерзнове́нїемъ , ꙗ҆́кѡ сꙋгꙋ́быхъ вѣне́цъ ѿ вѣнцеда́вца прїи́мъ . два́жды . сла́ва , и҆ ны́нѣ , пра́здникꙋ . Пре́жде зача́тїѧ чⷭ҇таѧ ѡ҆ст҃и́сѧ бг҃ови . и҆ ро́ждьшисѧ на землѝ , да́ръ принесе́сѧ є҆мꙋ̀ , и҆сполнѧ́ющи ѻ҆́ч҃ее ѡ҆бѣща́нїе . въ бжⷭ҇твенѣмъ же хра́мѣ , ꙗ҆́кѡ вои́стинꙋ бжⷭ҇твенаѧ цр҃кви , ѿ младе́нства со свѣща́ми свѣ́тлыми ѿдана̀ бы́вши , ꙗ҆ви́сѧ прїѧ́телище неприкоснове́нномꙋ и҆ бжⷭ҇твеномꙋ свѣ́тꙋ . ве́лїе вои́стинꙋ прои҆схожде́нїе твоѐ , є҆ди́на бг҃оневѣ́стнаѧ . =и҆лѝ : боⷢ҇ . Ѡ҆ =тебѣ̀ ра́дꙋетсѧ ѡ҆бра́дованнаѧ всѧ́каѧ тва́рь , а҆рха́нг҃льскїи собо́ръ и҆ чл҃ческїи ро́дъ . ѽ сщ҃е́ннаѧ цр҃кви , и҆ раю̀ слове́сныи , дв҃ственаѧ похвало̀ . и҆з̾ неѧ́же бг҃ъ воплоти́сѧ , и҆ млⷣнцъ бы́сть , и҆́же пре́жде вѣ́къ сы́и бг҃ъ на́шъ . ложесна́ бо твоѧ̀ прⷭ҇то́лъ сотворѝ , и҆ твое́ же чре́во простра́ннѣйши нб҃съ содѣ́ла дв҃це . ѡ҆ тебѣ̀ ра́дꙋетсѧ ѡ҆бра́дованнаѧ всѧ́каѧ тва́рь сла́ва тебѣ̀ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . всѧ́ко дыха́нїе . =є҆ѵⷢ҇а́лїе , ѿ =матѳе́ѧ . заⷱ҇ , м҃г . ѱало́мъ , н҃ .

сла́ва . мл҃твъ ра́ди прпⷣбнагѡ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Прїиди́те всѝ лю́дїе , хвалꙋ̀ принесе́мъ бл҃же́нномꙋ , вопїю́ще си́це . ра́дꙋисѧ пресвѣ́тлыи сто́лпе , просвѣща́ѧ на́съ чꙋде́съ свѣтлостьмѝ . ра́дꙋисѧ росны́и ѻ҆́блаче , пла́мень погаша́ѧи страсте́мъ , и҆ ѡ҆роша́ѧи вѣ́рныхъ мы́сли , бжⷭ҇твеныи а҆леѯа́ндре .

Кано́нъ пра́здникꙋ , гла́съ , а҃ . со і҆рмосо́мъ , на́ ѕ҃ . і҆рмо́съ , по аⷤ . и҆ ст҃о́мꙋ два̀ кано́на , на́ и҃ . а҆́ще ли внѣ̀ попра́зднества и҆зво́литъ настоѧ́тель пѣ́ти бл҃говѣ́рномꙋ кнѧ́ѕю а҆леѯа́ндрꙋ , пое́мъ , кано́нъ бцⷣѣ , со і҆рмосо́мъ , на́ ѕ҃ . гла́съ , в҃ . нетре́нꙋ неѡ҆бы́чнꙋ . кано́нъ , а҆леѯа́ндрꙋ . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стопа́ми дре́вле ше́ствовавъ і҆и҃ль , крⷭ҇тоѡбра́зно мѡѷсе́ѡвыма рꙋка́ма , а҆мали́ковꙋ си́лꙋ в̾ пꙋсты́ни побѣди́лъ є҆́сть .

запѣ́въ : Ст҃ы́и бл҃говѣ́рныи вели́кїи кнѧ́же а҆леѯа́ндре , молѝ бг҃а ѡ҆ на́съ . Прїи́мша въ свое́мъ срⷣцы бл҃же , твою̀ бл҃года́ть дх҃о́внꙋю тве́рдѡ , премꙋ́драгѡ повелѣ́нїѧ , и҆ въ дш҃а бл҃гочести́выхъ вложи́вшагѡ , похвала́ми да́ждь оу҆блажи́ти , а҆леѯа́ндра пресла́внаго . Свѣти́льниче многосвѣ́тлыи рꙋ́сскїѧ землѝ , чꙋдесы̀ ꙗ҆́коже сл҃нце второ́е сїѧ́ѧ , всѣ́хъ на́съ помина́й , соверша́ющихъ па́мѧть твою̀ а҆леѯа́ндре бл҃же́нне . Цр҃кви бы́сть хрⷭ҇то́вѣ красота̀ бл҃же́нне . пѣ́нїемъ бо сїю̀ оу҆краси́лъ є҆сѝ пресла́вне . и҆ ны́нѣ мо́лимъ тѧ свободѝ на́съ , ѿ всѧ́кїѧ бра́ни бори́телѧ , пою́щихъ тѧ а҆леѯа́ндре . боⷢ҇ . Ра́дꙋисѧ бл҃года́ти и҆сто́чниче , ра́дꙋисѧ лѣ́ствице и҆ две́рь нбⷭ҇наѧ , ра́дꙋисѧ свѣти́льниче , и҆ рꙋ́чко злата́ѧ , и҆ горо̀ несѣко́маѧ дв҃о , ꙗ҆́же жизнода́вца хрⷭ҇та̀ ми́рови ро́ждьши .

дрꙋгі́и , кано́нъ ст҃о́мꙋ . гла́съ , и҃ . пѣ́снь , а҃ . і҆рмо́съ . Во́дꙋ проше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вопїѧ́ше , и҆зба́вителю бг҃ꙋ на́шемꙋ пое́мъ .

запѣ́въ : Ст҃ы́и бл҃говѣ́рныи вели́кїи кнѧ́же а҆леѯа́ндре , молѝ бг҃а ѡ҆ на́съ . Досто́йными похвала́ми воспѣ́ти пресла́внаго чꙋдотво́рца , оу҆́мъ и҆ смы́слъ да́рꙋй ми хрⷭ҇тѐ бж҃е , ꙗ҆́кѡ да воспою̀ ра́дꙋѧсѧ па́мѧть є҆гѡ̀ . Пѣ́сньми и҆ пѣ́ньми дх҃о́вными восхва́лимъ бл҃же́ннаго , и҆ честнꙋ́ю є҆гѡ̀ и҆ многоцѣле́бнꙋю ра́кꙋ ѡ҆бстоѧ́ще , любе́знѡ ѡ҆блобыза́емъ . и҆ си́це вопїе́мъ , ра́дꙋисѧ ѻ҆те́чествꙋ сѝ пресвѣ́тлыи свѣти́льниче . Бг҃омꙋ́дре а҆леѯа́ндре , а҆́ще тѧ̀ и҆ напослѣ́докъ лѣ́тъ новопросвѣще́ннаѧ рꙋ́сскаѧ страна̀ воз̾растѝ , но дре́внихъ че́сти сподо́бисѧ . дарова́нїе чꙋде́съ досто́йнѡ прїе́мъ .= боⷢ҇ . З=ако́нъ кромѣ̀ є҆сте́ственыхъ дв҃о родила̀ є҆сѝ , законода́вца бг҃а , чл҃ка бы́вша . тогѡ̀ ꙗ҆́кѡ бл҃га молѝ всенепоро́чнаѧ , на́ша без̾зако́нїѧ презрѣ́ти .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твоѧ̀ хрⷭ҇тѐ зовꙋ́щи , ты́ ми крѣ́пость гдⷭ҇и , и҆ прибѣ́жище и҆ оу҆тверже́нїе . Въ ве́сь ми́ръ про́йде сла́ва чꙋде́съ твои́хъ бл҃же́нне . и҆́миже просвѣтѝ вселе́ннꙋю , ѿ всѣ́хъ напа́стей и҆збавлѧ́ѧ прⷭ҇нѡ . Бл҃гочести́ваго и҆ вѣнцено́снаго а҆леѯа́ндра , соше́дшесѧ по достоѧ́нїю восхва́лимъ . ꙗ҆́кѡ чꙋде́съ пода́телѧ ѡ҆би́льнаго , и҆ гдⷭ҇ви молѧ́щасѧ ѡ҆ всѣ́хъ на́съ .= И҆сто́чникъ чꙋде́съ гро́бъ тво́й ꙗ҆ви́сѧ неи҆счерпа́емыи . ѿ него́ же рѣ́ки и҆сцѣле́ней и҆з̾лива́еши , и҆́же вѣ́рнѡ па́мѧть твою̀ творѧ́щимъ бл҃же́нне . =боⷢ҇ . Ты̀ є҆ди́на на землѝ , преє҆сте́ственымъ бл҃ги́мъ хода́таица мт҃и бж҃їѧ бы́сть . тѣ́мъ ти ра́дꙋисѧ зове́мъ .

и҆́нъ , і҆рмо́съ . Нбⷭ҇номꙋ крꙋ́гꙋ верхотво́рче гдⷭ҇и , и҆ цр҃кви зижди́телю , ты̀ менѐ оу҆твердѝ в̾ любвѝ свое́й . жела́нїемъ сы́и кра́й , и҆ вѣ́рнымъ оу҆тверже́нїе , є҆ди́не чл҃колю́бче . Свѣти́льникъ свѣ́та ꙗ҆ви́сѧ а҆леѯа́ндре бжⷭ҇твеныи , недꙋ́гъ глꙋбо́кꙋю тмꙋ̀ разрꙋша́ѧ всегда̀ , заре́ю свѣ́тлою чꙋде́съ премꙋ́дре . Престо́лꙋ пред̾стои́ши бл҃года́ти , со всѣ́ми а҆́нг҃лы ра́дꙋѧсѧ дне́сь . и҆ ми́рови и҆сцѣле́нїѧ раздава́ѧ бога́тство , спасѝ всѣ́хъ на́съ моли́твами сѝ бл҃же́нне . Житїѧ̀ твоегѡ̀ свѣ́тлость прпⷣбне всѣ́мъ бг҃ъ ꙗ҆́вѣ показа̀ , воз̾жже́нїемъ свѣщѝ оу҆́гроба твоегѡ̀ . тѣ́мже прибѣга́ющїи ти с̾ вѣ́рою всѝ просвѣща́ютсѧ .= боⷢ҇ . Ꙗ҆́=кѡ вои́стинꙋ гдⷭ҇ь воцр҃и́сѧ в̾ црⷭ҇твїе не ѿпа́дающее , и҆ ѡ҆блече́сѧ ѱало́мски и҆з̾ тебѐ бг҃омт҃и въ кра́сное бл҃голѣ́пїе , пло́ть ст҃ꙋ́ю . є҆ю́же сме́рть прїѧ́тъ , и҆ разрꙋшѝ є҆ѧ̀ ца́рство .

конда́къ , и҆ и҆́косъ , пра́здникꙋ . сѣда́ленъ . гла́съ , и҃ . Ꙗ҆́кѡ ѕвѣзда̀ многосвѣ́тлаѧ , ѿ восто́ка прои҆з̾ше́дъ , ꙗ҆ви́лсѧ є҆сѝ свѣ́тлагѡ ра́ди житїѧ̀ твоегѡ̀ , и҆ чистоты̀ дш҃е́вныѧ и҆ тѣле́сныѧ сосꙋ́дъ ст҃о́мꙋ дх҃ꙋ . и҆ сегѡ̀ ра́ди по оу҆спе́нїи твое́мъ ѿ мно́гъ лѣ́тъ во́ гробѣ нетлѣ́нны ѡ҆брѣто́шасѧ ст҃ы́ѧ ти мо́щи . ѿ ни́хже и҆сточа́еши рѣ́ки чꙋде́съ и҆сцѣле́ней , вѣ́рнѡ зовꙋ́щимъ тѝ . ра́дꙋисѧ бл҃говѣ́рныи вели́кїи кнѧ́же а҆леѯа́ндре . двⷤа . сла́ва , и҆ ны́нѣ , пра́здникꙋ . гла́съ , д҃ . Непоро́чнаѧ а҆́гница и҆ нескве́рныи черто́гъ , в̾ до́мъ бж҃їи бцⷣа мр҃їа́мъ , съ весе́лїемъ в̾во́дитсѧ пресла́внѡ . ю҆́же а҆́нг҃ли бж҃їи дароносѧ́ще вѣ́рнѡ , и҆ всѝ вѣ́рнїи оу҆бл҃жа́ютъ прⷭ҇нѡ . и҆ бл҃года́рственѡ вопїю́тъ є҆́й непреста́ннѡ велегла́снѡ , на́ша сла́ва ты̀ є҆сѝ и҆ спасе́нїе пренепоро́чнаѧ . и҆лѝ : сла́ва , и҆ нн҃ѣ , боⷢ҇ . Ꙗ҆́кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище в̾ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ .

пѣ́снь , д҃ . і҆рмо́съ . Воз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свое́мъ , досто́йнѡ взыва́ющи , сла́ва си́лѣ твое́й гдⷭ҇и . Кто̀ любо́вь твою̀ и҆ млⷭ҇ть ко всѣ́мъ чл҃кѡмъ , па́че же к̾ ни́щимъ и҆з̾гл҃етъ ; и҆ по сме́рти оу҆́бѡ ꙗ҆́кѡ жи́въ просте́рлъ є҆сѝ рꙋ́кꙋ свою̀ . и҆ прїѧ́тъ ѿ ст҃лѧ сви́токъ грѣхо́въ проще́нїѧ . Дне́сь дн҃ь ст҃а́гѡ пра́зднественыи , мно́гихъ созыва́етъ на весе́лїе дх҃о́вное и҆ трапе́зꙋ , и҆ пи́щꙋ нетлѣ́нныѧ жи́зни , бжⷭ҇твенагѡ наслажде́нїѧ . Къ бжⷭ҇твеномꙋ свѣ́тꙋ ны́нѣ преста́висѧ , свѣ́тꙋ сн҃ъ возлю́бленъ бы́въ . в̾ ра́дости и҆ красотѣ̀ с̾ ли́ки а҆́нг҃льскими , ны́нѣ ра́достнѡ ликꙋ́еши бл҃же́нне . боⷢ҇ . Свѣ́та твоегѡ̀ блиста́ньми , ѡ҆зарѝ ѻ҆трокови́це всенепоро́чнаѧ , є҆́же в̾ нощѝ страсте́й и҆скꙋше́нїи ѡ҆держи́мое срⷣце моѐ . пра́вды сл҃нца свѣ́тъ восїѧ́вши .

и҆́нъ , і҆рмо́съ . Оу҆слы́шахъ гдⷭ҇и смотре́нїѧ твоегѡ̀ та́инство , разꙋмѣ́хъ дѣ́ла твоѧ̀ , и҆ просла́вихъ твоѐ бжⷭ҇тво̀ . Заре́ю трисл҃нчныѧ бл҃года́ти сїѧ́ѧ , свѣ́тлѣ тво́й пра́здникъ творѧ́щихъ ѡ҆зарѝ . и҆ страстна́гѡ ѡ҆мраче́нїѧ бѣсо́вскагѡ и҆зба́ви а҆леѯа́ндре пресла́вне . И҆сточи́лъ є҆сѝ рѣ́ки чꙋде́съ бл҃же́нне , вѣ́рныхъ напоѧ́юща срⷣца̀ . и҆ мꙋ́тныѧ во́ды многобо́жїѧ и҆з̾сꙋша́юща . Сщ҃е́нницы и҆ ста́рцы со ю҆́нотами , и҆ ве́сь во́зрастъ свѣ́тлѡ пред̾и҆гра́йте . и҆ па́мѧть бл҃же́ннагѡ в̾ пѣ́снехъ воз̾вели́чимъ .= боⷢ҇ . И҆=мѣ́ю тѧ помо́щницꙋ , и҆ не постыждꙋ́сѧ пречⷭ҇таѧ мт҃и бж҃їѧ . и҆мѣ́ю тѧ̀ пред̾ста́тельницꙋ , и҆ вра́гъ мои́хъ не оу҆бою́сѧ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Досточꙋ́днаѧ и҆ пресла́внаѧ па́мѧть твоѧ̀ , восїѧ̀ в̾ рꙋ́сстѣй землѝ бл҃же́нне . и҆ ра́достнѡ вѣ́рныхъ весели́тъ собо́ры . Ѿверзо́шасѧ тебѣ̀ две́ри є҆де́мскїѧ , и҆ несказа́ненъ свѣ́тъ и҆ трисїѧ́ненъ восїѧ̀ бл҃же́нне , в̾ неподви́жимѣмъ црⷭ҇твїи нбⷭ҇нѣмъ . и҆ пра́ведныхъ весе́лїе прїѧ́тъ ра́дꙋѧсѧ . Ны́нѣ а҆леѯа́ндръ вели́кїи , си́рымъ , и҆ вдови́цамъ млⷭ҇тивныи печа́льникъ , ѻ҆те́чествїе своѐ и҆ всѧ̀ вкꙋ́пѣ ꙗ҆́вѣ созыва́етъ . прїиди́те собра́вшесѧ , ꙗ҆́кѡ ѻ҆́бщемꙋ застꙋ́пникꙋ свѣ́тлѡ торжествꙋ́емъ .= боⷢ҇ . С=ы́и въ зра́цѣ бж҃їи пребжⷭ҇твеныи всели́сѧ в̾ чре́во твоѐ , в̾ зра́къ мо́й ѡ҆блече́сѧ гдⷭ҇ь пренепоро́чнаѧ .

и҆́нъ , і҆рмо́съ . Оу҆́треннююще вопїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Прїѧ́лъ є҆сѝ и҆сцѣле́нїемъ бл҃года́ть а҆леѯа́ндре сла́вне , сꙋ́щимъ в̾ бѣда́хъ подава́еши здра́вїе свои́мъ застꙋпле́нїемъ . тѣ́мъ ра́тныхъ де́рзость низ̾ложѝ , и҆ ми́рꙋ подава́й чꙋдеса̀ . Ꙗ҆́кѡ ѕвѣзда̀ свѣтла̀ ꙗ҆ви́сѧ непреле́стнаѧ . плѣне́нымъ свободи́тель , и҆ ни́щимъ богати́тель , и҆ болѧ́щимъ вра́чь . и҆ гра́дꙋ на́шемꙋ оу҆твержде́нїе . Ꙗ҆ви́сѧ в̾ рꙋ́сстѣй землѝ чꙋдотво́рецъ пресла́венъ , а҆леѯа́ндръ бл҃же́нныи , ꙗ҆́кѡ всесвѣ́тлыи свѣти́льникъ сїѧ́ѧ во все́мъ ми́рѣ . и҆ во́ мрацѣ страсте́й ѡ҆зарѧ́ѧ всѣ́хъ .= боⷢ҇ . М=е́ртвости и҆ тлѧ̀ и҆зба́вила є҆сѝ чл҃чество . є҆стество́мъ бо живода́вца и҆ бг҃а без̾ сѣ́мене родила̀ є҆сѝ дв҃о всенепоро́чнаѧ , на бл҃годѣѧ́нїе восхвалѧ́ющимъ тѧ̀ вѣ́рнѡ .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Твоѧ̀ ст҃а́ѧ па́мѧть а҆леѯа́ндре , вселе́ннꙋю весели́тъ , созыва́ющи вѣ́рныѧ в̾ честны́и хра́мъ тво́й . в̾ не́мже ны́нѣ ра́достїю совокꙋ́пльшесѧ , тѧ̀ мо́лимъ , ꙗ҆зы́ческагѡ наше́ствїѧ , и҆зба́ви лю́ди своѧ̀ пресла́вне . Весе́лїѧ дне́сь всѧ̀ и҆спо́лнисѧ рꙋ́сскаѧ землѧ̀ , в̾ нарочи́тыи дн҃ь пра́здника пресла́внагѡ чꙋдотво́рца , а҆леѯа́ндра бл҃же́ннагѡ . соблюда́етъ бо ѻ҆те́чество своѐ вы́нꙋ ненавѣ́тнѡ .= Си́рымъ и҆ вдови́цамъ застꙋ́пника , и҆ в̾ бѣда́хъ непобори́маго помо́щника , пѣ́сньми а҆леѯа́ндра оу҆бл҃жи́мъ сла́вѧще . пра́зднꙋющихъ бо па́мѧть є҆гѡ̀ ве́селѡ , ѿ бѣ́дъ и҆збавлѧ́етъ и҆ скорбе́й . =боⷢ҇ . Ст҃ы́и і҆с҃ъ всели́сѧ во оу҆тро́бꙋ твою̀ , и҆́же во ст҃ы́хъ дв҃о почива́ѧи . и҆ прославлѧ́ѧ и҆́же вѣ́рою и҆́стинною , сегѡ̀ ѻ҆трокови́це сла́вѧщихъ .

и҆́нъ , і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Ѿ пречестна́гѡ ко́рене и҆з̾растѐ вѣ́твь пресла́вне . и҆ бл҃гоче́стнѡ на землѝ поживѐ , и҆ прїѧ́телище чи́сто дх҃ꙋ ꙗ҆ви́сѧ , ѡ҆свѧща́ѧ вѣ́рою притека́ющїѧ ти бл҃же́нне . Добродѣ́телемъ поло́жника , и҆ бл҃гочести́вымъ кнѧзе́мъ оу҆добре́нїе , цр҃кви сла́витъ тѧ̀ , и҆ воспѣва́етъ бл҃же́нне . мл҃твами си пода́ждь чтꙋ́щимъ любо́вїю до́блести твоѧ̀ и҆ боре́нїѧ , лю́тыхъ прегрѣше́ней ѡ҆ставле́нїе . И҆́же в̾ бѣда́хъ и҆ ско́рбехъ сꙋ́щїи к̾ ра́цѣ твое́й притека́юще , прїе́млютъ честна́ѧ дарова́нїѧ , ѿ ꙗ҆́же в̾ тебѣ̀ живꙋ́щїѧ бл҃года́ти . ты́ бо ми́рови при́снѡ и҆сточа́еши и҆сцѣле́нїе .= боⷢ҇ . С=ꙋ́щи прест҃ы́и хра́мъ бцⷣе , и҆сто́чникъ родила̀ є҆сѝ пренепоро́чнаѧ , неи҆счерпа́емыи влⷣчце .

конда́къ . гла́съ , и҃ . Ꙗ҆́кѡ ѕвѣздꙋ́ тѧ восїѧ́вшꙋ рꙋ́сстѣй землѝ дне́сь почте́мъ . всю́ бо странꙋ̀ сїю̀ чꙋдесы̀ и҆ добро́тою ѡ҆богати́въ , просвѣща́еши вѣ́рою чтꙋ́щихъ па́мѧть твою̀ а҆леѯа́ндре бл҃же́нне . тѣ́мъ вопїе́мъ ти лю́дїе твоѝ сꙋ́ще . молѝ хрⷭ҇та̀ бг҃а , спастѝ ѻ҆те́чествїе твоѐ . и҆ всѣ́хъ притека́ющихъ к̾ ра́цѣ моще́й твои́хъ , и҆ вѣ́рнѡ вопїю́щихъ ти . ра́дꙋисѧ гра́дꙋ на́шемꙋ застꙋпле́нїе . и҆́косъ . Ве́лїи чꙋдотво́рецъ ꙗ҆ви́сѧ рꙋ́сстѣй землѝ , бл҃же́нныи а҆леѯа́ндръ . неви́димѡ хрⷭ҇то́вы лю́ди посѣща́ѧ , и҆ и҆сцѣле́нїѧ подава́ѧ бога́тнѡ , всѣ́мъ ѿ дш҃и приходѧ́щимъ . и҆ согла́снѡ вопїю́щимъ си́це , ра́дꙋисѧ сто́лпе пресвѣ́тлыи , просвѣща́ѧ на́съ чꙋде́съ свѣтлостьмѝ . ра́дꙋисѧ велехва́льнагѡ кралѧ̀ побѣди́выи посо́бїемъ бж҃їимъ . ра́дꙋисѧ свободи́выи гра́дъ пско́въ ѿ невѣ́рныхъ . ра́дꙋисѧ ри́мскаѧ оу҆че́нїѧ презрѣ́выи , и҆ пре́лесть и҆́хъ ни во что́же вмѣни́въ . ра́дꙋисѧ ꙗ҆́кѡ воспрїѧ́лъ є҆сѝ в̾ тлѣ́нныхъ мѣ́сто нетлѣ́ннаѧ . ра́дꙋисѧ свѣ́та непристꙋ́пнагѡ зри́телю . ра́дꙋисѧ ꙗ҆́кѡ ликꙋ́еши со а҆́нг҃лы . ра́дꙋисѧ ѻ҆́блаче росны́и , вѣ́рныхъ мы́сли ѡ҆роша́ѧи . ра́дꙋисѧ те́мныхъ страсте́й прогони́телю . ра́дꙋисѧ рꙋ́сской землѝ застꙋ́пниче . ра́дꙋисѧ гра́дꙋ на́шемꙋ застꙋпле́нїе .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃говѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Дне́сь цр҃кви хрⷭ҇то́ва пра́зднꙋющи , а҆леѯа́ндрово торжество̀ бы́вшее ѡ҆́ бз҃ѣ , соше́дшимсѧ вои́стинꙋ и҆сточа́етъ и҆сцѣле́нїе , прилѣ́жнѡ молѧ́щимсѧ и҆ любо́вїю пою́щимъ є҆гѡ̀ . Во всѣ́хъ страна́хъ прои҆зы́де вѣща́нїе , ꙗ҆́кѡ на́шемꙋ гра́дꙋ ꙗ҆ви́сѧ чꙋдотво́рецъ пресла́венъ . и҆сточа́ѧ и҆сцѣле́ней мно́жество , всѣ́мъ просѧ́щимъ те́плѣ .= Дне́сь весе́лїѧ и҆сполнѧ́етсѧ хра́мъ бг҃а на́шегѡ , в̾ не́мже лежа́тъ честны́ѧ мо́щи бл҃же́ннагѡ . и҆ всѝ притека́ющїи ѡ҆блобыза́ютъ со́ страхомъ ст҃ꙋ́ю ра́кꙋ пресла́внагѡ , и҆ прїе́млютъ и҆сцѣле́нїе . =боⷢ҇ . Вы́шнѧгѡ ѡ҆сщ҃е́нное бж҃їе селе́нїе , ра́дꙋисѧ . тобо́ю бо даде́сѧ ра́дость бцⷣе вопїю́щимъ ти , бл҃гослове́на ты̀ в̾ жена́хъ пренепоро́чнаѧ влⷣчце .

и҆́нъ , і҆рмо́съ . И҆́же ѿ і҆ꙋде́и , доше́дше ѻ҆́троцы въ вавилѡ́нъ дре́вле , вѣ́рою оу҆тверже́нїи , пла́мень пе́щныи попра́вше гл҃юще , ѻ҆ц҃ъ на́шихъ бж҃е бл҃гослове́нъ є҆сѝ . Ꙗ҆́кѡ ѕвѣзда̀ сїѧ́ѧ краснѡ̀ бл҃же́нне , заре́ю добродѣ́телей , и҆ мно́гимъ бы́сть просвѣще́нїе . тѣ́мъ и҆ на́съ просвѣтѝ вопїю́щихъ тѝ . ра́дꙋисѧ а҆леѯа́ндре бл҃гоче́стне . Ны́нѣ сте́кшесѧ ѿ всѣ́хъ стра́нъ и҆ градо́въ , сщ҃е́нницы , бога́тїи , и҆ оу҆бо́зїи , и҆ вкꙋ́пѣ всѝ ра́дꙋющесѧ хвалꙋ̀ воздади́мъ хрⷭ҇тꙋ̀ , и҆ оу҆го́дникꙋ є҆гѡ̀ а҆леѯа́ндрꙋ пресла́вномꙋ . Чꙋдесы̀ оу҆́бѡ свои́ми ꙗ҆́кѡ цвѣ́тъ процвѣ́лъ є҆сѝ бл҃же́нне . и҆ и҆сцѣле́нїѧ подава́еши притека́ющимъ в̾ кро́въ тво́й мꙋ́дре и҆ досточꙋ́дне .= боⷢ҇ . Ѿ= дв҃ческихъ ложе́снъ твои́хъ вопло́щьсѧ бг҃ъ , и҆ ꙗ҆ви́сѧ на спасе́нїе на́ше . тѣ́мже тѧ мт҃рь свѣ́дꙋще бцⷣе правовѣ́рнѡ вопїе́мъ є҆мꙋ̀ , ѻ҆ц҃ъ на́шихъ бж҃е бл҃гослове́нъ є҆сѝ .

пѣ́снь , и҃ . і҆рмо́съ . Рꙋ́цѣ распросте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ оу҆гаси́ша добродѣ́телїю поѧ́савшесѧ , и҆́же бл҃гоче́стїѧ люби́тели ѻ҆́троцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . А҆́нг҃льстїи чи́ни хва́лѧтъ тѧ пресла́вне . и҆ чл҃честїи ро́ди пою́тъ непреста́ннѡ . творѧ́ще вѣ́рнѡ па́мѧть твою̀ , а҆леѯа́ндре великои҆мени́те . Тебѐ в̾ чꙋдесѣ́хъ сла́вна рꙋ́сскимъ страна́мъ показа̀ бг҃ъ а҆леѯа́ндре и҆ оу҆краси́ тѧ нбⷭ҇ными дармѝ . тогѡ̀ молѝ поми́ловати всѣ́хъ на́съ . Побѣ́до и҆стиннои҆мени́тъ , вои́стинꙋ вѣ́рнымъ лю́демъ в̾ бѣда́хъ , и҆ крѣ́покъ помо́щникъ ꙗ҆ви́сѧ , а҆леѯа́ндре бл҃же́нне . боⷢ҇ . Сщ҃е́нныи тѧ пррⷪ҇къ , бл҃гоѡ҆бра́знѡ проповѣ́да , две́рь и҆ го́рꙋ и҆ сѣ́нь и҆ зе́млю ст҃ꙋ́ю , и҆ ѻ҆́блакъ свѣ́та . и҆з̾ него́ же во тмѣ̀ сꙋ́щимъ , восїѧ̀ сл҃нце , дв҃о , є҆ди́нъ свѣтода́вецъ .

и҆́нъ , і҆рмо́съ . Бг҃озра́чныѧ дѣ́ти в̾ пещѝ , со ѻ҆гне́мъ и҆ ле́сть попра́вше поѧ́хꙋ , бл҃гослови́те дѣ́ла гдⷭ҇нѧ гдⷭ҇а . Ꙗ҆́кѡ оу҆́тро , ꙗ҆́кѡ дн҃ь свѣ́тлыи тво́й пра́здникъ ꙗ҆ви́сѧ , просвѣща́ѧ на́ша срⷣца̀ . и҆ всѣ́хъ и҆́же вѣ́рою восхвалѧ́ющихъ тѧ а҆леѯа́ндре пресла́вне . Дн҃ь спасе́нїѧ , и҆ пра́здникъ весе́лїѧ наста̀ стеце́мсѧ вѣ́рнїи , ѡ҆чи́стивше вкꙋ́пѣ дш҃а и҆ тѣлеса̀ . се́бо на́съ призыва́етъ а҆леѯа́ндръ бжⷭ҇твеныи . Стрꙋѧ̀ прои҆схо́дитъ ѿ ра́ки твоеѧ̀ а҆леѯа́ндре и҆сцѣле́ней всѧ́ческихъ , и҆ ѡ҆мыва́етъ скве́рны страсте́й , и҆ гное́нїѧ лю́тыхъ ѡ҆чища́етъ . и҆ всѣ́хъ вѣ́рныхъ напоѧ́етъ срⷣца̀ , любо́вїю чтꙋ́щихъ тѧ̀ пресла́вне .= боⷢ҇ . Ѻ҆́=бразы носѧ́щи дре́вле ржⷭ҇тва̀ твоегѡ̀ дв҃о мт҃и , пе́щь оу҆́бѡ ю҆́ношей не ѡ҆палѝ . та́коже и҆ ѻ҆́гнь бжⷭ҇твеныи оу҆тро́бꙋ твою̀ чⷭ҇таѧ .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Красе́нъ тѣ́ломъ и҆ дш҃е́ю , и҆ бл҃гоче́стїемъ сїѧ́ѧ сла́вне бжⷭ҇твенагѡ ра́зꙋма , ѻ҆рга́нъ бы́сть ст҃а́гѡ дх҃а . и҆ по сме́рти оу҆́бѡ къ без̾сме́ртной жи́зни , и҆ несконча́емомꙋ бл҃же́нствꙋ , прише́лъ є҆сѝ ра́дꙋѧсѧ а҆леѯа́ндре бг҃омꙋ́дре . Ꙗ҆́кѡ свѣтоза́рное бл҃же́нне сл҃нце восїѧ́въ ѿ за́пада , и҆ всю̀ зарѧ́ми бл҃гоче́стїѧ рꙋ́сскꙋю зе́млю просвѣти́лъ є҆сѝ . и҆ ѿгна́лъ є҆сѝ тмꙋ̀ глꙋбо́кꙋю є҆рети́чествꙋющихъ а҆леѯа́ндре пресла́вне . Твоѐ ст҃о́е преставле́нїе дне́сь свѣ́тлѡ пра́зднꙋемъ . и҆спо́лни ра́дости и҆ весе́лїѧ восхвалѧ́ющихъ тѧ , а҆леѯа́ндре великоимени́те . боⷢ҇ . Свѣ́томъ мѧ твоегѡ̀ милосе́рдїѧ , и҆́же во тмѣ̀ неразꙋ́мїѧ лежа́щагѡ ѡ҆зарѝ , є҆ди́на свѣтода́вца ро́ждьшаѧ , и҆зба́вителѧ и҆ бг҃а , и҆́же ст҃ы́хъ вѣнча́вшагѡ .

и҆́нъ , і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Ве́лїи щи́тъ и҆ крѣ́пость рꙋ́сстѣй землѝ а҆леѯа́ндре ѡ҆брѣ́тесѧ . лю́демъ на́шимъ похвале́нїе , и҆ сла́ва во всѣ́хъ ꙗ҆зы́цѣхъ . и҆ нн҃ѣ мо́лимтисѧ , сохранѧ́й ѻ҆те́чество своѐ ѿ ꙗ҆зы́ка чꙋжа́гѡ . Незаходи́магѡ свѣ́та лꙋча́ми , во тмѣ̀ сꙋ́щимъ сїѧ́ѧ сла́вне . къ просвѣще́нїю весе́лїѧ наста́ви на́съ пою́щихъ тѧ . Бл҃же́нныи а҆леѯа́ндре , ка́кѡ тѧ̀ возмо́жемъ воспѣ́ти досто́йнѡ ; немо́жетъ бо ꙗ҆зы́къ чл҃ческїи и҆з̾гл҃ати , твоѧ̀ разли́чнаѧ и҆сцѣле́нїѧ , и҆ мно́гаѧ дарова́нїѧ всѣ́мъ чл҃кѡмъ .= боⷢ҇ . Ꙗ҆́=кѡ оу҆́тро те́мнымъ и҆ блꙋдѧ́щимъ дв҃це восїѧ̀ пра́ведное сл҃нце хрⷭ҇то́съ . є҆го́же на рꙋкꙋ̀ свое́ю носи́ла є҆сѝ чⷭ҇таѧ .

свѣти́ленъ . Слы́шана бы́сть во всѣ́хъ страна́хъ , превели́каѧ сла́ва твоѧ̀ . и҆ тогда̀ жены̀ мѡави́тскїѧ страша́хꙋ дѣ́ти своѧ̀ гро́знымъ ти и҆́менемъ . и҆ нн҃ѣ бл҃же́нне , врагѝ на́ша , неви́димѡ оу҆страша́й , ѡ҆полча́ющихсѧ на хрⷭ҇толюби́вое твоѐ во́инство . два́жды . сла́ва , и҆ ны́нѣ , пра́здникꙋ . Ю҆́же дре́вле провозвѣстѝ проро́ческїи собо́ръ , рꙋ́чкꙋ , и҆ же́злъ , и҆ скрижа́ль , и҆ несѣко́мꙋю го́рꙋ , мр҃і́ю бг҃оѻ҆трокови́цꙋ вѣ́рнѡ восхва́лимъ . дне́сь бо вво́дитсѧ во ст҃а́ѧ ст҃ы́хъ , воспита́тисѧ гдⷭ҇ви .

и҆лѝ : сла́ва , и҆ ны́нѣ , боⷢ҇ . Совѣ́та вели́кагѡ а҆́нг҃ла ѻ҆́ч҃а родила̀ є҆сѝ хрⷭ҇та̀ препѣ́таѧ ѻ҆трокови́це , цр҃ѧ сла́вы . є҆го́же крⷭ҇тъ а҆пⷭ҇ли проповѣ́давше , просвѣти́ша ꙗ҆зы́ки . и҆ наꙋчи́ша тѧ бцⷣꙋ сла́вити , и҆ покланѧ́тисѧ твоемꙋ̀ ржⷭ҇твꙋ̀ .

На хвали́тѣхъ , стⷯры , пра́здникꙋ , г҃ . гла́съ , а҃ . поⷣ . нбⷭ҇нымъ чино́мъ .= С=вѣщено́сицы дв҃ы ,꙳ при́снѡ дв҃ꙋю свѣ́тлѡ провожда́юще ,꙳ проро́чествꙋютъ вои́стинꙋ дх҃омъ бꙋ́дꙋщее .꙳ хра́мъ бо бж҃їи бцⷣа сꙋ́щи ,꙳ в̾ цр҃ковь со сла́вою дв҃ьственою ,꙳ младе́нствꙋющи в̾во́дитсѧ . Ѡ҆бѣща́нїѧ ст҃а́гѡ пло́дъ сла́вныи ,꙳ бцⷣа вои́стинꙋ ꙗ҆ви́сѧ ми́рови ,꙳ ꙗ҆́кѡ всѣ́хъ вы́шшаѧ .꙳ ꙗ҆́же бл҃гоче́стнѡ приводи́ма въ цр҃ковь бж҃їю ,꙳ моли́твꙋ ро́ждьшихъ и҆сполнѧ́ющи ,꙳ соблюда́ема бжⷭ҇твенымъ дх҃омъ . Нбⷭ҇нымъ воспитѣ́на дв҃о хлѣ́бомъ ,꙳ въ цр҃кви гдⷭ҇ни вѣ́рнѡ ,꙳ породѝ ми́рови живота̀ хлѣ́бъ сло́во .꙳ ꙗ҆́кѡ хра́мъ и҆збра́нныи и҆ пренепоро́чныи ,꙳ пред̾ѡ҆брꙋчи́сѧ дх҃омъ та́йнѡ ,꙳ ѡ҆брꙋчена̀ бг҃ꙋ и҆ ѻ҆ц҃ꙋ .

и҆ ст҃о́мꙋ , г҃ . гла́съ , и҃ . поⷣ . ѽ =пресла́вное чꙋ́до . =Ѽ пресла́вное чꙋ́до ,꙳ сїѧ́нїемъ дх҃а ст҃а́гѡ просвѣ́щьсѧ а҆леѯа́ндре бг҃омꙋ́дре .꙳ оу҆че́нїѧ ри́мскаѧ презрѣ́въ и҆ пре́лесть и҆́хъ ѡ҆бличи́въ ,꙳ и҆ самѣ́хъ оу҆кори́въ и҆ чꙋ́жи вѣ́ры пра́выѧ наре́къ ,꙳ и҆ де́рзость и҆́хъ ни во что́же вмѣни́въ .꙳ и҆ сегѡ̀ ра́ди ѿ хрⷭ҇та̀ бг҃а прїѧ́тъ воздаѧ́нїе въ црⷭ҇твїи нбⷭ҇нѣмъ .꙳ со а҆́нг҃лы ликоствова́нїе ,꙳ и҆ с̾ пра́ведными ра́дованїе .꙳ и҆ нн҃ѣ молѝ спасти́сѧ дш҃а́мъ на́шимъ . Ѽ ка́кѡ возмогꙋ̀ досто́йнѡ похвали́ти ,꙳ и҆лѝ ꙗ҆́снѡ и҆з̾гл҃ати ,꙳ пресла́внаѧ чꙋдеса̀ ,꙳ бл҃же́ннагѡ и҆ сла́внагѡ а҆леѯа́ндра .꙳ подава́етъ бо разли́чнаѧ и҆сцѣле́нїѧ ,꙳ не то́кмѡ приходѧ́щимъ к̾ ра́цѣ моще́й є҆гѡ̀ ,꙳ но и҆ в̾ да́льнихъ страна́хъ , призыва́ющихъ и҆̀ никогда́же ѡ҆ставлѧ́етъ .꙳ тѣ́мъ и҆ по всю́дꙋ хва́льнѡ и҆́мѧ є҆гѡ̀ .꙳ и҆ нн҃ѣ мо́литъ оу҆мири́ти ми́ръ и҆ спастѝ всѣ́хъ на́съ . Ѽ ка́кѡ воз̾мо́жемъ воспѣ́ти , бл҃же́ннаго а҆леѯа́ндра ,꙳ ꙗ҆́кѡ а҆пⷭ҇ла , и҆ ꙗ҆́кѡ проповѣ́дника .꙳ всѧ́кѡ оу҆́бѡ є҆рети́ческое нече́стїе попра́лъ є҆́сть .꙳ свое́ же ѻ҆те́чествїе до́брѣ оу҆пра́вивъ и҆ соблюдѐ .꙳ цр҃кви разоре́ныѧ воз̾дви́гнꙋвъ , пѣ́нїѧ и҆спо́лни ,꙳ и҆ распꙋже́ныѧ лю́ди собра̀ в̾ до́мы своѧ̀ .꙳ и҆ ни́щимъ и҆ сирота́мъ и҆ вдови́цамъ бы́сть печа́льникъ ,꙳ и҆ въ бѣда́хъ застꙋ́пникъ .꙳ и҆ нн҃ѣ мо́литъ ѡ҆ спасе́нїи дш҃ъ на́шихъ .

сла́ва . гла́съ , в҃ . Прїиди́те всѝ ꙗ҆зы́цы , восплещи́те рꙋка́ми ликоствꙋ́юще . прїиди́те всѝ сщ҃е́нницы и҆ и҆́ноки же и҆ прості́и , дх҃о́внѣ с̾весели́мсѧ , въ наро́читомъ пра́здницѣ бл҃же́ннагѡ а҆леѯа́ндра . и҆ многоцѣле́бнꙋю є҆гѡ̀ ра́кꙋ ѡ҆б̾стоѧ́ще любе́знѡ ѡ҆блобыза́емъ . и҆ тогѡ̀ ꙗ҆́кѡ цвѣ́ты пѣ́сньми и҆ хвала́ми оу҆вѧзе́мъ рекꙋ́ще . ра́дꙋисѧ землѝ рꙋ́сстѣй похвало̀ . ра́дꙋисѧ сла́вномꙋ гра́дꙋ влади́мирꙋ оу҆твержде́нїе . ра́дꙋисѧ ѻ҆те́чествꙋ своемꙋ̀ застꙋпле́нїе , и҆ мл҃твениче ѡ҆ дш҃а́хъ на́шихъ .

и҆ ны́нѣ , пра́здникꙋ . гла́съ , то́йже . Дне́сь в̾ цр҃ковь в̾во́дитсѧ всенепоро́чнаѧ дв҃аѧ , во ѻ҆би́телище всѣ́хъ цр҃ѧ и҆ бг҃а , и҆ всеѧ̀ жи́зни на́шеѧ пита́телѧ . дне́сь честнѣ́йша ст҃ы́нѧ , ꙗ҆́кѡ трилѣ́тствꙋющаѧ ю҆́ница , во ст҃а́ѧ ст҃ы́хъ в̾во́дитсѧ . то́й возопїе́мъ ꙗ҆́кѡ а҆́нг҃лъ , ра́дꙋисѧ є҆ди́на в̾ жена́хъ бл҃гослове́наѧ .

Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , пра́здникꙋ , пѣ́снь , є҃ ѧ , на д҃ . и҆ ст҃о́мꙋ , пѣ́снь , ѕ҃ ѧ , на д҃ .

проки́менъ , ѱл҃о́мъ дв҃довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ= гала́тѡмъ . заⷱ҇ , сг҃і . а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , въ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =матѳе́ѧ . заⷱ҇ , м҃г . =прича́стенъ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>