24 ноября: св. влмчц. Екатерины и св. мч. Меркурия

МЦⷭ҇А ТОГО́ЖЕ ВЪ К҃Д ДН҃Ь

ст҃ы́ѧ великомч҃нцы є҆катери́ны . и҆ ст҃а́гѡ мч҃нка меркꙋ́рїѧ . =И҆ ст҃а́гѡ мч҃нка меркꙋ́рїѧ смоле́нскагѡ , но́вагѡ чꙋдотво́рца . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и возва́хъ , стⷯры , ст҃ѣ́й . гла́съ , а҃ . поⷣ . н=бⷭ҇нымъ чино́мъ . Дне́сь красꙋ́етсѧ гра́дъ а҆леѯа́ндрскїи ,꙳ пе́лены твоѝ мч҃нце ,꙳ въ бжⷭ҇твенѣй ти цр҃кви и҆мѣ́ѧ премꙋ́дренѡ .꙳ тѣ́мже и҆ мы̀ бл҃гоче́стнѡ пра́зднꙋемъ ,꙳ є҆катери́но па́мѧть твою̀ честнꙋ́ю ,꙳ моли́сѧ ѡ҆ чтꙋ́щихъ тѧ̀ . Є҆катери́ны па́мѧть ны́нѣ пра́зднꙋемъ .꙳ та́ бо вои́стинꙋ всѧ̀ вра́жїѧ си́лы ,꙳ сло́вомъ же и҆ дѣ́ломъ низ̾ложѝ крѣ́пкѡ ,꙳ и҆ виті́йское сопротивле́нїе .꙳ но мл҃твами є҆ѧ̀ и҆зба́ви на́съ бж҃е ,꙳ ѿ без̾бо́жныхъ вра́гъ . Ра́дꙋисѧ пресла́внаѧ мч҃нце є҆катери́но честна́ѧ .꙳ и҆́бо сина́йскаѧ гора̀ ,꙳ в̾ не́йже ви́дѣ кꙋпинꙋ̀ мѡѷсе́й неѡ҆палѧ́ющꙋ .꙳ в̾ то́й хрⷭ҇то́съ бг҃оꙋго́дное тѣ́ло твоѐ ,꙳ ны́нѣ преложи́въ храни́тъ ,꙳ да́же до́ времене втора́гѡ прише́ствїѧ своегѡ̀ .

и҆́ны , стⷯры , мч҃нкꙋ . гла́съ , д҃ . поⷣ . ꙗ҆́кѡ до́блѧ . Поборе́нїемъ дх҃о́внымъ ,꙳ страстоте́рпче меркꙋ́рїе ,꙳ ѡ҆долѣ́въ сопроти́вномꙋ ,꙳ ꙗ҆́кѡ во́инъ непобѣди́мыи .꙳ ѻ҆рꙋ́жїемъ вѣ́ры ,꙳ тмы̀ разꙋ́мныхъ мꙋ́ринъ с̾сѣ́клъ є҆сѝ .꙳ и҆ соверши́въ сво́й по́двигъ зако́ннѡ ,꙳ со всѣ́ми страда́льцы вѣнча́сѧ ,꙳ великомч҃нче пребога́те . Съ нб҃сѐ тебѣ̀ а҆́нг҃лъ ,꙳ ꙗ҆́звы твоѧ̀ и҆сцѣлѧ́ѧи ,꙳ по́сланъ бы́сть ма́нїемъ бжⷭ҇твенагѡ дх҃а .꙳ ѿ него́же и҆сцѣлѣ́въ достосла́вне .꙳ рожны̀ пробода́емъ льсти́внѡ раз̾жже́ными .꙳ терпѣ́лъ є҆сѝ повѣ́шаемъ и҆ протѧза́емь ,꙳ и҆ к̾ ка́мени привѧза́емь тѧ́жкомꙋ .꙳ и҆ кровьмѝ свои́ми ,꙳ мч҃нче ѡ҆блива́емь всю́дꙋ . Царю̀ во́инствꙋѧ ,꙳ земно́мꙋ меркꙋ́рїе .꙳ ѿ него́же бѣсо́мъ повелѣва́емь жре́ти ,꙳ бг҃омꙋ́дре бл҃же́нне ,꙳ мꙋ́ки претерпѣ́лъ є҆сѝ .꙳ и҆ попале́нїе ѻ҆́гненое и҆ нꙋ́жнꙋю сме́рть .꙳ и҆ востечѐ ко хрⷭ҇тꙋ̀ вѣнцено́сецъ .꙳ и҆ сочта́сѧ мч҃нческихъ ста́дъ ,꙳ ѡ҆́ мирѣ молѧ́сѧ . сла́ва . гла́съ , в҃ . Ра́достнѡ к̾ торжествꙋ̀ бг҃омꙋ́дрыѧ мч҃нцы є҆катери́ны , стеце́мсѧ ѽ мч҃нколю́бцы . и҆ тꙋ̀ похвала́ми , ꙗ҆́кѡ цвѣ́ты оу҆вѧзе́мъ , ра́дꙋисѧ вопїю́ще , и҆́же блѧди́выхъ виті́й свирѣ́по оу҆́стїе ѡ҆бличи́вше , ꙗ҆́кѡ ненаказа́нїѧ и҆спо́лнь . и҆ тѣ́хъ к̾ вѣ́рѣ бжⷭ҇твенѣй наста́вльши . ра́дꙋисѧ ꙗ҆́же тѣ́ло многоплете́ннымъ мꙋ́камъ вда́вши , любвѐ ра́ди творца̀ своегѡ̀ . и҆ нениз̾ложи́сѧ , ꙗ҆́кѡ ѻ҆трокови́ца неги́блема . ра́дꙋисѧ ꙗ҆́же го́рнѧѧ пребыва́лища , возмѣ́здїе болѣ́знемъ наслѣ́довавши . и҆ въ сла́вѣ вѣ́чнѣй наслажда́ешисѧ . є҆ѧ́же жела́юще пѣвцы̀ твоѝ , оу҆пова́нїѧ да не ѿпаде́мъ . и҆ ны́нѣ . гла́съ , и҃ . Поржⷭ҇твѣ̀ твое́мъ бг҃оневѣ́сто влⷣчце , прїи́де в̾ цр҃ковь гдⷭ҇ню воспита́тисѧ во ст҃а́ѧ ст҃ы́хъ , ꙗ҆́кѡ ѡ҆сщ҃е́нна . тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй , пи́щꙋ ти приноша́ше . нбⷭ҇наѧ всѧ̀ оу҆диви́шасѧ , зрѧ́ще дх҃а ст҃а́гѡ в̾ тѧ̀ все́льшасѧ . тѣ́мже пречⷭ҇таѧ и҆ нескве́рнаѧ , ꙗ҆́же на́ нб҃сѣхъ и҆ на землѝ сла́вима , мт҃и бж҃їѧ , спасѝ ро́дъ на́шъ .

На стихо́внѣ , стⷯры , пра́здникꙋ . гла́съ , а҃ . поⷣ . нбⷭ҇нымъ чино́мъ . Прїиди́те празднолю́бцы всѝ ,꙳ пѣ́сньми почте́мъ є҆ди́нꙋ бцⷣꙋ чⷭ҇тꙋю и҆ дв҃ꙋ .꙳ в̾во́дитбосѧ в̾ цр҃квь бж҃їю ,꙳ в̾ не́й жи́ти ны́нѣ свѣ́тлѡ .꙳ ст҃ѣ́йшаѧ вои́стинꙋ хрⷭ҇то́ва цр҃кви ,꙳ и҆ ра́дости всѧ́кїѧ хода́таица .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . Две́ри проро́че ѿве́рзи ,꙳ вѣ́рою прїе́мли въ цр҃ковь гдⷭ҇ню приведе́нꙋю ,꙳ всѣ́хъ а҆́нг҃лъ же и҆ чл҃къ похвалꙋ̀ ,꙳ и҆ свѣ́тло ра́дованїе ,꙳ внꙋ́трь жи́ти и҆ ликова́ти ,꙳ ꙗ҆́же цр҃кви бж҃їѧ и҆ ѻ҆би́телище .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃квь цр҃е́вꙋ . Бцⷣа мр҃і́ѧ въ цр҃ковь приведена̀ ,꙳ хлѣ́бъ прїе́млющи ѿ а҆́нг҃ла ꙗ҆ви́сѧ ,꙳ вопїю́ща є҆́й ра́дꙋйсѧ ,꙳ заче́ньши сн҃а не и҆скꙋсомꙋ́жно ,꙳ бг҃оневѣ́стнаѧ бл҃гослове́наѧ бцⷣе дв҃о ,꙳ землены́мъ бл҃гонаслѣ́дїе и҆ назда́нїе . сла́ва . гла́съ , в҃ . Житїѐ невеще́ствено навы́кши . сꙋди́ще без̾бо́жное дости́гши ста̀ , побѣдоно́сице є҆катери́но честна́ѧ . цвѣ́тъ носѧ́щи бж҃їю свѣ́тлость , и҆ бжⷭ҇твеною по́мощїю ѡ҆дѣ́ѧна , повелѣ́нїю мꙋчи́телевꙋ порꙋга́сѧ . и҆ виті́ѧмъ оу҆толи́ла є҆сѝ блѧди́выѧ рѣ́чи , многострада́льнаѧ . и҆ нн҃ѣ , пра́здникꙋ . гла́съ , и҃ . Дв҃дъ провоз̾глаша́ше тѧ пречⷭ҇таѧ , прови́дѧ сщ҃е́нство вхо́да твоегѡ̀ є҆́же в̾ цр҃ковь . в̾ не́мже концы̀ дне́сь пра́зднꙋюще , славосло́вѧтъ тѧ̀ всепѣ́таѧ . ꙗ҆́же бо пре́жде ржⷭ҇тва̀ дв҃а , и҆ по ржⷭ҇твѣ̀ пребы́вши нетлѣ́нна , мт҃и сло́вꙋ живота̀ . дне́сь в̾ цр҃кви заха́рїѧ весели́тсѧ , воспрїе́мъ тѧ̀ влⷣчце . и҆ ст҃ы́хъ ст҃а́ѧ ра́дꙋетсѧ , под̾є́мши тѧ̀ и҆сто́чника живота̀ на́шегѡ . сегѡ̀ ра́ди и҆ мы̀ пѣ́сненѡ вопїе́мъ тѝ , ѡ҆ на́съ молѝ сн҃а своегѡ̀ и҆ бг҃а , дарова́ти на́мъ ве́лїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , мч҃нцѣ . гла́съ , д҃ . Добродѣ́тельми ꙗ҆́кѡ лꙋча́ми сл҃нчными просвѣти́ла є҆сѝ невѣ́рныхъ мꙋдрецо́въ . и҆ ꙗ҆́коже пресвѣ́тлаѧ лꙋна̀ ходѧ́щимъ в̾ нощѝ , невѣ́рїѧ тмꙋ̀ ѿгна́ла є҆сѝ . и҆ цр҃цꙋ оу҆вѣ́рила є҆сѝ , бг҃озва́ннаѧ невѣ́сто бл҃же́ннаѧ є҆катери́но . востечѐ в̾ нбⷭ҇ныи черто́гъ , жела́нїе и҆мꙋ́щи к̾ прекра́сномꙋ женихꙋ̀ своемꙋ̀ хрⷭ҇тꙋ̀ . и҆ ѿ негѡ̀ црⷭ҇кимъ вѣнце́мъ вѣнча́сѧ . є҆мꙋ́же со а҆́нг҃лы пред̾стоѧ̀ , ѡ҆ на́съ моли́сѧ творѧ́щихъ всечⷭ҇тнꙋ́ю па́мѧть твою̀ . сла́ва , мч҃нкꙋ . Мч҃нкъ тво́й гдⷭ҇и меркꙋ́рїй , во страда́нїи свое́мъ вѣне́цъ прїѧ́тъ нетлѣ́нныи ѿ тебѐ бг҃а на́шегѡ . и҆мѣ́ѧ крѣ́пость твою̀ непобѣди́мꙋю , мꙋча́щихъ оу҆празднѝ , и҆ разрꙋшѝ бѣсо́мъ немощно́е шата́нїе . тогѡ̀ мл҃твами хрⷭ҇тѐ бж҃е спасѝ дш҃а на́ша . и҆ ны́нѣ , пра́здникꙋ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе .

На оу҆́трени , на бг҃ъ гдⷭ҇ь , тропа́рь , пра́здникꙋ , и҆ мч҃нцѣ . сла́ва , мч҃нкꙋ . и҆ ны́нѣ , пра́здникꙋ .

По а҃ , стихоло́гїи , сѣда́ленъ . гла́съ , а҃ . Восхвали́те дв҃ы , и҆ мт҃ре пред̾вари́те , лю́дїе славослови́те , сщ҃е́ннїи бл҃гослови́те пречⷭ҇тꙋю мт҃рь бж҃їю . пло́тїю оу҆́бѡ младе́нствꙋющи пре́жде , в̾ цр҃квь принесена̀ бы́сть , ꙗ҆́кѡ цр҃кви гдⷭ҇нѧ ст҃ѣ́йши . тѣ́мже пра́здникъ дх҃о́вныи соверша́юще , воспое́мъ є҆ѧ̀ , ꙗ҆́кѡ пред̾ста́тельницꙋ ро́дꙋ чл҃ческомꙋ . сла́ва , и҆ ны́нѣ , то́йже .

По в҃ , стихоло́гїи , сѣда́ленъ . гла́съ , а҃ . Ст҃а́ѧ ст҃ы́хъ бцⷣа сꙋ́щи , досто́йнѡ приведе́сѧ жи́ти во ст҃а́ѧ , ꙗ҆́кѡ ѡ҆дш҃е́вленъ гдⷭ҇нь ковче́гъ , и҆ дх҃а ст҃а́гѡ вои́стинꙋ вмѣсти́лище бжⷭ҇твеное дв҃о мт҃и . тѣ́мже всели́сѧ в̾ тѧ̀ , и҆́же ѻ҆ц҃ꙋ є҆диноро́дныи , и҆ дх҃а ст҃а́гѡ соє҆сте́ственыи тво́й сн҃ъ неи҆скꙋсомꙋ́жнѡ , ѡ҆бг҃отвори́въ всѐ чл҃чество . сла́ва , и҆ ны́нѣ , то́йже .

По г҃ , стихоло́гїи , сѣда́ленъ . гла́съ , д҃ . Весе́лїѧ дне́сь вселе́ннаѧ и҆спо́лнисѧ всѧ̀ въ бл҃гонаро́читѣмъ пра́здницѣ бцⷣы , зовꙋ́щи , ты̀ є҆сѝ сѣ́нь нбⷭ҇наѧ . сла́ва , и҆ ны́нѣ , то́йже .

Кано́нъ пра́здникꙋ , гла́съ , д҃ . со і҆рмосо́мъ , на́ ѕ҃ . і҆рмо́съ , по вⷤ . и҆ ст҃ы́мъ два̀ кано́на , на́ и҃ . кано́нъ , мч҃нцѣ . и҆мы́и краегране́сїе си́цево : є҆катери́нꙋ приснопа́мѧтнꙋю пѣ́сньми пою̀ . творе́нїе ѳеѡ́фаново . гла́съ , и҃ . пѣ́снь , а҃ . і҆рмо́съ . Воѡ҆рꙋже́на фараѡ́на погрꙋзѝ , чꙋдотворѧ́й дре́вле , мѡѷсе́йскїи же́ѕлъ крⷭ҇тоѡ҆бра́знѡ проразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша ходѧ́ща спасѐ , пѣ́снь бг҃ови воз̾сыла́юща .

запѣ́въ : Ст҃а́ѧ великомч҃нце є҆катери́но , молѝ бг҃а ѡ҆ на́съ . Є҆катери́ны премꙋ́дрыѧ мч҃нцы мл҃твами хрⷭ҇тѐ , ѡ҆мраче́ное ѻ҆́ко дш҃и моеѧ̀ просвѣтѝ . зарю́ ми даѧ̀ влⷣко твоегѡ̀ свѣтоли́тїѧ . дш҃етлѣ́нныхъ согрѣше́ней мои́хъ , ве́сь мра́къ потреблѧ́ющꙋ . Направлѧ́ема влⷣчними премꙋ́драѧ бжⷭ҇твеными повелѣ́нїи . и҆ тогѡ̀ любо́вїю раз̾жига́ема , потечѐ к̾ по́двигомъ тща́щисѧ . и҆ мꙋчи́телю ра́зꙋмъ є҆катери́но оу҆страши́ла є҆сѝ , сло́вомъ и҆ мꙋ́дростїю и҆ бл҃года́тїю . Ѡ҆кормлѧ́ема дла́нїю сла́внаѧ крѣ́пкою хрⷭ҇то́вою , и҆́дольскїѧ бꙋ́ри и҆з̾бѣ́гла є҆сѝ мч҃нце . немо́крено преплы́вши , крⷭ҇тнымъ вѣ́триломъ , и҆ бжⷭ҇твеными вѣ́тры дх҃о́вными , пѣ́снь бг҃ови воспѣва́ющи . Ра́дꙋющисѧ дв҃ьствеными добро́тами , є҆катери́но мꙋ́драѧ . и҆ бжⷭ҇твеныи ра́зꙋмъ с̾ нб҃сѐ и҆мꙋ́щи . лжѐ и҆мени́томꙋ ра́зꙋмꙋ , бл҃годерзнове́нно и҆ мꙋ́жествено . пред̾ста́телей посрами́ла є҆сѝ . си́хъ держа́внѣ побѣди́вши . боⷢ҇ . И҆́же бцⷣꙋ тѧ̀ проповѣ́даетъ пречⷭ҇таѧ , всѧ́кїѧ є҆́реси ѿринове́нїе и҆́мать . пло́ть бо бы́вша неи҆змѣ́нно родила̀ є҆сѝ , превы́шша всѧ́коѧ бг҃ороди́тельнице тва́ри , сло́во бж҃їе прⷭ҇носꙋ́щное .

и҆́нъ , кано́нъ , мч҃нкꙋ . и҆мы́и краегране́сїе си́цево : меркꙋ́рїева мѧ̀ крѣ́пость да сохрани́тъ . творе́нїе і҆ѡ́сифово . гла́съ , и҃ . пѣ́снь , а҃ . і҆рмо́съ . Посѣче́ныи несѣко́мое пресѣчѐ , и҆ ви́дѣ сл҃нце зе́млю , є҆ѧ́же нѣ́сть ви́дѣло , лю́тагѡ врага̀ вода̀ потопи́ла є҆́сть , и҆ непроходи́мое про́йде і҆зра́иль , пѣ́снь же воспѣва́шесѧ гдⷭ҇ви пое́мъ , сла́внѡ бо просла́висѧ .

запѣ́въ : Ст҃ы́и мч҃нче меркꙋ́рїе , молѝ бг҃а ѡ҆ на́съ . Съ вы́шними ли́ки меркꙋ́рїе , бл҃ги́хъ и҆сто́чникꙋ ра́дꙋѧсѧ пред̾стои́ши . и҆ бжⷭ҇твенагѡ наслажде́нїѧ приснопа́мѧтне и҆сполнѧ́емь . любо́вїю торжество̀ твоѐ соверша́ющихъ сохранѧ́й , гдⷭ҇ви пою́ща , сла́внѡ бо просла́висѧ . Во́лею вше́дъ в̾ по́двигъ свидѣ́тельства мꙋ́дре , си́лою оу҆крѣплѧ́емь хрⷭ҇то́вою , и҆́же на́съ ра́ди стрⷭ҇ти спасе́ныѧ , во́лею претерпѣ́вша пло́тїю . и҆ ра́дꙋѧсѧ взыва́ше , сла́вно бо просла́висѧ . Глаго́лъ мꙋчи́телѧ ꙗ҆́вѣ оу҆кори́лъ є҆сѝ , и҆сповѣ́данїемъ хрⷭ҇то́вымъ бл҃же́нне оу҆краша́емъ . и҆ всѧ́ко болѣ́зненое видѣ́нїе , веселѧ́сѧ претерпѣ́лъ є҆сѝ меркꙋ́рїе . вопїѧ̀ тебѐ оу҆крѣ́пльшемꙋ , гдⷭ҇ви пое́мъ , сла́вно бо просла́висѧ . боⷢ҇ . Ѿ ѻ҆трокови́цы дв҃ы ꙗ҆ви́сѧ воплоща́емъ на́съ ра́ди , ꙗ҆́коже мы̀ чл҃къ бы́въ . и҆ свидѣ́телѧ вѣ́рна страсте́мъ свои́мъ ꙗ҆влѧ́етъ меркꙋ́рїѧ до́блѧго страда́льца . томꙋ̀ крѣ́пкѡ пою́ща , гдⷭ҇ви пое́мъ , сла́вно бо просла́висѧ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмомъ , и҆ зе́млю на вода́хъ ѡ҆снова́выи . на ка́мени мѧ хрⷭ҇тѐ цр҃ко́внѣмъ оу҆твердѝ , ꙗ҆́кѡ нѣ́сть ст҃а , па́че тебѐ чл҃колю́бче . Во́льными тѝ оу҆стремле́нїи , вше́дши ко страда́нїю во́лею хрⷭ҇та̀ подража́ющи , и҆ побѣди́вши свѣ́тлѡ тмѣ̀ мироде́ржьца , и҆ вѣнцено́сица ꙗ҆ви́сѧ , є҆катери́но бг҃опрїѧ́тнаѧ . Крѣ́постїю оу҆ма̀ ѡ҆бличи́ла є҆сѝ мꙋчи́телѧ , в̾ без̾бо́жнꙋю глꙋбинꙋ̀ впа́дшаѧ . виті́йствꙋющи ꙗ҆́вѣ бг҃оразꙋ́мїѧ повелѣ́нїи , бж҃їею мꙋ́дростїю мч҃нце оу҆краша́ема всехва́лнаѧ . Равнобо́жїе во оу҆́ши є҆́ввинѣ пошепта́въ , ѻ҆трокови́цею младо́ю ны́нѣ попра́нъ бы́сть . ѻ҆рꙋ́жїемъ бо крⷭ҇тнымъ ѡ҆гради́вшисѧ , посрамѝ є҆катери́но мч҃нца , без̾ мѣ́ры тогѡ̀ хва́лѧщасѧ . боⷢ҇ . Оу҆мерщве́наго мѝ оу҆ма̀ , живо́тнымъ дѣ́йствомъ и҆з̾ тебѐ ꙗ҆́вльшꙋсѧ ми́рови воз̾дви́гни . ꙗ҆́звы и҆ стрꙋ́пы потреблѧ́ющи грѣхо́вныѧ є҆ди́на бг҃ороди́тельнице пренепоро́чнаѧ .

и҆́нъ , і҆рмо́съ . Ты̀ є҆сѝ оу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пое́тъ тѧ̀ дх҃ъ мо́й . Ве́сь раз̾жига́емь бжⷭ҇твеною любо́вїю сла́вне . ѻ҆́гнь , и҆ ю҆́зы , ме́чь и҆ мꙋ́ки , ꙗ҆́коже со́нъ вмѣни́лъ є҆сѝ меркꙋ́рїе . Воспѣва́ше сотво́ршаго , примѣша́ѧсѧ лю́тымъ ра́намъ мч҃нче мꙋ́дре . и҆ и҆сцѣле́нїе ꙗ҆́звамъ прїима́ше сла́вне .= Жезло́мъ оу҆крѣплѧ́емь бжⷭ҇твенымъ , вра́жїе шата́нїе , ꙗ҆́кѡ страда́лецъ мч҃нче доблемꙋ́дрене , бл҃гомо́щнѡ смири́лъ є҆сѝ . =боⷢ҇ . Ꙗ҆́кѡ да проѡ҆брази́тъ твоѐ па́че оу҆ма̀ чи́стаѧ ржⷭ҇тво̀ , кꙋпина̀ ꙗ҆ви́сѧ ѻ҆гне́мъ палѧ́щи , и҆ ника́коже сгара́ющи .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

конда́къ , и҆ и҆́косъ , пра́здникꙋ . конда́къ , меркꙋ́рїю . гла́съ , д҃ . Въ бра́нѣхъ непобѣди́маго во́ина , и҆ в̾ бѣда́хъ непосты́дна застꙋ́пника , пѣ́сньми меркꙋ́рїѧ оу҆бл҃жи́мъ сла́вѧще . пра́зднꙋющихъ бо па́мѧть є҆гѡ̀ ве́селѡ , ѿ бѣ́дъ и҆збавлѧ́етъ и҆ ско́рбей . сѣда́ленъ , ст҃ѣ́й . Жениха̀ своегѡ̀ хрⷭ҇та̀ воз̾люби́вши , свѣщꙋ̀ свою̀ свѣ́тлꙋ оу҆гото́вльши , добродѣ́тельми просїѧ́вши сла́внаѧ . тѣ́мже вни́де с̾ ни́мъ в̾ черто́гъ , и҆ вѣне́цъ страда́нїѧ ѿ негѡ̀ прїе́мши . ѿ бѣ́дъ и҆зба́ви на́съ , соверша́ющихъ є҆катери́но па́мѧть твою̀ . и҆́нъ , сѣда́ленъ , мч҃нкꙋ . Мч҃нкъ меркꙋ́рїй под̾виза́всѧ , льсти́ваго посрамѝ , и҆ вѣне́чникъ крѣ́покъ хрⷭ҇то́въ бы́сть . тѣ́мже и҆ нбⷭ҇нымъ причте́сѧ ликѡ́мъ , сла́вы непремѣ́нныѧ досто́йнѡ причаща́ѧсѧ ра́дости . сегѡ̀ ра́ди сщ҃е́ннꙋю є҆гѡ̀ па́мѧть соверша́емъ вѣ́рнѡ . сла́ва , и҆ ны́нѣ , пра́здникꙋ . Дв҃де пред̾ и҆дѝ в̾ цр҃ковь бж҃їю , и҆ ра́дꙋѧсѧ прїимѝ цр҃цꙋ на́шꙋ . и҆ то́й возопі́й , вни́ди гжⷭ҇е в̾ цр҃ковь цр҃е́вꙋ . вни́ди , є҆́йже сла́ва покрове́но разꙋмѣва́етсѧ . и҆з̾ неѧ́же хо́щетъ на́мъ и҆сточи́тисѧ всѣ́мъ свѣ́тъ хрⷭ҇то́съ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Страда́льческое є҆катери́но противле́нїе показа̀ мч҃нце прⷭ҇нопа́мѧтнаѧ , враже́бникꙋ ѕѣлѡ̀ терпи́ши противлѧ́ющꙋсѧ . и҆ тогѡ̀ попра́вши нога́ма кра́сныма , крⷭ҇тною си́лою стрⷭ҇тоте́рпице , мч҃нкѡмъ похвала̀ . Невѣ́ста хрⷭ҇то́ва є҆катери́но всебога́таѧ ꙗ҆ви́сѧ . бжⷭ҇твеными красота́ми , свѣтови́дными лꙋча́ми просвѣща́ема , и҆ добро́тою сїѧ́ющи . тѣ́мже и҆ веселѧ́щисѧ пое́ши влⷣцѣ , си́лѣ твое́й сла́ва чл҃колю́бче . Мꙋчи́тельскꙋю горды́ню низ̾ложи́ла є҆сѝ . и҆ бжⷭ҇твенымъ сло́вомъ премꙋ́дрости твоеѧ̀ , ꙗ҆́кѡ ѿ глꙋбины̀ преле́стнаго бѣсослꙋже́нїѧ прельща́емыѧ и҆схи́тила є҆сѝ . наꙋча́ющи зва́ти хрⷭ҇то́ви пою́щи , си́лѣ твое́й сла́ва чл҃колю́бче .= Бл҃госла́вное и҆ свѣтоно́сное торжество̀ сла́вныѧ па́мѧти , всехва́льныѧ , крѣ́пкѡ шата́нїе вра́жїе попра́вши , ꙗ҆́кѡ сл҃нце восїѧ̀ . въ не́мже велегла́сно влⷣцѣ вопїе́мъ , си́лѣ твое́й сла́ва чл҃колю́бче . боⷢ҇ . Н=ы́нѣ крѣ́пость низ̾ложѝ , небрегꙋ́щимъ ѻ҆́браза ѻ҆трокови́це поклоне́нїѧ , тебѐ чи́стыѧ , и҆ па́че оу҆ма̀ и҆з̾ тебѐ воплоще́ннагѡ , и҆ ми́ра всегѡ̀ просвѣ́щшаго , и҆ всѣ́хъ ст҃ы́хъ . вѣ́рою же чтꙋ́щихъ просвѣтѝ всепѣ́таѧ .

и҆́нъ , і҆рмо́съ . Оу҆слы́шахъ гдⷭ҇и смотре́нїѧ твоегѡ̀ та́инство , разꙋмѣ́хъ дѣ́ла твоѧ̀ , и҆ просла́вихъ твоѐ бжⷭ҇тво̀ . Присво́ивсѧ зижди́телю своемꙋ̀ бжⷭ҇твенагѡ мꙋче́нїѧ бг҃омꙋ́дре страстьмѝ и҆ свѣ́тлыѧ вѣнцы̀ ѿ негѡ̀ прїѧ́тъ сла́вне , ꙗ҆́кѡ непобѣди́мыи . И҆стка́нꙋ ѿ вы́шнїѧ бл҃года́ти въ ри́зꙋ мч҃нче ны́нѣ ѡ҆блече́сѧ . тлѧ̀ и҆ ме́ртвости ри́зы мч҃нче совлече́сѧ . Да́же до́крове сла́вне проти́вꙋ вра́гъ под̾виза́лсѧ є҆сѝ побѣдоно́сецъ показа́сѧ . и҆ вы́шнїѧ сла́вы сподо́бисѧ меркꙋ́рїе . боⷢ҇ . Натѧ̀ спасе́ное сло́во сни́де , прⷭ҇нѡ дв҃о ꙗ҆́коже тꙋ́ча . и҆ и҆з̾сꙋшѝ многобо́жїѧ наводне́нїѧ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Любо́вїю распала́ема мч҃нце сла́внаѧ влⷣки своегѡ̀ . и҆ и҆́щꙋщи тогѡ̀ недомы́слимꙋю добро́тꙋ ви́дѣти , самово́льнымъ нра́вомъ , ра́намъ себѐ вдала̀ є҆сѝ . дв҃ьствеными сїѧ́ющи бл҃года́тьми . Страстьмѝ сщ҃е́нными ѻ҆трокови́це до́браѧ дв҃о , оу҆краси́вши себѐ бл҃голѣ́пнѡ , взы́де к̾ нбⷭ҇номꙋ хрⷭ҇то́вꙋ черто́гꙋ . и҆ ны́нѣ свѣ́тло своемꙋ̀ женихꙋ̀ ве́село сочета́сѧ всебога́таѧ . Ѻ҆трокови́ца всесвѣ́тлаѧ ꙗ҆ви́сѧ , воз̾люби́вши є҆ди́нагѡ жела́емагѡ , и҆ в̾слѣ́дъ тогѡ̀ крѣ́пкое тече́нїе соверши́вши . в̾ воню̀ ми́ра твоегѡ̀ разꙋ́мнагѡ и҆сточи́вшагосѧ , вопїѧ́ше потекꙋ̀ женишѐ мо́й . боⷢ҇ . И҆́стиннꙋю бцⷣꙋ тѧ̀ всѝ оу҆вѣ́дѣвше пречⷭ҇таѧ влⷣчце , и҆з̾ тебѐ ро́ждьшагосѧ бг҃а сло́ва , вѣ́дѧще проповѣ́даемъ во двою̀ сꙋществꙋ̀ . хотѣ́нїи самовла́стными познава́ема мт҃и бг҃оневѣ́стнаѧ .

и҆́нъ , і҆рмо́съ . Оу҆́треннююще вопїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Растѧза́емь , и҆ ѻ҆строто́ю меркꙋ́рїе неѡ҆сла́бнѡ раз̾сѣка́емь терпѧ́ше , бжⷭ҇твеными наде́ждами вжилѧ́емь . И҆́же ка́менемъ разꙋ́мнымъ оу҆крѣпи́въ своѐ срⷣце . ка́менемъ ѡ҆тѧгча́емь , нестꙋжѝ сѝ меркꙋ́рїе сла́вне . Прича́стникъ страсте́мъ влⷣки своегѡ̀ бы́въ , сла́вы прїѡ҆бщи́сѧ тогѡ̀ , и҆ бжⷭ҇твенѣй свѣ́тлости . боⷢ҇ . Оу҆мертвѝ дв҃о живꙋ́щїи мо́й грѣ́хъ , живо́тъ ро́ждьшаѧ , оу҆мертви́вшаго сме́рть .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Бе́здна грѣхо́внаѧ и҆ прегрѣше́нїи бꙋ́рѧ мѧ смꙋща́етъ , и҆ во глꙋбинꙋ̀ нꙋ́жнꙋю рѣ́етъ ѿча́ѧнїѧ , но са́мъ крѣ́пкꙋю рꙋ́кꙋ ми прострѝ ꙗ҆́кѡ петро́ви , и҆ ѿ тлѝ бж҃е мо́й воз̾веди́ мѧ . Всю́ тѧ добро́тою сїѧ́ющꙋ дв҃ьства заре́ю , мч҃нческою ѻ҆трокови́це ѡ҆багрена̀ кро́вїю , бл҃го́е сло́во пречⷭ҇тое , в̾ черто́зѣхъ нбⷭ҇ныхъ тѧ̀ вселѝ . Воз̾мо́же крⷭ҇то́мъ , мꙋчи́тельскꙋю раз̾рꙋши́ти держа́вꙋ , и҆ мирскі́ѧ мꙋ́дрости ѡ҆бличи́вше сꙋ́етїе . бг҃одх҃нове́ннагѡ оу҆че́нїѧ точа́щи повелѣ́нїѧ велемꙋ́дренаѧ , є҆катери́но приснопа́мѧтнаѧ . Ле́стїю пре́жде , а҆да́ма ра́йскїѧ пи́щи и҆з̾гна́вшаго , ра́намъ болѣ́зни крѣ́пкѡ терпѧ́щи , низ̾ложи́ла є҆сѝ на́ землю мч҃нце пресла́внаѧ и҆ вѣнцы̀ црⷭ҇твїѧ вѣнча́сѧ .= боⷢ҇ . М=лⷭ҇тивами сꙋдїю̀ сн҃а своегѡ̀ бцⷣе дв҃о , твои́ми мольба́ми бы́ти въ де́нь сꙋда̀ , и҆ и҆зба́вителѧ же лю́тыхъ мт҃и сотворѝ . к̾ тебѣ́ бо є҆ди́ной оу҆пова́нїе воз̾лага́ю .

и҆́нъ , і҆рмо́съ . Мл҃твꙋ пролїю̀ ко́ гдⷭ҇ꙋ , и҆ томꙋ̀ воз̾вѣщꙋ̀ печа́ль мою̀ . ꙗ҆́кѡ ѕѡ́лъ дш҃а моѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ молю́сѧ ꙗ҆́кѡ і҆ѡ́на , ѿ тлѝ бж҃е мо́й воз̾веди́ мѧ . Вжилѧ́ше тѧ̀ прⷭ҇носꙋ́щное сло́во , за́нь всѧ́къ ви́дъ мꙋче́нїѧ мч҃нче мꙋ́дре терпѧ́ща тѧ̀ видѣ̀ . и҆ а҆́нг҃лѡмъ дерза́ти повелѣва́ше меркꙋ́рїе . и҆ ника́коже мꙋчи́тельскагѡ оу҆страши́тисѧ повелѣ́нїѧ . Оу҆мерщвле́нъ бы́сть многоѡ҆бра́зныи ѕмі́й . и҆ нога́ма попра́сѧ кра́сныма страда́льца , и҆ до́блѧгѡ ѻ҆рꙋ́жника . самово́льными бо оу҆стремле́нїи вше́дъ къ мꙋче́нїѧ ра́намъ и҆ к̾ сме́рти , сла́вы и҆спо́лнь . Всѐ соверше́нѡ влⷣцѣ прине́съ , серде́чное и҆зволе́нїе мч҃нче . и҆ тогѡ̀ ра́ди претерпѣ̀ сломле́нїѧ . и҆ побѣди́тель ѿ негѡ̀ вѣнча́сѧ . и҆ томꙋ̀ ны́нѣ на́ нб҃сѣхъ со всѣ́ми мч҃нки пред̾стои́ши меркꙋ́рїе . боⷢ҇ . Зача́тъ гла́сомъ а҆́нг҃лѡвымъ , вели́кагѡ совѣ́та а҆́нг҃ла ѻ҆трокови́це . и҆ ѿ твои́хъ пречⷭ҇тыхъ крове́й воплоще́на всенепоро́чнаѧ родила̀ є҆сѝ , показа́вшаго всѣ́мъ живота̀ вхо́ды , за неи҆з̾гл҃аннꙋю млⷭ҇ть .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ , ст҃ѣ́й . гла́съ , г҃ . Виті́йствꙋющи дне́сь є҆катери́на мч҃нца , и҆ виті́ѧмъ ѡ҆бличѝ оу҆мовре́днꙋю є҆́ресь . а҆́нг҃лъ бо съ нб҃сѐ к̾ то́й прїи́де , си́лꙋ ѿ вы́шнѧгѡ принесѐ ю҆́же прїе́мши мꙋ́жески речѐ , хрⷭ҇то́съ є҆́сть мч҃нкѡмъ похвала̀ . и҆́косъ . Свѣ́томъ твои́мъ хрⷭ҇тѐ просвѣтѝ срⷣце моѐ и҆ дх҃омъ твои́мъ раз̾ширѝ ны́нѣ оу҆ста̀ моѧ̀ , воспѣ́ти досто́йнѡ твою̀ стрⷭ҇тоте́рпицꙋ . та́бо вои́стинꙋ сло́вомъ и҆ бл҃года́тїю , мꙋ́дростїю и҆ дх҃омъ ѡ҆гра́ждьшисѧ всѣ́мъ ѻ҆рꙋ́жїемъ трⷪ҇цы чⷭ҇тны́ѧ , мно́жество ѡ҆бличѝ виті́йствꙋющихъ , в̾ сꙋетѣ̀ хва́лѧщихсѧ . и҆ си́хъ приведѐ тебѣ̀ бг҃ови своемꙋ̀ , влⷣцѣ и҆ сп҃сꙋ всѣ́хъ вопїю́щи , хрⷭ҇то́съ є҆сть мч҃нкѡмъ оу҆твержде́нїе .

пѣ́снь , з҃ . і҆рмо́съ . Бж҃їѧ схожде́нїѧ ѻ҆́гнь оу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́троцы , в̾ пещѝ ра́дованною ного́ю , ꙗ҆́кѡ во́ свѣтѣ ликова́хꙋ пою́ще , блгⷭ҇ве́нъ бг҃ъ ѻ҆ц҃ъ на́шихъ . Мч҃нкѡмъ похвала̀ , бл҃гоче́стїѧ мч҃нце бы́сть . свѣ́тломꙋ ти женихꙋ̀ , мч҃нкъ мно́жество приводѧ́щи хрⷭ҇то́ви . с̾ ни́ми же зове́ши всехва́льнаѧ , пою́щи блгⷭ҇ве́нъ бг҃ъ ѻ҆ц҃ъ на́шихъ . Сло́во твоѐ премꙋ́дрое ко спасе́нїю мно́гїѧ и҆схитѝ , ѿ и҆́дольскїѧ пре́лести . и҆ свѣтоно́сны ꙗ҆вѝ мч҃нки , велегла́снѡ с̾ тобо́ю зовꙋ́щихъ , блгⷭ҇ве́нъ бг҃ъ ѻ҆ц҃ъ на́шихъ . Ѻ҆трокови́ца в̾слѣ́дъ тебѐ и҆дꙋ́щи приведе́сѧ , мече́мъ оу҆сѣ́чена , твою̀ подража́ющи стра́сть пречи́стꙋю . и҆ тебѣ̀ зижди́телю вопїю́щи и҆ гл҃ющи , блгⷭ҇ве́нъ бг҃ъ ѻ҆ц҃ъ на́шихъ . боⷢ҇ . Ст҃ы́хъ ст҃ы́й , в̾ тѧ̀ сщ҃е́нно всели́сѧ чи́стаѧ бцⷣе дв҃о . воплоще́нъ и҆з̾ тебѐ ражда́етсѧ за спасе́нїе , вѣ́рою зовꙋ́щихъ , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Дѣ́ти є҆вре́йскїѧ в̾ пещѝ , попра́вше и҆ пла́мень дерзнꙋ́вше , и҆ на́ росꙋ ѻ҆́гнь прело́жше вопїѧ́хꙋ , бл҃гослове́нъ є҆сѝ гдⷭ҇и бж҃е во́ вѣки . Свѣ́томъ вы́шнѧгѡ просвѣще́нїѧ ѡ҆зарѧ́емь до́блїи во́ине воспѣва́ющихъ тѧ̀ ны́нѣ просвѣща́еши , и҆ пою́щихъ бл҃гослове́нъ є҆сѝ гдⷭ҇и бж҃е во́ вѣки . Воспѣва́ше всѣ́хъ бл҃года́телѧ , распалѧ́емь тогѡ̀ ре́вностїю бл҃же́нне . и҆ ѻ҆гне́мъ чꙋ́вственымъ жго́мъ , и҆ поѧ̀ бл҃гослове́нъ є҆сѝ гдⷭ҇и бж҃е во́ вѣки . Ка́менїю приносѧ́щїи че́сть , и҆́же чꙋ́вство ѡ҆ка́менено и҆мꙋ́ще , ка́менемъ мч҃нче ѡ҆тѧгчава́ютъ вы́ю твою̀ . вопїю́ща , бл҃гослове́нъ є҆сѝ гдⷭ҇и бж҃е во́ вѣки . Кровьмѝ , кро́вь смѣси́въ свою̀ честнꙋ́ю влⷣки чл҃колю́бца , прїо́бщникъ тогѡ̀ ꙗ҆ви́сѧ стрⷭ҇ти . вопїѧ̀ меркꙋ́рїе , бл҃гослове́нъ є҆сѝ гдⷭ҇и бж҃е во́ вѣки . боⷢ҇ . Чи́ни а҆́нг҃льстїи оу҆дивлѧ́ютсѧ , та́инства твоегѡ̀ глꙋбинѣ̀ бцⷣе . бг҃ъ бо и҆з̾ тебѐ воплоще́нъ ꙗ҆ви́сѧ . є҆го́же пою́ще хва́лимъ , бл҃гослове́нъ є҆сѝ гдⷭ҇и бж҃е во́ вѣки .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃очести́вымъ лю́тѣ раз̾жжѐ . си́лою же лꙋ́чшею спасе́ныхъ ви́дѣвъ , творцꙋ̀ и҆ и҆зба́вителю вопїѧ́ше , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Твои́ми оу҆че́нїи цр҃ца вѣ́рꙋющи , притечѐ ко бл҃гоче́стїю . и҆ крѣ́пкѡ претерпѣ́вши болѣ́зненое чꙋ́вство , и҆ црⷭ҇твїю нбⷭ҇номꙋ непреме́нномꙋ ꙗ҆́вственѡ сподо́бисѧ . вопїю́щи влⷣцѣ , сщ҃е́ннїи блгⷭ҇ви́те лю́дїе , и҆ превозноси́те є҆гѡ̀ во́ вѣки . Съ мч҃нки да бꙋ́дꙋтъ вѣ́рныхъ проше́нїѧ , стрⷭ҇тоте́рпица бо хрⷭ҇то́ви пред̾стои́тъ , просѧ́щи бо́льшаѧ , и҆ спасе́нїю хода́тайственаѧ , всест҃ꙋ́ю и҆ честнꙋ́ю є҆ѧ̀ па́мѧть оу҆се́рднѡ соверша́ющимъ , и҆ вѣ́рою пою́щимъ , лю́дїе превозноси́те є҆гѡ̀ во́ вѣки . Ѿве́рзъ прїе́млетъ тѧ̀ жени́хъ премꙋ́драѧ две́ри ра́йскїѧ , и҆ в̾ черто́зѣ всесвѣ́тлѣмъ жи́ти сотворѝ . и҆ црⷭ҇твїѧ прича́стницꙋ , ꙗ҆́кѡ прїо́бщницꙋ стрⷭ҇те́мъ ꙗ҆влѧ́етъ . є҆мꙋ́же ны́нѣ пред̾стоѧ́щи цр҃е́ва дщѝ , свѣ́тлѡ оу҆кра́шена , и҆ на́съ незабꙋ́ди . Оу҆хищре́ными глаго́лы прилѣжа́ше мꙋчи́тель , и҆ препрѣ́ными словесы̀ лю́то льстѧ̀ , ѡ҆сла́бити твою̀ крѣ́пость оу҆пова́въ сла́внаѧ . но оу҆невѣ́ститисѧ хрⷭ҇тꙋ̀ хотѧ́щи , вопїѧ́ше влⷣцѣ , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . боⷢ҇ . Сщ҃е́ннейши бы́сть бцⷣе пренепоро́чнаѧ , преми́рнагѡ чи́на а҆́нг҃льскагѡ . си́хъ бо родила̀ є҆сѝ содѣ́телѧ и҆ гдⷭ҇а , ѿ дв҃ьственыѧ и҆ неи҆скꙋсобра́чныѧ оу҆тро́бы , въ двѣ̀ сꙋществѣ̀ , несовра́тнѡ и҆ непрело́жнѡ . є҆ди́нѣмъ же соста́вомъ бг҃а воплоще́нна .

и҆́нъ , і҆рмо́съ , то́йже . Страда́льцемъ тѧ̀ приложе́нїе ли́къ прїе́млетъ , оу҆кра́шена и҆ свѣ́тла бы́вша , честны́ми красота́ми пречестны́хъ ти страда́нїи . и҆ сла́внагѡ твоегѡ̀ , и҆ честна́гѡ свидѣ́тельства . и҆ ны́нѣ вопїе́ши непреста́ннѡ , сщ҃е́ннїи лю́дїе бл҃гослови́те гдⷭ҇а , и҆ превозноси́те є҆гѡ̀ во́ вѣки . Бл҃гоче́стнѡ мꙋ́дренѡ сла́вне по́двигъ соверши́лъ є҆сѝ . и҆ доблемꙋ́дренѡ врага̀ посрами́въ . и҆ побѣ́дꙋ нбⷭ҇нꙋю ꙗ҆́кѡ побѣди́тель взе́мъ , со а҆́нг҃льскими ли́ки весели́шисѧ . с̾ ни́ми же вопїе́ши непреста́ннѡ , сщ҃е́ннїи лю́дїе по́йте гдⷭ҇а , и҆ превозноси́те є҆гѡ̀ во́ вѣки . Сконча́всѧ всебога́те мече́мъ меркꙋ́рїе , и҆ полꙋчѝ жела́емагѡ тѝ конца̀ . зе́млю оу҆́бѡ кро́вными пролїѧ́нїи напои́лъ є҆сѝ . побѣдоно́сное же бл҃же́нное тѣ́ло , бѣлѣ́йши снѣ́га показа̀ . поѧ̀ , сщ҃е́ннїи лю́дїе по́йте гдⷭ҇а , и҆ превозноси́те є҆гѡ̀ во́ вѣки . боⷢ҇ . Ꙗ҆́кѡ на́шегѡ сꙋ́щества поновле́нїе пречⷭ҇таѧ , всѝ вино́внꙋю вѣ́рнїи пое́мъ тѧ̀ . бг҃а бо всевино́внаго , па́че вины̀ родила̀ є҆сѝ . сокрꙋши́вшїисѧ ѻ҆́бразъ ѕло́бою , свои́мъ бл҃гоꙋтро́бїемъ назда́вшаго . є҆ди́на при́снѡ бл҃гослове́наѧ , и҆ ѡ҆бра́дованнаѧ .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Преста́висѧ къ черто́гамъ свѣтови́днымъ , невѣ́стными оу҆кра́шена ѡ҆дѣѧ́нїи . дв҃ьственꙋю и҆мꙋ́щи свѣщꙋ̀ в̾ свое́й десни́цѣ , въ дрꙋго́й же держа́щи ѿсѣ́ченꙋю тѝ главꙋ̀ . и҆ ны́нѣ пред̾стои́ши хрⷭ҇то́ви своемꙋ̀ женихꙋ̀ , тебѐ пою́щїѧ сохранѝ . Прїѧ́та бы́сть твоѧ̀ бг҃омꙋ́драѧ мл҃тва . и҆́бо вѣ́рою твоѐ нарица́ющихъ и҆́мѧ честна́ѧ , спаса́етъ влⷣка ѿ и҆скꙋше́нїи , и҆ бл҃го́е здра́вїе подава́етъ . и҆ недꙋ́гъ всѧ́ческихъ , дш҃а́мъ же и҆ тѣ́ломъ . тѣ́мже тѧ̀ веселѧ́щесѧ , є҆катери́но оу҆бл҃жа́емъ . Приста́ла є҆сѝ ти́хомꙋ приста́нищꙋ бл҃госпрїѧ́тно же и҆ легко̀ , мо́ре мирско́е мч҃нце преплы́вши , треволне́нїи премꙋ́драѧ . бога́тство многоѡ҆бра́зное , хрⷭ҇то́ви приносѧ́щи дв҃о мно́жество мч҃нкъ , є҆катери́но всебл҃же́ннаѧ .= Въ черто́зѣхъ нбⷭ҇ныхъ ны́нѣ внꙋ́трь с̾ дв҃ьственымъ мно́жествомъ ликоствꙋ́ющи , мч҃нческими ѡ҆зарѧ́ема лꙋча́ми є҆катери́но премꙋ́драѧ . разрѣшѝ согрѣше́нїи мои́хъ плени́цꙋ , оу҆се́рднѡ молѧ́щи всѣ́хъ бл҃года́телѧ . за него́ же кро́вь свою̀ и҆злїѧ́ла є҆сѝ . =боⷢ҇ . Ꙗ҆ви́сѧ ѽ дв҃о мт҃и бж҃їѧ , па́че є҆стества̀ ро́ждьши в̾ тѣлесѝ бл҃го́е сло́во , є҆́же ѿ срⷣца своегѡ̀ ѻ҆ц҃ъ ѿры́гнꙋ , пре́жде всѣ́хъ вѣ́къ ꙗ҆́кѡ бл҃гъ . є҆го́же ны́нѣ и҆ тѣле́съ вы́шша разꙋмѣва́емъ , а҆́ще и҆ въ тѣ́ло ѡ҆блече́сѧ .

и҆́нъ , і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схожде́нїѧ , ꙗ҆́кѡ вы́шнїи во́лею сни́де да́же и҆ до́ плоти . ѿ дв҃ческагѡ бо чре́ва бы́въ оу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Гно́еве мч҃нчестїи , бл҃гоꙋха́нїе ны́нѣ и҆спꙋща́ютъ бл҃года́тное . и҆ смра́дныѧ на́ша стра́сти , неи҆зрече́ннымъ сло́вомъ ѿгонѧ́ютъ . и҆ и҆сточа́ютъ мо́щи , цѣле́бныѧ во́ды . и҆ напоѧ́ютъ дш҃а пою́ща , тѣ́хъ чꙋдодѣѧ́нїѧ . Ꙗ҆́кѡ вели́ка столпа̀ хрⷭ҇то́вѣ цр҃кви , сщ҃е́ннѡ тѧ̀ почита́емъ . ꙗ҆́кѡ стѣ́нꙋ непоколѣби́мꙋю . ꙗ҆́кѡ гра́дъ вои́стинꙋ мч҃нче неплѣнѧ́емыи . ꙗ҆́кѡ во́ина крѣ́пка бг҃а и҆ цр҃ѧ всѣ́хъ . ꙗ҆́кѡ потреби́телѧ вра́жїѧ . ꙗ҆́кѡ свѣти́льника разꙋ́мна и҆ всеми́рнаго . Спомо́щника а҆́нг҃ла свѣ́тла , к̾ страда́нїю бг҃омꙋ́дре прїѧ́тъ . тѣ́мже растерза́емь , и҆ свѣща́ми поджига́емь , и҆ раз̾сѣка́емь лю́тѣ , и҆ мече́мъ оу҆сѣка́емь не оу҆страши́сѧ стрⷭ҇тоте́рпче хрⷭ҇то́въ до́блественыи . Де́нь и҆спо́лнь просвѣще́нїѧ , весе́лїѧ и҆ ра́дости на́мъ восїѧ̀ бжⷭ҇твенаѧ па́мѧть твоѧ̀ , тебѐ чтꙋ́щимъ мч҃нче меркꙋ́рїе . в̾ не́мже помина́й на́съ , па́мѧть твою̀ творѧ́щихъ . и҆ лю́тыхъ и҆скꙋше́нїи и҆ бѣ́дъ и҆ страсте́й и҆зба́ви . боⷢ҇ . Просвѣтѝ две́ри свѣ́та , ѡ҆мраче́нꙋю дш҃ꙋ мою̀ страстьмѝ , и҆ лꙋка́выми по́мыслы , ѡ҆чернѣ́вшꙋю , и҆ бѣ́дствꙋющꙋю . и҆ и҆зба́ви мѧ и҆скꙋше́нїи , и҆ бѣ́дъ и҆ ско́рбей . да сла́влю тѧ̀ , оу҆пова́нїе вѣ́рнымъ и҆ оу҆твержде́нїе .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . Досто́йнѡ є҆́сть .

свѣти́ленъ . А҆́нг҃льстїи чи́нове , и҆ мч҃нческїи ли́къ пра́зднꙋетъ дне́сь с̾ на́ми , в̾ бжⷭ҇твенѣмъ в̾веде́нїи бг҃оѻ҆трокови́цы , и҆ ма́тере гдⷭ҇ни , і҆ѡаки́ма же и҆ а҆́нны , в̾кꙋ́пѣ тве́рдагѡ меркꙋ́рїѧ , и҆ є҆катери́ны . и҆́хже мл҃твами ѡ҆брѣстѝ на́мъ ѡ҆ставле́нїе , мно́гимъ согрѣше́нїемъ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ .= С=вѣ́тъ тѧ̀ трисїѧ́нныи ,꙳ вже́гши бцⷣе ,꙳ въ цр҃кви сла́вы .꙳ нбⷭ҇нꙋю тѝ пи́щꙋ посыла́етъ ,꙳ велича́ѧ тѧ̀ .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . И҆ско́рене оу҆́бѡ дв҃дова ,꙳ прозѧбла̀ є҆сѝ дв҃о .꙳ гаврїи́лъ тѝ ра́дость приносѧ̀ ,꙳ вопїѧ́ше ,꙳ бг҃а ро́ждьши пречⷭ҇таѧ .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃квь цр҃е́вꙋ . Бл҃го же сщ҃е́нномꙋ ,꙳ и҆ бжⷭ҇твеномꙋ сопрѧже́нїю ,꙳ і҆ѡаки́ма и҆ а҆́нны .꙳ и҆з̾ ни́хже чⷭ҇таѧ роди́сѧ .꙳ приведена̀ бы́сть ны́нѣ творцꙋ̀ своемꙋ̀ .

сла́ва , и҆ ны́нѣ , гла́съ , то́йже . Две́ри нбⷭ҇ныѧ ,꙳ воспрїими́те дв҃ꙋ мр҃і́ю ,꙳ неи҆скꙋсомꙋ́жнꙋю ,꙳ чⷭ҇тꙋю бцⷣꙋ .꙳ и҆з̾ неѧ́же чл҃кѡмъ и҆збавле́нїе .

На литꙋргі́и , бл҃же́нна , пра́здникꙋ , пѣ́снь , з҃ ѧ , на д҃ . и҆ ст҃ѣ́й , пѣ́снь , ѕ҃ ѧ , на д҃ .

проки́менъ , ѱл҃о́мъ дв҃довъ . ди́венъ бг҃ъ во ст҃ы́хъ свои́хъ , бг҃ъ і҆и҃левъ . сти́хъ . въ цр҃квахъ бл҃гослови́те бг҃а гдⷭ҇а , ѿ и҆сто́чникъ і҆зра́илевъ .= а҆пⷭ҇лъ , къ є҆фесе́ѡмъ . зача́ло , сл҃г . =а҆ллилꙋ́їѧ . возва́ша пра́веднїи , и҆ гдⷭ҇ь оу҆слы́ша и҆́хъ , и҆ ѿ всѣ́хъ печа́лей и҆́хъ и҆зба́ви и҆́хъ . є҆ѵⷢ҇а́лїе , ѿ =лꙋкѝ . заⷱ҇ , р҃ѕ . прича́стенъ . р=а́дꙋйтесѧ пра́веднїи ѡ҆́ гдⷭ҇ѣ .

Слꙋ́жба ст҃а́гѡ мч҃нка меркꙋ́рїѧ смоле́нскагѡ , но́вагѡ чꙋдотво́рца . =Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и возва́хъ , стⷯры . гла́съ , д҃ . Дрꙋга́го тѧ̀ пое́мъ , и҆мꙋ́щаго поборе́нїе по́ дх҃ꙋ хрⷭ҇то́въ меркꙋ́рїе , ꙗ҆́кѡ непобѣди́маго во́ина . внегда́ бо повелѣ́нїю оу҆го́дниче гжⷭ҇и и҆ бцⷣы , и҆з̾ше́лъ є҆сѝ на срѣ́тенїе пога́ныхъ си́лъ , и҆ и҆споли́на съ сы́номъ крѣ́пкаго побѣди́лъ є҆сѝ посо́бїемъ бцⷣы . подо́бїе и҆мы́и , ꙗ҆́коже ст҃ы́и мч҃нкъ не́стѡръ . ꙗ҆́рость прекроти́въ ѕлосвирѣ́пагѡ мꙋчи́телѧ , лі́ѧ бг҃обо́рца побѣди́въ хрⷭ҇то́вымъ и҆́менемъ и҆ си́лою . и҆лѝ тезои҆мени́томꙋ тѝ ст҃о́мꙋ мч҃нкꙋ меркꙋ́рїю . ꙗ҆́коже во а҆леѯандрі́и ѻ҆́нъ побѣди́въ , прободѐ въ се́рдце мꙋчи́телѧ , и҆ законопрестꙋ́пника , ревнꙋ́ѧ по бл҃гоче́стїи . ты́ же тѣ́хъ подража́ѧ , сопроти́вныхъ и҆ пога́ныхъ и҆ноплеме́нникъ си́лꙋ пресѣчѐ , ꙗ҆́кѡ во́инъ до́бръ и҆ неко́сенъ . и҆ совершѝ своѐ подвиза́нїе крѣ́пцѣ , по бл҃говѣ́рїи ст҃ы́ѧ цр҃кве гжⷭ҇и и҆ бцⷣы , со всѣ́ми оу҆го́дники хрⷭ҇та̀ бг҃а . и҆ вѣнча́сѧ ве́рхъ тво́й ст҃е и҆ великомч҃нче . Ꙗ҆́коже ѿ а҆́нг҃ла , и҆лѝ съ нб҃сѐ зна́менїе прїе́млеши . къ тебѣ́ бо по́сланъ быва́етъ слꙋга̀ цр҃кве вели́цѣй гжⷭ҇и и҆ бцⷣы , возвѣща́ѧ и҆ велѧ̀ тебѐ и҆зы́ти на срѣ́тенїе си́лъ пога́ныхъ и҆ноплеме́нникъ . гла́сꙋ же къ тебѣ̀ свы́ше соше́дшꙋ , ра́бе мо́й и҆ оу҆го́дниче меркꙋ́рїе , воста́въ препоѧ́шисѧ по́ѧсомъ во́инства , и҆зы́ди ско́рѡ съ вели́кою де́рзостїю сопроти́вныхъ побѣжда́ѧ . съ тобо́ю є҆́смь побора́ющи по бл҃говѣ́рїи . нехощꙋ́бо речѐ зрѣ́ти свое́й плѣне́нѣ бы́ти цр҃кви ѿ пога́ныхъ . оу҆моли́хъ бо сн҃а моегѡ̀ да пода́стъ тѝ ѡ҆ се́мъ дерзнове́нїи твое́мъ вѣне́цъ нбⷭ҇ныи , ѿ животво́рныѧ десни́цы є҆гѡ̀ . =Ѿ црⷭ҇ка колѣ́на во́инъ и҆зы́де , и҆ посла́сѧ непобѣди́мымъ воєво́дою на́шемꙋ гра́дꙋ . вели́ко поможе́нїе ѿ гжⷭ҇и на́шеѧ бцⷣы . во́инствꙋѧ бо неземно́мꙋ цр҃ю оу҆гожда́ѧ , но свы́ше повелѣ́нїе прїе́млѧ бг҃омꙋ́дре . и҆ бл҃же́нныи страда́льче меркꙋ́рїе жела́нїемъ и҆ ре́вностїю побора́ѧ по бл҃говѣ́рїи . мч҃нчески стражда̀ , и҆ сопроти́вныхъ полкѝ побѣжда́ѧ , пога́ныхъ и҆ноплеме́нникъ . и҆ са́мъ нꙋ́жною сме́ртїю коне́цъ житїю̀ воспрїи́меши . и҆ ко хрⷭ҇тꙋ̀ бг҃ꙋ на́ нб҃о востече́ши . и҆ ра́вными тебѣ̀ ст҃ы́ми мч҃нки ли́кꙋ сочта́сѧ воз̾мѣ́здїе прїи́меши . тѣ́мже и҆ ны́нѣ мы̀ многогрѣ́шнїи мо́лимъ тѧ̀ ст҃е , и҆мѣ́ѧ дерзнове́нїе , помоли́сѧ ѡ҆́ градѣ на́шемъ невоева́нꙋ пребы́ти є҆мꙋ̀ , и҆ дш҃а́мъ на́шимъ дарова́ти ве́лїю млⷭ҇ть .

сла́ва . гла́съ , в҃ . Прїидѣ́те бл҃говѣ́рнїи лю́дїе , прїидѣ́те со́нмище празднолюбе́зныхъ пѣ́снь воскли́кнемъ . и҆ рꙋка́ми воспле́щемъ к̾ застꙋ́пницѣ на́шей , и҆ гжⷭ҇е и҆ бцⷣѣ , сы́нове гра́да смоле́нска , ра́достїю покрыва́ющесѧ . и҆́же посла́сѧ ѿ неѧ̀ непобѣди́мъ во́инъ гра́дꙋ на́шемꙋ , оу҆го́дникъ сеѧ̀ сы́и меркꙋ́рїи . мно́гѡ побора́ѧ по на́съ , пога́ныхъ побѣжда́ѧ . и҆ забра́ло быва́етъ тве́рдо ѿ всѣ́хъ ра́тей , находѧ́щихъ гра́дꙋ на́шемꙋ . стеце́мсѧ гра́ждане всѝ в̾ цр҃ковь ст҃ꙋ́ю гжⷭ҇и и҆ бцⷣы . и҆ пристꙋпи́вше ѡ҆бъи́мемъ лобза́юще , срⷣцемъ же и҆ оу҆сты̀ гро́бъ ст҃а́гѡ меркꙋ́рїѧ . и҆ похвала́ми пое́мъ є҆гѡ̀ . ра́дꙋисѧ вопїю́ще , и҆́же хꙋдо́жства побѣди́вша ѕловѣ́рныхъ ва́рваръ , и҆ свирѣ́пое и҆́хъ мꙋчи́тельство ѡ҆бличи́вша . и҆ ве́лїе дерзнове́нїе ѿ хрⷭ҇та̀ бг҃а прїи́мша . и҆ ны́нѣ ст҃е мо́лимъ тѧ̀ незабꙋ́ди своегѡ̀ гра́да и҆ люде́й живꙋ́щихъ в̾ не́мъ . и҆дѣ́же бо є҆́сть гро́бъ съ бл҃же́ннымъ тѣ́ломъ твои́мъ . моли́сѧ побѣ́дꙋ да́ти гра́дꙋ на́шемꙋ . и҆ дш҃а́мъ на́шимъ проще́нїе мно́гимъ грѣхо́мъ и҆ ве́лїю млⷭ҇ть . и҆ ны́нѣ , боⷢ҇ . Пре́йде сѣ́нь зако́ннаѧ , бл҃года́ти прише́дши , ꙗ҆́коже бо кꙋпина̀ не с̾гара́ше , распала́ющисѧ . та́кѡ и҆ дв҃аѧ родила̀ є҆́сть , и҆ дв҃ою пребы́сть . в̾мѣ́стѡ столпа̀ ѻ҆́гненнагѡ , пра́ведное возсїѧ̀ сл҃нце . в̾мѣ́стѡ мѡѷсе́ѧ хрⷭ҇то́съ , во спасе́нїе дш҃а́мъ на́шимъ . вы́ходъ . проки́менъ , дню̀ .

Ѿ проро́чества и҆са́ина , чте́нїе .

Та́кѡ глаго́летъ гдⷭ҇ь , всѝ ꙗ҆зы́цы собра́шасѧ вкꙋ́пѣ , и҆ соберꙋ́тсѧ кнѧ́зи ѿ ни́хъ . и҆ кто̀ возвѣсти́тъ сїѧ̀ в̾ ни́хъ ; и҆ ꙗ҆́коже и҆з̾ нача́ла кто̀ слы́шана сотвори́тъ ва́мъ ; да приведꙋ́тъ свидѣ́тели своѧ̀ , и҆ ѡ҆правдѧ́тсѧ , и҆ да оу҆слы́шатъ , и҆ да рекꙋ́тъ и҆́стинꙋ . бꙋ́дете ми свидѣ́тели , и҆ а҆́зъ свидѣ́тель , гл҃етъ гдⷭ҇ь бг҃ъ , и҆ ѻ҆́трокъ , є҆го́же и҆збра́хъ , да позна́ете и҆ вѣ́рꙋете ми , и҆ разꙋмѣ́ете ꙗ҆́кѡ а҆́зъ є҆́смь . и҆ пре́жде менѐ не бы́сть и҆́нъ бг҃ъ , и҆ по мнѣ̀ небꙋ́детъ . а҆́зъ є҆́смь бг҃ъ , и҆ нѣ́сть ра́звѣ менѐ спаса́ѧи . а҆́зъ возвѣсти́хъ и҆ спасо́хъ , и҆ оу҆ничижи́хъ , и҆ небѣ̀ в̾ва́съ ѿчꙋжде́нїѧ . вы̀ мнѣ̀ свидѣ́тели , и҆ а҆́зъ свидѣ́тель гл҃етъ гдⷭ҇ь бг҃ъ . и҆ є҆щѐ ѿ нача́ла а҆́зъ є҆́смь , и҆ нѣ́сть и҆́же ѿ рꙋкꙋ̀ мое́ю и҆збавлѧ́ѧи . сотворю̀ , и҆ кто̀ ѿврати́тъ то̀ ; си́це гл҃етъ гдⷭ҇ь бг҃ъ , и҆збавлѧ́ѧи ва́съ ст҃ы́и і҆и҃левъ .

Ѿ премꙋ́дрости соло́мони , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ не многолѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрость человѣ́кѡмъ . и҆ во́зрастъ ста́рости , житїѐ нескве́рно . бл҃гоꙋго́денъ бг҃ови бы́въ , воз̾лю́бленъ бы́сть . и҆ живы́и посредѣ̀ грѣ́шникъ , преста́вленъ бы́сть . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хоти , премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та мно́га , оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни положи́ша в̾ помышле́нїи такова́гѡ , ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

На стихо́внѣ , стⷯры . гла́съ , д҃ . поⷣ . ꙗ҆́кѡ до́блѧ .= М=ногоѡ҆бра́зными мꙋче́нїи ,꙳ лю́тыи мꙋчи́тель ка́знемъ ѕлы́мъ пре́давъ казни́ти ,꙳ многострада́льное и҆ долготерпѣли́вое тѣ́ло твоѐ ,꙳ бг҃омы́слене меркꙋ́рїе .꙳ не ѿве́ржесѧ хрⷭ҇та̀ .꙳ ни кꙋми́рѡмъ поже́рлъ є҆сѝ .꙳ но терпѣ́лъ є҆сѝ ,꙳ ꙗ҆́кѡ и҆но́мꙋ стра́ждꙋщꙋ .꙳ ѡ҆жида́ѧ бꙋ́дꙋщагѡ воз̾да́нїѧ ,꙳ и҆ без̾сме́ртнагѡ бг҃осло́вїѧ .

сти́х̾ : пра́ведникъ ꙗ҆́кѡ фи́никъ процвѣте́тъ ,꙳ и҆ ꙗ҆́кѡ ке́дръ и҆́же в̾ лива́нѣ оу҆мно́житсѧ . Воз̾дви́женъ и҆ стрꙋ́жемь ,꙳ и҆ ка́менїемъ посыпа́емъ и҆ желѣ́зомъ оу҆ранѧ́емь ,꙳ и҆ мече́мъ скончава́емь ,꙳ непрекло́ненъ пре́былъ є҆сѝ ,꙳ на ка́мени оу҆́мнѣмъ ,꙳ дш҃ꙋ свою̀ водрꙋзи́въ ,꙳ и҆ сегѡ̀ ра́ди а҆́нг҃льскимъ лико́мъ сочета́сѧ ,꙳ свѣ́та невече́рнѧгѡ сподоблѧ́емъ .

сти́хъ : насажде́нъ въ домꙋ̀ гдⷭ҇ни ,꙳ во дво́рѣхъ до́мꙋ бг҃а на́шегѡ процвѣтꙋ́тъ . И҆сцѣле́нїе дарова́нїемъ жела́ющимъ ,꙳ и҆сточа́ютъ сла́вне твоѧ̀ мо́щи .꙳ потоплѧ́ютъ стра́сти недꙋ́ги , меркꙋ́рїе .꙳ и҆ разорѧ́ютъ лꙋка́выхъ дѣ́монъ толпы̀ .꙳ напоѧ́ютъ же вѣ́рныхъ срⷣца̀ ,꙳ прозѧба́ющаѧ добродѣ́телемъ ,꙳ плоды̀ бжⷭ҇твеныѧ ,꙳ и҆ бл҃гоче́стїѧ разꙋмѣ́нїе .

сла́ва . гла́съ , в҃ . Житїе́мъ до́брымъ и҆ чистото́ю ст҃е оу҆гожда́ѧ хрⷭ҇тꙋ̀ бг҃ꙋ , и҆ тогѡ̀ ро́ждьшей бг҃омт҃ри . сꙋди́щемъ без̾бо́жныхъ и҆ноплеме́нникъ постиза́еши . повелѣ́нїемъ да́же подо́бнѣ и҆сходѧ́и на проти́въ борю́щихъ , цѣломꙋ́дрїѧ проти́вꙋ ѕловѣ́рне цѣлꙋ́ющагѡ меркꙋ́рїе . тꙋ̀ побѣдоносѧ́щи под̾виза́ешисѧ . и҆ чꙋ́до вели́ко ѡ҆ себѣ̀ сотворѧ́ѧ . ра́тника съ вели́кими си́лами побѣди́въ хрⷭ҇то́вою си́лою . и҆ са́мъ тꙋ̀ внѣ̀ пред̾ градо́мъ бл҃же́нне коне́цъ воспрїе́млеши . и҆ си́мъ чꙋдесе́мъ гра́дъ оу҆дивлѧ́еши . ѿсѣ́ченнꙋю свою̀ ст҃ꙋ́ю главꙋ̀ и҆ноплеме́нника сꙋдо́мъ бж҃їимъ , са́мъ ꙗ҆́кѡ жи́въ по сме́рти с̾ тѣ́ломъ во́ градъ вне́слъ є҆сѝ . тѣ́мже и҆ ны́нѣ побѣ́дѣ вѣне́цъ и҆мы́и . и҆ мы̀ под̾виза́юще мо́лимъ тѧ̀ ѡ҆бстоѧ́ще ст҃е гро́бъ тво́й . да прише́дъ побо́реши по́градѣ тѝ и҆ лю́дехъ , держа́вы гжⷭ҇и и҆ бцⷣы . и҆́же на на́съ ѕлѣ̀ ра́тꙋющихъ . и҆ ѿ хрⷭ҇та̀ бг҃а просѧ̀ на́мъ ми́ра , и҆ ве́лїѧ млⷭ҇ти . и҆ ны́нѣ , боⷢ҇ . Ѽ чꙋдесѝ но́вагѡ , па́че всѣ́хъ дре́внихъ чꙋде́съ , кто́ бо позна̀ мт҃рь бе́з̾мꙋжа ро́ждьшꙋю , и҆ на рꙋкꙋ̀ носѧ́щꙋ , и҆́же всю̀ тва́рь содержа́щагѡ . бж҃їе є҆́сть сло́во ро́ждьшесѧ . є҆го́же ꙗ҆́кѡ млⷣнца пречⷭ҇таѧ на рꙋкꙋ̀ свое́ю носи́вши , и҆ мт҃рьне дерзнове́нїе к̾ немꙋ̀ и҆мꙋ́щи , непреста́й молѧ́щи ѡ҆ чтꙋ́щихъ тѧ̀ , оу҆ще́дрити ми́ра , и҆ спастѝ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Мч҃нкъ тво́й гдⷭ҇и меркꙋ́рїи , во страда́нїи свое́мъ вѣне́цъ прїѧ́тъ нетлѣ́нныи , ѿ тебѐ бг҃а на́шегѡ . и҆мѣ́ѧ бо крѣ́пость твою̀ непобѣди́мꙋю , мꙋ́чащихъ оу҆празднѝ , и҆ разрꙋшѝ бѣсо́мъ немощна́ѧ шата́нїѧ . тогѡ̀ мл҃твами хрⷭ҇тѐ бж҃е спасѝ дш҃а на́ша . сла́ва , и҆ ны́нѣ , пра́здникꙋ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе .

На оу҆́трени , на бг҃ъ гдⷭ҇ь , тропа́рь , пра́здникꙋ , два́жды . сла́ва , мч҃нкꙋ . и҆ ны́нѣ , пра́здникꙋ .

По а҃ , стихоло́гїи , сѣда́ленъ . гла́съ , а҃ . Во́инство и҆́же на землѝ воз̾ненави́дѣвъ мч҃нче . ю҆́же на́ нб҃сѣхъ воз̾желѣ́лъ є҆сѝ сла́вꙋ , и҆ болѣ́зни претерпѣ́лъ є҆сѝ , и҆ нꙋ́жнꙋю сме́рть . тѣ́мже дне́сь всест҃ꙋ́ю твою̀ па́мѧть пра́зднꙋемъ , хрⷭ҇то́ви приносѧ́ще хвалꙋ̀ , пребл҃же́нне меркꙋ́рїе .

двⷤа . сла́ва , и҆ ны́нѣ , боⷢ҇ . Мт҃рь тѧ̀ бж҃їю и҆ дв҃ꙋ мо́лимъ всѝ вои́стинꙋ . въ щедро́ты твоѧ̀ вопїе́мъ . любо́вїю прибѣга́юще к̾ твое́й бл҃гости . тѧ́ бо и҆́мамы грѣ́шнїи застꙋ́пницꙋ . и҆ тебѐ стѧжа́хомъ в̾ напа́стехъ спасе́нїе , є҆ди́нꙋ пречи́стꙋю .

По в҃ , стихоло́гїи , сѣда́ленъ . гла́съ , д҃ . Тече́нїе соверши́въ и҆́стинно , и҆ мꙋчи́телемъ всю̀ крѣ́пость побѣди́лъ є҆сѝ . прїѧ́тъ вѣне́цъ ѿ рꙋкѝ вседержи́телѧ меркꙋ́рїе , всече́стне . и҆ показа́сѧ а҆́нг҃лѡмъ соприча́стникъ . двⷤа . сла́ва , и҆ ны́нѣ , боⷢ҇ . Сло́во ѻ҆́ч҃ее хрⷭ҇та̀ бг҃а на́шегѡ и҆з̾ тебѐ вопло́щшеесѧ разꙋмѣ́хомъ бцⷣе дв҃о . є҆ди́на чи́стаѧ и҆ бл҃гослове́наѧ . тѣ́мже всегда̀ прославлѧ́емъ тѧ̀ велича́юще .

по хвали́те и҆́мѧ гдⷭ҇не , припѣ́в̾ : Велича́емъ тѧ̀ стрⷭ҇тоте́рпче хрⷭ҇то́въ меркꙋ́рїе . и҆ чте́мъ чⷭ҇тна́ѧ страда́нїѧ твоѧ̀ , ꙗ҆́же за хрⷭ҇та̀ претерпѣ́лъ є҆сѝ . ѱл҃о́мъ и҆збра́нныи : бг҃ъ на́мъ прибѣ́жище .

По полїєлеѡ́сѣ , сѣда́ленъ . гла́съ , д҃ . Во́ина хрⷭ҇то́ва непобѣди́маго , побѣди́телѧ на врагѝ до́блѧго . и҆́же в̾ вели́кихъ чꙋдесѣ́хъ восїѧ́вшаго при́снѡ всѝ восхва́лимъ вѣ́рою меркꙋ́рїѧ , стрⷭ҇тоте́рпца . то́читъ бо цѣльбы̀ прири́щꙋщимъ вѣ́рою , и҆ оу҆толѧ́етъ стра́сти лю́тыѧ . и҆ сꙋ́щаѧ в̾ скорбѣ́хъ чл҃ки застꙋпа́етъ . двⷤа . сла́ва , и҆ нн҃ѣ , боⷢ҇ . Стѣна̀ непобѣди́маѧ , на́мъ хрⷭ҇тїа́нѡмъ є҆сѝ бцⷣе дв҃о . к̾ тебѣ́ бо прибѣга́юще невреди́ми пребыва́емъ . и҆ па́ки согрѣша́юще и҆́мамы тѧ̀ мл҃твеницꙋ . тѣ́мъ бл҃годарѧ́ще вопїе́мъ тѝ , ра́дꙋисѧ ѡ҆бра́дованнаѧ гдⷭ҇ь с̾ тобо́ю .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . пра́ведникъ ꙗ҆́кѡ фи́никъ процвѣте́тъ , и҆ ꙗ҆́кѡ кѣ́дръ и҆́же в̾ лива́нѣ оу҆мно́житсѧ .= сти́хъ . насажде́ни в̾ домꙋ̀ гдⷭ҇ни , во дво́рѣхъ бг҃а на́шегѡ процвѣтꙋ́тъ . всѧ́ко дыха́нїе . =є҆ѵⷢ҇а́лїе , ѿ лꙋкѝ . заⷱ҇ , р҃ѕ . ѱало́мъ , н҃ .

сла́ва . моли́твъ ра́ди страстоте́рпча , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Дне́сь вселе́ннаѧ всѧ̀ , страстоте́рпца лꙋча́ми просвѣща́ема . и҆ бж҃їѧ цр҃кви цвѣ́ты оу҆краша́ема , мч҃нче меркꙋ́рїе вопїе́тъ тѝ . оу҆го́дниче хрⷭ҇то́въ , и҆ застꙋ́пниче те́плыи , непреста́й молѧ́сѧ за рабы̀ своѧ̀ .

Кано́нъ пра́здникꙋ , гла́съ , д҃ . со і҆рмосо́мъ , на́ ѕ҃ . і҆рмо́съ , по вⷤ . и҆ ст҃о́мꙋ , на́ и҃ . =Кано́нъ , ст҃о́мꙋ меркꙋ́рїю , и҆мы́и краегране́сїе си́цево : велехва́льно пое́мъ во́ина тве́рда , ст҃а́гѡ до́блѧго меркꙋ́рїѧ . гла́съ , и҃ . пѣ́снь , а҃ . і҆рмо́съ . П=осѣче́ныи несѣко́мое пресѣчѐ , и҆ ви́дѣ сл҃нце зе́млю , є҆ѧ́же нѣ́сть ви́дѣло , лю́тагѡ врага̀ вода̀ потопи́ла є҆́сть , и҆ непроходи́мое про́йде і҆зра́иль , пѣ́снь же воспѣва́шесѧ гдⷭ҇ви пое́мъ , сла́внѡ бо просла́висѧ .

запѣ́въ : Ст҃ы́и мч҃нче меркꙋ́рїе , молѝ бг҃а ѡ҆ на́съ . Ѿ вы́шнихъ повелѣ́нїи ст҃е во́инствꙋеши , с̾ вы́шними ли́ки пред̾стои́ши бл҃ги́хъ и҆сто́чникꙋ . и҆ ра́дости бжⷭ҇твенагѡ наслажде́нїѧ , приснопа́мѧтне наслажда́ешисѧ . сохранѧ́й тве́рдѣ гра́дъ , в̾ не́мже соверша́ютъ сла́вне па́мѧть твою̀ , гдⷭ҇ви пою́ще , сла́вно бо просла́висѧ . По́двигъ тѝ ре́вности свидѣ́тельствова мꙋ́дре , си́лою оу҆крѣплѧ́емь хрⷭ҇то́вою , и҆ проти́вꙋ ра́тникъ и҆схо́диши , и҆ ра́дꙋѧсѧ претерпѣ̀ главѣ̀ свое́й ѿсѣче́нїе . и҆ вопїѧ́ше сла́внѡ повелѣ́нїемъ є҆ѧ̀ . Стра́жь гра́дꙋ ꙗ҆ви́лсѧ є҆сѝ . и҆ мꙋчи́телѧ ꙗ҆́вѣ оу҆кори́лъ є҆сѝ . и҆ болѣ́зненое ѿ ни́хъ видѣ́нїе веселѧ́сѧ претерпѣ́лъ є҆сѝ меркꙋ́рїе , вопїѧ̀ и҆ молѧ́сѧ к̾ посла́вшей тѧ̀ . гдⷭ҇ви пое́мъ , сла́вно бо просла́висѧ . боⷢ҇ . Ꙗ҆́коже и҆ в̾ кесарі́и , равнои҆менова́нное тебѣ̀ прїе́млеши сꙋ́ще зва́нїе . та́коже и҆ здѣ̀ и҆зво́ли бл҃гочести́ваѧ цр҃ца , посыла́етъ тѧ̀ меркꙋ́рїе бцⷣа мч҃нче . к̾ то́й помоли́сѧ ѡ҆ мнѣ̀ ѡ҆каѧ́ннѣмъ . ми́лостива ѡ҆брѣстѝ на стра́шнѣмъ сꙋдѣ̀ сн҃а є҆ѧ̀ .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмомъ , и҆ зе́млю на вода́хъ ѡ҆снова́выи . на ка́мени мѧ хрⷭ҇тѐ цр҃ко́внѣмъ оу҆твердѝ , ꙗ҆́кѡ нѣ́сть ст҃а , па́че тебѐ чл҃колю́бче . Ѿ младе́нства в̾во́йнисѧ хрⷭ҇тꙋ̀ . ро́дъ и҆ бога́тство ѻ҆те́чества ѡ҆ста́вль . и҆ ве́сь раз̾жиза́емъ бжⷭ҇твеною любо́вїю . и҆ ѿ тогѡ̀ ро́ждьшїѧ сла́вне , стра́жь гра́дꙋ є҆ѧ̀ посла́лсѧ є҆сѝ . Воспое́мъ гдⷭ҇а и҆ съ ро́ждьшею є҆гѡ̀ бг҃омт҃рїю . пода́вшаго стра́жа тве́рда гра́дꙋ на́шемꙋ , во́ина до́блѧго меркꙋ́рїѧ , и҆ чꙋде́съ и҆спо́лненаго . Десни́цею оу҆крѣплѧ́емъ влⷣчнею , вра́жїе па́гꙋбное наше́ствїе побѣди́лъ є҆сѝ ꙗ҆́кѡ до́бръ страда́лецъ бг҃омꙋ́дре , по цр҃кви бг҃оро́дичинѣ и҆ по бл҃говѣ́рїи . боⷢ҇ . Ѽ гдⷭ҇а моегѡ̀ мт҃и , ты̀ наде́жда ѿча́ѧннымъ , и҆ по́мощь всѣ́мъ грѣ́шникѡмъ . непре́зри млⷭ҇тиваѧ цр҃це менѐ ѻ҆каѧ́ннагѡ , лю́тѣ и҆ пребез̾мѣ́рнѡ согрѣши́вшагѡ па́че чл҃ческагѡ є҆стества̀ .

сѣда́ленъ . гла́съ , д҃ . Ри́млѧнинъ ро́домъ сы́и , но вѣ́рою бл҃говѣ́рною ѡ҆гражде́нъ , а҆ неполꙋвѣ́рїемъ болѧ́и . но оу҆го́дникъ бг҃ꙋ бы́сть , и҆ тогѡ̀ ро́ждьшей . льсти́вагѡ ра́тника посрамѝ , и҆споли́на съ сы́номъ поразѝ . и҆ вѣ́нечникъ хрⷭ҇то́въ ꙗ҆ви́сѧ , и҆ сла́вы ра́достныѧ причасти́сѧ . сегѡ̀ ра́ди сщ҃е́ннꙋю є҆гѡ̀ па́мѧть пра́зднꙋемъ нн҃ѣ . двⷤа . сла́ва , и҆ ны́нѣ , боⷢ҇ . Данїи́лъ же тѧ̀ го́рꙋ ве́лїю наречѐ . а҆ и҆́нъ же́злъ и҆ катапета́змꙋ . дв҃дъ же две́рь , є҆ю́же про́йде хрⷭ҇то́съ бг҃ъ . бцⷣе непре́зри ми́лостиваѧ . но прїимѝ мои́хъ скве́рныхъ ѻ҆каѧ́нныхъ оу҆сте́нъ моле́нїе , и҆ тꙋ́не покажѝ гжⷭ҇е свою̀ ми́лость на мнѣ̀ многогрѣ́шнѣмъ .

пѣ́снь , д҃ . і҆рмо́съ . Оу҆слы́шахъ гдⷭ҇и слꙋ́хъ тво́й и҆ оу҆боѧ́хсѧ , ꙗ҆́кѡ неи҆зрече́ннымъ совѣ́томъ бг҃ъ сы́и присносꙋ́щныи , ѿ дв҃ы произы́де вопло́щьсѧ . сла́ва схожде́нїю твоемꙋ̀ хрⷭ҇тѐ , сла́ва си́лѣ твое́й . Ꙗ҆́коже и҆ во свое́мъ ѻ҆те́чествѣ присво́исѧ любе́знѣ зижди́телю . и҆ свѣ́тлыи вѣне́цъ ѿ негѡ̀ воспрїѧ́тъ , и҆ во́инствова по бл҃говѣ́рїи ꙗ҆́кѡ непобѣди́мъ , ст҃е меркꙋ́рїе помоли́сѧ . ѿ него́же полꙋчи́лъ є҆сѝ дерзнове́нїе ѡ҆ мнѣ̀ ѻ҆каѧ́ннѣмъ , да полꙋчꙋ̀ млⷭ҇ть . И҆стка̀ себѣ̀ порѳи́рꙋ бл҃гоче́стїѧ па́че ѻ҆ц҃ъ свои́хъ . в̾ ню́же ѡ҆бо́лксѧ , и҆ во́инъ крѣ́покъ показа́сѧ . и҆ ме́ртвости совлечѐ ри́зꙋ невѣ́рїѧ . и҆ поѧ́ше , сла́ва си́лѣ твое́й гдⷭ҇и . Да́же до́крове ста̀ и҆ под̾виза́сѧ , побѣжда́ѧ сопроти́вныхъ ра́тникъ . побѣдоно́сецъ показа́сѧ , и҆ вы́шнѣй сла́вѣ сподо́бисѧ меркꙋ́рїе . боⷢ҇ . Ꙗ҆́коже до́ждь на рꙋно̀ сни́де , та́коже без̾щꙋ́ка в̾ твою̀ пречи́стꙋю оу҆тро́бꙋ , сло́во спасе́ное сни́де при́снѡ дв҃о , ты́ же бцⷣе ꙗ҆́кѡ тꙋ́ча , и҆з̾сꙋшѝ мно́гихъ мои́хъ ѕѡ́лъ бре́мѧ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Распросте́ръ рꙋ́цѣ протѧ́гъ ѕлы́и ва́рваринъ , хотѧ̀ внеза́пꙋ наитѝ на́ градъ и҆ цр҃ковь бцⷣы . ты́ же неѡ҆сла́бнѡ просте́ръ своѝ со ѻ҆рꙋ́жїемъ ст҃ѣ́и рꙋ́цѣ и҆з̾ше́лъ є҆сѝ , и҆ побѣдѝ проти́вника . и҆ ѿ тꙋ́дꙋ вѣнча́сѧ . И҆́же сл҃нцꙋ и҆ ѻ҆́гневи слꙋжа̀ прїи́де . ты́ же ст҃е хрⷭ҇тꙋ̀ и҆ тогѡ̀ мт҃ри слꙋжа̀ и҆з̾ше́лъ є҆сѝ , и҆ тогѡ̀ си́лꙋ пресѣчѐ . и҆ гра́дъ свободѝ , и҆ са́мъ ѿ хрⷭ҇та̀ просла́висѧ . Прича́стникъ страсте́мъ влⷣчнимъ ꙗ҆ви́сѧ . и҆ сла́вѣ тогѡ̀ прїо́бщникъ бы́въ , и҆ тогѡ̀ бжⷭ҇твенѣй свѣ́тлости . боⷢ҇ . Оу҆мертвѝ ѽ дв҃о живꙋ́щїи во мнѣ̀ грѣ́хъ , и҆́же живо́тъ ро́ждьшаѧ , и҆ оу҆мертви́вшаго сме́рть .

пѣ́снь , ѕ҃ . і҆рмо́съ . Мл҃твꙋ пролїю̀ ко́ гдⷭ҇ꙋ , и҆ томꙋ̀ воз̾вѣщꙋ̀ печа́ль мою̀ . ꙗ҆́кѡ ѕѡ́лъ дш҃а моѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ молю́сѧ ꙗ҆́кѡ і҆ѡ́на , ѿ тлѝ бж҃е мо́й воз̾веди́ мѧ . Вжилѧ́ше тѧ̀ присносꙋ́щное ѿ высоты̀ меркꙋ́рїе , зва́нїе всѐ видѣ́нїе . и҆ слꙋга̀ цр҃ко́вныи мꙋ́дре оу҆вѣ́ри тѧ ꙗ҆́коже а҆́нг҃лъ , повелѣва́ше ти дерза́ти , и҆ ника́коже оу҆страши́тисѧ , ва́рварска наше́ствїѧ . Оу҆мерщвле́нъ бы́сть ѕмі́й вселꙋка́выи , и҆ несбы́стьсѧ ѕлохи́трїе є҆гѡ̀ . но нога́ма попра́сѧ кра́сныма ѿ до́блѧгѡ во́ина , и҆ ѻ҆рꙋ́жника хрⷭ҇то́ва меркꙋ́рїѧ . вше́дъ бо побѣдѝ пога́нѧнина . Всесоверше́нно влⷣцѣ принесѐ срⷣчное и҆з̾воле́нїе мч҃нче . и҆ тогѡ̀ ра́ди и҆зы́де проти́въ ра́ти пога́нскихъ си́лъ , и҆ побѣди́тель ве́лїи показа́сѧ . и҆ ны́нѣ на́ нб҃си пред̾стои́ши меркꙋ́рїе . боⷢ҇ . Зача́тїе неи҆зрече́нно , ржⷭ҇тво̀ неи҆з̾гл҃анно ѻ҆трокови́це , ꙗ҆́кѡ бг҃а ражда́еши пло́тїю . оу҆ми́лостивисѧ ѡ҆ мнѣ̀ ѻ҆каѧ́ннѣмъ , да оу҆лꙋчꙋ̀ и҆ а҆́зъ лише́ныи , застꙋпле́нїе твоѐ .

конда́къ . гла́съ , д҃ . Ꙗ҆ви́сѧ во бранѣ́хъ непобѣди́мъ во́инъ , ѿ ри́млѧнъ ро́домъ , сыновство̀ и҆мѣ̀ гра́да смоле́нска . ꙗ҆́кѡ бо си́хъ ра́дма нарече́сѧ , ꙗ҆́кѡ ѿ бцⷣы стра́жь крѣ́покъ посла́сѧ гра́дꙋ пѣ́сньми меркꙋ́рїѧ оу҆бл҃жи́мъ , пра́зднꙋюще ве́селѡ па́мѧть є҆гѡ̀ . ꙗ҆́кѡ да и҆зба́витъ гра́дъ на́шъ ѿ бѣды̀ ра́тникъ . и҆́косъ . Горды́ню низ̾ло́жь льсти́вагѡ мꙋчи́телѧ , и҆́же на правосла́вїе воз̾носѧ́щагосѧ . нечести́вагѡ до конца̀ сегѡ̀ лю́тагѡ ѕмі́ѧ главꙋ̀ ѿсѣ́клъ є҆сѝ ст҃е меркꙋ́рїе . и҆ пꙋ́ста є҆гѡ̀ сотво́рь , и҆ па́мѧть є҆гѡ̀ с̾ шꙋ́момъ бы́сть . ты́ бо и҆схо́диши на пред̾гра́дїе є҆ди́нъ , бра́тисѧ с̾ ты́сѧщами без̾бо́жныхъ ва́рваръ . ꙗ҆́ко бо ѿ высоты̀ и҆мы́и повелѣ́нїе , наде́ждꙋ и҆ оу҆пова́нїе ѿ са́мыѧ гжⷭ҇и и҆ бцⷣы , застꙋпа́ющи и҆ помога́ющи тѝ . тоѧ́же посо́бїемъ непобѣди́мымъ , и҆ ра́тника ѕлоко́знаго крѣ́пкѡ оу҆дави́лъ є҆сѝ . и҆ мно́жество си́лъ є҆гѡ̀ побѣдѝ , и҆ самого̀ мꙋчи́телѧ посрамѝ . тѣ́мже крѣ́пкїи хрⷭ҇то́въ во́ине зове́мъ ти ра́достнѡ , и҆ ве́селѡ пра́зднꙋемъ па́мѧть твою̀ . ꙗ҆́кѡ да и҆зба́виши гра́дъ на́шъ ѿ бѣды̀ ра́тникъ .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , попра́вше и҆ пла́мень дерзнꙋ́вше , и҆ на́ росꙋ ѻ҆́гнь прело́жше вопїѧ́хꙋ , бл҃гослове́нъ є҆сѝ гдⷭ҇и бж҃е во́ вѣки . Свѣ́томъ вы́шнѧгѡ просвѣще́нъ ѡ҆зарѧ́емь до́блїи во́ине , воспѣва́ющихъ ны́нѣ па́мѧть твою̀ просвѣтѝ , пою́щїѧ , бл҃гослове́нъ бг҃ъ ѻ҆ц҃ъ на́шихъ . Воспѣва́ше всѣ́хъ бл҃года́телѧ распалѧ́сѧ . и҆ и҆зше́дъ на побѣжде́нїе ра́тникъ . ѻ҆гнѧ̀ ре́вностїю бл҃же́нне жего́мъ . и҆ поѧ̀ , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . Въ кровѝ проти́вꙋ ста́лъ є҆сѝ без̾зако́нныхъ ѡ҆полче́нїѧ ст҃е . и҆́же ка́меневи и҆ ѻ҆гню̀ кла́нѧющихсѧ . ты́ же къ ка́мени хрⷭ҇тꙋ̀ вопїѧ̀ , си́хъ побѣди́лъ є҆сѝ . поѧ̀ , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . Зе́млю ѡ҆багри́въ бл҃же́нне меркꙋ́рїе кро́вїю свое́ю , влⷣки чл҃колю́бца жела́ѧ ѻ҆́бщникъ тогѡ̀ бы́ти . поѧ̀ , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . боⷢ҇ . Чи́ни а҆́нг҃льстїи оу҆дивлѧ́ютсѧ . та́инства твоегѡ̀ глꙋбинѣ̀ бцⷣе . бг҃ъ бо и҆з̾ тебѐ воплоще́нъ ꙗ҆ви́сѧ . є҆го́же похва́лимъ , бж҃е бл҃гослове́нъ є҆сѝ .

пѣ́снь , ѳ҃ . і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Гно́еве мч҃нчестїи , бл҃гоꙋха́нїе ны́нѣ и҆спꙋща́ютъ бл҃года́тное , смра́дныѧ на́ша стрⷭ҇ти и҆сцѣлева́хꙋ . и҆сточа́ютъ бо ст҃ы́ѧ и҆́хъ мо́щи цѣле́бныѧ во́ды . и҆ напоѧ́ютъ дш҃а пою́щихъ тѣ́хъ чꙋдодѣѧ́нїе . Ꙗ҆́кѡ вели́ка столпа̀ , и҆ тве́рдо забра́ло дарова̀ тѧ̀ хрⷭ҇то́съ меркꙋ́рїе гра́дꙋ семꙋ̀ , и҆дѣ́же ны́нѣ то́чиши чꙋде́съ стрꙋю̀ , и҆ помога́еши побѣ́дою на пога́ныхъ . Съпомо́щника и҆мѣ́ѧхꙋ всѝ гра́ждане , стрⷭ҇тоте́рпче хрⷭ҇то́въ до́блественыи . копїѐ и҆ щи́тъ тво́й вы́нꙋ вели́ко посо́бїе и҆мꙋ́ще тѧ̀ велича́ютъ , хрⷭ҇та̀ бг҃а сла́вѧще вѣнча́вшаго тѧ̀ . боⷢ҇ . Просвѣтѝ две́ри свѣ́та , ѡ҆мраче́нꙋю дш҃ꙋ мою̀ страстьмѝ , и҆ лꙋка́выми по́мыслы ѡ҆чернѣ́вшꙋю и҆ бѣ́дствꙋющꙋ . и҆ и҆зба́ви и҆скꙋше́нїй и҆ бѣ́дъ и҆ скорбе́й , да сла́влю тѧ̀ оу҆пова́нїе вѣ́рнымъ и҆ оу҆твержде́нїе .

свѣти́ленъ . Женихꙋ̀ свѣщꙋ̀ соблю́лъ є҆сѝ , жестокꙋ̀ стезю̀ ше́ствовалъ є҆сѝ . в̾ бжⷭ҇твеныѧ стезѝ вше́дъ , и҆ къ простра́нствꙋ ра́йскомꙋ чи́стою пло́тїю дости́глъ є҆сѝ . и҆ свѣ́тлѡ ѿ ст҃ы́ѧ трⷪ҇цы вѣнча́сѧ , чтꙋ́щїѧ тѧ̀ помѧнѝ ст҃е меркꙋ́рїе . двⷤа . сла́ва , и҆ нн҃ѣ , пра́здникꙋ . Ю҆́же дре́вле провозвѣстѝ проро́ческїи собо́ръ , рꙋ́чкꙋ , и҆ же́злъ , и҆ скрижа́ль , и҆ несѣко́мꙋю го́рꙋ , мр҃і́ю бг҃оѻ҆трокови́цꙋ вѣ́рнѡ восхва́лимъ . дне́сь бо в̾во́дитсѧ во ст҃а́ѧ ст҃ы́хъ , воспита́тисѧ гдⷭ҇ви .

и҆лѝ : сла́ва , и҆ ны́нѣ , боⷢ҇ . Ꙗ҆́кѡ застꙋ́пницꙋ нера́тнꙋ , пред̾гра́дїе вои́стинꙋ пред̾лага́ю покро́въ тво́й бцⷣе дв҃о . хода́таицꙋ же къ бг҃ꙋ . и҆зба́витимисѧ влⷣчце мꙋ́ки вѣ́чныѧ . и҆ жи́зни нетлѣ́ннѣй тобо́ю причасти́тисѧ нбⷭ҇нагѡ црⷭ҇твїѧ .

На хвали́тѣхъ , стⷯры , на д҃ . гла́съ , д҃ . Дрꙋга́го тѧ̀ пое́мъ , и҆мꙋ́щаго поборе́нїе по́ дх҃ꙋ хрⷭ҇то́въ меркꙋ́рїе , ꙗ҆́кѡ непобѣди́маго во́ина . внегда́ бо повелѣ́нїю оу҆го́дниче гжⷭ҇и и҆ бцⷣы , и҆з̾ше́лъ є҆сѝ на срѣ́тенїе пога́ныхъ си́лъ , и҆ и҆споли́на съ сы́номъ крѣ́пкаго побѣди́лъ є҆сѝ посо́бїемъ бцⷣы . подо́бїе и҆мы́и , ꙗ҆́коже ст҃ы́и мч҃нкъ не́стѡръ . ꙗ҆́рость прекроти́въ ѕлосвирѣ́пагѡ мꙋчи́телѧ , лі́ѧ бг҃обо́рца побѣди́въ хрⷭ҇то́вымъ и҆́менемъ и҆ си́лою . и҆лѝ тезои҆мени́томꙋ тѝ ст҃о́мꙋ мч҃нкꙋ меркꙋ́рїю . ꙗ҆́коже во а҆леѯандрі́и ѻ҆́нъ побѣди́въ , прободѐ въ се́рдце мꙋчи́телѧ , и҆ законопрестꙋ́пника , ревнꙋ́ѧ по бл҃гоче́стїи . ты́ же тѣ́хъ подража́ѧ , сопроти́вныхъ и҆ пога́ныхъ и҆ноплеме́нникъ си́лꙋ пресѣчѐ , ꙗ҆́кѡ во́инъ до́бръ и҆ неко́сенъ . и҆ совершѝ своѐ подвиза́нїе крѣ́пцѣ , по бл҃говѣ́рїи ст҃ы́ѧ цр҃кве гжⷭ҇и и҆ бцⷣы , со всѣ́ми оу҆го́дники хрⷭ҇та̀ бг҃а . и҆ вѣнча́сѧ ве́рхъ тво́й ст҃е и҆ великомч҃нче .= двⷤа . Ꙗ҆́коже ѿ а҆́нг҃ла , и҆лѝ с̾ нб҃сѐ зна́менїе прїе́млеши . къ тебѣ́ бо по́сланъ быва́етъ слꙋга̀ цр҃кве вели́цѣй гжⷭ҇и и҆ бцⷣы , возвѣща́ѧ и҆ велѧ̀ тебѐ и҆зы́ти на срѣ́тенїе си́лъ пога́ныхъ и҆ноплеме́нникъ . гла́сꙋ же къ тебѣ̀ свы́ше соше́дшꙋ , ра́бе мо́й и҆ оу҆го́дниче меркꙋ́рїе , воста́въ препоѧ́шисѧ по́ѧсомъ во́инства , и҆зы́ди ско́рѡ съ вели́кою де́рзостїю сопроти́вныхъ побѣжда́ѧ . съ тобо́ю є҆́смь побора́ющи по бл҃говѣ́рїи . нехощꙋ́бо речѐ зрѣ́ти свое́й плѣне́нѣ бы́ти цр҃кви ѿ пога́ныхъ . оу҆моли́хъ бо сн҃а моегѡ̀ да пода́стъ тѝ ѡ҆ се́мъ дерзнове́нїи твое́мъ вѣне́цъ нбⷭ҇ныи , ѿ животво́рныѧ десни́цы є҆гѡ̀ . =Ѿ црⷭ҇ка колѣ́на во́инъ и҆зы́де , и҆ посла́сѧ непобѣди́мымъ воєво́дою на́шемꙋ гра́дꙋ . вели́ко поможе́нїе ѿ гжⷭ҇и на́шеѧ бцⷣы . во́инствꙋѧ бо неземно́мꙋ цр҃ю оу҆гожда́ѧ , но свы́ше повелѣ́нїе прїе́млѧ бг҃омꙋ́дре . и҆ бл҃же́нныи страда́льче меркꙋ́рїе жела́нїемъ и҆ ре́вностїю побора́ѧ по бл҃говѣ́рїи . мч҃нчески стражда̀ , и҆ сопроти́вныхъ полкѝ побѣжда́ѧ , пога́ныхъ и҆ноплеме́нникъ . и҆ са́мъ нꙋ́жною сме́ртїю коне́цъ житїю̀ воспрїи́меши . и҆ ко хрⷭ҇тꙋ̀ бг҃ꙋ на́ нб҃о востече́ши . и҆ ра́вными тебѣ̀ ст҃ы́ми мч҃нки ли́кꙋ сочта́сѧ воз̾мѣ́здїе прїи́меши . тѣ́мже и҆ ны́нѣ мы̀ многогрѣ́шнїи мо́лимъ тѧ̀ ст҃е , и҆мѣ́ѧ дерзнове́нїе , помоли́сѧ ѡ҆́ градѣ на́шемъ невоева́нꙋ пребы́ти є҆мꙋ̀ , и҆ дш҃а́мъ на́шимъ дарова́ти ве́лїю млⷭ҇ть .

сла́ва . гла́съ , то́йже . Столпа̀ твердѣ́йшагѡ , и҆ забра́ло тве́рдо гра́дꙋ на́шемꙋ воспое́мъ . и҆ желѣ́знаѧ врата̀ сꙋ́ща . и҆ посо́бїе крѣ́пкѡ и҆мꙋ́ще со ѻ҆рꙋ́жїемъ ст҃а́гѡ меркꙋ́рїѧ . тѣ́мже к̾ немꙋ̀ молѧ́щесѧ возопїе́мъ , ст҃че незабꙋ́ди на́съ пред̾стоѧ́щихъ гро́бꙋ твоемꙋ̀ . но моли́сѧ къ чл҃колю́бцꙋ бг҃ꙋ спастѝ дш҃а на́ша .

и҆ ны́нѣ , боⷢ҇ . Бцⷣе всѣ́мъ цр҃це , правосла́внымъ похвало̀ , є҆рети́чествꙋющихъ шата́нїѧ разорѝ , и҆ ли́ца и҆́хъ посрамѝ , не кла́нѧющихсѧ ни чтꙋ́щихъ , пречⷭ҇таѧ честны́и ѻ҆́бразъ тво́й .

Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , пра́здникꙋ , пѣ́снь , з҃ ѧ , на д҃ . и҆ ст҃о́мꙋ , пѣ́снь , ѕ҃ ѧ , на д҃ .

проки́менъ , ѱл҃о́мъ дв҃довъ . воз̾весели́тсѧ пра́ведникъ ѡ҆́ гдⷭ҇ѣ , и҆ оу҆пова́етъ на́нь . сти́хъ . оу҆слы́ши бж҃е мл҃твꙋ мою̀ , внегда̀ моли́тимисѧ к̾ тебѣ̀ . а҆пⷭ҇лъ , къ тимоѳе́ю . заⷱ҇ , сч҃в .= а҆ллилꙋ́їѧ . пра́ведникъ ꙗ҆́кѡ фи́никъ процвѣте́тъ , и҆ ꙗ҆́кѡ ке́дръ и҆́же в̾ лива́нѣ оу҆мно́житсѧ . =є҆ѵⷢ҇а́лїе , ѿ =лꙋкѝ . заⷱ҇ , ѯ҃г . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>