МЦⷭ҇А ТОГО́ЖЕ ВЪ К҃Є ДН҃Ь

и҆́же во ст҃ы́хъ ѻ҆ц҃ъ на́шихъ и҆ сщ҃енномч҃нкъ : кли́мента па́пы ри́мскагѡ , и҆ петра̀ а҆леѯа́ндрскагѡ . =Ве́черъ , на гдⷭ҇и возва́хъ , стихѣ́ры , пра́здникꙋ . гла́съ , а҃ . Дне́сь вѣ́рнїи ликоствꙋ́емъ , во ѱалмѣ́хъ и҆ пѣ́снѣхъ гдⷭ҇ви пою́ще , и҆ чтꙋ́ще тогѡ̀ сщ҃е́ннꙋю сѣ́нь , ѡ҆дш҃евле́ныи ковче́гъ , невмѣсти́мое сло́во вмѣсти́вшꙋ . приво́дитбосѧ гдⷭ҇ви , па́че є҆стества̀ мла́денствꙋющи . и҆ ст҃ль вели́кїи заха́рїѧ прїе́млетъ съ весе́лїемъ сїю̀ , ꙗ҆́кѡ бж҃їе жили́ще . Д=не́сь цр҃кви ѡ҆дш҃евле́наѧ , ст҃ы́ѧ сла́вы хрⷭ҇та̀ бг҃а на́шегѡ . є҆ди́на въ жена́хъ бл҃гослове́наѧ чи́стаѧ , приво́дитсѧ в̾ цр҃ковь зако́ннꙋю жи́ти во ст҃ы́хъ . и҆ ра́дꙋетсѧ съ не́ю і҆ѡаки́мъ и҆ а҆́нна дх҃омъ . и҆ дв҃ьственїи ли́цы гдⷭ҇ви пою́тъ , ѱало́мски воспѣва́юще , и҆ чтꙋ́ще мт҃рь є҆гѡ̀ . Ты̀ проро́кѡмъ проповѣ́данїе , а҆пⷭ҇лѡмъ сла́ва , и҆ мч҃нкѡмъ похвала̀ , и҆ всѣ́мъ земны́мъ ѡ҆бновле́нїе , дв҃о мт҃и бж҃їѧ . тобо́ю бг҃ови примири́хомсѧ . тѣ́мже чте́мъ твоѐ в̾ цр҃ковь гдⷭ҇ню вхожде́нїе . и҆ со а҆́нг҃лѡмъ всѝ пѣ́сненѡ ра́дꙋйсѧ тебѣ̀ пречи́стаѧ вопїе́мъ , и҆́же мл҃твами твои́ми спаса́еми .

и҆́ны , стихѣ́ры , ст҃о́мꙋ кли́ментꙋ . гла́съ , в҃ . поⷣ . є҆гда̀ ѿ́ древа . Лоза̀ виногра́да живо́тнагѡ бы́лъ є҆сѝ ѻ҆́ч҃е ст҃лю . красно̀ и҆зносѧ̀ гро́здїе дх҃омъ повелѣ́ней тѝ премꙋ́дре , ка́плюще всегда̀ спасе́ное вино̀ , бжⷭ҇твенагѡ ра́зꙋма . и҆ веселѧ́ще всѣ́хъ бл҃гочести́выхъ срⷣца̀ , чистотꙋ̀ чтꙋ́щимъ , кли́менте бг҃оно́сне всебл҃же́нне . Петра̀ верхо́внагѡ оу҆чени́къ ѻ҆́ч҃е бы́въ , на ка́мени тогѡ̀ со́здалъ є҆сѝ , ꙗ҆́кѡ ка́мень честны́и себѐ прехва́льне . тве́рдостїю слове́съ твои́хъ , всѐ низ̾ложи́лъ є҆сѝ зда́нїе многобо́жное . хра́мы воз̾дви́же бжⷭ҇твеныѧ , в̾ че́сть трⷪ҇цѣ , ѡ҆ не́йже под̾виза́сѧ бл҃же́нне , и҆ свидѣ́тельства вѣне́цъ прїѧ́тъ . Ꙗ҆́коже свѣтода́тельное сл҃нце ѿ за́пада воз̾сїѧ̀ ѻ҆́ч҃е , просвѣща́ѧ зе́млю заре́ю повелѣ́ней тѝ и҆ ра́нами свѣ́тлѡ пости́же страны̀ восто́чныѧ требл҃же́нне . за́йде оу҆мерщвѧ́емъ . и҆ восїѧ́лъ є҆сѝ кли́менте ко хрⷭ҇тꙋ̀ . и҆ та́мѡ сꙋ́щими лꙋча́ми бога́тнѡ непреста́ннѡ , по бжⷭ҇твеномꙋ причаще́нїю просвѣща́емь .

сла́ва , и҆ ны́нѣ . гла́съ , и҃ . По ржⷭ҇твѣ̀ твое́мъ бг҃оневѣ́сто влⷣчце , прїи́де в̾ цр҃ковь гдⷭ҇ню воспита́тисѧ во ст҃а́ѧ ст҃ы́хъ , ꙗ҆́кѡ ѡ҆сщ҃е́нна . тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй , пи́щꙋ ти приноша́ше . нбⷭ҇наѧ всѧ̀ оу҆диви́шасѧ , зрѧ́ще дх҃а ст҃а́гѡ в̾ тѧ̀ все́льшасѧ . тѣ́мже пречⷭ҇таѧ и҆ нескве́рнаѧ , ꙗ҆́же на́ нб҃сѣхъ и҆ на землѝ сла́вима , мт҃и бж҃їѧ , спасѝ ро́дъ на́шъ .

На стихо́внѣ , стⷯры , пра́здникꙋ . гла́съ , а҃ . поⷣ . нбⷭ҇нымъ чино́мъ .= П=ресꙋ́щественыѧ трⷪ҇цы ,꙳ є҆ди́но сꙋществѡ̀ проповѣ́даѧ всебл҃же́нне ,꙳ ꙗ҆́кѡ несозда́ннѡ є҆ди́нство .꙳ а҆́рїѧ низ̾ложи́лъ є҆сѝ ,꙳ показа́въ на́мъ сн҃о́вне нераздѣле́нїе ,꙳ ꙗ҆́кѡ того́же сꙋ́ща , ѻ҆ц҃ꙋ и҆ дх҃ꙋ бжⷭ҇твеномꙋ .

сти́хъ : сщ҃е́нницы твоѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твоѝ возра́дꙋютсѧ . Гонѧ́щихъ преста̀ оу҆бі́йственое оу҆стремле́нїе .꙳ кро́вное проли́тїе нн҃ѣ сконча́сѧ ,꙳ ѡ҆боѧ̀ запечатлѣ̀ пе́тре мꙋ́дре .꙳ сщ҃е́ннымъ ти свидѣ́тельствомъ .꙳ ꙗ҆́кѡ ѻ҆тро́чищꙋ мѡѷсе́ѡви ста̀ тече́нїе ,꙳ на пестротꙋ̀ сепѳо́ринꙋ дре́вле .

сти́хъ : бл҃же́нъ мꙋ́жь боѧ́исѧ гдⷭ҇а ,꙳ въ за́повѣдехъ є҆гѡ̀ восхо́щетъ ѕѣлѡ̀ . Па́стырьски пожи́въ сщ҃енномч҃нче хрⷭ҇то́въ ,꙳ мч҃нческїѧ по́двиги показа́лъ є҆сѝ до́блественѡ .꙳ є҆ди́нъ за ѡ҆боѐ вѣне́цъ прїѧ́тъ ,꙳ ѡ҆бою́дꙋ оу҆краша́емь ,꙳ сщ҃е́нствомъ и҆ болѣ́зньми страда́нїѧ .꙳ сегѡ̀ ра́ди молѝ спасти́сѧ на́мъ .

сла́ва . гла́съ , д҃ . Рꙋко́ю бж҃їею пома́завсѧ въ ст҃льство . верхо́вномꙋ сои҆мени́те , и҆ дѣ́лы соприча́стниче . слове́сныѧ ѻ҆́вцы є҆ѵⷢ҇а́льскими препита́лъ є҆сѝ пи́щами , ꙗ҆́кѡ мꙋ́дръ и҆ и҆́стиненъ па́стырь . и҆ ма́ркꙋ прїе́мникъ досто́йнѡ показа́сѧ . страстоте́рпческою кро́вїю , вѣ́рѣ тече́нїе соверши́лъ є҆сѝ , ѡ҆́ людехъ пред̾пожира́емь , и҆ хрⷭ҇тꙋ̀ соѡ҆бразꙋ́ѧсѧ . моли́сѧ ѡ҆ дш҃а́хъ на́шихъ .

и҆ ны́нѣ , пра́здникꙋ . гла́съ , ѕ҃ . Дне́сь собо́ри вѣ́рныхъ соше́дшесѧ , дх҃о́внѣ торжествꙋ́емъ , и҆ бг҃оѻ҆трокови́цꙋ дв҃ꙋ и҆ бцⷣꙋ , въ цр҃ковь гдⷭ҇ню приводи́мꙋ , бл҃гоче́стнѡ восхва́лимъ . прои҆збра́ннꙋю ѿ всѣ́хъ ро́дъ , во ѻ҆би́телище всѣ́хъ цр҃ѧ хрⷭ҇та̀ и҆ бг҃а . дв҃ы свѣщѝ носѧ́ще пред̾и҆ди́те , при́снѡ дв҃ыѧ чтꙋ́ще честно́е прои҆схожде́нїе . мт҃ри печа́ль всю̀ ѿло́жше , ра́достнѡ спослѣ́дствꙋйте , мт҃ри бж҃їи быва́ющей . и҆ ра́дости ми́рꙋ хода́тайцѣ , всѝ оу҆́бѡ ра́достнѣ , є҆́же ра́дꙋйсѧ со а҆́нг҃лѡмъ возопїе́мъ ѡ҆ба́дованнѣй , при́снѡ молѧ́щейсѧ ѡ҆ дш҃а́хъ на́шихъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Бж҃е ѻ҆ц҃ъ на́шихъ , творѧ́и прⷭ҇нѡ с̾ на́ми по твоемꙋ̀ смотре́нїю , не ѿста́ви млⷭ҇ти твоеѧ̀ ѿ на́съ . но тѣ́хъ мл҃твами , в̾ смире́нїи оу҆стро́й живо́тъ на́шъ . сла́ва , и҆ нн҃ѣ , пра́здникꙋ . гла́съ , д҃ . Дне́сь бл҃говоле́нїѧ бж҃їѧ проѡ҆браже́нїе , и҆ чл҃ча спасе́нїѧ проповѣ́данїе , въ цр҃кви бж҃їи ꙗ҆́снѡ дв҃аѧ ꙗ҆влѧ́етсѧ , и҆ хрⷭ҇та̀ всѣ́мъ бл҃говѣствꙋ́етъ . то́й и҆ мы̀ велегла́снѡ возопїе́мъ , ра́дꙋйсѧ смотре́нїѧ зижди́телева и҆сполне́нїе .

На оу҆́трени , на бг҃ъ гдⷭ҇ь , тропа́рь , пра́здникꙋ , два́жды . сла́ва , ст҃ы́мъ . и҆ ны́нѣ , пра́здникꙋ .

По а҃ , стихоло́гїи , сѣда́ленъ . гла́съ , а҃ . Пра́ведныхъ пло́дъ і҆ѡаки́ма и҆ а҆́нны , прино́ситсѧ бг҃ови в̾ цр҃ковь ст҃ꙋ́ю , пло́тїю младе́нствꙋющи пита́тельница жи́зни на́шеѧ . ю҆́же бл҃гословѝ сщ҃е́нныи заха́рїѧ . сїю̀ всѝ ꙗ҆́кѡ мт҃рь бж҃їю вѣ́рнѡ да оу҆блажи́мъ . сла́ва , и҆ ны́нѣ , то́йже .

По в҃ , стихоло́гїи , сѣда́ленъ . гла́съ , д҃ . Пре́жде зача́тїѧ чⷭ҇таѧ ѡ҆ст҃и́сѧ бг҃ови , и҆ ро́ждьшисѧ на землѝ , да́ръ принесе́сѧ є҆мꙋ̀ , и҆сполнѧ́ющи ѻ҆те́ческое ѡ҆бѣща́нїе . въ бжⷭ҇твенѣмъ же хра́мѣ , ꙗ҆́кѡ вои́стинꙋ бжⷭ҇твенаѧ цр҃кви , ѿ младе́нства со свѣща́ми свѣ́тлыми вдана̀ бы́вши . ꙗ҆ви́сѧ прїѧ́телище неприкоснове́номꙋ , и҆ бжⷭ҇твеномꙋ свѣ́тꙋ . вели́ко вои́стинꙋ происхожде́нїе твоѐ є҆ди́на бг҃оневѣ́стнаѧ . сла́ва , и҆ ны́нѣ , то́йже .

По г҃ , стихоло́гїи , сѣда́ленъ . гла́съ , и҃ . Да ра́дꙋетсѧ дв҃дъ пѣснопи́сецъ , и҆ да ликоствꙋ́етъ і҆ѡаки́мъ со а҆́нною , ꙗ҆́кѡ пло́дъ ст҃ы́и ѿ ни́хъ произы́де , мр҃і́ѧ свѣтоно́снаѧ и҆ бжⷭ҇твенаѧ свѣща̀ . и҆ ра́дꙋетсѧ входѧ́щи въ цр҃ковь . ю҆́же поѧ̀ блгⷭ҇вѝ варахїи́нъ сн҃ъ , и҆ ра́дꙋѧсѧ взыва́ше , ра́дꙋйсѧ чꙋ́до всеми́рное .= сла́ва , и҆ ны́нѣ , то́йже .=

Кано́нъ пра́здникꙋ , гла́съ , д҃ . со і҆рмосо́мъ , на́ ѕ҃ . і҆рмо́съ , по вⷤ . и҆ ст҃ы́мъ два̀ кано́на , на и҃ . кано́нъ , ст҃о́мꙋ кли́ментꙋ . творе́нїе ѳеѡ́фаново . гла́съ , и҃ . пѣ́снь , а҃ . і҆рмо́съ . Во́дꙋ проше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вопїѧ́ше , и҆зба́вителю бг҃ꙋ на́шемꙋ пое́мъ .

запѣ́въ : Ст҃ы́и сщ҃енномч҃нче кли́менте , молѝ бг҃а ѡ҆ на́съ . Петро́мъ бжⷭ҇твенымъ наꙋчи́всѧ , и҆́же а҆пⷭ҇лѡмъ верхо́вныи . и҆ ѿ негѡ̀ навы́къ бжⷭ҇твеныи ра́зꙋмъ ѻ҆́ч҃е , и҆́дольскꙋю ле́сть ѡ҆бличи́лъ є҆сѝ . Ло́зꙋ бг҃онасажде́нꙋ на землѝ , плоды̀ добродѣ́тельныѧ оу҆че́ней всебл҃гочести́выхъ , хрⷭ҇то́съ тѧ̀ пред̾лага́етъ . вои́стинꙋ сꙋ́щїи цвѣтꙋ́щь виногра́дъ .= Во всѧ̀ концы̀ протечѐ вои́стинꙋ , бжⷭ҇твеныхъ повелѣ́ней , твоѐ вѣща́нїе кли́менте мꙋ́дре . и҆ всѧ̀ просвѣтѝ трⷪ҇цꙋ бг҃осло́вити , во є҆ди́нствѣ бжⷭ҇тва̀ . боⷢ҇ . С=ѐ прорече́нїѧ прⷪ҇ро́ческаѧ ѡ҆ тебѣ̀ прїѧ́ша коне́цъ вои́стинꙋ . сло́во бо без̾ сѣ́мене заче́нши бг҃ороди́тельнице , пло́тїю родила̀ є҆сѝ .

и҆́нъ кано́нъ , ст҃о́мꙋ петрꙋ̀ . носѧ̀ краегране́сїе сицево̀ : восхвалѧ́ю трибога́таго петра̀ . творе́нїе ѳеѡ́фаново . пѣ́снь , а҃ . і҆рмо́съ . Пое́мъ гдⷭ҇ви прове́дшемꙋ лю́ди своѧ̀ , сквозѣ̀ чермно́е мо́ре , ꙗ҆́кѡ є҆ди́нъ , сла́вно бо просла́висѧ .

запѣ́в̾ : Ст҃ы́и сщ҃енномч҃нче пе́тре , молѝ бг҃а ѡ҆ на́съ . Во свѣтлѣ́йшихъ селе́нїихъ житїѐ и҆мы́и , просвѣще́нїе ми пода́ждь , мл҃твами ти пе́тре бл҃же́нне . Ра́зꙋмомъ наꙋче́нъ , и҆ сщ҃е́нствомъ оу҆краша́емь всебл҃же́нне пе́тре , хрⷭ҇то́ви принесе́сѧ кро́вїю .= Оу҆́тварь и҆спещре́наѧ , и҆ ꙗ҆́кѡ многоцѣ́нное воз̾ложе́нїе , честнѣ́й цр҃кви ѿ́ бг҃а дарова́сѧ бл҃же́нне . боⷢ҇ . П=речⷭ҇таѧ бцⷣе , воплоще́нно прⷭ҇носꙋ́щное и҆ пребжⷭ҇твеное сло́во , па́че є҆стества̀ ро́ждьшꙋю пое́мъ тѧ̀ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Стра́хъ тво́й гдⷭ҇и всадѝ в̾ срⷣца̀ ра́бъ твои́хъ , и҆ бꙋ́ди на́мъ оу҆тверже́нїе , вои́стинꙋ тѧ̀ призыва́ющимъ . Бога́тнѡ и҆злїѧ́сѧ дх҃о́внаѧ бл҃года́ть , въ твоѝ оу҆стнѣ̀ мꙋ́дре . є҆ю́же всѧ̀ просвѣти́лъ є҆сѝ , бжⷭ҇твеными тѝ оу҆че́нїи , и҆ хрⷭ҇то́ви приведѐ . Ѻ҆гне́мъ воз̾держа́нїѧ ты̀ попали́лъ є҆сѝ , страсте́й ѻ҆гнепа́льнаѧ оу҆стремле́нїѧ . и҆ цр҃ковь себѐ соверши́въ , дх҃а бжⷭ҇твенагѡ доблемꙋ́дрене ѻ҆́ч҃е . На́ горꙋ бжⷭ҇твеныхъ добродѣ́телей воз̾ше́дъ , и҆ мра́комъ покры́всѧ разꙋ́мнымъ , оу҆зрѣ̀ неи҆зрече́ннꙋю въ чи́стѣй дш҃и свое́й дх҃о́внꙋю зарю̀ .= боⷢ҇ . Н=еи҆зрече́ннѡ зачала̀ є҆сѝ пречⷭ҇таѧ сп҃са и҆ гдⷭ҇а , и҆зба́вльшаго на́съ ѿ лю́тыхъ , тѧ̀ вои́стинꙋ призыва́ющихъ .

и҆́нъ , і҆рмо́съ . Нѣ́сть ст҃а ꙗ҆́кѡ гдⷭ҇ь , и҆ нѣ́сть пра́ведна ꙗ҆́коже бг҃ъ на́шъ . є҆го́же пое́тъ всѧ̀ тва́рь , нѣ́сть бо прест҃а па́че тебѐ гдⷭ҇и . Взы́де є҆здѧ̀ ꙗ҆́кѡ на колесни́цѣ , твое́ю кро́вїю премꙋ́дре къ нбⷭ҇нымъ , и҆дѣ́же прⷣтча на́шъ хрⷭ҇то́съ взы́де , є҆ди́нъ без̾грѣ́шенъ . Живо́тъ тлѣ́ющїи ѡ҆ста́вилъ є҆сѝ . и҆ живо́тъ без̾сме́ртныи ѡ҆брѣ́те бл҃же́нне , и҆дѣ́же вѣнцено́сецъ ликꙋ́еши , молѧ̀ спасти́сѧ дш҃а́мъ на́шимъ .= Ꙗ҆́коже фи́никъ процвѣтѐ бл҃гопло́дныи . ꙗ҆́кѡ ма́слина плодоро́дна ꙗ҆ви́сѧ бг҃опрїѧ́тне во дво́рѣхъ гдⷭ҇нихъ . ꙗ҆́кѡ смѵ́рна и҆ лива́нъ , и҆ ꙗ҆́кѡ мѵ́рѡ бл҃гово́нное . боⷢ҇ . Ꙗ҆́=кѡ две́ри спаси́тельныѧ , и҆ ра́й кра́сныи . свѣ́тꙋ присносꙋ́щномꙋ ѻ҆́блакъ сꙋ́щꙋ , ст҃ꙋ́ю дв҃ꙋ воспое́мъ всѝ , гл҃юще є҆́й , ра́дꙋисѧ .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

конда́къ , петрꙋ̀ . гла́съ , г҃ . Правосла́вными повелѣ́нїи цр҃ковь просвѣти́лъ є҆сѝ , заню́же и҆ пострада̀ бг҃обл҃же́нне ѻ҆́ч҃е , а҆́рїѧ ѿстꙋ́пника ѿгна́въ . тѣ́мже ти пречестнꙋ́ю па́мѧть соверша́юще , правосла́внѡ вопїе́мъ , ра́дꙋисѧ пе́тре ка́меню вѣ́ры . и҆́косъ . Къ ди́внѣй а҆леѯандрі́и потщи́мсѧ ше́ствовати оу҆мо́мъ , и҆ оу҆́зримъ вели́каѧ стра́ннаѧ та́мѡ соверша́емаѧ . ка́кѡ на же́ртвꙋ себѐ пред̾лага́етъ , ꙗ҆́кѡ ѻ҆вча̀ неѕло́бивое , первосщ҃е́нникъ , и҆ вели́кїи побо́рникъ пе́тръ . и҆ ны́нѣ созыва́етъ на́съ здѣ̀ , и҆ ст҃ꙋ́ю свою̀ главꙋ̀ пред̾положи́въ , ꙗ҆́коже снѣ́дь честнꙋ́ю . є҆ѧ́же наслади́вшесѧ всѝ , правосла́внѡ возопїе́мъ , ра́дꙋисѧ пе́тре , ка́меню вѣ́ры .

сѣда́ленъ , петрꙋ̀ . гла́съ , и҃ . Ѿ вы́шнѧгѡ сꙋда̀ хрⷭ҇то́ви пред̾ста́въ ста́дꙋ , на па́жити бл҃гоживо́тныѧ наста́лъ є҆сѝ , премꙋ́дрыми тѝ повелѣ́нїи . ѿгна́въ а҆́рїѧ ꙗ҆́кѡ во́лка некро́ткагѡ , вше́дшаго в̾ ни́хъ без̾бо́жными оу҆че́нїи . тѣ́мже и҆ дш҃ꙋ свою̀ положѝ за ни́хъ . па́стырь нарече́сѧ , ꙗ҆́коже речѐ гдⷭ҇ь , бжⷭ҇твеныи пе́тре бл҃же́нне . молѝ хрⷭ҇та̀ бг҃а , грѣхо́въ ѡ҆ставле́нїе дарова́ти чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ , кли́ментꙋ . гла́съ , д҃ . Восїѧ́въ ꙗ҆́коже сл҃нца зарѧ̀ , и҆ блиста́еши прпⷣбне всемꙋ̀ ми́рꙋ свѣ́тлѡ , оу҆че́нїи твои́ми бг҃огла́се кли́менте свѣтоно́сне , мч҃нкѡмъ похвало̀ . сла́ва , и҆ нн҃ѣ . сѣда́ленъ , пра́здникꙋ . Непоро́чнаѧ а҆́гница и҆ нескве́рныи черто́гъ , в̾ до́мъ бж҃їи бцⷣа мр҃їа́мъ с̾ весе́лїемъ в̾во́дитсѧ пресла́внѡ . ю҆́же а҆́нг҃ли бж҃їи дароносѧ́ще вѣ́рнѡ , и҆ всѝ вѣ́рнїи оу҆бл҃жа́ютъ прⷭ҇нѡ . и҆ бл҃года́рственѡ пою́тъ є҆́й , непреста́ннѡ велегла́снѡ , на́ша сла́ва и҆ спасе́нїе ты̀ є҆сѝ пренепоро́чнаѧ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Ѿ за́пада прише́дъ бл҃же́нне к̾ восто́кꙋ , петро́ви примѣси́сѧ а҆пⷭ҇лꙋ . и҆ тогѡ̀ бжⷭ҇твеными свѣтлостьмѝ и҆ оу҆че́нїи просвѣща́емь , с̾ ни́мъ воз̾вѣща́ѧ спасе́ное сло́во , за́паднꙋю всю̀ протечѐ . Дрꙋгі́и мѡѷсе́й кли́менте мꙋ́дре бы́лъ є҆сѝ . зако́ны бжⷭ҇твеныѧ всѣ́мъ и҆злага́ѧ , и҆ сщ҃е́ннаѧ пиша̀ оу҆че́нїѧ , и҆ цр҃ко́вное всѐ в̾чинѧ́еши и҆сполне́нїе . ѿ сю́дꙋ законополо́жника тѧ̀ и҆ оу҆чи́телѧ всѝ и҆мꙋ́ще , вѣ́рою чте́мъ . По́стническими поты̀ ѡ҆чи́стивсѧ , сщ҃еннонача́льникъ бл҃же́нне ꙗ҆ви́сѧ . въ бл҃гоче́стнѣй вѣ́рѣ хрⷭ҇то́вѣ всѧ̀ воз̾водѧ̀ бжⷭ҇твеными тѝ сказа́нїи . пострада́въ же зако́ннѡ . подо́бнѡ же болѣ́зни сплетѐ вѣне́цъ , приснопа́мѧтне .= боⷢ҇ . С=ъ бг҃омъ тѧ̀ застꙋ́пницꙋ стѧжа́хомъ . ты́ бо мт҃и бж҃їѧ бы́сть творца̀ и҆ содѣ́телѧ , на́шъ ѻ҆́бразъ прїе́мша пренепоро́чнаѧ , и҆ тогѡ̀ спа́сша ѿ тлѧ̀ и҆ сме́рти . и҆ сла́вою бжⷭ҇твеною просла́вльшемꙋ .

и҆́нъ , і҆рмо́съ . И҆з̾ горы̀ присѣ́нныѧ сло́ве проро́къ , и҆з̾ є҆ди́ныѧ бцⷣы хотѧ́щасѧ воплоти́ти , бг҃ови́днѡ раз̾смо́трь , и҆ со́ страхомъ славосло́вѧши си́лꙋ твою̀ . Добродѣ́тельною ше́ствовавъ стезе́ю ѻ҆́ч҃е , пости́же ѻ҆би́тели вы́шнїѧ бг҃оно́сне . сщ҃е́нства пома́занїемъ оу҆кра́шенъ , и҆ мꙋче́нїѧ сїѧ́ѧ кро́вїю . Тꙋ́чами пото́къ твои́хъ крове́й бл҃же́нне оу҆гаси́лъ є҆сѝ пе́щь пре́лести . и҆ гоне́нїѧ погꙋби́лъ є҆сѝ мра́къ , сщ҃енномч҃нче достосла́вне .= Но́выи пе́тръ нѣ́кїи на́мъ ꙗ҆ви́сѧ , вои́стинꙋ а҆пⷭ҇льскими сїѧ́ѧ дарова́нїи . ст҃ль же и҆ свидѣ́тель стрⷭ҇ти , влⷣки своегѡ̀ всебога́те . боⷢ҇ . В=сѣ́хъ до́брыхъ и҆сполне́нїе ро́ждьши . и҆спо́лни на́ша дв҃о моле́нїѧ . грѣхо́въ на́мъ и҆збавле́нїѧ просѧ́щи . и҆ просвѣще́нїѧ , и҆ ве́лїѧ ми́лости .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Просвѣтѝ на́съ повелѣ́нїемъ сѝ гдⷭ҇и , и҆ мы́шцею высо́кою , твоегѡ̀ ми́ра пода́ждь на́мъ , є҆ди́не чл҃колю́бче . Во́ свѣтѣ за́повѣдей ходѧ̀ гдⷭ҇нихъ , ча́до вои́стинꙋ ꙗ҆ви́сѧ тогѡ̀ бл҃же́нне нело́жное . Всегѡ̀ на землѝ ты̀ ѿрече́сѧ пристра́стїѧ ст҃лю , да бꙋ́дꙋщее бл҃госла́вїе полꙋчи́ши , и҆ свѣ́тлости сла́вы хрⷭ҇то́вы . Мч҃нческими оу҆кра́шенъ свѣ́тлостьми , со а҆́нг҃лы ны́нѣ пред̾стои́ши , влⷣцѣ ѡ҆ пою́щихъ молѧ́сѧ . боⷢ҇ . Мт҃и бж҃їѧ , вѣ́рою тѧ̀ пою́щихъ , ѿ бѣ́дъ и҆зба́ви моли́твами си дв҃о , ꙗ҆́кѡ тѧ̀ пред̾ста́тельницꙋ свѣ́мы чⷭ҇таѧ .

и҆́нъ , і҆рмо́съ . Оу҆́треннююще вопїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . На ка́мень воз̾ше́дъ вѣ́ры страстоте́рпче , не оу҆кло́ненъ пребы́сть во и҆скꙋше́нїихъ сопроти́вныхъ . Ѻ҆рꙋ́жїемъ ѻ҆́гненымъ дх҃а ст҃а́гѡ ст҃лю , а҆́рїѧ хꙋ́льнагѡ , бжⷭ҇твенымъ сꙋдо́мъ закла́лъ є҆сѝ .= Крѣ́постїю оу҆крѣплѧ́емь сла́вне сп҃совою , вра́жїю си́лꙋ и҆ крѣ́пость попра́лъ є҆сѝ . боⷢ҇ . Д=в҃ꙋ по ржⷭ҇твѣ̀ пое́мъ тѧ бцⷣе . ты́ бо бг҃а сло́ва пло́тїю ми́рови родила̀ є҆сѝ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Ре́вностїю раз̾жже́нъ , гдⷭ҇нею любо́вїю мꙋ́дре , и҆́дольскꙋю ле́сть ѡ҆бличи́лъ є҆сѝ крѣ́пкѡ , слове́сными противле́нїи , и҆ чꙋде́сными ꙗ҆вле́нїи всехва́льне . Недрема́ннѡ соблю́дъ ѻ҆́ко срⷣца твоегѡ̀ , на ѕло́бꙋ ника́коже воз̾дрема́въ сла́вне . бжⷭ҇твеными восхожде́нїи вчинѧ́ѧ , добродѣ́телей к̾ верхо́вномꙋ . Ꙗ҆́кѡ ст҃ль че́стенъ , вѧза́ти и҆ рѣша́ти прегрѣше́нїѧ , вла́сть прїи́мъ ѿ сп҃са хрⷭ҇та̀ , мно́гихъ мѝ прегрѣше́нїи до́лгъ разрѣшѝ , воз̾водѧ̀ к̾ покаѧ́нїю .= боⷢ҇ . Т=вои́ми мольба́ми чⷭ҇таѧ , бѣ́дъ и҆ напа́стей и҆схи́ти мѧ лю́тыхъ , и҆ и҆зба́ви мѧ молю́сѧ . ты́ бо стѣна̀ є҆сѝ неразрꙋши́ма , и҆ приста́нище и҆ покро́въ , и҆ неѡ҆бори́мое оу҆твержде́нїе .

и҆́нъ , і҆рмо́съ . Ри́зꙋ ми пода́ждь свѣ́тлꙋ , ѡ҆дѣѧ́исѧ свѣ́томъ ꙗ҆́кѡ ри́зою , многомлⷭ҇тиве хрⷭ҇тѐ бж҃е на́шъ . Цѣломꙋ́дренѡ и҆ пра́веднѡ бг҃ови , ты̀ жи́тельствовавъ . коне́цъ бл҃же́нныи ѿ негѡ̀ прїе́мъ всебл҃же́нне пе́тре . Всесоверше́нꙋю же́ртвꙋ прїѧ́тнꙋ , себѐ прине́слъ є҆сѝ пе́тре ди́вныи , же́ртва тебѐ ра́ди бы́вшꙋ бг҃ꙋ .= Слове́съ дх҃о́вныхъ и҆спо́лнисѧ . дх҃омъ двиза́емь ѻ҆рга́нъ бы́сть , поѧ̀ бг҃огл҃иве неи҆зрече́ннаѧ . боⷢ҇ . Є҆=ди́на сло́вомъ пло́тїю сло́во ро́ждьшаѧ , и҆зба́ви мо́лимсѧ сѣ́тей вра́жїихъ дш҃а на́ша .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ , и҆ и҆́косъ , пра́здникꙋ .

пѣ́снь , з҃ . і҆рмо́съ . Дѣ́ти бл҃гочести́выѧ въ вавилѡ́нѣ , тѣ́лꙋ злато́мꙋ непоклони́шасѧ , но посредѝ пе́щи пла́менны прохлажда́еми , пѣ́снь воспѣва́хꙋ гл҃юще , бл҃гослове́нъ бг҃ъ ѻ҆ц҃ъ на́шихъ . Ꙗ҆́коже оу҆́тро восїѧ̀ , просвѣща́ѧ землѝ всѧ̀ концы̀ . и҆ но́щь преле́стнꙋю ѿгонѧ̀ бг҃огла́се , и҆́дольскагѡ без̾бо́жїѧ . бл҃гослове́нъ є҆сѝ вопїѧ̀ бж҃е ѻ҆ц҃ъ на́шихъ . Всѧ̀ спастѝ хотѧ̀ бг҃ъ , твои́ми мл҃твами прозрѣ́нїе дарова̀ сисині́ю . и҆ дш҃и и҆ тѣлесѝ ѻ҆чеса̀ ѿве́рзъ ѻ҆́ч҃е . тѣ́мже просвѣща́етсѧ бжⷭ҇твеною ба́нею . Стрꙋѝ и҆сцѣле́ней то́чиши , ѿ бжⷭ҇твеныѧ тѝ ра́ки кли́менте сла́вне . страсте́й мно́гихъ и҆збавлѧ́еши всегда̀ притека́ющихъ к̾ тебѣ̀ , и҆ пою́щихъ , бл҃гослове́нъ бг҃ъ ѻ҆ц҃ъ на́шихъ .= боⷢ҇ . П=одоба́ше без̾ сѣ́мене воплоща́емомꙋ и҆з̾ тебѐ проитѝ дв҃о пречⷭ҇таѧ . ты́ бо возрастѐ всѣ́хъ чи́стаѧ пребо́льши . тѣ́мже ти непреста́ннѡ зове́мъ , бл҃гослове́нъ пло́дъ чре́ва твоегѡ̀ .

и҆́нъ , і҆рмо́съ , то́йже . Житїе́мъ бг҃олѣ́пнымъ оу҆кра́шенъ , и҆ бжⷭ҇твенымъ свѣ́томъ просвѣща́емь , нбⷭ҇ныхъ в̾ незаходи́маѧ вше́дъ веселѧ́сѧ . и҆ вопїѧ̀ мꙋ́дре сотво́ршемꙋ , бл҃гослове́нъ бг҃ъ ѻ҆ц҃ъ на́шихъ . Ꙗ҆́кѡ да свѣ́тлѡ оу҆годи́ши хрⷭ҇тꙋ̀ бг҃ꙋ бг҃обл҃же́нне , в̾ рꙋ́ки без̾зако́нныхъ себѐ пре́далъ є҆сѝ во́лею , поѧ̀ пребога́те , бл҃гослове́нъ бг҃ъ ѻ҆ц҃ъ на́шихъ .= Ве́сь просвѣще́нъ , сподо́бисѧ ви́дѣти хрⷭ҇та̀ своегѡ̀ , просвѣща́юща свою̀ ри́зꙋ лю́тѣ раздранꙋ̀ , и҆стка́ннꙋю свы́ше прпⷣбне , бл҃гослове́нагѡ бг҃а ѻ҆ц҃ъ на́шихъ . боⷢ҇ . В=сѧ̀ ꙗ҆́кѡ чи́ста прїѧ́тъ в̾ оу҆тро́бѣ свое́й сло́во воплоща́емо . но тогѡ̀ молѝ ѡ҆чи́стити ми прегрѣше́нїи , дш҃ꙋ и҆ тѣ́ло пречⷭ҇таѧ , к̾ тебѣ̀ чи́стою вѣ́рою прири́щꙋщагѡ .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Мꙋсикі́йскимъ ѻ҆рга́нѡмъ согласѧ́щимъ , и҆ лю́демъ без̾числа̀ кла́нѧющимсѧ , тѣ́лꙋ сꙋ́щꙋ на моле́бнѣмъ , трїѐ ѻ҆́троцы пѣсносло́вѧхꙋ , гдⷭ҇а по́йте , и҆ превозноси́те є҆гѡ̀ во́ вѣки . Оу҆чени́къ бы́въ петро́въ , бжⷭ҇твеныѧ нра́вы тогѡ̀ подража́ѧ кли́менте страда́льче . тѣ́мже и҆ престо́ла прїе́мникъ сѣда́лищꙋ вои́стинꙋ показа́сѧ , просвѣща́ѧ всѧ́кꙋ тва́рь . Та́йнѡ ѡ҆черви́въ си оу҆стнѣ̀ , ча́шею премꙋ́дрости кли́менте . ѿры́гнꙋ бжⷭ҇твеныхъ оу҆че́нїи пꙋчи́нꙋ потоплѧ́ющꙋ бѣсостра́шное . дш҃а́мъ же чл҃ческимъ , и҆сточа́ющꙋ спасе́нїе . Ꙗ҆́кѡ пречестнꙋ́ю оу҆́тварь цр҃кви стѧжа́вши , твоѧ̀ бжⷭ҇твенаѧ законоположе́нїѧ , ѡ҆ тебѣ̀ хва́литсѧ . и҆ всѧ̀ подвиза́етъ , твою̀ па́мѧть вѣ́рою почита́ти во всѧ̀ вѣ́ки .= боⷢ҇ . М=р҃і́е дв҃о бцⷣе , ꙗ҆́же бг҃а сп҃са чл҃кѡмъ ро́ждьши тѣле́снѡ , спасѝ вѣ́рою пою́щихъ твоѐ ржⷭ҇тво̀ , и҆ превозносѧ́щихъ во всѧ̀ вѣ́ки .

и҆́нъ , і҆рмо́съ . Проѧвле́ннагѡ на горѣ̀ ст҃ѣ́й , и҆ в̾ кꙋпинѣ̀ ѻ҆́гненнѣй , дв҃ческꙋю мѡѷсе́ѡви та́йнꙋ ꙗ҆́вльшагѡ , гдⷭ҇а по́йте и҆ превозноси́те є҆гѡ̀ во́ вѣки . Ѡ҆держа́щїи оу҆ста́вилъ є҆сѝ недꙋ́гъ , а҆́рїева ѕлохꙋле́нїѧ . ѿ вѣ́рныхъ собо́рища ѿсѣ́къ и҆ ѿгна́въ , цр҃ковь бг҃омꙋ́дре ѡ҆гради́лъ є҆сѝ . Первостоѧ́тель ли́ка а҆пⷭ҇льскагѡ пе́тръ ꙗ҆ви́сѧ , бжⷭ҇твеныи верхо́вникъ . коне́цъ же мч҃нкѡмъ ты̀ бы́сть прехва́льне пе́тре бг҃оно́сне , и҆ ст҃ль бж҃їи сщ҃енномч҃нкъ .= Наꙋчи́всѧ ѿ бжⷭ҇твенагѡ в̾дохнове́нїѧ , бꙋ́дꙋщихъ ра́зꙋмꙋ бг҃огл҃иве . и҆ є҆́же ѿ землѝ проꙋвѣ́дѣвъ своѐ преставле́нїе к̾ вы́шнимъ , гдⷭ҇ꙋ сла́вы хрⷭ҇тꙋ̀ во́ вѣки всѧ̀ . боⷢ҇ . И҆́=же во оу҆тро́бꙋ дв҃ыѧ все́льшасѧ , и҆ ѿ неѧ̀ стра́шнѡ и҆ па́че сло́ва , дре́внѧго а҆да́ма ѡ҆бно́вльша гдⷭ҇а , по́йте и҆ превозноси́те є҆гѡ̀ во́ вѣки .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

На ѳ҃ й пѣ́сни , честнѣ́йшꙋ непое́мъ . пое́мъ припѣ́въ пра́здникꙋ := Велича́й дш҃е моѧ̀ , приведе́нꙋю в̾ цр҃ковь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма . і҆рмо́съ , вⷤ . на ѻ҆́ба ли́ка . =и҆ на четы́рехъ стисѣ́хъ , пое́мъ то́йже , припѣ́въ , по вⷤ , на странꙋ̀ . а҆ ст҃ы́мъ запѣва́емъ на́ и҆мѧ . пое́мъ в̾ ко́емждо и҆́хъ кано́нѣ , по́ три тропарѧ̀ , ст҃о́мꙋ . оу҆ бг҃оро́дичновъ же и҆́хъ пое́мъ , то́йже припѣ́въ , пра́здникꙋ .

пѣ́снь , ѳ҃ . і҆рмо́съ . Вои́стинꙋ бцⷣꙋ тѧ̀ и҆сповѣ́дающе , спасе́ннїи тобо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Тече́нїе своѐ соверши́въ , мно́гими по́двиги . и҆ несꙋмѣ́ннѡ соблю́дъ вѣ́рꙋ хрⷭ҇то́вꙋ , пра́веднымъ вѣнце́мъ оу҆краси́сѧ . Ꙗ҆́кѡ спа́слъ є҆сѝ ѻ҆́трока дре́вле , оу҆держа́на въ мо́ри лѣ́тнымъ ѡ҆бхожде́нїемъ мч҃нче хрⷭ҇то́въ . си́це глꙋбины̀ грѣхо́вныѧ , и҆ менѐ спасѝ . Любо́вїю тѧ чтꙋ́щихъ кли́менте страстоте́рпче . ѿ напа́стей и҆ бѣ́дъ и҆ скорбе́й спасѝ , молѧ̀ зижди́телѧ хрⷭ҇та̀ .= боⷢ҇ . Р=а́дости моѐ срⷣце и҆спо́лни дв҃о , ꙗ҆́же ра́дости прїе́мшаѧ и҆сполне́нїе . и҆ грѣхо́внꙋю печа́ль потреблѧ́ющи .

и҆́нъ , і҆рмо́съ . Проѧвле́нное на горѣ̀ законода́вцꙋ , ѻ҆гне́мъ и҆ кꙋпино́ю , ржⷭ҇тво̀ при́снѡ дв҃ыѧ . въ на́ше вѣ́рныхъ спасе́нїе , пѣ́сньми немо́лчными велича́емъ . Пред̾и҆збра́ннаго сщ҃е́ннѡ ст҃льствовати , и҆ сщ҃е́нства коне́цъ бл҃госла́внѡ прїе́мша , и҆ хрⷭ҇то́вꙋ под̾ража́вша стрⷭ҇ть , петра̀ чꙋ́днагѡ воспое́мъ . Жезло́мъ оу҆крѣпле́ны си́лы гдⷭ҇ни , и҆ ст҃льствовавша , и҆ сщ҃е́ннѡ поже́ршасѧ , и҆ хрⷭ҇то́ви прене́сшасѧ же́ртва , петра̀ бг҃оно́снаго воспое́мъ . Всегѡ̀ примѣ́шена заре́ю трⷪ҇чною , и҆ свѣтосїѧ́ннагѡ є҆ѧ̀ насла́ждьшасѧ свѣ́та , и҆ на́мъ спасе́нїе просѧ́ща , петра̀ бг҃огла́снаго воспое́мъ .= Дава́еши ѡ҆би́льнѡ дш҃и мое́й спасе́нїе . ꙗ҆́кѡ первосщ҃е́нникъ бо и҆́маши вла́сть , вѧза́ти и҆ разрѣша́ти прегрѣше́нїѧ вины̀ , твои́ми застꙋпле́нїи сщ҃е́ннѣйшїи . боⷢ҇ . Т=ы̀ є҆сѝ бцⷣе ѻ҆рꙋ́жїе на́ше и҆ стѣна̀ . ты̀ є҆сѝ застꙋпле́нїе к̾ тебѣ̀ прибѣга́ющимъ . тебѐ и҆ нн҃ѣ на мл҃твꙋ под̾виза́емъ , да и҆зба́вимсѧ ѿ вра́гъ на́шихъ .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ .

задосто́йнѡ : Велича́й дш҃е моѧ̀ , приведе́нꙋю в̾ цр҃ковь гдⷭ҇ню , и҆ блгⷭ҇ве́нꙋю рꙋка́ма і҆єре́ѡвыма .= Ꙗ҆́кѡ ѡ҆ дш҃е́внѣмъ бж҃їи кїѡ́тѣ , да неко́снетсѧ ника́коже рꙋка̀ невѣ́рныхъ . оу҆ста́ же вѣ́рныхъ бцⷣѣ немо́лчнѡ , гла́съ а҆́нг҃лѡвъ воспѣва́ютъ , ра́достїю вопїю́ще , ра́дꙋйсѧ ѡ҆бра́дованнаѧ гдⷭ҇ь с̾ тобо́ю . =покло́н̾ до землѝ .

свѣти́ленъ . Ны́нѣ бл҃гонаро́читъ ꙗ҆ви́сѧ на́мъ де́нь . и҆мꙋ́щи сщ҃е́нныхъ прїе́мникъ , сщ҃е́нныхъ а҆пⷭ҇лъ , петра̀ кꙋ́пнѡ и҆ кли́мента . проповѣ́дники вѣ́рѣ , и҆ непобѣди́мыѧ мч҃нки . и҆́хже моле́бнꙋю па́мѧть , вѣ́рнѡ соверша́емъ всѝ . сла́ва , и҆ ны́нѣ , пра́здникꙋ . Ю҆́же дре́вле провозвѣстѝ проро́ческїи собо́ръ , рꙋ́чкꙋ , и҆ же́злъ , и҆ скрижа́ль , и҆ несѣко́мꙋю го́рꙋ , мр҃і́ю бг҃оѻ҆трокови́цꙋ вѣ́рнѡ восхва́лимъ . дне́сь бо вво́дитсѧ во ст҃а́ѧ ст҃ы́хъ , воспита́тисѧ гдⷭ҇ви .

На хвали́тѣхъ , стихѣ́ры , на д҃ . гла́съ , є҃ . поⷣ . ра́дꙋйсѧ живоно́сныи .= Р=а́дꙋисѧ свѣтоза́рное и҆ кра́сное бжⷭ҇твенагѡ дх҃а мꙋ́дре ѡ҆би́телище . лоза̀ мꙋ́жества та́йнѡ бы́вши , бл҃гопло́дна всебл҃же́нне , и҆ гобзꙋ́ющаѧ . и҆з̾ неѧ́же и҆ска́па оу҆че́нїе спаси́тельное . мсто̀ , напоѧ́ющее и҆ веселѧ́щее срⷣца̀ всегда̀ чтꙋ́щихъ тѧ̀ всебога́те . мч҃нче непобѣди́мыи . нбⷭ҇ныи чл҃че . цр҃ко́вныи сто́лпе . бл҃гочести́вымъ оу҆твержде́нїе . хрⷭ҇та̀ молѝ , посла́ти дш҃а́мъ на́шимъ ве́лїю млⷭ҇ть . Ра́дꙋисѧ бг҃осло́вїѧ скрижа́ли . неи҆зрече́нныхъ сказа́тель писа́нїи . ра́зꙋмъ та́йныи цр҃кви крѣ́пкїи сто́лпъ , и҆ ѡ҆снова́нїе непоколеби́мое . пра́вило и҆звѣ́стнѣйшее . та́йнѡ писа́тель мꙋ́дрѣйшїи . бг҃огл҃ивыи ꙗ҆зы́къ , всѧ́кꙋ є҆́ресь ѿсѣка́ющь , ꙗ҆́коже ме́чь ѡ҆бою́дꙋ ѻ҆́стръ . ѻ҆рга́нъ сладковѣща́нныи , оу҆́мъ нбⷭ҇ныи , кли́менте всебл҃же́нне . сщ҃еннострада́льцемъ ѡ҆снова́нїе и҆ оу҆крѣпле́нїе . хрⷭ҇та̀ молѝ , посла́ти дш҃а́мъ на́шимъ ве́лїю млⷭ҇ть .

и҆́ны , стⷯры , петрꙋ̀ . гла́съ , и҆ подо́бенъ , то́йже . И҆мѣ́ѧ бл҃гочести́вое помышле́нїе , над̾ стрⷭ҇тьмѝ самоде́ржца . претерпѣ̀ неꙋкло́ннѡ мече́мъ го́рькꙋю кончи́нꙋ , и҆ сме́рть всебл҃же́нне . и҆́мже бжⷭ҇твенагѡ бл҃же́нства полꙋчѝ , и҆ сла́дкагѡ сп҃сова прича́стїѧ , и҆ красоты̀ наслади́тисѧ сподо́би . пе́тре бл҃же́нне ка́меню вѣ́ры . коне́цъ бжⷭ҇твеныхъ мч҃нкъ . ст҃лемъ оу҆добре́нїе хрⷭ҇та̀ молѝ , посла́ти дш҃а́мъ на́шимъ ве́лїю млⷭ҇ть . Свѣтѧ́сѧ сщ҃е́нною ѻ҆де́жею , и҆ мꙋче́нїѧ вѣнце́мъ оу҆краша́емь , пред̾ста̀ хрⷭ҇то́ви всѣ́хъ сщ҃еннонача́льникꙋ и҆ бг҃ꙋ , и҆ ꙗ҆́вльшꙋсѧ первомч҃нкꙋ , сꙋгꙋ́бое прїе́мъ ѿ негѡ̀ воздаѧ́нїе . є҆го́же и҆сповѣ́да ѻ҆ц҃ꙋ є҆диносꙋ́щна , и҆ собезнача́льна ро́ждьшемꙋ , и҆ сопресто́льна . а҆́рїѧ ѕлои҆мени́тагѡ ѿсѣ́къ всебога́те , и҆ и҆зве́рже ѿ ню́дъ вѣ́рнагѡ собо́рища . тогѡ̀ ны́нѣ молѝ дарова́ти ми́рови ве́лїю млⷭ҇ть .

сла́ва , и҆ ны́нѣ , пра́здникꙋ . гла́съ , д҃ . Дне́сь бг҃овмѣсти́маѧ цр҃ковь бцⷣа , въ цр҃ковь бж҃їю приво́дитсѧ , и҆ заха́рїѧ тꙋ̀ под̾є́млетъ . дне́сь ст҃а́ѧ ст҃ы́хъ ра́дꙋетсѧ , и҆ ли́къ а҆́нг҃льскїи та́йнѡ торжествꙋ́етъ . с̾ ни́ми же и҆ мы̀ пра́з̾днꙋюще дне́сь , съ гаврїи́ломъ возопїе́мъ , ра́дꙋисѧ ѡ҆бра́дованнаѧ гдⷭ҇ь с̾ тобо́ю , и҆мѣ́ѧи ве́лїю млⷭ҇ть .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ .= С=вѣщено́сицы дв҃ы ,꙳ при́снѡ дв҃ꙋю свѣ́тлѡ провожда́юще ,꙳ проро́чествꙋютъ вои́стинꙋ дх҃омъ бꙋ́дꙋщее .꙳ хра́мъ бо бж҃їи бцⷣа сꙋ́щи ,꙳ в̾ цр҃ковь со сла́вою дв҃ьственою ,꙳ младе́нствꙋющи в̾во́дитсѧ .

сти́хъ : приведꙋ́тсѧ цр҃ю дв҃ы въ слѣ́дъ є҆ѧ̀ ,꙳ бли́жнѧѧ є҆ѧ̀ приведꙋ́тсѧ тебѣ̀ . Ѡ҆бѣща́нїѧ ст҃а́гѡ пло́дъ сла́вныи ,꙳ бцⷣа вои́стинꙋ ꙗ҆ви́сѧ ми́рови ,꙳ ꙗ҆́кѡ всѣ́хъ вы́шшаѧ .꙳ ꙗ҆́же бл҃гоче́стнѡ приводи́ма въ цр҃ковь бж҃їю ,꙳ моли́твꙋ ро́ждьшихъ и҆сполнѧ́ющи ,꙳ соблюда́ема бжⷭ҇твенымъ дх҃омъ .

сти́хъ : приведꙋ́тсѧ въ весе́лїе и҆ ра́дость ,꙳ в̾ведꙋ́тсѧ в̾ цр҃ковь цр҃е́вꙋ . Нбⷭ҇нымъ воспитѣ́на дв҃о хлѣ́бомъ ,꙳ въ цр҃кви гдⷭ҇ни вѣ́рнѡ ,꙳ породѝ ми́рови живота̀ хлѣ́бъ сло́во .꙳ ꙗ҆́кѡ хра́мъ и҆збра́нныи и҆ пренепоро́чныи ,꙳ пред̾ѡ҆брꙋчи́сѧ дх҃омъ та́йнѡ ,꙳ ѡ҆брꙋчена̀ бг҃ꙋ и҆ ѻ҆ц҃ꙋ .

сла́ва , и҆ ны́нѣ . гла́съ , в҃ . Дне́сь в̾ цр҃ковь в̾во́дитсѧ всенепоро́чнаѧ дв҃аѧ , во ѻ҆би́телище всѣ́хъ цр҃ѧ и҆ бг҃а , и҆ всеѧ̀ жи́зни на́шеѧ пита́телѧ . дне́сь честнѣ́йша ст҃ы́нѧ , ꙗ҆́кѡ трилѣ́тствꙋющаѧ ю҆́ница , во ст҃а́ѧ ст҃ы́хъ в̾во́дитсѧ . то́й возопїе́мъ ꙗ҆́кѡ а҆́нг҃лъ , ра́дꙋисѧ є҆ди́на в̾ жена́хъ бл҃гослове́наѧ .

На литꙋргі́и , бл҃же́нна , пра́здникꙋ , на и҃ . пѣ́снь , и҃ ѧ , и҆ пѣ́снь , ѳ҃ ѧ .

по вхо́дѣ тропа́рь пра́здникꙋ , и҆ ст҃ы́мъ . сла́ва , конда́къ , ст҃ы́мъ . и҆ ны́нѣ , пра́здникꙋ .

проки́мен̾ , пѣ́снь бцⷣы . вели́читъ дш҃а моѧ̀ гдⷭ҇а , и҆ воз̾ра́довасѧ дх҃ъ мо́й ѡ҆́ бз҃ѣ сп҃сѣ мое́мъ . сти́хъ . ꙗ҆́кѡ призрѣ̀ на смире́нїе рабы̀ своеѧ̀ , се́бо ѿ ны́нѣ бл҃жа́тъ мѧ всѝ ро́ди . дрꙋгі́и , честна̀ пре́д̾ гдⷭ҇емъ сме́рть прпⷣбныхъ є҆гѡ̀ . а҆пⷭ҇лъ , къ є҆вре́ѡмъ . зача́ло , т҃к . дрꙋгі́и , а҆пⷭ҇лъ , къ филипписі́омъ . заⷱ҇ , см҃ѕ .= а҆ллилꙋ́їѧ . слы́ши дщѝ и҆ ви́ждь , и҆ приклонѝ оу҆́хо твоѐ . =сти́хъ . приведꙋ́тсѧ цр҃ю дв҃ы в̾ слѣ́дъ є҆ѧ̀ , бли́жнѧѧ є҆ѧ̀ приведꙋ́тсѧ тебѣ̀ . сти́хъ . і҆єре́и твоѝ ѡ҆блекꙋ́тсѧ в̾ пра́вдꙋ , и҆ прпⷣбнїи твоѝ воз̾ра́дꙋютсѧ . є҆ѵⷢ҇а́лїе , ѿ лꙋкѝ . заⷱ҇ , н҃д . и҆ є҆ѵⷢ҇а́лїе , ѿ матѳе́ѧ . заⷱ҇ , а҃і . прича́стен̾ . ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призовꙋ̀ . дрꙋгі́и , въ па́мѧть вѣ́чнꙋю бꙋ́детъ пра́ведникъ .

Подоба́етъ вѣ́дати , ꙗ҆́кѡ а҆́ще слꙋчи́тсѧ ѿда́нїе пра́здника в̾веде́нїѧ пречⷭ҇тыѧ бцⷣы в̾ недѣ́лю . ѡ҆ставлѧ́етсѧ вослѣ́дованїе ст҃а́гѡ петра̀ . и҆ пое́тсѧ є҆гда̀ хо́щетъ цр҃кви нача́льникъ . Въ сꙋбо́тꙋ на ма́лѣй вече́рни , стихѣ́ры воскрⷭ҇ны , и҆ бцⷣы по ѻ҆бы́чаю . тропа́рь воскрⷭ҇нъ , и҆ пра́здникꙋ .

На вели́цѣй вече́рни , по а҃ каѳи́смѣ , на гдⷭ҇и возва́хъ , стихѣ́ры , воскрⷭ҇ны , д҃ . и҆ пра́здникꙋ , г҃ , гла́съ , а҃ . дне́сь вѣ́рнїи ликоствꙋ́емъ . и҆ ст҃о́мꙋ кли́ментꙋ , г҃ . сла́ва , пра́здникꙋ , гла́съ , и҃ . по ржⷭ҇твѣ̀ твое́мъ . и҆ ны́нѣ , боⷢ҇ , пе́рвыи , настоѧ́щемꙋ гла́сꙋ . вы́ходъ . проки́менъ дню̀ . на литі́и , стихѣ́ра хра́мꙋ . стихѣ́ры пра́здникꙋ . сла́ва , пра́здникꙋ . гла́съ , є҃ . восїѧ̀ де́нь ра́достенъ .= и҆ ны́нѣ . гла́съ , и҃ . дв҃дъ провоз̾глаша́ше . на стихо́внѣ , стихѣ́ры , воскрⷭ҇ны . сла́ва , и҆ ны́нѣ , пра́здникꙋ . =гла́съ , ѕ҃ . дне́сь собо́ри вѣ́рныхъ . на бл҃гослове́нїе хлѣ́бѡмъ , бцⷣе дв҃о ра́дꙋисѧ , три́жды . а҆ и҆дѣ́же все́нощное небыва́етъ , гл҃емъ , тропа́рь воскрⷭ҇нъ .

сла́ва , тропа́рь кли́ментꙋ . гла́съ , д҃ . И҆́же ѿ бг҃а чꙋдодѣ́йствы , пресла́внѡ оу҆дивлѧ́ѧ вселе́нныѧ концы̀ ми́ра сщ҃е́нныи страда́льче . па́че бо є҆стества̀ мо́рю соста́вы вода́мъ содѣва́еши раздѣле́нїе , в̾ честнѣ́й па́мѧти твое́й , всегда̀ притека́ющимъ оу҆се́рднѡ , въ бг҃озда́ннꙋю ти цр҃ковь къ чꙋде́снымъ моще́мъ , и҆ по всенаро́дномъ хожде́нїи , мо́ре во є҆ди́но тече́нїе чꙋдодѣ́тельнѣ творѧ̀ кли́менте преди́вный , молѝ хрⷭ҇та̀ бг҃а спасти́сѧ дш҃а́мъ на́шимъ . и҆ ны́нѣ , пра́здникꙋ .

На оу҆́трени , на бг҃ъ гдⷭ҇ь , тропа́рь воскрⷭ҇нъ , двⷤа . сла́ва , кли́ментꙋ . и҆ ны́нѣ , пра́здникꙋ . по а҃ , стихоло́гїи , сѣда́ленъ , воскрⷭ҇нъ . сла́ва , и҆ нн҃ѣ , боⷢ҇ , настоѧ́щагѡ гла́са . по в҃ , стихоло́гїи , сѣда́ленъ , воскрⷭ҇нъ . сла́ва , и҆ нн҃ѣ , боⷢ҇ , є҆гѡ̀ . понепоро́чнахъ , тропарѝ и҆́хъ . є҆ктенїѧ̀ . ѵ҆пако́й , гла́сꙋ . степе́нна гла́сꙋ . проки́менъ . всѧ́ко дыха́нїе . є҆ѵⷢ҇а́лїе , воскрⷭ҇но . воскрⷭ҇нїе хрⷭ҇то́во . ѱало́мъ , н҃ . стихѣ́ра , воскрⷭ҇на .

Кано́нъ , воскрⷭ҇нъ , со і҆рмосо́мъ , на д҃ . и҆ бцⷣѣ , на́ в҃ . и҆ пра́здникꙋ , гла́съ , д҃ , на д҃ . и҆ ст҃о́мꙋ кли́ментꙋ , на д҃ . катава́сїѧ : хрⷭ҇то́съ ражда́етсѧ .

по г҃ пѣ́сни , конда́къ , и҆ и҆́косъ , пра́здникꙋ . конда́къ , кли́ментꙋ . гла́съ , в҃ . Бжⷭ҇твенагѡ виногра́да , ꙗ҆́кѡ сщ҃енноѡ҆дѣ́ѧнна лоза̀ всѣ́мъ ꙗ҆ви́сѧ , ка́плющи сла́дость премꙋ́дрости . и҆ мл҃твами твои́ми всече́стне , да тѝ и҆сткꙋ̀ ꙗ҆́кѡ багрѧни́цꙋ пѣ́снь мы́сленꙋю , кли́менте ст҃е , спасѝ рабы̀ своѧ̀ . и҆ сѣда́ленъ , є҆мꙋ̀ . сла́ва , и҆ ны́нѣ , пра́здникꙋ . по ѕ҃ пѣ́сни , конда́къ , и҆ и҆́косъ , воскрⷭ҇нъ . на ѳ҃ пѣ́сни , пое́мъ , честнѣ́йшꙋ . свѣти́ленъ , воскрⷭ҇нъ . сла́ва , ст҃о́мꙋ . и҆ ны́нѣ , пра́здникꙋ . На хвали́тѣхъ , стихѣ́ры воскрⷭ҇ны , д҃ . и҆ пра́здникꙋ со сла́внымъ , на д҃ , со стихѝ пра́здничными . сла́ва , стⷯра , є҆ѵⷢ҇а́льскаѧ . и҆ ны́нѣ , гла́съ , в҃ . пребл҃гослове́нна є҆сѝ бцⷣѣ . Славосло́вїе вели́кое . тропа́рь , воскрⷭ҇нъ то́чїю . є҆ктенїѝ , и҆ ѿпꙋ́стъ . и҆ =ча́съ , а҃ . =на а҃ мъ часѣ̀ : тропа́рь , воскрⷭ҇нъ . сла́ва , пра́здникꙋ . конда́къ , воскрⷭ҇нъ . и҆ коне́чныи ѿпꙋ́стъ .

на г҃ мъ часѣ̀ : тропа́рь , воскрⷭ҇нъ . сла́ва , ст҃о́мꙋ . конда́къ , пра́здникꙋ .

на ѕ҃ мъ часѣ̀ : тропа́рь , воскрⷭ҇нъ . сла́ва , пра́здникꙋ . конда́къ , воскрⷭ҇нъ .

на ѳ҃ мъ часѣ̀ : тропа́рь , воскрⷭ҇нъ . сла́ва , ст҃о́мꙋ . конда́къ , пра́здникꙋ .

На литꙋргі́и , бл҃же́нна , гла́сꙋ , на́ ѕ҃ . и҆ пра́здникꙋ , пѣ́снь , ѳ҃ ѧ , д҃ гѡ гла́са , на д҃ .

По вхо́дѣ : тропа́рь , воскрⷭ҇нъ , и҆ пра́здникꙋ , и҆ ст҃о́мꙋ . конда́къ , воскрⷭ҇нъ . сла́ва , ст҃о́мꙋ . и҆ ны́нѣ , пра́здникꙋ . Проки́менъ , а҆пⷭ҇лъ , а҆ллилꙋ́їѧ , и҆ є҆ѵⷢ҇а́лїе , гла́сꙋ и҆ пра́здникꙋ . прича́стенъ . хвали́те гдⷭ҇а с̾ небе́съ .= дрꙋгі́и , ч=а́шꙋ спасе́нїѧ прїимꙋ̀ , и҆ и҆́мѧ гдⷭ҇не призовꙋ̀ .