26 ноября: прп. Алимпия Столпника и освящение церкви вмч. Георгия в Киеве

МЦⷭ҇А ТОГО́ЖЕ ВЪ К҃Ѕ ДН҃Ь

прпⷣбнагѡ ѻ҆ц҃а на́шегѡ а҆лѵ́мпїѧ сто́лпника . =И҆ ѡ҆сщ҃е́нїе цр҃кви ст҃а́гѡ великомч҃нка геѡ́ргїѧ , и҆́же въ кі́евѣ пред̾ враты̀ ст҃ы́ѧ соѳі́и . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и возва́хъ , стихѣ́ры . гла́съ , а҃ . поⷣ . прехва́льнїи мч҃нцы . Всебл҃же́нне а҆лѵ́мпїе ,꙳ ты̀ и҆́з̾млада воз̾ложѝ живо́тъ сво́й ꙳ хрⷭ҇тꙋ̀ бг҃ꙋ на́шемꙋ .꙳ ѿ него́же оу҆крѣплѧ́емь ,꙳ плотны́ѧ стра́сти по́мыслꙋ покори́лъ є҆сѝ ,꙳ го́ршее преклони́въ бо́льшемꙋ .꙳ тѣ́мже моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю ми́лость . Бг҃омꙋ́дре а҆лѵ́мпїе ,꙳ свѣти́ло ꙗ҆ви́сѧ вели́кое ,꙳ просвѣща́ѧ под̾сл҃нчнꙋю ꙳ чꙋде́съ сїѧ́нїи .꙳ тѣ́мже по оу҆спе́нїи ,꙳ незаходи́мыи тѧ̀ свѣ́тъ прїѧ́тъ .꙳ сегѡ̀ ра́ди моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . Сто́лпъ бы́лъ є҆сѝ мꙋ́дре ,꙳ и҆́нокѡмъ непоколеби́мъ .꙳ вы́ше столпа̀ стоѧ̀ ,꙳ и҆ стражда̀ зно́емъ и҆ зимо́ю ,꙳ и҆ мно́гими страда́нїи .꙳ тѣ́мже и҆ прїѧ́тъ дх҃о́внаѧ ,꙳ бжⷭ҇твенаѧ дарова́нїѧ ,꙳ цѣли́ти недꙋ́ги ,꙳ и҆ ѿгони́ти стра́сти лютѣ́йшїѧ . =сла́ва , и҆ ны́нѣ , боⷢ҇ . Ра́дꙋисѧ кꙋпино̀ неѡ҆пали́маѧ .꙳ совѣ́та вели́кагѡ а҆́нг҃ла ,꙳ ра́дꙋисѧ є҆ди́на ро́ждьшаѧ .꙳ ра́дꙋисѧ и҆зволе́нїе чⷭ҇тны́ѧ трⷪ҇цы .꙳ ра́дꙋисѧ земны́мъ оу҆твержде́нїе .꙳ раю̀ кла́съ прозѧ́бши невоздѣ́ланныи ,꙳ цр҃ѧ и҆ гдⷭ҇а ,꙳ прозѧбе́нїѧ и҆зсꙋша́юща ѕло́бы . крⷭ҇тобоⷢ҇ . А҆́гньца а҆́гница ,꙳ и҆ пренепоро́чнаѧ влⷣчца ,꙳ на крⷭ҇тѣ̀ ꙗ҆́кѡ ви́дѣ ,꙳ зра́ка не и҆мꙋ́ща ни добро́ты ,꙳ оу҆вы̀ мнѣ̀ пла́чꙋщи гл҃аше ,꙳ гдѣ̀ добро́та твоѧ̀ за́йде сла́дкїи .꙳ гдѣ̀ бл҃голѣ́пїе .꙳ гдѣ̀ бл҃года́ть сїѧ́ющи ѻ҆́браза твоегѡ̀ ,꙳ сн҃е мо́й любе́зныи .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , а҃ . Терпѣ́нїѧ сто́лпъ бы́сть , ревнова́въ пра́ѻ҆ц҃емъ прпⷣбне . і҆́ѡвꙋ во стрⷭ҇те́хъ , и҆ і҆ѡ́сифꙋ въ напа́стехъ . и҆ беспло́тныхъ житїѐ и҆мѣ́ѧ в̾ тѣлесѝ а҆лѵ́мпїе ѻ҆́ч҃е на́шъ . молѝ хрⷭ҇та̀ бг҃а , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .=

На оу҆́трени . ѻ҆́ба кано́на , во ѻ҆кта́и . и҆ прпⷣномꙋ , на д҃ . є҆мꙋ́же краегране́сїе сицево̀ : ра́дꙋѧсѧ хвалю̀ а҆лѵ́мпїевы болѣ́зни . творе́нїе і҆ѡ́сифово . гла́съ , є҃ . пѣ́снь , а҃ . і҆рмо́съ . Конѧ̀ и҆ вса́дники в̾ мо́ри чермнѣ́мъ , сокрꙋша́ѧ и҆ бра́ни мы́шцею высо́кою , хрⷭ҇то́съ и҆стрѧ́слъ є҆́сть , і҆и҃лѧ же спасѐ , побѣ́днꙋю пѣ́снь пою́ща .

запѣ́в̾ : Прпⷣбне ѻ҆́ч҃е а҆лѵ́мпїе , молѝ бг҃а ѡ҆ на́съ .= Бл҃года́тїю и҆спо́лненъ , ра́дости мѝ и҆спо́лни дш҃ꙋ , похвали́ти житїѐ твоѐ а҆лѵ́мпїе и҆ жи́тельство . и҆́миже всѧ̀ а҆́нг҃лы воз̾веселѝ под̾виза́всѧ . Ꙗ҆́кѡ дрꙋга́го тѧ̀ самꙋ́ила бг҃ъ ѡ҆ст҃ѝ , и҆з̾ ма́тернѧгѡ чре́ва а҆лѵ́мпїе бл҃же́нне . и҆ зрѣ́ти пре́днѧѧ , ꙗ҆́кѡ прⷪ҇рка бжⷭ҇твена содѣ́ѧ тѧ достосла́вне . Ꙗ҆́кѡ да бг҃ъ и҆звѣсти́тъ твою̀ свѣ́тлость , ю҆́же на послѣ́докъ и҆мѣ̀ , до́брѣ под̾виза́всѧ . свѣ́та бжⷭ҇твенагѡ и҆спо́лни , тебѣ̀ ро́ждьшꙋсѧ прпⷣбне , хра́минꙋ па́че оу҆ма̀ . боⷢ҇ . Р=ече́нїе прⷪ҇рка честна́гѡ коне́цъ прїѧ́тъ . се́бо дв҃аѧ пло́тїю бг҃а породѝ , чл҃ки поновлѧ́юща , сокрꙋше́нныѧ пре́жде грѣхмѝ и҆ прегрѣше́нїи .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Оу҆тверже́и ни наче́мъ же зе́млю повелѣ́нїемъ сѝ , и҆ распространѝ не ѡ҆держи́мꙋю тѧготꙋ̀ , на недви́жимомъ хрⷭ҇тѐ ка́мени заповѣде́й тѝ , цр҃квь свою̀ оу҆твердѝ , є҆ди́не бл҃же и҆ чл҃колю́бче . Ꙗ҆́кѡ свѣти́льникъ на свѣ́щницѣ стоѧ́нїѧ бо́льшагѡ воз̾ложе́нъ . свѣтоза́рными ти ѻ҆́ч҃е добродѣ́тельми , всѧ́кꙋ дш҃ꙋ вѣ́рнѡ к̾ тебѣ̀ приходѧ́щꙋ , бл҃гоче́стнѡ мꙋ́дренѡ просвѣти́лъ є҆сѝ . тмы̀ грѣхо́вныѧ и҆збавлѧ́ѧ . Оу҆́мъ тво́й сщ҃е́нныѧ по́двиги творѧ̀ . къ соблюде́нїю бжⷭ҇твеныхъ зако́нъ дх҃о́вныхъ . а҆́нг҃лъ ꙗ҆ви́сѧ на землѝ . а҆́нг҃льское житїѐ съ пло́тїю прїе́мъ , ѻ҆́ч҃е бг҃оно́се а҆лѵ́мпїе . Разꙋ́мнѡ пли́щь жите́йскихъ а҆лѵ́мпїе ѿше́льникъ бы́сть . и҆ пристꙋпѝ къ по́стническомꙋ пребыва́нїю оу҆се́рднѡ . твоѐ срⷣце жили́ще ꙗ҆влѧ́ѧ дх҃ови прпⷣбне .= боⷢ҇ . Д=в҃о чⷭ҇таѧ , сло́вꙋ пола́то , дш҃ꙋ мою̀ покажѝ до́мъ дх҃ови . и҆ водо́ю и҆сто́чника живонача́льнагѡ напо́й мѧ , зно́емъ грѣхо́внымъ и҆з̾гора́ема . ꙗ҆́кѡ да по́ долгꙋ прославлѧ́ю тѧ .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

сѣда́ленъ . гла́съ , д҃ . Свѣ́тлостїю вѣ́ры , и҆ дѣ́тельнымъ свѣ́томъ , ꙗ҆ви́сѧ равноа́нг҃ленъ на землѝ вои́стинꙋ а҆лѵ́мпїе прпⷣбне . показа́лъ є҆сѝ мꙋ́жественѡ , крѣ́пкое ра́зꙋма твоегѡ̀ , побѣдѝ ѡ҆полче́нїѧ страстна́ѧ посто́мъ . тѣ́мже и҆ по кончи́нѣ ꙗ҆́кѡ жи́въ сы́и , молѝ спасти́сѧ на́мъ . сла́ва , и҆ ны́нѣ , боⷢ҇ . Дв҃о всенепоро́чнаѧ , и҆́же пресꙋ́щественагѡ бг҃а ро́ждьшаѧ , со беспло́тными тогѡ̀ молѝ , ѿпꙋще́нїе согрѣше́нїемъ , и҆ и҆справле́нїе житїю̀ , да́ти на́мъ пре́жде конца̀ , и҆́же вѣ́рою и҆ любо́вїю пою́щимъ тѧ по́долгꙋ , є҆ди́на препѣ́таѧ . крⷭ҇тобоⷢ҇ . Дв҃о всенепоро́чнаѧ мт҃и хрⷭ҇та̀ бг҃а , ѻ҆рꙋ́жїе про́йде прест҃ꙋ́ю твою̀ дш҃ꙋ , є҆гда̀ распина́ема ви́дѣ во́лею сн҃а и҆ бг҃а своегѡ̀ . є҆го́же пребл҃гослове́наѧ молѧ́щи непреста́й , ѡ҆ставле́нїе согрѣше́нїемъ на́шимъ дарова́ти .

пѣ́снь , д҃ . і҆рмо́съ . Бжⷭ҇твенное твоѐ разꙋмѣ́въ смотре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вопїѧ́ше тѝ , на спасе́нїе лю́демъ сѝ , спастѝ бл҃гі́ѧ своѧ̀ прише́лъ є҆сѝ . Любо́вь и҆́стиннꙋю и҆ милосе́рдїе , вѣ́рꙋ и҆ наде́жꙋ тве́рдꙋ , и҆ жи́тельство нело́жное прїе́мъ ѻ҆́ч҃е , оу҆го́дникъ хрⷭ҇то́въ бы́лъ є҆сѝ . Стоѧ̀ на столпѣ̀ непрекло́ннѡ , проти́вныѧ прило́ги бѣсо́вскагѡ полка̀ побѣди́лъ є҆сѝ . и҆ коле́блемымъ бы́сть всебл҃же́нне непрекло́нно оу҆твержде́нїе . Во́дъ бжⷭ҇твеныхъ и҆спо́лнь бы́въ , и҆ ѡ҆роси́лъ є҆сѝ дꙋ́ши и҆згорѣ́вшаѧ зно́емъ лю́тагѡ грѣха̀ , а҆лѵ́мпїе бг҃омꙋ́дре всебога́те . Ꙗ҆ви́лсѧ є҆сѝ стра́шенъ и҆ непристꙋ́пенъ бѣсо́мъ всѣ́мъ вои́стинꙋ . оу҆ранѧ́ѧ си́хъ ра́ною сщ҃е́нныхъ тѝ мл҃твъ , и҆ далечѐ ѿгонѧ́ѧ а҆лѵ́мпїе .= боⷢ҇ . С=тра́сти дш҃и моеѧ̀ и҆сцѣлѝ . и҆ просвѣти́ ми оу҆́мъ , и҆ срⷣце моѐ влⷣчце . свѣтода́телѧ ро́ждьши хрⷭ҇та̀ пребл҃га́гѡ бг҃а .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Ѡ҆дѣѧ́исѧ свѣ́томъ ꙗ҆́кѡ ри́зою , к̾ тебѣ̀ оу҆́треннюю , и҆ тебѣ̀ вопїю̀ , дш҃ꙋ мою̀ просвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . Ве́сь прилѣжа̀ вседержи́телеви . лѣ́тнымъ стоѧ́нїемъ без̾ покро́ва ѻ҆́ч҃е , дожде́мъ и҆ зно́емъ ѕѣлѡ̀ стражда̀ , оу҆се́рднѡ претерпѣ́лъ є҆сѝ . Въ пѣ́снехъ и҆ мольба́хъ оу҆пражнѧ́ѧсѧ прпⷣбне , трисл҃нчныѧ зарѝ бл҃года́ть оу҆ма̀ чистото́ю прїѧ́тъ . и҆ свѣ́тъ цѣле́ней восїѧ́лъ є҆сѝ . Тѣ́ло своѐ на столпѣ̀ ѡ҆гради́въ , оу҆мо́мъ ше́ствовати невозбра́ннѡ , к̾ тебѣ̀ жела́емомꙋ ѻ҆́ч҃е попꙋсти́лъ є҆сѝ , свѣ́та и҆сполнѧ́емь .= боⷢ҇ . С=т҃а́гѡ родила̀ є҆сѝ бг҃а , бы́вша чл҃ка за млрⷭ҇дїе , ст҃а́ѧ ѻ҆трокови́це , ѡ҆сщ҃а́ющаго , и҆́же тогѡ̀ вѣ́рою и҆ стра́хомъ ѡ҆сщ҃а́ющихъ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Волнѧ́щеесѧ бꙋ́рею дш҃етлѣ́нною , влⷣко хрⷭ҇тѐ , страсте́й мои́хъ мо́ре оу҆кротѝ , и҆ и҆з̾ тлѝ воз̾веди́ мѧ , ꙗ҆́кѡ млрⷭ҇дъ . Ка́менїемъ тѧ дꙋ́си ѕло́бы бїю́ще мꙋ́дре , творѧ́ща стоѧ́нїе на столпѣ̀ . и҆ тве́рдагѡ ка́мени , ника́коже поколеба́ша . Терпѧ̀ прпⷣбне претерпѣ́лъ є҆сѝ , терпѣ́нїе тебѣ̀ и҆́стиннѡ , гдⷭ҇ꙋ дарова́вшꙋ . и҆ ѿ всѣ́хъ неꙋдо́бныхъ тѧ̀ и҆зба́вившꙋ . Пресла́внѡ прпⷣбне , свѣ́тъ ви́дѣнъ бы́сть вы́ше столпа̀ . на всѧ́къ де́нь просвѣща́ющь всегда̀ , дш҃е́внаѧ чꙋ́вства .= боⷢ҇ . К=рѣ́пко тѧ оу҆тѣше́нїе и҆́же в̾ ско́рби , и҆ прибѣ́жище , и҆ и҆звѣ́стнѡ и҆́мамы застꙋпле́нїе бцⷣе . спасѝ ѿ бѣ́дъ рабы̀ своѧ̀ .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ . гла́съ , и҃ . Ꙗ҆́кѡ добродѣ́телемъ винꙋ̀ , и҆ по́стникѡмъ оу҆добре́нїе , цр҃кви сла́витъ тѧ дне́сь , и҆ воспѣва́етъ а҆лѵ́мпїе . мл҃твами тѝ пода́ждь , чтꙋ́щимъ любо́вїю до́блести твоѧ̀ и҆ боре́нїѧ , лю́тыхъ прегрѣше́нїи ѡ҆ставле́нїе , и҆збавле́нїю тезои҆мени́тыи . и҆́косъ . А҆лѵ́мпїевꙋ житїю̀ бжⷭ҇твеномꙋ и҆ равноа́нг҃льномꙋ прїиди́те почꙋди́мсѧ . сщ҃е́нницы , и҆ и҆́ночествꙋющїи , и҆ смѣ́снїи лю́дїе ѻ҆те́чества є҆гѡ̀ . и҆ подража́емъ дѣѧ́нїѧ є҆гѡ̀ , да тогѡ̀ ча́сти сподо́бимсѧ мольба́ми є҆гѡ̀ празднолю́бцы , нбⷭ҇нꙋю пѣ́снь пѣ́ти бг҃ови . без̾ско́рбїю тезои҆мени́тыи .

пѣ́снь , з҃ . і҆рмо́съ . Превозноси́мыи ѻ҆ц҃е́мъ гдⷭ҇ь , пла́мень оу҆гаси́въ , дѣ́ти же прохлади́лъ є҆́сть , є҆диногла́снѡ пою́ща , бж҃е бл҃гослове́нъ є҆сѝ . Терпѣли́вѣйшїи , и҆ крѣ́пкїи а҆лѵ́мпїе . лѣ́ты мно́гими , зимо́ю стражда̀ . дх҃о́вною теплото́ю согрѣва́ешисѧ пресла́внѡ . Къ высотѣ̀ нбⷭ҇нѣй и҆мѣ́ѧ жи́тельство , ѡ҆ тѣлесѝ небре́глъ є҆сѝ , ꙗ҆́кѡ растлѣ́тисѧ хотѧ́щꙋ . и҆ томꙋ̀ согнива́емꙋ , нерадѝ ѡ҆ болѣ́знехъ . Всѧ́когѡ сладостра́стїѧ ѻ҆́ч҃е ѿве́ргсѧ . с̾ зимо́ю и҆ ва́ромъ борѧ́сѧ , пострада́лъ є҆сѝ без̾ покро́ва . поѧ̀ , бл҃гослове́нъ бг҃ъ ѻ҆ц҃ъ на́шихъ .= боⷢ҇ . Н=епостижи́мыи пло́ть прїѧ́тъ , оу҆́мнꙋ же и҆ ѡ҆дш҃е́вленꙋ , и҆з̾ тебѐ прⷭ҇нѡ дв҃аѧ , спасѐ пою́щїѧ , бж҃е бл҃гослове́нъ є҆сѝ .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Тебѣ̀ вседѣ́телю в̾ пещѝ ѻ҆́троцы , всеми́рныи ли́къ соста́вльше поѧ́хꙋ , дѣ́ла всѧ́каѧ гдⷭ҇а по́йте , и҆ превозноси́те є҆гѡ̀ во́ вѣки . Но́выи самꙋ́илъ пред̾зрѧ̀ бꙋ́дꙋщее , оу҆́мною чистото́ю , ꙗ҆ви́сѧ а҆лѵ́мпїе всѣ́мъ пред̾гл҃ѧ , ꙗ҆́кѡ бж҃їи пррⷪ҇къ , ѿ гдⷭ҇а ꙗ҆влѧ́емаѧ ти ѻ҆́ч҃е . Свѣтови́дныи цр҃ко́вныи сто́лпъ . забра́ло непоколеби́мое . стѣна̀ нерꙋши́маѧ , всѣ́мъ чл҃кѡмъ бг҃ꙋ вѣ́ровавшимъ , хрⷭ҇то́въ оу҆го́дникъ а҆лѵ́мпїе да почте́тсѧ . Оу҆снꙋ́въ до́брѣ сно́мъ пра́веднымъ ѻ҆́ч҃е , всѣ́мъ должны́мъ , оу҆спи́въ пре́жде стра́сти многоѡ҆бра́зныѧ , мольба́ми и҆ бдѣ́нїи . тѣ́мже неꙋсы́пна тѧ пред̾ста́телѧ нн҃ѣ ѡ҆бога́тихомсѧ .= боⷢ҇ . Т=воѐ ржⷭ҇тво̀ , роди́вшїисѧ грѣ́хъ ѕло́бою ѕмїи́ною без̾пло́дства потре́би , є҆ди́на клѧ́твѣ потреби́тельница дв҃о . тѣ́мже тѧ̀ чте́мъ во всѧ̀ вѣ́ки .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ породѝ сн҃а є҆мманꙋ́ила , бг҃а же и҆ чл҃ка , восто́къ и҆́мѧ є҆мꙋ̀ . є҆го́же велича́юще , тебѐ дв҃о оу҆бл҃жа́емъ . Сщ҃е́нное житїѐ твоѐ , ѿ пеле́нъ ꙗ҆ви́сѧ хрⷭ҇тꙋ̀ , сїѧ́ѧ добродѣ́тельнымъ свѣ́томъ бл҃же́нне . честна́ же твоѧ̀ па́мѧть пре́д̾ бг҃омъ бы́сть , ѻ҆́ч҃е а҆лѵ́мпїе , и҆́нокꙋющимъ нача́льниче . Ꙗ҆́кѡ свѣти́ло пресвѣ́тлое , просвѣща́еши всю̀ зе́млю , ѿгонѧ̀ лꙋка́выѧ стра́сти , и҆ разрѣша́ѧ тмꙋ̀ грѣхо́внꙋю . и҆ просвѣща́ѧ бжⷭ҇твеными свѣтлостьмѝ и҆сцѣле́нїи , пою́щихъ тѧ . Стоѧ́нїе на столпѣ̀ сотворѝ , лѣ́та мꙋ́дре пѧтьдесѧ́тъ к̾ тре́мъ . ꙗ҆́кѡ страда́лецъ стражда̀ оу҆се́рднѡ зимо́ю и҆ мра́зомъ и҆ зно́емъ ѻ҆́ч҃е , неѡ҆сла́бнѡ ѡ҆держи́мь . Ст҃а́ѧ ти па́мѧть , дх҃омъ ст҃ы́мъ на́съ ѡ҆сщ҃а́етъ мꙋ́дре . сїю̀ сщ҃е́ннѡ соверша́ющихъ , и҆ вѣ́рою тѧ̀ пою́щихъ ѻ҆́ч҃е в̾ не́й , ꙗ҆́кѡ застꙋ́пника , и҆ пред̾ста́телѧ дш҃а́мъ на́шимъ .= боⷢ҇ . П=росвѣще́нїе мѝ да́рꙋй , во тмѣ̀ сꙋ́щꙋ страсте́й , ѡ҆каѧ́нномꙋ и҆ грѣ́шномꙋ и҆ и҆зба́ви мѧ лꙋка́выхъ дѣ́лъ , и҆ пла́мене пред̾лежа́щагѡ мѝ , пречⷭ҇таѧ влⷣчце , пред̾ста́тельнице пою́щимъ тѧ .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . До́сто́йнѡ є҆́сть .

свѣти́ленъ . По́двиги па́че чл҃ка про́йде ѻ҆́ч҃е прпⷣбне хрⷭ҇то́вою си́лою . пѧтьдесѧ́тъ бо к̾ тре́мъ лѣ́томъ на столпѣ̀ стоѧ̀ мꙋ́дре а҆лѵ́мпїе , всю́дꙋ стражда̀ . и҆ ны́нѣ коне́чное бл҃же́нне жела́нїе всѣ́хъ ѡ҆брѣ́те . сла́ва , и҆ ны́нѣ , боⷢ҇ . Ты́ ми пред̾ста́тельница чⷭ҇таѧ , и҆ тве́рдое прибѣ́жище . ты́ ми застꙋ́пница и҆ покро́въ . и҆ к̾ тебѣ̀ припа́дающи зовꙋ̀ , болѣ́зней мои́хъ и҆зба́ви мѧ , ꙗ҆́кѡ всѣ́хъ преи҆мꙋ́щи . и҆ ѻ҆гнѧ́ мѧ и҆схитѝ вѣ́чнꙋющагѡ дв҃о , натѧ̀ оу҆пова́ющагѡ .

Слꙋ́жба ѡ҆сщ҃е́нїю цр҃кве ст҃а́гѡ великомч҃нка геѡ́ргїѧ , и҆́же в̾ кі́евѣ пред̾ враты̀ ст҃ы́ѧ соѳі́и . =Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и возва́хъ , стⷯры , на и҃ . гла́съ , д҃ . поⷣ . ꙗ҆́=кѡ до́блѧ . Страда́лецъ ди́вныи во́инъ хра́брыи непобѣди́мъ , и҆ свѣти́льникъ всеми́рныи . по́двиги страда́нїи твои́хъ всѧ̀ просвѣща́ѧ ми́рꙋ концы̀ , ѿгонѧ́ѧ мра́къ бѣсо́вскїи лю́тыи , геѡ́ргїе страстоте́рпче оу҆добре́нїе мч҃нкѡмъ , и҆ сограждани́нъ нбⷭ҇нымъ во́инствомъ . Пресловꙋ́щїи в̾ мꙋ́жествѣ , красе́нъ в̾ во́зрастѣ бы́въ , въ словесѣ́хъ и҆ дѣ́лѣхъ , ѿ всѣ́хъ преꙋдивлѧ́емь . хра́борски ѿлꙋчи́сѧ к̾ подвиго́мъ мꙋче́нїѧ за хрⷭ҇та̀ . небоѧ́зненѡ на врагѝ воз̾дви́глъ є҆сѝ побѣ́ды , вели́кими ти страда́нїи . сегѡ̀ ра́ди тѧ геѡ́ргїе во хвале́нїи чте́мъ ра́достнѡ . досточꙋ́дне красота̀ мч҃нкѡмъ и҆ похвала̀ . На высотꙋ̀ нбⷭ҇нꙋю ра́дꙋѧсѧ взы́де . в̾ прекра́снꙋю ѻ҆де́ждꙋ ѡ҆болче́нъ , ѿ свои́хъ страда́льческихъ крове́й ѡ҆багре́нꙋ , цр҃ю всѣ́хъ пред̾ста́въ , живонача́льною десни́цею вѣнча́емь . тѣ́мже дне́сь геѡ́ргїе великострада́льче , твою̀ па́мѧть свѣтоза́рнꙋю соверша́юще , и҆спросѝ просвѣще́нїе и҆ спасе́нїе дш҃а́мъ на́шимъ .

сла́ва . гла́съ , ѕ҃ . Дне́сь прїиди́те празднолю́бнїи собо́ри , страстоте́рпца честно́е торжество̀ свѣ́тлѡ пра́зднꙋемъ . и҆́бо неви́димаго врага̀ низ̾ложѝ , зако́ннѡ по хрⷭ҇тѣ̀ пострада́въ , и҆ досто́йнѡ прїѧ̀ побѣ́ды ѿ сп҃са вѣне́цъ . и҆ нн҃ѣ на́ нб҃сѣхъ со а҆́нг҃лы ра́дꙋѧсѧ , трⷪ҇цѣ свѣ́тлѡ пред̾стоѧ̀ . тѣ́мже и҆ мы̀ пѣ́сньми хвале́нїѧ воспое́мъ ра́дꙋисѧ тве́рдыи страда́льче непобѣди́мыи . ра́дꙋисѧ хра́брыи ѻ҆рꙋ́жниче хрⷭ҇то́въ . ра́дꙋисѧ многобо́жїѧ льстѝ потреби́телю , и҆ и҆́стиннѣй вѣ́рѣ свѣ́тлыи побо́рниче . но ѽ стрⷭ҇тоте́рпцемъ оу҆краше́нїе геѡ́ргїе , моли́сѧ гдⷭ҇ви , и҆зба́витисѧ на́мъ ви́димыхъ и҆ неви́димыхъ вра́гъ , и҆ спасти́сѧ дш҃а́мъ на́шимъ . и҆ ны́нѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невоспѣва́етъ твоегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а возсїѧ́въ сн҃ъ є҆диноро́дныи , то́йже ѿ тебѐ чи́стыѧ про́йде , несказа́ннѡ вопло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двою̀ лицꙋ̀ раздѣлѧ́емъ . но во двою̀ є҆стествꙋ̀ несмѣ́сно познава́емъ . тогѡ̀ молѝ чⷭ҇таѧ и҆ всебл҃же́ннаѧ , поми́ловатисѧ дш҃а́мъ на́шимъ . вы́ходъ . проки́менъ , дню̀ .

Ѿ проро́чества и҆са́ина , чте́нїе .

Та́кѡ глаго́летъ гдⷭ҇ь , всѝ ꙗ҆зы́цы собра́шасѧ вкꙋ́пѣ , и҆ соберꙋ́тсѧ кнѧ́зи ѿ ни́хъ . и҆ кто̀ возвѣсти́тъ сїѧ̀ в̾ ни́хъ ; и҆ ꙗ҆́коже и҆з̾ нача́ла кто̀ слы́шана сотвори́тъ ва́мъ ; да приведꙋ́тъ свидѣ́тели своѧ̀ , и҆ ѡ҆правдѧ́тсѧ , и҆ да оу҆слы́шатъ , и҆ да рекꙋ́тъ и҆́стинꙋ . бꙋ́дете ми свидѣ́тели , и҆ а҆́зъ свидѣ́тель , гл҃етъ гдⷭ҇ь бг҃ъ , и҆ ѻ҆́трокъ , є҆го́же и҆збра́хъ , да позна́ете и҆ вѣ́рꙋете ми , и҆ разꙋмѣ́ете ꙗ҆́кѡ а҆́зъ є҆́смь . и҆ пре́жде менѐ не бы́сть и҆́нъ бг҃ъ , и҆ по мнѣ̀ небꙋ́детъ . а҆́зъ є҆́смь бг҃ъ , и҆ нѣ́сть ра́звѣ менѐ спаса́ѧи . а҆́зъ возвѣсти́хъ и҆ спасо́хъ , и҆ оу҆ничижи́хъ , и҆ небѣ̀ в̾ва́съ ѿчꙋжде́нїѧ . вы̀ мнѣ̀ свидѣ́тели , и҆ а҆́зъ свидѣ́тель гл҃етъ гдⷭ҇ь бг҃ъ . и҆ є҆щѐ ѿ нача́ла а҆́зъ є҆́смь , и҆ нѣ́сть и҆́же ѿ рꙋкꙋ̀ мое́ю и҆збавлѧ́ѧи . сотворю̀ , и҆ кто̀ ѿврати́тъ то̀ ; си́це гл҃етъ гдⷭ҇ь бг҃ъ , и҆збавлѧ́ѧи ва́съ ст҃ы́и і҆и҃левъ .

Ѿ премꙋ́дрости соло́мони , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ не многолѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрость человѣ́кѡмъ . и҆ во́зрастъ ста́рости , житїѐ нескве́рно . бл҃гоꙋго́денъ бг҃ови бы́въ , воз̾лю́бленъ бы́сть . и҆ живы́и посредѣ̀ грѣ́шникъ , преста́вленъ бы́сть . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хоти , премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та мно́га , оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни положи́ша в̾ помышле́нїи такова́гѡ , ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Н=а стихо́внѣ , стихѣ́ры . гла́съ , и҃ . поⷣ . ѽ =пресла́вное чꙋ́до . За всѣ́хъ живота̀ стра́жеши ,꙳ крове́й твои́хъ и҆злива́емыхъ .꙳ страстоте́рпче геѡ́ргїе .꙳ и҆́же кро́вь свою̀ тебѐ ра́ди и҆злїѧ́вшемꙋ .꙳ приведе́сѧ хрⷭ҇тꙋ̀ бл҃же́нне .꙳ тѣ́мъ ѻ҆бѣ́щника свое́й сла́вѣ сотвори́ тѧ ,꙳ и҆ црⷭ҇тва тогѡ̀ соприча́стника ,꙳ ꙗ҆́кѡ мꙋ́жествовавша крѣ́пкѡ на льсти́ваго ,꙳ и҆ сегѡ̀ оу҆хищре́нїѧ до конца̀ низ̾ложи́вшаго .

сти́хъ : пра́ведникъ ꙗ҆́кѡ фи́никъ процвѣте́тъ ,꙳ и҆ ꙗ҆́кѡ ке́дръ и҆́же въ лива́нѣ оу҆мно́житсѧ . Бл҃гоче́стїѧ сто́лпъ бы́сть ,꙳ ѡ҆снова́нъ тве́рдѡ на ка́мени вѣ́ры и҆скꙋше́нїи вѣ́тры непоколе́блемь ,꙳ мꙋче́нїи мно́гихъ бл҃же́нне .꙳ съ лю́тою ꙗ҆́ростїю вразѝ тебѣ̀ прирази́шасѧ ,꙳ творѧ́щесѧ низ̾ложи́ти .꙳ и҆ не воз̾мого́ша крѣ́пости твоеѧ̀ ,꙳ но посра́млени падо́ша ,꙳ побѣди́тельнымъ бо ѿ хрⷭ҇та̀ вѣнце́мъ ,꙳ оу҆краси́тисѧ воз̾желѣ́лъ є҆сѝ .

сти́хъ : насажде́нъ въ домꙋ̀ гдⷭ҇ни ,꙳ во дво́рѣхъ до́мꙋ бг҃а на́шегѡ процвѣтꙋ́тъ . Вопло́щшемꙋсѧ хрⷭ҇тꙋ̀ бг҃ꙋ на́шемꙋ ,꙳ и҆ стра́стїю крⷭ҇тною ,꙳ низ̾ложи́вшемꙋ ѿстꙋ́пника .꙳ во́льнымъ тогѡ̀ страсте́мъ ,꙳ стрⷭ҇тоте́рпче геѡ́ргїе поревнова́въ .꙳ и҆ ра́нами протѧза́емь .꙳ хва́лѧщагосѧ неви́димаго врага̀ ,꙳ с̾ пло́тїю мч҃нче побѣди́въ .꙳ и҆ на землѝ низ̾ложи́лъ є҆сѝ .

сла́ва . гла́съ , д҃ . Прїиди́те вѣ́рныхъ собо́ри . прїиди́те пра́здникъ соста́вимъ . и҆́бо пресвѣ́тлаѧ па́мѧть , дне́сь ꙗ҆ви́сѧ стрⷭ҇тоте́рпца геѡ́ргїѧ . на́ша просвѣща́етъ неви́димѡ срⷣца̀ , добродѣ́тельми блиста́юща . тѣ́мже є҆диномꙋ́дренѡ воспѣва́юще рце́мъ . ра́дꙋисѧ во́ине вели́кагѡ цр҃ѧ хрⷭ҇та̀ . ра́дꙋисѧ пресвѣ́тлаѧ похвало̀ вѣ́рѣ . ра́дꙋисѧ всесвѣ́тле и҆ пребога́те . ѡ҆ на́съ пребл҃же́нне , всѣ́хъ влⷣкꙋ хрⷭ҇та̀ бг҃а молѝ , сохране́нымъ бы́ти ѿ и҆скꙋше́нїй лꙋка́вагѡ . и҆ спастѝ дш҃а на́ша . и҆ ны́нѣ , боⷢ҇ . Пода́ждь оу҆тѣше́нїе , свои́мъ рабо́мъ всенепоро́чнаѧ , оу҆толѧ́ющи лю́таѧ на ны̀ ѡ҆б̾стоѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снова́нїе и҆́мамы , и҆ твоѐ застꙋпле́нїе стѧжа́хомъ , да непостыди́мсѧ влⷣчце , тебѐ призыва́юще . потщи́сѧ на мл҃твꙋ тебѣ̀ вопїю́щихъ , ра́дꙋисѧ влⷣчце всѣ́мъ помо́щнице , ра́досте и҆ покро́ве дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Дне́сь бл҃жа́тъ тѧ̀ мирсті́и концы̀ , бжⷭ҇твеныхъ чꙋде́съ и҆спо́лншесѧ , и҆ землѧ̀ ра́дꙋетсѧ напи́вшисѧ кро́ве твоеѧ̀ . и҆ хрⷭ҇тои҆мени́тїи лю́дїе гра́да кі́ева , ѡ҆сщ҃е́нїемъ бжⷭ҇твенагѡ хра́ма твоегѡ̀ , ра́достїю воз̾весели́шасѧ стрⷭ҇тоте́рпче геѡ́ргїе . дѣ́ланїемъ болѣ́зней твои́хъ , сосꙋ́дъ и҆збра́нъ бы́сть ст҃о́мꙋ дх҃ꙋ , оу҆го́дниче хрⷭ҇то́въ . є҆го́же молѝ с̾ вѣ́рою ѡ҆ приходѧ́щихъ во ст҃ы́и тво́й хра́мъ , и҆ просѧ́щихъ ѡ҆чище́нїѧ грѣхо́въ . и҆ оу҆мири́ти ми́ръ , и҆ спастѝ дш҃а на́ша . сла́ва , и҆ ны́нѣ , боⷢ҇ . И҆́же ѿ́ вѣка оу҆тае́нное , и҆ а҆́нг҃лѡмъ несвѣ́домое та́иньство , тобо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи воплоща́емъ . и҆ крⷭ҇тъ во́лею на́съ ра́ди воспрїе́мъ , и҆́мъ же воскр҃сѝ первозда́ннаго , и҆ спасѐ ѿ сме́рти дш҃а на́ша .

На оу҆́трени , на бг҃ъ гдⷭ҇ь , тропа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , д҃ . Страстоте́рпца дне́сь геѡ́ргїѧ , бл҃гоче́стнѡ сотворѧ́емъ пра́зднество ѡ҆сщ҃е́нїе цр҃кве . ꙗ҆́кѡ непреста́ннѡ мо́литсѧ гдⷭ҇ви всѣ́мъ да́ти ми́ръ , и҆ спасе́нїе дш҃а́мъ на́шимъ . =два́жды . сла́ва , и҆ ны́нѣ , боⷢ҇ . Те́плое застꙋпле́нїе , сꙋ́щимъ въ бѣда́хъ , на́шꙋ помо́щницꙋ . и҆ к̾ бг҃ꙋ премѣне́нїе , є҆ѧ́же ра́ди тлѧ̀ и҆зба́вихомсѧ бцⷣꙋ вѣ́рнїи оу҆бл҃жа́емъ .

По в҃ , стихоло́гїи , сѣда́ленъ . гла́съ , а҃ . Земно́е во́инство и҆ че́сть ѿри́нꙋ ꙗ҆́кѡ ско́рѡ ги́блющꙋю . на́ небесѣхъ со а҆́нг҃льскими вѡ́и бы́ти воз̾желѣ́въ , и҆ сла́вы при́снѡ вѣ́чнѡ пребыва́ющїѧ . тѣ́мже мно́ги мꙋ́ки претерпѣ̀ и҆ сме́рть прїѧ́тъ . сегѡ̀ ра́ди дне́сь всест҃ꙋ́ю ти па́мѧть пра́зднꙋюще , хрⷭ҇то́ви прино́симъ хвалꙋ̀ требл҃же́нне геѡ́ргїе . двⷤа . сла́ва , и҆ ны́нѣ , боⷢ҇ . Мт҃рь тѧ̀ бж҃їю мо́лимъ всѝ , и҆ дв҃ꙋ вои́стинꙋ . в̾ щедро́ты твоѧ̀ вопїе́мъ , любо́вїю прибѣга́юще въ твою̀ бл҃гость . тѧ́ бо и҆́мамы грѣ́шнїи застꙋ́пницꙋ . тебѐ стѧжа́хомъ в̾ напа́стехъ спасе́нїе , є҆ди́нꙋ пречи́стꙋю .

По полїєлеѡ́сѣ , сѣда́ленъ . гла́съ , и҃ . Ꙗ҆́кѡ лꙋчѝ блиста́нїи чꙋде́съ , всѧ̀ просвѣща́ѧ ми́рꙋ концы̀ , ꙗ҆́кѡ ѕвѣзда̀ пресвѣ́тлаѧ . и҆ краснѡ̀ бл҃гоꙋха́еши , ꙗ҆́кѡ бжⷭ҇твеныи ра́й прⷭ҇нѡ дш҃а на́ша весели́ши , и҆ ѿго́ниши недꙋ́ги . тѣ́мже тѧ̀ бл҃же́нне по́ долгꙋ пое́мъ , и҆ любо́вїю чте́мъ честнꙋ́ю па́мѧть твою̀ , великомч҃нче геѡ́ргїе . молѝ хрⷭ҇та̀ бг҃а согрѣше́нїемъ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . два́жды . сла́ва , и҆ ны́нѣ , боⷢ҇ . Премꙋ́дрость во́ чревѣ заче́ньши неѡ҆па́льнѡ мт҃и бж҃їѧ , ми́рови родила̀ є҆сѝ , ми́ра преи҆мꙋ́щаго . и҆ сосцы̀ дои́ла є҆сѝ , всѧ́ческаѧ пита́ющагѡ . тѣ́мже молю́сѧ пречи́стаѧ дв҃о , и҆ вѣ́рнѡ вопїю́ ти , є҆гда̀ хощꙋ̀ пред̾ста́ти пред̾ лице́мъ созда́телѧ моегѡ̀ , тогѡ̀ молѝ грѣхо́въ ѡ҆ставле́нїе пода́ти . тебе́ бо и҆мѣ́ю наде́ждꙋ ра́бъ тво́й .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . пра́ведникъ ꙗ҆́кѡ фи́никъ процвѣте́тъ , и҆ ꙗ҆́кѡ кѣ́дръ и҆́же в̾ лива́нѣ оу҆мно́житсѧ .= сти́хъ . насажде́ни в̾ домꙋ̀ гдⷭ҇ни , во дво́рѣхъ бг҃а на́шегѡ процвѣтꙋ́тъ . всѧ́ко дыха́нїе . =є҆ѵⷢ҇а́лїе , ѿ =лꙋкѝ . заⷱ҇ , ѯ҃г . ѱ=ало́мъ , н҃ .

сла́ва . моли́твъ ра́ди страстоте́рпча , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Дне́сь вселе́ннаѧ всѧ̀ , страстоте́рпца просвѣща́етсѧ зарѧ́ми . и҆ хрⷭ҇то́ва цр҃кви цвѣ́ты оу҆краша́ема , геѡ́ргїе вопїе́тъ ти оу҆го́дниче хрⷭ҇то́въ , и҆ застꙋ́пниче те́плыи , непреста́й молѧ́сѧ ѡ҆ рабѣ́хъ свои́хъ .

Кано́нъ бцⷣѣ , на́ ѕ҃ . і҆рмо́съ , по вⷤ . и҆ ст҃о́мꙋ , на́ и҃ . кано́нъ , гла́съ , д҃ . пѣ́снь , а҃ . і҆рмо́съ . Воспою́ ти гдⷭ҇и бж҃е мо́й , ꙗ҆́кѡ и҆зведѐ лю́ди и҆з̾ рабо́ты є҆ги́петскїѧ . покры́ же ѻ҆рꙋ́жїе фараѡ́не и҆҆ си́лꙋ .

запѣ́в̾ : Ст҃ы́и сла́вныи великомч҃нче геѡ́ргїе , молѝ бг҃а ѡ҆ на́съ . Воспѣ́ти твоѧ̀ страда́нїѧ ра́зꙋмъ да́ждь . сла́внѡ вѣнцено́сче страстоте́рпче геѡ́ргїе , оу҆ цр҃ѧ всѣ́хъ прⷭ҇то́лꙋ пред̾стоѧ̀ свѣ́тлѣ , на́съ сохранѧ́й пою́щихъ тѧ̀ . Ѡ҆ бл҃гоче́стїи крѣ́пцѣ подвиза́сѧ , великострада́льче геѡ́ргїе , вѣнце́мъ сла́вы досто́йнѡ почте́сѧ , десни́цею вседержи́телевою . Крѣ́пость да́въ ти хрⷭ҇то́съ на по́двиги мно́ги . ви́ды мꙋ́къ до́блественѣ , терпѣли́внѡ подъѧ́тъ . и҆ побѣди́лъ є҆сѝ без̾бо́жныхъ шата́нїѧ .= боⷢ҇ . Л=ѣ́ствица ꙗ҆ви́сѧ нбⷭ҇наѧ дв҃о , є҆ю́же сни́де к̾ на́мъ сло́во бж҃їе . тѧ̀ дре́вле прови́дѣ і҆а́кѡвъ пра́ѻ҆ц҃ъ тво́й .

пѣ́снь , г҃ . і҆рмо́съ . Лꙋ́къ си́льныхъ и҆знемо́же , а҆ не́мощнїи препоѧ́сашасѧ си́лою . сегѡ̀ ра́ди воз̾весели́сѧ , ѡ҆́ гдⷭ҇ѣ срⷣце моѐ . Плотны́и сою́зъ , и҆ сочета́нїе твои́хъ оу҆до́въ разрꙋша́шесѧ . но крѣ́пость соблюде́сѧ твоеѧ̀ дш҃и неразрꙋши́ма . Ꙗ҆́рости оу҆стремле́нїе , бл҃гомо́щнѡ претерпѣ́лъ є҆сѝ ѕѣлѡ̀ ѿ мꙋ́чащихъ тѧ̀ , страстоте́рпче геѡ́ргїе . терпѣ́нїе до́блественѡ крѣ́пкѡ показа́въ . Кто̀ возмо́жетъ твоѐ крѣ́пкое и҆ си́льное , и҆ по́мысла неꙋкло́ннꙋю мꙋ́дрость геѡ́ргїе , похвала́ми почти́ти по достоѧ́нїю бл҃же́нне .= боⷢ҇ . О=у҆ста́вила є҆сѝ тлю̀ сме́рти , и҆́же в̾ соста́вѣ пло́тїю живота̀ ро́ждьши пречⷭ҇таѧ . чл҃кѡмъ ꙗ҆́вльшасѧ и҆́з̾ чрева твоегѡ̀ прест҃а́ѧ .

сѣда́ленъ . гла́съ , д҃ . До́блемꙋ страда́льцꙋ , и҆ во́инꙋ крѣ́пкꙋ всецр҃ю́ющагѡ хрⷭ҇та̀ , похвале́нїѧ прино́симъ . ра́дꙋисѧ мч҃нкѡмъ оу҆краше́нїе и҆ лѣ́пото . ра́дꙋисѧ пресвѣ́тлаѧ цр҃кви ѕвѣздо̀ . застꙋ́пниче и҆ спаси́телю къ тебѣ̀ прибѣга́ющимъ , великомч҃нче сла́вныи геѡ́ргїе . тѧ̀ пою́щїѧ спаса́й ѿ всѣ́хъ навѣ́тъ вра́жїихъ . и҆ мл҃твами ти ко́ гдⷭ҇ꙋ , црⷭ҇твїѧ є҆гѡ̀ сподо́би на́съ . двⷤа . сла́ва , и҆ ны́нѣ , боⷢ҇ . Дв҃о всенепоро́чнаѧ , пребога́таго бг҃а ро́ждьшаѧ . со стрⷭ҇тоте́рпцы тогѡ̀ молѝ непреста́ннѡ , ѡ҆ставле́нїе согрѣше́нїемъ , и҆ и҆справле́нїе житїю̀ , да́ти на́мъ пре́жде конца̀ . вѣ́рою и҆ любо́вїю пою́щимъ тѧ по́ долгꙋ , є҆ди́на препѣ́таѧ .

пѣ́снь , д҃ . і҆рмо́съ . Нб҃са̀ добродѣ́тель твоѧ̀ покры́ла є҆́сть , и҆ землѧ̀ и҆спо́лнисѧ сла́вы твоеѧ̀ хрⷭ҇тѐ . тѣ́мже вѣ́рнѡ вопїе́мъ , сла́ва си́лѣ твое́й гдⷭ҇и И҆́же ꙗ҆́ростїю бѣсо́вскою мꙋчи́теле ѡ҆держи́ми , тѧ̀ любо́вїю бж҃їею содержи́маго , неми́лостивнѡ ѕлодѣ́и оу҆ранѧ́хꙋ , стрⷭ҇тоте́рпче геѡ́ргїе . Ѻ҆гнѧ̀ си́льнѣйши и҆зволе́нїе стѧжа̀ , мꙋчи́телѧ несмы́сльство низ̾ложи́въ . и҆ посрамѝ зовы́и геѡ́ргїе , сла́ва си́лѣ твое́й гдⷭ҇и . По хрⷭ҇тѣ̀ да́же до сме́рти , дш҃е́ю терпѣли́внѡ всѧ́кимъ мꙋ́камъ , сопроти́вилсѧ є҆сѝ . велегла́снѡ вопїѧ́ше , сла́ва си́лѣ твое́й гдⷭ҇и . Ѕѣ́льнѣйшимъ и҆з̾воле́нїемъ бл҃же́нне ѡ҆держи́мь , пре́лесть геѡ́ргїе попра́лъ є҆сѝ , бл҃года́рнѡ вопїѧ̀ , сла́ва си́лѣ твое́й гдⷭ҇и .= боⷢ҇ . В=опло́щьсѧ ѿ дв҃ы беспло́тенъ сы́и , на́ землю къ чл҃кѡмъ прїи́де . тѣ́мъ вѣ́рою зове́мъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Созда́выи на́съ сꙋ́щїѧ лю́ди , кро́вїю твое́ю гдⷭ҇и , тво́й ми́ръ да́ждь на́мъ , во є҆ди́ной мы́сли сохранѧ́ѧ ста́до своѐ . Непобѣди́мою крⷭ҇та̀ си́лою оу҆крѣплѧ́емь , вели́кїи страда́льче геѡ́ргїе , воз̾мо́же мꙋчи́телево лю́тое побѣди́ти шата́нїе . Поста́ви срⷣце своѐ велеꙋ́мнѣ , на тве́рдѣмъ ка́мени вѣ́ры геѡ́ргїе нахожде́нїи и҆скꙋше́нїи мꙋ́къ , непобѣди́мъ пре́былъ є҆сѝ . Ꙗ҆́кѡ нбⷭ҇нагѡ цр҃ѧ во́инъ . со а҆́нг҃льскими вѡ́и томꙋ̀ пред̾стоѧ̀ , стрⷭ҇тоте́рпче геѡ́ргїе . тебѐ вѣ́рою призыва́ющїѧ , ѿ всѧ́кихъ и҆скꙋше́нїи и҆зба́ви .= боⷢ҇ . И҆=збавлѧ́ющи на́съ ꙗ҆ви́сѧ ѿ бѣ́дъ и҆ прегрѣше́нїй тлетво́рныхъ стрⷭ҇те́й , и҆ скорбе́й и҆ ѡ҆бстоѧ́нїи , пою́щимъ тѧ вѣ́рою бцⷣе прⷭ҇нѡ дв҃о .

пѣ́снь , ѕ҃ . і҆рмо́съ . Возопи́лъ проѡбразꙋ́ѧ погребе́нїе тридне́вное , пррⷪ҇къ і҆ѡ́на в̾ ки́тѣ бг҃ꙋ молѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Преди́венъ взо́ромъ , красе́нъ тѣ́ломъ , оу҆до́бренъ же дх҃омъ геѡ́ргїе ѿлꙋчи́лсѧ є҆сѝ к̾ боре́нїю ѕлоко́зненагѡ , и҆ сегѡ̀ раз̾рази́въ побѣ́дѣ вѣне́цъ прїи́мъ . Оу҆краша́ютсѧ до́брыхъ по́двигъ ѡ҆долѣ́нїе , страда́льческихъ зрѧ́ще натрижне́нїѧ . перворожде́ныхъ и҆з̾бра́нїе , и҆ свѣтоно́сное собо́рище . Нбⷭ҇ныхъ бл҃же́нство воспрїе́млѧ , ꙗ҆́же ѿ́ гдⷭ҇а оу҆гото́ваныхъ геѡ́ргїе страда́льче . и҆́хже ра́ди на землѝ под̾виза́сѧ да́же до́крове . и҆ побѣ́дныѧ по́чести прїи́мъ .= боⷢ҇ . Ꙗ҆́=кѡ бразда̀ чре́во твоѐ чи́стаѧ оу҆зрѣ́всѧ , пшени́цꙋ приносѧ́ще без̾сме́ртїѧ , всѣ́мъ вѣ́рнымъ дш҃а пита́юща , и҆ мч҃нкъ веселѧ́ща .

конда́къ . гла́съ , в҃ . Бл҃гоче́стїю вѣнцено́снаго мч҃нка , и҆́же на врагѝ побѣ́дꙋ взе́мшаго ѡ҆долѣ́нїе . соше́дшесѧ вѣ́рою во сщ҃е́нныи хра́мъ є҆гѡ̀ , похва́лимъ вели́кагѡ мч҃нка геѡ́ргїѧ , є҆го́же бл҃говолѝ бг҃ъ созда́тисѧ во́ и҆мѧ є҆гѡ̀ , є҆ди́нъ во ст҃ы́хъ почива́ѧи . и҆́косъ . Ꙗ҆́кѡ свѣти́льника незаходи́магѡ , ѕвѣзда̀ показа́сѧ непреле́стна , сл҃нца хрⷭ҇та̀ воз̾вѣща́ѧ зарѧ́ми твои́ми , страстоте́рпче геѡ́ргїе . созыва́еши ѿ первопресто́льнагѡ ма́тере градово́мъ , бг҃омъ спасе́нагѡ кі́ева , в̾ вели́кїи се́й во сщ҃е́нныи хра́мъ хрⷭ҇толюби́ваѧ мно́жества . ѡ҆благода́тельствовати ѡ҆бы́чнѣ , хотѧ́щимъ восхвали́ти пѣ́сньми , во́ гласѣ ра́дованїѧ и҆ и҆сповѣ́данїѧ , соста́вити пра́здникъ сщ҃е́ннагѡ хра́ма . є҆го́же бл҃говолѝ бг҃ъ созда́тисѧ во́ и҆мѧ є҆гѡ̀ . є҆ди́нъ во ст҃ы́хъ почива́ѧи .

пѣ́снь , з҃ . і҆рмо́съ . Ѻ҆те́ческїи бж҃е непосрамѝ на́съ , но да́рꙋй на́мъ со дерзнове́нїемъ вопи́ти ти , ѻ҆ц҃ъ на́шихъ бж҃е бл҃гослове́нъ є҆сѝ . Крѣпча́йшимъ ра́зꙋмомъ пла́мень льстѝ погасѝ , во и҆скꙋше́нїи непобѣди́мъ бы́сть геѡ́ргїе . вопїѧ̀ , ѻ҆ц҃ъ на́шихъ бж҃е бл҃гослове́нъ є҆сѝ . Ꙗ҆́кѡ мч҃нкъ и҆ вели́къ страда́лецъ , въ пресвѣ́тлыи бжⷭ҇твеныи черто́гъ вни́де , хрⷭ҇то́въ оу҆го́дниче . вопїѧ̀ , ѻ҆ц҃ъ на́шихъ бж҃е блгⷭ҇ве́нъ є҆сѝ . Ви́дѣти сподо́бисѧ геѡ́ргїе та́мѡ бл҃же́нства . и҆ наслажде́нїѧ вѣ́чныхъ ст҃ы́хъ свѣ́тлостей а҆пⷭ҇лъ и҆ прⷪ҇ркъ и҆ мч҃нкъ и҆ ст҃ль , и҆ всѣ́хъ пра́ведныхъ .= боⷢ҇ . Ꙗ҆=ви́сѧ всѣ́мъ чл҃кѡмъ чⷭ҇таѧ мт҃и бж҃їѧ , держа́ва ве́лїѧ и҆ покро́въ и҆ застꙋпле́нїе , тѧ̀ пою́щимъ всегда̀ , сщ҃е́нными пѣ́сньми .

пѣ́снь , и҃ . і҆рмо́съ . Всѧ̀ дѣ́ла бж҃їѧ и҆ всѧ̀ тва́рь бл҃гослови́те гдⷭ҇а . прпⷣбнїи и҆ смире́нїи срⷣцемъ по́йте лю́дїе , и҆ превозноси́те є҆гѡ̀ во́ вѣки . Низ̾ложи́въ всѧ̀ вра́жїѧ ѻ҆рꙋ́жїѧ , великомч҃нче геѡ́ргїе , и҆ попра́въ и҆́дольскꙋю ле́сть . зовы́и по́йте лю́дїе , и҆ превозноси́те є҆гѡ̀ во́ вѣки . Оу҆краше́нъ ѕѣлѡ̀ бл҃голѣ́пнѡ , хрⷭ҇то́ви пред̾стоѧ̀ страда́льче приснопа́мѧтне геѡ́ргїе . ѿ крове́й свои́хъ мч҃нческихъ ѡ҆червле́нꙋ багрѧни́цꙋ носѧ̀ . ве́селѡ поѧ̀ , лю́дїе превозноси́те є҆гѡ̀ во́ вѣки . По́чести тебѣ̀ хрⷭ҇то́съ пода́стъ геѡ́ргїе во страда́нїихъ твои́хъ , и҆сповѣ́давъ тогѡ̀ велегла́снѡ . свидѣ́тельствꙋѧ зовы́и , по́йте лю́дїе , и҆ превозноси́те є҆гѡ̀ во́ вѣки . Ны́нѣ пред̾стои́ши живонача́льнѣй свѣ́тꙋ трⷪ҇цѣ , бжⷭ҇твеными сїѧ́нїи геѡ́ргїе просвѣща́емь . помина́й на́съ вѣ́рою чтꙋ́щихъ тѧ , и҆ превозносѧ́щихъ хрⷭ҇та̀ во́ вѣки .= боⷢ҇ . З=аконода́вца породила̀ є҆сѝ хрⷭ҇та̀ . и҆́же зако́ннѡ страда́вшаго , вѣнча́вша стрⷭ҇тоте́рпца и҆ мч҃нка . є҆го́же молѝ зако́номъ грѣха̀ побѣжде́на мѧ ѻ҆трокови́це и҆сцѣли́ти .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Зако́нныхъ повелѣ́нїи побѣжда́етсѧ , по́двигъ твои́хъ геѡ́ргїе вели́чествомъ . є҆ди́нъ влⷣка хрⷭ҇то́съ просла́ви тѧ . є҆го́же молѝ ѡ҆ на́съ страстоте́рпче , любо́вїю пою́щихъ тѧ . Красе́нъ вои́стинꙋ дш҃е́ю и҆ тѣ́ломъ бы́сть ве́сь сла́вне геѡ́ргїе . ны́нѣ пред̾стои́ши цр҃ю цр҃е́мъ всѣ́хъ красотѣ̀ , при́снѡ прича́стїи соꙋдобрѧ́емь , всекра́сныхъ всече́стне наслажде́нїи . Да твою̀ цр҃ю хрⷭ҇тѐ любо́вь геѡ́ргїи под̾ража́въ , кро́вїю да́же до сме́рти , мечꙋ̀ ѻ҆́гневи же и҆ мꙋ́камъ , бжⷭ҇твеныи страда́лецъ сопроти́вльсѧ . и҆ є҆́же ѿ тебѐ чл҃колю́бче , без̾сме́ртїе прїи́мъ наслажда́етсѧ . Всегѡ̀ себѐ же́ртвꙋ принесѐ , и҆ тогѡ̀ црⷭ҇твїѧ наслѣ́дникъ ꙗ҆ви́сѧ и҆ прича́стникъ . и҆ прⷭ҇нѡ с̾ ни́ми ра́дꙋѧсѧ , ны́нѣ вѣ́чнѡ црⷭ҇твꙋеши стрⷭ҇тоте́рпче геѡ́ргїе . Вѣ́рою страда́нїѧ твоѧ̀ геѡ́ргїе чтꙋ́щихъ , ѡ҆ на́съ хрⷭ҇та̀ молѝ страстоте́рпче прилѣ́жнѡ , спасти́сѧ на́мъ бѣ́дъ треволне́нїѧ и҆ всѣ́хъ страсте́й . и҆ до́брѣ прейтѝ житїѐ , и҆ бжⷭ҇твеныхъ бл҃же́нство оу҆лꙋчи́ти .= боⷢ҇ . Ѡ҆=бле́ксѧ и҆з̾ тебѐ цр҃ь въ тѣле́снꙋю багрѧни́цꙋ , про́йде ве́сь красе́нъ и҆з̾ оу҆тро́бы твоеѧ̀ , и҆ всѧ̀ врагѝ побѣдѝ . и҆ побѣ́дꙋ страда́льцемъ подадѐ , є҆ди́на прⷭ҇нѡ дв҃о мт҃и .

свѣти́ленъ . Ꙗ҆́кѡ свѣтоза́рное сл҃нце , чꙋде́сными лꙋча́ми ѡ҆сїѧ́еши всю̀ тва́рь , пресла́вне геѡ́ргїе страстоте́рпче . твою̀ пра́з̾днꙋюще па́мѧть , про́симъ ѿ всѧ́кихъ бѣ́дъ и҆зба́витисѧ . двⷤа . сла́ва , и҆ ны́нѣ , боⷢ҇ . Млⷭ҇ти и҆ щедро́ты твоѧ̀ бж҃е , на на́съ люде́й ра́бъ твои́хъ низ̾послѝ , мл҃твами пречⷭ҇тыѧ твоеѧ̀ мт҃ре , и҆ сла́внагѡ страстоте́рпца твоегѡ̀ геѡ́ргїѧ . и҆ всѣ́мъ да́рꙋй вели́кꙋю твою̀ млⷭ҇ть .

На хвали́тѣхъ , стⷯры , на д҃ . гла́съ , и҃ . поⷣ . ѽ =пресла́вное чꙋ́до . Пресла́вныи страстоте́рпче ,꙳ велемꙋ́дрене геѡ́ргїе .꙳ хрⷭ҇то́вымъ ѻ҆рꙋ́жїемъ ,꙳ себѐ воѡ҆рꙋжи́въ мꙋ́жески .꙳ на сꙋди́щи дерзнове́ннѡ гдⷭ҇а всѣ́хъ бг҃а и҆сповѣ́да ,꙳ и҆ врага̀ побѣди́въ оу҆мертвѝ .꙳ тѣ́мже побѣ́днымъ вѣнце́мъ ,꙳ твою̀ главꙋ̀ вѣнча̀ нбⷭ҇ныи цр҃ь ,꙳ великодарови́тыи . =два́жды . Си́лою бжⷭ҇твеною оу҆крѣплѧ́емь геѡ́ргїе ,꙳ вои́стинꙋ непобѣди́мою ,꙳ го́рдаго врага̀ посрамѝ .꙳ гдⷭ҇а бг҃а пред̾ мꙋчи́тели проповѣ́да творца̀ всѣ́хъ ,꙳ за него́же живота̀ непощади́лъ є҆сѝ ,꙳ и҆ кро́вь свою̀ и҆з̾лїѧ̀ сла́вне .꙳ тѣ́мже нбⷭ҇ныи а҆́нг҃лѡмъ цр҃ь ,꙳ тѧ̀ съ црⷭ҇твовати кꙋ́пнѡ съ собо́ю ,꙳ вѣ́чнѡ сподо́билъ є҆́сть . Преꙋдивле́нъ въ во́зрастѣ мꙋ́жества сы́и ,꙳ тѣлесѐ красото́ю оу҆добре́нъ .꙳ и҆ дш҃е́ю бжⷭ҇твеною бл҃года́тїю оу҆краше́нъ ,꙳ и҆ въ побѣ́дахъ пресловꙋ́щь .꙳ въ словесѣ́хъ и҆ въ премꙋ́дрости преди́венъ бы́въ .꙳ ѡ҆ тлѣ́нныхъ че́стехъ земны́хъ нерадѝ .꙳ нбⷭ҇ныхъ по́чести воз̾желѣ̀ .꙳ и҆́хже полꙋчѝ цр҃ѧ црⷭ҇твꙋющагѡ ,꙳ на́съ бл҃же́нне помина́й . сла́ва . гла́съ , ѕ҃ . По хрⷭ҇тѣ̀ зако́ннѡ пострада́въ геѡ́ргїе . и҆ съ земны́мъ враже́бнымъ мꙋчи́телемъ , неви́димаго низ̾ложѝ врага̀ , досто́йнѡ прїѧ́тъ ѿ вѣнцеда́вца сп҃са вѣне́цъ . и҆ ны́нѣ на́ нб҃сѣхъ со а҆́нг҃льскими чи́ны вы́шнѧгѡ свѣтоли́тїѧ наслажда́ѧсѧ . и҆ трїѷпоста́сномꙋ и҆ пе́рвомꙋ свѣ́тꙋ причаща́ѧсѧ ѡ҆би́льнѡ . тѣ́мже и҆ мы̀ бл҃говѣ́рнїи лю́дїе , и҆ любомꙋ́ченичными пѣ́сньми воспое́мъ ти . ра́дꙋисѧ а҆дама́нте непобѣди́мыи дш҃е́ю , и҆ крѣ́пкїи ѻ҆рꙋ́жниче хрⷭ҇то́въ . ра́дꙋисѧ и҆́же льстѝ и҆́дольстѣй потреби́телю , и҆ и҆́стинѣ побо́рниче свѣ́тлыи . но моли́сѧ гдⷭ҇ви , и҆ на́мъ житїе́мъ бг҃олюби́вымъ с̾ тобо́ю , полꙋчи́ти стоѧ́нїе при прⷭ҇то́лѣ вели́чествїѧ є҆гѡ̀ . и҆ ны́нѣ , боⷢ҇ . Бцⷣе ты̀ є҆сѝ лоза̀ и҆́стиннаѧ , возрасти́вшаѧ на́мъ пло́дъ живо́тныи , тебѣ̀ мо́лимсѧ , моли́сѧ влⷣчце со страстоте́рпцемъ , поми́ловатисѧ дш҃а́мъ на́шимъ . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , пѣ́снь г҃ , и҆ ѕ҃ , на и҃ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃о́мꙋ . сла́ва , конда́къ ст҃о́мꙋ . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃о́мꙋ . конда́къ хра́мꙋ . сла́ва , ст҃о́мꙋ . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . воз̾весели́тсѧ пра́ведникъ ѡ҆́ гдⷭ҇ѣ , и҆ оу҆пова́етъ на́нь . сти́хъ . оу҆слы́ши бж҃е мл҃твꙋ мою̀ , внегда̀ моли́тимисѧ к̾ тебѣ̀ . а҆пⷭ҇лъ , къ тимоѳе́ю . заⷱ҇ , сч҃в .= а҆ллилꙋ́їѧ . пра́ведникъ ꙗ҆́кѡ фи́никъ процвѣте́тъ , и҆ ꙗ҆́кѡ ке́дръ и҆́же в̾ лива́нѣ оу҆мно́житсѧ . =є҆ѵⷢ҇а́лїе , ѿ =і҆ѡа́нна . зача́ло , н҃в . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>