27 ноября: св. влмч. Иакова Перского и прп. Паладия и свт. Иакова Ростовского; Знамение Богородицы в Новгороде

МЦⷭ҇А ТОГО́ЖЕ ВЪ КЗ҃ ДН҃Ь

ст҃а́гѡ и҆ многострада́льнаго великомч҃нка і҆а́кѡва пе́рскагѡ . =и҆ прпⷣбнагѡ ѻ҆ц҃а на́шегѡ пала́дїѧ . И҆ и҆́же во ст҃ы́хъ ѻ҆ц҃а на́шегѡ і҆а́кѡва є҆пкⷭ҇па , росто́вскагѡ чꙋдотво́рца . слꙋ́жба є҆мꙋ̀ пи́сана по слꙋ́жбѣ зна́менїѧ прест҃ы́ѧ бцⷣы .=

Въ то́йже дн҃ь пра́зднꙋемъ , по́ бз҃ѣ зна́менїе бы́вшее пречⷭ҇тою бцⷣею в̾ вели́комъ новѣ̀ гра́дѣ . слꙋ́жба є҆ѧ̀ пи́сана по се́й слꙋ́жбѣ .

Ве́черъ , на гдⷭ҇и возва́хъ . стихѣ́ры , мч҃нкꙋ і҆а́кѡвꙋ , на́ ѕ҃ . гла́съ , в҃ . поⷣ . є҆гда̀ ѿ́ древа . Ми́ра кра́снаѧ ѡ҆ста́вль , ро́да свѣ́тлость , бога́тство и҆ красотꙋ̀ . все́ же чꙋ́вство ѿве́ргъ . и҆ тѣ́ломъ раздроблѧ́емь , страстны́мъ подража́нїемъ , ра́дꙋѧсѧ послѣ́довалъ є҆сѝ хрⷭ҇то́ви і҆а́кѡве . ꙗ҆́кѡ оу҆́бѡ прїо́бщникъ страсте́мъ , сла́вѣ бы́сть вои́стинꙋ , и҆ црⷭ҇твїю нн҃ѣ соприча́стникъ . Оу҆́ды пожина́емы плотны́ѧ , и҆ нестерпи́мыѧ болѣ́зни и҆ ра́ны терпѧ̀ , мч҃нче хрⷭ҇то́въ достосла́вне і҆а́кѡве . и҆ мꙋчи́телемъ сꙋровство̀ попра́въ мꙋ́жественѡ , побѣ́дѣ многоцѣ́нныи вѣне́цъ прїѧ́тъ . и҆́мже ны́нѣ оу҆краша́емь бл҃же́нне , бжⷭ҇твеномꙋ влⷣки своегѡ̀ прⷭ҇то́лꙋ , съ пострада́вшими с̾ тобо́ю пред̾стои́ши . И҆мѣ́ѧ дерзнове́нїе ко хрⷭ҇тꙋ̀ , ѡ҆ всѣ́хъ вѣ́рою творѧ́щихъ честны́и ти пра́здникъ , мч҃нче приснопа́мѧтне , те́плѣ пред̾стои́ши , ѿ бѣ́дъ и҆збавлѧ́ѧ , и҆ страсте́й свобожда́ѧ . всѧ́кагѡ ѡ҆бстоѧ́нїѧ лю́тагѡ премѣнѧ́ѧ . подава́ѧ дш҃а́мъ спасе́нїе , бжⷭ҇твеными ти мл҃твами . ꙗ҆́кѡ да свѣ́тлыѧ тѝ по́двиги просла́вимъ .

сла́ва . гла́съ , є҃ . Оу҆диви́лъ є҆сѝ ѽ і҆а́кѡве , въ мꙋ́кахъ всѣ́хъ долготерпѣ́въ . пе́рстомъ бо и҆ рꙋка́ма , и҆ мы́шцамъ ѿсѣ́ченомъ тѝ бы́вшимъ . подо́бнѣ и҆ нога́мъ и҆ лы́стомъ твои́мъ , да́же до бедрꙋ̀ претерпѣ́лъ є҆сѝ . про́чее молѧ́щꙋтисѧ , и҆ честнꙋ́ю главꙋ̀ твою̀ ѿсѣко́ша . мч҃нче многострада́льне , ѡ҆ на́съ непреста́й хрⷭ҇то́ви молѧ́сѧ , поми́ловатисѧ дш҃а́мъ на́шимъ .

и҆ ны́нѣ , боⷢ҇ . и҆лѝ , крⷭ҇тобоⷢ҇ . А҆́гньца своегѡ̀ а҆́гница и҆ногда̀ зрѧ́щи къ заколе́нїю тща́щасѧ , оу҆се́рднѡ послѣ́доваше , си́це вопїю́щи є҆мꙋ̀ , гдѣ̀ и҆́деши ча́до моѐ сла́дкое хрⷭ҇тѐ ; чесѡ̀ ра́ди тече́нїе сѐ до́лго терпѧ̀ , тече́ши нелѣ́ностнѡ , і҆с҃е любе́знѣйшїи , без̾грѣ́шне многоми́лостиве гдⷭ҇и ; да́ждь ми сло́во рабѣ̀ твое́й , сн҃е мо́й вселюбе́зныи . непре́зри менѐ ще́дрыи молча̀ ; стра́ннѡ ро́ждьшꙋю тѧ , и҆́же даѧ̀ ми́рови ве́лїю ми́лость .

На стихо́внѣ , во ѻ҆кта́и . сла́ва . гла́съ , и҃ . Вѣ́рнѡ соше́дшесѧ дне́сь , любо́вїю празднолю́бцы , ви́дите бра́нь стра́ннꙋю и҆ размѣне́нꙋю , і҆а́кѡва и҆́же ѿ перси́ды , на́мъ ѡ҆блиста́вшꙋ в̾мѣ́стѡ ѕвѣзды̀ , ю҆́же волхво́мъ ꙗ҆́вльшейсѧ , и҆ ко и҆́стинномꙋ ра́зꙋмꙋ наста́вльшей . то́й бо до́блественыи , внегда̀ па́дати бра́нники ѿража́ше . и҆ внегда̀ соста́вомъ оу҆до́въ рѣ́занꙋ бы́ти , мꙋ́чащихъ не́мощны творѧ́ше . вы́шнимъ про́мысломъ оу҆крѣплѧ́емь вопїѧ̀ , а҆́ще и҆ оу҆́ды моѧ̀ чꙋ́вственыѧ сꙋ́ще сѣчетѐ , но и҆́мамъ хрⷭ҇та̀ разꙋ́мна ми всѧ̀ быва́юща . тѣ́мже прови́дѧ бꙋ́дꙋщꙋю жи́знь , пред̾лежа́щїѧ ра́ди всѣ́хъ сме́рти , ко ѻ҆́ной тща́щесѧ прейтѝ . в̾ не́йже водворѧ́емь , про́ситъ на́мъ ѿ вѣнцеда́телѧ бг҃а , ѡ҆чище́нїе и҆ просвѣще́нїе , и҆ ве́лїю ми́лость творѧ́щимъ па́мѧть є҆гѡ̀ .

=и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . ѽ =пресла́вное чꙋ́до . Что̀ ви́димое чꙋ́до ,꙳ є҆́же ѻ҆чи́ма мои́ма ,꙳ зри́тсѧ ѽ влⷣко ,꙳ содержа́и всю̀ тва́рь ,꙳ на́ древѣ распина́ешисѧ ,꙳ и҆ оу҆мерщвѧ́ешисѧ всѣ́мъ даѧ́и жи́знь ,꙳ бцⷣа пла́чꙋщи глаго́лаше ,꙳ є҆гда̀ оу҆зрѣ̀ на крⷭ҇тѣ̀ ви́сима ,꙳ и҆́же и҆з̾ неѧ̀ неи҆зрече́ннѡ восїѧ́вша бг҃а и҆ чл҃ка .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , мч҃нкꙋ . гла́съ , д҃ . Мꙋче́нїи стра́ннѡ оу҆жа́сными , и҆ до́блестїю терпѣ́нїѧ всѣ́хъ преꙋдиви́лъ є҆сѝ многострада́льче , над̾ кои́мждо соста́вомъ оу҆десѝ рѣ́занїѧ , бл҃года́рны мольбы̀ преди́внѣ и҆зречѐ гдⷭ҇ви . тѣ́мъ во страда́нїи свое́мъ вѣне́цъ прїе́мъ , к̾ прⷭ҇то́лꙋ взы́де нбⷭ҇наго цр҃ѧ хрⷭ҇та̀ бг҃а і҆а́кѡве . тогѡ̀ молѝ спастѝ дш҃а на́ша . сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

Слꙋ́жба ст҃а́гѡ пала́дїѧ , пое́тсѧ на па́вечерницѣ . кано́нъ , и҆҆мы́и краегране́сїе сицево̀ : твоѐ почита́ю всебл҃же́нне ѻ҆́ч҃е житїѐ . творе́нїе і҆ѡ́сифово . гла́съ , д҃ . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́в̾ : Прпⷣбне ѻ҆́ч҃е пала́дїе , молѝ бг҃а ѡ҆ на́съ . Бжⷭ҇твеными свѣтлостьмѝ ѡ҆зарѧ́емь прпⷣбне , ѻ҆́блакъ раз̾женѝ помышле́нїѧ моегѡ̀ . ꙗ҆́кѡ да оу҆зрю̀ твоѐ житїѐ свѣтоно́сное , и҆ и҆справле́нїе жи́тельства твоегѡ̀ . Оу҆тренева́въ к̾ бг҃ꙋ пра́ведномꙋ сл҃нцꙋ , ѿ младе́нства всебога́те , тмы̀ и҆збѣжѐ тѣле́сныхъ страсте́й , воз̾держа́нїемъ . и҆ да́ромъ чꙋде́съ ѡ҆бога́тисѧ прпⷣбне . сла́ва . Оу҆́мнꙋю чистотꙋ̀ , без̾стрⷭ҇тїемъ стѧжа́въ , дх҃о́вное бы́сть вмѣсти́лище , досточꙋ́дне пала́дїе всебл҃же́нне . ѻ҆ц҃е́мъ оу҆краше́нїе , свѣти́льниче всеми́рныи .= и҆ нн҃ѣ , боⷢ҇ . Т=ы̀ є҆ди́на бг҃оневѣ́сто , в̾ вы́шнихъ сѣдѧ́щаго рꙋка́ма носи́ла є҆сѝ , пло́ть бы́вшаго . ты́ бо є҆сѝ прїѧ́телище досто́йнѡ , и҆́же всѣ́хъ вѣ́къ вседержи́телѧ .

пѣ́снь , г҃ . і҆рмо́съ . Твоѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ совокꙋ́пльши дх҃о́венъ оу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы сподо́би . Всено́щное ѻ҆́ч҃е моле́нїе , бо́дренымъ приносѧ̀ по́мысломъ бг҃ꙋ вседержи́телю , стра́сти плотны́ѧ оу҆спи́лъ є҆сѝ . тѣ́мже пред̾ста́тель неꙋсы́пныи , всѣ́мъ на́мъ бы́лъ є҆сѝ . Оу҆мертви́въ оу҆́ды воз̾держа́нїемъ , ѡ҆живи́лъ є҆сѝ ѻ҆́ч҃е дш҃ꙋ , бжⷭ҇твеными воз̾враще́нїи . добродѣ́тельми в̾жилѧ́емь , вседѣ́тельными си́лами ѻ҆ц҃е́мъ ѻ҆́ч҃е пала́дїе . сла́ва . Вкꙋси́въ до́брыи бж҃їи глаго́лъ , и҆ ра́зꙋмꙋ бжⷭ҇твеномꙋ прича́щьсѧ , молчали́во соверши́въ своѐ житїѐ . прилѣплѧ́ѧсѧ невозвра́тнѡ прпⷣбне , свѣтода́телю бг҃ꙋ на́шемꙋ .= и҆ нн҃ѣ , боⷢ҇ . М=лⷭ҇тивыми тѝ ѻ҆трокови́це ка́плѧми , оу҆́глїе оу҆гасѝ страстно́е , мр҃і́е неи҆скꙋсобра́чнаѧ . и҆ оу҆гаше́ныи воз̾жзѝ свѣти́льникъ срⷣца моегѡ̀ , ѕлаты́и свѣти́льниче всенепоро́чнаѧ .

пѣ́снь , д҃ . і҆рмо́с̾ . Неи҆зслѣ́дномꙋ бж҃їю совѣ́тꙋ , є҆́же ѿ дв҃ы воплоще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вопїѧ́ше , сла́ва си́лѣ твое́й гдⷭ҇и . Си́лою же и҆ бл҃года́тїю вседѣ́тельною , всѣ́хъ цр҃ѧ бг҃а на́шегѡ , лꙋка́вствїѧ беспло́тныхъ вра́гъ ѿню́дъ и҆з̾бѣжѐ ѻ҆́ч҃е пала́дїе , бг҃одх҃нове́нне . Да воз̾ра́дꙋемсѧ дх҃о́внѣ , па́мѧть соверша́юще пра́зденьственꙋю , знаменоно́сца и҆ честна́гѡ ѻ҆ц҃а на́шегѡ , сщ҃е́нными тогѡ̀ мольба́ми , неꙋдоби́зненыхъ и҆збавлѧ́еми . Цѣле́нїе прⷭ҇нѡ текꙋ́щее , твоѧ̀ ра́ка то́читъ , ѽ пала́дїе сла́вне , приходѧ́щихъ ѡ҆чища́етъ скве́рны , плотны́ѧ в̾кꙋ́пѣ и҆ дш҃е́вныѧ . ѻ҆́ч҃е ѻ҆ц҃е́мъ бг҃опрїѧ́тне . сла́ва . И҆зба́ви на́съ прпⷣбне твои́ми моли́твами , всѣ́хъ собла́знъ ѕмїи́ныхъ сѣ́тей , и҆ и҆сцѣлѝ на́ша лю́тыѧ недꙋ́ги , ко влⷣцѣ мольба́ми си .= и҆ ны́нѣ , боⷢ҇ . Ꙗ҆=ви́сѧ бг҃овмѣсти́маѧ вои́стинꙋ цр҃ковь пренепоро́чнаѧ бг҃ороди́тельнице . тѣ́мже бл҃гоче́стнѡ гаврїи́лово , ра́дꙋисѧ вѣ́рнїи несꙋме́ннѡ прино́симъ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща . Стра́сти небре́глъ є҆сѝ плотны́ѧ бг҃обл҃же́нне , премно́гимъ воз̾держа́нїемъ . тѣ́мъ тѝ бл҃года́ть бжⷭ҇твенаѧ дарова́сѧ , стра́сти и҆сцѣлѧ́ти вѣ́рнымъ ѻ҆́ч҃е , приходѧ́щимъ тѝ ѽ пала́дїе пресла́вне . Ст҃о своѐ житїѐ всебл҃же́нне соверши́въ , тѣ́мже и҆ к̾ ст҃ы́мъ причте́сѧ , и҆́же ѿ́ вѣка бг҃ови рабо́тавшимъ . всѣ́хъ ѡ҆сщ҃а́еши дш҃а , хва́лѧщихъ твоѧ̀ чⷭ҇тна́ѧ чꙋдодѣѧ́нїѧ . сла́ва . Бл҃же́нъ бы́сть вои́стинꙋ достосла́вне . ты́ бо въ пꙋ́ть ѡ҆правда́нїи , всеви́дца бг҃а ходи́лъ є҆сѝ , неѕло́бивъ и҆ кро́токъ бы́въ , и҆ восхожде́нїи до́брыми оу҆краша́емь .= и҆ ны́нѣ , боⷢ҇ . Д=алечѐ чл҃чество бг҃а дв҃о бы́сть . тебѣ́ же заче́нши сп҃са несказа́ннѡ бг҃ора́дованнаѧ , па́ки въ ра́й вхо́дитъ , вѣ́рою оу҆блажа́ѧ тѧ всепѣ́таѧ .

пѣ́снь , ѕ҃ . і҆рмо́съ . Бжⷭ҇твеное сѐ и҆ всечⷭ҇тно́е соверша́юще пра́зднество , бг҃омꙋ́дрїи бж҃їѧ мт҃ре , прїиди́те рꙋка́ми воспле́щемъ , ѿ неѧ̀ ро́ждьшагосѧ вѣ́рою сла́вѧще . Чи́сто житїѐ воспрїе́мъ воз̾держа́нїѧ ꙗ҆́кѡ беспло́тенъ . и҆спра́вивъ стоѧ́нїе всено́щное , мл҃твꙋ мꙋ́дре неѡ҆скꙋ́днꙋ , вѣ́рꙋ и҆́стиннꙋю , бжⷭ҇твеное смире́нїе . До́брыхъ видѣ́нїи оу҆краша́емь , ꙗ҆́кѡ а҆́нг҃лъ ви́дѣнъ бы́сть , в̾ пло́ти жи́тельствꙋѧ . и҆ прише́дъ всели́сѧ со а҆́нг҃лы , ѻ҆́ч҃е бг҃обл҃же́нне пала́дїе . сла́ва . А҆́нг҃лы и҆мѣ́ѧ с̾помо́щники , бѣсо́вскаѧ ѿразѝ мечта́нїѧ и҆ всѧ̀ лꙋка́вствїѧ . и҆ без̾ претыка́нїѧ про́йде ѽ бг҃обл҃же́нне , стезю̀ к̾ жи́зни в̾водѧ́щꙋю .= и҆ ны́нѣ , боⷢ҇ . Г=лаго́лы ѻ҆трокови́це всенепоро́чнаѧ , бжⷭ҇твенагѡ гаврїи́ла ꙗ҆́кѡ оу҆слы́ша , сло́во зача́тъ в̾ без̾сѣ́меннѣмъ чре́вѣ твое́мъ . и҆ па́че сло́ва сегѡ̀ породила̀ є҆сѝ .

Гдⷭ҇и поми́лꙋй , гⷤ . сла́ва , и҆ ны́нѣ . сѣда́ленъ . гла́съ , а҃ . И҆́ночествовавъ бг҃оꙋго́дно , бг҃оно́сне ѻ҆́ч҃е на́шъ . мл҃твою и҆ посто́мъ бг҃а взыска́лъ є҆сѝ . и҆ бы́сть прїѧ́телище чи́сто дх҃ꙋ . блиста́ѧ вѣ́рнымъ добродѣ́тельныѧ зарѝ , и҆́миже просвѣща́еши всѧ̀ чтꙋ́щїѧ тѧ̀ . сла́ва просла́вльшемꙋ тѧ̀ хрⷭ҇тꙋ̀ . сла́ва оу҆крѣ́пльшемꙋ тѧ̀ , сла́ва дѣ́йствꙋющемꙋ тобо́ю всѣ́мъ и҆сцѣле́нїе .

пѣ́снь , з҃ . і҆рмо́съ . Непослꙋжи́ша тва́ри бг҃омꙋ́дрїи па́че зижди́телѧ , но ѻ҆́гненное преще́нїе , мꙋ́жески попра́вше ра́довахꙋсѧ пою́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Пресла́вными оу҆каза́нїи всебога́те чꙋде́съ , всѣ́хъ дш҃а притека́ющихъ тѝ , просвѣща́еши бл҃года́тїю вседержи́телевою , просвѣти́вшагѡ твою̀ дш҃ꙋ . и҆ показа́вшꙋ є҆ѧ̀ сл҃нца свѣтлѣ́йшꙋ . Воз̾люби́въ соверше́ннѣйше гдⷭ҇а , оу҆ма̀ пра́востїю , и҆ ѿ негѡ̀ всемꙋ́дре соверше́нѣ возлюби́сѧ . бл҃года́ть прїѧ́тъ лꙋка́выѧ ѿгонѧ́ти дꙋ́хи , и҆ и҆сцѣлѧ́ти всѧ̀ недꙋ́ги . сла́ва . Сле́зъ твои́хъ тече́нїѧ прїе́мъ всеви́децъ бг҃ъ , оу҆тѣше́нїѧ а҆́нг҃льскагѡ прича́стна тѧ̀ содѣ́ла . є҆́же полꙋчи́ша , и҆́же бг҃ꙋ слꙋжи́вшїи пра́востїю срⷣца .= и҆ ны́нѣ , боⷢ҇ . М=лⷭ҇тиваго ро́ждьши гдⷭ҇а , є҆ди́на бг҃обл҃года́тнаѧ . десни́цею є҆гѡ̀ чⷭ҇таѧ поми́ловати мѝ оу҆́мъ моли́сѧ . и҆́же всегда̀ лю́тѣ совраща́емъ , жите́йскими печа́льми .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Си́лою бжⷭ҇твеною , ѡ҆полче́нїѧ бѣсо́вскаѧ па́гꙋбнаѧ потреби́лъ є҆сѝ , бл҃года́ть же прїе́мъ оу҆ста́вити не́мощи , и҆ ѿгони́ти дꙋ́хи нечи́стыѧ , вопїѧ̀ , гдⷭ҇а по́йте дѣ́ла , и҆ превозноси́те є҆гѡ̀ во́ вѣки . По́живъ всебл҃же́нне бг҃оꙋго́днѡ , пра́веднымъ ꙗ҆́вѣ до́лжнымъ сно́мъ ны́нѣ оу҆снꙋ́лъ є҆сѝ . и҆ к̾ неконча́емомꙋ приведе́сѧ наслажде́нїю прпⷣбне , вопїѧ̀ , гдⷭ҇а по́йте дѣ́ла , и҆ превозноси́те є҆гѡ̀ во́ вѣки . сла́ва . Цѣльбы̀ и҆сточа́етъ пресла́внѡ , ра́ка твоѧ̀ ѻ҆́ч҃е прири́щꙋщимъ , оу҆ставлѧ́ющи недꙋ́ги , стра́сти же и҆з̾сꙋша́ющи є҆́йже покланѧ́ющесѧ , пое́мъ житїѐ твоѐ . болѣ́зни и҆ бжⷭ҇твеныѧ по́двиги , пала́дїе бл҃же́нне , свѣти́льниче и҆́ночествꙋющимъ .= и҆ ны́нѣ , боⷢ҇ . В=о́дъ мѧ и҆спо́лни дв҃о бжⷭ҇твеныхъ , ꙗ҆́же и҆сто́чникъ поро́ждьшаѧ , и҆зба́ви мѧ̀ зно́ѧ грѣхо́внагѡ , и҆ к̾ животꙋ̀ наста́ви , две́ри бжⷭ҇твенагѡ живота̀ , вопїю́ща , гдⷭ҇а по́йте дѣ́ла , и҆ превозноси́те є҆гѡ̀ во́ вѣки .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃омъ просвѣща́емъ . да ликовствꙋ́етъ же , беспло́тныхъ оу҆мо́въ є҆стество̀ , почита́ѧ ст҃о́е торжество̀ бж҃їѧ мт҃ре . и҆ да пое́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Возмо́же бж҃їею си́лою и҆ бл҃года́тїю ѻ҆́ч҃е , побѣди́ти ѕмїѧ̀ хва́лѧщасѧ безꙋ́мїемъ , и҆ па́гꙋбнꙋю главꙋ̀ є҆гѡ̀ сокрꙋши́ти , и҆ попра́въ нога́ма свои́ма . тѣ́мже соше́дшесѧ , оу҆ми́льною дш҃е́ю тебѐ оу҆блажа́емъ . Ꙗ҆ви́лсѧ є҆сѝ нб҃о высото́ю , жи́тельства твоегѡ̀ , чꙋдесы̀ оу҆добрѧ́емь всебога́те , ꙗ҆́кѡ бжⷭ҇твеными ѕвѣзда́ми . и҆ просвѣща́еши дш҃а , бл҃гоче́стнѡ всегда̀ приходѧ́щихъ тѝ , и҆ чтꙋ́щихъ вѣ́рою по́двиги твоѧ̀ бг҃оно́сне , свѣти́ло свѣтлѣ́йшее . Оу҆ста́вилъ є҆сѝ страстна́ѧ тече́нїѧ прпⷣбне , тꙋ́чами сле́зъ твои́хъ . стрꙋѝ притека́ющимъ чꙋде́съ то́чиши бг҃обл҃же́нне . ѿрѣва́еши зно́й страстны́и всегда̀ , пала́дїе сла́вне , цр҃кви чⷭ҇тно́е оу҆добре́нїе . сла́ва . Процвѣтѐ ꙗ҆́вѣ , ꙗ҆́кѡ шипо́къ бл҃гово́нныи въ цр҃кви хрⷭ҇то́вѣ . и҆ ѡ҆бл҃гоꙋха́лъ є҆сѝ чꙋде́сными вонѧ́ми мирскі́ѧ концы̀ . тѣ́мже бжⷭ҇твенꙋю тѝ па́мѧть , торжествꙋ́емъ . в̾ не́йже всѣ́мъ и҆спросѝ ѡ҆ставле́нїе бг҃оно́сне , мно́гимъ согрѣше́нїемъ .= и҆ ны́нѣ , боⷢ҇ . С=вѣ́тъ и҆́же ѿ́ свѣта , восїѧ̀ ѿ́ чрева твоегѡ̀ , мт҃и при́снѡ дв҃аѧ . и҆ пре́лести тмꙋ̀ ѿгна̀ , и҆ земны́ѧ концы̀ всѧ̀ просвѣтѝ . тѣ́мже вѣ́рою ра́дꙋисѧ зове́мъ тѝ , бцⷣе прпⷣбнымъ похвало̀ .

стихѣ́ры . гла́съ , а҃ . поⷣ . прехва́льнїи мч҃нцы . запѣ́в̾ : Прпⷣбне ѻ҆́ч҃е пала́дїе , молѝ бг҃а ѡ҆ на́съ . Оу҆́мъ тво́й просвѣща́емь свѣ́томъ ,꙳ всебл҃же́нне пала́дїе .꙳ трисл҃нчнагѡ бжⷭ҇тва̀ ꙳ цр҃ковь бы́сть чиста̀ ,꙳ бжⷭ҇твеныѧ ст҃а́гѡ дх҃а зарѧ̀ разꙋ́мнѡ прїе́млѧ .꙳ тѣ́мже моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю ми́лость . А҆́нг҃лы с̾поспѣ́шники и҆мѣ́ѧ мꙋ́дре ,꙳ оу҆крѣплѧ́ющїѧ тѧ .꙳ бѣсо́вскаѧ мечта́нїѧ ,꙳ и҆ лꙋка́ваѧ дѣѧ́нїѧ ѿрази́въ ѻ҆́ч҃е .꙳ и҆ пꙋ́ть про́йде ,꙳ в̾водѧ́щь къ бжⷭ҇твеномꙋ поко́ю .꙳ тѣ́мже моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть . сла́ва . Дш҃е́вною чистото́ю мꙋ́дре ,꙳ бг҃оно́сне сла́вне ,꙳ чⷭ҇томꙋ оу҆подо́бисѧ бг҃ꙋ ,꙳ и҆ зижди́телю своемꙋ̀ .꙳ же́ртва жива̀ томꙋ̀ принесе́сѧ ,꙳ ꙗ҆́кѡ храни́тель тогѡ̀ повелѣ́нїи .꙳ тѣ́мже моли́сѧ ,꙳ дарова́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .= и҆ ны́нѣ , боⷢ҇ . Пречⷭ҇таѧ цр҃кви бж҃їѧ ,꙳ нб҃съ ши́ршаѧ ,꙳ и҆ херꙋви́мъ ст҃ѣ́йши бг҃обл҃года́тнаѧ ,꙳ всест҃а́ѧ ѻ҆трокови́це ,꙳ оу҆́мъ мо́й ѡ҆бл҃года́ти ,꙳ и҆ просвѣтѝ серде́чнїи ѻ҆́чи .꙳ подаю́щи ми бл҃гопрїѧ́тнымъ ти хода́тайствомъ ,꙳ прегрѣше́нїй всѣ́хъ ѿпꙋще́нїе . =крⷭ҇тобоⷢ҇ . Дв҃аѧ нескве́рнаѧ дре́вле ,꙳ на́ древѣ зрѧ́щи бг҃а ,꙳ є҆го́же и҆з̾ без̾сѣ́менна чре́ва породѝ ,꙳ нетерпѧ́щи оу҆тро́бное оу҆ѧзвле́нїе ,꙳ терза́ющисѧ гл҃аше .꙳ ма́нїемъ содержа́и всю̀ тва́рь ,꙳ ка́кѡ ꙗ҆́кѡ ѡ҆сꙋ́жденикъ на крⷭ҇тѣ̀ ,꙳ распѧ́тсѧ хотѧ́и ,꙳ спастѝ всѧ́кѡ чл҃чество .

На оу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на́ ѕ҃ . и҆мы́и краегране́сїе сицево̀ : пе́рсѧнина і҆а́кѡва пѣ́сньми мч҃нка пою̀ . творе́нїе і҆ѡ́сифово . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пое́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прове́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ просла́висѧ .

запѣ́въ : Ст҃ы́и великомч҃нче і҆а́кѡве , молѝ бг҃а ѡ҆ на́съ . Хрⷭ҇то́вꙋ престо́лꙋ ны́нѣ пред̾стоѧ̀ , вѣнцено́сецъ сла́вне мч҃нче і҆а́кѡве . свѣтоно́снꙋю мѝ зарю̀ , и҆ бл҃года́ть с̾ нб҃сѐ да́ждь мл҃твами тѝ . Ꙗ҆́коже оу҆́тро на́мъ восїѧ́лъ є҆сѝ многосвѣ́тлое , ѿ восто́ка и҆сходѧ̀ . и҆ просвѣтѝ хрⷭ҇то́вꙋ цр҃ковь , свѣ́тлостїю страда́нїи мч҃нче і҆а́кѡве .= Ю҆́ношеское сопротивле́нїе показа́въ , ꙗ҆́кѡ побѣди́тель , сподо́бисѧ по́чести , и҆ соверше́нагѡ натрижне́нїѧ . и҆ сла́вы вѣ́чныѧ мч҃нче і҆а́кѡве . боⷢ҇ . П=рⷪ҇рческїѧ тѧ̀ трꙋбы̀ провозвѣсти́ша є҆́же ѡ҆ тебѣ̀ та́инство проповѣ́дающе бцⷣе дв҃о . и҆з̾ дале́ча зрѧ́ще твоѧ̀ чꙋдеса̀ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Оу҆твердѝ на́съ собо́ю гдⷭ҇и , дре́вомъ оу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃колю́бецъ . Бы́сть ꙗ҆́кѡ и҆з̾бра́нна хрⷭ҇то́ва лоза̀ , серпо́мъ мꙋче́нїѧ ѡ҆чища́ема . и҆ мно́гъ пло́дъ носѧ́щи , в̾ точи́лѣ сп҃совѣ приноси́мыи . Текꙋ́щихъ тлѣ́нное , и҆ оу҆до́бь разрꙋши́мое презрѣ̀ смы́сленѡ вѣнцено́сче . ꙗ҆́кѡ ѡ҆строꙋ́мныи же и҆збра̀ , присностоѧ́щихъ недви́жимое . Вѣнцы̀ тебѣ̀ свѣ́тлы , раздроблѧ́емо тѣ́ло , сꙋровство́мъ мꙋчи́телей и҆схода́таи і҆а́кѡве , и҆ пи́щи ра́йскїѧ наслажде́нїе .= боⷢ҇ . П=оми́лованѡ бы́сть ꙗ҆́вѣ , ржⷭ҇тво́мъ твои́мъ бжⷭ҇твенымъ дв҃о чл҃чество , совокꙋпи́вшесѧ по соста́вꙋ влⷣцѣ всѣ́хъ бг҃оневѣ́сто .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

сѣда́ленъ . гла́съ , и҃ . Ѿ =перси́ды ѕвѣздꙋ̀ прⷭ҇носвѣтѧ́щꙋю , хрⷭ҇то́съ восїѧ̀ земны́мъ бжⷭ҇твенагѡ і҆а́кѡва , прⷭ҇нопа́мѧтнаго мч҃нка . тогѡ̀ ра́ди преле́стныи мра́къ ѿгна̀ , и҆ вѣ́рнымъ бл҃года́ть дх҃о́внꙋю восїѧ̀ . тѣ́мже па́мѧть є҆гѡ̀ соверша́юще вѣ́рнѡ пра́зднꙋемъ . и҆ вопїе́мъ гл҃юще , стрⷭ҇тоте́рпче многострада́льне , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . =двⷤа . сла́ва , и҆ ны́нѣ , боⷢ҇ . Въ ти́нꙋ впа́дъ грѣхо́въ , и҆ нѣ́сть постоѧ́нїѧ , лю́тѣ потопи́ мѧ бꙋ́рѧ прегрѣше́нїй . но ꙗ҆́кѡ ро́ждьши сло́во , є҆ди́ногѡ чл҃колю́бца , намѧ̀ раба̀ своегѡ̀ при́зри . и҆ и҆з̾ба́ви мѧ всѧ́когѡ грѣха̀ , и҆ страсте́й дш҃етлѣ́нныхъ . и҆ всѧ́когѡ ѡ҆ѕлобле́нїѧ лꙋка́вагѡ оу҆бі́йца , ꙗ҆́кѡ да пою́ти ра́дꙋисѧ . молѝ хрⷭ҇та̀ бг҃а , грѣхо́въ ѡ҆ставле́нїе да́тими . тебе́ бо наде́ждꙋ и҆́мамъ ра́бъ тво́й . крⷭ҇тобоⷢ҇ . Дв҃аѧ и҆ мт҃и и҆зба́вителѧ , крⷭ҇тꙋ̀ пред̾стоѧ́щи , болѣ́зненѡ со слеза́ми рыда́ющи , мт҃рьски вопїѧ́ше , что̀ стра́нное сѐ , и҆ пресла́вное сн҃е . и҆сточа́ѧ всѣ́мъ земны́мъ без̾стра́стїе ; посредѣ̀ ѡ҆сꙋжде́ною на крⷭ҇тѣ̀ распѧ́тсѧ . въ ре́бра пробода́емь , и҆ же́лчїю напоѧ́емь , ѿ рꙋ́къ и҆́хже созда̀ . но воста́ни , и҆ да́рꙋй прегрѣше́ней ѡ҆ставле́нїе , и҆́же вѣ́рою пою́щимъ , бжⷭ҇твенаѧ тѝ страда́нїѧ .

пѣ́снь , д҃ . і҆рмо́съ . Пою́ тѧ слꙋ́хомъ бо гдⷭ҇и , оу҆слы́шахъ и҆ оу҆боѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гое твоѐ соше́ствїе є҆́же на мѧ̀ прославлѧ́ю ѡ҆бновле́нїе . Вжилѧ́емь сла́вне , и҆́же ѿ́ бг҃а да́нымъ ти ѻ҆рꙋ́жїемъ , ѻ҆гнеслꙋже́бнꙋю ле́сть всю̀ оу҆гаси́лъ є҆сѝ . Ѡ҆чище́нїе на́мъ и҆спросѝ , и҆́же честнꙋ́ю ти па́мѧть соверша́ющимъ , дерзнове́нїе и҆мѣ́ѧ мч҃нче і҆а́кѡве . Текꙋ́щїи кро́вныѧ пото́цы , твои́хъ оу҆до́въ требл҃же́нне , преле́стныи пла́мень ве́сь погаси́ша .= боⷢ҇ . Ѡ҆=корми́ ми пречⷭ҇таѧ помышле́нїѧ , к̾ ти́хомꙋ приста́нищꙋ , твоегѡ̀ без̾стра́стїѧ , и҆ чистоты̀ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Свѣ́та пода́телю , и҆ вѣко́мъ тво́рче гдⷭ҇и , во́ свѣтѣ твои́хъ повелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Ꙗ҆́кѡ нѣ́каѧ землѧ̀ бл҃га́ѧ , и҆ добропло́дна вои́стинꙋ бы́сть . ра́ломъ го́рькихъ мꙋ́къ раздроблѧ́емь мꙋ́дре , многокла́сное зижди́телю приносѧ̀ дѣ́ланїе . Стрѣ́лы всѧ̀ и҆зѧ́щнѣ , раз̾жже́ныѧ вра́жїѧ оу҆гаси́лъ є҆сѝ , кро́вїю ѿсѣ́ченыхъ тѝ оу҆до́въ тѣле́сныхъ требл҃же́нне . наде́жею оу҆́бѡ ꙗ҆ви́сѧ и҆ вѣ́рою ѡ҆гражда́емь . Всепло́днѡ ꙗ҆́кѡ ѻ҆вча̀ хрⷭ҇то́ви премꙋ́дре , твои́мъ оу҆до́мъ рѣ́жемымъ лю́тѣ , побѣ́днꙋю пѣ́снь , и҆ досто́йнꙋю хвалꙋ̀ , на кі́иждо приноша́ше . Дае́ши ѡ҆чище́нїе дш҃е́вныхъ ми скве́рнъ , сла́вне мч҃нче хрⷭ҇то́въ твоѧ̀ болѣ́зни , и҆ и҆збавле́нїе подава́ѧ кро́вныѧ пото́ки пред̾лага́ѧ .= боⷢ҇ . И҆́=стинствꙋюще честно́мꙋ и҆ стра́шномꙋ ржⷭ҇твꙋ̀ твоемꙋ̀ , гла́съ и҆ срⷣце и҆ ꙗ҆зы́къ приносѧ́ще ꙗ҆́снѡ , тѧ̀ и҆ нн҃ѣ бцⷣꙋ чи́стꙋю и҆менꙋ́емъ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твоегѡ̀ призыва́ю бе́зднꙋ , ѿ тлѝ бж҃е мѧ воз̾ведѝ . Поꙋче́нїе смы́сленѡ прїе́мъ бли́жнихъ свои́хъ . ра́дꙋѧсѧ оу҆стреми́сѧ к̾ подвиго́мъ сла́вне , и҆ вѣнцы̀ побѣ́дѣ прїѧ́тъ . Ꙗ҆́коже в̾ чꙋже́мъ тѣлесѝ стражда̀ , терпѣ́лъ є҆сѝ мч҃нче і҆а́кѡве . и҆ оу҆́ды раздроблѧ́емь , влⷣцѣ пѣ́снь воз̾сыла́ше . Спасе́нїѧ в̾ ри́зꙋ ꙗ҆́вственѡ , и҆ весе́лїѧ ѻ҆де́ждꙋ , кро́вїю твое́ю ѡ҆багри́вшеюсѧ премꙋ́дре , побѣдоно́сецъ ꙗ҆́кѡ мч҃нкъ ѡ҆блече́сѧ .= Мꙋче́нїѧ преплꙋ́тїе совершѝ . тѣ́мже сщ҃еннопобѣ́дныи вѣне́цъ прїѧ́лъ є҆сѝ . и҆ ны́нѣ съ мч҃нческими чи́нми с̾ликоствꙋ́еши досто́йнѡ і҆а́кѡве . боⷢ҇ . Н=е и҆скꙋсомꙋ́жнѡ дв҃о родила̀ є҆сѝ , и҆ вѣ́чнꙋеши дв҃ою , ꙗ҆влѧ́ющи и҆́стиннагѡ бжⷭ҇тва̀ , сн҃а и҆ бг҃а твоегѡ̀ зна́менїе .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ . гла́съ , в҃ . Вѣ́ровавъ до́брой сꙋпрꙋ́жницѣ , терпѣливодꙋ́шне . и҆ страшна́гѡ сꙋди́ща боѧ́сѧ , пе́рское повелѣ́нїе и҆ стра́хъ і҆а́кѡве поплева́лъ є҆сѝ . и҆ показа́сѧ мч҃нкъ чꙋ́дныи за хрⷭ҇та̀ , пло́ть ꙗ҆́кѡ гро́здъ прорасти́выи , и҆ ꙗ҆́кѡ лоза̀ ѡ҆брѣ́заемь . и҆́косъ . Ѿ дꙋшѝ воз̾сте́немъ всѝ , сле́зы пролива́юще , зрѧ́ще мч҃нка го́рькѡ раздроблѧ́ема . подо́бнѡ псо́мъ рыка́ющимъ , соше́дшесѧ оу҆́ды растерза́ютъ , чꙋ́днагѡ и҆ до́блѧгѡ въ свидѣ́телехъ мч҃нка . что̀ оу҆́бѡ є҆́сть ; да прирекꙋ̀ , а҆́ще хо́щете ма́лѡ пожди́те , и҆ рекꙋ̀ всѧ̀ со тща́нїемъ . ка́кѡ во є҆ди́нъ де́нь бы́сть сме́рть , тѣ́ло ꙗ҆́кѡ лоза̀ ѡ҆брѣза́емо .

пѣ́снь , з҃ . і҆рмо́съ . Тѣ́лꙋ злато́мꙋ премꙋ́дрыѧ дѣ́ти непослꙋжи́ша , и҆ в̾ пла́мень са́ми поидо́ша , и҆ бо́ги и҆́хъ ѡ҆брꙋга́ша . средѝ пла́мене возопи́ша , и҆ ѡ҆бросѝ и҆́хъ а҆́нг҃лъ , оу҆слы́шасѧ оу҆́же оу҆́стъ ва́шихъ мл҃тва . Крѣ́постїю оу҆́мною , терпѣ́нїемъ же дш҃е́внымъ , раздроблѧ́емꙋ мч҃нче твоемꙋ̀ тѣ́лꙋ , непрело́женъ и҆ непрекло́ненъ бы́сть вѣ́рою оу҆крѣплѧ́емь бжⷭ҇твеною . и҆ зовы́и і҆а́кѡве , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . И҆спра́вивъ своѧ̀ помышле́нїѧ , к̾ смотре́нїю вы́шнѧгѡ зва́нїѧ , и҆ мꙋ́ками ѡ҆блива́емь непотопи́сѧ . но терпѧ̀ оу҆до́бь ꙗ҆́звы без̾зако́нныхъ , и҆ раз̾сѣка́емь , поѧ́ше . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Бл҃же́нъ є҆сѝ и҆ добро̀ тебѣ̀ бꙋ́детъ . нн҃ѣ бл҃же́ннѣйши , побѣди́вшꙋ тѝ неоу҆кроти́мое лꙋка́вагѡ свирѣ́пїе , и҆ мꙋчи́телевꙋ ꙗ҆́рость . оу҆се́рднѡ зовꙋ́щꙋ ти , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ .= боⷢ҇ . Н=езаходи́магѡ свѣ́та , и҆ свѣщѝ бжⷭ҇твенагѡ сїѧ́нїѧ , ꙗ҆ви́сѧ свѣ́щникъ ѕлатосїѧ́ющь , и҆ ми́ра всегѡ̀ ѡ҆зарѧ́ющь , заре́ю чⷭ҇тна́гѡ дв҃ьства , и҆ пою́щїѧ спаса́еши , бл҃гослове́наѧ , ꙗ҆́же бг҃а пло́тїю ро́ждьшаѧ .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ соше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Си́лою бж҃їею оу҆крѣпи́всѧ , лꙋка́выхъ собо́рища , и҆ ѡ҆полче́нїѧ разори́лъ є҆сѝ бл҃же́нне . и҆ держа́внѡ ѿгна́въ , побѣ́ды вѣне́цъ прїѧ́тъ , зовы́и , бл҃гослови́те всѧ̀ дѣ́ла гдⷭ҇нѧ гдⷭ҇а , по́йте и҆ превозноси́те є҆гѡ̀ во́ вѣки . Ѿрѣ́занїе оу҆до́въ , ꙗ҆́кѡ приложе́нїе бл҃ги́хъ мч҃нче зрѧ́ше . не ны́нѣшнихъ ви́дѧ болѣ́зни , но бꙋ́дꙋщее смотрѧ́ѧ , мч҃нкѡмъ кра́сное вѣнча́нїе , ѿ пра́веднагѡ сꙋдїѝ оу҆гото́ванное . Терпѣ́нїе па́че є҆стества̀ стѧжа́въ тве́рдѡ , ꙗ҆́коже сто́лпъ пребы́сть бл҃же́нне . вра́жїѧ оу҆стремле́нїѧ бе́з̾страха и҆ стрѣ́лы прїе́млѧ . зовы́и , бл҃гослови́те хрⷭ҇та̀ во́ вѣки . Оу҆стремле́нїемъ мно́гимъ , тебѣ̀ приложи́всѧ , началоѕло́бныи вра́гъ , и҆ дш҃етлѣ́нныи , и҆ мꙋчи́телѧ подви́гнꙋвъ низ̾ложи́ти дш҃е́внꙋю тѝ крѣ́пость , и҆ невозмо́же сла́вне . и҆́бо во всѐ ѻ҆рꙋ́жїе хрⷭ҇то́во ѡ҆дѣ́ѧвъ себѐ .= боⷢ҇ . Б=ез̾сме́ртїѧ свѣтоза́рныи свѣ́мы тѧ̀ и҆сто́чникъ бцⷣе . ꙗ҆́кѡ ро́ждьшаѧ сло́во без̾сме́ртнаго ѻ҆ц҃а ; всѣ́хъ сме́рти и҆зба́вльшаго , превозносѧ́щихъ є҆гѡ̀ во́ вѣки .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́нною мꙋ́дростїю , прише́дшагѡ ѡ҆бнови́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно воплоща́ема на́съ ра́ди , вѣ́рнїи є҆диномꙋ́дреннѡ пѣ́сньми велича́емъ . Съ мч҃нки ꙗ҆́кѡ мч҃нкъ с̾ликоствꙋ́еши пребл҃же́нне . и҆ прⷭ҇то́лꙋ пред̾стоѧ̀ хрⷭ҇то́вꙋ . соверша́ющихъ па́мѧть твою̀ , и҆ тво́й свѣтоно́сныи с̾ весе́лїемъ дне́сь чтꙋ́щихъ пра́здникъ , лю́тыхъ бѣ́дъ твои́ми мл҃твами и҆зба́ви . И҆дѣ́же мч҃нчестїи собо́ри . и҆дѣ́же всѣ́хъ ст҃ы́хъ ст҃о́е оу҆поко́исѧ мно́жество . и҆дѣ́же пра́ведныхъ дꙋ́си . и҆дѣ́же цр҃ковь перворожде́нныхъ , нн҃ѣ на́ нб҃сѣхъ весели́шисѧ вои́стинꙋ ꙗ҆́кѡ мч҃нкъ ѽ і҆а́кѡве . Свѣщено́сецъ пред̾ста̀ сп҃сꙋ всѣ́хъ , за него́же тѣ́ла своегѡ̀ оу҆до́въ ѿсѣче́нїе претерпѣ́лъ є҆сѝ . и҆ ѻ҆гнѧ̀ и҆ ра́нъ и҆скꙋше́нїѧ неради́лъ є҆сѝ крѣ́пкѡ . тѣ́мже тѧ̀ всѝ вѣ́рою и҆ любо́вїю оу҆бл҃жа́емъ і҆а́кѡве .= И҆спещре́ною баграни́цею , кровьмѝ твои́ми ѡ҆червленѣ́вшеюсѧ ны́нѣ ѡ҆дѣ́ѧнъ , и҆ со хрⷭ҇то́мъ црⷭ҇твꙋеши і҆а́кѡве . страстьми́ бо без̾стра́стїѧ ѡ҆брѣ́те и҆сто́чникъ . є҆го́же наслажда́тисѧ вѣ́чнѡ всебл҃же́нне сподо́бисѧ . боⷢ҇ . Ꙗ҆́=кѡ бг҃а заче́ншꙋ , и҆ бж҃їю мт҃рь бы́вшꙋю вои́стинꙋ чи́стаѧ , тѧ̀ бцⷣꙋ сла́вимъ ве́щемъ є҆стествꙋ̀ , зва́нїе причита́юще ꙗ҆́снѡ , и҆ подо́бнѡ бжⷭ҇твеныи тѝ гла́съ приносѧ́ще .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . До́сто́йнѡ є҆́сть .

свѣти́ленъ . Ꙗ҆́кѡ ло́зꙋ ѡ҆брѣ́заемꙋ мно́гими мꙋ́ками , просла́ви гдⷭ҇ь . ꙗ҆́кѡ виногра́дъ чⷭ҇тны́и , вино̀ и҆сточа́ющь , ѿ и҆сто́чникъ крове́й твои́хъ , і҆а́кѡве страстоте́рпче , и҆ покрови́телю , и҆́же любо́вїю всесщ҃е́ннꙋю тѝ па́мѧть досто́йнѡ творѧ́щимъ . сла́ва , и҆ нн҃ѣ , боⷢ҇ . Нѣ́сть ѿ ню́дъ во мнѣ̀ спасе́нїѧ дв҃о , ꙗ҆́кѡ ѕлѣ̀ в̾падо́хъ въ глꙋбинꙋ̀ грѣхо́внꙋю . и҆ ча́ю запреще́нїѧ и҆ стра́шнагѡ мꙋче́нїѧ , и҆ ко́злищь ча́сти . оу҆ще́дри мѧ пре́жде сꙋда̀ , ꙗ҆́кѡ сꙋ́щи те́плое застꙋпле́нїе бцⷣе .

На стихо́внѣ , во ѻ҆кта́и . сла́ва . гла́съ , в҃ . Терпѧ̀ въ страда́нїихъ мч҃нче і҆а́кѡве , тѣ́ло своѐ пре́далъ є҆сѝ за хрⷭ҇та̀ бг҃а и҆ раздроблѧ́емь рꙋ́цѣ и҆ стегнѣ̀ , мы́шца и҆ лы́ста и҆ пе́рсты , и҆ коне́чное главꙋ̀ свою̀ , возлетѣ̀ на нб҃са̀ и҆ съцрⷭ҇твꙋѧ цр҃ю всѣ́хъ . тѣ́мже страда́льцемъ держа́вне , не ѡ҆ставлѧ́й молѧ́сѧ , спасти́сѧ дш҃а́мъ на́шимъ , ѿ всѧ́кагѡ вре́да чꙋжа́гѡ . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . є҆гда̀ ѿ́ древа . Є҆гда̀ нескве́рнаѧ а҆́гница , оу҆зрѣ̀ своегѡ̀ а҆́гньца , на заколе́нїе ꙗ҆́кѡ зе́млена влеко́ма во́лею , пла́чꙋщи глаго́лаше , без̾ча́дствовати мѧ̀ ны́нѣ тщи́шисѧ хрⷭ҇тѐ ро́ждьшꙋю тѧ̀ . что̀ сѐ сотвори́лъ є҆сѝ и҆зба́вителю всѣ́хъ . ѻ҆ба́че пою̀ и҆ сла́влю , твоѐ па́че оу҆ма̀ и҆ сло́ва , коне́чнꙋю бл҃госты́ню чл҃колю́бче .

На литꙋргі́и , проки́менъ , ѱл҃о́мъ дв҃довъ . ст҃ы́мъ и҆́же сꙋ́ть на землѝ є҆гѡ̀ , оу҆дивѝ гдⷭ҇ь всѧ̀ во́лѧ своѧ̀ в̾ ни́хъ . сти́хъ . пред̾зрѣ́хъ гдⷭ҇а предомно́ю вы́нꙋ , ꙗ҆́кѡ ѡ҆деснꙋ́ю менѐ є҆́сть дасѧ̀ неподви́жꙋ . а҆пⷭ҇лъ , къ є҆фесе́ѡмъ . зача́ло , сл҃г . а҆ллилꙋ́їѧ . мно́ги ско́рби пра́веднымъ , и҆ ѿ всѣ́хъ и҆́хъ и҆з̾ба́витъ ѧ҆̀ гдⷭ҇ь .= є҆ѵⷢ҇а́лїе , ѿ і҆ѡа́нна . заⷱ҇ , н҃ . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

Зна́менїе прⷭ҇тѣ́й бцⷣѣ . =На ма́лѣй вече́рни , на гдⷭ҇и возва́хъ , стⷯры . гла́съ , а҃ . поⷣ . нбⷭ҇нымъ чино́мъ . Ны́нѣ наста̀ де́нь ра́достенъ ,꙳ и҆ весе́лїѧ и҆спо́лненъ дне́сь .꙳ ѿ скорбе́й бо премѣне́нїе дв҃о бг҃ороди́тельнице ,꙳ зна́менїе и҆ко́ны твоеѧ̀ пречⷭ҇таѧ ,꙳ пра́здникъ свѣ́телъ торжествꙋ́юще зове́мъ .꙳ влⷣчце и҆зба́ви ѿ бѣ́дъ дш҃а на́ша . =вⷤ . Сѐ ны́нѣ вре́мѧ бл҃гопрїѧ́тно .꙳ сѐ ны́нѣ де́нь спасе́нїѧ .꙳ сѐ хра́мъ пресвѣ́телъ и҆ мѣ́сто сщ҃е́нїѧ ,꙳ зна́менїе и҆ко́ны твоеѧ̀ пречⷭ҇таѧ ,꙳ пра́здникъ дх҃о́внѣ соверша́юще вопїе́мъ .꙳ влⷣчце мт҃и хрⷭ҇та̀ бг҃а , и҆зба́ви ѿ бѣ́дъ дш҃а на́ша . Чꙋ́дное ѡ҆долѣ́нїе ,꙳ и҆ зна́менїе стра́шное ,꙳ и҆ ве́щь пресла́внꙋю ,꙳ дне́сь пра́зднꙋюще лю́дїе твоѝ бцⷣе ,꙳ похва́льнꙋю пѣ́снь с̾ гаврїи́ломъ прино́симъ ти гл҃юще ,꙳ ра́дꙋйсѧ ѡ҆бра́дованнаѧ . сла́ва , и҆ ны́нѣ . гла́съ , а҃ . Ди́вна правосла́вныхъ торжества̀ , дне́сь сте́кшесѧ ѱало́мскаѧ пѣ́нїѧ принесе́мъ гл҃юще . воскрⷭ҇нѝ гдⷭ҇и в̾ поко́й тво́й , ты̀ и҆ кїѡ́тъ ст҃ы́ни твоеѧ̀ . ꙗ҆́кѡ побѣ́дꙋ дарова̀ , ѻ҆́бразъ пречⷭ҇тыѧ ти мт҃ре сло́ве . є҆ѧ́же мл҃твами , і҆с҃е всеси́льне , спасѝ дш҃а на́ша .

проки́менъ , дню̀ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фовъ . До́мꙋ премꙋ́дрости бж҃їѧ ,꙳ чꙋ́дномꙋ ст҃лю ,꙳ ꙗ҆́вльсѧ свѣ́тлымъ ѻ҆́бразомъ ,꙳ дерза́ти повелѣва́ѧ ,꙳ и҆ наде́жи не ѿпа́дати .

сти́хъ : воскрⷭ҇нѝ гдⷭ҇и в̾ поко́й тво́й ,꙳ ты̀ и҆ кїѡ́тъ ст҃ы́ни твоеѧ̀ . Въ хра́мъ тво́й влⷣчце ,꙳ соше́дшесѧ наро́ди ,꙳ молѧ́щесѧ и҆ глаго́люще ,꙳ ви́ждь ѡ҆ѕлобле́нїе на́ше ,꙳ и҆ пода́ждь на́мъ по́мощь пречⷭ҇таѧ .

сти́хъ : клѧ́тсѧ гдⷭ҇ь дв҃дꙋ и҆́стиною ,꙳ и҆ не ѿве́ржетсѧ є҆ѧ̀ . Ви́ждь пречⷭ҇таѧ бѣды̀ ра́бъ свои́хъ ,꙳ и҆ не ѿри́ни на́съ в̾ коне́цъ ,꙳ на твою̀ по́мощь надѣ́ющихсѧ .꙳ да всѝ вопїе́мъ ти ,꙳ ра́дꙋисѧ ѡ҆бра́дованнаѧ .

сла́ва , и҆ ны́нѣ . гла́съ , а҃ . Стрѣло́ю стрѣли́вшихъ неразꙋ́мнѣ , ѻ҆́бразꙋ твоемꙋ̀ пречⷭ҇таѧ , бг҃ора́нною стрѣло́ю тѣ́хъ оу҆ѧзвѝ , не то́кмѡ сердца̀ , но и҆ дш҃а . и҆ и҆сто́чникъ чⷭ҇тны́ѧ и҆ко́ны твоеѧ̀ , тѣ́мъ неꙋтѣ́шимыи пла́чь наведѐ . на́мъ же лю́демъ твои́мъ ра́дость ве́лїю сотворѝ и҆ко́на твоѧ̀ пречⷭ҇таѧ мт҃и сло́ва . є҆ѧ́же ра́ди спасѝ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Ꙗ҆́кѡ неѡ҆бори́мꙋю стѣ́нꙋ и҆ и҆сто́чникъ чꙋде́съ , стѧжа́вше тѧ рабѝ твоѝ бцⷣе пречи́стаѧ , сопроти́вныхъ ѡ҆полче́нїѧ низлага́емъ . тѣ́мже мо́лимъ тѧ , ми́ръ гра́дꙋ твоемꙋ̀ да́рꙋй , и҆ дш҃а́мъ на́шимъ ве́лїю млⷭ҇ть . та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , блаже́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на и҃ . гла́съ , и҃ . Го́рдостїю за́висти распали́вшесѧ . и҆ неи́стовствомъ ѡ҆держи́ми , и҆ногда̀ ненака́заннїи , наче́нше проти́внаѧ на́ градъ тво́й пречⷭ҇таѧ . но ѻ҆ба́че са́ми спѧ́ти бы́ша и҆ падо́ша , ѱало́мски при а҆́дѣ , бг҃ороди́тельнице . Внегда̀ оу҆́бѡ мꙋ́жїе вели́кагѡ нова̀ гра́да , ви́дѣвше себѐ проти́вными ѡ҆бстои́мы , ни ѿкꙋ́дꙋ же по́мощи надѣ́ющесѧ , то́кмѡ тебѣ̀ пречⷭ҇таѧ молѧ́щесѧ , гл҃юще , ви́ждь бцⷣе бѣды̀ ра́бъ свои́хъ , и҆ не ѿри́ни моле́нїѧ на́шегѡ в̾ коне́цъ . да разꙋмѣ́ютъ сопроти́внїи , ꙗ҆́кѡ ты̀ є҆сѝ пречⷭ҇таѧ застꙋпле́нїе дш҃а́мъ на́шимъ . Ди́внꙋю гра́дꙋ твоемꙋ̀ побѣ́дꙋ дарова́ла є҆сѝ дв҃о пречⷭ҇таѧ . ты́ бо є҆сѝ томꙋ̀ тве́рдое ѡ҆гражде́нїе , на врагѝ оу҆крѣплѧ́ющи , и҆ держа́внѡ непокори́выхъ покорѧ́ющи при́снѡ . тѣ́мже чи́стою вѣ́рою сла́вимъ тѧ . и҆ сн҃ꙋ твоемꙋ̀ любе́знѡ вопїе́мъ , і҆с҃е всеси́льне спасѝ всѣ́хъ ꙗ҆́кѡ милосе́рдъ . Да́лъ є҆сѝ зна́менїе живо́тное , ѻ҆́бразъ пречⷭ҇тыѧ ти мт҃ре сло́ве . ю҆́же зрѧ́ще любе́знѡ ѡ҆блобыза́емъ . и҆ ѿ сеѧ̀ ра́дости и҆спо́лнившесѧ , стра́шни враго́мъ борю́щимсѧ с̾ на́ми ꙗ҆влѧ́емсѧ . и҆ та́инство премꙋ́дрости бж҃їѧ ви́дѣвше , хва́лимъ тѧ па́че сло́ва ро́ждьшагосѧ и҆з̾ неѧ̀ . і҆с҃е чꙋ́днаѧ добро́то , спасѝ всѣ́хъ ꙗ҆́кѡ милосе́рдъ . =сла́ва , и҆ ны́нѣ . гла́съ , ѕ҃ . Весели́тесѧ лю́дїе , и҆ всѝ правосла́внїи собо́ри вели́кагѡ нова̀ гра́да дне́сь , и҆ рꙋка́ми восплещи́те ꙗ҆зы́цы с̾ весе́лїемъ . се́бо цр҃ца цр҃ѧ хрⷭ҇та̀ ро́ждьшаѧ , ст҃лю ꙗ҆́вльсѧ чꙋ́днымъ ѻ҆́бразомъ . дерза́ти наро́домъ повелѣва́етъ , ꙗ҆́коже нѣ́кїи воево́да . и҆́же в̾ печа́ли сꙋ́щимъ , тогда̀ ра́дость сотворѝ . тѣ́мъ сопроти́вныхъ побѣди́вше , тебѣ̀ ра́дость ро́ждьшей всѣ́мъ , любо́вїю вопїе́мъ дв҃о пречⷭ҇таѧ , молѝ спасти́сѧ дш҃а́мъ на́шимъ . вы́ходъ . проки́менъ , дню̀ .

Ѿ= бытїѧ̀ , чте́нїе .=

И҆зы́де і҆а́кѡвъ ѿ стꙋденца̀ клѧ́твеннагѡ , и҆ и҆́де в̾ харра́нь , и҆ ѡ҆брѣ́те мѣ́сто и҆ ста̀ тꙋ̀ . заше́дшꙋ же сл҃нцꙋ , взѧ́тъ ѿ ка́менїѧ мѣ́ста тогѡ̀ , и҆ положѝ є҆̀ в̾ воз̾гла́вїе себѣ̀ . и҆ спа̀ на мѣ́стѣ то́мъ , и҆ со́нъ ви́дѣ . и҆ сѐ лѣ́ствица оу҆твержена̀ на землѝ , є҆́йже глава̀ досѧза́ше до небесѐ . и҆ а҆́нг҃ли бж҃їи воз̾хожда́хꙋ , и҆ низ̾хожда́хꙋ по не́й . гдⷭ҇ь же оу҆твержа́шесѧ на не́й , и҆ речѐ , а҆́зъ бг҃ъ а҆враа́мѡвъ ѻ҆ц҃а твоегѡ̀ , и҆ бг҃ъ і҆саа́кѡвъ , небо́йсѧ . землѧ̀ на не́й же ты̀ спи́ши , тебѣ̀ да́мъ ю҆̀ , и҆ сѣ́мени твоемꙋ̀ . и҆ бꙋ́детъ сѣ́мѧ твоѐ , ꙗ҆́кѡ пѣсо́къ земны́и , и҆ распространи́тсѧ на́ море , и҆ на ли́вꙋ , на сѣ́веръ , и҆ восто́къ . и҆ бл҃гословѧ́тсѧ ѡ҆ тебѣ̀ всѧ̀ колѣ́на земна́ѧ , и҆ ѡ҆ сѣ́мени твое́мъ . и҆ сѐ а҆́зъ с̾ тобо́ю , сохранѧ́ѧи тѧ̀ на всѧ́комъ пꙋтѝ , а҆́може а҆́ще по́йдеши . и҆ воз̾вращꙋ́ тѧ в̾ зе́млю сїю̀ , ꙗ҆́кѡ не ѡ҆ста́влю тебѐ , до́ндеже сотвори́ти ми всѧ̀ є҆ли́ка гл҃ахъ тѝ . и҆ воста́въ і҆а́кѡвъ ѿ сна̀ своегѡ̀ , и҆ речѐ , ꙗ҆́кѡ є҆́сть гдⷭ҇ь на мѣ́стѣ се́мъ , а҆́зъ же невѣ́дѣхъ . и҆ оу҆боѧ́сѧ , и҆ речѐ , ꙗ҆́кѡ стра́шно мѣ́сто сѐ , нѣ́сть сѐ , но до́мъ бж҃їи , и҆ сі́ѧ врата̀ нбⷭ҇наѧ .

Ѿ= пррⷪ҇чества і҆єзекі́илева , чте́нїе .=

Та́кѡ гл҃етъ гдⷭ҇ь , бꙋ́детъ ѿ ѻ҆сма́гѡ днѐ и҆ про́чее , сотворѧ́тъ і҆єре́и , на ѻ҆лтарѝ всесожже́нїѧ ва́ша , и҆́же спасе́нїѧ ва́шегѡ , и҆ прїимꙋ̀ вы̀ гл҃етъ гдⷭ҇ь бг҃ъ . и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ , зрѧ́щихъ на восто́къ , и҆ сїѧ̀ бѧ́хꙋ затворе́на . и҆ речѐ гдⷭ҇ь ко мнѣ̀ , врата̀ сїѧ̀ затворе́на бꙋ́дꙋтъ , и҆ не ѿве́рзꙋтсѧ . и҆ никто́же про́йдетъ сквозѣ̀ и҆́хъ , ꙗ҆́кѡ гдⷭ҇ь бг҃ъ і҆и҃левъ вни́детъ и҆́ми , и҆ бꙋ́дꙋтъ затворе́на . занѐ и҆гꙋ́менъ се́й сѧ́детъ в̾ ни́хъ снѣ́сти хлѣ́бъ . по пꙋтѝ є҆ла́мскихъ вра́тъ вни́детъ , и҆ по пꙋтѝ є҆гѡ̀ и҆зы́детъ . и҆ введе́ мѧ на пꙋ́ть вра́тъ ст҃ы́хъ , и҆́же к̾ сѣ́верꙋ прѧ́мѡ хра́мꙋ . и҆ ви́дѣхъ , и҆ сѐ и҆спо́лнисѧ сла́вы хра́мъ гдⷭ҇нь .

Ѿ= при́тчей , чте́нїе .=

Премꙋ́дрость созда̀ себѣ̀ хра́мъ , и҆ оу҆твердѝ сто́лпъ се́дмь . закла̀ своѧ̀ же́ртвенаѧ , и҆ черпа̀ в̾ ча́ши свое́й вино̀ , и҆ оу҆гото́ва свою̀ трапе́зꙋ . посла̀ своѧ̀ рабы̀ , созыва́ющи с̾ высо́кимъ проповѣ́данїемъ на ча́шꙋ , гл҃ющи , и҆́же є҆́сть безꙋ́менъ , да оу҆клони́тсѧ ко мнѣ̀ . и҆ тре́бꙋющимъ оу҆ма̀ речѐ , прїиди́те и҆ ꙗ҆ди́те мо́й хлѣ́бъ , и҆ пі́йте вино̀ є҆́же че́рпахъ ва́мъ . ѡ҆ста́вите безꙋ́мїе , и҆ жи́ви бꙋ́дете . взыщи́те премꙋ́дрость , да поживетѐ . и҆спра́вите вѣ́дѣнїи в̾ ра́зꙋмѣ . кажа́и ѕлы́ѧ , прїе́млетъ себѣ̀ без̾че́стїе . ѡ҆блича́ѧи же нечести́ваго порече́тъ себѐ . ѡ҆бличе́нїе бо нечести́вомꙋ мозо́лїе є҆мꙋ̀ . не ѡ҆блича́й ѕлы́хъ , да не воз̾ненави́дѧтъ тебѐ . ѡ҆блича́й премꙋ́дра , и҆ возлю́битъ тѧ . да́й премꙋ́дрꙋ винꙋ̀ , и҆ премꙋ́дрѣе бꙋ́детъ . сказа́й пра́ведномꙋ , и҆ приложи́тъ прїима́ти . зача́ло премꙋ́дрости , стра́хъ гдⷭ҇нь , и҆ свѣ́тъ ст҃ы́хъ , ра́зꙋмъ . а҆ є҆́же разꙋмѣ́ти зако́нъ , по́мысла є҆́сть бл҃га , си́мъ бо ѻ҆́бразомъ поживе́ши мно́го лѣ́тъ , и҆ приложа́тътисѧ лѣ́та животꙋ̀ .

На литі́и , стихѣ́ры . гла́съ , ѕ҃ . Ро́ги грѣ́шныхъ сотро́шасѧ , и҆ лꙋ́цы и҆́хъ сокрꙋши́шасѧ . грѣхо́вною бо тмо́ю ѻ҆́чи помрачи́вше , и҆ дрꙋ́гъ дрꙋ́га ꙗ҆́кѡ сопроти́вна зрѧ́ще , ѻ҆рꙋ́жїемъ неми́лостивнѡ себѐ оу҆ѧзвлѧ́хꙋ . наро́ди же ви́дѣвше по́мощь твою̀ влⷣчце , на сопроти́вныхъ оу҆стреми́шасѧ , тебѐ на́ помощь призыва́юще . Ꙗ҆́коже и҆ногда̀ кро́ткїи дв҃дъ , сопроти́вѧщагосѧ го́рдаго голїа́да , си́лою сн҃а твоегѡ̀ препоѧ́савсѧ низложѝ . та́кожде и҆ лю́дїе твоѝ пречⷭ҇таѧ , и҆мꙋ́ще ѻ҆́бразъ тво́й честны́и , пресла́внѡ ѡ҆долѣ́нїе показа́ша . Чꙋ́днаѧ побѣ́да и҆ ди́вное ѡ҆долѣ́нїе , честны́ѧ и҆ко́ны твоеѧ̀ пречⷭ҇таѧ мт҃и сло́ва , оу҆дивлѧ́етъ оу҆́мъ и҆ оу҆жаса́етъ по́мыслъ . без̾ѻ҆рꙋ́жнїи бо ѻ҆рꙋ́жныхъ побѣжда́хꙋ , си́лою твое́ю дв҃о всепѣ́таѧ , и҆ посо́бїемъ бжⷭ҇твенагѡ зра́ка твоегѡ̀ , во спасе́нїе дш҃а́мъ на́шимъ . сла́ва , и҆ ны́нѣ . гла́съ , то́йже . Сѐ де́нь и҆збавле́нїѧ на́шегѡ наста̀ , и҆ сме́рти премѣне́нїе . ра́дꙋйтесѧ собо́ри дне́сь вели́кагѡ нова̀ гра́да , и҆ веселѧ́щесѧ торжествꙋ́йте . и҆́же бо на на́съ подви́гшїисѧ , коне́чнѣ бг҃ора́нными ꙗ҆́звами оу҆ѧзви́вшесѧ . тѣ́мже пречⷭ҇тѣй , и҆ и҆з̾ неѧ̀ нетлѣ́ннѡ воплоще́нномꙋ сло́вꙋ вопїе́мъ , і҆с҃е всеси́льне , мл҃твами ро́ждьшїѧ тѧ спасѝ всѣ́хъ на́съ , ꙗ҆́кѡ милосе́рдъ .

На стихо́внѣ , стихѣ́ры . гла́съ , а҃ . Ꙗ҆́коже дре́вле во і҆єрⷭ҇ли́мѣ зороваве́лемъ , держа́внаѧ ти десни́ца чꙋдодѣ́йствоваше гдⷭ҇и , мно́жество бесчи́сленое проти́вныхъ побѣдѝ . та́кожде и҆ си́хъ низложѝ прише́дшихъ разори́ти гра́дъ , є҆го́же и҆скꙋпѝ кро́вїю свое́ю сло́ве . да разꙋмѣ́ютъ ѿ дѣ́лъ , ꙗ҆́кѡ ты̀ и҆зба́витель с̾ на́ми є҆сѝ .

сти́хъ : воскрⷭ҇нѝ гдⷭ҇и в̾ поко́й тво́й ,꙳ ты̀ и҆ кїѡ́тъ ст҃ы́ни твоеѧ̀ . Ди́вна правосла́вныхъ торжества̀ , дне́сь сте́кшесѧ ѱало́мскаѧ пѣ́нїѧ принесе́мъ гл҃юще . воскрⷭ҇нѝ гдⷭ҇и в̾ поко́й тво́й , ты̀ и҆ кїѡ́тъ ст҃ы́ни твоеѧ̀ . ꙗ҆́кѡ побѣ́дꙋ дарова̀ , ѻ҆́бразъ пречⷭ҇тыѧ ти мт҃ре сло́ве . є҆ѧ́же мл҃твами , і҆с҃е всеси́льне , спасѝ дш҃а на́ша .

сти́хъ : клѧ́тсѧ гдⷭ҇ь дв҃дꙋ и҆́стиною ,꙳ и҆ не ѿве́ржетсѧ є҆ѧ̀ . Стрѣло́ю стрѣли́вшихъ неразꙋ́мнѣ , ѻ҆́бразꙋ твоемꙋ̀ пречⷭ҇таѧ , бг҃ора́нною стрѣло́ю тѣ́хъ оу҆ѧзвѝ , не то́кмѡ сердца̀ , но и҆ дш҃а . и҆ и҆сто́чникъ чⷭ҇тны́ѧ и҆ко́ны твоеѧ̀ , тѣ́мъ неꙋтѣ́шимыи пла́чь наведѐ . на́мъ же лю́демъ твои́мъ ра́дость ве́лїю сотворѝ и҆ко́на твоѧ̀ пречⷭ҇таѧ мт҃и сло́ва . є҆ѧ́же ра́ди спасѝ дш҃а на́ша .

сла́ва , и҆ нн҃ѣ . гла́съ , и҃ . Мнѧ́щесѧ непокори́вїи , ѿ ѻ҆снова́нїѧ разори́ти гра́дъ тво́й пречⷭ҇таѧ , не разꙋмѣ́вше по́мощь твою̀ влⷣчце . но си́лою твое́ю низложе́ни бы́ша , на бѣжа́нїе оу҆стремлѧ́хꙋсѧ . и҆ ꙗ҆́коже оу҆́зами желѣ́зными слѣпото́ю свѧ́зани бы́вше , и҆ мра́комъ ꙗ҆́коже дре́вле є҆гѵ́петъ ѡ҆бьѧ́ти не разꙋмѣ́вше , до́ндеже и҆ коне́чнѣ побѣжде́ни бы́ша . тѣ́мже чи́стою вѣ́рою сла́вимъ тѧ̀ . и҆ сн҃ꙋ твоемꙋ̀ любе́знѡ вопїе́мъ , мл҃твами ро́ждьшїѧ тѧ , і҆с҃е всеси́льне , неи҆зрече́ннаѧ ра́досте , сохранѧ́й гра́дъ тво́й невреди́мъ , ꙗ҆́кѡ милосе́рдъ и҆ чл҃колю́бецъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Ꙗ҆́кѡ неѡ҆бори́мꙋю стѣ́нꙋ и҆ и҆сто́чникъ чꙋде́съ , стѧжа́вше тѧ рабѝ твоѝ бцⷣе пречи́стаѧ , сопроти́вныхъ ѡ҆полче́нїѧ низлага́емъ . тѣ́мже мо́лимъ тѧ , ми́ръ гра́дꙋ твоемꙋ̀ да́рꙋй , и҆ дш҃а́мъ на́шимъ ве́лїю млⷭ҇ть . гⷤ . а҆́ще нѣ́сть бдѣ́нїе . глаго́лемъ , тропа́рь , аⷤ .

На оу҆́трени , на бг҃ъ гдⷭ҇ь , тропа́рь , пра́здникꙋ , три́жды . По а҃ , стихоло́гїи , сѣда́ленъ . гла́съ , д҃ . Ѻ҆́чи мы́сленыѧ ѡ҆чи́стивше , прїиди́те ли́цы вели́каго нова̀ гра́да дне́сь , торжествꙋ́имъ свѣ́тлѡ . чтꙋ́ще бг҃оѻ҆трокови́цꙋ , добро́тꙋ і҆а́кѡвлю , и҆ невѣ́стꙋ всѣ́хъ цр҃ѧ хрⷭ҇та̀ бг҃а на́шегѡ . сїѧ́ бо показа́сѧ нб҃о , и҆ кра́снаѧ пола́та , и҆ цр҃ковь ѡ҆дш҃евле́на . и҆ сеѧ̀ си́лою проти́вныхъ побѣжда́емъ . сла́ва , и҆ ны́нѣ , то́йже .

По в҃ , стихоло́гїи , сѣда́ленъ . гла́съ , а҃ . Пречⷭ҇таѧ твоѧ̀ и҆ко́на бцⷣе дв҃о , врачевство̀ гра́дꙋ твоемꙋ̀ дарова́сѧ дх҃о́вное . к̾ не́йже прилага́юще главꙋ̀ и҆ ѻ҆́чи и҆ срⷣце , покланѧ́емсѧ и҆ почита́емъ , и҆ ѡ҆блобыза́емъ и҆ чте́мъ , и҆сцѣле́нїй бл҃года́ть почерпа́юще . и҆ недꙋ́гъ тѣле́сныхъ , и҆ дш҃е́вныхъ страсте́й твои́ми мл҃твами свобожда́емсѧ . сла́ва , и҆ ны́нѣ , то́йже .

По полїєлеѡ́сѣ , сѣда́ленъ . гла́съ , и҃ . Ꙗ҆́же нб҃съ превы́шши сꙋ́щи , и҆ херꙋви́мъ вои́стинꙋ сла́внѣйши . и҆ всеѧ̀ тва́ри честнѣ́йши дв҃о пречⷭ҇таѧ . дне́сь бл҃года́рственаѧ рабѝ твоѝ прино́симъ , ѻ҆́бразꙋ честна́гѡ ти подо́бїѧ . ты́ бо стра́ннꙋю побѣ́дꙋ , и҆ ди́вное ѡ҆долѣ́нїе гра́дꙋ твоемꙋ̀ дарова̀ . тѣ́мже согла́снѡ пою́ще вопїе́мъ ти , влⷣчце бцⷣе молѝ хрⷭ҇та̀ бг҃а грѣхо́въ ѡ҆ставле́нїе дарова́ти . тебе́ бо наде́жꙋ и҆́мамы рабѝ твоѝ .= сла́ва , и҆ ны́нѣ , то́йже .=

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . слы́ши дщѝ и҆ ви́ждь , и҆ приклонѝ оу҆́хо твоѐ . сти́хъ . ѿры́гнꙋ срⷣце моѐ сло́во бл҃го .= всѧ́ко дыха́нїе . =є҆ѵⷢ҇а́лїе , ѿ лꙋкѝ . заⷱ҇ , д҃ . ѱл҃о́мъ , н҃ . сла́ва . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . моли́твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . Весели́тесѧ лю́дїе , и҆ всѝ правосла́внїи собо́ри вели́кагѡ нова̀ гра́да дне́сь , и҆ рꙋка́ми восплещи́те ꙗ҆зы́цы с̾ весе́лїемъ . се́бо цр҃ца цр҃ѧ хрⷭ҇та̀ ро́ждьшаѧ , ст҃лю ꙗ҆́вльсѧ чꙋ́днымъ ѻ҆́бразомъ . дерза́ти наро́домъ повелѣва́етъ , ꙗ҆́коже нѣ́кїи воево́да . и҆́же в̾ печа́ли сꙋ́щимъ , тогда̀ ра́дость сотворѝ . тѣ́мъ сопроти́вныхъ побѣди́вше , тебѣ̀ ра́дость ро́ждьшей всѣ́мъ , любо́вїю вопїе́мъ дв҃о пречⷭ҇таѧ , молѝ спасти́сѧ дш҃а́мъ на́шимъ .

Кано́на два̀ . і҆рмо́съ , а҃ гѡ кано́на , по двⷤа . тропарѝ , во ѡ҆бою̀ , на в҃і . Кано́нъ бцⷣѣ . творе́нїе сщ҃е́нно и҆́нока пахо́мїѧ логоѳе́та . є҆мꙋ́же краегране́сїе сицево̀ : да́ждь ми сло́во сло́ве бж҃їи восхвали́ти ро́ждьшꙋю тѧ̀ . гла́съ , ѕ҃ . пѣ́снь , а҃ . і҆рмо́съ . Волно́ю морско́ю скры́вшагѡ дре́вле , гони́телѧ мꙋчи́телѧ , под̾ земле́ю скры́ша , спасе́ныхъ дѣ́ти . но мы̀ ꙗ҆́кѡ ѻ҆трокови́ца гдⷭ҇ви пое́мъ , сла́вно бо просла́висѧ .

запѣ́въ : Прест҃а́ѧ гжⷭ҇е бцⷣе , спасѝ на́съ . Да ра́дꙋетсѧ ра́достїю , бжⷭ҇твеное мно́жество новагра́да дне́сь , зрѧ́ще те́плꙋю застꙋ́пницꙋ , стра́ннꙋ побѣ́дꙋ да́рꙋющꙋ на сопроти́вныхъ , и҆ да пое́тъ бжⷭ҇твеными пѣ́сньми . Ꙗ҆́коже лѣ́ствицꙋ превысо́кꙋ зри́мъ дне́сь , и҆ко́нꙋ твою̀ дв҃о всенепоро́чнаѧ , ю҆́же сопроти́внѣ зрѧ́щїи , коне́чнѣй слѣпотѣ̀ преда́шасѧ . мы́же къ не́й вѣ́рнѣ взира́юще , ѿ бѣ́дъ и҆збавлѧ́емсѧ . Въ ржⷭ҇твѣ̀ тлѝ не прїи́мши , тлѣ́нїѧ всѣ́хъ на́съ дв҃о и҆змѣнѝ . печа́ли оу҆ставлѧ́ющи мт҃рьнимъ премѣне́нїемъ бг҃ора́дованнаѧ .

Дрꙋгі́и , кано́нъ . гла́съ , и҃ . і҆рмо́съ . Посѣче́ныи несѣко́мое пресѣчѐ , и҆ ви́дѣ сл҃нце зе́млю , є҆ѧ́же нѣ́сть ви́дѣло , лю́тагѡ врага̀ вода̀ потопи́ла є҆́сть , и҆ непроходи́мое про́йде і҆зра́иль , пѣ́снь же воспѣва́шесѧ гдⷭ҇ви пое́мъ , сла́внѡ бо просла́висѧ .

запѣ́въ : Прест҃а́ѧ гжⷭ҇е бцⷣе , спасѝ на́съ . Бжⷭ҇твеныѧ си́лы же́злъ дне́сь преѡ҆блиста́ѧ бл҃года́тїю . и҆ свѣ́томъ без̾мѣ́рнымъ свѧ́то жили́ще . чꙋ́до па́че є҆стества̀ ѻ҆́браза твоегѡ̀ пречⷭ҇таѧ . Ви́дѣхомъ пресла́вное дне́сь зна́менїе бы́вшее , ѿ бжⷭ҇твенагѡ тѝ зра́ка мт҃и бж҃їѧ . па́че же и҆ сопроти́внїи ѻ҆нѝ ꙗ҆́кѡ ви́дѧще со ѻ҆́бразомъ и҆ си́лꙋ ѿвраща́ющꙋ , а҆́бїе тѣле́сными ѻ҆чи́ма ѡ҆слѣпо́ша . Наде́ждꙋ и҆мꙋ́ще на тебѐ , бг҃ороди́тельнице , и҆ несꙋмѣ́ннꙋ вѣ́рꙋ гра́да сегѡ̀ наро́ди , ꙗ҆́кѡ цр҃ьскїи ски́петръ , тебѐ гра́дꙋ забра́ла положи́ша , дв҃о неи҆скꙋсобра́чнаѧ . Ꙗ҆́коже жи́вꙋ мт҃рь сло́вꙋ ви́дѣвше тѧ , сꙋемꙋ́дреныхъ многочи́сленое во́инство , ꙗ҆́коже бо́дренаго блюсти́телѧ , на забра́лѣхъ ѡ҆бстои́ма вѣ́рными , а҆́бїе рꙋ́цѣ и҆́хъ с̾ про́чими оу҆́ды ѡ҆слабѣ́ша .

пѣ́снь , г҃ . і҆рмо́съ . Тобо́ю хрⷭ҇тѐ нб҃са̀ оу҆твержа́ема всѧ̀ , сло́во бж҃їе и҆ си́ла , и҆сповѣ́даютъ сла́вꙋ неи҆зрече́ннꙋ , и҆ вседѣ́тельныѧ рꙋкѝ твоеѧ̀ сотворе́нїе . нѣ́сть бо прест҃а ра́звѣ тебѐ гдⷭ҇и . Ꙗ҆́кѡ ѕвѣ́ри оу҆стреми́вшесѧ на ста́до твоѐ пречⷭ҇таѧ . но ты̀ тѣ́хъ че́люсти сокрꙋшѝ , и҆ си́хъ не́мощны до конца̀ показа̀ . Ѻ҆́бщаго па́стырѧ , влⷣкꙋ хрⷭ҇та̀ поро́ждьши дв҃о неи҆скꙋсобра́чнаѧ . томꙋ̀ моли́сѧ настоѧ́щагѡ гнѣ́ва и҆зба́вити на́съ , и҆ проти́вныхъ ѡ҆бстоѧ́нїѧ влⷣчце . Млⷭ҇тиваѧ млⷭ҇тиваго ро́ждьши сп҃са , ви́ждь ѡ҆ѕлобле́нїе и҆ воздыха́нїе люде́й твои́хъ , оу҆скорѝ пречⷭ҇таѧ оу҆ще́дрити ны .

и҆́нъ , і҆рмо́съ . Оу҆тверже́и нб҃са̀ в̾ нача́тцѣ ра́зꙋмомъ , и҆ зе́млю на вода́хъ ѡ҆снова́выи . на ка́мени мѧ хрⷭ҇тѐ цр҃ко́внѣмъ оу҆твердѝ , ꙗ҆́кѡ нѣ́сть ст҃а , па́че тебѐ чл҃колю́бче . Пе́рвѣе оу҆́бѡ вседержи́тельнаѧ ти десни́ца гдⷭ҇и , мѡѷсе́ѡмъ чꙋдодѣ́йствꙋѧ , помрача́ше є҆гѵ́петъ . та́кожде и҆ здѣ̀ прише́дшихъ разори́ти гра́дъ тво́й , ѻ҆́бразомъ мт҃ре твоеѧ̀ помрача́еши . Ꙗ҆́коже оу҆слы́ша чꙋ́дный а҆рхїєпкⷭ҇пъ ѡ҆бѣща́нїе твоѐ бг҃ороди́тельнице , бл҃говѣствова́ше наро́домъ ра́дость гл҃ѧ , дерза́йте . мт҃и бо бг҃а на́шегѡ с̾ на́ми є҆́сть . Пресла́внꙋю побѣ́дꙋ , и҆спо́лненꙋ оу҆́жаса ви́дѣвше , и҆́же тогда̀ наро́ди на сопроти́вныхъ ѡ҆полчи́вшесѧ . и҆ а҆́бїе до конца̀ тѣ́хъ побѣди́ша . Ны́нѣ наста̀ дн҃ь весе́лїѧ , зна́менїѧ и҆ко́ны твоеѧ̀ дв҃о бг҃ороди́тельнице , и҆ пра́здникъ свѣ́телъ . є҆го́же соверша́юще вопїе́мъ , нѣ́сть пречⷭ҇ты па́че тебѐ бг҃оневѣ́сто .

сѣда́ленъ . гла́съ , и҃ . Ꙗ҆́же дре́вле проро́ки проповѣ́дасѧ две́рь нбⷭ҇наѧ , неѡ҆пали́маѧ кꙋпина̀ , свѣ́щникъ многосвѣ́тлыи , злата́ѧ кади́льница , рꙋ́чка и҆ же́злъ , пресла́внѡ дне́сь чꙋ́дномꙋ ст҃лю ꙗ҆влѧ́етсѧ , наро́домъ дерза́ти повелѣва́етъ , и҆ ди́внꙋю побѣ́дꙋ показꙋ́етъ . тѣ́мже бл҃года́рнаѧ то́й возопїе́мъ , дв҃о бг҃ороди́тельнице , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти на́мъ . тебе́ бо и҆́мамы наде́ждꙋ рабѝ твоѝ . сла́ва , и҆ ны́нѣ , то́йже .

пѣ́снь , д҃ . і҆рмо́съ . Оу҆диви́сѧ тво́й ра́зꙋмъ ѿ менѐ , оу҆слы́шавшꙋ пресла́внаѧ велѣ́нїѧ смотре́нїѧ твоегѡ̀ , оу҆крѣпи́жесѧ воз̾любле́нїемъ твоегѡ̀ схожде́нїѧ , ты́ бо моеѧ̀ нищеты̀ не ѿве́ржесѧ . Почита́ющїи тѧ гра́дъ пречⷭ҇таѧ , и҆ по́долгꙋ сла́вѧщїи , ѡ҆гражда́й ѿ безбо́жныхъ чⷭ҇таѧ и҆ноплеме́нникъ . ты́ бо томꙋ̀ пречⷭ҇таѧ бога́тство неѿе́млемо є҆сѝ , покро́въ же и҆ сла́ва . Мнѧ́щїисѧ ꙗ҆́коже дре́вле і҆єрихо́нъ разори́ти гра́дъ тво́й , пречⷭ҇таѧ мт҃и сло́ва , са́ми коне́чнѣй поги́бели преда́шасѧ , си́лою и҆з̾ тебѐ воплоще́ннагѡ влⷣчце . При́зри чⷭ҇таѧ , спасѝ пою́щїѧ тѧ , потреби́тисѧ хотѧ́ща ѿ сопроти́вныхъ . тѣ́мже наше́дшагѡ преще́нїѧ и҆зба́ви бг҃ороди́тельнице .

и҆́нъ , і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Є҆гда̀ оу҆слы́шаша наро́ди чꙋ́дное ѡ҆бѣща́нїе побѣ́ды , ра́достїю неи҆зрече́нною и҆спо́лнившесѧ . и҆ ꙗ҆́коже крѣ́пка нѣ́коего храни́телѧ и҆мꙋ́ще , сопроти́вныхъ побѣжда́хꙋ . Многобога́тныи да́ръ , и҆ неи҆стощи́мое сокро́вище дарова́лъ є҆сѝ гра́дꙋ твоемꙋ̀ , и҆ко́нꙋ мт҃ре твоеѧ̀ сло́ве . и҆ сеѧ̀ по́мощїю проти́вныхъ низлага́емъ . Въ бжⷭ҇твенѣмъ хра́мѣ твое́мъ бг҃ора́дованнаѧ , и҆дѣ́же чꙋдотво́рнаѧ твоѧ̀ и҆ко́на положена̀ бы́сть , и҆сцѣле́нїѧ вѣ́рою приходѧ́щимъ подава́етъ . Собо́ри вѣ́рныхъ и҆ всѧ́ко состоѧ́нїе чл҃ческое весели́тсѧ , совокꙋ́пльшесѧ в̾ чⷭ҇тнѣ́мъ хра́мѣ твое́мъ , зрѧ́ще в̾ не́мъ ꙗ҆́коже пресвѣ́тлое сл҃нце , чⷭ҇тны́и ѻ҆́бразъ тво́й влⷣчце .

пѣ́снь , є҃ . і҆рмо́съ . Сою́зомъ любвѐ свѧзꙋ́еми а҆пⷭ҇ли , владꙋ́щемꙋ всѣ́ми себѐ хрⷭ҇тꙋ̀ преда́вше , красны̀ но́ги оу҆мыва́хꙋ , бл҃говѣствꙋ́юще всѣ́мъ ми́ръ . Те́плаѧ застꙋ́пнице къ тебѣ̀ прибѣга́ющимъ . и҆ ненадѣ́ющимсѧ наде́жда , ви́ждь ѡ҆ѕлобле́нїе люде́й свои́хъ , и҆ пода́ждь по́мощь пречⷭ҇таѧ . Ꙗ҆́же ѻ҆́гнь ро́ждьшаѧ бжⷭ҇твеныи дв҃о , проти́вныхъ пречⷭ҇таѧ мл҃твою твое́ю ѻ҆гне́мъ попалѝ , ꙗ҆́кѡ мт҃и сꙋ́щи зижди́телѧ всепѣ́таѧ . Чи́стаѧ бг҃оневѣ́сто , недоꙋмѣ́нныѧ лю́ди оу҆ще́дри , мт҃рьними мольба́ми , и҆ є҆́же на ны̀ сопроти́вныхъ ѡ҆бстоѧ́нїѧ , разорѝ вско́рѣ мл҃твами ти .

и҆́нъ , і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Ꙗ҆́коже и҆ногда̀ в̾ црⷭ҇твꙋющемъ гра́дѣ , неи́стовѧщагосѧ хꙋ́лителѧ , хотѧ́щагѡ ѻ҆́бразъ тво́й низложи́ти , тогѡ̀ а҆́бїе коне́чнѣ оу҆ѧзвѝ . та́кожде и҆ ны́нѣ показа̀ бг҃ороди́тельнице . Ꙗ҆́кѡ щито́мъ ѡ҆гражда́еми , непобѣди́мою тѝ си́лою дв҃о , сопроти́вныхъ побѣжда́ютъ неи҆зрече́нное мно́жество , на тѧ̀ наде́ждꙋ и҆мꙋ́щїи лю́дїе твоѝ всепѣ́таѧ . Тѧ̀ бога́тство неи҆стощи́мое и҆мꙋ́ще , и҆ и҆сцѣле́нїемъ и҆сто́чникъ , вѣ́рою прибѣга́ющїи хра́мꙋ твоемꙋ̀ , и҆дѣ́же пребыва́етъ чⷭ҇тны́и ѻ҆́бразъ тво́й влⷣчце .

пѣ́снь , ѕ҃ . і҆рмо́съ . Ꙗ҆́тъ бы́сть но неꙋде́ржанъ в̾ пе́рсѣхъ ки́товѣхъ і҆ѡ́на , тво́й бо ѻ҆́бразъ носѧ̀ , пострада́вша и҆ погребе́нїю дана̀ , ꙗ҆́кѡ ѿ черто́га ѿ ѕвѣ́рѧ и҆з̾ше́дъ . приглаша́ше же кꙋстоді́и , хранѧ́щїи всꙋ́е лжꙋ̀ , млⷭ҇ти ва́шеѧ ѡ҆ста́вили є҆стѐ . И҆зба́ви ꙗ҆зы́ческагѡ наше́ствїѧ гра́дъ тво́й пречⷭ҇таѧ . и҆ не преда́ждь до конца̀ поги́бнꙋти наслѣ́дїю твоемꙋ̀ всепѣ́таѧ . но си́лою и҆́же и҆з̾ тебѐ рожде́нагѡ проти́вныхъ низложѝ . Многосогрѣ́шшїѧ ти не пре́зри , но прїимѝ мольбꙋ̀ мт҃ре твоеѧ̀ ѡ҆ на́съ ще́дре . да не похва́лѧтсѧ сопроти́внїи , гдѣ̀ є҆́сть бг҃ъ и҆́хъ гл҃юще . но да разꙋмѣ́ютъ всѝ , ꙗ҆́кѡ ты̀ и҆зба́витель с̾ на́ми є҆сѝ . Ны́нѣ по́мощи прїи́де вре́мѧ . нн҃ѣ премѣне́нїю потре́ба чⷭ҇таѧ , сн҃ꙋ твоемꙋ̀ и҆ бг҃ꙋ . ꙗ҆́кѡ да оу҆ще́дритъ согрѣши́вшїѧ , и҆ належа́щагѡ гнѣ́ва и҆зба́витъ .

и҆́нъ , і҆рмо́съ . Мл҃твꙋ пролїю̀ ко́ гдⷭ҇ꙋ , и҆ томꙋ̀ воз̾вѣщꙋ̀ печа́ль мою̀ . ꙗ҆́кѡ ѕѡ́лъ дш҃а моѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ молю́сѧ ꙗ҆́кѡ і҆ѡ́на , ѿ тлѝ бж҃е мо́й воз̾веди́ мѧ . И҆́же тогда̀ чꙋ́дномꙋ ст҃лю ꙗ҆́вльсѧ стра́ннымъ ѻ҆́бразомъ , на де́рзость подвиза́ѧ . наро́ди же неи҆зрече́нныѧ ра́дости и҆спо́лнившесѧ , ѻ҆рꙋ́жныхъ побѣжда́хꙋ влⷣчце . Зна́менїе стра́шно , и҆ ве́щь пресла́внꙋ , и҆ чꙋ́дное ѡ҆долѣ́нїе дне́сь пра́зднꙋюще лю́дїе твоѝ бцⷣе , похва́льнаѧ ꙗ҆́кѡ досто́йной похвалы̀ прино́симъ гл҃юще , ра́дꙋисѧ ѡ҆бра́дованнаѧ . Честнꙋ́ю и҆ко́нꙋ твою̀ , ра́достнымъ срⷣцемъ и҆ дш҃е́ю ѡ҆блобыза́емъ веселѧ́щесѧ . и҆ те́плою вѣ́рою прикаса́ющесѧ , и҆сцѣле́нїе почерпа́емъ .

конда́къ . гла́съ , д҃ . Честна́гѡ ѻ҆́браза твоегѡ̀ зна́менїе , пра́зднꙋюще лю́дїе твоѝ бг҃ороди́тельнице . и҆́мже ди́внꙋю побѣ́дꙋ на сопроти́вныхъ гра́дꙋ твоемꙋ̀ дарова́ла є҆сѝ , вѣ́рою взыва́емъ , ра́дꙋисѧ дв҃о хрⷭ҇тїа́нѡмъ похвало̀ . и҆́косъ . Разрѣшѝ тмꙋ̀ мои́хъ согрѣше́нїи , и҆́же во оу҆мѣ̀ мое́мъ лежа́щꙋю . и҆ твои́мъ мѧ свѣ́томъ просвѣтѝ дв҃о , ꙗ҆́кѡ да возмогꙋ̀ тебѣ̀ похвалꙋ̀ принестѝ , є҆ѧ́же ѻ҆ц҃ъ восхвалѝ , и҆ дх҃ъ ст҃ы́и ѡ҆сѣнѝ , сн҃ъ же и҆ сло́во бж҃їе всели́всѧ , и҆ нетлѣ́ннѡ ѿ пречⷭ҇тою ти бокꙋ̀ проше́дъ , съ чл҃ки поживѐ . тѣ́мже мы̀ грѣ́шнїи и҆ недосто́йнїи рабѝ твоѝ , дне́сь соверша́юще сщ҃е́нное торжество̀ , зна́менїѧ бы́вшагѡ честно́ю и҆ко́ною твое́ю , є҆ю́же пресла́внꙋю побѣ́дꙋ на сопроти́вныхъ гра́дꙋ твоемꙋ̀ дарова́ла є҆сѝ . и҆ ѿ си́хъ чꙋде́съ и҆спо́лнившесѧ , вмѣ́стѡ бл҃гово́нныхъ а҆рама́тъ , є҆ли́кѡ возмо́жнѡ на́мъ землены́мъ , похва́льнаѧ прино́симъ тебѣ̀ гл҃юще , ра́дꙋисѧ бцⷣе , ра́дость а҆́нг҃лѡмъ и҆ чл҃кѡмъ . ра́дꙋисѧ тве́рдаѧ наде́жде и҆ покро́ве гра́дꙋ твоемꙋ̀ . ра́дꙋисѧ ꙗ҆́кѡ проти́вныхъ си́лою твое́ю низлага́емъ . ра́дꙋисѧ разꙋ́мнагѡ сл҃нца мт҃и , вѣ́рныхъ просвѣща́юща , невѣ́рныхъ же помрача́юща . ра́дꙋисѧ дв҃о хрⷭ҇тїа́нѡмъ похвало̀ .

пѣ́снь , з҃ . і҆рмо́съ . Неи҆зрече́нное чꙋ́до и҆́же в̾ пещѝ и҆зба́вивыи , прпⷣбныѧ ѻ҆́троки и҆з̾ пла́мени , во́ гробѣ но́вѣ бездꙋ́шенъ полага́етсѧ , на спасе́нїе на́мъ пою́щимъ , и҆зба́вителю бж҃е бл҃гослове́нъ є҆сѝ . Вои́стинꙋ сокро́вище че́стнѡ гра́дꙋ твоемꙋ̀ , и҆ко́на твоѧ̀ пречⷭ҇таѧ дарова́сѧ . є҆ѧ́же и҆ са́ми зрѧ́ще чꙋдесѝ оу҆дивлѧ́емсѧ , и҆ сн҃ꙋ твоемꙋ̀ вопїе́мъ , и҆зба́вителю бж҃е блгⷭ҇ве́нъ є҆сѝ . Ꙗ҆́коже и҆ногда̀ ниневи́тѧны , покаѧ́нїѧ ра́ди пощади́въ сло́ве бж҃їи , про́повѣдїю і҆ѡ́ны проро́ка . та́кожде и҆ здѣ̀ показа̀ ѻ҆́бразомъ пречⷭ҇тыѧ ти мт҃ре хрⷭ҇тѐ , вопїю́щимъ , и҆зба́вителю бж҃е бл҃гослове́нъ є҆сѝ . Хра́мъ тѧ бж҃їи влⷣчце вѣ́дꙋще , во ст҃ѣ́мъ хра́мѣ твое́мъ , рꙋ́цѣ нечи́стѣи дви́жемъ на мл҃твꙋ . ви́ждь ѡ҆ѕлобле́нїе на́ше , и҆ пода́ждь на́мъ по́мощь .

и҆́нъ , і҆рмо́съ . Бж҃їѧ схожде́нїѧ ѻ҆́гнь оу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́троцы , в̾ пещѝ ра́дованною ного́ю , ꙗ҆́кѡ во́ свѣтѣ ликова́хꙋ пою́ще , блгⷭ҇ве́нъ бг҃ъ ѻ҆ц҃ъ на́шихъ . Ви́ждь пречⷭ҇таѧ ѡ҆ѕлобле́нїе ра́бъ свои́хъ , и҆ не ѿри́ни въ коне́цъ . твое́бо є҆смы̀ достоѧ́нїе , и҆ твое́ю наде́ждею крѣпи́мсѧ . да всѝ вопїе́мъ тѝ , ра́дꙋисѧ ѡ҆бра́дованнаѧ . Свѣтоно́снаѧ бл҃года́ть , и҆ и҆сцѣле́нїѧ дарова́нїе , даде́сѧ гра́дꙋ твоемꙋ̀ ѻ҆́бразъ тво́й пречⷭ҇таѧ . є҆го́же любе́знѡ ѡ҆блобыза́юще весели́мсѧ .

пѣ́снь , и҃ . і҆рмо́съ . Оу҆жасни́сѧ боѧ́исѧ нб҃о , и҆ да подви́жатсѧ ѡ҆снова́нїѧ землѝ . сѐ оу҆́бѡ в̾ мертвецѣ́хъ вмѣнѧ́етсѧ и҆́же в̾ вы́шнихъ живы́и , и҆ во́ гробѣ ма́лѣ ѡ҆битова́етъ . є҆го́же дѣ́ти бл҃гослови́те , сщ҃е́ннїи по́йте , и҆ превозноси́те є҆гѡ̀ во́ вѣки . Собезнача́льнаго сло́ва ѻ҆ц҃ꙋ , дв҃о пречⷭ҇таѧ нетлѣ́ннѡ породила̀ є҆сѝ , и҆ ѿ сосцꙋ̀ пита́ла є҆сѝ , тогѡ̀ молѝ бг҃ороди́тельнице , ѿ сопроти́вныхъ ѡ҆бстоѧ́нїи спастѝ пою́щихъ тѧ , и҆ превозносѧ́щихъ во́ вѣки . Є҆го́же прови́дѣ на прⷭ҇то́лѣ превысо́цѣ и҆са́їѧ , сегѡ̀ в̾ ложеснѣ́хъ дв҃о вмѣсти́ла є҆сѝ и҆ нетлѣ́ннѡ породѝ . є҆го́же молѝ спасти́сѧ гра́дꙋ твоемꙋ̀ , пою́щꙋ , дѣ́ти блгⷭ҇ви́те , сщ҃е́ннїи по́йте , и҆ превозноси́те є҆гѡ̀ во́ вѣки . Є҆ди́на сꙋ́щи бл҃га́ѧ , пребл҃го́е сло́во молѝ прилѣ́жнѡ , настоѧ́щагѡ гнѣ́ва гра́дꙋ твоемꙋ̀ и҆зба́витисѧ , несꙋмѣ́нною вѣ́рою сн҃ꙋ твоемꙋ̀ пою́щꙋ . дѣ́ти бл҃гослови́те , сщ҃е́ннїи по́йте , и҆ превозноси́те є҆гѡ̀ во́ вѣки .

и҆́нъ , і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃очести́вымъ лю́тѣ раз̾жжѐ . си́лою же лꙋ́чшею спасе́ныхъ ви́дѣвъ , творцꙋ̀ и҆ и҆зба́вителю вопїѧ́ше , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Ѡ҆ всѣ́хъ наро́ди недоꙋмѣ́вшесѧ к̾ тебѣ̀ прибѣга́ютъ вопїю́ще , не преда́ждь на́съ враго́мъ на́шимъ влⷣчце бцⷣе . но держа́вною сѝ рꙋко́ю тѣ́хъ низложѝ , да тѧ̀ непреста́ннѡ пое́мъ , и҆ превозно́симъ во́ вѣки . Ꙗ҆́кѡ нерꙋши́мое забра́ло и҆мꙋ́ще гра́дꙋ и҆ко́нꙋ твою̀ пречⷭ҇таѧ , сопроти́вѧщихсѧ низлага́емъ . и҆ сн҃ꙋ твоемꙋ̀ вопїе́мъ , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Чꙋ́дномꙋ ст҃лю ꙗ҆ви́сѧ пречⷭ҇таѧ , и҆ с̾ про́чимъ наро́домъ чꙋдесѝ оу҆ди́вльсѧ , а҆́бїе с̾ ра́достїю ко ѻ҆́бразꙋ твоемꙋ̀ прибѣга́етъ . пода́ждь по́мощь влⷣчце гл҃ющимъ , дѣ́ти бл҃гослови́те , сщ҃е́ннїи воспо́йте лю́дїе , и҆ превозноси́те є҆гѡ̀ во́ вѣки . Что́ти принесе́мъ пречⷭ҇таѧ , ѿ всеѧ̀ тва́ри сла́вимѣй недоꙋмѣ́емсѧ влⷣчце . то́чїю є҆́же гаврїи́лъ на́съ наꙋчѝ , ра́дꙋисѧ ѡ҆бра́дованнаѧ .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твенныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́съ . Стра́нствїѧ влады́чнѧ , и҆ без̾сме́ртнѣй трапе́зѣ , на го́рнѣмъ мѣ́стѣ , высо́кими оу҆мы̀ вѣ́рнїи прїиди́те воспрїи́мемъ воз̾ше́дша сло́ва , ѿ́ слова наꙋ́чшесѧ , є҆го́же велича́емъ . Млрⷭ҇дымъ ѻ҆́комъ свы́ше , при́зри на́ градъ и҆ лю́ди твоѧ̀ пречⷭ҇таѧ . и҆ны́ѧ бо по́мощи не и҆́мамы , то́кмѡ тебѐ всенепоро́чнаѧ , да тѧ̀ всѝ мт҃рь бж҃їю непреста́ннѡ велича́емъ . Є҆ди́на ро́ждьшаѧ сло́во воплоще́нное дв҃о всепѣ́таѧ , приснотекꙋ́щїи и҆сто́чникъ и҆сцѣле́нїемъ и҆злива́еши , вѣ́рою притека́ющимъ хра́мꙋ твоемꙋ̀ пречⷭ҇таѧ . Сѐ рабѝ твоѝ вопїе́мъ ти мт҃и бж҃їѧ , ѡ҆бы́чныѧ млⷭ҇ти твоѧ̀ на́ градъ и҆ лю́ди , млⷭ҇тивнѡ показꙋ́ющи , сопроти́вныхъ ѡ҆бстоѧ́нїи на́съ и҆змѣнѝ , да тѧ̀ всѝ непреста́ннѡ велича́емъ .

и҆́нъ , і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Сѐ вре́мѧ бл҃гопрїѧ́тнѡ и҆ дн҃ь спасе́нїѧ , зна́менїе и҆ко́ны твоеѧ̀ пречⷭ҇таѧ . є҆го́же пра́зднꙋюще свѣ́тлѡ , дх҃о́внѣ торжество̀ соверша́емъ . Ꙗ҆́кѡ бжⷭ҇твеною свѣ́тлостїю ѡ҆зарѧ́емꙋ , зри́мъ дне́сь пречⷭ҇таѧ и҆ко́нꙋ твою̀ честнꙋ́ю . є҆́йже вѣ́рою покланѧ́ющесѧ тѧ̀ велича́емъ . Мы́сли ѡ҆чи́стивше праз̾днолю́бнагѡ нова̀ гра́да собо́ри , со а҆рхїєре́йскимъ ли́комъ восхвали́те , и҆́же па́че наде́жди по́мощь на сопроти́вныхъ дарова́вшꙋю . Дв҃ьства твоегѡ̀ зна́менїе невреди́мѡ сохрани́въ сло́во бж҃їе , и҆з̾ тебѐ проше́дъ . сохранѝ гра́дъ тво́й невреди́мъ дв҃о всепѣ́таѧ , да тѧ̀ непреста́ннѡ велича́емъ .

свѣти́ленъ . Возжелѣ́въ твое́й добро́тѣ і҆с҃ъ пречⷭ҇таѧ в̾ тѧ̀ всели́сѧ . и҆ тебѐ застꙋ́пницꙋ гра́дꙋ твоемꙋ̀ сло́во бж҃їе дарова̀ . є҆го́же сохранѧ́й застꙋпле́нїемъ сѝ при́снѡ . ꙗ҆́кѡ да тѧ̀ оу҆бл҃жа́емъ , пренепоро́чнаѧ ѻ҆трокови́це . сла́ва , и҆ ны́нѣ , то́йже .

На хвали́тѣхъ , стихѣ́ры , на д҃ . гла́съ , ѕ҃ . Не поко́рство ра́зꙋма , и҆ го́рдостїю разже́гшесѧ ненака́заннїи , на ста́до твоѐ пречⷭ҇таѧ , є҆́же и҆скорени́ти гра́дъ , в̾ не́мже пречестны́и тво́й ѻ҆́бразъ водворѧ́етсѧ . но оу҆́бѡ показа́ла є҆сѝ , ꙗ҆́коже и҆ногда̀ сн҃ъ тво́й є҆вре́ѡмъ , досто́йнѡ в̾ пꙋсты́ни тѣлесы̀ па́дшимъ . Сѐ хра́мъ пресвѣ́телъ и҆ мѣ́сто сщ҃е́нїѧ , и҆дѣ́же честна́ѧ и҆ко́на мт҃ре твоеѧ̀ сло́ве , пристꙋпи́те чл҃цы , и҆ и҆сцѣле́нїе почерпи́те . ꙗ҆́кѡ спасе́нїе тоѧ̀ ра́ди на́мъ дарова́сѧ , и҆ и҆збавле́нїе ѿ сопроти́вныхъ , потреби́ти на́съ хотѧ́щихъ , но ті́и по проро́кꙋ потреби́шасѧ . Ꙗ҆́коже и҆ногда̀ кро́ткїи дв҃дъ , сопроти́вѧщагосѧ го́рдаго голїа́да , си́лою сн҃а твоегѡ̀ препоѧ́савсѧ низложѝ . та́кожде и҆ лю́дїе твоѝ пречⷭ҇таѧ , и҆мꙋ́ще ѻ҆́бразъ тво́й честны́и , пресла́внѡ ѡ҆долѣ́нїе показа́ша . Чꙋ́днаѧ побѣ́да и҆ ди́вное ѡ҆долѣ́нїе , честны́ѧ и҆ко́ны твоеѧ̀ пречⷭ҇таѧ мт҃и сло́ва , оу҆дивлѧ́етъ оу҆́мъ и҆ оу҆жаса́етъ по́мыслъ . без̾ѻ҆рꙋ́жнїи бо ѻ҆рꙋ́жныхъ побѣжда́хꙋ , си́лою твое́ю дв҃о всепѣ́таѧ , и҆ посо́бїемъ бжⷭ҇твенагѡ зра́ка твоегѡ̀ , во спасе́нїе дш҃а́мъ на́шимъ .

Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на , пѣ́снь г҃ ѧ , и҆ втора́гѡ , пѣ́снь ѕ҃ ѧ .

По вхо́дѣ , а҆́ще ли хра́мъ гдⷭ҇ьскїи : тропа́рь , хра́мꙋ , и҆ пра́здникꙋ . сла́ва , конда́къ , хра́мꙋ . и҆ ны́нѣ , пра́здникꙋ .

По вхо́дѣ , а҆́ще ли хра́мъ бцⷣѣ , и҆лѝ ст҃ы́мъ : тропа́рь , пра́здникꙋ . сла́ва , и҆ ны́нѣ . конда́къ , пра́здникꙋ . проки́менъ , пѣ́снь бцⷣы . вели́читъ дш҃а моѧ̀ гдⷭ҇а , и҆ воз̾ра́довасѧ дх҃ъ мо́й ѡ҆́ бз҃ѣ сп҃сѣ мое́мъ . сти́хъ . ꙗ҆́кѡ призрѣ̀ на смире́нїе рабы̀ своеѧ̀ , се́бо ѿ ны́нѣ блажа́тъ мѧ всѝ ро́ди . а҆пⷭ҇лъ , къ є҆вре́ѡмъ . заⷱ҇ , т҃к . а҆ллилꙋ́їѧ . слы́ши дщѝ и҆ ви́ждь , и҆ приклонѝ оу҆́хо твоѐ . сти́хъ . лицꙋ̀ твоемꙋ̀ помо́лѧтсѧ бога́тїи лю́дьстїи . є҆ѵⷢ҇а́лїе , ѿ лꙋкѝ . заⷱ҇ , н҃д . прича́стенъ . ча́шꙋ спасе́нїѧ прїимꙋ̀ , и҆ и҆́мѧ гдⷭ҇не призовꙋ̀ .

Подоба́етъ же вѣ́дати и҆ сѐ . а҆́ще и҆зво́литъ настоѧ́тель , зна́менїю прⷭ҇тѣ́й бцⷣѣ кꙋ́пно пѣ́ти с̾ великомч҃нкѡмъ і҆а́кѡвомъ , си́це :

на ма́лой вече́рни , на́ гдⷭ҇и возва́хъ , стⷯры , на д҃ . гла́съ , а҃ . поⷣ . нбⷭ҇нымъ чино́мъ . сла́ва , и҆ ны́нѣ , гла́съ , а҃ . на стихо́внѣ , стⷯры . гла́съ , в҃ . поⷣ . до́ме є҆вфра́ѳовъ , с̾ запѣ́вы и҆́хъ . сла́ва , и҆ ны́нѣ . гла́съ , а҃ . и҆ про́чее ѻ҆бы́чное . и҆ ѿпꙋ́стъ .

на вели́цѣй вече́рни , бл҃же́нъ мꙋ́жь , а҃ й , а҆нтиѳо́нъ . на́ гдⷭ҇и возва́хъ , стⷯры , бцⷣѣ , на д҃ . и҆ мч҃нкꙋ , на д҃ . сла́ва , мч҃нкꙋ . и҆ ны́нѣ , =бцⷣѣ . =вы́ходъ . проки́менъ , дню̀ . и҆ =чте́нїѧ бцⷣѣ . на литі́и стⷯры , бцⷣѣ . сла́ва , и҆ ны́нѣ , гла́съ , ѕ҃ . на стихо́внѣ стихѣ́ры , бцⷣѣ , со стихѝ и҆́хъ . =сла́ва , мч҃нкꙋ . и҆ нн҃ѣ , =бцⷣѣ . на бл҃гослове́нїе хлѣ́бомъ . тропа́рь , бцⷣѣ , гⷤ . а҆́ще ли нѣ́сть бдѣ́нїѧ . тропа́рь , мч҃нкꙋ . сла́ва , и҆ ны́нѣ , бцⷣѣ . =на оу҆́трени , на бг҃ъ гдⷭ҇ь , тропа́рь , бцⷣѣ , двⷤа . сла́ва , мч҃нкꙋ . и҆ ны́нѣ , бцⷣѣ . по каѳи́смахъ , сѣда́льны , бцⷣѣ . по полїєлеѡ́сѣ , сѣда́ленъ , бцⷣѣ . сла́ва , и҆ ны́нѣ , то́йже . проки́менъ , и҆ =є҆ѵⷢ҇а́лїе . по н҃ мъ ѱалмѣ̀ , стⷯра , бцⷣѣ . =кано́на два̀ , бцⷣѣ , на́ и҃ . и҆ мч҃нкꙋ , на́ ѕ҃ . катава́сїѧ : хрⷭ҇то́съ ражда́етсѧ . по г҃ й пѣ́сни : конда́къ , мч҃нкꙋ , и҆ и҆́косъ . и҆ сѣда́ленъ , бцⷣѣ . сла́ва , сѣда́ленъ , мч҃нкꙋ . и҆ ны́нѣ , бцⷣѣ . по ѕ҃ й пѣ́сни : конда́къ , бцⷣѣ , и҆ и҆́косъ . по ѳ҃ й пѣ́сни , свѣти́ленъ , бцⷣѣ . сла́ва , мч҃нкꙋ . и҆ ны́нѣ , бцⷣѣ . на хвали́тѣхъ , стⷯры , бцⷣѣ , на д҃ . сла́ва , мч҃нкꙋ . и҆ ны́нѣ , бцⷣѣ . славосло́вїе вели́кое . по трⷭ҇то́мъ , тропа́рь , мч҃нкꙋ . сла́ва , и҆ ны́нѣ , бцⷣѣ . є҆ктенїѝ , и҆ ѿпꙋ́стъ . и҆ ча́съ а҃ . на а҃ мъ часѣ̀ : тропа́рь , бцⷣѣ . сла́ва , мч҃нкꙋ . и҆ ны́нѣ , боⷢ҇ , часо́въ . по трⷭ҇то́мъ , конда́къ , бцⷣѣ . и҆ соверше́ныи ѿпꙋ́стъ .

на литꙋргі́и , бл҃же́нна бцⷣѣ , а҃ гѡ кано́на , пѣ́снь г҃ ѧ , на д҃ . и҆ в҃ гѡ кано́на , пѣ́снь ѕ҃ ѧ , на д҃ . проки́менъ , пѣ́снь бцⷣѣ . и҆ проки́менъ , мч҃нкꙋ . а҆пⷭ҇лъ , а҆ллилꙋ́їѧ , и҆ є҆ѵⷢ҇а́лїе , и҆ прича́стенъ бцⷣѣ , и҆ мч҃нкꙋ .

Потре́бно є҆́сть вѣ́дати и҆ сѐ , ꙗ҆́кѡ а҆́ще слꙋчи́тсѧ в̾ нлⷣю пра́здникъ прест҃ы́ѧ бцⷣы чⷭ҇тна́гѡ є҆ѧ̀ зна́менїѧ , и҆ ст҃а́гѡ великомч҃нка і҆а́кѡва пе́рскагѡ , си́це : на ма́лой вече́рни , на́ гдⷭ҇и возва́хъ , стⷯры , воскрⷭ҇ны , гла́сꙋ , д҃ . сла́ва , и҆ ны́нѣ , зна́менїю . на стихо́внѣ , стⷯра воскрⷭ҇на є҆ди́на , и҆ зна́менїю , г҃ , со стихѝ и҆́хъ . сла́ва , и҆ ны́нѣ , зна́менїю . та́же , нн҃ѣ ѿпꙋща́еши . и҆ по трⷭ҇то́мъ , тропа́рь , воскрⷭ҇нъ . сла́ва , и҆ ны́нѣ , зна́менїю . є҆ктенїѧ̀ ма́лаѧ , и҆ ѿпꙋ́стъ .

на вели́цѣй вече́рни , по ѡ҆бы́чной стихоло́гїи , на гдⷭ҇и возва́хъ , стⷯры , воскрⷭ҇ны , г҃ . и҆ восто́ченъ є҆ди́нъ . и҆ зна́менїю , г҃ . и҆ мч҃нкꙋ , г҃ . сла́ва , зна́менїю . и҆ ны́нѣ , бг҃оро́диченъ пе́рвыи гла́сꙋ . чте́нїѧ зна́менїю . на литі́и стⷯры зна́менїю . сла́ва , мч҃нкꙋ . и҆ нн҃ѣ , зна́менїю . на стихо́внѣ , стихѣ́ры , воскрⷭ҇ны . сла́ва , мч҃нкꙋ . и҆ ны́нѣ , зна́менїю . на бл҃гослове́нїе хлѣ́бомъ , тропа́рь , зна́менїю , гⷤ . а҆́ще нѣ́сть бдѣ́нїе , глаго́лемъ тропа́рь , воскрⷭ҇нъ . сла́ва , мч҃нкꙋ . и҆ ны́нѣ , зна́менїю . на оу҆́трени , на бг҃ъ гдⷭ҇ь , тропа́рь , воскрⷭ҇нъ , двⷤа . сла́ва , мч҃нкꙋ . и҆ нн҃ѣ , зна́менїю . по а҃ , стихоло́гїи , сѣда́ленъ , воскрⷭ҇нъ . сла́ва , и҆ ны́нѣ , боⷢ҇ . и҆́же по тропарѣ̀ , воскрⷭ҇номъ , настоѧ́щаго гла́са . по в҃ , стихоло́гїи , сѣда́ленъ , воскрⷭ҇нъ . сла́ва , и҆ ны́нѣ , боⷢ҇ . є҆гѡ̀ . по непоро́чнахъ , и҆ тропарѝ и҆́хъ , и҆ ѵ҆пако́й , гла́сꙋ . по многомлⷭ҇тиво . велича́нїе пое́мъ : Досто́йно є҆́сть бл҃жи́ти тѧ̀ бцⷣе дв҃о , честнѣ́йшꙋю херꙋви́мъ , и҆ сла́внѣйшꙋю без̾ разсꙋжде́нїѧ серафи́мъ . и҆лѝ : пѣ́снь всѧ́кꙋ дх҃о́внꙋю принесе́мъ бцⷣѣ . ѱало́мъ и҆збра́нныи : помѧнѝ гдⷭ҇и дв҃да , и҆ всю̀ кро́тость є҆гѡ̀ . и҆ сѣда́льны , зна́менїю , кꙋ́пно всѣ̀ трѝ . степе́нна , и҆ проки́менъ , гла́сꙋ . є҆ѵⷢ҇а́лїе , воскрⷭ҇но . та́же , воскрⷭ҇нїе хрⷭ҇то́во . ѱало́мъ , н҃ . стихѣ́ра , воскрⷭ҇на . Кано́нъ , воскрⷭ҇нъ , со и҆рмосо́мъ , на д҃ . зна́менїю , є҆ди́нъ кано́нъ , на́ ѕ҃ . мч҃нкꙋ , на д҃ . катава́сїѧ : хрⷭ҇то́съ ражда́етсѧ . по г҃ пѣ́сни : конда́къ , и҆ и҆́косъ , зна́менїю . конда́къ , и҆ и҆́косъ , мч҃нкꙋ . и҆ сѣда́ленъ , мч҃нкꙋ . сла́ва , и҆ ны́нѣ , зна́менїю . по ѕ҃ й пѣ́сни : конда́къ , и҆ и҆́косъ , воскрⷭ҇нъ . на ѳ҃ й пѣ́сни , пое́мъ , честнѣ́йшꙋю . свѣти́ленъ , воскрⷭ҇нъ . сла́ва , мч҃нкꙋ . и҆ ны́нѣ , зна́менїю . на хвали́тѣхъ , стихѣ́ры , воскрⷭ҇ны , д҃ . и҆ зна́менїю , д҃ , со стихѝ . сти́хъ : воскрⷭ҇нѝ гдⷭ҇и в̾ поко́й тво́й ,꙳ ты̀ и҆ кїѡ́тъ ст҃ы́ни твоеѧ̀ .= сти́хъ : клѧ́тсѧ гдⷭ҇ь дв҃дꙋ и҆́стиною ,꙳ и҆ не ѿве́ржетсѧ є҆ѧ̀ . =сла́ва , стⷯра , є҆ѵⷢ҇а́льскаѧ . и҆ ны́нѣ , пребл҃гослове́на є҆сѝ . Славосло́вїе вели́кое . є҆ктенїѝ . и҆ ѿпꙋ́стъ . и҆ ча́съ , а҃ . на а҃ мъ часѣ̀ : тропа́рь , воскрⷭ҇нъ . сла́ва , зна́менїю . конда́къ , воскрⷭ҇нъ . и҆ коне́чныи ѿпꙋ́стъ . на г҃ мъ часѣ̀ : тропа́рь , воскрⷭ҇нъ . сла́ва , мч҃нкꙋ . конда́къ , зна́менїю . на ѕ҃ мъ часѣ̀ : тропа́рь , воскрⷭ҇нъ . сла́ва , зна́менїю . конда́къ , мч҃нкꙋ . на ѳ҃ мъ часѣ̀ : тропа́рь , воскрⷭ҇нъ . сла́ва , мч҃нкꙋ . конда́къ , воскрⷭ҇нъ .

на литꙋргі́и , бл҃же́нна , гла́сꙋ , на д҃ . и҆ бцⷣѣ , пѣ́снь , г҃ ѧ , на д҃ . и҆ мч҃нкꙋ , пѣ́снь , ѕ҃ ѧ , на д҃ .

по вхо́дѣ : тропарѝ , воскрⷭ҇нъ , и҆ зна́менїю , и҆ мч҃нкꙋ . та́же , конда́къ , воскрⷭ҇нъ . сла́ва , мч҃нкꙋ . и҆ ны́нѣ , зна́менїю .

проки́менъ , а҆пⷭ҇лъ , а҆ллилꙋ́їѧ , є҆ѵⷢ҇а́лїе , и҆ прича́стенъ . пре́жде воскрⷭ҇нъ , и҆ пото́мъ бцⷣѣ .

а҆ мч҃нкꙋ , а҆пⷭ҇лъ , и҆ є҆ѵⷢ҇а́лїе , честѝ под̾ зача́ло в̾ срѣди́нахъ .

А҆́ще ли хра́мъ , ст҃ы́ѧ бцⷣы пречꙋ́днаго є҆ѧ̀ зна́менїѧ , ѡ҆ставлѧ́етсѧ слꙋ́жба ст҃а́гѡ мч҃нка і҆а́кѡва , и҆ пое́мъ , си́це : на ма́лой вече́рни , на́ гдⷭ҇и возва́хъ , стⷯры , воскрⷭ҇ны , гла́сꙋ , д҃ . сла́ва , и҆ ны́нѣ , зна́менїю . на стихо́внѣ , стⷯра воскрⷭ҇на є҆ди́на , и҆ зна́менїю , г҃ , со стихѝ и҆́хъ . сла́ва , и҆ ны́нѣ , зна́менїю . та́же , нн҃ѣ ѿпꙋща́еши . и҆ по трⷭ҇то́мъ , тропа́рь , воскрⷭ҇нъ . сла́ва , и҆ ны́нѣ , зна́менїю . є҆ктенїѧ̀ ма́лаѧ , и҆ ѿпꙋ́стъ .

на вели́цѣй вече́рни , по ѡ҆бы́чной стихоло́гїи , на гдⷭ҇и возва́хъ , стⷯры , воскрⷭ҇ны , г҃ . и҆ восто́ченъ є҆ди́нъ . и҆ зна́менїю , на́ ѕ҃ . сла́ва , зна́менїю . и҆ ны́нѣ , бг҃оро́диченъ пе́рвыи гла́сꙋ . чте́нїѧ зна́менїю . на литі́и стⷯры зна́менїю . сла́ва , и҆ ны́нѣ , зна́менїю . на стихо́внѣ , стихѣ́ры , воскрⷭ҇ны . сла́ва , и҆ ны́нѣ , зна́менїю . на бл҃гослове́нїе хлѣ́бомъ , тропа́рь , зна́менїю , гⷤ . а҆́ще нѣ́сть бдѣ́нїе , глаго́лемъ тропа́рь , воскрⷭ҇нъ . сла́ва , и҆ ны́нѣ , зна́менїю . на оу҆́трени , на бг҃ъ гдⷭ҇ь , тропа́рь , воскрⷭ҇нъ , двⷤа . сла́ва , и҆ ны́нѣ , зна́менїю . по а҃ , стихоло́гїи , сѣда́ленъ , воскрⷭ҇нъ . сла́ва , и҆ ны́нѣ , боⷢ҇ . и҆́же по тропарѣ̀ , воскрⷭ҇номъ , настоѧ́щаго гла́са . по в҃ , стихоло́гїи , сѣда́ленъ , воскрⷭ҇нъ . сла́ва , и҆ ны́нѣ , боⷢ҇ . є҆гѡ̀ . по непоро́чнахъ , и҆ тропарѝ и҆́хъ , и҆ ѵ҆пако́й , гла́сꙋ . по многомлⷭ҇тиво . велича́нїе пое́мъ : Досто́йно є҆́сть бл҃жи́ти тѧ̀ бцⷣе дв҃о , честнѣ́йшꙋю херꙋви́мъ , и҆ сла́внѣйшꙋю без̾ разсꙋжде́нїѧ серафи́мъ . и҆лѝ : пѣ́снь всѧ́кꙋ дх҃о́внꙋю принесе́мъ бцⷣѣ . ѱало́мъ и҆збра́нныи : помѧнѝ гдⷭ҇и дв҃да , и҆ всю̀ кро́тость є҆гѡ̀ . и҆ сѣда́льны , зна́менїю , кꙋ́пно всѣ̀ трѝ . степе́нна , гла́сꙋ . проки́менъ , и҆ є҆ѵⷢ҇а́лїе , бцⷣѣ . та́же , воскрⷭ҇нїе хрⷭ҇то́во . ѱало́мъ , н҃ . сла́ва . моли́твъ ра́ди бцⷣы .

и҆ ны́нѣ . мл҃твъ ра́ди бцⷣы . поми́лꙋй мѧ бж҃е . стихѣ́ра , бцⷣѣ зна́менїю . Кано́нъ , воскрⷭ҇нъ , со и҆рмосо́мъ , на д҃ . и҆ бцⷣѣ , на в҃ . и҆ зна́менїю , два̀ кано́на , на́ и҃ . катава́сїѧ : хрⷭ҇то́съ ражда́етсѧ . по г҃ пѣ́сни : конда́къ , и҆ и҆́косъ , зна́менїю . сѣда́ленъ , зна́менїю . сла́ва , и҆ ны́нѣ , то́йже . по ѕ҃ й пѣ́сни : конда́къ , и҆ и҆́косъ , воскрⷭ҇нъ . на ѳ҃ й пѣ́сни , пое́мъ , честнѣ́йшꙋю . свѣти́ленъ , воскрⷭ҇нъ . сла́ва , и҆ ны́нѣ , зна́менїю . на хвали́тѣхъ , стⷯры , воскрⷭ҇ны , д҃ . и҆ зна́менїю , д҃ , состихѝ . сти́хъ : воскрⷭ҇нѝ гдⷭ҇и в̾ поко́й тво́й ,꙳ ты̀ и҆ кїѡ́тъ ст҃ы́ни твоеѧ̀ .= сти́хъ : клѧ́тсѧ гдⷭ҇ь дв҃дꙋ и҆́стиною ,꙳ и҆ не ѿве́ржетсѧ є҆ѧ̀ . =сла́ва , =зна́менїю . =и҆ ны́нѣ , пребл҃гослове́на є҆сѝ . Славосло́вїе вели́кое . проки́менъ , гла́сꙋ . є҆ѵⷢ҇а́лїе , воскрⷭ҇но . є҆ктенїѝ . и҆ ѿпꙋ́стъ . и҆ стихѣ́ра , є҆ѵⷢ҇а́льскаѧ . и҆ ча́съ , а҃ . и҆ коне́чныи ѿпꙋ́стъ .

на часѣ́хъ : =тропа́рь , воскрⷭ҇нъ . сла́ва , зна́менїю . =на а҃ мъ часѣ̀ : конда́къ , воскрⷭ҇нъ . на г҃ мъ часѣ̀ : конда́къ , зна́менїю . на ѕ҃ мъ часѣ̀ : конда́къ , воскрⷭ҇нъ . на ѳ҃ мъ часѣ̀ : конда́къ , зна́менїю .

на литꙋргі́и , бл҃же́нна , гла́сꙋ , на́ ѕ҃ . и҆ бцⷣѣ , пѣ́снь , г҃ ѧ , на д҃ .

по вхо́дѣ : тропарѝ , воскрⷭ҇нъ , и҆ зна́менїю . конда́къ , воскрⷭ҇нъ . сла́ва , и҆ ны́нѣ , зна́менїю .

проки́менъ , а҆пⷭ҇лъ , а҆ллилꙋ́їѧ , є҆ѵⷢ҇а́лїе , и҆ прича́стенъ . пре́жде воскрⷭ҇нъ , и҆ пото́мъ бцⷣѣ .

Слꙋ́жба и҆́же во ст҃ы́хъ ѻ҆ц҃ꙋ на́шемꙋ і҆а́кѡвꙋ є҆пкⷭ҇пꙋ , росто́вскомꙋ чꙋдотво́рцꙋ . =Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и возва́хъ , стихѣ́ры , на ѕ҃ . гла́съ , ѕ҃ . поⷣ . в=сѐ оу҆пова́нїе . Ве́сь ѡ҆сщ҃е́нъ ,꙳ и҆ бг҃оно́сецъ показа́сѧ .꙳ пома́занїе бж҃їе ст҃о́е ,꙳ ст҃ы́мъ дх҃омъ ѡ҆бложе́нъ .꙳ и҆ свѣ́тлѡ входѧ̀ вы́нꙋ ꙳ во ст҃а́ѧ ст҃ы́хъ ,꙳ бг҃онача́льными свѣтлостьмѝ ѡ҆зарѧ́емь .꙳ и҆ бл҃года́ти причаща́ѧсѧ спасе́нымъ та́йнамъ ,꙳ ꙗ҆́кѡ и҆́стинныи ст҃ль пресла́венъ .꙳ со дерзнове́нїемъ моли́сѧ ꙳ ѡ҆ дш҃а́хъ на́шихъ . Просвѣти́сѧ житїѐ твоѐ ꙳ добродѣ́тельными свѣтлостьмѝ ,꙳ и҆ вѣ́рныѧ просвѣти́лъ є҆сѝ ,꙳ и҆ льстѝ тмꙋ̀ раз̾гна̀ .꙳ и҆́стинное бо ꙗ҆ви́сѧ ,꙳ и҆ свѣтоза́рное сл҃нце ,꙳ ст҃лю пребл҃же́нне і҆а́кѡве .꙳ и҆ ны́нѣ всели́сѧ ,꙳ и҆дѣ́же сїѧ́етъ свѣ́тъ невече́рнїи ,꙳ и҆ сн҃ъ днѝ бл҃года́тїю дх҃а ст҃а́гѡ бы́въ .꙳ тѣ́мже ти бжⷭ҇твенꙋю па́мѧть ,꙳ и҆ свѣтоно́снꙋю ,꙳ и҆ чⷭ҇тнѡ соверша́юще прⷭ҇нѡ па́мѧтне любо́вїю почита́емъ . Оу҆́мъ тво́й манове́нїемъ є҆́же к̾ бг҃ꙋ ,꙳ мꙋ́дре вѣ́рою оу҆добрѧ́емь .꙳ свѣ́телъ ꙗ҆ви́сѧ всесла́вне ,꙳ в̾ ме́ртвенѣмъ тѣ́лѣ и҆ тлѣ́ннѣмъ премꙋ́дре нетлѣ́нїю поꙋчи́всѧ ,꙳ притѧжа́лъ є҆сѝ беспло́тныхъ свѣ́тлости .꙳ и҆ страсте́й внѣ̀ бы́въ ,꙳ без̾стра́стїемъ оу҆краша́ѧсѧ ,꙳ і҆а́кѡве ѻ҆́ч҃е ст҃лю премꙋ́дре ,꙳ свѣтлѣ́йшее свѣти́ло ,꙳ и҆ мл҃твениче ѡ҆ чтꙋ́щихъ вѣ́рою па́мѧть твою̀ .

и҆́ны , стⷯры . гла́съ , и҃ . поⷣ . ѽ пресла́вное чꙋ́до . Прпⷣбне ѻ҆́ч҃е і҆а́кѡве ,꙳ ты̀ є҆щѐ во оу҆тро́бѣ сы́и мт҃рьни ,꙳ ст҃льства прозва́нїе и҆́мѧ прїи́мъ нарече́нное ,꙳ ты̀ и҆́з̾млада хрⷭ҇та̀ возлюби́лъ є҆сѝ .꙳ прїи́мъ па́ствꙋ слове́сныхъ ѻ҆ве́цъ ,꙳ до́брѣ пасѧ́ше цр҃ковь хрⷭ҇то́вꙋ .꙳ тѣ́мъ пра́зднꙋемъ твоѐ оу҆спе́нїе ,꙳ ра́достїю срⷣца хрⷭ҇та̀ велича́емъ ,꙳ прославлѧ́ющаго своегѡ̀ оу҆го́дника . Прпⷣбне ѻ҆́ч҃е і҆а́кѡве , и҆спросѝ ꙗ҆́же к̾ бг҃ꙋ мл҃твами си ,꙳ цр҃кви оу҆тверже́нїе .꙳ ст҃лѧ покры́и мл҃твою си .꙳ странѣ̀ на́шей побѣ́ды да́рꙋй на врагѝ и҆ ѡ҆долѣ́нїе .꙳ недви́жимꙋ и҆ неѡ҆бори́мꙋ гра́дꙋ твоемꙋ̀ ,꙳ и҆ вѣ́рнымъ лю́демъ грѣхо́въ ѡ҆ставле́нїе ,꙳ всѣ́мъ притека́ющимъ к̾ ра́цѣ моще́й твои́хъ ,꙳ свѣ́тлѡ творѧ́ще празднество̀ оу҆спе́нїѧ твоегѡ̀ ,꙳ заны̀ ст҃е помоли́сѧ . Прпⷣбне ѻ҆́ч҃е , и҆ бг҃оно́сне ст҃лю і҆а́кѡве .꙳ ты̀ вои́стинꙋ ꙗ҆ви́сѧ , просвѣща́ѧ всѣ́хъ ѡ҆мраче́ннаѧ срⷣца̀ ,꙳ наставлѧ́ѧ на пꙋ́ть и҆́стинныи .꙳ ты̀ бы́сть оу҆бо́гимъ и҆ си́рымъ и҆ вдови́цамъ застꙋ́пникъ .꙳ велмо́жамъ тве́рдое наказа́нїе и҆ оу҆тверже́нїе ,꙳ всѣ́мъ вѣ́рою притѣка́ющимъ ,꙳ под̾ кро́въ пречⷭ҇тѣй бж҃їи мт҃ре .꙳ и҆спросѝ ст҃е грѣхо́въ ѡ҆ставле́нїе ,꙳ молѧ́сѧ заны̀ ко влⷣцѣ .

сла́ва . гла́съ , ѕ҃ . А҆пⷭ҇лѡмъ ревни́телѧ і҆а́кѡва пребл҃же́ннагѡ ѻ҆ц҃а и҆ оу҆чи́телѧ , с̾ше́дшесѧ восхва́лимъ , и҆́мже хрⷭ҇та̀ бг҃а позна́хомъ . и҆ ѿ тмы̀ к̾ свѣ́тꙋ приближа́ющесѧ , ѻ҆́чи и҆ срⷣце просвѣща́емъ в̾ па́мѧть є҆гѡ̀ ликоствꙋ́юще , кꙋ́пнѡ весели́мсѧ пра́во ведꙋ́ща в̾ црⷭ҇твїе бж҃їе .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невоспѣва́етъ твоегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а воз̾сїѧ́въ сн҃ъ є҆диноро́дныи , то́йже ѿ тебѐ чи́стыѧ про́йде , несказа́ннѡ вопло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двою̀ лицꙋ̀ раздѣлѧ́емъ . но во двою̀ є҆стествꙋ̀ несмѣ́сно познава́емъ . тогѡ̀ молѝ чⷭ҇таѧ и҆ всебл҃же́ннаѧ , поми́ловатисѧ дш҃а́мъ на́шимъ . та́же , вы́ходъ . проки́менъ , дню̀ .

Ѿ при́тчей , чте́нїе .

Па́мѧть пра́веднагѡ с̾ похвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрость , и҆ сме́ртенъ и҆́же оу҆вѣ́дѣ ра́зꙋмъ . лꙋ́чше бо сїю̀ кꙋпова́ти , не́жели зла́та и҆ сребра̀ сокро́вища . честнѣ́йши бо є҆́сть ка́менїѧ многоцѣ́нна , все́же чⷭ҇тно́е , недосто́йнѡ є҆́сть є҆́й . долгота́ бо дні́й , и҆ лѣ́та живота̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бога́тство и҆ сла́ва . ѿ оу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . послꙋ́шайте оу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ моѧ̀ храни́тъ . и҆схо́ди бо моѝ , и҆схо́ди живота̀ , и҆ оу҆гото́ваетсѧ хотѣ́нїе ѿ́ гдⷭ҇а . сегѡ̀ ра́ди молю̀ ва́съ , и҆ пред̾лага́ю мо́й гла́съ сн҃ово́мъ чл҃ческимъ . ꙗ҆́кѡ а҆́зъ премꙋ́дрость всели́хъ , совѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й совѣ́тъ и҆ оу҆тверже́нїе , мо́й ра́зꙋмъ , моѧ́ же крѣ́пость . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃года́ть . разꙋмѣ́йте оу҆́бѡ неѕло́бивїи кова́рство , ненака́занїи же прилага́йте срⷣца̀ . послꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ оу҆сте́нъ мои́хъ пра́вдꙋ . ꙗ҆́кѡ и҆́стинѣ поꙋча́етсѧ горта́нь мо́й , ме́рзски же предо мно́ю оу҆стны̀ лжи́выхъ . с̾ пра́вдою всѝ гл҃ы оу҆́стъ мои́хъ , ни что́же в̾ ни́хъ стро́потно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ= при́тчей , чте́нїе .=

=Ѿ =оу҆́стъ пра́веднагѡ ка́плетъ премꙋ́дрость , ꙗ҆зы́къ же непра́веднагѡ потреби́тсѧ . оу҆сты̀ мꙋже́й пра́ведныхъ свѣ́дѧтъ бл҃года́ть , оу҆ста́ же нечести́выхъ разорѧ́тсѧ . мѣ́рила ле́стна ме́рзость пре́д̾ гдⷭ҇емъ , мѣ́рило же пра́ведно прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ досажде́нїе , тꙋ̀ и҆ бесче́стїе . оу҆ста̀ смире́ныхъ поꙋча́тсѧ премꙋ́дрости , кончи́на же пра́ведныхъ наста́витъ и҆́хъ . и҆ поползнове́нїе законопрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рости , пра́вда же и҆збавлѧ́етъ ѿ сме́рти . оу҆мира́ѧ пра́ведныи , ѡ҆ставлѧ́етъ попече́нїе . ме́рзостна же быва́етъ и҆ на́гла нечести́выхъ поги́бель . пра́вда непоро́чнагѡ и҆справлѧ́етъ пꙋтѝ , нече́стїемъ же свои́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾совѣ́тїемъ же оу҆ловлѧ́ютсѧ законопрестꙋ́пнїи . сконча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жа , хвала́ же нечести́выхъ потреби́тсѧ . пра́ведникъ ѿ лови́твы и҆збѣ́гнетъ , вмѣ́сто же є҆гѡ̀ предае́тсѧ нечести́выи . во оу҆стѣ́хъ законопрестꙋ́пныхъ сѣ́ть гражда́нѡмъ , чꙋ́вство же пра́ведныхъ бл҃госпѣ́шнѡ . во бл҃гости пра́ведныхъ и҆спра́витсѧ гра́дъ , и҆ въ поги́бели нечести́выхъ ра́дованїе . во бл҃гослове́нїи пра́ведныхъ возвы́ситсѧ гра́дъ , оу҆сты́ же нечести́выхъ раскопа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жъ же мꙋ́дръ без̾мо́лвїе во́дитъ .

Ѿ премꙋ́дрости соло́мони , чте́нїе .

Похвалѧ́емꙋ пра́ведникꙋ , воз̾веселѧ́тсѧ лю́дїе . без̾сме́ртїе бо є҆́сть па́мѧть є҆гѡ̀ , ꙗ҆́кѡ ѿ́ гдⷭ҇а познава́етсѧ и҆ ѿ чл҃къ , и҆ оу҆го́дна гдⷭ҇ви дш҃а є҆гѡ̀ .= =возлюби́те оу҆́бѡ мꙋ́дрость , и҆ поживетѐ . восхощи́те є҆ѧ̀ , и҆ нака́зани бꙋ́дете . нача́ло бо є҆ѧ̀ любы̀ , и҆ соблюде́нїе зако́нꙋ . почти́те премꙋ́дрость , да во́ вѣки црⷭ҇твꙋете . возвѣщꙋ̀ ва́мъ , и҆ нескры́ю ѿ ва́съ та́инъ бж҃їихъ . ꙗ҆́кѡ то́й мꙋ́дрости наста́вникъ є҆́сть , и҆ мꙋ́дрыхъ и҆спра́витель , и҆ всѧ́кꙋ смы́слꙋ и҆ дѣ́лꙋ хитре́цъ , и҆ всѣ́мъ смы́сломъ наꙋчи́тъ мꙋ́дрость . є҆́сть бо в̾ не́й дх҃ъ разꙋ́менъ и҆ ст҃ъ , и҆ сїѧ́нїе свѣ́та присносꙋ́щнагѡ , и҆ ѻ҆́бразъ бл҃гости бж҃їѧ . та̀ и҆ дрꙋ́ги бж҃їѧ и҆ пррⷪ҇ки оу҆строѧ́етъ . бл҃голѣ́пнѣйши є҆́сть сл҃нца , и҆ па́че сотворе́нїѧ ѕвѣ́здъ свѣ́томъ сказа́ема ѡ҆брѣта́етсѧ пе́рвѣйши . та̀ оу҆гожда́ющимъ є҆́й ѿ болѣ́зней и҆збавлѧ́етъ , и҆ наста́витъ на стезѝ пра́вы , и҆ да́стъ и҆́мъ ра́зꙋмъ и҆мѣ́ти ст҃ы́хъ , и҆ сохрани́тъ ѧ҆̀ ѿ ловѧ́щихъ , по́двигъ крѣ́покъ пода́стъ и҆́мъ . да разꙋмѣ́ютъ всѝ ꙗ҆́кѡ си́льнѣйши є҆́сть всегѡ̀ бл҃гоче́стїе , и҆ непремо́жетъ ѕло́ба ни коли́же мꙋ́дрости , ни пре́йдетъ ѕлы́ѧ ѡ҆блича́ющи сꙋ́дъ . реко́ша же в̾ себѣ̀ помы́сливше непра́веднѡ , наси́льствꙋемъ пра́ведномꙋ , и҆ непощади́мъ преподо́бства є҆гѡ̀ , ни оу҆срами́мсѧ сѣди́нъ ста́рости многолѣ́тны , бꙋ́детъ бо на́мъ крѣ́пость зако́нꙋ . и҆ оу҆лови́мъ пра́веднаго , ꙗ҆́кѡ не оу҆го́денъ на́мъ є҆́сть , и҆ сопроти́витсѧ дѣло́мъ на́шимъ , и҆ поно́ситъ на́мъ ѿпаде́нїе зако́на , и҆ ѡ҆блича́етъ на́мъ согрѣше́нїѧ наказа́нїѧ на́шегѡ . возвѣща́етъ на́мъ ра́зꙋмъ и҆мѣ́ти бж҃їи , и҆ ѻ҆́трока гдⷭ҇нѧ себѐ и҆менꙋ́етъ , и҆ бы́сть на ѡ҆бличе́нїе помышле́нїемъ на́шимъ , и҆ тѧ́жекъ на́мъ є҆́сть . и҆ ви́димъ ꙗ҆́кѡ неподо́бнѡ и҆нѣ́мъ житїѐ є҆гѡ̀ , и҆ и҆змѣнены̀ стезѝ є҆гѡ̀ . въ порꙋга́нїе вмѣни́хомсѧ є҆мꙋ̀ , и҆ оу҆далѧ́етсѧ ѿ пꙋте́й на́шихъ ꙗ҆́кѡ ѿ нечисто́тъ , и҆ блажи́тъ послѣ́днѧѧ пра́ведныхъ . ви́димъ оу҆́бѡ а҆́ще словеса̀ є҆гѡ̀ и҆́стина сꙋ́ть , и҆ оу҆смо́тримъ сбытїѧ̀ є҆гѡ̀ . рꙋга́нїемъ и҆ мꙋ́кою и҆стѧ́жемъ є҆гѡ̀ . да разꙋмѣ́емъ кро́тость є҆гѡ̀ , и҆ и҆скꙋ́симъ без̾ѕло́бство є҆гѡ̀ , сме́ртїю без̾ѡ҆бра́зною ѡ҆сꙋ́димъ є҆гѡ̀ , бꙋ́детъ бо посѣще́нїе ѿ слове́съ є҆гѡ̀ . сїѧ̀ помы́слиша и҆ прельсти́шасѧ , ѡ҆слѣпи́ бо и҆́хъ ѕло́ба и҆́хъ , и҆ неразꙋмѣ́ша та́инъ бж҃їихъ . и҆ неразсꙋди́ша ꙗ҆́кѡ ты̀ є҆сѝ бг҃ъ є҆ди́нъ животꙋ̀ и҆мѣ́ѧи и҆ сме́рти вла́сть , и҆ спаса́ѧ во́ времѧ ско́рби , и҆ и҆збавлѧ́ѧи ѿ всѧ́кагѡ ѕла̀ , ще́дръ и҆ млⷭ҇тивъ даѧ̀ преподо́бнымъ свои́мъ бл҃года́ть , и҆ свое́ю мы́шцею го́рдымъ противлѧ́ѧсѧ .

На литі́и , стихѣ́ры . гла́съ , и҃ . Прпⷣбне ѻ҆́ч҃е і҆а́кѡве , ты̀ воз̾ше́дъ на лѣ́ствицꙋ бжⷭ҇твенагѡ ра́зꙋма , и҆ к̾ бг҃ꙋ приближа́ѧсѧ , оу҆сыне́нїѧ да́ръ ѿ негѡ̀ прїи́мъ , и҆сцѣлѧ́ѧ недꙋ́ги неи҆сцѣ́льныѧ , и҆ ѿгонѧ́ѧ дꙋ́хи нечи́стыѧ . тѣ́мъ твоѐ оу҆спе́нїе пра́зднꙋемъ ра́достїю срⷣца хрⷭ҇та̀ веселѧ́ще , велича́юща своегѡ̀ оу҆го́дника . гла́съ , д҃ . Воз̾зрѣ́въ неꙋкло́ннѡ на высотꙋ̀ ра́зꙋма , и҆ оу҆смотри́лъ є҆сѝ без̾вѣ́стнѡ премꙋ́дрости глꙋбинꙋ̀ . оу҆че́нїи ми́ръ ѡ҆богати́лъ є҆сѝ ѻ҆́ч҃е . ѡ҆ на́съ прⷭ҇нѡ молѝ хрⷭ҇та̀ ст҃лю і҆а́кѡве . Чл҃че бж҃їи вѣ́рныи оу҆го́дниче , строи́телю тогѡ̀ та́йнамъ , и҆ мꙋ́жь жела́нїи дх҃о́вныхъ , сто́лпе ѡ҆дш҃евле́ныи , дх҃о́вныи ѻ҆́бразъ ꙗ҆́кѡ бжⷭ҇твеное сокро́вище , мирскі́ѧ цр҃кви ѡ҆брѣ́тше тѧ̀ , мл҃твеника ѡ҆ дш҃а́хъ на́шихъ . гла́съ , и҃ . Ст҃лю і҆а́кѡве , высото́ю добродѣ́телей бж҃їе просвѣще́нїе , дх҃о́вныи а҆рга́не . правосла́внымъ сла́во . ѕловѣ́рїѧ ѻ҆бличи́телю . дв҃ственомꙋ ли́кꙋ вели́кое и҆ спасе́ное , и҆ ди́вное мꙋдрова́нїе . сла́ва . гла́съ , ѕ҃ . Правосла́вныѧ вѣ́ры , дш҃е́вныѧ ра́ди мꙋ́дрости оу҆чи́тель ꙗ҆ви́сѧ і҆а́кѡве бл҃же́нне , хрⷭ҇та̀ ѡ҆брѣ́тъ наста́вника . совѣ́ты ѕлосла́вныѧ є҆рети́ческїѧ разгна́лъ є҆сѝ , тѣ́мъ мо́лимъ тѧ̀ ст҃е , моли́сѧ хрⷭ҇тꙋ̀ бг҃ꙋ ѡ҆ на́съ до конца̀ , є҆́же ѡ҆ тебѣ̀ и҆звѣ́ствованнꙋю правосла́внꙋю вѣ́рꙋ неподви́жнꙋ сохрани́ти на́мъ , и҆ ве́лїю млⷭ҇ть и҆спроси́ти ѻ҆́ч҃е і҆а́кѡве . и҆ ны́нѣ , боⷢ҇ . Творе́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твои́хъ ложе́снъ проше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свободѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вои́стинꙋ , вопїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ покро́ве , и҆ спасе́нїе дш҃а́мъ на́шимъ .

На стихо́внѣ , стихѣ́ры . гла́съ , д҃ . поⷣ . ꙗ҆́кѡ до́блѧ .= З=арѧ́ми дх҃о́вными ꙳ просвѣще́нное свѣтоза́рное ꙳ сл҃нце бы́лъ є҆сѝ ,꙳ ꙗ҆́коже лꙋчѝ оу҆че́нїѧ ꙳ во всѧ̀ концы̀ простира́ѧ ,꙳ и҆ вѣ́рныхъ ѡ҆зарѧ́ѧ ꙳ и҆сполне́нїе бл҃же́нне .꙳ и҆ ѿгонѧ̀ тмꙋ̀ бг҃оно́се є҆ресе́мъ си́лою ,꙳ и҆́же ѿ дв҃ы восїѧ́вшагѡ .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Бл҃госказа́нїи слове́съ твои́хъ ,꙳ сщ҃е́нныи і҆а́кѡве .꙳ цр҃кви всѧ̀ оу҆краша́етсѧ .꙳ ра́дꙋющисѧ оу҆че́ньми кра́сными въ добродѣ́телехъ .꙳ и҆ почита́етъ сщ҃е́нное ꙳ твоѐ преставле́нїе пресла́вне .꙳ сщ҃е́ннымъ похвало̀ ,꙳ ѻ҆ц҃е́мъ верхо́вниче ,꙳ и҆ прест҃ы́ѧ трⷪ҇цы побо́рниче .

сти́хъ : сщ҃е́нницы твоѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твоѝ возра́дꙋютсѧ . Ѻ҆́гнеными твои́ми оу҆че́нїи ꙳ є҆ресе́мъ всѧ́каѧ х̾вра́стнаѧ ꙳ попалѧ́етсѧ ле́сть премꙋ́дре .꙳ разꙋ́мными глꙋбина́ми ꙳ погрꙋжа́етсѧ во́инство ,꙳ неповинꙋ́ющихсѧ ѕлочести́выхъ ,꙳ сщ҃е́нно ѻ҆́ч҃е і҆а́кѡве оу҆че́ньми твои́ми .꙳ и҆ оу҆краша́етсѧ вѣ́рныхъ всегда̀ цр҃кви ,꙳ велегла́снѡ чтꙋ́щихъ тѧ̀ .

сла́ва . гла́съ , и҃ . И҆́же по ѻ҆́бразꙋ соблю́дъ невреди́мѡ , прпⷣбне ѻ҆́ч҃е , ѡ҆ хрⷭ҇то́вѣ ѻ҆́бразѣ проти́вꙋ ста̀ мꙋ́жески , не оу҆боѧ́всѧ , гноеи҆мени́тагѡ преще́нїѧ , но дх҃о́внымъ мече́мъ тогѡ̀ оу҆би́лъ є҆сѝ . тѣ́мже дерзнове́нїе стѧжа́въ къ бг҃ꙋ , спасѝ ста́до своѐ ѿ є҆ресе́й всѣ́хъ , і҆а́кѡве многострада́льне . и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твои́хъ ра́бъ мольбы̀ прїимѝ всенепоро́чнаѧ , всѣ́мъ подаю́щи ѡ҆чище́нїе прегрѣше́нїемъ . ны́нѣ на́ша моле́нїѧ прїе́мши , молѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . И҆збра́нъ ѿ ю҆́ности бг҃ови бы́въ , ст҃лю і҆а́кѡве . сегѡ̀ ра́ди а҆рхїере́йства са́номъ почте́нъ бы́сть , оу҆па́слъ є҆сѝ лю́ди , и҆́же тебѣ̀ бг҃омъ в̾рꙋче́нныѧ . тѣ́мже и҆ по преставле́нїи чꙋдесе́мъ дарова́нїѧ ѿ́ бг҃а прїѧ́лъ є҆сѝ , и҆сцѣлѧ́ти разли́чныѧ недꙋ́ги . молѝ ѡ҆ на́съ соверша́ющихъ чⷭ҇тнꙋ́ю па́мѧть твою̀ , да тебѐ непреста́ннѡ велича́емъ . сла́ва , и҆ нн҃ѣ , боⷢ҇ . И҆́же ѿ́ вѣка оу҆тае́нное , и҆ а҆́нг҃лѡмъ несвѣ́домое та́инство , тобо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи воплоща́емъ . и҆ крⷭ҇тъ во́лею на́съ ра́ди воспрїе́мъ , и҆́мъ же воскр҃сѝ первозда́ннаго , и҆ спасѐ ѿ сме́рти дш҃а на́ша .

На оу҆́трени , на бг҃ъ гдⷭ҇ь , тропа́рь , ст҃лю , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , а҃ . Слꙋжи́тель бы́въ хрⷭ҇то́въ , всѧ́ческихъ влⷣцѣ наꙋчи́лъ є҆сѝ лю́ди , и҆ просвѣти́лъ є҆сѝ бжⷭ҇твенымъ кр҃ще́нїемъ , к̾ разꙋмѣ́нїю си́хъ наставлѧ́ѧ ст҃лю . тѣ́мже тѧ̀ проповѣ́дника и҆́стинна всѝ и҆менꙋ́емъ , всечⷭ҇тна́гѡ ст҃лѧ и҆ оу҆го́дника хрⷭ҇то́ва . =двⷤа . сла́ва , и҆ ны́нѣ , боⷢ҇ . Без̾невѣ́стнаѧ чⷭ҇таѧ бцⷣе дв҃о , є҆ди́на пред̾ста́тельница вѣ́рнымъ и҆ покро́въ , бѣ́дъ и҆ скорбе́й и҆ лю́тыхъ ѡ҆бстоѧ́нїи всѣ́хъ и҆зба́ви , и҆́же на тѧ̀ оу҆пова́нїе и҆мꙋ́щихъ ѻ҆трокови́це . и҆ дш҃а на́ша спасѝ бжⷭ҇твеными мольба́ми си .

По в҃ , стихоло́гїи , сѣда́ленъ . гла́съ , д҃ . Ѿ ю҆́ности взе́мъ крⷭ҇тъ сво́й , бл҃гоче́стнѡ послѣ́довалъ є҆сѝ , и҆ оу҆вѧди́въ плотьско́е мꙋдрова́нїе воз̾держа́нїемъ . тѣ́мже на ст҃льскомъ сѣда́лищи , сѣ́дъ і҆а́кѡве , воз̾вели́чилъ є҆сѝ влⷣкꙋ , и҆ тогѡ̀ пречⷭ҇тꙋю мт҃рь зна́меньми разли́чными твою̀ оу҆краси́вше ра́кꙋ , і҆а́кѡве бг҃обл҃же́нне . вⷤ . сла́ва , и҆ ны́нѣ , боⷢ҇ . Дв҃о всенепоро́чнаѧ пресꙋ́щнагѡ бг҃а ро́ждьшаѧ , со ст҃лемъ і҆а́кѡвомъ , тогѡ̀ непреста́ннѡ молѝ ѡ҆ставле́нїе согрѣше́нїемъ . и҆ и҆справле́нїе житїю̀ да́ти на́мъ пре́жде конца̀ , вѣ́рою и҆ любо́вїю чтꙋ́щимъ тѧ̀ по́долгꙋ , є҆ди́на всепѣ́таѧ .

По полїєлеѡ́сѣ , сѣда́ленъ . гла́съ , и҃ . Над̾ страстьмѝ црⷭ҇твовалъ є҆сѝ плотьски́ми , ст҃ль ꙗ҆ви́сѧ бг҃оподо́бенъ . гра́дъ тво́й росто́въ оу҆па́слъ є҆сѝ , кр҃ще́нїемъ же просвѣти́лъ є҆сѝ . и҆ наказа́лъ є҆сѝ сла́вити є҆ди́нагѡ бг҃а , в̾ трїе́хъ соста́вѣхъ . тѣ́мже и҆сточа́еши и҆сцѣле́нїѧ и҆ по кончи́нѣ , вѣ́рою приходѧ́щимъ къ пречⷭ҇тѣй бж҃їи мт҃ри , и҆ к̾ ра́цѣ моще́й твои́хъ і҆а́кѡве молѝ хрⷭ҇та̀ бг҃а грѣхо́мъ ѡ҆ставле́нїе пода́ти , чтꙋ́щимъ любо́вїю ст҃ꙋ́ю па́мѧть твою̀ . двⷤа . сла́ва , и҆ ны́нѣ , боⷢ҇ . Нбⷭ҇нꙋю две́рь и҆ ковче́гъ , всест҃ꙋ́ю го́рꙋ , свѣ́тлыи ѻ҆́блакъ воспое́мъ , неѡ҆пали́мꙋю кꙋпинꙋ̀ , слове́сныи ра́й , є҆́ввино возва́нїе , вселе́ннѣй все́й вели́кїи сосꙋ́дъ , ꙗ҆́кѡ спасе́нїе в̾ не́мъ содѣ́ласѧ ми́рꙋ , и҆ ѡ҆ставле́нїе грѣхо́мъ дре́внимъ . тѣ́мже и҆ вопїе́мъ є҆́й , молѝ хрⷭ҇та̀ бг҃а , согрѣше́нїемъ ѡ҆ставле́нїе дарова́ти , покланѧ́ющимсѧ вѣ́рою ржⷭ҇твꙋ̀ твоемꙋ̀ честно́мꙋ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . оу҆ста̀ моѧ̀ воз̾глаго́лютъ премꙋ́дрость , и҆ поꙋче́нїе срⷣца моегѡ̀ ра́зꙋмъ . сти́хъ . оу҆ста̀ пра́веднагѡ поꙋча́тсѧ премꙋ́дро сти , и҆ ꙗ҆зы́къ є҆гѡ̀ воз̾гл҃етъ сꙋ́дъ . всѧ́ко дыха́нїе . є҆ѵⷢ҇а́лїе , ѿ і҆ѡа́нна . заⷱ҇ , л҃є . ѱало́мъ , н҃ . сла́ва . мл҃твъ ра́ди ст҃лѧ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

стихѣ́ра . гла́съ , ѕ҃ . Наслѣ́дниче хрⷭ҇то́въ , слꙋго̀ гдⷭ҇нь і҆а́кѡве , по и҆́мени твоемꙋ̀ та́кѡ и҆ житїѐ твоѐ , просїѧ́въ сѣди́нами ра́зꙋмъ , свидѣ́тельствоваше свѣ́тлость лица̀ твоегѡ̀ , дш҃е́вное неѕло́бїе и҆звѣ́ствоваше кро́тость . сло́во молчали́вое . жи́знь твоѧ̀ сла́внаѧ , и҆ оу҆спе́нїе со ст҃ы́ми . молѝ ѡ҆ дш҃а́хъ на́шихъ .

Кано́нъ бцⷣѣ , на́ ѕ҃ . и҆ ст҃о́мꙋ , на́ и҃ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ ходи́въ і҆и҃ль , по бе́зднѣ стопа́ми , гони́телѧ фараѡ́на , ви́дѧ потоплѧ́ема , бг҃ꙋ побѣ́днꙋю пѣ́снь пое́мъ вопїѧ́ше .

запѣ́в̾ : Ст҃лю хрⷭ҇то́въ і҆а́кѡве , молѝ бг҃а ѡ҆ на́съ . Бжⷭ҇твеными зарѧ́ми , и҆ сщ҃е́нными свѣтосїѧ́нїи при́снѡ мою̀ дш҃ꙋ ѡ҆зарѝ , ст҃льскїи пра́здникъ ѻ҆́ч҃е сла́вѧща . Всесвѣ́тлꙋю тѧ̀ ѕвѣздꙋ̀ , мы́сленое показа̀ сл҃нце , свѣ́тлость твои́хъ добродѣ́телей , просвѣтѝ зе́млю ст҃лю хрⷭ҇то́въ мꙋ́дре і҆а́кѡве . Житїѐ прⷭ҇нѡ ѡ҆чище́но и҆ чи́сто , и҆ скве́рнѣ несмѣ́шено ꙗ҆ви́въ , хрⷭ҇то́въ сщ҃е́нъ сосꙋ́дъ премꙋ́дре сказа́сѧ на землѝ і҆а́кѡве бл҃же́нне . боⷢ҇ . Со ѻ҆ц҃е́мъ сꙋ́щимъ є҆диноча́дыи , земны́ѧ ѡ҆божи́въ чⷭ҇таѧ за мно́гїѧ щедро́ты ꙗ҆́кѡ бг҃ъ пребл҃гі́и .

пѣ́снь , г҃ . і҆рмо́съ . Нѣ́сть ст҃а ꙗ҆́коже ты̀ , гдⷭ҇и бж҃е мо́й , вознесы́и ро́гъ вѣ́рныхъ си бл҃же , и҆ оу҆тве́рждь и҆́хъ на ка́мени и҆сповѣ́данїѧ тѝ . Дне́сь днѐ свѣ́та , ты̀ ст҃лю трꙋды̀ бжⷭ҇твеными всели́всѧ . ꙗ҆́снѡ во свѣ́тлостехъ ны́нѣ ст҃ы́хъ сїѧ́ѧ бл҃года́тїю . Проповѣ́даѧ ны́нѣ є҆ди́но бл҃гочести́внѡ , трⷪ҇цы є҆ди́но бжⷭ҇тво̀ . многобо́жнꙋю ле́сть и҆скорени́лъ є҆сѝ ѿ землѝ , ꙗ҆́кѡ честны́и ст҃ль , и҆ ꙗ҆́кѡ сло́вꙋ и҆́стинныи слꙋжи́тель . Пꙋ́ть показа́лъ є҆сѝ мꙋ́дре , всѣ́мъ прельще́нымъ нечести́вагѡ и҆скꙋше́нїѧ . и҆ приве́лъ є҆сѝ к̾ сло́вꙋ па́стыремъ нача́льникꙋ , ꙗ҆́кѡ па́стырь слове́сныи , и҆ спасе́ныи . боⷢ҇ . Приста́нище бꙋ́ди и҆ стра́хъ бѣ́дномꙋ , стрⷭ҇тьмѝ неѡ҆сла́бнѡ погиба́ющꙋ . приста́нище в̾ мо́ри жите́йстѣмъ , є҆ди́на чⷭ҇таѧ прⷭ҇нѡ дв҃аѧ .

сѣда́ленъ . гла́съ , и҃ . Оу҆краша́ѧсѧ премꙋ́дростїю ра́зꙋма , горды́ню низло́жь плотьскі́ѧ тѧ́гости . и҆ бы́сть ѻ҆би́телище дх҃ꙋ прест҃о́мꙋ , непремѣ́ннѡ простира́ѧсѧ ра́зꙋмомъ к̾ лю́бѧщемꙋ тѧ̀ . тѣ́мъ ре́вностїю бжⷭ҇твеною разгара́ѧсѧ сла́вне , си́рымъ и҆ оу҆бо́гимъ оу҆тверже́нїе , ꙗ҆ви́сѧ а҆́нг҃лѡвъ собесѣ́дникъ і҆а́кѡве . молѝ хрⷭ҇та̀ бг҃а грѣхо́въ ѡ҆ставле́нїе пода́ти , чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ . гла́съ , д҃ . Правовѣ́рнѡ прпⷣбне цр҃ковь хрⷭ҇то́вꙋ оу҆па́слъ є҆сѝ , и҆ є҆рети́ческїѧ ѿгна́лъ є҆сѝ плевелы̀ . и҆ в̾ вы́шнихъ се́лѣхъ водворѧ́ешисѧ пребл҃же́нне . сла́ва , и҆ ны́нѣ , боⷢ҇ . Ꙗ҆́кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище въ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃олѣ́пнѡ зове́тъ вопїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Пре́жде с̾вѣ́дыи бг҃ъ бл҃же́нне твоеѧ̀ дш҃ѝ красотꙋ̀ , и҆ ра́зꙋма чистотꙋ̀ . сщ҃енно проповѣ́дника мꙋ́дра , и҆ оу҆чи́телѧ показа́ тѧ . Дх҃омъ просвѣще́ннымъ , сꙋ́щїѧ во тмѣ̀ пре́лестнѣ просвѣща́еши , и҆ кр҃ще́нїемъ сн҃ы днѝ соверша́еши , ст҃лю пресловꙋ́щїи . Ѿ тмы̀ ѕвѣре́й и҆зба́вилъ є҆сѝ ста́до своѐ растерза́ти и҆́щꙋщихъ , и҆ ѿстꙋпи́ти вѣ́ры непоро́чныѧ , ст҃лемъ добро́та , и҆ па́стыремъ старѣ́йшинство . боⷢ҇ . Разꙋ́мнѡ в̾ кꙋпинѣ́ тѧ мѡѷсе́й ви́дѣвъ сщ҃е́ннѡ воѡ҆браже́нꙋ ѻ҆́гненꙋ , ржⷭ҇твꙋ̀ , хотѧ́щꙋ роди́тисѧ та́йнѡ бцⷣе прⷭ҇нѡ дв҃аѧ .

пѣ́снь , є҃ . і҆рмо́съ . Бж҃їимъ свѣ́томъ тѝ бл҃же , оу҆́тренюющихъ тѝ дш҃а любо́вїю , просвѣтѝ молю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Ст҃льскꙋю сѝ ѻ҆де́ждꙋ сщ҃е́ннꙋю носи́въ сщ҃е́ннѡ , нечести́выѧ просвѣти́лъ є҆сѝ , честны́и ст҃лю . є҆ди́нство несо́зданнѡ въ трїе́хъ ли́цѣхъ , і҆а́кѡве премꙋ́дре проповѣ́далъ є҆сѝ . Ѿ оу҆́стъ во́лка мы́сленагѡ восхи́тилъ є҆сѝ лю́ди оу҆че́нїемъ , бг҃огла́се . оу҆ста̀ є҆рети́ческаѧ велерѣ́чиваѧ , твои́ми бг҃осло́вїи загради́лъ є҆сѝ ѻ҆́ч҃е . Ме́рз̾скїи низложе́нъ бы́сть твои́ми сщ҃е́нными словесы̀ маркїа́нъ , и҆ и҆згна́нъ бы́сть ра́ди всѧ́когѡ без̾мѣ́стїѧ ѿрыга́ѧи скве́рны смра́дныѧ , і҆а́кѡве пресла́вныи . боⷢ҇ . Зако́ны є҆стества̀ пресꙋ́щныи бг҃ъ , ѡ҆бновлѧ́етъ непоро́чнаѧ , ѿ твоеѧ̀ оу҆тро́бы ража́етсѧ , є҆ди́нъ оу҆сво́ивъ всѧ́ческаѧ во́лею .

пѣ́снь , ѕ҃ . і҆рмо́съ . Жите́йскагѡ мо́рѧ воз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вопїю́ ти , воз̾ведѝ ѿ тлѝ живо́тъ мо́й многомлⷭ҇тиве . Возвы́шено смире́нїе чистото́ю оу҆ма̀ , и҆ любо́вь нелицемѣ́рнꙋ , вѣ́рꙋ и҆ наде́ждꙋ и҆мѣ́ѧ и҆́стинꙋ , і҆а́кѡве всесла́вныи , трⷪ҇цѣ ꙗ҆ви́сѧ жили́ще . Ны́нѣ ѿ созва́нїѧ твоегѡ̀ дх҃омъ премꙋ́дре , и҆́же по тебѣ̀ бл҃года́тїю слове́сныхъ ѻ҆ве́цъ , наста́вника приво́диши ко ѻ҆лтаре́ви , добродѣ́тели писа́нїемъ ѡ҆блиста́ема . Вельмѝ оу҆краси́вшасѧ росто́вскагѡ сщ҃е́нїѧ , сѣда́лищꙋ тѧ̀ оу҆чи́тъ прехва́льне дх҃ъ ст҃ы́и , и҆ тебѐ па́стырѧ рꙋко́ю ст҃льскою , і҆а́кѡве соверша́етъ . боⷢ҇ . Две́рь бг҃обл҃года́тнаѧ ѿве́рзши две́ри нбⷭ҇ныѧ , две́ри свѣ́та ѿве́рзи ми влⷣчце . и҆ ѿвра́тъ сме́ртныхъ свободи́ мѧ чⷭ҇таѧ .

конда́къ . гла́съ , и҃ . Ꙗ҆́кѡ а҆рхїере́ѡмъ сопрⷭ҇то́льникъ , и҆ ст҃лемъ и҆зрѧ́дныи побо́рникъ бы́лъ є҆сѝ ст҃лю і҆а́кѡве , непреста́ннѡ сохранѧ́й ѻ҆те́чество своѐ , гра́дъ же и҆ лю́ди и҆́же тебѐ вѣ́рою почита́ющихъ , и҆ честны́мъ моще́мъ твои́мъ кла́нѧющихсѧ . да велегла́снѡ тебѣ̀ вопїе́мъ , ра́дꙋисѧ і҆а́кѡве бг҃омꙋ́дре . и҆́косъ . И҆́з̾чрева ма́терьнѧ , ѡ҆сщ҃е́ннагѡ ст҃лѧ гдⷭ҇нѧ , хва́литъ ны́нѣ всѧ̀ страна̀ рꙋ́сскаѧ , прпⷣбнагѡ і҆а́кѡва , росто́вꙋ гра́дꙋ оу҆тверже́нїе . бл҃года́тныѧ да́ры прїе́мшагѡ , бжⷭ҇твеныѧ сла́вы , к̾ немꙋ́же притека́юще всѝ вѣ́рою те́плою , к̾ ра́цѣ моще́й є҆гѡ̀ , любе́знѡ цѣлꙋ́юще . тѣ́мъ и҆ а҆́зъ недосто́йныи и҆ грѣ́шныи , надѣ́ѧсѧ на мл҃твы твоѧ̀ ст҃лю ꙗ҆́же ко влⷣцѣ и҆ пречⷭ҇тѣй є҆гѡ̀ мт҃ри , жела́ю а҆́ки псѝ ѿ крꙋпи́цъ па́дающихъ ѿ трапе́зы господе́й свои́хъ насыще́нїе прїѧ́ти , є҆́же въ де́нь сꙋ́дныи содѣ́ѧнныхъ мно́ю ѕѡ́лъ , мл҃твами твои́ми ст҃е проще́нїе оу҆лꙋчи́ти . да велегла́снѡ тебѣ̀ вопїю̀ , ра́дꙋисѧ і҆а́кѡве бг҃омꙋ́дре .

пѣ́снь , з҃ . і҆рмо́съ . Хладода́тельнꙋ оу҆́бѡ пе́щь сотворѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ оу҆вѣща̀ вопи́ти , бл҃гослове́нъ бг҃ъ ѻ҆ц҃ъ на́шихъ . Вразꙋмлѧ́ѧ неразꙋ́мныѧ , оу҆страша́ше прельще́ныѧ , соверша́ющисѧ ѻ҆́ч҃е спа́слъ є҆сѝ , и҆ бг҃ови приведѐ чи́сты , томꙋ̀ пою́щїѧ бл҃гоче́стнѡ , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ .= Оу҆краси́шасѧ бжⷭ҇твенїи твоѝ по́двизи , воплоще́нїе проповѣ́дающе неи҆зрече́ннымъ милосе́рдїемъ , восїѧ́вшагѡ на́мъ . є҆мꙋ́же вопїе́мъ прилѣ́жнѡ , бл҃гослове́нъ бг҃ъ ѻ҆ц҃ъ на́шихъ . Ѡ҆блада́въ страстьмѝ тѣле́сными , поще́нїемъ сла́внымъ , неѡ҆блада́емь жите́йскими напа́стьми ꙗ҆ви́сѧ . ны́нѣ пое́ши прⷭ҇нѡ , бл҃гослове́нъ бг҃ъ ѻ҆ц҃ъ на́шихъ . =боⷢ҇ . И҆збавлѧ́еши дре́внѧгѡ престꙋпле́нїѧ . ржⷭ҇тво́мъ ти пречⷭ҇таѧ хва́лимъ тѧ̀ спасе́нїе тобо́ю дв҃о , пою́ще и҆ вопїю́ще , бл҃гослове́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆сточѝ , а҆ пра́веднагѡ же́ртвꙋ и҆ во́ды попалѝ , всѧ́ бо твори́ши хрⷭ҇тѐ , є҆ли́ко хо́щеши , тѣ́мъ тѧ превозно́симъ гдⷭ҇а во́ вѣки . Процвѣтѐ ꙗ҆́кѡ фи́никъ во дво́рѣхъ бж҃їихъ . до́лжнымъ сно́мъ прпⷣбнымъ оу҆снꙋ́лъ є҆сѝ . прⷭ҇нѡ же наслажде́нїе пребжⷭ҇твеныи гро́бъ тво́й , и҆ чꙋ́до ви́дѧщимъ і҆а́кѡве проповѣ́дниче . Бж҃їе бо сло́во сꙋ́щественое , сщ҃е́ннѡ тѧ̀ и҆ ст҃лѧ воставлѧ́етъ пома́зающїѧ лю́ди , сщ҃е́ннѡ ст҃лю , и҆ престо́льниче расто́вскїи , и҆ свѣти́льниче вселе́нныѧ . Вопло́щшагосѧ сло́ва бг҃осло́вилъ є҆сѝ мно́го . без̾слове́сїѧ бо лю́ди и҆зба́вивъ . бжⷭ҇твенъ бы́сть оу҆чени́къ , восїѧ́вшагѡ і҆а́кѡве бг҃огла́се . боⷢ҇ . Сщ҃е́ннѡ наꙋ́чьсѧ твои́мъ та́йнамъ , прⷪ҇рчески бжⷭ҇твеныи ли́къ бцⷣе и҆з̾ дале́ча оу҆ви́дѣвъ , и҆ ꙗ҆́кѡ положи́въ бг҃опроповѣ́днѡ бжⷭ҇твенагѡ проповѣ́данїѧ ржⷭ҇тва̀ твоегѡ̀ .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ꙗ҆́кѡ свѣ́тъ , ꙗ҆́кѡ свѣ́щникъ , ꙗ҆́кѡ вели́кое сл҃нце . ꙗ҆́кѡ мо́лнїѧ хрⷭ҇то́вѣ цр҃кве восїѧ́лъ є҆сѝ , и҆ вѣ́рныхъ ра́зꙋмъ просвѣти́лъ є҆сѝ . и҆ в̾ невече́рнѧѧ мѣ́ста всели́сѧ поѧ̀ трист҃ы́ми гла́сы трⷪ҇цꙋ несозда́ннꙋю . Пло́тїю ми́ра кромѣ̀ бы́въ ст҃лю , в̾ прекра́сныѧ чи́ны ѡ҆бита́въ , ро́да на́шегѡ ѡ҆божа́еши творе́нїемъ свѣ́тлымъ . тѣ́мже па́мѧть твою̀ вѣ́рою соверша́емъ на землѝ , і҆а́кѡве премꙋ́дре .= Землѧ̀ тѣ́ло твоѐ бл҃же́нное скрыва́етъ , ꙗ҆́кѡ и҆сцѣле́нїѧ то́чиши вѣ́рнымъ . нб҃о же дꙋ́хъ со и҆збра́нными ѿ́ вѣка но́ситъ бжⷭ҇твеными сїѧ́нїи . ѡ҆заре́нъ вои́стинꙋ ꙗ҆́кѡ всесла́вныи . =боⷢ҇ . Гла́съ а҆рха́нг҃ла гаврїи́ла прїе́мши вели́кагѡ совѣ́та чи́стаѧ , хрⷭ҇та̀ є҆мманꙋ́ила родила̀ є҆сѝ , со а҆́нг҃лы земны́ѧ всѧ̀ сочта́вшагѡ . є҆ди́на вино́вна на́шегѡ дв҃о бл҃же́нства .

свѣти́ленъ . Чꙋ́днагѡ и҆ сла́внагѡ ст҃лѧ і҆а́кѡва вели́кагѡ , прїиди́те пѣ́сньми бжⷭ҇твеными сщ҃е́нными похва́лимъ , ꙗ҆́кѡ росто́вꙋ пред̾сѣда́льника , и҆ а҆́нг҃льскимъ чино́мъ слꙋже́бника бы́вша . дрꙋгі́и , свѣти́ленъ . Сла́внѡ кра́ситсѧ дне́сь свѣтоза́рное торжество̀ , во́ свѣтѣ сла́вы бж҃їѧ пред̾стоѧ̀ ст҃лю , помѧнѝ на́съ хва́лѧщихъ твою̀ па́мѧть . сла́ва , и҆ ны́нѣ , боⷢ҇ . Съ бг҃омъ оу҆пова́нїе натѧ̀ воз̾ложи́хомъ пречи́стаѧ , и҆́же и҆з̾ тебѐ проше́дшемꙋ с̾распина́емсѧ хрⷭ҇тꙋ̀ . свои́ми же к̾ немꙋ̀ мольба́ми , невреди́мы да́же до конца̀ сохранѝ .

На хвали́тѣхъ , стⷯры . гла́съ , а҃ . поⷣ . нбⷭ҇нымъ чино́мъ . На́ нб҃си пред̾почи́лъ є҆сѝ веселꙋ́ѧсѧ ,꙳ молѧ̀ заны̀ прест҃ꙋ́ю трⷪ҇цꙋ ,꙳ млⷭ҇ть пода́ти на́мъ ст҃ꙋ́ю ,꙳ и҆ житїѐ без̾грѣ́шнѡ .꙳ ꙗ҆́кѡ в̾ тꙋ̀ вѣ́рꙋющихъ при́снѡ ско́рби ѿгонѧ́етъ ,꙳ и҆ недꙋ́ги и҆сцѣлѧ́етъ . Милосе́рдїѧ твоегѡ̀ ,꙳ и҆сто́чникъ на́мъ да́рꙋй ,꙳ бл҃года́ть в̾ско́рѣ ра́дости и҆спо́лнь .꙳ пода́й же цѣльбы̀ в̾ ско́рбѣхъ и҆ печа́лѣхъ ,꙳ молѧ̀ хрⷭ҇та̀ всесла́вне ,꙳ спастѝ всѧ̀ пою́щїѧ тѧ̀ . На весе́лїе в̾ше́дъ нетлѣ́емое ,꙳ весе́лїе да́ти молѝ спастѝ рабы̀ своѧ̀ ,꙳ мо́жеши бо і҆а́кѡве ,꙳ в̾ мл҃твахъ бѣды̀ всѧ̀ разгони́ти ,꙳ молѧ̀ хрⷭ҇та̀ и҆сцѣли́ти болѧ́щїѧ ,꙳ и҆ спастѝ дш҃а на́ша . Ѿ зако́ннагѡ ко́рене и҆з̾растѐ вѣ́твь в̾сыне́нїѧ .꙳ вода́ми напое́нъ ꙗ҆́снѡ і҆а́кѡве .꙳ и҆́бо цр҃кви хрⷭ҇то́вѣ ꙗ҆́кѡ фи́никъ ,꙳ высокове́рхїи процвѣ́лъ є҆сѝ на́мъ просвѣща́ѧ вѣ́рныѧ .꙳ тѣ́мъ ны́нѣ со ст҃ли пред̾стои́ши престо́лꙋ хрⷭ҇то́вꙋ ,꙳ моли́сѧ ѡ҆ дш҃а́хъ на́шихъ .

сла́ва . гла́съ , ѕ҃ . Добродѣ́телей твои́хъ ѻ҆́ч҃е прпⷣбне , пло́дъ просвѣти́лъ є҆сѝ вѣ́рныхъ срⷣца̀ . кто́ бо слы́ша бесчи́сленое твоѐ смире́нїе , и҆ терпѣ́нїю неꙋдиви́тсѧ , є҆́же къ ни́щимъ ти́хость , скорбѧ́щимъ оу҆тѣше́нїе . всѧ̀ бг҃олѣ́пнѡ наꙋчи́лъ є҆сѝ . прпⷣбне ст҃лю і҆а́кѡве . ны́нѣ неꙋвѧда́емымъ вѣнце́мъ оу҆вѧзе́сѧ , молѧ̀ ѡ҆ дш҃а́хъ на́шихъ . и҆ ны́нѣ , боⷢ҇ . Бцⷣе ты̀ є҆сѝ лоза̀ и҆́стиннаѧ , возрасти́вшаѧ на́мъ пло́дъ живо́тныи , тебѣ̀ мо́лимсѧ , моли́сѧ влⷣчце со ст҃лемъ , поми́ловатисѧ дш҃а́мъ на́шимъ .

Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , пѣ́снь г҃ , и҆ ѕ҃ , на и҃ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃лю . сла́ва , конда́къ ст҃лю . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃лю . конда́къ хра́мꙋ . сла́ва , ст҃лю . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . оу҆ста̀ моѧ̀ воз̾гл҃ютъ премꙋ́дрость , и҆ поꙋче́нїе срⷣца моегѡ̀ ра́зꙋмъ . сти́хъ . оу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . а҆пⷭ҇лъ , къ є҆вре́ѡмъ . заⷱ҇ , ти҃і .= а҆ллилꙋ́їѧ . оу҆ста̀ пра́веднагѡ поꙋча́тсѧ премꙋ́дрости , и҆ ꙗ҆зы́къ є҆гѡ̀ воз̾гл҃етъ сꙋ́дъ . =є҆ѵⷢ҇а́лїе , ѿ =і҆ѡа́нна . заⷱ҇ , л҃ѕ . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>