28 ноября: прп. Стефана Нового Исповедника и св. мч. Иринарха

МЦⷭ҇А ТОГО́ЖЕ ВЪ К҃И ДН҃Ь

прпⷣбнагѡ ѻ҆ц҃а на́шегѡ стефа́на но́вагѡ и҆сповѣ́дника . и҆ ст҃а́гѡ мч҃нка и҆рина́рха . =Ве́черъ , на гдⷭ҇и возва́хъ , стⷯры , на́ ѕ҃ . гла́съ , ѕ҃ . поⷣ . в=сѐ оу҆пова́нїе . Ве́сь ѿ ю҆́ности ,꙳ возложи́сѧ влⷣцѣ .꙳ пло́ти кромѣ̀ бы́сть мирскі́ѧ ,꙳ любвѐ сщ҃е́ннѣйшїи .꙳ и҆́нокъ и҆зѧ́щенъ бы́въ стефа́не ,꙳ и҆ прїѧ́телище бжⷭ҇твенагѡ дх҃а .꙳ и҆́бо затвори́сѧ бл҃же́нне в̾ хи́жѣ тѣ́снѣ .꙳ в̾пери́лъ є҆сѝ оу҆́мъ к̾ нбⷭ҇нымъ ,꙳ зрѣ́ти неи҆зрече́ннꙋю добро́тꙋ ,꙳ хрⷭ҇та̀ цр҃ѧ и҆ бг҃а .꙳ є҆го́же кла́нѧѧсѧ ѻ҆́бразꙋ ,꙳ пострада́лъ є҆сѝ крѣпча́йше . Четы́редесѧть дне́й ꙗ҆́кѡ влⷣка пости́всѧ ,꙳ в̾ темни́цѣ блюдо́мъ .꙳ себѐ къ страда́нїю оу҆гото́валъ є҆сѝ , сщ҃е́нне стефа́не ,꙳ и҆́нокѡмъ оу҆твержде́нїе ,꙳ и҆ мч҃нкѡмъ оу҆добре́нїе .꙳ тѣ́мъ тѧ̀ ꙗ҆́кѡ ѕвѣ́ри неми́лостивїи наше́дше ,꙳ ꙗ҆́кѡ неѕло́бивое а҆́гнѧ влекꙋ́ще , непра́веднѡ растерза́хꙋ .꙳ и҆ съ без̾зако́нными поло́жьше ,꙳ страда́вша крѣ́пкѡ .꙳ и҆ со дерзнове́нїемъ молѧ́щасѧ ,꙳ ѡ҆ дш҃а́хъ на́шихъ . Лю́дїе без̾зако́ннїи без̾зако́нїю повинꙋ́ющесѧ ,꙳ законопрестꙋ́пнагѡ царѧ̀ прпⷣбне .꙳ ка́менїемъ тебѐ ꙗ҆́кѡ первострада́льца ,꙳ и҆ честна́гѡ стефа́на вои́стинꙋ поби́ша ,꙳ и҆ главꙋ̀ твою̀ сокрꙋши́ша .꙳ по оу҆́лицамъ же влекꙋ́ще сꙋ́рово ,꙳ пролїѧ́ша оу҆тро́бы твою̀ всебога́те ,꙳ нижѐ по сме́рти оу҆щедрѧ́юще тѧ̀ . ѽ твоегѡ̀ мꙋ́жества ,꙳ ѽ нра́ва , ѽ мно́гагѡ терпѣ́нїѧ ,꙳ и҆́мже прїѧ́тъ стефа́не ,꙳ вѣне́цъ неꙋвѧда́емыи .

сла́ва . гла́съ , ѕ҃ . Ѿ младе́нства бг҃ови возложи́сѧ , сщ҃е́ннѣйшїи стефа́не , ꙗ҆́коже вели́кїи прⷪ҇ркъ самꙋи́лъ . и҆ на́горꙋ воз̾ше́дъ , и҆ и҆́ночески оу҆годи́лъ є҆сѝ є҆мꙋ̀ . а҆́бїе же к̾ страда́нїю ѡ҆бнажи́сѧ мꙋ́жески . и҆ за ѻ҆́бразъ є҆го́въ , и҆з̾гна́нїѧ и҆ ско́рби , подъѧ́лъ є҆сѝ терпѣли́внѡ , и҆ оу҆́зы темни́цы . пожда́лъ є҆сѝ влачи́мь и҆ бїе́мь , и҆ ка́менїемъ побива́емь , и҆ главо́ю сокрꙋша́емь , вѣнце́мъ сподо́бисѧ ѿ хрⷭ҇та̀ бг҃а . тогѡ̀ молѝ , и҆́же любо́вїю соверша́ющимъ твою̀ при́снѡ честнꙋ́ю па́мѧть , и҆зба́витисѧ ѿ страсте́й и҆ и҆скꙋше́нїи и҆ бꙋ́дꙋщагѡ сꙋда̀ . и҆ спасти́сѧ дш҃а́мъ на́шимъ .

и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . всѐ оу҆пова́нїе .= А҆́=гньца своегѡ̀ ,꙳ а҆́гница нескве́рнаѧ дре́вле ,꙳ и҆ непоро́чнаѧ влⷣчца .꙳ на крⷭ҇тѣ̀ возноси́ма ꙗ҆́кѡ оу҆зрѣ̀ .꙳ мт҃рьски восклица́ше ,꙳ и҆ дивѧ́щисѧ вопїѧ́ше .꙳ что̀ видѣ́нїе ча́до сладча́йшее ,꙳ сїѐ но́вое и҆ пресла́вное .꙳ ка́кѡ собо́ръ без̾бл҃года́тныи ,꙳ сꙋди́щꙋ пила́товꙋ преда́стъ .꙳ и҆ ѡ҆сꙋжда́етъ сме́ртїю живота̀ всѣ́хъ .꙳ но пою̀ твоѐ неи҆зрече́нное ,꙳ сло́ве схожде́нїе .

На стихо́внѣ , во ѻ҆кта́и . сла́ва . гла́съ , и҃ . И҆́же по ѻ҆́бразꙋ соблю́дъ невреди́мѡ препⷣбне ѻ҆́ч҃е . ѡ҆ хрⷭ҇то́вѣ ѻ҆́бразѣ проти́вꙋ ста̀ мꙋ́жески . не оу҆боѧ́всѧ гноеи҆мени́тагѡ преще́нїѧ . но дх҃о́внымъ мече́мъ тогѡ̀ оу҆би́лъ є҆сѝ . тѣ́мже дерзнове́нїе стѧжа́въ к̾ бг҃ꙋ . спасѝ ста́до своѐ ѿ є҆ресе́й всѣ́хъ , стефа́не многострада́льне .

=и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . ѽ =пресла́вное чꙋ́до . Что̀ ви́димое чꙋ́до ,꙳ є҆́же ѻ҆чи́ма мои́ма ,꙳ зри́тсѧ ѽ влⷣко ,꙳ содержа́и всю̀ тва́рь ,꙳ на́ древѣ распина́ешисѧ ,꙳ и҆ оу҆мерщвѧ́ешисѧ всѣ́мъ даѧ́и жи́знь ,꙳ бцⷣа пла́чꙋщи глаго́лаше ,꙳ є҆гда̀ оу҆зрѣ̀ на крⷭ҇тѣ̀ ви́сима ,꙳ и҆́же и҆з̾ неѧ̀ неи҆зрече́ннѡ восїѧ́вша бг҃а и҆ чл҃ка .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . По́стнически и҆спыта́всѧ на горѣ̀ , мы́сленаѧ враго́мъ ѡ҆полче́нїѧ всѧ̀ , ѻ҆рꙋ́жїемъ погꙋби́лъ є҆сѝ пребл҃же́нне крⷭ҇нымъ . па́ки же къ страда́нїю мꙋ́жески оу҆стреми́всѧ , оу҆би́въ копрони́ма мече́мъ вѣ́ры . и҆ си́хъ ра́ди ѡ҆бою́дꙋ вѣнча́сѧ ѿ́ бг҃а , прпⷣбно мч҃нче прⷭ҇нѡ па́мѧтне , сла́вныи стефа́не .

сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

Слꙋ́жба , ст҃а́гѡ мч҃нка и҆рина́рха пое́тсѧ на па́вечерницѣ . кано́нъ , и҆мы́и краегране́сїе сицево̀ : ми́рнꙋю ми пода́ждь мч҃нче бл҃года́ть . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ ходи́въ і҆и҃ль , по бе́зднѣ стопа́ми , гони́телѧ фараѡ́на , ви́дѧ потоплѧ́ема , бг҃ꙋ побѣ́днꙋю пѣ́снь пое́мъ вопїѧ́ше .

запѣ́въ : Ст҃ы́и мч҃нче и҆рина́рхе , молѝ бг҃а ѡ҆ на́съ . Ѿ собла́знъ жите́йскихъ , и҆ страсте́й крамолꙋ́щихъ мѧ̀ , оу҆мирѝ мо́й оу҆́мъ страда́льче и҆рина́рхе , твою̀ похвали́ти па́мѧть ти́хѡ сподо́би . Стрꙋѧ́ми крове́й твои́хъ пла́мень горѧ́щїи оу҆гаси́въ , напои́лъ є҆сѝ помышле́нїѧ вѣ́рныхъ , возрасти́ти жела́нїе живота̀ вѣ́чнагѡ бл҃гоче́стнѡ мч҃нче и҆рина́рхе . сла́ва . Сщ҃е́ннѡ побѣ́дныѧ вѣнцы̀ , ꙗ҆́кѡ страда́лецъ прїе́мъ и҆рина́рхе , преложи́сѧ ѿ землѝ къ ми́рꙋ нера́тномꙋ . и҆ свѣ́тꙋ и҆ животꙋ̀ и҆́стинномꙋ бл҃же́нне .= и҆ ны́нѣ , боⷢ҇ . Н=евмѣсти́мое сло́во , в̾ твое́мъ чре́вѣ вмѣ́щено ро́ждьши , бг҃овмѣсти́маѧ честна́ѧ оу҆тѣснѧ́ющихъ мѧ̀ лю́тыхъ треволне́ней ѕлы́хъ чⷭ҇таѧ и҆зба́ви .

пѣ́снь , г҃ . і҆рмо́съ . Нѣ́сть ст҃а ꙗ҆́коже ты̀ , гдⷭ҇и бж҃е мо́й , вознесы́и ро́гъ вѣ́рныхъ си бл҃же , и҆ оу҆тве́рждь и҆́хъ на ка́мени и҆сповѣ́данїѧ тѝ . Вжилѧ́ешисѧ крѣ́постїю бжⷭ҇твеною , и҆ грѧде́ши к̾ подвиго́мъ оу҆се́рднѡ всебл҃же́нне . терпѧ̀ ра́ны , и҆ растерза́нїѧ гонѧ́щихъ , страстоте́рпче мч҃нче до́блественыи . Крѣ́пость тѝ дае́тъ хрⷭ҇то́съ вели́кїи стрⷭ҇тополо́жникъ , погꙋби́ти пре́лесть , и҆ посрами́ти врага̀ хва́лѧщасѧ без̾стꙋ́днѡ . и҆ сꙋ́етнѡ мч҃нче бѣсѧ́щагосѧ . сла́ва . Низ̾ложѝ болѣ́зньми мꙋ́жествеными ѕлонача́льнаго ѕмі́ѧ , ли́къ ст҃ы́хъ пострада́въ крѣ́пкѡ . ра́ны и҆ оу҆́зы претерпѣ́въ , си́лою бжⷭ҇твенагѡ дх҃а . и҆ ны́нѣ , боⷢ҇ . Ю҆́же ви́дѣ дре́вле і҆а́кѡвъ ѿ землѝ досѧ́жꙋщꙋ , къ нбⷭ҇нѣй высотѣ̀ бжⷭ҇твенꙋю лѣ́ствицꙋ , ꙗ҆́вѣ мр҃і́ю чⷭ҇тꙋю , влⷣчню воспое́мъ пола́тꙋ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃олѣ́пнѡ зове́тъ вопїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Зако́ннѡ потечѐ , зако́ннѡ пострада̀ , и҆ зако́ннѡ вѣнча́сѧ , бж҃їимъ зако́номъ оу҆крѣплѧ́емь . и҆ тогѡ̀ непоколѣби́мо соблюда́ѧ бл҃же́нне . Нетерпѧ̀ сла́вне въ пре́лести плꙋ́ти , къ бг҃орожде́нїю ꙗ҆́кѡ смы́сленъ , ра́дꙋѧсѧ оу҆стреми́лсѧ є҆сѝ . свѣ́тъ разꙋ́мныи прїе́мъ , и҆ свѣти́льникъ ꙗ҆влѧ́емь . Ѿ =ню́дъ непокры̀ глꙋбина̀ прїе́мши тѧ̀ всебога́те мч҃нче , позна́въ тѧ̀ бжⷭ҇твеныхъ стрⷭ҇те́й , всеи́стиннагѡ хрⷭ҇та̀ , бжⷭ҇твенагѡ свидѣ́телѧ и҆рина́рхе . =сла́ва . Сщ҃е́ннѡ дѣ́йствꙋемы , и҆ предѝ закала́емы . и҆ терза́емы кꙋ́пнѡ . и҆ ѻ҆гне́мъ всю́дꙋ под̾палѧ́емы , не ѿверго́стесѧ хрⷭ҇та̀ , стрⷭ҇тоте́рпицы досточꙋ́дныѧ . и҆ ны́нѣ , боⷢ҇ . Дв҃ою пребы́сть по ржⷭ҇твѣ̀ , ꙗ҆́коже бѣ̀ пре́жде ржⷭ҇тва̀ , ꙗ҆́кѡ бг҃а сло́ва родила̀ є҆сѝ , и҆зба́вльшаго на́съ хода́тайствомъ тѝ пренепоро́чнаѧ .

пѣ́снь , є҃ . і҆рмо́съ . Бж҃їимъ свѣ́томъ тѝ бл҃же , оу҆́тренюющихъ тѝ дш҃а любо́вїю , просвѣтѝ молю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Копїе́мъ оу҆ѧзви́сѧ вра́гъ . терпѣ́нїемъ крѣ́пкимъ доблемꙋ́дренагѡ мч҃нка , и҆ тогѡ̀ пѧта́мъ покори́сѧ , и҆ смѣ́хъ ви́дитсѧ посрамлѧ́емь . Нога̀ твоѧ̀ ста̀ прⷪ҇рчески мч҃нче на пра́вости ꙗ҆́вѣ , неоу҆кло́ннымъ мꙋдрова́нїемъ препина́ющи многоко́зненаго и҆ стезѧ́ми мч҃нческими оу҆добрѧ́ема . сла́ва . Ты̀ ѕло́бꙋ гонѧ́щихъ , неѕло́бивъ и҆ про́стъ ꙗ҆́вльсѧ мч҃нче ѿри́нꙋ а҆ка́кїе . и҆ конча́нїемъ твоеѧ̀ кро́ве , вѣнцы̀ нетлѣ́нїѧ оу҆вѧзе́сѧ . и҆ ны́нѣ , боⷢ҇ . Разꙋмѣ́въ и҆з̾ дале́ча та́йнѡ прⷪ҇ро́къ бг҃освѣ́тлыхъ ли́къ дв҃о бг҃оневѣ́стнаѧ , бжⷭ҇твенагѡ ржⷭ҇тва̀ твоегѡ̀ глꙋбинꙋ̀ неи҆зрече́ннꙋю . ѻ҆́бразы сщ҃е́нными тѧ̀ проначерта̀ .

пѣ́снь , ѕ҃ . і҆рмо́съ . Жите́йскагѡ мо́рѧ воз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вопїю́ ти , воз̾ведѝ ѿ тлѝ живо́тъ мо́й многомлⷭ҇тиве . Возше́дъ на́воды ѡ҆кормлѧ́емь рꙋко́ю живонача́льною и҆рина́рхе , и҆ спасе́сѧ въ си́хъ . гони́телемъ погрꙋзи́въ ѕлоче́стїе , мл҃твою прилѣ́жною сщ҃е́ннѣйшїи . Ма́лыми и҆скꙋплѧ́емы , вели́ки себѐ в̾ ра́й в̾да́ша сщ҃е́нныѧ жены̀ . льсти́телѧ є҆́в̾вина , дх҃омъ оу҆мертви́вше ѕмі́ѧ ꙗ҆вле́ннѣйше . сла́ва . Ѻ҆́троцы ст҃і́и , а҆́гньцы чи́стїи , и҆ приноше́нїѧ соверше́наѧ , на́съ ра́ди пожре́номꙋ и҆́стинномꙋ а҆́гньцꙋ приведе́ни бы́ша , в̾ воню̀ бл҃гоꙋха́нїѧ веселѧ́щесѧ . и҆ ны́нѣ , боⷢ҇ . Сѐ ны́нѣ воплоти́сѧ ѿ крове́й твои́хъ чи́стыхъ дв҃о мт҃и гдⷭ҇ь , и҆ чл҃кѡмъ совокꙋплѧ́етсѧ кромѣ̀ преложе́нїѧ , за неи҆з̾гл҃аннꙋю млⷭ҇ть , на́ше спасе́нїе содѣва́ѧ .

Гдⷭ҇и поми́лꙋй , гⷤ . сла́ва , и҆ ны́нѣ . сѣда́ленъ . гла́съ , а҃ . Ми́ръ тебѣ̀ мно́гъ прибы́сть мч҃нче , пости́гшꙋ врага̀ . и҆ побѣди́вшꙋ пре́лести ра́ть бжⷭ҇твеною бл҃года́тїю , крѣ́пкѡ пострада́вшꙋ ти . тѣ́мже вѣ́рою тѧ̀ мо́лимъ , всѧ́когѡ вре́да и҆зба́ви , ст҃ꙋ́ю ти па́мѧть чтꙋ́щихъ и҆рина́рхе .

пѣ́снь , з҃ . і҆рмо́съ . Хладода́тельнꙋ оу҆́бѡ пе́щь сотворѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ оу҆вѣща̀ вопи́ти , бл҃гослове́нъ бг҃ъ ѻ҆ц҃ъ на́шихъ . Любвѐ є҆́же к̾ пло́ти распрѧ́гъ своегѡ̀ оу҆ма̀ бл҃же́нне . попалѧ́емь и҆ ѻ҆гне́мъ жго́мь мꙋ́дре , ѻ҆́троческꙋю вопїѧ́ше пѣ́снь , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ .= Оу҆бл҃же́нъ бы́сть ѻ҆троко́мъ бжⷭ҇твеныи собо́ръ , и҆ же́нъ седмочи́сленыи ли́къ ст҃ы́и . строга́нїѧ , ѻ҆́гнь , и҆ ра́ны крѣ́пкѡ претерпѣ́вше кꙋ́пнѡ , и҆ нбⷭ҇ныхъ бл҃гъ сподоблѧ́еми . =сла́ва . Ѿгонѧ́ютсѧ ѿ є҆ди́нагѡ твоегѡ̀ призыва́нїѧ лꙋка́вїи дꙋ́хове , оу҆вѣ́дѣвше тѧ̀ страда́льца непобѣди́ма хрⷭ҇то́ва и҆рина́рхе . пою́ща те́плѣ бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . и҆ ны́нѣ , боⷢ҇ . Оу҆ны́нїемъ ѡ҆держи́ма , воз̾дви́гни к̾ дѣ́йствꙋ пречи́стаѧ бжⷭ҇твеныхъ дѣѧ́нїи , оу҆крѣплѧ́ющи мѧ̀ на врагѝ прⷭ҇нѡ борю́щихъ мѧ̀ лю́тѣ . и҆ сопроти́вными помышле́нїи льстѧ́щихъ мѧ̀ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆сточѝ , а҆ пра́веднагѡ же́ртвꙋ и҆ во́ды попалѝ , всѧ́ бо твори́ши хрⷭ҇тѐ , є҆ли́ко хо́щеши , тѣ́мъ тѧ превозно́симъ гдⷭ҇а во́ вѣки . Кровны́ми тече́нїи є҆щѐ ка́плѧ , и҆ ра́нъ добро́тою оу҆добрѧ́емь , побѣдотво́рцꙋ ꙗ҆ви́сѧ и҆рина́рхе . побѣ́де по́чести ѿ негѡ̀ прїе́млѧ . Возне́съсѧ любо́вїю вседержи́телевою гони́телемъ вознесе́нꙋю горды́ню низ̾ложи́лъ є҆сѝ . и҆ и҆́дольское смири́лъ є҆сѝ шата́нїе , мч҃нче стрⷭ҇тоте́рпче и҆рина́рхе всебл҃же́нне . сла́ва . Млрⷭ҇дїѧ мѧ̀ бжⷭ҇твенагѡ мч҃нче сподо́би . и҆скꙋше́нїѧ и҆ бѣ́дъ и҆збавлѧ́ѧ . вѣ́рою тѧ̀ те́плою чтꙋ́ща и҆рина́рхе . и҆ под̾кро́въ тво́й прибѣга́юща . и҆ ны́нѣ , боⷢ҇ . Ра́дꙋисѧ ст҃а́ѧ горо̀ и҆ бг҃опроходи́маѧ , неи҆зрече́нныхъ веще́й , ра́дꙋисѧ ѡ҆бъꙗ҆вле́нїе и҆ слы́шанїе стра́шное . неꙋдо́бь ви́димое видѣ́нїе , ра́дꙋисѧ па́дшихъ воста́нїе дв҃о .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Са́мо то̀ послѣ́днее и҆ бл҃же́нное жела́нїе пости́же бг҃омꙋ́дре и҆рина́рхе . и҆ прича́стїемъ бг҃ъ бы́лъ є҆сѝ , поѧ̀ со беспло́тными , ст҃ъ ст҃ъ ст҃ъ трⷪ҇це вседѣ́тельнаѧ и҆ всеси́льнаѧ . И҆збѣ́гъ сѣ́ти ловѧ́щихъ тѧ̀ , ко гнѣздꙋ̀ нбⷭ҇номꙋ почи́лъ є҆сѝ сла́вне . и҆ съ мч҃нческими совокꙋпи́сѧ во́инствы , с̾ тобо́ю страда́вшими . тѣ́мже чте́мъ па́мѧть ва́шꙋ , ра́достнѡ торжествꙋ́юще . сла́ва . Крѣ́пость и҆ си́лꙋ хрⷭ҇та̀ пред̾лага́ѧ , лю́тꙋю мꙋ́ки преплꙋ́въ пꙋчи́нꙋ . и҆ вы́шнѧгѡ приста́нища дости́же . ве́сь оу҆кра́шенъ дх҃о́внымъ свѣтоли́тїемъ , ѡ҆би́льнѡ ѡ҆блива́емь . и҆ ны́нѣ , боⷢ҇ . Разꙋмѣ́ти чꙋ́до непости́жимое ржⷭ҇тва̀ твоегѡ̀ дв҃о мт҃и немогꙋ́ще , молча́нїемъ сѐ па́че сла́вимъ . и҆ тебѐ славосло́вимъ пребл҃же́ннꙋю є҆ди́нꙋ , и҆ до́брꙋю в̾ жена́хъ и҆ всенепоро́чнꙋю .

стихѣ́ры . гла́съ , ѕ҃ . поⷣ . в̾ =тре́тїи де́нь . =запѣ́въ : Ст҃ы́и мч҃нче и҆рина́рхе , молѝ бг҃а ѡ҆ на́съ . По́двиги честна́гѡ страда́льца ,꙳ и҆ болѣ́зни ѻ҆рꙋ́жника хрⷭ҇то́ва хва́лѧще ,꙳ по́долгꙋ вѣ́рнїи возопїе́мъ гдⷭ҇ви .꙳ тогѡ̀ моли́твами ,꙳ всѧ́кїѧ нꙋ́жды и҆зба́ви на́съ . Ми́ръ мно́гъ ѿ́ гдⷭ҇а страда́вшꙋ ти бы́сть .꙳ и҆ бꙋ́рю проше́дшꙋ лю́тыхъ ,꙳ и҆рина́рхе всебл҃же́нне ,꙳ до́блїи во́ине ,꙳ и҆ моли́твениче ѡ҆ хва́лѧщихъ тѧ̀ . сла́ва . Спострада̀ с̾ тобо́ю же́н̾скїи ли́къ ,꙳ и҆ дѣте́й бжⷭ҇твеное собра́нїе ,꙳ со ст҃ы́мъ а҆ка́кїемъ крѣ́пкѡ , соверша́юще по́двигъ .꙳ пре́лесть оу҆малѧ́юще ,꙳ и҆рина́рхе бл҃же́нне . и҆ ны́нѣ , боⷢ҇ . Застꙋ́пница и҆ покро́въ мо́й ,꙳ ты̀ є҆сѝ пренепоро́чнаѧ бцⷣе .꙳ тѧ́ бо и҆́мамъ помо́щницꙋ в̾ ско́рбѣхъ ,꙳ и҆ недꙋ́зѣхъ и҆ тѣснота́хъ .꙳ и҆ тѧ̀ прославлѧ́ю препѣ́тꙋю . крⷭ҇тобоⷢ҇ . Людьмѝ без̾зако́нными ,꙳ непра́веднѡ пригвожда́ема тѧ̀ на́ древѣ ,꙳ дв҃аѧ чи́стаѧ и҆ мт҃и твоѧ̀ зрѧ́щи ,꙳ ꙗ҆́коже сѷмеѡ́нъ проречѐ ,꙳ оу҆тро́бою сп҃се растерза́шесѧ .

На оу҆́трени . ѻ҆́ба кано́на , во ѻ҆кта́и . и҆ прпⷣбномꙋ , на́ ѕ҃ . и҆мы́и краегране́сїе сицево̀ : хрⷭ҇то́съ вѣнча́етъ тѧ̀ мч҃нческимъ вѣнце́мъ бл҃же́нне . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ ходи́въ і҆и҃ль , по бе́зднѣ стопа́ми , гони́телѧ фараѡ́на , ви́дѧ потоплѧ́ема , бг҃ꙋ побѣ́днꙋю пѣ́снь пое́мъ вопїѧ́ше .

запѣ́в̾ : Прпⷣбне ѻ҆́ч҃е стефа́не , молѝ бг҃а ѡ҆ на́съ .= Ра́достнѡ ты̀ проше́дъ тѣ́снꙋю стезю̀ поста̀ , свидѣ́тельствова широтꙋ̀ . вра́жїѧ попали́лъ є҆сѝ стремле́нїѧ . и҆ простра́нныи живо́тъ бл҃же́нне наслѣ́дова . Ко́рень тѧ̀ непло́дныи , пре́жде пло́дствꙋетъ , а҆́ннѣ тезои҆мени́тыи , ꙗ҆́кѡ дре́вле самꙋ́ила . и҆ даѧ́нїемъ тѧ̀ дае́тъ бг҃ови , житїѧ̀ твоегѡ̀ мꙋ́дре бл҃года́ть зна́менающи . Въ сщ҃е́нныи бжⷭ҇твеныхъ и҆́нокъ прише́дъ чи́нъ . ꙗ҆́кѡ свѣтлѣ́йша ѕвѣзда̀ добродѣ́тельми восїѧ́лъ є҆сѝ вѣ́рныхъ ѡ҆зарѧ́ѧ та́йнѡ , прпⷣбне стефа́не . И҆стни́въ тѣ́ло ѻ҆гражде́нїемъ тѣ́снагѡ житїѧ̀ . в̾пери́лъ є҆сѝ оу҆́мъ к̾ нбⷭ҇нымъ мꙋ́дре . восхожде́нїи до́брыми распространѧ́ѧсѧ . =боⷢ҇ . Непроходи́мꙋю две́рь . чи́стꙋю чистоты̀ хра́минꙋ , до́брꙋю в̾ жена́хъ , ст҃ꙋ́ю влⷣчцꙋ , гла́сы сщ҃е́нными , сщ҃е́ннїи лю́дїе просла́вимъ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Нѣ́сть ст҃а ꙗ҆́коже ты̀ , гдⷭ҇и бж҃е мо́й , вознесы́и ро́гъ вѣ́рныхъ си бл҃же , и҆ оу҆тве́рждь и҆́хъ на ка́мени и҆сповѣ́данїѧ тѝ . Оу҆́мъ тво́й зрѣ́нїемъ к̾ бг҃ꙋ оу҆добрѧ́емь ѻ҆́ч҃е , красе́нъ ꙗ҆ви́сѧ . и҆ бл҃года́ти всѧ́кїѧ и҆спо́лненъ вои́стинꙋ , и҆ бжⷭ҇твеныѧ свѣ́тлости прича́стникъ . Чтⷭ҇нѣ́й и҆ко́нѣ хрⷭ҇то́вѣ , и҆ тогѡ̀ ро́ждьшїѧ покланѧ́ѧсѧ бл҃же́нне . царѧ̀ ѕлочести́вагѡ повелѣ́нїе ме́рзское возненави́дѣ , си́лою бжⷭ҇твенагѡ дх҃а . Желѣ́зы тебѐ , желѣ́знѡ и҆мꙋ́ща срⷣце , несмы́сленыи свѧза́въ ѿсыла́етъ в̾ темни́цꙋ . ꙗ҆́кѡ храни́телѧ хрⷭ҇то́вѣхъ оу҆че́ней , стефа́не всебога́те .= Твоѧ̀ кра́сныѧ ꙗ҆́вственѡ и҆мѣ̀ прпⷣбне но́зѣ , мꙋче́нїѧ к̾ стезѧ́мъ стꙋпа́ющи свѣ́тлѡ . и҆ главы̀ вра́жїѧ сокрꙋша́ющи , стефа́не многострада́льне . =боⷢ҇ . И҆з̾ тебѐ є҆ди́ныѧ чⷭ҇тыѧ пребжⷭ҇твеное сло́во вопло́щьсѧ ꙗ҆́коже вѣ́сть . и҆ спасѐ на́съ покланѧ́ющихсѧ , за млрⷭ҇дїе бжⷭ҇твеномꙋ є҆гѡ̀ с̾хожде́нїю .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

сѣда́ленъ . гла́съ , а҃ . Кро́вь твоѧ̀ мꙋ́дре та́йнѡ зове́тъ ѿ землѝ къ бг҃ꙋ , ꙗ҆́коже а҆́велева бг҃омꙋ́дре . ꙗ҆́снѡ бо проповѣ́да хрⷭ҇то́во вочл҃ченїе . тѣ́мже посрами́лъ є҆сѝ и҆конора́тныхъ пре́лесть , и҆ пре́йде в̾ нбⷭ҇ныѧ черто́ги , молѝ спастѝ на́съ . двⷤа . сла́ва , и҆ нн҃ѣ , боⷢ҇ . Без̾невѣ́стнаѧ чⷭ҇таѧ бцⷣе дв҃о , є҆ди́на вѣ́рнымъ застꙋ́пница и҆ покро́въ , бѣ́дъ и҆ скорбе́й , и҆ лю́тыхъ напа́стей всѣ́хъ и҆зба́ви , и҆́же натѧ̀ оу҆пова́нїе ѻ҆трокови́це и҆мꙋ́щихъ . и҆ дш҃а на́ша спасѝ , бжⷭ҇твеными моли́твами сѝ . крⷭ҇тобоⷢ҇ . Зрѧ́щи тѧ̀ хрⷭ҇тѐ всенепоро́чнаѧ мт҃и , ме́ртва на крⷭ҇тѣ̀ просте́рта , вопїѧ́ше , сн҃е мо́й собез̾нача́льне ѻ҆ц҃ꙋ и҆ дх҃ꙋ , что̀ неи҆зрече́нное твоѐ сѐ смотре́нїе ; и҆́мже спа́слъ є҆сѝ ще́дре , пречⷭ҇тꙋю рꙋ́кꙋ свое́ю созда́нїе .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃олѣ́пнѡ зове́тъ вопїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Свѣ́томъ дх҃о́внымъ просвѣща́емь , мольба́ми бжⷭ҇твеными , слѣпы́мъ свѣ́тъ ѻ҆́ч҃е по́далъ є҆сѝ , своегѡ̀ влⷣкꙋ и҆ бг҃а подража́въ бг҃одохнове́нне . Ви́дѣнъ бы́сть и҆з̾ дале́ча пла́вающими , ѡ҆кормлѧ́ѧ си́хъ бл҃же́нне , к̾ ти́хомꙋ приста́нищꙋ , бжⷭ҇твеною бл҃года́тїю , призыва́ющихъ тѧ̀ вѣ́рнѡ ѻ҆́ч҃е стефа́не . Сщ҃е́ннѡ дѣ́йствꙋемь , ꙗ҆́коже заколе́нїе сщ҃е́ннѡ принесе́сѧ , тебѐ ра́ди пожре́номꙋ стефа́не . и҆ перворожде́ныхъ во ѻ҆би́тели почѝ ра́дꙋѧсѧ . Честны́мъ ти гл҃омъ , пре́жде на́полы сꙋхі́и здра́въ ꙗ҆ви́сѧ ве́сь . оу҆ди́вльсѧ мч҃нче да́нной тѝ бл҃года́ти с̾ высоты̀ ѡ҆би́льнѡ , чл҃кѡмъ на и҆справле́нїе . боⷢ҇ . Натѧ̀ пренепоро́чнаѧ спасе́нїѧ моегѡ̀ оу҆пова́нїе возложи́хъ к̾ твоемꙋ̀ покро́вꙋ прибѣго́хъ . бꙋ́дими ѻ҆трокови́це помо́щница , лю́тыхъ и҆збавлѧ́ющи мѧ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Бж҃їимъ свѣ́томъ тѝ бл҃же , оу҆́тренюющихъ тѝ дш҃а любо́вїю , просвѣтѝ молю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Мч҃нческими вѣнча̀ почестьмѝ , по́стническїѧ твоѧ̀ трꙋды̀ вои́стинꙋ прпⷣбне стефа́не , под̾вигополо́жникъ є҆ди́нъ бг҃ъ на́шъ , на оу҆бі́йцы оу҆крѣпи́выи тѧ̀ . Под̾виза́емь бл҃госла́внѡ , со мно́жествомъ мч҃нкъ в̾ темни́цахъ примѣша́ѧсѧ мч҃нче . ѡ҆брѣ́тше тѧ̀ , ꙗ҆́кѡ ѕвѣ́зды незаходи́мое сл҃нце , ѡ҆б̾стоѧ́ще пребо́льше просвѣща́хꙋсѧ . Гл҃ы , бжⷭ҇твеныхъ сщ҃е́нно и҆сповѣ́дникъ , и҆ под̾ража́телей бжⷭ҇твенѣй стра́сти , оу҆бл҃жа́емъ три́ста , и҆ четы́редесѧте и҆ дво́ицꙋ , без̾бо́жныхъ пребори́вшаѧ . Власо́мъ ѿѧ́тїе рꙋга́тельнѡ , слꙋхо́мъ ѿрѣ́занїе и҆ рꙋ́къ . оу҆до́въ же бжⷭ҇твеныхъ пож̾же́нїе . по и҆ко́нѣ хрⷭ҇то́вѣ подъѧ́ша , мно́жество прпⷣбныхъ бг҃осло́внѣйшее . боⷢ҇ . Прест҃а́ѧ , ꙗ҆́же бг҃а є҆ди́на на землѝ вои́стинꙋ , прест҃а́гѡ ро́ждьшаѧ , тѧ̀ бцⷣꙋ при́снѡ проповѣ́дающихъ , ѡ҆ст҃ѝ и҆ спасѝ хода́тайствомъ сѝ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Жите́йскагѡ мо́рѧ воз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вопїю́ ти , воз̾ведѝ ѿ тлѝ живо́тъ мо́й многомлⷭ҇тиве . Слове́съ твои́хъ си́лꙋ , ѕло́бѣ ѡ҆брѣта́тель претерпѣ́ти невозмо́же . тѣ́мже оу҆́замъ тѧ̀ стефа́не и҆ ра́намъ , сме́рти же нꙋ́жднѣй сꙋ́рово льсте́цъ предадѐ . Ꙗ҆́кѡ хлѣ́бъ пеко́мъ ѻ҆гне́мъ , и҆ за́ нозѣ неми́лостивнѡ ѡ҆вѣ́шаемь , всесожже́нїе па́вле бы́сть . и҆ бг҃ови же́ртва принесе́сѧ , соводворе́нїѧ мч҃нкъ сподоблѧ́емь . Зако́ннѡ пострада́вше затворе́ни , и҆ оу҆да́вою житїѐ ѡ҆ста́вльше , во є҆фе́сѣ прпⷣбнїи и҆́ноцы , ѻ҆́смь к̾ три́десѧтимъ . и҆́хъ же вѣ́рою и҆ любо́вїю оу҆бл҃жа́емъ . Крѣ́пкѡ сꙋдѧ́щемꙋ проти́вѧсѧ , и҆ ра́нами оу҆ранѧ́емо твоѐ тѣ́ло , оу҆мретѝ восхотѣ̀ за хрⷭ҇та̀ , є҆ди́нагѡ без̾сме́ртнагѡ достосла́вне пе́тре , великои҆мени́тыи . боⷢ҇ . Є҆ди́нꙋ препѣ́тꙋю , и҆ до́брꙋю въ жена́хъ бг҃ороди́тельницꙋ , хрⷭ҇тїа́нѡмъ стѣ́нꙋ неѡ҆бори́мꙋю пречⷭ҇тꙋю влⷣчцꙋ , несꙋме́ннымъ срⷣцемъ оу҆бл҃жа́емъ .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ . гла́съ , г҃ . И҆з̾ непло́дна прпⷣбне ко́рене . возрастѐ вѣ́твь , первострада́льцꙋ тезои҆мени́те . и҆́нокѡмъ наста́вникъ вели́къ ѻ҆́ч҃е ꙗ҆ви́сѧ . и҆ ꙗ҆́рости не оу҆боѧ́всѧ царѧ̀ , нехотѧ́ща хрⷭ҇то́въ честѝ ѻ҆́бразъ . сегѡ̀ ра́ди сконча́сѧ , мч҃нческїи вѣне́цъ прїѧ́тъ стефа́не . и҆́косъ . И҆́же за́висти ѻ҆ц҃ъ , и҆ бг҃а чꙋ́ждь , и҆скꙋше́нїѧ ти мно́га , и҆ треволне́нїѧ воз̾дви́же , нетерпѧ̀ зрѣ́ти твоѐ бжⷭ҇твеное житїѐ . и҆ пра́вагѡ тѝ прет̾кнꙋ́ти ше́ствїѧ , ме́рз̾скїи лꙋка́вствїѧ тѝ с̾шива́етъ , мнѣ́всѧ бы́ти оу҆чени́къ , ꙗ҆́коже і҆ꙋ́да пре́жде . и҆ тебѐ в̾ рꙋ́ки без̾зако́нныхъ ѻ҆́ч҃е потща́сѧ в̾ложи́ти , хрⷭ҇та̀ проповѣ́дающа свѣ́тлѡ , и҆ тогѡ̀ ѻ҆́бразꙋ любо́вїю кла́нѧющасѧ . мч҃нческїи вѣне́цъ прїѧ́тъ стефа́не .

пѣ́снь , з҃ . і҆рмо́съ . Хладода́тельнꙋ оу҆́бѡ пе́щь сотворѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ оу҆вѣща̀ вопи́ти , бл҃гослове́нъ бг҃ъ ѻ҆ц҃ъ на́шихъ . Возвѣсти́сѧ ти коне́цъ бл҃же́нне , вседѣ́тельнымъ хотѣ́нїемъ . тѣ́мже бо́льшемꙋ постꙋ̀ в̾да́въ себѐ . и҆ ѿ сла́вы в̾ сла́вꙋ прихо́диши , оу҆бїе́мь за хрⷭ҇та̀ и҆́же надовсѣ́ми бг҃а . Тезои҆мени́тнѡ , первострада́льномꙋ с̾просла́висѧ . и҆́бо ка́менїемъ побива́емь неми́лостивнѡ , и҆ влеко́мъ , и҆ оу҆дарѧ́емь , кровьмѝ и҆спо́лнилъ є҆сѝ зе́млю . и҆ дш҃ꙋ свою̀ гдⷭ҇ви ра́дꙋѧсѧ пре́далъ є҆сѝ . Во оу҆́лицахъ мч҃нче стефа́не град̾ски́хъ , неми́лостивнѡ влеко́мъ , с̾равни́лъ є҆сѝ мꙋче́нїѧ стезю̀ вѣ́рнымъ . на ню́же настꙋпа́ющїи крѣ́пкѡ , к̾ нбⷭ҇номꙋ гра́дꙋ ꙗ҆́вѣ дои҆до́ша . боⷢ҇ . Сщ҃е́ннїи проро́цы провозвѣсти́ша чи́стаѧ ꙗ҆вле́ннѣйше та́инство чи́стагѡ ти ржⷭ҇тва̀ . и҆ ны́нѣ мы̀ с̾хожде́нїе свѣ́тлѡ разꙋмѣ́юще , бл҃гоче́стнѡ тѧ̀ оу҆бл҃жа́емъ .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆сточѝ , а҆ пра́веднагѡ же́ртвꙋ и҆ во́ды попалѝ , всѧ́ бо твори́ши хрⷭ҇тѐ , є҆ли́ко хо́щеши , тѣ́мъ тѧ превозно́симъ гдⷭ҇а во́ вѣки . Свирѣ́пѣйше ꙗ҆́коже ѕвѣ́ри восхити́ша , хрⷭ҇то́ва а҆́гнѧ , бїю́щїи оу҆бива́юще . и҆ с̾ мꙋ́жи без̾зако́нными погреба́юще , без̾зако́нїемъ живꙋ́щїи . Неми́лостивнѡ тѝ главꙋ̀ вра́гъ сокрꙋшѝ , ю҆́же бг҃ъ в̾ вы́шнихъ вѣнце́мъ вѣнча̀ побѣ́днымъ , вѣне́чниче многострада́льне . сла́ва мч҃нкѡмъ и҆ всѣ́мъ прпⷣбнымъ . Терпѣли́внѡ мꙋчи́телю противлѧ́ѧсѧ бг҃омꙋ́дрыи а҆ндре́й , ра́нами раз̾дроблѧ́етсѧ . и҆ неми́лостивнѡ оу҆мерщвлѧ́етсѧ пра́ведныи , поѧ̀ влⷣцѣ во́ вѣки . Ст҃ѣ́йшїи до́мъ оу҆́же бы́въ , и҆́же над̾ всѣ́ми ст҃ы́ми почива́ющаго , в̾ свое́мъ и҆мѣ̀ се́рдцы живꙋ́ща , многострада́льне стефа́не во всѧ̀ вѣ́ки . боⷢ҇ . Ѡ҆кропле́нїемъ бжⷭ҇твеныѧ кро́ве бг҃обл҃года́тнаѧ . и҆з̾ ре́бръ и҆сточи́вшеюсѧ сн҃а твоегѡ̀ и҆ бг҃а , лꙋка́вымъ грѣхо́мъ прибы́вшихъ с̾кве́рнꙋ , молю́тисѧ ѡ҆мы́й дв҃о .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ви́дѣвъ ра́дꙋѧсѧ а҆́нг҃льскїѧ чи́ны , патрїа́рхъ прпⷣбныхъ . страда́лецъ , и҆ а҆пⷭ҇лъ . и҆ пра́ведныхъ всѣ́хъ бг҃одх҃нове́нне . с̾ ни́ми же совокꙋплѧ́ѧсѧ , помѧнѝ , застꙋпѝ , и҆́же чи́стѣ на землѝ оу҆бл҃жа́ющихъ тѧ̀ . Ꙗ҆́кѡ свѣ́тъ , ꙗ҆́кѡ оу҆́тро , ꙗ҆́кѡ вели́кое сл҃нце , ꙗ҆́кѡ нб҃о ѕвѣ́здное , чꙋде́сными свѣтлостьмѝ , ꙗ҆́звами ст҃ы́ми бы́сть . всѣ́хъ помышле́нїѧ хва́лѧщихъ тѧ , стефа́не оу҆краша́ѧ вои́стинꙋ , мч҃нче многострада́льне . Крѣ́пкими по́стническими по́двиги , низ̾ложи́въ тмѣ̀ нача́ла ѻ҆́ч҃е пре́жде , и҆ в̾ послѣ́днѧѧ пострада́въ крѣ́пкѡ , коне́чнѣй па́гꙋбѣ сїѧ̀ пре́давъ , стефа́не мч҃нкѡмъ добро́та , и҆ прпⷣбнымъ похвале́нїе . Твоѧ̀ сла́внаѧ па́мѧть дне́сь , пресвѣ́тлыми зарѧ́ми даро́въ дх҃о́вныхъ , ѡ҆зарѧ́етъ землена́ѧ и҆сполне́нїѧ . ю҆́же ра́достнѡ ны́нѣ пра́зднꙋющихъ , просвѣтѝ и҆ ѡ҆ст҃ѝ на́съ , бг҃обл҃же́нне стефа́не . боⷢ҇ . Свѣ́та прїѧ́телище бг҃ора́дованнаѧ , сщ҃енномч҃нкѡмъ вои́стинꙋ оу҆твержде́нїе , и҆ прпⷣбнымъ всѣ́мъ похвале́нїе , спасѝ на́съ ѿ бѣ́дъ и҆ ѡ҆б̾стоѧ́нїи , и҆ ꙗ҆зы́къ наше́ствїѧ , воспѣва́ющихъ тѧ̀ .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . Досто́йнѡ є҆́сть .

свѣти́ленъ . Болѣ́зньми по́стническими , нача́ло ѕло́бнагѡ ѕмі́ѧ до конца̀ оу҆мертви́лъ є҆сѝ . на концы́ же вѣне́цъ мꙋче́нїѧ взе́мъ , стефа́не всехва́льне . поклоне́нїе подаѧ̀ честны́мъ ѻ҆бразо́мъ , ꙗ҆́кѡ с̾вѣ́дыи , на первоѡ҆бра́зное ꙗ҆́вѣ преходи́ти всебл҃же́нне . сла́ва , и҆ ны́нѣ , боⷢ҇ . Неи҆з̾рече́нномꙋ ржⷭ҇твꙋ̀ бы́сть всенепоро́чнаѧ невѣ́ста , ꙗ҆́кѡ сꙋ́щи чистѣ́йшаѧ цр҃кви бцⷣе . свѣ́тъ бо превѣ́чныи в̾тѧ̀ все́льшїисѧ породѝ бг҃а сло́ва . пою́ще ти оу҆́бѡ ржⷭ҇тво̀ , велича́емъ досто́йнѡ тебѐ , всенепоро́чнаѧ ѻ҆трокови́це .

На литꙋргі́и , бл҃же́нна , во ѻ҆кта́и . и҆ ст҃о́мꙋ , пѣ́снь , ѕ҃ ѧ . проки́менъ , ѱало́мъ давы́довъ . восхва́лѧтсѧ прпⷣбнїи во сла́вѣ , и҆ возра́дꙋютсѧ на ло́жахъ свои́хъ . сти́хъ . воспо́йте гдⷭ҇ви пѣ́снь но́вꙋ . а҆пⷭ҇лъ , къ тимоѳе́ю . заⷱ҇ , сч҃а .= а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , в̾ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =матѳе́ѧ . заⷱ҇ , л҃з . =прича́стенъ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>