29 ноября: св. мч. Парамона и св. мч. Филумена и прп. Акакия в Лествице

МЦⷭ҇А ТОГО́ЖЕ ВЪ К҃Ѳ ДН҃Ь

ст҃а́гѡ мꙋ́ченика парамо́на . и҆ ст҃а́гѡ мч҃нка филꙋме́на . и҆ прпⷣбнагѡ ѻ҆ц҃а на́шегѡ а҆ка́кїѧ , и҆́же в̾ лѣ́ствицѣ , а҆ллилꙋ́їѧ . =Ве́черъ , на гдⷭ҇и возва́хъ , стихѣ́ры . гла́съ , д҃ . поⷣ . и҆́же зва́нныи свы́ше . С=вѣтосїѧ́нїемъ ꙗ҆́вѣ ѡ҆зарѧ́емь ,꙳ всебл҃же́нне парамѡ́не ,꙳ бжⷭ҇твенагѡ дх҃а .꙳ тмꙋ̀ глꙋбо́кꙋю ,꙳ до конца̀ возненави́дѣ многобо́жїѧ .꙳ и҆ прїи́де бл҃го́е вре́мѧ прїе́мъ всебога́те ,꙳ къ пред̾лежа́щимъ страда́нїемъ доблемꙋ́дренѡ .꙳ и҆ побѣдоно́сецъ ꙗ҆́вльсѧ ,꙳ низ̾ложи́въ го́рдаго ра́тника всѣ́хъ земны́хъ ,꙳ велича́ѧ хрⷭ҇та̀ .꙳ є҆го́же молѝ , спастѝ и҆ просвѣти́ти дш҃а на́ша . За всѣ́хъ бг҃а и҆ цр҃ѧ ,꙳ мно́жество мно́гѡ бе́зчисленое ,꙳ закала́емое разꙋмѣ́въ , парамѡ́не .꙳ бжⷭ҇твеною ре́вностїю раз̾же́гсѧ ве́сь ,꙳ возопѝ хрⷭ҇то́въ ра́бъ при́сныи є҆́смь всегда̀ , разꙋмѣ́йте мꙋчи́теле ,꙳ и҆ ꙗ҆́кѡ а҆́гнѧ неѕло́биво закала́йте .꙳ нн҃ѣ самозва́нъ прїидо́хъ ,꙳ не оу҆́бѡ жди́те .꙳ же́ртва прїѧ́тна пожре́нномꙋ пло́тїю ,꙳ менѐ ра́ди во́лею ,꙳ бы́ти понꙋжда́юсѧ . Седмочи́слено почита́еми десѧти́цею .꙳ трегꙋ́бно же честны́и ,꙳ стори́цею ли́къ страда́лецъ ,꙳ многобо́жнꙋю низложѝ ле́сть ,꙳ без̾зако́ннꙋющихъ вѣ́рою .꙳ с̾ ни́ми же вѣнча́тисѧ под̾виза́всѧ ,꙳ доблемꙋ́дренѡ парамѡ́не .꙳ и҆ лико́мъ беспло́тныхъ ра́дꙋѧсѧ сочета́сѧ .꙳ с̾ ни́ми же моли́сѧ , всѧ́кїѧ ско́рби и҆ напа́сти ,꙳ и҆зба́витисѧ на́мъ ,꙳ тѧ̀ чтꙋ́щимъ и҆ при́снѡ бл҃жа́щимъ .

А҆́ще и҆зво́литъ настоѧ́тель , пѣ́ти а҆ллилꙋ́їѧ . да пое́тъ , стⷯры , бцⷣѣ . гла́съ , и҆ подо́бенъ , то́йже . И҆́же бл҃гоче́стнѡ поклонѧ́ющихсѧ твоемꙋ̀ ржⷭ҇твꙋ̀ ,= ѿ всѧ́каго спасѝ навѣ́та вра́жїѧ , бг҃ороди́тельнице всенепоро́чнаѧ , ꙗ҆́кѡ пред̾ста́тельница ро́дꙋ на́шемꙋ . полꙋчи́вше тѧ оу҆́бѡ ны́нѣ по́мощь , всѝ стѧжа́хомъ прибѣ́жище же и҆ оу҆тверже́нїе , и҆ хода́таицꙋ ко влⷣцѣ хрⷭ҇тꙋ̀ бг҃ꙋ . є҆го́же молѝ , дарова́ти смире́нїе ми́рови мо́лимсѧ , и҆ прегрѣше́нїе разрѣше́нїе , притека́ющимъ к̾ кро́вꙋ твоемꙋ̀ . Сѐ стрꙋ́пы ѡ҆бнажа́ю ти дш҃и моеѧ̀ , и҆ показꙋ́ю ти бѣ́днаѧ сокрꙋше́нїѧ , ꙗ҆́же разбо́йницы наложи́ша ми , лꙋка́вными по́мыслы , и҆ бѣсо́вскими крамола́ми , влⷣчце пренепоро́чнаѧ , цѣли́телѧ дш҃а́мъ и҆ тѣ́ломъ ро́ждьшаѧ , и҆сцѣле́нїе мѝ пода́ждь си́хъ поноше́нїемъ , простира́ющи ма́сло милосе́рдїѧ своегѡ̀ и҆ бл҃гость , к̾ бл҃годосто́инствꙋ , спасе́нїѧ и҆ и҆збавле́нїѧ . Н=ескры́ю ѡ҆каѧ́нныи бѣды̀ моеѧ̀ , ꙗ҆́кѡ всѧ̀ притѧжа́хъ , ꙗ҆́же ненави́дитъ бг҃ъ , пло́ть ѡ҆скверни́хъ , и҆ дх҃ъ мо́й , и҆ оу҆́мнаѧ помышле́нїѧ , неподо́бными дѣ́лы и҆ словесы̀ скве́рными . ꙗ҆зы́кѡмъ ѡ҆сꙋжда́ю согрѣша́ющихъ , са́мъ же лю́тѣйшаѧ дѣ́лаю . бг҃ороди́тельнице всѣ́хъ ми да́ждь си́хъ и҆справле́нїе , да и҆стрезви́всѧ ѕлы́хъ мои́хъ ѡ҆бы́чай , припа́даю и҆ пла́чꙋсѧ , ѡ҆ ни́хже бѣ́дно содѣ́ѧхъ в̾ жи́зни мое́й хожде́нїемъ .

сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ . Нерыда́й менѐ мт҃и ,꙳ зрѧ́щи на́ древѣ повѣ́шена своегѡ̀ сн҃а и҆ бг҃а ,꙳ и҆́же на вода́хъ повѣ́сившаго зе́млю неѡ҆держи́мо ,꙳ и҆ всю̀ тва́рь созда́вшаго .꙳ и҆́бо воста́нꙋ и҆ просла́влюсѧ ,꙳ и҆ а҆́дова црⷭ҇твїѧ сокрꙋшꙋ̀ крѣ́постїю ,꙳ и҆ потреблю̀ є҆гѡ̀ всю̀ си́лꙋ ,꙳ и҆ оу҆́зники и҆зба́влю ,꙳ ѿ ѕлодѣ́йства є҆гѡ̀ ꙗ҆́кѡ милосе́рдъ ,꙳ и҆ ѻ҆ц҃ꙋ своемꙋ̀ приведꙋ̀ ,꙳ ꙗ҆́кѡ чл҃колю́бецъ .

Прпⷣбномꙋ а҆ка́кїю слꙋ́жба пое́тсѧ на па́вечерницѣ . кано́нъ , и҆мы́и краегране́сїе сицево̀ : а҆ка́кїѧ и҆збра́ннаго послꙋ́шателѧ пѣ́сньми пою̀ . творе́нїе ѳеѡ́фаново . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стопа́ми дре́вле ше́ствовавъ і҆и҃ль , крⷭ҇тоѡбра́зно мѡѷсе́ѡвыма рꙋка́ма , а҆мали́ковꙋ си́лꙋ в̾ пꙋсты́ни побѣди́лъ є҆́сть .

запѣ́въ : Прпⷣбне ѻ҆́ч҃е а҆ка́кїе , молѝ бг҃а ѡ҆ на́съ .= Неѕло́бивымъ нра́вомъ , бг҃омꙋ́дре дѣ́йствꙋѧ . бл҃ги́мъ ѻ҆́бразомъ , добродѣ́телемъ стѧжа̀ оу҆добре́нїе . хрⷭ҇то́во под̾ража́ѧ во́льное послꙋша́нїе , да́же до сме́рти всебл҃же́нне . Ѕло́бѣ ѡ҆брѣта́телѧ посрамѝ , неѕло́бою свое́ю , терпѣ́нїемъ же и҆скꙋше́нїй , тогѡ̀ гордели́вое и҆ вознесе́ное помышле́нїе , до землѝ всебл҃же́нне смири́лъ є҆сѝ . Посто́мъ крѣпча́йшимъ прпⷣбне пред̾ и҆спыта́всѧ . и҆ страстна́ѧ ѿсѣка́ѧ нача́ла , без̾стра́стїѧ ѻ҆де́жею оу҆краси́сѧ по́слѣжде , бл҃года́тїю бжⷭ҇твеною покрыва́емь . =сла́ва . Оу҆крѣпи́въ дш҃е́вное оу҆строе́нїе , терпѣ́нїемъ тве́рдымъ , и҆ крѣ́пкимъ всебл҃же́нне смы́сломъ . на всѧ́къ де́нь претерпѣ́лъ є҆сѝ мꙋ́ченическїи по́двигъ . и҆ вѣне́чникъ показа́сѧ сла́вныи а҆ка́кїе .= и҆ ны́нѣ , боⷢ҇ . К=рѣ́пость моѧ̀ содѣ́тельнаѧ , и҆ пѣ́нїе моѐ бг҃ъ и҆ гдⷭ҇ь , на́съ ра́ди вопло́щьсѧ и҆з̾ тебѐ и҆ ро́ждьсѧ ѿ проро́чицы , ꙗ҆́коже и҆са́їѧ пречⷭ҇таѧ , пррⷪ҇чески бл҃говѣствова̀ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твоѧ̀ хрⷭ҇тѐ зовꙋ́щи , ты́ ми крѣ́пость гдⷭ҇и , и҆ прибѣ́жище и҆ оу҆тверже́нїе . Всесоверше́нѡ себѐ , творцꙋ̀ своемꙋ̀ и҆ бг҃ꙋ прпⷣбне возло́жь , терпѣ́лъ є҆сѝ мч҃нческое оу҆ничиже́нїе . Зако́ннѡ страда́льчески , терпѣ́нїе страда́льче ꙗ҆ви́лъ є҆сѝ на землѝ . тѣ́мже тѝ ꙗ҆́же на́ нб҃сѣхъ ра́дость да́стъсѧ . сла́ва . Смире́нїемъ и҆́стиннымъ , и҆ долготерпѣ́нїемъ и҆спы́тнымъ по́живъ . терпѣ́нїемъ же и҆ воз̾держа́нїемъ , и҆ послꙋша́нїемъ всебл҃же́нне .= и҆ нн҃ѣ , боⷢ҇ . В=сѣ́хъ содѣ́тель , содѣва́етсѧ на́съ ра́ди пречⷭ҇таѧ , пло́ть прїе́мъ ѡ҆дш҃евле́нꙋ и҆з̾ тебѐ прест҃а́ѧ бг҃оневѣ́сто .

пѣ́снь , д҃ . і҆рмо́съ . Воз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свое́мъ , досто́йнѡ взыва́ющи , сла́ва си́лѣ твое́й гдⷭ҇и .= Оу҆мертви́въ ѻ҆́ч҃е мꙋдрова́нїе пло́ти твоеѧ̀ , дш҃ꙋ же ѡ҆живи́лъ є҆сѝ . и҆ пра́веднымъ оу҆вѧзе́сѧ вѣнце́мъ , зовы́и а҆ка́кїе , сла́ва си́лѣ твое́й гдⷭ҇и . По́двиги до́лги соверша́ѧ , на всѧ́къ де́нь терпѣли́внѡ ꙗ҆влѧ́ше противле́нїе ѻ҆́ч҃е . тѣ́мже и҆ по сме́рти возопи́лъ є҆сѝ , сла́ва си́лѣ твое́й гдⷭ҇и . =сла́ва . До́блественою мꙋ́дростїю , мꙋче́нїе за хрⷭ҇та̀ претерпѣ́лъ є҆сѝ а҆ка́кїе бл҃же́нне . сегѡ̀ зрѧ̀ распина́ема , за спасе́нїе ро́да на́шегѡ .= и҆ нн҃ѣ , боⷢ҇ . С=щ҃е́ннѣйши є҆сѝ нбⷭ҇ныхъ разꙋ́мныхъ си́лъ , ꙗ҆́кѡ тѣ́хъ зижди́телѧ пречⷭ҇таѧ ро́ждьши . тѣ́мъ ти зове́мъ , ра́дꙋисѧ бцⷣе препѣ́таѧ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Ты̀ прпⷣбне ꙗ҆́звенѡ мꙋ́жески оу҆ранѧ́емь , и҆ стра́сти на всѧ́къ де́нь терпѧ̀ крѣ́пкѡ , прпⷣбнѡ почи́лъ є҆сѝ . Тече́нїе добро̀ , совершѝ а҆ка́кїе , неѕло́бивое и҆ нетрꙋ́дное , ѿ болѣ́зни свобо́дное прїѧ́лъ є҆сѝ поко́ище . сла́ва . Оу҆́мъ тво́й чⷭ҇тымъ смы́сломъ ѡ҆кормлѧ́емь , а҆ка́кїе бг҃оно́сне , к̾ винѣ̀ всѣ́хъ , бл҃гоꙋго́днѡ оу҆стреми́лъ тѧ є҆́сть .= и҆ ны́нѣ , боⷢ҇ . Н=и оу҆́мъ а҆́нг҃льскїи , ни чл҃ческїи мо́жетъ , ржⷭ҇тво̀ твоѐ сказа́ти . превосхо́дитъ бо всѧ́ко постиже́нїе ра́зꙋма .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Оу҆снꙋ́лъ є҆сѝ бл҃же́ннымъ сно́мъ бл҃же́нне , и҆ по сме́рти ꙗ҆ви́сѧ послꙋша́нїе и҆мѣ́ѧ ѻ҆́ч҃е вопраша́ющимъ , ꙗ҆́кѡ не оу҆мира́етъ послꙋша́нїе держа́и . И҆спо́лнивъ до́брыѧ по́двиги , тезои҆мени́те , нетлѣ́ннагѡ бг҃омꙋ́дре сподо́бисѧ вои́стинꙋ без̾сме́ртїѧ , и҆дѣ́же ра́дꙋѧсѧ вѣне́цъ побѣ́ды взѧ́лъ є҆сѝ . сла́ва . Бжⷭ҇твеное до́брое и҆ бл҃гоꙋго́дное , по́стническое жи́тельство твоѐ бл҃же́нне , мно́гихъ оу҆крѣплѧ́етъ бжⷭ҇твенымъ стра́хомъ , и҆ жела́нїемъ бꙋ́дꙋщихъ бл҃гъ а҆ка́кїе .= и҆ ны́нѣ , боⷢ҇ . В=ои́стинꙋ бцⷣꙋ тѧ̀ сла́вимъ , ꙗ҆́кѡ бг҃а заче́ншꙋ , и҆ ро́ждьшꙋ тогѡ̀ неи҆скꙋсобра́чнѡ , совокꙋ́пльша и҆з̾ тебѐ прїе́мша ст҃а́гѡ хра́ма .

Гдⷭ҇и поми́лꙋй , гⷤ . сла́ва , и҆ ны́нѣ . сѣда́ленъ . гла́съ , д҃ . Свѣ́тлостїю вѣ́ры , и҆ дѣ́тельнымъ свѣ́томъ , ꙗ҆ви́сѧ равноа́нг҃ленъ на землѝ , вои́стинꙋ а҆ка́кїе всемꙋ́дре . показа́лъ є҆сѝ мꙋ́жески крѣ́пкое оу҆ма̀ твоегѡ̀ , сокрꙋши́ла є҆сѝ напа́данїѧ страсте́мъ посто́мъ . тѣ́мже и҆ по кончи́нѣ , ꙗ҆́кѡ жи́въ ꙗ҆ви́сѧ непобѣди́ме .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃говѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Все́ю любо́вїю влⷣцѣ приближа́ѧсѧ , оу҆кори́зны и҆ без̾че́стїѧ , и҆ ра́ны претерпѣ̀ , взыва́ше , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Помышле́нїе твоѐ , влⷣчнѧѧ помина́ѧ страда́нїѧ , и҆ крⷭ҇тꙋ̀ и҆ сме́рти поꙋча́ѧсѧ , оу҆ранѧ́емь и҆ бїе́мь поѧ́ше , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . сла́ва . Ме́ртвъ во́ гробѣ , зако́номъ оу҆ме́ршимъ лежа̀ без̾ дыха́нїѧ , гл҃ющемꙋ вѣща́еши па́че є҆стества̀ , ꙗ҆́кѡ не оу҆́мерлъ є҆сѝ . зове́ши же , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и .= и҆ ны́нѣ , боⷢ҇ . О=у҆мерщве́нїемъ дв҃о , ѡ҆держи́ми бѣ́хомъ зако́номъ , живо́тъ ро́ждьшаѧ и҆́стинныи , воз̾дви́гнꙋла є҆сѝ зовꙋ́щїѧ , бл҃гослове́на ты̀ в̾ жена́хъ пренепоро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распросте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ оу҆гаси́ша добродѣ́телїю поѧ́савшесѧ , и҆́же бл҃гоче́стїѧ люби́тели ѻ҆́троцы взыва́юще , бл҃гослови́те всѧ̀ дѣ́ла гдⷭ҇нѧ гдⷭ҇а . Крѣ́пкимъ посто́мъ бг҃ови , тебѣ̀ бы́сть примѣси́тисѧ прпⷣбне . оу҆́зы тѣле́сныѧ раз̾рѣши́вшꙋ , и҆ пло́ть и҆знꙋри́вшꙋ . и҆ видѣ́нїемъ дѣ́йственымъ ѻ҆́ч҃е зовꙋ́щꙋ , бл҃гослови́те всѧ̀ дѣ́ла гдⷭ҇нѧ гдⷭ҇а . Съ мч҃нки хрⷭ҇то́вы причита́емь и҆ вчинѧ́емь , не ѡ҆скꙋдѣ́й ны́нѣ прпⷣбне , молѧ̀ чл҃колю́бца , ѡ҆ на́съ хва́лѧщихъ и҆ вопїю́щихъ , всѧ̀ дѣ́ла гдⷭ҇нѧ гдⷭ҇а по́йте , и҆ превозноси́те є҆гѡ̀ во́ вѣки . сла́ва . Пострада̀ зако́ннѡ на землѝ , нбⷭ҇ное ѡ҆брѣ́те поко́ище , совсе́льсѧ прпⷣбне ст҃ы́мъ . и҆ соприча́стникъ весе́лїѧ и҆ ра́дости тѣ́хъ бы́въ , зовы́и , всѧ̀ дѣ́ла гдⷭ҇нѧ гдⷭ҇а по́йте , и҆ превозноси́те є҆гѡ̀ во́ вѣки .= и҆ ны́нѣ , боⷢ҇ . В=оплоща́етсѧ беспло́тныи пре́жде , созда́тель созида́етсѧ , и҆з̾ тебѐ пренепоро́чнаѧ . и҆́бо въ пречи́стое чре́во твоѐ вше́дъ непости́жимыи , и҆ ѡ҆писа́нїемъ тѣле́снымъ , хотѧ̀ претерпѣ́лъ є҆́сть . тѣ́мъ тѧ̀ блгⷭ҇ви́мъ мр҃і́е бг҃оневѣ́стнаѧ .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Ве́село ше́ствова ѻ҆́ч҃е ко всебл҃года́телю , неѕло́бивою добро́тою оу҆кра́шенъ , и҆ добродѣ́тельми сїѧ́ѧ . тѣ́мже тѧ̀ всѝ оу҆блажа́емъ а҆ка́кїе . Зако́нꙋ повинꙋ́ѧсѧ влⷣчнемꙋ , свою̀ преклони́лъ є҆сѝ вы́ю , и҆́ночествꙋющимъ борьбѣ̀ . и҆ побѣдоно́сецъ ѻ҆́ч҃е бы́въ , к̾ неѕло́бїю прише́лъ є҆сѝ коне́чномꙋ всебл҃же́нне . Пѣ́снь бг҃ови , воз̾сыла́ти со беспло́тными сподо́бисѧ , ꙗ҆́кѡ сохрани́въ тѣ́хъ жи́тельство и҆ чистотꙋ̀ . терпѣ́нїемъ же дѣ́тельнымъ , мч҃нческꙋю сла́вꙋ прїѧ́лъ є҆сѝ . сла́ва . Прїимѝ ѿ на́съ бг҃омꙋ́дре , приноси́мꙋю тѝ пѣ́снь ѿ́чиста срⷣца . и҆ воздава́й мл҃твами сѝ , грѣхо́мъ ѿпꙋще́нїе , и҆ спасе́нїе всече́стне .= и҆ ны́нѣ , боⷢ҇ . Ꙗ҆́=кѡ ко́рень сꙋ́щꙋ вои́стинꙋ нетлѣ́нїѧ , тебѐ дв҃о всѝ вѣ́рнїи и҆ оу҆твержде́нїѧ , хвала́ми почита́емъ . ты́ бо соста́вное на́мъ без̾сме́ртїе родила̀ є҆сѝ .

стихѣ́ры прпⷣбномꙋ . гла́съ , д҃ . поⷣ . ꙗ҆́кѡ до́блѧ . запѣ́въ : Прпⷣбне ѻ҆́ч҃е а҆ка́кїе , молѝ бг҃а ѡ҆ на́съ .= Воз̾держа́нїемъ мꙋдрова́нїе плотьско́е ,꙳ оу҆мертви́лъ є҆сѝ .꙳ и҆ дш҃ꙋ ѡ҆живи́лъ є҆сѝ посто́мъ ,꙳ и҆ добродѣ́тельнымъ соверше́нїемъ .꙳ и҆ ѿ сю́дꙋ ꙗ҆ви́сѧ ,꙳ ꙗ҆́кѡ жи́въ по сме́рти вои́стинꙋ .꙳ сме́рть бо ꙗ҆́кѡ со́нъ тебѣ̀ вмѣни́сѧ ,꙳ къ бг҃ꙋ прише́дшꙋ .꙳ и҆ в̾ рꙋ́цѣ є҆гѡ̀ дш҃ꙋ свою̀ преда́вшꙋ ,꙳ а҆ка́кїе сла́вне . Стрⷭ҇те́мъ оу҆спи́лъ є҆сѝ ,꙳ жела́нїѧ а҆ка́кїе .꙳ бдѣ́нїе всено́щное стѧжа́въ ,꙳ послꙋша́нїе же и҆ смире́нїе ,꙳ поꙋче́нїе бжⷭ҇твеныхъ писа́нїи .꙳ срⷣце чи́сто ,꙳ и҆ оу҆́мъ несмꙋще́нъ .꙳ тѣ́мже бы́сть вмѣсти́лище ст҃а́гѡ дх҃а .꙳ зарѝ чꙋде́сныѧ ,꙳ восїѧ́въ конце́мъ . =сла́ва . Мирско́е пристра́стїе ,꙳ ѿ ню́дъ возненави́дѣвъ ,꙳ без̾стра́стїѧ сосꙋ́дъ бы́лъ є҆сѝ .꙳ любомꙋ́дрїѧ же сла́вне ,꙳ дѣ́йственымъ є҆́жденїемъ вознесе́сѧ ,꙳ къ самомꙋ̀ жела́емомꙋ верхꙋ̀ .꙳ и҆ ви́дѣлъ є҆сѝ та́йнымъ видѣ́нїемъ ,꙳ неви́димыхъ недомы́сленыѧ ,꙳ и҆ бжⷭ҇твеныѧ добро́ты ,꙳ а҆ка́кїе всемꙋ́дре и҆ бл҃же́нне . и҆ ны́нѣ , боⷢ҇ . Ѻ҆ц҃ꙋ є҆диносꙋ́щна ,꙳ и҆ дх҃ꙋ сопрⷭ҇то́льна ,꙳ ѿ чи́стыхъ крове́й свои́хъ воплоти́ла є҆сѝ ,꙳ и҆ па́че сло́ва породѝ ,꙳ в̾ двѣ̀ познава́ема дѣ́йствеными сꙋществы̀ ,꙳ вои́стинꙋ и҆ хотѣ́нїи .꙳ є҆го́же молѝ прест҃а́ѧ дв҃о ,꙳ ꙗ҆́кѡ сн҃а своегѡ̀ и҆ бг҃а ,꙳ спастѝ вѣ́рою чи́стою ,꙳ тебѐ блажа́щихъ . крⷭ҇тобоⷢ҇ . А҆́гница и҆ па́стырѧ тѧ̀ ,꙳ на́ древѣ ꙗ҆́кѡ ви́дѣ ,꙳ а҆́гница ро́ждьшаѧ рыда́ше ,꙳ и҆ мт҃рьски тебѣ̀ вѣща́ше .꙳ сн҃е мо́й любе́знѣйшїи ,꙳ ка́кѡ на́ древѣ крⷭ҇тнѣмъ ,꙳ ѡ҆вѣ́шенъ бы́сть долготерпѣли́ве ,꙳ ка́кѡ рꙋ́цѣ и҆ но́зѣ твоѝ сло́ве ,꙳ пригвозди́ша без̾зако́ннїи ,꙳ и҆ кро́вь свою̀ и҆злїѧ̀ влⷣко .

На оу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . и҆мы́и краегране́сїе сицево̀ : воспѣва́ти твою̀ ны́нѣ да́ждь мч҃нче бл҃года́ть . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стопа́ми дре́вле ше́ствовавъ і҆и҃ль , крⷭ҇тоѡбра́зно мѡѷсе́ѡвыма рꙋка́ма , а҆мали́ковꙋ си́лꙋ в̾ пꙋсты́ни побѣди́лъ є҆́сть .

запѣ́въ : Ст҃ы́и мч҃нче парамѡ́не , молѝ бг҃а ѡ҆ на́съ . Пою́щꙋ свѣтоно́снꙋю твою̀ па́мѧть , мч҃нче парамѡ́не , свѣ́тлыми дх҃а зарѧ́ми срⷣце моѐ просвѣтѝ . и҆ пребыва́ти ми въ бжⷭ҇твеныхъ законоположе́нїихъ оу҆крѣпѝ . Мч҃нческимъ свѣ́тлѡ бл҃госло́вїемъ бл҃же́нне ѡ҆богати́сѧ . мч҃нческими просїѧ́въ добродѣ́тельми , и҆ кра́сными ра́нами оу҆краси́всѧ парамѡ́не . тѣ́мже тѧ̀ вѣ́рнѡ оу҆блажа́емъ . Во́дъ животво́рныхъ дх҃а сы́и и҆спо́лненъ , без̾бо́жїѧ зно́емъ лю́тѣ и҆згорѣ́вшїѧ ꙗ҆́кѡ ѡ҆роси́лъ є҆сѝ . и҆ к̾ водѣ̀ сла́вне покаѧ́нїѧ наста́вилъ є҆сѝ .= боⷢ҇ . В=ъ лѣ́то кромѣ̀ лѣ́та родила̀ є҆сѝ , чл҃ка бы́вша чⷭ҇таѧ . є҆го́же прилѣ́жнѡ молѝ , ꙗ҆́кѡ сн҃а своегѡ̀ и҆ гдⷭ҇а , дꙋшѝ моеѧ̀ лѣ́тныѧ стрⷭ҇ти и҆сцѣли́ти всенепоро́чнаѧ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твоѧ̀ хрⷭ҇тѐ зовꙋ́щи , ты́ ми крѣ́пость гдⷭ҇и , и҆ прибѣ́жище и҆ оу҆тверже́нїе . Возноше́нїе вра́жїе , смири́всѧ хрⷭ҇та̀ ра́ди раз̾рꙋшѝ . и҆ тогѡ̀ ѡ҆полче́нїѧ , мече́мъ терпѣ́нїѧ с̾сѣ́клъ є҆сѝ . Разрꙋши́лъ є҆сѝ лꙋка́выи совѣ́тъ , и҆́же на вѣ́рꙋ на́шꙋ . и҆ крѣ́пкѡ пострада́лъ є҆сѝ , мч҃нче стрⷭ҇тоте́рпче парамѡ́не . Оу҆крѣпи́всѧ бжⷭ҇твеною бл҃года́тїю , ꙗ҆́кѡ во́инъ си́ленъ . и҆ лю́тыѧ мꙋ́ки мч҃нче , ꙗ҆́кѡ со́нъ вмѣни́лъ є҆сѝ .= боⷢ҇ . О=у҆крѣпѝ мо́й оу҆́мъ , совраща́емь мно́гими страстьмѝ мт҃и бж҃їѧ пречⷭ҇таѧ , ꙗ҆́кѡ да по́долгꙋ сла́влю тѧ̀ .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

сѣда́ленъ . гла́съ , д҃ . Терпѣ́нїемъ бжⷭ҇твеныхъ повелѣ́нїи , ѡ҆чи́стивъ сѝ дш҃ꙋ ѿ скве́рны . и҆ къ страда́льческомꙋ пости́же соверше́нїю , жре́ти бо кꙋми́рѡмъ ѿре́ксѧ преле́стнымъ . подража́ѧ хрⷭ҇та̀ , копїе́мъ закла́нъ бы́сть . но прилѣ́жнѡ молѝ є҆гѡ̀ ѡ҆́ мирѣ , всебл҃же́нне парамѡ́не . сла́ва , и҆ нн҃ѣ , боⷢ҇ . Съ бг҃омъ к̾ твоемꙋ̀ бцⷣе прибѣга́ю смире́ныи покро́вꙋ бжⷭ҇твеномꙋ , припа́даѧ молю́сѧ , поми́лꙋй чⷭ҇таѧ , ꙗ҆́кѡ превзыдо́ша ми главꙋ̀ грѣсѝ . и҆ оу҆страша́юсѧ влⷣчце мꙋ́ки и҆ трепе́щꙋ , моле́нїѧ сотворѝ чⷭ҇таѧ къ сн҃ꙋ своемꙋ̀ , ѿ тѣ́хъ и҆зба́вити мѧ . крⷭ҇тобоⷢ҇ . И҆́же ѿ без̾нача́льна ѻ҆ц҃а рожде́ннагѡ , въ послѣ́днѧѧ пло́тїю ро́ждьшаѧ , на крⷭ҇тѣ́ тѧ ви́сѧща зрѧ́щи хрⷭ҇тѐ , оу҆вы̀ мнѣ̀ любе́зныи і҆с҃е вопїѧ́ше . ка́кѡ сла́вимъ сы́и ꙗ҆́кѡ бг҃ъ ѿ а҆́нг҃лъ , ѿ без̾зако́нныхъ ны́нѣ чл҃къ сн҃е , хотѧ̀ распина́ешисѧ . пою́ тѧ долготерпѣли́ве .

пѣ́снь , д҃ . і҆рмо́съ . Воз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свое́мъ , досто́йнѡ взыва́ющи , сла́ва си́лѣ твое́й гдⷭ҇и . Се́рдце твоѐ мꙋ́жественѡ ѡ҆гражда́емо , и҆ дерзнове́ннѡ сла́вне раз̾жига́емо . мꙋ́ки многоплете́нныѧ , младе́нецъ стрѣлѧ́нїѧ , мч҃нче доблемꙋ́дрене в̾мѣни́лъ є҆сѝ .= Оу҆мерщвлѧ́емы повеле́нїемъ мꙋчи́телѧ страда́льца ви́дѣ . ꙗ҆́коже ѻ҆нѝ , бжⷭ҇твенꙋю ре́вность прїе́мъ мч҃нкъ парамѡ́нъ , къ страда́нїю прїи́де . Крѣ́пкѡ тѧ̀ растѧза́ема , и҆ ко́пїи неми́лостивнѡ бодо́ма , и҆ ко́зни вра́жїѧ побѣжда́юща , хрⷭ҇то́съ вѣнча́ тѧ побѣдополо́жникъ бл҃же́нне парамѡ́не . Терпѣ́нїю оу҆дивлѧ́ѧсѧ мч҃нкъ , и҆ тѣ́хъ соверше́нїю дивѧ́сѧ сла́вне , тѣ́хъ прїѡ҆бщи́сѧ ре́вности вѣ́рнѣй , и҆ пречⷭ҇тно́мꙋ страда́нїю . боⷢ҇ . О=у҆мерщвены̀ чл҃ки престꙋпле́нїемъ , живоно́снымъ ти ржⷭ҇тво́мъ дв҃о мр҃і́е , всѣ́хъ ѡ҆живи́ла є҆сѝ . тѣ́мже тѧ сла́вимъ , и҆ бг҃олѣ́пнѡ оу҆блажа́емъ .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Да́ръ многоцѣ́нныи себѐ прине́слъ є҆сѝ творцꙋ̀ своемꙋ̀ , пострада́въ , и҆ пре́лесть побѣди́въ , мч҃нкѡмъ оу҆добре́нїе . Кꙋми́ры мꙋ́дре , и҆ бѣсо́вскїѧ ѻ҆́бразы сокрꙋши́лъ є҆сѝ . оу҆твержено̀ помышле́нїе стѧжа́въ , на ка́мени бжⷭ҇твеныѧ вѣ́ры парамѡ́не . Бѣсо́вское мно́жество , мꙋ́жественѡ ѡ҆стрꙋпи́лъ є҆сѝ , ѡ҆стрꙋпле́нїемъ пло́ти твоеѧ̀ , страда́льче доблемꙋ́дреныи . тѣ́мже тѧ̀ оу҆блажа́емъ .= боⷢ҇ . Р=авноче́стенъ ѻ҆ц҃ꙋ сы́и и҆ дх҃ови гдⷭ҇ь , ѿ чи́стыхъ тѝ крове́й воплоти́сѧ чⷭ҇таѧ , чл҃къ бы́въ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Небы́сть во́ времѧ по́двигъ лежа̀ . въстанли́въ же па́че , и҆ бжⷭ҇твеномꙋ страда́нїю до́блественъ . сегѡ̀ ра́ди вѣне́цъ сла́вы полꙋчи́лъ є҆сѝ . Мч҃нческомꙋ собо́рꙋ себѐ сочета́лъ є҆сѝ , сконча́вшихсѧ оу҆се́рднѡ , пре́жде твоегѡ̀ страда́нїѧ прⷭ҇нопа́мѧтне . и҆ с̾ ни́ми нбⷭ҇номꙋ черто́гꙋ сподо́бисѧ . Ко́пїѧ подража́телѧ тѧ хрⷭ҇то́ва содѣ́лаша . и҆́миже пробода́емь мч҃нче , к̾ немꙋ̀ востечѐ свѣтоно́сецъ , оу҆мертви́въ терпѣ́нїѧ ѻ҆рꙋ́жїемъ несмы́сленыѧ .= боⷢ҇ . И҆=зба́ви мѧ собла́знъ жите́йскихъ пренепоро́чнаѧ , в̾ нощѝ невѣ́дѣнїѧ без̾мѣ́стными помышле́нїи ѡ҆держи́ма , и҆ ѕло́бою вра́жїею прⷭ҇нѡ ѡ҆мрача́ема .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃говѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Цѣле́бъ и҆ чꙋде́съ бл҃года́тїю мꙋ́дре мч҃нче , ѿ бг҃а ѡ҆бога́щьсѧ свѣ́тлѡ , врачꙋ́еши зовꙋ́щихъ , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Простира́емыхъ мꙋ́къ небре́глъ є҆сѝ , всѐ попече́нїе и҆мы́и на́ нб҃сѣхъ . зовы́и достосла́вне , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и . Ты̀ кровны́мъ страда́льче ѻ҆гне́мъ , всю̀ попалѝ ве́щь без̾бо́жїѧ сла́вне лꙋка́вꙋю . росо́ю же чꙋде́съ твои́хъ , сꙋ́щихъ в̾ зноѝ лю́тыхъ ѡ҆роша́еши парамѡ́не . зовы́и , блгⷭ҇ве́нъ є҆сѝ в̾ цр҃кви сла́вы твоеѧ̀ гдⷭ҇и .= боⷢ҇ . Р=а́дꙋисѧ є҆ди́на , ра́дость ро́ждьшаѧ чл҃кѡмъ . ра́дꙋисѧ нб҃о и҆ прⷭ҇то́лѣ херꙋви́мскїи , и҆ пресла́внаѧ пола́то , црⷭ҇твꙋющагѡ всѣ́хъ вѣ́къ , всенепоро́чнаѧ влⷣчце .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Рꙋ́цѣ распросте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ оу҆гаси́ша добродѣ́телїю поѧ́савшесѧ , и҆́же бл҃гоче́стїѧ люби́тели ѻ҆́троцы взыва́юще , бл҃гослови́те всѧ̀ дѣ́ла гдⷭ҇нѧ гдⷭ҇а . Бо́драго тѧ̀ храни́телѧ дш҃а́мъ ѡ҆богати́хомсѧ , оу҆ставлѧ́юща бѣсо́вскаѧ мечта́нїѧ всегда̀ , и҆ плотны́ѧ свирѣ́пыѧ во́лны . и҆ бꙋ́рю помышле́нїи мч҃нче многострада́льне , вопїю́щимъ , бл҃гослови́те всѧ̀ дѣ́ла гдⷭ҇нѧ гдⷭ҇а . Стрꙋѧ́ми твои́хъ сщ҃е́нныхъ крове́й багрѧни́цꙋ ѡ҆червлени́лъ є҆сѝ себѣ̀ , ѡ҆бетша́нїе прїѧ́ти нехотѧ́щꙋ . и҆ свѣ́тлѡ оу҆краша́емь , въ нбⷭ҇наѧ всели́сѧ . вопїѧ̀ бл҃же́нне , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Ꙗ҆́коже ѻ҆вча̀ чи́стое , и҆ же́ртва непоро́чнаѧ , и҆ приноше́нїе всесожега́емо оу҆́гльми , сщ҃е́ннагѡ мч҃нче страда́нїѧ , стрⷭ҇тополо́жникꙋ своемꙋ̀ хрⷭ҇то́ви , принесе́сѧ мꙋ́дренѡ . поѧ̀ , блгⷭ҇ви́те всѧ̀ дѣ́ла гдⷭ҇нѧ гдⷭ҇а .= боⷢ҇ . З=ако́на тѧ сѣ́ни , и҆ проро́къ проначерта́ша чи́стаѧ проповѣ́данїѧ , неи҆зрече́ннѡ хотѧ́щꙋ бы́ти , бг҃а на́шегѡ роди́тельницꙋ , бг҃обл҃года́тнаѧ чⷭ҇таѧ . є҆мꙋ́же всѝ пое́мъ , бл҃гослови́те всѧ̀ дѣ́ла гдⷭ҇нѧ гдⷭ҇а .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Тѧ̀ свѣтоза́рнаѧ стрⷭ҇тоте́рпца , свѣтови́днѡ восїѧ̀ па́мѧть , всѣ́мъ вѣ́рнымъ срⷣца̀ просвѣща́ющи бжⷭ҇твенымъ дх҃омъ , ра́достнѡ ликоствꙋ́ющимъ , и҆ вѣ́рою блажа́щимъ . Ꙗ҆́кѡ седмокрꙋ́жнꙋю десѧти́цею , и҆ тресꙋгꙋ́бною стори́цею , непобѣди́мыхъ мч҃нкъ совокꙋплѧ́емь . с̾ ни́ми же тѣ́ло твоѐ мч҃нче хрⷭ҇то́въ лежи́тъ и҆ с̾ ни́ми молѝ спасти́сѧ на́мъ . По́прище проше́дше болѣ́зненое , многови́дныхъ мꙋ́къ и҆сполнѧ́емо . и҆ со хрⷭ҇то́мъ и҆́же ми́ра побѣди́вшемъ , свѣ́тлѡ побѣди́вше , вѣнцено́сцы мч҃нцы на́ нб҃сѣхъ жи́тельствꙋете . Взѧ́тъ бы́сть ѿ землѝ , и҆ по́чести твои́хъ по́двигъ прїе́мъ . ны́нѣ же рѣ́ки и҆сточа́еши на́мъ чꙋде́съ тебѐ чтꙋ́щимъ , и҆ бл҃гоче́стнѡ па́мѧть твою̀ торжествꙋ́ющимъ парамѡ́не .= боⷢ҇ . П=росвѣтѝ дш҃е́вныѧ ми зѣ́ницы , ѡ҆мраче́ныѧ невѣ́дѣнїемъ тлетворѧ́щагѡ грѣха̀ , бг҃ороди́тельнице пречⷭ҇таѧ влⷣчце . ты́ бо вѣ́рнымъ є҆сѝ по́мощь , и҆ просвѣще́нїе чи́стаѧ .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . До́сто́йнѡ є҆́сть .

свѣти́ленъ . Мно́жество непобѣди́мое во́инства , сосло́вїе бжⷭ҇твено непобѣди́мыхъ мч҃нкъ , бл҃гочестнѡ мꙋ́дренѡ воспое́мъ . стѧжа́вше чинонача́льника , парамѡ́на чꙋ́днаго , ѡ҆бличи́вшаго мꙋчи́телѧ . и҆́же со всѣ́ми мч҃нки вѣне́цъ полꙋчѝ сла́вы . сла́ва , и҆ ны́нѣ , боⷢ҇ . Ра́дꙋисѧ бж҃їѧ пола́то , ра́дꙋисѧ горо̀ ѡ҆сѣне́наѧ . ра́дꙋисѧ кꙋпино̀ неѡ҆пали́маѧ , ра́дꙋисѧ прⷭ҇то́лѣ сла́вы . ра́дꙋисѧ бжⷭ҇твенаѧ трапе́зо , ра́дꙋисѧ рꙋ́чко всезлата́ѧ . ра́дꙋисѧ свѣ́щниче всесвѣ́тлыи , ра́дꙋисѧ ле́гкїи ѻ҆́блаче дв҃о мт҃и мр҃і́е .

<< Previous

Contents

Next >>