3 ноября: свв. мчч. Акепсимы, Иосифа и Аифала

МЦⷭ҇А ТОГО́ЖЕ ВЪ Г҃ ДН҃Ь

ст҃ы́хъ мч҃нкъ , а҆кеѱі́мы є҆пⷭ҇кпа , и҆ і҆ѡ́сифа презви́тера , и҆ а҆иѳа́ла дїа́кона . =И҆ ѡ҆сщ҃е́нїе хра́ма ст҃а́гѡ великомч҃нка геѡ́ргїѧ , и҆дѣ́же положено̀ є҆́сть честно́е тѣ́ло є҆гѡ̀ . Ве́черъ , на гдⷭ҇и возва́хъ , стихѣ́ры , мч҃нкѡмъ . гла́съ , и҃ . поⷣ . ѽ пресла́вное чꙋ́до . =Ѽ пресла́вное чꙋ́до ,꙳ а҆кеѱі́ма кра́сныи ,꙳ мч҃нкѡмъ слꙋжи́тель ,꙳ пѣ́сней оу҆вѧзе́нїемъ вѣнча́етсѧ дне́сь .꙳ бг҃оѧ́звенаѧ страда́нїѧ пред̾лага́етъ ,꙳ и҆ ѡ҆стрꙋплѧ́етъ врага̀ беспло́тнаго .꙳ ѽ є҆́же полꙋчѝ многода́рныѧ бл҃года́ти .꙳ є҆го́же мл҃твами спасѝ дш҃а на́ша хрⷭ҇тѐ .꙳ ꙗ҆́кѡ млрⷭ҇дъ . Ѽ пресла́вное чꙋ́до ,꙳ ѿ перси́ды ѕвѣзда̀ ,꙳ і҆ѡ́сифъ восїѧ̀ ,꙳ волше́бнꙋю ме́рзость ,꙳ разрꙋша́ѧ дх҃омъ ,꙳ кро́вными стрꙋѧ́ми погасѝ ѻ҆гню̀ слꙋже́нїе без̾бо́жїѧ .꙳ ѽ крѣ́пости є҆́юже низ̾ложѝ бѣсы̀ .꙳ тогѡ̀ мл҃твами спасѝ дш҃а на́ша хрⷭ҇тѐ ,꙳ ꙗ҆́кѡ млрⷭ҇дъ . Ѽ пресла́вное чꙋ́до ,꙳ а҆иѳа́лъ тве́рдыи ,꙳ страда́нїю побо́рникъ ,꙳ тезои҆мени́тъ ꙗ҆влѧ́етсѧ .꙳ са́дъ прⷭ҇ноцвѣтꙋ́щїи ,꙳ и҆ рѣ́жемь цвѣте́тъ ра́нами ,꙳ и҆ оу҆́же оу҆мерщвлѧ́емь жи́ти начина́етъ .꙳ ѽ тѣ́сности є҆стества̀ , ю҆́же претерпѣ́лъ є҆́сть .꙳ тогѡ̀ мл҃твами спасѝ дш҃а на́ша хрⷭ҇тѐ ,꙳ ꙗ҆́кѡ милосе́рдъ .

и҆́ны стⷯры , ст҃о́мꙋ геѡ́ргїю . гла́съ , д҃ . поⷣ . ꙗ҆́кѡ до́блѧ . Страстоте́рпче геѡ́ргїе ,꙳ а҆́нг҃лѡмъ собесѣ́дниче ,꙳ и҆ мч҃нкѡмъ съсе́льниче ,꙳ прибѣ́жище скорбѧ́щимъ всегда̀ ,꙳ приста́нище оу҆тише́нїѧ .꙳ пла́вающемꙋ мѝ в̾ житїѝ бꙋ́ди ,꙳ и҆ ѡ҆кормѝ молю́ тѧ ,꙳ живо́тъ мо́й .꙳ ꙗ҆́кѡ да вѣ́рою не сꙋмѣ́нною оу҆бл҃жа́ю ,꙳ па́че є҆стества̀ по́двиги твоѧ̀ . Въ мо́ри мѧ пла́вающа ,꙳ на пꙋте́хъ ше́ствꙋюща ,꙳ в̾ нощѝ спѧ́ща соблюдѝ .꙳ бдѧ́щꙋ просвѣтѝ ,꙳ оу҆́мъ мо́й геѡ́ргїе ,꙳ и҆ наста́ви твори́ти во́лю гдⷭ҇ню .꙳ ꙗ҆́кѡ да ѡ҆брѧ́щꙋ въ дн҃ь сꙋ́дныи ,꙳ в̾ житїѝ содѣ́ѧнныхъ мѝ разрѣше́нїе ,꙳ прибѣга́ѧ въ кро́въ тво́й сла́вне . И҆́же вѣ́ры бронѧ́ми ,꙳ и҆ щито́мъ бл҃года́ти крⷭ҇та̀ ,꙳ копїе́мъ ты̀ воѡ҆рꙋжи́всѧ ,꙳ сопроти́внымъ непобѣди́мъ бы́сть геѡ́ргїе .꙳ и҆ ꙗ҆́кѡ бжⷭ҇твеныи храбо́ръ ,꙳ бѣсо́вскаѧ ѡ҆полче́нїѧ побѣди́въ ,꙳ со а҆́нг҃лы ликꙋ́еши .꙳ вѣ́рныѧ же застꙋпа́еши и҆ ѡ҆сщ҃а́еши ,꙳ и҆ спаса́еши призыва́емь .

сла́ва . гла́съ , ѕ҃ . Досто́йнѡ и҆́мени по́жилъ є҆сѝ во́ине геѡ́ргїе , крⷭ҇тъ бо хрⷭ҇то́въ на ра́мо взе́мъ , ѿ дїа́вольскїѧ льстѝ ѡ҆лѧденѣ́вшꙋю зе́млю до́брѣ дѣ́лалъ є҆сѝ . и҆ терно́вное слꙋже́нїе и҆скорени́въ и҆́дольское , правосла́вныѧ вѣ́ры ло́зꙋ насади́лъ є҆сѝ . тѣ́мже то́чиши и҆сцѣле́нїѧ и҆́же во все́й вселе́ннѣй вѣ́рнымъ . и҆ трⷪ҇цѣ дѣ́латель пра́веденъ показа́сѧ . молѝ мо́лимсѧ ѡ҆ оу҆мире́нїи ми́ра , и҆ спасе́нїи дш҃ъ на́шихъ .

и҆ ны́нѣ , боⷢ҇ . Бцⷣе ты̀ є҆сѝ лоза̀ и҆́стиннаѧ , возрасти́вшаѧ на́мъ пло́дъ живо́тныи , тебѣ̀ мо́лимсѧ , моли́сѧ влⷣчце со страстоте́рпчемъ , поми́ловатисѧ дш҃а́мъ на́шимъ .

крⷭ҇тобоⷢ҇ . поⷣ . в̾ =тре́тїи де́нь . Н=а́ древѣ живо́тъ на́шъ ,꙳ всенепоро́чнаѧ бцⷣа зрѧ́щи ви́сѧщь ,꙳ мт҃рьски рыда́ше вопїю́щи ,꙳ сн҃е и҆ бж҃е мо́й ,꙳ спасѝ любо́вїю воспѣва́ющихъ тѧ .

На стихо́внѣ , во ѻ҆кта́и . сла́ва , ст҃ы́мъ . гла́съ , ѕ҃ . Тринача́лїе ѡ҆бра́знѡ трисїѧ́ннагѡ ва́шегѡ є҆диномы́слїѧ , и҆ ѡ҆ хрⷭ҇тѣ̀ мꙋче́нїѧ , неи҆зрече́нныѧ трⷪ҇цы и҆ пресꙋ́щественыѧ є҆ди́ницы страда́льцы , и҆́же въ перси́дѣ не ѡ҆па́льни соблю́дшесѧ трїѐ ѻ҆́троцы бы́вше . ꙗ҆́ко бо ѻ҆нѝ на пла́мень дерзнꙋ́вше , бг҃ꙋ недосади́ша , та́кѡ и҆ вы̀ оу҆́мрети не ѿреко́стесѧ , не пощадѣ́вшесѧ хрⷭ҇то́вою любо́вїю . но ꙗ҆́коже во ѻ҆́нѣхъ ꙗ҆ви́выисѧ четве́ртыи , въ пла́мени ѡ҆роша́ше , та́кѡ и҆ ва́съ хрⷭ҇то́съ и҆́же є҆ди́нъ ѿ трⷪ҇цы , прїѧ́тъ в̾ мѣ́сто прохла́дное , а҆кеѱі́мо со і҆ѡ́сифомъ , и҆ а҆иѳа́ле бг҃опрїѧ́тне , да моли́тесѧ ѡ҆ дш҃а́хъ на́шихъ . и҆ ны́нѣ , боⷢ҇ . и҆лѝ крⷭ҇тобоⷢ҇ . Ви́дѧщи тѧ распина́ема хрⷭ҇тѐ , тебѐ ро́ждьшаѧ вопїѧ́ше , что̀ стра́нное є҆́же ви́ждꙋ та́инство сн҃е мо́й , ка́кѡ на́ древѣ оу҆мира́еши , пло́тїю ви́сѧ живота̀ пода́телю .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Мч҃нцы твоѝ гдⷭ҇и , во страда́нїихъ свои́хъ вѣнцы̀ прїѧ́ша нетлѣ́нныѧ ѿ тебѐ бг҃а на́шегѡ , и҆мꙋ́ще крѣ́пость твою̀ не побѣди́мꙋю , мꙋ́чащихъ оу҆праздни́ша , и҆ разрꙋши́ша бѣсо́мъ немощна́ѧ шата́нїѧ . тѣ́хъ мл҃твами хрⷭ҇тѐ бж҃е спасѝ дш҃а на́ша .

сла́ва , тропа́рь , геѡ́ргїю . гла́съ , д҃ . Ꙗ҆́кѡ плѣ́ннымъ свободи́тель , и҆ ни́щимъ защи́титель , болѧ́щимъ вра́чь , и҆ цр҃е́мъ посо́бникъ . побѣдоно́сче великомч҃нче геѡ́ргїе , молѝ хрⷭ҇та̀ бг҃а спасти́сѧ дш҃а́мъ на́шимъ .

и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . є҆ди́нъ кано́нъ , во ѻ҆кта́и , со і҆рмосо́мъ , на д҃ . и҆ мч҃нкѡмъ , на д҃ . и҆ геѡ́ргїю , на́ ѕ҃ . кано́нъ , мч҃нкѡмъ . гла́съ , д҃ . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ . запѣ́въ : Ст҃і́и сщ҃енномч҃нцы , моли́те бг҃а ѡ҆ на́съ .= Трⷪ҇цѣ равночи́сленїи прест҃ѣ́й всебога́тїи , то́й ꙗ҆ви́стесѧ честні́и покло́нницы . и҆ пред̾стоитѐ престо́лꙋ трⷪ҇чномꙋ . те́плїи застꙋ́пницы притека́ющимъ къ ва́мъ . Трⷪ҇цы покло́нницы трисл҃нчныѧ сꙋ́ще , многобо́жїѧ ле́сть ст҃і́и разрꙋши́сте , претерпѣ́вше мꙋ́ки многоѡ҆бра́зныѧ , и҆ сме́рть не пра́веднꙋю бг҃обл҃же́ннїи . Мꙋче́нїѧ пꙋчи́нꙋ без̾ волне́нїѧ преи҆до́сте вѣ́рою бл҃же́ннїи . и҆ приста́сте къ без̾печа́льномꙋ животꙋ̀ , к̾ приста́нищꙋ вы́шнїѧ свѣ́тлости , в̾ сла́вꙋ неи҆зрече́ннꙋю . =боⷢ҇ . Ра́дости на́мъ хода́таица , ꙗ҆́кѡ прїе́мши и҆сполне́нїе всегѡ̀ бжⷭ҇тва̀ , ꙗ҆ви́сѧ пренепоро́чнаѧ . тѣ́мъ всѝ тебѣ̀ ра́дость а҆́нг҃лѡвꙋ , согла́снѡ зове́мъ бг҃ора́дованнаѧ .

дрꙋгі́и кано́нъ , ст҃о́мꙋ геѡ́ргїю . є҆мꙋ́же краегране́сїе сицево̀ : дѣ́ланїе бг҃ꙋ тѧ̀ сла́влю бл҃же́нне . гла́съ , д҃ . пѣ́снь , а҃ . і҆рмо́съ . Тристоѧ́ща крѣ́пкїи , рожде́исѧ ѿ дв҃ы , без̾стра́стїе во глꙋбинѣ̀ , дш҃и трича́стное потопѝ молю́сѧ . да тѝ ꙗ҆́кѡ в̾ тимпа́нѣ , во оу҆мерщве́ннѣмъ тѣлесѝ , побѣ́дное пою̀ воспѣва́нїе .

запѣ́въ : Ст҃ы́и великомч҃нце геѡ́ргїе , молѝ бг҃а ѡ҆ на́съ .= Дѣ́ланїе бж҃їе , гобзꙋ́ющее ꙗ҆ви́сѧ , пита́ѧ вѣ́рныѧ под̾ража́нїемъ бл҃гочести́вымъ страстоте́рпче геѡ́ргїе , па́мѧть твою̀ свѣтоно́снꙋю сщ҃е́нно пра́з̾днꙋющїѧ . и҆ въ сїю̀ те́пло тѧ сла́вѧщїѧ . Раз̾жжѐ твоѐ страстоте́рпче срⷣце , бжⷭ҇твеное раче́нїе вои́стинꙋ . самозва́нъ тѣ́мъ к̾ мꙋчи́телемъ прїи́де , попалѧ́ѧ многобо́жныѧ пре́лести . и҆ ра́зꙋмъ свѣ́тлости ѡ҆блиста́ѧ спасе́нїѧ . Ꙗ҆́кѡ ле́въ оу҆пова́ѧ сꙋди́щꙋ пред̾ста̀ , воз̾вѣща́ѧ ꙗ҆́вствено воплоще́нїе хрⷭ҇то́во , и҆́мже ми́ръ и҆зба́висѧ паде́нїѧ дре́внѧгѡ . пе́рвое прїѧ́тъ бл҃гопло́дїе , треблаже́нне геѡ́ргїе . =боⷢ҇ . И҆з̾бавлѧ́ѧ на́съ ѡ҆сꙋжде́нїѧ дре́внѧгѡ , сн҃ъ бж҃їи , бы́сть сн҃ъ дв҃ыѧ ꙗ҆́кѡ чл҃къ . тѣ́мъ сегѡ̀ в̾ сꙋществꙋ̀ в̾ двою̀ хотѣ́нїю , правовѣ́рнымъ срⷣцемъ сла́вимъ .

пѣ́снь , г҃ . і҆рмо́съ . Немꙋ́дростїю ни си́лою , ни бога́тствомъ хва́лимсѧ , но твое́ю ѻ҆́ч҃ею соста́вною мꙋ́дростїю бж҃їею . ꙗ҆́кѡ нѣ́сть ст҃а па́че тебѐ чл҃колю́бче . Не въ мꙋ́дрости є҆́ллинскагѡ сꙋ́етїѧ мꙋ́дрїи , но ра́зꙋмомъ бжⷭ҇твенымъ , без̾бо́жїе ѡ҆бличи́сте пе́р̾сское , оу҆кори́вше си́хъ безꙋ́мїе . Сщ҃еннонача́лїѧ просвѣще́нъ бжⷭ҇твенымъ помаза́нїемъ , сщ҃е́нныи а҆кеѱі́мо . мꙋче́нїѧ же кро́вїю себѐ оу҆краси́лъ є҆сѝ , бг҃обл҃же́нне . Сокрꙋше́нїе твои́хъ оу҆дѡ́въ і҆ѡ́сифе приснопа́мѧтне , пре́лестныѧ ко́зни до конца̀ мч҃нче сокрꙋшѝ тебѣ́ же и҆схода́тай сла́вꙋ нетлѣ́ннꙋю . боⷢ҇ . Тѧ̀ премꙋ́дрость бж҃їѧ чистѣ́йше селе́нїе ѡ҆брѣ́тши , ѿ твои́хъ чи́стыхъ крове́й воплоти́сѧ . и҆ по ржⷭ҇твѣ̀ нетлѣ́ннꙋ ꙗ҆вѝ .

и҆́нъ , і҆рмо́съ . Лꙋ́къ си́льныхъ и҆знемо́же , а҆ не́мощнїи препоѧ́сашасѧ си́лою . сегѡ̀ ра́ди воз̾весели́сѧ , ѡ҆́ гдⷭ҇ѣ срⷣце моѐ . Ро́да и҆ ѻ҆те́чества сла́вы , ра́достїю ѿве́ржесѧ , и҆ хрⷭ҇то́ви послѣ́дова . и҆ го́рнѧгѡ сїѡ́на жи́тель мч҃нче ꙗ҆ви́сѧ краснѣ́йшїи . Да наслѣ́дникъ и҆зѧ́щенъ , и҆ покори́въ жива́гѡ бг҃а сн҃ъ ꙗ҆ви́шисѧ . претерпѣ́лъ є҆сѝ ра́ны треволне́нїѧ мꙋчи́тель . мч҃нче до́блїи . боⷢ҇ . Всегѡ̀ а҆да́ма ѡ҆дѣ́ѧсѧ , и҆́же милосе́рдїѧ ра́ди но́выи а҆да́мъ пренепоро́чнаѧ , сꙋ́щи и҆з̾ тебѐ є҆ди́ноѧ . чл҃кѡмъ созда́тель .

конда́къ , мч҃нкѡмъ . гла́съ , в҃ . Бжⷭ҇твенаѧ мꙋ́дре непоро́чнѡ наꙋчи́лъ є҆сѝ , же́ртва прїѧ́тна бы́сть бг҃обл҃же́нне . хрⷭ҇то́вꙋ бо и҆спи́въ ча́шꙋ , ст҃ы́и а҆кеѱі́мо , со страда́вшими тѝ . молѧ̀ непреста́ннѡ ѡ҆ всѣ́хъ на́съ . и҆́косъ . Кто̀ вѣ́рныхъ воз̾мо́жетъ ѿ ню́дъ , досто́йнѡ воспѣ́ти премꙋ́драгѡ сщ҃е́нника а҆кеѱі́ма , свѣти́льника хрⷭ҇то́ва . то́й бо разрꙋшѝ пре́лесть и҆́дольскꙋю , и҆ посрамѝ бѣсо́вскаѧ оу҆хищре́нїѧ , крѣ́пкою си́лою сп҃са хрⷭ҇та̀ бг҃а . трⷪ҇цѣ прест҃ѣ́й бл҃гоче́стнѡ покланѧ́тисѧ наказꙋ́ѧ ѻ҆ц҃а и҆ сн҃а и҆ ст҃а́гѡ дх҃а въ є҆ди́номъ бжⷭ҇твѣ̀ сла́вити , и҆ молѧ̀ непреста́ннѡ ѡ҆ всѣ́хъ на́съ .

сѣда́ленъ , мч҃нкѡмъ . гла́съ , и҃ . І҆ѡ́сифъ до́блїи подви́жникъ , а҆кеѱі́ма пре́лести гꙋби́тель , и҆ а҆иѳа́лъ пресла́вныи страда́лецъ непобѣди́мыи , свѣ́тлыѧ ѕвѣ́зды , вѣ́рными пѣ́сньми досто́йнѡ вои́стинꙋ да восхва́лѧтсѧ дне́сь . сі́и бо пре́лесть пе́рсѡмъ ѡ҆черни́ша , со́лнцꙋ не поже́рше , ни ѻ҆гнѧ̀ поче́тше . к̾ ни́мже любо́вїю возопїе́мъ , моли́те хрⷭ҇та̀ бг҃а , грѣхѡ́въ ѡ҆ставле́нїе дарова́ти , пра́з̾днꙋющимъ любо́вїю ст҃ꙋ́ю па́мѧть ва́шꙋ . и҆́нъ , сѣда́ленъ , ст҃о́мꙋ геѡ́ргїю . гла́съ , а҃ . Во́инство на землѝ воз̾ненави́дѣвъ мч҃ниче , на́ нб҃сѣхъ воз̾желѣ́лъ є҆сѝ сла́вы . и҆ болѣ́зни поне́слъ є҆сѝ , и҆ лю́тꙋю сме́рть . тѣ́мъ дне́сь всест҃ꙋ́ю ти па́мѧть пра́з̾днꙋюще , хрⷭ҇то́ви прино́симъ хвалꙋ̀ требл҃же́нне геѡ́ргїе . сла́ва , и҆ нн҃ѣ , боⷢ҇ . Наде́же хрⷭ҇тїа́нѡмъ прест҃а́ѧ дв҃о , є҆го́же родила̀ є҆сѝ бг҃а па́че оу҆ма̀ и҆ сло́ва , непреста́ннѡ молѝ съ вы́шними си́лами , да́ти ѡ҆ставле́нїе грѣхо́въ всѣ́мъ на́мъ , и҆ и҆справле́нїе житїю̀ , вѣ́рою и҆ любо́вїю всегда́ тѧ сла́вѧщимъ . крⷭ҇тобоⷢ҇ . Нескве́рнаѧ а҆́гница , а҆́гньца и҆ па́стырѧ ви́сѧща ме́ртва на́ древѣ зрѧ́щи , рыда́ющи вѣща́ше , мт҃рьски восклица́ющи ; ка́кѡ претерплю̀ твоѐ є҆́же па́че сло́ва сн҃е мо́й сни́тїе , и҆ во́льныѧ стра́сти , бж҃е пребл҃гі́и .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вопїю́щїѧ , сла́ва хрⷭ҇тѐ си́лѣ твое́й . И҆́же ни́жнѧѧ презрѣ́вше , и҆ въ є҆ди́нѣмъ пребыва́ющимъ смотрѧ́юще , тѣ́хъ полꙋчи́ша жили́ща . а҆кеѱі́ма до́блїи , и҆ сла́внїи і҆ѡ́сифъ же и҆ а҆иѳа́лъ , да восхва́лѧтсѧ . И҆́же къ є҆ди́номꙋ влⷣцѣ просте́ртое твоѐ помышле́нїе , во́ времѧ страда́нїѧ мч҃нче , ѡ҆блегче́нїе тебѣ̀ творѧ́ше нестерпи́мыхъ мꙋ́къ , крѣ́пкїи і҆ѡ́сифе , страстоте́рпче хрⷭ҇то́въ досточꙋ́дне . Честно́е твоѐ свидѣ́тельство , ꙗ҆́кѡ плодови́та лоза̀ ѡ҆бъє́млема , и҆сточа́етъ вино̀ вѣ́рнымъ оу҆миле́нїѧ , а҆иѳа́ле страстоте́рпче , веселѧ́щи зовꙋ́щихъ , сла́ва хрⷭ҇тѐ си́лѣ твое́й . боⷢ҇ . Ст҃а́ѧ бцⷣа , в̾ ню́же всели́тисѧ бл҃гои҆зволѝ ꙗ҆́кѡ во бл҃гоꙋха́нныи хра́мъ сло́во ѻ҆́ч҃ее и҆ равнобжⷭ҇твеное , нерастлѣ̀ чистоты̀ ни стꙋжи́ си . и҆́бо родѝ є҆мманꙋ́ила , бг҃а и҆ чл҃ка .

и҆́нъ , і҆рмо́съ . Любвѐ ра́ди ще́дре своегѡ̀ си ѻ҆́браза , на крⷭ҇тѣ̀ свое́мъ стоѧ̀ и҆ раз̾стоѧ́щасѧ ꙗ҆зы́цы . ты́ бо є҆сѝ бг҃ъ на́шъ , крѣ́пость моѧ̀ и҆ похвала̀ . Оу҆мерщве́ное твоѐ тѣ́ло мꙋ́ками бл҃же́нне , оу҆мерщве́ннагѡ сло́ва воѡ҆бража́етъ стрⷭ҇ти , дарова́вшагѡ тѝ живо́тъ вѣ́чныи . Щито́мъ и҆́стиннымъ ѡ҆гражде́нъ побо́рники ло́жныѧ крѣ́пкимъ смы́сломъ кꙋ́пнѡ погꙋби́лъ є҆сѝ бг҃омꙋ́дре геѡ́ргїе . Просла́висѧ твои́ми оу҆́ды ст҃ы́ми , и҆́же в̾ земны́хъ ѡ҆дѣ́ѧсѧ неможе́нїе сло́во . тѣ́мъ вѣ́чнѡ тѧ̀ прославлѧ́етъ геѡ́ргїе . боⷢ҇ . И҆́же бытїѐ дарова́выи чл҃кѡмъ , и҆ є҆́же до́брѣ бы́ти тѣ́мъ престꙋпле́нїемъ и҆стлѣ́вшемъ пречⷭ҇таѧ дарова̀ , бы́въ чл҃къ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Вели́кое и҆ честно́е призыва́ѧ и҆́мѧ гдⷭ҇не , ча́шꙋ спасе́нїѧ страда́нїи ра́дꙋѧсѧ а҆кеѱі́мо и҆́спилъ є҆сѝ . Вы́шнѧѧ тѧ̀ пи́ща звана̀ ра́нами прїѧ́тъ , и҆ ли́цы і҆ѡ́сифе мч҃нчестїи , с̾ ни́ми веселѧ́щасѧ . Са́дъ присноцвѣтꙋ́щїи , плоды̀ по́двигъ твои́хъ концы̀ пита́ѧ вои́стинꙋ ꙗ҆ви́сѧ а҆иѳа́ле бл҃же́нне . боⷢ҇ . Свѣ́тъ без̾лѣ́тныи на́мъ ѻ҆́ч҃ее сїѧ́нїе родила̀ є҆сѝ , под̾ лѣ́тна бл҃госты́нею бога́тства бы́вша пренепоро́чнаѧ .

и҆́нъ , і҆рмо́съ , то́йже . Вни́де мꙋ́жески в̾ мч҃нческїи по́двигъ и҆ поразѝ и҆́дольское страстоте́рпче шата́нїе , тѣ́ломъ сокрꙋша́емь . Тебѐ ка́мень свѣ́тлыи , влⷣка в̾ вѣнцѣ́хъ вонзѐ страстоте́рпче свое́й цр҃кви подо́бно сїѧ́юща . Пожре́сѧ ꙗ҆́кѡ а҆́гнецъ , до́брагѡ па́стыре нача́льника сме́рть воѡ҆брази́въ , и҆ принесе́сѧ вы́шнѣй трапе́зѣ же́ртва непоро́чна . боⷢ҇ . Спасѝ на́съ ѿ бѣ́дъ и҆ скорбе́й пречⷭ҇таѧ бцⷣе . и҆ мꙋ́къ и҆зба́ви бꙋ́дꙋщихъ моли́твами тѝ .

пѣ́снь , ѕ҃ . і҆рмо́съ . Пожрꙋ́ти со́ гласомъ хвале́нїѧ гдⷭ҇и , цр҃кви вопїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Главѣ̀ а҆кеѱі́мо твое́й оу҆сѣче́нѣ ѿ тѣлесѐ , хрⷭ҇то́ви совокꙋпѝ вѣ́рою дш҃ꙋ твою̀ мч҃нче не ѿстꙋ́пнѡ . та́мѡ сꙋ́щими зарѧ́ми при́снѡ просвѣща́емь . Ка́менїемъ ꙗ҆́кѡ первострада́лецъ мч҃нче оу҆бива́емь . не ѿве́ржесѧ ка́менѧ живо́тнагѡ хрⷭ҇та̀ . преходѧ̀ к̾ та́мѡ сꙋ́щимъ свѣ́тлымъ ѻ҆би́телемъ . Же́злїемъ неми́лостивнѡ оу҆ранѧ́емь ра́довашесѧ , же́злъ и҆мѣ́ѧ си́лы крⷭ҇тъ гдⷭ҇нь и҆ похвалꙋ̀ , страстоте́рпче а҆иѳа́ле , бг҃омꙋ́дре всебога́те . боⷢ҇ . Кꙋпина̀ проѡ҆бразова́ше вели́кꙋю та́йнꙋ , па́че оу҆ма̀ твоегѡ̀ ржⷭ҇тва̀ , ѻ҆гне́мъ ѿ ню́дъ повива́ема , и҆ ника́коже ѡ҆палѧ́ема , дв҃о всепѣ́таѧ .

и҆́нъ , і҆рмо́съ . Прїидо́хъ во глꙋбины̀ морскі́ѧ , и҆ потопи́ла мѧ є҆́сть бꙋ́рѧ мно́гихъ ми прегрѣше́нїи . но ꙗ҆́кѡ бг҃ъ , и҆з̾ тлѝ воз̾ведѝ живо́тъ мо́й многомлⷭ҇тиве . Сосꙋ́дъ раз̾дроблѧ́емь тѣ́ла страда́нїи мч҃нче , вра́жїѧ всѧ̀ ко́зни лꙋка́выѧ мꙋ́жески разрꙋши́лъ є҆сѝ , всебл҃же́нне геѡ́ргїе . Ѻ҆строты̀ разсѣка́ющїѧ тѣ́ло и҆ колесѐ мч҃нче , и҆ распалѧ́емы ве́щи пе́щныѧ , и҆́же къ бг҃ꙋ любо́вїю распалѧ́емь , ѿ ню́дъ не оу҆страши́лсѧ є҆сѝ . боⷢ҇ . Ст҃ы́и хра́мъ , въ ст҃ы́хъ почива́ющемꙋ была̀ є҆сѝ бг҃омт҃и . тѣ́мже на́съ вѣ́рнѡ пою́щихъ тебѐ ѡ҆сщ҃а́еши при́снѡ дв҃о .

конда́къ , ст҃о́мꙋ геѡ́ргїю . гла́съ , в҃ . Звѣзда̀ свѣтла̀ ꙗ҆ви́сѧ непреле́стна , сл҃нца хрⷭ҇та̀ воз̾вѣща́ѧ зарѧ́ми твои́ми , страстоте́рпче геѡ́ргїе . и҆ пре́лесть оу҆гаси́лъ є҆сѝ всю̀ . и҆ на́мъ подае́ши свѣ́тъ , молѧ́сѧ непреста́ннѡ ѡ҆ всѣ́хъ на́съ . и҆́косъ . За мир̾скі́и живо́тъ дш҃ꙋ свою̀ поло́жша хрⷭ҇та̀ цр҃ѧ , жела́ѧ во́инъ тщи́тсѧ оу҆́мрети за́нь . ре́вность вели́кꙋ бжⷭ҇твенꙋю въ срⷣцы свое́мъ и҆мы́и , томꙋ̀ себѐ принесѐ . сего́ же и҆ всѝ геѡ́ргїѧ , ꙗ҆́кѡ те́пла застꙋ́пника воспое́мъ вѣ́рнїи . ꙗ҆́кѡ сла́вна сꙋ́ща хрⷭ҇то́ва раба̀ , подо́бѧщасѧ ꙗ҆́вѣ своемꙋ̀ влⷣцѣ , и҆ комꙋ́ждо молѧ́щемꙋсѧ прихо́дитъ . тщи́тбосѧ всегда̀ , и҆ мо́литъ сп҃са непреста́ннѡ ѡ҆ всѣ́хъ на́съ .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и оу҆би́въ , ꙗ҆́же без̾ пра́вды пра́ведныѧ оу҆ловлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гослове́нъ є҆сѝ . Во ѻ҆гнѝ мꙋче́нїѧ ро́сꙋ ѿ́ бг҃а прїе́мше , сопроти́вныхъ пла́мы , ва́шимъ терпѣ́нїемъ погаси́сте страстоте́рпцы , зовꙋ́ще , бж҃е ѻ҆ц҃ъ на́шихъ бл҃гослове́нъ є҆сѝ . И҆́же ѻ҆гню̀ покло́нницы , семꙋ̀ наслѣ́дницы ꙗ҆ви́вшесѧ . ѻ҆гню̀ слꙋжи́ти , слꙋжи́тели сл҃нцꙋ сла́вы понꙋжда́хꙋ . но сі́и взыва́хꙋ , бж҃е ѻ҆ц҃ъ на́шихъ бл҃гослове́нъ є҆сѝ . А҆кеѱі́ма , и҆ і҆ѡ́сифъ , и҆ а҆иѳа́лъ трⷪ҇ца всечестна́ѧ , трⷪ҇цѣ свѣти́льницы и҆́же всѧ̀ концы̀ бл҃гоче́стїѧ зарѧ́ми ѡ҆блиста́ющи , да почтꙋ́тсѧ во́ вѣки . боⷢ҇ . Бл҃гослове́нъ пло́дъ бл҃гослове́нагѡ тѝ чре́ва , є҆го́же бл҃гословѧ́тъ нбⷭ҇ныѧ си́лы , и҆ земны́хъ со́нмища , и҆́же на́съ и҆зба́вивыи клѧ́твы пе́рвыѧ , бл҃гослове́наѧ .

и҆́нъ , і҆рмо́съ . Ю҆́ношы трѝ в̾ вавилѡ́нѣ , велѣ́нїе мꙋчи́телево на бꙋ́йство преложи́ша . и҆ посредѝ ѻ҆гнѧ̀ в̾ве́ржени , прохлажда́еми вопїѧ́хꙋ , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Жива̀ бы́сть же́ртва мч҃нче , за ны̀ пожре́номꙋ ꙗ҆́кѡ ѻ҆вча́ти . бѣсо́мъ же́ртвы всꙋ́е приноси́мыѧ оу҆праз̾дни́лъ є҆сѝ , ѡ҆ хрⷭ҇тѣ̀ оу҆крѣплѧ́емь . Ꙗ҆ви́сѧ бл҃гопло́денъ ꙗ҆́кѡ лоза̀ , приносѧ̀ гро́здїе на́мъ терпѣ́нїѧ сла́вне , вино̀ ка́плюще бжⷭ҇твеное , и҆́же срⷣца̀ всѣ́хъ бл҃гочести́выхъ веселѧ́ще . Оу҆́ды да́лъ є҆сѝ оу҆се́рднѡ раз̾сѣка́ти за хрⷭ҇та̀ . пребы́сть же не ѿлꙋче́нъ тогѡ̀ любвѐ пребл҃же́нне , и҆ наслѣ́дникъ всѣ́хъ бл҃гъ веселѧ́сѧ . боⷢ҇ . Хвалꙋ̀ бг҃ови прино́ситъ всѧ̀ тва́рь , ѿ твоегѡ̀ ро́ждьшꙋсѧ пренепоро́чнаѧ ѻ҆трокови́це пречⷭ҇тагѡ чре́ва . и҆ дре́внїѧ всѣ́хъ на́съ клѧ́твы и҆зба́вльшемꙋ .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Сло́вꙋ бы́вше прїѧ́телища , и҆ тогѡ̀ ꙗ҆́звы носѧ́ще , мꙋчи́телей сꙋро́вствомъ , бре́мѧ а҆́ки бездꙋ́шно на без̾слове́снаѧ воз̾ложи́стесѧ . приноси́ми ко и҆скꙋше́нїю мно́жайшимъ мꙋ́камъ мч҃нцы до́блїи . хрⷭ҇та̀ превозносѧ́ще во́ вѣки . Хода́таи сла́вы присносꙋ́щныѧ , приснопа́мѧтнїи мч҃нцы оу҆краша́еми . ра́достнѡ ше́ствовасте , є҆го́же воз̾люби́сте свидѣ́тельства сла́внїи пꙋ́ть . зовꙋ́ще , гдⷭ҇а по́йте и҆ превозноси́те є҆гѡ̀ во́ вѣки . Ни ѻ҆́гнь , ни ра́ны , ни ѕвѣ́ри , ни ме́чь , ни ро́въ , ни сме́рть возмо́же мч҃нки твоеѧ̀ любвѐ ѿлꙋчи́ти гдⷭ҇и . бл҃ги́хъ и҆сто́чниче , любвѐ не и҆стощи́маѧ стрꙋѧ̀ . и҆́хже хва́лѧще хрⷭ҇тѐ , тебѐ бл҃гослови́мъ во́ вѣки . боⷢ҇ . Є҆ди́нꙋ неи҆скꙋсомꙋ́жнꙋю мт҃рь , и҆ є҆ди́нꙋ тва́рей преи҆мꙋ́щꙋю , го́рꙋ прест҃ꙋ́ю , трапе́зꙋ всезлатꙋ́ю , бцⷣꙋ , пѣ́сньми воспѣва́юще зове́мъ , гдⷭ҇а воспѣва́йте дѣ́ла и҆ превозноси́те є҆гѡ̀ во́ вѣки .

и҆́нъ , і҆рмо́съ . И҆зба́вителю всѣ́хъ всеси́льне , посредѣ̀ пла́мене бл҃гоче́ствовавшїѧ сше́дъ ѡ҆роси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гослови́те гдⷭ҇нѧ гдⷭ҇а . Корми́тель пла́вающимъ и҆зѧ́щныи , помо́щникъ въ ско́рбѣхъ вели́къ ꙗ҆ви́сѧ геѡ́ргїе . спаса́еши вѣ́рою к̾ тебѣ̀ , и҆ несꙋмѣ́ннымъ срⷣцемъ притека́ющихъ . И҆́стинѣ ꙗ҆ви́сѧ побо́рникъ , и҆ лжѝ бы́сть ѡ҆глаго́льникъ . на́мъ же па́ки оу҆твержде́нїе стрⷭ҇тоте́рпче вѣ́рою вопїю́щимъ . бл҃гослови́те всѧ̀ дѣ́ла гдⷭ҇нѧ гдⷭ҇а . Кропле́нїемъ крове́й твои́хъ , погаси́лъ є҆сѝ пре́лести геѡ́ргїе оу҆́глїе . и҆ вѣ́рныхъ напои́лъ є҆сѝ срⷣца̀ , вѣ́рнѡ тѧ̀ воспѣва́ющихъ , и҆ соверша́ющихъ сла́внꙋю па́мѧть твою̀ . боⷢ҇ . Ѿ і҆єс̾се́ѡва ко́рене прозѧбла̀ є҆сѝ , и҆ ѕло́бныи ко́рень и҆сто́ргнꙋла є҆сѝ , содѣ́телѧ тва́ри прозѧ́бши ѻ҆трокови́це . є҆мꙋ́же пое́мъ , бл҃гослови́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́с̾ . Ка́мень нерꙋкосѣ́чныѧ горы̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , совокꙋпи́въ раз̾стоѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Бл҃гочести́выѧ свѣти́льники , и҆ пре́лести потреби́тели , разꙋ́мнагѡ раѧ̀ бл҃гово́нныѧ цвѣ́ты , сосꙋ́ды честны́ѧ , бж҃їѧ красоты̀ зри́телѧ восхва́лимъ . Оу҆́гль , є҆го́же дре́вле ви́дѣ и҆са́їѧ , въ срⷣцы внꙋ́трь прїе́мше . и҆ тогѡ̀ блиста́нїемъ ѡ҆зарѧ́еми , мра́чное мч҃нцы ѻ҆гнѧ̀ слꙋже́нїе ѿрази́сте . Живонача́льнѣй ны́нѣ трⷪ҇цѣ оу҆краше́ни пред̾стоитѐ , и҆ вѣне́чными добро́тами просвѣща́еми . па́мѧть твори́те , ѡ҆ и҆́же на землѝ бл҃же́ннїи помина́ющихъ ва́съ всегда̀ . боⷢ҇ . Ѿча́ѧннагѡ мѧ̀ спасѝ , и҆́же сп҃са заче́нши , и҆ пло́тїю ро́ждьши дв҃о . грѣхо́внымъ бо бре́менемъ ѡ҆тѧгча́емь , болѣ́зненѡ зовꙋ́ ти , потща́вшисѧ помозѝ рабꙋ̀ своемꙋ̀ .

и҆́нъ , і҆рмо́съ . Є҆́вва оу҆́бѡ недꙋ́гомъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прозѧбе́нїемъ прижи́тїѧ твоегѡ̀ , ми́рови бл҃гослове́нїе процвѣла̀ є҆сѝ . тѣ́мъ тѧ̀ всѝ велича́емъ . Ꙗ҆́кѡ оу҆́тро , ꙗ҆́кѡ сл҃нце свѣ́тлѡ восїѧ́въ , и҆ тва́рь просвѣти́лъ є҆сѝ , страсте́й незаходи́мыми зарѧ́ми , чꙋде́съ же мно́гихъ ꙗ҆вле́нїи геѡ́ргїе , мч҃нкѡмъ ра́дованїе . тѣ́мъ тѧ̀ любо́вїю оу҆блажа́емъ . Ка́плѧ бжⷭ҇твенꙋю сла́дость геѡ́ргїе , ꙗ҆́кѡ па́че горы̀ ꙗ҆ви́сѧ . страстнꙋ́ю на́шꙋ го́ресть взе́млѧ , и҆ ѡ҆слажда́ѧ всегда̀ , дш҃а́ же и҆ срⷣца̀ , вѣ́рою тѧ̀ блажа́щихъ достосла́вне . Ѡ҆ст҃и́лъ є҆сѝ кро́вїю зе́млю , и҆ дх҃омъ весе́лїѧ нбⷭ҇наѧ и҆спо́лнилъ є҆сѝ мч҃нче . тѣ́мъ всѧ́ка дш҃а тѧ̀ бл҃гочести́выхъ , ꙗ҆́кѡ оу҆го́дника гдⷭ҇нѧ лю́битъ при́снаго , и҆ помо́щника тѧ̀ написꙋ́етъ . боⷢ҇ . Гла́съ тѝ прино́симъ бжⷭ҇твенагѡ гаврїи́ла весе́лїѧ зовꙋ́ще . ра́дꙋисѧ ра́дость вселе́ннѣй , ско́рби потреби́телѧ поро́ждьши , и҆ є҆́ввино ѿє҆́мши поноше́нїе . ра́дꙋисѧ дв҃о неи҆скꙋсобра́чнаѧ .

свѣти́ленъ . Подъѧ́лъ є҆сѝ ꙗ҆́кѡ беспло́тенъ нестерпи́мыѧ мꙋ́ки , а҆кеѱі́мо всехва́льне сщ҃е́нникѡмъ сла́вѡ , со і҆ѡ́сифомъ чꙋ́днымъ , и҆ ди́вныи а҆иѳа́лъ дїа́конъ , хрⷭ҇тꙋ̀ таи́нникъ . и҆́хже болѣ́знемъ страда́нїѧ оу҆дивлѧ́ютсѧ при́снѡ беспло́тныхъ чи́нове . сла́ва , геѡ́ргїю . Стрꙋѧ́ми крове́й твои́хъ , пре́лестныѧ пла́мы погаси́лъ є҆сѝ бл҃же́нне . и҆ мꙋчи́тель свирѣ́пїе до конца̀ погꙋби́лъ є҆сѝ . и҆ хрⷭ҇та̀ просла́вилъ є҆сѝ , геѡ́ргїе страстоте́рпче . тѣ́мъ вѣне́цъ прїѧ́тъ нетлѣ́нїѧ и҆ живота̀ ѿ десни́цы вы́шнѧгѡ . и҆ ны́нѣ , боⷢ҇ . Нѣ́сть во мнѣ̀ ѿ ню́дъ наде́жи спасе́нїю дв҃о , ꙗ҆́кѡ ѕлѣ̀ впадо́хъ въ глꙋбинꙋ̀ прегрѣше́нїи , и҆ ча́ѧ преще́нїѧ стра́шныѧ мꙋ́ки , и҆ ко́злищь ча́сти . но оу҆ще́дри мѧ̀ пре́жде сꙋда̀ , ꙗ҆́кѡ сꙋ́щи тепла̀ застꙋ́пница бцⷣе .

На стихо́внѣ , во ѻ҆кта́и . и҆ мч҃нкѡмъ , сти́хъ : гла́съ , в҃ . воз̾ва́ша пра́веднїи ,꙳ и҆ гдⷭ҇ь оу҆слы́ша и҆́хъ . Ѡ҆ бл҃гоче́стїи ст҃і́и тве́рдѣ под̾виза́вшесѧ за хрⷭ҇та̀ , свирѣ́пство мꙋчи́тель посрами́сте , и҆ и҆́долѡвъ высотꙋ̀ въ про́пасть погрꙋзи́сте , а҆кеѱі́мо , и҆ а҆иѳа́ле , и҆ і҆ѡ́сифе . и҆ ны́нѣ на́ нб҃сѣхъ вѣнцено́сцы ликꙋ́юще , моли́тесѧ ѡ҆ дш҃а́хъ на́шихъ . сла́ва . гла́съ , д҃ . Разꙋ́мнагѡ а҆дама́нта , терпѣ́нїе бра́тїе дх҃о́внѡ восхва́лимъ , геѡ́ргїѧ сла́внагѡ мч҃нка . є҆го́же по хрⷭ҇тѣ̀ раз̾жига́ема , кова́хꙋ бѣды̀ , и҆ и҆зъ ѡ҆стри́ша мꙋ́ки . и҆ раз̾ли́чныѧ мꙋ́ки и҆знꙋри́ша тѣ́ло є҆стество́мъ тлѣ́нно . побѣжда́ше бо и҆ жела́нїе є҆стество̀ , сме́ртїю понꙋжда́ѧ рачи́телѧ , прейтѝ к̾ жела́емомꙋ хрⷭ҇тꙋ̀ бг҃ꙋ , и҆ сп҃сꙋ дш҃а́мъ на́шимъ . и҆ ны́нѣ , боⷢ҇ . и҆лѝ крⷭ҇тобоⷢ҇ . поⷣ . ꙗ҆́кѡ до́блѧ .= Н=а крⷭ҇тѣ̀ ꙗ҆́кѡ ви́дѣ тѧ̀ ,꙳ пригвожда́ема гдⷭ҇и ,꙳ а҆́гница и҆ мт҃и твоѧ̀ дивлѧ́шесѧ .꙳ и҆ что̀ видѣ́нїе зовѧ́ше ,꙳ сн҃е воз̾желѣ́нне ,꙳ сїѧ́ти непокори́выи и҆ без̾зако́нныи собо́ръ воз̾да́стъ ,꙳ мно́гихъ тѝ чꙋде́съ наслади́всѧ .꙳ но сла́ва неи҆з̾рече́нномꙋ ,꙳ схожде́нїю твоемꙋ̀ влⷣко .

<< Previous

Contents

Next >>