МЦⷭ҇А ТОГО́ЖЕ ВЪ Л҃ ДН҃Ь

ст҃а́гѡ и҆ всехва́льнагѡ а҆пⷭ҇ла а҆ндре́ѧ первозва́ннагѡ . =Ве́черъ , пое́мъ , бл҃же́нъ мꙋ́жь , а҃ , а҆нтифо́нъ . На гдⷭ҇и возва́хъ , стихѣ́ры , на́ и҃ . гла́съ , д҃ . поⷣ . и҆́же зва́нныи свы́ше . И҆́=же прⷣтчевымъ свѣ́томъ воѡ҆браже́нъ ,꙳ є҆гда̀ сїѧ́нїе сꙋ́щественое ,꙳ ѿ ѻ҆те́ческїѧ сла́вы восїѧ́въ ,꙳ чл҃ческомꙋ ро́дꙋ ,꙳ за бл҃гоꙋтро́бїе спастѝ восхотѣ́въ ,꙳ тогда̀ пе́рвїе сла́вне к̾ немꙋ̀ притечѐ ,꙳ просвѣще́нъ помышле́нїемъ ,꙳ соверше́ною лꙋче́ю тогѡ̀ бжⷭ҇тва̀ .꙳ тѣ́мже и҆ проповѣ́дникъ и҆ а҆пⷭ҇лъ бы́въ ,꙳ хрⷭ҇та̀ бг҃а на́шегѡ .꙳ є҆го́же молѝ ,꙳ спастѝ и҆ просвѣти́ти дш҃а на́ша . И҆́же прⷣтчевымъ ,꙳ глаго́ломъ ѡ҆глаше́нъ ,꙳ є҆гда̀ прест҃о́е сло́во воплоти́сѧ ,꙳ живо́тъ на́мъ подава́ѧ ,꙳ и҆ спасе́нїе землены́мъ бл҃говѣствꙋ́ѧ ,꙳ тогда̀ томꙋ̀ ве́сь послѣ́дова .꙳ и҆ себѐ верхо́вное ,꙳ и҆ прест҃о́е приноше́нїе ,꙳ томꙋ̀ ѡ҆ст҃ѝ .꙳ є҆го́же и҆ оу҆вѣ́дѣвъ ,꙳ и҆ воз̾вѣстѝ сро́дникꙋ своемꙋ̀ бг҃а на́шегѡ .꙳ є҆го́же молѝ ,꙳ спастѝ и҆ просвѣти́ти дш҃а на́ша . И҆́же и҆з̾ непло́дове ,꙳ восїѧ́вшемꙋ оу҆чени́къ бы́въ .꙳ є҆гда̀ дв҃ственое ржⷭ҇тво̀ восїѧ̀ ,꙳ бл҃гоче́стїѧ оу҆чи́тель ,꙳ и҆ цѣломꙋ́дрїѧ показꙋ́ѧ чистотꙋ̀ ,꙳ тогда̀ ты̀ теплѣ́йшїи добродѣ́тели рачи́тель ,꙳ а҆ндре́е бл҃же́нне бы́сть ,꙳ восхожде́нїѧ в̾ срⷣцы свое́мъ поло́жь ,꙳ и҆ ѿ сла́вы к̾ нетлѣ́ннѣй взѧ́тсѧ сла́вѣ ,꙳ хрⷭ҇та̀ бг҃а на́шегѡ .꙳ є҆го́же молѝ ,꙳ спастѝ и҆ просвѣти́ти дш҃а на́ша .

сла́ва . гла́съ , д҃ . Ры́бнꙋю лови́твꙋ ѡ҆ста́вль а҆пⷭ҇ле , чл҃ки оу҆ловлѧ́еши , тро́сть проповѣ́данїѧ мета́ѧ ꙗ҆́коже оу҆́дицꙋ , бл҃гоче́стїѧ льще́нїе . и҆ воз̾водѧ̀ и҆з̾ глꙋбины̀ льстѝ ꙗ҆зы́ки всѧ̀ , а҆ндре́е а҆пⷭ҇ле , верхо́вномꙋ є҆динокро́вниче , и҆ вселе́ннѣй є҆диноповѣсти́телю велегла́сныи . моли́тисѧ непреста́й ѡ҆ на́съ , вѣ́рою и҆ любо́вїю хва́лѧщихъ , всечестнꙋ́ю па́мѧть твою̀ . и҆ ны́нѣ . гла́съ , то́йже . И҆са́їе ликꙋ́й , сло́во бж҃їе воспрїи́мъ , прорцы̀ ѡ҆ ѻ҆трокови́цѣ мр҃і́и , кꙋпинѣ̀ горѧ́щѣ ѻ҆гне́мъ бжⷭ҇тва̀ , и҆ несгара́ющей . виѳлее́ме гото́висѧ . ѿве́рзи врата̀ є҆де́ме . и҆ волсвѝ и҆ди́те , ви́дити спасе́нїе в̾ ꙗ҆́слѣхъ повива́емо . є҆го́же ѕвѣзда̀ показа̀ верхꙋ̀ вертьпа̀ жизнода́вца и҆ гдⷭ҇а , спаса́юща ро́да на́шегѡ . та́же , вы́ходъ . проки́менъ , дню̀ .

Ѿ собо́рнагѡ посла́нїѧ петро́ва , чте́нїе .

Пе́тръ , а҆пⷭ҇лъ і҆с҃ъ хрⷭ҇то́въ , и҆збра́ннымъ прише́льцемъ разсѣ́ѧнїѧ , по́нтꙋ , галаті́и , каппадокі́и , а҆сі́и , и҆ виѳині́и , по прозрѣ́нїю бг҃а и҆ ѻ҆ц҃а , во ст҃ы́ню дх҃а , въ послꙋша́нїе и҆ кропле́нїе кро́ве і҆с҃ъ хрⷭ҇то́вы , бл҃года́ть ва́мъ и҆ ми́ръ да оу҆мно́житсѧ . бл҃гослове́нъ бг҃ъ и҆ ѻ҆ц҃ъ гдⷭ҇а на́шегѡ і҆с҃а хрⷭ҇та̀ , и҆́же по мно́зѣй свое́й ми́лости , порожде́и на́съ , во оу҆пова́нїе жи́во , воскрⷭ҇нїемъ і҆с҃ъ хрⷭ҇то́вымъ . в̾ наслѣ́дїе нетлѣ́нно и҆ нескве́рно и҆ неꙋвѧда́емо , соблюдено̀ на́ нб҃сѣхъ в̾ ва́съ , и҆́же си́лою бж҃їею соблюде́ныхъ вѣ́рою , во спасе́нїе гото́во ꙗ҆ви́тисѧ во́ времѧ послѣ́днее . ѡ҆ не́мже ра́дꙋйтесѧ , ма́лѡ ны́нѣ а҆́ще лѣ́по є҆́сть , приско́рбни бы́вше въ разли́чныхъ напа́стехъ . да и҆скꙋше́нїе ва́шеѧ вѣ́ры , многочестнѣ́йше зла́та ги́бнꙋща , ѻ҆гне́мъ же и҆скꙋше́на ѡ҆брѧ́щетсѧ , в̾ похвалꙋ̀ и҆ че́сть и҆ сла́вꙋ , во ѿкрове́нїи і҆с҃ъ хрⷭ҇то́вѣ . є҆го́же неви́дѣвше лю́бите , и҆ на него́же ны́нѣ незрѧ́ще , вѣ́рꙋюще же . ра́дꙋйтесѧ ра́достїю неи҆з̾глаго́ланною и҆ просла́вленною , прїе́млюще кончи́нꙋ вѣ́рѣ ва́шей , спасе́нїе дш҃а́мъ . ѡ҆ не́мже спасе́нїи взыска́ша и҆ и҆спыта́ша прⷪ҇рцы , и҆́же ѡ҆ ва́шей бл҃года́ти проре́кшеи . и҆спыта́юще каково̀ , и҆лѝ в̾ коѐ вре́мѧ ꙗ҆влѧ́шесѧ в̾ ни́хъ дх҃ъ хрⷭ҇то́въ , пре́жде свидѣ́тельствꙋѧ ѡ҆ хрⷭ҇то́выхъ стрⷭ҇те́хъ , и҆ ꙗ҆́же по си́хъ сла́вахъ . и҆́мже ѿкры́сѧ ꙗ҆́кѡ не и҆́мъ самѣ́мъ , но ва́мъ слꙋжа́хꙋ сїѧ̀ . ꙗ҆́же ны́нѣ воз̾вѣсти́шасѧ ва́мъ , бл҃говѣствова́вшими ва́мъ дх҃омъ ст҃ы́мъ , по́сланымъ с̾ нб҃сѐ , въ не́же жела́ютъ а҆́нг҃ли прини́кнꙋти . тѣ́мже воз̾лю́бленїи , препоѧ́савше чре́сла помышле́нїѧ ва́шегѡ , трезвѧ́щесѧ соверше́нѣ , оу҆пова́йте на приноси́мꙋю ва́мъ бл҃года́ть ѿкрове́нїемъ і҆с҃ъ хрⷭ҇то́вымъ , ꙗ҆́кѡ ча́да послꙋша́нїю . не преѡ҆бразꙋ́ющесѧ пе́рвыми невѣ́дѣнїѧ ва́шегѡ похотѣ́нїи . но позва́вшемꙋ вы̀ ст҃о́мꙋ , и҆ са́ми ст҃и во все́мъ житїѝ бꙋ́дите . занѐ пи́сано є҆́сть , ст҃и бꙋ́дите , ꙗ҆́кѡ а҆́зъ ст҃ъ є҆́смь , и҆ а҆́ще ѻ҆ц҃а называ́ете , нелицемѣ́рнѡ сꙋдѧ́ща комꙋ́ждо по дѣ́лꙋ , со́страхомъ житїѧ̀ ва́шегѡ вре́мѧ жи́тельствꙋйте . вѣ́дѧще ꙗ҆́кѡ неи҆стлѣ́ннымъ сребро́мъ и҆лѝ зла́томъ , и҆зба́вистесѧ ѿ сꙋ́етнагѡ ва́шегѡ житїѧ̀ ѻ҆ц҃ы пре́даннагѡ , но чⷭ҇тно́ю кро́вїю ꙗ҆́кѡ а҆́гньца непоро́чна и҆ пречⷭ҇та хрⷭ҇та̀ . пред̾оу҆вѣ́дѣна оу҆́бѡ пре́жде сложе́нїѧ ми́ра , ꙗ҆́вльшажесѧ в̾ послѣ́днѧѧ лѣ́та ва́съ ра́ди , и҆́же є҆гѡ̀ ра́ди вѣ́ровавшихъ въ бг҃а , воз̾дви́гшаго є҆гѡ̀ и҆з̾ ме́ртвыхъ , и҆ сла́вꙋ є҆мꙋ̀ да́вша ꙗ҆́кѡ да вѣ́ра ва́ша и҆ оу҆пова́нїе бꙋ́детъ на́ бг҃а . дш҃а ва́ша ѡ҆чи́стивше в̾ послꙋша́нїе и҆́стинѣ дх҃омъ . въ братолю́бїе нелицемѣ́рно , ѿ чи́ста срⷣца . дрꙋ́гъ дрꙋ́га люби́те прилѣ́жнѡ порожде́ни не ѿ сѣ́мене и҆стлѣ́нна , но неи҆стлѣ́нна , сло́вомъ жива́гѡ бг҃а и҆ пребыва́юща во́ вѣки . занѐ всѧ́ка пло́ть , ꙗ҆́кѡ трава̀ . и҆ всѧ́ка сла́ва чл҃кꙋ , ꙗ҆́кѡ цвѣ́тъ тра́вныи . и҆́з̾сше трава̀ , и҆ цвѣ́тъ є҆ѧ̀ ѿпадѐ . глаго́лъ же гдⷭ҇нь пребыва́етъ во́ вѣки . се́же є҆́сть глаго́лъ бл҃говѣствова́нныи в̾ ва́съ . ѿло́жше оу҆́бѡ всѧ́кꙋ ѕло́бꙋ , и҆ всѧ́кꙋ ле́сть , и҆ лицемѣ́рїе , и҆ за́висть , и҆ всѧ̀ клеветы̀ , ꙗ҆́кѡ новорожде́ни младе́нцы , слове́сное и҆ неле́стное млеко̀ возлюби́те , ꙗ҆́кѡ да ѡ҆ не́мъ возрасте́те во спасе́нїе . поне́же вкꙋси́сте ꙗ҆́кѡ бл҃гъ гдⷭ҇ь . к̾ немꙋ́же приходѧ́ще ка́мени жи́вꙋ , ѿ чл҃къ оу҆́бѡ оу҆ничиже́нꙋ , ѿ бг҃а же и҆́збранꙋ , че́стнꙋ . и҆ са́ми ꙗ҆́кѡ ка́менїе жи́во зи́ждетесѧ , въ хра́мъ дх҃о́венъ . ст҃льство ст҃о . воз̾нестѝ же́ртвы дх҃о́вны бл҃гопрїѧ́тны бг҃ови і҆с҃ъ хрⷭ҇то́мъ . занѐ пи́сано є҆́сть в̾ писа́нїи , сѐ полага́ю в̾ сїѡ́нѣ ка́мень краеꙋго́ленъ , и҆́збранъ че́стенъ . и҆ вѣ́рꙋѧи во́нь , непостыди́тсѧ .

Ѿ собо́рнагѡ посла́нїѧ петро́ва , чте́нїе .

Воз̾лю́бленїи , хрⷭ҇то́съ пострада̀ по на́съ , на́мъ ѡ҆ста́вль ѻ҆́бразъ , да послѣ́дꙋемъ стопа́мъ є҆гѡ̀ . и҆́же грѣха̀ несотворѝ , ни ѡ҆брѣте́сѧ ле́сть во оу҆стѣ́хъ є҆гѡ̀ . и҆́же оу҆карѧ́емъ , проти́вꙋ не оу҆карѧ́ше . стражда̀ , непреща́ше . предаѧ́ше же сꙋдѧ́щемꙋ пра́веднѡ и҆́же грѣхѝ на́ша са́мъ вознесѐ на́ тѣлѣ свое́мъ на́ древо , да ѿ грѣ́хъ и҆збы́вше , пра́вдою поживе́мъ , є҆го́же ꙗ҆́звою и҆сцѣлѣ́сте . бѣ́сте бо ꙗ҆́кѡ ѻ҆́вцы заблꙋ́ждьшїѧ не и҆мꙋ́ще па́стырѧ . но воз̾врати́стесѧ ны́нѣ к̾ па́стырю , и҆ посѣти́телю дꙋ́шъ ва́шихъ . та́кожде же и҆ жены̀ да повинꙋ́ютсѧ свои́мъ мꙋже́мъ . да и҆ а҆́ще нѣ́цыи неповинꙋ́ютсѧ сло́вꙋ , же́нскимъ житїе́мъ , бе́з̾слова плѣне́ни бꙋ́дꙋтъ . ви́дѣвше є҆́же со́ страхомъ чи́сто житїѐ ва́ше . и҆́мже да є҆́сть невне́шнѣе плете́нїе вла́съ , и҆ ѡ҆б̾ложе́нїе зла́та , и҆лѝ ѡ҆дѣѧ́нїемъ ри́зъ лѣпота̀ , но потае́ныи срⷣца чл҃къ , в̾ не и҆стлѣ́нїе кро́ткагѡ и҆ молчали́вагѡ дх҃а , и҆́же є҆́сть пре́д̾ бг҃омъ многоцѣ́ннѡ . та́кѡ бо и҆ногда̀ и҆ ст҃ы́ѧ жены̀ оу҆пова́ющїѧ на́ бг҃а , оу҆краша́хꙋ себѐ , повинꙋ́ющесѧ свои́мъ мꙋже́мъ . ꙗ҆́коже са́рра послꙋ́шаше а҆враа́ма господи́на тогѡ̀ зовꙋ́щи . є҆ѧ́же бы́сте ча́да бл҃готворѧ́ще , и҆ небоѧ́щесѧ ни є҆ди́нагѡ стра́ха . мꙋ́жїе та́кожде вкꙋ́пѣ живꙋ́ще съ свои́ми жена́ми по ра́зꙋмꙋ . ꙗ҆́кѡ немощнѣ́йшꙋ сосꙋ́дꙋ же́нскомꙋ воздаю́ще че́сть . ꙗ҆́кѡ с̾ наслѣ́дницы бл҃года́тнѣй жи́зни , во є҆́же непрекраща́тисѧ мл҃твамъ ва́шимъ . коне́цъ же , всѝ є҆диномꙋ́дрени бꙋ́дите . ми́лостиви , братолю́бцы , милосе́рди , бл҃гоꙋтро́бни , мꙋдролю́бцы , смиреномꙋ́дри . не воздаю́ще ѕла̀ за ѕло̀ , и҆лѝ досажде́нїе за досажде́нїе . сꙋпроти́вное же бл҃гословѧ́ще . вѣ́дꙋше ꙗ҆́кѡ на сѐ зва́ни бы́сте , да блгⷭ҇ве́нїе наслѣ́дите .

Ѿ собо́рнагѡ посла́нїѧ петро́ва , чте́нїе .

Воз̾лю́бленїи , хрⷭ҇тꙋ̀ пострада́вшꙋ за на́съ пло́тїю , и҆ вы̀ в̾ тꙋ́же мы́сль воѡ҆рꙋжи́тесѧ . занѐ пострада́выи пло́тїю , преста̀ ѿ грѣха̀ , во є҆́же не к̾ томꙋ̀ в̾ чл҃ческїѧ по́хоти , но в̾ во́лю бж҃їю про́чее в̾ пло́ти жи́ти вре́мѧ . довлѣ́етъ бо ва́мъ мимоше́дшее вре́мѧ житїѧ̀ , во́лю ꙗ҆зы́ческꙋю твори́ти . хо́ждьшемъ въ нечистота́хъ , въ по́хотехъ , в̾ мꙋжело́жствѣ , в̾ скотоло́жствѣ , въ помысло́хъ , въ пїѧ́нствѣ , въ козлогласова́нїихъ , въ лихои҆ма́нїи , и҆ богоме́рз̾скихъ и҆долꙋслꙋже́нїихъ . ѡ҆ не́мже дивѧ́тсѧ несходѧ́щемсѧ ва́мъ , в̾ то́же блꙋда̀ разлїѧ́нїе , хꙋ́лѧще и҆́же воздадѧ́тъ сло́во , гото́вꙋ сꙋ́щемꙋ сꙋди́ти живы́мъ и҆ ме́ртвымъ . на се́бо и҆ ме́ртвымъ бл҃говѣсти́сѧ . да сꙋ́дъ оу҆́бѡ прїи́мꙋтъ по чл҃кꙋ пло́тїю , поживꙋ́тъ же по́ бз҃ѣ дх҃омъ . всѣ́мъ же кончи́на прибли́жисѧ оу҆цѣломꙋ́дритесѧ оу҆́бѡ , и҆ трезви́тесѧ в̾ мл҃твахъ . пре́жде же всѣ́хъ ꙗ҆́же дрꙋ́гъ ко́ дрꙋгꙋ любо́вь прилѣ́жнꙋ и҆мѣ́йте . занѐ любо́вь покрыва́етъ мно́жество грѣхо́въ . люби́те стра́нныхъ , и҆ люби́тесѧ са́ми в̾ себѣ̀ без̾ ропта́нїѧ . ко́ждо ꙗ҆́коже прїѧ́тъ дарова́нїе междꙋ̀ себѐ сїѐ слꙋжа́ще , ꙗ҆́кѡ до́брїи строи́телїе разли́чнѣй бл҃года́ти бж҃їи . а҆́ще кто̀ гл҃етъ , ꙗ҆́кѡ словеса̀ бж҃їѧ . а҆́ще кто̀ слꙋ́житъ , ꙗ҆́кѡ ѿ крѣ́пости , ꙗ҆́коже пода́стъ бг҃ъ . да ѡ҆ все́мъ сла́витсѧ бг҃ъ , і҆с҃ъ хрⷭ҇то́мъ , є҆мꙋ́же є҆́сть сла́ва и҆ держа́ва во́ вѣки вѣко́мъ , а҆ми́нь .

На литі́и , стихѣ́ры . гла́съ , а҃ . Первозва́нныи оу҆чени́къ , и҆ подо́бникъ стра́сти , соѡ҆бразꙋ́емь тебѣ̀ гдⷭ҇и , а҆ндре́й а҆пⷭ҇лъ . и҆́же въ глꙋбинѣ̀ невѣ́денїѧ прельща́емыѧ и҆ногда̀ , оу҆́дицею крⷭ҇та̀ твоегѡ̀ , воз̾вле́къ приведѐ к̾ тебѣ̀ . тѣ́мъ и҆ спа́сшесѧ вѣ́рнїи вопїе́мъ тѝ , мл҃твами є҆гѡ̀ пребла́же , жи́знь на́шꙋ оу҆мирѝ , и҆ спасѝ дш҃а на́ша . Воспое́мъ вѣ́рнїи , петро́ва сро́дника а҆ндре́ѧ . хрⷭ҇то́ва оу҆ченика̀ . то́й бо мо́ре мре́жами и҆спыта́въ и҆ногда̀ , ры́бы оу҆лови́лъ є҆́сть . ны́нѣ же вселе́ннꙋю тро́стїю оу҆ловлѧ́етъ крⷭ҇тною , и҆ ꙗ҆зы́ки ѿ ле́сти ѡ҆враща́етъ ко кр҃ще́нїю . и҆ хрⷭ҇тꙋ̀ пред̾стоѧ̀ , про́ситъ ми́ръ дш҃а́мъ на́шимъ , и҆ ве́лїю ми́лость . Ѻ҆́гнь оу҆́мныи просвѣща́ющь по́мыслы , и҆ ѡ҆палѧ́ющь грѣхѝ , внꙋ́трь прїе́мъ въ срⷣцы а҆пⷭ҇лъ хрⷭ҇то́въ и҆ оу҆чени́къ , сїѧ́етъ оу҆́бѡ та́йными лꙋча́ми оу҆че́нїи , въ ꙗ҆зы́ческихъ непросвѣще́нныхъ срⷣца́хъ , ѡ҆палѧ́етъ же па́ки сѣнови́днаѧ нечести́выхъ баснодѣѧ́нїѧ . ѻ҆́гнь бо дх҃а таково́е и҆́мать дѣ́йство . ѽ чꙋ́до стра́ннѡ , и҆ стра́шнѡ , веще́ственыи ꙗ҆зы́къ , бре́нное є҆стество̀ , тѣ́ло пе́рстное , оу҆́мныи и҆ невеще́ственыи пое́тъ ра́зꙋмъ . но ѽ таи́нниче неи҆зрече́нныхъ , зри́телю нбⷭ҇ныхъ молѝ ѡ҆зари́тисѧ дш҃а́мъ на́шимъ . гла́съ , и҃ . Жела́емаго бг҃а въ пло́ти ви́дѣвъ на землѝ ходѧ́ща , бг҃ови́дче первозва́нне , с̾кро́вникꙋ вопїѧ̀ ра́дꙋѧсѧ , ѡ҆брѣто́хомъ ѽ сѵ́мѡне жела́емаго . сп҃сꙋ же дв҃дски возопи́лъ є҆сѝ . и҆́мъ же ѻ҆́бразомъ жела́етъ є҆ле́нь на и҆сто́чники водны́ѧ , си́це жела́етъ дш҃а моѧ̀ к̾ тебѣ̀ хрⷭ҇тѐ бж҃е . тѣ́мъ и҆ жела́нїе къ жела́нїю приложи́лъ є҆сѝ . крⷭ҇та̀ ра́ди восхо́диши к̾ немꙋ̀ . є҆го́же вожжелѣ́лъ є҆сѝ , ꙗ҆́кѡ и҆́стинныи оу҆чени́къ , и҆ мꙋ́дрыи подо́бникъ бы́лъ є҆сѝ крⷭ҇то́мъ тогѡ̀ стра́сти . тѣ́мже и҆ сла́вѣ прича́стникъ є҆гѡ̀ бы́сть . прилѣ́жнѡ молѝ ѡ҆ дш҃а́хъ на́шихъ . сла́ва . гла́съ , и҃ . Проповѣ́дника вѣ́рѣ , и҆ слꙋгꙋ̀ сло́вꙋ , а҆ндре́ѧ восхва́лимъ . то́й бо и҆з̾ глꙋбины̀ чл҃ки оу҆ловлѧ́етъ , вмѣ́стѡ тро́сти крⷭ҇тъ в̾ рꙋка́хъ держа̀ . и҆ ꙗ҆́кѡ ю҆́же мета́ѧ си́лꙋ , возво́дитъ дш҃а ѿ ле́сти вра́жїѧ . и҆ прино́ситъ гдⷭ҇ви да́ръ бл҃гопрїѧ́тенъ . и҆ прⷭ҇нѡ тогѡ̀ вѣ́рнїи с̾ ли́комъ оу҆чени́къ хрⷭ҇то́выхъ восхва́лимъ . да мо́лѧтсѧ є҆мꙋ̀ , ꙗ҆́кѡ да ми́лостивъ бꙋ́детъ на́мъ в̾ де́нь сꙋ́дныи . и҆ ны́нѣ , боⷢ҇ . Влⷣчце прїимѝ мл҃твꙋ ра́бъ свои́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

На стихо́внѣ , стихѣ́ры . гла́съ , є҃ . поⷣ . ра́дꙋйсѧ живоно́сныи .= Р=а́дꙋисѧ слове́сное нб҃о , сла́вꙋ бж҃їю всегда̀ повѣ́даѧ . пе́рвыи , хрⷭ҇та̀ зовꙋ́ща послꙋ́шаѧ те́плѣ , и҆ без̾ ѿстꙋ́пнѡ с̾ ни́мъ с̾пребыва́ѧ . ѿ него́же просвѣ́щьсѧ , оу҆ви́дѣлъ є҆сѝ свѣ́тъ вторы́и . и҆ и҆́же во тмѣ̀ , мо́лнїѧми свои́ми просвѣти́лъ є҆сѝ , бл҃гости тогѡ̀ оу҆подоблѧ́ѧсѧ . тѣ́мже прест҃о́е твоѐ соверша́емъ торжество̀ . и҆ моще́й ра́кꙋ . ра́достнѡ цѣлꙋ́емъ , ѿ неѧ́же и҆сточа́еши спасе́нїе просѧ́щимъ , и҆ ве́лїю млⷭ҇ть .

сти́хъ : во всю̀ зе́млю и҆зыдо́ша вѣща́нїе и҆́хъ ,꙳ и҆ въ концы̀ вселе́нныѧ глаго́лы и҆́хъ . Пе́рвыи добродѣ́телей ѡ҆брѣта́тель , милосе́рдїѧ ра́ди на́мъ пред̾лежа́щагѡ а҆ндре́е , бг҃оразꙋ́мне є҆стество́мъ . совокꙋпи́сѧ є҆мꙋ̀ раз̾жже́ннымъ жела́нїемъ . сро́дникꙋ вопїѧ̀ , є҆го́же проповѣ́даша проро́цы въ дс҃ѣ , ѡ҆брѣто́хомъ . грѧдѝ къ є҆гѡ̀ лѣпотѣ̀ . воспое́мъ дш҃е́ю и҆ помышле́нїемъ , ꙗ҆́кѡ свѣ́томъ наставлѧ́еми , тогѡ̀ свѣтлостьмѝ . но́щь пре́лести и҆ тмꙋ̀ неразꙋ́мїѧ ѿжене́мъ . хрⷭ҇та̀ бл҃гословѧ́ще , подаю́щагѡ ми́рови ве́лїю млⷭ҇ть .

сти́хъ : нб҃са̀ повѣ́даютъ сла́вꙋ бж҃їю ,꙳ творе́нїе же рꙋ́кꙋ є҆гѡ̀ возвѣща́етъ тве́рдь . Ꙗ҆зы́ки , и҆́же невѣ́дѧщїѧ бг҃а , и҆з̾ глꙋбины̀ неразꙋ́мїѧ оу҆лови́лъ є҆сѝ , оу҆́дицею свои́хъ слове́съ , и҆ воз̾мꙋща́еши ꙗ҆́вѣ сла́ныѧ морѧ̀ . ко́нь и҆зрѧ́денъ ꙗ҆ви́лсѧ є҆сѝ влады́чествꙋющагѡ мо́ремъ , приснопа́мѧтне . и҆ тлѣ́нїе без̾бо́жїѧ и҆с̾сꙋшѝ , со́ль честнꙋ́ю вложѝ мꙋ́дрость свою̀ . є҆́йже и҆ пречꙋди́шасѧ а҆пⷭ҇ле сла́вне , бꙋ́йственѣй мꙋ́дрости без̾стꙋ́днѣ внима́ющїи , хрⷭ҇та̀ невѣ́дѧщїи , подаю́ща ми́рови ве́лїю млⷭ҇ть .

сла́ва . гла́съ , г҃ . Скро́вника петро́ва , и҆ хрⷭ҇то́ва оу҆ченика̀ , ры́бамъ хитреца̀ , и҆ ловца̀ чл҃кѡмъ , в̾ пѣ́снехъ почте́мъ а҆ндре́ѧ а҆пⷭ҇ла . і҆с҃ова оу҆́бѡ оу҆че́нїѧ всѧ̀ наказа́въ повелѣ́ньми . и҆ ꙗ҆́кѡ льще́нїе ры́бамъ , пло́ть без̾зако́ннымъ предадѐ , и҆ тѣ́хъ оу҆лови́лъ є҆́сть . тогѡ̀ мл҃твами хрⷭ҇тѐ , пода́ждь лю́демъ свои́мъ ве́лїю млⷭ҇ть .

и҆ ны́нѣ . гла́съ , то́йже . І҆ѡ́сифе рцы̀ на́мъ , ка́кѡ ѿ ст҃ы́хъ ю҆́же прїѧ́лъ є҆сѝ дв҃ꙋ непра́зднꙋ приво́диши въ виѳлее́мъ ; а҆́зъ речѐ проро́чески и҆спыта́хъ . и҆ вѣ́сть прїе́мъ ѿ а҆́нг҃ла , вѣ́рꙋю ꙗ҆́кѡ бг҃а роди́тъ мр҃і́ѧ несказа́ннѡ . є҆мꙋ́же на поклоне́нїе , волсвѝ ѿ восто́къ прїи́дꙋтъ с̾ да́ры честны́ми слꙋжа́ще . воплоти́выисѧ на́съ ра́ди , гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Ꙗ҆́кѡ а҆пⷭ҇ломъ первозва́нныи , и҆ верхо́вномꙋ и҆́стыи бра́тъ , влⷣцѣ всѣ́хъ а҆ндре́е моли́сѧ , ми́ръ вселе́ннѣй дарова́ти , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ , боⷢ҇ . И҆́же ѿ́ вѣка оу҆тае́нное , и҆ а҆́нг҃лѡмъ несвѣ́домое та́инство , тобо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи воплоща́емъ . и҆ крⷭ҇тъ во́лею на́съ ра́ди воспрїе́мъ , и҆́мъ же воскр҃сѝ первозда́ннаго , и҆ спасѐ ѿ сме́рти дш҃а на́ша .

На оу҆́трени , на бг҃ъ гдⷭ҇ь , тропа́рь , а҆пⷭ҇лꙋ , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , а҃ . Ꙗ҆́кѡ бжⷭ҇твенагѡ оу҆ченика̀ , и҆ первозва́ннаго всѣ́хъ хрⷭ҇то́выхъ оу҆чени́къ , похвалѧ́емъ тѧ̀ любо́вїю а҆ндре́е а҆пⷭ҇ле . и҆ вѣ́рнѡ вопїе́мъ тѝ , и҆зба́ви ста́до своѐ , є҆мꙋ́же ѿ́ бг҃а оу҆вѣ́рисѧ , всѧ́кїѧ печа́ли и҆ нꙋ́жды , и҆ смꙋще́нїѧ , и҆ всѧ́когѡ ѡ҆ѕлобле́нїѧ . =вⷤ . сла́ва , и҆ ны́нѣ , боⷢ҇ . Рꙋ́цѣ твоѝ чⷭ҇тнѣ́и , ны́нѣ просте́рши оу҆молѝ . по́мощь на́мъ ѿ ст҃а́гѡ пода́ждь . и҆ да́ждь без̾бѣ́днѡ житїѐ препроводи́ти , сла́вѧщимъ твоѐ прест҃о́е ржⷭ҇тво̀ . и҆ тѧ̀ влⷣчце восписꙋ́ющимъ ѻ҆трокови́це наде́ждꙋ и҆ похвалꙋ̀ .

По в҃ , стихоло́гїи , сѣда́ленъ . гла́съ , г҃ . Первозва́нна тѧ̀ ѡ҆брѣ́те хрⷭ҇то́съ , таи́нника и҆зрѧ́дна а҆ндре́е бл҃же́нне , и҆ повелѣ́нїѧ є҆гѡ̀ де́рзостнѡ проповѣ́да вселе́ннѣй ꙗ҆́коже крыла́тъ , посѣща́ѧ и҆ оу҆ча̀ ꙗ҆зы́ческаѧ раз̾стоѧ́нїѧ . тогѡ̀ ꙗ҆́кѡ бг҃а молѝ , дарова́ти на́мъ ве́лїю ми́лость . два́жды . сла́ва , и҆ ны́нѣ , боⷢ҇ . Бжⷭ҇твенаѧ бы́сть сѣ́нь сло́ва , є҆ди́на всечи́стаѧ бг҃ороди́тельнице , чистото́ю а҆́нг҃лъ превозше́дшаѧ . па́че всѣ́хъ менѐ ѡ҆скверне́на прегрѣше́ньми , ѡ҆чи́сти пречи́стаѧ всест҃а́ѧ свои́ми моли́твами , ꙗ҆́кѡ всемогꙋ́щаѧ .

по хвали́те и҆́мѧ гдⷭ҇не , припѣ́в̾ : Велича́емъ тѧ̀ а҆пⷭ҇ле хрⷭ҇то́въ а҆ндре́е . и҆ чте́мъ болѣ́зни и҆ трꙋды̀ твоѧ̀ , и҆́миже трꙋди́сѧ во бл҃говѣ́стїи хрⷭ҇то́вѣ . ѱл҃о́мъ и҆збра́нныи : нб҃са̀ повѣ́даютъ сла́вꙋ .

По полїєлеѡ́сѣ , сѣда́ленъ . гла́съ , є҃ . А҆пⷭ҇ла всѝ восхва́лимъ , ꙗ҆́кѡ самови́дца сло́вꙋ , и҆ бжⷭ҇твенаго проповѣ́дника , и҆ ꙗ҆зы́кѡмъ дх҃о́внагѡ лови́телѧ , ꙗ҆́кѡ вои́стинꙋ . и҆́же приведѐ на́съ в̾ позна́нїе хрⷭ҇та̀ а҆ндре́й бг҃оглаго́ливыи , ве́лїи сы́й на́шъ пред̾ста́тель . и҆ нн҃ѣ мо́литъ без̾преста́ни , во є҆́же спастѝ дш҃а на́ша . два́жды . сла́ва , и҆ ны́нѣ , боⷢ҇ . И҆́же твоѐ оу҆пова́нїе дв҃о чⷭ҇таѧ непосты́днѡ и҆мѣ́ющимъ , покро́въ сꙋ́щи , ѿ разли́чныхъ и҆скꙋше́нїй , и҆ ѡ҆б̾стоѧ́нїи , и҆ ѿ бѣ́дъ лю́тыхъ свободѝ на́съ , молѧ́щи сн҃а своегѡ̀ со а҆пⷭ҇лы є҆гѡ̀ . и҆ спасѝ всѣ́хъ воспѣва́ющихъ тѧ̀ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ давы́довъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ . сти́х̾ . нб҃са̀ повѣ́даютъ сла́вꙋ бж҃їю , творе́нїе же рꙋ́кꙋ є҆гѡ̀ возвѣща́етъ тве́рдь . всѧ́ко дыха́нїе . є҆ѵⷢ҇а́лїе , ѿ матѳе́ѧ . заⷱ҇ , ѳ҃ . ѱл҃о́мъ , н҃ .

сла́ва . моли́твъ ра́ди а҆пⷭ҇ла , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , и҃ . Проповѣ́дника вѣ́рѣ , и҆ слꙋгꙋ̀ сло́вꙋ , а҆ндре́ѧ восхва́лимъ . то́й бо и҆з̾ глꙋбины̀ чл҃ки оу҆ловлѧ́етъ , вмѣ́стѡ тро́сти крⷭ҇тъ в̾ рꙋка́хъ держа̀ . и҆ ꙗ҆́кѡ ю҆́же мета́ѧ си́лꙋ , возво́дитъ дш҃а ѿ ле́сти вра́жїѧ . и҆ прино́ситъ гдⷭ҇ви да́ръ бл҃гопрїѧ́тенъ . и҆ прⷭ҇нѡ тогѡ̀ вѣ́рнїи с̾ ли́комъ оу҆чени́къ хрⷭ҇то́выхъ восхва́лимъ . да мо́лѧтсѧ є҆мꙋ̀ , ꙗ҆́кѡ да ми́лостивъ бꙋ́детъ на́мъ в̾ де́нь сꙋ́дныи .

Кано́нъ , бцⷣѣ , со і҆рмосо́мъ , на́ ѕ҃ . и҆ ст҃о́мꙋ два̀ кано́на , на и҃ . кано́нъ , а҆пⷭ҇лꙋ . гла́съ , а҃ . пѣ́снь , а҃ . і҆рмо́съ . Твоѧ̀ побѣди́тельнаѧ десни́ца , бг҃олѣ́пнѡ в̾ крѣ́пости просла́висѧ . та́ бо без̾сме́ртне всемогꙋ́щаѧ проти́вныѧ сотрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́въ : Ст҃ы́и а҆пⷭ҇ле а҆ндре́е , молѝ бг҃а ѡ҆ на́съ .= Смꙋще́нꙋю мѝ дꙋ́шꙋ , помышле́нїи же и҆ словесы̀ , ѡ҆чи́сти все́льшеюсѧ в̾ тѧ̀ , проповѣ́дателю хрⷭ҇то́въ а҆ндре́е бжⷭ҇твеною бл҃года́тїю . ꙗ҆́кѡ да чи́стѣ тѝ и҆сточꙋ̀ пѣ́сней во́ды . Честны́и прⷣтча хрⷭ҇то́въ , свои́хъ оу҆чени́къ верхо́внагѡ , и҆́же ѿ непло́днагѡ чре́ва вѣ́твь , ѿ дв҃ы ро́ждьшемꙋсѧ хрⷭ҇тꙋ̀ , препросла́вленагѡ а҆ндре́ѧ , ра́дꙋѧсѧ приведѐ . Жела́нїемъ и҆ любо́вїю не оу҆кло́нною , добродѣ́тельныхъ степе́нь наче́нъ , и҆ восхожде́нїю при́снѡ поꙋча́ѧсѧ , ѿ хꙋды́ѧ си́лы к̾ верхо́внѣй а҆ндре́е си́лѣ пости́же . =боⷢ҇ . Радꙋисѧ бл҃года́тныѧ и҆сто́чниче . ра́дꙋисѧ лѣ́ствице , и҆ две́ре нбⷭ҇наѧ . ра́дꙋисѧ свѣ́щниче , и҆ рꙋ́чко злата́ѧ , и҆ горо̀ несѣко́маѧ , ꙗ҆́же жизнода́вца хрⷭ҇та̀ ми́рови ро́ждьшаѧ .

и҆́нъ , кано́нъ , а҆пⷭ҇лꙋ . гла́съ , то́йже . пѣ́снь , а҃ . і҆рмо́съ . Столпо́мъ ѻ҆́гненнымъ и҆ ѻ҆́блакомъ , і҆и҃лѧ наста́влъ ꙗ҆́кѡ бг҃ъ , мо́ре разве́ргъ , ѻ҆рꙋ́жїе же фараѡ́не глꙋбино́ю покры́въ . пое́мъ ти пѣ́снь побѣ́днꙋю ꙗ҆́кѡ просла́висѧ .

запѣ́въ : Ст҃ы́и а҆пⷭ҇ле а҆ндре́е , молѝ бг҃а ѡ҆ на́съ .= Тро́стїю є҆ѵⷢ҇а́лїѧ , ѿ глꙋбины̀ пре́лести и҆зе́мъ , а҆ндре́е многопѣ́тыи , оу҆лови́лъ є҆сѝ лю́ди , ꙗ҆́коже повелѣ̀ тѝ хрⷭ҇то́съ . и҆́же наꙋчи́выи тѧ̀ чл҃къ , ꙗ҆́кѡ ры́бы оу҆ловлѧ́ти . И҆́же вѣ́рѣ сто́лпъ , сѣда́лище и҆́стинныхъ догма́тъ хрⷭ҇то́выхъ , а҆ндре́й бг҃одх҃нове́нныи , всѧ̀ дне́сь призыва́етъ земны́ѧ концы̀ , пра́зднество лѣ́тное соста́вити . стеце́мсѧ оу҆́бѡ всѝ вѣ́рнїи . Морска́гѡ ки́та мре́жами и҆спыта́ѧ , хꙋдо́жествомъ лови́тель , сѣ́тїю дх҃о́вною , ꙗ҆зы́къ племена̀ и҆ лю́ди оу҆ловлѧ́еши дх҃омъ ꙗ҆́вственѡ . вы́шнюю глꙋбинꙋ̀ многочꙋ́днѣ ѿкрыва́ѧ тѣ́мъ . Та́йнѡ гра́дче , самови́дче и҆ ри́торе неи҆зрече́ннагѡ позна́нїѧ хрⷭ҇то́ва , и҆́же воспрїе́мыи свы́ше дх҃а ст҃а́гѡ гл҃юща , во ꙗ҆зы́цѣхъ сѣдѧ́щагѡ , ѻ҆гне́мъ раздѣлѧ́юща дарова́нїѧ , молѝ спасти́сѧ на́мъ . сла́ва , трⷪ҇ченъ . Пребезнача́льныѧ трⷪ҇цы , є҆ди́ницѣ пресꙋ́щественнѣй вѣ́рою покланѧ́юсѧ , нераз̾сѣца́ѧ бжⷭ҇тва̀ . є҆́сть бо є҆диноѡ҆бра́зна , проста̀ , нераздѣ́льна . совокꙋплѧ́ю же є҆ѧ̀ сꙋщество́мъ . ли́цы же вѣ́рнѣ раздѣлѧ́ю . =и҆ ны́нѣ , боⷢ҇ . Младе́нствꙋетъ бг҃ъ ѿ дв҃ы , и҆ ѡ҆бновлѧ́етъ растлѣ́вшихсѧ ѿ а҆да́ма , и҆ разрꙋша́етъ средостѣ́нїе , и҆ вражды̀ прегражде́нїе , въ пло́ти свое́й . клѧ́твꙋ бл҃гословлѧ́етъ прама́тернюю , ѿ чи́стыѧ мт҃ре прои҆зше́дъ .

катава́сїѧ : Хрⷭ҇то́съ ражда́етсѧ сла́вите . хрⷭ҇то́съ с̾ нб҃сѐ срѧ́щите , хрⷭ҇то́съ на землѝ воз̾носи́тесѧ . по́йте гдⷭ҇ви всѧ̀ землѧ̀ , и҆ весе́лїемъ воспо́йте лю́дїе , ꙗ҆́кѡ просла́висѧ .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немощно́е , и҆ млⷭ҇тивно внѐ ѡ҆болкі́исѧ , препоѧ́ши мѧ с̾вы́ше си́лою , воспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃колю́бче . Притечѐ жа́ждею незва́нъ а҆ндре́е , но свои́мъ и҆з̾воле́нїемъ , к̾ живо́тномꙋ и҆сто́чникꙋ , ꙗ҆́кѡ є҆ле́нь . и҆ всѣ́мъ сегѡ̀ ѡ҆брѣ́тъ проповѣ́да . и҆ пи́въ , напои́лъ є҆сѝ нетлѣ́нными вода́ми , и҆ста́ѧвшїѧ жа́ждею концы̀ . Мре́жею слове́сною , и҆з̾ глꙋбины̀ пре́лести оу҆лови́лъ є҆сѝ слове́сныѧ ры́бы а҆пⷭ҇ле . и҆ трапе́зѣ хрⷭ҇то́вѣ сне́дь честнꙋ́ю принесѐ , просвѣще́нꙋ бл҃года́тїю , ꙗ҆́вльшагосѧ плотны́мъ подо́бїемъ . Оу҆вѣ́дѣ є҆сте́ственыѧ зако́ны а҆ндре́е достосла́вне . и҆ прїо́бщника сро́дника прїе́мъ , вопїѧ̀ , ѡ҆брѣто́хомъ жела́емаго и҆ пꙋ́ть сотвори́вшемꙋ плотно́е рожде́нїе , проповѣ́да ра́зꙋмъ дх҃о́вныи . боⷢ҇ . Ѻ҆́блакъ тѧ̀ ле́гкїи нело́жнѡ дв҃о и҆мѧнꙋ́емъ , прⷪ҇ро́ческимъ послѣ́дꙋюще бесѣ́дамъ . прїи́де бо натѧ̀ гдⷭ҇ь , низ̾ложи́ти є҆гѵ́петскаѧ преле́стнаѧ рꙋкотворе́нїѧ , и҆ просвѣти́ти си́мъ слꙋжа́щих̾ .

и҆́нъ , і҆рмо́съ . Да оу҆тверди́тсѧ срⷣце моѐ в̾ во́ли твое́й хрⷭ҇тѐ бж҃е , и҆́же над̾ вода́ми нб҃о оу҆тверже́и второ́е , и҆ ѡ҆снова́выи на вода́хъ зе́млю всемогі́и . Сло́вомъ призыва́ющемꙋ , грѧдѝ по мнѣ̀ . хрⷭ҇тꙋ̀ а҆́бїе послѣ́дова , со а҆ндре́емъ и҆ ки́фа , роди́тели ѡ҆ста́вивше , и҆ корабле́цъ , и҆ мре́жи , ꙗ҆́кѡ вѣ́рѣ пред̾лага́тели . Ка́пища претвори́въ , в̾ до́мы бж҃їѧ всече́стне , ѡ҆свѧти́лъ є҆сѝ в̾ ни́хъ сн҃ы кр҃ще́нїѧ . и҆́хже бл҃года́ть ѡ҆бновѝ водо́ю и҆ дх҃омъ . Би́сера многоцѣ́ннагѡ , та́йнѣ ми́рꙋ пред̾ложи́лъ є҆сѝ , се́рдца твоегѡ̀ села̀ сокрове́ннагѡ а҆пⷭ҇ле . є҆го́же вѣ́рою стѧжа́ша ꙗ҆зы́цы ѡ҆брѣ́тшїи . Ꙗ҆́кѡ сокро́вище є҆ѵⷢ҇а́лїе , в̾ рꙋцѣ̀ прїи́мъ многопѣ́тыи , всю̀ ѡ҆богати́лъ є҆сѝ зе́млю , бжⷭ҇твенымъ проповѣ́данїемъ . тѣ́мже и҆ па́мѧть твою̀ почита́емъ , с̾ по́двиги твои́ми . сла́ва , трⷪ҇ченъ . И҆́же въ трⷪ҇цѣ є҆ди́нꙋ си́лꙋ , правосла́внѣ всѝ воспое́мъ , без̾нача́льнагѡ , несозда́ннагѡ бг҃а , є҆диносꙋ́щнагѡ , сопрⷭ҇то́льнагѡ , трїипоста́снагѡ , трисл҃нчнагѡ , сїю̀ восхвалѧ́юще . и҆ ны́нѣ , боⷢ҇ . Всѧ́ка оу҆́бѡ мт҃и ча́до ро́ждьши , дв҃ствовати к̾ томꙋ̀ немо́жетъ . ты́ же ро́ждьши хрⷭ҇та̀ мт҃и и҆ дв҃а пребыла̀ є҆сѝ . млеко́мъ воспита́вши живо́тъ на́шъ , чиста̀ пребы́вши .

катава́сїѧ : Первовѣ́чномꙋ ѿ ѻ҆ц҃а рожде́нꙋ нетлѣ́ннѡ сн҃ꙋ , и҆ въ послѣ́днѧѧ ѿ дв҃ы , воплоще́нꙋ без̾ сѣ́мене , хрⷭ҇тꙋ̀ бг҃ꙋ возопїе́мъ , воз̾дви́гнꙋвыи ро́гъ на́шъ ст҃ъ є҆сѝ гдⷭ҇и .

сѣда́ленъ . гла́съ , и҃ . Ꙗ҆́кѡ первозва́ннаго всѝ оу҆ченика̀ самови́дца сло́вꙋ и҆ слꙋгꙋ̀ , а҆ндре́е а҆пⷭ҇ле по́долгꙋ чте́мъ тѧ . и҆́бо а҆́гньцꙋ взе́млющемꙋ ми́рꙋ прегрѣше́нїѧ , несꙋмѣ́нною вѣ́рою . те́плѣ послѣ́довалъ є҆сѝ . тѣ́мъ и҆ стра́сти на́съ ра́ди во́лею пострада́вшагѡ , подража́тель ꙗ҆ви́сѧ . сегѡ̀ ра́ди вопїе́мъ тѝ , молѝ хрⷭ҇та̀ бг҃а , грѣхо́въ ѡ҆ставле́нїе пода́ти , чтꙋ́щимъ любо́вїю ст҃ꙋ́ю па́мѧть твою̀ . и҆́нъ , сѣда́ленъ . И҆́дольскаѧ шата́нїѧ низ̾ложи́въ , спа́совѣ стра́сти воз̾желѣ́въ , а҆ндре́е бл҃же́нне . ꙗ҆ви́сѧ ми́рꙋ всемꙋ̀ , с̾ нб҃сѐ и҆сточа́ѧ чꙋдеса̀ . ꙗ҆зы́кѡмъ бы́въ оу҆чи́тель всебл҃же́нне . тѣ́мъ твою̀ па́мѧть досто́йнѡ чтꙋ́ще пѣ́сньми сла́вимъ , и҆ вѣ́рою велича́емъ гдⷭ҇нь а҆пⷭ҇ле . молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . сла́ва , и҆ ны́нѣ , боⷢ҇ . Ра́дꙋисѧ престо́ле , ѻ҆гнеѡ҆бра́зныи бж҃їи . ра́дꙋисѧ ѻ҆трокови́це , сѣда́лище црⷭ҇кое . ло́же , преи҆спещре́нно по́стланое . ѕла́то порфи́рныи черто́же , ри́за лꙋчецвѣ́тнаѧ . оу҆кра́шенныи ѻ҆́бразъ , молнено́сное ѻ҆рꙋ́жїе . свѣти́льникъ многосвѣ́тлыи . ра́дꙋисѧ бцⷣе , дванадесѧтостѣ́нныи гра́де , и҆ две́рь ѕлатокова́ннаѧ , и҆ пола́то свѣтоѡ҆бра́знаѧ . свѣтлопоѕлаще́ннаѧ трапе́зо , бг҃оꙋкра́шеннаѧ сѣ́нь . ра́дꙋисѧ сла́внаѧ невѣ́сто , сл҃нца ка́плющаѧ . ра́дꙋисѧ є҆ди́на дш҃и мое́й бл҃голѣ́пїе .

пѣ́снь , д҃ . і҆рмо́съ . Го́рꙋ тѧ бл҃года́тїю бж҃їею присѣ́ннꙋ , прозорли́выма а҆вва́кꙋмъ оу҆смотри́въ ѻ҆чи́ма , и҆з̾ тебѐ и҆зы́ти і҆и҃леви , провоз̾глаша́ше ст҃а́гѡ , на спасе́нїе на́ше и҆҆ ѡ҆бновле́нїе . Бжⷭ҇твенаѧ потреби́тельнаѧ , ꙗ҆́же го́ршагѡ , вседѣ́тельнаѧ и҆ свѣтоза́рнаѧ , дх҃о́внаѧ си́ла в̾ тѧ̀ а҆ндре́е все́льшисѧ бг҃олѣ́пнѡ , ѻ҆́гненымъ ꙗ҆зы́кѡмъ , неи҆зрече́нныхъ показа́ тѧ проповѣ́дателѧ . Не ѻ҆рꙋ́жїѧ ѿмще́нїю взѧ́тъ плотьска́ѧ , на потребле́нїе лю́тыхъ оу҆твержде́нїи вра́жїихъ , а҆ндре́е всече́стне . но хрⷭ҇то́мъ ѡ҆гради́всѧ , плѣни́въ ꙗ҆зы́ки в̾ послꙋша́нїе . Го́рꙋ тѧ ка́плющꙋ разꙋ́мное весе́лїе , преє҆сте́ственыи бг҃ъ , ѡ҆сꙋ́ществивыисѧ є҆́же ѡ҆ на́съ а҆ндре́е ꙗ҆вѝ . го́ры го́рскїѧ бѣсо́вскагѡ воз̾ноше́нїѧ , потреблѧ́ющꙋ си́лою дх҃о́вною . Любо́вїю соверша́ющимъ твою̀ па́мѧть пѣ́сньми , ѡ҆би́льна да́ра оу҆чи́телѧ своегѡ̀ хрⷭ҇та̀ , а҆ндре́е всебога́те , дх҃о́внагѡ весе́лїѧ во́ды и҆сполнѧ́ѧ , непреста́й мл҃твами сѝ .= боⷢ҇ . П=ое́мъ ве́лїе и҆ стра́шное твоѐ та́инство . преми́рныхъ бо оу҆таи́всѧ чинонача́лїи , на тѧ̀ сы́и сни́де ꙗ҆́кѡ до́ждь на рꙋно̀ препѣ́таѧ , на спасе́нїе на́ше и҆ ѡ҆бновле́нїе .

и҆́нъ , і҆рмо́съ . Дх҃омъ пред̾зрѧ̀ пррⷪ҇къ а҆вва́кꙋмъ , словесѐ воплоще́нїе проповѣ́даше глаго́лѧ , внегда̀ прибли́жатсѧ лѣ́та позна́нъ бꙋ́деши . внегда̀ прїи́детъ вре́мѧ ꙗ҆ви́шисѧ , сла́ва си́лѣ твое́й гдⷭ҇и . Мре́жи своѧ̀ пове́рже , и҆ взе́мъ крⷭ҇тъ , пꙋте́мъ послѣ́довалъ є҆сѝ зовꙋ́щемꙋ хрⷭ҇тꙋ̀ . и҆ сѣ́ть дх҃о́внꙋю распросте́ръ , вмѣ́стѡ ры́бъ чл҃ки ло́виши . сла́ва да́вшемꙋ тѝ крѣ́пость . Дх҃о́вныи пла́мень ꙗ҆зы́кѡмъ воспрїи́мъ , бы́сть а҆пⷭ҇ле бг҃опрїѧ́тенъ мꙋ́жь . нбⷭ҇ныхъ красо́тъ преходѧ̀ , и҆ ꙗ҆́же в̾ си́хъ мы́сленныѧ наꙋча́ѧсѧ красоты̀ , и҆ на́мъ ѿкрыва́ѧ сїѧ̀ . Пꙋсты́ню жа́ждꙋщꙋю напои́лъ є҆сѝ премꙋ́дре , бжⷭ҇твеными словесы̀ свои́ми . и҆ показа́лъ є҆сѝ сїю̀ многопло́днꙋ , ча́да цр҃ко́внаѧ плодоносѧ́щꙋ , проповѣ́данїѧ сѣ́мѧ сла́ва да́вшемꙋ ти премꙋ́дрость . Неи҆сповѣ́димꙋю твою̀ красотꙋ̀ а҆ндре́й прови́дѣ і҆с҃е , сро́дника призва̀ свѣ́тлѣ . пе́тре є҆динокро́вне ѡ҆брѣто́хомъ месі́ю , и҆́же зако́номъ и҆ пррⷪ҇ки проповѣ́даннагѡ , грѧдѝ , прелепи́мсѧ сꙋ́щемꙋ животꙋ̀ . сла́ва , трⷪ҇ченъ . Трⷪ҇цꙋ є҆ди́ницꙋ , воспое́мъ вѣ́рнїи во є҆ди́номъ бжⷭ҇твѣ̀ . ѻ҆ц҃а и҆ сн҃а и҆ дх҃а бжⷭ҇твенагѡ . сꙋщество̀ є҆ди́но , и҆ є҆стество̀ нераздѣ́льно , неразлꙋ́чно . є҆ди́нъ бо въ тре́хъ ли́цѣхъ бг҃ъ . и҆ ны́нѣ , боⷢ҇ . Є҆ди́наго ѿ трⷪ҇цы , неи҆зрече́ннѡ во́ чревѣ прїе́мши , родила̀ є҆сѝ нетлѣ́ннѡ ꙗ҆́кѡ сн҃а и҆ бг҃а . и҆ трⷪ҇ца оу҆́бѡ приложе́нїѧ всѧ́чески не и҆мѣ̀ , и҆ чиста̀ , ꙗ҆́коже бѣ̀ и҆ пре́жде ржⷭ҇тва̀ дв҃а бг҃омт҃и пребы́сть .

катава́сїѧ : Же́ѕлъ и҆з̾ ко́рене і҆єссе́ѡва , и҆ цвѣ́тъ ѿ негѡ̀ хрⷭ҇тѐ ѿ дв҃ы прозѧ́блъ є҆сѝ , и҆з̾ горы̀ хва́льныѧ присѣ́нныѧ ча́сты прїи́де вопло́щьсѧ , ѿ без̾мꙋ́жныѧ беспло́тныи бг҃ъ , сла́ва си́лѣ твое́й гдⷭ҇и .

пѣ́снь , є҃ . і҆рмо́съ . Просвѣще́й сїѧ́нїемъ прише́ствїѧ твоегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ концы̀ , срⷣца̀ просвѣтѝ свѣ́томъ твоегѡ̀ бг҃оразꙋ́мїѧ , правовѣ́рнѡ хва́лѧщимъ тѧ . Прїѧ́лъ є҆сѝ є҆го́же воз̾желѣ̀ , а҆ндре́е всехва́льне . въ нетлѣ́нныѧ съ ни́мъ вше́дъ ѻ҆би́тели , болѣ́зненыѧ рꙋкоѧ́ти своѧ̀ пожа́въ досто́йнѡ . тѣ́мже тѧ̀ пѣ́сньми сла́вимъ . Напрѧ́гъ тѧ̀ ꙗ҆́кѡ стрѣ́лꙋ си́льнꙋ бл҃же́нне , пꙋстѝ в̾ ве́сь ми́ръ гдⷭ҇ь , ѡ҆стрꙋплѧ́ѧ бѣ́совы . и҆ ѕловѣ́рїемъ чл҃ки ѡ҆стрꙋпле́ныѧ и҆сцѣлѧ́ѧ .= Возлюби́лъ є҆сѝ влⷣкꙋ . и҆ вслѣ́дъ тогѡ̀ погна́въ сто́пъ , к̾ животꙋ̀ наставлѧ́ющихъ и҆ тогѡ̀ стра́сти нело́жно прече́стне а҆ндре́е , да́же до сме́рти подража́ѧ . =боⷢ҇ . Приноше́нїѧ вѣ́рнѡ приносѧ́щихъ препѣ́таѧ непре́зри . но прїимѝ , и҆ сїѧ̀ принесѝ сн҃ꙋ своемꙋ̀ чи́стаѧ , бг҃ꙋ є҆ди́номꙋ бл҃года́телю . тѧ́ бо застꙋ́пницꙋ и҆́мамы .

и҆́нъ , і҆рмо́съ . Ѡ҆зарѝ на́шъ оу҆́мъ бж҃е , свѣ́томъ заповѣде́й твои́хъ . и҆ мно́жество бл҃года́ти твоеѧ̀ , да́рꙋй на́мъ бж҃е твоѧ̀ млⷭ҇ти . занѐ свѣ́тъ и҆ ми́ръ повелѣ́нїѧ твоѧ̀ . Воз̾желѣ́выи крⷭ҇та̀ хрⷭ҇то́въ оу҆ченичѐ , полꙋчи́лъ є҆сѝ крⷭ҇то́мъ свои́мъ нетлѣ́нное црⷭ҇тво , и҆́мже мно́гихъ привле́клъ є҆сѝ . и҆ мзды̀ наслѣ́дство по́далъ є҆́сть ва́мъ бг҃осло́вомъ свои́мъ . Взыска́лъ є҆сѝ хрⷭ҇та̀ сꙋ́щагѡ живота̀ . и҆ и҆скі́и и҆́щꙋща , пе́рвый ѡ҆брѣ́лъ є҆сѝ , и҆ ѡ҆брѣ́тъ та́йнѣ прите́клъ є҆сѝ , и҆ бы́сть сокро́вище живота̀ нетлѣ́ннагѡ . Гл҃ы твои́хъ бжⷭ҇твеныхъ гремѣ́нїи и҆з̾лїѧ́шасѧ в̾ ми́рѣ . и҆ ѿ коне́цъ до конца̀ землѝ проидо́ша . ѡ҆быдо́ша бо ꙗ҆́коже ко́ло , и҆ ꙗ҆ви́шасѧ твоѧ̀ мо́лнїѧ , ꙗ҆́коже глаго́летъ дв҃дъ вселе́ннѣй . Помина́й на́съ хрⷭ҇то́въ оу҆ченичѐ , соверша́ющихъ твою̀ па́мѧть . и҆ чтꙋ́щихъ мо́щи твоѧ̀ моли́сѧ при́снѡ прилѣ́жнѡ ѡ҆ ста́дѣ , є҆мꙋ́же бы́лъ є҆сѝ и҆з̾ нача́ла храни́тель и҆ спасе́нїе . сла́ва , трⷪ҇ченъ . Ѻ҆ц҃а и҆ сн҃а и҆ дх҃а , нераздѣли́мꙋю трⷪ҇цꙋ трїипоста́снагѡ бжⷭ҇тва̀ , просла́вимъ согла́снѡ вѣ́рнїи , без̾преста́нными бг҃осло́вїи тогѡ̀ вѣ́рнѡ пѣсносло́вѧще . и҆ ны́нѣ , боⷢ҇ . Родила̀ є҆сѝ свѣ́тъ невѣ́дѧщи ка́кѡ . всесвѣ́тлыи свѣти́льниче , сл҃нца свѣ́тъ носѧ́щаѧ . и҆ была̀ є҆сѝ невеще́ственагѡ свѣ́та но́вое прїѧ́телище , и҆стоща́юща все́й землѝ бг҃оразꙋ́мїѧ лꙋчѝ .

катава́сїѧ : Бг҃ъ сы́и ми́ра , ѻ҆ц҃ъ щедро́тамъ , вели́кагѡ совѣ́та ти а҆́нг҃ла , ми́ръ подава́юща , посла́лъ є҆сѝ на́мъ . тѣ́мъ бг҃оразꙋ́мїѧ к̾ свѣ́тꙋ наставлѧ́еми , ѿ́ нощи оу҆́тренююще , славосло́вимъ тѧ̀ чл҃колю́бче .

пѣ́снь , ѕ҃ . і҆рмо́съ . Ѡ҆бы́де на́съ послѣ́днѧѧ бе́здна , нѣ́сть и҆҆збавлѧ́ѧи , в̾мѣни́хомсѧ ꙗ҆́кѡ ѻ҆вча̀ на заколе́нїе , спасѝ лю́ди своѧ̀ бж҃е на́шъ . ты́ бо крѣ́пость немощны́мъ и҆҆ и҆҆справле́нїе . Мо́ре жите́йское препла́ваѧ в̾ кораблѝ тѣле́снѣмъ , всѧ́ческаѧ содержа́щаго хрⷭ҇та̀ ѡ҆брѣ́те ко́рмчїѧ всебл҃же́нне . и҆ к̾ немꙋ̀ ра́дꙋѧсѧ приста̀ , а҆ндре́е всече́стне . Ꙗ҆́кѡ волна̀ ти́химъ и҆ кро́ткимъ дх҃омъ подвиза́емь бл҃же́нне , и҆з̾сꙋши́лъ є҆сѝ мо́рѧ лꙋка́ваѧ многобо́жїѧ , бжⷭ҇твеными стрꙋѧ́ми . и҆ рѣ́ки бг҃оразꙋ́мїѧ всѣ́мъ и҆сточи́лъ є҆сѝ . Дꙋ́си сло́вомъ ѿгонѧ́ютсѧ , недꙋ́зи бѣжа́тъ . дш҃е́вныхъ же стрⷭ҇те́й мно́жество , далечѐ ѿ недꙋ́жныхъ ѿгонѧ́ютсѧ , да́нною тѝ бг҃омъ а҆ндре́е бл҃года́тїю . боⷢ҇ . Веселѧ́тсѧ ѡ҆ тебѣ̀ дв҃о пречⷭ҇таѧ ро́да на́шегѡ пра́ѻ҆ц҃ы , є҆де́ма воспрїе́мше тобо́ю , є҆го́же престꙋпле́нїемъ погꙋби́ша . ты́ бо чиста̀ , пре́жде ржⷭ҇тва̀ и҆ по ржⷭ҇твѣ̀ є҆сѝ .

и҆́нъ , і҆рмо́съ . Пррⷪ҇кꙋ і҆ѡ́нѣ подо́бѧсѧ вопїю̀ , живо́тъ мо́й бла́же , свободѝ и҆з̾ тлѝ , и҆ спаси́ мѧ сп҃се ми́ра зовꙋ́ща сла́ва тебѣ̀ . И҆́же ѿ виѳсаи́ды приводѧ́и на́съ , пра́здновати созыва́етъ , торжества̀ пред̾ложѝ на́мъ ѻ҆бѣ́дъ боре́нїѧ є҆гѡ̀ . И҆́же хꙋдо́жествомъ лови́тель , вѣ́рою оу҆чени́къ , ꙗ҆́кѡ глꙋбинꙋ̀ и҆спыта́ѧ , срⷣца̀ вѣ́рныхъ оу҆́дицею и҆з̾влачи́тъ сло́ва , и҆ оу҆ловлѧ́етъ и҆́хъ . Любвѐ хрⷭ҇то́вы в̾ срⷣцы твое́мъ ѻ҆́гнь , ѡ҆бносѧ̀ оу҆ченичѐ , вопїѧ̀ ꙗ҆зы́кѡмъ , пла́мень ва́шъ оу҆гасѐ , и҆́стинѣ ꙗ҆́вльшꙋсѧ хрⷭ҇тꙋ̀ . И҆́же со́лїю ра́зꙋма принесо́ша хрⷭ҇тꙋ̀ хлѣ́бы ва́ша , наслади́ша ва́съ веле́нїѧ нбⷭ҇ныѧ , и҆ нетлѣ́емаѧ пи́ща . сла́ва , трⷪ҇ченъ . Ѻ҆ц҃ꙋ и҆ сн҃ꙋ и҆ дх҃ꙋ , и҆́стиннѡ поклони́мсѧ вѣ́рнїи , трїипоста́сномꙋ є҆стествꙋ̀ , нераздѣли́момꙋ , вопїю́ще , сла́ва въ трⷪ҇цѣ бг҃ꙋ . и҆ ны́нѣ , боⷢ҇ . Бл҃говоле́нїемъ ѻ҆́ч҃имъ , вопло́щьсѧ сн҃ъ дх҃омъ бж҃їимъ , во оу҆тро́бѣ твое́й чи́стаѧ , и҆ спасѐ дре́внїи ѻ҆́бразъ , бг҃ороди́тельнице ꙗ҆́вѣ .

катава́сїѧ : Оу҆тро́ба і҆ѡ́нꙋ младе́нца невредѝ , морскі́и ѕвѣ́рь , і҆а́кѡва прїѧ́тъ . въ дв҃цꙋ оу҆́бѡ все́льсѧ сло́во , и҆ пло́ть прїи́мъ , про́йде сохранѝ неи҆стлѣ́ннꙋ . и҆́же бо непострада̀ и҆стлѣ́нїѧ , ро́ждьшꙋю сохранѝ неврежде́ннꙋ .

конда́къ . гла́съ , в҃ . И҆́же мꙋ́жествꙋ тезои҆мени́таго бг҃огла́сника , и҆ цр҃кви побо́рника а҆пⷭ҇ла верхо́внаго , петро́ва сро́дника восхва́лимъ , занѐ ꙗ҆́коже томꙋ̀ дре́вле , и҆ на́мъ ны́нѣ взыва́етъ , прїиди́те ѡ҆брѣто́хомъ жела́емаго . и҆́косъ . Свы́ше оу҆́бѡ давы́дъ воз̾ставлѧ́етъ . грѣ́шнагѡ ꙗ҆́кѡ менѐ , и҆сповѣ́дати бж҃їѧ , бг҃ослове́сно ѡ҆правда́нїѧ . ѡ҆ба́че к̾ вѣ́рѣ оу҆чи́тъ па́ки , и҆ слеза́ми мно́гими и҆сповѣ́дати . дне́сь бо гла́съ є҆гѡ̀ а҆́ще оу҆слы́шите , срⷣца̀ не ѡ҆жести́те , ꙗ҆́коже нѣ́когда і҆и҃ль , преѡ҆горчѝ . прино́ситъ оу҆́бѡ про́чее ѱалма̀ , гдⷭ҇ви всѧ̀ землѧ̀ воспо́йте . ѡ҆брѣто́хомъ жела́емаго .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смотрѧ́емъ вѣ́рнїи , ꙗ҆́коже бо ѻ҆́троки спасѐ трѝ превозноша́емыи , ми́ръ ѡ҆бнови́лъ є҆́сть , во́ чревѣ твое́мъ соверше́нъ , восхвалѧ́емыи ѻ҆ц҃е́мъ бг҃ъ и҆҆ препросла́вленъ . Нело́жнѡ ꙗ҆́вственѡ и҆спо́лнисѧ ѡ҆бѣща́нїе твоѐ хрⷭ҇тѐ . и҆́бо бꙋ́ри оу҆чени́къ тво́й бжⷭ҇твеныи сло́вомъ запрѣща́ѧ , на кро́ткꙋю тишинꙋ̀ преложѝ . в̾ не́й погрꙋже́ныѧ , ꙗ҆́кѡ петра̀ и҆з̾бавлѧ́ѧ . На разꙋ́мнꙋю сїѡ́на а҆пⷭ҇ле , взы́ти го́рꙋ повелѣ́нъ . спасе́нїѧ же прїе́мъ ча́шꙋ ра́дꙋѧсѧ настꙋпѝ преходѧ̀ сме́ртїю , къ бжⷭ҇твеномꙋ животꙋ̀ , и҆дѣ́же хрⷭ҇то́съ и҆́же всѣ́хъ бг҃ъ , а҆ндре́е сла́вне . Тѧ̀ слове́снꙋю рѣкꙋ̀ показа̀ , бжⷭ҇твенаѧ вода̀ живота̀ , преле́стныѧ рѣ́ки пото́ки и҆з̾сꙋша́ющꙋ бл҃же́нне проповѣ́данїѧ . и҆ вопїю́щихъ напаѧ́ющꙋ , хвали́мыи ѻ҆ц҃е́мъ бж҃е блгⷭ҇ве́нъ є҆сѝ . Ты̀ зе́мленъ сы́и а҆пⷭ҇ле па́че є҆стества̀ чꙋдодѣ́йствꙋеши , любо́вїю бо премѣни́всѧ . превозноси́мыи крѣ́пость тѝ непобѣди́мꙋю на́ дꙋхи дадѐ , хвали́мыи ѻ҆ц҃е́мъ бг҃ъ блгⷭ҇ве́ныи .= боⷢ҇ . Т=ѧ̀ і҆а́кѡвъ бцⷣе лѣ́ствицꙋ , проро́чески разꙋмѣ̀ . тобо́ю бо на землѝ , превозноси́мыи ꙗ҆ви́сѧ чл҃кѡмъ , и҆ поживѐ ꙗ҆́коже бл҃гои҆зво́ли , хвали́мыи ѻ҆ц҃е́мъ бг҃ъ бл҃гослове́ныи .

и҆́нъ , і҆рмо́съ . Ꙗ҆́же в̾ пещѝ ѻ҆́троки твоѧ̀ сп҃се , неприкоснꙋ́сѧ ни вредѝ и҆́хъ ѻ҆́гнь . тогда̀ трїѐ , ꙗ҆́кѡ є҆ди́нѣми оу҆сты̀ поѧ́хꙋ , и҆ бл҃гословлѧ́хꙋ глаго́люще , бл҃гослове́нъ бг҃ъ ѻ҆ц҃ъ на́шихъ . Прест҃а́гѡ дх҃а ѻ҆́гнь соше́дыи свы́ше а҆пⷭ҇ле хрⷭ҇то́въ , ꙗ҆зы́ки но́выми , и҆́миже никогда́же гл҃аше , ми́ра конце́мъ повелѣ̀ тебѣ̀ гл҃ати вели́чїѧ є҆гѡ̀ . Оу҆диви́сѧ всѧ́къ по́мыслъ проповѣ́данїю , є҆го́же вострꙋби́сте землѝ таи́нницы хрⷭ҇то́вы . зри́тели вы́шнихъ , ꙗ҆́кѡ толи́кѡ двана́десѧть , тмы̀ землѝ просвѣти́сте . Оу҆диви́сѧ влⷣко хрⷭ҇тѐ бл҃года́ть твоѧ̀ , въ бг҃омꙋ́дрыхъ оу҆ченицѣ́хъ . и҆́же ма́ли и҆ про́сти сꙋ́ще , всю̀ зе́млю протеко́ша , ѿ коне́цъ є҆ѧ̀ , да́же до коне́цъ всѣ́хъ . Кто̀ поꙋчѝ та́кѡ тѧ̀ гл҃ати а҆пⷭ҇ле . кто̀ просвѣтѝ тво́й ра́зꙋмъ , зрѣ́ти ꙗ҆́вѣ непристꙋ́пныѧ сла́вы зарю̀ восїѧ́вшꙋю , и҆́стинныи свѣ́тъ въ срⷣца́хъ ва́шихъ . сла́ва , трⷪ҇ченъ . Тро́йчески воспое́мъ вѣ́рнїи , сла́вѧще без̾нача́льнаго ѻ҆ц҃а и҆ сн҃а и҆ дх҃а и҆́стиннаго , є҆ди́нственное сꙋщество̀ є҆ди́но . ю҆́же трегꙋ́бѡ воспѣва́емъ , ст҃ъ , ст҃ъ , ст҃ъ , є҆сѝ во́ вѣки . и҆ ны́нѣ , боⷢ҇ . Ꙗ҆́кѡ ѿ трⷪ҇цы є҆ди́нагѡ тѧ̀ хрⷭ҇тѐ просла́вимъ , и҆́же ѿ дв҃ы вопло́щшасѧ , кромѣ̀ премѣне́нїѧ чл҃чески всѧ̀ понесѐ . не ѿлꙋча́ѧсѧ є҆стества̀ ѻ҆́ч҃а і҆с҃е , а҆́ще и҆ сожи́тельствовалъ є҆сѝ съ на́ми .

катава́сїѧ : Ѻ҆́троцы во бл҃зѣ́й вѣ́рѣ воспита́ни , нечести́ва велѣ́нїѧ небре́гше , ѻ҆́гненнагѡ преще́нїѧ не оу҆боѧ́шасѧ . но посредѝ пла́мене стоѧ́ще поѧ́хꙋ , ѻ҆ц҃е́мъ бг҃ъ блгⷭ҇ве́нъ є҆сѝ .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́коже в̾ горни́лѣ добро́тою бл҃гоче́стїѧ , чистѣ́е зла́та блеща́хꙋсѧ гл҃юще , бл҃гослови́те всѧ̀ дѣ́ла гдⷭ҇нѧ гдⷭ҇а , по́йте и҆҆ превозноси́те є҆гѡ̀ во́ вѣки . Свѣтоно́снаѧ и҆ бл҃гора́достнаѧ лꙋча̀ цѣле́ней , а҆ндре́е хрⷭ҇то́въ а҆пⷭ҇ле , сїѧ́ющи на́мъ бжⷭ҇твенаѧ па́мѧть твоѧ̀ , вопїю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превозноси́те є҆гѡ̀ во́ вѣки . Свѣтолꙋ́ченъ ꙗ҆́коже мо́лнїѧ , въ свѣ́тъ ꙗ҆зы́кѡмъ и҆зы́де , тмꙋ̀ невѣ́денїѧ ѿгонѧ̀ , и҆ вѣ́рныѧ просвѣща́ѧ , зовꙋ́щихъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а по́йте , и҆ превозноси́те є҆гѡ̀ во́ вѣки . Чл҃ческое є҆стество̀ прїе́мъ , тогѡ̀ превзы́де зако́ны , и҆ ко а҆́нг҃льскомꙋ пре́йде селе́нїю а҆ндре́е а҆пⷭ҇ле . зовы́и блгⷭ҇ви́те всѧ̀ дѣ́ла гдⷭ҇нѧ гдⷭ҇а по́йте , и҆ превозноси́те є҆гѡ̀ во́ вѣки .= боⷢ҇ . Р=а́дꙋисѧ престо́ле сла́вы бж҃їѧ . ра́дꙋисѧ вѣ́рнымъ стѣно̀ , є҆ю́же свѣ́тъ сꙋ́щимъ во тмѣ̀ восїѧ̀ хрⷭ҇то́съ , тебѐ бл҃жа́щимъ и҆ вопїю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превозноси́те є҆гѡ̀ во́ вѣки .

и҆́нъ , і҆рмо́съ . На сина́и кꙋпинꙋ̀ пали́мꙋ и҆ нежего́мꙋ показа́вшагѡ , и҆ ѻ҆́троки средѝ горѧ́ща пла́мене и҆зба́вльшагѡ бг҃а , по́йте бл҃гослови́те лю́дїе , и҆ превозноси́те є҆гѡ̀ во́ вѣки . Хꙋдо́жествомъ ловле́нїѧ , и҆́з̾морѧ и҆з̾вле́клъ є҆сѝ ры́бы всемꙋ́дре . ны́нѣ же вѣ́рою чл҃ки привлачи́ши хрⷭ҇тꙋ̀ ѿ́ лести вра́жїѧ . глꙋбина́ бо бѣ̀ пре́лести тогда̀ , погрꙋжа́ющи ꙗ҆зы́ки бꙋ́рею неразꙋ́мїѧ . Мы́сленагѡ житїѧ̀ , без̾мо́лвнѡ преплы́лъ є҆сѝ глꙋбинꙋ̀ а҆пⷭ҇ле . пролетѣ́въ стрѣло́ю дх҃а вѣ́рою хрⷭ҇то́вою . тѣ́мже и҆ ко приста́нищꙋ житїѧ̀ доше́лъ є҆сѝ ра́дꙋѧсѧ во всѧ̀ вѣ́ки . Мы́сленагѡ сл҃нца , на́ древѣ заше́дшагѡ самовла́стною во́лею , и҆́же сл҃нца свѣти́льникъ соꙋмертви́тисѧ и҆скі́и , и҆ заитѝ во хрⷭ҇та̀ , на́ древѣ повѣ́шьсѧ крⷭ҇тнѣмъ , а҆ндре́е вели́кїи свѣти́ло цр҃ко́вное . Ѽ оу҆ченичѐ и҆ дрꙋ́же хрⷭ҇то́въ , и҆ совѣ́тниче а҆пⷭ҇лъ є҆гѡ̀ , є҆гда̀ на прⷭ҇то́лѣ сѧ́детъ сꙋдїѧ̀ с̾ ва́ми двана́десѧтьми сꙋди́ти , ꙗ҆́коже ѡ҆бѣща́нїе глаго́летъ , бꙋ́дите тогда̀ на́мъ чл҃колю́бїѧ стѣна̀ . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . трⷪ҇ченъ . Трисвѣ́тлꙋю є҆ди́ницꙋ , и҆ трⷪ҇цꙋ сопресто́льнꙋю , славосло́вимъ нераздѣлѧ́юще . соединѧ́юще же ю҆̀ сра́сленѡ , ꙗ҆́кѡ є҆ди́нꙋ и҆́стиннꙋю . сꙋщество̀ соединѧ́емо , в̾ ли́цѣхъ тре́хъ неслива́емо . и҆ ны́нѣ , боⷢ҇ . И҆́же ѿ трⷪ҇цы є҆ди́наго заче́ньши родила̀ є҆сѝ , вопло́щшагосѧ ѿ тебѐ , ѡ҆бновлѧ́ющаго зако́ны є҆стества̀ , ржⷭ҇тво́мъ твои́мъ чи́стаѧ . тогѡ̀ ѡ҆ на́съ ꙗ҆́кѡ бг҃а прⷭ҇нѡ молѧ́щи непреста́й бцⷣе .

катава́сїѧ : Хва́лимъ бл҃гослови́мъ кланѧ́емсѧ гдⷭ҇ви , пое́мъ и҆ превозно́симъ є҆гѡ̀ во́ вѣки . Чꙋ́до преве́лїе , росода́вицꙋ воѡ҆бразѝ пе́щь ѻ҆́бразомъ . ꙗ҆́же бо прїѧ́тъ не ѡ҆палѝ ю҆́ныхъ , та́коже и҆ ѻ҆́гнь бжⷭ҇твеныи дв҃ꙋ , ю҆́же про́йде чи́стꙋ . тѣ́мъ пою́ще возопїе́мъ , да блгⷭ҇ви́тъ тва́рь всѧ́каѧ гдⷭ҇а , и҆ превозно́ситъ є҆гѡ̀ во́ вѣки [покло́н̾] .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твоегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю оу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Ꙗ҆́кѡ оу҆чени́къ преꙋго́денъ , и҆́же на крⷭ҇тѣ̀ во́лею распе́ньшемꙋсѧ , влⷣцѣ своемꙋ̀ да́же до сме́рти послѣ́дꙋѧ . взы́де ра́дꙋѧсѧ и҆ к̾ высотѣ̀ крⷭ҇та̀ и҆ды́и ше́ствїемъ на нб҃са̀ , бл҃же́нне а҆пⷭ҇ле . Две́рь є҆де́ма тебѣ̀ ѿве́рзесѧ , пред̾ложи́сѧ лѣ́ствица нбⷭ҇наѧ , и҆ прїѧ́ша тѧ̀ нбⷭ҇ныѧ ѡ҆би́тели . и҆ пред̾ста̀ ра́дꙋѧсѧ а҆пⷭ҇ле , хрⷭ҇тꙋ̀ жизнода́вцꙋ , ѡ҆́ мирѣ моли́твеникъ и҆зѧ́щенъ . Ра́вными просла́висѧ стрⷭ҇тьмѝ оу҆чи́тельными , бл҃же́нне а҆ндре́е всемꙋ́дре , крⷭ҇то́мъ бо бжⷭ҇твеныи коне́цъ прїѧ́тъ , и҆ причаще́нїемъ бг҃ъ бы́лъ є҆сѝ . тѣ́мже тѧ мо́лимъ , ѡ҆ на́съ при́снѡ моли́сѧ . Ра́дꙋисѧ дво́ице всеи҆зрѧ́днаѧ , прїе́мша на́ нб҃сѣхъ ны́нѣ жи́тельство , назира́юща же пою́щихъ и҆зволе́нїе , самы́хъ себѐ бѣдѧ́щихъ си́лою . и҆ бжⷭ҇твеныхъ дарова́нїи просвѣща́ета свѣтлостьмѝ .= боⷢ҇ . И҆=с̾ко́рене дв҃дова прозѧбѐ , прⷪ҇ро́ческагѡ дв҃о и҆ бг҃оѻ҆те́ческагѡ . но и҆ дв҃да вои́стинꙋ ты̀ просла́ви , ꙗ҆́кѡ ро́ждьши прорица́емаго гдⷭ҇а сла́вы . є҆го́же пою́ще велича́емъ .

и҆́нъ , і҆рмо́съ . Свѣтоно́сныи ѻ҆́блакъ , во́нь же всѣ́хъ влⷣка , ꙗ҆́кѡ до́ждь с̾ нб҃сѐ на рꙋно̀ сни́де , и҆ воплоти́сѧ на́съ ра́ди , бы́въ оу҆́бѡ чл҃къ без̾нача́ленъ . велича́емъ всѝ ꙗ҆́кѡ мт҃рь бг҃а на́шегѡ чи́стꙋ . И҆́же сѣ́ть распространи́выи та́йнагѡ бг҃овидѣ́нїѧ , и҆ ꙗ҆́кѡ ры́бы в̾ не́й оу҆лови́выи добро́тами , нбⷭ҇ныхъ разꙋмѣ́нїи , молѝ ст҃е ст҃ꙋ́ю трⷪ҇цꙋ , є҆́же и҆сточи́ти и҆ на́мъ милосе́рдїе . Бл҃годари́мъ ꙗ҆зы́цы , и҆́же тобо́ю просвѣ́щшїисѧ , и҆ ѿ землѝ на нб҃са̀ тобо́ю вознесе́ныѧ . слꙋже́нїѧ бо вра́жїѧ ѿста́вше , бы́хомъ соприча́стницы ст҃ы́хъ а҆́нг҃лъ . гдⷭ҇нїѧ же сла́вы соѡ҆́бщницы . Неи҆зрече́нныхъ самови́дцы и҆ слꙋжи́телїе сло́ва , таи́нницы и҆ зри́телїе неи҆спыта́емыхъ , с̾наслѣ́дникѡмъ и҆ на́мъ бы́ти , моли́тесѧ а҆пⷭ҇ли хрⷭ҇то́ва црⷭ҇твїѧ , и҆ соприча́стникѡмъ бжⷭ҇тва̀ є҆гѡ̀ . Вѧза́ти и҆ рѣша́ти прїе́мшїи ѿ хрⷭ҇та̀ вла́сть , разрѣши́те всѧ̀ свѧ́заныѧ ѿ мно́гихъ согрѣше́ней . є҆гда̀ прїи́детъ хрⷭ҇то́съ . и҆ всѝ сѧ́дѣте два́надесѧть на прⷭ҇то́лѣхъ свои́хъ , сꙋди́ти всѧ̀ колѣ́на і҆и҃лева . сла́ва , трⷪ҇ченъ . Трисоста́вное є҆стество̀ , и҆ нераздѣли́мꙋю сла́вꙋ , и҆́же в̾ бжⷭ҇твѣ̀ є҆ди́номъ пѣва́емꙋю без̾преста́ни , на́ нб҃си и҆ на землѝ , трⷪ҇цꙋ неразлꙋ́чнꙋ просла́вимъ , с̾ сн҃омъ ѻ҆ц҃ꙋ и҆ дх҃ꙋ , покланѧ́ющесѧ бл҃гоче́стнѡ . и҆ ны́нѣ , боⷢ҇ . Под̾ твоѐ милосе́рдїе прибѣга́ющихъ вѣ́рою , и҆ покланѧ́ющихсѧ бл҃гоче́стнѡ сн҃ꙋ твоемꙋ̀ дв҃о бг҃ороди́тельнице , тогѡ̀ ꙗ҆́кѡ бг҃а ми́рꙋ и҆ гдⷭ҇а молѝ ѿ и҆стлѣ́нїѧ и҆ бѣ́дъ и҆зба́вити всѧ́ческихъ и҆скꙋше́нїи .

катава́сїѧ : Та́инство стра́нно ви́жꙋ , и҆ пресла́вно . не́бо сꙋ́щꙋ пеще́рꙋ , прⷭ҇то́лъ херꙋви́мскїи , дв҃цꙋ , ꙗ҆́сли , вмѣсти́лище , в̾ ни́хъ же воз̾лежѐ невмѣсти́мыи хрⷭ҇то́съ бг҃ъ , є҆го́же хва́лѧще велича́емъ . До́сто́йнѡ є҆́сть .

свѣти́ленъ . Сло́во пред̾безнача́льное ѡ҆брѣ́тъ тѧ̀ пребл҃же́нне , первозва́нна показа̀ всѣ́мъ а҆пⷭ҇лѡмъ , а҆ндре́е приснопа́мѧтне . и҆ сегѡ̀ стопа́ми грѧды́и , показа́лсѧ є҆сѝ наста́вникъ заблꙋ́ждьшимъ , къ нбⷭ҇номꙋ си́хъ возводѧ̀ , бжⷭ҇твеномꙋ жи́тельствꙋ . сла́ва , дрꙋгі́и , свѣти́ленъ . Петро́ва скро́вника , оу҆чени́къ пе́рвѣйшагѡ , самови́дца и҆ слꙋгꙋ̀ бы́вша сло́вꙋ а҆ндре́ѧ а҆пⷭ҇ла , пресла́внѡ воспое́мъ . ꙗ҆зы́ки бо просвѣтѝ , и҆ распѧ́тсѧ соверше́нѣ , ꙗ҆́кѡ оу҆чени́къ влⷣцѣ . и҆ нн҃ѣ , боⷢ҇ . Бг҃а , є҆го́же родила̀ є҆сѝ дв҃о пренепоро́чнаѧ молѝ ѡ҆ всѣ́хъ , и҆́же бл҃гоче́стнѡ тѧ̀ чтꙋ́щихъ , с̾ первозва́ннымъ а҆ндре́емъ , оу҆лꙋчи́ти бжⷭ҇твенагѡ сїѧ́нїѧ твоегѡ̀ сн҃а , и҆ стоѧ́нїѧ и҆збра́нныхъ ст҃ы́хъ . и҆́бо мо́жеши є҆ли́кѡ хо́щеши .

На хвали́тѣхъ , стихѣ́ры , на д҃ . гла́съ , а҃ . поⷣ . нбⷭ҇нымъ чино́мъ . Виѳсаи́до ны́нѣ весели́сѧ .꙳ в̾ тебѣ́ бо процвѣто́ша ,꙳ ѿ ма́терьнѧ оу҆до́лїѧ ,꙳ бл҃гоꙋха́ннїи кри́ни пе́тръ и҆ а҆ндре́й .꙳ ми́рꙋ всемꙋ̀ ,꙳ вѣ́ры проповѣ́данїѧ бл҃гоꙋха́юще ,꙳ бл҃года́тїю хрⷭ҇то́вою .꙳ є҆го́же и҆ стра́сти причасти́шасѧ . А҆ндре́е ра́дꙋисѧ и҆ ликꙋ́й ,꙳ ꙗ҆́кѡ прїѧ́тъ ꙗ҆́вѣ в̾ словесѣ́хъ сїѧ́нїе ,꙳ сл҃нца сла́вы хрⷭ҇та̀ жизнода́вца .꙳ є҆го́же и҆ держа́сѧ в̾ вѣ́рѣ проповѣ́далъ є҆сѝ .꙳ тогѡ̀ молѝ без̾преста́ни ѡ҆ на́съ ,꙳ и҆́же вѣ́рою воспѣва́ющихъ тѧ̀ . Тайноꙋчи́тель бжⷭ҇твенагѡ и҆зволе́нїѧ хрⷭ҇то́ва ,꙳ и҆́же и҆збра́нъ бы́сть в̾ пе́рвыхъ наꙋча́тисѧ ,꙳ словесѝ а҆ндре́й бг҃ови́децъ .꙳ вопїѧ̀ глаго́лѧ , скро́вника петра̀ оу҆ви́дѣвъ ,꙳ ѡ҆брѣто́хомъ месі́ю є҆го́же писа́нїѧ ꙳ и҆ проро́цы проповѣ́даша . Ѻ҆те́ческїи тѧ̀ гра́дъ па́стырѧ и҆мѣ́ѧ ,꙳ и҆ вла́стелѧ бжⷭ҇твенагѡ ,꙳ и҆ бѣ́дъ всѧ́ческихъ и҆зба́вителѧ и҆ храни́телѧ ,꙳ тѧ̀ а҆ндре́е премꙋ́дре , бл҃года́рнѡ чте́тъ .꙳ но молѝ без̾преста́ни ѡ҆ не́мъ ,꙳ сохрани́тисѧ невреди́мꙋ .

сла́ва . гла́съ , и҃ . Проповѣ́дника вѣ́рѣ , и҆ слꙋгꙋ̀ сло́вꙋ , а҆ндре́ѧ восхва́лимъ . то́й бо и҆з̾ глꙋбины̀ чл҃ки оу҆ловлѧ́етъ , вмѣ́стѡ тро́сти крⷭ҇тъ в̾ рꙋка́хъ держа̀ . и҆ ꙗ҆́кѡ ю҆́же мета́ѧ си́лꙋ , возво́дитъ дш҃а ѿ ле́сти вра́жїѧ . и҆ прино́ситъ гдⷭ҇ви да́ръ бл҃гопрїѧ́тенъ . и҆ прⷭ҇нѡ тогѡ̀ вѣ́рнїи с ли́комъ оу҆чени́къ хрⷭ҇то́выхъ восхва́лимъ . да мо́лѧтсѧ є҆мꙋ̀ , ꙗ҆́кѡ да млⷭ҇тивъ бꙋ́детъ на́мъ в̾ дн҃ь сꙋ́дныи . и҆ нн҃ѣ . гла́съ , то́йже . Воспрїимѝ виѳлее́ме бж҃їю митропо́лїю . свѣ́тъ бо незаходи́мыи в̾ тебѣ̀ роди́тисѧ прихо́дитъ . а҆́нг҃ли чꙋди́тесѧ на́ нб҃си . и҆ чл҃цы просла́вите на землѝ . волсвѝ ѿ перси́ды пресла́вныѧ да́ры принеси́те . па́стыри свирѧ́юще трист҃о́е пѣ́нїе воспо́йте . всѧ́ко дыха́нїе да хва́литъ вседѣ́телѧ . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . ѿ а҃ гѡ кано́на , пѣ́снь , г҃ ѧ . и҆ в҃ гѡ кано́на , пѣ́снь , ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃о́мꙋ . сла́ва , конда́къ ст҃о́мꙋ . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь ст҃о́мꙋ , и҆ хра́мꙋ . конда́къ ст҃о́мꙋ . сла́ва , хра́мꙋ . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱало́мъ дв҃довъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ . сти́хъ . нб҃са̀ повѣ́даютъ сла́вꙋ бж҃їю , творе́нїе же рꙋ́кꙋ є҆гѡ̀ возвѣща́етъ тве́рдь . а҆пⷭ҇лъ , къ кори́нфѡмъ . зача́ло , рл҃а .= а҆ллилꙋ́їѧ . и҆сповѣ́дѧтъ нб҃са̀ чꙋдеса̀ твоѧ̀ гдⷭ҇и , и҆́бо и҆́стинꙋ твою̀ в̾ цр҃кви ст҃ы́хъ . =сти́хъ . бг҃ъ прославлѧ́емь въ совѣ́тѣхъ ст҃ы́хъ . є҆ѵⷢ҇а́лїе , ѿ =і҆ѡа́нна . заⷱ҇ , д҃ . =прича́стенъ . во всю̀ зе́млю и҆зыдо́ша вѣща́нїе и҆́хъ , и҆ в̾ концы̀ вселе́нныѧ гл҃ы и҆́хъ .