4 ноября: прп. Иоаникия Великого

МЦⷭ҇А ТОГО́ЖЕ ВЪ Д҃ ДН҃Ь

прпⷣбнагѡ ѻ҆ц҃а на́шегѡ і҆ѡани́кїѧ вели́кагѡ . =и҆ ст҃ы́хъ мꙋ́ченикъ , ника́ндра є҆пкⷭ҇па , і҆єрмі́ѧ презви́тера . Ве́черъ , на гдⷭ҇и возва́хъ , стихѣ́ры , прпⷣбномꙋ , на́ ѕ҃ . гла́съ , д҃ . поⷣ . и҆́=же зва́нныи свы́ше . И҆́же свѣ́томъ ꙳ ѡ҆блиста́нъ бжⷭ҇твенымъ .꙳ є҆гда̀ чистото́ю оу҆ма̀ воз̾рѣ́лъ є҆сѝ .꙳ и҆ подо́бнѡ раз̾сꙋди́въ нестоѧ́щихъ ,꙳ вѣ́чнѡ бꙋ́дꙋщаѧ .꙳ тогда̀ ѻ҆́гнь в̾ срⷣцы ѻ҆́ч҃е прїе́мъ ,꙳ є҆ле́ни подо́бнѡ разже́гсѧ ,꙳ бжⷭ҇твеною любо́вїю ,꙳ и҆ забы̀ пло́ть и҆ кро́вь .꙳ и҆ оу҆гото́висѧ къ под̾виго́мъ по́стническимъ .꙳ и҆́хже ра́ди тѣле́сныѧ стра́сти ,꙳ дш҃и свое́й покори́лъ є҆сѝ . На восхожде́нїе бжⷭ҇твеныхъ го́ръ высоты̀ , всели́лсѧ є҆сѝ .꙳ не смирѧ́емь смире́ннагѡ сегѡ̀ тѣлесѐ ,꙳ нꙋ́ждами ѻ҆́ч҃е бѣ́дными і҆ѡани́кїе .꙳ бдѣ́нными стоѧ́нїи ,꙳ и҆ вседне́вными мл҃твами ,꙳ бл҃го́мꙋ сочета́всѧ ,꙳ просвѣти́лсѧ є҆сѝ .꙳ и҆ проро́чества прїѧ́тъ да́ръ ,꙳ зрѣ́ти да́льнаѧ ꙗ҆́кѡ бли́жнѧѧ ,꙳ и҆ пред̾глаго́лати вѣ́рнымъ бꙋ́дꙋщаѧ .꙳ тѣ́мъ ꙗ҆́кѡ бжⷭ҇твенаго ꙳ оу҆чи́телѧ тѧ̀ сла́вимъ . Бѣсо́вскаѧ стремле́нїѧ и҆ стрѣ́лы ,꙳ крѣ́пкѡ притꙋпи́лъ є҆сѝ ,꙳ воѡ҆браже́нїи моли́твъ .꙳ и҆ на тѣ́хъ взѧ́лъ є҆сѝ побѣ́ды ,꙳ бж҃їею си́лою достосла́вне .꙳ ѿ сю́дꙋ по́чести тебѣ̀ ѻ҆́ч҃е ,꙳ чꙋде́съ бл҃гі́и дарова̀ ,꙳ смире́нїемъ оу҆поко́ивсѧ срⷣца твоегѡ̀ .꙳ тѣ́мже и҆ мѵ́рѡ бл҃гоꙋха́ющее ,꙳ твоѧ̀ честны́ѧ и҆сточа́ютъ мо́щи .꙳ бл҃гово́нїе бо ꙗ҆ви́сѧ ꙳ хрⷭ҇то́во і҆ѡанни́кїе .

сла́ва . гла́съ , ѕ҃ . Прпⷣбне ѻ҆́ч҃е , во всю̀ зе́млю и҆зы́де вѣща́нїе и҆справле́нїи твои́хъ . тѣ́мъ на́ нб҃сѣхъ ѡ҆брѣ́те мздꙋ̀ трꙋдѡ́въ твои́хъ . бѣсо́вскаѧ погꙋби́лъ є҆сѝ ѡ҆полче́нїѧ . и҆ а҆́нг҃льскїѧ дости́глъ є҆сѝ чи́ны , и҆́хже житїю̀ без̾ поро́ка поревнова́лъ є҆сѝ . дерзнове́нїе и҆мѣ́ѧ к̾ хрⷭ҇тꙋ̀ бг҃ꙋ , ми́ръ и҆спросѝ дш҃а́мъ на́шимъ .= и҆ ны́нѣ , боⷢ҇ . и҆лѝ , крⷭ҇тобоⷢ҇ . В=и́дѧщи тѧ распина́ема хрⷭ҇тѐ , тебѐ ро́ждьшаѧ вопїѧ́ше , что̀ стра́нное є҆́же ви́ждꙋ та́инство сн҃е мо́й , ка́кѡ на́ древѣ оу҆мира́еши , пло́тїю ви́сѧ живота̀ пода́телю .

На стихо́внѣ , во ѻ҆кта́и . сла́ва . гла́съ , и҃ . И҆́нокъ мно́жество , наста́вника тѧ̀ чте́мъ ѻ҆́ч҃е на́шъ . тобо́ю бо пꙋ́ть сꙋ́щїи пра́выи ходи́ти оу҆вѣ́дѣхомъ . бл҃же́нъ є҆сѝ хрⷭ҇то́ви рабо́тавъ , и҆ вра́жїю ѡ҆бличи́въ си́лꙋ . а҆́нг҃лѡмъ собесѣ́дниче и҆ прпⷣбнымъ соприча́стниче и҆ пра́веднымъ . с̾ ни́ми же моли́сѧ гдⷭ҇ви , поми́ловатисѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . Тѧ̀ пригвожда́ема ви́дѧщи , на крⷭ҇тѣ̀ і҆с҃е , и҆ стра́сть прїе́млюща во́лею влⷣко , дв҃аѧ и҆ мт҃и твоѧ̀ , ча́до гл҃аше , ча́до сла́дкое , ꙗ҆́звы непра́веднѡ ка́кѡ терпи́ши , врачꙋ̀ и҆сцѣли́выи земны́мъ не́мощь , и҆ ѿ тлѧ̀ и҆зба́вивыи всѣ́хъ милосе́рдїемъ сѝ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Слеза́ми твои́хъ и҆сто́чникъ пꙋсты́ни без̾пло́дное напои́лъ є҆сѝ , и҆ є҆́же и҆з̾ глꙋбины̀ воз̾дыха́ньми во́сто трꙋды̀ оу҆плодоно́силъ є҆сѝ . и҆ бы́сть свѣти́льникъ вселе́ннѣй сїѧ́ѧ чꙋдесы̀ , і҆ѡани́кїе ѻ҆́ч҃е на́шъ . молѝ хрⷭ҇та̀ бг҃а спасти́сѧ дш҃а́мъ на́шимъ .

сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

Слꙋ́жба мꙋ́ченикѡмъ , пое́тсѧ на па́вечерницѣ . кано́нъ , гла́съ , д҃ . пѣ́снь , а҃ . і҆рмо́съ . Ли́цы і҆зра́ильтестїи невла́жными стопа́ми , по́нта чермна́гѡ морскꙋ́ю глꙋбинꙋ̀ прогна́вше . вса́дники тристоѧ́ща врагѝ ви́дѧщи в̾ не́й погрꙋже́ны , с̾ весе́лїемъ поѧ́хꙋ , пое́мъ бг҃ꙋ на́шемꙋ , ꙗ҆́кѡ просла́висѧ .

запѣ́въ : Ст҃і́и сщ҃енномч҃нцы , моли́те бг҃а ѡ҆ на́съ .= Честны́и пра́здникъ честны́хъ страда́лецъ сщ҃енномч҃нкъ сщ҃е́нныхъ , сщ҃е́ннꙋю па́мѧть дне́сь , сщ҃е́нными пѣ́сньми ны́нѣ сщ҃е́ннаѧ хрⷭ҇то́ва цр҃кви , сщ҃еннолѣ́пнѡ сверша́ющи , пѣ́сньми оу҆краша́етсѧ , си́хъ почита́ющи . Честно́ю пома́занъ ма́стїю сщ҃е́нничества вѣ́рнѡ , сщ҃еннонача́льниче ника́ндре . честнѣ́йшо сѐ , и҆́же ѿ крове́й твои́хъ ѡ҆багре́нїемъ содѣ́лалъ є҆сѝ . с̾ ра́достїю зовы́и , пое́мъ бг҃ꙋ на́шемꙋ ꙗ҆́кѡ просла́висѧ . =сла́ва . По́тъ мꙋче́нїѧ текꙋ́щь , весе́лїе и҆́стинно в̾ не́мъ ꙗ҆́вѣ показꙋ́юще . ѡ҆бога́тистесѧ бл҃года́тїю чꙋде́съ дарова́нїи нбⷭ҇ныи мч҃нцы . согла́снѡ вопїю́ще , пое́мъ бг҃ꙋ на́шемꙋ ꙗ҆́кѡ просла́висѧ . и҆ ны́нѣ , боⷢ҇ . И҆́же в̾ неи҆спи́санныхъ нѣ́драхъ ѻ҆те́ческихъ , въ нѣ́дрѣхъ ма́терьнихъ пло́тьски хрⷭ҇то́съ ѡ҆писꙋ́етсѧ , и҆ по ржⷭ҇твѣ̀ сїю̀ и҆́стиннꙋ дв҃ꙋ па́че оу҆ма̀ сохрани́въ . є҆мꙋ́же велегла́снѡ вопїе́мъ , пое́мъ бг҃ꙋ на́шемꙋ ꙗ҆́кѡ просла́висѧ .

пѣ́снь , г҃ . і҆рмо́съ . Ꙗ҆́кѡ непло́ды родѝ , ѿ ꙗ҆зы́къ цр҃кви . и҆ мно́гѡ ѡ҆ ча́дѣхъ и҆знемо́же со́нмище . чꙋ́дномꙋ бг҃ꙋ на́шемꙋ возопїе́мъ , ст҃ъ є҆сѝ гдⷭ҇и . Слове́сныѧ мре́жи простира́ѧ , сꙋ́щїѧ в̾ пре́лести чꙋдодѣ́ѧ оу҆ловлѧ́ше , ѻ҆́трокъ многоѡ҆бра́зныхъ . и҆́же ѿ дв҃ы ника́ндре восїѧ́вшемꙋ си́хъ приводѧ̀ . Розга̀ бл҃гопло́дна ти́това сада̀ бы́сть , кри́тскагѡ свѣти́льника . гро́зды носѧ̀ слове́сныѧ , сла́дость на́мъ и҆сточа́юща спасе́нꙋю , ника́ндре бл҃же́нне . сла́ва . Со і҆єрмі́емъ бжⷭ҇твенымъ , ѡ҆лѧдинѣ́вшаѧ срⷣца̀ . крⷭ҇тнымъ ра́ломъ дѣ́лали є҆стѐ мꙋ́дрїи . и҆ плодоно́сна бл҃года́ти ꙗ҆ви́сте , тѣ́мъ бл҃жи́ми є҆стѐ . и҆ ны́нѣ , боⷢ҇ . Ни оу҆́мъ нбⷭ҇ныи мо́жетъ , па́че оу҆ма̀ ржⷭ҇тва̀ твоегѡ̀ сказа́ти ѻ҆трокови́це . оу҆ма́ бо пе́рваго в̾ чре́вѣ сло́во чⷭ҇таѧ , зача́тъ и҆́же всѧ́ческаѧ сло́вомъ соста́вившаго .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вопїю́щїѧ , сла́ва хрⷭ҇тѐ си́лѣ твое́й . Колесни́ца ꙗ҆ви́стесѧ сло́вꙋ . разꙋ́мнѡ сїю̀ носѧ́ще , тѣ́мъ привѧ́зани къ ко́немъ . лю́тѣ же влачи́ми не ѿверго́стесѧ сегѡ̀ , ни побѣди́стесѧ . к̾ нбⷭ҇нѣй стезѣ̀ ꙗ҆́вѣ подвиза́еми . Темни́цамъ преближа́ющесѧ , и҆ оу҆́зами ѡ҆блага́еми , ѿ оу҆́зъ льстѝ гра́дъ и҆ лю́ди спасо́сте . и҆ оу҆́зами любвѐ свѧза́сте , привѧ́заномꙋ пло́тїю на́съ ра́ди всебл҃же́ннїи . сла́ва . Со а҆́нг҃лы влⷣкꙋ затворе́ни сла́влѧхꙋ , нбⷭ҇нымъ хлѣ́бомъ всесла́внїи пита́еми . тѣ́мъ пло́ти болѣ́зней небрего́сте , си́льнѣйше ра́нъ бы́вше . и҆ ны́нѣ , боⷢ҇ . На престо́лѣ высоцѣ̀ стра́шныи сѣдѧ́и , на ма́терьню рꙋкꙋ̀ мла́дѧ бы́въ сѣди́тъ , па́дшїи ѻ҆́бразъ и҆справлѧ́ѧ . и҆ ѡ҆боже́нїе сꙋ́щимъ ѿ а҆да́ма да́рꙋѧ .

пѣ́снь , є҃ . і҆рмо́съ . Просвѣще́нїе твоѐ гдⷭ҇и низ̾послѝ на́мъ , ѿ мглы̀ прегрѣше́нїѧ разрѣшѝ бл҃же , и҆ твоегѡ̀ ми́ра с̾ нб҃сѐ подава́ѧ . Въ просвѣще́нїе вѣ́рное наста́вилъ є҆сѝ лю́ди . и҆ ѡ҆ста́вльше тмꙋ̀ кꙋмиробѣ́сїѧ , ча́да свѣ́тꙋ бы́ша , хода́тайствомъ тѝ ника́ндре . Просвѣти́тельными дх҃а блиста́юще зарѧ́ми , мꙋче́нїѧ но́щь преи҆до́сте без̾ вреда̀ . рѣша́ще мглꙋ̀ грѣхо́внꙋю , свѣти́льницы сла́внїи . сла́ва . Па́вловѣхъ во́дъ и҆спо́лненъ ти́тъ бы́въ , тѧ̀ напоѧ́ше показꙋ́ѧ рѣкꙋ̀ . стрꙋѝ мꙋ́тныѧ без̾ бо́жїѧ потоплѧ́ющꙋ ника́ндре . и҆ ны́нѣ , боⷢ҇ . А҆́гньца и҆ па́стырѧ ро́ждьшаѧ пло́тїю дв҃о , є҆ди́на нескве́рнаѧ ски́нїе . бжⷭ҇твеныи ковче́же , честны́и свѣти́льниче . дш҃ꙋ мою̀ ѡ҆зарѝ .

пѣ́снь , ѕ҃ . і҆рмо́съ . Возопи́лъ проѡбразꙋ́ѧ погребе́нїе тридне́вное , пррⷪ҇къ і҆ѡ́на в̾ ки́тѣ бг҃ꙋ молѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Пригвожда́еми гвоздьмѝ тѣлесы̀ мч҃нцы , стрⷭ҇те́мъ подо́бницы сп҃сꙋ ꙗ҆влѧ́хꙋсѧ распе́ншемꙋсѧ на крⷭ҇тѣ̀ , и҆ ѿ тлѧ̀ ми́ръ спа́сшемꙋ . Пꙋчи́нꙋ мꙋ́къ преидо́сте мч҃нцы , ѡ҆кормле́нїемъ ст҃а́гѡ всеси́льнїи дх҃а . и҆ къ бжⷭ҇твеномꙋ приста́нищꙋ приста́сте , сла́вы и҆сполнѧ́еми . сла́ва . Побѣди́лъ є҆сѝ тезои҆мени́тне мꙋ́жества , всѧ́ко противле́нїе оу҆бі́ицъ , ст҃лю приснопа́мѧтне ника́ндре . и҆ вѣнцы̀ сла́вы прїѧ́тъ , бг҃ови пред̾стоѧ̀ . и҆ ны́нѣ , боⷢ҇ . Погꙋби́ла є҆сѝ прама́терьнее ѻ҆трокови́це поноше́нїе , бл҃гослове́нїемъ на́съ вѣнча́вшаго пло́тїю ро́ждьши . и҆ ско́рбь тоѧ̀ в̾ ра́дость и҆́стиннꙋю преложи́ла є҆сѝ .

сѣда́ленъ . гла́съ , д҃ . Ст҃льства и҆́стины бжⷭ҇твенымъ пома́занїемъ , и҆ мꙋче́нїѧ сщ҃е́нною вои́стинꙋ кро́вїю просвѣще́ни сла́внїи , совокꙋпи́стесѧ чинѡ́мъ ра́дꙋющесѧ беспло́тныхъ а҆́нг҃лъ . тѣ́мъ пра́з̾днꙋемъ чⷭ҇тнꙋ́ю ва́шꙋ па́мѧть , молѧ́щесѧ всѣ́мъ ѡ҆чище́нїе пода́ти , мл҃твами ва́шими ст҃і́и .

пѣ́снь , з҃ . і҆рмо́с̾ . А҆враа́мстїи дре́вле в̾ вавило́нѣ ѻ҆́троцы , в̾ пещѝ пла́мень попра́вше хвала́ми вопїю́ще , ѻ҆ц҃ъ на́шихъ бж҃е блгⷭ҇ве́нъ є҆сѝ . Сщ҃е́ннꙋю ти ѻ҆де́жꙋ ѡ҆черни́въ бл҃же́нне ѡ҆багре́нїемъ кро́внымъ соверши́лъ є҆сѝ свѣтлѣ́йшꙋ ника́ндре . и҆́же ѻ҆ц҃е́мъ вопїѧ̀ , бж҃е бл҃гослове́нъ є҆сѝ . Приближа́ющесѧ ѻ҆гню̀ , несꙋмѣ́нною любо́вїю и҆́же къ творцꙋ̀ , не ѡ҆пали́стесѧ вопїю́ще бл҃же́ннїи , ѻ҆ц҃ъ на́шихъ бж҃е бл҃гослове́нъ є҆сѝ . сла́ва . Пе́щныи пла́мень ва́мъ оу҆гото́вленыи на мꙋче́нїе , преврати́сте на мꙋчи́телей дх҃омъ . вседѣ́телеви вопїю́ще , ѻ҆ц҃ъ на́шихъ бж҃е бл҃гослове́нъ є҆сѝ . и҆ ны́нѣ , боⷢ҇ . Воплоще́нно сло́во ро́ждьши неска́занно чⷭ҇таѧ дв҃о , зовꙋ́щїѧ сме́рти и҆збавлѧ́юща , ѻ҆ц҃ъ на́шихъ бж҃е бл҃гослове́нъ є҆сѝ .

пѣ́снь , и҃ . і҆рмо́с̾ . И҆зба́вителю всѣ́хъ всеси́льне , посредѣ̀ пла́мене бл҃гоче́ствовавшїѧ сше́дъ ѡ҆роси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гослови́те гдⷭ҇нѧ гдⷭ҇а . Ст҃ль че́стенъ бы́лъ є҆сѝ , ника́коже чꙋже́ю кро́вїю . свое́ю же ника́ндре вше́дъ въ го́рнїи хра́мъ . и҆ пое́ши , бл҃гослови́те всѧ̀ дѣ́ла гдⷭ҇нѧ гдⷭ҇а . На сѣда́лищи похвали́въ гдⷭ҇а ста́рецъ є҆рмі́й сла́вныи . оу҆добри́сѧ кро́вїю мꙋче́нїѧ . зовы́и , бл҃гослови́те всѧ̀ дѣ́ла гдⷭ҇нѧ гдⷭ҇а . сла́ва . Сщ҃е́нно пред̾соверша́юще ст҃а́ѧ , же́ртвы честны́ѧ ꙗ҆ви́стесѧ , и҆ в̾ воню̀ принесо́стесѧ бл҃гоꙋха́нїѧ гдⷭ҇ви . вопїю́ще , бл҃гослови́те всѧ̀ дѣ́ла гдⷭ҇нѧ гдⷭ҇а . и҆ ны́нѣ , боⷢ҇ . Ѕѡ́лъ мои́хъ пꙋчи́нꙋ и҆з̾сꙋшѝ , бл҃госе́рдїѧ пꙋчи́нꙋ ро́ждьши и҆зба́вителѧ и҆ гдⷭ҇а . є҆мꙋ́же вопїе́мъ дв҃о , всѧ̀ дѣ́ла бл҃гослови́те гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Є҆́вва оу҆́бѡ недꙋ́гомъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прозѧбе́нїемъ прижи́тїѧ твоегѡ̀ , ми́рови бл҃гослове́нїе процвѣла̀ є҆сѝ . тѣ́мъ тѧ̀ всѝ велича́емъ . На́ древѣ мꙋ́дре терпѣли́вно растерза́емь , и҆ свѣща́ми под̾палѧ́емь , ро́сꙋ нбⷭ҇нꙋю прїѧ́тъ рꙋко́ю а҆́нг҃лѡвою мч҃нче ника́ндре попалѧ́ющꙋ . є҆ю́же ме́ртвыѧ живи́лъ є҆сѝ , живоно́сными ти моли́твами . Ви́дѣстесѧ ꙗ҆вле́нїе стра́шно , ѡ҆бнажа́еми , и҆ без̾слове́снымъ привѧза́еми , и҆ на мно́зѣ страстоте́рпцы влеко́ми , и҆ цѣ́ли ꙗ҆влѧ́еми . ѻ҆гне́ви приближа́ющесѧ , и҆ неѡ҆палѧ́еми , дх҃омъ бжⷭ҇твенымъ соблюда́еми . Дне́сь мѵ́рскаѧ сщ҃е́ннаѧ митропо́лїѧ пра́зднꙋетъ , велегла́снѡ гра́дъ всѧ́къ на весе́лїе созыва́ющи , па́мѧть ва́шꙋ сїю̀ всехва́льнїи . въ ню́же сщ҃е́нное ва́ше страда́нїе соверши́сте . сла́ва . Ѿве́рзесѧ ва́мъ нб҃о , и҆ а҆́нг҃ли воз̾хожде́нїю восплеска́вше , чи́ни прпⷣбныхъ и҆ пра́ведныхъ воз̾весели́шасѧ , взыгра́шасѧ мч҃нцы . с̾ ни́ми же все́льшесѧ , помѧни́те помина́ющихъ ва́съ ст҃і́и . и҆ нн҃ѣ , боⷢ҇ . Свѣ́томъ мѧ̀ ѡ҆зарѝ твои́мъ всенепоро́чнаѧ , ро́ждьши свѣ́тъ неприкоснове́нныи . разрѣшѝ ѻ҆́блаки дш҃и моеѧ̀ , и҆ тмы́ мѧ и҆схитѝ молю́сѧ , и҆ бжⷭ҇твенагѡ спасе́нїѧ сподо́би пречⷭ҇таѧ , є҆ди́на при́снѡ дв҃о .

стихѣ́ры . гла́съ , в҃ . поⷣ . є҆гда̀ ѿ́ древа . Зва́нїе тезои҆мени́то прїе́мъ , ѿ бжⷭ҇твенагѡ промышле́нїѧ , сїѐ вещмѝ ѻ҆́ч҃е зна́меналъ є҆сѝ оу҆тверди́въ ра́тныхъ мно́жества . и҆ собо́ръ мꙋчи́тель в̾ терпѣ́нїи свое́мъ побѣди́лъ є҆сѝ . тѣ́мъ вѣне́цъ побѣ́ды прїе́мъ вѣ́рою взыва́ше , сла́ва непобѣди́мѣй держа́вѣ твое́й чл҃колю́бче . Мѵ́рѡ бл҃гоꙋха́ющее на́мъ , и҆сцѣле́нїе и҆сточа́еши дне́сь ника́ндре , въ бжⷭ҇твенѣй па́мѧти твое́й , ѿго́ниши мꙋ́дре мглꙋ̀ скорбе́й , и҆ стра́сти тѣле́сныѧ . и҆ бога́тыѧ бл҃года́ти и҆сполнѧ́еши собо́ръ , всѣ́хъ вопїю́щихъ хрⷭ҇то́ви . ты̀ є҆сѝ неи҆стощи́мое мѵ́рѡ , бл҃гоꙋха́ѧ пою́щихъ тѧ̀ . И҆мѣ́ѧ дерзнове́нїе ко хрⷭ҇тꙋ̀ , прославлѧ́емомꙋ є҆ди́номꙋ во ст҃ы́хъ є҆гѡ̀ . тогѡ̀ молѝ прпⷣбне ника́ндре ѡ҆ всѣ́хъ , любо́вїю соверша́ющихъ твою̀ па́мѧть , и҆ восхвалѧ́ющихъ твоѧ̀ и҆справле́нїѧ , ꙗ҆́кѡ да неи҆зрече́нныхъ бл҃гъ и҆ нетлѣ́нныѧ сла́вы , ѻ҆́бщницы бꙋ́демъ бл҃года́тїю . сла́ва , и҆ ны́нѣ , боⷢ҇ . Прїимѝ моле́бнꙋю пѣ́снь твои́хъ ра́бъ бцⷣе , ю҆́же ти прино́симъ . влⷣчце помозѝ недоꙋмѣ́ющимъ на́мъ . и҆ ѿ бѣ́дъ и҆зба́ви ста́до своѐ сїѐ , вѣ́рою тѝ припа́дающїѧ в̾ честнѣ́мъ твое́мъ хра́мѣ . ты́ бо сп҃са ро́ждьши , и҆́маши дерзнове́нїе ꙗ҆́кѡ тогѡ̀ мт҃и , молѝ спасти́сѧ дш҃а́мъ на́шимъ . крⷭ҇тобоⷢ҇ . На́ древѣ крⷭ҇тнѣмъ і҆с҃е , ра́спѧта ви́дѧщи неи҆скꙋсобра́чнаѧ , пла́чꙋщи гл҃аше . ча́до сла́дкое , почто́ мѧ ѡ҆ста́ви ро́ждьшꙋю тѧ̀ є҆ди́нꙋ , свѣ́те неприкоснове́нныи пребезнача́льнагѡ ѻ҆ц҃а . потщи́сѧ и҆ просла́висѧ , ꙗ҆́кѡ да сла́вы полꙋча́тъ бжⷭ҇твеныѧ , и҆́же ст҃ы́ѧ твоѧ̀ стрⷭ҇ти сла́вѧщїи .

На оу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на́ ѕ҃ . кано́нъ ст҃о́мꙋ . є҆мꙋ́же краегране́сїе сицево̀ : прⷣтчева подража́телѧ хвалю̀ . творе́нїе і҆ѡ́сифово . гла́съ , д҃ . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́въ : Прпⷣбне ѻ҆́ч҃е і҆ѡани́кїе , молѝ бг҃а ѡ҆ на́съ .= Свѣ́томъ бл҃года́ти ѡ҆зарѧ́емь прпⷣбне , вѣ́рою па́мѧть твою̀ торжествꙋ́ющихъ просвѣтѝ . и҆ тмы̀ грѣхо́вныѧ , мл҃твами твои́ми и҆зба́ви і҆ѡани́кїе . Пꙋ́ть в̾водѧ́щь невоз̾вра́тно ше́ствовалъ є҆сѝ ко́ градꙋ нбⷭ҇номꙋ і҆ѡани́кїе . и҆́бо ст҃ы́и наста́ви тѧ дх҃ъ , почива́ющь въ срⷣцы твое́мъ . Воз̾носѧ́щее смире́нїе і҆ѡани́кїе и҆мѣ́лъ є҆сѝ . тѣ́м̾тисѧ мо́лимъ , оу҆ще́дри прпⷣбне смире́нїе на́ше , и҆ болѣ́зни всѧ̀ ѡ҆блегчѝ срⷣцъ на́шихъ . =боⷢ҇ . Па́дшимъ воста́нїе , и҆ стоѧ́щимъ оу҆крѣпле́нїе сꙋ́щи всенепоро́чнаѧ . тѣ́м̾тисѧ молю̀ , па́дшагѡ ми оу҆ма̀ грѣхо́мъ , и҆спра́ви влⷣчце , ꙗ҆́кѡ да сла́влю тѧ .

пѣ́снь , г҃ . і҆рмо́съ . Твоѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ совокꙋ́пльши дх҃о́венъ оу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы сподо́би . Текꙋ́щихъ стоѧ́щими и҆змѣни́лъ є҆сѝ , смы́слено прїе́мъ сво́й крⷭ҇тъ і҆ѡани́кїе . и҆ на невосходи́мыѧ го́ры , ꙗ҆́кѡ и҆лїѧ̀ вели́кїи восходѧ̀ пре́былъ є҆сѝ . Пꙋ́ть тебѣ̀ ѕѣлѡ̀ жела́емыи ѻ҆ц҃ъ показа̀ дво́ица . и҆́хже ѡ҆брѣ́те лѣ́ты мно́гими , сокрыва́емы в̾ гора́хъ проро́ческимъ даро́мъ просвѣще́ни бл҃же́нне . Коле́блеми страстьмѝ разли́чными , вѣ́рою притека́емъ , къ твоемꙋ̀ покро́вꙋ і҆ѡани́кїе , ст҃ы́ми тѝ хода́тайствы всѧ̀ ны̀ посѣтѝ , молѧ́сѧ чл҃колю́бцꙋ . боⷢ҇ . Кропле́нїемъ ми́лости твоеѧ̀ дв҃о , оу҆́глїе погасѝ мои́хъ страсте́й бг҃ора́дованнаѧ . и҆ оу҆га́сшїи воз̾жзѝ свѣти́льникъ срⷣца моегѡ̀ , златы́и свѣти́льниче пренепоро́чнаѧ .

сѣда́ленъ . гла́съ , и҃ . Страстны́и мра́къ ѡ҆чи́стивъ , и҆ хрⷭ҇то́ва повелѣ́нїѧ ꙗ҆́кѡ вои́стинꙋ свѣ́тъ прїе́мъ , в̾ постѣ̀ просїѧ́лъ є҆сѝ . и҆ оу҆мертви́въ тѣ́лѡ , дх҃омъ ѡ҆́жилъ є҆сѝ . вра́жїѧ сѣ́ти попра́въ бл҃же́нне . тѣ́мъ и҆ вы́шнихъ беспло́тныхъ слꙋ́гъ соприча́стникъ бы́сть дх҃а бл҃года́тїю , і҆ѡани́кїе ѻ҆́ч҃е на́шъ . молѝ хрⷭ҇та̀ бг҃а , грѣхо́въ ѡ҆ставле́нїе дарова́ти пра́з̾днꙋющимъ любо́вїю ст҃ꙋ́ю па́мѧть твою̀ . два́жды . сла́ва , и҆ ны́нѣ , боⷢ҇ . Ꙗ҆́кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище въ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ . крⷭ҇тобоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ восклица́ше слезѧ́щи . ми́ръ оу҆́бѡ ра́дꙋетсѧ прїе́млѧ тобо́ю и҆збавле́нїе . оу҆тро́ба же моѧ̀ гори́тъ зрѧ́щи твоѐ распѧ́тїе , є҆́же терпи́ши за милосе́рдїе ми́лости долготерпѣли́ве гдⷭ҇и . ми́лости бе́здно , и҆ и҆сто́чниче неи҆счерпа́емыи , оу҆милосе́рдисѧ и҆ да́рꙋй грѣхо́въ ѡ҆ставле́нїе , вѣ́рою воспѣва́ющимъ бжⷭ҇твенаѧ твоѧ̀ страда́нїѧ .

пѣ́снь , д҃ . і҆рмо́с̾ . Неи҆зслѣ́дномꙋ бж҃їю совѣ́тꙋ , є҆́же ѿ дв҃ы воплоще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вопїѧ́ше , сла́ва си́лѣ твое́й гдⷭ҇и . Го́ры высо́кїѧ пости́гъ , верхѝ бѣсо́вскїѧ возвыша́емыѧ , смире́нїемъ смири́лъ є҆сѝ мꙋ́дре . и҆ на ни́хъ мꙋ́жествовалъ є҆сѝ , сла́ва и҆́ночествꙋющимъ и҆ оу҆твержде́нїе . Ꙗ҆́кѡ ѻ҆бою́дꙋ ѻ҆́стръ , въ хрⷭ҇то́въ стра́хъ воѡ҆рꙋжи́всѧ , ѕмїѧ̀ ѿстꙋ́пника низ̾ложи́лъ є҆сѝ . разꙋ́мнѡ и҆ чꙋ́вственѡ бл҃же́нне , сщ҃е́нными побѣ́дами прославлѧ́емь . Ве́сь бжⷭ҇твенымъ дх҃омъ распали́всѧ ѻ҆́ч҃е , мра́зъ претерпѣ́лъ є҆сѝ . мно́гими лѣ́ты в̾ пꙋсты́нѧхъ вселѧ́ѧсѧ . и҆скі́и гдⷭ҇а , бл҃года́тїю тѧ̀ бжⷭ҇твеною согрѣва́юща . боⷢ҇ . Тѧ̀ ѡ҆чище́нїе всѣ́мъ земны́мъ вѣ́рою молю̀ , и҆ припа́даю бл҃гослове́наѧ , ми́лостива сꙋдїю̀ и҆ сн҃а твоегѡ̀ сотворѝ , ꙗ҆́кѡ да по́ долгꙋ сла́влю тѧ̀ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща . Ше́ствовалъ є҆сѝ прпⷣбне , оу҆́зкїи и҆ приско́рбныи пꙋ́ть , бжⷭ҇твеными восхожде́нїи срⷣца , и҆ видѣ́нїи разширѧ́емь , и҆ положе́нїемъ ѡ҆божа́емь ꙗ҆́вѣ . тѣ́мъ бы́сть и҆́нокꙋющимъ оу҆твержде́нїе и҆ оу҆краше́нїе . Ꙗ҆́кѡ ѡ҆чи́стившꙋ помышле́нїѧ прпⷣбне , благода́ть тебѣ̀ да́ст̾сѧ прⷪ҇ркꙋ , ꙗ҆́кѡ настоѧ́щаѧ гл҃ати бꙋ́дꙋщаѧ . зрѣ́ти же да́льнаѧ ꙗ҆́кѡ бли́жнѧѧ і҆ѡани́кїе , бж҃їе ѻ҆би́телище . Болѣ́зней мѧ̀ и҆зба́ви грѣхо́вныхъ и҆ скорбе́й , оу҆толѝ срⷣца моегѡ̀ лю́тость . и҆ грѣхопаде́нїемъ разрѣше́нїе да́рꙋй . бл҃года́телѧ бг҃а и҆мѣ́ѧ послꙋ́шающа честны́хъ ти моли́твъ . боⷢ҇ . Оу҆ма̀ моегѡ̀ , оу҆врачꙋ́й и҆зстꙋпле́нїемъ всенепоро́чнаѧ . и҆ оу҆сцѣлѝ стрⷭ҇ти дш҃е́вныѧ мѝ , и҆ оу҆ны́нїѧ тмꙋ̀ ѿженѝ . ꙗ҆́кѡ да восхвалѧ́ю тѧ̀ пѣ́сненѡ приснобл҃же́ннаѧ бцⷣе всепѣ́таѧ .

пѣ́снь , ѕ҃ . і҆рмо́съ . Бжⷭ҇твеное сѐ и҆ всечⷭ҇тно́е соверша́юще пра́зднество , бг҃омꙋ́дрїи бж҃їѧ мт҃ре , прїиди́те рꙋка́ми воспле́щемъ , ѿ неѧ̀ ро́ждьшагосѧ вѣ́рою сла́вѧще . Оу҆вѧди́въ стра́сти тѣле́сныѧ , ꙗ҆́кѡ дре́во оу҆зрѣ́сѧ высокове́рхое . плоды̀ чꙋде́сныѧ , и҆ честна́ѧ и҆справле́нїѧ сщ҃е́нно носѧ̀ бг҃обл҃же́нне . И҆сцѣли́ тѧ гдⷭ҇ь ꙗ҆вле́нїемъ є҆ѵ̾ста́фїѧ мч҃нка , ꙗ҆́да всепа́гꙋбна и҆спи́вша всебога́те рꙋко́ю непра́ведною , и҆ бѣ́дствꙋюща . Тма́мъ болѣ́зней прибли́жихсѧ , тѣ́ломъ не́мощенъ низлежа̀ і҆ѡани́кїе . тѣ́мъ вѣ́рою зовꙋ́ ти , болѣ́зни оу҆толѝ срⷣца моегѡ̀ . боⷢ҇ . Є҆ди́на всѣ́мъ поможе́нїе , помозѝ на́мъ бѣ́дствꙋющимъ . и҆ рꙋ́кꙋ пода́ждь , и҆ к̾ приста́нищꙋ введѝ спасе́нїѧ , ѻ҆трокови́це бг҃обл҃года́тнаѧ .

конда́къ . гла́съ , и҃ . Свѣти́льникъ ꙗ҆ви́сѧ свѣ́тлыи , сїѧ́ѧ в̾ ми́рѣ , и҆ в̾ мра́цѣ страсте́й ѡ҆блиста́ѧ . вра́чь же крѣ́покъ показа́лсѧ є҆сѝ . но ꙗ҆́кѡ прїе́мыи бл҃года́ть и҆сцѣле́нїемъ , просѧ́щимъ оу҆ тебѐ пода́ждь цѣльбꙋ̀ . да зове́мъ тѝ , ра́дꙋисѧ ѻ҆́ч҃е і҆ѡани́кїе . и҆́косъ . Дрꙋгі́и ѻ҆́ч҃е ꙗ҆ви́сѧ вра́чь и҆ пред̾ста́тель , недꙋ́ги ѡ҆держи́мымъ и҆ скорбьмѝ , і҆ѡани́кїе чꙋ́дне . и҆сцѣлѧ́ѧ всѣ́хъ вѣ́рнѡ притека́ющихъ под̾ бжⷭ҇твеныи кро́въ тво́й . тѣ́мъ и҆ ѿ на́съ слы́шиши , ра́дꙋисѧ ѻ҆ц҃а бл҃га́гѡ ко́рене . ра́дꙋисѧ ма́тере бл҃гі́ѧ вѣ́твь . ра́дꙋисѧ и҆́же тѣ́хъ любо́вь ѿри́нꙋвыи ра́дꙋисѧ и҆́же є҆ди́наго бг҃а прїе́мыи . ра́дꙋисѧ ꙗ҆́кѡ ѡ҆ста́вилъ є҆сѝ земно́е во́инство , ра́дꙋисѧ ꙗ҆́кѡ низ̾ложи́лъ є҆сѝ ва́рварскꙋю горды́ню . ра́дꙋисѧ стѣна̀ и҆ храни́тель цр҃е́мъ бы́выи . ра́дꙋисѧ ѻ҆рꙋ́жїе и҆ сто́лпъ ми́рови ꙗ҆́вльсѧ . ра́дꙋисѧ ꙗ҆зы́ческїѧ разрꙋша́ѧ бра́ни . ра́дꙋисѧ свѣти́льниче сїѧ́ѧ чꙋдесы̀ . ра́дꙋисѧ наги́мъ покрови́телю , ра́дꙋисѧ плѣ́ннымъ и҆зба́вителю . ра́дꙋисѧ ѻ҆́ч҃е і҆ѡани́кїе .

пѣ́снь , з҃ . і҆рмо́съ . Непослꙋжи́ша тва́ри бг҃омꙋ́дрїи па́че зижди́телѧ , но ѻ҆́гненное преще́нїе , мꙋ́жески попра́вше ра́довахꙋсѧ пою́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Се́рдце своѐ трⷪ҇цѣ жили́ще содѣ́лалъ є҆сѝ , трѝ созда́въ цр҃кви . в̾ ни́хже бжⷭ҇твеною бл҃года́тїю і҆ѡани́кїе , мѵ́ро и҆сточа́еши , в̾ просвѣще́нїе и҆ ѡ҆чище́нїе вѣ́рою приходѧ́щимъ . Дш҃а твоѧ̀ свѣтозаре́нїемъ бжⷭ҇твенагѡ дх҃а ѡ҆сщ҃а́ема прⷭ҇нѡ , дш҃ъ зрѧ́ше вѣ́рныхъ приходѧ́щихъ тѝ , свѣ́тъ бл҃же́нне и҆ двиза́нїѧ . пррⷪ҇ческими провидѣ́ньми сщ҃е́ннѡ оу҆дивлѧ́ема . Недꙋ́гъ ѡ҆бꙋрева́ющихъ мѧ бл҃же́нне дш҃и́ же и҆ тѣлесѐ , твои́ми ст҃ы́ми моли́твами ско́рѡ и҆зба́ви . и҆ пѣ́ти сотворѝ , препѣ́тыи ѻ҆ц҃ъ на́шихъ бж҃е бл҃гослове́нъ є҆сѝ . боⷢ҇ . Неи҆змѣ́ннѡ ро́ждьшаѧ є҆ди́на гдⷭ҇а бг҃ора́дованнаѧ . десни́цею є҆гѡ̀ чи́стаѧ премѣни́ти ми оу҆́мъ . моли́сѧ к̾ лꙋ́чшимъ , лю́тѣ совраща́емъ жите́йскими печа́льми .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Стоѧ́щꙋ тѝ высоко̀ на горѣ̀ , ꙗ҆́кѡ на свѣ́щницѣ свѣти́льникъ прпⷣбне , всѣ́хъ помышле́нїѧ вѣ́рою просвѣща́ше . показꙋ́ѧ и҆зрѧ́днѡ словесы̀ и҆ дѣ́лы стезю̀ живота̀ , и҆ возводѧ̀ си́хъ бжⷭ҇твенымъ сло́вомъ , к̾ высотѣ̀ без̾стра́стїѧ . Оу҆мо́мъ без̾стра́стїѧ ѡ҆чи́щенъ , бесѣ́доваше гдⷭ҇ви вседержи́телю . ѿ него́же неи҆з̾гл҃аннымъ прпⷣбне наꙋча́емь , проро́чески пред̾гл҃аше . просвѣща́ѧ дш҃а , ꙗ҆́кѡ вели́къ всебл҃же́нне прⷪ҇ркъ . тѣ́мъ тѧ̀ согла́снѡ вѣ́рнїи похвалѧ́емъ . Постиго́ша мѧ ра́ны тѧ́жкїѧ , и҆ недꙋ́зи разли́чнїи смꙋща́ютъ . си́хъ мѧ и҆зба́ви ѻ҆́ч҃е молю́тисѧ , ꙗ҆́кѡ ѿ бг҃а прїе́мъ і҆ѡани́кїе бл҃года́ть , врачева́ти стра́сти , и҆ болѣ́зни вѣ́рнымъ ѡ҆блегчева́ти . трⷪ҇ченъ . Со всѣ́ми вы́шними во́инствы , ѻ҆ц҃а и҆ сн҃а и҆ ст҃а́гѡ дх҃а , трⷪ҇цꙋ нераздѣ́льнꙋ , несозда́нное бжⷭ҇тво̀ , пѣсносло́вѧще , ст҃ъ ст҃ъ ст҃ъ возопїе́мъ ра́достїю , є҆ди́на вла́сть нача́ло и҆ црⷭ҇тво . боⷢ҇ . Ꙗ҆ви́сѧ а҆́нг҃лъ вы́шши , бг҃а неи҆зрече́ннѡ вопло́щши . тогѡ̀ оу҆молѝ влⷣчце всенепоро́чнаѧ , плотьски́хъ вы́шша страсте́й бы́ти мѧ оу҆мо́мъ , высото́ю смире́нїѧ , пѣсносло́вѧща твою̀ вели́кꙋю бл҃года́ть .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃омъ просвѣща́емъ . да ликовствꙋ́етъ же , беспло́тныхъ оу҆мо́въ є҆стество̀ , почита́ѧ ст҃о́е торжество̀ бж҃їѧ мт҃ре . и҆ да пое́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Оу҆крѣпи́сѧ , бг҃ꙋ оу҆́мъ тѝ оу҆тверди́вшꙋ оу҆держа́ти стра́сти . а҆́нг҃лъ в̾ плотѝ ѿ сю́дꙋ ѻ҆́ч҃е бы́сть , и҆ со а҆́нг҃лы на́ нб҃сѣхъ живе́ши всегда̀ . нбⷭ҇нагѡ жили́ща сла́вы престо́лꙋ пред̾стоѧ̀ , и҆ свѣ́та невече́рнѧгѡ и҆сполнѧ́емь . Ꙗ҆́кѡ на́ нб҃о на́ горы и҆ вертьпы̀ всели́лсѧ є҆сѝ прпⷣбне . тѣ́мтисѧ оу҆кроти́ша ди́вїи ѕвѣ́рїе , покори́вшꙋ стра́сти дш҃е́вныѧ , неоу҆до́бь покори́мыѧ і҆ѡани́кїе . и҆ пра́веднꙋ оу҆́же бы́вшꙋ . сегѡ̀ ра́ди вѣ́рнѡ тѧ почита́емъ . Твоѧ̀ сщ҃е́нныѧ и҆ ст҃ы́ѧ мо́щи во́ гробѣ лежа́ще , недꙋ́ги погрꙋжа́ютъ . и҆ попалѧ́ютъ полкѝ бѣсо́вскїѧ всегда̀ , мꙋ́дре і҆ѡани́кїе бж҃їею бл҃года́тїю . и҆ то́чиши всѣ́мъ и҆сцѣле́нїе , вѣ́рно тѧ̀ при́снѡ бл҃жа́щимъ . Оу҆́же хрⷭ҇то́ви приближа́ѧсѧ ꙗ҆снѣ́йше и҆ чистѣ́йше , помѧнѝ вѣ́рою тѧ помина́ющихъ і҆ѡани́кїе . грѣхо́въ проще́нїѧ на́мъ просѧ̀ , и҆ недꙋ́гъ всѣ́хъ и҆збавле́нїѧ . и҆ нбⷭ҇нагѡ црⷭ҇твїѧ сподо́битисѧ . боⷢ҇ . Просвѣтѝ чⷭ҇таѧ дш҃и моеѧ̀ ѻ҆́чи , свѣ́та поро́ждьшаѧ . да непости́гнетъ мѧ̀ грѣхо́внаѧ тма̀ тѧжка́ѧ , нижѐ глꙋбина̀ покры́етъ мѧ̀ ѿча́ѧнїѧ . но ты́ мѧ спасѝ и҆ ѡ҆кормѝ к̾ приста́нищꙋ бжⷭ҇твенагѡ хотѣ́нїѧ .

свѣти́ленъ . Бл҃года́ть преи҆збы́сть бж҃їѧ в̾ дш҃и твое́й премꙋ́дре і҆ѡани́кїе , беспло́тнѡ живꙋ́щꙋ . тѣ́мъ почита́ющихъ тѧ̀ , страсте́й и҆зба́ви те́мныхъ ѻ҆́блакъ . к̾ ти́хомꙋ приста́нищꙋ вводѧ̀ , и҆ ѿгонѧ́ѧ ѡ҆полче́нїѧ бѣсо́вскаѧ . боⷢ҇ . Сотворѝ вои́стинꙋ с̾ тобо́ю вели́чїѧ , сн҃ъ пред̾вѣ́чныи ѻ҆́ч҃имъ совѣ́томъ . жи́знь бо нетлѣ́ннꙋю без̾ стра́сти родила̀ є҆сѝ . и҆ пребы́сть ꙗ҆́коже пре́жде ржⷭ҇тва̀ , мт҃рьскихъ и҆збѣ́гши , и҆ па́ки по ржⷭ҇твѣ̀ пребы́вши дв҃ою .

На стихо́внѣ , во ѻ҆кта́и . сла́ва . гла́съ , ѕ҃ . И҆́же по ѻ҆́бразꙋ соблю́дъ невреди́мо , оу҆ма̀ влⷣкꙋ на́ страсти па́гꙋбныѧ по́стнически поста́вивъ . и҆ на подо́бьствїе ꙗ҆́коже мо́щно воз̾ше́лъ є҆сѝ . мꙋ́жески бо є҆стество̀ понꙋ́дивъ , потща́лсѧ є҆сѝ хꙋ́ждьшее покори́ти лꙋ́чьшемꙋ , и҆ пло́ть порабо́тити дх҃ꙋ . тѣ́мъ и҆́ночествꙋющимъ ꙗ҆ви́сѧ наста́вникъ , жи́тель пꙋсты́нныи . до́брѣ текꙋ́щимъ ѡ҆бꙋчи́тель , пра́вило добродѣ́телей и҆звѣ́стное . и҆ ны́нѣ на́ нб҃сѣхъ зерца́ломъ раз̾рѣ́шшимсѧ ѻ҆́ч҃е на́шъ і҆ѡани́кїе чи́стѣ зри́ши ст҃ꙋ́ю трⷪ҇цꙋ сы́и посредѣ̀ , моли́сѧ ѡ҆ и҆́же вѣ́рою и҆ любо́вїю чтꙋ́щихъ тѧ̀ .

и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . всѐ оу҆пова́нїе .= Ѻ҆=рꙋ́жїе ꙗ҆́коже речѐ сѷмеѡ́нъ ,꙳ срⷣце твоѐ про́йде пречⷭ҇таѧ влⷣчце .꙳ є҆гда̀ ви́дѣ и҆з̾ тебѐ воз̾сїѧ́вшаго ,꙳ неи҆зрече́ннымъ сло́вомъ ,꙳ без̾зако́нными ꙗ҆́кѡ ѡ҆сꙋжде́нна ,꙳ и҆ на́ крⷭ҇тъ воз̾несе́нна ,꙳ ѻ҆цта́ же и҆ же́лчи вкꙋша́юща ,꙳ ре́бра же и҆скопава́ема ,꙳ рꙋка́ма же и҆ нога́ма пригвожде́на ,꙳ и҆ рыда́ющи восклица́ше ,꙳ вопїю́щи мт҃рьски .꙳ что́ се ча́до сла́дкое , но́вое та́инство .

На литꙋргі́и . проки́менъ , ѱл҃о́мъ давы́довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ= гала́тѡмъ . зача́ло , сг҃і . а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , в̾ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =матѳе́ѧ . заⷱ҇ , і҃ . =прича́стенъ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>