5 ноября: свв. мчч. Галактиона и Епистимии

МЦⷭ҇А ТОГО́ЖЕ ВЪ Є҃ ДН҃Ь

ст҃ы́хъ мч҃нкъ галактїѡ́на и҆ є҆писти́мїи . =И҆ преставле́нїе и҆́же во ст҃ы́хъ ѻ҆ц҃а на́шегѡ і҆ѡ́ны , а҆рхїє҆пкⷭ҇па вели́кагѡ новагра́да чꙋдотво́рца . слꙋ́жба є҆мꙋ̀ пи́сана по се́й слꙋ́жбѣ .=

В=е́черъ , на гдⷭ҇и возва́хъ , стихѣ́ры . гла́съ , и҃ . поⷣ . ѽ =пресла́вное чꙋ́до . Млеко́мъ воспитѣ́нъ вѣ́ры .꙳ мꙋ́къ ра́ди мно́гихъ галактїѡ́не и҆ скорбе́й ,꙳ къ хрⷭ҇то́вꙋ преше́лъ є҆сѝ вертьпꙋ̀ .꙳ бы́сть прїѧ́тна же́ртва ,꙳ и҆ соверше́но заколе́нїе ,꙳ самово́льнымъ оу҆стремле́нїемъ всебога́те .꙳ ѽле тве́рдыѧ тѝ ,꙳ и҆ и҆звѣ́стныѧ вѣ́ры ,꙳ є҆ю́же бг҃а полꙋчѝ ,꙳ ѡ҆божа́емь ны́нѣ соверше́нѣйше . Хꙋдо́жественѣ взыска́ла є҆сѝ ,꙳ бл҃ги́хъ и҆сто́чника жела́нныхъ кра́йнее .꙳ тогѡ̀ свѣ́тлостїю ,꙳ и҆ дш҃ꙋ и҆ помышле́нїе ,꙳ ѡ҆зари́ла є҆сѝ бг҃обл҃же́ннаѧ .꙳ и҆ низ̾ложи́ла є҆сѝ крѣ́пкими противле́нїи ,꙳ многоко́зненаго ста́раго мꙋчи́телѧ .꙳ є҆ди́нствꙋющимъ бжⷭ҇твеное оу҆краше́нїе ,꙳ мч҃нце многострада́льнаѧ . Два̀ свѣти́льника пресвѣ́тлаѧ ,꙳ восто́ка разꙋ́мнагѡ ,꙳ восїѧ́ста бл҃года́ти .꙳ и҆ тва́рь всю̀ бл҃гоче́стнѡ ѡ҆зарѧ́ета ,꙳ превосходѧ́щими страсте́й свѣтлостьмѝ ,꙳ и҆ и҆сцѣле́нїи бжⷭ҇твеными разжже́нїи .꙳ є҆ю́же пресвѣ́тлыи пра́здникъ почита́юще ,꙳ тѣ́хъ ра́ди всѣ́хъ ,꙳ ѡ҆сщ҃а́ющагѡ хрⷭ҇та̀ просла́вимъ .

сла́ва , и҆ ны́нѣ , боⷢ҇ . подо́бенъ , то́йже . Ра́дꙋисѧ дш҃а́мъ просвѣще́нїе ,꙳ согрѣша́ющимъ проще́нїе ,꙳ неради́вымъ и҆справле́нїе .꙳ ра́дꙋисѧ оу҆тѣше́нїе и҆ ра́дость ,꙳ скорбѧ́щимъ помо́щнице .꙳ ра́дꙋисѧ бл҃га́ѧ ,꙳ немощны́хъ дш҃ъ и҆сцѣле́нїе .꙳ ра́дꙋисѧ примире́нїе къ бг҃ꙋ и҆ хода́таице .꙳ серафи́мъ всѣ́хъ ꙗ҆́кѡ сꙋ́щи ст҃ѣ́йши чи́стаѧ . крⷭ҇тобоⷢ҇ . Тѧ̀ пригвожда́ема ви́дѧщи на крⷭ҇тѣ̀ і҆с҃е , и҆ стрⷭ҇ти прїе́млюща во́лею влⷣко , дв҃аѧ мт҃и твоѧ̀ , оу҆вы̀ мнѣ̀ вопїѧ́ше , ча́до сла́дкое , ра́ны без̾пра́вды ка́кѡ терпи́ши , врачꙋ̀ и҆сцѣли́выи чл҃кѡмъ не́мощь , и҆ ѿ тлѝ всѣ́хъ и҆зба́вивыи милосе́рдїемъ свои́мъ .

На оу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . є҆мꙋ́же краегране́сїе сицево̀ : сꙋпрꙋ́га страда́льца несꙋпрꙋ́жна пѣ́ти подоба́етъ . гла́съ , и҃ . пѣ́снь , а҃ . і҆рмо́съ . И҆стрѧ́сшагѡ въ мо́ри мꙋчи́тельство фараѡ́не , и҆ по́ сꙋхꙋ і҆зра́илѧ наста́вльша . воспое́мъ бг҃ови , ꙗ҆́кѡ просла́висѧ во́ вѣки .

запѣ́въ : Ст҃і́и мч҃нцы , моли́те бг҃а ѡ҆ на́съ .= Животворѧ́щѣй трⷪ҇цѣ всебл҃же́нне пред̾стоѧ̀ ра́достнѡ , и҆ свѣ́тлыми мо́лнїѧми просвѣща́емь , и҆спросѝ просвѣще́нїе , совѣрша́ющимъ твою̀ ст҃ꙋ́ю па́мѧть . =Ѿ =дх҃а ст҃а́гѡ распали́въ свою̀ дш҃ꙋ , пожжѐ стра́сти плотьскі́ѧ посто́мъ , и҆ погаси́лъ є҆сѝ ѻ҆́гнь без̾бо́жїѧ кро́вными стрꙋѧ́ми . Ро́дъ и҆ бога́тство и҆ держа́вꙋ хрⷭ҇та̀ ра́ди ѡ҆ста́вивъ . взе́мъ прпⷣбне крⷭ҇тъ и҆́ночествовалъ є҆сѝ бг҃олѣ́пнѡ , со є҆писти́мїею бл҃же́нною тѝ сꙋпрꙋ́гою . =боⷢ҇ . Застꙋ́пнице скорбѧ́щимъ , спасе́нїе и҆ наде́жде ненадѣ́ющимсѧ бцⷣе всепѣ́таѧ , молѝ прилѣ́жнѡ и҆зба́витисѧ на́мъ ѿ бѣ́дъ .

пѣ́снь , г҃ . і҆рмо́съ . Оу҆тверже́и нб҃са̀ сло́вомъ сѝ , и҆ зе́млю ѡ҆снова́въ , над̾ вода́ми мно́гими , оу҆тверди́ мѧ на пѣ́нїе , славосло́вїѧ твоегѡ̀ гдⷭ҇и . Дневнꙋ́ю ѕвѣздꙋ̀ , ѿ непло́дныхъ чре́слъ мч҃нче тѧ̀ прои҆зведѐ ро́ждьшаѧ тѧ̀ , но́щь без̾бо́жїѧ разорѧ́юща . Чистото́ю любвѐ ѡ҆держи́мь , дѣ́вствовати наꙋчѝ с̾ тобо́ю сꙋпрꙋ́жницꙋ . с̾ не́юже пострада́въ зако́нно мч҃нче галактїѡ́не просла́висѧ . Ѽле жены̀ , предѝ и҆скꙋше́нїѧ мч҃нческаѧ наꙋчи́вшїѧсѧ всѧ̀ приклю́чшаѧсѧ , ѿкрове́нїемъ бжⷭ҇твенымъ , и҆ низ̾ло́жши мꙋчи́телѧ . боⷢ҇ . Оу҆мерщве́на страстьмѝ вре́дными жи́ва сотвори́ мѧ , живо́тъ поро́ждьшаѧ , разори́вшагѡ ѻ҆трокови́це всю̀ сме́ртнꙋю си́лꙋ .

сѣда́ленъ . гла́съ , д҃ . Посто́мъ оу҆краси́вшꙋ тѝ чистотꙋ̀ дш҃е́внꙋю , лꙋча́ми же страда́нїѧ просвѣща́еши вѣ́рныхъ галактїѡ́не бл҃же́нне . тѣ́мъ тво́й ст҃ы́и и҆ свѣтоно́сныи де́нь вѣ́рою соверша́юще бл҃гоче́стнѡ вопїе́мъ . ꙗ҆́кѡ и҆мѣ́ѧ дерзнове́нїе к̾ бг҃ꙋ , молѝ спасти́сѧ на́мъ . сла́ва , и҆ ны́нѣ , боⷢ҇ . Ѡ҆бнови́ла є҆сѝ пречⷭ҇таѧ бжⷭ҇твенымъ тѝ ржⷭ҇тво́мъ растлѣ́вшее страстьмѝ землены́хъ ме́ртвеное сꙋщество̀ , и҆ воз̾ста́вила є҆сѝ всѣ́хъ к̾ животꙋ̀ нетлѣ́нїѧ . тѣ́мъ тѧ по́ долгꙋ велича́емъ всѝ дв҃о пресла́внаѧ , ꙗ҆́коже прорекла̀ є҆сѝ . крⷭ҇тобоⷢ҇ . Дв҃о всенепоро́чнаѧ мт҃и хрⷭ҇та̀ бг҃а . ѻ҆рꙋ́жїе про́йде твою̀ прест҃ꙋ́ю дш҃ꙋ , є҆гда̀ распина́ема оу҆зрѣ̀ сн҃а и҆ бг҃а своегѡ̀ . є҆го́же бл҃гослове́наѧ молѧ́щи непреста́й , ѡ҆ставле́нїе грѣхо́въ дарова́ти на́мъ .

пѣ́снь , д҃ . і҆рмо́съ . И҆з̾ горы̀ присѣ́нныѧ сло́ве проро́къ , и҆з̾ є҆ди́ныѧ бцⷣы хотѧ́щасѧ воплоти́ти , бг҃ови́днѡ раз̾смо́трь , и҆ со́ страхомъ славосло́вѧши си́лꙋ твою̀ . А҆́гницы слове́снїи ꙗ҆ви́стесѧ , па́стырю всецр҃е́ви ꙗ҆́вствено послѣ́дꙋюще , и҆ в̾ нбⷭ҇нѣй ѡ҆гра́дѣ вѣнцено́сцы с̾ мч҃нки всели́стасѧ . Сопрѧже́нїе и҆з̾бра́ннѡ ꙗ҆ви́стасѧ , раздѣлѧ́юще браздꙋ̀ чⷭ҇тна́гѡ и҆ до́брагѡ свидѣ́тельства . и҆ содѣ́ласте кла́съ в̾ жи́тницахъ нбⷭ҇ныхъ соблюда́емь . По хрⷭ҇тѣ̀ оу҆сѣка́еми до́блїи , но́зѣ и҆ главы̀ и҆ но́гти и҆ рꙋ́ки , и҆скорени́сте ле́сть нече́стїѧ , и҆ побѣдоно́сцы ꙗ҆ви́стесѧ . боⷢ҇ . Ꙗ҆зы́къ земны́хъ не мо́жетъ воспѣ́ти тѧ бж҃їю роди́тельницꙋ , ꙗ҆́вльшꙋюсѧ всенепоро́чнаѧ пречⷭ҇таѧ , хрⷭ҇тїа́номъ прибѣ́жище .

пѣ́снь , є҃ . і҆рмо́съ . Оу҆́треннююще вопїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Ꙗ҆́кѡ млеко́мъ воспитѣ́всѧ по́стнически галактїѡ́не , во и҆сполне́нїе соверше́ное хрⷭ҇то́выхъ стрⷭ҇те́й дости́глъ є҆сѝ . Оу҆мо́мъ ѡ҆чище́номъ ви́дѣла є҆сѝ є҆писти́мїе взѧта̀ превысоко̀ , ст҃ы́хъ на поко́ище . Мч҃нкѡмъ соводворе́нїе полꙋчи́сте в̾ вы́шнихъ , без̾сме́ртнꙋю сла́вꙋ прпⷣбномч҃нцы ѡ҆брѣто́сте . боⷢ҇ . Родила̀ є҆сѝ во́ времѧ без̾вре́меннагѡ пречⷭ҇таѧ бы́вша чл҃ка , да спасе́тъ чл҃ка .

пѣ́снь , ѕ҃ . і҆рмо́съ . Ри́зꙋ ми пода́ждь свѣ́тлꙋ , ѡ҆дѣѧ́исѧ свѣ́томъ ꙗ҆́кѡ ри́зою , многомлⷭ҇тиве хрⷭ҇тѐ бж҃е на́шъ . Ба́нею бжⷭ҇твенагѡ просвѣще́нїѧ к̾ без̾сꙋпрꙋ́жнымъ пристꙋпи́сте . кро́вїю послѣдѝ кр҃щьшесѧ страда́льцы соверше́ннѣйше . Мно́гимъ жесточество́мъ дш҃ꙋ просвѣти́въ посто́мъ , краснꙋ̀ ꙗ҆ви́лъ є҆сѝ галактїѡ́не свѣ́томъ страда́нїѧ . На колесни́цѣ кро́ви ва́шеѧ всѣ́дше мч҃нцы , и҆ пꙋ́ть постиго́сте нбⷭ҇ныи , в̾ не́мже почива́ете . боⷢ҇ . Равноче́стна родила̀ є҆сѝ ѻ҆ц҃ꙋ сн҃а неи҆скꙋсобра́чнаѧ . и҆ млеко́мъ пита́ла є҆сѝ , пита́телѧ всѣ́хъ па́че оу҆ма̀ .

пѣ́снь , з҃ . і҆рмо́съ . А҆́нг҃лѡмъ ѻ҆́троки ѿ ѻ҆гнѧ̀ спасѐ , и҆ гремѧ́щꙋю пе́щь преложи́въ на́ хладъ , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . Оу҆невѣ́стившисѧ сло́вꙋ є҆писти́мїе бжⷭ҇твеномꙋ , тѧ̀ ѡ҆бнажи́ти тща́щихсѧ ѡ҆слѣпи́ла є҆сѝ невѣ́рныѧ . и҆ пока́ѧвшасѧ , свѣ́тꙋ ча́да ꙗ҆ви́ла є҆сѝ . Пожре́ти богѡ́мъ без̾дꙋ́шнымъ ѿре́кшесѧ ѿ ню́дъ , и҆́стинномꙋ бг҃ꙋ на́шемꙋ и҆ дш҃а́мъ влⷣцѣ же́ртва мч҃нцы честна́ѧ принесо́стесѧ . На ѻ҆́гнь мꙋче́нїѧ приведе́нъ галактїѡ́не , кровны́ми пото́ки без̾бо́жїѧ пла́мы мч҃нче погаси́лъ є҆сѝ мꙋ́дре . вопїѧ̀ , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . боⷢ҇ . Съ вы́шними всѣ́ми нбⷭ҇ными чи́нми велегла́снѡ тѧ̀ всѝ бг҃ороди́тельнице ѻ҆трокови́це тобо́ю спасе́нїи блажи́мъ .

пѣ́снь , и҃ . і҆рмо́съ . Без̾нача́льнагѡ цр҃ѧ сла́вы , є҆го́же трепе́щꙋтъ нбⷭ҇ныѧ си́лы , по́йте сщ҃е́ннїи , лю́дїе превозноси́те є҆гѡ̀ во́ вѣки . Равноче́стны чистото́ю , и҆ равнѝ поще́нїемъ и҆ страда́нїемъ сꙋ́ще , ра́вныѧ ѿ бг҃а полꙋчи́сте да́ры до́блїи страда́льцы . Сочета́нїе нетлѣ́нїемъ сохрани́сте , воз̾желѣ́вше а҆́нг҃льское житїѐ , с̾ ни́ми же ра́достно гдⷭ҇ви стрⷭ҇тоно́сцы ликꙋ́ете досто́йно . Стоѧ̀ пред̾ сꙋди́щемъ мꙋ́жески , проповѣ́далъ є҆сѝ мч҃нче є҆ди́наго гдⷭ҇а бг҃а и҆́стиннаго . и҆ многобо́жїѧ разрꙋши́лъ є҆сѝ шата́нїе . боⷢ҇ . Ꙗ҆́кѡ че́стенъ и҆ превы́ш̾шїи прⷭ҇то́лъ сꙋ́щꙋю бг҃а вы́шнѧгѡ воспое́мъ лю́дїе , є҆ди́нꙋ по ржⷭ҇твѣ̀ мт҃рь и҆ дв҃ꙋ .

пѣ́снь , ѳ҃ . і҆рмо́съ . Проѧвле́нное на горѣ̀ законода́вцꙋ , ѻ҆гне́мъ и҆ кꙋпино́ю , ржⷭ҇тво̀ при́снѡ дв҃ыѧ . въ на́ше вѣ́рныхъ спасе́нїе , пѣ́сньми немо́лчными велича́емъ . Сто́лпъ ꙗ҆ви́сѧ бг҃омꙋ́дре нбⷭ҇ныи , цр҃кви ѻ҆снова́нїе , и҆ сто́лпъ бл҃гоче́стїѧ , и҆ мч҃нкѡмъ и҆ по́стникомъ галактїѡ́не оу҆твержде́нїе , и҆ бжⷭ҇твеное оу҆добре́нїе . Процвѣла̀ є҆сѝ въ дв҃ьственыхъ цвѣтѣ́хъ ꙗ҆́коже шипо́къ , и҆ во оу҆до́лїѧхъ мч҃нческихъ бл҃гоꙋха́ющи ꙗ҆́кѡ кри́нъ , є҆писти́мїе дв҃о мч҃нце гдⷭ҇нѧ . тѣ́мъ тѧ согла́снѡ оу҆бл҃жа́емъ . Свѣ́томъ трисл҃нчныѧ свѣ́тлости ѡ҆заре́ни , к̾ томꙋ̀ преи҆до́сте ны́нѣ , сн҃ове свѣ́та ꙗ҆́вльшесѧ . моли́тесѧ просвѣще́нїе дарова́ти мч҃нцы вѣ́рою хва́лѧщимъ вы̀ . боⷢ҇ . Ты̀ є҆сѝ бцⷣе ѻ҆рꙋ́жїе на́ше и҆ стѣна̀ , ты̀ є҆сѝ застꙋпле́нїе к̾ тебѣ̀ прибѣга́ющимъ . тѧ̀ ны́нѣ на моли́твꙋ под̾виза́емъ , да и҆зба́вимсѧ ѿ вра́гъ на́шихъ .

Слꙋ́жба и҆́же во ст҃ы́хъ ѻ҆ц҃а на́шегѡ і҆ѡ́ны , а҆рхїє҆пкⷭ҇па вели́кагѡ новагра́да чꙋдотво́рца . =На ма́лѣй вече́рни , на гдⷭ҇и возва́хъ , стⷯры . гла́съ , и҃ . поⷣ . ѽ =пресла́вное чꙋ́до . Водрꙋзе́нїе и҆́стинѣ ,꙳ бл҃гоче́стїѧ согла́сника тѧ̀ зна́емъ ,꙳ и҆ вѣ́рѣ ѡ҆сщ҃е́нїе ,꙳ чистотѣ́ же селе́нїе ,꙳ прїѧ́телище и҆з̾бра́нно ст҃лю прпⷣбне і҆ѡ́но ,꙳ мо́лимъ тѧ̀ в̾ ми́рѣ на́мъ сохранити́сѧ ,꙳ да прⷭ҇нѡ сла́вимъ и҆ воспѣва́емъ гдⷭ҇а на́шегѡ , прославлѧ́ющагѡ ,꙳ и҆ тебѐ ра́ди подаю́щагѡ на́мъ ,꙳ спасе́нїе и҆ ве́лїю млⷭ҇ть . Житїѐ своѐ добродѣ́тельми оу҆краси́въ ,꙳ свѣти́льникъ ꙗ҆́вѣ бы́въ и҆ храни́тель хрⷭ҇то́вꙋ ста́дꙋ .꙳ дѣѧ́нїѧ бо видѣ́нїѧ ꙗ҆́вѣ , показа́лъ є҆сѝ восхожде́нїемъ .꙳ ꙗ҆́кѡ дш҃ꙋ согласи́лъ є҆сѝ дѣ́тельно ,꙳ и҆ и҆зрѧ́днѡ к̾ видѣ́нїю взѧ́тсѧ .꙳ и҆ зри́ши гдⷭ҇а ст҃лю і҆ѡ́но .꙳ є҆мꙋ́же прилѣ́жнѡ моли́сѧ дарова́ти ми́ръ ми́рови .꙳ спасе́нїе же и҆ мно́гꙋю ми́лость ,꙳ почита́ющимъ на́мъ сщ҃е́ннꙋю па́мѧть твою̀ . Воз̾держа́нїемъ пре́жде оу҆мертви́въ ,꙳ плотьска́ѧ мꙋдрова́нїѧ ,꙳ сщ҃еннодѣ́йственикъ бы́лъ є҆сѝ ,꙳ бж҃їѧ бжⷭ҇твенѡ сверша́ѧ .꙳ и҆ чистѣ́йшимъ по́мысломъ чи́стѣ прикаса́ѧсѧ ,꙳ слꙋжи́тель ꙗ҆ви́сѧ вседержи́телю ст҃лю і҆ѡ́но .꙳ є҆го́же оу҆молѝ , ꙗ҆́кѡ всемлⷭ҇тива и҆ бл҃га ,꙳ дарова́ти смире́нїе ми́рови ,꙳ и҆ дш҃а́мъ на́шимъ ве́лїю млⷭ҇ть .

сла́ва . гла́съ , д҃ . Весели́сѧ и҆ ра́дꙋйсѧ вели́кїи но́въ гра́де . да и҆гра́ютъ сн҃ы твоѧ̀ в̾ тебѣ̀ , свѣ́тлѡ торжествꙋ́юще в̾ па́мѧть ст҃лѧ і҆ѡ́ны . си́рымъ и҆ вдови́цамъ пред̾ста́телѧ . скорбѧ́щимъ оу҆тѣ́шителѧ . прибѣга́ющимъ к̾ немꙋ̀ помо́щника , и҆ те́пла застꙋ́пника . призыва́ющимъ є҆гѡ̀ ско́рѡ послꙋ́шающа . люде́й на́шихъ на милосе́рдїе и҆ ти́хость прелага́юща , и҆ проти́вныѧ примирѧ́юща . пред̾стои́тъ бо гдⷭ҇ви , молѧ́сѧ оу҆мири́ти ми́ра , и҆ спастѝ дш҃а на́ша .

и҆ ны́нѣ , боⷢ҇ . Ве́лїе и҆ пресла́вное , є҆́же ѡ҆ тебѣ̀ бы́вшее чꙋ́до . и҆ кто̀ дово́ленъ и҆з̾гл҃ати си́лы гдⷭ҇нѧ , ꙗ҆́коже ѡ҆ тебѣ̀ бы́вшаѧ бцⷣе . оу҆страша́етъ бо оу҆́мъ на́шъ , вели́ка видѣ́нїѧ достоѧ́нїѧ . ꙗ҆́кѡ непости́жимаго тѝ та́иньства , глаго́лати немогꙋ́ще . кто́бо слы́ша ѿ́ вѣка дв҃ꙋ дои́вшꙋ , и҆ мт҃рь бе́з̾ мꙋжа ꙗ҆́вльшꙋсѧ на землѝ , и҆ своегѡ̀ содѣ́телѧ ꙗ҆́кѡ младе́нца на рꙋкꙋ̀ носи́вшꙋ . тѣ́мже тѧ̀ всѝ ро́ди оу҆блажа́емъ .

На стихо́внѣ , стихѣ́ры . гла́съ , з҃ . Ѻ҆́ч҃е сщ҃е́нне і҆ѡ́но , ты̀ ѡ҆ст҃и́сѧ бл҃года́тїю всест҃а́гѡ дх҃а , слове́сномꙋ ста́дꙋ хрⷭ҇то́вꙋ . но ꙗ҆́кѡ влⷣцѣ своемꙋ̀ подража́тель , ми́ловати на́съ жи́въ сы́и непреста́лъ є҆сѝ . и҆ ны́нѣ та́коже молѧ̀ непреста́й , и҆з̾ба́вити на́съ ѿ всѧ́когѡ лю́тагѡ ѡ҆б̾стоѧ́нїѧ . и҆ спастѝ дш҃а на́ша .

сти́хъ : гла́съ , а҃ . сщ҃е́нницы твоѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твоѝ воз̾ра́дꙋютсѧ . Ѻ҆́ч҃е преподо́бне і҆ѡ́но , ты̀ земна́ѧ мꙋдрова́нїѧ воз̾держа́нїемъ оу҆мертви́въ , дш҃ꙋ напра́вилъ є҆сѝ к̾ невла́емомꙋ наслажде́нїю . просѝ на́мъ невла́емо прейтѝ пꙋчи́нꙋ житїѧ̀ . пред̾лага́ѧ стро́потное в̾ тишинꙋ̀ , подаѧ̀ хва́лѧщимъ тѧ̀ ми́ръ , и҆ спасе́нїе бл҃же́нне .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ заповѣде́хъ є҆гѡ̀ восхо́щетъ ѕѣлѡ̀ . Ѻ҆́ч҃е і҆ѡ́но бл҃же́нне , да́нныи тѝ тала́нтъ оу҆мно́жилъ є҆сѝ , ра́дости сподо́бисѧ гдⷭ҇а своегѡ̀ . и҆спещре́нъ бл҃года́ти сїѧ́нїемъ , заре́ю дх҃о́вною блиста́ѧ пред̾стои́ши гдⷭ҇ꙋ . просѝ и҆з̾ба́витисѧ на́мъ всѧ́когѡ гнѣ́ва и҆ ѡ҆ѕлобле́нїѧ . да в̾ ми́рѣ сла́вѧще гдⷭ҇а , при́снѡ тѧ̀ оу҆блажа́емъ .

сла́ва . гла́съ , є҃ . Прїидѣ́те вѣ́рныхъ сосло́вїе , соше́дшесѧ восхва́лимъ ст҃лѧ і҆ѡ́нꙋ . и҆́бо до́брыи па́стырь , пасо́мыѧ рꙋководѧ̀ к̾ вѣ́рѣ сло́вомъ и҆́стиннымъ . и҆ вѣ́рꙋ и҆звѣ́ствовати добродѣ́тельми наказꙋ́ѧ . тѣ́мъ и҆ хрⷭ҇то́съ во́здалъ є҆́сть семꙋ̀ мздꙋ̀ , ꙗ҆́кѡ до́бромꙋ рабꙋ̀ своемꙋ̀ . и҆ на́мъ блажа́щимъ па́мѧть є҆гѡ̀ , да́рꙋетъ ꙗ҆́кѡ бл҃гъ мно́жество щедро́тъ свои́хъ є҆гѡ̀ ра́ди , и҆ бога́тꙋю млⷭ҇ть . и҆ ны́нѣ , боⷢ҇ . Ра́дꙋисѧ две́ре мы́сленнаѧ , є҆ю́же про́йде превѣ́чныи бг҃ъ . ра́дꙋисѧ же́зле а҆арѡ́новъ , и҆зрасти́вшїи цвѣ́тъ ѿ ко́рене і҆єссе́ева . ра́дꙋисѧ трапе́зо , ꙗ҆́же хлѣ́бъ жи́зни на пи́щꙋ всемꙋ̀ пода́вши ро́дꙋ чл҃ческомꙋ , дв҃о мт҃и чⷭ҇таѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . И҆справле́нїе вѣ́рѣ , ѻ҆́бразъ кро́тости , и҆ ꙗ҆́коже са́дъ посредѣ̀ раѧ̀ , прпⷣбными дѣ́лы ми́ръ просвѣща́ѧ . сегѡ̀ ра́ди к̾ честнѣ́й ра́цѣ твое́й любо́вїю прикаса́емсѧ , и҆ вѣ́рнѡ вопїе́мъ . пред̾ста́ни хрⷭ҇тꙋ̀ бг҃ꙋ с̾ восхвалѧ́ющими па́мѧть твою̀ свѣтоно́снꙋю , ѻ҆́ч҃е і҆ѡ́но , и҆ молѝ спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . И҆́же ѿ́ вѣка оу҆тае́нное , и҆ а҆́нг҃лѡмъ несвѣ́домое та́иньство , тобо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи воплоща́емъ . и҆ крⷭ҇тъ во́лею на́съ ра́ди воспрїе́мъ , и҆́мъ же воскр҃сѝ первозда́ннаго , и҆ спасѐ ѿ сме́рти дш҃а на́ша . та́же , є҆ктенїѧ̀ ма́лаѧ . =и҆ ѿпꙋ́стъ .

На вели́цѣй вече́рни , бл҃же́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на и҃ . гла́съ , ѕ҃ . поⷣ . в=сѐ оу҆пова́нїе . Ꙗ҆́коже ѕвѣзда̀ восїѧ́лъ є҆сѝ на тве́рди цр҃ко́внѣй ,꙳ ѡ҆зарѧ́ѧ ми́ра ,꙳ и҆справле́нїемъ сло́ва и҆́стиннагѡ , премꙋ́дре і҆ѡ́но .꙳ вдови́цы и҆ сироты̀ снабдѣва́ѧ ѻ҆те́чески ,꙳ и҆ ни́щїѧ ми́лꙋѧ .꙳ ѡ҆би́димыѧ и҆зима́ѧ .꙳ вражды̀ оу҆толѧ́ѧ ,꙳ смире́нїе оу҆твержа́ѧ .꙳ хрⷭ҇то́выхъ за́повѣдей дѣ́лателю ,꙳ ѻ҆́ч҃е всесщ҃е́нне ,꙳ просѝ ми́ра ми́рови мо́лимъ тѧ̀ ,꙳ и҆ спасе́нїѧ дш҃а́мъ на́шимъ . Досто́йно натѧ̀ ст҃льства нарече́нїе ,꙳ прїи́де прпⷣбне ѻ҆́ч҃е ,꙳ ѻ҆троча́ти є҆щѐ тебѣ̀ сꙋ́щꙋ .꙳ дѣѧ́нїѧ бо в̾ тебѣ̀ бг҃оꙋго́днаѧ воспита́ема ,꙳ кро́тость с̾ неѕло́бїемъ .꙳ тѣ́мъ во дворы̀ гдⷭ҇нѧ вселѧ́ешисѧ ,꙳ ꙗ҆́кѡ тако́въ подоба́ше ст҃ль ,꙳ бы́ти прпⷣбенъ .꙳ но ꙗ҆́кѡ и҆́маши дерзнове́нїе ,꙳ молѝ мо́лимъ тѧ оу҆мири́ти ми́ра ,꙳ и҆ спастѝ дш҃а на́ша . Прпⷣбне ст҃лю ,꙳ и҆зво́лилъ є҆сѝ примета́ти себѣ̀ ,꙳ в̾ домꙋ̀ бж҃їи па́че ,꙳ не́же жи́ти в̾ се́лѣхъ ми́ра .꙳ и҆ по́стническими пра́вилы и҆спытова́шесѧ ,꙳ послѣ́дꙋѧ знаменоно́сцемъ ѻ҆тце́мъ вели́кимъ варла́мꙋ и҆ се́ргїю .꙳ тѣ́мже и҆ гдⷭ҇ь и҆зведе́ тѧ па́стырѧ лю́демъ свои́мъ .꙳ и҆ ꙗ҆́кѡ вѣ́рнꙋ рабꙋ̀ стро́ити дш҃а си́хъ порꙋчѝ .꙳ за нѧ́же молѝ поми́ловати ѧ҆̀ и҆ спастѝ .

сла́ва . гла́съ , а҃ . Прїидѣ́те вели́кагѡ нова́града лю́дїе , дх҃о́внѣ торжествꙋ́емъ . дне́сь бо де́нь поко́ѧ трꙋдо́въ до́брагѡ на́шегѡ па́стырѧ , во́ньже пѣ́сней трꙋбо́ю воз̾глаша́юще . ра́дꙋисѧ свѣти́ло свѣ́тлое ми́рови . ра́дꙋисѧ мы́сленагѡ сл҃нца свѣ́тлыи ѻ҆́бразе . ра́дꙋисѧ зарѧ́ми добродѣ́телей ѡ҆сїѧва́ѧ всѣ́хъ . но ѻ҆́ч҃е прекра́сне хода́таю ми́ра , и҆ застꙋ́пниче те́плыи ста́дꙋ своемꙋ̀ , непреста́й моли́тисѧ мо́лимтисѧ , спасти́сѧ на́мъ ѿ всѧ́кагѡ навѣ́та , любо́вїю чтꙋ́щимъ сщ҃е́ннꙋю па́мѧть твою̀ .

и҆ ны́нѣ , боⷢ҇ . Всеми́рнꙋю сла́вꙋ ѿ человѣ́къ прозѧ́бшꙋю , и҆ влⷣкꙋ ро́ждьшꙋю , нбⷭ҇нꙋю две́рь воспое́мъ мр҃і́ю дв҃цꙋ , беспло́тнымъ пѣ́снь , и҆ вѣ́рнымъ оу҆добре́нїе . та́бо ꙗ҆ви́сѧ нб҃о и҆ цр҃кви бжⷭ҇твеннаѧ . та̀ прегражде́нїе вражды̀ разрꙋши́вши , смире́нїе в̾ведѐ и҆ црⷭ҇тво ѿве́рзе . тоѧ̀ оу҆́бѡ и҆мꙋ́щи вѣ́рное оу҆тверже́нїе , побо́рника и҆́мамы , и҆з̾ неѧ̀ ро́ждьшагосѧ гдⷭ҇а . дерза́йте оу҆́бѡ , дерза́йте лю́дїе бж҃їи , и҆́бо то́й побѣди́тъ врагѝ , ꙗ҆́кѡ всеси́ленъ .

та́же , вы́ходъ . проки́менъ , дню̀ .

Ѿ при́тчей , чте́нїе .

Па́мѧть пра́веднагѡ с̾ похвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрость , и҆ сме́ртенъ и҆́же оу҆вѣ́дѣ ра́зꙋмъ . лꙋ́чше бо сїю̀ кꙋпова́ти , не́жели зла́та и҆ сребра̀ сокро́вища . честнѣ́йши бо є҆́сть ка́менїѧ многоцѣ́нна , все́же чⷭ҇тно́е , недосто́йнѡ є҆́сть є҆́й . долгота́ бо дні́й , и҆ лѣ́та живота̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бога́тство и҆ сла́ва . ѿ оу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . послꙋ́шайте оу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ моѧ̀ храни́тъ . и҆схо́ди бо моѝ , и҆схо́ди живота̀ , и҆ оу҆гото́ваетсѧ хотѣ́нїе ѿ́ гдⷭ҇а . сегѡ̀ ра́ди молю̀ ва́съ , и҆ пред̾лага́ю мо́й гла́съ сн҃ово́мъ чл҃ческимъ . ꙗ҆́кѡ а҆́зъ премꙋ́дрость всели́хъ , совѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й совѣ́тъ и҆ оу҆тверже́нїе , мо́й ра́зꙋмъ , моѧ́ же крѣ́пость . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃года́ть . разꙋмѣ́йте оу҆́бѡ неѕло́бивїи кова́рство , ненака́занїи же прилага́йте срⷣца̀ . послꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ оу҆сте́нъ мои́хъ пра́вдꙋ . ꙗ҆́кѡ и҆́стинѣ поꙋча́етсѧ горта́нь мо́й , ме́рзски же предо мно́ю оу҆стны̀ лжи́выхъ . с̾ пра́вдою всѝ гл҃ы оу҆́стъ мои́хъ , ни что́же в̾ ни́хъ стро́потно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ѡ҆сꙋ́дитъ же пра́ведникъ оу҆мира́ѧ живы́хъ нечести́выхъ . оу҆́зрѧтъ бо кончи́нꙋ пра́веднагѡ , и҆ неразꙋмѣ́ютъ , что̀ совѣща́ша ѡ҆ не́мъ . ꙗ҆́кѡ пове́ржетъ и҆́хъ гдⷭ҇ь без̾гла́сны ни́цъ , и҆ поколе́блетъ и҆́хъ ѿ ѡ҆снова́нїѧ , и҆ да́же и҆ до послѣ́днѧгѡ и҆сче́знꙋтъ в̾ болѣ́зни , и҆ па́мѧть и҆́хъ поги́бнетъ . прїи́дꙋтъ в̾ помышле́нїе согрѣше́нїй свои́хъ оу҆жа́сни , и҆ ѡ҆бличи́тъ и҆́хъ сопроти́въ без̾зако́нїѧ и҆́хъ . тогда̀ ста́нетъ в̾ дерзнове́нїи мно́зѣ пра́ведникъ , пред̾ лице́мъ ѡ҆скорби́вшихъ є҆гѡ̀ , и҆ ѿмета́ющихъ трꙋды̀ є҆гѡ̀ . ви́дѣвше же смѧтꙋ́тсѧ стра́хомъ мно́гимъ , и҆ оу҆жа́снꙋтсѧ ѡ҆ пресла́вномъ спасе́нїи є҆гѡ̀ . и҆ рекꙋ́тъ в̾ себѣ̀ ка́ющесѧ , и҆ в̾ тѣснотѣ̀ дꙋ́ха воздыха́юще . се́й бѣ̀ є҆го́же и҆мѣ́хомъ нѣ́когда в̾ посмѣ́хъ , и҆ въ при́тчꙋ поноше́нїѧ . безꙋ́мнїи житїѐ є҆гѡ̀ вмѣни́хомъ неи́стово , и҆ кончи́нꙋ є҆гѡ̀ без̾че́стнꙋ . ка́кѡ вмѣни́сѧ в̾ сн҃ѣ́хъ бж҃їихъ , и҆ во ст҃ы́хъ жре́бїй є҆гѡ̀ є҆́сть ; оу҆́бѡ заблꙋди́хомъ ѿ пꙋтѝ и҆́стиннагѡ , и҆ пра́вды свѣ́тъ не ѡ҆блиста̀ на́съ , и҆ сл҃нце невоз̾сїѧ̀ на́мъ . без̾зако́нїѧ и҆спо́лнихомсѧ во стезѧ́хъ и҆ поги́бели . и҆ ходи́хомъ сквозѣ̀ пꙋсты́ни непрохо́дны , пꙋти́ же гдⷭ҇нѧ неразꙋмѣ́хомъ .

Ѿ премꙋ́дрости соло́мони , чте́нїе .

=Ѿ =оу҆́стъ пра́веднагѡ и҆ска́плетъ премꙋ́дрость , оу҆стны́ же мꙋ́жь мꙋ́дрыхъ вѣ́дѧтъ дарова́нїѧ . оу҆ста̀ мꙋ́дрыхъ поꙋча́тсѧ премꙋ́дрости , пра́вда же и҆збавлѧ́етъ ѿ сме́рти . сконча́вшꙋжесѧ мꙋ́жꙋ пра́веднꙋ , неоу҆ма́литсѧ наде́жда . сн҃ъ бо пра́веденъ ражда́етсѧ в̾ живо́тъ , и҆ во бл҃ги́хъ свои́хъ , пло́дъ пра́ведныи ѡ҆бъе́млетъ . свѣ́тъ пра́веднымъ всегда̀ , и҆ ѿ́ гдⷭ҇а ѡ҆брѧ́щꙋтъ бл҃года́ть и҆ сла́вꙋ . ꙗ҆зы́къ мꙋ́дрыхъ до́браѧ вѣ́сть , и҆ в̾ срⷣцы и҆́хъ почі́етъ премꙋ́дрость . лю́битъ гдⷭ҇ь прпⷣбныѧ срⷣца̀ , прїѧ́тни же є҆мꙋ̀ всѝ непоро́чнїи в̾ пꙋ́ть . мꙋ́дрость гдⷭ҇нѧ , просвѣща́етъ лицѐ разꙋ́мнагѡ . варѧ́етъ бо жела́ющихъ ю҆̀ , пе́рвїе разꙋмѣ́тисѧ , и҆ оу҆до́бь оу҆́зритсѧ ѿ лю́бѧщимъ є҆ѧ̀ . оу҆́треневавыи к̾ не́й , не оу҆трꙋди́тсѧ , и҆ бдѧ̀ є҆ѧ̀ ра́ди , ско́рѡ беспеча́ли бꙋ́детъ . ꙗ҆́кѡ досто́йныѧ себѣ̀ та̀ ѡ҆б̾хо́дитъ и҆́щꙋщи . и҆ во стезѧ́хъ ꙗ҆влѧ́етсѧ и҆́мъ бл҃гопотре́бна . премꙋ́дрости не оу҆долѣ́етъ когда̀ ѕло́ба . си́хъ ра́ди и҆ рачи́тель бы́хъ добро́тѣ є҆ѧ̀ . и҆ возлюби́хъ сїю̀ и҆ в̾зыска́хъ ѿ ю҆́ности моеѧ̀ . и҆ по и҆ска́хъ невѣ́стꙋ в̾вестѝ себѣ̀ , ꙗ҆́кѡ всѣ́хъ влⷣка возлюбѝ ю҆̀ . оу҆чи́тельница бо є҆́сть бж҃їю ра́зꙋмꙋ , и҆ ѡ҆брѣта́тельница дѣ́ломъ є҆гѡ̀ . тоѧ̀ сꙋ́ть добрѝ нра́вы . цѣломꙋ́дрїю бо и҆ ра́зꙋмꙋ сїѧ̀ оу҆чи́тъ , пра́вдѣ же и҆ мꙋ́жествꙋ , и҆́хже потре́бнѣе ни что́же є҆́сть в̾ житїѝ чл҃кѡмъ . а҆́щели же и҆ мно́гомꙋ и҆мѣ́нїю хо́щетъ кто̀ , да вѣ́сть пе́рваѧ и҆ бꙋ́дꙋщаѧ раз̾смотри́ти . свѣ́сть и҆з̾ви́тїе слове́съ , и҆ рѣше́нїѧ гада́нїемъ . зна́менїѧ и҆ чꙋдеса̀ проразꙋмѣ́ти и҆з̾ бытїѧ̀ време́нъ и҆ лѣ́томъ , и҆ всѣ́мъ совѣ́тникъ є҆́сть бл҃гъ . ꙗ҆́кѡ без̾сме́ртїе є҆́сть в̾ не́й , и҆ бл҃гозва́нїе во ѡ҆бще́нїи слове́съ є҆ѧ̀ . сегѡ̀ ра́ди рѣ́хъ гдⷭ҇ви , и҆ помоли́хсѧ є҆мꙋ̀ , и҆ рѣ́хъ всѣ́мъ срⷣцемъ мои́мъ . Бж҃е ѻ҆ц҃ъ и҆ гдⷭ҇и млⷭ҇ти , сотвори́выи всѧ̀ сло́вомъ свои́мъ , и҆ мꙋ́дростїю свое́ю оу҆стро́ивыи чл҃ка , да владѣ́етъ надо всѣ́ми тобо́ю бы́вшими тварьмѝ , и҆ назира́етъ ми́ръ прпⷣбїемъ и҆ пра́вдою . да́ждь ми ѿ твои́хъ престо́лъ намѣ́стницꙋ премꙋ́дрость , и҆ не ѿлꙋчѝ менѐ ѿ ѻ҆́трокъ твои́хъ , ꙗ҆́кѡ а҆́зъ ра́бъ тво́й , и҆ сн҃ъ рабы̀ твоеѧ̀ . послѝ ю҆̀ ѿ ст҃а́гѡ жили́ща твоегѡ̀ , и҆ ѿ прⷭ҇то́ла сла́вы твоеѧ̀ , да прише́дши ко мнѣ̀ наꙋчи́тъ мѧ , что̀ оу҆го́дно є҆́сть пред̾ тобо́ю . и҆ наста́витъ мѧ в̾ ра́зꙋмъ , и҆ сохрани́тъ мѧ сла́вою свое́ю . помышле́нїѧ бо сме́ртныхъ всѝ оу҆жа́сни , и҆ затворе́на оу҆мышле́нїѧ и҆́хъ .

На литі́и , стихѣ́ры . гла́съ , а҃ . Свѣ́тлыи содѣ́ловаетъ пра́здникъ дне́сь , сщ҃е́нныи хра́мъ честна́гѡ и҆ сла́внагѡ крⷭ҇тлѧ гдⷭ҇нѧ , ра́достнѡ хрⷭ҇то́ва цр҃кви бл҃же́ннагѡ ст҃лѧ і҆ѡ́ны . ꙗ҆́кѡ мѵ́ро бл҃гово́нное ѡ҆благоꙋха́ѧ на́мъ сщ҃е́нныѧ бл҃года́ти , и҆ болѣ́зней ѿгна́нїе . и҆ ꙗ҆́кѡ ло́зꙋ виногра́да живо́тнагѡ , вино̀ и҆ска́пающꙋю и҆сцѣле́нїѧ , воз̾веселѧ́ющее срⷣца̀ напа́стныхъ печа́лей раз̾гна́нїемъ . тѣ́мъ мо́лимсѧ є҆мꙋ̀ просѧ́ще ми́ра , и҆ спасе́нїѧ дш҃а́мъ на́шимъ . гла́съ , г҃ . Ты̀ оу҆кра́шенъ добродѣ́тельными дѣѧ́нїи , несозда́ннѣй трⷪ҇цы хра́мъ ѡ҆сщ҃е́нъ бы́лъ є҆сѝ . созда́лъ є҆сѝ сщ҃е́нныѧ хра́мы гдⷭ҇ню и҆́мени , во́ и҆мѧ сла́внагѡ крⷭ҇тлѧ и҆ вели́кихъ ст҃лей , и҆ бг҃оно́сныхъ ѻ҆ц҃ъ . и҆ ны́нѣ с̾ ни́ми водворѧ́ѧсѧ , молѝ ѡ҆ творѧ́щихъ па́мѧть твою̀ , и҆зба́витисѧ ѿ лꙋка́вагѡ ловле́нїѧ , и҆ собла́знъ проти́внагѡ , ст҃лю і҆ѡ́но бл҃же́нне . гла́съ , д҃ . Весели́сѧ и҆ ра́дꙋйсѧ вели́кїи но́въ гра́де . да и҆гра́ютъ сн҃ы твоѧ̀ в̾ тебѣ̀ , свѣ́тлѡ торжествꙋ́юще в̾ па́мѧть ст҃лѧ і҆ѡ́ны . си́рымъ и҆ вдови́цамъ пред̾ста́телѧ . скорбѧ́щимъ оу҆тѣ́шителѧ . прибѣга́ющимъ к̾ немꙋ̀ помо́щника , и҆ те́пла застꙋ́пника . призыва́ющимъ є҆гѡ̀ ско́рѡ послꙋ́шающа . люде́й на́шихъ на милосе́рдїе и҆ ти́хость прелага́юща , и҆ проти́вныѧ примирѧ́юща . пред̾стои́тъ бо гдⷭ҇ви , молѧ́сѧ оу҆мири́ти ми́ра , и҆ спастѝ дш҃а на́ша .

сла́ва . гла́съ , д҃ . Прїидѣ́те лю́дїе , и҆́же вели́кагѡ нова́града порожде́нїе , всѧ́къ ро́дъ и҆ во́зрастъ , пѣ́сньми почти́мъ до́браго па́стырѧ . ꙗ҆́кѡ тогѡ̀ пред̾стоѧ́нїемъ и҆́же ко хрⷭ҇тꙋ̀ , дарова́шасѧ бл҃га́ѧ всѧ̀ гра́дꙋ на́шемꙋ ѿ́ бг҃а , и҆ всѣ́мъ предѣ́ломъ є҆гѡ̀ . и҆́бо бл҃гослови́шасѧ бл҃гостїю вѣнцы̀ лѣ́тъ є҆пкⷭ҇пства є҆гѡ̀ . гдⷭ҇ь да́стъ бл҃гость є҆гѡ̀ ра́ди . и҆ землѧ̀ на́ша подава́ше плоды̀ своѧ̀ , насы́тисѧ всѧ́ка дш҃а бл҃говоле́нїѧ тогда̀ . оу҆мири́шасѧ всѝ ꙗ҆зы́цы проти́внїи . и҆ приклони́шасѧ стра́нъ хрⷭ҇толю́бцы влⷣки держа́внїи . ми́лостивными ѻ҆чи́ма смотрѧ́юще , ти́хое промышле́нїе подава́хꙋ . ра́дость и҆ ми́ръ всѧ́ческаѧ прїима́ше . но ѽ бл҃же́нне і҆ѡ́но , и҆ ны́нѣ такова́ѧ да́рꙋй лю́демъ твои́мъ . да и҆ честнꙋ́ю па́мѧть твою̀ чтꙋ́ще , при́снѡ оу҆блажа́емъ .

и҆ ны́нѣ , боⷢ҇ . Пода́ждь оу҆тѣше́нїе , свои́мъ рабо́мъ всенепоро́чнаѧ , оу҆толѧ́ющи лю́таѧ наны̀ ѡ҆б̾стоѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снова́нїе и҆́мамы , и҆ твоѐ застꙋпле́нїе стѧжа́хомъ , да непостыди́мсѧ влⷣчце , тебѐ призыва́юще . потщи́сѧ на мл҃твꙋ тебѣ̀ вопїю́щихъ , ра́дꙋисѧ влⷣчце всѣ́мъ помо́щнице , ра́досте и҆ покро́ве дш҃а́мъ на́шимъ .

На стихо́внѣ , стⷯры . гла́съ , в҃ . Послѣ́дователѧ тѧ̀ позна́хомъ ѻ҆́ч҃е , кро́ткагѡ и҆ неѕло́биваго влⷣки хрⷭ҇та̀ . ти́хое бо сло́ва и҆ нра́ва молчали́вое , ѿ ю҆́ности сѐ возрастѐ в̾ тебѣ̀ . смире́нїе же и҆ кра́сное кро́тости совоспита́емо . и҆ с̾ сѣди́ною спросїѧ́ющꙋ ра́зꙋмꙋ . тѣ́мже и҆́же всѧ̀ вѣ́дыи гдⷭ҇ь , прои҆зведе́ тѧ па́стырѧ слове́сномꙋ ста́дꙋ своемꙋ̀ , и҆ на прⷭ҇то́лѣ первопресто́льника бж҃їѧ цр҃кви посадѝ тѧ̀ , ꙗ҆́кѡ пасꙋ́щꙋ ти сїѧ̀ преподо́бїемъ и҆ пра́вдою .

сти́хъ : сщ҃е́нницы твоѝ ѡ҆блекꙋ́тсѧ в̾ пра́вдꙋ ,꙳ и҆ прпⷣбнїи твоѝ воз̾ра́дꙋютсѧ . Не по землѝ ни́зитисѧ нижѐ на тлѣ́ющаѧ взира́ти , и҆ ревнова́ти миродержи́телемъ , по́мыслы дш҃и твоеѧ̀ оу҆тверди́шасѧ , сщ҃е́нне і҆ѡ́но . но вознесе́сѧ на высотꙋ̀ без̾сме́ртныѧ добродѣ́тели , без̾сме́ртнаго живота̀ рачи́телю . ꙗ҆́кѡ поꙋчи́сѧ навы́кнꙋти , оу҆ кро́ткагѡ оу҆чи́телѧ , и҆ смире́ннагѡ срⷣцемъ вои́стинꙋ влⷣки хрⷭ҇та̀ и҆ бг҃а . тогѡ̀ молѝ блаже́нне оу҆ще́дрити ми́ра , и҆ спастѝ и҆ просвѣти́ти дш҃а на́ша .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ заповѣде́хъ є҆гѡ̀ восхо́щетъ ѕѣлѡ̀ . Возлюбѝ чи́стаѧ дш҃а твоѧ̀ бл҃же́нне і҆ѡ́но , чистотꙋ̀ бжⷭ҇твеныхъ чисти́тель . и҆́же ве́рхъ оу҆чи́тельствꙋ , и҆ пра́вило добродѣ́телемъ , и҆ є҆стествꙋ̀ оу҆краше́нїе . вои́стинꙋ небесѝ и҆зъѧвле́нїе , і҆єра́рхѡмъ нача́ла бжⷭ҇твенагѡ нико́лꙋ , и҆ вели́каго васи́лїѧ . бг҃осло́вца григо́рїѧ . златоꙋ́стаго же і҆ѡа́нна . и҆́мъ же сщ҃е́нныѧ хра́мы воз̾дви́глъ є҆сѝ . ꙗ҆́кѡ вои́стинꙋ во дворы̀ и҆́хъ жела́ѧ всели́тисѧ , и҆́же во́ свѣтѣ присносꙋ́щныѧ ра́дости , живота̀ вѣ́чнагѡ началопа́стырѧ хрⷭ҇та̀ . тогѡ̀ съ ни́ми ст҃лю непреста́й молѧ̀ , оу҆мири́ти ми́ра , и҆ спастѝ дш҃а на́ша . сла́ва . гла́съ , ѕ҃ . Прпⷣбне бл҃же́нне а҆рхїєре́ю сщ҃е́нне і҆ѡ́но , кро́тость и҆ неѕло́бїе твоѐ , оу҆диви́ша самоде́ржцы бл҃гочести́выѧ , и҆ вои́стинꙋ ѿ дш҃и возлюби́ша тѧ̀ . ра́ди бо добродѣ́телей и҆справле́нїѧ ѡ҆брѣ́те бл҃года́ть ѿ́ бг҃а . тѣ́мже и҆ самоде́ржцы почто́ша тѧ , моли́твъ твои́хъ и҆ бл҃гослове́нїѧ тре́бꙋюще . прⷭ҇нѡ бл҃гопослꙋ́шны быва́хꙋ прпⷣбїю твоемꙋ̀ , и҆ лю́ди твоѧ̀ неѕло́бїемъ снабдѣва́юще . но и҆ ны́нѣ лю́демъ свои́мъ пред̾стоѧ̀ бꙋ́ди , и҆ бл҃гопоспѣше́нїе да́рꙋй моли́твами твои́ми , и҆ дш҃а́мъ на́шимъ ве́лїю млⷭ҇ть . и҆ ны́нѣ , боⷢ҇ . Творе́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твои́хъ ложе́снъ проше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свободѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вои́стинꙋ , вопїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ покро́ве , и҆ спасе́нїе дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , ст҃лю , двⷤа . и҆ бцⷣе дв҃о ра́дꙋисѧ ,= аⷤ .=

На оу҆́трени , на бг҃ъ гдⷭ҇ь , тропа́рь , ст҃лю , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , а҃ . Плоды̀ слове́сныѧ приносѧ̀ премꙋ́дре і҆ѡ́но гдⷭ҇ви , восхвалѧ́ѧ ст҃ли съ прпⷣбными є҆гѡ̀ пѣ́сньми . с̾ ни́ми же в̾ землѝ живы́хъ ра́дꙋешисѧ , ꙗ҆́кѡ сла́вꙋ и҆́хъ возлюбѝ . тѣ́мже с̾ ни́ми ѻ҆́ч҃е сщ҃е́нне , ѡ҆ на́съ восхвалѧ́ющихъ тѧ̀ , непреста́й молѧ̀ цр҃ѧ нбⷭ҇наго , и҆ сп҃са всегѡ̀ ми́ра хрⷭ҇та̀ є҆ди́наго чл҃колю́бца . =двⷤа . сла́ва , и҆ ны́нѣ , боⷢ҇ . Прⷪ҇рцы тѧ̀ ꙗ҆́снѡ провозвѣсти́ша ѻ҆трокови́це , мт҃рь бж҃їю . и҆ а҆пⷭ҇ли бж҃їи , въ ми́рѣ проповѣ́даша . и҆ мы̀ вѣ́ровахомъ , тѣ́мже бл҃гочестномꙋ́дренѣ почита́юще воспѣва́емъ тѧ̀ , и҆ бцⷣꙋ при́снѡ и҆менꙋ́емъ .

По в҃ , стихоло́гїи , сѣда́ленъ . гла́съ , и҃ . Любы̀ твоѧ̀ бжⷭ҇твенаѧ , воз̾ведѐ тѧ̀ па́стырѧ и҆з̾рѧ́дна слове́сномꙋ мно́жествꙋ . все́ю бо дш҃е́ю к̾ бжⷭ҇твенѣй любвѝ прилѣпи́лсѧ є҆сѝ . и҆ ст҃ы́мъ честны́ѧ хра́мы соз̾да́лъ є҆сѝ и҆ лѣпотꙋ̀ си́мъ сщ҃е́нными и҆ко́нами оу҆творѧ́ѧ , бжⷭ҇твеномꙋ прⷣтчи , и҆ пресвѣ́тлымъ оу҆чи́телемъ , васи́лїю григо́рїю , і҆ѡа́ннꙋ съ мꙋ́дрымъ нико́лою . прпⷣбномꙋ ѻ҆нꙋ́фрїю , и҆ се́ргїю чꙋдотво́рцꙋ . пѣ́сньми же похвалѧ́ѧ чꙋде́снаго варлаа́ма , и҆ са́вꙋ . є҆ѵ̾фѵ́мїѧ же со і҆ѡ́ною митрополи́томъ . тѣ́мже нн҃ѣ сликꙋ́еши и҆́мъ . с̾ ни́ми же ѻ҆́ч҃е сщ҃е́нне молѝ ѡ҆ на́съ . любо́вїю чтꙋ́щихъ чⷭ҇тнꙋ́ю па́мѧть твою̀ . два́жды . сла́ва , и҆ ны́нѣ , боⷢ҇ . Непоколѣби́мое оу҆твержде́нїе вѣ́рѣ , и҆ честно́е дарова́нїе дш҃ъ на́шихъ , бцⷣꙋ в̾ пѣ́снѣхъ вѣ́рнїи воз̾вели́чимъ . ра́дꙋисѧ , ка́мень живо́тныи во́ чревѣ свое́мъ вмѣсти́вши . ра́дꙋисѧ конце́мъ оу҆пова́нїе , и҆ печа́льнымъ застꙋ́пнице . ра́дꙋисѧ невѣ́сто неневѣ́стнаѧ .

По полїєлеѡ́сѣ , сѣда́ленъ . гла́съ , и҃ . Воз̾люби́вшаго за бл҃госе́рдїе землены́ѧ , воз̾люби́лъ є҆сѝ хрⷭ҇та̀ . сла́вою спаси́тельною , тебѐ просла́вльшаго . добродѣ́тельми сщ҃е́нными сїѧ́юща , ꙗ҆́кѡ бг҃ови оу҆гожда́юща . тѣ́мже и҆ всѣ́мъ ра́тнымъ ми́ръ воз̾вѣща́юща . бѣ́совскаѧ стремле́нїѧ воз̾ража́юща , ст҃лю і҆ѡ́но бл҃же́нне . є҆мꙋ́же непреста́й молѧ́сѧ , согрѣше́нїемъ проще́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . два́жды . сла́ва , и҆ ны́нѣ , боⷢ҇ . Во и҆скꙋше́нїѧ многоплете́ннаѧ впа́дъ . ѿ вра́гъ ви́димыхъ и҆ неви́димыхъ бꙋ́рею ѡ҆держи́мь є҆́смь , бесчи́сленыхъ мѝ грѣхо́въ . и҆ ꙗ҆́кѡ к̾ те́пломꙋ застꙋпле́нїю , и҆ покро́вꙋ моемꙋ̀ чⷭ҇таѧ , приста́нищꙋ притѣка́ѧ твоеѧ̀ бл҃гости . тѣ́мже пречⷭ҇таѧ и҆з̾ тебѐ воплоти́вшагосѧ без̾ сѣ́мене молѝ ѡ҆ всѣ́хъ рабѣ́хъ твои́хъ , непреста́ннѡ пою́щихъ тѧ̀ , бцⷣе пречи́стаѧ . молѧ́щи тогѡ̀ прилѣ́жнѡ , согрѣше́нїемъ ѡ҆ставле́нїе дарова́ти , поклонѧ́ющимсѧ вѣ́рою ржⷭ҇твꙋ̀ твоемꙋ̀ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . всѧ́ко дыха́нїе . є҆ѵⷢ҇а́лїе , ѿ і҆ѡа́нна . заⷱ҇ , л҃є , ѿ полꙋ̀ .= ѱ=ало́мъ , н҃ .

сла́ва . моли́твъ ра́ди ст҃лѧ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . По и҆́мени твоемꙋ̀ и҆ житїѐ пребл҃же́нне . по гдⷭ҇ни бо за́повѣди цѣ́лость голꙋби́нꙋ , вои́стинꙋ стѧжа́лъ є҆сѝ . с̾ кро́тостїю бо незло́бїемъ оу҆добри́сѧ , прекра́снаѧ дш҃а твоѧ̀ . ю҆́же ꙗ҆́кѡ любе́знꙋ невѣ́стꙋ и҆ нескве́рнꙋ пред̾ста́вити потща́лсѧ є҆сѝ , пречⷭ҇томꙋ є҆ди́номꙋ и҆ без̾сме́ртномꙋ женихꙋ̀ хрⷭ҇то́ви . тогѡ̀ молѝ ст҃лю прⷭ҇нѡ , ми́ръ ми́рови дарова́ти , и҆ дш҃а́мъ на́шимъ ве́лїю млⷭ҇ть .

Кано́нъ , бцⷣы , со і҆рмосо́мъ на́ ѕ҃ , д҃ гѡ гла́са . и҆ ст҃о́мꙋ кано́нъ , на́ и҃ . гла́съ , д҃ . пѣ́снь , а҃ . і҆рмо́съ . Тристоѧ́ща крѣ́пкїи , рожде́исѧ ѿ дв҃ы , без̾стра́стїе во глꙋбинѣ̀ , дш҃и трича́стное потопѝ молю́сѧ . да тѝ ꙗ҆́кѡ в̾ тимпа́нѣ , во оу҆мерщве́ннѣмъ тѣлесѝ , побѣ́дное пою̀ воспѣва́нїе .

запѣ́в̾ : Ст҃лю хрⷭ҇то́въ і҆ѡ́но , молѝ бг҃а ѡ҆ на́съ . И҆збра́ тѧ бл҃года́ть ѻ҆́ч҃е ѿ оу҆тро́бы мт҃ре твоеѧ̀ , поста́вити тѧ̀ проро́ка лю́демъ свои́мъ . хода́тайствовати ко́ гдⷭ҇ꙋ ѡ҆ спасе́нїи ми́ра , и҆ ѻ҆ ѡ҆ставле́нїи невѣ́ждьственыхъ и҆́мъ бл҃же́нне . Рꙋко́ю вели́кагѡ а҆рхїєре́ѧ і҆ѡ́ны . се́й же ѡ҆ не́мъ собо́ра сщ҃е́нныхъ мꙋже́й сꙋдо́мъ , прїе́млеши пома́занїе а҆рхїєре́йства , дх҃омъ воз̾двиза́емь і҆ѡ́но . и҆ па́стырь вели́комꙋ гра́дꙋ сщ҃е́нне полага́емъ . Бл҃же́ннагѡ миха́ила сбы́стьсѧ на тебѣ̀ прорече́нїе , невнѣ́шнюю бо на тебѣ̀ нищетꙋ̀ зрѧ́ще , но внꙋ́тренее преспѣва́нїе дш҃и твоеѧ̀ , дх҃о́вными ѻ҆чи́ма сматрѧ́ѧ , а҆́ще и҆ є҆щѐ ѻ҆тро́чищꙋ тѝ бл҃же́нне . боⷢ҇ . Пресвѣ́тлаѧ свѣщѐ сл҃нца сла́вы , дш҃и моеѧ̀ ѻ҆́гнь оу҆гаше́ныи при́снѡ оу҆ны́нїемъ воз̾жѝ , бжⷭ҇твеныхъ дѣ́лъ ма́сломъ пречⷭ҇таѧ напоѧ́ющи . да вѣ́рою и҆ любо́вїю прⷭ҇нѡ тѧ̀ сла́влю бг҃ороди́тельнице .

катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . Съ высоты̀ сни́де во́лею на́ землю , и҆́же превы́ше всѧ́кїѧ вла́сти , и҆ смире́нныѧ вознесѐ , и҆́з̾ рова преи҆спо́днѧгѡ ро́да чл҃ча . нѣ́сть бо прест҃а , па́че тебѐ гдⷭ҇и . Ѿ ю҆́ности твоеѧ̀ , бжⷭ҇твеное просвѣще́нїе , і҆ѡ́но на тебѣ̀ сїѧ́ше , ꙗ҆́коже прпⷣбныи прови́дѣ . и҆́же ми́рови оу҆ро́дъ , бг҃ови же премꙋ́дръ , ꙗ҆́кѡ бг҃ꙋ и҆збра́нъ є҆сѝ , и҆́з̾чрева ма́тере твоеѧ̀ сщ҃е́нне . Ми́ръ оу҆мири́сѧ , мл҃твами твои́ми , ст҃лю во твое́мъ є҆пкⷭ҇пствѣ , но ꙗ҆́кѡ тогда̀ , и҆ нн҃ѣ бж҃їе чл҃колю́бїе оу҆молѝ прилѣ́жнѡ въ ми́рѣ оу҆тверди́тисѧ ми́рови і҆ѡ́но . Плоды̀ гдⷭ҇ви нача́токъ дѣ́лъ свои́хъ прине́слъ є҆сѝ , плоды́ же землѝ , мл҃твами си , оу҆мно́жилъ є҆сѝ . и҆ нн҃ѣ молѝ бл҃же́нне на землѝ на́шей , плодоно́сїе при́снѡ подава́ти , ꙗ҆́кѡ бл҃гопослꙋ́шна тѧ̀ и҆мѣ́емъ . боⷢ҇ . Є҆́в̾винꙋ дре́внюю клѧ́твꙋ , хрⷭ҇та̀ ро́ждьши мт҃и чⷭ҇таѧ , пресвѣ́тлѡ разрѣши́ла є҆сѝ , и҆́же всѣ́хъ вѣнчава́ющаго бл҃гослове́ньми . нѣ́сть бо пречⷭ҇таѧ па́че тебѐ и҆́на помо́щница .

катава́сїѧ : Твоѧ̀ пѣвцы̀ .

сѣда́ленъ . гла́съ , д҃ . Добродѣ́тельми свѣтѧ́сѧ пастѝ хрⷭ҇то́вы ѻ҆вца̀ поставле́нїе прпⷣбномꙋ се́ргїю , красе́нъ хра́мъ внꙋ́трь є҆пи́скопїи воз̾дви́глъ є҆сѝ . ꙗ҆́кѡ дш҃е́ю любѧ̀ тогѡ̀ по́двиги є҆гѡ̀ почита́ѧ . и҆ сегѡ̀ моли́твеника себѣ̀ ѡ҆ ста́дѣ свое́мъ ко́ гдⷭ҇ꙋ полага́ѧ нн҃ѣ ра́дꙋешисѧ є҆мꙋ̀ ѻ҆́ч҃е сщ҃е́нне . молѝ спасти́сѧ дш҃а́мъ на́шимъ . два́жды . сла́ва , и҆ ны́нѣ , боⷢ҇ . Ѡ҆бнови́ла є҆сѝ чⷭ҇таѧ бжⷭ҇твенымъ ржⷭ҇тво́мъ свои́мъ , и҆стлѣ́вшее , въ страсте́хъ земноро́дныхъ ме́ртвеное сꙋщество̀ . и҆ воз̾дви́гла є҆сѝ всѧ̀ ѿ сме́рти , къ животꙋ̀ нетлѣ́нїѧ . тѣ́мже тѧ̀ по́ долгꙋ бл҃жи́мъ всѝ дв҃о пресла́внаѧ , ꙗ҆́коже прорекла̀ є҆сѝ .

пѣ́снь , д҃ . і҆рмо́съ . Любвѐ ра́ди ще́дре своегѡ̀ си ѻ҆́браза , на крⷭ҇тѣ̀ свое́мъ стоѧ̀ и҆ раз̾стоѧ́щасѧ ꙗ҆зы́цы . ты́ бо є҆сѝ бг҃ъ на́шъ , крѣ́пость моѧ̀ и҆ похвала̀ . Бжⷭ҇твеномꙋ прⷣтчи , вели́комꙋ і҆ѡа́ннꙋ хра́мъ сщ҃е́нныи воз̾дви́глъ є҆сѝ , ꙗ҆́кѡ вѣ́ренъ дш҃ꙋ , томꙋ̀ и҆ тѣ́ло в̾ снабдѣ́нїе воз̾лага́ѧ ѻ҆́ч҃е сщ҃е́нне . Ꙗ҆́кѡ рачи́тель и҆ вѣ́рникъ те́плъ крⷭ҇тлю гдⷭ҇ню показа́сѧ . тѣ́мже в̾ хра́мѣ є҆гѡ̀ , є҆го́же є҆мꙋ̀ со́здалъ є҆сѝ , тѣ́ло своѐ полага́еши . и҆ во дворы̀ є҆гѡ̀ прїѧ́тисѧ жела́ѧ . Воз̾люби́лъ є҆сѝ ст҃лю сщ҃е́нныхъ мꙋже́й пѣ́сньми восхвалѧ́ти , сщ҃е́нныѧ и҆́хъ па́мѧти , ꙗ҆́кѡ рачи́тель добро́тѣ и҆́хъ , и҆ подража́тель дѣѧ́нїемъ бг҃олюбе́знымъ . боⷢ҇ . И҆мѣ́ю тѧ̀ помо́щницꙋ , ѿ кого́сѧ оу҆бою̀ когда̀ , и҆лѝ оу҆страшꙋ̀ . кто́же хотѧ̀ ско́рбнаѧ навестѝ рабꙋ̀ твоемꙋ̀ , и҆ не оу҆страши́тсѧ тебѐ пречⷭ҇таѧ и҆ не па́дати под̾ нозѣ̀ .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Нечести́вїи не оу҆́зрѧтъ сла́вы твоеѧ̀ хрⷭ҇тѐ , но мы́ тѧ є҆диноро́дне ѻ҆́ч҃ее заре́нїе сла́вы бж҃їѧ . ѿ́ нощи оу҆́треннююще , воспѣва́емъ тѧ милосе́рде . Приноси́мое ꙗ҆́кѡ че́стно воз̾ложе́нїе бг҃ови , и҆ ѡ҆сщ҃е́нно первопресто́льникѡмъ рꙋ́сскимъ і҆ѡ́ною твоѐ сщ҃е́нное па́стырства воз̾веде́нїе . ꙗ҆́кѡ пасꙋ́щꙋ тѝ гдⷭ҇нѧ лю́ди і҆ѡ́но ст҃лю преподо́бїемъ и҆ кро́тостїю . А҆́ще наставле́нїемъ митрополи́чимъ і҆ѡ́но зово́мъ самѣ́мъ погрестѝ є҆гѡ̀ , ѿрече́сѧ ста́рости ра́ди прїи́ти і҆ѡ́но ст҃лю . ѻ҆ба́че ѡ҆бѣща́лсѧ є҆сѝ є҆мꙋ̀ , ви́дѣти тогѡ̀ в̾ свое́мъ преставле́нїи во́ свѣтѣ хрⷭ҇то́вѣ . Пѣ́сньми поче́лъ є҆сѝ , па́мѧть ст҃лѧ і҆ѡ́ны митрополи́та , и҆ хвала́ми ꙗ҆́кѡ досто́йнѡ , оу҆блажи́лъ є҆сѝ тогѡ̀ . са́мъ ны́нѣ , ст҃лю і҆ѡ́но , прича́ствꙋеши похвала́мъ є҆гѡ̀ , и҆ по сотворе́нїю своемꙋ̀ къ бли́жнемꙋ воспрїе́млеши . боⷢ҇ . Низ̾ложѝ влⷣчце вра́гъ мои́хъ шата́нїе пренепоро́чнаѧ тѧ́ бо и҆́мамъ и҆ пред̾ста́тельницꙋ и҆ наде́ждꙋ , и҆ по́мощь крѣ́пкꙋю . ты́ мѧ соблюдѝ чи́стаѧ навѣ́та вра́жїѧ , и҆збавлѧ́ющи мѧ ла́ѧнїѧ тѣ́хъ .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Въ пꙋчи́нѣ жите́йстѣй дѣѧ́нїи мои́ми , снидо́хъ во глꙋбинꙋ̀ . но ꙗ҆́кѡ ѿ ки́та і҆ѡ́на вопїю́ ти , и҆з̾ глꙋбины̀ ѕо́лъ мои́хъ воз̾веди́ мѧ молю́сѧ сн҃е бж҃їи сло́ве . Прильпѣ̀ любвѐ дш҃а твоѧ̀ къ гдⷭ҇ню крⷭ҇тлю , ст҃лю бг҃обл҃же́нне . тѣ́мже тѣ́ло твоѐ честно́е , въ честнѣ́мъ хра́мѣ є҆гѡ̀ нетлѣ́нно , во мнѡ́га лѣ́та соблюда́емо ꙗ҆влѧ́шесѧ . Красота̀ говѣ́нїѧ твоегѡ̀ є҆́же к̾ гдⷭ҇ꙋ привлечѐ бл҃года́ть , бл҃голѣ́пїю дш҃и твоеѧ̀ сщ҃е́нне . и҆ воз̾веде́ тѧ вели́комꙋ но́вꙋ гра́дꙋ ѻ҆ц҃а и҆ первопресто́льника , гдⷭ҇нѧ сщ҃е́нства прпⷣбна показа̀ . Просла́ви тѧ̀ гдⷭ҇ь і҆ѡ́но , тѣ́ло твоѐ соблюдѐ во мно́га лѣ́та нетлѣ́нно . ꙗ҆влѧ́ѧ тѧ ѻ҆́бщника ра́бъ свои́хъ , и҆́хже под̾ража́тель въ житїѝ бы́лъ є҆сѝ . си́мъ и҆ по сме́рти досто́йнѡ , соꙋблажа́ешисѧ бл҃же́нне . боⷢ҇ . Всест҃а́ѧ дв҃о , пред̾ста́тельнице и҆ покро́ве всѣ́мъ вѣ́рнымъ . пред̾ста́ни , и҆ и҆зба́ви на́съ вра́гъ на́шихъ нападе́нїѧ и҆ ѿ всѧ́кїѧ ско́рби , и҆ стра́шнагѡ сꙋда̀ и҆спыта́нїѧ . да вѣ́рою при́снѡ пою́ тѧ .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , д҃ . Свы́ше прїѧ́тъ бжⷭ҇твенꙋю бл҃года́ть , хода́тайствовати бг҃ови и҆ чл҃кѡмъ . ꙗ҆́кѡ ст҃ль возноше́нїе возносѧ̀ , и҆ ми́ръ лю́демъ свои́мъ сносѧ̀ , и҆ ѡ҆би́лїе плодѡ́мъ і҆ѡ́но сщ҃е́нне . ты́ бо є҆сѝ вели́комꙋ но́вꙋ гра́дꙋ похвала̀ , и҆ сꙋ́щимъ ѡ҆ не́мъ ра́дость . и҆́косъ . Похва́лимъ досто́йнѡ нн҃ѣ ст҃лѧ . ꙗ҆́кѡ ѿ́ чрева ма́тере своеѧ̀ и҆з̾бра́нъ бг҃ови во ѡ҆сщ҃е́нїе . и҆ ѻ҆́трочищь є҆щѐ сы́и пронарече́нъ во а҆рхїєре́йство гра́дꙋ своемꙋ̀ ѿ́ бг҃а . тѣ́мже не ѿ чл҃къ прои҆зведе́нъ ст҃ль , но свы́ше пронарече́нъ , и҆ дх҃омъ пома́занъ , сщ҃еннодѣ́йствꙋѧ бг҃опрїѧ́тнѡ . и҆ смире́нїе и҆ тишинꙋ̀ мл҃твами свои́ми да́рꙋетъ , и҆ ѻ҆би́лїе плодѡ́мъ . то́й бо вели́комꙋ но́вꙋ гра́дꙋ сла́ва , и҆ всѣ́мъ и҆́же ѡ҆ не́мъ ра́дованїе .

пѣ́снь , з҃ . і҆рмо́с̾ . А҆враа́мстїи дре́вле в̾ вавило́нѣ ѻ҆́троцы , в̾ пещѝ пла́мень попра́вше хвала́ми вопїю́ще , ѻ҆ц҃ъ на́шихъ бж҃е блгⷭ҇ве́нъ є҆сѝ . Зи́ждеши бжⷭ҇твеномꙋ и҆́мени , бога́тною рꙋко́ю в̾ пꙋсты́нѧхъ оу҆да́лено і҆ѡ́но сщ҃е́нныѧ хра́мы . вели́кихъ бг҃оꙋго́дникъ бжⷭ҇твеныхъ а҆рхїєре́й с̾ прпⷣбными . Но́вꙋ ѻ҆би́тель составлѧ́еши вели́кихъ трїе́хъ і҆єра́рхъ , и҆ мни́шестѣй че́сти , бл҃гоꙋти́шно приста́нище ѻ҆́ч҃е . мѣ́стнымъ же оу҆дале́нїемъ , ѡ҆брꙋча́ѧ и҆́мъ без̾мо́лвїе . Виногра́дъ насажда́ѧ бг҃ови ѡ҆гра́дꙋ сщ҃е́ннꙋю , вино̀ и҆зносѧ̀ веселѧ́щее , в̾ сщ҃е́нныхъ храмѣ́хъ бжⷭ҇твеное пѣ́нїе . и҆́же в̾ трⷪ҇цѣ є҆ди́номꙋ хвали́мꙋ и҆ бл҃гослови́мꙋ бг҃ꙋ ѻ҆ц҃ъ на́шихъ . боⷢ҇ . Є҆ди́нꙋ всест҃ꙋ́ю , ꙗ҆́же є҆ди́номꙋ бг҃ови вселе́нїе , є҆ди́но пречи́сто , ѿ і҆ѡаки́ма и҆ а҆́нны ражда́емꙋю , сщ҃е́ннымъ хра́момъ почита́ѧ . ꙗ҆́кѡ въ не́мъ воспѣва́ти препѣ́тое дв҃ыѧ ржⷭ҇тво̀ .

катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Кро́ткое и҆ молчали́вое нра́ва твоегѡ̀ воспрїе́мъ гдⷭ҇ь бл҃же́нне , поста́ви тѧ па́стырѧ лю́демъ свои́мъ . на кого́ бо при́зритъ , но на кро́ткаго и҆ молча́ща трепе́щꙋща слове́съ є҆гѡ̀ . Оу҆ста̀ вдовы́ѧ бл҃гослови́ша тѧ , застꙋпле́нїѧ ѿ тебѐ сподо́бльшесѧ ст҃лю бл҃же́нне . бл҃гоꙋгожа́ѧ бг҃ови по непоро́чномꙋ і҆́ѡвꙋ . и҆ ѡ҆би́димыѧ ѿ наси́лїѧ и҆зима́ѧ . Лю́дїе твоѝ ст҃лю прпⷣбне сѣ́товахꙋ сиротства̀ своегѡ̀ , в̾ твое́мъ к̾ бг҃ꙋ ѿше́ствїи , до́брагѡ па́стырѧ своегѡ̀ . нн҃ѣ же сщ҃е́нною па́мѧтїю твое́ю воз̾ра́довашасѧ всѧ́ческаѧ . боⷢ҇ . Натѧ̀ всю̀ наде́ждꙋ спасе́нїѧ моегѡ̀ воз̾ложи́хъ , бг҃ома́ти неи҆скꙋсобра́чнаѧ . и҆ тѧ̀ призыва́ю прⷭ҇нѡ на́ помощь . спаси́ мѧ ѿ напа́стей и҆ печа́ли врага̀ . разрѣшѝ плени́цꙋ ѕѡ́лъ мои́хъ , и҆ сꙋда́ мѧ и҆схи́ти . катава́сїѧ : Хва́лимъ бл҃гослови́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Сотворѝ держа́вꙋ мы́шцею свое́ю , низложи́ бо си́льныѧ со престо́лъ , и҆ вознесѐ смире́нныѧ бг҃ъ і҆и҃левъ . в̾ ни́хже посѣтѝ на́съ восто́къ свы́ше , и҆ напра́вилъ ны̀ є҆́сть на пꙋ́ть ми́ренъ . Бл҃же́ннагѡ є҆ѵ̾фѵ́мїѧ , престо́лъ наслѣ́дова сщ҃е́нне і҆ѡ́но , ꙗ҆́кѡ подража́тель добродѣ́телемъ є҆гѡ̀ бы́лъ є҆сѝ , и҆ пѣ́сньми сегѡ̀ оу҆блажи́въ па́мѧть и҆зрѧ́днѡ . са́мъ ны́нѣ ѻ҆́бществꙋешисѧ хвала́мъ є҆гѡ̀ , ꙗ҆́кѡ соводворѧ́ешисѧ є҆мꙋ̀ во́ свѣтѣ незаходи́мѣмъ . Въ зе́млю кро́ткихъ со ст҃ли досто́йнѡ всели́лсѧ є҆сѝ ст҃лю і҆ѡ́но , кро́ткагѡ оу҆чи́телѧ оу҆ченичѐ . томꙋ̀ пред̾ста́ни ѡ҆ на́съ пою́щихъ па́мѧть твою̀ . и҆ и҆спросѝ на́мъ собла́знѡмъ ѡ҆ставле́нїе , и҆ шꙋ́ѧѧ ча́сти в̾ де́нь сꙋда̀ и҆збавле́нїе , и҆ лю́тыѧ гее́ны бл҃же́нне . Неи҆знемо́жетъ всѧ́къ глаго́лъ и҆́же ѿ́ бг҃а . оу҆бо́га тѧ и҆ си́ра , и҆́же ѻ҆ц҃ъ си́рыхъ прїе́млетъ бг҃ъ , и҆́же на престо́лѣ со́ кнѧзи посадѝ . тѧ̀ лю́демъ свои́мъ , ꙗ҆́кѡ досто́йна па́стырѧ прои҆зводѧ̀ , ѻ҆ц҃а си́рымъ , и҆ застꙋ́пника вдови́цамъ те́пла положи́ тѧ , і҆ѡ́но бл҃же́нне . боⷢ҇ . Просвѣтѝ чⷭ҇таѧ и҆́же любо́вїю чтꙋ́щихъ тѧ и҆ велича́ющихъ , разрѣшѝ стра́сти на́ша . тѣ́мъ дв҃о оу҆ста́ви бꙋ́рю , лꙋка́вагѡ собла́зны ѿ среды̀ ѿженѝ . ва́рвары покорѝ на́мъ мл҃твами сѝ .

катава́сїѧ : Всѧ́къ зе́менъ .= Досто́йнѡ є҆́сть . свѣти́ленъ . Трисо́лнечнагѡ свѣ́та , сла́вы сїѧ́нїемъ , трїе́хъ оу҆чи́тель ѡ҆зари́всѧ , всѧ̀ просвѣща́еши . просїѧ́въ дѣ́тельми и҆ бл҃года́тїю , прпⷣбне ст҃лю . =двⷤа . сла́ва , и҆ ны́нѣ , боⷢ҇ . Сла́дость а҆́нг҃лѡмъ , скорбѧ́щихъ ра́досте . хрⷭ҇тїа́нѡмъ пред̾ста́тельнице дв҃о мт҃и гдⷭ҇нѧ , застꙋпи́вши на́съ спасѝ вѣ́чнагѡ мꙋче́нїѧ .

На хвали́тѣхъ , стⷯры , на д҃ . гла́съ , ѕ҃ . поⷣ . всѐ оу҆пова́нїе . Ꙗ҆́кѡ ѕвѣзда̀ восїѧ́лъ є҆сѝ ,꙳ на тве́рди цр҃ко́внѣй ,꙳ ѡ҆зарѧ́ѧ ми́ра и҆справле́нїемъ ꙳ сло́ва и҆́стиннагѡ ,꙳ премꙋ́дре і҆ѡ́но .꙳ вдови́цы и҆ сироты̀ снабдѣва́ѧ ѻ҆те́чески .꙳ и҆ ни́щїѧ ми́лꙋѧ ,꙳ ѡ҆би́димыѧ и҆зима́ѧ .꙳ вражды̀ оу҆толѧ́ѧ ,꙳ смире́нїе оу҆твержа́ѧ ,꙳ хрⷭ҇то́выхъ за́повѣдей дѣ́лателю .꙳ ѻ҆́ч҃е всесщ҃е́нне ,꙳ просѝ ми́ра ми́рови мо́лимъ тѧ и҆ спасе́нїѧ дш҃а́мъ на́шимъ . двⷤа . Досто́йнѡ натѧ̀ ст҃льства ,꙳ нарече́нїе прїи́де прпⷣбне ѻ҆́ч҃е ,꙳ ѻ҆троча́ти и҆ є҆щѐ тебѣ̀ сꙋ́щꙋ .꙳ дѣѧ́нїѧ бо въ тебѣ̀ бл҃гоꙋго́днаѧ ꙳ совоспита́ема .꙳ кро́тость съ неѕло́бїемъ .꙳ тѣ́мъ во дворы̀ гдⷭ҇нѧ вселѧ́ешисѧ .꙳ ꙗ҆́кѡ тако́въ подоба́ше ꙳ ст҃ль бы́ти прпⷣбенъ .꙳ но ꙗ҆́кѡ и҆́маши дерзнове́нїе ,꙳ молѝ мо́лимъ тѧ̀ ,꙳ оу҆мири́ти ми́ра ,꙳ и҆ спастѝ дш҃а на́ша . Прпⷣбне ст҃лю ,꙳ и҆зво́лилъ є҆сѝ примета́ти себѐ ꙳ въ домꙋ̀ бж҃їи па́че ,꙳ не́же жи́ти въ се́лѣхъ ми́ра .꙳ по́стническими пра́вилы ,꙳ и҆спытова́шесѧ .꙳ послѣ́дꙋѧ знаменоно́сцемъ вели́кимъ ,꙳ варлаа́мꙋ и҆ се́ргїю .꙳ тѣ́мже и҆ гдⷭ҇ь и҆зведе́ тѧ ,꙳ па́стырѧ лю́демъ свои́мъ .꙳ и҆ ꙗ҆́кѡ вѣ́рнꙋ рабꙋ̀ ,꙳ стро́ити дш҃а си́хъ порꙋчѝ .꙳ за ни́хже и҆ молѝ поми́ловати и҆ спастѝ дш҃а на́ша . сла́ва . гла́съ , д҃ . Прїидѣ́те лю́дїе , и҆́же вели́кагѡ но́ва гра́да порожде́нїе , всѧ́къ ро́дъ и҆ во́зрастъ . и҆ пѣ́сньми почте́мъ до́браго па́стырѧ , ꙗ҆́кѡ тогѡ̀ пред̾стоѧ́нїемъ и҆́же ко хрⷭ҇тꙋ̀ , дарова́шасѧ бл҃га́ѧ всѧ̀ гра́дꙋ на́шемꙋ ѿ́ бг҃а , и҆ всѣ́мъ предѣ́лѡмъ є҆гѡ̀ . и҆́бо бл҃гослови́шасѧ бла́гостїю вѣнцы̀ лѣ́тъ є҆пи́скопства є҆гѡ̀ . гдⷭ҇ь да́стъ бл҃гость є҆гѡ̀ ра́ди , и҆ землѧ̀ на́ша подава́ше плоды̀ своѧ̀ . насы́тисѧ всѧ́ка дш҃а бл҃говоле́нїѧ тогда̀ . оу҆мири́шасѧ всѝ ꙗ҆зы́цы проти́внїи , и҆ приклони́шасѧ стра́нъ хрⷭ҇толю́бцы , влады́ки держа́внїи , млⷭ҇тивныма ѻ҆чи́ма сматрѧ́юще , ти́хое промышле́нїе подава́хꙋ . ра́дость и҆ ми́ръ всѧ́ческаѧ прїима́ше . но ѽ бл҃же́нне і҆ѡ́но , и҆ нн҃ѣ такова́ѧ да́рꙋй лю́демъ твои́мъ . да чⷭ҇тнꙋ́ю па́мѧть твою̀ прⷭ҇нѡ чтꙋ́ще оу҆блажа́емъ .

и҆ ны́нѣ , боⷢ҇ . =Славосло́вїе вели́кое , и҆ ѿпꙋ́стъ .=

На литꙋргі́и , бл҃же́нна , на и҃ . ѿ кано́на , ст҃лю , пѣ́снь г҃ ѧ , и҆ ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃лю . сла́ва , конда́къ ст҃лю . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃лю . конда́къ хра́мꙋ . сла́ва , ст҃лю . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . оу҆ста̀ моѧ̀ воз̾гл҃ютъ премꙋ́дрость , и҆ поꙋче́нїе срⷣца моегѡ̀ ра́зꙋмъ . сти́хъ . оу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . а҆пⷭ҇лъ , къ є҆вре́ѡмъ . заⷱ҇ , ти҃і .= а҆ллилꙋ́їѧ . оу҆ста̀ пра́веднагѡ поꙋча́тсѧ премꙋ́дрости , и҆ ꙗ҆зы́къ є҆гѡ̀ воз̾гл҃етъ сꙋ́дъ . =є҆ѵⷢ҇а́лїе , ѿ =і҆ѡа́нна . заⷱ҇ л҃ѕ . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>