МЦⷭ҇А ТОГО́ЖЕ ВЪ Ѕ҃ ДН҃Ь

и҆́же во ст҃ы́хъ ѻ҆ц҃а на́шегѡ па́вла и҆сповѣ́дника . =И҆ прпⷣбнагѡ и҆ бг҃оно́снагѡ ѻ҆ц҃а на́шегѡ и҆гꙋ́мена варлаа́ма хꙋ́тынскагѡ новгоро́дскагѡ чꙋдотво́рца . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и возва́хъ , стихѣ́ры , на ѕ҃ . гла́съ , д҃ . поⷣ . да́лъ є҆сѝ зна́менїе . Па́велъ бг҃огла́сныи ,꙳ тѧ̀ подо́бника поставлѧ́етъ тезои҆мени́тна ,꙳ и҆ нра́вы оу҆краша́ема ,꙳ тогѡ̀ всебл҃же́нне .꙳ и҆ бл҃гоче́стїемъ и҆ мꙋ́жествомъ дш҃и ,꙳ и҆ терпѣ́нїемъ напа́стей ,꙳ и҆ ре́вностїю распала́ема ,꙳ правосла́вїю побо́рниче .꙳ є҆мꙋ́же и҆ ны́нѣ спрославлѧ́ешисѧ ꙳ на нбⷭ҇ныхъ ѻ҆би́телехъ . А҆́рїѧ без̾бо́жнаго ,꙳ и҆ ѕлочести́ваго македѡ́нїѧ ,꙳ тве́рдыхъ повелѣ́ней жи́лами оу҆дави́лъ є҆сѝ .꙳ крѣ́пкимъ же сло́вомъ оу҆че́нїѧ ,꙳ правосла́вныхъ мно́жества ,꙳ сщ҃енномч҃нче ѻ҆́ч҃е оу҆тверди́лъ є҆сѝ .꙳ тѣ́мже тѝ пресвѣ́тлое и҆сповѣ́данїе прїе́мъ ,꙳ црⷭ҇твїю показа̀ ѻ҆́бщника ,꙳ чл҃колю́бецъ . Тече́нїе соверши́вша тѧ̀ ,꙳ и҆ вѣ́рꙋ соблю́дша ,꙳ ст҃лю бл҃же́нне ,꙳ хрⷭ҇то́съ вѣнча̀ ,꙳ свѣ́тлымъ вѣнце́мъ пра́вды ,꙳ и҆ оу҆красѝ твоѐ и҆сповѣ́данїе досточꙋ́дне .꙳ тѣ́мъ нбⷭ҇ное наслѣ́дїе прїе́мъ ,꙳ сп҃сꙋ моли́сѧ ꙳ ѡ҆ воспѣва́ющихъ тѧ̀ . Па́вле всебл҃же́нне ,꙳ и҆сповѣ́данїю тезои҆мени́те ,꙳ те́плѣ хва́лѧщимъ тѧ̀ пред̾ста́тель бы́въ .꙳ ѿ всѧ́кїѧ бѣды̀ и҆ грѣха̀ и҆ бꙋ́ри и҆ страсте́й ,꙳ и҆ мꙋчи́тельства ѻ҆́ч҃е и҆зба́ви ,꙳ ꙗ҆́кѡ мч҃нкъ не ѡ҆сла́бенъ ,꙳ и҆ ст҃ль бг҃опрїѧ́тенъ ,꙳ дерзнове́нїе бо стѧжа̀ ,꙳ к̾ хрⷭ҇тꙋ̀ бг҃ꙋ на́шемꙋ . =сла́ва . гла́съ , а҃ . А҆рхїєре́йскою ѻ҆де́ждею ѡ҆дѣ́ѧвсѧ прпⷣбне ѻ҆́ч҃е . тезои҆мени́томꙋ па́влꙋ поревнова́лъ є҆сѝ , гоне́нїѧ претерпѣ́въ и҆ напа́сти , въ свои́хъ при́сныхъ болѣ́знехъ , хꙋ́льнаѧ преда́нїѧ а҆́рїева посрами́лъ є҆сѝ . и҆ пострада́въ бо за без̾нача́льнꙋю трⷪ҇цꙋ є҆диносꙋ́щнꙋю , ѕлочести́ваго и҆ дх҃обо́рнаго низ̾ложѝ македѡ́нїѧ , и҆ правосла́внꙋю вѣ́рꙋ оу҆ѧсни́въ всѣ́мъ , съ невеще́ствеными водворѧ́ешисѧ а҆́нг҃лы . с̾ ни́ми же нн҃ѣ молѝ , спасти́сѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . прехва́льнїи мч҃нцы . Заколе́нїѧ твоегѡ̀ непра́веднагѡ хрⷭ҇тѐ ,꙳ дв҃аѧ зрѧ́щи ,꙳ и҆ рыда́ющи вопїѧ́ше тебѣ̀ ча́до сла́дкое ,꙳ ка́кѡ без̾ пра́вды оу҆мира́еши .꙳ ка́кѡ на́ древѣ ви́сиши ,꙳ и҆́же всю̀ зе́млю повѣ́сивыи на вода́хъ .꙳ не ѡ҆ста́ви менѐ є҆ди́нꙋ ,꙳ бл҃года́телю многомлⷭ҇тиве ,꙳ свою̀ мт҃рь и҆ рабꙋ̀ молю́сѧ .

На стихо́внѣ , во ѻ҆кта́и . и҆ ст҃ы́мъ , сти́хъ : гла́съ , а҃ . сщ҃е́нницы твоѝ ѡ҆блекꙋ́тсѧ въ пра́вдꙋ ,꙳ и҆ прпⷣбнїи твоѝ воз̾ра́дꙋютсѧ . Прпⷣбне ѻ҆́ч҃е па́вле , добродѣ́телїю ѡ҆дѣ́ѧвсѧ ѿ хрⷭ҇та̀ бг҃а , всѧ́кїи бѣсо́вскїи и҆ ва́рварскїи до́блественѣ побѣди́лъ є҆сѝ по́лкъ , вѣ́рою оу҆крѣплѧ́емъ . на ка́мени оу҆тверди́лъ є҆сѝ своѐ ста́до , ѿ всѧ́кїѧ є҆́реси ненавѣ́тнѡ . тѣ́мъ со а҆́нг҃лы ликоствꙋ́ѧ , сп҃сꙋ моли́сѧ , въ ми́рѣ сохрани́тисѧ дш҃а́мъ на́шимъ . сла́ва . гла́съ , в҃ . По́стнꙋю пꙋчи́нꙋ преплы́въ , воз̾держа́нїѧ хла́домъ , страсте́й бꙋ́ри и҆з̾бѣ́глъ є҆сѝ прпⷣбне . тѣ́мъ є҆динои҆ме́ньством̾ тезои҆мени́тъ бы́въ бжⷭ҇твеномꙋ па́влꙋ , гоне́нїѧ претерпѣ́лъ є҆сѝ и҆ ѡ҆бстоѧ́нїѧ , ѡ҆ѕлоблѧ́емъ в̾ є҆рети́чествꙋющихъ ꙗ҆зыкобо́лїихъ . тѣ́мъ а҆́рїева низ̾ложи́лъ є҆сѝ преда́нїѧ , и҆ нестѡ́рїевы є҆́реси побѣди́въ , цр҃кви хрⷭ҇то́вѣ ꙗ҆ви́сѧ ревни́тель . тогѡ̀ молѝ ст҃лю бл҃же́нне , спасти́сѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тобоⷢ҇ . поⷣ . є҆гда̀ ѿ́ древа . Є҆гда̀ нескве́рнаѧ а҆́гница , оу҆зрѣ̀ своегѡ̀ а҆́гньца , на заколе́нїе ꙗ҆́кѡ зе́млена влеко́ма во́лею , пла́чꙋщи глаго́лаше , без̾ча́дствовати мѧ̀ ны́нѣ тщи́шисѧ хрⷭ҇тѐ ро́ждьшꙋю тѧ̀ . что̀ сѐ сотвори́лъ є҆сѝ и҆зба́вителю всѣ́хъ . ѻ҆ба́че пою̀ и҆ сла́влю , твоѐ па́че оу҆ма̀ и҆ сло́ва , коне́чнꙋю бл҃госты́ню чл҃колю́бче .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , г҃ . Бжⷭ҇твеныѧ вѣ́ры и҆сповѣ́данїе , дрꙋга́го тѧ па́вла цр҃кви ревни́телѧ в̾ сщ҃е́нныхъ ꙗ҆вѝ . с̾ вопїе́тъ ти и҆ а҆́вель къ гдⷭ҇ꙋ , и҆ заха́рїина кро́вь пра́веднагѡ , ѻ҆́ч҃е прпⷣбне па́вле . хрⷭ҇та̀ бг҃а молѝ , дарова́ти на́мъ ве́лїю млⷭ҇ть .

сла́ва , и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на́ ѕ҃ . кано́нъ , є҆мꙋ́же краегране́сїе сицево̀ : та́йно оу҆чи́телѧ па́вла пою̀ подо́бно . творе́нїе ѳеѡ́фаново . гла́съ , д҃ . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́в̾ : Ст҃лю хрⷭ҇то́въ и҆ и҆сповѣ́дниче па́вле , молѝ бг҃а ѡ҆ на́съ . Вѣ́ры оу҆твержде́нїе , цр҃кви оу҆чи́телѧ , и҆ столпа̀ непоколеби́ма и҆сповѣ́данїѧ тѧ̀ , и҆ многосвѣ́тлаго свѣти́льника бл҃года́ти , и҆ оу҆ста̀ ѻ҆гнедх҃нове́нна па́вле свѣ́мы . Па́велъ пе́рвыи со́лнце вселе́нныѧ требл҃же́нне , поставлѧ́етъ тѧ па́вле втора́го , ꙗ҆́кѡ ѻ҆́гнь , попалѧ́юща крѣ́пкѡ є҆́реси , и҆ сѣки́рꙋ , сѣкꙋ́ща без̾бо́жїе . Зако́нно под̾виза́сѧ бѣ́дствꙋѧ бг҃огла́се , бжⷭ҇твеномꙋ проповѣ́данїю , ꙗ҆́кѡ ст҃ль вѣ́ренъ . и҆ оу҆дави́лъ є҆сѝ жи́лами твои́хъ повелѣ́нїи , ꙗ҆́кѡ ѕвѣ́рѧ а҆́рїѧ сꙋемꙋ́дренаго . боⷢ҇ . Марі́ю пречⷭ҇тꙋю , прїиди́те воспое́мъ всѝ , є҆ди́нꙋ оу҆краси́вшꙋю чл҃чество . и҆ ро́ждьшꙋю бг҃а воплоще́нна , дв҃ою же пребы́вшꙋ неврежде́нꙋ .

пѣ́снь , г҃ . і҆рмо́съ . Твоѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ совокꙋ́пльши дх҃о́венъ оу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы сподо́би . Оу҆сыни́всѧ бл҃года́тїю , є҆стество́мъ сн҃а є҆диноро́днагѡ в̾ тва́рь несведѐ ѻ҆ц҃ꙋ собезнача́льна па́вле , па́влимъ оу҆че́нїемъ бг҃оно́снагѡ послѣ́дꙋѧ . Оу҆сты̀ и҆ се́рдцемъ и҆ ꙗ҆зы́кѡмъ , премꙋ́дрость и҆ си́лꙋ бж҃їю сло́во ѵ҆поста́сное , ты̀ хрⷭ҇та̀ и҆сповѣ́далъ є҆сѝ па́вле бг҃омꙋ́дре прпⷣбне , ѕлочести́ваго ѡ҆бличи́въ а҆́рїѧ . Пресꙋ́щественыѧ вла́сти дх҃ъ ст҃ы́и бж҃їи , и҆́мже бг҃отвори́мсѧ сꙋдо́мъ пра́веднымъ премꙋ́дре , є҆стество́мъ бг҃а проповѣ́далъ є҆сѝ вседѣ́тельна и҆ всеси́льна . боⷢ҇ . Без̾нача́льна роди́телѧ сло́во вы́шше всѧ́кагѡ нача́ла , нача́ло ны́нѣ воплоща́емо и҆з̾ тебѐ чⷭ҇таѧ прїѧ́тъ , и҆ под̾ лѣ́томъ бы́сть , лѣ́тъ всѣ́хъ превы́шши .

сѣда́ленъ . гла́съ , и҃ . Ꙗ҆́кѡ сосꙋ́да сы́и и҆збра́ннагѡ тезои҆мени́тъ ѻ҆́ч҃е и҆ подража́тель , бѣды̀ претерпѣ́лъ є҆сѝ за вѣ́рꙋ и҆ гоне́нїѧ . ꙗ҆́кѡ то́й в̾ ри́мъ прїи́де прпⷣбне , всю́дꙋ проповѣ́дꙋѧ трⷪ҇цꙋ равночестнꙋ́ю . тѣ́мъ и҆ тече́нїе во а҆рмені́и сконча́въ , досто́йнѡ прїѧ́тъ ѿ́ гдⷭ҇а вѣне́цъ , посрами́въ македѡ́нїѧ . молѝ хрⷭ҇та̀ бг҃а грѣхо́въ ѡ҆ставле́нїе дарова́ти , пра́з̾днꙋющимъ любо́вїю ст҃ꙋ́ю па́мѧть твою̀ .= двⷤа . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ оу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи , и҆ ꙗ҆́кѡ млⷣнца дои́ши зижди́телѧ и҆ гдⷭ҇а . тѣ́мже а҆́нг҃льскїи собо́ръ и҆ чл҃ческїи ро́дъ , без̾преста́ни сла́вимъ прест҃о́е ржⷭ҇тво̀ твоѐ . и҆ согла́снѡ вопїе́мъ ти , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , воспѣва́ющим̾ досто́йнѡ сла́вꙋ твою̀ . =крⷭ҇тобоⷢ҇ . А҆́гньца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀ , восклица́ше пла́чꙋщи , и҆ го́рькѡ вопїю́щи , ми́ръ оу҆́бѡ ра́дꙋетсѧ прїе́млѧ и҆збавле́нїе . оу҆тро́ба же моѧ̀ распала́етсѧ , ви́дѧщи твоѐ распѧ́тїе , є҆́же терпи́ши за бл҃гоꙋтро́бїе ми́лости , долготерпѣли́ве гдⷭ҇и . ми́лости пꙋчи́но , и҆ и҆сто́чниче неи҆счерпа́емыи , оу҆милосе́рдисѧ , и҆ да́рꙋй грѣхо́въ ѡ҆ставле́нїе , пою́щимъ вѣ́рою твоѧ̀ бжⷭ҇твенаѧ страда́нїѧ .

пѣ́снь , д҃ . і҆рмо́с̾ . Неи҆зслѣ́дномꙋ бж҃їю совѣ́тꙋ , є҆́же ѿ дв҃ы воплоще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вопїѧ́ше , сла́ва си́лѣ твое́й гдⷭ҇и . Че́сть многоцѣ́ннꙋю твоемꙋ̀ верхꙋ̀ и҆сповѣ́данїѧ вѣне́цъ , ꙗ҆́кѡ побѣдоно́сцꙋ , живоно́сною десни́цею зижди́тель возложѝ , па́вле бг҃огл҃иве всебога́те . Ꙗ҆́коже пре́жде под̾виза́всѧ , бл҃гочести́выхъ премꙋ́дре велѣ́нїи прїѧ́тъ воз̾да́нїѧ , ны́нѣ дре́ва живо́тнагѡ полꙋчи́въ бл҃же́нне , па́вле бг҃огла́сне вседо́блїи . На нбⷭ҇нѣй землѝ ликова́ти , и҆дѣ́же но́ги кро́ткихъ ликоствꙋ́ютъ сподо́бисѧ . ꙗ҆́кѡ свѣ́телъ под̾ви́жникъ , и҆ и҆́стинѣ всечестнѣ́й па́вле бы́въ побо́рникъ . боⷢ҇ . Є҆диносꙋ́щїемъ ѻ҆́ч҃имъ сп҃се ꙗ҆́кѡ сн҃ъ ви́димь ѿ дв҃ы , є҆диносꙋ́щественъ на́мъ воплоти́всѧ бы́сть , спастѝ восхотѣ́въ на́съ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твое́й , ты́ бо браконеи҆скꙋси́маѧ дв҃це , прїѧ́тъ во оу҆тро́бѣ надовсѣ́ми сꙋ́щагѡ бг҃а , и҆ родила̀ є҆сѝ без̾лѣ́тнагѡ сн҃а , всѣ́мъ воспѣва́ющимъ тѧ̀ ми́ръ подава́юща . Недꙋ́ги є҆ресе́мъ и҆ гно́й оу҆ста́вилъ є҆сѝ , приложи́въ си́льное бг҃омꙋ́дре врачева́нїе ѻ҆́ч҃е и҆сповѣ́данїе своѐ . и҆ твои́хъ повелѣ́нїи свѣ́тлое , оу҆ма́ же чистотꙋ̀ , и҆ ре́вность бжⷭ҇твенꙋю . Бога́тно и҆з̾лїѧ́сѧ ст҃а́гѡ дх҃а бл҃года́ть , твои́мъ оу҆стна́мъ бл҃же́нне . побо́рника вои́стинꙋ правосла́вїѧ крѣ́пка ѡ҆брѣ́тши преизѧ́щна вѣ́рныхъ . тѣ́мъ просвѣти́лъ є҆сѝ бжⷭ҇твенаѧ со́нмища . А҆́рїево без̾бо́жное и҆ македѡ́нїево хꙋле́нїе , па́вле бг҃одх҃нове́нныхъ ти повелѣ́нїи и҆спра́вивъ плете́ньми , ꙗ҆́кѡ дв҃дъ и҆ноплеме́нника пре́жде си́хъ оу҆дави́лъ є҆сѝ , и҆ крѣ́пкѡ ѡ҆сꙋди́лъ є҆сѝ . боⷢ҇ . Сы́и превѣ́чныи , ны́нѣ под̾лѣ́тенъ бы́сть пло́ть прїе́мъ дв҃о ѡ҆дш҃е́вленꙋ и҆ оу҆́мнꙋ , сло́во без̾нача́льное и҆з̾ тебѐ неи҆скꙋсобра́чнаѧ чⷭ҇таѧ , всѣ́мъ пою́щимъ тѧ ми́ръ подава́ѧ .

пѣ́снь , ѕ҃ . і҆рмо́съ . Прїидо́хъ во глꙋбины̀ морскі́ѧ , и҆ потопи́ла мѧ є҆́сть бꙋ́рѧ мно́гихъ ми прегрѣше́нїи . но ꙗ҆́кѡ бг҃ъ , и҆з̾ тлѝ воз̾ведѝ живо́тъ мо́й многомлⷭ҇тиве . Глаго́лавыи на высотꙋ̀ хꙋлꙋ̀ , и҆ сн҃а сло́ва бж҃їѧ а҆́рїи в̾ тва́рь сведы́и , ѿ тебѐ ѡ҆каѧ́нныи премꙋ́дре ѡ҆сꙋжда́етсѧ . Безꙋ́мныи и҆ несмы́сленыи и҆ без̾бо́жныи ѿве́ргъ ѻ҆́ч҃е македѡ́нїи бжⷭ҇твеныи дх҃ъ , твои́мъ крѣ́пкимъ противле́нїемъ бг҃овѣща́телю низ̾ложи́сѧ . Оу҆мерщвлѧ́етсѧ пресмыка́емыи ѕмі́й живо́тными ти словесы̀ , пред̾ложи́выи є҆ресе́й мно́жество , ст҃лю бж҃їи всебога́те , бг҃оглаго́льниче ѡ҆сщ҃е́нне . боⷢ҇ . Пое́мъ дв҃о бг҃ома́ти па́че є҆стества̀ ржⷭ҇тво̀ твоѐ , и҆ твою̀ нетлѣ́ннꙋю чистотꙋ̀ . и҆́бо и҆з̾ тебѐ ди́внѡ сочета́сѧ , дв҃ьство и҆ ржⷭ҇тво̀ нетлѣ́ннѡ .

конда́къ . гла́съ , в҃ . Ѻ҆блиста́въ на землѝ , ꙗ҆́кѡ ѕвѣзда̀ многосвѣ́тлаѧ , собо́рнꙋю просвѣща́ющи цр҃квь . за ню́же и҆ пострада́лъ є҆сѝ , дш҃ꙋ свою̀ па́вле положи́въ . и҆ ꙗ҆́кѡ заха́рїина и҆ а҆́велева ꙗ҆́снѡ вопїе́тъ твоѧ̀ кро́вь къ гдⷭ҇ꙋ . и҆́косъ . Свы́ше и҆мѣ́лъ є҆сѝ па́вле нарече́нїе , ржⷭ҇тво́ же до́лѣ ѿ землѝ , ꙗ҆́кѡ са́дъ красе́нъ и҆спо́лнь сꙋ́щи . ꙗ҆́кѡ ѿ раѧ́ бо процвѣ́лъ є҆сѝ посто́мъ всѐ бл҃гоꙋха́ѧ ѿ вонѧ̀ мно́гихъ тѝ трꙋда̀ по́двигъ . пото́въ , заточе́нїѧ , гла́да , жа́жды , и҆ всѧ́кїѧ тѣсноты̀ . в̾ ни́хже прои́де бл҃гои҆скꙋ́снѡ , и҆ вѣнце́мъ побѣ́ды оу҆краша́емь вопїе́тъ твоѧ̀ кро́вь ко́ гдⷭ҇ꙋ .

пѣ́снь , з҃ . і҆рмо́съ . Непослꙋжи́ша тва́ри бг҃омꙋ́дрїи па́че зижди́телѧ , но ѻ҆́гненное преще́нїе , мꙋ́жески попра́вше ра́довахꙋсѧ пою́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ . Пре́йде бг҃омꙋ́дре к̾ нбⷭ҇нымъ па́вле селе́нїемъ . и҆ прибли́жисѧ бг҃ови , прича́стїемъ ѡ҆божа́емь . бжⷭ҇твенъ бы́въ пое́ши прпⷣбне , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ . Наставлѧ́еми твои́ми словесы̀ оу҆чи́мсѧ па́вле всехва́льне , ꙗ҆́кѡ въ со́лнцехъ тре́хъ нераздѣли́мѣхъ несѣко́мо честѝ бжⷭ҇тво̀ препѣ́тыи бл҃гослове́нъ є҆сѝ зовꙋ́ще гдⷭ҇и , бж҃е ѻ҆ц҃ъ на́шихъ . Ꙗ҆́кѡ всесщ҃е́нно бжⷭ҇твено и҆ бг҃оꙋго́дно и҆сповѣ́данїе твоѐ , ꙗ҆́кѡ зла́то бо ѡ҆чи́стивсѧ , бг҃ови принесе́сѧ же́ртва бл҃гопрїѧ́тна , веселѧ́сѧ прпⷣбне под̾ража́нїемъ стрⷭ҇те́й сп҃са на́шегѡ . боⷢ҇ . Всѣ́мъ хода́таица чл҃кѡмъ є҆ди́на ꙗ҆ви́сѧ бжⷭ҇твенагѡ и҆збавле́нїѧ , и҆зба́вителѧ всѣ́хъ ро́ждьши всенепоро́чнаѧ . є҆мꙋ́же пое́мъ , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ бл҃гослове́нъ є҆сѝ .

пѣ́снь , и҃ . і҆рмо́съ . Ѻ҆́троки бл҃гочести́выѧ в̾ пещѝ , ржⷭ҇тво̀ бг҃оро́диче спасло̀ є҆́сть . тогда̀ оу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ воз̾дви́же пѣ́ти , гдⷭ҇а воспѣва́йте дѣ́ла , и҆ превозноси́те є҆гѡ̀ во́ вѣки . Текꙋ́тъ и҆сто́чницы твои́хъ повелѣ́нїи , и҆ всю̀ цр҃ковь напаѧ́ютъ . кро́вїю же честно́ю ѻ҆́ч҃е ѡ҆свѧти́лъ є҆сѝ , правосла́вною вѣ́рою тебѣ̀ послѣ́довавшихъ . гдⷭ҇а по́йте вопїю́щи , и҆ превозноси́те є҆гѡ̀ во́ вѣки . Приста́нищꙋ ти́хомꙋ ны́нѣ приста́лъ є҆сѝ , жите́йскаѧ треволне́нїѧ ѡ҆ста́вивъ . и҆мѧ́ше бо направлѧ́юща всѐ ше́ствїе твоѐ корми́телѧ гдⷭ҇а па́вле всехва́льне , ма́нїемъ всѧ̀ творѧ́щаго , є҆го́же превозно́симъ во́ вѣки . Свѣ́тъ трисїѧ́ненъ пребжⷭ҇твеныѧ трⷪ҇цы в̾ тѧ̀ всели́всѧ , свѣ́тъ тѧ̀ вторы́и показа̀ , просвѣща́юща собо́ръ правосла́вныхъ , є҆рети́ческое же ѡ҆полче́нїе ѻ҆́ч҃е ѡ҆мрача́юща . гдⷭ҇а по́йте вопїю́ща , и҆ превозноси́те є҆гѡ̀ во́ вѣки . боⷢ҇ . Глаго́лѡмъ проро́ческимъ послѣ́дꙋюще дв҃о тѧ̀ бцⷣꙋ воз̾вѣща́емъ . роди́ бо ѻ҆троча̀ всѣ́хъ дре́внѣйша , є҆м̾манꙋ́илъ нарица́емо . є҆мꙋ́же ны́нѣ зове́мъ , гдⷭ҇а по́йте дѣ́ла , и҆ превозноси́те є҆гѡ̀ во́ вѣки .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃омъ просвѣща́емъ . да ликовствꙋ́етъ же , беспло́тныхъ оу҆мо́въ є҆стество̀ , почита́ѧ ст҃о́е торжество̀ бж҃їѧ мт҃ре . и҆ да пое́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Всегѡ̀ себѐ приношꙋ̀ бг҃огла́се бжⷭ҇твеномꙋ покро́вꙋ твоемꙋ̀ . ꙗ҆́кѡ сщ҃енномч҃нкъ вла́сть раз̾рѣша́ти прегрѣше́нїѧ ѿ хрⷭ҇та̀ прїе́мъ . мои́хъ согрѣше́нїи плени́ца растерза́въ спаси́ мѧ мольба́ми твои́ми , и҆ бжⷭ҇твенымъ свѣ́томъ просвѣтѝ . Но́въ ꙗ҆ви́лсѧ є҆сѝ ре́вностїю раз̾жига́емь па́вле преи҆зѧ́щне , и҆́же в̾ раѝ ны́нѣ неи҆зрече́ннаѧ словеса̀ ѻ҆́ч҃е оу҆слы́шалъ є҆сѝ . ѻ҆́бщникъ бо нра́вомъ , восхожде́нїѧ ты̀ прича́щьсѧ , и҆ вѣне́цъ прїѧ́тъ црⷭ҇твїѧ хрⷭ҇то́ва бл҃голѣ́пенъ . Ꙗ҆́кѡ нѣ́кто хра́мъ ꙗ҆ви́сѧ , ѡ҆глаго́льникъ всѧ́кихъ є҆ресе́й . правосла́вїѧ же сщ҃енномч҃нче бжⷭ҇твеныи побо́рникъ . лꙋча́ми бл҃года́тными просвѣще́нъ ꙗ҆́вѣ , и҆ свѣ́томъ па́вле сла́вне несозда́нныѧ трⷪ҇цы ѡ҆блиста́емь . боⷢ҇ . Пло́тїю и҆з̾ тебѐ сло́во пренепоро́чнаѧ ѡ҆дѣ́ѧвсѧ , в̾ телесѝ пожи́въ в̾ ми́рѣ ꙗ҆́кѡ млрⷭ҇дъ , пребы́въ нехꙋ́ждьше и҆́же пре́жде без̾телесѐ . и҆ дре́вле всѣ́хъ мꙋ́чащаго бжⷭ҇твеною си́лою низ̾ложѝ .

свѣти́ленъ . Ре́вностїю распала́емъ ѿ те́плагѡ срⷣца , дх҃о́вныи побо́рникъ бл҃года́ти ꙗ҆ви́сѧ . собо́рище є҆рети́ческое мече́мъ раз̾сѣ́къ слове́съ твои́хъ ст҃лю . тече́нїе же соверши́въ , равностоѧ́тель бы́сть мч҃нческомꙋ мно́жествꙋ . боⷢ҇ . Неи҆зрече́нномꙋ прижи́тїю бы́сть пренепоро́чнаѧ невѣ́ста , и҆ ꙗ҆́кѡ сꙋ́щи чⷭ҇тнѣ́йшїи хра́мъ бцⷣе . свѣ́тъ бо превѣ́чныи в̾ тѧ̀ всели́сѧ , и҆ породѝ бг҃а сло́ва . пою́ще тѝ ржⷭ҇тво̀ велича́емъ досто́йнѡ , всенепоро́чнаѧ ѻ҆трокови́це .

На стихо́внѣ , во ѻ҆кта́и . сла́ва . гла́съ , з҃ . Прини́кнꙋлъ є҆сѝ в̾ глꙋбины̀ дх҃о́вныѧ , и҆ ꙗ҆́кѡ беспло́тенъ на землѝ пожи́въ , и҆ ѿ тꙋ́дꙋ поче́рпъ бога́тство бжⷭ҇твеныхъ разꙋмѣ́ней . правосла́вїемъ чл҃ки ѡ҆бога́тилъ є҆сѝ , оу҆че́нїи твои́ми прпⷣбне ѻ҆́ч҃е . и҆ ны́нѣ , боⷢ҇ . и҆лѝ крⷭ҇тобоⷢ҇ .

Ви́дѧщи на́ древѣ просте́рта а҆́гньца , а҆́гница и҆ дв҃аѧ , посредѣ̀ двою̀ разбо́йникꙋ . оу҆вы̀ мнѣ̀ вопїѧ́ше сла́дкое ча́до , что̀ сѐ стра́нное и҆ пресла́вное та́инство , ка́ко тѧ̀ без̾зако́нныи собо́ръ на крⷭ҇тѣ̀ пригвоздѝ , и҆ же́лчїю напоѝ , ма́нны , напитѣ́вшаго чл҃ки .

На литꙋргі́и , бл҃же́нна , на и҃ . ѿ кано́на , ст҃лю , пѣ́снь г҃ ѧ , и҆ ѕ҃ ѧ . проки́менъ , ѱл҃о́мъ дв҃довъ . восхва́лѧтсѧ прпⷣбнїи во сла́вѣ , и҆ возра́дꙋютсѧ на ло́жахъ свои́хъ . сти́хъ . воспо́йте гдⷭ҇ви пѣ́снь но́вꙋ . а҆пⷭ҇лъ , къ є҆вре́ѡмъ . зача́ло , ти҃і , в҃ е . а҆ллилꙋ́їѧ . сщ҃е́нницы твоѝ ѡ҆блекꙋ́тсѧ въ пра́вдꙋ , и҆ преподо́бнїи твоѝ воз̾ра́дꙋютсѧ . є҆ѵⷢ҇а́лїе , ѿ =лꙋкѝ . зача́ло , ѯ҃д . прича́стенъ . в=ъ па́мѧть вѣ́чнꙋю бꙋ́детъ пра́ведникъ .

Слꙋ́жба прпⷣбнагѡ ѻ҆ц҃а на́шегѡ варлаа́ма , новгоро́дскагѡ чꙋдотво́рца , и҆гꙋ́мена хꙋ́тынѧ монастырѧ̀ . =На ма́лѣй вече́рни , на гдⷭ҇и возва́хъ , стихѣ́ры . гла́съ , ѕ҃ . В=седержи́тельною десни́цею оу҆крѣплѧ́емь , прпⷣбне ѻ҆́ч҃е на́шъ варлаа́ме , воз̾держа́нїемъ пи́щꙋ бжⷭ҇твенꙋю позна́лъ є҆сѝ . и҆ непреста́нною мл҃твою и҆ нощны́мъ стоѧ́нїемъ , а҆нтѡ́нїѧ бл҃же́ннагѡ снаслѣ́дникъ бы́ти сподо́бисѧ . сле́зными же пото́ки , всѧ̀ бѣсо́вскаѧ ѡ҆полче́нїѧ потопи́лъ є҆сѝ . тѣ́мже и҆ хрⷭ҇то́съ тѧ̀ дарова́нїемъ чꙋде́съ просла́ви . є҆го́же воз̾желѣ̀ , и҆ є҆го́же ра́ди тѧготꙋ̀ дневнꙋ́ю понесѐ , молѝ спасти́сѧ дш҃а́мъ на́шимъ . Прїиди́те всѝ концы̀ земні́и ѱалмы̀ и҆ пѣ́сньми , сщ҃е́нное и҆ честно́е прпⷣбнагѡ торжество̀ варлаа́ма дне́сь , бл҃гоче́стнѡ восхва́лимъ а҆́ще бо и҆ послѣдѝ восїѧ̀ , но дре́внихъ че́сти сподо́бисѧ . и҆ мо́литсѧ хрⷭ҇то́ви , спасти́сѧ дш҃а́мъ на́шимъ . Страстна́ѧ взыгра́нїѧ , воз̾держа́нїемъ ѻ҆́ч҃е прпⷣбне варлаа́ме и҆з̾сꙋши́лъ є҆сѝ , и҆ ѿ сегѡ̀ до́мъ и҆ жили́ще дх҃ꙋ ст҃о́мꙋ показа́сѧ . и҆сцѣле́нїѧ вѣ́рою приходѧ́щимъ к̾ тебѣ̀ подава́еши . ꙗ҆́коже вторы́и и҆лїѧ̀ чꙋдесы̀ показа́сѧ . ѻ҆́нъ бо в̾ животѣ̀ сы́и , воз̾дꙋ́хи водото́чными чꙋдодѣ́йствоваше . ты́ же и҆ по сме́рти чꙋдесы̀ оу҆дивлѧ́еши , не зерца́ломъ бо и҆ гада́ньми , но ꙗ҆вле́нне и҆ ꙗ҆́снѣ зри́ши ст҃ꙋ́ю трⷪ҇цꙋ . є҆́йже моли́сѧ , спасти́сѧ дш҃а́мъ на́шимъ .

сла́ва . гла́съ , и҃ . Прїиди́те и҆́нѡкъ мно́жества дне́сь , ѱалѡ́мскаѧ пѣ́нїѧ а҆́ки цвѣ́ты дх҃о́вныѧ принесе́мъ , ꙗ҆́кѡ вои́стинꙋ и҆́ноческомꙋ оу҆добре́нїю , и҆ прпⷣбнымъ сожи́телю , хва́лѧще си́це рце́мъ . ра́дꙋисѧ свѣти́льниче многосвѣ́тлыи , воз̾водѧ̀ ко хрⷭ҇тꙋ̀ и҆́нѡкъ мно́жества . ра́дꙋисѧ всеѧ̀ росі́и похвала̀ и҆ оу҆твержде́нїе , и҆ всѣ́мъ вѣ́рнымъ бл҃гоꙋти́шное приста́нище , и҆ и҆сцѣле́нїе болѧ́щимъ во грѣсѣ́хъ , на бжⷭ҇твеное тѣ́хъ воз̾выша́ѧ раче́нїе тѣ́мъ пречⷭ҇тнꙋ́ю и҆ ст҃ꙋ́ю твою̀ , и҆ а҆́нг҃лѡмъ говѣ́йнꙋю ѡ҆б̾стоѧ́ще ра́кꙋ , любе́знѡ ѡ҆блобыза́емъ , прпⷣбне ѻ҆́ч҃е на́шъ варлаа́ме . и҆ бжⷭ҇твенагѡ чл҃колю́бїѧ про́симъ полꙋчи́ти , твои́ми к̾ бг҃ꙋ моли́́твами , и҆ ми́рови ми́ръ дарова́ти , и҆ дш҃а́мъ на́шимъ ве́лїю ми́лость . и҆ ны́нѣ , боⷢ҇ . дневны́и .

на стихо́внѣ , стихѣ́ры . гла́съ , є҃ . Вѣ́рою и҆ любо́вїю соше́дшесѧ праз̾днолю́бцы , ѱалмы̀ и҆ пѣ́сньми восхва́лимъ дне́сь , нбⷭ҇наго чл҃ка и҆ земна́го а҆́нг҃ла . к̾ немꙋ́ же возопїе́мъ , ѽ всебл҃же́нне и҆ прпⷣбне , по́стникѡмъ похвала̀ . ѡ҆ на́съ моли́сѧ ко хрⷭ҇тꙋ̀ варлаа́ме ѻ҆́ч҃е на́шъ , поми́ловатисѧ дш҃а́мъ на́шимъ .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Честны́и и҆ свѣтоно́сныи прпⷣбне тво́й пра́здникъ , и҆спо́лнь ра́дости и҆ весе́лїѧ дх҃о́внагѡ . тѣ́мже соше́дшесѧ и҆́нѡкъ мно́жества , и҆ хрⷭ҇тои҆мени́тїи лю́дїе , любо́вїю восхвалѧ́юще , бл҃жи́мъ бжⷭ҇твенаѧ дѣѧ́нїѧ твоѧ̀ . ꙗ҆́кѡ бо кри́нъ во оу҆до́лїи процве́лъ є҆сѝ , и҆ бл҃гоꙋха́еши дш҃е́внаѧ на́ша чꙋ́вства варлаа́ме ѻ҆́ч҃е на́шъ . молѝ спасти́сѧ дш҃а́мъ на́шимъ .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ за́поведѣхъ є҆гѡ̀ восхо́щетъ ѕѣлѡ̀ . Ꙗ҆́кѡ оу҆ѧ́звисѧ жела́нїемъ бжⷭ҇твенымъ , прпⷣбне ѻ҆́ч҃е на́шъ варлаа́ме , взе́мъ бо крⷭ҇тъ сво́й послѣ́дова влⷣцѣ хрⷭ҇тꙋ̀ . тогда̀ всѧ̀ плотьска́ѧ мꙋдрова́нїѧ оу҆мертви́въ , и҆ наслѣ́довалъ є҆сѝ вои́стинꙋ кро́ткихъ зе́млю . прича́стїемъ ѡ҆божа́емь , и҆ не и҆з̾рече́ннагѡ ѻ҆́ногѡ весе́лїѧ наслажда́ѧсѧ . помина́й на́съ творѧ́щихъ всест҃ꙋ́ю и҆ пречⷭ҇тнꙋ́ю па́мѧть твою̀ .

сла́ва . гла́съ , и҃ . Прпⷣбне и҆ бг҃обл҃же́нне ѻ҆́ч҃е варлаа́ме , вои́стинꙋ сподо́бисѧ бжⷭ҇твенѣй жи́зни , посто́мъ бо и҆ бдѣ́нїемъ тѣ́ло своѐ и҆з̾нꙋрѧ́ѧ . тѣ́мже и҆ ѻ҆́бразъ бы́сть и҆́нокѡмъ . а҆́ще бо и҆ тѣле́сныи ꙗ҆зы́къ оу҆молчѐ , но чꙋдеса̀ свидѣ́тельствꙋютъ . вели́кїи же но́въ гра́дъ проповѣ́дꙋѧ хва́литсѧ , и҆мѣ́ю бо речѐ въ себѣ̀ не и҆стощи́мое сокро́вище . са́ми бо зрѧ́ще чⷭ҇тнꙋ́ю ра́кꙋ моще́й твои́хъ , и҆ чꙋдеса̀ быва́емаѧ , прославлѧ́етъ просла́вльшаго тѧ̀ гдⷭ҇а . є҆мꙋ́же моли́сѧ дарова́ти вселе́ннѣй ми́ръ и҆ ве́лїю ми́лость . и҆ ны́нѣ , боⷢ҇ . дневны́и .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , г҃ . И҆́же на землѝ лега́нїемъ , поще́нїемъ же и҆ бдѣ́нїемъ тѣ́ло своѐ и҆знꙋрѧ́ѧ прпⷣбне , всѧ̀ плотьска́ѧ мꙋдрова́нїѧ оу҆мертви́въ . и҆ и҆сцѣле́нїемъ стрꙋѧ̀ незави́стнаѧ ꙗ҆ви́сѧ , вѣ́рою притѣка́ющимъ к̾ ра́цѣ моще́й твои́хъ варлаа́ме ѻ҆́ч҃е на́шъ . хрⷭ҇та̀ бг҃а молѝ , спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . Тебѐ хода́таицꙋ спасе́нїѧ ро́да на́шегѡ , воспѣва́емъ бцⷣе дв҃о . пло́тїю бо є҆ю́же и҆з̾ тебѐ проше́дъ сн҃ъ тво́й и҆ бг҃ъ на́шъ , крⷭ҇тнꙋю прїе́мъ стра́сть , и҆зба́вилъ є҆́сть на́съ и҆з̾ и҆стлѣ́нїѧ , ꙗ҆́кѡ чл҃колю́бецъ . та́же , є҆ктенїѧ̀ ма́лаѧ . ѿпꙋ́стъ .

На вели́цѣй вече́рни , бл҃же́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на́ и҃ . гла́съ , и҃ . П=рпⷣбне и҆ бг҃обл҃же́нне ѻ҆́ч҃е на́шъ варлаа́ме , поꙋчи́всѧ в̾ за́повѣдехъ гдⷭ҇нихъ де́нь и҆ но́щь , и҆ в̾ зако́нѣ є҆гѡ̀ досто́йнѡ поживѐ . ѡ҆брѣ́лъ є҆сѝ лѣ́ствицꙋ нбⷭ҇нꙋю , по не́й же воз̾ше́дъ дости́же го́рнѧгѡ і҆єрⷭ҇ли́ма , ѿ болѣ́зней и҆ по́двигъ досто́йнꙋю по́честь прїе́млѧ . и҆ с̾ вы́шними ра́дꙋешисѧ , бжⷭ҇твенагѡ зрѣ́нїѧ наслажда́ѧсѧ . ѿ цр҃ѧ́ бо црⷭ҇твꙋющимъ хрⷭ҇та̀ вѣнце́мъ оу҆вѧзе́сѧ , и҆ црⷭ҇твїѧ є҆гѡ̀ съ наслѣ́дникъ бы́сть . но ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀ , ми́рови ми́ръ и҆спросѝ , и҆ дш҃а́мъ на́шимъ ве́лїю млⷭ҇ть . Ꙗ҆́кѡ чи́сто и҆ нескве́рное зерца́ло , ꙗ҆ви́сѧ в̾ вы́шнихъ ликостоѧ́нїихъ . тѣ́мже и҆ чⷭ҇тагѡ ра́ди житїѧ̀ твоегѡ̀ , трⷪ҇цѣ жили́ще показа́сѧ . и҆ ꙗ҆́кѡ свѣтоно́сное сл҃нце , в̾ свое́й ѻ҆би́тели сїѧ́ѧ варлаа́ме ꙗ҆ви́сѧ , и҆ всю̀ под̾нбⷭ҇нꙋю просвѣща́ѧ . ꙗ҆́коже вторы́и , мѡѷсе́й , крⷭ҇тною па́лицею мо́ре страстно́е пресѣчѐ , разꙋ́мнаго же а҆мали́ка побѣди́въ без̾ па́кости . и҆ нбⷭ҇ныи восхо́дъ ѡ҆брѣ́лъ є҆сѝ , и҆ со беспло́тными трⷪ҇цѣ пред̾стоѧ̀ , молѝ спасти́сѧ дш҃а́мъ на́шимъ . Прпⷣбне ѻ҆́ч҃е и҆ бг҃оно́се варлаа́ме , си́лою крⷭ҇тною оу҆тве́рждьсѧ , страстны́ѧ пото́ки и҆з̾сꙋши́лъ є҆сѝ . и҆ ра́достїю и҆ весе́лїемъ дш҃и дости́глъ є҆сѝ , и҆дѣ́же гла́съ пра́зднꙋющихъ слы́шашесѧ , и҆ кра́снагѡ и҆ неи҆зрече́ннагѡ ѻ҆́ногѡ весе́лїѧ насыща́ѧсѧ . тѣ́мъ и҆ свѣ́тлыми тѧ̀ вѣнцы̀ хрⷭ҇то́съ ѡ҆бога́ти . нетлѣ́ннаѧ же твоѧ̀ и҆ всечестна́ѧ ра́ка , и҆сцѣле́нїемъ неѡ҆скꙋ́дныи и҆сто́чникъ и҆сточа́етъ , вѣ́рою приходѧ́щимъ . є҆́йже со́ страхомъ и҆ вѣ́рою пред̾стоѧ́ще мо́лимсѧ , моли́сѧ прпⷣбне ѻ҆́ч҃е на́шъ , спасти́сѧ дш҃а́мъ на́шимъ . Чи́стое и҆ пречестно́е прїѧ́телище ꙗ҆ви́сѧ дх҃ꙋ прест҃о́мꙋ , варлаа́ме прпⷣбне . беспло́тнымъ бо в̾ пло́ти подо́бѧсѧ , и҆ тѣ́хъ житїѐ под̾ража́лъ є҆сѝ . сегѡ̀ ра́ди ѿ вседѣ́тельныѧ вѣнча́сѧ десни́цы , и҆ чꙋде́съ и҆сцѣле́нїемъ ѿ негѡ̀ сподо́бисѧ а҆́ще бо и҆ преста́висѧ ѿ землѝ , но бг҃ови жи́въ пред̾стои́ши со а҆́нг҃лы , и҆ мо́лишисѧ ѡ҆ дш҃а́хъ на́шихъ .

сла́ва . гла́съ , и҃ . Всечⷭ҇тна́ѧ и҆ чꙋдотво́рнаѧ ра́ка , и҆дѣ́же лежи́тъ пречⷭ҇тно́е и҆ ст҃о́е тѣ́ло твоѐ варлаа́ме ѻ҆́ч҃е на́шъ , и҆сцѣле́нїѧ неѡ҆скꙋ́днѡ подава́етъ притека́ющимъ с̾ вѣ́рою , и҆ дш҃етлѣ́нныѧ стра́сти и҆сцѣлѧ́ющи , мно́жества же бѣсо́вскаѧ ѿража́ющи . тѣ́мже и҆ стада̀ и҆́нѡкъ твои́ми чꙋдесы̀ оу҆дивлѧ́еми , ра́достнѡ ѿ дш҃и вопїе́мъ , бг҃обл҃же́нне и҆ прпⷣбне ѻ҆́ч҃е на́шъ варлаа́ме , молѝ хрⷭ҇та̀ бг҃а , оу҆ще́дрити ми́ръ и҆ спастѝ дш҃а на́ша .

и҆ ны́нѣ , боⷢ҇ . Цр҃ь нбⷭ҇ныи , за чл҃колю́бїе на землѝ ꙗ҆ви́сѧ , и҆ с̾ человѣ́ки поживѐ . ѿ дв҃ы бо чⷭ҇тыѧ пло́ть прїе́мыи , и҆з̾ неѧ̀ проше́дъ с̾ воспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несоста́вомъ . тѣ́мже соверше́на тогѡ̀ бг҃а , и҆ соверше́на чл҃ка , вои́стинꙋ проповѣ́дающе , и҆сповѣ́даемъ хрⷭ҇та̀ бг҃а на́шегѡ . є҆го́же молѝ , ма́ти без̾невѣ́стнаѧ , поми́ловатисѧ дш҃а́мъ на́шимъ . та́же , вы́ходъ . проки́менъ , дню̀ .

Ѿ премꙋ́дрости соло́мони , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ оу҆́мрети , и҆ вмѣни́сѧ ѡ҆ѕлобле́нїе и҆схо́дъ и҆́хъ , и҆ є҆́же ѿ на́съ ше́ствїе сокрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , оу҆пова́нїе и҆́хъ без̾сме́ртїѧ и҆спо́лнь . и҆ ма́лымъ пока́зани бы́ша , вели́каѧ воспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ досто́йны себѣ̀ . ꙗ҆́кѡ зла́то в̾ горни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ посѣще́нїѧ и҆́хъ воз̾сїѧ́ютъ , и҆ ꙗ҆́кѡ и҆́скры по сте́блїю потекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ воцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

Ѿ премꙋ́дрости соло́мони , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ помышле́нїе и҆́хъ пред̾ вы́шнимъ . сегѡ̀ ра́ди прїи́мꙋтъ црⷭ҇твїе бл҃голѣ́пїѧ , и҆ вѣне́цъ добро́ты ѿ рꙋкѝ гдⷭ҇ни . ꙗ҆́кѡ десни́цею покры́етъ и҆́хъ , и҆ мы́шцею защи́титъ и҆́хъ . прїи́метъ всѐ ѡ҆рꙋ́жїе ре́вности є҆гѡ̀ , и҆ воѡ҆рꙋже́но сотвори́тъ созда́нїе , в̾ ме́сть враго́мъ . и҆ ѡ҆блече́тъ ѧ҆̀ во бронѧ̀ пра́вды , и҆ возложи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непобѣди́мъ преподо́бїе . по ѡ҆стри́тъ же напра́сенъ гнѣ́въ во ѡ҆рꙋ́жїи . и҆ побо́ретъ с̾ ни́мъ ми́ръ на безꙋ́мныѧ . и҆ по́йдꙋтъ праволꙋ́чнѣ стрѣ́лы мо́лнїины , ꙗ҆́кѡ ѿ бл҃гокрꙋ́гла лꙋ́ка ѻ҆блако́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рости и҆спо́лнь , падꙋ́тъ гра́ды . вознегодꙋ́етъ на ни́хъ вода̀ морска́ѧ , рѣ́ки же потекꙋ́тъ жесточа́е . сопроти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хоръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлодѣѧ́нїе преврати́тъ престо́лы си́льныхъ . слы́шите оу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ конце́мъ землѝ . внꙋши́те содержа́щїи мно́жества , и҆ гордѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

Ѿ премꙋ́дрости соло́мони , чте́нїе .

Пра́ведникъ а҆́ще пости́гнетъ сконча́тисѧ , в̾ поко́й бꙋ́детъ . ста́рость бо честна̀ не многолѣ́тна ни в̾ числѣ̀ лѣ́тъ и҆счита́етсѧ . сѣди́ны же сꙋ́ть , мꙋ́дрость чл҃кѡмъ . и҆ во́зрастъ ста́рости , житїѐ нескве́рно . бл҃гоꙋго́денъ бг҃ови бы́въ , воз̾лю́бленъ бы́сть . и҆ живы́и посредѣ̀ грѣ́шникъ , преста́вленъ бы́сть . восхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ . раче́нїе бо ѕло́е , гꙋби́тъ до́браѧ , и҆ паре́нїе по́хоти , премѣнѧ́етъ оу҆́мъ неѕло́бивъ . сконча́всѧ в̾ ма́лѣ , и҆спо́лни лѣ́та мно́га , оу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди потща́сѧ ѿ среды̀ ѕло́бы . лю́дїе же ви́дѣвше и҆ неразꙋмѣ́вше , ни положи́ша в̾ помышле́нїи такова́гѡ , ꙗ҆́кѡ бл҃года́ть и҆ млⷭ҇ть в̾ прпⷣбныхъ є҆гѡ̀ , и҆ посѣще́нїе во и҆збра́нныхъ є҆гѡ̀ .

На литі́и , стихѣ́ры . гла́съ , и҃ . Бжⷭ҇твенаѧ и҆ свѣтоно́снаѧ наста̀ па́мѧть , и҆́же в̾ по́стницѣхъ вели́кагѡ варлаа́ма , дш҃а и҆ тѣлеса̀ веселѧ́ща . тѣ́мже прїиди́те празднолю́бцы , ꙗ҆́кѡ да наслади́мсѧ ны́нѣшнѧгѡ торжества̀ . се́бо на́ше зва́нїе прїи́де , и҆ рꙋ́сскїѧ землѝ оу҆добре́нїе . вели́комꙋ же но́вꙋ гра́да похвала̀ , и҆ оу҆тверже́нїе . снаслѣ́дникъ бо хрⷭ҇то́въ ꙗ҆ви́сѧ , и҆ беспло́тныхъ житїю̀ подража́тель бы́въ , и҆ мо́литсѧ сп҃сꙋ всѣ́хъ , оу҆мири́ти ми́ръ , и҆ спастѝ дш҃а на́ша . Весели́сѧ и҆ ра́дꙋисѧ ѡ҆́ гдⷭ҇ѣ , всѧ̀ рꙋ́сскаѧ землѧ̀ , процвѣ́тши в̾ себѣ̀ но́ваго свѣти́льника , ꙗ҆́коже сл҃нце вселе́ннꙋю просвѣща́ѧ . красꙋ́йсѧ и҆ ликꙋ́й цр҃кви бж҃їѧ , и҆ и҆́нѡкъ мно́жества сра́дꙋйтесѧ . праз̾днолю́бныхъ собо́ри взыгра́йте , и҆ вѣне́цъ ѿ дх҃о́вныхъ цвѣте́цъ и҆спле́тше , съ дв҃домъ возопїе́мъ , со́нъ че́стенъ пре́д̾ гдⷭ҇емъ сме́рть прпⷣбныхъ є҆гѡ̀ . Чтⷭ҇но́е и҆ пречⷭ҇тно́е прїѧ́телище ꙗ҆ви́сѧ дх҃ꙋ прест҃о́мꙋ , прпⷣбне варлаа́ме ѻ҆́ч҃е на́шъ . беспло́тныхъ во́ плоти житїѐ подража́лъ є҆сѝ , тѣле́снаѧ бо двиза́нїѧ воз̾держа́нїемъ оу҆мертви́въ . въ живоно́снꙋю ме́ртвость ѡ҆бо́лксѧ . и҆ сегѡ̀ ра́ди ѿ вседержи́тельныѧ десни́цы вѣнча́сѧ , и҆ чꙋде́съ и҆сцѣле́нїемъ ѿ негѡ̀ сподо́бисѧ . а҆́ще бо и҆ преста́висѧ ѿ землѝ , но бг҃ови жи́въ пред̾стои́ши , и҆ здѣ̀ с̾ на́ми неви́димо водворѧ́ѧсѧ . но ꙗ҆́кѡ и҆мѣ́ѧ дерзнове́нїе , моли́сѧ ѡ҆ дш҃а́хъ на́шихъ .

сла́ва . гла́съ , ѕ҃ . Свѣ́тлыи и҆ всепра́з̾дньственыи дне́сь восїѧ̀ де́нь , ꙗ҆́коже второ́е сл҃нце , всѧ̀ праз̾днолю́бныхъ собо́ры просвѣща́ѧ , и҆ мглꙋ̀ ѿгонѧ́щи дре́внѧгѡ помраче́нїѧ , честна́ѧ па́мѧть варлаа́ма вселе́ннꙋю сзыва́етъ . чⷭ҇тнѣ́й бо є҆гѡ̀ и҆ чꙋдотво́рнѣй ра́цѣ , со́ страхомъ и҆ любо́вїю пред̾стоѧ́ще , любе́знѡ ѡ҆блобыза́емъ и҆ мо́лимсѧ , ꙗ҆́коже кро́ткомꙋ дв҃дꙋ , странѣ̀ на́шей побѣ́дное ѡ҆долѣ́нїе на сопроти́вныѧ дарова́ти , и҆ ми́рови оу҆мире́нїе , и҆ дш҃а́мъ на́шимъ ве́лїю млⷭ҇ть . и҆ ны́нѣ , боⷢ҇ . Творе́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твои́хъ ложе́снъ проше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свободѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вои́стинꙋ , вопїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ покро́ве , и҆ спасе́нїе дш҃а́мъ на́шимъ .

На стихо́внѣ , стихѣ́ры . гла́съ , в҃ . Дх҃а ст҃а́гѡ теплото́ю премꙋ́дре , жела́нїе срⷣца своегѡ̀ є҆́же ко́ гдⷭ҇ꙋ согрѣ́ѧвъ , и҆ зи́мꙋ страсте́й оу҆мертви́въ . многоко́зненꙋю же си́лꙋ бѣсо́вскꙋю низ̾ложи́лъ є҆сѝ , и҆ в̾ коне́цъ не́мощны си́хъ показа̀ . нбⷭ҇наѧ же во́инства оу҆диви́въ терпѣ́нїемъ свои́мъ . но ꙗ҆́коже по́стникѡмъ под̾ража́тель , и҆ прпⷣбнымъ сожи́тель , молѝ спасти́сѧ дш҃а́мъ на́шимъ .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Взе́мъ крⷭ҇тъ гдⷭ҇нь прпⷣбне варлаа́ме , крѣ́пкѡ послѣ́довалъ є҆сѝ и҆́же на крⷭ҇тѣ̀ на́съ ра́ди распе́ншемꙋсѧ , и҆ є҆гѡ̀ ра́ди любвѐ всѧ̀ ѡ҆ста́вилъ є҆сѝ , и҆ тогѡ̀ є҆ди́наго хрⷭ҇та̀ воз̾люби́лъ є҆сѝ . є҆мꙋ́же и҆ со а҆́нг҃лы пред̾стоѧ̀ , молѝ оу҆ще́дрити ми́ръ , и҆ спастѝ дш҃а на́ша .

сти́хъ : блаже́нъ мꙋ́жь боѧ́исѧ гдⷭ҇а ,꙳ въ за́поведѣхъ є҆гѡ̀ восхо́щетъ ѕѣлѡ̀ . Ꙗ҆́кѡ прїе́мъ ѻ҆́ч҃е нбⷭ҇ное сѣ́мѧ , пло́дъ стори́чествꙋющь добродѣ́телей прине́слъ є҆сѝ , варлаа́ме ѻ҆́ч҃е на́шъ . пита́ѧ бл҃гоче́стнѡ и҆́же гла́домъ та́ющихъ добродѣ́телей . ѿ ню́дꙋ же и҆сцѣле́нїѧ вѣ́рою приходѧ́щимъ подае́ши . тѣ́мже ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀ , молѝ прпⷣбне ѻ҆́ч҃е на́шъ , спасти́сѧ и҆́же вѣ́рою чтꙋ́щимъ тѧ̀ , и҆ пра́з̾днꙋющимъ любо́вїю па́мѧть твою̀ .

сла́ва . гла́съ , и҃ . И҆́нѡкъ мно́жества наста́вника тѧ̀ почита́емъ ѻ҆́ч҃е на́шъ варлаа́ме . твое́ю бо стезе́ю пра́вѡ вои́стинꙋ ходи́ти позна́хомъ . бл҃же́нъ є҆сѝ ꙗ҆́кѡ хрⷭ҇тꙋ̀ рабо́тавъ , и҆ вра́жїю низ̾ложи́лъ є҆сѝ си́лꙋ . а҆́нг҃лѡмъ собесѣ́дниче , и҆ прпⷣбнымъ є҆динокро́вне и҆ пра́веднымъ . с̾ ни́ми же моли́сѧ гдⷭ҇ви , поми́ловатисѧ дш҃а́мъ на́шимъ . и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твои́хъ ра́бъ мольбы̀ прїимѝ всенепоро́чнаѧ , всѣ́мъ подаю́щи ѡ҆чище́нїе прегрѣше́нїемъ . ны́нѣ на́ша моле́нїѧ прїе́мши , молѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь , ст҃о́мꙋ , двⷤа . и҆ бцⷣе дв҃о ра́дꙋисѧ ,= аⷤ .=

На оу҆́трени , на бг҃ъ гдⷭ҇ь , тропа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , воскрⷭ҇нъ . =По а҃ , стихоло́гїи , сѣда́ленъ . гла́съ , и҃ . Мно́гимъ воз̾держа́нїемъ прпⷣбне житїѐ оу҆краси́въ , пꙋ́ть показа̀ ведꙋ́щїи въ жи́знь , добродѣ́телей смире́нїемъ . ми́ра бо ѿве́ргсѧ , и҆ всѧ̀ ꙗ҆́же в̾ ми́рѣ кра́снаѧ преѡ҆би́дѣвъ , є҆ѵⷢ҇льскимъ оу҆че́нїемъ послѣ́довалъ є҆сѝ . жестоки́мъ же житїе́мъ пло́ть свою̀ и҆знꙋрѧ́ѧ , и҆ го́рдаго ѕмїѧ̀ воз̾держа́нїемъ оу҆би́лъ є҆сѝ . тѣ́мже на́ нб҃сѣхъ водворѧ́ѧсѧ , трисл҃нечномꙋ бжⷭ҇твꙋ̀ пред̾стоѧ̀ бг҃огла́се варлаа́ме , молѝ хрⷭ҇та̀ бг҃а , грѣхѡ́въ ѡ҆ставле́нїе дарова́ти чтꙋ́щимъ любо́вїю ст҃ꙋ́ю па́мѧть твою̀ . =двⷤа . сла́ва , и҆ нн҃ѣ , боⷢ҇ . Нбⷭ҇нꙋю две́рь и҆ ковче́гъ , и҆ всест҃ꙋ́ю го́рꙋ , и҆ свѣ́тлыи ѻ҆́блакъ воспое́мъ , неѡ҆пали́мꙋю кꙋпинꙋ̀ , слове́сныи ра́й , є҆́ввино возва́нїе , и҆ все́й вселе́ннѣй вели́кое прибѣ́жище . ꙗ҆́кѡ спасе́нїе тоѧ̀ ра́ди ми́рꙋ содѣ́ѧсѧ , и҆ ѡ҆ставле́нїе дре́внихъ грѣхо́въ . тѣ́мже вопїе́мъ є҆́й , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , бл҃гоче́стнѡ поклонѧ́ющимсѧ ржⷭ҇твꙋ̀ твоемꙋ̀ .

По в҃ , стихоло́гїи , сѣда́ленъ . гла́съ , и҃ . Красоты̀ ми́ра сегѡ̀ ѿ млады́хъ ногте́й прпⷣбне воз̾ненави́дѣвъ , є҆ди́ного хрⷭ҇та̀ ѿ срⷣца воз̾люби́лъ є҆сѝ , и҆ томꙋ̀ все́ю дш҃е́ю прилѣпи́сѧ , и҆ ꙗ҆́кѡ беспло́тенъ на землѝ поживѐ с̾ пло́тїю . сла́вꙋ же мимотекꙋ́щꙋю и҆ бога́тство ни вочто́же вмѣни́въ , нбⷭ҇ное бога́тство воспрїѧ́лъ є҆сѝ и҆ сла́вꙋ вѣ́чнꙋю . тѣ́мже оу҆бл҃жа́емъ ст҃о́е твоѐ оу҆спе́нїе , и҆ в̾ не́мъ торжествꙋ́юще вопїе́мъ ти бг҃огла́се ѻ҆́ч҃е на́шъ варлаа́ме , молѝ хрⷭ҇та̀ бг҃а грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . два́жды . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ оу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи , и҆ ꙗ҆́кѡ млⷣнца дои́ши зижди́телѧ и҆ гдⷭ҇а . тѣ́мже а҆́нг҃льскїи собо́ръ и҆ чл҃ческїи ро́дъ , без̾преста́ни сла́вимъ прест҃о́е ржⷭ҇тво̀ твоѐ . и҆ согла́снѡ вопїе́мъ ти , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , воспѣва́ющим̾ досто́йнѡ сла́вꙋ твою̀ .

По полїєлеѡ́сѣ , сѣда́ленъ . гла́съ , г҃ . Сою́зомъ любвѐ привѧза́сѧ хрⷭ҇то́ви , земна́ѧ же и҆ мимотекꙋ́щаѧ возненави́дѣвъ бг҃омꙋ́дре . пꙋсты́нное ѡ҆ѕлобле́нїе оу҆се́рднѡ подъє́мъ , бѣсо́вскаѧ же ѡ҆полче́нїѧ и҆ и҆́хъ многоко́зненꙋю си́лꙋ посрами́лъ є҆сѝ . и҆ под̾вигополо́жникъ хрⷭ҇то́съ дарова́нїемъ чꙋде́съ ѡ҆богати́ тѧ . тѣ́мже тѧ̀ почита́емъ варлаа́ме бг҃омꙋ́дре . два́жды . сла́ва , и҆ ны́нѣ , боⷢ҇ . Ꙗ҆́кѡ невоздѣ́ланенъ дв҃о виногра́дъ , прекра́сныи гро́здъ хрⷭ҇та̀ возрасти́вши , и҆сточа́юща на́мъ спасе́сное вино̀ , всѣ́мъ веселѧ́що дш҃а и҆ тѣлеса̀ . тѣ́мже ꙗ҆́кѡ вино́внꙋ тѧ̀ до́брымъ оу҆блажа́юще при́снѡ . и҆ со а҆́нг҃лѡмъ вопїе́мъ тѝ , ра́дꙋисѧ ѡ҆бра́дованнаѧ .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ воз̾да́мъ гдⷭ҇ви ѡ҆ всѣ́хъ , и҆́хже воз̾да́стъ ми . всѧ́ко дыха́нїе . є҆ѵⷢ҇а́лїе , ѿ матѳе́ѧ . заⷱ҇ , м҃г .= ѱ=ало́мъ , н҃ .

сла́ва . мл҃твъ ра́ди прпⷣбнагѡ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стⷯра . гла́съ , ѕ҃ . Свѣ́тлыи и҆ всепра́з̾дньственыи дне́сь восїѧ̀ де́нь , ꙗ҆́коже второ́е сл҃нце , всѧ̀ праз̾днолю́бныхъ собо́ры просвѣща́ѧ , и҆ мглꙋ̀ ѿгонѧ́щи дре́внѧгѡ помраче́нїѧ , честна́ѧ па́мѧть варлаа́ма вселе́ннꙋю сзыва́етъ . чⷭ҇тнѣ́й бо є҆гѡ̀ и҆ чꙋдотво́рнѣй ра́цѣ , со́ страхомъ и҆ любо́вїю пред̾стоѧ́ще , любе́знѡ ѡ҆блобыза́емъ и҆ мо́лимсѧ , ꙗ҆́коже кро́ткомꙋ дв҃дꙋ , странѣ̀ на́шей побѣ́дное ѡ҆долѣ́нїе на сопроти́вныѧ дарова́ти , и҆ ми́рови оу҆мире́нїе , и҆ дш҃а́мъ на́шимъ ве́лїю млⷭ҇ть .

кано́нъ бцⷣѣ , со і҆рмосо́мъ , на́ ѕ҃ . пи́санъ во ѻ҆кта́и , во в҃ мъ , гла́сѣ в̾ нлⷣю , тре́тей кано́нъ . і҆рмосы̀ , по два́жды , нетре́нꙋ неѡ҆бы́чнꙋ . и҆́нъ кано́нъ , прпⷣбномꙋ варлаа́мꙋ , на и҃ . є҆мꙋ́же краегране́сїе сицево̀ : глаго́лъ да́ждь ми хрⷭ҇тѐ мо́й , восхвали́ти твоегѡ̀ оу҆го́дника . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пое́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прове́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ просла́висѧ .

запѣ́в̾ : Прпⷣбне ѻ҆́ч҃е варлаа́ме , молѝ бг҃а ѡ҆ на́съ . Ѿ свѣ́та свѣ́тъ хрⷭ҇тѐ мо́й , ѿ ѻ҆ц҃а пре́жде вѣ́къ рожде́исѧ , и҆́же и҆сконѝ со ѻ҆ц҃е́мъ и҆ дх҃омъ , согрѣше́нїи мра́къ дш҃ѝ моеѧ̀ ѿгна́въ , ѡ҆зарѝ оу҆́мъ мо́й молю́сѧ , да возмогꙋ̀ пѣ́ти варлаа́ма твоегѡ̀ оу҆го́дника . Ѿ ко́рене блага́гѡ блажа́йшаѧ ѿ́расль прозѧ́блъ є҆сѝ . земны́хъ маловре́меннагѡ житїѧ̀ и҆збѣ́глъ є҆сѝ . тѣ́мъ ны́нѣ чистоты̀ вѣне́цъ прїе́млѧ , со а҆́нг҃лы хрⷭ҇тꙋ̀ воспѣва́еши , пое́мъ гдⷭ҇ви , ꙗ҆́кѡ просла́висѧ . Земна́ѧ и҆ мимотекꙋ́щаѧ ꙗ҆́кѡ оу҆ме́ты вмѣни́въ , хрⷭ҇та̀ є҆ди́ного прїѡ҆брѣ́лъ є҆сѝ . є҆го́же сою́зомъ любвѐ оу҆ѧ́звивъ дш҃ꙋ свою̀ , и҆ тогѡ̀ потща́сѧ ѡ҆брѣстѝ ненасыща́емыѧ добро́ты . боⷢ҇ . Оу҆слы́ша є҆́вва прама́ти в̾ печа́лехъ роди́ши ча́да . ты́ же чⷭ҇таѧ дв҃о оу҆слы́ша гдⷭ҇ь с̾ тобо́ю ра́дꙋисѧ , и҆ ра́дованнымъ гла́сомъ бг҃оневѣ́сто печа́ль прама́тере потре́бльши .

катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . На ка́мени мѧ вѣ́ры оу҆твердѝ , раз̾ширѝ оу҆ста̀ моѧ̀ на врагѝ моѧ̀ . воз̾весели́босѧ дх҃ъ мо́й воспѣва́ти , нѣ́сть ст҃а ꙗ҆́коже бг҃ъ на́шъ , и҆ нѣ́сть пра́ведна па́че тебѐ гдⷭ҇и . По а҆пⷭ҇лꙋ ѻ҆́ч҃е вы́шнѧѧ и҆ща̀ , и҆ мꙋдрова́нїе и҆мѣ́ѧ є҆́же къ бг҃ꙋ , всѧ̀ ꙗ҆́же на землѝ ѡ҆ста́вилъ є҆сѝ , и҆ па́че є҆стества̀ добро́ты сподо́бисѧ . Свѣ́томъ бжⷭ҇твенымъ ѡ҆сїѧ́емь ѡ҆ не́мъ , и҆ пꙋ́ть и҆́же к̾ жи́зни ведꙋ́щь позна́лъ є҆сѝ ѻ҆́ч҃е на́шъ варлаа́ме . и҆ равноа҆́нг҃льнагѡ ра́ди житїѧ̀ , чꙋдотво́рецъ и҆сцѣле́нїемъ нарече́сѧ . Зако́ны пита́ѧсѧ всѣ́хъ творца̀ и҆ влⷣки . тѣ́мже и҆ невече́рнимъ блиста́ѧ свѣ́томъ , неле́стное сл҃нце ꙗ҆ви́лсѧ є҆сѝ , и҆ премꙋ́дрости сокро́вище , ми́ръ ѡ҆богаща́ѧ . боⷢ҇ . Во и҆ны́хъ жена́хъ мт҃и до́ндеже дв҃а непозна́сѧ , ни мт҃и по ржⷭ҇твѣ̀ дв҃ьствовати сподо́бисѧ . на тебѣ́ же дв҃о бг҃омт҃и ѡ҆боѐ сбы́стьсѧ . тѣ́мъ весе́лїемъ дх҃а воспѣва́ю , нѣ́сть непоро́чны па́че тебѐ влⷣчце .

катава́сїѧ : Твоѧ̀ пѣвцы̀ .

сѣда́ленъ . гла́съ , и҃ . Красоты̀ мирскі́ѧ ѿ млады́хъ ногте́й прпⷣбне воз̾ненави́дѣвъ , є҆ди́ного же хрⷭ҇та̀ ѿ срⷣца воз̾люби́лъ є҆сѝ , и҆ томꙋ̀ все́ю дш҃е́ю прилѣпи́сѧ , ꙗ҆́кѡ беспло́тенъ на землѝ поживѐ с̾ пло́тїю . сла́вꙋ же мимотекꙋ́щꙋю и҆ бога́тство нивочто́же вмѣни́въ . нбⷭ҇ное бога́тство воспрїѧ́лъ є҆сѝ , и҆ сла́вꙋ вѣ́чнꙋю . тѣ́мже оу҆блажа́емъ ст҃о́е твоѐ оу҆спе́нїе , и҆ в̾ не́мъ торжествꙋ́юще вопїе́мъ ти . бг҃огла́се ѻ҆́ч҃е на́шъ варлаа́ме , молѝ хрⷭ҇та̀ бг҃а , грѣхо́въ ѡ҆ставле́нїе дарова́ти , чтꙋ́щимъ любо́вїю ст҃ꙋ́ю па́мѧть твою̀ . вⷤ . сла́ва , и҆ ны́нѣ , боⷢ҇ . Ꙗ҆́кѡ всенепоро́чнаѧ невѣ́сто творцꙋ̀ , ꙗ҆́кѡ неи҆скꙋсомꙋ́жнаѧ мт҃и и҆зба́вителѧ прїѧ́телище , ꙗ҆́кѡ сꙋ́щи оу҆тѣ́шителѧ всепѣ́таѧ , без̾зако́нїю мѧ сꙋ́ща скве́рно жили́ще , и҆ бѣсо́мъ и҆гра́лище въ ра́зꙋмѣ бы́вша , потщи́сѧ и҆ си́хъ ѕлодѣ́йствїѧ мѧ и҆зба́вити , свѣ́тло жили́ще добродѣ́тельми содѣ́лавши , свѣтода́тельнаѧ и҆ нетлѣ́ннаѧ , разженѝ ѻ҆́блакъ страсте́й , и҆ вы́шнѧгѡ прича́стїѧ сподо́би , и҆ свѣ́тꙋ невече́рнемꙋ мл҃твами сѝ .

пѣ́снь , д҃ . і҆рмо́съ . Пою́ тѧ слꙋ́хомъ бо гдⷭ҇и , оу҆слы́шахъ и҆ оу҆боѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гое твоѐ соше́ствїе є҆́же на мѧ̀ прославлѧ́ю ѡ҆бновле́нїе . Ꙗ҆́кѡ в̾ порѳи́рꙋ и҆ вѷссѡ́нъ и҆ въ ца́рскꙋю багрѧни́цꙋ ѡ҆дѣ́ѧсѧ тобо́ю вели́каѧ рꙋ́сскаѧ землѧ̀ , дне́сь оу҆́бѡ свѣ́тлѡ торжествꙋ́ѧ весели́тсѧ варлаа́ме , и҆мѣ́ѧ тѧ̀ в̾ себѣ̀ ꙗ҆́кѡ неи҆стощи́мое сокро́вище . Ми́ра любвѐ ѿре́ксѧ дости́же го́рнѧгѡ і҆єрⷭ҇ли́ма и҆дѣ́же хрⷭ҇то́съ со ѻ҆ц҃е́мъ и҆ дх҃омъ , и҆ вѣнце́мъ ѿ негѡ̀ сподо́бисѧ . со беспло́тными ли́ки пое́ши прїе́млѧ є҆гѡ̀ сїѧ́нїе . А҆́ще оу҆́бѡ ѻ҆́ч҃е тѣ́сныи и҆ болѣ́зненыи пꙋ́ть ше́ствовавъ въ житїѝ , но ѻ҆ба́че нетлѣ́ннꙋю жи́знь наслѣ́дова , ѿ ѻ҆нꙋ́дными свѣтлостьмѝ бога́тнѡ просвѣща́ѧсѧ , бг҃обл҃же́нне варлаа́ме . боⷢ҇ . И҆́стиннѡ тѧ̀ сѣ́нь свидѣ́тельствова многоразли́чными ѻ҆бразы̀ , ꙗ҆́вѣ показꙋ́ющи воплоще́ннагѡ и҆з̾ тебѐ є҆ди́ного ѿ трⷪ҇цы пречⷭ҇таѧ неи҆змѣ́ннѡ бг҃омт҃и влⷣчце , и҆ ми́ръ ѡ҆бно́вльша .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Свѣ́та пода́телю , и҆ вѣко́мъ тво́рче гдⷭ҇и , во́ свѣтѣ твои́хъ повелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Ꙗ҆ре́мъ гдⷭ҇нь ѿ ю҆́ности мꙋ́дре взе́мъ , послѣ́дова хрⷭ҇тꙋ̀ скорбьмѝ и҆ слеза́ми прпⷣбне , мы́сленое ѻ҆́ко к̾ немꙋ̀ и҆мѣ́ѧ , до́ндеже и҆ ст҃ы́хъ селе́нїи дости́же , ѡ҆брѣ́тъ поко́ище кра́йнѧгѡ гра́да . Страсте́й ѿгна́въ мглꙋ̀ ꙗ҆́вѣ , зарѧ́ми ѻ҆́ч҃е добродѣ́телей . просвѣще́нїе дх҃а в̾ срⷣцы прїе́мъ варлаа́ме , и҆́мже попали́лъ є҆сѝ всѧ̀ бѣсо́вскаѧ ѡ҆полче́нїѧ . и҆ по́стническимъ ликѡ́мъ причте́сѧ . Насажде́нъ во дворы̀ гдⷭ҇нѧ , и҆ в̾ домꙋ̀ бг҃а на́шегѡ процвѣ́лъ є҆сѝ . прїе́мъ нбⷭ҇ное сѣ́мѧ бг҃одх҃нове́нне серде́чною браздо́ю , кла́съ стори́чествꙋющь прине́слъ є҆сѝ . тѣ́мже ѡ҆богати́сѧ вѣнце́мъ чꙋдесы̀ . боⷢ҇ . Оу҆пра́ви оу҆́мъ мо́й влⷣчце трꙋжда́ющьсѧ в̾ пꙋчи́нѣ скорбе́й , и҆ потоплѧ́емь наше́ствїемъ тлетво́рныхъ страсте́й . и҆ спасѝ бцⷣе к̾ тебѣ̀ прибѣга́ющїѧ , и҆ны́ѧ бо помо́щницы чⷭ҇таѧ ра́звѣ тебѐ незна́емъ . катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твоегѡ̀ призыва́ю бе́зднꙋ , ѿ тлѝ бж҃е мѧ воз̾ведѝ . Мо́ре жите́йское любомꙋ́дрїемъ и҆спыта́въ , и҆ разꙋмѣ́въ сꙋ́етно сꙋ́ще , и҆ ꙗ҆́кѡ вско́рѣ погиба́юще ѿве́рглъ є҆сѝ , є҆ди́номꙋ прилѣпи́сѧ хрⷭ҇тꙋ̀ . є҆го́же ра́ди и҆ тѧготꙋ̀ дневнꙋ́ю поне́слъ є҆сѝ . ѡ҆ всѣ́хъ томꙋ̀ восхожде́нїѧ въ срⷣцы сѝ полага́ше . Вѣ́триломъ ѡ҆крилѧ́емь воздержа́нїѧ , и҆ ѿ тꙋ́дꙋ дости́же в̾ приста́нище бл҃гоꙋти́шное . поще́нїемъ пита́ѧ дш҃ꙋ свою̀ прпⷣбне , и҆ свѣ́тлꙋ всѣ́хъ творцꙋ̀ пред̾ста́ви ю҆̀ . тѣ́мже и҆ хрⷭ҇то́съ прїѧ́тъ ю҆̀ ꙗ҆́кѡ свѣтоза́рнꙋю ѕвѣздꙋ̀ , и҆ свое́й сла́вѣ прича́стнꙋ содѣ́ла . А҆́нг҃льскаѧ во́инства и҆́же во́ плоти житїю̀ твоемꙋ̀ оу҆диви́шасѧ ѻ҆́ч҃е варлаа́ме . бꙋ́ри бо страсте́й ѿбѣ́глъ , и҆ соверше́нагѡ ра́ди житїѧ̀ , вѣ́триломъ воздержа́нїѧ дости́же въ бл҃гоꙋти́шное приста́нище хрⷭ҇то́во . боⷢ҇ . Ѡ҆бетша́вшїѧ ны̀ го́рькимъ дре́вле дре́ва вкꙋше́нїемъ , и҆ па́дшасѧ поползнове́нїемъ пречⷭ҇таѧ ѡ҆бнови́ла є҆сѝ , зижди́телѧ ро́ждьши сло́во соста́вное дв҃о мт҃и влⷣчце .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , и҃ . Ꙗ҆́коже дрꙋгі́и и҆лїѧ̀ ѻ҆́ч҃е до́ждь с̾ нб҃сѐ сведѐ . ѻ҆́нъ бо ѻ҆́гнь сведѐ , и҆ царѧ̀ оу҆дивѝ . ты́ же лю́ди своѧ̀ воз̾веселѝ , и҆ торжествова́ти оу҆стро́и . вели́кїи бо но́въ гра́дъ вельмѝ тобо́ю хва́литсѧ , и҆мѣ́ѧ мо́щи твоѧ̀ в̾ себѣ̀ , є҆го́же и҆ сохранѝ ѿ вра́гъ непоколеби́ма . да зове́мъ ти , ра́дꙋисѧ прпⷣбне варлаа́ме ѻ҆́ч҃е на́шъ . и҆́косъ . А҆́ще и҆ чл҃къ є҆стество́мъ бы́сть прпⷣбне ѻ҆́ч҃е , но вы́шнѧгѡ і҆єрⷭ҇ли́ма ꙗ҆ви́сѧ согра́жданинъ . и҆ чл҃къ оу҆́бѡ є҆стество́мъ , беспло́тныхъ че́сти сподо́бисѧ . тѣ́мже и҆ са́ми зрѧ́ще чꙋдеса̀ похва́льнаѧ оу҆дивлѧ́ютъ на́съ , и҆ наꙋча́ютъ зва́ти тебѣ̀ такова́ѧ . ра́дꙋисѧ бл҃гочести́ва ѻ҆ц҃а ѿ́расль , ра́дꙋисѧ ма́тере бл҃гоговѣ́йныѧ вѣ́твь . ра́дꙋисѧ смире́нїѧ высото̀ , ра́дꙋисѧ ꙗ҆́кѡ к̾ бж҃їю ра́зꙋмꙋ всѣ́хъ приводѧ̀ . ра́дꙋисѧ ꙗ҆́кѡ мно́га чꙋдеса̀ ѡ҆ хрⷭ҇тѣ̀ сотвори́лъ є҆сѝ , ра́дꙋисѧ цѣломꙋ́дрїѧ сто́лпе , и҆́мже бѣсо́вскаѧ шата́нїѧ и҆скорени́шасѧ . ра́дꙋисѧ свѣти́льниче многосвѣ́тлыи , ра́дꙋисѧ ꙗ҆́кѡ оу҆вѧди́лъ є҆сѝ плотьска́ѧ мꙋдрова́нїѧ . ра́дꙋисѧ ꙗ҆́кѡ до́ждь моли́твою сведѐ . и҆ па́ки наводне́нїю бы́вшꙋ , моли́твою водото́чныѧ ѻ҆́блаки востѧзꙋ́еши . ра́дꙋисѧ вели́комꙋ но́вꙋ гра́дꙋ похвала̀ и҆ оу҆тверже́нїе , є҆го́же и҆ сохранѝ ѿ вра́гъ непоколеби́ма до конца̀ , да зове́мъ тѝ , ра́дꙋисѧ прпⷣбне варлаа́ме ѻ҆́ч҃е на́шъ .

пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ поли деи́рѣ слꙋжи́мѣмъ , трїѐ ѻ҆́троцы неради́ша ѡ҆ без̾бо́жнѣмъ велѣ́нїи , но посредѣ̀ пла́мени в̾ве́ржени , прохлажда́еми поѧ́хꙋ , бл҃гослове́нъ бг҃ъ ѻ҆ц҃ъ на́шихъ . Ѕѣ́льнымъ поще́нїемъ ꙗ҆́кѡ бл҃гово́нною пи́щею пита́ѧ дш҃ꙋ свою̀ , прпⷣбне варлаа́ме . тѣ́мже и҆ трисл҃нечномꙋ бжⷭ҇твꙋ̀ пред̾стоѧ̀ со а҆́нг҃лы , пое́ши , бл҃гослове́нъ бг҃ъ ѻ҆ц҃ъ на́шихъ . Ѡ҆блиста́лъ є҆сѝ ꙗ҆́коже невече́рнее сл҃нце , ѻ҆те́чество сѝ просвѣща́ѧ прпⷣбне варлаа́ме , тмы̀ и҆збавлѧ́ѧ страсте́й . и҆ и҆́же на на́съ навѣ́тꙋющихъ совѣ́ты разорѝ , ѿ вра́гъ непреткнове́нномъ бы́ти на́мъ , пою́щимъ , бл҃гослове́нъ бг҃ъ ѻ҆ц҃ъ на́шихъ . Ꙗ҆́кѡ на бжⷭ҇твенꙋю добродѣ́телей лѣ́ствицꙋ воз̾держа́нїемъ ѻ҆́ч҃е воз̾ше́дъ , смотрели́выма ѻ҆чи́ма хрⷭ҇та̀ цр҃ѧ ви́дѣлъ є҆сѝ , незави́стною десни́цею по числꙋ̀ добродѣ́телей варлаа́ме , дарова́нїѧ даю́ща , ѿ дш҃и вопїю́щимъ , бл҃гослове́нъ бг҃ъ ѻ҆ц҃ъ на́шихъ . Дрема́нїѧ ѿ ню́дъ и҆ сна̀ свои́ма ѻ҆чи́ма не́далъ є҆сѝ , до́ндеже возме́здїе ѿ хрⷭ҇та̀ трꙋдо́мъ ѡ҆брѣ́те , наслажде́нїе нбⷭ҇нагѡ црⷭ҇твїѧ , и҆́же оу҆гото́ва ѿ вѣ́ры пою́щимъ , бл҃гослове́нъ бг҃ъ ѻ҆ц҃ъ на́шихъ . боⷢ҇ . Ѡ҆бновлѧ́ютсѧ в̾ тебѣ̀ є҆стества̀ зако́ни , вы́ше є҆стества́ бо є҆стество́мъ непости́жимаго дв҃о бг҃а є҆мманꙋ́ила пресла́внѡ чⷭ҇таѧ родила̀ є҆сѝ , в̾ на́ше вѣ́рныхъ порожде́нїе .

катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Въ пе́щь ѻ҆́гненнꙋю , к̾ дѣ́темъ є҆вре́йскимъ соше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Слеза́ми свои́ми ѻ҆́ч҃е варлаа́ме оу҆мыва́ѧсѧ житїѐ проше́лъ є҆сѝ , и҆ тѣ́ми мно́жества бѣсо́въ потопи́лъ є҆сѝ , вѣ́рныхъ же мы́сли воз̾веселѝ . пою́щихъ , всѧ̀ дѣ́ла гдⷭ҇а по́йте , и҆ превозноси́те є҆гѡ̀ во́ вѣки . Оу҆ѧзви́сѧ бжⷭ҇твенымъ жела́нїемъ всебл҃же́нне . тѣ́мже и҆ непоро́чно и҆ пра́ведно житїѐ проходѧ̀ , до́ндеже дости́же црⷭ҇кагѡ прⷭ҇то́ла . ѿ ѻ҆нꙋ́дными свѣтлостьмѝ ѡ҆сїѧ́ѧ пою́щихъ , всѧ̀ дѣ́ла гдⷭ҇а по́йте , и҆ превозноси́те є҆гѡ̀ во́ вѣки . Къ свѣ́тꙋ незаходи́момꙋ сла́вне взѧ́тсѧ . наслажде́нїе же земны́хъ веще́й ѡ҆плюва́въ вы́шнѧгѡ ра́ди наслажде́нїѧ , па́че воздержа́нїю поревнова́лъ є҆сѝ . и҆ страсте́й пла́мень потща́лсѧ є҆сѝ оу҆гаси́ти , слеза́ми свои́хъ и҆сто́чникъ варлаа́ме . вопїѧ̀ , всѧ̀ дѣ́ла гдⷭ҇а по́йте , и҆ превозноси́те є҆гѡ̀ во́ вѣки . боⷢ҇ . Распѧ́тїе и҆ погребе́нїе и҆́же ѿ тебѐ небра́чно дв҃о прои҆зы́де , претерпѣ́въ на́съ ра́ди мꙋче́нїе . є҆го́же стрⷭ҇те́мъ ревнꙋ́ѧ прпⷣбныи варлаа́мъ , крⷭ҇тови́днѡ мꙋче́нїѧ поще́нїемъ томꙋ̀ чⷭ҇таѧ послѣ́дова . катава́сїѧ : Хва́лимъ бл҃гослови́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Ꙗ҆́же пре́жде сл҃нца , свѣти́льника бг҃а воз̾сїѧ́вша , пло́тїю к̾ на́мъ прише́дша и҆з̾ бокꙋ̀ дв҃чꙋ , неи҆зрече́ннѡ вочл҃чьшасѧ , бл҃гослове́ннаѧ чⷭ҇таѧ , тѧ̀ бцⷣе велича́емъ . Пожи́въ на землѝ ра́вно а҆́нг҃льнѡ , тѣ́мже и҆ равноа҆́нг҃льнꙋ ѡ҆брѣ́те свѣ́тлость . молѝ непреста́ннѡ и҆зба́вителѧ варлаа́ме , ѡ҆ творѧ́щихъ бл҃гоче́стнѡ па́мѧть твою̀ ѽ пребл҃же́нне , и҆́нокꙋющимъ похвало̀ . Оу҆́зкїи и҆ приско́рбныи ше́ствовавъ пꙋ́ть ѻ҆́ч҃е варлаа́ме . и҆ тѣле́снѣ оу҆́бѡ преста́висѧ , дх҃омъ же жи́въ пред̾стои́ши бг҃ови . но ꙗ҆́кѡ и҆мѣ́ѧ дерзнове́нїе є҆мꙋ́же в̾ житїѝ порабо́та , молѝ спастѝ дш҃а на́ша . И҆сцѣле́нїи ꙗ҆ви́сѧ стрꙋѧ̀ незави́стнаѧ , многомѧте́жнагѡ пла́мене оу҆́глїе страсте́й оу҆гаси́лъ є҆сѝ . оу҆́мъ бо сво́й некра́домъ прпⷣбне ѻ҆́ч҃е соблюдѐ . и҆ ꙗ҆́кѡ крѣ́покъ варлаа́ме , побѣжда́еши и҆скꙋси́телѧ . боⷢ҇ . Є҆ди́на преи҆мꙋ́щи дерзнове́нїе влⷣчце , за ве́сь ми́ръ сн҃ꙋ своемꙋ̀ моли́сѧ , не помина́ѧ без̾чи́сленыхъ собла́знъ на́шихъ . и҆ покры́й лю́ди вопїю́щїѧ ти оу҆миле́нымъ гла́сомъ , спасѝ чⷭ҇таѧ бцⷣе тебѐ досто́йнѡ велича́ющихъ .

катава́сїѧ : Всѧ́къ зе́менъ .= Досто́йнѡ є҆́сть . свѣти́ленъ . Восто́ка восто́комъ разꙋ́мнагѡ сл҃нца хрⷭ҇та̀ свѣтоза́рнаѧ лꙋча̀ восїѧ̀ , и҆ свѣти́льникъ многосвѣ́тлыи , пꙋсты́нное воспита́нїе , и҆ чистоты̀ кра́снаѧ ѻ҆би́тель , хрⷭ҇то́вы добро́ты ꙗ҆́снѡ зрѧ̀ є҆го́же сїѧ́ньми оу҆́мъ сво́й ѡ҆зари́въ . тѣ́мже тѧ̀ свѣти́льника стѧжа́вше ѻ҆́ч҃е на́шъ варлаа́ме , мо́лимъ тѧ̀ в̾ ми́рѣ сохране́номъ бы́ти , па́мѧть твою̀ почита́ющимъ . =два́жды . сла́ва , и҆ ны́нѣ , боⷢ҇ . Неи҆зрече́нномꙋ сѝ прижитїю̀ бы́сть всенепоро́чнаѧ невѣ́сто ꙗ҆́кѡ сꙋ́щи чⷭ҇тнѣ́йшїи хра́мъ бцⷣе , свѣ́тъ бо превѣ́чныи в̾ тѧ̀ всели́сѧ , и҆ породѝ бг҃а сло́ва . пою́ще твоѐ ржⷭ҇тво̀ , велича́емъ тѧ̀ досто́йнѡ всенепоро́чнаѧ ѻ҆трокови́це .

На хвали́тѣхъ , стⷯры . гла́съ , и҃ . Бжⷭ҇твенаѧ и҆ свѣтоно́снаѧ наста̀ па́мѧть и҆́же в̾ по́стницехъ вели́кагѡ варлаа́ма , дш҃ꙋ и҆ тѣ́ло веселѧ́ща . тѣ́мже прїиди́те празднолю́бцы , ꙗ҆́кѡ да наслади́мсѧ ны́нѣшнѧгѡ торжества̀ . се́бо на́ше зва́нїе прїи́де , все́й вели́кой росі́йской землѝ оу҆добре́нїе , вели́комꙋ же новꙋ̀ гра́дꙋ похвала̀ , и҆ оу҆твержде́нїе . снаслѣ́дникъ бо хрⷭ҇то́въ ꙗ҆ви́сѧ , и҆ беспло́тныхъ житїю̀ подража́тель бы́въ . и҆ мо́литсѧ сп҃сꙋ всѣ́хъ , оу҆мири́ти ми́ръ и҆ спастѝ дш҃а на́ша . два́жды . Ꙗ҆́кѡ в̾ терпѣ́нїи мно́гъ , и҆ въ ѕло́бѣ бл҃го ѿда́тливъ , въ животѣ̀ и҆ по сме́рти ѻ҆́ч҃е пока́засѧ , всѣ́мъ вѣ́рою приходѧ́щимъ , и҆сцѣле́нїѧ ѡ҆би́льнѡ подава́еши . хро́мымъ хожде́нїе , и҆ дꙋ́хи лꙋка́выѧ прогонѧ́еши . па́мѧть твоѧ̀ сла́вна , и҆ оу҆спе́нїе со ст҃ы́ми , варлаа́ме ѻ҆́ч҃е на́шъ . тѣ́мже оу҆вѣрѧ́еми глаго́лемъ , па́мѧть пра́веднагѡ с̾ похвала́ми быва́етъ . Дх҃а бжⷭ҇твенагѡ бл҃года́тїю со́брани праз̾днолю́бцы , варлаа́ма бл҃гоче́стїю подража́телѧ , веселѧ́щесѧ восхва́лимъ дне́сь , цр҃кви пресвѣ́тлагѡ свѣти́льника . тѣ́ло бо неꙋдо́бь покори́вое , воздержа́нїѧ брозда́ми ꙗ҆́вѣ низ̾ложѝ , и҆ бл҃гопокори́во дш҃ѝ повинꙋ́лъ є҆́сть . тѣ́мже бжⷭ҇твенагѡ дх҃а сосꙋ́дъ досто́инъ оу҆гото́васѧ . и҆ трⷪ҇цѣ со а҆́нг҃лы пред̾стоѧ̀ , мо́литсѧ непреста́ннѡ ѡ҆ оу҆мире́нїи ми́ра , и҆ ѡ҆ спасе́нїи дш҃ъ на́шихъ . сла́ва . гла́съ , и҃ . Всечⷭ҇тна́ѧ и҆ чꙋдотво́рнаѧ ра́ка , и҆дѣ́же лежи́тъ всечⷭ҇тно́е и҆ ст҃о́е тѣ́ло твоѐ , варлаа́ме ѻ҆́ч҃е на́шъ , и҆сцѣле́нїѧ неѡ҆скꙋ́днѡ подава́етъ притека́ющимъ съ вѣ́рою , и҆ дш҃етлѣ́нныѧ стра́сти и҆сцѣлѧ́ющи , мно́жества же бѣсо́вскаѧ ѿрѣва́ющи . тѣ́мже и҆ стада̀ и҆́нокъ , со а҆рхїєре́йскими ли́ки чꙋдесы̀ оу҆дивлѧ́еми , достолѣ́пнѡ и҆ ра́достнѡ ѿ дш҃ѝ вопїе́мъ , бг҃обл҃же́нне и҆ прпⷣбне ѻ҆́ч҃е на́шъ варлаа́ме , молѝ хрⷭ҇та̀ бг҃а , оу҆ще́дрити ми́ръ , и҆ спастѝ дш҃а на́ша . и҆ ны́нѣ , боⷢ҇ . Влⷣчце прїимѝ мл҃твꙋ ра́бъ свои́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . пѣ́снь г҃ , и҆ ѕ҃ ѧ .

По вхо́дѣ , а҆́ще ли хра́мъ хрⷭ҇то́въ , и҆лѝ бцⷣы : тропа́рь хра́мꙋ , и҆ ст҃о́мꙋ . сла́ва , конда́къ ст҃о́мꙋ . и҆ ны́нѣ , хра́мꙋ .

По вхо́дѣ , а҆́ще хра́мъ ст҃ы́мъ : тропа́рь хра́мꙋ , и҆ ст҃о́мꙋ . конда́къ хра́мꙋ . сла́ва , ст҃о́мꙋ . и҆ ны́нѣ , конда́къ : застꙋ́пнице хрⷭ҇тїа́нѡмъ .

проки́менъ , ѱл҃о́мъ дв҃довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ= гала́тѡмъ . заⷱ҇ , сг҃і . а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , в̾ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =лꙋкѝ . заⷱ҇ , к҃д . =прича́стенъ . въ па́мѧть вѣ́чнꙋю бꙋ́детъ пра́ведникъ .