7 ноября: свв. мчч. 33 в Мелетии

МЦⷭ҇А ТОГО́ЖЕ ВЪ З҃ ДН҃Ь

ст҃ы́хъ мч҃нкъ л҃г , и҆́же в̾ мелеті́и мꙋ́ченыхъ . и҆ прпⷣбнагѡ ѻ҆ц҃а на́шегѡ ла́зарѧ и҆́же въ галасі́йстѣй горѣ̀ пости́вшагосѧ . =Ве́черъ , на гдⷭ҇и возва́хъ , стихѣ́ры , гла́съ , д҃ . поⷣ . ꙗ҆́кѡ до́блѧ . Б=г҃осо́браное ѡ҆полче́нїе ,꙳ сщ҃е́нное во́инство ,꙳ цр҃кви ѡ҆́ бз҃ѣ со́нмъ ст҃ы́и ,꙳ чи́нъ мч҃нкъ бг҃одх҃нове́нъ ,꙳ кра́сное собра́нїе ,꙳ неразрꙋши́мое споборе́нїе ,꙳ вои́стинꙋ ꙗ҆ви́стесѧ достосла́внїи ,꙳ и҆ вы́шнїѧ митропо́лїи досто́йни жи́теле .꙳ сегѡ̀ ра́ди до́лжнѡ оу҆бл҃жа́етесѧ . Съ ника́ндромъ и҆ сихі́а ,꙳ а҆ѳана́сїа и҆ ма́манта ,꙳ бжⷭ҇твенаго варахі́а и҆ кали́нника ,꙳ и҆ ѳеѡге́на и҆ ни́кона ,꙳ ло́гина и҆ ѳео́дора ,꙳ оу҆але́рїа кꙋ́пнѡ и҆ ѯанѳі́а ,꙳ ѳеодѡ́та и҆ каллима́ха и҆ є҆вге́нїа ,꙳ всѝ соше́дшесѧ ,꙳ с̾ бжⷭ҇твенымъ ѳеодꙋ́ломъ и҆ ѻ҆стрихі́а почте́мъ . До́блѧго неро́на ,꙳ и҆ сла́внаго є҆пифа́нїа , маѯимїа́на кꙋ́пнѡ и҆ дꙋкиті́а ,꙳ клавдїа́на и҆ ѳео́фила ,꙳ и҆ бжⷭ҇твенаго гига́нтїа ,꙳ и҆ дороѳе́а вѣ́рнѡ дїодѡ́та воспое́мъ ,꙳ и҆ кастрикі́а и҆ а҆ники́та кꙋ́пнѡ и҆ ѳемелі́а ,꙳ є҆ѵтихі́а же согла́снѡ ,꙳ и҆́стинныѧ мч҃нки .

и҆́ны стихѣ́ры , прпⷣбномꙋ . гла́съ , ѕ҃ . поⷣ . всѐ оу҆пова́нїе . Всѐ ѿложи́въ страсте́й без̾слове́сїе ,꙳ и҆ пло́ть дх҃ови покори́въ ,꙳ бы́сть добродѣ́тели пра́вило ,꙳ и҆́нокѡмъ оу҆тверже́нїе ,꙳ по́стникѡмъ ѻ҆́бразъ ,꙳ прпⷣбнымъ оу҆добре́нїе .꙳ и҆ ны́нѣ неи҆зрече́нныѧ добро́ты ,꙳ зри́ши творца̀ своегѡ̀ ,꙳ пита́ѧсѧ прⷭ҇нѡ добро́тами ,꙳ и҆́же на́ нб҃сѣхъ дх҃омъ .꙳ тѣ́мъ соше́дшесѧ ,꙳ в̾ пѣ́снехъ пѣ́нїи сла́дкими твою̀ честнꙋ́ю ,꙳ и҆ всепра́здньственꙋю па́мѧть пра́зднꙋемъ . Всѐ ѡ҆мрази́лъ є҆сѝ ,꙳ ве́щное без̾кра́сїе ,꙳ и҆ многомѧте́жное пло́ти волне́нїе ,꙳ оу҆кроти́въ мꙋ́дре дыха́нїѧ ,꙳ пре́былъ є҆сѝ страстьмѝ непрекло́ненъ ,꙳ ꙗ҆́кѡ сто́лпъ оу҆крѣплѧ́емь ,꙳ дх҃о́вными бронѧ́ми оу҆мо́мъ до́блественымъ .꙳ и҆ ны́нѣ бжⷭ҇твенагѡ полꙋчѝ ,꙳ вои́стинꙋ видѣ́нїѧ и҆ свѣ́тлости ,꙳ и҆ к̾ немꙋ́же жела́лъ є҆сѝ преста́висѧ ,꙳ наслажда́ѧсѧ є҆гѡ̀ неконе́чныѧ свѣ́тлости ,꙳ положе́нїемъ ѡ҆божа́емъ . И҆лїѝ подо́бѧсѧ ,꙳ и҆ і҆ѡа́ннꙋ свѣти́льникꙋ .꙳ свѣ́тъ воз̾люби́въ ,꙳ молча́ти в̾ гора́хъ и҆ в̾ пꙋсты́нѧхъ сꙋхи́хъ .꙳ восхожде́нїю всегда̀ поꙋча́ѧсѧ бжⷭ҇твеномꙋ ,꙳ и҆ преспѣва́ѧ добродѣ́телей пꙋте́мъ .꙳ тѣ́мже пости́глъ є҆сѝ жела́нїе кра́йнее премꙋ́дре ,꙳ и҆ ра́дꙋѧсѧ пред̾стои́ши ,꙳ трисїѧ́нномꙋ трⷪ҇цы свѣ́тꙋ .꙳ ѿ него́ же нехода́тайственѣ ,꙳ бжⷭ҇твенꙋю прїе́млѧ зарю̀ .꙳ со дерзнове́нїемъ моли́сѧ ,꙳ ѡ҆ дш҃а́хъ на́шихъ . сла́ва . гла́съ , є҃ . Прпⷣбне ѻ҆́ч҃е , не́далъ є҆сѝ сна̀ свои́ма ѻ҆чи́ма , ни бро́вма свои́ма дрема́нїѧ , до́ндеже дш҃ꙋ и҆ тѣ́ло ѿ страсте́й свободи́лъ є҆сѝ . и҆ себѐ оу҆гото́ва дх҃ꙋ ст҃о́мꙋ ѻ҆би́тель , прише́дъ бо хрⷭ҇то́съ со ѻ҆ц҃е́мъ жили́ще в̾ тебѣ̀ сотворѝ . и҆ є҆диносꙋ́щнѣй трⷪ҇цѣ оу҆го́дникъ бы́въ , великопроповѣ́дниче ла́заре ѻ҆́ч҃е на́шъ , моли́сѧ ѡ҆ дш҃а́хъ на́шихъ . и҆ нн҃ѣ , боⷢ҇ . и҆лѝ , крⷭ҇тобоⷢ҇ . поⷣ . ра́дꙋйсѧ живоно́сныи .= А҆́=гньца своегѡ̀ , а҆́гница и҆ногда̀ зрѧ́щи , к̾ заколе́нїю тща́щасѧ , оу҆се́рднѡ послѣ́доваше си́це вопїю́щи є҆мꙋ̀ , гдѣ̀ и҆́деши ча́до моѐ сла́дкое хрⷭ҇тѐ . что̀ ра́ди тече́нїе сѐ долготе́рпе тече́ши нелѣ́ностнѡ і҆с҃е любе́зныи , без̾грѣ́шныи многомлⷭ҇тиве гдⷭ҇и . да́ждь сло́во рабѣ̀ свое́й сн҃е мо́й многолюби́мыи . непреминѝ менѐ ще́дрыи молча̀ , стра́ннѡ ро́ждьшꙋю тѧ̀ бж҃е пребл҃гі́и , даѧ́и ми́рови ве́лїю млⷭ҇ть .

На стихо́внѣ , во ѻ҆кта́и . сла́ва . гла́съ , ѕ҃ . Прпⷣбне ѻ҆́ч҃е , во всю̀ зе́млю и҆зы́де вѣща́нїе и҆справле́нїи твои́хъ . тѣ́мъ на́ нб҃сѣхъ ѡ҆брѣ́те мздꙋ̀ трꙋдѡ́въ твои́хъ . бѣсо́вскаѧ погꙋби́лъ є҆сѝ ѡ҆полче́нїѧ . и҆ а҆́нг҃льскїѧ пости́глъ є҆сѝ чи́ны , и҆́хже житїю̀ беспоро́ка поревнова́лъ є҆сѝ . дерзнове́нїе и҆мѣ́ѧ к̾ хрⷭ҇тꙋ̀ бг҃ꙋ , ми́ръ и҆спросѝ дш҃а́мъ на́шимъ . и҆ нн҃ѣ , боⷢ҇ . и҆лѝ , крⷭ҇тобоⷢ҇ . поⷣ . в̾ =тре́тїи де́нь . Л=ю́дїи без̾зако́нныхъ , непра́веднѡ пригвозди́вшихъ тѧ̀ на́ древѣ , дв҃о чⷭ҇таѧ мт҃и твоѧ̀ зрѧ́щи . ꙗ҆́коже сѷмеѡ́нъ проречѐ , оу҆тро́бою сп҃се оу҆ѧзвлѧ́шесѧ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Мч҃нцы твоѝ гдⷭ҇и во страда́нїихъ свои́хъ вѣнцы̀ прїѧ́ша нетлѣ́нныѧ ѿ тебѐ бг҃а на́шегѡ . и҆мꙋ́ще крѣ́пость твою̀ непобѣди́мꙋю , мꙋ́чащихъ оу҆праздни́ша , и҆ разрꙋши́ша бѣсо́мъ немощна́ѧ шата́нїѧ . тѣ́хъ мл҃твами хрⷭ҇тѐ бж҃е спасѝ дш҃а на́ша .

сла́ва , прпⷣбномꙋ . гла́съ , и҃ . Бдѣ́нными мл҃твами , и҆ и҆злїѧ́нїи сле́зъ , сто́лпъ ѡ҆дождѧ́ше . и҆ и҆з̾ глꙋбины̀ воз̾дыха́нїи , во́сто трꙋды̀ расплоди́лъ є҆сѝ . и҆ бы́сть па́стырь . всѣ́мъ подава́ѧ ѡ҆ставле́нїе , прпⷣбне ѻ҆́ч҃е на́шъ ла́заре , молѝ хрⷭ҇та̀ бг҃а , спасти́сѧ дш҃а́мъ на́шимъ .

и҆ ны́нѣ , боⷢ҇ . и҆лѝ , крⷭ҇тобоⷢ҇ .

На оу҆́трени . є҆ди́нъ кано́нъ , во ѻ҆кта́и , со і҆рмосо́мъ , на́ ѕ҃ . и҆ ст҃ы́мъ два̀ . кано́нъ мч҃нкѡмъ , носѧ̀ краегране́сїе си́це , мꙋ́дрымъ похвалꙋ̀ сїю̀ мч҃нкѡмъ приношꙋ̀ . гла́съ , и҃ . пѣ́снь , а҃ . і҆рмо́съ . Во́дꙋ проше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вопїѧ́ше , и҆зба́вителю бг҃ꙋ на́шемꙋ пое́мъ .

запѣ́въ : Ст҃і́и мч҃нцы , моли́те бг҃а ѡ҆ на́съ .= Совокꙋ́пльшесѧ бжⷭ҇твенымъ нбⷭ҇нымъ си́ламъ . всѣ́мъ проси́те ѡ҆чище́нїѧ , свѣтоно́снꙋю ва́шꙋ па́мѧть похвалѧ́ющимъ , добропобѣ́днїи мч҃нцы . Пꙋ́ть мꙋче́нїѧ свѣ́тлѡ ше́ствовати жела́юще , претерпѣ́сте крѣ́пкѡ всѐ треволне́нїе мꙋче́нїѧ , оу҆крѣплѧ́еми дх҃омъ ст҃ы́мъ . Свѣти́льницы ꙗ҆ви́стесѧ на землѝ , многобо́жїѧ разрꙋша́юще тмꙋ̀ , бжⷭ҇твенїи страстоте́рпцы . сегѡ̀ ра́ди невече́рнѧгѡ свѣ́та прїе́млете . =боⷢ҇ . Ма́нїемъ всѧ̀ содѣва́ѧи , и҆з̾ тебѐ па́че сло́ва воплоща́етсѧ мт҃и чⷭ҇таѧ , страстоте́рпцы вѣнча́выи , побѣ́днѡ врага̀ попра́вшихъ .

дрꙋгі́и кано́нъ прпⷣбномꙋ . є҆мꙋ́же краегране́сїе сицево̀ : мольбꙋ̀ пою̀ второ́е тебѣ̀ требл҃же́нне . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пое́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прове́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ просла́висѧ .

запѣ́въ : Прпⷣбне ѻ҆́ч҃е ла́заре , молѝ бг҃а ѡ҆ на́съ . Прїиди́те вѣ́рнїи , дх҃омъ бжⷭ҇твенымъ веселѧ́щесѧ вѣ́рнѡ , восхва́лимъ бжⷭ҇твенаго ла́зарѧ . к̾ немꙋ̀ вопїю́ще , бл҃же́нне твои́ми мл҃твами бѣ́дъ и҆зба́ви на́съ . Къ твоемꙋ̀ па́ки ѻ҆те́чествꙋ прїитѝ тѧ̀ бг҃ъ сотворѝ и҆ нехотѧ́ща . тѣ́мъ приходѧ́ща мѧ при́снѡ к̾ страсте́мъ , спасѝ мл҃твами тѝ . Свѣтоза́рнаѧ бг҃ода́ннаѧ любы̀ въ тебѣ̀ восїѧ́вши бога́тно . свою̀ дш҃ꙋ за бли́жнѧго тѧ оу҆се́рднѡ бг҃оно́се положи́ти сотворѝ . боⷢ҇ . Спасѝ на́съ бг҃ороди́тельнице всенепоро́чнаѧ всѧ́когѡ гнѣ́ва и҆ скорбе́й , покланѧ́ющихсѧ твоемꙋ̀ ст҃о́мꙋ ѻ҆́бразꙋ , и҆ вѣ́рою бцⷣꙋ и҆сповѣ́дающихъ тѧ̀ .

пѣ́снь , г҃ . і҆рмо́съ . Нбⷭ҇номꙋ крꙋ́гꙋ верхотво́рче гдⷭ҇и , и҆ цр҃кви зижди́телю , ты̀ менѐ оу҆твердѝ в̾ любвѝ свое́й . жела́нїемъ сы́и кра́й , и҆ вѣ́рнымъ оу҆тверже́нїе , є҆ди́не чл҃колю́бче . Сщ҃е́нными повелѣ́нїи ти , сщ҃е́нныѧ мч҃нки сла́вне нерѡ́не къ бжⷭ҇твеномꙋ страда́нїю ты̀ наста́вилъ є҆сѝ . и҆ неради́ти ѡ҆ мꙋ́кахъ пресла́внѡ сотвори́лъ є҆сѝ бг҃обл҃же́нне . Сокрꙋша́еми дре́вїемъ , стра́сть честнꙋ́ю ст҃і́и пребл҃га́гѡ влⷣки и҆з̾ѡ҆брази́ли є҆стѐ . сокрꙋши́сте па́гꙋбныѧ лестьцы̀ тмы̀ , бл҃года́тїю вседержи́телѧ . На гдⷭ҇а всѣ́хъ бг҃ови́днїи мч҃нцы возло́жше оу҆пова́нїе , ѿ ню́дъ неподви́жими бы́сте стоѧ́нїѧ бо́льшагѡ . но зако́ннѡ бжⷭ҇твеное тече́нїе соверши́сте нра́ва пра́востїю . боⷢ҇ . Многои҆мени́таѧ ѻ҆трокови́це , ра́дꙋисѧ чⷭ҇таѧ влⷣчце , ꙗ҆́же неѡ҆пи́санное сло́во поро́ждьши ѡ҆пи́санно пло́тїю . є҆го́же ли́къ мч҃нческїи бг҃а и҆сповѣ́даѧ , стра́ждетъ крѣпча́йше .

и҆́нъ , і҆рмо́съ . Оу҆твердѝ на́съ собо́ю гдⷭ҇и , дре́вомъ оу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃колю́бецъ . Крѣ́постїю бжⷭ҇твеною мꙋ́дре оу҆крѣплѧ́емь , и҆зба́висѧ ѕвѣре́й сверѣ́пыхъ . тѣ́мъ моли́сѧ хрⷭ҇тꙋ̀ , ѿ ѕвѣре́й мы́сленыхъ и҆зба́вити пою́щихъ тѧ̀ .= Оу҆крѣплѧ́емь хрⷭ҇то́вою си́лою прпⷣбне , жа́ждꙋ и҆ тѧ́жесть пꙋсты́ннꙋю и҆ скꙋ́дость поне́слъ є҆сѝ до́блественѡ , наде́жею неи҆зрече́нныѧ пи́щи . И҆збѣ́глъ є҆сѝ враже́бныхъ напа́стей всебл҃же́нне а҆га́ринѣхъ внꙋ́къ , бжⷭ҇твеною бл҃года́тїю покрыва́емь , и҆ мно́гимъ на по́льзꙋ спаса́емь . =боⷢ҇ . Влⷣкꙋ всѧ́ческимъ чⷭ҇таѧ родила̀ є҆сѝ дв҃о , па́че сло́ва неи҆зрече́ннѡ . є҆го́же молѝ всепѣ́таѧ , пою́щихъ тѧ влады́чествїѧ и҆змѣни́ти страсте́й .

конда́къ , мч҃нкѡмъ . гла́съ , и҃ . Ли́къ мч҃нческїй ꙗ҆́сенъ , по́лкъ свѣтоно́сенъ , соше́дъ к̾ на́мъ разꙋ́мнѡ , цр҃ковь дне́сь просвѣти́лъ є҆́сть чꙋ́дными зарѧ́ми . тѣ́мже пра́зднꙋюще чⷭ҇тнꙋ́ю па́мѧть и҆́хъ , про́симъ ѿ тебѐ млⷭ҇ти сп҃се на́шъ . тѣ́хъ мл҃твами ѿ бѣ́дъ и҆зба́ви на́съ , да пое́мъ ти , а҆ллилꙋ́їѧ . сѣда́ленъ . гла́съ , д҃ . Мꙋ́жества крѣ́пкое показа́вше мꙋ́дрїи , пристꙋпи́сте враго́мъ всеѕло́бныѧ ко́зни , на сꙋди́щи проповѣ́давше хрⷭ҇та̀ . тѣ́мъ глава́ми оу҆сѣ́чени , и҆ бжⷭ҇твеною десни́цею вѣнча́стесѧ , и҆́же к̾ тре́мъ десѧти́цамъ трѝ бл҃же́ннїи , милити́нѣ же жи́теле . на́съ вѣ́рою вы̀ чтꙋ́щихъ , помѧни́те чⷭ҇тні́и мч҃нцы . и҆́нъ , сѣⷣ , прпⷣбномꙋ . гла́съ , г҃ . Бжⷭ҇твеныи смы́слъ твоѐ срⷣце и҆мы́и прпⷣбне , земна́ѧ и҆змѣнѝ бжⷭ҇твеными и҆ стоѧ́щими . и҆ сликоствꙋ́еши а҆́нг҃лѡмъ , свѣ́та невеще́ственагѡ наслажда́ѧсѧ , непреста́ннѡ веселѧ́сѧ . тѣ́мъ прпⷣбне хрⷭ҇та̀ бг҃а молѝ , дарова́ти на́мъ ве́лїю млⷭ҇ть . сла́ва , и҆ ны́нѣ , боⷢ҇ . Бжⷭ҇твена бы́сть сѣ́нь сло́ва є҆ди́на пречⷭ҇таѧ дв҃о мт҃и , чистото́ю а҆́нг҃лѡвъ превоз̾ше́дши . и҆́же па́че всѣ́хъ менѐ пе́рсть бы́вша , ѡ҆скверне́на плотьски́ми согрѣше́ньми . ѡ҆чи́сти мл҃твами твои́хъ бжⷭ҇твеныхъ во́дъ , подаю́щи чⷭ҇таѧ ве́лїю млⷭ҇ть . крⷭ҇тобоⷢ҇ . Нескве́рнаѧ а҆́гница , сло́вꙋ нетлѣ́ннаѧ дв҃а мт҃и на крⷭ҇тѣ̀ ви́дѣвши ви́сима , и҆́же и҆з̾ неѧ̀ без̾ болѣ́зни прозѧ́бшагѡ . мт҃рьски подо́бнѡ рыда́ющи взыва́ше , оу҆вы̀ мнѣ̀ ча́до моѐ , ка́кѡ стра́ждеши , хотѧ̀ и҆зба́вити ѿ страсте́й без̾че́стїѧ чл҃ка .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дованїе . не ѡ҆ста́вль нѣ́дра ѻ҆́ч҃а , но ми́лостїю си на́шꙋ нищетꙋ̀ посѣти́въ . тѣ́мъ съ проро́кѡмъ а҆вва́кꙋмомъ зовꙋ̀ , си́лѣ твое́й сла́ва чл҃колю́бче . Зарѧ́ми бжⷭ҇твеныхъ по́двигъ всебога́тїи , вселе́нныѧ всѧ̀ концы̀ просвѣща́ете пресла́внѡ , и҆ неви́димыхъ враго́въ тмꙋ̀ ѿго́ните . тѣ́мъ бл҃гоче́стно мꙋ́дрено ва́ше соверша́емъ свѣтоно́сное и҆ бжⷭ҇твеное торжество̀ . Ра́внѡ мꙋ́дрїи всѝ по́двигъ соверши́вше , и҆ по́чести ра́внѡ сподо́бистесѧ , да́вше кро́ви своѧ̀ за пострада́вшагѡ , и҆ бжⷭ҇твенꙋю кро́вь и҆сточи́вшагѡ на́ древѣ во́лею , за на́ше спасе́нїе . сегѡ̀ ра́ди ва́съ оу҆блажа́емъ . Ны́нѣ мꙋ́дрыѧ восхва́лимъ мч҃нки , ѳеоге́на , и҆ ма́манта . неро́на , клавдїа́на . ни́кона кꙋ́пнѡ и҆ ника́ндра . ло́гина , и҆ и҆сихі́а , и҆ варахі́ѧ . кали́нника вели́каго , и҆ ѯанѳі́ѧ бжⷭ҇твенаго ѳео́ѳила , и҆ оу҆але́рїѧ . Всеꙋ́мнѡ к̾ по́двигомъ оу҆стреми́вшесѧ . содѣ́йствꙋющꙋ всѧ̀ достосла́внїи бжⷭ҇твенꙋю бл҃года́ть и҆зба́вителѧ ѡ҆брѣто́сте . и҆ всѧ̀ доблемꙋ́дренѡ претерпѣ́сте мꙋче́нїѧ . бл҃года́рственѡ хрⷭ҇то́ви пою́ще , си́лѣ твое́й сла́ва чл҃колю́бче . боⷢ҇ . Зако́на сѣ́ни и҆ прⷪ҇рческаѧ гада́нїѧ , тѧ̀ мт҃рь провозвѣсти́ша дре́вле бы́вшꙋ и҆зба́вителѧ . и҆́мже ны́нѣ соверше́нїѧ мы̀ зрѧ́ще всенепоро́чнаѧ , согла́снѡ тѧ̀ пое́мъ , страстоте́рпцемъ сла́во , и҆ мч҃нкъ ст҃ы́хъ держа́ва .

и҆́нъ , і҆рмо́съ . Пою́ тѧ слꙋ́хомъ бо гдⷭ҇и , оу҆слы́шахъ и҆ оу҆боѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гое твоѐ соше́ствїе є҆́же на мѧ̀ прославлѧ́ю ѡ҆бновле́нїе . Ꙗ҆́кѡ всѣ́хъ временны́хъ прпⷣбне пристра́стїѧ же и҆ любвѐ , ѿбѣжа́въ всю̀ къ бг҃ꙋ твою̀ наде́ждꙋ стѧжа́въ всегда̀ . и҆ є҆́же прїѧ́лъ є҆сѝ , ни́щихъ рꙋ́цѣ прїѧ́ша . Бѣсо́вское ѕлодѣ́йство прпⷣбне ѿрази́въ прираже́нїи ѕвѣри́ными , некоснове́нъ ѿ сегѡ̀ ѿ ню́дъ пребы́въ бл҃же́нне , бжⷭ҇твеною бл҃года́тїю покрыва́емъ , и҆́же тѧ̀ при́снѡ во всѣ́хъ застꙋпа́ющагѡ . Раз̾сла́бити твою̀ крѣ́пость прпⷣбне вселꙋка́выи тща́шесѧ , є҆́же к̾ бг҃ꙋ зрѧ̀ твою̀ любо́вь и҆ бл҃годаре́нїе , тѣ́мъ на тѧ̀ псы̀ поꙋстѝ . но во тщетꙋ̀ є҆гѡ̀ оу҆хищре́нїе ѡ҆бличи́сѧ . боⷢ҇ . Пою́ тѧ бцⷣе влⷣчце , и҆ вопїю́ ти , твое́ю мл҃твою ѡ҆ст҃ѝ соблюда́ющи , и҆ наста́ви ко спасе́нїю , мно́гими грѣхѝ па́дающаго , и҆ прило́ги бѣсо́вскими коле́блема .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твоегѡ̀ свѣ́те незаходѧ́и , покры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ заповѣде́й ти пꙋтѝ моѧ̀ напра́ви молю́тисѧ . Мꙋ́дрыхъ страстоте́рпецъ , маѯимїѧ́на , и҆ бжⷭ҇твенаго є҆вге́нїѧ , съ ѳео́дѡромъ , дꙋкиті́ѧ чтꙋ́ще . калима́ха , кꙋ́пнѡ ѳеодꙋ́ла и҆ дорофе́ѧ похва́лимъ , мꙋ́жески по́двигъ соверши́вшихъ . До́блїи ѻ҆рꙋ́жницы , во́лею оу҆мерщвлѧ́еми и҆ сокрꙋша́еми , без̾сме́ртїе вѣ́чно наслѣ́доваша . и҆ въ ра́йстѣй ликꙋ́ютъ ны́нѣ широтѣ̀ , бл҃же́нныхъ наде́ждъ прїе́мше . Дрема́нїе небреже́нїѧ ѿрази́вше всехва́льнїи во́ времѧ по́двигъ кꙋ́пнѡ бо́дростїю бжⷭ҇твеною потеко́сте , тече́нїе бжⷭ҇твеныѧ вѣ́ры мꙋче́нїѧ . и҆ к̾ приста́нищꙋ нбⷭ҇номꙋ ны́нѣ прїидо́сте . боⷢ҇ . Свѧ́зана плени́цами мѧ прегрѣше́ней всепѣ́таѧ влⷣчце , оу҆́зы а҆́довы разрѣши́вши бжⷭ҇твенымъ тѝ ржⷭ҇тво́мъ , разрѣшѝ молю́тисѧ . и҆ пꙋтѝ вводѧ́щїѧ к̾ животꙋ̀ стꙋпа́ти поспѣшѝ .

и҆́нъ , і҆рмо́съ . Свѣ́та пода́телю , и҆ вѣко́мъ тво́рче гдⷭ҇и , во́ свѣтѣ твои́хъ повелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Дш҃и твоеѧ̀ тве́рдое , и҆ ра́зꙋма бл҃гостоѧ́нное прпⷣбне , лꙋка́выи низ̾ложи́ти надѣ́ѧвсѧ , во пса̀ себѐ преложи́въ , та́кѡ прїи́де и҆скꙋси́ти тѧ . Въ скꙋ́дости мно́зѣ недоꙋмѣ́нїѧ вра́гъ бы́въ ѿстꙋпѝ , ни что́ же ѿ ню́дъ . слꙋжи́вша тѧ̀ бл҃же́нне зрѧ̀ . па́че же бл҃года́рственѡ скꙋ́дость носѧ́ща . Же́злъ си́лы ꙗ҆́коже ѻ҆рꙋ́жїе крⷭ҇тъ прпⷣбне в̾ рꙋкꙋ̀ всегда̀ носѧ̀ , всѐ вра́жїе кознова́нїи дѣ́йство ꙗ҆́кѡ пра́хъ и҆стни́лъ є҆сѝ . боⷢ҇ . Ѿча́ѧвшимсѧ оу҆пова́нїе , и҆ пред̾ста́тельнице вѣ́рнымъ , спаси́ мѧ мт҃и бж҃їѧ ѿ всѧ́когѡ наси́лїѧ враго́въ неви́димыхъ и҆ ви́димыхъ препѣ́таѧ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ моѧ̀ , и҆ и҆з̾ глꙋбины̀ ѕѡ́лъ воз̾веди́ мѧ молю́сѧ , к̾ тебѣ́ бо воз̾ва́хъ и҆ оу҆слы́ша мѧ , бж҃е спасе́нїѧ моегѡ̀ . Въ пѣ́снехъ страда́льца , ѳеодо́та , и҆ларїѡ́на , гига́нтїѧ мꙋ́драго , и҆ а҆ѳана́сїѧ , и҆ бжⷭ҇твенаго є҆втихі́ѧ , со є҆пифа́нїемъ , по́ долгꙋ оу҆бл҃жи́мъ . Да оу҆бл҃жа́тсѧ вѣ́рнѡ , неро́нъ , и҆ дїодѡ́тъ , кастрихі́й мꙋ́дрыи , и҆ бжⷭ҇твеныи ѻ҆стрихі́и , вели́кїи ѳемелі́и , со а҆мони́томъ , хрⷭ҇то́ви до́блїи мч҃нцы . Кро́внымъ ва́шимъ тече́нїемъ , фараѡ́на неви́димаго потопи́вше со всѣ́мъ во́инствомъ , добропобѣ́днїи мч҃нцы . нб҃са̀ постиго́сте , и҆ перворожде́ныхъ цр҃ковь оу҆краси́сте . боⷢ҇ . Ѻ҆рꙋ́жїѧ вра́жїѧ бг҃ороди́тельнице ѡ҆скꙋдѣ́ша , ѿ не́леже копїе́мъ прободе́сѧ хрⷭ҇то́съ є҆го́же родила̀ є҆сѝ , кро́вїю и҆ водо́ю ѡ҆бетша́вшїѧ чл҃ки назида́ѧ .

и҆́нъ , і҆рмо́съ . Ко́ гдⷭ҇ꙋ ѿ ки́та і҆ѡ́на вопїѧ́ше , ты́ мѧ воз̾вѣдѝ и҆з̾ глꙋбины̀ а҆́да влⷣко . да ꙗ҆́кѡ и҆зба́вителю во́ гласѣ хвале́нїѧ , и҆́стиннымъ же дх҃омъ пожрꙋ́ ти . Хра́мъ бг҃ꙋ своѐ срⷣце хотѧ̀ ꙗ҆ви́ти прпⷣбне , цр҃кви ѡ҆бхожда́ше ст҃ы́хъ . ѿ ни́хже прїѧ́тъ бл҃года́ть ѡ҆би́льнѡ ст҃а́гѡ дх҃а , мно́гимъ чл҃кѡмъ на оу҆твержде́нїе . Твоѐ ѻ҆те́чество , ꙗ҆́кѡ бога́тство тѧ̀ бг҃омꙋ́дре многоцѣ́нное па́ки прїѧ́тъ бжⷭ҇твенымъ сꙋдо́мъ . тѣ́мъ стра́нна мѧ ѻ҆ч҃ества є҆де́мскагѡ прпⷣбне сꙋ́ща наслѣ́дника семꙋ̀ содѣ́лай . Цр҃ковь тѧ̀ мари́ны дв҃ы мч҃нцы пе́рво прїѧ́тъ все́льника . в̾ не́й же ꙗ҆́кѡ незаходи́ма восїѧ́лъ є҆сѝ ѕвѣзда̀ , ѡ҆зарѧ́ѧ прпⷣбне во тмѣ̀ невѣ́дѣнїѧ спѧ́щихъ . боⷢ҇ . Оу҆молѝ сн҃а своегѡ̀ и҆ гдⷭ҇а дв҃о ѡ҆ рабѣ́хъ свои́хъ , вѣ́рою чⷭ҇тно́мꙋ ѻ҆́бразꙋ зра́ка твоегѡ̀ всенепоро́чнаѧ покланѧ́ющихсѧ при́снѡ , и҆́бо мо́жеши .

конда́къ . гла́съ , и҃ . И҆́же па́че є҆стества̀ твоѧ̀ премꙋ́дре трꙋды̀ и҆ по́двиги , и҆ са́ми ті́и а҆́нг҃ли ви́дѣвше оу҆диви́шасѧ , и҆́хже ра́ди прїѧ́лъ є҆сѝ ѿ́ бг҃а вѣне́цъ . но ꙗ҆́кѡ и҆мѣ́ѧ дерзнове́нїе къ гдⷭ҇ꙋ , ѿ всѧ́кихъ на́съ бѣ́дъ спаса́й . да зове́мъ ти , ра́дꙋисѧ ѻ҆́ч҃е ла́заре па́стырю на́шъ . и҆́косъ . Чл҃къ оу҆́бѡ є҆стество́мъ бы́лъ є҆сѝ ѻ҆́ч҃е , но ꙗ҆ви́сѧ сограждани́нъ а҆́нг҃лѡмъ . с̾ пло́тїю бо на землѝ бестѣле́сныхъ житїѐ проше́дъ , бы́сть страстьмѝ непоколеби́мъ . тѣ́мъ тѧ̀ хва́лимъ ѻ҆́ч҃е . ра́дꙋисѧ и҆́нокѡмъ сла́во свѣ́тлаѧ , ра́дꙋисѧ кра́сныи цѣломꙋ́дрїѧ сто́лпе . ра́дꙋисѧ пастыренача́льниче слове́сныхъ ѻ҆ве́цъ , ра́дꙋисѧ чинонача́льниче є҆ди́нствꙋющихъ чи́нꙋ . ра́дꙋисѧ пꙋсты́нныи граждани́не всеми́рныи , ра́дꙋисѧ свѣти́льниче вселе́ннѣй многосвѣ́тлыи . ра́дꙋисѧ и҆́ночествꙋющимъ спасе́нїю хода́тай , ра́дꙋисѧ и҆звѣ́стное пра́вило добродѣ́телей . ра́дꙋисѧ и҆́мже посрами́шасѧ бѣ́сове , ра́дꙋисѧ и҆́мже всѧ́ка стра́сть оу҆мертви́сѧ . ра́дꙋисѧ вѣ́рнымъ неѡ҆бори́маѧ стѣно̀ , ра́дꙋисѧ кра́сное добродѣ́телей храни́лище . ра́дꙋисѧ ла́заре ѻ҆́ч҃е па́стырю на́шъ .

пѣ́снь , з҃ . і҆рмо́съ . И҆́же ѿ і҆ꙋде́и , доше́дше ѻ҆́троцы въ вавилѡ́нъ дре́вле , вѣ́рою оу҆тверже́нїи , пла́мень пе́щныи попра́вше гл҃юще , ѻ҆ц҃ъ на́шихъ бж҃е бл҃гослове́нъ є҆сѝ . Чтⷭ҇нꙋ́ю сѝ рꙋ́кꙋ за и҆́стинꙋ неро́не сла́вне ѿсѣ́ченꙋ зрѧ̀ бл҃года́рственаѧ пѣ́сни всеви́дцꙋ поѧ̀ , взыва́ше , ѻ҆ц҃ъ на́шихъ бж҃е бл҃гослове́нъ є҆сѝ . Высо́кимъ смы́сломъ проѡ҆бра́зїе со страда́льцемъ бы́сть сла́вне неро́не , и҆ съ си́ми вы́шнѧгѡ црⷭ҇твїѧ жре́бїи прїѧ́лъ є҆сѝ . поѧ̀ , ѻ҆ц҃ъ на́шихъ бж҃е бл҃гослове́нъ є҆сѝ . Во́ини до́блїи цр҃ѧ ꙗ҆́вльшесѧ вѣ́чнꙋющагѡ . мꙋ́жества ва́шегѡ мече́мъ , ѡ҆полче́нїѧ лестьца̀ погꙋби́ли є҆стѐ пою́ще , ѻ҆ц҃ъ на́шихъ бж҃е бл҃гослове́нъ є҆сѝ . боⷢ҇ . Врача̀ поро́ждьши дв҃о , срⷣца моегѡ̀ стра́сти и҆сцѣлѝ чⷭ҇таѧ , и҆ вѣ́чнꙋющагѡ мѧ̀ мꙋче́нїѧ и҆зба́ви . в̾ пѣ́снехъ зовꙋ́ща , ѻ҆ц҃ъ на́шихъ бж҃е бл҃гослове́нъ є҆сѝ .

и҆́нъ , і҆рмо́съ . Вѣті́и ꙗ҆ви́шасѧ ѻ҆́троцы , премꙋ́дрїи дре́вле , бг҃опрїи́мцы дш҃е́ю бг҃ослове́сны оу҆сты̀ поѧ́хꙋ , пребжⷭ҇твеныи ѻ҆ц҃ъ на́шихъ бж҃е бл҃гослове́нъ є҆сѝ . Трапе́зꙋ ѡ҆би́льнꙋ оу҆гото́ва , и҆спо́лненꙋ благи́хъ добродѣ́телей ти бжⷭ҇твеныхъ , и҆́миже всѧ̀ питѣ́ѧ . и҆ пѣ́ти наꙋча́ше , ѻ҆ц҃ъ на́шихъ бж҃е бл҃гослове́нъ є҆сѝ . Гл҃омъ оу҆че́ней твои́хъ премꙋ́дрыхъ послѣ́дꙋюще лю́дїе , маловре́менныхъ всѣ́хъ любо́вь вои́стинꙋ оу҆се́рднѡ ѿложи́вше , и҆ жи́тельство с̾ тобо́ю ꙗ҆́кѡ бл҃го , всебл҃же́нне прои҆зво́лиша . Ѻ҆́бразъ стѧжа́въ житїѧ̀ ты̀ сѷмеѡ́на ди́внагѡ . ꙗ҆́кѡ ка́мень а҆дама́нтъ на столпѣ̀ без̾ покро́ва стоѧ̀ . зовы́и веселѧ́сѧ , пребжⷭ҇твеныи ѻ҆ц҃е́мъ и҆ на́мъ бж҃е бл҃гослове́нъ є҆сѝ . боⷢ҇ . Спаси́ мѧ ѿ сѣ́тей вра́жїихъ , хода́тайствомъ тѝ чⷭ҇таѧ , и҆ любвѝ коне́чной бл҃га́гѡ сн҃а твоегѡ̀ привѧжѝ , оу҆далѧ́ема всегда̀ ѿ негѡ̀ сластьмѝ без̾мѣ́стными .

пѣ́снь , и҃ . і҆рмо́съ . Побѣди́тели врагꙋ̀ и҆ пла́мени , бл҃года́тїю бы́вше , и҆́же по за́повѣди ѕѣлѡ̀ побора́юще дѣ́ти поѧ́хꙋ , блгⷭ҇ви́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Оу҆мертви́вшесѧ ми́рови , живота̀ бꙋ́дꙋщагѡ наслѣ́дꙋете . и҆ и҆сцѣле́нїемъ бл҃года́ть и҆сточа́ете , пою́щимъ , бл҃гослови́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Свѣ́тлїи свѣти́льницы страстны́ми сїѧ́ньми ꙗ҆́вльшесѧ , ѡ҆блиста́ете ми́ра , страстоно́сцы мч҃нцы . вопїю́ще , бл҃гослови́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Въ темни́цꙋ в̾ве́ржени , бжⷭ҇твеныѧ вои́стинꙋ храни́теле и҆́стины . и҆ волꙋ́ѧми жи́лами пло́ти неми́лостивнѡ бл҃же́ннїи оу҆ранѧ́еми , ника́коже пра́ваго пꙋтѝ соврати́стесѧ . тѣ́мъ побѣ́дныѧ прїѧ́сте вѣнцы̀ . Словесы̀ ст҃ы́ми вѣ́рою просвѣща́еми , бг҃а ѻ҆ц҃а и҆ сн҃а и҆ ст҃а́го дх҃а трⷪ҇цꙋ нераздѣ́лимꙋю и҆сповѣ́даемъ , є҆ди́но црⷭ҇тво , є҆ди́но гдⷭ҇ьство , и҆ є҆ди́нꙋ вла́сть , во всѧ̀ вѣ́ки . боⷢ҇ . Ꙗ҆́кѡ ст҃ѣ́йши а҆́нг҃лъ чⷭ҇таѧ , прїѧ́ла є҆сѝ и҆́же во ст҃ы́хъ почива́ющаго бг҃а всѣ́хъ . сегѡ̀ ра́ди всѝ вѣ́рнїи пое́мъ тѧ̀ , и҆ славосло́вимъ во всѧ̀ вѣ́ки .

и҆́нъ , і҆рмо́съ . Въ пе́щь ѻ҆́гненнꙋю , к̾ дѣ́темъ є҆вре́йскимъ соше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Навы́къ неле́стнѡ , ѿ пре́жде тебѐ пости́вшихсѧ ѻ҆ц҃ъ ѻ҆́ч҃е по́двиги и҆ боре́нїѧ , и҆ потща́сѧ не ꙗ҆ви́тисѧ вторы́и . и҆ ꙗ҆́кѡ не то́кмѡ ꙗ҆ви́сѧ , но оу҆жѐ и҆ превзы́де . И҆спо́лнилъ є҆сѝ моли́твꙋ є҆ю́же молѧ́сѧ бг҃ꙋ дре́вле требл҃же́нне . тво́й хлѣ́бъ всѣ́мъ пред̾лага́ю глаго́лѧ , и҆ тебѣ̀ твоѧ̀ ѿ твои́хъ прино́симъ гдⷭ҇и сла́вы во всѧ̀ вѣ́ки . И҆ сло́вомъ ѻ҆́ч҃е и҆ дѣ́ломъ ты̀ направлѧ́ѧ сꙋ́щихъ с̾ тобо́ю къ бжⷭ҇твенѣй стезѣ̀ , са́мъ множа́е па́че си́хъ к̾ се́й направлѧ́емь . и҆́мже чꙋдеса̀ соверши́лъ є҆сѝ , бг҃ъ бо мл҃твами тѝ гꙋмно̀ оу҆мно́живъ . боⷢ҇ . Да ра́дꙋетсѧ нб҃о , да весели́тсѧ и҆ землѧ̀ с̾ чл҃ки , дв҃аѧ бо мр҃і́ѧ творца̀ всѣ́хъ неи҆зрече́ннѡ родѝ . є҆мꙋ́же пое́мъ , тѧ̀ превозно́симъ хрⷭ҇тѐ во́ вѣки .

пѣ́снь , ѳ҃ . і҆рмо́съ . Оу҆диви́сѧ оу҆́бѡ ѡ҆ се́мъ не́бо , и҆ землѝ оу҆жасо́шасѧ концы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твоѐ бы́сть простра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинонача́лїѧ велича́емъ . Возмо́же си́лою бжⷭ҇твеною оу҆крѣплѧ́емь неро́не пречꙋ́дне , многоко́зненаго побори́ти , оу҆ма̀ крѣ́постїю . и҆ приведѐ хрⷭ҇то́ви стрⷭ҇тоте́рпецъ собо́ръ , твои́ми поꙋче́ньми . с̾ ни́ми же вѣ́рою тѧ̀ при́снѡ оу҆бл҃жа́емъ . Ꙗ҆ви́стесѧ во́инство честно́е , ѡ҆ хрⷭ҇тѣ̀ собрано̀ великои҆мени́тїи . и҆ проти́вистесѧ ко власте́мъ мироде́ржца , и҆ побѣди́вше и҆́хъ ѻ҆рꙋ́жїемъ бжⷭ҇твеныѧ вѣ́ры , вѣнцы̀ взѧ́сте ѿ рꙋкѝ живонача́льныѧ веселꙋ́еми . Взыгра́й ѽ мелеті́е , приве́дши многочи́сленыи собо́ръ вседержи́телю честны́хъ мч҃нкъ , и҆́хже митропо́лїѧ вы́шнѧѧ и҆́мать , сщ҃е́нно тече́нїе соверши́вшихъ , и҆ со всѣ́ми вѣ́рнѡ си́хъ гра́ды оу҆блажа́й всегда̀ . Сл҃нце незаходи́мое хрⷭ҇тѐ , мл҃твами сла́вныхъ мч҃нкъ твои́хъ соверша́ющїѧ и҆́хъ свѣтоно́сное и҆ бжⷭ҇твеное страда́нїе свѣ́тлыми зарѧ́ми просвѣтѝ , и҆ ѡ҆ст҃ѝ и҆ та́мѡ приѡ҆бщи́телей црⷭ҇твїѧ ꙗ҆́кѡ бг҃ъ сподо́би . боⷢ҇ . Трепе́щꙋ твоегѡ̀ є҆ди́не цр҃ю сꙋда̀ бꙋ́дꙋщагѡ , и҆ оу҆страша́юсѧ , да не ка́кѡ в̾ стрⷭ҇ть и҆ мꙋче́нїе в̾ве́ргꙋсѧ . но ѡ҆чи́сти мѧ ѿ всѧ́кїѧ скве́рны грѣхо́вныѧ , мл҃твами пречⷭ҇тыѧ тѝ мт҃ре , ꙗ҆́кѡ чл҃колю́бецъ .

и҆́нъ , і҆рмо́съ . И҆́же ѿ́ бг҃а бг҃а сло́ва , неи҆зрече́нною мꙋ́дростїю , прише́дшагѡ ѡ҆бнови́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно воплоща́ема на́съ ра́ди , вѣ́рнїи є҆диномꙋ́дреннѡ пѣ́сньми велича́емъ . Лѣ́ностїю оу҆вы̀ мнѣ̀ житїѐ соверши́хъ всѐ , и҆ бою́сѧ сꙋда̀ страшна́го . но ѽ чл҃колю́бче гдⷭ҇и , моле́нїемъ ла́зарѧ сле́зныѧ мѝ послѝ стрꙋѝ да си́ми ѡ҆мы́ю скве́рнꙋ прегрѣше́нїи мои́хъ . Ти́хꙋ и҆мы́и дш҃ꙋ , кро́токъ же зра́къ въ лѣпотꙋ̀ и҆мѣ́лъ є҆сѝ ѻ҆́ч҃е , и҆ оу҆вѣ́тливъ ко всѣ́мъ ве́сь ꙗ҆влѧ́емь . стрꙋѧ́ми же твои́хъ напоѧ́ѧ дш҃а мꙋ́дре . ю҆́же тишинꙋ̀ и҆ на́мъ хрⷭ҇та̀ оу҆молѝ пода́ти . Ꙗ҆́вственнѣйшꙋ всѣ́мъ добродѣ́тель твою̀ бжⷭ҇твенꙋю подо́бнѡ ꙗ҆ви́ти хотѧ̀ бг҃ъ , горѣ̀ пристꙋпи́ти тѧ прпⷣбне содѣ́ѧ к̾ жестоко́й . ѿ неѧ́же па́че ѻ҆́ч҃е лꙋча̀ оу҆до́бь и҆спꙋща́ѧ житїѧ̀ , ѡ҆зарѝ вселе́ннꙋю . боⷢ҇ . Ми́лостива тогда̀ ꙗ҆ви́ми сꙋдїю̀ сн҃а твоегѡ̀ , є҆го́же родѝ без̾ сѣ́мене , во́ времѧ є҆гда̀ сѧ́детъ , ꙗ҆́коже пи́шетсѧ на прⷭ҇то́лѣ ст҃ѣ́мъ , сꙋди́ти ѻ҆трокови́це всѣ́мъ земны́мъ , ѡ҆ и҆́хже в̾ житїѝ без̾мѣ́стныхъ содѣ́ѧша .

свѣти́ленъ . Ѻ҆рꙋ́жїемъ чⷭ҇тна́гѡ твоегѡ̀ крⷭ҇та̀ защити́вшесѧ страстоте́рпцы твоѝ сло́ве , проти́вныѧ си́лы крѣ́пкѡ побѣди́ша , и҆ мꙋчи́телѧ посрами́ша . по тебѣ̀ пострада́ша , и҆ тебѣ̀ хрⷭ҇тѐ мо́й всѣ́хъ цр҃ю съ црⷭ҇твꙋютъ кꙋ́пнѡ . дрꙋгі́и , свѣти́ленъ , прпⷣбномꙋ . Бг҃оно́сца всѝ и҆ влⷣчнѧ под̾ража́телѧ восхва́лимъ пѣ́сньми , ла́зарѧ прⷭ҇нопа́мѧтнаго , бѣсо́вское шата́нїе разори́вшаго бжⷭ҇твеною си́лою . боⷢ҇ . Тѧ̀ данїи́лъ прописа̀ несѣко́мꙋю го́рꙋ . ѿ неѧ́ же честны́и ка́мень ѿсѣче́сѧ , сокрꙋша́ѧ и҆́дольскїѧ хра́мы , бг҃ороди́тельнице мр҃і́е .

На литꙋргі́и . проки́менъ , ѱл҃о́мъ давы́довъ . честна̀ пре́д̾ гдⷭ҇емъ сме́рть прпⷣбныхъ є҆гѡ̀ . сти́хъ . что̀ возда́мъ гдⷭ҇ви ѡ҆ всѣ́хъ , и҆́хже возда́стъ ми . а҆пⷭ҇лъ , къ= гала́тѡмъ . зача́ло , сг҃і . а҆ллилꙋ́їѧ . бл҃же́нъ мꙋ́жь боѧ́исѧ гдⷭ҇а , въ за́повѣдехъ є҆гѡ̀ восхо́щетъ ѕѣлѡ̀ . =є҆ѵⷢ҇а́лїе , ѿ =матѳе́ѧ . заⷱ҇ , і҃ . =прича́стенъ . въ па́мѧть вѣ́чнꙋю бꙋ́детъ пра́ведникъ .

<< Previous

Contents

Next >>