МЦⷭ҇А ТОГО́ЖЕ ВЪ И҃ ДН҃Ь

собо́ръ ст҃а́гѡ а҆рхистрати́га миха́ила , и҆ про́чихъ нбⷭ҇ныхъ си́лъ . а҆́ще хра́мъ собо́ра ст҃а́гѡ а҆рхистрати́га миха́ила , и҆лѝ є҆гда̀ и҆зво́литъ настоѧ́тель , твори́мъ бдѣ́нїе . =На ма́лѣй вече́рни , на гдⷭ҇и возва́хъ , стихѣ́ры . гла́съ , а҃ . поⷣ . нбⷭ҇нымъ чино́мъ . Нбⷭ҇нымъ сы́и пе́рвыи ,꙳ в̾ дерзнове́нїи мно́зѣ пред̾стоѧ̀ ,꙳ прⷭ҇то́лꙋ неприкоснове́нныѧ сла́вы ,꙳ самови́дче неи҆зрече́нныхъ ,꙳ спасѝ на́съ миха́иле а҆рхистрати́же ,꙳ сꙋ́щїѧ в̾ нꙋ́жныхъ бѣда́хъ и҆ напа́стехъ , мл҃твами твои́ми мо́лимсѧ . двⷤа . Беспло́тныхъ а҆́нг҃лъ пе́рвыи є҆сѝ ,꙳ и҆ слꙋжи́тель бжⷭ҇твенагѡ свѣтозаре́нїѧ ѻ҆́ногѡ ,꙳ самови́децъ же и҆ таи́нникъ ,꙳ спасѝ на́съ миха́иле а҆рхистрати́же ,꙳ моле́бнѡ тѧ̀ чтꙋ́щихъ ,꙳ и҆ бл҃гочⷭ҇тнѡ воспѣва́ющихъ трⷪ҇цꙋ вѣ́рно . А҆́нг҃льски в̾ ми́рѣ торжествꙋ́юще ,꙳ и҆́же на прⷭ҇то́лѣ сла́вы гдⷭ҇ви ,꙳ и҆ сѣдѧ́щемꙋ возопїе́мъ пѣ́снь ,꙳ ст҃ъ є҆сѝ ѻ҆́ч҃е нбⷭ҇ныи ,꙳ ст҃ъ є҆сѝ и҆ сопрⷭ҇носꙋ́щное сло́во ,꙳ ст҃ъ є҆сѝ дш҃е прест҃ы́и . =сла́ва . гла́съ , д҃ . А҆́нг҃льскимъ ликѡ́мъ чинонача́льниче , на́ нб҃сѣхъ прⷭ҇то́лꙋ пред̾стоѧ̀ трисл҃нчнагѡ бжⷭ҇тва̀ , и҆ бога́тнѡ ѡ҆сїѧва́емь бжⷭ҇твеными свѣтлостьмѝ , и҆спꙋща́емыми непреста́ннѡ ѿ тꙋ́дꙋ , и҆ на́съ сꙋ́щихъ на землѝ трⷭ҇то́е пѣ́нїе ра́достнѡ вопїю́щихъ , страсте́й мглы̀ и҆зба́ви , и҆ просвѣще́нїемъ оу҆ѧснѝ , миха́иле а҆рхистрати́же , моли́твениче ѡ҆ дш҃а́хъ на́шихъ . и҆ ны́нѣ , боⷢ҇ . дневны́и .

Н=а стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . А҆рха́нг҃льскїѧ си́лы хрⷭ҇тѐ ,꙳ прⷭ҇то́лꙋ пред̾стоѧ́ще твоемꙋ̀ ,꙳ мо́лѧтсѧ ѡ҆́ родѣ чл҃честѣмъ .꙳ тѣ́хъ оу҆́бѡ мольба́ми ,꙳ ꙗ҆зы́кѡмъ де́рзость низ̾ложѝ ,꙳ ми́ръ всѣ́мъ вѣ́рнымъ подаю́щи .

сти́хъ : творѧ́и а҆́нг҃лы своѧ̀ дх҃и ,꙳ и҆ слꙋгѝ своѧ̀ ѻ҆́гнь палѧ́щь . Ѻ҆кре́стъ прⷭ҇то́ла всѣ́хъ цр҃ѧ ,꙳ прⷭ҇нѡ ликꙋ́юще а҆́нг҃лѡвъ чи́нове ,꙳ на́съ сохранѧ́йте ,꙳ и҆́же вѣ́рою ва́съ призыва́ющихъ ,꙳ и҆ мꙋче́нїѧ всѣ́хъ и҆зба́вите .

сти́хъ : хвали́те гдⷭ҇а всѧ̀ си́лы є҆гѡ̀ , хвали́те є҆гѡ̀ всѝ а҆́нг҃ли є҆гѡ̀ . Ѻ҆ц҃ъ и҆́же над̾ всѣ́ми бг҃ъ ,꙳ си́лы нбⷭ҇ныхъ оу҆мѡ́въ без̾ѡ҆бра́зны и҆ невеще́ствены ,꙳ пѣвцы̀ трисл҃нчныѧ сла́вы своеѧ̀ ,꙳ и҆ є҆ди́нственое сло́во ,꙳ и҆ дх҃ъ приведѐ .

сла́ва , и҆ ны́нѣ , боⷢ҇ . Ра́дꙋисѧ бцⷣе дв҃о ,꙳ съ гаврїи́ломъ согла́сно ти вопїе́мъ .꙳ ты́ бо ра́дость пе́рвꙋю прїе́мши ,꙳ ра́дости всѣ́хъ на́съ и҆спо́лни .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . Нбⷭ҇ныхъ во́инствъ а҆рхистрати́зи , мо́лимъ вы̀ ны́нѣ мы недосто́йнїи , ꙗ҆́кѡ да ва́шими мл҃твами покры́ете на́съ кро́вомъ крилꙋ̀ невеще́ственыѧ ва́шеѧ сла́вы . сохранѧ́юще на́съ молѧ́щихсѧ прилѣ́жнѡ , и҆ вопїю́щихъ ѿ бѣ́дъ и҆зба́вите на́съ , ꙗ҆́кѡ чинонача́льницы вы́шнимъ си́ламъ .= сла́ва , и҆ ны́нѣ , боⷢ҇ . И҆́=же ѿ́ вѣка оу҆тае́нное , и҆ а҆́нг҃лѡмъ несвѣ́домое та́инство , тобо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи воплоща́емъ . и҆ крⷭ҇тъ во́лею на́съ ра́ди воспрїе́мъ , и҆́мъ же воскр҃сѝ первозда́ннаго , и҆ спасѐ ѿ сме́рти дш҃а на́ша .

та́же , є҆ктенїѧ̀ ма́лаѧ . и҆ ѿпꙋ́стъ .

На вели́цѣй вече́рни , бл҃же́нъ мꙋ́жь , а҃ , а҆нтифо́нъ . =На гдⷭ҇и возва́хъ , стихѣ́ры , на и҃ . гла́съ , д҃ . поⷣ . ꙗ҆́кѡ до́блѧ . Т=рисл҃нчнагѡ бжⷭ҇тва̀ , пред̾ста́тель свѣтлѣ́йшїи , миха́иле ꙗ҆влѧ́емь а҆рхистрати́же . с̾ вы́шними си́лами зове́ши веселѧ́сѧ , ст҃ъ є҆сѝ ѻ҆́ч҃е , ст҃ъ є҆сѝ без̾нача́льное сло́во ст҃о́е , и҆ ст҃ы́и дх҃ъ , є҆ди́на сла́ва и҆ црⷭ҇тво , є҆ди́но сꙋщество̀ , и҆ є҆ди́но бжⷭ҇тво̀ и҆ си́ла . Видѣ́нїе твоѐ ѻ҆́гнено , и҆ добро́та чꙋде́сна , миха́иле пе́рвыи а҆́нг҃ле . невеще́ственымъ бо є҆стество́мъ , прехо́диши концы̀ , соверша́ѧ повелѣ́нїѧ всѣ́хъ творца̀ , си́ленъ в̾ крѣ́пости сѝ познава́емь . и҆ и҆сто́чникъ и҆сцѣле́нїи , цр҃ковь твою̀ содѣва́ѧ , и҆́мѧнемъ твои́мъ ст҃ы́мъ почита́емꙋ . Творѧ́и а҆́нг҃лы своѧ̀ , ꙗ҆́коже пи́сано є҆́сть дх҃и ,꙳ и҆ слꙋ́жащїѧ тебѣ̀ пла́мы ѻ҆́гнены , посредѣ̀ чино́въ старѣ́йшинствꙋюща , ꙗ҆ви́лъ є҆сѝ гдⷭ҇и твои́хъ а҆рха́нг҃льскихъ , миха́ила а҆рхистрати́га , твои́хъ ма́нїи послꙋ́шающа сло́ве , и҆ пѣ́нїе трист҃о́е , со́ страхомъ воз̾глаша́юща си́лѣ твое́й .

сла́ва . гла́съ , ѕ҃ . Сра́дꙋйтесѧ на́мъ всѧ̀ а҆́нг҃льскаѧ чинонача́лїѧ . пред̾ста́тель бо ва́шъ и҆ на́шъ застꙋ́пникъ , вели́кїи а҆рхистрати́гъ , въ дне́шнїи де́нь въ честнѣ́мъ є҆гѡ̀ хра́мѣ , пресла́внѡ ꙗ҆влѧ́ѧсѧ ѡ҆сщ҃а́етъ . тѣ́мже по́ долгꙋ є҆мꙋ̀ пою́ще возопїе́мъ , покры́й на́съ кро́вомъ крилꙋ̀ твоею̀ , вели́кїи миха́иле а҆рха́нг҃ле .

и҆ ны́нѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невоспѣва́етъ твоегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а возсїѧ́въ сн҃ъ є҆диноро́дныи , то́йже ѿ тебѐ чи́стыѧ про́йде , несказа́ннѡ вопло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двою̀ лицꙋ̀ раздѣлѧ́емъ . но во двою̀ є҆стествꙋ̀ несмѣ́сно познава́емъ . тогѡ̀ молѝ чⷭ҇таѧ и҆ всебл҃же́ннаѧ , поми́ловатисѧ дш҃а́мъ на́шимъ . та́же , вы́ходъ . проки́менъ , дню̀ .

Ѿ= і҆сꙋ́са на́ввина , чте́нїе .=

Бы́сть є҆гда̀ бѧ́ше і҆сꙋ́съ оу҆ є҆рихо́на , и҆ воз̾зрѣ́въ ѻ҆чи́ма свои́ма ви́дѣ чл҃ка стоѧ́ща пред̾ ни́мъ , и҆ ме́чь ѡ҆бнаже́нъ в̾ рꙋцѣ̀ є҆гѡ̀ . и҆ пристꙋпи́въ і҆сꙋ́съ к̾ немꙋ̀ и҆ речѐ , на́шъ ли є҆сѝ , и҆лѝ ѿ сопроти́вныхъ на́шихъ . ѻ҆́нъ же речѐ є҆мꙋ̀ , а҆́зъ а҆рхистрати́гъ си́лы гдⷭ҇ни , нн҃ѣ прїидо́хъ сѣ́мѡ . и҆ па́дъ і҆сꙋ́съ поклони́сѧ лице́мъ свои́мъ на́ землю . и҆ речѐ є҆мꙋ̀ , влⷣко что́ ми повелѣва́еши твоемꙋ̀ рабꙋ̀ . и҆ речѐ а҆рхистрати́гъ гдⷭ҇нь ко і҆сꙋ́сꙋ , и҆зꙋ́й сапо́гъ тво́й с̾ ногꙋ̀ твое́ю . мѣ́сто бо на не́мже ты̀ стои́ши ст҃о є҆́сть . и҆ сотворѝ і҆сꙋ́съ та́кѡ .

Ѿ= проро́чества и҆са́ина , чте́нїе .=

Та́кѡ гл҃етъ гдⷭ҇ь , всѧ̀ землѧ̀ да вопїе́тъ с̾ весе́лїемъ , и҆ древа̀ лива́нова воз̾весели́шасѧ ѡ҆ тебѣ̀ . и҆ ке́дри лива́нстїи рекꙋ́тъ , ѿ не́леже ты̀ оу҆спѐ невзы́де сѣкі́и на́съ . а҆́дъ до́лѣ ѡ҆горчи́сѧ срѣ́тъ тебѐ . грѧдꙋ́щꙋ ти , воз̾дви́же на тѧ̀ и҆споли́ны , всѣ́хъ владѣ́вшихъ земле́ю . а҆́ще воста́ли бы́ша ѿ престо́лъ свои́хъ всѝ ца́рїе ꙗ҆зы́честїи , всѝ ѿвѣща́ютъ , и҆ рекꙋ́тъ тебѣ̀ и҆ ты̀ ꙗ҆́тъ бы́сть ꙗ҆́коже и҆ мы̀ , с̾ на́ми же причте́сѧ . сни́де во а҆́дъ сла́ва твоѧ̀ , и҆ мно́гое твоѐ весе́лїе . под̾ тобо́ю просте́ртъ є҆́сть гно́й , и҆ покро́въ тво́й че́рви . ка́кѡ спадѐ с̾ нб҃съ денни́ца , заꙋ́тра восїѧва́ющи ; сокрꙋши́сѧ на землѝ , посыла́ѧ и҆̀ ко всѣ́мъ ꙗ҆зы́кѡмъ . ты́ бо речѐ в̾ помышле́нїи твое́мъ , на́ нб҃о взы́дꙋ , и҆ верхꙋ̀ ѕвѣ́здъ нбⷭ҇ныхъ поста́влю прⷭ҇то́лъ сво́й . и҆ сѧ́дꙋ на горѣ̀ высоцѣ̀ , на гора́хъ высо́кихъ , и҆́же к̾ сѣ́верꙋ . и҆ взы́дꙋ вы́ше ѻ҆́блакъ , и҆ бꙋ́дꙋ подо́бенъ вы́шнемꙋ . ны́нѣ же во а҆́дъ сни́деши , во ѡ҆снова́нїе землѝ . и҆ ви́дѣвшїи тѧ̀ почꙋдѧ́тсѧ , и҆ рекꙋ́тъ ѡ҆ тебѣ̀ , се́й чл҃къ смꙋща́ѧи зе́млю , потрѧса́ѧи царѧ̀ . порѣва́ѧи вселе́ннꙋю всю̀ , и҆ гра́ды є҆ѧ̀ низ̾ложи́въ , и҆ плѣне́ныхъ неразрѣшѝ , и҆ разрꙋшѝ до́мы и҆́хъ . всѝ ца́рїе зе́мстїи оу҆спо́ша с̾ че́стїю , и҆ чл҃къ в̾ домꙋ̀ свое́мъ . ты́ же ѿве́рженъ бꙋ́деши в̾ гора́хъ ꙗ҆́кѡ мертве́цъ , и҆ воз̾ненави́денъ со мно́гими мертвецы̀ , и҆з̾сѣ́чеными мече́мъ , с̾ ходѧ́щими во а҆́дъ . и҆́мже ѻ҆́бразомъ ри́за кро́вїю намо́чена небꙋ́детъ чиста̀ . си́це и҆ ты̀ небꙋ́деши чи́стъ , зане́ же зе́млю мою̀ погꙋби́лъ є҆сѝ , и҆ лю́ди моѧ̀ порази́лъ , и҆ непребꙋ́деши в̾ вѣ́чное вре́мѧ .

Ѿ= проро́чества заха́рїина , чте́нїе .=

Та́кѡ гл҃етъ гдⷭ҇ь , да оу҆бои́тсѧ всѧ́ка пло́ть ѿ лица̀ гдⷭ҇нѧ , ꙗ҆́кѡ воста̀ ѿ ѻ҆́блакъ ст҃ы́хъ свои́хъ . и҆ показа́ ми гдⷭ҇ь і҆сꙋ́са ст҃лѧ вели́кагѡ стоѧ́ща пред̾ лице́мъ а҆́нг҃ла гдⷭ҇нѧ , и҆ дїа́волъ стоѧ́ше ѡ҆деснꙋ́ю є҆гѡ̀ , проти́витисѧ є҆мꙋ̀ . и҆ речѐ гдⷭ҇ь к̾ дїа́волꙋ , запреща́етъ ти гдⷭ҇ь дїа́воле , и҆з̾бра́выи і҆єрⷭ҇ли́ма , несе́ли є҆сѝ ꙗ҆́кѡ главнѧ̀ и҆з̾ѧта̀ и҆з̾ ѻ҆гнѧ̀ . и҆ і҆сꙋ́съ бѣ̀ ѡ҆дѣ́ѧнъ в̾ ри́зы гнꙋси́вы , и҆ стоѧ́ше пред̾ лице́мъ а҆́нг҃ла гдⷭ҇нѧ . и҆ ѿвѣща́въ речѐ к̾ пред̾стоѧ́щимъ пред̾ лице́мъ є҆гѡ̀ гл҃ѧ , ѿи҆ми́те ѡ҆дѣѧ́нїѧ гнꙋси́ваѧ ѿ негѡ̀ . и҆ речѐ к̾ немꙋ̀ , сѐ ѿѧ́хъ ѿ тебѐ без̾зако́нїѧ твоѧ̀ и҆ ѡ҆дѣ́йте є҆гѡ̀ в̾ поди́ръ , и҆ воз̾ложи́те крꙋ́нꙋ и҆ клобꙋ́къ чи́стыи на главꙋ̀ є҆гѡ̀ . и҆ воз̾ложи́ша крꙋ́нꙋ и҆ клобꙋ́къ чи́стыи на главꙋ̀ є҆гѡ̀ , и҆ ѡ҆блеко́ша є҆гѡ̀ в̾ ри́зы . и҆ а҆́нг҃лъ гдⷭ҇нь стоѧ́ше . и҆ засвидѣ́тельствоваше а҆́нг҃лъ гдⷭ҇нь ко і҆сꙋ́сꙋ гл҃ѧ , си́це гл҃етъ гдⷭ҇ь вседержи́тель , а҆́ще пꙋтѝ мои́ми ше́ствꙋеши , и҆ повелѣ́нїѧ моѧ̀ соблюде́ши , ты̀ раз̾сꙋди́ши до́мъ мо́й . и҆ а҆́ще до́мъ мо́й сохрани́ши , да́мъ ти живꙋ́щихъ посредѣ̀ стоѧ́щихъ си́хъ . и҆ ѡ҆брати́сѧ а҆́нг҃лъ гдⷭ҇нь гл҃ѧи ко мнѣ̀ , и҆ воз̾дви́же мѧ̀ , и҆́мже ѻ҆́бразомъ є҆гда̀ воста́нетъ чл҃къ ѿ сна̀ своегѡ̀ , и҆ речѐ ко мнѣ̀ , что́ ты зри́ши . и҆ рѣ́хъ , ви́дѣхъ , и҆ сѐ свѣ́щникъ зла́тъ ве́сь , и҆ свѣща̀ верхꙋ̀ є҆гѡ̀ , и҆ се́дмь свѣти́льникъ на не́мъ , и҆ се́дмь ꙗ҆́чаицъ свѣти́льникѡмъ ве́рхнимъ є҆гѡ̀ и҆ двѣ̀ свѣщѝ вели́цы верхꙋ̀ є҆гѡ̀ , є҆ди́на свѣща̀ ѡ҆деснꙋ́ю є҆гѡ̀ , и҆ є҆ди́на ѡ҆шꙋ́ю . и҆ вопроси́хъ , и҆ рѣ́хъ ко а҆́нг҃лꙋ гл҃ющемꙋ мнѣ̀ , гл҃ѧ , что̀ сꙋ́ть сїѧ̀ гдⷭ҇и . и҆ ѿвѣща̀ а҆́нг҃лъ гл҃ѧи со мно́ю , и҆ речѐ ко мнѣ̀ гл҃ѧ , невѣ́си ли что̀ сꙋ́ть сїѧ̀ . и҆ рѣ́хъ , ни гдⷭ҇и . и҆ ѿвѣща̀ ко мнѣ̀ гл҃ѧ , сїѐ сло́во гдⷭ҇не к̾ зороваве́лю . гл҃ѧ , ни си́лою вели́кою , ни крѣ́постїю , но дх҃омъ мои́мъ , гл҃етъ гдⷭ҇ь вседержи́тель .

На литі́и , стихѣ́ры . гла́съ а҃ . Беспло́тнїи а҆́нг҃ли , бж҃їю прⷭ҇то́лꙋ пред̾стоѧ́ще , и҆ всѧ́кими свѣтлостьмѝ ѡ҆блиста́еми , свѣтоли́тїи вѣ́чными сїѧ́юще , и҆ свѣ́ти быва́юще вторі́и , хрⷭ҇тꙋ̀ моли́тесѧ , дарова́ти дш҃а́мъ на́шимъ , ми́ръ и҆ ве́лїю ми́лость . Без̾сме́ртнїи а҆́нг҃ли , живо́тъ вои́стинꙋ без̾сме́ртныи , ѿ пе́рвагѡ прїе́мше живота̀ всебога́тїи . присносꙋ́щныѧ сла́вы чи́стыѧ зри́тели вы̀ всегда̀ показа́стесѧ , свѣ́та и҆сполнѧ́еми , и҆ свѣщѝ соѡ҆браща́еми совокꙋпле́нїемъ и҆менꙋ́етесѧ . хрⷭ҇тꙋ̀ моли́тесѧ , дарова́ти дш҃а́мъ на́шимъ , ми́ръ и҆ ве́лїю млⷭ҇ть . Нача́льниче миха́иле а҆рхистрати́же , престо́лꙋ пред̾стоѧ̀ влⷣчню с̾ про́чими беспло́тными а҆рха́нг҃лы и҆ а҆́нг҃лы , нача́ла , и҆ престо́ли , гдⷭ҇ьствїѧ , и҆ серафи́ми шестокрила́тїи , и҆ многоѡ҆чи́тїи херꙋви́ми бжⷭ҇твенїи , премꙋ́дрости сосꙋ́ди , си́лы и҆ вла́сти бжⷭ҇твенѣйшїи , хрⷭ҇то́ви моли́тесѧ , дарова́ти дш҃а́мъ на́шимъ , ми́ръ и҆ ве́лїю млⷭ҇ть .

сла́ва . гла́съ , а҃ . Чинонача́льникъ вы́шнимъ си́ламъ миха́илъ , первостоѧ́тель бжⷭ҇твеныхъ чино́въ , дне́сь на́съ к̾ торжествꙋ̀ созва̀ , и҆́же всегда̀ с̾ на́ми ходѧ̀ и҆ сохранѧ́ѧ всѣ́хъ ѿ всѧ́когѡ ѡ҆бстоѧ́нїѧ дїа́вольскаго . прїиди́те оу҆́бѡ праз̾днолю́бцы и҆ хрⷭ҇толю́бцы , цвѣ́ты добродѣ́телей взе́мше , чи́стыми по́мыслы и҆ со́вѣстїю бл҃гостоѧ́нною , а҆рха́нг҃лѡвъ собо́ръ почте́мъ . то́й бо непреста́ннѡ бг҃ꙋ пред̾стоѧ̀ , и҆ трист҃ꙋ́ю пѣ́снь воспѣва́ѧ , мо́литъ спасти́сѧ дш҃а́мъ на́шимъ . и҆ ны́нѣ , боⷢ҇ . Сѐ и҆спо́лнисѧ и҆са́ино прорече́нїе , дв҃ою бо родила̀ є҆сѝ . и҆ по ржⷭ҇твѣ̀ ꙗ҆́кѡ пре́жде ржⷭ҇тва̀ пребыва́еши , бг҃ъ бо бѣ̀ рожде́исѧ , тѣ́мже и҆ є҆стество̀ но́во премѣни́сѧ . но ѽ бг҃ома́ти , мл҃твы твои́хъ ра́бъ во твое́й цр҃кви приноси́мыѧ ти непре́зри . но ꙗ҆́кѡ бл҃гоꙋтро́бнагѡ , свои́ма рꙋка́ма поноси́вшаѧ , на своѧ̀ рабы̀ оу҆милосе́рдисѧ , и҆ молѝ спасти́сѧ дш҃а́мъ на́шимъ .

На стихо́внѣ , стⷯры . гла́съ , а҃ . Мы́сленымъ си́ламъ чинонача́льницы , пред̾стоѧ́ще непреста́ннѡ влⷣчню прⷭ҇то́лꙋ , моли́тесѧ ко́ гдⷭ҇ꙋ , ми́ръ ми́рови дарова́ти , и҆ дш҃а́мъ на́шимъ ве́лїю ми́лость .

сти́хъ : творѧ́и а҆́нг҃лы своѧ̀ дх҃и ,꙳ и҆ слꙋгѝ своѧ̀ ѻ҆́гнь па́лѧщь . Чинонача́льникъ вы́шнимъ си́ламъ миха́илъ , первостоѧ́тель бжⷭ҇твеныхъ чино́въ , дне́сь на́съ к̾ торжествꙋ̀ созва̀ , и҆́же всегда̀ с̾ на́ми ходѧ̀ , и҆ сохранѧ́ѧ всѣ́хъ ѿ всѧ́когѡ дїа́вольскагѡ ѡ҆бстоѧ́нїѧ . прїиди́те оу҆́бѡ праз̾днолю́бцы и҆ хрⷭ҇толю́бцы , цвѣ́ты добродѣ́телей взе́мше , чи́стыми по́мыслы , и҆ со́вѣстїю бл҃гостоѧ́нною , а҆рха́нг҃лѡвъ собо́ръ почте́мъ . то́й бо непреста́ннѡ бг҃ꙋ пред̾стоѧ̀ , и҆ трист҃ꙋ́ю пѣ́снь воспѣва́ѧ , мо́литъ спасти́сѧ дш҃а́мъ на́шимъ .

сти́хъ : хвали́те гдⷭ҇а всѧ̀ си́лы є҆гѡ̀ ,꙳ хвали́те є҆гѡ̀ всѝ а҆́нг҃ли є҆гѡ̀ . Невеще́ственомꙋ сꙋществꙋ̀ , мы́сленыхъ си́лъ пред̾стоѧ́ще , и҆ трисл҃нчныѧ сла́вы блиста́нїемъ , свѣ́тъ даю́ще вселе́ннѣй а҆рхистрати́зи , непреста́нными гла́сы трист҃ꙋ́ю пѣ́снь воспѣва́ете . тѣ́мъ моли́тесѧ , спасти́сѧ дш҃а́мъ на́шимъ .

сла́ва , и҆ нн҃ѣ . гла́съ , и҃ . Ꙗ҆́кѡ чинонача́льникъ и҆ посо́бникъ , и҆ а҆́нг҃лѡмъ нача́льникъ а҆рхистра ти́же , всѧ́кїѧ нꙋ́жды и҆ ско́рби , болѣ́зни и҆ лю́тыхъ бѣ́дъ свободѝ , и҆́же чи́стѣ воспѣва́ющихъ , и҆ молѧ́щихъ тѧ̀ сла́вне . ꙗ҆́вѣ ꙗ҆́кѡ невеще́ственъ , невеще́ственагѡ зрѧ̀ , и҆ неприкоснове́ннымъ свѣ́томъ влⷣчнею сла́вою ѡ҆сїѧ́емь . то́й бо чл҃колю́бнѣ пло́ть на́съ ра́ди ѿ дв҃ы воспрїѧ́тъ , спастѝ восхотѣ́въ чл҃чество .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , д҃ . нбⷭ҇ныхъ во́инствъ .= двⷤа . и҆ бцⷣе дв҃о ра́дꙋисѧ , є҆ди́ною .=

На оу҆́трени , на бг҃ъ гдⷭ҇ь , тропа́рь : нбⷭ҇ныхъ во́инствъ .= двⷤа . сла́ва , и҆ ны́нѣ , боⷢ҇ , воскрⷭ҇нъ .=

По а҃ , стихоло́гїи , сѣда́ленъ . гла́съ , а҃ . Прⷭ҇то́лꙋ стра́шномꙋ пред̾стоѧ́ще при́снѡ , и҆ свѣ́тлыми зарѧ́ми трисл҃нчнагѡ бжⷭ҇тва̀ сїѧ́юще , просвѣти́те ны̀ , грѣхо́вныи мра́къ ѿгонѧ́ще , и҆́же ва́шъ собо́ръ пра́зднꙋющихъ свѣ́тлѡ . и҆ прилѣ́жнѡ моли́те и҆зба́витисѧ на́мъ ѿ бѣ́дъ , пресвѣ́тлїи моли́твеницы . дрꙋгі́и , сѣда́ленъ . гла́съ , то́йже . Ли́къ а҆́нг҃льскїи а҆рхистрати́га и҆мѣ́ѧ бжⷭ҇твенагѡ миха́ила , с̾ ни́мъ ст҃ѣ́й трⷪ҇цѣ приноша́етъ пѣ́нїе . ѿ несꙋ́щихъ бо содѣ́тель всѧ́ческимъ во́инства ѻ҆гнезра́чныхъ чино́въ сло́вомъ приве́дъ . сла́ва , и҆ ны́нѣ , боⷢ҇ . Оу҆пова́нїе хрⷭ҇тїа́нѡмъ прⷭ҇та́ѧ дв҃о . є҆го́же родила̀ є҆сѝ бг҃а па́че оу҆ма̀ и҆ сло́ва , непреста́ннѡ молѝ с̾ вы́шними си́лами , да́ти ѡ҆ставле́нїе грѣхо́въ всѣ́мъ на́мъ , и҆ и҆справле́нїе житїю̀ , вѣ́рою , и҆ любо́вїю при́снѡ тѧ̀ сла́вѧщимъ .

По в҃ , стихоло́гїи , сѣда́ленъ . гла́съ , в҃ . Посредѣ̀ полко́въ а҆́нг҃льскихъ старѣ́йшїи ꙗ҆ви́сѧ миха́иле а҆рхистрати́же . вы́шнѧгѡ цр҃ѧ непреста́ннѡ молѝ , до́льнихъ мꙋчи́телей горды́ню низ̾ложи́ти . и҆ ꙗ҆́кѡ и҆мѣ́ѧ дерзнове́нїе оу҆ престо́ла ѻ҆гнезра́чнагѡ , молѝ за ны̀ непреста́ннѡ рабы̀ своѧ̀ . дрꙋгі́и , сѣда́ленъ . гла́съ , д҃ . Беспло́тныи оу҆́мъ , слꙋжи́телемъ а҆рхистрати́же , пре́д̾ бг҃омъ оу҆́бѡ пред̾стоѧ̀ и҆ ѿ тꙋ́дꙋ трисл҃нечнымъ свѣ́томъ свѣтѧ́сѧ . просвѣти́же и҆ ѡ҆ст҃ѝ вѣ́рою пою́щїѧ тѧ̀ , всѧ́когѡ и҆збавлѧ́ѧ вра́жїѧ мꙋчи́тельства . и҆ ми́рнꙋ и҆спросѝ жи́знь хрⷭ҇тои҆мени́тымъ лю́демъ . сла́ва , и҆ ны́нѣ , боⷢ҇ . Дв҃о всенепоро́чнаѧ , и҆́же пресꙋ́щнаго бг҃а ро́ждьши , со беспло́тными си́лами , тогѡ̀ непреста́ннѡ молѝ , ѡ҆ставле́нїе и҆ грѣхо́въ и҆ и҆справле́нїе житїю̀ да́ти на́мъ пре́жде конца̀ , и҆́же вѣ́рою и҆ любо́вїю пою́щимъ тѧ̀ по до́лгꙋ , є҆ди́на всепѣ́таѧ .

По полїєлеѡ́сѣ , сѣда́ленъ . гла́съ , и҃ . Нбⷭ҇нымъ чино́мъ нача́льникъ , слꙋжи́тель же сла́вы бжⷭ҇твеныѧ досто́инъ бы́въ . повелѣ́нїемъ зижди́телѧ хрⷭ҇тїа́нѡмъ є҆сѝ хода́тай спасе́ныи . невеще́ственою сѝ сла́вою земны́ѧ назира́ѧ . тѣ́мже тѧ̀ по до́лгꙋ восхвалѧ́емъ всѝ , бжⷭ҇твеное твоѐ дне́сь воспѣва́юще торжество̀ , миха́иле а҆рхистрати́же . молѝ хрⷭ҇та̀ бг҃а грѣхо́въ ѡ҆ставле́нїе дарова́ти , чтꙋ́щимъ любо́вїю ст҃о́е твоѐ торжество̀ . дрꙋгі́и , сѣда́ленъ . гла́съ , д҃ . А҆́нг҃льстїи чи́ни со́ страхомъ пред̾стоѧ́тъ престо́лꙋ твоемꙋ̀ влⷣко хрⷭ҇тѐ бж҃е , и҆ и҆́же ѿ тꙋ́дꙋ зарѧ́ми при́снѡ просвѣща́еми , пѣ́снь тѝ немо́лчнѡ побѣ́днꙋю воспѣва́ютъ . и҆́хъ же сщ҃е́нными мл҃твами , ми́ръ ми́рови да́рꙋй , и҆ дш҃а́мъ на́шимъ ве́лїю млⷭ҇ть . сла́ва , и҆ нн҃ѣ , боⷢ҇ . Чтⷭ҇аѧ и҆ всенепоро́чнаѧ и҆ неи҆скꙋсомꙋ́жнаѧ дв҃о мт҃и , и҆́же є҆ди́на без̾лѣ́тнаго сн҃а и҆ сло́ва бж҃їѧ в̾ лѣ́то поро́ждьши . сегѡ̀ со беспло́тными честны́ми нбⷭ҇ными си́лами молѝ , дарова́ти на́мъ ѡ҆чище́нїе грѣхо́въ , и҆ ве́лїю млⷭ҇ть .

степе́нна , д҃ го гла́са . а҆нтиѳо́нъ , а҃ . проки́мен̾ , ѱл҃о́мъ дв҃довъ . творѧ́и а҆́нг҃лы своѧ̀ дх҃и , и҆ слꙋгѝ своѧ̀ ѻ҆́гнь па́лѧщь . сти́хъ . бл҃гословѝ дш҃е моѧ̀ гдⷭ҇а , гдⷭ҇и бж҃е мо́й возвели́чилсѧ є҆сѝ ѕѣлѡ̀ . всѧ́ко дыха́нїе . є҆ѵⷢ҇а́лїе , ѿ =матѳе́ѧ . заⷱ҇ , н҃в . ѱл҃о́мъ , н҃ . =сла́ва . мл҃твъ ра́ди а҆рха́нг҃лъ , млⷭ҇тиве ѡ҆чи́сти мно́жество согрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество согрѣше́нїи на́шихъ .

Поми́лꙋй мѧ бж҃е по вели́цѣй млⷭ҇ти твое́й по мно́гимъ щедро́тамъ твои́мъ , ѡ҆чи́сти без̾зако́нїѧ моѧ̀ , бж҃е сп҃се мо́й .

стихѣ́ра . гла́съ , ѕ҃ . А҆́нг҃ли твоѝ хрⷭ҇тѐ , прⷭ҇то́лꙋ вели́чествїѧ со́ страхомъ пред̾стоѧ́тъ , и҆ твое́ю свѣ́тлостїю при́снѡ просвѣща́еми , в̾ вы́шнихъ пѣвцы̀ и҆ свѣ́тꙋ твоемꙋ̀ слꙋжи́тели , ѿ тебѐ посыла́еми , подаю́тъ свѣ́тъ дш҃а́мъ на́шимъ .

Кано́нъ , бцⷣѣ . со і҆рмосо́мъ на́ ѕ҃ . і҆рмо́съ , по два́жды . и҆ беспло́тнымъ , два̀ кано́на , на́ и҃ . кано́нъ , бцⷣѣ . гла́съ , и҃ . пѣ́снь , а҃ . і҆рмо́съ . Пое́мъ гдⷭ҇ви прове́дшемꙋ лю́ди своѧ̀ , сквозѣ̀ чермно́е мо́ре , ꙗ҆́кѡ є҆ди́нъ , сла́вно бо просла́висѧ .

запѣ́въ : Прест҃а́ѧ гжⷭ҇е бцⷣе спасѝ на́съ .= П=рест҃а́ѧ бцⷣе , ꙗ҆́же вопло́щшеесѧ прⷭ҇носꙋ́щное и҆ пребжⷭ҇твеное сло́во , па́че є҆стества̀ ро́ждьши пое́мъ тѧ . Гро́здъ тѧ живоно́сенъ и҆ всекра́сныи . дв҃аѧ хрⷭ҇тѐ породила̀ є҆́сть , и҆́же всемꙋ̀ ми́рꙋ ка́плюща сла́дость спасе́нїѧ . Ро́дъ а҆да́мскїи ко и҆́же па́че оу҆ма̀ бл҃же́нствꙋ , тобо́ю воз̾веде́ныи бцⷣе досто́йнѡ сла́витъ тѧ .

пе́рвыи , кано́нъ . є҆мꙋ́же краегране́сїе сицево̀ : да торжествꙋ́емъ бг҃омꙋ́дрїи похвалꙋ̀ собо́рꙋ беспло́тныхъ . творе́нїе і҆ѡ́сифово . гла́съ , и҃ . пѣ́снь , а҃ . і҆рмо́съ . Пѣ́снь воз̾сле́мъ лю́дїе чꙋдотво́рцꙋ бг҃ꙋ , свобо́ждьшемꙋ і҆и҃лѧ ѿ рабо́ты , пѣ́снь побѣ́днꙋю пою́ща и҆ вопїю́ща , воспое́мъ тебѣ̀ є҆ди́номꙋ влⷣцѣ .

запѣ́въ : Ст҃і́и а҆рха́нг҃ли и҆ а҆́нг҃ли , моли́те бг҃а ѡ҆ на́съ . Всѝ воспое́мъ лю́дїе , всѧ̀ направлѧ́ющꙋю невеще́ственыѧ ли́ки вы́шнѧгѡ чинонача́лїѧ , трⷪ҇цꙋ несозда́ннꙋю , пою́ще , ст҃ъ , ст҃ъ , ст҃ъ є҆сѝ , бж҃е вседержи́телю . Положи́лъ є҆сѝ тва́ремъ нача́токъ , сꙋщество̀ беспло́тное , тво́рче а҆́нг҃лѡмъ , пречⷭ҇тыи тво́й прⷭ҇то́лъ ѡ҆крꙋжа́юща , зва́ти ти , ст҃ъ , ст҃ъ , ст҃ъ є҆сѝ , бж҃е вседержи́телю . Ра́дꙋисѧ гаврїи́ле , бж҃їѧ воплоще́нїѧ воз̾вѣсти́телю . миха́иле же чино́мъ невеще́ственымъ пред̾ста́телю , непреста́ннѡ зовꙋ́ще , ст҃ъ , ст҃ъ , ст҃ъ є҆сѝ , бж҃е вседержи́телю .= боⷢ҇ . Т=репе́щꙋ та́инства хрⷭ҇тѐ твоегѡ̀ схожде́нїѧ , ꙗ҆́кѡ и҆́же є҆стество́мъ бг҃ъ , прїѧ́лъ є҆сѝ ѿ дв҃ы роди́тисѧ , ꙗ҆́кѡ чл҃къ , да спасе́ши ми́ра , ѿ рабо́ты сопроти́внагѡ .

дрꙋгі́и кано́нъ . гла́съ , д҃ . пѣ́снь , а҃ . і҆рмо́съ . Ѿве́рзꙋ оу҆ста̀ моѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ торжествꙋ́ѧ , и҆ воспою̀ ра́дꙋѧсѧ тоѧ̀ чꙋдеса̀ .

запѣ́в̾ : Ст҃ы́и а҆рха́нг҃ле миха́иле , молѝ бг҃а ѡ҆ на́съ . Бжⷭ҇твеными свѣтлостьмѝ ѡ҆блиста́емь всегда̀ , оу҆́мъ мо́й ѿве́рзи пѣ́ти тѧ а҆рхистрати́же вы́шнихъ во́инствъ . всѣ́мъ оу҆тверже́нїе притека́ющимъ тѝ . Оу҆́мъ пребез̾нача́льныи , преми́рна чинонача́льника показа̀ чино́мъ , тѧ̀ пресла́вне а҆рхистрати́же . и҆ свѣ́тъ сꙋ́щимъ въ ми́рѣ , и҆ бжⷭ҇твеное оу҆краше́нїе цр҃кви свое́й . сла́ва . Оу҆мово́мъ пѣ́рвее нбⷭ҇нымъ въ дс҃ѣ , до́льнимъ же всеи҆зрѧ́днѣ миха́иле да́лсѧ є҆сѝ , ѡ҆гражде́нїе и҆ оу҆тверже́нїе , и҆ ѻ҆рꙋ́жїе , врагѝ закала́ющее , и҆ потреблѧ́ющее . и҆ ны́нѣ , боⷢ҇ . Дв҃о всепѣ́таѧ , ꙗ҆́же а҆́нг҃лѡмъ бл҃голѣ́пїе , чл҃кѡмъ по́моще , ты́ ми помозѝ в̾ мо́ри пла́вающемꙋ , и҆ въ бꙋ́рю грѣха̀ прⷭ҇нѡ впа́дающꙋ и҆ бѣдꙋ́ющꙋ . катава́сїѧ : Ѿве́рзꙋ оу҆ста̀ моѧ̀ .

пѣ́снь , г҃ . і҆рмо́съ . Ты̀ є҆сѝ оу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пое́тъ тѧ̀ дх҃ъ мо́й . Да́ждь на́мъ по́мощь твои́ми моли́твами всечи́стаѧ , прило́ги разрꙋша́ющи лю́тыхъ ѡ҆б̾стоѧ́нїи . Є҆́ввѣ пра́мт҃ри ты̀ и҆справле́нїе бы́сть , нача́льника жи́зни ми́рꙋ хрⷭ҇та̀ , бцⷣе ро́ждьши . Препоѧ́ши мѧ си́лою свы́ше всечи́стаѧ , ꙗ҆́же вои́стиннꙋ бг҃а ро́ждьши пло́тїю , ѻ҆́ч҃ꙋю соста́внꙋю си́лꙋ .

и҆́нъ , і҆рмо́съ . Стра́хъ тво́й гдⷭ҇и всадѝ в̾ срⷣца̀ ра́бъ твои́хъ , и҆ бꙋ́ди на́мъ оу҆тверже́нїе , вои́стинꙋ тѧ̀ призыва́ющимъ . Крѣ́постїю оу҆ста́вилъ є҆сѝ без̾сме́ртне си́льныѧ , соверша́ющихъ прⷭ҇то́е твоѐ хотѣ́нїе , тебѣ̀ в̾ вы́шнихъ всегда̀ пред̾стоѧ́щихъ . Хода́таи твоегѡ̀ вочл҃ченїѧ , и҆ честна́гѡ воста́нїѧ , а҆́нг҃льскїѧ чинонача́льники хрⷭ҇тѐ , за ны̀ прїимѝ молѧ́щихсѧ . А҆́нг҃лы приста́вилъ є҆сѝ храни́тели чл҃кѡмъ , ꙗ҆́кѡ бл҃гоꙋтро́бенъ . слꙋжи́тели же показа̀ хрⷭ҇тѐ спасе́нїю , твои́мъ оу҆го́дникѡмъ . боⷢ҇ . Неи҆зрече́ннѡ ро́ждьши бг҃оневѣ́сто сп҃са и҆ гдⷭ҇а , и҆зба́вльшаго на́съ ѿ тлѝ , и҆́же тѧ вои́стинꙋ призыва́ющихъ .

и҆́нъ , і҆рмо́съ . Немꙋ́дростїю ни си́лою , ни бога́тствомъ хва́лимсѧ , но твое́ю ѻ҆́ч҃ею соста́вною мꙋ́дростїю бж҃їею . ꙗ҆́кѡ нѣ́сть ст҃а па́че тебѐ чл҃колю́бче . Си́лою бжⷭ҇твеною , воево́до а҆́нг҃лѡмъ прехва́льне , ѡ҆бхо́диши всю̀ зе́млю , ѿ лю́тыхъ на́съ и҆зима́й , призыва́ющихъ твоегѡ̀ бжⷭ҇твенагѡ и҆́мене . Ꙗ҆́кѡ бжⷭ҇твенъ проповѣ́дникъ , ꙗ҆́кѡ пред̾ста́тель вѣ́рнымъ непосты́денъ . заблꙋ́ждьшимъ наста́вникъ , и҆ наказа́тель бы́лъ є҆сѝ , бж҃їи а҆рхистрати́же бг҃ови́дче . сла́ва . Бжⷭ҇твенагѡ сїѧ́нїѧ пречи́стое зерца́ло бы́лъ є҆сѝ . ꙗ҆вле́нїѧ честна́гѡ свѣ́тлѡ прїе́мъ дх҃а , миха́иле пе́рвыи а҆́нг҃ле досточꙋ́дне . и҆ ны́нѣ , боⷢ҇ . И҆́же невеще́ственыѧ оу҆мы̀ составлѧ́ѧи , свое́ю во́лею , въ твоѐ чре́во всели́сѧ хотѣ́нїемъ всенепоро́чнаѧ , пло́тїю зри́мь неви́димыи .= катава́сїѧ : Т=воѧ̀ пѣвцы̀ .

сѣда́ленъ . гла́съ , и҃ . Нбⷭ҇ныхъ нача́льниче , и҆ первостоѧ́телю высокопресто́льныхъ и҆ стра́шныхъ бжⷭ҇твеныѧ сла́вы , миха́иле а҆рхистрати́же а҆́нг҃лѡмъ чинонача́льниче , со всѣ́ми беспло́тными . є҆мꙋ́же слꙋ́жиши влⷣцѣ ѡ҆ все́мъ ми́рѣ непреста́ннѡ моли́сѧ , и҆ и҆спросѝ ѡ҆ставле́нїе грѣхо́въ , и҆ млⷭ҇ть и҆ бл҃года́ть ѡ҆брѣстѝ в̾ дн҃ь сꙋ́дныи . двⷤа . сла́ва , и҆ нн҃ѣ , боⷢ҇ . Въ пꙋчи́нꙋ лю́тѣ впа́дъ оу҆ны́нїѧ , ѿ мно́жества лꙋка́выхъ и҆ без̾зако́нныхъ мѝ дѣ́лъ прїидо́хъ въ недоꙋмѣ́нїе , и҆ ѿча́ѧнїемъ нн҃ѣ ѡ҆держꙋ́сѧ . влⷣчце бцⷣе ты̀ мѧ̀ спасѝ , ты́ ми помозѝ . грѣ́шнымъ бо ты̀ є҆сѝ ѡ҆чище́нїе , и҆ чистота̀ спасе́наѧ . =крⷭ҇тобоⷢ҇ . Ѿ =чи́стыхъ крове́й твои́хъ вопло́щшасѧ , и҆ па́че оу҆ма̀ и҆з̾ тебѐ чи́стаѧ ро́ждьшагосѧ , на́ древѣ ви́сѧща посредѣ̀ ѕлодѣ́ю зрѧ́щи , оу҆тро́бою болѣ́зноваше . и҆ мт҃рьски пла́чꙋщи вопїѧ́ше оу҆вы̀ мнѣ̀ ча́до моѐ , что̀ є҆́сть бжⷭ҇твеное и҆ неи҆зрече́нное смотре́нїе твоѐ , и҆́мже ѡ҆животвори́лъ є҆сѝ созда́нїе своѐ . пою̀ твоѐ милосе́рдїе .

пѣ́снь , д҃ . і҆рмо́съ . Оу҆слы́шахъ гдⷭ҇и смотре́нїѧ твоегѡ̀ та́инство , разꙋмѣ́хъ дѣ́ла твоѧ̀ , и҆ просла́вихъ твоѐ бжⷭ҇тво̀ .= И҆́=же кла́съ возрасти́вши животво́рныи , неѡ҆ра́ннаѧ ни́ва , даю́щаго ми́рови жи́знь , бцⷣе спаса́й пою́щихъ тѧ . Бцⷣꙋ тѧ всечⷭ҇таѧ , просвѣ́щшїисѧ всѝ зна́емъ , сл҃нце бо пра́вды родила̀ є҆сѝ прⷭ҇нѡ дв҃о . Ѡ҆чище́нїе да́рꙋй на́шимъ невѣ́дѣнїемъ , ꙗ҆́кѡ без̾грѣ́шенъ , и҆ оу҆мирѝ ми́ръ сво́й бж҃е , мл҃твами ро́ждьшїѧ тѧ̀ .

и҆́нъ , і҆рмо́съ . Всѣ́дъ на конѧ̀ , на а҆пⷭ҇лы твоѧ̀ гдⷭ҇и , и҆ прїѧ́тъ рꙋка́ма си оу҆зды̀ и҆́хъ , и҆ спасе́нїе бы́сть є҆жде́нїе твоѐ . вѣ́рою вопїю́щимъ тѝ , сла́ва си́лѣ твое́й гдⷭ҇и . Всѣ́де на а҆́нг҃лы ꙗ҆́коже на конѧ̀ чл҃колю́бче , и҆ прїѧ́тъ рꙋко́ю си брозды̀ и҆́хъ , и҆ спасе́нїе бы́сть є҆жде́нїе твоѐ , вѣ́рнѡ ти вопїю́щимъ , сла́ва си́лѣ твое́й гдⷭ҇и . Покрыва́етъ а҆́нг҃лы , добродѣ́тель твоѧ̀ без̾сме́ртне , и҆ земны́ѧ и҆сполнѧ́етъ концы̀ , твоегѡ̀ сла́внагѡ без̾нача́льне бжⷭ҇твенагѡ хвале́нїѧ , с̾ ни́ми же тебѣ̀ вопїе́мъ , сла́ва си́лѣ твое́й гдⷭ҇и . И҆зы́де ще́дре на спасе́нїе лю́демъ свои́мъ хрⷭ҇тѐ , созыва́еши же дрꙋ́ги си́лы своѧ̀ . и҆ весе́лїе бы́сть во спасе́нїи твое́мъ без̾ве́щнымъ , вопїю́щимъ , сла́ва си́лѣ твое́й гдⷭ҇и . боⷢ҇ . Дв҃а и҆ мт҃и па́че є҆стества̀ ꙗ҆ви́сѧ пречⷭ҇таѧ . ꙗ҆́кѡ бг҃а того́же и҆ чл҃ка хрⷭ҇та̀ родѝ , ѿ а҆́нг҃лъ хвали́магѡ . люде́й твои́хъ печа́ль преложѝ на ра́дость , мл҃твами сѝ .

и҆́нъ , і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречтⷭ҇ыѧ дв҃ы , спасе́ же вопїю́щїѧ , сла́ва хрⷭ҇тѐ си́лѣ твое́й . Оу҆́мъ сы́и пе́рвыи , соста́вилъ є҆сѝ бжⷭ҇твеныѧ оу҆мы̀ хотѣ́нїемъ . нача́льника посредѣ̀ си́мъ миха́ила содѣ́ла , бога́тнымъ прича́стїемъ просвѣща́ема , и҆ оу҆́мными бг҃онача́лїи ѡ҆блиста́ема . Пѣ́нїе ст҃о со прⷭ҇то́лы и҆ нача́лы и҆ си́лами , и҆ властьмѝ , и҆ сщ҃е́нными гдⷭ҇ьствы возглаша́еши трⷪ҇цы , пресла́вне миха́иле , спаса́й на́съ пою́щїѧ тѧ . сла́ва . Возвели́чимъ всѣ́хъ творца̀ и҆ гдⷭ҇а , и҆́же за млрⷭ҇дїе да́вшаго ѡ҆гражде́нїе вѣ́лїе , и҆ неѡ҆бори́мꙋ стѣ́нꙋ , и҆ забра́ло , миха́ила на́мъ свѣтоза́рнаго а҆рхистрати́га . и҆ ны́нѣ , боⷢ҇ . Мы́сленѡ дв҃цѣ твоегѡ̀ ржⷭ҇тва̀ , пресла́вное ска́зоваше дре́вле , сщ҃енноѧвле́нныи дх҃омъ , го́рꙋ присѣ́ннꙋю ви́дѣ тѧ̀ ꙗ҆́снѡ . и҆з̾ неѧ́же ст҃ы́и прїи́де бг҃ъ воплаща́емъ .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Оу҆́треннююще вопїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Оу҆толѝ непостоѧ́ннꙋю бꙋ́рю стрⷭ҇те́й на́шихъ дв҃о , ꙗ҆́же бг҃а ро́ждьши ѡ҆корми́телѧ и҆ гдⷭ҇а . Слꙋ́жатъ ржⷭ҇твꙋ̀ твоемꙋ̀ пречⷭ҇таѧ бцⷣе , а҆́нг҃льстїи чи́нове , и҆ земны́хъ составле́нїѧ . Мр҃і́е бцⷣе без̾невѣ́стнаѧ , оу҆пова́нїѧ враго́въ сꙋ́етна сотворѝ , а҆ пою́щихъ тѧ̀ ѡ҆б̾веселѝ .

и҆́нъ , і҆рмо́съ . Ѿ ́нощи невѣ́денїѧ , по дш҃етлѣ́ннꙋ пꙋтѝ прⷭ҇нѡ блꙋдѧ́щагѡ , свѣ́томъ бг҃оразꙋ́мїѧ твоегѡ̀ гдⷭ҇и , наставлѧ́ѧ мѧ на стезю̀ заповѣде́й твои́хъ напра́ви . Невозвра́тнымъ жела́нїемъ всегда̀ , к̾ высотѣ̀ хрⷭ҇тѐ носи́ми . кра́йнее всѣ́хъ жела́нїе , а҆́нг҃льскїѧ си́лы непреста́ннѡ сла́вѧтъ . Ты̀ разꙋ́мныѧ по сꙋществꙋ̀ , нетлѣ́нныѧ бл҃года́тїю твое́ю хрⷭ҇тѐ поста́вилъ є҆сѝ , пѣвцы̀ твоемꙋ̀ вели́чествїю , а҆́нг҃лы твоѧ̀ по ѻ҆́бразꙋ содѣ́лавъ непости́жиме . Ты̀ непрекло́нны на го́ршаѧ , к̾ тебѣ̀ приближе́нїемъ хрⷭ҇тѐ , сохрани́лъ є҆сѝ своѧ̀ слꙋгѝ . и҆сто́чникъ бо бл҃гости ты̀ є҆сѝ , бл҃готворѧ̀ досто́йнѡ тѝ слꙋжа́щимъ . боⷢ҇ . Оу҆мерщве́нꙋю мѝ дш҃ꙋ стрⷭ҇тьмѝ ме́рзскими , всенепоро́чнаѧ ѡ҆живѝ , животꙋ̀ храни́телѧ ро́ждьши . и҆ к̾ стезѝ вѣ́чнѣй , и҆ бл҃же́нномꙋ житїю̀ оу҆стремѝ .

и҆́нъ , і҆рмо́съ . Нечести́вїи не оу҆́зрѧтъ сла́вы твоеѧ̀ хрⷭ҇тѐ , но мы́ тѧ є҆диноро́дне ѻ҆́ч҃ее заре́нїе сла́вы бж҃їѧ . ѿ́ нощи оу҆́треннююще , воспѣва́емъ тѧ милосе́рде . Ꙗ҆ви́лсѧ є҆сѝ пѣ́рвее , дре́внемꙋ і҆и҃лю , повелѣ́ньми и҆́же ѿ і҆а́кѡва . чл҃ческимъ дебельство́мъ , ꙗ҆́вльшꙋсѧ съ тѣ́ломъ , миха́иле беспло́тныи , а҆́нг҃лѡмъ а҆рхистрати́же . Невеще́ствеными сїѧ́нїи ѡ҆божа́емь прⷭ҇нѡ , прича́стїемъ бг҃онача́льнымъ . и҆ на́мъ сїѧ́нїе свѣтода́тельное подава́еши пѣ́рвыи а҆́нг҃ле , пресла́внѡ оу҆дивлѧ́емь . сла́ва . Оу҆краси́сѧ бл҃года́тїю бжⷭ҇твеныи тво́й хра́мъ . во́нь бо прише́дъ , и҆сцѣле́нїемъ є҆гѡ̀ пꙋчи́нꙋ показа́лъ є҆сѝ , миха́иле пѣ́рвыи а҆́нг҃лѡмъ , и҆ стрⷭ҇те́мъ потреби́телѧ . и҆ ны́нѣ , боⷢ҇ . Мы́сленымъ а҆́нг҃лѡмъ тѧ̀ показа̀ бг҃ъ вы́шшꙋ сѣ́нь , все́льсѧ въ твоѐ чре́во чⷭ҇таѧ всенепоро́чное . є҆го́же молѝ всегда̀ , оу҆ще́дрити пою́щїѧ тѧ̀ .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Ри́зꙋ ми пода́ждь свѣ́тлꙋ , ѡ҆дѣѧ́исѧ свѣ́томъ ꙗ҆́кѡ ри́зою , многомлⷭ҇тиве хрⷭ҇тѐ бж҃е на́шъ . Хра́мъ тѧ бж҃їи и҆ ковче́гъ , и҆ черто́гъ ѡ҆дш҃евле́нъ , и҆ две́рь небе́снꙋю , бцⷣе вѣ́рнїи воз̾вѣща́емъ . Тре́бищемъ разори́тель , бы́вшее ржⷭ҇тво̀ твоѐ мр҃і́е бг҃оневѣ́сто , поклонѧ́емъ є҆́сть , ꙗ҆́кѡ бг҃ъ со ѻ҆ц҃е́мъ и҆ дх҃омъ . Сло́во бж҃їе тебѐ показа̀ , земны́мъ лѣ́ствицꙋ нбⷭ҇нꙋю . тебе́ бо ра́ди к̾ на́мъ сни́де .

и҆́нъ , і҆рмо́съ . І҆ѡ́нꙋ в̾ ки́тѣ гдⷭ҇и є҆ди́нагѡ всели́лъ є҆сѝ , мене́ же свѧ́заннаго во мре́жахъ вра́жїѧхъ спасѝ , ꙗ҆́кѡ ѿ тлѝ тогѡ̀ спа́слъ є҆сѝ . Бг҃олѣ́пнѡ ѿ несꙋ́щества гдⷭ҇и , сло́вомъ приве́лъ є҆сѝ сꙋ́щества нбⷭ҇ныхъ без̾сме́ртне во́инствъ , свѣтови́дны си́хъ содѣ́ловаѧ . двⷤа . Слꙋжи́тели честні́и бж҃їѧ хвале́нїѧ бы́сте беспло́тнїи , гра́ждане нбⷭ҇нїи , и҆ бжⷭ҇твенаѧ вои́стинꙋ ски́нїѧ , творцꙋ̀ досто́йнѡ слꙋжа́ще . боⷢ҇ . Всепѣ́таѧ свѣ́та поро́ждьши , всѣ́мъ свѣ́тъ даю́щагѡ . тмꙋ̀ мои́хъ прегрѣше́нїи чⷭ҇таѧ ѿженѝ , мт҃рьними ти къ немꙋ̀ мл҃твами .

и҆́нъ , і҆рмо́съ . Возопи́лъ проѡ҆бразꙋ́ѧ погребе́нїе тридне́вное , пррⷪ҇къ і҆ѡ́на в̾ ки́тѣ бг҃ꙋ молѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Ра́дꙋетсѧ вѣ́рныхъ мно́жество , хва́лѧще тѧ̀ . и҆ сла́витъ всевино́внаго сло́ва , совокꙋ́пльшаго землены́ѧ со а҆́нг҃лы , миха́иле свое́ю бл҃гостїю . Во́инства і҆и҃лева спа́слъ є҆сѝ ꙗ҆́вльсѧ , и҆ бжⷭ҇твенаѧ даѧ̀ повелѣ́нїѧ , а҆рхистрати́же . и҆ врагѝ низ̾ложи́лъ є҆сѝ , и҆ до конца̀ тѣ́хъ потребѝ . сла́ва . Ꙗ҆́кѡ ви́дѣ тѧ̀ и҆сꙋ́съ на́ввинъ , поклони́сѧ , вопроси́въ честна́гѡ ти и҆ сла́внагѡ и҆́мене , нача́льниче а҆́нг҃лѡмъ , бл҃гоговѣ́нїемъ и҆ стра́хомъ ѡ҆держи́мъ . и҆ ны́нѣ , боⷢ҇ . Бл҃же́ни лю́дїе , прⷭ҇нѡ бл҃жа́щїи тѧ̀ бл҃же́ннаѧ ꙗ҆́же бг҃а бл҃же́ннаго ро́ждьши , и҆́же землены́ѧ за млрⷭ҇дїе , неи҆зрече́ннымъ соедине́нїемъ ѡ҆божи́вшаго .

катава́сїѧ : Бжⷭ҇твеное сѐ и҆ всечестно́е .

конда́къ . гла́съ , в҃ . А҆рхистрати́зи бж҃їи , и҆ слꙋгѝ бжⷭ҇твеныѧ сла́вы , а҆́нг҃лѡмъ нача́льницы , и҆ наста́вницы чл҃кѡмъ , поле́знаѧ на́мъ проси́те , и҆ ве́лїѧ млⷭ҇ти , ꙗ҆́кѡ беспло́тнымъ а҆рхистрати́зи . и҆́косъ . Ре́клъ є҆сѝ чл҃колю́бче въ писа́нїихъ твои́хъ , мно́жествꙋ ра́доватисѧ а҆́нг҃лъ , ѡ҆ чл҃цѣ є҆ди́номъ ка́ющемсѧ без̾сме́ртне . тѣ́мъ и҆ мы̀ въ без̾зако́нїихъ сꙋ́щїи , без̾грѣ́шне є҆ди́не срⷣцевѣ́дче , тѧ̀ моли́ти всегда̀ дерза́емъ , ꙗ҆́кѡ бл҃гоꙋтро́бна , оу҆ще́дрити на́съ , и҆ посла́ти недосто́йнымъ оу҆миле́нїе влⷣко , и҆ пода́ти на́мъ проще́нїе грѣхо́въ . ѡ҆ всѣ́хъ бо на́съ мо́лѧтсѧ тебѣ̀ , и҆́же беспло́тнымъ а҆рхистрати́зи .

пѣ́снь , з҃ . і҆рмо́съ . И҆́же ѿ і҆ꙋде́и , доше́дше ѻ҆́троцы въ вавилѡ́нъ дре́вле , вѣ́рою оу҆тверже́ нїи , пла́мень пе́щныи попра́вше гл҃юще , ѻ҆ц҃ъ на́шихъ бж҃е бл҃гослове́нъ є҆сѝ .= Ѿ= дв҃ческагѡ ложесна̀ воплоти́выисѧ , ꙗ҆ви́сѧ на спасе́нїе на́ше , сегѡ̀ ра́ди твою̀ мт҃рь вѣ́дꙋще бцⷣꙋ , бл҃года́рственѡ вопїе́мъ , ѻ҆ц҃ъ на́шихъ бж҃е блгⷭ҇ве́нъ є҆сѝ . Же́злъ прорастѐ дв҃о ѿ ко́рене і҆єссе́ѡва всебл҃же́нныи пло́дъ , цвѣ́тъ носѧ́щи спаси́тельныи , вѣ́рою сн҃ꙋ твоемꙋ̀ вопїю́щимъ , ѻ҆ц҃ъ на́шихъ бж҃е блгⷭ҇ве́нъ є҆сѝ . Премꙋ́дрости и҆спо́лни всѣ́хъ , и҆ крѣ́пости бжⷭ҇твеныѧ , соста́внаѧ премꙋ́дросте вы́шнѧгѡ , бцⷣы ра́ди , вѣ́рою тебѣ̀ вопїю́щихъ , ѻ҆ц҃ъ на́шихъ бж҃е бл҃гослове́нъ є҆сѝ .

и҆́нъ , і҆рмо́съ . Дѣ́ти є҆вре́йскїѧ в̾ пещѝ , попра́вше и҆ пла́мень дерзнꙋ́вше , и҆ на́ росꙋ ѻ҆́гнь прело́жше вопїѧ́хꙋ , бл҃гослове́нъ є҆сѝ гдⷭ҇и бж҃е во́ вѣки . Свѣ́тъ ꙗ҆ви́лъ є҆сѝ ще́дре , а҆́нг҃лъ твои́хъ невеще́ственое сꙋщество̀ , неи҆зрече́ннагѡ свѣ́та и҆сполнѧ́емы , непреста́ннѡ зовꙋ́ща , бл҃гослове́нъ є҆сѝ гдⷭ҇и бж҃е во́ вѣки . Є҆мꙋ́же пред̾стоѧ́тъ непреста́ннѡ , слꙋжа́ще , тмы̀ а҆́нг҃льскїѧ , лица́ же зрѣ́ти нетерпѧ́тъ бжⷭ҇тва̀ , блгⷭ҇ве́нъ є҆сѝ зовꙋ́ще бж҃е во́ вѣки . Сло́вомъ твои́мъ и҆поста́снымъ гдⷭ҇и , а҆́нг҃льское є҆стество̀ содѣ́лалъ є҆сѝ . ѡ҆ст҃и́въ же бжⷭ҇твенымъ дх҃омъ , трⷪ҇цꙋ тѧ бг҃осло́вѧще пѣ́ти , бл҃гослове́нъ є҆сѝ гдⷭ҇и бж҃е во́ вѣки . трⷪ҇ченъ . Трѝ оу҆́бѡ зрѧ́ще сꙋ́ща соста́вы , неѡ҆пи́санное сла́вимъ сꙋщество̀ , ѻ҆ц҃а и҆ сло́ва с̾ дх҃омъ , вопїю́ще , бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ .

и҆́нъ , і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и оу҆би́въ , ꙗ҆́же без̾ пра́вды пра́ведныѧ оу҆ловлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гослове́нъ є҆сѝ . Оу҆смотри́въ данїи́лъ , ви́дѣ стоѧ́ща тѧ̀ бл҃же́нне , и҆ оу҆мꙋдрѧ́юща тогѡ̀ въ хѡва́рѣ , видѣ́нїемъ є҆́же ви́дѣ гаврїи́ле молнїезра́чне , миха́ила чинонача́льника томꙋ̀ ꙗ҆влѧ́юща , и҆́же ра́дꙋисѧ дв҃цѣ свѣ́тлѡ возопи́лъ є҆сѝ . И҆́же а҆́нг҃лѡмъ наста́вники , бг҃ови́дныѧ и҆ свѣтоно́сныѧ , миха́ила и҆ гаврїи́ла , на́ша бл҃гі́ѧ застꙋ́пники , и҆ пред̾ста́тели , и҆ храни́тели восхва́лимъ вѣ́рою велегла́снѡ . сла́ва . Красе́нъ и҆ бл҃голѣ́пенъ и҆ бг҃ови́денъ сы́и , во́ждь па́че оу҆ма̀ невеще́ственыхъ , дх҃о́въ бы́лъ є҆сѝ , миха́иле свѣтоза́рнѣ , с̾ ни́ми оу҆́бѡ ѡ҆ всѣ́хъ на́съ помоли́сѧ . и҆ ны́нѣ , боⷢ҇ . Оу҆ма̀ вели́кагѡ вои́стинꙋ , сло́во прⷭ҇нѡсꙋ́щное дв҃о , в̾ тѧ неи҆згл҃анно и҆ стра́шнѡ все́льшасѧ ви́дѣ возопѝ , гаврїи́лъ а҆рха́нг҃лъ . ра́дꙋисѧ , прⷭ҇то́лѣ вы́шнѧгѡ бл҃гослове́ннаѧ .

катава́сїѧ : Непослꙋжи́ша тва́ри .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пою́тъ вѡ́и а҆́нг҃льстїи . хвали́те и҆ превозноси́те є҆гѡ̀ во́ вѣки . Сопроти́вныхъ раз̾жже́ныѧ и҆ пламенови́дныѧ на на́съ оу҆гасѝ стрѣ́лы , ꙗ҆́кѡ да пое́мъ тѧ чⷭ҇таѧ во́ вѣки . Па́че є҆стества̀ содѣ́телѧ и҆ сп҃са , бг҃а сло́ва родила̀ є҆сѝ дв҃о . є҆го́же превозно́симъ во всѧ̀ вѣ́ки . Свѣ́тлꙋю тѧ̀ и҆ златоза́рнꙋю показа̀ свѣщꙋ̀ ми́рꙋ , в̾сели́выисѧ в̾ тѧ̀ свѣ́тъ непристꙋ́пныи , дв҃о чⷭ҇таѧ , тѣ́мже тѧ пое́мъ во́ вѣки всѧ̀ .

и҆́нъ , і҆рмо́съ . Проѧвле́ннагѡ на горѣ̀ ст҃ѣ́й , и҆ въ кꙋпинѣ̀ ѻ҆́гненнѣй , дв҃ческꙋю мѡѷсе́ѡви та́йнꙋ ꙗ҆́вльшагѡ , гдⷭ҇а по́йте и҆ превозноси́те є҆гѡ̀ во́ вѣки . А҆́нг҃льскомꙋ поревнꙋ́емъ житїю̀ , и҆ ра́зꙋмъ впери́мъ къ высотѣ̀ , и҆ с̾ ни́ми невеще́ственѡ воспое́мъ гдⷭ҇а , и҆ превозно́симъ во́ вѣки . Лико́вственицы ли́ка нбⷭ҇нагѡ , и҆́же прⷭ҇то́лъ ѡ҆бстоѧ́ще сла́вы , ѡ҆́ бз҃ѣ всегда̀ ѡ҆браща́еми а҆́нг҃ли , пою́тъ и҆ славосло́вѧтъ во всѧ̀ вѣ́ки . Невеще́ствена ѻ҆гнѧ̀ творѧ́щей пла́мы , на высотѣ̀ непреста́ннѡ слꙋжа́щихъ , и҆ а҆́нг҃лы дх҃и ꙗ҆влѧ́ющей , трⷪ҇цѣ покланѧ́емсѧ , и҆ славосло́вимъ во всѧ̀ вѣ́ки . боⷢ҇ . И҆́же во оу҆тро́бꙋ все́льшасѧ дв҃ыѧ , и҆ ѿ сеѧ̀ стра́шнѡ и҆ вы́ше сло́ва , дре́внѧгѡ а҆да́ма назда́вша гдⷭ҇а , пое́мъ и҆ славосло́вимъ во́ вѣки .

и҆́нъ , і҆рмо́съ . И҆зба́вителю всѣ́хъ всеси́льне , посредѣ̀ пла́мене бл҃гоче́ствовавшїѧ сше́дъ ѡ҆роси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гослови́те гдⷭ҇нѧ гдⷭ҇а . Мы́сленыхъ беспло́тныхъ чинонача́льникъ , мл҃твеникъ чл҃кѡмъ спаси́теленъ бжⷭ҇твенъ , бж҃їи слꙋжи́тель , миха́иле показа́сѧ . поѧ̀ непреста́ннѡ , бл҃гослови́те гдⷭ҇а , и҆ превозноси́те є҆гѡ̀ во́ вѣки . Свѣти́льника два̀ всесвѣ́тлаѧ , миха́иле и҆ гаврїи́ле а҆рхистрати́зи , трисвѣ́тлагѡ бжⷭ҇тва̀ сїѧ́ньми , тва́рь просвѣща́юща , лю́тыхъ мглꙋ̀ ѿгонѧ́ете . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ꙗ҆́кѡ до́брїи ѡ҆корми́тели а҆рха́нг҃ли ко приста́нищꙋ бжⷭ҇твеныѧ во́ли , дш҃е́вныи кора́бль мо́й спаса́йте , ѿ бꙋ́ри согрѣше́нїи , па́дшїи и҆ потоплѧ́ющїисѧ . и҆ ны́нѣ , боⷢ҇ . Ꙗ҆́кѡ жени́хъ ѡ҆дѣ́ѧнъ бжⷭ҇твеныи а҆рха́нг҃лъ пред̾ста́въ , приглаша́ше тѝ , ра́дꙋисѧ невѣ́сто бж҃їѧ без̾невѣ́стнаѧ , а҆́нг҃лѡмъ сла́во , и҆ чл҃кѡмъ спасе́нїе и҆ ѡ҆гражде́нїе . катава́сїѧ : Хва́лимъ бл҃гослови́мъ . Ѻ҆́троки бл҃гочести́выѧ .

пѣ́снь , ѳ҃ . і҆рмо́съ . Вои́стинꙋ бцⷣꙋ тѧ̀ и҆сповѣ́ дающе , спасе́ннїи тобо́ю дв҃це чⷭ҇таѧ , с̾ нбⷭ҇ными вѡ́и тѧ̀ велича́емъ . Ра́дости и҆ весе́лїѧ и҆спо́лнь є҆́сть па́мѧть твоѧ̀ , приходѧ́щимъ и҆сцѣле́нїѧ точа́щи , и҆́же бл҃гоче́стнѡ бцⷣꙋ тѧ̀ воз̾вѣща́ющимъ . Ѱалмы̀ воспѣва́емъ тѧ̀ ѡ҆бра́дованнаѧ , и҆ немо́лчнѡ ти є҆́же ра́дꙋисѧ вопїе́мъ , ты́ бо и҆сточи́ла є҆сѝ всѣ́мъ ра́дость . Красе́нъ бцⷣе прорастѐ пло́дъ тво́й , не тлѧ́ бо причаща́ющимсѧ , но хода́тай жи́зни , ꙗ҆́же вѣ́рою тѧ̀ велича́ющимъ .

и҆́нъ , і҆рмо́съ . Оу҆ста́въ пре́йде є҆стества̀ , содѣ́телѧ заче́нши тва́ри , и҆ две́рь спасе́нїѧ ми́рови бы́сть , тѣ́мъ тѧ̀ бцⷣе непреста́ннѡ велича́емъ . Тѧ̀ неи҆зрече́ннѡ совокꙋпи́вшаго нбⷭ҇нымъ хрⷭ҇тѐ земна́ѧ , и҆ є҆ди́нꙋ цр҃ковь соверши́вша а҆́нг҃лѡмъ и҆ чл҃кѡмъ , непреста́ннѡ велича́емъ . А҆́нг҃ли и҆ а҆рха́нг҃ли , прⷭ҇то́ли , вла́сти же и҆ гдⷭ҇ьствїѧ , нача́ла и҆ си́лы , херꙋви́ми и҆ серафи́ми , съ бцⷣею ѡ҆ ми́рѣ моли́тесѧ . трⷪ҇ченъ . Тѧ̀ трⷪ҇це сла́вимъ , ꙗ҆́же ѿ небы́тїѧ всѧ̀ сотвори́вшꙋю , и҆ чи́ны а҆́нг҃льскїѧ оу҆краси́вшꙋ , и҆ бжⷭ҇твеными зарѧ́ми просвѣти́вшꙋ концы̀ . боⷢ҇ . Ра́дꙋисѧ ст҃а́ѧ бг҃оневѣ́сто , ра́дꙋисѧ свѣ́тъ ми́рови ро́ждьши вѣ́рнымъ . ра́дꙋисѧ стѣно̀ и҆ покро́ве всѣ́хъ на́съ . бг҃а ꙗ҆́кѡ бл҃года́телѧ , за ны̀ непреста́ннѡ молѝ .

и҆́нъ , і҆рмо́съ . Є҆́вва оу҆́бѡ недꙋ́гомъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прозѧбе́нїемъ прижи́тїѧ твоегѡ̀ , ми́рови бл҃гослове́нїе процвѣла̀ є҆сѝ . тѣ́мъ тѧ̀ всѝ велича́емъ . Сѐ бл҃голѣ́пїе твоегѡ̀ а҆рха́нг҃ле , бжⷭ҇твенагѡ хра́ма сїѧ́ющи , свѣтоза́рнымъ тѝ прише́ствїемъ , чꙋде́съ мо́лнїѧ и҆спꙋща́етъ . и҆ тмꙋ̀ недꙋ́гомъ всегда̀ ѿгонѧ́етъ бжⷭ҇твеною бл҃года́тїю . Ꙗ҆́кѡ красе́нъ сꙋпрꙋ́гъ , и҆ лѣ́потенъ сꙋ́ще , влады́чнѧ повелѣ́нїѧ , сꙋ́щимъ на землѝ слꙋ́жите а҆́нг҃ли , ѿ лю́тъ и҆зима́юще , и҆ всѣ́мъ просвѣще́нїе посыла́юще спаси́тельно , бжⷭ҇твенымъ дх҃омъ . Дне́сь ра́дꙋетсѧ с̾ на́ми , беспло́тнїи бжⷭ҇твенїи оу҆́ми , воспѣва́ема ви́дѧще сегѡ̀ ѿ всѣ́хъ , вели́каго и҆ свѣ́тлаго а҆ртистрати́га . и҆ любо́вїю с̾ на́ми пра́зднꙋютъ , жизнода́вца велича́юще . сла́ва . Бжⷭ҇твенаѧ дво́ице и҆ свѣтоза́рнаѧ , а҆рха́нг҃ли , миха́иле всече́стне , и҆ гаврїи́ле препросла́влене . трⷪ҇цѣ честнѣ́й пред̾стоѧ́ще , прегрѣше́нїи ѡ҆держа́нїѧ и҆ ѡ҆ѕлоблѣ́нїѧ , хва́лѧщїѧ ва́съ и҆зба́вите . и҆ ны́нѣ , боⷢ҇ . Гла́съ тѝ бжⷭ҇твенагѡ гаврїи́ла , прино́симъ ра́достнѡ , и҆ взыва́емъ . ра́дꙋисѧ раю̀ , дре́во посредѣ̀ живо́тное и҆мы́и пречⷭ҇таѧ , пресла́внаѧ сло́вꙋ пола́то . ра́дꙋисѧ дв҃о всенепоро́чнаѧ .

катава́сїѧ : Всѧ́къ зе́менъ .= Досто́йнѡ є҆́сть . свѣти́ленъ . Ѻ҆́гненымъ а҆рхистрати́же слꙋга́мъ пред̾ста́тельство ѿ ѻ҆ц҃а прїѧ́лъ є҆сѝ миха́иле свѣ́томъ , тѣ́мъ и҆ сїѧ́нїе тогѡ̀ сла́вы сїѧ́юще и҆́маши . ѡ҆́крестъ пречⷭ҇тна́гѡ престо́ла ты̀ пред̾стоѧ̀ ꙗ҆́кѡ пе́рвыи невеще́ственымъ чино́мъ . =сла́ва , и҆ ны́нѣ , боⷢ҇ . Почита́ютъ прижи́тїе твоѐ беспло́тныхъ чи́нове . ра́дости бо земны́хъ ты̀ и҆спо́лнила є҆сѝ є҆ди́на . тѣ́мъ тѧ всенепоро́чнꙋю вѣ́рнїи сла́вимъ пѣ́сньми славосло́вѧще . свѣ́тъ бо сꙋ́щимъ во тмѣ̀ восїѧ́ла є҆сѝ , ꙗ҆́кѡ оу҆́тро .

На хвали́тѣхъ , стихѣ́ры , на́ ѕ҃ . гла́съ , в҃ . Невеще́ственыи прⷭ҇то́лъ ѡ҆крꙋжа́юще , оу҆́мнаѧ сꙋ́щества бжⷭ҇твенїи а҆́нг҃ли , трист҃ꙋ́ю пѣ́снь смотри́телю бг҃ꙋ ѻ҆́гнеными оу҆стна́ми пою́тъ , ст҃ы́и бж҃е ѻ҆́ч҃е без̾нача́льныи , ст҃ы́и крѣ́пкїи сы́не собез̾нача́льныи , ст҃ы́и без̾сме́ртныи є҆диносꙋ́щныи дш҃е , и҆́же со ѻ҆ц҃е́мъ и҆ съ сн҃омъ с̾прославлѧ́емыи . вⷤ . Беспло́тными оу҆стна́ми и҆ сщ҃е́нными оу҆сты̀ , а҆́нг҃льстїи чи́ни непреста́ннѡ пѣ́нїе прино́сѧтъ , твоемꙋ̀ неприкоснове́нномꙋ бжⷭ҇твꙋ̀ гдⷭ҇и . и҆ оу҆́ми чи́стїи , и҆ слꙋжи́тели твоеѧ̀ сла́вы хва́лѧтъ тѧ̀ гдⷭ҇и . с̾ ни́ми же миха́илъ а҆рха́нг҃лъ и҆ первостоѧ́тель вы́шнимъ си́ламъ , чинонача́льникъ а҆́нг҃лѡмъ пи́рникъ дне́сь на́мъ бы́сть , пѣ́нїѧ и҆ пѣ́сни повелѣва́ѧ на́мъ пѣ́ти , неприкоснове́ннѣй тѝ сла́вѣ чл҃колю́бче . да мо́лимсѧ непреста́ннѡ ѡ҆ дꙋша́хъ на́шихъ .= гла́съ , д҃ . Ѻ҆́=гнеными оу҆стна́ми , пою́тъ тѧ̀ херꙋви́ми хрⷭ҇тѐ бж҃е . беспло́тными же оу҆сты̀ , немо́лчнѡ славосло́витъ тѧ̀ а҆рха́нг҃льскїи ли́къ . миха́илъ же а҆рхистрати́гъ вы́шнихъ си́лъ , побѣ́днꙋю пѣ́снь непреста́ннѡ прино́ситъ сла́вѣ твое́й . то́й бо на́съ дне́сь ѡ҆зарѝ к̾ торжествꙋ̀ свѣ́тлꙋ , плеска́ти досто́йнѡ ѱало́мски , хвалꙋ̀ трист҃ꙋ́ю бре́нными оу҆стна́ми . ꙗ҆́кѡ всѧ̀ твоегѡ̀ хвале́нїѧ и҆спо́лнишасѧ , и҆ подае́ши ми́рови тѣ́хъ ра́ди ве́лїю ми́лость . И҆́же сл҃нчными лꙋча́ми бжⷭ҇твенагѡ свѣ́та , просвѣща́еми а҆рхистрати́зи , невеще́ственыхъ ѡ҆зарѧ́ете чинонача́лїѧ . ꙗ҆́кѡ свѣ́тъ бѣлоѡ҆бразꙋ́юще въ вы́шнихъ , ѻ҆́гнь ѡ҆блиста́ете въ ми́рѣ неприкоснове́ннагѡ бжⷭ҇тва̀ . тѣ́мъ и҆ трист҃ꙋ́ю пѣ́снь пла́менными оу҆стна́ми , немо́лчнѡ пое́те , ст҃ъ ст҃ъ ст҃ъ є҆сѝ , бж҃е на́шъ сла́ва тебѣ̀ .

гла́съ , ѕ҃ . А҆́нг҃ли твоѝ хрⷭ҇тѐ , прⷭ҇то́лꙋ вели́чествїѧ со́ страхомъ пред̾стоѧ́тъ , и҆ твое́ю свѣ́тлостїю при́снѡ просвѣща́еми , в̾ вы́шнихъ пѣвцы̀ и҆ свѣ́тꙋ твоемꙋ̀ слꙋжи́тели , ѿ тебѐ посыла́еми , подаю́тъ свѣ́тъ дш҃а́мъ на́шимъ . сла́ва . гла́съ , є҃ . И҆дѣ́же ѡ҆сѣнѧ́етъ бл҃года́ть твоѧ̀ а҆рха́нг҃ле , ѿ тꙋ́дꙋ дїа́волѧ прого́нитсѧ си́ла , нетерпи́тъ бо свѣ́та твоегѡ̀ ви́дѣти спады́и денни́ца . тѣ́мъ мо́лимъ тѧ , ѻ҆́гненыѧ є҆гѡ̀ стрѣ́лы ꙗ҆́же на на́съ дви́жимыѧ оу҆гасѝ , хода́тайствомъ твои́мъ , и҆збавлѧ́ѧ на́съ ѿ собла́знъ є҆гѡ̀ , достохва́льне миха́иле а҆рхистрати́же . и҆ ны́нѣ , боⷢ҇ . дневны́и . Славосло́вїе вели́кое , и҆ ѿпꙋ́стъ .

На литꙋргі́и , бл҃же́нна , на и҃ . пѣ́снь , г҃ , и҆ ѕ҃ ѧ .

проки́менъ , ѱл҃о́мъ дв҃довъ . творѧ́и а҆́нг҃лы своѧ̀ дꙋ́хи , и҆ слꙋгѝ своѧ̀ ѻ҆́гнь палѧ́щь . сти́хъ . бл҃гословѝ дш҃е моѧ̀ гдⷭ҇а , гдⷭ҇и бж҃е мо́й воз̾вели́чилсѧ є҆сѝ ѕѣлѡ̀ . а҆пⷭ҇лъ , къ є҆вре́ѡмъ . зача́ло , т҃є . а҆ллилꙋ́їѧ . хвали́те гдⷭ҇а всѝ а҆́нг҃ли є҆гѡ̀ , хвали́те є҆гѡ̀ всѧ̀ си́лы є҆гѡ̀ . сти́хъ . ꙗ҆́кѡ то́й речѐ , и҆ бы́ша , то́й повелѣ̀ , и҆ созда́шасѧ . є҆ѵⷢ҇а́лїе , ѿ =лꙋкѝ . заⷱ҇ , н҃а . прича́стенъ . т=ворѧ́и а҆́нг҃лы своѧ̀ дꙋ́хи , и҆ слꙋгѝ своѧ̀ ѻ҆́гнь палѧ́щь .