9 ноября: свв. мчч. Онисифора и Порфирия и прп. Матроны

МЦⷭ҇А ТОГО́ЖЕ ВЪ Ѳ҃ ДН҃Ь

ст҃ы́хъ мч҃нкъ ѻ҆ниси́фора , и҆ порфи́рїѧ . =и҆ прпⷣбныѧ мт҃ри на́шеѧ матро́ны . и҆ прпⷣбныѧ ѳеѡкти́сты , лезви́льнины . Ве́черъ , на гдⷭ҇и возва́хъ , стихѣ́ры . гла́съ , д҃ . поⷣ . ꙗ҆́=кѡ до́блѧ . Страстна́ѧ и҆гра́нїѧ ,꙳ по́стными по́двиги ,꙳ дш҃и любоче́стнѣ покори́ла є҆сѝ .꙳ и҆ хрⷭ҇то́ви послѣ́довала є҆сѝ .꙳ и҆ посредѣ̀ по́стникъ всели́сѧ всеговѣ́йнѡ ѽ матро́но ,꙳ оу҆гаша́ющи распале́нїѧ сластна́ѧ ,꙳ бжⷭ҇твеными тꙋ́чами сле́зъ .꙳ и҆ ѕѣ́льнѣйше жела́нїе ,꙳ к̾ зижди́телю воз̾жига́ющи . Сщ҃е́нное жили́ще ,꙳ во мно́гихъ по́льзꙋ бг҃ови воз̾дви́же .꙳ бы́вши цр҃кви дх҃ꙋ всемꙋ́драѧ ,꙳ чистото́ю дш҃е́вною .꙳ и҆ наста́вила є҆сѝ дш҃а къ поле́знымъ ,꙳ по́двигомъ по́стнымъ ,꙳ и҆ принесѐ сїѧ̀ спасе́ны ,꙳ ѽ матро́но влⷣцѣ .꙳ с̾ ни́ми же вѣ́рою тѧ̀ почита́емъ . Ѻ҆трокови́цы воз̾люби́вше ,꙳ невѣ́стника и҆ гдⷭ҇а ,꙳ оу҆че́нїю твоемꙋ̀ покорѧ́ющесѧ .꙳ и҆ плотьскꙋ́ю презрѣ́вше сла́бость ѡ҆́ дс҃ѣ .꙳ оу҆се́рдїемъ стра́сти ꙳ бл҃гоче́стнѡ оу҆держа́ша ,꙳ и҆ в̾ведо́шасѧ с̾ тобо́ю ѽ матро́но ,꙳ в̾ черто́гъ нбⷭ҇ныи бжⷭ҇твеныи ,꙳ всегда̀ веселѧ́щесѧ .

и҆́ны , стихѣ́ры , мч҃нкѡмъ . гла́съ , и҃ . поⷣ . ѽ =пресла́вное чꙋ́до . Мч҃нче страда́льче ,꙳ бл҃же́нне ѻ҆ниси́форе ,꙳ хрⷭ҇та̀ бг҃а и҆сповѣ́далъ є҆сѝ ,꙳ стражда̀ крѣпча́йше ,꙳ без̾зако́ннꙋющихъ пред̾ сꙋди́щемъ ,꙳ ра́ны ꙗ҆звле́нїѧ претерпѣ́въ ,꙳ и҆ пожже́нїе всегѡ̀ тѣлесѐ .꙳ тѣ́мже вѣнча́сѧ побѣ́днымъ вѣнце́мъ ,꙳ живонача́льнѣйшею рꙋко́ю всехва́льне . Мч҃нче страда́льче порфи́рїе ,꙳ кро́внымъ ѡ҆багре́нїемъ ,꙳ себѣ̀ пома́залъ є҆сѝ ,꙳ препрꙋ́дꙋ бл҃года́ти и҆ си́лы дх҃а .꙳ в̾ ню́же ѡ҆дѣ́ѧвсѧ ,꙳ ꙗ҆ви́сѧ свѣтлѣ́йши .꙳ с̾ца́рствꙋѧ црⷭ҇твꙋющемꙋ ,꙳ є҆ди́номꙋ бг҃ꙋ на́шемꙋ во́ вѣки сла́вне .꙳ є҆го́же прилѣ́жнѡ всегда̀ молѝ спастѝ всѣ́хъ на́съ . Мч҃нцы достосла́внїи ,꙳ за всѣ́хъ живота̀ ,꙳ сщ҃е́ннѡ оу҆мерщвлѧ́еми .꙳ на сковрадѣ̀ ра́дꙋющесѧ ,꙳ раз̾жже́нѣ простро́стесѧ ,꙳ и҆ привѧ́зани ко́ньми влачи́ми ,꙳ бл҃же́нныи коне́цъ прїѧ́сте .꙳ тѣ́мъ сла́вими є҆стѐ со хрⷭ҇то́мъ бл҃же́ннїи ,꙳ ѡ҆ на́съ всегда̀ молѧ́щесѧ бл҃же́ннѣйше . =сла́ва , и҆ ны́нѣ , боⷢ҇ . Ра́дꙋисѧ дш҃а́мъ просвѣще́нїе , согрѣша́ющимъ проще́нїе , неради́вымъ и҆справле́нїе . ра́дꙋисѧ оу҆тѣше́нїе и҆ ра́дость , скорбѧ́щимъ помо́щнице . ра́дꙋисѧ бл҃га́ѧ , немощны́хъ дш҃ъ и҆сцѣле́нїе . ра́дꙋисѧ примире́нїе къ бг҃ꙋ и҆ хода́таице . серафи́мъ всѣ́хъ ꙗ҆́кѡ сꙋ́щи ст҃ѣ́йши чⷭ҇таѧ . крⷭ҇тобоⷢ҇ . Тѧ̀ пригвожда́ема ви́дѧщи на крⷭ҇тѣ̀ і҆с҃е , и҆ стрⷭ҇ти прїе́млюща во́лею влⷣко , дв҃аѧ мт҃и твоѧ̀ , оу҆вы̀ мнѣ̀ вопїѧ́ше , ча́до сла́дкое , ра́ны без̾ пра́вды ка́кѡ терпи́ши , врачꙋ̀ и҆сцѣли́выи чл҃кѡмъ не́мощь , и҆ ѿ тлѝ всѣ́хъ и҆зба́вивыи милосе́рдїемъ свои́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . тропа́рь . гла́съ , и҃ . Ѻ҆ тебѣ̀ мт҃и матро́но , и҆звѣ́стенъ бы́сть спасе́нїѧ ѻ҆́бразъ . воспрїе́мши бо крⷭ҇тъ послѣ́довала є҆сѝ хрⷭ҇тꙋ̀ . творѧ́щи же и҆ оу҆ча́ше , є҆́же презрѣ́ти пло́ть , прехо́дитъ бо , прилѣжа́ти же ѡ҆ дш҃и , ве́щи без̾сме́ртнѣй . тѣ́мже и҆ со а҆́нг҃лы ра́дꙋетсѧ прпⷣбнаѧ дх҃ъ тво́й . сла́ва , мч҃нкѡмъ . гла́съ , д҃ . Мч҃нцы твоѝ гдⷭ҇и во страда́нїихъ свои́хъ вѣнцы̀ прїѧ́ша нетлѣ́нныѧ ѿ тебѐ бг҃а на́шегѡ . и҆мꙋ́ще бо крѣ́пость твою̀ непобѣди́мꙋю , мꙋ́чащихъ оу҆праз̾дни́ша , и҆ разрꙋши́ша бѣсо́мъ немощна́ѧ шата́нїѧ . тѣ́хъ мл҃твами хрⷭ҇тѐ бж҃е спасѝ дш҃а на́ша .

и҆ ны́нѣ , боⷢ҇ . и҆лѝ , крⷭ҇тобоⷢ҇ .

Прпⷣбнѣй ѳеѡкти́стѣ пое́тсѧ на па́вечерницѣ . кано́нъ , гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ ходи́въ і҆и҃ль , по бе́зднѣ стопа́ми , гони́телѧ фараѡ́на , ви́дѧ потоплѧ́ема , бг҃ꙋ побѣ́днꙋю пѣ́снь пое́мъ вопїѧ́ше .

запѣ́в̾ : Прпⷣбнаѧ мт҃и ѳеѡкти́сто , молѝ бг҃а ѡ҆ на́съ .= Ꙗ҆́кѡ чꙋдна̀ твоѧ̀ жи́знь и҆ житїѐ , а҆́нг҃лѡмъ каса́ющисѧ невеще́ственымъ , но́вымъ и҆ не ѡ҆бы́чнымъ нра́вомъ , тѣсното́ю па́че є҆стества̀ ѳеѡкти́сто , жи́тельства твоегѡ̀ . =Ѿ младе́нства мирскꙋ́ю пи́щꙋ ѿ ню́дъ воз̾ненави́дѣла є҆сѝ , и҆ плотьскꙋ́ю сла́сть . по́стъ воз̾люби́вши , и҆́мже ѡ҆бꙋзда́ла є҆сѝ стремле́нїѧ всѧ̀ тѣле́снаѧ . сла́ва . Бл҃гꙋ́ю зе́млю дш҃и твоеѧ̀ , в̾ мла́дости неѕло́бїѧ , ѡ҆брѣ́те сѣ́ѧтель бл҃ги́мъ , и҆ вложѝ сѣ́мѧ жи́зни , собра̀ пло́дъ стори́чествꙋющїи . и҆ ны́нѣ , боⷢ҇ . Тѧ̀ пречⷭ҇тꙋю ѻ҆трокови́цꙋ , и҆ вѣ́рнымъ крѣ́пкое застꙋпле́нїе , ѳеѡкти́ста ѿ дш҃и и҆з̾ дѣ́тска воз̾люби́вши . всѣ́мъ добродѣ́телемъ па́че є҆стества̀ прїѧ́телище бы́сть .

пѣ́снь , г҃ . і҆рмо́съ . Нѣ́сть ст҃а ꙗ҆́коже ты̀ , гдⷭ҇и бж҃е мо́й , вознесы́и ро́гъ вѣ́рныхъ си бл҃же , и҆ оу҆тве́рждь и҆́хъ на ка́мени и҆сповѣ́данїѧ тѝ . Не оу҆таи́сѧ лꙋка́вагѡ , бг҃оꙋго́днѣ живꙋ́щи . сегѡ̀ ра́ди содѣва́етъ на плещѝ твоѝ ѕла́ѧ . и҆ мно́жество а҆ра́влѧнъ наво́дитъ ле́звѣ , ѻ҆те́чествꙋ твоемꙋ̀ . Плѣне́нꙋ тѧ̀ врагѝ пра́ведныхъ вра́гъ преда́ти тщи́тсѧ . но бли́зъ и҆зба́витель , и҆́же а҆́бїе ѿ ме́рзскихъ и҆схи́тивъ , чи́стꙋ себѣ̀ соблюдѐ . сла́ва . Въ па́трѣ ѻ҆́стровѣ враго́въ и҆збѣ́гши рꙋкѝ , и҆зво́ли и҆́ночествовати , ꙗ҆́кѡ пти́ца в̾ не́мъ . и҆ в̾ тꙋ̀ сꙋ́щемъ хра́мѣ прⷭ҇нѡ дв҃ыѧ бг҃омт҃ре , ꙗ҆́кѡ слꙋже́бница пребыва́ющи всегда̀ . и҆ ны́нѣ , боⷢ҇ . Всѐ оу҆пова́нїе натѧ̀ ѳеѡкти́ста воз̾ложи́вши , мт҃и дв҃о ѻ҆трокови́це . и҆ тѧ̀ покро́въ и҆ пи́щꙋ и҆ питїѐ , и҆ крѣ́пкое застꙋпле́нїе в̾ лю́тыхъ стѧжа̀ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃олѣ́пнѡ зове́тъ вопїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Та́й ѿше́дши внꙋ́тренѧѧ и҆ веще́ственыѧ ѻ҆́строва , ви́димыхъ враго́въ и҆збѣжѐ . неви́димыхъ же ѕѣ́льна приложи́сѧ тѝ ра́ть . Кто̀ воз̾мо́жетъ твоѧ̀ прпⷣбнаѧ ѿ ню́дъ и҆зрещѝ по́двиги , и҆́хже и҆мѣ́ла є҆сѝ къ нача́льникѡмъ тмѣ̀ стра́ждꙋщи . и҆́хже и҆ стрѣ́лы пла́менны , и҆ словеса̀ неꙋдо́бь пости́жима . сла́ва . Ѻ҆ и҆́же хранѧ́щїѧ тѧ̀ бжⷭ҇твеныѧ бл҃года́ти , ка́кѡ и҆ є҆ди́на и҆ млада̀ , разꙋ́мныхъ є҆ѳїѡ́плѧнъ ѡ҆полче́нїе , в̾ же́нстѣмъ є҆стествѣ̀ побѣди́вши посрами́ла є҆сѝ . и҆ ны́нѣ , боⷢ҇ . Соверше́нымъ ра́зꙋмомъ , во ю҆́ности тѣлесѐ ѳеѡкти́ста пожи́вши . к̾ твое́й мт҃ри бж҃е оу҆твердѝ всѐ оу҆пова́нїе своѐ , и҆ приспѣ̀ въ ста́рость до́брꙋю .

пѣ́снь , є҃ . і҆рмо́съ . Бж҃їимъ свѣ́томъ тѝ бл҃же , оу҆́тренюющихъ тѝ дш҃а любо́вїю , просвѣтѝ молю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Оу҆́мъ возвы́сивши к̾ бг҃ꙋ , всѧ̀ пре́йде жела́емаѧ паде́нїи и҆ нꙋ́жнаѧ тѣлесѐ . тѣ́мъ ни гла́дъ тѧ̀ ни жа́жда сла́внаѧ , ни мра́зъ ни нагота̀ ни зно́й побѣдѝ . Стра́нное твоѐ житїѐ вра́гъ ви́дѧ , ꙗ҆рѧ́сѧ за́вистїю , смꙋща́ѧ тѧ и҆ и҆скꙋша́ѧ козньмѝ всѧ́кими , но не возмо́же запѧ́ти , непорочны́ѧ стопы̀ твоѧ̀ . сла́ва . Стрѣ́лы младе́нецъ , лꙋка́вагѡ всѧ́ко приложе́нїе вмѣни́вши . невозвра́тнѡ соверши́ла є҆сѝ , но́вое поще́нїѧ твоегѡ̀ ѡ҆бхожде́нїе . и҆ посрамѝ сегѡ̀ тще́е шата́нїе . и҆ ны́нѣ , боⷢ҇ . Ꙗ҆́кѡ бл҃же́ннаѧ в̾ жена́хъ , тѧ̀ пребл҃же́ннаѧ бцⷣе разꙋ́мное застꙋпле́нїе себѣ̀ положѝ . ѡ҆ тебѣ̀ сотво́рши си́лꙋ , ѡ҆скорблѧ́ющїѧ оу҆ничижѝ .

пѣ́снь , ѕ҃ . і҆рмо́съ . Жите́йскагѡ мо́рѧ воз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вопїю́ ти , воз̾ведѝ ѿ тлѝ живо́тъ мо́й многомлⷭ҇тиве . Оу҆ста́вы є҆сте́ственыѧ превзы́де , кромѣ̀ потре́бныхъ жи́вшихъ . тѣ́мъ ꙗ҆́кѡ прикаса́ющисѧ во́ плоти , без̾веще́ствена пребыва́ше . и҆́мже хотѧ́ше сꙋ́щихъ , неви́димыхъ . Проꙋвѣ́дѣ дх҃омъ ст҃ы́мъ свою̀ кончи́нꙋ прибли́жшꙋсѧ . тѣ́мъ и҆ ви́дѣна бы́сть ловцꙋ̀ , бг҃ꙋ бл҃говоли́вшꙋ . ꙗ҆́кѡ да не оу҆таи́тсѧ твоѐ житїѐ странноѡ҆бра́зное . сла́ва . Ꙗ҆́кѡ ви́дѣ тѧ̀ прпⷣбнаѧ въ цр҃кви лове́цъ , зра́къ земле́нъ и҆мꙋ́щꙋ кромѣ̀ пло́ти и҆ кро́ви , оу҆ди́вльсѧ мечта́нїе зрѣ́ти мнѧ́ше , в̾ толи́кѡ и҆ста́ѧвшꙋ ѽ чꙋдесѝ . и҆ ны́нѣ , боⷢ҇ . Пречⷭ҇таѧ влⷣчце не ѿри́ни менѐ , лю́тыѧ нечистоты̀ по́лна сꙋ́ща . но млⷭ҇тива бꙋ́ди ми , и҆ оу҆вѣ́тлива , прїимѝ приносѧ́щаго твоеѧ̀ ѳеѡкти́сты в̾ моли́твꙋ моле́нїѧ .

сѣда́ленъ . гла́съ , а҃ . И҆́з̾ млада бг҃ови ѳеѡкти́сто вдана̀ бы́вши , ꙗ҆́кѡ зда́нїе бл҃го́е , и҆ созда́вшемꙋ подо́бнѡ . оу҆се́рднѡ и҆́го є҆гѡ̀ бл҃го́е ѿ ю҆́ности взе́мши , не вкꙋсѝ мѧте́жа жите́йскагѡ , хранѧ́щи всѧ̀ чꙋ́вства . тѣ́мъ ꙗ҆́кѡ беспло́тна , стра́ннѡ на землѝ жи́тельствова . сла́ва , и҆ ны́нѣ , боⷢ҇ . Без̾невѣ́стнаѧ чи́стаѧ бцⷣе дв҃о , є҆҆ди́на вѣ́рнымъ пред̾ста́тельнице и҆ покро́ве , ѿ бѣ́дъ и҆ скорбе́й и҆ лю́тыхъ ѡ҆бстоѧ́нїи всѣ́хъ и҆зба́ви , и҆́же на тѧ̀ наде́жꙋ ѻ҆трокови́це и҆мꙋ́щихъ . и҆ дш҃а на́ша спасѝ , бжⷭ҇твеными мл҃твами свои́ми . крⷭ҇тобоⷢ҇ . Нескве́рнаѧ а҆́гница , а҆́гньца и҆ па́стырѧ ви́сѧща ме́ртва на́ древѣ зрѧ́щи , рыда́ющи вѣща́ше , мт҃рьски восклица́ющи ; ка́кѡ претерплю̀ твоѐ є҆́же па́че сло́ва сн҃е мо́й сни́тїе , и҆ во́льныѧ стра́сти , бж҃е пребл҃гі́и .

пѣ́снь , з҃ . і҆рмо́съ . Хладода́тельнꙋ оу҆́бѡ пе́щь сотворѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ оу҆вѣща̀ вопи́ти , бл҃гослове́нъ бг҃ъ ѻ҆ц҃ъ на́шихъ . Ско́ро разрѣшѝ оу҆страши́вшемꙋсѧ видѣ́нїю твоемꙋ̀ боѧ́знь , ѡ҆бъѧ́вльши приклю́чьшаѧтисѧ по бжⷭ҇твеномꙋ про́мыслꙋ чⷭ҇таѧ . ѡ҆ ни́хже и҆ пред̾ ни́мъ дадѐ сла́вꙋ бг҃ови бл҃года́рственѡ . За́ шесть лѣ́тъ и҆ три́десѧть пости́вшисѧ , спасе́нагѡ тѣ́ла и҆ кро́ве причасти́тисѧ не и҆мꙋ́щи , про́сиши приклю́чьшемꙋтисѧ ѿ негѡ̀ ча́сть є҆ди́нꙋ , бл҃гоговѣ́йнѡ принестѝ к̾ тебѣ̀ . сла́ва . Прїи́де носѧ̀ жела́емое , и҆ вложѝ всеговѣ́йно в̾ рꙋкꙋ̀ твою̀ , є҆́же и҆ прїе́мши . и҆ веселѧ́щисѧ речѐ къ бг҃ꙋ , нн҃ѣ ѿпꙋща́еши мѧ твою̀ влⷣко рабꙋ̀ млⷭ҇тивнѡ по глаго́лꙋ твоемꙋ̀ . и҆ ны́нѣ , боⷢ҇ . Бл҃гоꙋго́днѡ тѝ пожи́вшꙋю всепѣ́таѧ прїѧ́тъ слꙋже́бницꙋ свою̀ , и҆ сподо́би неи҆зрече́нныхъ бжⷭ҇твеныхъ бл҃гъ . тоѧ̀ моли́твами и҆ на́съ прича́стники сотворѝ чⷭ҇таѧ нетлѣ́нныѧ пи́щи .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆сточѝ , а҆ пра́веднагѡ же́ртвꙋ и҆ во́ды попалѝ , всѧ́ бо твори́ши хрⷭ҇тѐ , є҆ли́ко хо́щеши , тѣ́мъ тѧ превозно́симъ гдⷭ҇а во́ вѣки . Стра́шныхъ та́инъ прича́щшисѧ вѣ́рнѡ , ꙗ҆́коже жела́ла є҆сѝ мт҃и прпⷣбнаѧ , ѡ҆ста́ви пе́рсть оу҆́бѡ пе́рсти , чⷭ҇тны́и же дх҃ъ тво́й а҆́нг҃ли че́стнѡ принесо́ша гдⷭ҇еви . Пристꙋпи́въ к̾ тебѣ̀ и҆ па́ки лове́цъ вѣ́рныи , бл҃гослове́нїѧ ꙗ҆́кѡ полꙋчи́ти ѿ тебѐ ше́дъ , ѡ҆брѣ́те мертвꙋ̀ лежа́щꙋ тѧ̀ зако́номъ є҆сте́ственымъ . и҆ дивлѧ́шесѧ , что̀ подо́бнѡ є҆мꙋ̀ содѣ́ѧти . сла́ва . Помышле́нїемъ ꙗ҆́кѡ мнѧ́ше , и҆́же не навы́къ до́брагѡ , бг҃оꙋго́днѡ взе́мъ твою̀ де́рзостнѡ рꙋ́кꙋ честнꙋ́ю , ѡ҆бѣща́сѧ прїѧ́ти на́честь ст҃ѣ́й твое́й па́мѧти бл҃же́ннаѧ , и҆ житїю̀ соблюде́нїе и҆мѣ́ти . и҆ ны́нѣ , боⷢ҇ . Добродѣ́тели ст҃ы́хъ почита́ю влⷣчце , добродѣ́тели же дѣ́ланїѧ ѿ ню́дъ не стѧжа́хъ . но ꙗ҆́кѡ ми́лостива оу҆ще́дри ми чꙋ́вствїѧ , и҆ и҆зба́ви мѧ всеѕло́бнагѡ ѡ҆бы́чаѧ .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́нг҃льстїи зрѣ́ти . тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Рꙋ́кꙋ оу҆кра́денꙋ взе́мшаго , с̾ корабле́мъ и҆ бре́менемъ и҆ пловꙋ́щими оу҆держа́ла є҆сѝ , пребыва́ти во ѻ҆́стровѣ па́рѣ , до́ндеже оу҆разꙋмѣ́въ ѻ҆́нъ , носѧ̀ сїю̀ положѝ с̾ мольбо́ю к̾ про́чемꙋ чⷭ҇тно́мꙋ ти тѣлесѝ . Ѿпꙋще́нїи и҆ оу҆де́ржанїи и҆́же в̾ тебѣ̀ си́лы во и҆скꙋ́сѣ бы́вше , кꙋ́пнѡ всѝ притеко́ша к̾ моще́мъ твои́мъ , до́брѣ поклони́тисѧ и҆ ѡ҆бъѧ́ти , не ѡ҆брѣто́ша ничто́же . неви́дима бо бы́вши ѻ҆́бразомъ и҆́мже вѣ́сть бг҃ъ . сла́ва . Вели́кимъ болѣ́знемъ и҆змѣне́нїе , бо́льшимъ ѿ хрⷭ҇та̀ прпⷣбнаѧ прїе́мши . и҆ и҆мꙋ́щи дерзнове́нїе вели́ко моли́тисѧ є҆мꙋ̀ , помѧнѝ почита́ющихъ бжⷭ҇твенꙋю па́мѧть твою̀ . и҆ и҆спросѝ на́мъ грѣхо́въ ѡ҆чище́нїе , и҆ житїю̀ и҆справле́нїе . и҆ ны́нѣ , боⷢ҇ . Всѣ́хъ хотѧ̀ спастѝ гдⷭ҇ь , тѧ̀ себѣ̀ мт҃рь и҆збра́въ , положѝ вѣ́рнымъ винꙋ̀ всѧ́когѡ бл҃га . сегѡ̀ без̾зако́нїемъ ѡ҆горчи́вшїи , тобо́ю оу҆пова́емъ ѡ҆брѣ́сти млⷭ҇ть , млⷭ҇тиваѧ влⷣчце .

стⷯры . гла́съ , а҃ . поⷣ . нбⷭ҇нымъ чино́мъ . запѣ́въ : Прпⷣбнаѧ мт҃и ѳеѡкти́сто , молѝ бг҃а ѡ҆ на́съ .= Вѣ́чныхъ жела́ющи полꙋчи́ти бл҃гъ , тлѣ́ющихъ всѐ сладостра́стїе ѕло́е мнѣ́ла є҆сѝ кꙋ́плю , и҆ пи́щꙋ страсте́й раз̾жже́нїе . тѣ́мъ и҆з̾ дѣ́тска ли́кꙋ и҆́ночествꙋющихъ сочта́на бы́сть чⷭ҇таѧ . Нечи́стыхъ дꙋхо́въ не невѣ́дѧщи ко́зни всѧ̀ , проти́висѧ до́блественѡ , ѿ ко́рене и҆стерза́ющи страстна́ѧ возраще́нїѧ . и҆ младе́нца ѕло́бы держа́щи дв҃дски , и҆ разбива́ющи к̾ ка́мени хрⷭ҇тꙋ̀ . Ма́нїемъ бж҃їимъ и҆збѣ́гши ра́тныхъ рꙋ́къ , водвори́сѧ в̾ пꙋсты́ни хрⷭ҇та̀ и҆́щꙋщи , претечѐ разꙋ́мнѡ мирско́е страсте́й мо́ре житїѧ̀ . и҆ въ приста́нищи вы́шнѧгѡ ѡ҆ти́шїѧ , є҆го́же возжелѣ́ла є҆сѝ хрⷭ҇та̀ зри́ши . =сла́ва , и҆ нн҃ѣ , боⷢ҇ . Ра́дꙋисѧ тꙋчна́ѧ горо̀ , ра́дꙋисѧ сѣда́лище бж҃їе . ра́дꙋисѧ бжⷭ҇твенаѧ держа́во , ра́дꙋисѧ не ѡ҆пали́маѧ кꙋпино̀ . ра́дꙋисѧ бцⷣе , ра́дꙋисѧ черто́же . ра́дꙋисѧ лѣ́ствице нбⷭ҇наѧ , ра́дꙋисѧ хра́ме . ра́дꙋисѧ рꙋ́чко , ра́дꙋисѧ ски́нїе . ра́дꙋисѧ непреста́ющаѧ ми́рꙋ ра́дость . крⷭ҇тобоⷢ҇ . Воздви́жена ꙗ҆́кѡ ви́дѣ на крⷭ҇тѣ̀ а҆́гньца , непоро́чнаѧ дв҃а пла́чꙋщи вопїѧ́ше , сла́дкое моѐ ча́до , что̀ но́вое и҆ пресла́вное видѣ́нїе , ка́кѡ содержа́и всѧ́ческаѧ го́рстїю , на́ древѣ пригвожда́ешисѧ пло́тїю .

На оу҆́трени . є҆ди́нъ кано́нъ , во ѻ҆кта́и , со і҆рмосо́мъ , на́ ѕ҃ . и҆ ст҃ы́мъ , два̀ кано́на , на и҃ . кано́нъ прпⷣбнѣй , и҆мы́и краегране́сїе си́це : матрѡ́нꙋ подо́бнѡ пою̀ сла́вꙋ . творе́нїе і҆ѡ́сифово . гла́съ , и҃ . пѣ́снь , а҃ . і҆рмо́съ . Пое́мъ гдⷭ҇ви всѝ лю́дїе , в̾ мо́ри чермнѣ́мъ фараѡ́на погрꙋ́жшемꙋ , побѣ́днꙋю пѣ́снь ꙗ҆́кѡ просла́висѧ .

запѣ́в̾ : Прпⷣбнаѧ мт҃и матрѡ́но , молѝ бг҃а ѡ҆ на́съ .= Съ чи́ны нбⷭ҇ными всегда̀ смѣша́ема , и҆ прича́стїемъ бжⷭ҇твенымъ ѡ҆божа́ема . чтꙋ́щїѧ тѧ̀ спаса́й пресла́внаѧ . Всѧ̀ бжⷭ҇твенымъ жела́нїемъ распалѧ́ема . раз̾жже́нїѧ сласте́й дꙋшетлѣ́нныхъ , воз̾держа́нїѧ тꙋ́чами оу҆гаси́ла є҆сѝ . Че́стенъ влⷣки сосꙋ́дъ ꙗ҆ви́ласѧ є҆сѝ , ѡ҆чи́щь срⷣце матрѡ́но страсте́й плотьски́хъ поще́нїемъ . =боⷢ҇ . Ѡ҆бра́дованнаѧ , и҆з̾ тебѐ роди́тисѧ бл҃говоли́вшаго па́че є҆стества̀ молѝ , оу҆мири́ти и҆ спастѝ всѧ́ческаѧ .

дрꙋгі́и , кано́нъ , мч҃нкѡмъ . є҆мꙋ́же краегране́сїе сицево̀ : прино́сиши по́льзꙋ свои́мъ похва́льникомъ бл҃же́нне . творе́нїе і҆ѡ́сифово . гла́съ , д҃ . пѣ́снь , а҃ . і҆рмо́съ . Воспою́ ти гдⷭ҇и бж҃е мо́й , ꙗ҆́кѡ и҆зведѐ лю́ди и҆з̾ рабо́ты є҆ги́петскїѧ . покры́ же ѻ҆рꙋ́жїе фараѡ́не и҆҆ си́лꙋ .

запѣ́въ : Ст҃і́и мч҃нцы ѻ҆ниси́форе и҆ порфи́рїе , моли́те бг҃а ѡ҆ на́съ .= Носѧ́щи вѣ́рою хва́лѧщимъ по́льзꙋ бжⷭ҇твенꙋю , честна́ѧ наста̀ па́мѧть твоѧ̀ . в̾ ню́же тѧ̀ мо́лимъ пребл҃же́нне , всѣ́хъ на́съ помѧнѝ . И҆мы́и дерзнове́нїѧ и҆спо́лнено своѐ до́блее помышле́нїе , без̾слове́снагѡ повелѣ́нїѧ небре́глъ є҆сѝ бг҃одх҃нове́нне . ра́дꙋѧсѧ бл҃же́нне страда́лъ є҆сѝ . Си́лою возмога́емь нбⷭ҇ною ѻ҆ниси́форе , к̾ лю́тымъ оу҆стреми́сѧ мꙋ́камъ . и҆ всю̀ побѣдѝ крѣ́пость ра́тꙋющагѡ . =боⷢ҇ . Оу҆ста́вила є҆сѝ сме́рти мꙋчи́тельство , без̾сме́ртныѧ жи́зни созда́телѧ ро́ждьши хрⷭ҇та̀ и҆зба́вителѧ на́шегѡ , дв҃о неи҆скꙋсобра́чнаѧ .

пѣ́снь , г҃ . і҆рмо́съ . Ты̀ є҆сѝ оу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пое́тъ тѧ̀ дх҃ъ мо́й . Жеѕло́мъ бжⷭ҇твеныѧ вѣ́ры , страстно́е предѣлѝ мо́ре , бжⷭ҇твенѣ дш҃а́мъ предѝ пꙋ́ть творѧ́щи в̾ пра́вое прехожде́нїе . Ꙗ҆ви́сѧ оу҆добре́нїе є҆ди́нствꙋющимъ ꙗ҆́вѣ всечⷭ҇тна́ѧ и҆ черньце́мъ житїѐ стѧжа́вши , чи́сто и҆ непоро́чно . Въ ме́ртвость ѡ҆дѣ́ѧвсѧ , тлю̀ творѧ́щꙋ страсте́мъ сла́внаѧ . и҆ врага̀ житїе́мъ бл҃гоче́стнымъ ѡ҆бнажи́ла є҆сѝ . боⷢ҇ . Совокꙋпи́сѧ во оу҆тро́бѣ твое́й созда́тель пло́тьски пречⷭ҇таѧ пребы́въ є҆́же бѣ̀ . ꙗ҆́кѡ да бл҃го бытїѐ чл҃кѡмъ да́рꙋетъ .

и҆́нъ , і҆рмо́съ . Лꙋ́къ си́льныхъ и҆знемо́же , а҆ не́мощнїи препоѧ́сашасѧ си́лою . сегѡ̀ ра́ди воз̾весели́сѧ , ѡ҆́ гдⷭ҇ѣ срⷣце моѐ . Равно̀ ѻ҆ц҃ꙋ и҆ дх҃ови сло́во на сꙋди́щи и҆сповѣ́дающе мч҃нцы , треволне́нїѧ мꙋ́камъ мꙋ́жески ѿрази́ша . Поста́вивъ тве́рдѡ но́зѣ своѝ мч҃нче на ка́мени и҆сповѣ́данїѧ вѣ́ры . вѣ́тры ѻ҆ниси́форе оу҆ране́нїѧ непоколѣба́сѧ . Всѣ́мъ оу҆мо́мъ бл҃же́нне мч҃нче и҆з̾стꙋпи́въ ко хрⷭ҇тꙋ̀ жела́емомꙋ , нечꙋ́ѧше и҆́же ѿ ра́нъ болѣ́зни всебл҃же́нне . боⷢ҇ . При́зри пречⷭ҇таѧ спасти́ мѧ . и҆́бо бжⷭ҇твенымъ ма́нїемъ всѐ стро́ѧщагѡ воплоти́ла є҆сѝ бг҃а сло́ва , па́че сло́ва и҆ помышле́нїѧ .

конда́къ , прпⷣбнѣй . гла́съ , в҃ . За любо́вь прпⷣбнаѧ гдⷭ҇ню пло́ти жела́нїе возненави́дѣ , поще́нїемъ сѝ дх҃ъ просвѣти́вши . но твои́ми мл҃твами , и҆ проти́вныхъ шата́нїе разорѝ . крѣ́пкѡ бо ѕвѣ́ри побѣди́ла є҆сѝ . и҆́косъ . Стрꙋю́ ми сло́вꙋ да́ждь бж҃е мо́й , и҆ и҆сто́чникъ бл҃гочи́нїѧ сотвори́ти ми оу҆́мъ , и҆ бл҃гословѝ ꙗ҆зы́къ мо́й да воспою̀ твою̀ а҆́гницꙋ , ю҆́же вѣнча̀ ты̀ бл҃гостїю своею̀ . а҆́ще бо са́мъ не да́си ми сло́во досто́йнѡ , ка́кѡ принесꙋ̀ да́ръ ни́щїи бога́тѣй во словесѣ́хъ и҆ дѣѧ́нїи ; тѣ́мъ пода́ждь ми си́лꙋ , и҆сповѣ́дати є҆ѧ̀ на трижне́нїѧ . крѣ́пкѡ бо ѕвѣ́ри побѣди́ла є҆́сть .

сѣда́ленъ , прпⷣбнѣй . гла́съ , и҃ . Пре́йде и҆з̾бра́ннаѧ ѿ́ бг҃а прпⷣнаѧ мт҃и , к̾ приста́нищꙋ живота̀ наставлѧ́ема , без̾ волне́нїѧ житїѧ̀ бꙋ́рю претечѐ . со а҆́нг҃лы пѣсносло́вѧщи и҆зба́вителѧ . и҆ молѧ́щисѧ непреста́ннѡ ѡ҆ на́съ . ꙗ҆́кѡ да бл҃года́ть и҆ ми́лость хрⷭ҇то́съ да́рꙋетъ на́мъ . сохранѧ́ющи па́ствꙋ , ю҆́же болѣ́знїю соста́вила є҆сѝ . и҆́нъ , сѣда́ленъ , мч҃нкѡмъ . гла́съ , а҃ . Ѻ҆гне́мъ бжⷭ҇твенагѡ распала́еми жела́нїѧ , ѻ҆гнѧ̀ чꙋ́вственагѡ прикоснове́нїемъ ѿ ню́дъ не ѡ҆пали́стесѧ бл҃же́ннїи , пре́лесть же пож̾го́сте . и҆ влеко́ми неми́лостивнѡ страстоте́рпцы , прⷭ҇нопа́мѧтныи прїѧ́сте коне́цъ , и҆ сла́вꙋ полꙋчи́сте . сла́ва , и҆ ны́нѣ , боⷢ҇ . Наста́ви на́съ на пꙋ́ть покаѧ́нїѧ , оу҆клонѧ́ющихсѧ всегда̀ ко ѕлы́мъ без̾пꙋ́тїѧмъ , и҆ пребл҃га́гѡ бг҃а прогнѣ́вающихъ , неи҆скꙋсобра́чнаѧ бл҃гослове́наѧ мр҃і́е , прибѣ́жище ѿча́ѧннымъ чл҃кѡмъ , бж҃їе селе́нїе . крⷭ҇тобоⷢ҇ . Зрѧ́щи тѧ̀ хрⷭ҇тѐ всенепоро́чнаѧ мт҃и , ме́ртва на крⷭ҇тѣ̀ просте́рта , вопїѧ́ше , сн҃е мо́й собез̾нача́льне ѻ҆ц҃ꙋ и҆ дх҃ꙋ , что̀ неи҆зрече́нное твоѐ сѐ смотре́нїе ; и҆́мже спа́слъ є҆сѝ ще́дре , пречⷭ҇тꙋю рꙋ́кꙋ свое́ю созда́нїе .

пѣ́снь , д҃ . і҆рмо́съ . Оу҆слы́шахъ гдⷭ҇и смотре́нїѧ твоегѡ̀ та́инство , разꙋмѣ́хъ дѣ́ла твоѧ̀ , и҆ просла́вихъ твоѐ бжⷭ҇тво̀ . Ка́плѧми сле́зъ твои́хъ напои́вши срⷣце своѐ , и҆ воздѣ́лала є҆сѝ добродѣ́телей стори́чествꙋющїи ѽ матрѡ́но кла́съ бжⷭ҇твеныѧ бл҃года́ти . Ко хрⷭ҇тꙋ̀ возве́ргши помышле́нїѧ степе́ни , пребы́сть напа́стьми несовра́тнѡ лꙋка́выхъ бѣсо́въ достосла́внаѧ . До́блественою мꙋ́дростїю , сꙋпрꙋ́га ѡ҆ста́вивши , и҆ житїѧ̀ мѧте́жь , и҆́го хрⷭ҇то́во возлюби́ла є҆сѝ , и҆ томꙋ̀ послѣ́дова . боⷢ҇ . Не ѡ҆ста́вивъ нбⷭ҇наѧ пречⷭ҇таѧ бг҃ъ и҆стоща́етсѧ во оу҆тро́бѣ твое́й , и҆ мѣ́ритсѧ неи҆змѣ́римыи неи҆змѣ́римаѧ ми́ра разрѣши́въ прегрѣше́нїѧ .

и҆́нъ , і҆рмо́съ . Любвѐ ра́ди ще́дре своегѡ̀ си ѻ҆́браза , на крⷭ҇тѣ̀ свое́мъ стоѧ̀ и҆ раз̾стоѧ́щасѧ ꙗ҆зы́цы . ты́ бо є҆сѝ бг҃ъ на́шъ , крѣ́пость моѧ̀ и҆ похвала̀ . Ѡ҆блиста́ющее свѣтозаре́нїе болѣ́зней твои́хъ ѻ҆ниси́форе мч҃нче , привлечѐ любо́вїю бл҃же́нне спострада́ти тебѣ̀ бл҃же́ннаго порфи́рїѧ . Возложи́вше на сковрадꙋ̀ раз̾жже́нꙋю , протѧза́ютъ мꙋчи́тели кꙋ́пнѡ хрⷭ҇то́вы во́ины , ра́дꙋющихсѧ и҆ горѧ́щихъ дх҃омъ . Заколе́нїе ꙗ҆́кѡ совершено̀ страстоте́рпцы , и҆ чⷭ҇тны́ѧ же́ртвы влⷣцѣ всѣ́хъ ра́дꙋющесѧ приведо́стесѧ . тѣ́мъ бл҃жи́ми є҆стѐ . Разꙋ́мнѡ тѧ̀ прилѣжа́ща влⷣцѣ , льсти́выѧ бесѣ́ды прельсти́ти ѿ ню́дъ не возмого́ша порфи́рїе бг҃омꙋ́дре , всемꙋ́дре и҆ всебога́те . боⷢ҇ . Воплоща́ема родила̀ є҆сѝ бг҃а сло́ва , оу҆подо́битисѧ ѻ҆трокови́це за млрⷭ҇дїе млⷭ҇ти всѣ́мъ бл҃говоли́вша , непоро́чнаѧ влⷣчце .

пѣ́снь , є҃ . і҆рмо́съ . Оу҆́треннююще вопїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Ѡ҆дѣ́ѧвшисѧ во ѻ҆́бразъ ст҃ы́и ѽ матрѡ́но , врага̀ ѕлодѣ́иваго в̾ стꙋ́дъ ѡ҆дѣ́ѧла є҆сѝ . Текꙋ́щими , и҆змѣнѝ стоѧ́щаѧ . и҆ сопрꙋ́жникѡмъ , жениха̀ без̾сме́ртнаго просвѣти́телѧ дш҃а́мъ на́шимъ . Всено́щнꙋю приносѧ́щи хвалꙋ̀ влⷣцѣ матрѡ́но , оу҆спи́ла є҆сѝ сла́сти тѣле́сныѧ . боⷢ҇ . Ме́ртвымъ и҆ живы́мъ влⷣкꙋ родила̀ є҆сѝ , стра́сти всенепоро́чнаѧ срⷣца моегѡ̀ оу҆мертвѝ .

и҆́нъ , і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рою воспѣва́ющїѧ тѧ . Столпѝ хрⷭ҇то́вѣ цр҃кви непоколеби́мїи , раскопа́нїемъ мꙋче́нїѧ несовра́тни крѣ́постїю дх҃а ꙗ҆ви́стесѧ . Кꙋми́ры богоме́рзскїѧ и҆стни́сте , и҆ ꙗ҆ви́стесѧ бл҃гоче́стїѧ и҆ мꙋ́жества ѻ҆́бразы , честні́и великомч҃нцы . Во́инствомъ и҆́стины ѿ́ бг҃а препоѧ́састесѧ , маловреме́нное наси́лїе ѡ҆ста́вивше вѣ́рою , ра́дꙋющесѧ пострада́сте . боⷢ҇ . Всели́сѧ в̾ тѧ̀ , вмѣсти́сѧ невмѣсти́мыи , и҆ показа́ тѧ нб҃съ ши́ршꙋ дв҃о . тѣ́мъ тѧ̀ оу҆бл҃жа́емъ .

пѣ́снь , ѕ҃ . і҆рмо́съ . Мл҃твꙋ пролїю̀ ко́ гдⷭ҇ꙋ , и҆ томꙋ̀ воз̾вѣщꙋ̀ печа́ль мою̀ . ꙗ҆́кѡ ѕѡ́лъ дш҃а моѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ молю́сѧ ꙗ҆́кѡ і҆ѡ́на , ѿ тлѝ бж҃е мо́й воз̾веди́ мѧ . Ꙗ҆́кѡ пти́ца добропѣ́снива в̾ лꙋ́зѣ по́стнѣмъ сла́дкѡ воз̾глаша́ющи , ꙗ҆́кѡ разꙋ́мныѧ привлечѐ пти́цы , сщ҃е́нныхъ же́нъ собо́ръ . мре́жъ вра́жїихъ и҆збѣ́гши матрѡ́но дх҃омъ . Пло́ть оу҆́бѡ любомꙋ́дрствїемъ держа́щи , и҆ ѡ҆бꙋздава́ющи стра́сти прпⷣбнаѧ . дш҃и́ же кра́снꙋю добро́тꙋ свѣ́тлѡ хрⷭ҇то́ви бл҃гооу҆краша́ющи . красна́ же и҆ бл҃голѣ́пна матрѡ́но дх҃омъ бы́сть . А҆́нг҃льское житїѐ на землѝ возлюби́ла є҆сѝ , пою́щи непреста́ннѡ на́съ ра́ди ѿ ст҃ы́ѧ дв҃ы за мно́жество бл҃гости вопло́щшасѧ и҆ є҆стество̀ же́нское на врага̀ лꙋка́ваго оу҆крѣ́пльша . боⷢ҇ . Порабо́тисѧ грѣхо́мъ є҆стество̀ чл҃ческое . но сїѐ и҆зба́ви бцⷣе лꙋка́выѧ рабо́ты , всѧ́ческимъ влⷣкꙋ ро́ждьши , показа́вша на́мъ жи́зни вхо́ды всенепоро́чнаѧ .

и҆́нъ , і҆рмо́съ . Прїидо́хъ во глꙋбины̀ морскі́ѧ , и҆ потопи́ла мѧ є҆́сть бꙋ́рѧ мно́гихъ ми прегрѣше́нїи . но ꙗ҆́кѡ бг҃ъ , и҆з̾ тлѝ воз̾ведѝ живо́тъ мо́й многомлⷭ҇тиве . Болѣ́зни ра́нъ претерпѣ́лъ є҆сѝ ѻ҆ниси́форе мч҃нче . тече́нїе соверши́въ свидѣ́тельства , и҆ побѣди́тель бы́въ , прїѧ́тъ по́чести нбⷭ҇ныѧ . Дрꙋ́гъ дрꙋ́гꙋ содержа́щесѧ вѣ́рою привѧза́еми кꙋ́пнѡ и҆ влеко́ми . разрѣше́нїе тѣлесѐ ꙗ҆́кѡ крѣ́пцыи страда́льцы прїѧ́сте , гдⷭ҇еви совокꙋплѧ́еми . Къ ко́немъ привѧ́зани , и҆ лю́тѣ влеко́ми , нра́вомъ сꙋдѧ́щагѡ лю́тымъ , сла́внїи мч҃нцы гдⷭ҇ни бжⷭ҇твеномꙋ концꙋ̀ сподо́бистесѧ . боⷢ҇ . Зако́нъ кромѣ̀ є҆сте́ственыхъ дв҃о законода́вца ро́ждьши , ѡ҆бновлѧ́ющаго сокрꙋше́ное є҆стество̀ на́ше . є҆го́же молѝ спасти́ мѧ , грѣхѝ сокрꙋше́наго .

конда́къ . гла́съ , в҃ . Мч҃нкъ дво́ица пострада́вше крѣ́пкѡ , вра́жїю горды́ню на́ землю низ̾ложи́ша . ѡ҆зари́вшесѧ бл҃года́тїю несозда́нныѧ трⷪ҇цы сла́внїи , ѻ҆ниси́форе и҆ порфи́рїе , молѧ́щесѧ непреста́ннѡ ѡ҆ всѣ́хъ на́съ . и҆́косъ . Возмого́ша бжⷭ҇твеною крѣ́постїю оу҆тве́рждьшесѧ хрⷭ҇то́вы во́ини , низ̾ложи́ти вра́жїѧ совѣ́ты оу҆хищре́нїѧ , к̾ свирѣ́пымъ ко́немъ кꙋ́пнѡ привѧ́зани , и҆ стра́ждꙋще зако́ннѡ . на́мъ про́сѧтъ ѿ́ бг҃а долго́въ проще́нїѧ , и҆ разрꙋше́нїѧ грѧдꙋ́щихъ и҆скꙋше́нїи , и҆ лю́тыхъ и҆збавле́нїѧ . тѣ́мъ ѧ҆̀ хва́лимъ прⷭ҇нѡ , ꙗ҆́кѡ при́сныѧ бг҃ꙋ оу҆го́дники , молѧ́щасѧ непреста́ннѡ ѡ҆ всѣ́хъ на́съ .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , попра́вше и҆ пла́мень дерзнꙋ́вше , и҆ на́ росꙋ ѻ҆́гнь прело́жше вопїѧ́хꙋ , бл҃гослове́нъ є҆сѝ гдⷭ҇и бж҃е во́ вѣки . Ꙗ҆́кѡ го́рлица красна̀ , соблюдѐ бг҃ови цѣломꙋ́дрїѧ бл҃гоча́дїе . страсте́й непло́дствомъ бл҃же́ннаѧ , ꙗ҆́кѡ вои́стинꙋ ѡ҆бога́щшисѧ , тобо́ю спаса́емыхъ . Ми́ръ чⷭ҇таѧ и҆ є҆́же в̾ ми́рѣ ѡ҆ста́вивши ѡ҆ бж҃їи наде́жди , преми́рное прїѧ́ла є҆сѝ наслѣ́дїе . є҆ди́нствꙋющимъ сꙋ́щее вои́стинꙋ матрѡ́но оу҆краше́нїе . боⷢ҇ . Разрѣша́ѧ є҆́в̾винꙋ клѧ́твꙋ , въ пренепоро́чнꙋю всели́сѧ дв҃цꙋ . бл҃гослове́нїѧ и҆сто́чникъ и҆сточа́ѧ вопїю́щимъ , бл҃гослове́нъ пречⷭ҇таѧ пло́дъ твоегѡ̀ чре́ва .

и҆́нъ , і҆рмо́съ . А҆враа́мстїи дре́вле в̾ вавило́нѣ ѻ҆́троцы , в̾ пещѝ пла́мень попра́вше хвала́ми вопїю́ще , ѻ҆ц҃ъ на́шихъ бж҃е блгⷭ҇ве́нъ є҆сѝ . Бл҃гостоѧ́нныѧ своеѧ̀ дш҃и бл҃горо́дныи нра́въ ꙗ҆влѧ́ѧ , и҆сповѣ́далъ є҆сѝ пред̾ мꙋчи́тели ѻ҆ниси́форе мч҃нче бг҃а воплоще́нна . Во́ вѣки бжⷭ҇твенꙋю свобо́дꙋ любѧ̀ , своемꙋ̀ влⷣчцѣ ꙗ҆́кѡ бл҃гопослꙋшли́въ ра́бъ спострада́лъ є҆сѝ . и҆ с̾ ни́мъ ликꙋ́еши порфи́рїе бл҃же́нне . Бжⷭ҇твеными кровьмѝ ва́шими , раз̾жже́ныи пла́мень многобо́жїѧ оу҆гаси́вше . вопїе́те всехва́льнїи , ѻ҆ц҃ъ на́шихъ бж҃е бл҃гослове́нъ є҆сѝ . Да бжⷭ҇твеныѧ и҆ без̾сме́ртныѧ сла́вы сподо́битесѧ , бл҃же́ннꙋю пострада́сте сме́рть , бг҃освѣ́тлыѧ ѕвѣ́зды мы́сленагѡ сл҃нца . боⷢ҇ . Воплоще́нно сло́во ѿ твои́хъ крове́й ро́ждьши , земны́ѧ ѡ҆бога́тити бл҃говоли́вша дв҃о . воспѣва́ющїѧ , ѻ҆ц҃ъ на́шихъ бж҃е бл҃гослове́нъ є҆сѝ .

пѣ́снь , и҃ . і҆рмо́съ . Побѣди́тели врагꙋ̀ и҆ пла́мени , бл҃года́тїю бы́вше , и҆́же по за́повѣди ѕѣлѡ̀ побора́юще дѣ́ти поѧ́хꙋ , блгⷭ҇ви́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Бл҃гоче́стїѧ ѻ҆бразы̀ дш҃ꙋ оу҆краси́вши . дх҃омъ бжⷭ҇твенымъ бг҃ови привела̀ є҆сѝ чⷭ҇таѧ ли́къ дѣ́вственыи . пою́щихъ , бл҃гослови́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки . Твои́хъ пото́въ лꙋча́ми бжⷭ҇твеными бг҃оно́снаѧ , и҆ страда́нїѧ бл҃года́тїю мꙋ́тныѧ пото́ки и҆з̾сꙋши́ла є҆сѝ . срⷣца́ же вѣ́рнѡ приходѧ́щихъ к̾ тебѣ̀ всегда̀ просвѣща́еши . тѣ́мъ тѧ̀ почита́емъ во всѧ̀ вѣ́ки . Себѐ ѻ҆рꙋ́жїемъ вѣ́ры ѡ҆бло́жши воз̾держа́нїѧ , не оу҆ѧ́звисѧ стрѣло́ю сла́сти . и҆ и҆́же дре́вле є҆́ввꙋ оу҆ѧзви́вшаго , оу҆ѧ́звила є҆сѝ копїе́мъ цѣломꙋ́дрїѧ , матрѡ́но бл҃же́ннаѧ . боⷢ҇ . Сѐ дв҃аѧ ꙗ҆́коже речѐ дх҃омъ и҆са́їѧ и҆мѣ̀ во́ чревѣ и҆з̾ба́вльшаго на́съ ѿ а҆́дова чре́ва , бл҃гоче́стнѡ вопїю́щихъ . бл҃гослови́те всѧ̀ дѣ́ла гдⷭ҇а , и҆ превозноси́те є҆гѡ̀ во́ вѣки .

и҆́нъ , і҆рмо́съ . Распѧ́тагѡ пло́тїю на крⷭ҇тѣ̀ , и҆ показа́вшагѡ на́мъ ѻ҆рꙋ́жїе на спасе́нїе , ѻ҆́троцы превозноси́те хрⷭ҇та̀ бг҃а на́шегѡ во́ вѣки . Оу҆́ды растерза́нїю преда́вше , растерза́сте врагꙋ̀ несмы́сленое срⷣце , пребы́вше непоколѣби́мы оу҆мо́мъ , великои҆мени́тїи вѣнцено́сцы . Кровьмѝ ва́шими ѻ҆́гнь оу҆гасѐ неразꙋ́мїѧ страда́льцы . вѣ́рныхъ же напои́сте всѣ́хъ срⷣца̀ и҆ дш҃а воз̾раще́нїемъ бг҃оразꙋ́мїѧ . Волне́нїѧ лю́тыхъ мꙋче́нїи ѡ҆кормле́нїемъ хрⷭ҇то́вымъ преи҆до́сте , и҆ къ приста́нищꙋ бжⷭ҇твеномꙋ црⷭ҇твїѧ нбⷭ҇нагѡ приста́сте въ нетлѣ́нїе . Оу҆́глїе ѻ҆́гнено оу҆тѣ́шителѧ , распала́еми ꙗ҆́вѣ мч҃нцы ꙗ҆́вльшесѧ , пожго́сте ле́сть вра́жїю , и҆ просвѣти́вше вселе́ннꙋю . боⷢ҇ . Цвѣ́тъ и҆з̾бра́нныи во оу҆до́лїѧхъ ѻ҆трокови́це житїѧ̀ ѡ҆брѣ́тъ , воз̾желѣ̀ твое́й добро́тѣ сло́во бж҃їе , и҆ воплоти́сѧ бл҃гоꙋха́ѧ вселе́ннꙋю .

пѣ́снь , ѳ҃ . і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схожде́нїѧ , ꙗ҆́кѡ вы́шнїи во́лею сни́де да́же и҆ до́ плоти . ѿ дв҃ческагѡ бо чре́ва бы́въ оу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Ꙗ҆́кѡ бжⷭ҇твенаѧ ты̀ голꙋ́бица , добродѣ́телей позлащена̀ крилы̀ , матрѡ́но сла́внаѧ взѧ́тсѧ . и҆ ны́нѣ почива́еши и҆дѣ́же прпⷣбныхъ ли́цы , и҆ пра́ведныхъ чи́нове , и҆ вѣ́чное весе́лїе , и҆ ра́дость неи҆з̾глаго́ланнаѧ . Лю́бѧщи и҆́же ѿ жены̀ за милосе́рдїе щедро́тъ восїѧ́вшаго , незаходи́маго сл҃нца , раз̾жже́ннꙋю и҆ неꙋдо́бь проходи́мꙋю оу҆до́бь про́йде чи́стаѧ стезю̀ по́стнꙋю . бѣсы̀ попалѧ́ющи , и҆ стра́сти и҆з̾сꙋша́ющи . Бжⷭ҇твенаѧ па́мѧть твоѧ̀ на́мъ свѣтлѣ́йши сл҃нца восїѧ̀ , просвѣща́ющи на́ша срⷣца̀ и҆ помышле́нїѧ . в̾ ню́же помина́й на́съ , вѣ́рою творѧ́щихъ ю҆̀ матрѡ́но сла́внаѧ , дерзнове́нїе к̾ бг҃ꙋ вои́стинꙋ и҆мꙋ́щи . боⷢ҇ . Носѧ́щи ѻ҆трокови́це в̾ рꙋка́хъ , всѧ́ческаѧ ма́нїемъ носѧ́щаго , рꙋки́ мѧ и҆зба́ви чꙋжа́гѡ хода́тайствомъ тѝ . и҆ свѣ́томъ сѝ моѐ помышле́нїе просвѣтѝ . и҆ ѿчꙋжи́ мѧ страсте́й , не ѡ҆сла́бнѡ борю́щихъ мѧ̀ .

и҆́нъ , і҆рмо́съ . Є҆́вва оу҆́бѡ недꙋ́гомъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прозѧбе́нїемъ прижи́тїѧ твоегѡ̀ , ми́рови бл҃гослове́нїе процвѣла̀ є҆сѝ . тѣ́мъ тѧ̀ всѝ велича́емъ . Возмого́ша си́лою хрⷭ҇то́вою вжилѧ́еми , беспло́тныѧ с̾ тѣ́ломъ побори́ти , до́блїи а҆дама́нти . столпѝ вѣ́рѣ . и҆ ны́нѣ на́ нб҃сѣхъ веселѧ́тсѧ ѿ́ вѣка с̾ пострада́вшими . Ꙗ҆́кѡ колесни́ца словесѐ сщ҃е́ннаѧ бы́вше , к̾ без̾слове́снымъ привѧ́зани бы́сте бжⷭ҇твенїи мч҃нцы . и҆ к̾ приста́нищꙋ нбⷭ҇номꙋ достиго́сте ра́дꙋющесѧ , и҆ побѣ́дныѧ по́чести прїѧ́сте . тѣ́мъ досто́йнѡ бл҃жи́ми є҆стѐ . Тѣлеса̀ ва́ю а҆ньгїа́нь сла́вныи ны́нѣ и҆́мать гра́дъ мч҃нцы бжⷭ҇твенїи , ѡ҆бога́щьсѧ застꙋ́пники ва́ми . и҆ врачѝ , цѣлѧ́щи тѣлесе́мъ и҆ дш҃а́мъ недꙋ́ги , приходѧ́щимъ вѣ́рою всегда̀ . Бжⷭ҇твенаѧ дво́ице и҆ свѣтоза́рнаѧ , порфи́рїе страстоте́рпче прⷭ҇носла́вныи , и҆ ѻ҆ниси́форе доблемꙋ́дрыи . трⷪ҇цѣ прест҃ѣ́й моли́тасѧ , ми́ръ и҆ лю́тыхъ и҆збавле́нїе пода́ти дш҃а́мъ на́шимъ . боⷢ҇ . Ѡ҆дѣ́ѧвсѧ во всего́ мѧ во́лею влⷣка , ѿ твои́хъ прои҆схо́дитъ всенепоро́чнаѧ бжⷭ҇твеныхъ чре́слъ . и҆ млеко́мъ пита́етсѧ , и҆́же всю̀ тва́рь пита́ѧи . блгⷭ҇ве́наѧ при́снѡ дв҃о .

свѣти́ленъ . Мч҃нки почте́мъ , страда́нїи восїѧ́вшихъ , и҆ ѡ҆зари́вшихъ ми́ра мч҃нческими свѣтлостьмѝ , ѻ҆ниси́фора сла́внаго , и҆ с̾ ни́мъ порфи́рїѧ . и҆́бо сїѝ мо́лѧтсѧ ѡ҆ на́съ , и҆́же любо́вїю соверша́ющихъ па́мѧть и҆́хъ .

дрꙋгі́и свѣти́ленъ , прпⷣбнѣй . сла́ва . Посредѣ̀ мꙋже́й всели́сѧ матрѡ́но присносла́внаѧ , прїе́мши ѻ҆́бразъ . ѽ стра́нно чꙋ́до прпⷣбнаѧ , ка́кѡ оу҆таи́сѧ мꙋчи́телѧ , тве́рдѡ при́снѡ ѡ҆горча́ющасѧ . поще́нїемъ и҆ моли́твами и҆ бдѣ́нїи непреста́нными , сегѡ̀ главꙋ̀ сокрꙋши́ла є҆сѝ . и҆ ны́нѣ , боⷢ҇ . Ра́дꙋисѧ бж҃їѧ пола́то , ра́дꙋисѧ горо̀ ѡ҆сѣне́наѧ . ра́дꙋисѧ не ѡ҆пали́маѧ кꙋпи́но , ра́дꙋисѧ прⷭ҇то́ле сла́вы , ра́дꙋисѧ бжⷭ҇твенаѧ трапе́зо , ра́дꙋисѧ рꙋ́чко всезлата́ѧ . ра́дꙋисѧ свѣ́щниче всесвѣ́тлыи , ра́дꙋисѧ ле́гкїи ѻ҆́блаче , дв҃о мт҃и мр҃і́е .

<< Previous

Contents

Next >>