Бг҃оро́дичны воскрⷭ҇ны , на ѻ҆́смь гласо́въ . пое́мыѧ ве́черъ , на гдⷭ҇и возва́хъ . и҆ на стихо́внахъ , и҆́же ѿ а҆лфави́тъ . боⷢ҇ . гла́съ , а҃ . Всеми́рнꙋю сла́вꙋ ѿ чл҃къ прозѧ́бшꙋю , и҆ влⷣкꙋ ро́ждьшꙋю , нбⷭ҇нꙋю две́рь воспое́мъ мр҃і́ю дв҃цꙋ , беспло́тнымъ пѣ́снь , и҆ вѣ́рнымъ оу҆добре́нїе . та́бо ꙗ҆ви́сѧ нб҃о и҆ цр҃кви бжⷭ҇твеннаѧ . та̀ прегражде́нїе вражды̀ разрꙋши́вши , смире́нїе в̾ведѐ и҆ црⷭ҇тво ѿве́рзе . тоѧ̀ оу҆́бѡ и҆мꙋ́щи вѣ́рное оу҆тверже́нїе , побо́рника и҆́мамы , и҆з̾ неѧ̀ ро́ждьшагосѧ гдⷭ҇а . дерза́йте оу҆́бѡ , дерза́йте лю́дїе бж҃їи , и҆́бо то́й побѣди́тъ врагѝ , ꙗ҆́кѡ всеси́ленъ . на стихо́внѣ , боⷢ҇ . Сѐ и҆спо́лнисѧ и҆са́ино прорече́нїе , дв҃ою бо родила̀ є҆сѝ . и҆ по ржⷭ҇твѣ̀ ꙗ҆́кѡ пре́жде ржⷭ҇тва̀ пребыва́еши , бг҃ъ бо бѣ̀ рожде́исѧ , тѣ́мже и҆ є҆стество̀ но́во премѣни́сѧ . но ѽ бг҃омт҃и , мл҃твы твои́хъ ра́бъ во твое́й цр҃кви приноси́мыѧ ти непре́зри . но ꙗ҆́кѡ бл҃гоꙋтро́бнагѡ , свои́ма рꙋка́ма поноси́вшаѧ , на своѧ̀ рабы̀ оу҆милосе́рдисѧ , и҆ молѝ спасти́сѧ дш҃а́мъ на́шимъ .

на гдⷭ҇и возва́хъ . боⷢ҇ . гла́съ , в҃ . Пре́йде сѣ́нь зако́ннаѧ , бл҃года́ти прише́дши , ꙗ҆́коже бо кꙋпина̀ не с̾гара́ше , распала́ющисѧ . та́кѡ и҆ дв҃аѧ родила̀ є҆́сть , и҆ дв҃ою пребы́сть . в̾мѣ́стѡ столпа̀ ѻ҆́гненнагѡ , пра́ведное возсїѧ̀ сл҃нце . в̾мѣ́стѡ мѡѷсе́ѧ хрⷭ҇то́съ , во спасе́нїе дш҃а́мъ на́шимъ . на стихо́внѣ , боⷢ҇ . Ѽ чꙋдесѝ но́вагѡ , па́че всѣ́хъ дре́внихъ чꙋде́съ , кто́ бо позна̀ мт҃рь бе́з̾мꙋжа ро́ждьшꙋю , и҆ на рꙋкꙋ̀ носѧ́щꙋ , и҆́же всю̀ тва́рь содержа́щагѡ . бж҃їе є҆́сть сло́во ро́ждьшесѧ . є҆го́же ꙗ҆́кѡ млⷣнца пречⷭ҇таѧ на рꙋкꙋ̀ свое́ю носи́вши , и҆ мт҃рьне дерзнове́нїе к̾ немꙋ̀ и҆мꙋ́щи , непреста́й молѧ́щи ѡ҆ чтꙋ́щихъ тѧ̀ , оу҆ще́дрити ми́ра , и҆ спастѝ дш҃а на́ша .

на гдⷭ҇и возва́хъ . боⷢ҇ . гла́съ , г҃ . Ка́кѡ недиви́мсѧ , бг҃омꙋ́жномꙋ твоемꙋ̀ ржⷭ҇твꙋ̀ пречи́стаѧ , и҆скꙋше́нїѧ бо мꙋ́жеска непрїе́мши всенепоро́чнаѧ , родила̀ є҆сѝ без̾ ѻ҆ц҃а сн҃а пло́тїю , и҆́же пре́жде вѣ́къ рожде́ннагѡ ѿ ѻ҆ц҃а без̾ мт҃ре , ника́коже претерпѣ́вша и҆змѣне́нїѧ , ли смѣше́нїѧ , ли раздѣле́нїѧ , но во ѻ҆бою̀ сꙋществꙋ̀ , сво́йство цѣ́ло сохра́ньша . тѣ́мже мт҃и дв҃о влⷣчце , тогѡ̀ молѝ спастѝ дш҃а , и҆́же правосла́внѡ , бцⷣꙋ тѧ̀ и҆сповѣ́дающихъ . на стихо́внѣ , боⷢ҇ . Без̾ сѣ́мене ѿ бжⷭ҇твеннагѡ дх҃а , во́лею оу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю роди́ла є҆сѝ , и҆ младе́нца млеко́мъ пита́ла є҆сѝ . тѣ́мже непреста́й молѧ́щи , и҆зба́витисѧ ѿ бѣ́дъ дш҃а́мъ на́шимъ .

на гдⷭ҇и возва́хъ . боⷢ҇ . гла́съ , д҃ . И҆́же тебѐ ра́ди бг҃оѻ҆ц҃ъ проро́къ давы́дъ , пѣ́сненно ѡ҆ тебѣ̀ провоз̾гласѝ , вели́чїѧ ти сотво́ршꙋ , пред̾ста̀ цр҃ца ѡ҆деснꙋ́ю тебѐ , тебе́ бо мт҃рь хода́тайцꙋ животꙋ̀ показа̀ , и҆́же без̾ ѻ҆ц҃а и҆з̾ тебѐ вочл҃читисѧ бл҃гои҆зво́ли бг҃ъ , да сво́й па́ки ѡ҆бнови́тъ ѻ҆́бразъ и҆стлѣ́вшїи страстьмѝ , и҆ заблꙋ́ждьшее волкохи́щное ѻ҆вча̀ ѡ҆брѣ́тъ , на ра́мо воспрїи́мъ , ко ѻ҆ц҃ꙋ принесѐ , и҆ къ своемꙋ̀ хотѣ́нїю , съ нбⷭ҇ными совокꙋпи́тъ си́лами . и҆ спасе́тъ бцⷣею ми́ръ хрⷭ҇то́съ , и҆мѣ́ѧи ве́лїю и҆ бога́тꙋю ми́лость . на стихо́внѣ , боⷢ҇ . Пода́ждь оу҆тѣше́нїе , свои́мъ рабо́мъ всенепоро́чнаѧ , оу҆толѧ́ющи лю́таѧ на ны̀ ѡ҆бстоѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снова́нїе и҆́мамы , и҆ твоѐ застꙋпле́нїе стѧжа́хомъ , да непостыди́мсѧ влⷣчце , тебѐ призыва́юще . потщи́сѧ на моли́твꙋ тебѣ̀ вопїю́щихъ , ра́дꙋисѧ влⷣчце всѣ́мъ помо́щнице , ра́досте и҆ покро́ве дш҃а́мъ на́шимъ .

на гдⷭ҇и возва́хъ . боⷢ҇ . гла́съ , є҃ . Во чермнѣ́мъ мо́ри , браконеи҆скꙋ́сныѧ невѣ́сты ѻ҆́бразъ написа́сѧ дре́вле . та́мѡ мѡѷсе́й раздѣли́тель водѣ̀ , здѣ́же гаврїи́лъ слꙋжи́тель чꙋдесѝ . тогда̀ глꙋбинꙋ̀ немо́креннѡ ше́ствовавъ і҆и҃ль , ны́нѣ же хрⷭ҇та̀ родѝ без̾ сѣ́мене дв҃аѧ . мо́ре по проше́ствїи і҆и҃левѣ , пребы́сть непроходи́мѡ . непоро́чнаѧ же по ржⷭ҇твѣ̀ є҆мманꙋ́илевѣ , пребы́сть нетлѣ́нна . сы́и пре́жде сы́и , ꙗ҆вле́исѧ ꙗ҆́кѡ чл҃къ , бж҃е поми́лꙋй на́съ . на стихо́внѣ , боⷢ҇ . Цр҃ковь и҆ две́рь є҆сѝ , пола́та и҆ прⷭ҇то́лъ цр҃е́въ дв҃о всечⷭ҇таѧ . є҆ю́же и҆зба́витель мо́й хрⷭ҇то́съ и҆ гдⷭ҇ь , и҆́же во тмѣ̀ сѣдѧ́щимъ ꙗ҆ви́сѧ сл҃нце сы́и пра́ведное , просвѣти́ти хотѧ̀ , и҆́хже созда̀ по ѻ҆́бразꙋ своемꙋ̀ рꙋко́ю свое́ю . тѣ́мже всепѣ́таѧ , ꙗ҆́кѡ мт҃рьне дерзнове́нїе к̾ немꙋ̀ стѧжа́вши , непреста́ннѡ молѝ спасти́сѧ дш҃а́мъ на́шимъ .

на гдⷭ҇и возва́хъ . боⷢ҇ . гла́съ , ѕ҃ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невоспѣва́етъ твоегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а возсїѧ́въ сн҃ъ є҆диноро́дныи , то́йже ѿ тебѐ чи́стыѧ про́йде , несказа́ннѡ вопло́щьсѧ . є҆стество́мъ бг҃ъ сы́и , и҆ є҆стество́мъ бы́въ человѣ́къ на́съ ра́ди . не во двою̀ лицꙋ̀ раздѣлѧ́емъ . но во двою̀ є҆стествꙋ̀ несмѣ́сно познава́емъ . тогѡ̀ молѝ чи́стаѧ и҆ всебл҃же́ннаѧ , поми́ловатисѧ дш҃а́мъ на́шимъ . на стихо́внѣ , боⷢ҇ . Творе́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твои́хъ ложе́снъ проше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свободѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вои́стинꙋ , вопїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ покро́ве , и҆ спасе́нїе дш҃а́мъ на́шимъ .

на гдⷭ҇и возва́хъ . боⷢ҇ . гла́съ , з҃ . Мт҃и оу҆́бѡ позна́сѧ па́че є҆стества̀ бцⷣе . пребы́сть же дв҃ою па́че сло́ва и҆ ра́зꙋма . и҆ чꙋдесѐ ржⷭ҇тва̀ твоегѡ̀ сказа́ти ꙗ҆зы́къ немо́жетъ . пресла́внꙋ бо сꙋ́щꙋ зача́тїю тѝ чⷭ҇таѧ , непости́женъ є҆́сть ѻ҆́бразъ рожде́нїѧ . и҆дѣ́же бо хо́щетъ бг҃ъ , побѣжда́етсѧ є҆стества̀ чи́нъ . тѣ́мже тѧ̀ всѝ мт҃рь бж҃їю свѣ́дꙋще , мо́лимтисѧ прилѣ́жнѡ , молѝ спасти́сѧ дш҃а́мъ на́шимъ . на стихо́внѣ , боⷢ҇ . Под̾ кро́въ тво́й влⷣчце , всѝ земноро́днїи прибѣга́юще вопїе́мъ тѝ , бцⷣе оу҆пова́нїе на́ше , и҆зба́ви на́съ ѿ без̾мѣ́рныхъ прегрѣше́нїи , и҆ спасѝ дш҃а на́ша .

на гдⷭ҇и возва́хъ . боⷢ҇ . гла́съ , и҃ . Цр҃ь нбⷭ҇ныи , за чл҃колю́бїе на землѝ ꙗ҆ви́сѧ , и҆ с̾ чл҃ки поживѐ . ѿ дв҃ы бо чи́стыѧ пло́ть прїе́мыи , и҆з̾ неѧ̀ проше́дъ с̾ воспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несоста́вомъ . тѣ́мже соверше́на тогѡ̀ бг҃а , и҆ соверше́на чл҃ка , вои́стинꙋ проповѣ́дающе , и҆сповѣ́даемъ хрⷭ҇та̀ бг҃а на́шегѡ . є҆го́же молѝ , мт҃и без̾невѣ́стнаѧ , поми́ловатисѧ дш҃а́мъ на́шимъ . на стихо́внѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твои́хъ ра́бъ мольбы̀ прїимѝ всенепоро́чнаѧ , всѣ́мъ подаю́щи ѡ҆чище́нїе прегрѣше́нїемъ . ны́нѣ на́ша моле́нїѧ прїе́мши , молѝ спасти́сѧ всѣ́мъ на́мъ .