Бг҃оро́дичны , ѻ҆смѝ гласо́въ . пое́мъ и҆́хъ є҆гда̀ є҆́сть сла́ва ст҃о́мꙋ въ минѣ́и . и҆ ны́нѣ по́ гласꙋ сїѧ̀ бг҃оро́дичны пое́мъ . въ недѣ́лю , ве́черъ , боⷢ҇ . гла́съ , а҃ . Нбⷭ҇нымъ чино́мъ ра́дованїе , и҆ на землѝ чл҃кѡмъ , крѣ́пкаѧ помо́щнице пречⷭ҇таѧ дв҃о , спаси́ ны и҆́же к̾ тебѣ̀ прибѣга́ющихъ , ꙗ҆́кѡ на тѧ̀ оу҆пова́нїе съ бг҃омъ бцⷣе воз̾ложи́хомъ .

в̾ понедѣ́льникъ , на оу҆́трени , боⷢ҇ . Грѣ́шныхъ мл҃твы прїе́млющи , и҆ скорбѧ́щихъ воздыха́нїѧ непрезира́ющи . молѝ и҆́же ѿ чи́стою бо́кꙋ твое́ю сн҃а своегѡ̀ , спасти́сѧ на́мъ прест҃а́ѧ дв҃о .

в̾ понедѣ́льникъ , ве́черъ , боⷢ҇ . Дв҃о всепѣ́таѧ ю҆́же в̾ тебѣ̀ та́йнꙋ , мѡѷсе́й пррⷪ҇ческима ви́дѣ ѻ҆чи́ма , кꙋпинꙋ̀ горѧ́щꙋ и҆ не ѡ҆палѧ́емꙋ . бжⷭ҇тва́ бо ѻ҆́гнь оу҆тро́бꙋ твою̀ чⷭ҇таѧ неѡ҆палѝ . тѣ́мже мо́лимъ тѧ̀ , ꙗ҆́кѡ мт҃рь бг҃а на́шегѡ , ми́ръ и҆спроси́ти всемꙋ̀ ми́рꙋ .

во вто́рникъ , на оу҆́трени , боⷢ҇ . Блꙋдни́цꙋ и҆ блꙋ́днаго , а҆́зъ и҆ разбо́йника побѣди́хъ . и҆ мытарѧ̀ прегрѣше́нїи преминꙋ́хъ , и҆ ниневи́тѧны . оу҆вы̀ мнѣ̀ что̀ бꙋ́дꙋ . ка́кѡ оу҆бѣ́гнꙋ мꙋ́ки а҆́зъ ѡ҆каѧ́нныи . чи́стаѧ припа́даю тѝ оу҆ще́дри мѧ млⷭ҇тїю си , ꙗ҆́коже ѻ҆нѣ́хъ сн҃ъ тво́й спа́слъ є҆́сть .

в̾ сре́дꙋ , ве́черъ , боⷢ҇ . Ра́дꙋисѧ ра́досте пра́дѣдомъ , а҆пⷭ҇лѡмъ , и҆ мч҃нкѡмъ весе́лїе , и҆ покро́въ на́мъ дв҃о , твои́мъ рабо́мъ .

в̾ четверто́къ , на оу҆́трени , боⷢ҇ . Ра́дꙋисѧ бцⷣе дв҃о . ра́дꙋисѧ похвало̀ всеѧ̀ вселе́ннѣй . ра́дꙋисѧ пречⷭ҇таѧ мт҃и бж҃їѧ бл҃гослове́наѧ .

в̾ пѧто́къ , ве́черъ , боⷢ҇ . Вои́стинꙋ па́че оу҆ма̀ твоѧ̀ чꙋ́днаѧ вели́чїѧ , ржⷭ҇тва̀ твоегѡ̀ бг҃оневѣ́сто , ꙗ҆́же проповѣ́даша прⷪ҇рцы всѝ , всѧ̀ пресла́внаѧ . зача́тїе и҆ ржⷭ҇тво̀ всепѣ́таѧ , недомы́слено и҆ несказа́нно . и҆́мже ми́ръ спа́слъ є҆́сть , ꙗ҆́кѡ ми́лосердъ .

в̾ сꙋбо́тꙋ , на оу҆́трени , боⷢ҇ . Ра́дꙋисѧ ѿ на́съ ст҃а́ѧ бцⷣе дв҃о , чи́стыи сосꙋ́де все́й вселе́ннѣй , свѣщѐ неꙋгаси́маѧ , вмѣсти́лище невмѣсти́магѡ , цр҃кви неѡ҆бори́маѧ . ра́дꙋисѧ и҆з̾ неѧ́же роди́сѧ а҆́гнецъ бж҃їи , взе́млѧи грѣхѝ всегѡ̀ ми́ра .

въ нлⷣю , ве́черъ , боⷢ҇ . гла́съ , в҃ . Ра́дꙋисѧ мр҃і́е бцⷣе , цр҃кви не ѡ҆бори́маѧ , па́че же ст҃а́ѧ , ꙗ҆́коже вопїе́тъ проро́къ , ст҃а̀ цр҃кви твоѧ̀ , ди́вна в̾ пра́вдꙋ .

в̾ понедѣ́льникъ , на оу҆́трени , боⷢ҇ . На тѧ̀ оу҆пова́нїе бцⷣе возложи́хомъ , ча́ѧнїѧ да не ѿ паде́мъ , спасѝ на́съ ѿ бѣ́дъ , помо́щнице недоꙋмѣ́емымъ , и҆ сопроти́вныхъ совѣ́ты разорѝ , ты́ бо є҆сѝ на́ше спасе́нїе бл҃гослове́наѧ .

в̾ понедѣ́льникъ , ве́черъ , боⷢ҇ . Непроходи́маѧ две́ре , та́йно запечатлѣ́ннаѧ , бл҃гослове́наѧ бцⷣе дв҃о , прїимѝ мл҃твы на́ша , и҆ принесѝ ѧ҆̀ сн҃ꙋ своемꙋ̀ , и҆ бг҃ꙋ на́шемꙋ , да спасе́тъ тебѐ ра́ди дш҃а на́ша .

во вто́рникъ , на оу҆́трени , боⷢ҇ . Спасѝ ѿ бѣ́дъ рабы̀ своѧ̀ бцⷣѣ дв҃о , ꙗ҆́кѡ всѝ по́ бз҃ѣ к̾ тебѣ̀ прибѣга́емъ , ꙗ҆́кѡ к̾ нерꙋши́мѣй стѣнѣ̀ и҆ пред̾ста́тельницѣ .

в̾ сре́дꙋ , ве́черъ , боⷢ҇ . Ꙗ҆́кѡ плодови́та ма́слина дв҃аѧ ѿрастѝ тебѐ плода̀ живо́тнаго , плодоноси́ти ми́рови ве́лїю и҆ бога́тꙋю млⷭ҇ть .

в̾ четверто́къ , на оу҆́трени , боⷢ҇ . Всѐ оу҆пова́нїе моѐ , на тѧ̀ воз̾лага́ю мт҃и бж҃їѧ , сохрани́ мѧ во свое́мъ си кро́вѣ .

в̾ пѧто́къ , ве́черъ , боⷢ҇ . Спасѝ ѿ бѣ́дъ рабы̀ своѧ̀ бцⷣѣ дв҃о , ꙗ҆́кѡ всѝ по́ бз҃ѣ к̾ тебѣ̀ прибѣга́емъ , ꙗ҆́кѡ к̾ нерꙋши́мѣй стѣнѣ̀ и҆ пред̾ста́тельницѣ .

в̾ сꙋбо́тꙋ , на оу҆́трени , боⷢ҇ . Всѐ оу҆пова́нїе моѐ , на тѧ̀ воз̾лага́ю мт҃и бж҃їѧ , сохрани́ мѧ во свое́мъ си кро́вѣ .

въ нлⷣю , ве́черъ , боⷢ҇ . гла́съ , г҃ . Влⷣчце пред̾ста́тельнице всѣ́мъ молѧ́щимтисѧ , тобо́ю дерза́емъ , и҆ тобо́ю хва́лимсѧ , и҆ к̾ тебѣ̀ всѐ оу҆пова́нїе на́ше є҆́сть , молѝ ро́ждьшагосѧ и҆з̾ тебѐ за непотре́бныѧ рабы̀ твоѧ̀ .

в̾ понедѣ́льникъ , на оу҆́трени , боⷢ҇ . Ст҃а чⷭ҇таѧ первопохвало̀ сꙋ́щи нбⷭ҇нымъ чинѡ́мъ . а҆пⷭ҇лѡмъ пѣ́нїе , и҆ пррⷪ҇кѡмъ събытїѐ . влⷣчце прїимѝ мл҃твы на́ша .

в̾ понедѣ́льникъ , ве́черъ , боⷢ҇ . Въ жена́хъ ст҃а́ѧ бцⷣе мт҃и без̾невѣ́стнаѧ , молѝ є҆го́же є҆сѝ родила̀ цр҃ѧ и҆ бг҃а , да спасе́тъ на́съ ꙗ҆́кѡ чл҃колю́бецъ .

во вто́рникъ , на оу҆́трени , Без̾ сѣ́мене зачала̀ є҆сѝ ѿ дх҃а ст҃а , и҆ славосло́вѧще воспѣва́емъ тѧ̀ , ра́дꙋисѧ прест҃а́ѧ дв҃о .

в̾ сре́дꙋ , ве́черъ , боⷢ҇ . Вельмѝ согрѣша́юща мѧ , ѻ҆трокови́це и҆схитѝ вели́кою свое́ю мл҃твою пла́мене нꙋ́жнагѡ , и҆ и҆спра́ви чⷭ҇таѧ твои́ми мольба́ми , ко спасе́нымъ стезѧ́мъ наставлѧ́ющи мѧ , мт҃рьними си мл҃твами .

в̾ четверто́къ , на оу҆́трени , Без̾ сѣ́мене зачала̀ є҆сѝ ѿ дх҃а ст҃а , и҆ славосло́вѧще воспѣва́емъ тѧ̀ , ра́дꙋисѧ прест҃а́ѧ дв҃о .

в̾ пѧто́къ , ве́черъ , боⷢ҇ . Въ жена́хъ ст҃а́ѧ бцⷣе мт҃и без̾невѣ́стнаѧ , молѝ є҆го́же є҆сѝ родила̀ цр҃ѧ и҆ бг҃а , да спасе́тъ на́съ ꙗ҆́кѡ чл҃колю́бецъ .

в̾ сꙋбо́тꙋ , на оу҆́трени , Без̾ сѣ́мене зачала̀ є҆сѝ ѿ дх҃а ст҃а , и҆ славосло́вѧще воспѣва́емъ тѧ̀ , ра́дꙋисѧ прест҃а́ѧ дв҃о .

въ нлⷣю , ве́черъ , боⷢ҇ . гла́съ , д҃ . Ра́дꙋисѧ свѣ́та ѻ҆́блаче . ра́дꙋисѧ свѣ́щниче свѣ́тлыи . ра́дꙋисѧ рꙋ́чко в̾ не́й же ма́нна . ра́дꙋисѧ же́зле а҆арѡ́новъ . ра́дꙋисѧ кꙋпино̀ неѡ҆пали́маѧ . ра́дꙋисѧ черто́же . ра́дꙋисѧ прⷭ҇то́ле . ра́дꙋисѧ горо̀ ст҃а́ѧ . ра́дꙋисѧ прибѣ́жище . ра́дꙋисѧ бжⷭ҇твенаѧ трапе́зо . ра́дꙋисѧ две́рь та́йнаѧ . ра́дꙋйсѧ всѣ́мъ ра́досте .

в̾ понедѣ́льникъ , на оу҆́трени , боⷢ҇ . Бцⷣе всѣ́мъ цр҃це , правосла́внымъ похвало̀ , є҆рети́чествꙋющихъ шата́нїѧ разорѝ , и҆ ли́ца и҆́хъ посрамѝ , не кла́нѧющихсѧ ни чтꙋ́щихъ , пречⷭ҇таѧ честны́и ѻ҆́бразъ тво́й .

в̾ понедѣ́льникъ , ве́черъ , боⷢ҇ . И҆зба́ви на́съ ѿ бѣ́дъ на́шихъ мт҃и хрⷭ҇та̀ бг҃а , ро́ждьшаѧ всѣ́хъ творца̀ , да всѝ вопїе́мъ ти , ра́дꙋисѧ є҆ди́на спасе́нїе дꙋ́шъ на́шихъ .

во вто́рникъ , на оу҆́трени , боⷢ҇ . Ѿ всѣ́хъ бѣ́дъ рабы̀ своѧ̀ сохранѝ бл҃гослове́наѧ бцⷣе , да тѧ̀ сла́вимъ наде́жꙋ дш҃а́мъ на́шимъ .

в̾ сре́дꙋ , ве́черъ , боⷢ҇ . И҆мꙋ́ще тѧ бцⷣе оу҆пова́нїе и҆ помо́щницꙋ , вра́жїихъ навѣ́тъ небои́мсѧ , ꙗ҆́кѡ спаса́еши дꙋ́ши на́ши .

в̾ четверто́къ , на оу҆́трени , боⷢ҇ . Тѧ̀ стѣ́нꙋ стѧжа́хомъ бцⷣе пречⷭ҇таѧ , и҆ бл҃гоꙋти́шное приста́нище и҆ оу҆тверже́нїе . тѣ́мже молю́сѧ , и҆́же в̾ житїѝ ѡ҆бꙋрева́емь ѡ҆кормѝ и҆ спаси́ мѧ .

в̾ пѧто́къ , ве́черъ , боⷢ҇ . Свѣщѐ неꙋгаси́маѧ , прⷭ҇то́ле пра́ведныи пречⷭ҇таѧ влⷣчце , молѝ спасти́сѧ дш҃а́мъ на́шимъ .

в̾ сꙋбо́тꙋ , на оу҆́трени , боⷢ҇ . Є҆ди́на чи́стаѧ и҆ пречⷭ҇таѧ дв҃о , ꙗ҆́же бг҃а без̾сѣ́меннѡ ро́ждьшаѧ , молѝ спасти́сѧ дш҃а́мъ на́шимъ .

въ нлⷣю , ве́черъ , боⷢ҇ . гла́съ , є҃ . Стра́шно и҆ пресла́вно , и҆ ве́лїе та́инство . невмѣсти́мыи во́ чрево в̾мѣсти́сѧ , и҆ мт҃и по ржⷭ҇твѣ̀ па́ки пребы́сть дв҃а , бг҃а бо родѝ и҆з̾ неѧ̀ воплоще́нна . томꙋ̀ возопїе́мъ , томꙋ̀ пѣ́снь рце́мъ , со а҆́нг҃лы воспѣва́юще , ст҃ъ є҆сѝ без̾нача́льныи бж҃е , и҆́же на́съ ра́ди вочл҃чивыисѧ сла́ва тебѣ̀ .

в̾ понлⷣникъ , на оу҆́трени , боⷢ҇ . Ѡ҆бра́дованнаѧ хода́тайствꙋй твои́ми мл҃твами , и҆ и҆спросѝ дш҃а́мъ на́шимъ мно́жествѡ щедро́тъ , и҆ ѡ҆чище́нїе мно́гимъ прегрѣше́нїемъ мо́лимсѧ .

в̾ понедѣ́льникъ , ве́черъ , боⷢ҇ . Оу҆толѝ болѣ́зни мно́го воздыха́ющїѧ дш҃и моеѧ̀ , оу҆ста́вившаѧ всѧ́кꙋ сле́зꙋ ѿ лица̀ землѝ . ты́ бо чл҃кѡмъ болѣ́зни ѿгонѧ́еши , и҆ грѣ́шныхъ ско́рби разрꙋша́еши . тебе́ бо всѝ стѧжа́хомъ наде́ждꙋ и҆ оу҆тверже́нїе , прест҃а́ѧ мт҃и дв҃о .

во вто́рникъ , на оу҆́трени , боⷢ҇ . Ѡ҆бра́дованнаѧ хода́тайствꙋй твои́ми мл҃твами , и҆ и҆спросѝ дш҃а́мъ на́шимъ мно́жествѡ щедро́тъ , и҆ ѡ҆чище́нїе мно́гимъ прегрѣше́нїемъ мо́лимсѧ .

в̾ сре́дꙋ , ве́черъ , боⷢ҇ . Бл҃жи́мъ тѧ̀ бцⷣе дв҃о , и҆ сла́вимъ тѧ̀ вѣ́рнїи по́ долгꙋ , гра́дъ непоколеби́мыи , стѣ́нꙋ не ѡ҆бори́мꙋю , тве́рдꙋю пред̾ста́тельницꙋ , и҆ прибѣ́жище дш҃а́мъ на́шимъ .

в̾ четверто́къ , на оу҆́трени , боⷢ҇ . Бл҃жи́мъ тѧ̀ бцⷣе дв҃о , ꙗ҆́кѡ и҆з̾ тебѐ восїѧ̀ сл҃нце пра́ведное хрⷭ҇то́съ , и҆мѣ́ѧи ве́лїю млⷭ҇ть .

в̾ пѧто́къ , ве́черъ , боⷢ҇ . Ѡ҆бра́дованнаѧ хода́тайствꙋй твои́ми мл҃твами , и҆ и҆спросѝ дш҃а́мъ на́шимъ мно́жествѡ щедро́тъ , и҆ ѡ҆чище́нїе мно́гимъ прегрѣше́нїемъ мо́лимсѧ .

в̾ сꙋбо́тꙋ , на оу҆́трени , боⷢ҇ . Ѽле ѻ҆каѧ́ннаѧ дш҃е , кі́и ѿвѣ́тъ и҆́маши рещѝ сꙋдїѝ во ѻ҆́нъ ча́съ , є҆гда̀ престо́ли поста́вѧтсѧ на сꙋдѣ̀ , и҆ сꙋдїѧ̀ прїи́детъ ѿ нб҃съ , соше́дъ со тма́ми а҆́нг҃льскими ; є҆гда̀ сѧ́детъ на сꙋди́щи , прю̀ сотвори́ти с̾ рабы̀ непотре́бными , подо́бными мнѣ̀ , что̀ ѿвѣща́ти и҆́маши ; что́же принестѝ тогда̀ ; пои́стинѣ ни что́же , оу҆́мъ и҆ тѣ́ло ѡ҆скверни́въ сѝ . тѣ́мже припадѝ къ дв҃ѣй , и҆ зовѝ непреста́ннѡ , пода́ти тебѣ̀ бога́тнѡ грѣхо́въ проще́нїе .

въ нлⷣю , ве́черъ , боⷢ҇ . гла́съ , ѕ҃ . А҆рха́нг҃льски воспое́мъ вѣ́рнїи , нбⷭ҇ныи черто́гъ , и҆ две́рь запечатлѣ́ннꙋ вои́стинꙋ , ра́дꙋисѧ , є҆ѧ́же ра́ди ѿрастѐ на́мъ сп҃съ всѧ́ческихъ хрⷭ҇то́съ жизнода́вецъ и҆ бг҃ъ . низ̾ложѝ влⷣчце мꙋчи́тели , безбо́жныѧ врагѝ на́ша . рꙋко́ю сѝ пречⷭ҇таѧ , оу҆пова́нїе хрⷭ҇тїа́нѡмъ .

в̾ понедѣ́льникъ , на оу҆́трени , боⷢ҇ . А҆рха́нг҃льское сло́во прїе́мши , и҆ херꙋви́мскїи прⷭ҇то́лъ показа́сѧ , и҆ на рꙋкꙋ̀ носи́ла є҆сѝ бцⷣе наде́жꙋ дш҃а́мъ на́шимъ .

в̾ понлⷣникъ , ве́черъ , боⷢ҇ . Никто́же притека́ѧ к̾ тебѣ̀ , посра́мленъ ѿ тебѐ и҆схо́дитъ чⷭ҇таѧ дв҃о бцⷣе , но про́ситъ бл҃года́ти , и҆ прїе́млетъ дарова́нїе к̾ поле́зномꙋ проше́нїю .

во вто́рникъ , на оу҆́трени , боⷢ҇ . Вели́кимъ дарѡ́мъ сподо́биласѧ є҆сѝ , є҆ди́на пречⷭ҇таѧ дв҃о мт҃и бж҃їѧ , ꙗ҆́кѡ родила̀ є҆сѝ на́мъ є҆ди́ного ѿ трⷪ҇цы , хрⷭ҇та̀ жизнода́вца , во спасе́нїе дш҃а́мъ на́шимъ .

в̾ сре́дꙋ , ве́черъ , боⷢ҇ . Ѻ҆́ко срⷣца моегѡ̀ воспꙋща́ю к̾ тебѣ̀ влⷣчце , непре́зри ма́лое ми воз̾дыха́нїѧ в̾ ча́съ , є҆гда̀ сꙋ́дитъ сн҃ъ тво́й ми́рꙋ , бꙋ́ди ми покро́въ и҆ помо́щница .

в̾ четверто́къ , на оу҆́трени , боⷢ҇ . Преложе́нїе скорбѧ́щимъ , премѣне́нїе болѧ́щимъ є҆сѝ бцⷣе всепѣ́таѧ , спасѝ гра́дъ и҆ лю́ди . бори́мымъ смире́нїе , ѡ҆бꙋрева́емымъ тишина̀ , є҆ди́на пред̾ста́тельница вѣ́рнымъ .

в̾ пѧто́къ , ве́черъ , боⷢ҇ . Моли́твами ро́ждьшїѧ тѧ хрⷭ҇тѐ , мч҃нкъ твои́хъ , и҆ а҆пⷭ҇лъ и҆ пррⷪ҇къ , и҆ ст҃лей , прпⷣбныхъ , и҆ пра́ведныхъ , и҆ всѣ́хъ ст҃ы́хъ , оу҆со́пшїѧ рабы̀ своѧ̀ поко́й .

в̾ сꙋбо́тꙋ , на оу҆́трени , боⷢ҇ . Бг҃а и҆з̾ тебѐ воплоти́вшасѧ разꙋмѣ́хомъ бцⷣе дв҃о . тогѡ̀ молѝ ѡ҆ спасе́нїи дш҃ъ на́шихъ .

въ нлⷣю , ве́черъ , боⷢ҇ . гла́съ , з҃ . Є҆́же ра́дꙋисѧ тебѣ̀ зове́мъ со а҆́нг҃лѡмъ бг҃оневѣ́сто , черто́гъ и҆ две́рь , и҆ прⷭ҇то́лъ ѻ҆́гненъ , нарица́юще тебѐ , и҆ несѣко́мꙋю го́рꙋ , и҆ кꙋпинꙋ̀ неѡ҆пали́мꙋю .

в̾ понедѣ́льникъ , на оу҆́трени , боⷢ҇ . Оу҆мирѝ мл҃твами бцⷣы жи́знь на́шꙋ вопїю́щихъ тѝ , ми́лостивыи , гдⷭ҇и сла́ва тебѣ̀ .

в̾ понедѣ́льникъ , ве́черъ , боⷢ҇ . Ра́дꙋисѧ сл҃нца ѻ҆́блаче мы́сленагѡ и҆ не и҆зрече́ннагѡ влⷣчце . ра́дꙋисѧ всесвѣ́тлаѧ свѣщѐ . ра́дꙋисѧ свѣ́щниче всезлаты́и . тобо́ю прест҃а́ѧ , є҆́вва и҆зба́висѧ ѿ клѧ́твы . но ꙗ҆́кѡ и҆мꙋ́щи дерзнове́нїе , к̾ бл҃гопремѣ́нномꙋ сн҃ꙋ своемꙋ̀ и҆ бг҃ꙋ , мт҃рьнею сѝ мл҃твою не ѡ҆скꙋдѣ́й , моли́тисѧ пречⷭ҇таѧ .

во вто́рникъ , на оу҆́трени , боⷢ҇ . Свѣ́тъ хрⷭ҇тѐ восїѧ́лъ є҆сѝ ѿ дв҃ы , и҆ просвѣти́лъ є҆сѝ ро́дъ чл҃ческїи , гдⷭ҇и сла́ва тебѣ̀ .

в̾ сре́дꙋ , ве́черъ , боⷢ҇ . Є҆ди́нꙋ по ржⷭ҇твѣ̀ пречⷭ҇тꙋю дв҃ꙋ воспое́мъ , ꙗ҆́кѡ мт҃рь бг҃а сло́ва , гл҃юще , сла́ва тебѣ̀ .

в̾ четверто́къ , на оу҆́трени , боⷢ҇ . Роди́всѧ ѿ дв҃ы несказа́нно хрⷭ҇тѐ , и҆ просвѣти́лъ є҆сѝ сꙋ́щїѧ во тмѣ̀ , вопїю́щїѧ гдⷭ҇и сла́ва тебѣ̀ .

в̾ пѧто́къ , ве́черъ , боⷢ҇ . Ꙗ҆́же є҆ди́на невмѣсти́маго прїе́мши , и҆ ро́ждьши бг҃а сло́ва воплоще́нна , молѝ спасти́сѧ дш҃а́мъ на́шимъ .

в̾ сꙋбо́тꙋ , на оу҆́трени , боⷢ҇ . Пое́мъ тѧ пречⷭ҇таѧ бцⷣе и҆ сла́вимъ , є҆го́же родила̀ є҆сѝ бг҃а сло́ва , зовꙋ́ще сла́ва тебѣ̀ .

въ нлⷣю , ве́черъ , боⷢ҇ . гла́съ , и҃ . А҆рха́нг҃ла гаврїи́ла гла́съ воспрїи́мше рце́мъ , ра́дꙋисѧ мт҃и бж҃їѧ , ꙗ҆́же жизнода́вца хрⷭ҇та̀ ми́рꙋ ро́ждьшаѧ .

в̾ понедѣ́льникъ , на оу҆́трени , боⷢ҇ . Нбⷭ҇наѧ пою́тъ тѧ ѡ҆бра́дованнаѧ мт҃и без̾невѣ́стнаѧ , и҆ мы̀ славосло́вимъ , не и҆з̾слѣ́дованное твоѐ ржⷭ҇тво̀ бцⷣе . молѝ спасти́сѧ дш҃а́мъ на́шимъ .

в̾ понедѣ́льникъ , ве́черъ , боⷢ҇ . Ра́дꙋисѧ вселе́ннѣй похвало̀ . ра́дꙋисѧ цр҃кви гдⷭ҇нѧ . ра́дꙋисѧ горо̀ присѣ́ннаѧ . ра́дꙋисѧ всѣ́мъ прибѣ́жище . ра́дꙋисѧ свѣ́щниче златы́и , ра́дꙋисѧ сла́во правосла́вныхъ честна́ѧ . ра́дꙋисѧ мр҃і́е мт҃и хрⷭ҇та̀ бг҃а , ра́дꙋисѧ раю̀ . ра́дꙋисѧ бжⷭ҇твенаѧ трапе́зо . ра́дꙋисѧ хра́ме . ра́дꙋисѧ ста́мно всезлата́ѧ . ра́дꙋисѧ всѣ́хъ оу҆пова́нїе .

во вто́рникъ , на оу҆́трени , боⷢ҇ . Кро́въ тво́й бцⷣе дв҃о врачевство̀ є҆́сть дх҃о́вное , во́нь бо прибѣга́юще ѿ дш҃е́вныхъ недꙋ́гъ и҆збавлѧ́емсѧ .

в̾ сре́дꙋ , ве́черъ , боⷢ҇ . А҆́зъ под̾ кро́въ тво́й прибѣга́ю , дв҃о ст҃а́ѧ бцⷣе , вѣ́мъ бо ꙗ҆́кѡ ѡ҆брѧ́щꙋ тобо́ю спасе́нїе , мо́жеши оу҆́бѡ чⷭ҇таѧ помощѝ мнѣ̀ .

в̾ четверто́къ , на оу҆́трени , боⷢ҇ . И҆схи́ти мѧ влⷣчце рꙋкѝ ѕмі́евы чл҃коꙋбі́йца , хотѧ́ща мѧ лꙋка́вствомъ поглоти́ти до конца̀ , сокрꙋшѝ че́люсти є҆гѡ̀ молю́ тѧ , и҆ ко́зни разорѝ . ꙗ҆́кѡ да и҆збы́въ ѿ ногте́й є҆гѡ̀ , велича́ю застꙋпле́нїе твоѐ .

в̾ пѧто́къ , ве́черъ , боⷢ҇ . Влⷣчце прїимѝ мл҃твы ра́бъ свои́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

в̾ сꙋбо́тꙋ , на оу҆́трени , и҆ ны́нѣ , боⷢ҇ . Чи́стаѧ дв҃о , сло́вꙋ две́ри , бг҃а на́шегѡ мт҃и , молѝ спасти́сѧ на́мъ .