Бг҃оро́дичны , и҆ крⷭ҇тобг҃оро́дичены , на ѻ҆́смь гласо́въ . и҆́хже гл҃емъ по тропарѣ́хъ ст҃ы́хъ . сла́ва , и҆ нн҃ѣ , боⷢ҇ . гла́съ , а҃ . Мл҃твы свои́хъ ра́бъ прїимѝ бцⷣе , и҆ и҆зба́ви на́съ ѿ всѧ́кїѧ бѣды̀ , ꙗ҆́кѡ ро́ждьши хрⷭ҇та̀ сп҃са , и҆зба́вителѧ дш҃а́мъ на́шимъ . крⷭ҇тобоⷢ҇ . И҆́же твоѐ застꙋпле́нїе стѧжа́вше пречⷭ҇таѧ , и҆ твои́ми мл҃твами ѿ бѣ́дъ и҆збавлѧ́емсѧ . крⷭ҇то́мъ бо сн҃а твоегѡ̀ всегда̀ храни́ми , по́ долгꙋ тѧ всѝ бл҃гоче́стнѡ велича́емъ .

боⷢ҇ . гла́съ , в҃ . Мт҃и ст҃а́ѧ пречⷭ҇тагѡ свѣ́та , а҆́нг҃льскими пѣ́сньми чтꙋ́ще тѧ пое́мъ и҆ велича́емъ . крⷭ҇тобоⷢ҇ . Тебѐ велича́емъ бцⷣе вопїю́ще , ра́дꙋисѧ же́зле , ѿ него́же без̾ сѣ́меннѡ бг҃ъ прозѧбѐ , и҆ погꙋбѝ крⷭ҇то́мъ сме́рть .

боⷢ҇ . гла́съ , г҃ . Ко́ждо и҆дѣ́же спаса́етсѧ , в̾ пра́вдꙋ та́мѡ прибѣга́етъ . и҆ ко́е и҆́но таково̀ прибѣ́жище , ꙗ҆́кѡ твоѐ бцⷣе , покрыва́ющее дш҃а на́ша . крⷭ҇тобоⷢ҇ . Же́злъ си́лы стѧжа́вше , крⷭ҇тъ сн҃а твоегѡ̀ бцⷣе . тѣ́мъ низ̾лага́емъ вра́жїѧ шата́нїѧ , ꙗ҆́кѡ да непреста́ннѡ тѧ̀ велича́емъ .

боⷢ҇ . гла́съ , д҃ . Стѣна̀ непобѣди́маѧ на́мъ хрⷭ҇тїа́нѡмъ є҆сѝ бцⷣе дв҃о . к̾ тебѣ́ бо прибѣга́юще , невреди́ми пребыва́емъ . и҆ па́ки согрѣша́юще , и҆́мамы тѧ̀ мл҃твеницꙋ . тѣ́мъ бл҃годарѧ́ще вопїе́мъ ти , ра́дꙋисѧ ѡ҆бра́дованнаѧ гдⷭ҇ь съ тобо́ю . крⷭ҇тобоⷢ҇ . Дв҃о всенепоро́чнаѧ мт҃и хрⷭ҇та̀ бг҃а , ѻ҆рꙋ́жїе про́йде твою̀ пречⷭ҇тꙋю дш҃ꙋ , є҆гда̀ распина́ема ви́дѣ во́лею сн҃а и҆ бг҃а своегѡ̀ . є҆го́же преблгⷭ҇ве́наѧ молѧ́щи непреста́й , проще́нїе согрѣше́нїемъ на́шимъ дарова́ти .

боⷢ҇ . гла́съ , є҃ . И҆́же ѿ дв҃ы восїѧ́выи всемꙋ̀ ми́рꙋ хрⷭ҇тѐ бж҃е , и҆ сн҃ы свѣ́та тоѧ̀ ра́ди показа́выи , поми́лꙋй на́съ . крⷭ҇тобоⷢ҇ . Крⷭ҇то́мъ сн҃а твоегѡ̀ бг҃ора́дованнаѧ , и҆́дольскаѧ пре́лесть всѧ̀ оу҆праздни́сѧ , и҆ бѣсо́вскаѧ крѣ́пость попрана̀ бы́сть . сегѡ̀ ра́ди вѣ́рнїи по́долгꙋ тѧ прⷭ҇нѡ пое́мъ , и҆ бл҃гослови́мъ . и҆ бцⷣꙋ и҆́стиннꙋю и҆сповѣ́дающе тѧ̀ велича́емъ .

боⷢ҇ . гла́съ , ѕ҃ . По словесѝ твоемꙋ̀ мт҃и и҆́стиннаѧ , сѐ всѝ ро́ди бл҃жа́ще тѧ пое́мъ и҆ велича́емъ . крⷭ҇тобоⷢ҇ . Бцⷣе дв҃о молѝ сн҃а своегѡ̀ , во́лею пригвозди́вшагосѧ на крⷭ҇тѣ̀ , и҆ ми́ра ѿ́ лести свобо́ждьшаго , хрⷭ҇та̀ бг҃а на́шегѡ , поми́ловати дш҃а на́ша .

боⷢ҇ . гла́съ , з҃ . А҆́ще и҆ мт҃рь тѧ̀ тва́рь позна̀ , но дв҃ꙋ тѧ зижди́тель показа̀ . родила́ бо є҆сѝ пло́тїю хрⷭ҇та̀ бг҃а на́шегѡ , спаса́ющагѡ дш҃а на́ша . крⷭ҇тобоⷢ҇ . Бцⷣе чⷭ҇таѧ прⷭ҇нѡ дв҃о , на крⷭ҇тѣ̀ зрѧ́щи своегѡ̀ сн҃а ви́сѧща , ꙗ҆́кѡ мт҃и пла́чꙋщи , велича́ше стра́шное є҆гѡ̀ соше́ствїе .

боⷢ҇ . гла́съ , и҃ . Ра́дꙋисѧ ꙗ҆́же ѿ а҆́нг҃ла ми́рꙋ ра́дость прїе́мши . ра́дꙋисѧ ро́ждьшаѧ творца̀ тва́ри . ра́дꙋисѧ сподо́бльшаѧсѧ бы́ти мт҃и хрⷭ҇та̀ бг҃а . крⷭ҇тобоⷢ҇ . А҆́гньца и҆ па́стырѧ и҆ сп҃са ми́рꙋ , на крⷭ҇тѣ̀ зрѧ́щи ро́ждьшаѧ тѧ̀ гл҃аше слезѧ́щи , ми́ръ оу҆́бѡ ра́дꙋетсѧ , прїе́млѧ тобо́ю и҆збавле́нїе . оу҆тро́ба же моѧ̀ гори́тъ , зрѧ́щи твоѐ распѧ́тїе , є҆́же за всѣ́хъ терпи́ши сн҃е и҆ бж҃е мо́й .