Мѣ́сѧца тогѡ́же въ л҃-й де́нь.

Ст҃а́гѡ а҆пⷭ҇ла і҆а́кѡва, бра́та ст҃а́гѡ і҆ѡа́нна бг҃осло́ва.

На вече́рни пое́мъ, Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ, стїхи̑ры на и҃, пра́здника г҃: и҆ а҆пⷭ҇ла є҃, гла́съ д҃.

Подо́бенъ: Ꙗ҆́кѡ до́блѧ:

Тро́стїю бл҃года́тною ꙳ и҆зъ глꙋбины̀ сꙋ́етства ꙳ человѣ́ки и҆звле́клъ є҆сѝ, досточꙋ́дне, ꙳ ᲂу҆чи́телѧ манове́нїємъ ꙳ повинꙋ́ѧсѧ, і҆а́кѡве, ꙳ просвѣ́щшагѡ по всемꙋ̀ твою̀ мы́сль, ꙳ и҆ а҆пⷭ҇ла и҆ че́стна бг҃огла́сника, тѧ̀, ꙳ преблаже́нне, показа́вшагѡ, ꙳ сегѡ̀ непостижи́магѡ бж҃ества̀.

Два́жды.

Дꙋхо́вное сїѧ́нїе ꙳ на тѧ̀ сни́де въ ви́дѣ ѻ҆́гненнѣ, ꙳ и҆ тѧ̀, бл҃же́нне, ꙳ бжⷭ҇твенное прїѧ́телище содѣ́ла, ꙳ крѣ́пкѡ ѿгонѧ́ща безбо́жїѧ тмꙋ̀, ꙳ и҆ мі́ръ просвѣща́юща ꙳ свѣ́тлостїю премꙋ́дрыхъ твои́хъ слове́съ, тайноповѣ́дателю, ꙳ а҆пⷭ҇лѡвъ ве́рше, ꙳ хрⷭ҇то́въ самови́дче і҆а́кѡве.

Два́жды.

Блиста̑нїи проповѣ́данїѧ ꙳ во тмѣ̀ спѧ́щыѧ невѣ́дѣнїѧ, ꙳ сла́вне і҆а́кѡве, просвѣ́щь, ꙳ показа́лъ є҆сѝ сы́ны ꙳ вѣ́рою влⷣки и҆ бг҃а. ꙳ є҆гѡ́же стрⷭ҇ти поревнова́лъ є҆сѝ и҆ сме́рти, ꙳ и҆ сла́вы бы́лъ є҆сѝ прича́стникъ, ꙳ ꙗ҆́кѡ премꙋ́дръ, и҆ ꙗ҆́кѡ бг҃огла́сникъ, ꙳ и҆ ꙗ҆́кѡ ᲂу҆ч҃ни́къ и҆́стиненъ.

Сла́ва, гла́съ и҃:

Прїиди́те, нбⷭ҇нагѡ та́инства проповѣ́дателѧ, и҆ сказа́телѧ є҆ѵⷢ҇лїа, ѱало́мскими пѣ́сньми і҆а́кѡва всѝ восхва́лимъ: се́й бо рѣка̀ ꙗ҆ви́сѧ мы́сленнагѡ раѧ̀, дꙋшє́вныѧ бразды̑ нбⷭ҇ными тꙋ́чами напаѧ́ѧ, и҆ плодонѡ́сны показꙋ́ѧ хрⷭ҇тꙋ̀ бг҃ꙋ, подаю́щемꙋ всѣ̑мъ моли́твами є҆гѡ̀ ѡ҆чище́нїе, и҆ просвѣще́нїе, и҆ ве́лїю ми́лость.

И҆ ны́нѣ, пра́здника.

Вхо́дъ. Прокі́менъ днѐ, и҆ чтє́нїѧ г҃.

Собо́рнагѡ посла́нїѧ і҆а́кѡвлѧ чте́нїе.

[Глава̀ а҃] І҆а́кѡвъ бг҃ꙋ и҆ гдⷭ҇ꙋ і҆и҃сꙋ хрⷭ҇тꙋ̀ ра́бъ, ѻ҆бѣмана́десѧте колѣ́нома, и҆̀же въ разсѣ́ѧнїи, ра́доватисѧ. Всѧ́кꙋ ра́дость и҆мѣ́йте, бра́тїе моѧ̑, є҆гда̀ во и҆скꙋшє́нїѧ впа́даете разли̑чна, вѣ́дѧще, ꙗ҆́кѡ и҆скꙋше́нїе ва́шеѧ вѣ́ры содѣ́ловаетъ терпѣ́нїе: терпѣ́нїе же дѣ́ло соверше́нно да и҆́мать, ꙗ҆́кѡ да бꙋ́дете соверше́ни и҆ всецѣ́ли, ни въ че́мъ же лише́ни. А҆́ще же кто̀ ѿ ва́съ лише́нъ є҆́сть премꙋ́дрости, да про́ситъ ѿ даю́щагѡ бг҃а всѣ̑мъ нелицепрїе́мнѣ, и҆ не поноша́ющагѡ, и҆ да́стсѧ є҆мꙋ̀. Да про́ситъ же вѣ́рою, ничто́же сꙋмнѧ́сѧ: сꙋмнѧ́йсѧ бо ᲂу҆подо́бисѧ волне́нїю морско́мꙋ, вѣ́тры возмета́емꙋ и҆ развѣва́емꙋ. Да не мни́тъ бо человѣ́къ ѻ҆́нъ, ꙗ҆́кѡ прїи́метъ что̀ ѿ бг҃а. Мꙋ́жъ двоедꙋ́шенъ неꙋстро́енъ во всѣ́хъ пꙋте́хъ свои́хъ. Да хва́литсѧ же бра́тъ смире́нный въ высотѣ̀ свое́й: бога́тый же во смире́нїи свое́мъ: занѐ ꙗ҆́коже цвѣ́тъ травны́й ми́мѡ и҆́детъ. Возсїѧ́ бо со́лнце со зно́емъ, и҆ и҆зсꙋшѝ травꙋ̀, и҆ цвѣ́тъ є҆ѧ̀ ѿпадѐ, и҆ благолѣ́пїе лица̀ є҆ѧ̀ поги́бе: си́це и҆ бога́тый въ хожде́нїи свое́мъ ᲂу҆вѧда́етъ. Бл҃же́нъ мꙋ́жъ, и҆́же претерпи́тъ и҆скꙋше́нїе, занѐ и҆скꙋ́сенъ бы́въ, прїи́метъ вѣне́цъ жи́зни, є҆го́же ѡ҆бѣща̀ бг҃ъ лю́бѧщымъ є҆го̀.

Собо́рнагѡ посла́нїѧ і҆а́кѡвлѧ чте́нїе.

[Глава̀ а҃ сті́хъ г҃і] Никто́же и҆скꙋша́емь да глаго́летъ, ꙗ҆́кѡ ѿ бг҃а и҆скꙋша́емь є҆́смь: бг҃ъ бо нѣ́сть и҆скꙋси́тель ѕлы̑мъ, не и҆скꙋша́етъ же то́й никого́же. Кі́йждо же и҆скꙋша́етсѧ, ѿ своеѧ̀ по́хоти влеко́мь и҆ прельща́емь. Та́же по́хоть заче́нши ражда́етъ грѣ́хъ: грѣ́хъ же содѣ́ѧнъ ражда́етъ сме́рть. Не льсти́тесѧ, бра́тїѧ моѧ̑ возлю́блєннаѧ. Всѧ́ко даѧ́нїе бла́го, и҆ всѧ́къ да́ръ соверше́нъ свы́ше є҆́сть, сходѧ́й ѿ ѻ҆ц҃а̀ свѣ́тѡвъ, ᲂу҆ негѡ́же нѣ́сть премѣне́нїѧ, и҆лѝ преложе́нїѧ стѣ́нь. Восхотѣ́въ бо, породѝ на́съ сло́вомъ и҆́стины, во є҆́же бы́ти на́мъ нача́токъ нѣ́кїй созда́нїємъ є҆гѡ̀. Тѣ́мже, бра́тїѧ моѧ̑ возлю́блєннаѧ, да бꙋ́детъ всѧ́къ человѣ́къ ско́ръ ᲂу҆слы́шати, и҆ ко́сенъ глаго́лати, ко́сенъ во гнѣ́въ. Гнѣ́въ бо мꙋ́жа, пра́вды бж҃їѧ не содѣ́ловаетъ. Сегѡ̀ ра́ди ѿло́жше всѧ́кꙋ скве́рнꙋ, и҆ и҆збы́токъ ѕло́бы, въ кро́тости прїими́те всажде́нное сло́во, могꙋ́щее спастѝ дꙋ́шы ва́шѧ. Быва́йте же творцы̀ сло́ва, а҆ не то́чїю слы́шатели, прельща́юще себѐ самѣ́хъ. Занѐ а҆́ще кто̀ є҆́сть слы́шатель сло́ва, а҆ не творе́цъ, таковы́й ᲂу҆подо́бисѧ мꙋ́жꙋ, смотрѧ́ющꙋ лицѐ бытїѧ̀ своегѡ̀ въ зерца́лѣ: ᲂу҆смотри́ бо себѐ, и҆ ѿи́де, и҆ а҆́бїе забы̀, како́въ бѣ̀. Прини́кїй же въ зако́нъ соверше́нъ свобо́ды, и҆ пребы́въ, се́й не слы́шатель забы́тливъ бы́въ, но творе́цъ дѣ́ла, се́й блаже́нъ въ дѣ́ланїи свое́мъ бꙋ́детъ. А҆́ще кто̀ мни́тсѧ вѣ́ренъ бы́ти въ ва́съ, и҆ не ѡ҆бꙋздава́етъ ѧ҆зы́ка своегѡ̀, но льсти́тъ се́рдце своѐ, сегѡ̀ сꙋ́етна є҆́сть вѣ́ра. Вѣ́ра бо чиста̀ и҆ нескве́рна предъ бг҃омъ и҆ ѻ҆ц҃е́мъ сїѧ̀ є҆́сть, є҆́же посѣща́ти си́рыхъ и҆ вдови́цъ въ ско́рбехъ и҆́хъ, и҆ нескве́рна себѐ блюстѝ ѿ мі́ра.

Собо́рнагѡ посла́нїѧ і҆а́кѡвлѧ чте́нїе.

[Глава̀ в҃] Бра́тїе моѧ̑, не на лица̑ зрѧ́ще, и҆мѣ́йте вѣ́рꙋ гдⷭ҇а на́шегѡ і҆и҃са хрⷭ҇та̀ сла́вы. А҆́ще бо вни́детъ въ со́нмище ва́ше мꙋ́жъ, зла́тъ пе́рстень носѧ̀, въ ри́зѣ свѣ́тлѣ, вни́детъ же и҆ ни́щъ въ хꙋ́дѣ ѻ҆де́ждѣ, и҆ воззритѐ на носѧ́щаго ри́зꙋ свѣ́тлꙋ, и҆ рече́те є҆мꙋ̀: ты̀ сѧ́ди здѣ̀ до́брѣ, и҆ ни́щемꙋ рече́те: ты̀ ста́ни та́мѡ, и҆лѝ сѧ́ди здѣ̀ на подно́жїи мое́мъ: и҆ не разсмотри́сте въ себѣ̀, и҆ бы́сте сꙋдїи̑ помышле́нїй ѕлы́хъ. Слы́шите, бра́тїе моѧ̑ возлю́блєннаѧ, не бг҃ъ ли и҆збра̀ ни́щыѧ мі́ра сегѡ̀, бога̑ты въ вѣ́рѣ, и҆ наслѣ́дники црⷭ҇твїѧ, є҆́же ѡ҆бѣща̀ лю́бѧщымъ є҆го̀; вы́ же ᲂу҆кори́сте ни́щаго. не бога́тїи ли наси́лꙋютъ ва́мъ, и҆ ті́и влекꙋ́тъ вы̀ на сꙋди̑ща; Не ті́и ли хꙋ́лѧтъ до́брое и҆́мѧ, нарече́нное на ва́съ; А҆́ще ᲂу҆́бѡ зако́нъ соверша́ете ца́рскїй, по писа́нїю: возлю́биши и҆́скреннѧго своего̀, ꙗ҆́коже себѐ сама́го: до́брѣ творитѐ. А҆́ще ли на лица̑ зритѐ, то̀ грѣ́хъ содѣва́ете, ѡ҆блича́еми ѿ зако́на, ꙗ҆́коже престꙋ̑пницы. И҆́же бо ве́сь зако́нъ соблюде́тъ, согрѣши́тъ же во є҆ди́номъ, бы́сть всѣ̑мъ пови́ненъ. Рекі́й бо: не прелюбы̀ сотвори́ши, ре́клъ є҆́сть и҆̀: не ᲂу҆бїе́ши. а҆́ще же не прелюбы̀ сотвори́ши, ᲂу҆бїе́ши же, бы́лъ є҆сѝ престꙋ́пникъ зако́на. Та́кѡ глаго́лите и҆ та́кѡ твори́те, ꙗ҆́кѡ зако́номъ свобо́днымъ и҆мꙋ́щїи сꙋ́дъ прїѧ́ти. Сꙋ́дъ бо без̾ ми́лости не сотво́ршемꙋ ми́лости: и҆ хва́литсѧ ми́лость на сꙋдѣ̀.

На стїхо́внѣ стїхи̑ры, ст҃а́гѡ, гла́съ и҃. Поⷣ: Ѽ пресла́внагѡ чꙋдесѐ!

Бл҃же́нне бг҃ови́дче і҆а́кѡве, ꙳ ты̀ сло́ва гла́съ а҆́бїе воспрїе́мъ, ꙳ ѡ҆ ѻ҆те́ческомъ небре́глъ є҆сѝ ꙳ ᲂу҆гожде́нїи и҆ любвѝ: ꙳ ѡ҆ста́вль ᲂу҆̀бо житїѧ̀ смꙋще́нїе, ꙳ въ мы́сленное же преше́дъ. мо́ре, ꙳ сїѐ возмꙋти́лъ є҆сѝ бл҃гоче́стїѧ ᲂу҆чє́нїи, ꙳ и҆ зарѧ́ми премі́рными ꙳ твои́ми, бг҃облаже́нне.

Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.

Сло́ва самови́дче і҆а́кѡве, ꙳ нача́льника жи́зни, ꙳ и҆ ѻ҆ц҃ꙋ̀ бꙋ́дꙋщихъ ᲂу҆гожда́ѧ дѣѧ̑нїи, ꙳ і҆сма́ила всескве́рнаго ꙳ пе́рвенства, бл҃же́нне, лиши́лъ є҆сѝ, ꙳ чре́во ꙗ҆́кѡ бо́га вмѣнѧ́юща. ꙳ є҆го́же и҆ запѧ́лъ є҆сѝ, ꙳ и҆ на́га показа́лъ є҆сѝ ѻ҆те́ческагѡ покро́ва, ꙳ бл҃гослове́нїѧ же и҆ наслѣ́дїѧ неприча́стна.

Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

Кнѧ́зь поста́вленъ бы́лъ є҆сѝ, сла́вне, ꙳ ны́нѣ по все́й землѝ, ꙳ ѡ҆ тебѣ̀ ꙗ҆́коже пре́жде написа́сѧ, ꙳ ᲂу҆чени́къ бы́въ всѧ̑ сотво́ршагѡ, ꙳ и҆ ре́вностїю твое́ю теплѣ́йшею, ꙳ и҆ дерзнове́нїемъ непобѣди́мымъ ꙳ ᲂу҆бі́йство претерпѣ́лъ є҆сѝ, ꙳ ѿ честна́гѡ двоена́десѧтихъ ᲂу҆чени̑къ, бл҃же́нне, совокꙋпле́нїѧ, ꙳ пе́рвѣе ᲂу҆бива́емый.

Сла́ва, гла́съ а҃:

Хрⷭ҇тꙋ̀ послѣ́довалъ є҆сѝ, бжⷭ҇твенный і҆а́кѡве, и҆ мі́ръ возненави́дѣлъ є҆сѝ, сегѡ̀ ᲂу҆че́нїѧ въ сокро́вищи твое́мъ скры́въ, показа́лсѧ є҆сѝ а҆пⷭ҇лъ. тѣ́мже ше́дъ во ꙗ҆зы́ки, и҆ си́хъ пре́лестїю и҆ страстьмѝ ѡ҆мрачи́вшыѧсѧ дꙋ́шы, за́повѣдьми сп҃са просвѣти́лъ є҆сѝ, вѣ́ровати въ трⷪ҇цꙋ є҆диносꙋ́щнꙋю.

И҆ ны́нѣ, пра́здника.

Тропа́рь, гла́съ г҃.

А҆пⷭ҇ле ст҃ы́й і҆а́кѡве, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

И҆́нъ тропа́рь, гла́съ то́йже:

А҆пⷭ҇лъ хрⷭ҇то́въ бы́лъ є҆сѝ и҆збра́нный, и҆ бг҃осло́вꙋ возлю́бленномꙋ бра́тъ є҆диноро́дный, всехва́льне і҆а́кѡве, пою́щымъ тѧ̀ грѣхѡ́въ ѡ҆ставле́нїе и҆спросѝ, и҆ дꙋша́мъ на́шымъ ве́лїю ми́лость.

Сла́ва, и҆ ны́нѣ, пра́здника.

На ᲂу҆́трени, на Бг҃ъ гдⷭ҇ь, тропа́рь пра́здника два́жды: Сла́ва, а҆пⷭ҇ла: И҆ ны́нѣ, пра́здника.

По а҃-й каѳі́смѣ сѣда́ленъ а҆пⷭ҇ла. Сла́ва, и҆ ны́нѣ, пра́здника.

По в҃-й каѳі́смѣ сѣда́ленъ, гла́съ д҃:

Лꙋчꙋ̀ ꙗ҆́кѡ со́лнце пра́вды и҆спꙋсти́ тѧ хрⷭ҇то́съ, просвѣти́ти всю̀ зе́млю, а҆пⷭ҇ле сла́вный і҆а́кѡве, бжⷭ҇твенными твои́ми моли́твами ѡ҆зарѧ́еши, и҆ бжⷭ҇твеннымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ свѧтꙋ́ю па́мѧть твою̀.

Сла́ва, и҆ ны́нѣ, пра́здника.

По полѷеле́и, сѣда́ленъ, гла́съ и҃. Подо́бенъ: Премꙋ́дрости:

Зарѧ́ми свы́ше напо́лнивсѧ, и҆ свѣ́тлостїю бжⷭ҇твенною просвѣти́всѧ, а҆пⷭ҇ле і҆а́кѡве, на ѳавѡ́рстѣй горѣ̀ преѡбразꙋ́ющагосѧ ви́дѣлъ є҆сѝ зижди́телѧ и҆ гдⷭ҇а, и҆ гла́съ ᲂу҆слы́шати досто́йнѡ полꙋчи́лъ є҆сѝ. тѣ́мже и҆ вели̑кимъ воздаѧ́нїємъ сподо́билсѧ є҆сѝ, ꙗ҆́кѡ самови́децъ бы́въ и҆ ᲂу҆чени́къ бл҃года́ти, и҆ свидѣ́тель та̑инъ бж҃їихъ. молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, пра́здника.

Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю: Всѧ́кое дыха́нїе: Є҆ѵⷢ҇лїе, і҆ѡа́нна, зача́ло ѯ҃з. По н҃-мъ ѱалмѣ̀, стїхи́ра, гла́съ а҃: Хрⷭ҇тꙋ̀ послѣ́довалъ є҆сѝ: пи́сана на стїхо́внѣ Сла́ва.

Канѡ́нъ пра́здника, со і҆рмосо́мъ на ѕ҃. И҆ а҆пⷭ҇ла на и҃.

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца, спасѐ, пѣ́снь бг҃ови воспѣва́юща.

Твое́ю мре́жею ꙗ҆́кѡ лове́цъ и҆скꙋ́сенъ, ѿ прегрѣше́нїй глꙋбины̀ возве́дъ, бл҃же́нне, дꙋ́шꙋ мою̀ просвѣтѝ свѣтолꙋ́чными сїѧ̑нїи, и҆ похвали́ти твою̀ досто́йнѡ, ѽ бг҃оѧвле́нне і҆а́кѡве, па́мѧть, ᲂу҆ченичѐ, сподо́би.

Превѣ́чный, ѻ҆ц҃ꙋ̀ собезнача́льный, пресоверше́нный же бг҃ъ, вопло́щсѧ ꙗ҆ви́сѧ на землѝ ꙗ҆́кѡ чл҃вѣ́къ, и҆ содѣ́йственника бл҃года́ти показа̀, бл҃же́нне, и҆ слꙋжи́телѧ тѧ̀ премꙋ́дра, си́лою є҆гѡ̀ ᲂу҆крѣплѧ́ема.

Разꙋмѣ̀ твоеѧ̀ дꙋшѝ бл҃горо́дїе, тѧ̀ провѣ́децъ бг҃ъ, и҆ тве́рдость, ᲂу҆ченичѐ, и҆ непобори́мꙋ мы́сль, сла́вне, свои́мъ слꙋжи́телемъ лꙋ́чша поста́ви, ꙗ҆зы́кѡмъ возвѣща́юща.

Бг҃оро́диченъ:

Совѣ́та вели́кагѡ, ѻ҆́ч҃е, а҆́гг҃лъ, ѿ дв҃ы мт҃ре ꙗ҆́вльсѧ мі́рꙋ, пло́ть прїе́мь, ꙗ҆́кѡ добродѣ́тельми ᲂу҆кра́шена, ᲂу҆ченика́ тѧ показꙋ́етъ, и҆ бг҃огла́сника, і҆а́кѡве, словеса̀ є҆гѡ̀ вѣті́йствꙋюща.

Катава́сїѧ пра́здника.

Пѣ́снь г҃. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.

Свы́ше тѧ̀ дыха́нїе нꙋ́ждное ᲂу҆тѣ́шителѧ разже́гше, мꙋ́дра бг҃огла́сника, вѣті́йствꙋюща ꙗ҆́вѣ вели̑чїѧ показа̀, вопло́щшагѡсѧ сло́ва, є҆гѡ́же и҆ самови́децъ бы́лъ є҆сѝ.

Тѧ̀ ꙗ҆́коже стрѣлꙋ̀ и҆збра́ннꙋ, сло́вомъ и҆з̾ѡщре́ннꙋ, въ сердца̀ врагѡ́въ вонзѝ, растерза́ѧ дꙋ́шы сопроти́вныхъ, премꙋ́дре, и҆ плѣнѧ́ѧ, таи́нниче, си́хъ коры̑сти, і҆а́кѡве.

Нескве́рныѧ твоеѧ̀ дꙋшѝ ти́хость влⷣцѣ ᲂу҆зрѣ́сѧ, и҆ пре́жде зва́нїѧ, бл҃же́нне, достопрїѧ́тенъ є҆мꙋ̀ ꙗ҆ви́лсѧ є҆сѝ, ѽ і҆а́кѡве! и҆ смотре́нїѧ є҆гѡ̀ ᲂу҆чени́къ бы́лъ є҆сѝ.

Свѧще́ннымъ твои́мъ, мꙋ́дре, житїе́мъ и҆ свѣтоно́снымъ, є҆́же къ бг҃ꙋ сро́дствомъ, всебл҃же́нне, ᲂу҆краша́емь ꙗ҆́снѡ, и҆ соѻ́бщникъ показа́лсѧ є҆сѝ: и҆змла́да бо ꙗ҆ви́лсѧ є҆сѝ сло́ва ссе́льникъ.

Бг҃оро́диченъ:

Две́рь ꙗ҆ви́сѧ мы́сленнаѧ, восто́ка свы́ше, сꙋ́щымъ на землѝ ꙗ҆́вльшагѡсѧ, дв҃о: тобо́ю бо къ на́мъ сло́во прїи́де, спастѝ всѣ́хъ ѿ безслове́сїѧ, пречⷭ҇таѧ.

Конда́къ и҆ і҆́косъ пра́здника. Сѣда́ленъ а҆пⷭ҇ла, гла́съ в҃:

Оу҆лови́въ ꙗ҆зы́ки а҆пⷭ҇лъ сла́вный, и҆ наꙋчи́въ концы̀ земны̑ѧ тебѣ̀ кла́нѧтисѧ со ѻ҆ц҃е́мъ и҆ дх҃омъ, хрⷭ҇тѐ бж҃е: тогѡ̀ ра́ди ᲂу҆твердѝ цр҃ковь твою̀, и҆ вѣ̑рнымъ низпослѝ бл҃гослове́нїе твоѐ, є҆ди́не ми́лостиве и҆ чл҃вѣколю́бче.

Сла́ва, и҆ ны́нѣ, пра́здника, и҆лѝ бг҃оро́диченъ:

Премꙋ́дрость и҆ сло́во въ твое́мъ чре́вѣ заче́нши неѡпа́льнѡ, мт҃и бж҃їѧ, мі́рꙋ родила̀ є҆сѝ мі́ръ содержа́щаго, и҆ во ѡ҆б̾ѧ́тїѧхъ понесла̀ є҆сѝ всѧ̑ носѧ́щаго, пита́телѧ всѣ́хъ и҆ творца̀ тва́ри. тѣ́мже молю́ тѧ, всест҃а́ѧ дв҃о, и҆ вѣ́рнѡ сла́влю тѧ̀, и҆зба́витисѧ мѝ ѿ прегрѣше́нїй, и҆ въ де́нь сꙋда̀, є҆гда̀ предста́ти и҆́мамъ предъ лице́мъ созда́телѧ моегѡ̀, влⷣчце дв҃о чⷭ҇таѧ, твою̀ по́мощь тогда̀ пода́ждь мѝ: всѧ̑ бо мо́жеши, є҆ли̑ка хо́щеши, всепѣ́таѧ.

Пѣ́снь д҃. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Проповѣ́дникъ хрⷭ҇то́въ бы́въ, бжⷭ҇твенный і҆а́кѡве, ты̀ зва́нъ ᲂу҆́бѡ, ско́рѡ послѣ́довалъ є҆сѝ, ѻ҆те́ческꙋю любо́вь презрѣ́въ, и҆ вѣ̑чнаѧ и҆змѣни́въ текꙋ́щими: тѣ́мъ неизрече́ннагѡ нбⷭ҇нагѡ наслѣ́дїѧ сподо́билсѧ є҆сѝ, бл҃же́нне приснопа́мѧтне.

Ѽ те́плагѡ жела́нїѧ твоегѡ̀ ко влⷣцѣ хрⷭ҇тꙋ̀! ты́ бо сегѡ̀ ѕѣлѡ̀ возжела́лъ є҆сѝ, сїѧ́нїемъ тогѡ̀ просвѣ́щсѧ, ꙗ҆́коже и҆ воѡбрази́тисѧ, и҆ ꙗ҆ви́тисѧ всѣ̑мъ свѣ́тъ вторы́й, пе́рвагѡ зарѧ́ми ѡ҆зари́всѧ и҆ сла́вою, всече́стне, блаже́нне і҆а́кѡве.

Житїѐ че́стно и҆мѣ́лъ є҆сѝ и҆ пречꙋ́дно, жела́нїемъ бо жела́нїе неѡдержи́мо прїе́мь, жела̑нїи бг҃онача́лїѧ соверше́ннагѡ бл҃же́нства дости́глъ є҆сѝ, бг҃ови́дче, со безпло́тными поѧ̀: си́лѣ твое́й сла́ва, чл҃вѣколю́бче.

Всего̀ себѐ манове́нїю ѿда́въ влⷣчню, ᲂу҆ченичѐ бг҃озра́чне, добродѣ́тельми взѧ́лсѧ є҆сѝ ꙗ҆вле́ннѡ къ высотѣ̀, и҆ бжⷭ҇твенномꙋ вои́стиннꙋ кра́ю: и҆ ѿтꙋ́дꙋ цѣле́бъ рѣ́ки и҆сточа́еши, па́мѧть твою̀ вѣ́рнѡ сла́вѧщымъ.

Бг҃оро́диченъ:

Ты̀ вѣ́рныхъ похвала̀ є҆сѝ, безневѣ́стнаѧ, ты̀ предста́тельница, ты̀ и҆ прибѣ́жище хрⷭ҇тїа́нъ, стѣна̀ и҆ приста́нище: къ сн҃ꙋ бо твоемꙋ̀ мольбы̑ но́сиши, всенепоро́чнаѧ, и҆ спаса́еши ѿ бѣ́дъ, вѣ́рою и҆ любо́вїю бцⷣꙋ чⷭ҇тꙋю тебѐ зна́ющыѧ.

Пѣ́снь є҃. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Но́въ ꙗ҆́коже и҆лїа̀ ре́вностїю разжига́емь, непоко́ршыѧсѧ проповѣ́данїю твоемꙋ̀ попали́ти восхотѣ́лъ є҆сѝ, сла́вне: но возбранѝ тебѣ̀ хоти́тель милосе́рдїѧ, наꙋча́ѧ кро́тости бл҃года́тнѣй.

Вше́дъ добродѣ́телїю коне́чною впери́мь, любвѐ ра́ди лꙋ́чшихъ прⷭ҇то́лъ влⷣки возжела́лъ є҆сѝ, премꙋ́дре, нача̑льнаѧ держа́ти, не ꙗ҆́кѡ жела́ѧ сла́вы сꙋ́етныѧ, но зрѣ́ти посредѝ є҆го́же возжела́лъ є҆сѝ.

Превзы́де ᲂу҆ста́вы, сп҃се, і҆а́кѡвъ человѣ́чества, во твою́ бо си́лꙋ ꙗ҆́кѡ въ ри́зꙋ ѡ҆бле́ксѧ, и҆сцѣле́нїѧ то́читъ рѣ́ки и҆ чꙋде́съ, и҆ просвѣща́етъ вѣ́рою концы̀.

Свѣ́телъ тѧ̀ ѻ҆́блакъ сло́ва, ѡ҆блиста́юща сла́вою ѡ҆боже́на, на ѳавѡ́рстѣй горѣ̀ ѡ҆сѣнѝ, бл҃же́нне і҆а́кѡве, и҆ гла́съ слы́шати ѻ҆ч҃ескїй сподо́билсѧ є҆сѝ, и҆звѣствꙋ́ѧй тогѡ̀ сн҃овство̀.

Пѣ́снь ѕ҃. І҆рмо́съ:

Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ, ꙗ҆́кѡ петро́ви, ѽ ᲂу҆пра́вителю, и҆ спасѝ.

Стрꙋи̑, ꙗ҆́кѡ ѿ и҆сто́чника, и҆сцѣле́нїй непреста́ннѡ и҆злива́ѧ, и҆ просвѣще́нїе ᲂу҆че́нїѧ бл҃гоче́стнѡ и҆сточа́ѧ, мꙋ́дре, дꙋ́шы бл҃гоче́стнѡ любо́вїю, і҆а́кѡве, пристꙋпа́ющыѧ просвѣща́еши, пребл҃же́нне.

Сосꙋ́дъ вмѣстѧ́щь влⷣка ѡ҆брѣ́тъ тѧ̀, пребл҃же́нне, своегѡ̀ бога́тнагѡ и҆ честна́гѡ даѧ́нїѧ, ѡ҆би́лꙋетъ дарова̑нїи, и҆́же па́че ᲂу҆ма̀ та́инствъ, слꙋжи́телю присносꙋ́щныѧ жи́зни.

Оу҆мерщвле́нїе на́съ ра́ди влⷣка восхотѣ̀ воспрїѧ́ти, ме́ртвыхъ винꙋ̀ и҆́стиннагѡ воскрⷭ҇нїѧ, ꙗ҆́кѡ мꙋ́дра таи́нника, бл҃же́нне, тѧ̀ взѧ́тъ содѣ́тельника, въ нощѝ, въ не́йже предаѧ́шесѧ.

Бг҃оро́диченъ:

Бе́зднꙋ щедро́тъ ро́ждшаѧ, бцⷣе дв҃о, ѿ печа́льныхъ житїѧ̀ дꙋ́шꙋ мою̀ спасѝ, и҆ ра́дости дꙋхо́вныѧ двє́ри мѝ ѿве́рзи: на тѧ́ бо є҆ди́нꙋ наде́ждꙋ мою̀ возложи́хъ.

Конда́къ, гла́съ в҃. Подо́бенъ: Вы́шнихъ и҆щѧ̀:

Гла́съ бжⷭ҇твенный слы́шавъ призыва́ющь тѧ̀, любо́вь ѻ҆тца̀ презрѣ́лъ є҆сѝ, и҆ прите́клъ є҆сѝ ко хрⷭ҇тꙋ̀, і҆а́кѡве, съ сро́дникомъ твои́мъ, сла́вне: съ ни́мже сподо́билсѧ є҆сѝ ви́дѣти гдⷭ҇не бжⷭ҇твенное преѡбраже́нїе.

І҆́косъ:

Вкꙋ́пѣ сы́й съ бра́томъ въ се́лѣхъ нбⷭ҇ныхъ, и҆̀же ст҃а̑ѧ ны́нѣ а҆га́рѧны попира́ющыѧ, нога́ми скве́рными и҆ нечи́стыми ходѧ́щыѧ, бжⷭ҇твенными ва́шими моли́твами ѿжени́те, и҆ мꙋчи́телємъ ᲂу҆мышлє́нїѧ ѿсѣ́кше, и҆ и҆̀же ѿ ни́хъ мно́жества ра́ди согрѣше́нїй на́шихъ, держи́мыхъ ны́нѣ, свобожде́нїѧ сподо́бите: ꙗ҆́кѡ да во є҆ди́но собра́вшесѧ, ви́димъ гдⷭ҇не бжⷭ҇твенное преѡбраже́нїе.

Пѣ́снь з҃. І҆рмо́съ:

Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ча́шꙋ и҆спи́лъ є҆сѝ, ꙗ҆́коже ѡ҆бѣща́лсѧ влⷣцѣ хрⷭ҇тꙋ̀, креще́нїемъ сегѡ̀ ты̀ крести́лсѧ є҆сѝ, бг҃облаже́нне. є҆мꙋ́же ны́нѣ ᲂу҆се́рднѡ зове́ши, ра́дꙋѧсѧ: бл҃гослове́нъ бг҃ъ ѻ҆тє́цъ на́шихъ.

Заре́ю ѡ҆сїѧ́емь бг҃овидѣ́нїѧ ꙗ҆ви́лсѧ є҆сѝ, і҆а́кѡве, сегѡ̀ ра́ди тѧ̀ вѣнце́мъ црⷭ҇твїѧ бл҃года́тель хрⷭ҇то́съ ᲂу҆краша́етъ, со а҆́гг҃лы пою́ща: бл҃гослове́нъ бг҃ъ ѻ҆тє́цъ на́шихъ.

Сѐ тебѣ̀ и҆спо́лни ѡ҆бѣща̑нїѧ великода́вецъ, къ немꙋ̀ возне́ссѧ подо́бїемъ страда́нїй є҆гѡ̀: є҆мꙋ́же предстоѧ̀ ны́нѣ зове́ши ра́дꙋѧсѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Дво́ицꙋ ᲂу҆́бѡ є҆стество́мъ, но не лице́мъ, мт҃и, проповѣ́дꙋемъ, и҆зъ тебє̀ воплоще́ннаго. є҆го́же пло́тїю и҆з̾ѡбража́емъ, и҆ покланѧ́емсѧ зра́ка воѡбраже́нїю, тебє̀ ра́ди бг҃ꙋ прими́ршїисѧ, чⷭ҇таѧ.

Пѣ́снь и҃. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

А҆враа́мское предложе́нїе ты̀, бг҃ови́дче, стѧжа́лъ є҆сѝ, призва́вшемꙋ тѧ̀ хрⷭ҇тꙋ̀ послѣ́дꙋѧ: и҆ пресвѣ́телъ слꙋжи́тель бы́лъ є҆сѝ є҆мꙋ̀, ꙗ҆́кѡ содѣ́телю и҆ и҆зба́вителю поѧ̀: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Крѣпча́йше ꙗ҆ви́сѧ гро́ма твоѐ провозглаше́нїе зако́ннагѡ ѻ҆́браза, шꙋмѣ́нїе. хрⷭ҇та́ бо возгремѣ́лъ є҆сѝ вселе́ннѣй все́й, бг҃а и҆ содѣ́телѧ, и҆ и҆зба́вителѧ, поѧ̀: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Оу҆диви́лсѧ є҆сѝ, сла́вне, мꙋче́нїѧ свѣ́тлостїю, и҆ бл҃гоче́стїѧ и҆́стиннымъ просвѣще́нїемъ, ꙗ҆́кѡ кнѧ́зь а҆пⷭ҇лъ поста́вленъ бы́лъ є҆сѝ по все́й землѝ, содѣ́телю и҆ и҆зба́вителю поѧ̀: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те хрⷭ҇та̀ во вѣ́ки.

Бг҃оро́диченъ:

Виті́йстїи ѧ҆зы́цы тебѐ воспѣ́ти не мо́гꙋтъ, ѽ бг҃ороди́тельнице мр҃і́е бг҃оневѣ́сто! бг҃а бо родила̀ є҆сѝ сꙋ́щаго надъ всѣ́ми, ѻ҆трокови́це чⷭ҇таѧ, содѣ́телѧ и҆ и҆зба́вителѧ, є҆мꙋ́же вопїе́мъ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Пѣ́снь ѳ҃. І҆рмо́съ:

Оу҆жасе́сѧ ѡ҆ се́мъ нб҃о и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Свѧ́тѡ преше́дъ твоѐ житїѐ, ст҃ы́хъ селе́нїѧ дости́глъ є҆сѝ, и҆дѣ́же ра́дꙋѧсѧ зарю̀ зри́ши трисїѧ́ннꙋю, є҆ѧ́же наслажда́ѧсѧ, премꙋ́дре, и҆спо́лненъ весе́лїѧ, пѣвцы̀ твоеѧ̀ ра́дости, пребл҃же́нне, покажѝ, твои́ми моли́твами, ѽ і҆а́кѡве!

Ви́дѣти тѧ̀ ѕлодѣ́и и҆ ᲂу҆бі̑йцы, ꙗ҆́коже твоегѡ̀ влⷣки пре́жде не терпѧ́ще: тѣ́хъ бо дѣѧ̑нїѧ ᲂу҆корѧ́ѧ, твоегѡ̀ житїѧ̀ предложе́нїемъ ѡ҆бличи́лъ є҆сѝ: ᲂу҆бива́ютъ мече́мъ подража́телѧ хрⷭ҇та̀, распѧ́таго пло́тїю за человѣ́ки, ѽ бг҃оглаго́ливе пребл҃же́нне!

Ѻ҆рꙋ́жїемъ нбⷭ҇нымъ томле́нъ бы́въ, ра́нами и҆́рѡдъ поги́бе, ꙗ҆́кѡ твоѧ̑, сло́ве, слꙋжи́тели и҆ ᲂу҆ченикѝ, и҆̀хже а҆пⷭ҇лы наре́клъ є҆сѝ, ᲂу҆бива́ти не дово́ленъ бы́сть ѻ҆каѧ́нный: тѣ́мже тѧ̀, пра́ведномꙋ промышле́нїю бл҃года́телѧ ᲂу҆ди́вльшесѧ, велича́емъ.

Бг҃оро́диченъ:

Ꙗ҆ви́ласѧ є҆сѝ, ѽ дв҃о мт҃и бж҃їѧ, па́че є҆стества̀ ро́ждши пло́тїю бг҃а сло́ва, є҆го́же ѻ҆ц҃ъ ѿры́гнꙋ ѿ се́рдца своегѡ̀, пре́жде всѣ́хъ вѣ̑къ, ꙗ҆́кѡ бла́гъ: є҆го́же ны́нѣ и҆ тѣле́съ превы́шша разꙋмѣва́емъ, а҆́ще и҆ въ тѣ́ло ѡ҆блече́сѧ.

Свѣти́ленъ. Подо́бенъ: Жєны̀ ᲂу҆слы́шите:

І҆а́кѡва воспое́мъ зеведе́ова всѝ: со хрⷭ҇то́мъ бо взы́де на го́рꙋ ѳавѡ́рскꙋю, и҆ зри́тель бы́сть бжⷭ҇твеннагѡ преѡбраже́нїѧ, и҆ соше́дъ, проповѣ́даше въ четвероконе́чнꙋю всю̀, съ петро́мъ и҆ і҆ѡа́нномъ.

Два́жды.

Сла́ва, и҆ ны́нѣ, пра́здника.

На хвали́техъ стїхи̑ры пра́здника, г҃, и҆ а҆пⷭ҇ла, г҃: гла́съ и҃.

Подо́бенъ: Ѽ пресла́внагѡ чꙋдесѐ!

Бл҃же́нне, бг҃ови́дче і҆а́кѡве, ꙳ ты̀ сло́ва гла́съ а҆́бїе воспрїе́мъ, ꙳ ѡ҆ ѻ҆те́ческомъ небре́глъ є҆сѝ ꙳ ᲂу҆гожде́нїи и҆ любвѝ. ꙳ ѡ҆ста́вль ᲂу҆̀бо житїѧ̀ смꙋще́нїе, ꙳ въ мы́сленное же преше́дъ мо́ре, ꙳ сїѐ возмꙋти́лъ є҆сѝ ꙳ благоче́стїѧ ᲂу҆чє́нїи, ꙳ и҆ зарѧ́ми премі́рными твои́ми, бг҃облаже́нне.

Сло́ва самови́дче і҆а́кѡве, ꙳ нача́льника жи́зни, ꙳ и҆ ѻ҆ц҃ꙋ̀ бꙋ́дꙋщихъ ᲂу҆гожда́ѧ дѣѧ̑нїи, ꙳ і҆сма́ила всескве́рнаго ꙳ пе́рвенства, блаже́нне, лиши́лъ є҆сѝ, ꙳ чре́во ꙗ҆́кѡ бо́га вмѣнѧ́юща: ꙳ є҆го́же и҆ запѧ́лъ є҆сѝ, ꙳ и҆ на́га показа́лъ є҆сѝ ѻ҆те́ческагѡ покро́ва, ꙳ благослове́нїѧ же и҆ наслѣ́дїѧ неприча́стна.

Кнѧ́зь поста́вленъ бы́лъ є҆сѝ, сла́вне, ꙳ ны́нѣ по все́й землѝ, ꙳ ѡ҆ тебѣ̀ ꙗ҆́коже пре́жде написа́сѧ, ꙳ ᲂу҆чн҃и́къ бы́въ всѧ̑ сотво́ршагѡ, ꙳ и҆ ре́вностїю твое́ю теплѣ́йшею, ꙳ и҆ дерзнове́нїемъ непобѣди́мымъ, ꙳ ᲂу҆бі́йство претерпѣ́лъ є҆сѝ, ꙳ ѿ честна́гѡ двоена́десѧтихъ ᲂу҆чени̑къ, бл҃же́нне, совокꙋпле́нїѧ, ꙳ пе́рвѣе ᲂу҆бива́емь.

Сла́ва, а҆пⷭ҇ла, гла́съ ѕ҃, самогла́сенъ:

Премꙋ́дрый ло́вче, ст҃ы́й ᲂу҆ченичѐ, дѣ́лателю сп҃совъ, и҆ сказа́телю тогѡ̀ стрⷭ҇те́й, и҆́же тва́рь вѣ́рою ѡ҆бте́къ, и҆ прельщє́нныѧ ꙗ҆зы́ки собра́въ, и҆ бг҃ꙋ приве́дъ, ꙗ҆́кѡ кади́ло до́брое на небеса̀ возве́лсѧ є҆сѝ. тѣ́мже предстоѧ̀ сꙋдїѝ, молѝ и҆зба́витисѧ на́мъ ѿ беззако́нїй на́шихъ, и҆ въ де́нь сꙋ́дный спасти́сѧ мꙋче́нїѧ.

И҆ ны́нѣ, пра́здника. Славосло́вїе вели́кое.

На лїтꙋргі́и, Бл҃жє́нна пра́здника, пѣ́снь рѧдова́ѧ: И҆ а҆пⷭ҇ла пѣ́снь г҃, на д҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: А҆пⷭ҇лъ, дѣѧ́нїй, зача́ло к҃ѳ. А҆ллилꙋ́їа, гла́съ а҃: И҆сповѣ́дѧтъ небеса̀ чꙋдеса̀ твоѧ̑, гдⷭ҇и. Є҆ѵⷢ҇лїе лꙋкѝ, зача́ло з҃і. Прича́стенъ: Во всю̀ зе́млю: