Мѣ́сѧца тогѡ́же въ ѕ҃-й де́нь.

И҆́же во ст҃ы́хъ ѻ҆тца̀ на́шегѡ нїкола́а, а҆рхїепі́скопа мѷрлѷкі́йскихъ чꙋдотво́рца.

А҆́ще хо́щетъ настоѧ́тель, твори́тъ бдѣ́нїе. На ма́лѣй вече́рни,

На Гдⷭ҇и, воззва́хъ, стїхи̑ры, на д҃, гла́съ д҃. Поⷣ: Ꙗ҆́кѡ до́блѧ:

Мѵ́ромъ бжⷭ҇твеннымъ ꙳ тѧ̀ пома́за бжⷭ҇твеннаѧ бл҃года́ть дх҃а, ꙳ мѵ́рѧнѡмъ предсѣда́тельствовавша, ꙳ и҆ мѷроблагоꙋха́вша добродѣ́тельми, ꙳ свѧще́ннѣйше, мі́ра концы̀, ꙳ сладкодохнове́нными же твои́ми мл҃твами ꙳ ѕлосмра̑дныѧ прогонѧ́ща стра̑сти всегда̀. ꙳ сегѡ̀ ра́ди тѧ̀ вѣ́рою бл҃гохва́лимъ, ꙳ и҆ па́мѧть твою̀ всесвѧтꙋ́ю соверша́емъ, нїко́лае.

Ꙗ҆́кѡ ѡ҆сїѧ́телѧ тѧ̀ незаходи́маго, ꙳ ꙗ҆́кѡ свѣти́льника всемі́рнаго, ꙳ на тве́рди возсїѧ́вша ꙳ цр҃ко́внѣй, нїко́лае, ꙳ и҆ мі́ръ просвѣща́юща, ꙳ и҆ бѣ́дъ лю́тыхъ мглꙋ̀ ѿгонѧ́ща, ꙳ и҆ и҆з̾има́юща печа́лей зимы̀, и҆ тишинꙋ̀ содѣ́ловающа глꙋбо́кꙋю, ꙳ по до́лгꙋ ᲂу҆блажа́емъ.

И҆ здѣ̀ сы́й, и҆ ꙗ҆влѧ́ѧсѧ въ со́нїихъ, нїко́лае, ꙳ и҆̀же непра́веднѡ и҆мꙋ́щыѧ ᲂу҆мре́ти спа́слъ є҆сѝ, ꙗ҆́кѡ сострада́теленъ, ꙳ ꙗ҆́кѡ благолюби́вый, ꙳ ꙗ҆́кѡ и҆зба́витель теплѣ́йшїй, ꙳ ꙗ҆́кѡ предста́тель и҆́стинный ꙳ вѣ́рнѡ просѧ́щихъ твоегѡ̀ защище́нїѧ, ꙳ свѧще́ннѣйшїй ѻ҆́ч҃е, а҆́гг҃лѡвъ сограждани́не, ꙳ а҆пⷭ҇лѡвъ и҆ прⷪ҇ро́кѡвъ равностоѧ́телю.

Пресла́вное житїѐ твоѐ ꙳ всю́дꙋ преди́вна тѧ̀ показа̀, ꙳ бг҃омꙋ́дре ѻ҆́ч҃е свѧще́ннѣйшїй, ст҃и́телей благолѣ́пїе, ꙳ преподо́бныхъ ᲂу҆краше́нїе. ꙳ и҆ ꙗ҆́кѡ со́лнце на землѝ лꙋчѝ распросте́ръ, ꙳ ѡ҆зари́лъ є҆сѝ вѣ́рныхъ сердца̀, ꙳ соверша́ющихъ свѣтоно́снꙋю твою̀ и҆ бжⷭ҇твеннꙋю па́мѧть, ꙳ всеблаже́нне нїко́лае.

Сла́ва, гла́съ ѕ҃.

Возсїѧ̀, ꙗ҆́коже со́лнце, твоѧ̀, ст҃и́телю, па́мѧть, вѣ́рныхъ сердца̀ мы́сленнѡ просвѣща́ющи, ю҆́же и҆ мы̀ свѣ́тлѡ соверша́юще дне́сь, моле́бнѡ тебѣ̀ вопїе́мъ: ра́дꙋйсѧ, держа́во цѣломꙋ́дрїѧ, непорабоще́нно дꙋшѝ соблю́дъ достоѧ́нїе, воздержа́нїѧ щито́мъ ѡ҆бложи́всѧ: ра́дꙋйсѧ, па́стырю и҆ ᲂу҆чи́телю хрⷭ҇тоимени́тыхъ люде́й твои́хъ: ра́дꙋйсѧ, цр҃ко́вное ᲂу҆краше́нїе, а҆рхїере́євъ добро́то, мона́шествꙋющихъ похвало̀: нїко́лае пресвѧще́нне, всебл҃же́нне ѻ҆́ч҃е, хрⷭ҇та̀ бг҃а молѝ непреста́ннѡ, ми́ръ пода́ти вселе́ннѣй, и҆ сп҃стѝ дꙋ́шы на́шѧ.

И҆ ны́нѣ, бг҃оро́диченъ: Никто́же притека́ѧй къ тебѣ̀:

На стїхо́внѣ стїхи̑ры, гла́съ ѕ҃. Поⷣ: Тридне́венъ воскре́слъ є҆сѝ:

Нїко́лае бл҃же́нне, припа́дающа мѧ̀ ᲂу҆ще́дри, молю́сѧ тебѣ̀: и҆ ѻ҆́чи, премꙋ́дре, просвѣтѝ дꙋшѝ моеѧ̀, да чи́стѣ ᲂу҆зрю̀ свѣтода́вца и҆ ще́драго.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Врагѡ́въ, и҆́щꙋщихъ ѕлосотвори́ти мнѣ̀, свѧ́те, и҆зми́ мѧ, дерзнове́нїе къ бг҃ꙋ ꙗ҆́кѡ и҆мѣ́ѧ, і҆ера́рше нїко́лае блаже́нне, и҆ ѿ мꙋже́й крове́й спаси́ мѧ.

Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Приста́нище тѧ̀ небꙋ́рное, и҆ стѣ́нꙋ неѡбори́мꙋю, і҆ера́рше, тѧ̀ стѧжа́хомъ вѣ́рнїи, и҆ сто́лпъ ᲂу҆твержде́нїѧ, и҆ две́рь покаѧ́нїѧ, и҆ наста́вника дꙋ́шъ, и҆ побо́рника.

Сла́ва, и҆ ны́нѣ, бг҃оро́диченъ:

Возревнова́въ, сопе́рникъ, проти́вꙋ ста́дꙋ твоемꙋ̀, пречⷭ҇таѧ, на кі́йждо де́нь и҆́щетъ лꙋка́вый снѣ́дь сотвори́ти: но ты̀, бцⷣе, тогѡ̀ вре́да и҆зми́ ны.

Тропа́рь, гла́съ д҃:

Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀ ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ: ѻ҆́ч҃е свѧщеннонача́льниче нїко́лае, молѝ хрⷭ҇та̀ бг҃а, спасти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:

На вели́цѣй вече́рни, Бл҃же́нъ мꙋ́жъ, а҃-й а҆нтїфѡ́нъ.

На Гдⷭ҇и, воззва́хъ, стїхи̑ры на и҃, гла́съ в҃. Поⷣ: Є҆гда̀ ѿ дре́ва тѧ̀:

Въ мѵ́рѣхъ пожи́въ чꙋ́вственнѡ, мѵ́ро вои́стиннꙋ ꙗ҆ви́лсѧ є҆сѝ, мѵ́ромъ пома́завсѧ ᲂу҆́мнымъ, свѧ́те нїко́лае, свѧти́телю хрⷭ҇то́въ: и҆ благоꙋха́еши ли́ца, вѣ́рою и҆ любо́вїю твою̀ всесла́внꙋю па́мѧть соверша́ющихъ при́снѡ, разрѣша́ѧ бѣ́дъ и҆ напа́стей и҆ скорбе́й си́хъ, ѻ҆́ч҃е, къ бг҃ꙋ твои́ми моли́твами.

Побѣ́ды тезоимени́тъ вои́стиннꙋ, вѣ̑рнымъ лю́демъ ꙗ҆ви́лсѧ є҆сѝ въ напа́стехъ крѣ́покъ, свѧ́те нїко́лае, свѧти́телю хрⷭ҇то́въ: вездѣ́ бо призыва́емь, бы́стрѡ предварѧ́еши любо́вїю притека́ющихъ подъ кро́въ тво́й: ты́ бо во днѝ и҆ но́щи вѣ̑рнымъ ꙗ҆влѧ́ѧсѧ, спаса́еши ѿ напа́стей и҆ ѡ҆бстоѧ́нїй.

Ꙗ҆ви́лсѧ є҆сѝ кѡнстанті́нꙋ царю̀ и҆ а҆вла́вїю во снѣ̀, и҆ си̑мъ стра́хъ вложи́въ, си́це тѣ̑мъ ре́клъ є҆сѝ: разрѣши́те ᲂу҆̀бо вско́рѣ, ꙗ҆̀же держитѐ свѧ̑занныѧ въ темни́цѣ, непови́нни бо сꙋ́ть беззако́ннагѡ заколе́нїѧ. ѻ҆ба́че а҆́ще преслꙋ́шаеши менє̀, мольбꙋ̀ сотворю̀ царю̀ на тѧ̀, ко гдⷭ҇ꙋ молѧ́сѧ.

Ве́лїй застꙋ́пникъ и҆ те́плый въ бѣда́хъ ѡ҆брѣта́ющымсѧ є҆сѝ, сла́вне, свѧ́те нїко́лае, свѧщеннопроповѣ́дниче хрⷭ҇то́въ, сꙋ́щымъ на землѝ и҆ пла́вающымъ, сꙋ́щымъ дале́че и҆ бли́зъ ѡ҆брѣта́ющымсѧ, ꙗ҆́кѡ ѕѣлѡ̀ ми́лостивнѣйшїй и҆ моле́бникъ крѣ́пкїй. тѣ́мже, соше́дшесѧ, вопїе́мъ: моли́сѧ ко гдⷭ҇ꙋ, ꙗ҆́кѡ да всѧ́кагѡ и҆зба́вимсѧ ѡ҆бстоѧ́нїѧ.

И҆́ны стїхи̑ры, гла́съ то́йже. Подо́бенъ: Кі́ими похва́льными:

Кі́ими похва́льными вѣнцы̑ ᲂу҆вѧзе́мъ ст҃и́телѧ; пло́тїю въ мѵ́рѣхъ сꙋ́ща, и҆ дꙋхо́внѡ всѣ̑мъ достиза́юща, чи́стѣ того̀ лю́бѧщымъ: всѣ́хъ предста́телѧ и҆ застꙋ́пника, и҆ всѣ́хъ ско́рбныхъ ᲂу҆тѣ́шителѧ: и҆ всѣ́хъ сꙋ́щихъ въ бѣда́хъ прибѣ́жище, благоче́стїѧ столпа̀, вѣ́рныхъ побо́рника. є҆гѡ́же ра́ди шата̑нїѧ врагѡ́въ хрⷭ҇то́съ низложѝ, и҆мѣ́ѧй ве́лїю ми́лость.

Два́жды.

Кі́ими пѣ́сненными пѣ̑нїи похва́лимъ ст҃и́телѧ; нече́стїѧ противоборца̀ и҆ благоче́стїѧ побо́рника: цр҃кве первостоѧ́телѧ, вели́каго застꙋ́пника же и҆ ᲂу҆чи́телѧ, всѧ̑ ѕлосла̑вныѧ посрамлѧ́юща: потреби́телѧ а҆́рїева, и҆ тогѡ̀ посо́бникѡвъ. є҆гѡ́же ра́ди си́хъ шата́нїе хрⷭ҇то́съ низложѝ, и҆мѣ́ѧй ве́лїю ми́лость.

Кі́ими проро́ческими пѣ́сньми похва́лимъ ст҃и́телѧ и҆́же дале́че сꙋ́щаѧ прови́дѧща, и҆ ѿстоѧ̑щаѧ ꙗ҆́кѡ бли́зъ сꙋ́ща проро́чествꙋюща нело́жнѡ, и҆ всю̀ вселе́ннꙋю назира́юща, и҆ всѧ̑ ѡ҆би̑димыѧ и҆збавлѧ́юща, во снѣ̀ ꙗ҆́вльшасѧ царю̀ бг҃омꙋ́дромꙋ, и҆ дре́вле свѧ̑занныѧ заколе́нїѧ непра́веднагѡ и҆зба́вльша, и҆ да́рꙋюща ве́лїю ми́лость;

Сла́ва, гла́съ ѕ҃:

Ст҃и́телей ᲂу҆добре́нїе и҆ ѻ҆тцє́въ сла́вꙋ, и҆сто́чника чꙋде́съ и҆ вѣ́рныхъ застꙋ́пника вели́каго, соше́дшесѧ, ѽ празднолю́бцы, пѣ́сненными похвала́ми воспои́мъ, глаго́люще: ра́дꙋйсѧ, мѵ́рѧнѡмъ храни́телю, и҆ первосѣда́телю честны́й, и҆ сто́лпе неподви́жимый: ра́дꙋйсѧ, свѣти́льниче всесвѣ́тлый, и҆́же мїрскі̑ѧ концы̀ просвѣща́ѧ чꙋдесы̑: ра́дꙋйсѧ, скорбѧ́щихъ бжⷭ҇твеннаѧ ра́досте, и҆ ѡ҆би́димыхъ те́плый предста́телю. и҆ ны́нѣ, всебл҃же́нне нїко́лае, не преста́й молѧ́сѧ хрⷭ҇тꙋ̀ бг҃ꙋ, ѡ҆ вѣ́рою и҆ любо́вїю чтꙋ́щихъ приснора́достнꙋю и҆ всепра́зднственнꙋю па́мѧть твою̀.

И҆ ны́нѣ, предпра́зднства, гла́съ то́йже:

Верте́пе, бл҃гоꙋкраси́сѧ, а҆́гница бо грѧде́тъ, чревоносѧ́щи хрⷭ҇та̀: ꙗ҆́сли же, под̾ими́те сло́вомъ разрѣши́вшаго ѿ безслове́снагѡ дѣѧ́нїѧ на́съ земноро́дныхъ. па́стырїе, свирѧ́юще, свидѣ́тельствꙋйте чꙋдесѝ стра́шномꙋ: и҆ волсвѝ ѿ персі́ды, зла́то и҆ лїва́нъ и҆ смѵ́рнꙋ цр҃ю̀ принеси́те, ꙗ҆́кѡ ꙗ҆ви́сѧ гдⷭ҇и и҆зъ дв҃ы мт҃ре. є҆мꙋ́же, и҆ прини́кши, ра́бски мт҃и поклони́сѧ, и҆ привѣща́ше къ держи́момꙋ на ѡ҆б̾ѧ́тїихъ є҆ѧ̀: ка́кѡ всѣ́ѧлсѧ є҆сѝ мнѣ̀, и҆лѝ ка́кѡ прозѧ́блъ є҆сѝ во мнѣ̀, и҆зба́вителю мо́й и҆ бж҃е;

Вхо́дъ. Прокі́менъ днѐ. Чтє́нїѧ трѝ.

При́тчей чте́нїе.

[Глава̀ і҃] Па́мѧть пра́веднагѡ съ похвала́ми, и҆ благослове́нїе гдⷭ҇не на главѣ̀ є҆гѡ̀. Блаже́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менє̀, ѽ ча̑да! честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

При́тчей чте́нїе:

[Глава̀ і҃] Оу҆ста̀ првⷣнагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ бл҃года̑ти, ᲂу҆ста́ же нечести́выхъ развраща́ютсѧ. [Глава̀ а҃і] Мѣ̑рила льсти̑ваѧ, ме́рзость предъ гдⷭ҇емъ, вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. не по́льзꙋютъ и҆мѣ̑нїѧ въ де́нь ꙗ҆́рости, пра́вда же и҆зба́витъ ѿ сме́рти. Оу҆́меръ првⷣный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Пра́ведникъ ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же пра́ведныхъ благоспѣ́шное. Во благи́хъ пра́ведныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты̑ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ.

Премꙋ́дрости соломѡ́ни чте́нїе.

[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїті́и стїхи́ра хра́ма:

Та́же стїхи̑ры нїкола́а, гла́съ в҃. Самогла́сны. Вѷзанті́ево:

Пра́вило вѣ́ры и҆ ѻ҆́бразъ кро́тости, ꙗ҆ви́ тѧ ста́дꙋ твоемꙋ̀ хрⷭ҇то́съ бг҃ъ, ст҃и́телю нїко́лае, въ мѵ́рѣхъ ᲂу҆́бѡ бл҃гоꙋха́ющꙋ тѝ, всю́дꙋ сїѧ́ютъ свѣ́тлѡ бжⷭ҇твєннаѧ твоѧ̑ и҆справлє́нїѧ, си́рыхъ и҆ вдови́цъ предста́телю. тѣ́мже моли́сѧ непреста́ннѡ, спастѝ дꙋ́шы на́шѧ.

Ѻ҆́ч҃е нїко́лае, мѷрополо́жница моще́й твои́хъ мѵ́ры ѡ҆богаща́етъ, въ ни́хже и҆ свѧ̑занныѧ непра́веднѡ ѡ҆сꙋждє́нныѧ, во снѣ̀ царю̀ видѣ́нїемъ твои́мъ ꙗ҆ви́всѧ, свободи́лъ є҆сѝ ѿ сме́рти, и҆ ᲂу҆́зъ, и҆ темни́цы. но и҆ ны́нѣ, ꙗ҆́кѡже тогда̀, и҆ при́снѡ видѣ́нїемъ твои́мъ ꙗ҆ви́сѧ, молѧ́й ѡ҆ дꙋша́хъ на́шихъ.

Ѻ҆́ч҃е нїко́лае, а҆́ще и҆ мѵ́рскаѧ страна̀ молчи́тъ, но мі́ръ ве́сь, и҆́же тобо́ю просвѣще́нный, мѵ́ра же благоꙋха̑нїи, и҆ чꙋде́съ мно́жєствы, взыва́етъ благохва́льными пѣ́сньми: и҆ спа́сшїисѧ тобо́ю ѡ҆сꙋжде́ннїи, съ сꙋ́щими въ мѵ́рѣхъ и҆ мы̀, пою́ще, вопїе́мъ: молѝ спасти́сѧ дꙋша́мъ на́шымъ.

Гла́съ д҃:

Ѻ҆́ч҃е нїко́лае, прест҃а́гѡ дх҃а мѷрополо́жница сы́й, ꙗ҆́кѡ въ мѵ́рѣхъ благоꙋха́еши бжⷭ҇твенными а҆рѡма̑ты: хрⷭ҇тѡ́вымъ бо а҆по́столѡмъ подо́бникъ бы́въ, вселе́ннꙋю ѡ҆бхо́диши словесы̀ чꙋде́съ твои́хъ. тѣ́мже и҆ да̑льнимъ, ꙗ҆́кѡ бли́зъ, во снѣ̀ ꙗ҆влѧ́ѧсѧ, ѿ сме́рти и҆збавлѧ́еши, и҆̀же непра́веднымъ сꙋдо́мъ ᲂу҆мре́ти и҆мꙋ́щыѧ, спаса́ѧ пресла́внѡ ѿ бѣ́дъ мно́гихъ призыва́ющыѧ тѧ̀. тѣ́мже и҆ на́съ ѿ находѧ́щихъ лю́тыхъ свободѝ твои́ми моли́твами, при́снѡ восхвалѧ́ющихъ тѧ̀.

Гла́съ и҃:

До́блестей твои́хъ, прпⷣбне ѻ҆́ч҃е пло́дъ просвѣти́лъ є҆́сть вѣ́рныхъ сердца̀: кто́ бо, слы́шѧ безмѣ́рное твоѐ смире́нїе, терпѣ́нїю не ᲂу҆диви́сѧ, є҆́же къ ни́щымъ ти́хости, къ скорбѧ́щымъ ᲂу҆тѣше́нїю; всѧ̑ бг҃олѣ́пнѡ наꙋчи́лъ є҆сѝ, ст҃и́телю нїко́лае, и҆ ны́нѣ неꙋвѧда́емымъ вѣнце́мъ ᲂу҆вѧ́злсѧ є҆сѝ, моли́сѧ ѡ҆ дꙋша́хъ на́шихъ.

На хвалꙋ̀ поте́клъ є҆сѝ гдⷭ҇ню, нїко́лае, во вре́меннѣй жи́зни, и҆ то́й тѧ̀ просла́ви на нбⷭ҇нѣй и҆ и҆́стиннѣй жи́зни. тѣ́мже дерзнове́нїе стѧжа́въ къ немꙋ̀, молѝ спастѝ дꙋ́шы на́шѧ.

Сла́ва, гла́съ ѕ҃:

Благі́й ра́бе вѣ́рный, дѣ́лателю вїногра́да хрⷭ҇то́ва, ты̀ и҆ тѧготꙋ̀ дневнꙋ́ю поне́слъ є҆сѝ, ты̀ и҆ да́нный тебѣ̀ тала́нтъ возрасти́лъ є҆сѝ, и҆ по тебѣ̀ прише́дшымъ не зави́дѣлъ є҆сѝ. тѣ́мже врата̀ нбⷭ҇наѧ ѿверзо́шасѧ тебѣ̀, вни́ти въ ра́дость гдⷭ҇а твоегѡ̀, и҆ молѝ ѡ҆ на́съ, ст҃е нїко́лае.

И҆ ны́нѣ, гла́съ то́йже:

Сїѡ́не, торжествꙋ́й, і҆ерꙋсали́ме, весели́сѧ, гра́де хрⷭ҇та̀ бг҃а, под̾имѝ зижди́телѧ, въ верте́пѣ и҆ ꙗ҆́слѣхъ вмѣща́емаго: ѿве́рзите мѝ врата̀, и҆ вше́дъ въ нѧ̀ ᲂу҆зрю̀, ꙗ҆́кѡ млⷣнца, пелена́ми повива́емаго, дла́нїю же содержа́щаго тва́рь: є҆го́же пою́тъ а҆́гг҃ли непреста́ннымъ гла́сомъ, жизнода́вца гдⷭ҇а, спаса́ющаго ро́дъ на́шъ.

На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:

Ра́дꙋйсѧ, свѧще́ннаѧ главо̀, чи́стый добродѣ́телей до́ме, бжⷭ҇твеннѣйшагѡ свѧще́нства пра́вило, па́стырю вели́кїй, свѣти́льниче свѣтлѣ́йшїй, и҆́же побѣ́ды носѧ̀ и҆́мѧ, и҆ молѧ́щымсѧ ми́лостивенъ преклони́тель, проница́ѧй къ немощны́хъ проше́нїѧмъ, и҆зба́вителю гото́вѣйшїй, храни́телю спаси́тельный, всѣ̑мъ, вѣ́рою чтꙋ́щымъ всесла́внꙋю па́мѧть твою̀, хрⷭ҇та̀ молѝ, преблаже́нне, низпосла́ти мі́рꙋ ве́лїю ми́лость.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Ра́дꙋйсѧ, свѧще́ннѣйшїй ᲂу҆́ме, трⷪ҇цы чи́стое ѡ҆бита́лище, сто́лпе цр҃ко́вный, вѣ́рныхъ ᲂу҆твержде́нїе, побѣжда́ємымъ по́мощь, ѕвѣздо̀, ꙗ҆́же сїѧ́ньми благопрїѧ́тныхъ твои́хъ моли́твъ, разорѧ́ѧ напа́стей же и҆ скорбе́й тмꙋ̀ всегда̀, ст҃и́телю нїко́лае, приста́нище ти́хое, въ не́же притека́юще, треволне́ньми житїѧ̀ ѡ҆держи́мїи спаса́ютсѧ, хрⷭ҇та̀ молѝ дꙋша́мъ на́шымъ да́ти ве́лїю ми́лость.

Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Ра́дꙋйсѧ, ре́вности бжⷭ҇твенныѧ и҆спо́лнивыйсѧ, и҆ наведе́нїѧ ѕла̀ и҆зба́вль непра́веднѡ хотѧ́щихъ ᲂу҆мре́ти, предста́нїемъ стра́шнымъ и҆ сна̀ запреще́ньми, и҆сто́чниче, и҆сточа́ѧй въ мѵ́рѣхъ, нїко́лае, мѵ́ро бога́тнѡ, и҆ дꙋ́шы напоѧ́ющее, смра́ды же страсте́й ѿгонѧ́ющее, ме́чь, пле́велы пре́лести посѣка́ющїй, лопа́та, развѣва́ющаѧ а҆́рїєва пле́вєльнаѧ ᲂу҆чє́нїѧ. хрⷭ҇та̀ молѝ низпосла́ти дꙋша́мъ на́шымъ ве́лїю ми́лость.

Сла́ва, гла́съ ѕ҃: І҆ѡа́нна мона́ха:

Человѣ́че бж҃їй и҆ вѣ́рный ра́бе, слꙋго̀ гдⷭ҇ень, мꙋ́жꙋ жела́нїй, сосꙋ́де и҆збра́нный, сто́лпе и҆ ᲂу҆твержде́нїе цр҃кве, црⷭ҇твїѧ наслѣ́дниче, не премолчѝ, вопїѧ̀ за ны̀ ко гдⷭ҇ꙋ.

И҆ ны́нѣ, гла́съ то́йже: Вѷзанті́ево:

Безневѣ́стнаѧ дв҃о, ѿкꙋ́дꙋ пришла̀ є҆сѝ; кто̀ роди́вый тѧ̀, кто̀ и҆ ма́ти твоѧ̀; ка́кѡ зижди́телѧ но́сиши на рꙋкꙋ̀; ка́кѡ не растли́ласѧ є҆сѝ ᲂу҆тро́бою; ѽ вели́кихъ, пресла́вныхъ на тебѣ̀ стра́шныхъ та́инствъ, на землѝ соверша́емыхъ, зри́мъ, всест҃а́ѧ. и҆ пред̾ꙋготовлѧ́емъ досто́йный тебѣ̀ до́лгъ, на землѝ верте́пъ, и҆ ѿ нб҃съ про́симъ пода́ти ѕвѣздꙋ̀, и҆ волсви́ же прихо́дѧтъ ѿ восто́кѡвъ землѝ къ за́падѡмъ, ви́дѣти человѣ́ческое спасе́нїе, во ꙗ҆́слѣхъ пелена́ми повива́емое.

На благослове́нїи хлѣ́бѡвъ тропа́рь, два́жды: пи́санъ на ма́лѣй вече́рни: и҆ Бцⷣе дв҃о: є҆ди́ножды. А҆ и҆дѣ́же нѣ́сть всено́щнагѡ бдѣ́нїѧ: На вели́цѣй вече́рни, по Ны́нѣ ѿпꙋща́еши, глаго́лемъ тропа́рь є҆ди́ножды.

Сла́ва, и҆ ны́нѣ, бг҃оро́диченъ воскре́сенъ.

На ᲂу҆́трени на Бг҃ъ гдⷭ҇ь, тропа́рь: Пра́вило вѣ́ры: два́жды. Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:

По а҃-мъ стїхосло́вїи сѣда́ленъ, гла́съ а҃. Подо́бенъ: Гро́бъ тво́й:

Въ мѵ́рѣхъ живы́й чꙋ́вственнѣ, і҆ера́рше, мѵ́ромъ разꙋ́мнѡ дꙋхо́внымъ ꙗ҆ви́лсѧ є҆сѝ пома́занъ, ѻ҆́ч҃е нїко́лае. тѣ́мже мѵ̑ры чꙋде́съ твои́хъ мі́ръ ѡ҆благово́нилъ є҆сѝ, мѵ́ро приснотекꙋ́щее пролива́ѧ, мѵ́рными твои́ми благово́нными словесы̀ и҆ па́мѧтїю твое́ю.

Сла́ва:

Ѡ҆блистава́еши на землѝ чꙋде́съ лꙋча́ми, нїко́лае мꙋ́дре, и҆ дви́жеши всѧ́къ ѧ҆зы́къ, на сла́вꙋ же и҆ хвалꙋ̀ на земли́ тѧ просла́вльшагѡ: є҆го́же молѝ всѧ́кїѧ нꙋ́жды и҆зба́витисѧ па́мѧть твою̀ вѣ́рою и҆ любо́вїю почита́ющымъ ѻ҆тцє́мъ и҆збра́нїе.

И҆ ны́нѣ, бг҃оро́диченъ:

Всѣ́хъ творца̀, бг҃а же и҆ содѣ́телѧ, всенепоро́чнаѧ чⷭ҇таѧ, дх҃омъ бжⷭ҇твеннымъ въ ложесна́хъ зачала̀ є҆сѝ, и҆ тлѣ́нїѧ кромѣ̀ родила̀ є҆сѝ: є҆го́же сла́вѧще, тѧ̀ воспѣва́емъ, дв҃о, ꙗ҆́кѡ пала́тꙋ всецр҃ѧ̀, и҆ мі́ра защище́нїе.

По в҃-мъ стїхосло́вїи сѣда́ленъ, гла́съ д҃ Поⷣ: Ꙗ҆ви́лсѧ є҆сѝ дне́сь:

Вѣ̑рнымъ предста́тельствꙋеши, покрыва́ѧ, соблюда́ѧ ты́ѧ, бл҃же́нне, всѧ́кїѧ ско́рби и҆збавлѧ́ѧ ꙗ҆́вѣ, і҆ера́рхѡвъ краснѣ́йшаѧ сла́во и҆ хвало̀, нїко́лае прпⷣбне.

Сла́ва, гла́съ и҃: Подо́бенъ: Премꙋ́дрости:

И҆сто́чникъ чꙋде́съ, ѻ҆́ч҃е мꙋ́дре, прїе́мъ ѿ гдⷭ҇а, всѣ̑мъ вѣ̑рнымъ и҆сточа́еши, бл҃же́нне, медотѡ́чныѧ во́ды: ꙗ҆́кѡ бо па́стырь сы́й и҆ проповѣ́дникъ вѣ́ры, и҆́стиннагѡ па́стырѧ словеса̀ соблю́лъ є҆сѝ. тѣ́мже дерзнове́нїе къ немꙋ̀ и҆мѣ́ѧ, человѣ́ки спа́слъ є҆сѝ ѿ сме́рти, нїко́лае, і҆ера́рше бл҃же́нне: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть.

И҆ ны́нѣ, бг҃оро́диченъ:

Въ ти́нꙋ впа́дъ грѣхѡ́въ, и҆ нѣ́сть мнѣ̀ постоѧ́нїѧ, лю́тѣ потопи́ мѧ бꙋ́рѧ прегрѣше́нїй: но, ꙗ҆́кѡ ро́ждшаѧ сло́во, є҆ди́наго чл҃вѣколю́бца, на мѧ̀, раба̀ твоего̀, при́зри, и҆ и҆зба́ви мѧ̀ всѧ́кагѡ грѣха̀, и҆ страсте́й дꙋшетлѣ́нныхъ, и҆ всѧ́кагѡ ѡ҆ѕлобле́нїѧ лꙋка́вагѡ ᲂу҆бі́йцы, бцⷣе неискꙋсомꙋ́жнаѧ: молѝ хрⷭ҇та̀ бг҃а, грѣхѡ́въ ѡ҆ставле́нїе да́ти мнѣ̀, тѧ́ бо наде́ждꙋ и҆́мамъ ра́бъ тво́й.

По полѷеле́и сѣда́ленъ, гла́съ є҃. Подо́бенъ: Собезнача́льное сло́во:

Премꙋ́драго і҆ера́рха восхва́лимъ, ꙗ҆́кѡ те́пла въ бѣда́хъ и҆ въ ско́рбехъ сꙋ́ща ѿ бг҃а помо́щника и҆ защи́тника, всѝ нїкола́а, вѣ́рнїи, бг҃оно́снаго благоче́стнѡ: мо́литсѧ бо ко гдⷭ҇ꙋ ѡ҆ вѣ́рою творѧ́щихъ и҆ пою́щихъ бжⷭ҇твеннꙋю па́мѧть є҆гѡ̀.

Сла́ва, гла́съ д҃: Подо́бенъ: Ско́рѡ предварѝ:

Предста́тель теплѣ́йшїй цр҃кве хрⷭ҇то́вы показа́лсѧ є҆сѝ, нїко́лае, и҆ є҆ресе́й безбѡ́жнаѧ ᲂу҆чє́нїѧ разрꙋша́ѧ содерзнове́нїемъ, и҆ пра́вило показа́лсѧ є҆сѝ всѣ̑мъ правосла́вїѧ, ѡ҆ всѣ́хъ молѧ́сѧ послѣ́дꙋющихъ твои̑мъ бжⷭ҇твєннымъ ᲂу҆че́нїємъ и҆ наказа́нїємъ.

И҆ ны́нѣ, бг҃оро́диченъ:

Ско́рѡ прїимѝ, влⷣчце, моли̑твы на́шѧ, и҆ сїѧ̑ принесѝ твоемꙋ̀ сн҃ꙋ и҆ бг҃ꙋ, гпⷭ҇жѐ всенепоро́чнаѧ: и҆зба́ви ѡ҆бстоѧ́нїй къ тебѣ̀ притека́ющыѧ: сокрꙋшѝ кова̑рства, и҆ низложѝ де́рзость воѡрꙋжа́ющисѧ безбо́жныхъ, пречⷭ҇таѧ, на рабы̑ твоѧ̑.

Степє́нна а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃ѕ.

По н҃-мъ ѱалмѣ̀ стїхи́ра, гла́съ ѕ҃:

Наслѣ́дниче бж҃їй, соприча́стниче хрⷭ҇то́въ, слꙋжи́телю гдⷭ҇ень, свѧ́те нїко́лае, по и҆́мени твоемꙋ̀ та́кѡ и҆ житїѐ твоѐ: спросїѧ́ бо сѣди́нѣ ра́зꙋмъ, свидѣ́тельствоваше свѣ́тлость лица̀ твоегѡ̀ дꙋше́вное неѕло́бїе, и҆звѣ́ствоваше кро́тость сло́ва молчали́вое. жи́знь твоѧ̀ сла́вна, и҆ ᲂу҆спе́нїе со ст҃ы́ми: молѝ ѡ҆ дꙋша́хъ на́шихъ.

Канѡ́нъ бцⷣы со і҆рмосо́мъ на ѕ҃: И҆ ст҃а́гѡ два̀ канѡ́на на и҃.

Канѡ́нъ бцⷣы.

Гла́съ а҃. Пѣ́снь а҃. І҆рмо́съ:

Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.

Премꙋ́дрости бе́зднꙋ ро́ждшаѧ, ка̑пли мꙋ́дрости мѝ и҆сто́чникъ благода́тнѡ точа́щїй, чⷭ҇таѧ, низпослѝ, пѣсносло́вити бл҃года́тей твои́хъ пꙋчи́нꙋ.

Пою́ тѧ, всепѣ́таѧ, ю҆́же воспѣва́ютъ а҆́гг҃лѡвъ чи́ни, ꙗ҆́кѡ бг҃а ро́ждшꙋю препѣ́таго, є҆го́же всѧ̀ тва́рь воспѣва́етъ: ꙗ҆́кѡ просла́висѧ.

И҆́нъ канѡ́нъ ст҃а́гѡ, є҆гѡ́же краегране́сїе:

Тебѣ̀, нїко́лае, воспѣва́ю бжⷭ҇твенное пѣ́нїе.

Творе́нїе ѳеофа́ново.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Вѣнцено́сецъ прⷭ҇то́лꙋ хрⷭ҇то́вꙋ, премꙋ́дре нїко́лае, предстоѧ̀ со а҆́гг҃льскими вѡ́инствы, просвѣще́нїе мѝ да́рꙋй, ѡ҆зарѧ́ющее дꙋшѝ моеѧ̀ ѡ҆мраче́нїе, ꙗ҆́кѡ да восхвалю̀, ра́дꙋѧсѧ, твою̀, всебл҃же́нне, па́мѧть.

Прославлѧ́ѧй всѧ̑ гдⷭ҇ь, того̀ сла́вѧщыѧ, тѧ̀ вѣ̑рнымъ прибѣ́жище дадѐ, напа́стей и҆збавлѧ́юща притека́ющыѧ къ твоемꙋ̀ кро́вꙋ, нїко́лае, и҆ призыва́ющыѧ тѧ̀ вѣ́рою и҆ любо́вїю, пресла́вне.

Бг҃оро́диченъ:

Сравни́тисѧ жела́нїе мѝ вложи́въ ѕмі́й вселꙋка́вый, содѣ́телю, ꙗ҆́кѡ плѣ́нника восхи́ти. тобо́ю же, всечⷭ҇таѧ, воззва́нъ бы́хъ, ѡ҆божи́всѧ и҆́стиннѣйше: ты́ бо, ѽ бг҃ома́ти, менѐ ѡ҆божи́вшаго родила̀ є҆сѝ.

Дрꙋгі́й канѡ́нъ по а҆лфави́тꙋ, кромѣ̀ трⷪ҇чнѡвъ и҆ бг҃оро́дичнѡвъ.

Гла́съ а҃. Пѣ́снь а҃. І҆рмо́съ:

Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̑ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ.

Недоꙋмѣ́ннымъ ѧ҆зы́комъ и҆ ᲂу҆стна́ми похвале́нїе ма́лое и҆ моле́нїе принестѝ твоемꙋ̀, нїко́лае, прїидо́хъ бг҃оподража́нномꙋ преизѧ́ществꙋ: но, ꙗ҆́кѡ богатода́вецъ, сп҃са и҆ бг҃а ми́лостива пода́ждь мѝ.

Человѣ́къ сы́й нбⷭ҇ный, равноа́гг҃ленъ на землѝ ꙗ҆ви́лсѧ є҆сѝ, вдѡ́въ защи́тникъ гото́вый, и҆ ᲂу҆трꙋжда́емыхъ ѿмсти́тель, и҆ всѣ̑мъ скорбѧ́щымъ въ бѣда́хъ помо́щникъ, ѻ҆́ч҃е нїко́лае.

Сказꙋ́етъ всѧ̀ подсо́лнечнаѧ, нїко́лае требл҃же́нне, чꙋде́съ твои́хъ добродѣ́телей пꙋчи́нꙋ: ни́щїи предста́телѧ, и҆ сироты̑ и҆ вдовы̑ пита́телѧ, и҆ слѣпі́и пꙋтевожда̀, вси́ же побо́рника.

Трⷪ҇ченъ:

Трⷪ҇цꙋ чествꙋ́ю несозда́ннꙋю, ѻ҆ц҃а̀ и҆ сн҃а со дх҃омъ, сꙋщество̀ про́сто, бжⷭ҇тво̀, є҆стество̀ несѣко́мое, сꙋще́ственнѣ, трѝ ѵ҆поста̑си, раздѣлѧ́ѧ ли́чнѡ и҆ по ѵ҆поста́си.

Бг҃оро́диченъ:

Безсѣ́меннѡ сло́во зачала̀ є҆сѝ є҆ди́наго ѿ трⷪ҇цы, всенепоро́чнаѧ, и҆ сего̀ пло́тїю родила̀ є҆сѝ, пребы́вши по ржⷭ҇твѣ̀ дв҃а, ꙗ҆́кѡ и҆ пре́жде. сего̀, ꙗ҆́кѡ сн҃а твоего̀ и҆ бг҃а, ѡ҆ на́съ при́снѡ молѝ.

Катава́сїа: Хрⷭ҇то́съ ражда́етсѧ:

Пѣ́снь г҃. І҆рмо́съ:

Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.

Небе́съ чистѣ́йшее цр҃е́во ѡ҆би́телище, бл҃года́тнѡ ды́шꙋщїй вои́стиннꙋ и҆ благово́нный ра́й, наде́ждꙋ хрⷭ҇тїа́нъ, бг҃ороди́тельницꙋ мою̀ воспѣва́ю.

Сло́вомъ сло́во породила̀ є҆сѝ, сло́вомъ всѐ къ сꙋществꙋ̀ приве́дшаго слове́сное є҆стество̀, кꙋ́пнѡ и҆ безслове́сное, безслове́сїѧ и҆збавлѧ́ющаго человѣ́ки, всебл҃гослове́ннаѧ.

И҆́нъ. І҆рмо́съ:

Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.

Нїко́лае бл҃же́нне, влⷣки и҆́скреннїй ᲂу҆чени́къ ты̀ бы́въ, спаса́еши къ тебѣ̀ притека́ющыѧ ѿ лю́тыхъ бѣ́дъ и҆ сме́рти го́рькїѧ.

Ѡ҆чи́сти рабы̑ твоѧ̑, грѣхѡ́въ ѡ҆ставле́нїе, ꙗ҆́кѡ бл҃гъ, да́рꙋѧ, нїкола́а, твоегѡ̀ ᲂу҆го́дника, ꙗ҆̀же къ тебѣ̀ хода̑тайствы, многоми́лостиве.

Бг҃оро́диченъ:

Оу҆толѝ смꙋще́нїе дꙋшѝ моеѧ̀, пречⷭ҇таѧ, и҆ жи́знь ѡ҆кормѝ, всест҃а́ѧ, бг҃а ро́ждшаѧ, въ не́мже ᲂу҆тверди́сѧ се́рдце моѐ.

И҆́нъ. І҆рмо́съ:

Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и.

Скрижа́ль въ се́рдцы стѧжа́въ, бг҃омꙋ́дре, мно́гихъ добродѣ́телей, напи́санꙋ безсме́ртнымъ и҆ пречи́стымъ пе́рстомъ хрⷭ҇та̀ бг҃а, нїко́лае, па́че ме́да и҆ со́та сла́дость то́чиши и҆зъ ᲂу҆сте́нъ твои́хъ.

Показа̀ бл҃года́ть на тебѣ̀ пресла́внѣ чꙋдеса̀, нїко́лае: чи́стое бо житїѐ твоѐ, вои́стиннꙋ зла́та свѣтлѣ́йши, ѡ҆блиста́етъ мра̑чныѧ дꙋ́шы заре́ю бжⷭ҇твеннагѡ дх҃а.

Живе́ши и҆ по сме́рти, во снѣ́хъ ꙗ҆́вѣ ꙗ҆влѧ́ѧсѧ, и҆ ю҆́ношы ѿ сме́рти пресла́внѡ и҆зба́вилъ є҆сѝ, вопїѧ̀ ꙗ҆́вѣ царю̀: не ѡ҆би́ди мꙋже́й, сꙋ́етною за́вистїю ѡ҆клевета́нныхъ.

Трⷪ҇ченъ:

Ми́лостива бꙋ́ди мнѣ̀, всест҃а́ѧ трⷪ҇це, бж҃е на́шъ, безмѣ́рными прегрѣшє́нїи ѡ҆скверни́вшемꙋ житїѐ, ѻ҆́ч҃е, сн҃е и҆ дш҃е живы́й, соблюда́ющи мѧ̀ ѿвсю́дꙋ, и҆ при́снѡ неꙋѧ́звленна ѿ ско́рби.

Бг҃оро́диченъ:

Дае́ши, бцⷣе, спасе́нїѧ наде́ждꙋ рабѡ́мъ твои̑мъ, и҆ въ нꙋ́ждахъ и҆ напа́стехъ скороте́чными моли́твами соблюда́ти и҆ помога́ти предста́ни: ты́ бо є҆сѝ похвала̀ на́мъ вѣ̑рнымъ, приснодв҃о.

Катава́сїа: Пре́жде вѣ̑къ:

Сѣда́ленъ, гла́съ и҃. Подо́бенъ: Премꙋ́дрости:

Возше́дъ на высотꙋ̀ добродѣ́телей, и҆ бжⷭ҇твенными ѿтꙋ́дꙋ, ѻ҆́ч҃е, ѡ҆зари́всѧ сїѧ̑нїи чꙋде́съ, пресвѣ́телъ вои́стиннꙋ ꙗ҆ви́лсѧ є҆сѝ мі́рови па́стырь, на́мъ въ напа́стехъ сы́й предста́тель непобѣди́мь: тѣ́мже, пресла́внѡ врага̀ побѣди́въ, лжꙋ̀ ѿгна́лъ є҆сѝ, и҆ человѣ́ки спа́слъ є҆сѝ ѿ сме́рти, нїко́лае, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, дрꙋгі́й сѣда́ленъ, гла́съ то́йже:

Рѣкꙋ̀ и҆сцѣле́нїй ѻ҆би́льнѣ и҆злива́ющꙋю и҆ и҆сто́чникъ тѧ̀ чꙋде́съ неѡскꙋ́дный показа̀, нїко́лае, ми́лости бе́здна: тѧ́жкими бо недꙋ́гами го́рцѣ дрꙋчи́мїи, и҆ ѕлоключе́ньми житїѧ̀ лю́тѣ мꙋ́чимїи, всѧ̑кїѧ скѡ́рби цѣле́бнꙋю вои́стиннꙋ ѡ҆брѣта́ютъ лѣчбꙋ̀, те́плое твоѐ защище́нїе. сегѡ̀ ра́ди вопїе́мъ тѝ: моли́сѧ хрⷭ҇тꙋ̀ бг҃ꙋ, прегрѣше́нїй ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

И҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Пѣ́снь д҃. І҆рмо́съ:

Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.

Сме́рти ᲂу҆́бѡ вина̀ земны̑мъ є҆́ѵа бы́сть, совѣ́томъ ѕмі́ѧ: ты́ же, дв҃о чⷭ҇таѧ, ро́ждшаѧ сло́вомъ сло́во, безсме́ртїѧ и҆ жи́зни хода́таица ꙗ҆ви́ласѧ є҆сѝ. тѣ́мже досто́йнѡ пое́мъ тѧ̀.

Дх҃омъ прⷪ҇ро́цы предзрѧ́ще тѧ̀, чⷭ҇таѧ, го́рꙋ, две́рь, трапе́зꙋ, ст҃ы́й кївѡ́тъ, свѣ́щникъ, прⷭ҇то́лъ жи́зни, ста́мнꙋ и҆ ѻ҆́дръ, бж҃їю мт҃рь въ гада́нїихъ тѧ̀ проѧви́ша. и҆́хже мы̀ зри́мъ сбытїѐ.

И҆́нъ. І҆рмо́съ:

Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Прибли́живсѧ чи́стѣ зарѧ́мъ дꙋхѡ́внымъ, свѣтоно́сецъ бы́лъ є҆сѝ, мі́ра просвѣща́ѧ концы̀, всѣ̑мъ предста́тельствꙋѧ, и҆ всѧ̑ спаса́ѧ вѣ́рою, къ тебѣ̀ притека́ющыѧ.

И҆збавлѧ́ѧ ѿ сме́рти, ꙗ҆́кѡ ꙗ҆ви́лсѧ є҆сѝ пе́рвѣе, нїко́лае, ю҆́ношы, прпⷣбне: та́кѡ и҆ ны́нѣ мѧ̀ спасѝ ѿ всѧ́кагѡ ѡ҆бстоѧ́нїѧ, и҆ напа́стей и҆ бѣ́дъ, всеблаже́нне.

Ѡ҆блиста́лъ є҆сѝ добродѣ́телей сїѧ́ньми, всеблаже́нне, подража́тель преизрѧ́днѣйшїй твоегѡ̀ влⷣки бы́въ, спаса́еши же, призыва́емь, благоговѣ́нїемъ и҆ любо́вїю тѧ̀ сла́вѧщыѧ.

Бг҃оро́диченъ:

На́йде на тѧ̀ влⷣка тва́ри воплоща́емь, и҆ спаса́ѧ, ꙗ҆́кѡ бл҃гоꙋтро́бенъ, всего́ мѧ человѣ́ка: тѣ́мже вѣ́рнїи бцⷣꙋ тѧ̀ сла́вимъ.

И҆́нъ. І҆рмо́съ:

Же́злъ и҆зъ ко́рене і҆ессе́ева и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀, хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.

И҆менова́нїе твоѐ, є҆ди́но вои́стиннꙋ призыва́емо, ѿ всѣ́хъ вра́жїихъ совѣ̑тъ ско́рѡ и҆збавлѧ́етъ зовꙋ́щыѧ тебѣ̀ те́плѣ, свѧще́нне нїко́лае: ꙗ҆́кѡ пе́рвѣе воевѡ́ды и҆зба́вилъ є҆сѝ, спасѝ и҆ на́съ ѿ всѧ́кагѡ лю́тагѡ ѡ҆бстоѧ́нїѧ.

Престо́лꙋ предстоѧ̀ бж҃їю, моли́ти прилѣ́жнѡ, мꙋ́дре, не преста́й ѡ҆ всѣ́хъ на́съ, твои́хъ вѣ́рныхъ рабѣ́хъ, чꙋ́дне нїко́лае: да ѻ҆гнѧ̀ вѣ́чнагѡ и҆зба́вимсѧ, и҆ ѿ врагѡ́въ, ѧ҆зы́ка лꙋка́вагѡ и҆ ѡ҆ѕлобле́нїѧ.

Врачева̑нїѧ то́чиши всю́дꙋ вѣ́рою къ тебѣ̀ притека́ющымъ, и҆ ѿ ᲂу҆́зъ и҆збавлѧ́еши всѧ̑. тѣ́мже печа́ль на́шꙋ въ ра́дость преложѝ твои́ми бг҃опрїѧ́тными моли́твами, нїко́лае пресвѣ́тле, низлага́ѧ го́рдость врагѡ́въ на́шихъ.

Трⷪ҇ченъ:

Безнача́льнагѡ бжⷭ҇тва̀ нача́ло ѻ҆ц҃а̀, и҆ сн҃а чтꙋ̀, и҆ дх҃а почита́ю всест҃а́го: всѧ́ческихъ вседѣ́тельное, є҆ди́нственное, несѣко́мое, тремѝ характи́ры и҆ ли́цы раздѣлѧ́емое при́снѡ, є҆ди́но црⷭ҇тво нераздѣ́льное.

Бг҃оро́диченъ:

Ты̀ вои́стиннꙋ па́че земны́хъ и҆ нбⷭ҇ныхъ честнѣ́йши є҆ди́на є҆сѝ, бг҃ороди́тельнице: всѣ́хъ бо творца̀ во ᲂу҆тро́бѣ зачала̀ є҆сѝ, пло́тїю ве́щною ѡ҆дѣ́ѧна, ро́ждши безъ сѣ́мене, ѽ новолѣ́пнагѡ зрѣ́нїѧ!

Катава́сїа: Же́злъ и҆зъ ко́рене і҆ессе́ева:

Пѣ́снь є҃. І҆рмо́съ:

Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ, бж҃е на́шъ.

Ꙗ҆́кѡ кївѡ́тъ, честна́ѧ, свѧще́нїѧ, и҆ ꙗ҆́кѡ ѻ҆гнеѻбра́зный престо́лъ ст҃ъ, и҆ ꙗ҆́кѡ пала́та ѡ҆свѧще́нна, влⷣчце, вмѣсти́ла є҆сѝ бг҃а вседержи́телѧ.

Мт҃ь неискꙋсомꙋ́жнаѧ въ дѣ́вахъ, ты̀ па́ки дв҃а въ ма́терехъ, є҆ди́на пречⷭ҇таѧ, ꙗ҆ви́ласѧ є҆сѝ: бг҃а бо неизрече́ннѡ родила̀ є҆сѝ, є҆стество̀ воздаю́щаго.

И҆́нъ. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Бг҃олѣ́пнымъ житїе́мъ, требл҃же́нне, просвѣща́емь ѡ҆сꙋждє́нныѧ непра́веднымъ и҆зрече́нїемъ ᲂу҆мре́ти, предста́въ, и҆зба́вилъ є҆сѝ, влⷣцѣ хрⷭ҇тꙋ̀ зовꙋ́щыѧ: и҆но́гѡ бо, ра́звѣ тебє̀, бо́га не зна́емъ.

На нб҃сѣ́хъ присносꙋ́щнꙋю сла́вꙋ ны́нѣ зрѧ̀, и҆ неизглаго́ланныѧ и҆ бжⷭ҇твенныѧ зарѝ свѣтлѣ́йшими наслажда́ѧсѧ сїѧ̑нїи, покры́й мѧ̀ предста́тельствомъ твои́мъ, преподо́бне, ᲂу҆го́дниче хрⷭ҇то́въ всече́стне.

Бг҃оро́диченъ:

Да тво́й взы́щеши ѻ҆́бразъ, погребе́нный страстьмѝ, сп҃се, нбⷭ҇ныхъ ᲂу҆таи́всѧ си́лъ, вопло́щсѧ и҆зъ дв҃ы, ꙗ҆ви́лсѧ є҆сѝ тебѣ̀ зовꙋ́щымъ: и҆но́гѡ, ра́звѣ тебє̀, бо́га не зна́емъ.

И҆́нъ. І҆рмо́съ:

Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ, бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.

Проповѣ́дꙋетъ твоѧ̑, ѻ҆́ч҃е, чꙋдеса̀, ны́нѣ мѵ́ръ, велича́йшаѧ митропо́лїа и҆ лѷкі́йскаѧ є҆па́рхїа, и҆ всѧ̑ ѻ҆те́чєствїѧ твоѧ̑ чꙋдодѣ̑йства, и҆́миже всѧ̑ ѿ болѣ́зней и҆ скорбе́й и҆збавлѧ́еши, бг҃облаже́нне нїко́лае.

Пита́тель вдѡ́въ и҆ ѻ҆те́цъ сиро́тъ, помо́щникъ сꙋ́щымъ въ ско́рбехъ всеизрѧ́днѣйшїй, пла́чꙋщымъ ᲂу҆тѣше́нїе, па́стырь и҆ пꙋтево́ждь всѣ́хъ блꙋдѧ́щихъ, нїко́лае, сы́й, и҆ на́съ твои́ми моли́твами ѿ бѣ́дъ и҆зба́ви.

Преста́вилсѧ є҆сѝ ѿ землѝ къ невеще́ствєннымъ ѻ҆би́телемъ, и҆дѣ́же зри́ши добро́тꙋ неизрече́ннꙋю хрⷭ҇то́вꙋ, и҆ а҆́гг҃льскимъ во́инствѡмъ собесѣ́дникъ ꙗ҆ви́лсѧ є҆сѝ. тѣ́мже, со а҆пⷭ҇лы и҆ съ мꙋ́чєники ликꙋ́ѧ, прилѣ́жнѡ влⷣцѣ всѣ́хъ, ѻ҆́ч҃е нїко́лае, ѡ҆ на́съ моли́сѧ.

Трⷪ҇ченъ:

Собезнача̑льнаѧ трѝ є҆динопрестѡ́льнаѧ, нераздѣ́льнагѡ же є҆ди́нагѡ бжⷭ҇тва̀ сла́влю самовла̑стнаѧ ли́ца ꙗ҆́вѣ, и҆́мже и҆зъ не сꙋ́щагѡ приведо́хсѧ во є҆́же бы́ти, со а҆́гг҃лы зовы́й: ст҃ъ, ст҃ъ, ст҃ъ є҆сѝ, гдⷭ҇и.

Бг҃оро́диченъ:

Человѣ́кѡмъ спасе́нїе всѣ̑мъ и҆ ᲂу҆пова́нїе, ꙗ҆́же предварѧ́ющи є҆ди́на и҆ спаса́ющи, помозѝ и҆ ны́нѣ на́мъ, вопїю́щымъ тебѣ̀, чⷭ҇таѧ, и҆ призыва́ющымъ тѧ̀ при́снѡ во ѡ҆бстоѧ́нїи лю́тыхъ: предста́тельницы бо и҆ и҆ны́ѧ, ра́звѣ тебє̀, по бз҃ѣ не и҆́мамы.

Катава́сїа: Бг҃ъ сы́й ми́ра:

Пѣ́снь ѕ҃. І҆рмо́съ:

Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.

Застꙋпле́нїе вѣ́рныхъ, и҆ печа́льныхъ ра́достное весе́лїе, ра́достїю ѡ҆богатѝ дꙋхо́вною рабы̑ твоѧ̑, жела́ющыѧ застꙋпле́нїѧ твоегѡ̀.

Нб҃о слове́сное, хра́мъ пречⷭ҇тый, ст҃ы́й кївѡ́тъ, краснѣ́йшїй бж҃їй ра́й, въ не́мже дре́во жи́зни моеѧ̀, да пое́тсѧ.

И҆́нъ. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

И҆́же побѣ́ды, нїко́лае, вѣне́цъ на твое́мъ версѣ̀ досто́йнѡ положи́сѧ: ꙗ҆́кѡ побѣди́тель ᲂу҆́бѡ и҆зрѧ́днѣйшїй, тѧ̀ призыва́ющыѧ спасѝ.

Оу҆мерщвле́на мѧ̀, блаже́нне, прегрѣше́ньми, и҆ страсте́й треволне́ньми погрꙋжа́ема, ꙗ҆ви́всѧ, спасѝ ко приста́нищꙋ бжⷭ҇твенныѧ во́ли.

Бг҃оро́диченъ:

На тѧ̀ надє́жды возложи́хъ, мт҃и приснодв҃о, спасе́нїѧ моегѡ̀, и҆ тѧ̀ предста́тельницꙋ полага́ю жи́зни, тве́рдꙋ же и҆ непоколеби́мꙋ.

И҆́нъ. І҆рмо́съ:

И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее не тлѣ́ннꙋ. є҆гѡ́же бо не пострада̀ и҆стлѣ́нїѧ ро́ждшꙋю сохранѝ неврежде́ннꙋ.

Но́вый ꙗ҆ви́лсѧ є҆сѝ а҆враа́мъ, нїко́лае, ꙗ҆́кѡ є҆диноро́дна бо сы́на приве́лъ є҆сѝ ᲂу҆ма̀ влⷣцѣ твоемꙋ̀, безкрѡ́вныѧ жє́ртвы приносѧ̀ при́снѡ. ѿѻнꙋ́дꙋже благослови́лсѧ є҆сѝ, ꙗ҆́кѡ страннолю́бецъ, ѻ҆́ч҃е, и҆ трⷪ҇цы бы́лъ є҆сѝ ѻ҆би́тель бжⷭ҇твенна и҆ непоро́чна.

Стра̑нна и҆ ᲂу҆жа̑сна содѣва́еши чꙋдеса̀, нїко́лае, по все́й землѝ и҆ въ мо́ри дале́че бѣ́дствꙋющымъ, скороте́чными моли́твами предста́тельствꙋѧ, немощны̑мъ вра́чь, и҆ ни́щымъ пита́тель, побѣ́ды на врагѝ тезоимени́тъ лю́демъ вѣ̑рнымъ ꙗ҆влѧ́ѧсѧ.

Ѻ҆́комъ ᲂу҆́мнымъ прови́дѧ бꙋ̑дꙋщаѧ, ᲂу҆че́нїй пра́выхъ напо́лнилъ є҆сѝ всѧ̑ концы̀: є҆диносꙋ́щна ѻ҆ц҃ꙋ̀ сн҃а возвѣща́ѧ на́мъ, а҆́рїево неи́стовство потреби́лъ є҆сѝ, сто́лпъ правосла́вныѧ вѣ́ры, честна̑ѧ твоѧ̑ предложи́въ и҆справлє́нїѧ.

Трⷪ҇ченъ:

Чтꙋ̀ и҆ почита́ю трⷪ҇цꙋ нераздѣ́льнꙋю, тремѝ ли́цы раздѣлѧ́емꙋю при́снѡ, соединѧ́емꙋю же сꙋщество́мъ и҆ є҆стество́мъ, ꙗ҆́кѡ є҆ди́но нача́ло, ѻ҆ц҃а̀, и҆ сн҃а, и҆ дх҃а ст҃а́гѡ, всѣ́ми держа́внѡ влⷣчествꙋющꙋю, и҆ всѧ̑ соблюда́ющꙋю, ꙗ҆́кѡ хо́щетъ.

Бг҃оро́диченъ:

Ве́сь вопло́щсѧ во ᲂу҆тро́бѣ твое́й, пречⷭ҇таѧ, хрⷭ҇то́съ бг҃ъ, безъ сѣ́мене роди́сѧ: не стерпѣ́ бо свои́хъ рꙋ́къ созда́нїе зрѣ́ти ѿ льсти́вагѡ мꙋ́чимо, прїи́де рабозра́чнымъ ѻ҆́бразомъ, человѣ́ческїй ро́дъ и҆зба́вити.

Катава́сїа: И҆зъ ᲂу҆тро́бы і҆ѡ́нꙋ:

Конда́къ гла́съ г҃. Подо́бенъ: Дв҃а дне́сь:

Въ мѵ́рѣхъ, свѧ́те, свѧщеннодѣ́йствитель показа́лсѧ є҆сѝ, хрⷭ҇то́во бо, прпⷣбне, є҆ѵⷢ҇лїе и҆спо́лнивъ, положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, и҆ спа́слъ є҆сѝ непови̑нныѧ ѿ сме́рти. сегѡ̀ ра́ди ѡ҆свѧти́лсѧ є҆сѝ, ꙗ҆́кѡ вели́кїй таи́нникъ бж҃їѧ бл҃года́ти.

І҆́косъ:

Воспои́мъ ны́нѣ ст҃и́телѧ пѣ́сньми, мѵ̑рскимъ лю́демъ па́стырѧ и҆ ᲂу҆чи́телѧ, да моли́твами є҆гѡ̀ просвѣти́мсѧ: се́ бо ꙗ҆ви́сѧ чи́стъ ве́сь, нетлѣ́ненъ дꙋ́хомъ, хрⷭ҇тꙋ̀ приносѧ̀ же́ртвꙋ непоро́чнꙋ, чи́стꙋ, бг҃ꙋ бл҃гопрїѧ́тнꙋ, ꙗ҆́кѡ ст҃и́тель ѡ҆чище́нъ и҆ дꙋше́ю и҆ тѣ́ломъ. тѣ́мже сы́й и҆́стиннѡ цр҃кве предста́тель и҆ побо́рникъ сеѧ̀, ꙗ҆́кѡ вели́кїй таи́нникъ бж҃їѧ бл҃года́ти.

Пѣ́снь з҃. І҆рмо́съ:

Пе́щь, сп҃се, ѡ҆роша́шесѧ, ѻ҆́троцы же, ликꙋ́юще, поѧ́хꙋ: ѻ҆ц҃є́въ бж҃е, бл҃гослове́нъ є҆сѝ.

Высоча́йшїй, нб҃о тѧ̀ ѡ҆дꙋшевле́нное, черто́гъ же, чи́стаѧ, бл҃года́тнѡ ѡ҆крꙋже́нъ, златоѻбра́знꙋю порфѵ́рꙋ и҆ ра́й показа̀.

Оу҆твердѝ ᲂу҆ма̀ моегѡ̀ враще́нїе, помышле́нїе мѧте́жно ᲂу҆крѣпѝ на недви́жимомъ ка́мени покро́вомъ твои́мъ, мт҃и дв҃о.

И҆́нъ. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ѻ҆́стромꙋ и҆скꙋше́нїю впадо́хъ, лю́тѣ пострѣка́емь, и҆ ко вратѡ́мъ а҆́да прибли́жихсѧ, скорбьмѝ поража́емь, спаси́ мѧ моли́твами твои́ми, бл҃же́нне, и҆ возста́ви пою́ща: бл҃гослове́нъ, є҆сѝ, бж҃е ѻ҆тє́цъ на́шихъ.

Незаходи́магѡ свѣ́та невеще́ственными лꙋча́ми ѡ҆блиста́емь, сꙋ́щыѧ во тмѣ̀ скорбе́й ѡ҆ѕло́блєнныѧ и҆схи́ти, и҆ къ просвѣще́нїю весе́лїѧ наста́ви пою́щыѧ: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Молѝ хрⷭ҇та̀, сн҃а твоего̀ и҆ бг҃а, дв҃о бг҃ороди́тельнице, прода̑нныѧ лю́тыми прегрѣше́ньми и҆ ле́стьми ѕмїи́ными, кро́вїю є҆гѡ̀ честно́ю и҆зба́витисѧ пою́щымъ: бл҃гослове́нъ є҆сѝ, бж҃е ѻ҆тє́цъ на́шихъ.

И҆́нъ. І҆рмо́съ:

Ѻ҆́троцы благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ.

Всѧ́кихъ лю́тыхъ недꙋ̑гъ вра́чь всеизрѧ́днѣйшїй, ѻ҆́ч҃е нїко́лае, ꙗ҆ви́всѧ, дꙋшѝ моеѧ̀ не́мощь и҆сцѣли́въ, пода́ждь мѝ благоздра́вїе вопи́ти: ѻ҆тцє́въ бж҃е, бл҃гослове́нъ є҆сѝ.

И҆зба́вивъ дре́вле воевѡ́ды ѿ сме́рти, ст҃е, и҆ ты́ѧ воздви́глъ є҆сѝ пѣ́ти и҆ сла́вити сп҃са хрⷭ҇та̀ съ вѣ́рою те́плою, и҆̀же и҆ взыва́хꙋ: ѻ҆тцє́въ бж҃е, бл҃гослове́нъ є҆сѝ.

Премꙋ́дрости ча́ши прибли́живсѧ та́инственнѡ, ᲂу҆стна́ми твои́ми, ѻ҆́ч҃е нїко́лае, ка̑пли ѡ҆дожде́нїѧ поче́рплъ є҆сѝ, па́че ме́да и҆ со́та, лю́демъ повелѣва́ѧ вопи́ти: ѻ҆тцє́въ бж҃е, бл҃гослове́нъ є҆сѝ.

Трⷪ҇ченъ:

Трⷪ҇це, тѧ̀ воспѣва́емъ, є҆ди́нице трисїѧ́тельнѣйшаѧ, є҆диносꙋ́щнаѧ, ѻ҆́ч҃е, сн҃е и҆ дш҃е ст҃ы́й: въ ни́хже всѝ крести́вшесѧ воспѣва́емъ: ѻ҆тцє́въ бж҃е, бл҃гослове́нъ є҆сѝ.

Бг҃оро́диченъ:

Ꙗ҆́кѡ всѣ́хъ тва́рей вы́шши є҆сѝ, бцⷣе, моли́сѧ твоемꙋ̀ сн҃ꙋ и҆ бг҃ꙋ, и҆зба́витисѧ мꙋ́ки чествꙋ́ющымъ тѧ̀ вои́стиннꙋ и҆ сла́вѧщымъ: ѻ҆тцє́въ бж҃е, бл҃гослове́нъ є҆сѝ.

Катава́сїа: Ѻ҆́троцы благоче́стїю совоспита́ни:

Пѣ́снь и҃. І҆рмо́съ:

Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите, ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки.

Ꙗ҆́кѡ ѡ҆дꙋшевле́нный черто́гъ и҆ вдохнове́ннаѧ червлени́ца, хламѵ́да червленоша́рнаѧ всѣ́хъ цр҃ѧ̀ ꙗ҆ви́ласѧ є҆сѝ, дв҃о, и҆ порфѵ́ра, и҆зъ неѧ́же пло́ть сопросїѧ̀ бг҃очеловѣ́ка сло́ва.

Зачала̀ є҆сѝ, пречⷭ҇таѧ, всю̀ тва́рь го́рстїю содержа́щаго, ꙗ҆́кѡ зижди́телѧ и҆ бг҃а, неизрече́ннѡ, непости́жнѡ, на́съ ра́ди по на́мъ чл҃вѣ́ка бы́вша, и҆ є҆́же бѣ̀ не ѿстꙋ́пльша.

И҆́нъ. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Ꙗ҆́кѡ бл҃гъ и҆ сострада́теленъ, во глꙋбинѣ̀ напа́стей лю́тѣ содержи̑мыѧ свободѝ, бл҃же́нне нїко́лае, ѿ содержа́щихъ лю́тыхъ разрѣше́нїе подаѧ̀ моли́твами твои́ми, ꙗ҆̀же ко сп҃сꙋ хрⷭ҇тꙋ̀, свѧщеннотаи́нниче.

Тайново́ждь сꙋ́щихъ па́че ᲂу҆ма̀, ст҃ы́хъ слꙋжи́тель и҆ нбⷭ҇ныхъ сы́й, бг҃омꙋ́дре: а҆рхїере́й же вѣ́ренъ, прегрѣше́нїй ѡ҆ставле́нїѧ просѝ ѿ сп҃са на́шегѡ, свѧщенноѧвле́нне.

Бг҃оро́диченъ:

И҆знемога́етъ мо́й ны́нѣ ᲂу҆́мъ, во глꙋбинꙋ̀ впа́дъ безче́стїѧ, ꙗ҆́кѡ ѿвсю́дꙋ разли́чными ѡ҆б̾ѧ́тъ є҆́смь ѕлы́ми: но ты̀, дв҃о, и҆сцѣлѝ, безстра́стїѧ свѣ́томъ ѡ҆дѣва́ющи.

И҆́нъ. І҆рмо́съ:

Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Чи́ни патрїа́рхѡвъ и҆ а҆пⷭ҇лѡвъ, и҆ свѧщенномч҃никѡвъ собо́ри, и҆ прⷪ҇ро́кѡвъ сосло́вїе, ве́сь собо́ръ по́стническїй бл҃жа́тъ бжⷭ҇твенное житїѐ твоѐ, съ ни́миже и҆ мы̀ вопїе́мъ: да благослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки.

Высоча́йшїй всецр҃ю̀, великодержа́вне, моли́твами прпⷣбнагѡ па́стырѧ жи́знь ᲂу҆мирѝ всѣ́хъ, сло́ве, хрⷭ҇тїа́нъ, побо́рствꙋѧ на ва́рвары, да тебѣ̀ хрⷭ҇тꙋ̀ зове́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Свѣ́томъ просвѣ́щсѧ непристꙋ́пнымъ, ѻ҆́ч҃е, дꙋ́шы сꙋ́щихъ въ ско́рби ѡ҆зарѧ́еши, разорѧ́ѧ всю̀ мра́чнꙋю тмꙋ̀ напа́стей, ѡ҆блиста́въ же весе́лїемъ сердца̀ на̑ша. и҆́миже далечесїѧ́тельнѡ просвѣща́еми, вопїе́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Трⷪ҇ченъ:

Живо́тъ и҆ животы̀, и҆ є҆ди́нъ и҆ трѝ свѣ́ты, трⷪ҇цꙋ вѣ́рнѡ воспѣва́емъ, ѻ҆ч҃єскимъ возслѣ́дꙋюще бжⷭ҇твєннымъ и҆́стиннѡ ᲂу҆че́нїємъ, ѻ҆ц҃а̀ и҆ сн҃а, и҆ дх҃а ст҃а́гѡ. съ ни́миже, благоче́ствꙋюще, воспои́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Бг҃оро́диченъ:

Чꙋ́до страннолѣ́пно кꙋпина̀ ѻ҆́бразъ проѡбразѝ, чⷭ҇таѧ ѻ҆трокови́це, горѧ́щи неѡпа́льна дре́вле на горѣ̀ сїна́йстѣй, та́йнꙋ ржⷭ҇тва̀ твоегѡ̀ прописꙋ́ющи: ѻ҆́гнь бо въ тѧ̀ бжⷭ҇тва̀ всели́выйсѧ невре́днꙋ тѧ̀ соблюдѐ. є҆го́же воспѣва́емъ во всѧ̑ вѣ́ки.

Катава́сїа: Чꙋ́да преесте́ственнагѡ:

Пѣ́снь ѳ҃. І҆рмо́съ:

Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи велича́емъ.

Стрꙋю̀ бл҃года́ти твоеѧ̀ и҆сточи́ ми, пла́менемъ ѕлоключе́нїй ѡ҆палѧ́емꙋ, и҆ лю́тѣ и҆стаѧва́емꙋ, и҆сто́чниче, благода́тнѡ точа́щїй, ро́ждшаѧ рѣкꙋ̀ благода́тей, и҆зъ неѧ́же пїѧ́й, вжа́ждетсѧ никогда́же.

Ꙗ҆́кѡ жениха́ тѧ кра́сный черто́гъ, ꙗ҆́кѡ влⷣчню пала́тꙋ ѡ҆дꙋшевле́ннꙋ, ꙗ҆́кѡ порфѵ́рꙋ всезлатꙋ́ю, ꙗ҆́кѡ кра́снѣйшее ѻ҆би́телище хрⷭ҇то́во, влⷣчце всѣ́хъ, ᲂу҆молѧ́ющаго тѧ̀, спаси́ мѧ.

И҆́нъ. І҆рмо́съ:

Безнача́льна роди́телѧ сн҃ъ бг҃ъ и҆ вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Свѣща́ми бл҃года́ти, бг҃омꙋ́дре, просвѣща́емь, и҆ свѣти́льникъ благоче́стїѧ ꙗ҆́вѣ бы́лъ є҆сѝ, сꙋ́щыѧ въ напа́стехъ спаса́еши, и҆ сꙋ́щыѧ во глꙋбинѣ̀ морстѣ́й и҆збавлѧ́еши, и҆ пита́еши а҆́лчꙋщыѧ пресла́внѡ, всеблаже́нне.

И҆́же въ раѝ сла́дости ны́нѣ водворѧ́ѧсѧ, и҆ неизрече́ннꙋю сла́вꙋ ꙗ҆́снѡ зрѧ̀, ѿ нбⷭ҇ныхъ крꙋ̑гъ пѣвцы̀ твоѧ̑ назира́еши, ѿ страсте́й и҆збавлѧ́ѧ, бг҃оно́се всеблаже́нне.

Бг҃оро́диченъ:

Премꙋ́дрость, и҆ си́лꙋ, и҆ сло́во ѵ҆поста́сное ѻ҆́ч҃ее, бг҃ома́ти чⷭ҇таѧ, родила̀ є҆сѝ, ѿ твои́хъ пречⷭ҇тыхъ крове́й сво́й хра́мъ прїи́мшꙋю, и҆ семꙋ̀ по соедине́нїю соедини́вшꙋюсѧ нераздѣ́льнѡ.

И҆́нъ. І҆рмо́съ:

Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ.

Ликовствꙋ́емъ дꙋхо́внѡ всѝ празднолю́бцы, нб҃са̀ весели́тесѧ, го́ры же и҆ хо́лми, цр҃кви и҆ дѣ́въ ли́цы, и҆ по́стникѡвъ свѣ́тлость, въ па́мѧти всеблаже́ннагѡ: въ не́йже, соше́дшесѧ, сп҃са велича́емъ.

Да пою́тъ пѣ́сньми непреста́ннѡ всѝ концы̀, похва́льными вѣнцы̑ ве́рхъ нїкола́а ᲂу҆краша́юще ꙗ҆́вѣ, ᲂу҆го́дника хрⷭ҇та̀ бг҃а: є҆гѡ́же моли́твами ѿ страсте́й же и҆ бѣ́дъ да и҆зба́вимсѧ.

Ꙗ҆́кѡ досто́йное прїимѝ пѣ́нїе, нїко́лае, ма́лагѡ трꙋда̀ сегѡ̀, ꙗ҆́коже хрⷭ҇то́съ прїѧ́тъ вдовы̀ два̀ лє́пта. не возгнꙋша́йсѧ ѻ҆каѧ́ннагѡ страстьмѝ, не гордѧ́сѧ бо, треблаже́нне, дерзнꙋ́хъ.

Трⷪ҇ченъ:

Соединѧ́етсѧ є҆диносꙋ́щною во́лею трⷪ҇ца: раздѣлѧ́етсѧ же па́ки ли́чнѡ нераздѣ́льнѣ, соблюда́ющи держа́вꙋ при́снѡ, ѻ҆ц҃ъ, сн҃ъ, и҆ дх҃ъ живы́й, є҆ди́нъ трїѷпоста́сный бг҃ъ, є҆го́же велича́емъ.

Бг҃оро́диченъ:

Потреби́сѧ всѧ́ка печа́ль ржⷭ҇тво́мъ твои́мъ, и҆ ѿѧ́тъ гдⷭ҇ь рыда́нїе и҆ пла́чь, и҆ всѧ́кꙋ сле́зꙋ ѿ всѧ́кагѡ лица̀ земноро́дныхъ, чⷭ҇таѧ бцⷣе неискꙋсобра́чнаѧ. ѡ҆ тебѣ̀ и҆ мы̀ до́лги и҆сполнѧ́емъ.

Катава́сїа: Та́инство стра́нное:

Свѣти́ленъ. Подо́бенъ: Жєны̀ ᲂу҆слы́шите.

Вели́каго а҆рхїпа́стырѧ и҆ і҆ера́рха всѝ, предсѣда́телѧ мѷрлѷкі́йскаго нїкола́а восхва́лимъ: мно́ги бо мꙋ́жы спасѐ, непра́веднѡ ᲂу҆мре́ти и҆мꙋ́щыѧ. и҆ царю̀ ꙗ҆влѧ́етсѧ со а҆вла́вїемъ во снѣ̀, рѣшѧ̀ непра́ведный сꙋ́дъ.

Сла́ва:

Вельми́ тѧ просла́ви въ чꙋдесѣ́хъ гдⷭ҇ь, и҆ жи́ва и҆ по концѣ̀, і҆ера́рше нїко́лае: кто́ бо ѿ любвѐ вѣ́ры то́кмѡ ст҃о́е твоѐ и҆́мѧ призове́тъ, и҆ не а҆́бїе ᲂу҆слы́шанъ, те́пла тѧ̀ предста́телѧ ѡ҆брѣта́етъ;

И҆ ны́нѣ, бг҃оро́диченъ:

Мꙋ́дрость ѵ҆поста́снꙋю, и҆ сло́во пресꙋ́щественное, и҆ врача̀ всѣ́хъ хрⷭ҇та̀ ро́ждши, дв҃о, гноє́нїѧ и҆ ꙗ҆́звы дꙋшѝ моеѧ̀ и҆сцѣлѝ лю̑тыѧ и҆ многовре́мєнныѧ, и҆ срⷣца моегѡ̀ стра̑стнаѧ помышлє́нїѧ ᲂу҆мертвѝ.

На хвали́техъ стїхи̑ры, на ѕ҃, гла́съ а҃. Самогла́сны.

Воззрѣ́въ неꙋкло́ннѡ на высотꙋ̀ ра́зꙋма, и҆ ᲂу҆зрѣ́въ неѧвле́ннѡ премꙋ́дрости глꙋбинꙋ̀, твои́ми ᲂу҆че́ньми мі́ръ ѡ҆богати́лъ є҆сѝ, ѻ҆́ч҃е. ѡ҆ на́съ при́снѡ моли́сѧ хрⷭ҇тꙋ̀, свѧти́телю нїко́лае.

Человѣ́че бж҃їй, и҆ вѣ́рный ᲂу҆го́дниче, и҆ строи́телю тогѡ̀ та̑инъ, и҆ мꙋ́жꙋ жела́нїй дꙋхо́вныхъ, сто́лпе ѡ҆дꙋшевле́нный, и҆ вдохнове́нный ѻ҆́бразъ: ꙗ҆́кѡ бжⷭ҇твенное бо сокро́вище тѧ̀ мѵ́рскаѧ цр҃ковь, чꙋдѧ́щисѧ, прїѧ́ла є҆́сть, и҆ моли́твенника ѡ҆ дꙋша́хъ на́шихъ.

И҆́ны стїхи̑ры, гла́съ то́йже. Подо́бенъ: Нбⷭ҇ныхъ чинѡ́въ:

Цр҃кѡ́вныѧ цвѣ́ты ѡ҆блета́ѧ, ꙳ ꙗ҆́коже птене́цъ вы́шнѧгѡ гнѣзда̀ а҆́гг҃льскагѡ, ꙳ нїко́лае требл҃же́нне, ꙳ зове́ши при́снѡ къ бг҃ꙋ ѡ҆ всѣ́хъ на́съ, ꙳ и҆̀же въ нꙋ́ждныхъ бѣда́хъ и҆ и҆скꙋше́нїихъ, ꙳ и҆ и҆збавлѧ́еши моли́твами твои́ми.

Свѧще́нныѧ ѻ҆де́жды красотꙋ̀ ꙳ дѣ́ѧтельными содѣ́лалъ є҆сѝ добродѣ́тельми свѣтлѣ́йшꙋю, ꙳ ѻ҆́ч҃е бг҃оно́се. ꙳ тѣ́мже на́мъ свѧщеннодѣ́йствꙋеши ди̑внаѧ, ꙳ сла́вныхъ чꙋде́съ свѧщеннодѣ́телю, ꙳ лю́тыхъ и҆збавлѧ́ѧ ны̀.

Неви́димыхъ добрѡ́ты проходѧ̀, ꙳ стра́шнꙋю ѻ҆́нꙋ разꙋмѣ́лъ є҆сѝ ꙳ сла́вꙋ ст҃ы́хъ, свѧ́те. ꙳ тѣ́мже на́мъ нбⷭ҇наѧ словеса̀ ꙳ присноживо́тныхъ ѻ҆́нѣхъ видѣ́нїй ꙗ҆влѧ́еши, ꙳ свѧще́ннѣйшїй ѻ҆́ч҃е.

Ꙗ҆́кѡ во снѣ̀ предста́лъ є҆сѝ благочести́вомꙋ царю̀, ꙳ и҆ ᲂу҆́зники, ѻ҆́ч҃е, ѿ сме́рти и҆зба́вилъ є҆сѝ: ꙳ моли́сѧ непреста́ннѡ, ꙳ ꙗ҆́кѡ да и҆ ны́нѣ моли́твами твои́ми ꙳ и҆зба́вимсѧ ѿ и҆скꙋше́нїй и҆ бѣ́дъ и҆ болѣ́зней, ꙳ досто́йнѡ благохва́лѧщїи тѧ̀.

Сла́ва, гла́съ є҃:

Вострꙋ́бимъ трꙋбо́ю пѣ́сней, взыгра́емъ пра́зднствєннаѧ, и҆ ликовствꙋ́емъ, ра́дꙋющесѧ, въ моле́бное торжество̀ бг҃оно́снагѡ ѻ҆тца̀. лю́дїе да стекꙋ́тсѧ, и҆ и҆́же со́ннымъ стра́шнымъ ꙗ҆вле́нїемъ царѧ̀ препира́юща, непови́ннѡ держи̑мыѧ трѝ ѿпꙋсти́ти воевѡ́ды, да воспою́тъ. па́стырїе и҆ ᲂу҆чи́телїе до́браго па́стырѧ, подобноревни́тельна па́стырѧ, соше́дшесѧ, восхва́лимъ. и҆̀же въ недꙋ́зѣхъ врача̀, и҆ и҆̀же въ бѣда́хъ и҆зба́вителѧ, грѣ́шнїи застꙋ́пника, ни́щїи сокро́вище, и҆ и҆̀же въ ско́рбехъ ᲂу҆тѣ́шителѧ, спꙋ́тника пꙋтеше́ствꙋющїи, на мо́ри сꙋ́щїи прави́телѧ, и҆ всѝ вездѣ̀ те́плѣ предварѧ́юща, вели́каго ст҃и́телѧ восхвалѧ́юще, си́це рце́мъ: прест҃ы́й нїко́лае, предварѝ, и҆ и҆зба́ви ны̀ ѿ настоѧ́щїѧ бѣды̀, и҆ спасѝ ста́до твоѐ моли́твами твои́ми.

И҆ ны́нѣ, бг҃оро́диченъ, подо́бенъ. Творе́нїе патрїа́рха ге́рмана:

Вострꙋ́бимъ трꙋбо́ю пѣ́сней: прини́кши бо свы́ше, всецр҃и́ца мт҃и дв҃а благослове́ньми вѣнчева́етъ воспѣва́ющыѧ ю҆̀. лю́дїе да стекꙋ́тсѧ, и҆ цр҃и́цѣ да воспле́щꙋтъ въ пѣ́снехъ, цр҃ѧ̀ ро́ждшей, и҆̀же сме́ртїю держи̑мыѧ пе́рвѣе разрѣши́ти чл҃вѣколю́бнѡ благоволи́вшаго: па́стырїе и҆ ᲂу҆чи́телїе, до́брагѡ па́стырѧ пречⷭ҇тꙋю мт҃рь, соше́дшесѧ, восхва́лимъ. свѣ́щникъ златоза́рный, свѣтоно́сный ѻ҆́блакъ, нб҃съ простра́ннѣйшꙋю ѡ҆дꙋшевле́нный кївѡ́тъ, ѻ҆гнезра́чный влⷣчень престо́лъ, маннопрїе́мнꙋю златꙋ́ю ста́мнꙋ, затворе́ннꙋю сло́ва две́рь, всѣ́хъ хрⷭ҇тїа́нъ прибѣ́жище, пѣ́сньми бг҃огла́сными похвалѧ́юще, си́це рце́мъ: пала́то сло́ва, сподо́би смире́нныхъ на́съ нбⷭ҇нагѡ црⷭ҇твїѧ: ничто́же бо невозмо́жно хода́тайствꙋ твоемꙋ̀.

Славосло́вїе вели́кое. И҆ ѿпꙋ́стъ. Дае́тсѧ же и҆ є҆ле́й бра́тїи ѿ канди́ла ст҃а́гѡ, и҆ ча́съ а҃. На лїтꙋргі́и: бл҃жє́нна ѿ канѡ́на, а҃-гѡ пѣ́снь г҃-ѧ, и҆ в҃-гѡ канѡ́на пѣ́снь ѕ҃. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й: А҆пⷭ҇лъ къ є҆вре́ємъ, зача́ло тл҃є. А҆ллилꙋ́їа, гла́съ д҃: Свѧще́нницы твоѝ ѡ҆блекꙋ́тсѧ въ пра́вдꙋ: Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю: