Мѣ́сѧца тогѡ́же въ ѳ҃і-й де́нь.

Ст҃а́гѡ мꙋ́ченика вонїфа́тїа.

А҆ллилꙋ́їа, и҆лѝ тропа́рь.

На Гдⷭ҇и, воззва́хъ, стїхи̑ры мч҃ника, гла́съ д҃. Поⷣ: Да́лъ є҆сѝ зна́менїе:

Благозва́нїѧ возжела́лъ є҆сѝ, ꙳ нарече́ннагѡ мꙋ́ченикѡмъ, ꙳ страстоте́рпче многострада́льне, ꙳ и҆ болѣ̑зни претерпѣ́лъ є҆сѝ ꙳ де́рзостнымъ ра́зꙋмомъ, ꙳ къ неболѣ́зненномꙋ поко́ю преложи́тисѧ ѡ҆жида́ѧ, ꙳ и҆ по́чєсти и҆щѧ̀ прїѧ́ти, всеблаже́нне, нбⷭ҇ныѧ, ꙳ и҆ ра́йское селе́нїе, ꙳ и҆ свѣ́тъ невече́рнїй и҆ жи́знь вѣ́чнꙋю.

Ногте́й терза̑нїѧ, ꙳ и҆ лю̑таѧ бодє́нїѧ, и҆ ѻ҆́лова врѣ́нїе, ꙳ главы̀ ѿѧ́тїе, ꙳ и҆ свирѣ́пѣйшыѧ претерпѣ́лъ є҆сѝ болѣ̑зни, ꙳ и҆ приложи́лсѧ є҆сѝ ли́кꙋ страстоте́рпєцъ ра́дꙋѧсѧ, многострада́льне. ꙳ тѣ́мже лѣ́тнее твоѐ ꙳ соверша́емъ торжество̀, страда́льче вонїфа́тїе, ꙳ а҆́гг҃лѡмъ собесѣ́дниче.

Раба́ тѧ предпосла́вши, ꙳ бжⷭ҇твеннаго влады́кꙋ воспрїѧ̀ ꙳ а҆глаі́да, вонїфа́тїе, ꙳ страстьмѝ ѡ҆блада́вша, ꙳ ца́рствовавша надъ мꙋчи́тєли, ꙳ низло́жша врагѝ, ꙳ и҆ побѣ́ды вѣнце́мъ ѡ҆дѣ́ѧнна. ꙳ тѣ́мже хра́мъ тебѣ̀ ст҃ы́й и҆ прекра́сенъ созда́вши, ꙳ въ не́мже положи́ла є҆́сть, свѧще́ннѡ восхвалѧ́ющи тѧ̀.

И҆́ны стїхи̑ры прест҃ѣ́й бцⷣѣ, гла́съ и҆ подо́бенъ то́йже:

Ѡ҆дожди́ ми, влⷣчце, ꙳ твоеѧ̀ ми́лости бе́зднꙋ, ꙳ и҆ ѡ҆па́льшеесѧ зно́емъ страсте́й се́рдце моѐ ꙳, ꙗ҆́кѡ ми́лостива, напо́й, ѻ҆трокови́це: ꙳ и҆ ᲂу҆миле́нїѧ ка̑пли точи́ти ꙳ непреста́ннѡ сотворѝ, молю́сѧ, ꙳ и҆́миже ᲂу҆тѣше́нїѧ сподо́блюсѧ, чⷭ҇таѧ, ꙳ є҆́же полꙋчи́ти и҆́мꙋтъ, ꙳ и҆̀же и҆́скреннѡ пла́кавшїисѧ.

Де́мѡнскими коле́блема прилѡ́ги, ꙳ и҆ въ ро́въ поги́бели вве́ржена ᲂу҆ще́дри, влⷣчце, ꙳ и҆ ᲂу҆тверди́ мѧ на ка́мени добродѣ́телей: ꙳ и҆ совѣ́ты врагѡ́въ разори́вши, ꙳ сподо́би мѧ̀ твори́ти повелѣ̑нїѧ ꙳ сн҃а твоегѡ̀, и҆ бг҃а на́шегѡ, ꙳ ꙗ҆́кѡ да полꙋчꙋ̀ ѡ҆ставле́нїе ꙳ въ де́нь сꙋда̀.

Въ разбо́йники впадо́хъ ꙳ скверноꙋбі́йствєнныѧ, всенепоро́чнаѧ ꙳, и҆ нетлѣ́нныѧ ѻ҆де́жды вы́шнїѧ свѣ́тлости ꙳ си́хъ нахожде́ньми совлече́нъ бы́хъ, ѻ҆трокови́це, ꙳ и҆ ѿ ни́хъ неми́лостивнѡ ᲂу҆ѧзви́хсѧ, ꙳ и҆ низве́рженъ бы́хъ ꙳ въ мѣ́сто ѡ҆ѕлобле́нїѧ є҆́ле жи́въ: ꙳ но предварѝ, и҆ рꙋ́кꙋ твою̀ прострѝ, ꙳ и҆ воздви́гни мѧ̀, молю́сѧ.

Сла́ва, и҆ ны́нѣ, гла́съ и҆ подо́бенъ то́йже:

На ѻ҆дрѣ̀ низлежꙋ̀ ᲂу҆ны́нїѧ, всенепоро́чнаѧ, ꙳ и҆ лѣ́ностнѡ прохождꙋ̀ житїѐ, ꙳ и҆ ᲂу҆жаса́юсѧ конца̀ моегѡ̀ вре́мене, бцⷣе, ꙳ да не ꙗ҆́коже ле́въ неща́днѡ расто́ргнетъ ꙳ смире́ннꙋю мою̀ дꙋ́шꙋ ꙳ ѕмі́й вселꙋка́вый. ꙳ тѣ́мже твое́ю бла́гостїю ꙳ пре́жде конца̀ предвари́вши, ꙳ къ покаѧ́нїю мѧ̀ воздви́гни.

Крⷭ҇тобг҃оро́диченъ. Подо́бенъ: Ꙗ҆́кѡ до́блѧ:

Распина́ема хрⷭ҇та̀ чл҃вѣколю́бца ви́дѧщи пречⷭ҇таѧ, ꙳ и҆ рє́бра и҆скопова́ема копїе́мъ, ꙳ пла́чꙋщи вопїѧ́ше: что̀ сїѐ, сн҃е мо́й; ꙳ что́ ти безблагода́тнїи лю́дїе возда́ша, ꙳ за ꙗ҆̀же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀, вселюбе́знѣйшїй ꙳; ᲂу҆дивлѧ́юсѧ, бл҃гоꙋтро́бне, ꙳ твоемꙋ̀ во́льномꙋ распѧ́тїю.

На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на д҃. Є҆гѡ́же краегране́сїе: Вѣ́рнѣ тѧ̀ пою̀, мч҃ниче пресвѣ́тле. Творе́нїе і҆ѡ́сифово.

Гла́съ д҃. Пѣ́снь а҃. І҆рмо́съ:

Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ, побѣ́дное воспою̀ пѣ́нїе.

Оу҆се́рднымъ по́мысломъ подвигѡ́мъ ревнова́въ до́блихъ страда́льцєвъ, пострада́лъ є҆сѝ крѣ́пкѡ: и҆ ѕмі́ѧ ᲂу҆мертви́лъ є҆сѝ страда̑нїи твои́ми живоно́сными, страда́льче вонїфа́тїе, ст҃ы́хъ а҆́гг҃лѡвъ собесѣ́дниче.

Ви́дѣвъ на землѝ вра́жїю ле́сть и҆злїѧ́ннꙋ лю́тѣ, до́блїй страда́льче, дꙋ́шꙋ распали́въ жела́нїемъ бжⷭ҇твеннѣйшимъ, вше́лъ є҆сѝ въ три́знище небоѧ́зненнымъ, треблаже́нне, мꙋдрова́нїемъ.

Мꙋ́дростїю бжⷭ҇твенною просвѣща́емый, бл҃же́нне, немꙋ̑дрыѧ врагѝ ѡ҆б̾юро́дилъ є҆сѝ, хрⷭ҇та̀ возвѣща́ѧ, дебельство́мъ пло́ти ᲂу҆подо́бльшасѧ, и҆̀мже ꙗ҆ви́тисѧ восхотѣ̀, вонїфа́тїе мꙋ́чениче многострада́льне.

Бг҃оро́диченъ:

Го́рꙋ бж҃їю, ю҆́же прови́дѣ данїи́лъ, ски́нїю мы́сленнꙋю, марі́ю чⷭ҇тꙋю, сла́вы свѧще́нїе, трапе́зꙋ, бжⷭ҇твенный хлѣ́бъ вмѣ́щшꙋю, всѝ вѣ́рнїи є҆диномꙋ́дреннѡ воспои́мъ.

Пѣ́снь г҃. І҆рмо́съ:

Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и.

Ꙗ҆́коже возжелѣ́лъ є҆сѝ, сла́вне, свобо́дꙋ вы́шнюю, ѿ и҆́га рабо́ты и҆збавлѧ́ешисѧ, стрⷭ҇те́мъ честны̑мъ поревнова́въ, сла́вне, и҆́же за милосе́рдїе раба̀ бы́вшагѡ.

Плотски́хъ вы́шшїй ꙗ҆́вльсѧ мꙋдрова́нїй и҆змѣне́нїемъ бжⷭ҇твеннымъ, внеза́пꙋ всѧ́къ прило́гъ лю́тыхъ претерпѣ́лъ є҆сѝ ра́дꙋѧсѧ, мꙋ́чениче вонїфа́тїе.

Тебѐ сама́го ѿве́рглсѧ є҆сѝ, и҆ къ подвигѡ́мъ и҆ боре́нїємъ врага̀ и҆зше́лъ є҆сѝ, крⷭ҇та̀ ѻ҆рꙋ́жїемъ ᲂу҆крѣпи́всѧ, и҆ побѣди́тель бы́въ, просла́вилсѧ є҆сѝ, мч҃ниче вонїфа́тїе.

Бг҃оро́диченъ:

Себѐ сама́го и҆стощѝ, ѻ҆ч҃ескихъ не и҆стощи́въ во чре́вѣ твое́мъ нѣ́дръ пресꙋ́щный бг҃ъ, и҆ тво́й сн҃ъ бы́сть, всенепоро́чнаѧ, спаса́ѧ человѣ́чество.

Сѣда́ленъ, гла́съ д҃. Подо́бенъ: Вознесы́йсѧ:

Къ сосло́вїю по́сланъ мꙋ́ченикѡвъ, мч҃никъ бы́лъ є҆сѝ и҆́стиненъ, пострада́въ за хрⷭ҇та̀ крѣпча́йше, всехва́льне: бре́мѧ же, бл҃же́нне, ѿда́лсѧ є҆сѝ вѣ́рою посла́вшей тѧ̀, вонїфа́тїе бл҃же́нне. но прилѣ́жнѡ молѝ, прїѧ́ти всѣ̑мъ согрѣше́нїй соверше́нное проще́нїе.

Сла́ва, и҆ ны́нѣ, бг҃оро́диченъ:

Грѣхолюби́въ сы́й, молю́ тѧ, безгрѣ́шнаго бг҃а ро́ждшꙋю, взе́млющаго грѣхѝ мі́ра, пречⷭ҇таѧ, многогрѣ́шнꙋю дꙋ́шꙋ мою̀ ᲂу҆ще́дрити, и҆ грѣхѝ моѧ̑ мнѡ́гїѧ ѡ҆чи́стити: грѣ̑шнымъ бо ты̀ є҆сѝ ѡ҆чище́нїе и҆ спасе́нїе вѣ̑рнымъ и҆ застꙋпле́нїе.

Крⷭ҇тобг҃оро́диченъ:

И҆зъ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.

Пѣ́снь д҃. І҆рмо́съ:

Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.

Оу҆блажа́ѧ стра́ждꙋщихъ терпѣ́нїе, подо́бїемъ, мч҃ниче, честны́хъ страда́нїй, си̑мъ ᲂу҆подо́билсѧ є҆сѝ, бг҃омꙋ́дре пребога́те.

И҆ды́й вѣ́рою къ мꙋ́ченикѡвъ бжⷭ҇твенномꙋ сосло́вїю, блаже́нне, тебѐ сама́го жела́ющи бре́мѧ досточꙋ́дное, бг҃омꙋ́дре, ѿда́лъ є҆сѝ.

Ѡ҆чище́нъ, ꙗ҆́коже зла́то, мꙋ́чениче, ꙗ҆́звъ горни́ломъ, чистѣ́йши ꙗ҆ви́лсѧ є҆сѝ, носѧ̀ зижди́телѧ стрⷭ҇те́й и҆з̾ѡбраже́нїе.

Бг҃оро́диченъ:

Дѣ́вство по ржⷭ҇твѣ̀ запеча́танно познава́ющи, ѻ҆трокови́це, несказа́ннѡ рожде́ннаго сло́ва и҆зъ бокꙋ̀ твоє́ю, вѣ́рнѡ велича́ла є҆сѝ.

Пѣ́снь є҃. І҆рмо́съ:

Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣши́ ны, бл҃же, тво́й ми́ръ да́рꙋѧй.

Ꙗ҆́кѡ свѣтоза́рнаѧ возше́лъ є҆сѝ ѕвѣзда̀ ѿ за̑падъ, и҆ заше́лъ є҆сѝ, мꙋ́чениче, страда́ньми терпѣли́внѡ, а҆́бїе къ за́падѡмъ возсїѧ́лъ є҆сѝ, ѡ҆зарѧ́ѧ концы̀.

Мч҃нически подвиза́лсѧ є҆сѝ, ногте́й терза̑нїѧ, ѻ҆́стрыми, мч҃ниче, тростьмѝ сбода́емь, и҆ лꙋка́вагѡ жа̑ла вѣ́рнѡ притꙋплѧ́ѧ бл҃года́тїю.

Вра̑жїѧ и҆знемого́ша, бг҃омꙋ́дре, на тѧ̀ кѡва́рствїѧ: и҆́бо къ бг҃ꙋ воззрѣ́нїемъ неꙋкло́ннымъ плотскі̑ѧ ра̑ны ꙗ҆́коже безпло́тенъ терпѣ́лъ є҆сѝ.

Бг҃оро́диченъ:

Скве́рны всѧ́кїѧ ѡ҆мы́й, дв҃о, дꙋ́шꙋ мою̀, вопїю́ ти, и҆ спаси́ мѧ, чⷭ҇таѧ, ꙗ҆́же и҆́стиннаго бг҃а сп҃са на землѝ вопло́щшаѧ.

Пѣ́снь ѕ҃. І҆рмо́съ:

Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.

Бїе́мый ра́нами плотски́ми ᲂу҆ѧзви́лъ є҆сѝ безбѡ́жныѧ, неисцѣ́льнѡ недꙋ́гꙋющыѧ невѣ́дѣнїемъ, и҆ болѧ́щымъ ꙗ҆ви́лсѧ є҆сѝ вра́чь, страда́льче вонїфа́тїе.

Возвыша́емь къ бг҃ꙋ, блаже́нне, прило́гомъ подвигѡ́въ, врагѝ неви̑димыѧ разрази́лъ є҆сѝ, и҆ низриновє́ннымъ помо́щникъ, страстоте́рпче, бы́лъ є҆сѝ.

Влачи́мь по землѝ, ꙗ҆́коже ка́мень многоцѣ́ненъ, страда́льче, пре́лести низложи́лъ є҆сѝ ᲂу҆твержде́нїе, вѣ́рныхъ же сердца̀ наипа́че вѣ́рою ᲂу҆тверди́лъ є҆сѝ.

Бг҃оро́диченъ:

Кꙋпина́ тѧ проѡбража́ше, всенепоро́чнаѧ, пе́рвѣе, горѧ́щи и҆ ника́коже ѡ҆палѧ́ема, пречⷭ҇таѧ: и҆́бо, ꙗ҆́коже ѻ҆на̀, не ѡ҆пали́ласѧ є҆сѝ, бг҃а вопло́щши.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Свѧще́нїе непоро́чное самово́льнѣ тебѐ приве́лъ є҆сѝ, и҆́же ѿ дв҃ы тебє̀ ра́ди роди́тисѧ хотѧ́щемꙋ, свѧ́те вѣнчено́сче, премꙋ́дре вонїфа́тїе.

Пѣ́снь з҃. І҆рмо́съ:

А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.

Колѣ́нъ не преклони́въ и҆стꙋка̑ннымъ, во и҆скꙋше́нїе ве́рглсѧ є҆сѝ велича́йшее, и҆́стиннѡ, мꙋ́чениче, въ пе́щь: въ не́йже ѡ҆роша́емый благода́рствовалъ є҆сѝ хрⷭ҇тꙋ̀ во вѣ́ки.

Разори́ти крѣ́пость твоегѡ̀ и҆сповѣ́данїѧ тща́сѧ льстивомꙋ́дренный во внꙋ́трєннѧѧ твоѧ̑ клоко́чꙋщее ѻ҆́лово неми́лостивнѡ влива́етъ: но ꙗ҆́вѣ посрами́сѧ.

Посѣ́ченъ бы́въ ᲂу҆се́рднѡ въ честнꙋ́ю твою̀ главꙋ̀, врага̀ льсти́вагѡ многоко́зненнꙋю главꙋ̀ ѿсѣ́клъ є҆сѝ, твоегѡ̀ мꙋ́жества мече́мъ, мꙋ́чениче хрⷭ҇то́въ бг҃омꙋ́дре.

Бг҃оро́диченъ:

Да гла̑сы подоба́ющими пѣсносло́влю тѧ̀, ѻ҆трокови́це, страсте́й мѧ̀ и҆зба́ви моли́твами твои́ми, бѣ́дъ же и҆ скорбе́й, и҆ лꙋка́выхъ человѣ̑къ, ѡ҆ѕло́бити мѧ̀ и҆́щꙋщихъ.

Пѣ́снь и҃. І҆рмо́съ:

И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.

Поле́зно твоѐ дѣ́лаѧ спасе́нїе хрⷭ҇то́съ, вонїфа́тїе, взыска́юща моще́й добропобѣ́дныхъ мꙋ́ченикѡвъ, тѧ̀ ᲂу҆крѣплѧ́етъ, є҆́же вѣ́рнѡ взыска́лъ є҆сѝ са́мъ бы́ти.

Блаже́ннѣй гпⷭ҇жѝ, блаже́нно сокро́вище пода́лсѧ є҆сѝ, блаже́нне: и҆́мже ѡ҆богати́вшисѧ поѧ́ше весе́лымъ се́рдцемъ, всѧ̑ дѣла̀ благослови́те, по́йте гдⷭ҇а.

Со тща́нїемъ сла́внаѧ жена̀ воздви́гши хра́мъ свѧще́ннѣйшїй, тѧ̀ въ не́мъ положѝ, сꙋ́щїй бжⷭ҇твенныѧ трⷪ҇цы хра́мъ, страстоте́рпче хрⷭ҇то́въ вонїфа́тїе.

Оу҆мертви́всѧ за любо́вь зижди́телѧ, ᲂу҆мерщвлѧ́ющагѡ стра̑сти тлетвѡ́рныѧ, животворѧ́й моли́твою твое́ю ꙗ҆́снѡ вопїю́щыѧ: всѧ̑ дѣла̀ благослови́те, по́йте гдⷭ҇а.

Бг҃оро́диченъ:

На тѧ̀ чⷭ҇тꙋю пребжⷭ҇твенный низше́дъ, ꙗ҆́коже вѣ́сть, воплоти́сѧ, и҆ человѣ́ки ѡ҆божѝ пѣснопою́щыѧ, дв҃о: всѧ̑ дѣла̀ благослови́те, по́йте гдⷭ҇а.

Пѣ́снь ѳ҃. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Ви́дѣвше тѧ̀ бре́мѧ свѧще́нное ра́довашесѧ, вопїю́ще приснопо́мнимаѧ раба̀: посла́хъ тѧ̀, бл҃же́нне, гдⷭ҇и́на и҆́стинна прїе́млю, рабо́ты мѧ̀ ѕѡ́лъ и҆збавлѧ́юща, твои́ми благопрїѧ́тными мольба́ми.

Ꙗ҆́кѡ крі́нъ во ᲂу҆до́лїихъ мы́сленныхъ процвѣ́лъ є҆сѝ мꙋ́ченикѡвъ, вонїфа́тїе, ꙗ҆́коже фі́нїѯъ возвы́силсѧ є҆сѝ, ꙗ҆́кѡ ке́дръ позна́лсѧ є҆сѝ мѷродыха́ненъ, ꙗ҆ви́лсѧ є҆сѝ и҆збра́нный ꙗ҆́кѡ кѷпарі́съ, благово́нствꙋѧ дꙋ́шы на́шѧ.

Дне́сь па́мѧть твоѧ̀ на́мъ возсїѧ̀, страстоте́рпче, ꙗ҆́коже со́лнце сїѧ́нїемъ бжⷭ҇твенныхъ дарова́нїй, просвѣща́ющи дꙋ́шы пою́щихъ тѧ̀, страсте́й же мглꙋ̀ ѿгонѧ́ющи, мꙋ́чениче бг҃омꙋ́дре всеблаже́нне.

Ꙗ҆́кѡ со́лнце ѿ за̑падъ возсїѧ́лъ є҆сѝ, и҆ восто́чнагѡ гра́да дости́глъ є҆сѝ, и҆дѣ́же пострада́въ, и҆ сме́ртїю заше́дъ, къ жи́зни восте́клъ є҆сѝ, и҆ ри́мъ свѣ́тлый дости́глъ є҆сѝ, сего̀ ѡ҆гражда́ѧ мольба́ми твои́ми.

Бг҃оро́диченъ:

Свѣ́томъ мѧ̀ ѡ҆зарѝ твои́мъ, всенепоро́чнаѧ, во тмѣ̀ содержи́маго грѣхо́внѣй, бцⷣе, и҆ пода́ждь во днѐ ходи́ти бжⷭ҇твенныхъ повелѣ́нїй, бг҃оневѣ́сто: ꙗ҆́кѡ да пою́ тѧ всепѣ́тꙋю.