Мѣ́сѧца тогѡ́же въ к҃и-й де́нь.

Ст҃ы́хъ мꙋ́чєникъ двꙋ̀ тмꙋ̀, въ нїкомиді́и сожже́нныхъ.

На Гдⷭ҇и, воззва́хъ: стїхи̑ры пра́здника, гла́съ є҃. Поⷣ: Ра́дꙋйсѧ:

Но́сиши а҆да́мовъ зра́къ во ѻ҆́бразѣ бж҃їи сы́й всесоверше́нный, и҆ хо́щеши рꙋка́ми держа́тисѧ, рꙋко́ю, всѧ̑ содержа́й си́лою твое́ю, чи́стаѧ всенепоро́чнаѧ провѣщава́ше глаго́лющи: ка́кѡ тѧ̀ пелена́ми повїю̀ ꙗ҆́кѡ младе́нца; ка́кѡ воздою́ тѧ, всѧ́чєскаѧ пита́ющаго; ка́кѡ твое́й па́че ᲂу҆ма̀ нищетѣ̀ ᲂу҆дивлю́сѧ; ка́кѡ тѧ̀ сн҃а моего̀ назовꙋ̀, раба̀ твоѧ̀ ны́нѣ сꙋ́щи; пою̀, бл҃гословлю́ тѧ, подаю́щаго мі́рꙋ ве́лїю ми́лость.

Млⷣнца воплоща́ема и҆зъ неѧ̀, предвѣ́чнаго бг҃а всенепоро́чнаѧ зрѧ́щи, рꙋка́ми держа́щи, и҆ ѡ҆блобыза́ющи ча́стѡ, и҆ ра́дости и҆сполнѧ́ющисѧ провѣщава́ше є҆мꙋ̀: бж҃е высоча́йше, цр҃ю̀ неви́димый, ка́кѡ зрю́ тѧ, и҆ разꙋмѣ́ти та́инства не могꙋ̀ безмѣ́рныѧ нищеты̀ твоеѧ̀; верте́пъ бо малѣ́йшїй и҆ се́й чꙋ́ждїй, внꙋ́трь вмѣща́етъ тѧ̀ ро́ждшагосѧ, и҆ дѣ́вства нерѣши́вша, ложесна̀ соблю́дшаго, ꙗ҆́кѡ пре́жде ржⷭ҇тва̀, и҆ даю́щаго ве́лїю ми́лость.

Сїѧ̑ ра́бски чⷭ҇таѧ, ᲂу҆жа́снѡ же вѣща́ющи, ᲂу҆слы́шаше волхвѡ́въ предъ верте́помъ кꙋ́пнѡ предстоѧ́щихъ, и҆ къ ни̑мъ речѐ: кого̀ и҆́щете вы̀, ꙗ҆́кѡ ви́ждꙋ бо, ѿ и҆нода́льныѧ страны̀ прїидо́сте: пе́рсскїй ѻ҆́бразъ, и҆ мꙋдрова́нїе и҆мꙋ́ще, стра́ненъ и҆схо́дъ и҆ ше́ствїе сотвори́сте: и҆ къ стра́нствовавшемꙋ ѿ высоты̀, и҆ стра́ннѡ въ мѧ̀ все́льшꙋсѧ, ꙗ҆́кѡ вѣ́сть, со тща́нїемъ прїидо́сте томꙋ̀ поклони́тисѧ, да́рꙋющемꙋ мі́рꙋ ве́лїю ми́лость.

И҆́ны стїхи̑ры ст҃ы́хъ, гла́съ д҃. Подо́бенъ: Ꙗ҆́кѡ до́блѧ:

Си́лою вжилѧ́еми, ꙳ и҆ тве́рдѡ ᲂу҆крѣплѧ́еми, ꙳ и҆ всилѧ́еми влⷣки хрⷭ҇та̀, ꙳ въ не́мощи є҆сте́ственнѣй ꙳ непобѣди́ми ꙗ҆ви́стесѧ, страстоте́рпцы, ꙳ врага̀ въ по́двизѣхъ побѣди́вше, ꙳ и҆ моли́тесѧ ѡ҆ соверша́ющихъ ꙳ свѧтꙋ́ю и҆ свѣтоно́снꙋю ва́шꙋ па́мѧть, ꙳ великомꙋ́чєницы сла́внїи.

Въ словесѣ́хъ ѳео́фїлъ, ꙳ и҆ въ дѣ́лѣхъ дѡроѳе́й, и҆ мѷгдо́нїй, ꙳ кꙋ́пнѡ и҆ горго́нїй, ꙳ съ секꙋ́ндомъ же и҆ пе́тръ, ꙳ и҆ і҆́ндисъ до́бльствовавше, ꙳ и҆ врага̀ ѡ҆полчє́нїѧ побѣди́ша ра́дꙋющесѧ: ꙳ и҆ мо́лѧтъ ѿ всѧ́кихъ бѣ́дъ и҆зба́вити, ꙳ вѣ́рою соверша́ющыѧ ꙳ всечестнꙋ́ю па́мѧть и҆́хъ.

Ю҆́ношы, дѣ̑вы, ꙳ ста́рцы и҆ младе́нцы, ꙳ є҆ди́нꙋ показа́ша до́блесть. ꙳ тѣ́мже и҆ ра̑внаѧ ꙳ полꙋчи́ша возмє́здїѧ бл҃года́тїю, ꙳ всѣ́хъ цр҃ю̀ и҆ бг҃ꙋ спребыва́юще. ꙳ ꙗ҆̀же почти́мъ свѧще́нными пѣснопѣ́сньми, ꙳ ꙗ҆́кѡ свѣтоза̑рныѧ свѣти́льники вселе́нныѧ, двѣ̀ тмы̀ сꙋ́щыѧ.

Сла́ва, и҆ ны́нѣ, гла́съ є҃:

Да веселѧ́тсѧ нб҃са̀, и҆ да ра́дꙋетсѧ землѧ̀: дне́сь бо вои́стиннꙋ є҆ди́но ста́до бы́сть а҆́гг҃лѡвъ и҆ человѣ́кѡвъ. ѽ чꙋдесѐ! неви́димый ви́дитсѧ, невмѣсти́мый вмѣща́етсѧ, сло́во ѡ҆дебелѣва́етъ, сн҃ъ бж҃їй, сн҃ъ чл҃вѣ́чь быва́етъ: и҆ дв҃а неискꙋсомꙋ́жнаѧ, мт҃и зри́тсѧ бж҃їѧ, и҆ мт҃и по ржⷭ҇твѣ̀, дв҃а ѡ҆брѣта́етсѧ. вопло́щшеесѧ сло́во ѻ҆́ч҃ее въ ꙗ҆́слехъ возлега́етъ, и҆ па́стырїе проповѣ́дницы, ѻ҆́бщницы та́инства быва́ютъ: волсвѝ ѿ востѡ́къ да́ры приноша́хꙋ, ѕвѣздо́ю наставлѧ́еми, ро́ждшемꙋсѧ сп҃сꙋ поклони́шасѧ, съ ни́миже и҆ мы̀ празднолю́бцы, сердє́чнаѧ сокрѡ́вища ᲂу҆се́рднѡ ѿве́рзше, принесе́мъ є҆мꙋ̀ дѣѧ̑нїѧ блага̑ѧ: вѣ́рꙋ, наде́ждꙋ и҆ любо́вь, ꙗ҆́кѡ зла́то и҆ лїва́нъ и҆ смѵ́рнꙋ, безпло́тныхъ гла́съ вопїю́ще є҆мꙋ̀: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе, прише́дшемꙋ спастѝ ѿ пре́лести ве́сь ро́дъ на́шъ.

На стїхо́внѣ стїхи̑ры пра́здника, гла́съ в҃. Поⷣ: До́ме є҆ѵфра́ѳовъ:

Всего̀ бг҃олѣ́пнѡ ꙳ поне́съ ѿ дв҃ы ꙳ а҆да́ма, хрⷭ҇тѐ, пе́рваго, ꙳ роди́лсѧ є҆сѝ въ верте́пѣ, ꙳ и҆ въ ꙗ҆́слехъ пеленꙋ́емь.

Сті́хъ: И҆зъ чре́ва пре́жде денни́цы роди́хъ тѧ̀.

По́й прⷪ҇ро́чески, дв҃де, ꙳ движѧ̀ свирѣ́ль: ꙳ и҆зъ твои́хъ бо чре́слъ, ꙳ и҆зъ ни́хже бцⷣа, ꙳ хрⷭ҇то́съ ражда́етсѧ дне́сь.

Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀.

Хвалꙋ̀ бг҃олѣ́пнꙋ, ꙳ съ па̑стыри волсвѝ, и҆ со а҆́гг҃лы сла́вꙋ, ꙳ ѿ дв҃ы прозѧ́бшемꙋ бг҃ꙋ, вѣ́рнїи принесе́мъ.

Сла́ва, и҆ ны́нѣ, гла́съ а҃:

Сла́ва въ вы́шнихъ бг҃ꙋ, въ виѳлее́мѣ слы́шꙋ ѿ безпло́тныхъ дне́сь, на землѝ ми́ръ благоволи́вшемꙋ бы́ти. ны́нѣ дв҃а небе́съ ши́рши: возсїѧ́ бо свѣ́тъ ѡ҆мрачє́ннымъ, и҆ смирє́нныѧ возвы́си, а҆́гг҃льски пою́щыѧ: сла́ва въ вы́шнихъ бг҃ꙋ.

Тропа́рь ст҃ы̑мъ, гла́съ в҃:

Страстоте́рпцы гдⷭ҇ни, бл҃же́нна землѧ̀ напи́вшаѧсѧ кровьмѝ ва́шими, и҆ свѧ̑та селє́нїѧ прїи́мшаѧ тѣлеса̀ ва̑ша: въ по́двизѣ бо врага̀ побѣди́сте, и҆ хрⷭ҇та̀ со дерзнове́нїемъ проповѣ́дасте. того̀ ꙗ҆́кѡ бла́га моли́те спасти́сѧ, мо́лимсѧ, дꙋша́мъ на́шымъ.

Сла́ва, и҆ ны́нѣ, пра́здника. Тропа́рь, гла́съ д҃:

Ржⷭ҇тво̀ твоѐ, хрⷭ҇тѐ бж҃е на́шъ, возсїѧ̀ мі́рови свѣ́тъ ра́зꙋма: въ не́мъ бо ѕвѣзда́мъ слꙋжа́щїи, ѕвѣздо́ю ᲂу҆ча́хꙋсѧ, тебѣ̀ кла́нѧтисѧ сл҃нцꙋ пра́вды, и҆ тебѐ вѣ́дѣти съ высоты̀ восто́ка: гдⷭ҇и, сла́ва тебѣ̀.

На ᲂу҆́трени тропа́рь пра́здника, два́жды.

Сла́ва, ст҃ы́хъ. И҆ ны́нѣ, пра́здника.

По а҃-й стїхоло́гїи сѣда́ленъ, гла́съ а҃. Поⷣ: Ка́мени запеча́танꙋ:

На прⷭ҇то́лѣ ѻ҆гнезра́чнѣмъ въ вы́шнихъ сѣдѧ́й со ѻ҆ц҃е́мъ безнача́льнымъ и҆ бжⷭ҇твеннымъ твои́мъ дх҃омъ, благоволи́лъ є҆сѝ роди́тисѧ пло́тїю ѿ дв҃ы неискꙋсомꙋ́жныѧ, і҆и҃се: сегѡ̀ ра́ди и҆ ѕвѣзда́ тѧ ѿ персі́ды волхвѡ́мъ показа̀. сла́ва всебл҃го́мꙋ твоемꙋ̀ совѣ́тꙋ, сла́ва ꙗ҆вле́нїю твоемꙋ̀, сла́ва къ чл҃вѣ́кѡмъ кра́йнемꙋ соше́ствїю твоемꙋ̀.

Сла́ва, и҆ ны́нѣ, то́йже.

По в҃-й стїхоло́гїи сѣда́ленъ, гла́съ г҃. Поⷣ: Красотѣ̀ дѣ́вства:

Превѣ́чнаго и҆ непостижи́маго, соприсносꙋ́щнаго неви́димомꙋ ѻ҆ц҃ꙋ̀, во ᲂу҆тро́бѣ пло́тски носи́ла є҆сѝ, бцⷣе, є҆ди́но и҆ неслїѧ́нное трⷪ҇цы бжⷭ҇тво̀: просїѧ̀ благода́ть твоѧ̀ въ мі́рѣ, всепѣ́таѧ. тѣ́мже непреста́ннѡ вопїе́мъ: ра́дꙋйсѧ, чⷭ҇таѧ дв҃о мт҃и.

Сла́ва, и҆ ны́нѣ, то́йже.

Канѡ́нъ пра́здника со і҆рмосо́мъ на и҃. Гла́съ а҃.

Творе́нїе кѵ́ръ і҆ѡа́нна.

Пѣ́снь а҃. І҆рмо́съ:

Спасѐ лю́ди чꙋдодѣ́йствꙋѧй влⷣка, мо́крꙋю мо́рѧ волнꙋ̀ ѡ҆землени́въ дре́вле, во́лею же ро́ждсѧ ѿ дв҃ы, стезю̀ прохо́днꙋ небесѐ полага́етъ на́мъ: є҆го́же по сꙋществꙋ̀ ра́вна же ѻ҆ц҃ꙋ̀ и҆ человѣ́кѡмъ сла́вимъ.

И҆знесѐ чре́во свѧще́нно сло́во, ꙗ҆́вѣ неѡпа́льнѡ живопи́санное кꙋпино́ю, смѣше́на зра́комъ человѣ́чимъ бг҃а, є҆́ѵы ѻ҆каѧ́ннꙋю ᲂу҆тро́бꙋ клѧ́твы дре́внїѧ разрѣша́ющее го́рькїѧ: є҆го́же земні́и сла́вимъ.

Показа̀ ѕвѣзда̀ пре́жде со́лнца, сло́во, прише́дшее ᲂу҆ста́вити грѣхѝ, волхвѡ́мъ, ꙗ҆́вѣ во ᲂу҆бо́зѣмъ верте́пѣ, ми́лостиваго тебѐ, пелена́ми пови́та: є҆го́же ра́дꙋющесѧ ви́дѧхꙋ самого̀ и҆ чл҃вѣ́ка и҆ гдⷭ҇а.

И҆ ст҃ы́хъ канѡ́нъ на д҃. Є҆гѡ́же краегране́сїе:

Мно́жество мѧ̀ спаса́етъ добропобѣ́дныхъ мꙋ́ченикѡвъ. І҆ѡ́сифъ.

Гла́съ а҃. Пѣ́снь а҃. І҆рмо́съ:

Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.

Мно́жество многочи́сленное честны́хъ мꙋ́ченикѡвъ, мно́жество ѡ҆чи́стите мно́гихъ прегрѣше́нїй мои́хъ хода́тайствомъ ва́шимъ, и҆ дади́те сло́во, воспѣ́ти ва́ше торжество̀.

Свѣти̑ла пресвѣ̑тлаѧ цр҃кве, добропобѣ́днїи мꙋ́чєницы, свои́ми ᲂу҆́ды хрⷭ҇та̀ просла́вивше, свѣтоно́сною ны́нѣ ва́шею па́мѧтїю просла́вистесѧ.

Вѣ́ра бжⷭ҇твеннаѧ страда́льцєвъ невѣ́рныхъ безбо́жное мꙋчи́тельство разорѝ, и҆ потребѝ де́мѡнское лꙋка́вое противле́нїе благода́тїю.

Бг҃а всемо́щнаго пло́ть прїе́мша, и҆ сме́рть разрꙋши́вша сме́ртїю, мꙋ́чєницы и҆сповѣ́давше, ᲂу҆мерщвле́ни бы́вше, жи́знь прїѧ́сте непреста́ннꙋю.

Бг҃оро́диченъ:

Пою́ тѧ, всепѣ́таѧ бл҃гослове́ннаѧ, бг҃а препѣ́таго пло́тїю ро́ждшꙋю, велича́ющаго страда́льцы, врага̀ побѣди́вшыѧ.

Пѣ́снь г҃. І҆рмо́съ:

При́зри на пѣ́нїѧ рабѡ́въ, бл҃годѣ́телю, врага̀ смирѧ́ѧ вознесе́ннꙋю горды́ню: носѧ́й же, всеви́дче, грѣха̀ превы́шше, непоколе́блемѡ ᲂу҆тверждє́нныѧ, бл҃же, пѣвцы̀, ѡ҆снова́нїемъ вѣ́ры.

Невѣ́сты пречⷭ҇тыѧ пребога́тое ржⷭ҇тво̀, ви́дѣти па́че ᲂу҆ма̀ сподо́бивсѧ, ли́къ свирѧ́ющихъ преклонѧ́шесѧ стра́ннымъ ѻ҆́бразомъ: чи́нъ же пою́щихъ безпло́тныхъ, цр҃ѧ̀ хрⷭ҇та̀ безсѣ́меннѡ вопло́щшагосѧ.

Высото́ю црⷭ҇твꙋѧй нб҃съ, милосе́рдїемъ соверша́етъ ѡ҆ на́съ, и҆зъ безневѣ́стныѧ ѻ҆трокови́цы: невеще́ственъ сы́й пре́жде, но по́слѣжде сло́во ѡ҆дебелѣ́вшо пло́тїю, да па́дшаго къ себѣ̀ привлече́тъ первозда́ннаго.

И҆́нъ. І҆рмо́съ:

Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.

Краснѣ́йше распалѧ́еми хрⷭ҇то́вою любо́вїю, всехва́льнїи, разже́гшꙋсѧ ѻ҆гню̀, ника́коже ᲂу҆боѧ́стесѧ: но въ не́мъ сконча́вшесѧ, кꙋ́пнѡ просла́вистесѧ.

Живы́мъ гла́сомъ бг҃а проповѣ́дающе, преще́нїѧ безбо́жныхъ не ᲂу҆страши́шасѧ: но дѣте́й гла́съ є҆диномꙋ́дреннѡ взыва́юще всехва́льнїи ѻ҆рꙋ́жницы хрⷭ҇то́вы сконча́шасѧ.

Не ᲂу҆бои́мсѧ ѻ҆гнѧ̀ є҆динора́бнагѡ, до́блїи вкꙋ́пѣ взыва́хꙋ, ра́дꙋющесѧ дꙋше́ю: тебє̀ ра́ди ᲂу҆мерщвлѧ́емсѧ ᲂу҆ме́ршагѡ, и҆ сме́рть, сп҃се, ᲂу҆праздни́вшагѡ.

Бг҃оро́диченъ:

Да ѡ҆божи́тъ человѣ́чество, бг҃ъ бы́сть чл҃вѣ́къ и҆зъ тебє̀, дв҃о чⷭ҇таѧ, па́че сло́ва и҆ смы́сла: сегѡ̀ ра́ди тѧ̀ согла́снѡ вѣ́рнїи ᲂу҆блажа́емъ.

Конда́къ, гла́съ в҃. Подо́бенъ: Твє́рдыѧ:

Тве́рди дꙋше́ю по вѣ́рѣ, ст҃і́и, ѻ҆гне́мъ страда́нїе прїе́мше двѣ̀ тмѣ̀ страда́лєцъ, вопїю́ще ро́ждшемꙋсѧ ѿ дв҃ы: прїимѝ всесожжє́нїѧ на̑ша за тѧ̀, ꙗ҆́коже да́ры пе́рсскихъ царе́й, зла́то, и҆ смѵ́рнꙋ, и҆ лїва́нъ, превѣ́чный бж҃е.

Сѣда́ленъ, гла́съ а҃. Подо́бенъ: Гро́бъ тво́й:

Во́инство въ числѣ̀ двою̀ тмꙋ̀ мꙋ́ченикѡвъ чествꙋ́емо на́мъ возсїѧ̀, просвѣща́ющее сердца̀ и҆ мы̑сли благочести́выхъ вѣ́ры ра́ди. разже́гшесѧ бо бжⷭ҇твенною любо́вїю влⷣки, кончи́нꙋ свѧтꙋ́ю ѻ҆гне́мъ до́блїи ᲂу҆се́рднѡ прїѧ́ша.

Сла́ва, и҆ ны́нѣ, пра́здника, гла́съ и҆ подо́бенъ то́йже:

Во ꙗ҆́слехъ на́съ ра́ди безслове́сныхъ положи́лсѧ є҆сѝ, долготерпѣли́ве сп҃се, млⷣнствовавъ во́лею: па́стырїе же тѧ̀ воспѣ́ша со а҆́гг҃лы, взыва́юще: сла́ва и҆ хвала̀ на землѝ рожде́нномꙋ, и҆ ѡ҆божи́вшемꙋ земноро́дныхъ сꙋщество̀, хрⷭ҇тꙋ̀ бг҃ꙋ на́шемꙋ.

Пѣ́снь д҃. І҆рмо́съ:

Ро́да человѣ́ча ѡ҆бновле́нїе дре́вле поѧ̀ прⷪ҇ро́къ а҆ввакꙋ́мъ предвозвѣща́етъ, ви́дѣти неизрече́ннѡ сподо́бивсѧ ѻ҆́бразъ: млады́й млⷣнецъ бо и҆зъ горы̀ дв҃ы и҆зы́де, люде́й во ѡ҆бновле́нїе, сло́во.

Ра́венъ произше́лъ є҆сѝ человѣ́кѡмъ вы́шнїй, во́лею пло́ть прїи́мъ ѿ дв҃ы, ꙗ҆́дъ ѡ҆чи́стити ѕмі́евы главы̀, приводѧ̀ всѧ̑ къ свѣ́тꙋ живоно́сномꙋ, бг҃ъ сы́й, ѿ вра́тъ безсо́лнечныхъ.

Ꙗ҆зы́цы, и҆̀же дре́вле тле́ю погрꙋже́ни, па́гꙋбы ѕѣлѡ̀ вра́жїѧ ᲂу҆бѣжа́вше, возно́сѧтъ рꙋ́ки съ похва́льными пѣ́сньми, є҆ди́наго чтꙋ́ще хрⷭ҇та̀, ꙗ҆́кѡ бл҃годѣ́телѧ, къ на́мъ ми́лостивнѡ прише́дшаго.

Ѿ ко́рене и҆зра́стши і҆ессе́ева, дв҃о, ᲂу҆ста́вы прешла̀ є҆сѝ человѣ́ческагѡ сꙋщества̀, ѻ҆́ч҃ее ро́ждши превѣ́чное сло́во, ꙗ҆́кѡ благоволѝ са́мъ запеча́таннꙋю ᲂу҆тро́бꙋ проитѝ, и҆стоща́нїемъ стра́ннымъ.

И҆́нъ. І҆рмо́съ:

Оу҆слы́шахъ, гдⷭ҇и, слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, прⷪ҇ро́къ глаго́лаше, и҆ просла́вихъ си́лꙋ твою̀.

Твое́й любвѝ привѧза́вше сердца̀, сло́ве, страстоте́рпцы, тебє̀ ра́ди ᲂу҆мерщвлѧ́еми, ꙗ҆́кѡ а҆́гнцы непоро́чнїи, подража́телє стрⷭ҇ти твоеѧ̀ ꙗ҆ви́шасѧ.

Оу҆пра́вивше ст҃і́и ко приста́нищꙋ спасе́нїѧ дꙋ́шы ва́шѧ дх҃омъ, бꙋ́ри ᲂу҆бѣжа́сте і҆дѡлонеи́стовства, блаже́ннїи.

Непрело́жни ꙗ҆ви́стесѧ въ по́двизѣ мꙋче́нїѧ, непоколеби́ми, и҆ неꙋжа́сни, гони́телей противле́нїе бжⷭ҇твенною вѣ́рою побѣди́вше.

Бг҃оро́диченъ:

И҆зба́вльшесѧ ржⷭ҇тво́мъ твои́мъ, бл҃гослове́ннаѧ, пе́рвыѧ клѧ́твы, благослове́нїе воспрїѧ́хомъ, и҆ жи́знь и҆ и҆збавле́нїе, тѧ̀ бцⷣꙋ сла́вѧщїи.

Пѣ́снь є҃. І҆рмо́съ:

И҆зъ но́щи дѣ́лъ ѡ҆мраче́нныѧ пре́лести, ѡ҆чище́нїе на́мъ, хрⷭ҇тѐ, бо́дреннѡ ны́нѣ соверша́ющымъ пѣ́снь, ꙗ҆́кѡ бл҃годѣ́телю, прїидѝ, подава́ѧй ᲂу҆до́бнꙋ стезю̀, по не́йже востека́юще ѡ҆брѧ́щемъ сла́вꙋ.

Лю́тꙋю враждꙋ̀, ю҆́же къ на́мъ влⷣка ѿсѣка́ѧ па́ки, плотски́мъ прише́ствїемъ, да держа́щаго разрꙋши́тъ дꙋшетлѣ́ющаго, мі́ръ сочета́ѧ съ невеще́ственными сꙋществы̀, положи́въ пристꙋ́пна, ро́ждшаго, тва́ри.

Лю́дїе ви́дѣша дре́вле ѡ҆мраче́ннїи по дне́хъ свѣ́тъ вы́шнїѧ свѣ́тлости: ꙗ҆зы́ки же бг҃ꙋ наслѣ́дїе сн҃ъ прино́ситъ, подаѧ̀ та́мѡ неизрече́ннꙋю бл҃года́ть, и҆дѣ́же мно́жайшїй процвѣтѐ грѣ́хъ.

И҆́нъ. І҆рмо́съ:

Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ, бж҃е на́шъ.

Свѣтоѧвле́нна па́мѧть просїѧ̀ страстоте́рпєцъ твои́хъ, и҆ просвѣтѝ земны̑ѧ концы̀, чꙋде́съ бжⷭ҇твенными раздаѧ̑нїи, хрⷭ҇тѐ бж҃е на́шъ.

Свѧщеннодѣ́телїе же́ртвꙋ приносѧ́ще, заколє́нїѧ совершє́ннаѧ принесо́шасѧ всесожега́еми, со всѣ́ми и҆ны́ми мно́жайшими мч҃ники хрⷭ҇та̀ велича́юще.

Хра́ми бж҃їи сꙋ́ще ст҃і́и креще́нїемъ, кончи́нꙋ свѧ́тꙋ вкꙋ́пѣ прїѧ́сте въ домꙋ̀ бжⷭ҇твеннѣмъ, и҆ къ нбⷭ҇номꙋ хра́мꙋ взѧ́стесѧ.

Бг҃оро́диченъ:

Да бг҃ъ съ вы́шними совокꙋпи́тъ попо́лзшыѧсѧ престꙋпле́нїемъ въ вели́къ ро́въ, во твою̀ ᲂу҆тро́бꙋ всели́сѧ, всенепоро́чнаѧ, и҆ пло́ть бы́сть.

Пѣ́снь ѕ҃. І҆рмо́съ:

Ѡ҆бита́ѧ і҆ѡ́на въ преиспо́днихъ морски́хъ, прїитѝ молѧ́шесѧ, и҆ бꙋ́рю ᲂу҆толи́ти: ᲂу҆нзе́нъ же а҆́зъ мꙋ́чащагѡ стрѣло́ю, хрⷭ҇тꙋ̀ воспѣва́ю: ѕѡ́лъ гꙋби́телю, ско́рѡ прїитѝ тебѣ̀ къ мое́й лѣ́ности.

И҆́же бѣ̀ и҆спе́рва къ бг҃ꙋ, бг҃ъ сло́во, ны́нѣ ᲂу҆твержда́етъ немощно́е дре́вле: ви́дѣвъ сохрани́ти, є҆́же по на́мъ сꙋщество̀, и҆́мже себѐ вторы́мъ ѡ҆бще́нїемъ а҆́бїе проѧвлѧ́ѧ страсте́й свобо́дное.

Грѧде́тъ на́съ ра́ди и҆зъ а҆враа́млихъ чре́слъ темнопа́дшыѧ во мра́цѣ прегрѣше́нїй, сы́ны воздви́гнꙋти до́лꙋ пони́кшихъ: и҆́же во свѣ́тѣ ѡ҆бита́ѧй и҆ ꙗ҆́слехъ, чрезъ достоѧ́нїе, ны́нѣ благоволи́въ въ человѣ́ческое спасе́нїе.

И҆́нъ. І҆рмо́съ:

Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.

Верхо́вникъ свѧще́нныхъ бы́лъ є҆сѝ люде́й, и҆ предпосла́лъ є҆сѝ ѧ҆̀ въ ра́дости на нб҃са̀, пострада́вшыѧ, свѧщенномꙋ́чениче а҆нѳі́ме сла́вне.

Ꙗ҆́кѡ зла́то чи́сто посредѝ ѻ҆гнѧ̀, благоче́стїе ва́ше страда́льческое і҆и҃сꙋ позна́сѧ, со́лнца мно́жае ѡ҆блиста́ющее.

Оу҆мертви́вшесѧ пло́тїю, жи́знь и҆́стиннꙋю наслѣ́довасте, мꙋ́дрїи, со хрⷭ҇то́мъ сꙋ́ще, показа́вшимъ вы̀ си́льнѣйшыѧ мꙋ́къ.

Бг҃оро́диченъ:

По ржⷭ҇твѣ̀ вои́стиннꙋ, ꙗ҆́кѡ пре́жде ржⷭ҇тва̀, марі́е, си́лою и҆зъ тебє̀ вопло́щшагѡсѧ і҆и҃са, пребыла̀ є҆сѝ дв҃а: чꙋ́до вои́стиннꙋ пресла́вно.

Конда́къ пра́здника, гла́съ г҃. Подо́бенъ:

Дв҃а дне́сь пресꙋ́щественнаго ражда́етъ, и҆ землѧ̀ верте́пъ непристꙋ́пномꙋ прино́ситъ, а҆́гг҃ли съ па́стырьми славосло́вѧтъ, волсви́ же со ѕвѣздо́ю пꙋтеше́ствꙋютъ: на́съ бо ра́ди роди́сѧ ѻ҆троча̀ мла́до, превѣ́чный бг҃ъ.

І҆́косъ:

Є҆де́мъ виѳлее́мъ ѿве́рзе, прїиди́те ви́димъ, пи́щꙋ въ та́йнѣ ѡ҆брѣто́хомъ: прїиди́те, прїи́мемъ сꙋ̑щаѧ ра̑йскаѧ внꙋ́трь верте́па: та́мѡ ꙗ҆ви́сѧ ко́рень ненапое́нъ, прозѧба́ѧ ѿпꙋще́нїе: та́мѡ ѡ҆брѣ́тесѧ кла́дѧзь неиско́панъ, и҆зъ негѡ́же дв҃дъ пи́ти дре́вле возжада́сѧ. та́мѡ дв҃а ро́ждши младе́нца, жа́ждꙋ ᲂу҆ста́ви а҆́бїе а҆да́мовꙋ и҆ дв҃довꙋ. сегѡ̀ ра́ди къ немꙋ̀ и҆́демъ, гдѣ̀ роди́сѧ ѻ҆троча̀ мла́до превѣ́чный бг҃ъ.

Пѣ́снь з҃. І҆рмо́съ:

Всецр҃ѧ̀ любо́вїю ᲂу҆ловле́ннїи ѻ҆́троцы, ᲂу҆кори́ша безчи́сленнѡ ꙗ҆рѧ́щасѧ мꙋчи́телѧ ѕлобо́жное ꙗ҆зыковре́дїе[[По другим источникам (Праздничная Минея, М.: 1993, репринт 1914; Минея, Январь (в приложении), М.: Сретенский Монастырь, 1996; Ирмологий, СТЛ 1995, репринт 1913): ѧ҆зыковре́дїе, что более согласно с правилами церковнославянской орфографии (ср. греч. γλωσσαλγία в оригинальном тексте Этого ирмоса). Прим. orthlib]], и҆̀мже повинꙋ́сѧ ѻ҆́гнь мно́гїй, влⷣцѣ глаго́лющымъ: во вѣ́ки бл҃гослове́нъ є҆сѝ.

Слꙋги̑ ᲂу҆́бѡ неи́стовнѡ попалѧ́етъ, спаса́етъ же всепалѧ́щаѧ со стра́хомъ ю҆́ныѧ, седмочи́сленнымъ разжже́нїемъ возвы́шена и҆̀хже вѣнча̀ пла́мень, незави́стнѡ гдⷭ҇ꙋ подаю́щꙋ благоче́стїѧ ра́ди ро́сꙋ.

Помо́щниче хрⷭ҇тѐ человѣ́кѡмъ, проти́вное гада́нїе воплоще́нїе неизглаго́ланное и҆мѣ́ѧй, посрами́лъ є҆сѝ бога́тство ѡ҆боже́нїѧ носѧ́й, воѡбра́жсѧ ны́нѣ, є҆гѡ́же ра́ди ᲂу҆пова́нїемъ, свы́ше въ преиспо́днїй прїидо́хомъ мра́къ.

Ѕлѣ̀ неꙋдержа́ннѡ возвыша́емы, нече́стнѡ бѣсѧ́щїйсѧ ѿ развраще́нїѧ мі́ра. низложи́лъ є҆сѝ всемо́щнѣ грѣ́хъ, ꙗ҆̀же привлечѐ пре́жде: дне́сь же ѿ сѣ́тей спаса́еши, вопло́щсѧ во́лею, благодѣ́телю.

И҆́нъ. І҆рмо́съ:

Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀, поѧ́хꙋ, и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆ц҃ъ на́шихъ.

Смотрѧ́юще є҆ди̑на, ꙗ҆̀же та́мѡ, бл҃же́ннїи, пребыва̑ющаѧ си́лою бжⷭ҇твенною, ꙗ҆́коже трїѐ въ вавѷлѡ́нѣ бжⷭ҇твеннїи ѻ҆́троцы, ѻ҆гнѧ̀ вы́шшїи ꙗ҆ви́стесѧ, бжⷭ҇твеннымъ свѣ́томъ просвѣща́еми.

Глаго́лъ мꙋчи́телевъ безслове́сный, мꙋ́дрїи, похꙋ́ливше, со сщ҃е́нными жена́ми, и҆ приноше́нїе ꙗ҆́кѡ и҆́стиннѡ бжⷭ҇твенными младе́нцы, приношє́нїѧ всецѣ̑ла цр҃ю̀ всѣ́хъ принесо́стесѧ.

Просвѣще́нїе зна́нїѧ хрⷭ҇то́ва предстоѧ́щи внꙋ́трь дꙋшѝ всеблагоговѣ́йнѡ, те́мный безбо́жїѧ ѻ҆́блакъ вои́стиннꙋ страда́льцы проидо́сте, и҆ въ вѣ́чный свѣ́тъ прїидо́сте.

Бг҃оро́диченъ:

Вы́шши ꙗ҆ви́ласѧ є҆сѝ нб҃съ, ро́ждшаѧ всѣ́хъ влⷣкꙋ и҆ бг҃а. є҆го́же прилѣ́жнѡ молѧ́щи не преста́й, всест҃а́ѧ чⷭ҇таѧ, спастѝ вѣ́рою те́плою пѣсносло́вѧщыѧ тѧ̀.

Пѣ́снь и҃. І҆рмо́съ:

Оу҆тро́бꙋ неѡпа́льнꙋ ѡ҆бразꙋ́ютъ ѻ҆трокови̑цы, и҆̀же въ ве́тсѣмъ ѡ҆палѧ́емїи ю҆́ношы, преесте́ственнѡ ражда́ющꙋю запечатлѣ́ннꙋ. ѻ҆боѧ́ же содѣва́ющи чꙋдодѣ́йство є҆ди́но, лю́ди къ пѣ́нїю возставлѧ́етъ бл҃года́ть.

Па́гꙋбы ᲂу҆бѣжа́вши, є҆́же ѡ҆божи́тисѧ пре́лестїю непреста́ннѡ пое́тъ и҆злїѧ́вшагосѧ сло́ва, ю҆́ношески всѧ̀ съ тре́петомъ тва́рь, несла́внꙋ хвалꙋ̀ боѧ́щисѧ прино́ситъ, тлѣ́нна сꙋ́щи, а҆́ще и҆ мꙋ́дрѣ терпѧ́ше.

Грѧде́ши, заблꙋ́ждшее на па́жить ѡ҆браща́ѧ цвѣтотво́рнꙋю, и҆зъ пꙋсты́нныхъ холмѡ́въ, ꙗ҆зы́кѡвъ возста́нїе, человѣ́ческое є҆стество̀, си́лꙋ нꙋ́жнꙋю человѣкоꙋбі́йцы ᲂу҆гаси́ти: мꙋ́жъ же ꙗ҆ви́всѧ и҆ бг҃ъ промышле́нїемъ.

И҆́нъ. І҆рмо́съ:

Пѣсносло́вцы въ пещѝ спа́сшаго дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте, и҆ превозноси́те во всѧ̑ вѣ́ки.

То́чатъ бжⷭ҇твеннагѡ благово́нїѧ врачева́нїе мѵ́ра, мꙋ́ченикѡвъ мо́щи, и҆ страсте́й смра́дъ ѿе́млютъ вѣ́рою пѣсносло́вѧщихъ тѧ̀ хрⷭ҇та̀ во вѣ́ки.

Ꙗ҆ви́стесѧ ꙗ҆́кѡ шипцы̀ страда́льцы краснѣ́йшїи, посредѣ̀ ходѧ́ще ѻ҆гнѧ̀, и҆ ᲂу҆се́рднѡ зовꙋ́ще: по́йте и҆ превозноси́те хрⷭ҇та̀ во вѣ́ки.

Ю҆́ношы вкꙋ́пѣ и҆ дѣ̑вы, и҆ ста́рцы и҆ ю҆́нїи, младе́нцы ст҃і́и, же́нъ же мно́жество безчи́сленное, вы́шнее ᲂу҆лꙋчи́ша ликова́нїе, вкꙋ́пѣ пострада́вше.

Бг҃оро́диченъ:

І҆езекі́иль тѧ̀ две́рь зри́тъ заключе́ннꙋ, дв҃о: є҆́юже про́йде і҆и҃съ, всели́выйсѧ во ᲂу҆тро́бѣ твое́й, и҆ пло́ть ѿ твои́хъ крове́й поне́съ неслїѧ́ннѡ.

Пѣ́снь ѳ҃. І҆рмо́съ:

Люби́ти ᲂу҆́бѡ на́мъ, ꙗ҆́кѡ безбѣ́дное стра́хомъ ᲂу҆до́бѣе молча́нїе, любо́вїю же, дв҃о, пѣ̑сни тка́ти спротѧже́ннѡ сложє́нныѧ, неꙋдо́бно є҆́сть: но и҆ мт҃и, си́лꙋ, є҆ли́ко є҆́сть произволе́нїе, да́ждь.

Ѻ҆́бразы несвѣ̑тлы, и҆ сѣ̑ни приведе́ны, ѽ мт҃и чи́стаѧ, ви́дѣвше сло́ва, но́ва ꙗ҆́вльшагосѧ ѿ вра́тъ заключе́нныхъ: мнѧ́щїи же и҆́стиннꙋю свѣ́тлость, досто́йнѡ твою̀ благослови́мъ ᲂу҆тро́бꙋ.

Жела́нїе полꙋчи́вше, и҆ бж҃їѧ прише́ствїѧ хрⷭ҇токра́снїи лю́дїе сподо́бльшесѧ, ны́нѣ ᲂу҆тѣша́ютсѧ па́ки бытїе́мъ, ꙗ҆́кѡ живоно́снꙋ благода́ть дае́ши, дв҃о чⷭ҇таѧ, поклони́тисѧ сла́вѣ.

И҆́нъ. І҆рмо́съ:

Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ небесѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.

Ꙗ҆́кѡ вольнозакла́ннїи а҆́гнцы всесожго́стесѧ вкꙋ́пѣ, и҆ ꙗ҆́кѡ жє́ртвы чи̑стыѧ закла́нномꙋ влⷣцѣ ѡ҆ на́съ земноро́дныхъ, добропобѣ́днїи мч҃ницы приведо́стесѧ, и҆ вѣнцы̀ побѣ́ды досто́йнѡ прїѧ́сте вкꙋ́пѣ.

Со ст҃ы́ми прⷪ҇рѡ́ки, съ честны́ми а҆пⷭ҇лы и҆ съ ли̑ки и҆збра́нныхъ предстоѧ́ще а҆́гг҃лъ, мно́жество мꙋ́ченикѡвъ свѧще́нныхъ, гдⷭ҇ꙋ моли́тесѧ, є҆́же спастѝ ѿ напа́стей и҆ бѣ́дъ, вѣ́рою блажа́щыѧ ва́съ.

Со́лнечныхъ лꙋ̑чь свѧще́ннаѧ ва́ша па́мѧть мно́жае сїѧ́етъ страда́льцы, де́мѡнскꙋю тмꙋ̀ ѿгонѧ́щи при́снѡ, и҆ всѣ́хъ просвѣща́ющи всехва́льнїи, вѣ́рою и҆ любо́вїю по до́лгꙋ блажа́щыѧ ва́съ.

Бг҃оро́диченъ:

Свѣ́тъ ро́ждшаѧ бжⷭ҇твенный ѿ ѻ҆ц҃а̀ возсїѧ́вшїй ѡ҆мраче́ннꙋю мою̀ дꙋ́шꙋ лестьмѝ житїѧ̀, и҆ бы́вшꙋю врагѡ́мъ, всенепоро́чнаѧ, и҆гра́лище, ᲂу҆ще́дри, и҆ свѣ́томъ покаѧ́нїѧ спаси́тельнагѡ сподо́би, чⷭ҇таѧ.

Свѣти́ленъ пра́здника:

Посѣти́лъ ны̀ є҆́сть свы́ше сп҃съ на́шъ, восто́къ восто́кѡвъ, и҆ сꙋ́щїи во тмѣ̀ и҆ сѣ́ни ѡ҆брѣто́хомъ и҆́стинꙋ: и҆́бо ѿ дв҃ы роди́сѧ гдⷭ҇ь.

Два́жды.

На стїхо́внѣ стїхи̑ры, гла́съ ѕ҃. Подо́бенъ: А҆́гг҃льскїѧ:

До́ме є҆ѵфра́ѳовъ, ꙳ сїѡ́не гра́де ст҃ы́й, ꙳ прїимѝ съ ра́достїю влⷣкꙋ всѣ́хъ ꙳ въ тебѣ̀ ѿ дв҃ы па́че сло́ва ражда́ема, ꙳ градонаписа́ти хотѧ́ща ꙳ раѧ̀ ѿпа́дшыѧ, ꙳ къ немꙋ́же зове́мъ: ꙳ благослове́нъ прише́дый ꙳ бж҃е на́шъ, сла́ва тебѣ̀.

Сті́хъ: И҆зъ чре́ва пре́жде денни́цы роди́хъ тѧ̀, клѧ́тсѧ гдⷭ҇ь и҆ не раска́етсѧ.

Тѧ̀ на́съ ра́ди по на́мъ ꙗ҆́вльшасѧ, сло́ве, ꙳ свирѧ́ющихъ ли́къ ви́дѣвъ въ верте́пѣ, ꙳ пелена́ми пови́та, ꙳ въ ꙗ҆́слехъ же лежа́ща, ꙳ пое́тъ тѧ̀ ꙗ҆́вѣ со а҆́гг҃лы, ꙳ сла́ва бг҃ꙋ въ вы́шнихъ. ꙳ съ ни́миже зове́мъ: ꙳ бл҃гослове́нъ рожде́йсѧ ꙳ бж҃е на́шъ, сла́ва тебѣ̀.

Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀.

И҆́же во прⷪ҇ро́цѣхъ велегла́сный взыва́етъ: ѿ дѣ́вственнагѡ хо́щетъ роди́тисѧ чре́ва ꙳ ѻ҆троча̀ влⷣка, ꙳ па́че сло́ва и҆ мы́сли, ꙳ а҆́гг҃лъ совѣ́та вои́стиннꙋ вели́ка, и҆ жи́знь живꙋ́щихъ сы́й. ꙳ съ ни́ми же зове́мъ: ꙳ бл҃гослове́нъ рожде́йсѧ ꙳ бж҃е на́шъ, сла́ва тебѣ̀.

Сла́ва, и҆ ны́нѣ, гла́съ а҃:

Нб҃о и҆ землѧ̀ дне́сь прⷪ҇ро́чески да возвеселѧ́тсѧ, а҆́гг҃ли и҆ человѣ́цы дꙋхо́внѡ да торжествꙋ́ютъ, ꙗ҆́кѡ бг҃ъ во пло́ти ꙗ҆ви́сѧ, сꙋ́щымъ во тмѣ̀ и҆ сѣ́ни сѣдѧ́щымъ, рожде́йсѧ ѿ дв҃ы: верте́пъ и҆ ꙗ҆́сли прїѧ́ша того̀: па́стырїе чꙋ́до проповѣ́дꙋютъ: волсвѝ ѿ востѡ́къ въ виѳлее́мъ да́ры прино́сѧтъ. мы́ же хвалꙋ̀ недосто́йными ᲂу҆стна́ми, а҆́гг҃льски томꙋ̀ принесе́мъ: сла́ва въ вы́шнихъ бг҃ꙋ, и҆ на землѝ ми́ръ: прїи́де бо ча́ѧнїе ꙗ҆зы́кѡвъ, прише́дъ спасѐ на́съ ѿ рабо́ты вра́жїѧ.

На лїтꙋргі́и бл҃жє́нна, пѣ́снь д҃-ѧ и҆ є҃-ѧ на ѕ҃. Прокі́менъ ст҃ы́хъ, гла́съ є҃: Ты̀, гдⷭ҇и, сохрани́ши ны̀ и҆ соблюде́ши ны̀: Сті́хъ: Спаси́ мѧ, гдⷭ҇и, ꙗ҆́кѡ ѡ҆скꙋдѣ̀ прпⷣбный: А҆пⷭ҇лъ къ ри́млѧнѡмъ, зача́ло ч҃ѕ ѿ полꙋ̀. А҆ллилꙋ́їа, гла́съ д҃: Воскли́кните гдⷭ҇еви всѧ̀ землѧ̀: Є҆ѵⷢ҇лїе лꙋкѝ, зача́ло н҃а ѿ полꙋ̀. Прича́стенъ: Ра́дꙋйтесѧ, првⷣнїи ѡ҆ гдⷭ҇ѣ: