Мѣ́сѧца тогѡ́же въ ѕ҃-й де́нь.

Преподо́бнагѡ ѻ҆ц҃а̀ на́шегѡ вꙋко́ла, є҆пⷭ҇кпа смѵ́рнскагѡ.

На Гдⷭ҇и, воззва́хъ, стїхи̑ры пра́здника, гла́съ а҃.

Подо́бенъ: Нбⷭ҇ныхъ чинѡ́въ:

Творе́цъ всѧ́ческихъ и҆ и҆зба́витель на́шъ ꙳ мт҃рїю дв҃ою въ це́рковь прино́ситсѧ, ꙳ тѣ́мже ста́рецъ сего̀ прїе́мъ, съ ра́достїю взыва́ше: ꙳ ны́нѣ ѿпꙋща́еши раба̀ твоего̀, бл҃же, съ ми́ромъ, ꙳ ꙗ҆́коже и҆зво́лилъ є҆сѝ.

Сѷмеѡ́нъ на рꙋ́ки ѿ дв҃ы прїе́мъ ꙳ пре́жде всѣ́хъ вѣ̑къ рожде́ннаго, ꙳ сп҃са ви́дѣхъ, вопїѧ́ше, ꙳ просвѣще́нїе твоеѧ̀ сла́вы концє́мъ: ꙳ ны́нѣ ѿпꙋща́еши раба̀ твоего̀, бл҃же, съ ми́ромъ, ꙳ ꙗ҆́кѡ ви́дѣхъ тѧ̀ дне́сь.

Напослѣ́докъ вѣкѡ́въ рожде́на на спасе́нїе человѣ́кѡвъ, ꙳ сѷмеѡ́нъ понесы́й на рꙋка́хъ сп҃са, ꙳ ра́дꙋѧсѧ вопїѧ́ше: ꙳ ви́дѣхъ свѣ́тъ ꙗ҆зы́кѡвъ и҆ сла́вꙋ і҆и҃лѧ, ꙳ ны́нѣ ѿпꙋща́еши, ꙳ ꙗ҆́коже ре́клъ є҆сѝ, ꙗ҆́кѡ бг҃ъ, ꙳ ѿ сꙋ́щихъ здѣ̀ велѣ́нїемъ твои́мъ.

И҆́ны стїхи̑ры преподо́бнагѡ, гла́съ ѕ҃. Подо́бенъ: Тридне́венъ:

Свѣ́томъ бл҃годѣ́тельныхъ добродѣ́телей блиста́ѧсѧ, свѧще́ннѣйше, свѣ́тъ положи́лсѧ є҆сѝ на свѣ́щницѣ та́инственнѡ бжⷭ҇твенныѧ цр҃кве, ᲂу҆ѧснѧ́ѧ сїю̀, ѻ҆́ч҃е, свѧще́нными ᲂу҆чє́нїи твои́ми.

Дх҃ъ тѧ̀ ст҃ы́й, вꙋко́ле свѧще́нне, ѡ҆ст҃и́въ, тобо́ю ст҃ы́ню вѣ́рою пристꙋпа́ющымъ подае́тъ, бг҃оно́се, и҆ просвѣще́нїе и҆ и҆збавле́нїе.

Кра́йнюю бла́гость проповѣ́даѧ бг҃а на́шегѡ, ѡ҆ѕло́блєнныѧ ᲂу҆блажа́еши лю́ди, мꙋ́дре, благода́тнѡ, приводѧ̀ сп҃сꙋ ꙗ҆́кѡ свѧще́нникъ свѧще́ннѣйшїй.

Сла́ва, и҆ ны́нѣ, пра́здника, гла́съ є҃.

И҆спыта́йте писа̑нїѧ, ꙗ҆́коже речѐ во є҆ѵⷢ҇лїихъ хрⷭ҇то́съ бг҃ъ на́шъ, въ ни́хъ бо ѡ҆брѣта́емъ того̀ ражда́ема, и҆ пелена́ми повива́ема, въ ꙗ҆́слехъ полага́ема, и҆ млеко́мъ пита́ема, ѡ҆брѣ́занїе прїе́млюща, и҆ сѷмеѡ́номъ носи́ма, не мнѣ́нїемъ, ни привидѣ́нїемъ, но и҆́стиною мі́рови ꙗ҆́вльшасѧ. къ немꙋ́же возопїи́мъ: превѣ́чный бж҃е, сла́ва тебѣ̀.

А҆́ще є҆́сть по́стъ, Сла́ва, и҆ ны́нѣ, бг҃оро́диченъ: А҆́ще ли среда̀ и҆лѝ пѧто́къ, крⷭ҇тобг҃оро́диченъ: пи́санъ сегѡ̀ мцⷭ҇а въ а҃і де́нь.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Носѧ́щи чⷭ҇таѧ ꙳ и҆ пречⷭ҇таѧ дв҃а ꙳ содѣ́телѧ и҆ влⷣкꙋ, ꙳ ꙗ҆́кѡ младе́нца на рꙋка́хъ, ꙳ въ це́рковь вхо́дитъ.

Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.

Прїимѝ, ѽ сѷмеѡ́не, ꙳ гдⷭ҇а сла́вы, ꙳ ꙗ҆́коже и҆звѣсти́лсѧ є҆сѝ ꙳ ѿ дх҃а ст҃а́гѡ: ꙳ се́ бо прїи́де.

Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ.

Ны́нѣ ви́дѣша, ꙳ бл҃гі́й бж҃е, ѻ҆́чи моѝ ꙳ твоѐ ѡ҆бѣща́нїе, ꙳ разрѣши́ мѧ ско́рѡ, ꙳ раба̀ твоего̀, чл҃вѣколю́бче.

Сла́ва, и҆ ны́нѣ, гла́съ є҃. Ге́рманово:

Ве́тхїй де́ньми младе́нствовавъ пло́тїю, мт҃рїю дв҃ою въ це́рковь прино́ситсѧ, своегѡ̀ зако́на и҆сполнѧ́ѧ ѡ҆бѣща́нїе, є҆го́же сѷмеѡ́нъ прїи́мъ, глаго́лаше: ны́нѣ ѿпꙋща́еши съ ми́ромъ, по глаго́лꙋ твоемꙋ̀, раба̀ твоего̀: ви́дѣша бо ѻ҆́чи моѝ спасе́нїе твоѐ, ст҃ы́й.

Тропа́рь, гла́съ д҃:

Пра́вило вѣ́ры, и҆ ѻ҆́бразъ кро́тости, воздержа́нїѧ ᲂу҆чи́телѧ, ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е вꙋко́ле, молѝ хрⷭ҇та̀ бг҃а, спасти́сѧ дꙋша́мъ на́шымъ.

Сла́ва, и҆ ны́нѣ, пра́здника, гла́съ а҃.

Ра́дꙋйсѧ, блгⷣтнаѧ бцⷣе дв҃о, и҆з̾ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тмѣ̀: весели́сѧ и҆ ты̀, ста́рче пра́ведный, прїе́мый во ѡ҆б̾ѧ̑тїѧ свободи́телѧ дꙋ́шъ на́шихъ, да́рꙋющаго на́мъ воскресе́нїе.

На ᲂу҆́трени, по а҃-й стїхоло́гїи сѣда́ленъ, гла́съ а҃.

Подо́бенъ: Ка́мени запеча́танꙋ:

Въ це́рковь прине́слсѧ є҆сѝ жи́знь всѧ́ческихъ, менє̀ ра́ди младе́нствовавъ, подъ зако́номъ бы́лъ є҆сѝ, дре́вле начерта́въ на скрижа́лѣхъ зако́нъ на горѣ̀ сїна́йстѣй, да всѧ̑ и҆змѣни́ши ѿ зако́нныѧ дре́внїѧ рабо́ты. сла́ва милосе́рдїю твоемꙋ̀, сп҃се, сла́ва црⷭ҇твїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.

Сла́ва, и҆ ны́нѣ, то́йже.

По в҃-й стїхоло́гїи сѣда́ленъ, гла́съ є҃. Поⷣ: Собезнача́льное сло́во:

Въ це́рковь прине́слсѧ є҆сѝ, ѻ҆бы̑чнаѧ и҆сполнѧ́ѧ, творе́цъ и҆ влⷣка и҆ зако́на да́тель, сп҃се: и҆ на рꙋка́хъ сѷмеѡ́на благоволе́нїемъ твои́мъ носи́тисѧ пло́тїю, и҆́же всѣ̑мъ стра́шный, и҆ всю̀ тва́рь содержа́й, восхотѣ́лъ є҆сѝ, є҆ди́не ще́дре, свѣ́тъ тво́й всѣ̑мъ ѿкры́ти на́мъ.

Сла́ва, и҆ ны́нѣ, то́йже.

Канѡ́нъ пра́здника со і҆рмосо́мъ на и҃, и҆ ст҃а́гѡ на д҃. Канѡ́нъ пра́здника.

Гла́съ г҃. Пѣ́снь а҃. І҆рмо́съ:

Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀, лю́демъ пѣшомореходѧ́щымъ, и҆ бг҃оꙋго́днѡ пою́щымъ: пои́мъ гдⷭ҇еви, сла́внѡ бо просла́висѧ.

Да ка́плютъ во́дꙋ ѻ҆́блацы, со́лнце бо на ѻ҆́блацѣ ле́гцѣ носи́мо наста́ло є҆́сть, на нетлѣ́ннꙋю рꙋкꙋ̀, хрⷭ҇то́съ въ це́ркви ꙗ҆́кѡ младе́нецъ. тѣ́мже, вѣ́рнїи, возопїе́мъ: пои́мъ гдⷭ҇еви, сла́внѡ бо просла́висѧ.

Крѣпи́тесѧ, рꙋ́цѣ сѷмеѡ́ни, ста́ростїю ѡ҆сла́бленнїи, лы́ста же претрꙋждє́нна ста̑рча, пра́вѡ быстрѡ̀ движи́тасѧ хрⷭ҇тꙋ̀ на срѣ́тенїе, ли́къ со безпло́тными соста́вльше: пои́мъ гдⷭ҇еви, сла́внѡ бо просла́висѧ.

Ра́зꙋмомъ простє́ртаѧ нб҃са̀, весели́тесѧ, и҆ ра́дꙋйсѧ, землѐ: и҆зъ пребжⷭ҇твенныхъ бо нѣ́дръ хитре́цъ проше́дъ хрⷭ҇то́съ, мт҃рїю дв҃ою бг҃ꙋ ѻ҆ц҃ꙋ̀ прино́ситсѧ, младе́нецъ, и҆́же пре́жде всѣ́хъ: сла́внѡ бо просла́висѧ.

Канѡ́нъ ст҃а́гѡ, є҆гѡ́же краегране́сїе:

Вꙋко́ла вели́кагѡ воспою̀ сла́вꙋ. І҆ѡ́сифъ.

Гла́съ ѕ҃. Пѣ́снь а҃. І҆рмо́съ:

Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мь, вопїѧ́ше.

Бжⷭ҇твенными свѣтлостьмѝ, и҆ свѧще́нными и҆ свѣтоно́сными сїѧ́ньми просвѣща́емь при́снѡ, мою̀ ѡ҆зарѝ дꙋ́шꙋ, свѣ́тлый тво́й пра́здникъ, ѻ҆́ч҃е, чтꙋ́щагѡ.

Всесвѣ́тлꙋ тѧ̀ ѕвѣздꙋ̀ мы́сленное показа́въ со́лнце, свѣтлостьмѝ твои́хъ добродѣ́телей ᲂу҆ѧснѝ зе́млю, свѧти́телю хрⷭ҇то́въ вꙋко́ле всемꙋ́дре.

Житїѐ при́снѡ ѡ҆свѧще́нно и҆ чи́сто, и҆ скве́рнамъ несмѣ́сно показꙋ́ѧ, хрⷭ҇то́въ свѧще́нъ сосꙋ́дъ, мꙋ́дре, позна́лсѧ є҆сѝ на землѝ, вꙋко́ле пресла́вне.

Бг҃оро́диченъ:

И҆́же ѻ҆ц҃ꙋ̀ сы́й є҆диноро́денъ, па́че ᲂу҆ма̀ во чре́вѣ твое́мъ вопло́щсѧ бг҃олѣ́пнѡ, человѣ́ки ѡ҆божѝ, чⷭ҇таѧ, за мно́жество щедро́тъ, пребл҃гі́й.

Пѣ́снь г҃. І҆рмо́съ:

Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ чⷭ҇тно́ю твое́ю кро́вїю.

Перворожде́нъ и҆з̾ ѻ҆ц҃а̀ пре́жде вѣ̑къ, перворожде́нъ млⷣнецъ и҆зъ дв҃ы нетлѣ́нныѧ, а҆да́мꙋ рꙋ́кꙋ простира́ѧ, ꙗ҆ви́сѧ.

Младоꙋ́мна бы́вша пре́лестїю первозда́ннаго, па́ки и҆справлѧ́ѧй бг҃ъ сло́во, младе́нствовавъ, ꙗ҆ви́сѧ.

Землѝ и҆сча́дїе, па́ки поте́кшее въ ню̀, бжⷭ҇тва̀ соѻбра́зное є҆стество̀ зижди́тель, ꙗ҆́кѡ непрело́жнѣ младе́нствовавъ, ꙗ҆вѝ.

И҆́нъ. І҆рмо́съ:

Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Сн҃ъ днѐ и҆ свѣ́та бы́въ, ст҃и́телю, трꙋды̀ бж҃е́ственными, всели́лсѧ є҆сѝ ꙗ҆́вѣ во свѣ́тлостехъ ны́нѣ ст҃ы́хъ, благода́тїю сїѧ́ѧ.

Проповѣ́даѧ є҆ди́но бл҃гоче́стнѡ трⷪ҇цы сꙋщество̀, многобо́жнꙋю ле́сть и҆скорени́лъ є҆сѝ ѿ землѝ, ꙗ҆́кѡ свѧти́тель че́стенъ, ꙗ҆́кѡ сло́ва и҆́стинный слꙋжи́тель.

Пꙋ́ть показа́лъ є҆сѝ жи́зни всѣ̑мъ прельщє́ннымъ ѿ врагѡ́въ навѣ́та, и҆ приве́лъ є҆сѝ ты́ѧ ꙗ҆́кѡ па́стырь слове́сенъ спасє́ны, сло́вꙋ первопа́стырю.

Бг҃оро́диченъ:

Приста́нище бꙋ́ди мѝ и҆ стра́жъ, лю́тыми треволнє́нїи страсте́й неѡсла́бнѡ ѡ҆бꙋрева́емꙋ при́снѡ, въ мо́ри, чⷭ҇таѧ, житїѧ̀, є҆ди́на приснодв҃о.

Сѣда́ленъ ст҃а́гѡ, гла́съ д҃. Подо́бенъ: Вознесы́йсѧ:

Свѧще́нства свѣ́томъ сїѧ́ѧ, просвѣти́лъ є҆сѝ лю́ди, свѧти́телю, и҆ і҆́дѡльскꙋю тмꙋ̀ потреби́лъ є҆сѝ, заре́ю же и҆сцѣле́нїй страсте́й мглꙋ̀ разори́въ, преше́лъ є҆сѝ къ незаходи́момꙋ сїѧ́нїю, ѡ҆ на́съ молѧ̀ прилѣ́жнѡ тѧ̀ чтꙋ́щихъ, вꙋко́ле блаже́нне.

Сла́ва, и҆ ны́нѣ, пра́здника, гла́съ то́йже. Поⷣ: Оу҆диви́сѧ і҆ѡ́сифъ:

Младе́нствꙋеши менє̀ ра́ди, ве́тхїй де́ньми, чище́нїемъ приѡбща́ешисѧ, чистѣ́йшїй бж҃е, да пло́ть ᲂу҆вѣ́риши мнѣ̀, ю҆́же ѿ дв҃ы: и҆ си̑мъ сѷмеѡ́нъ поꙋча́ѧсѧ, позна́ тѧ бг҃а ꙗ҆́вльшагосѧ пло́тїю, и҆ ꙗ҆́кѡ жи́знь лобза́ше и҆ ра́дꙋѧсѧ ста́рчески взыва́ше: ѿпꙋстѝ менѐ, тебе́ бо ви́дѣхъ живота̀ всѧ́ческихъ.

А҆́ще є҆́сть по́стъ, Сла́ва, и҆ ны́нѣ, бг҃оро́диченъ: а҆́ще среда̀ и҆лѝ пѧто́къ, крⷭ҇тобг҃оро́диченъ, пи̑саны въ з҃і де́нь.

Пѣ́снь д҃. І҆рмо́съ:

Покры́ла є҆́сть нб҃са̀ добродѣ́тель твоѧ̀, хрⷭ҇тѐ: и҆зъ кївѡ́та бо проше́дъ ст҃ы́ни, твоеѧ̀ нетлѣ́нныѧ мт҃ре, въ хра́мѣ сла́вы твоеѧ̀ ꙗ҆ви́лсѧ є҆сѝ, ꙗ҆́кѡ младе́нецъ рꙋконоси́мь, и҆ и҆спо́лнишасѧ всѧ̑ твоегѡ̀ хвале́нїѧ.

Ра́дꙋѧсѧ, сѷмеѡ́не, неизрече́нныхъ таи́нниче, бцⷣа вопїѧ́ше: є҆го́же ѿ ст҃а́гѡ дре́вле и҆звѣсти́сѧ тебѣ̀ дх҃а, младе́нствовавшаго сло́ва, хрⷭ҇та̀ на рꙋ́ки прїимѝ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.

На него́же ᲂу҆пова́лъ є҆сѝ, сѷмеѡ́не, во́зрастъ дѣ́тищный, ра́дꙋѧсѧ под̾имѝ хрⷭ҇та̀, і҆и҃лѧ бжⷭ҇твеннагѡ ᲂу҆тѣше́нїе, зако́на творца̀ и҆ влⷣкꙋ, и҆сполнѧ́ющаго зако́на чи́нъ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.

Ви́дѧ сѷмеѡ́нъ сло́во безнача́льное, съ пло́тїю, ꙗ҆́кѡ на прⷭ҇то́лѣ херꙋві́мстѣмъ, дв҃ою носи́мо, вино́внаго є҆́же бы́ти всѧ́ческихъ, ꙗ҆́кѡ младе́нцꙋ дивѧ́сѧ, вопїѧ́ше є҆мꙋ̀: и҆спо́лнишасѧ всѧ̑ твоегѡ̀ хвале́нїѧ.

И҆́нъ. І҆рмо́съ:

Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи, ѿ смы́сла чи́ста, ѡ҆ гдⷭ҇ѣ пра́зднꙋющи.

Предвѣ́даѧй бг҃ъ твоеѧ̀, бг҃облаже́нне, дꙋшѝ красотꙋ̀, и҆ ᲂу҆ма̀ чистотꙋ̀, свѧщеннопроповѣ́дника мꙋ́дра свѧще́ннѡ тѧ̀ рꙋкополага́етъ.

Ѿ дх҃а просвѣща́емь, сꙋ́щыѧ во тмѣ̀ пре́лести просвѣща́еши: и҆ кр҃ще́нїемъ сы́ны днѐ соверша́еши, ст҃и́телю пресла́вне.

Ѡ҆брѣ́тъ тѧ̀ бл҃года́тїю сїѧ́юща сла́вный бг҃осло́въ, рꙋ́кꙋ возлага́етъ бжⷭ҇твенными вожде́ньми, и҆ свѧще́нника соверша́етъ свѧще́нна, вꙋко́ле всемꙋ́дре.

Бг҃оро́диченъ:

Разꙋ́мнѡ въ кꙋпинѣ́ тѧ мѡѷсе́й ᲂу҆зрѣ̀ сщ҃енноѻбразꙋ́емꙋ, ѻ҆гнѧ̀ хотѧ́щаго бы́ти во ᲂу҆тро́бѣ, ꙗ҆влѧ́етъ та́инственнѡ, бцⷣе приснодв҃о.

Пѣ́снь є҃. І҆рмо́съ:

Ꙗ҆́кѡ ви́дѣ и҆са́їа ѻ҆бра́знѡ на прⷭ҇то́лѣ превознесе́на бг҃а, ѿ а҆́гг҃лъ сла́вы дѡрѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща.

Разꙋмѣ́въ бжⷭ҇твенный ста́рецъ проѧвле́ннꙋю дре́вле проро́кꙋ сла́вꙋ, рꙋка́ми сло́во зрѧ̀ мт҃рними держи́мо, ѽ ра́дꙋйсѧ, вопїѧ́ше, чⷭ҇таѧ: ꙗ҆́кѡ прⷭ҇то́лъ бо держи́ши бг҃а, свѣ́та невече́рнѧго, и҆ ми́ромъ влады́чествꙋюща.

Покло́нсѧ ста́рецъ, и҆ стопа́мъ бжⷭ҇твеннѣ прикоснꙋ́всѧ неискꙋсобра́чныѧ и҆ бг҃ома́тере, ѻ҆́гнь, речѐ, но́сиши, чⷭ҇таѧ: младе́нца бою́сѧ ѡ҆б̾ѧ́ти бг҃а, свѣ́та невече́рнѧго, и҆ ми́ромъ влады́чествꙋюща.

Ѡ҆чища́етсѧ и҆са́їа ѿ серафі́ма, ᲂу҆́гль прїе́мъ, ста́рецъ вопїѧ́ше бг҃ома́тери: ты̀ ꙗ҆́коже клеща́ми рꙋка́ми просвѣща́еши мѧ̀, пода́вши, є҆го́же но́сиши, свѣ́та невече́рнѧго, и҆ ми́ромъ влады́чествꙋюща.

И҆́нъ. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Свѧти́тельскꙋю свѧще́ннꙋю ѻ҆де́ждꙋ носи́въ свѧще́ннѡ, нечести̑выѧ просвѣти́лъ є҆сѝ, честны́й свѧти́телю, є҆ди́ницꙋ несозда́ннꙋю въ трїе́хъ ли́цѣхъ, вꙋко́ле, проповѣ́даѧ.

Ѿ ᲂу҆́стъ во́лка мы́сленнагѡ и҆схи́тилъ є҆сѝ лю́ди ᲂу҆че́ньми бг҃огла́сныхъ твои́хъ ᲂу҆́стъ: и҆ є҆реті́чєствꙋющаѧ незатворє́ннаѧ ᲂу҆ста̀ твои́ми бг҃ослѡ́вїи загради́лъ є҆сѝ, ѻ҆́ч҃е.

Ме́рзскїй побѣди́сѧ твои́ми свѧще́нными словесы̀ маркїо́нъ, и҆ и҆зри́несѧ всѧ́кагѡ безмѣ́стїѧ, и҆зрыга́ѧй ти́нꙋ ѕлосмра́днꙋ, вꙋко́ле сла́вне.

Бг҃оро́диченъ:

Зако́ны є҆стества̀ і҆и҃съ, пресꙋ́щественный бг҃ъ, ѡ҆бновлѧ́етъ, всенепоро́чнаѧ, и҆з̾ твоеѧ̀ ᲂу҆тро́бы ражда́ѧсѧ, є҆ди́нъ ѡ҆сꙋществова́вый всѧ̑ во́лею.

Пѣ́снь ѕ҃. І҆рмо́съ:

Возопѝ къ тебѣ̀, ви́дѣвъ ста́рецъ ѻ҆чи́ма спасе́нїе, є҆́же лю́демъ прїи́де ѿ бг҃а, хрⷭ҇тѐ, ты̀ бг҃ъ мо́й.

Сїѡ́нꙋ ты̀ ка́мень возложи́лсѧ є҆сѝ, непокори̑вымъ претыка́нїе, и҆ собла́зна ка́мень, нерꙋши́мое вѣ́рныхъ спасе́нїе.

И҆звѣ́стнѣ носѧ̀ начерта́нїе, и҆́же пре́жде вѣ̑къ тѧ̀ и҆зрасти́вшагѡ, земны́хъ за милосе́рдїе ны́нѣ не́мощїю ѡ҆бложи́сѧ.

Сн҃ꙋ вы́шнѧгѡ, сн҃ꙋ дв҃ы, бг҃ꙋ ѻ҆троча́ти бы́вшемꙋ, покло́ншасѧ тебѣ̀ ны́нѣ ѿпꙋстѝ съ ми́ромъ.

И҆́нъ. І҆рмо́съ:

Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Возносѧ́щее смире́нїе, чистотꙋ̀ ᲂу҆ма̀, любо́вь нелицемѣ́рнꙋ, вѣ́рꙋ и҆ наде́ждꙋ и҆мѣ́ѧ чи́стꙋ, вꙋко́лъ сла́вный трⷪ҇цѣ ꙗ҆ви́сѧ жили́ще.

Вельмѝ ᲂу҆краси́вша смѵ́рнѧнѡмъ сщ҃е́нное сѣда́лище тѧ̀, прехва́льне, тайново́ждствꙋетъ дх҃ъ, сꙋ́щаго по тебѣ̀ па́стырѧ полѷка́рпа, рꙋко́ю твое́ю, вꙋко́ле, соверша́ема.

Разꙋмѣ́въ зва́нїе твоѐ дх҃омъ, премꙋ́дре, сꙋ́щаго по тебѣ̀ благода́тїю словє́снымъ ѻ҆вца́мъ наста́вника приво́диши къ прⷭ҇то́лꙋ, добродѣ́телей сїѧ́нїемъ блиста́юща.

Бг҃оро́диченъ:

Две́рь благода́ти, ѿве́рзшаѧ человѣ́кѡмъ две́рь нбⷭ҇нꙋю, покаѧ́нїѧ двє́ри мѝ пресвѣ́тлѡ ѿве́рзи, влⷣчце, и҆ ѿ вра́тъ сме́ртныхъ свободѝ.

Конда́къ пра́здника, гла́съ а҃:

Оу҆тро́бꙋ дв҃и́чꙋ ѡ҆ст҃и́вый ржⷭ҇тво́мъ твои́мъ, и҆ рꙋ́цѣ сѷмеѡ́нѣ бл҃гослови́вый, ꙗ҆́коже подоба́ше, предвари́въ, и҆ ны́нѣ спа́слъ є҆сѝ на́съ, хрⷭ҇тѐ бж҃е: но ᲂу҆мирѝ во бранѣ́хъ жи́тельство и҆ ᲂу҆крѣпѝ лю́ди, и҆́хже возлюби́лъ є҆сѝ, є҆ди́не чл҃вѣколю́бче.

І҆́косъ:

Къ бцⷣѣ притеце́мъ, хотѧ́щїи сн҃а є҆ѧ̀ ви́дѣти, къ сѷмеѡ́нꙋ носи́ма, є҆го́же съ нб҃сѐ безпло́тнїи ви́дѧще, дивлѧ́хꙋсѧ, глаго́люще: чꙋ̑днаѧ зри́мъ ны́нѣ и҆ пресла̑внаѧ, непостижи̑маѧ, несказа̑ннаѧ: и҆́же бо а҆да́ма созда́вый, но́ситсѧ ꙗ҆́кѡ младе́нецъ, невмѣсти́мый вмѣща́етсѧ на рꙋка́хъ ста́рчихъ: и҆́же въ нѣ́дрѣхъ неѡпи́санныхъ сы́й ѻ҆ц҃а̀ своегѡ̀, во́лею ѡ҆писꙋ́етсѧ пло́тїю, а҆ не бжⷭ҇тво́мъ, є҆ди́нъ чл҃вѣколю́бецъ.

Пѣ́снь з҃. І҆рмо́съ:

Тебѐ во ѻ҆гнѝ ѡ҆роси́вшаго ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, благоче́стнѡ пою́ще: бл҃гослове́нъ бг҃ъ ѻ҆тє́цъ на́шихъ.

А҆да́мꙋ и҆звѣсти́ти хотѧ́й и҆дꙋ̀, во а҆́дѣ живꙋ́щꙋ, и҆ є҆́ѵѣ принестѝ бл҃говѣ́стїе, сѷмеѡ́нъ вопїѧ́ше, со прⷪ҇рѡ́ки ликꙋ́ѧ: бл҃гослове́нъ бг҃ъ ѻ҆тє́цъ на́шихъ.

Ро́да зе́мна и҆збавлѧ́ѧй бг҃ъ, да́же до а҆́да прїи́детъ: плѣ̑ннымъ же пода́стъ всѣ̑мъ ѡ҆ставле́нїе, и҆ прозрѣ́нїе слѣпы̑мъ, ꙗ҆́кѡ и҆ нѣмы̑мъ вопи́ти: бл҃гослове́нъ бг҃ъ ѻ҆тє́цъ на́шихъ.

И҆ твоѐ се́рдце, нетлѣ́ннаѧ, ѻ҆рꙋ́жїе про́йдетъ, сѷмеѡ́нъ бцⷣѣ провозгласѝ, на крⷭ҇тѣ̀ зрѧ́щи твоего̀ сн҃а, є҆мꙋ́же вопїе́мъ: бл҃гослове́нъ бг҃ъ ѻ҆тє́цъ на́шихъ.

И҆́нъ. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: благослове́нъ є҆сѝ, бж҃е ѻ҆тє́цъ на́шихъ.

Вразꙋмлѧ́ѧ неразꙋ̑мныѧ, и҆справлѧ́ѧ же ле́стїю попо́лзшыѧсѧ, ѻ҆́ч҃е, спа́слъ є҆сѝ, и҆ бг҃ꙋ приве́лъ є҆сѝ чи̑сты томꙋ̀ пѣснопою́щыѧ бл҃гоче́стнѡ: бл҃гослове́нъ є҆сѝ, бж҃е ѻ҆тє́цъ на́шихъ.

Оу҆краси́шасѧ, всебл҃же́нне, лани̑ты твоѧ̑, воплоще́нїе проповѣ́дающыѧ, за неизрече́нное милосе́рдїе возсїѧ́вшагѡ на́мъ, къ немꙋ́же вопїѧ́лъ є҆сѝ прилѣ́жнѡ: бл҃гослове́нъ є҆сѝ, бж҃е ѻ҆тє́цъ на́шихъ.

Ѡ҆блада́въ воздержа́нїемъ тѣлесѐ страстьмѝ, сла́вне, неѡблада́нъ льсти́вагѡ ꙗ҆ви́лсѧ є҆сѝ прило́гами, и҆ ны́нѣ воспѣва́еши неле́стнѡ: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

И҆зба́вльшесѧ дре́внѧгѡ ѡ҆сꙋжде́нїѧ ржⷭ҇тво́мъ твои́мъ, всенепоро́чнаѧ, ꙗ҆́кѡ влⷣчцꙋ воспѣва́емъ тѧ̀ спа́сшїисѧ, дв҃о, тебє̀ ра́ди, вопїю́ще и҆ глаго́люще вѣ́рнѡ: бл҃гослове́на ꙗ҆́же бг҃а пло́тїю ро́ждшаѧ.

Пѣ́снь и҃. І҆рмо́съ:

Нестерпи́момꙋ ѻ҆гню̀ соедини́вшесѧ, благоче́стїѧ предстоѧ́ще ю҆́нѡши, пла́менемъ же неврежде́ни, бжⷭ҇твеннꙋю пѣ́снь поѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Лю́дїе і҆и҃лєвы, твою̀ сла́вꙋ є҆мманꙋ́ила, зрѧ́ще ѻ҆троча̀ и҆з̾ дв҃ы, предъ лице́мъ бжⷭ҇твеннагѡ ковче́га ны́нѣ ликꙋ́йте, бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Сѐ, сѷмеѡ́нъ вопїѧ́ше, прерѣка́емое зна́менїе се́й бꙋ́детъ, бг҃ъ сы́й и҆ ѻ҆троча̀, семꙋ̀, вѣ́рнїи, возопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Живо́тъ сы́й, се́й бꙋ́детъ паде́нїе непокори̑вымъ, младе́нствовавъ бг҃ъ сло́во: ꙗ҆́кѡ воста́нїе всѣ̑мъ вѣ́рою пою́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

И҆́нъ. І҆рмо́съ:

И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.

Процвѣ́лъ є҆сѝ ꙗ҆́кѡ фі́нїѯъ во дво́рѣхъ бж҃їихъ, до́лжнымъ пра́ведныхъ сно́мъ ᲂу҆снꙋ́лъ є҆сѝ: прино́ситъ же наслажде́нїе бжⷭ҇твенный тво́й гро́бъ, чꙋ́до зрѧ́щымъ, вꙋко́ле бг҃опроповѣ́дниче.

Бж҃їе бг҃ъ сло́во ѵ҆поста́сное, сщ҃е́нна ст҃и́телѧ тѧ̀ поставлѧ́етъ, помазꙋ́юща лю́ди сщ҃е́ннѡ, ст҃и́телю наста́вниче смѵ́рнѧнѡмъ, свѣти́льниче вселе́нныѧ.

Вопло́щшагосѧ сло́ва бг҃осло́вилъ є҆сѝ, и҆ мнѡ́ги ѿ безслове́сїѧ лю́ди спа́слъ є҆сѝ, бжⷭ҇твенъ бы́въ ᲂу҆чени́къ возсїѧ́вшагѡ въ бг҃осло́вїи, вꙋко́ле бг҃оно́се.

Бг҃оро́диченъ:

Свѧще́ннѡ наꙋча́шесѧ твои́мъ та́инствомъ проро́кѡвъ, бцⷣе, бжⷭ҇твенное сосло́вїе, и҆здале́ча разꙋмѣ́въ, и҆ ꙗ҆́снѡ и҆злага́ѧ бг҃озна́мєнїѧ бжⷭ҇твеннагѡ ржⷭ҇тва̀ твоегѡ̀.

Пѣ́снь ѳ҃. І҆рмо́съ:

Въ зако́нѣ сѣ́ни и҆ писа́нїй ѻ҆́бразъ ви́димъ, вѣ́рнїи: всѧ́къ мꙋ́жескїй по́лъ, ложесна̀ разверза́ѧ, ст҃ъ бг҃ꙋ. тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.

И҆̀же дрє́внимъ новорожде́нныхъ го́рличищъ сꙋпрꙋ́гъ, дво́ица же бѧ́ше птенцє́въ, въ ни́хже мѣ́стѡ бжⷭ҇твенный ста́рецъ, и҆ цѣломꙋ́дреннаѧ а҆́нна прⷪ҇ро́чица, ѿ дв҃ы рожде́нномꙋ, и҆ сн҃ꙋ є҆диноро́дномꙋ ѻ҆́ч҃ꙋ въ це́рковь приноси́мꙋ слꙋ́жатъ велича́юще.

Возда́лъ є҆сѝ мнѣ̀, вопїѧ́ше сѷмеѡ́нъ, спасе́нїѧ твоегѡ̀, хрⷭ҇тѐ, ра́дованїе: воспрїимѝ твоего̀ слꙋжи́телѧ, сѣ́нїю претрꙋжде́ннаго, но́выѧ бл҃года́ти сщ҃еннопроповѣ́дника та́йнаго, во хвале́нїи велича́юща.

Сщ҃еннолѣ́пнѡ и҆сповѣ́дашесѧ а҆́нна прорица́ющи, цѣломꙋ́дреннаѧ и҆ преподо́бнаѧ, и҆ ста́рица влⷣцѣ, въ це́ркви ꙗ҆́вственнѡ, бцⷣꙋ же проповѣ́дающи всѣ̑мъ сꙋ́щымъ, велича́ше.

И҆́нъ. І҆рмо́съ:

Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Ꙗ҆́кѡ свѣ́тъ, ꙗ҆́кѡ зарѧ̀, ꙗ҆́кѡ вели́кое сл҃нце, ꙗ҆́кѡ мо́лнїѧ хрⷭ҇то́вꙋ цр҃ковь ѡ҆блиста́лъ є҆сѝ, и҆ вѣ́рныхъ мы̑сли просвѣти́лъ є҆сѝ: и҆ въ невече́рнихъ мѣ́стѣхъ всели́лсѧ є҆сѝ, поѧ̀ трист҃ы́ми гла́сы трⷪ҇цꙋ несозда́ннꙋю.

Пло́ти и҆ мі́ра внѣ̀ бы́въ, сщ҃еннодѣ́йственне, ко премі̑рнымъ ра́дꙋѧсѧ преше́лъ є҆сѝ чинѡ́мъ, ѡ҆божа́емь положе́нїемъ свѣтлѣ́йшимъ: тѣ́мже па́мѧть твою̀ вѣ́рою соверша́емъ на землѝ, вꙋко́ле всемꙋ́дре.

Землѧ̀ тѣ́ло твоѐ блаже́нное покрыва́етъ, ꙗ҆́вѣ и҆сцѣлє́нїѧ точа́що и҆ дарова̑нїѧ, нб҃о же дх҃ъ со и҆збра́нными но́ситъ, и҆̀же ѿ вѣ́ка, бжⷭ҇твенными сїѧ́ньми ᲂу҆кра́шенъ вои́стиннꙋ, вꙋко́ле сла́вне.

Бг҃оро́диченъ:

Гла́сомъ а҆́гг҃ловымъ, вели́кагѡ совѣ́та а҆́гг҃ла, чⷭ҇таѧ, хрⷭ҇та̀ є҆мманꙋ́ила породила̀ є҆сѝ, ко а҆́гг҃лѡмъ дѡ́льныѧ совокꙋплѧ́юща є҆ди́на бл҃гослове́ннаѧ, є҆ди́на всепѣ́таѧ, є҆ди́на вино́вна на́шегѡ, дв҃о, ѡ҆боже́нїѧ.

Свѣти́ленъ пра́здника:

Дх҃омъ во ст҃и́лищи предста́въ ста́рецъ, на рꙋ́ки воспрїѧ́тъ зако́на влⷣкꙋ, вопїѧ̀: ны́нѣ соꙋ̑зъ мѧ̀ плотски́хъ разрѣшѝ, ꙗ҆́коже ре́клъ є҆сѝ, съ ми́ромъ: ви́дѣхъ бо ѻ҆чи́ма ѿкрове́нїе ꙗ҆зы́кѡвъ, и҆ і҆и҃лю спасе́нїе.

Сла́ва, и҆ ны́нѣ, то́йже.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Дне́сь сп҃си́тель ꙳ ꙗ҆́кѡ младе́нецъ принесе́нъ бы́сть ꙳ въ це́рковь гдⷭ҇ню, ꙳ и҆ рꙋка́ми престарѣ́лыми ꙳ ста́рецъ того̀ под̾е́млетъ.

Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ.

Млⷣнцъ пло́тїю, ве́тхїй де́ньми, ꙳ ви́димь є҆́сть пресла́внѡ ꙳ во дне́шнїй де́нь, ꙳ и҆ въ це́рковь прино́ситсѧ.

Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ.

Прїимѝ, ѽ сѷмеѡ́не, ꙳ всечⷭ҇таѧ вопїѧ́ше, ꙳ во ѡ҆б̾ѧ̑тїѧ ꙗ҆́кѡ младе́нца, ꙳ гдⷭ҇а сла́вы, ꙳ и҆ мі́ра спасе́нїе.

Сла́ва, и҆ ны́нѣ, гла́съ и҆ подо́бенъ то́йже:

Ве́лїе и҆ стра́шное та́инство, ꙳ и҆ стра́нное смотре́нїѧ, ꙳ и҆́же всѧ̑ ѡ҆б̾е́млѧ, и҆ младе́нцы созида́ѧй, ꙳ ꙗ҆́кѡ младе́нецъ на рꙋка́хъ но́ситсѧ.