Мѣ́сѧца тогѡ́же въ є҃-й де́нь.

Ст҃а́гѡ свѧщенномꙋ́ченика дѡроѳе́а, є҆пі́скопа тѵ́рскагѡ.

Стїхи̑ры, гла́съ и҃. Подо́бенъ: Мꙋ́чєницы твоѝ, гдⷭ҇и:

Скрижа̑ли бж҃їѧ дх҃а, бг҃облаже́нне, показа́лсѧ є҆сѝ ѻ҆́ч҃е, бжⷭ҇твєннаѧ ᲂу҆чє́нїѧ пи̑сана носѧ̀ въ ра́зꙋмѣ бжⷭ҇твеннѣ, тѣ́хъ разгнꙋ́тїемъ просвѣти́лъ є҆сѝ неразꙋ́мїемъ бѣ́дствꙋющыѧ. тѣ́мъ твои́ми моли́твами просѝ на́мъ всѣ̑мъ, ѻ҆́ч҃е, ве́лїю ми́лость.

Крове́й бжⷭ҇твенными течє́нїи ѡ҆багри́въ твою̀ свѧще́ннꙋю ѻ҆де́ждꙋ, дѡроѳе́е, вше́лъ є҆сѝ ра́дꙋѧсѧ въ нбⷭ҇ный хра́мъ, ны́нѣ ꙗ҆ви́тисѧ бг҃ꙋ на́шемꙋ, подаю́щемꙋ вѣнцы̀ страда́вшымъ. Того̀ прилѣ́жнѡ молѝ, всѣ̑мъ низпосла́ти ве́лїю ми́лость.

Житїѐ твоѐ равноа́гг҃льно, мꙋче́нїе же просвѣще́нно, и҆́мже сподо́билсѧ є҆сѝ со а҆́гг҃лы ликова́ти въ ра́дости, чꙋдесы̀ зе́млю, ѻ҆́ч҃е дѡроѳе́е, бжⷭ҇твенными ѡ҆зарѧ́ѧ и҆ ᲂу҆че́ньми: тѣ́мъ твои́ми моли́твами просѝ дарова́ти всѣ̑мъ ве́лїю ми́лость.

И҆́ны стїхи̑ры бцⷣы, гла́съ и҆ подо́бенъ то́йже:

И҆схити́ мѧ, влⷣчце, и҆зъ рꙋкѝ ѕмі́ѧ человѣкоꙋбі́йцы, борю́щагѡ мѧ̀ ле́стїю пожре́ти до конца̀: сокрꙋшѝ чє́люсти сегѡ̀, молю́сѧ, и҆ кова̑рствїѧ разорѝ, ꙗ҆́кѡ да и҆зба́вльсѧ сегѡ̀ ногте́й, велича́ю си́лꙋ твою̀.

А҆́зъ є҆́смь дре́во непло́дное, всенепоро́чнаѧ, неплодѧ́щее плода̀ спаси́тельнагѡ. тѣ́мже и҆ трепе́щꙋ посѣче́нїѧ, да не ка́кѡ вве́рженъ бꙋ́дꙋ во ѻ҆́гнь негаси́мый, ѻ҆каѧ́нный. тѣ́мже тѝ припа́даю: сегѡ̀ и҆зба́ви мѧ̀, и҆ плодоно́сна покажѝ, чⷭ҇таѧ, сн҃ꙋ твоемꙋ̀, хода́тайствомъ твои́мъ.

Оу҆ѧзвѝ се́рдце моѐ стрѣла̀ жела́нїѧ смертоно́снаѧ, и҆ ᲂу҆ѧзви́хсѧ ѿ неразꙋ́мїѧ, и҆ неисцѣ́льнѡ болю̀: мт҃и бж҃їѧ, не пре́зри менє̀ ѿча́ѧннагѡ, но и҆сцѣле́нїе да́ждь мѝ, ꙗ҆́кѡ ро́ждши гдⷭ҇а и҆ сп҃са, є҆ди́наго милосе́рдаго.

Сла́ва, и҆ ны́нѣ, бг҃оро́диченъ:

Помышлє́нїѧ нечи̑ста и҆ ᲂу҆стны̀ льсти̑вы, дѣла́ же моѧ̑ всѧ̑ ѡ҆сквернє́на, и҆ что̀ сотворю̀; ка́кѡ ᲂу҆срѧ́щꙋ сꙋдїю̀; влⷣчце дв҃о, молѝ сн҃а твоего̀ и҆ зижди́телѧ, и҆ гдⷭ҇а, ꙗ҆́кѡ да въ покаѧ́нїи прїи́метъ дꙋ́хъ мо́й, ꙗ҆́кѡ є҆ди́нъ благоꙋтро́бенъ.

Крⷭ҇тобг҃оро́диченъ:

Ю҆́ница нескве́рнаѧ, ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, люби́мѣйшее ча́до: что̀ тѝ со́нмъ воздадѐ безблагода́тный є҆вре́йскїй, хотѧ̀ ѡ҆безча́дствовати ѿ тебє̀, вселюбе́зне;

Тропа́рь, гла́съ д҃.

И҆ нра́вѡмъ прича́стникъ, и҆ престо́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, свѧщенномꙋ́чениче дѡроѳе́е, молѝ хрⷭ҇та̀ бг҃а, спасти́сѧ дꙋша́мъ на́шымъ.

Канѡ́нъ, є҆гѡ́же краегране́сїе:

Да́ра бж҃їѧ тѧ̀, всебл҃же́нне ѻ҆́ч҃е, чествꙋ́ю. Творе́нїе і҆ѡ́сифово.

Гла́съ и҃. Пѣ́снь а҃. І҆рмо́съ:

Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ:

Да́ръ бг҃ꙋ, всеблаже́нне, тебѐ сама́го прине́слъ є҆сѝ, честнѣ́йшїй, житїе́мъ соверше́ннымъ и҆ честны́мъ мꙋче́нїемъ, дѡроѳе́е.

Ꙗ҆́коже зрѣ́лъ гро́здъ, ѻ҆́ч҃е, и҆згне́тъ мы́сль, весе́лїѧ ча́шꙋ вѣ̑рнымъ ᲂу҆чє́нїѧ предложи́лъ є҆сѝ.

То́ки лє́стныѧ ᲂу҆ста́вилъ є҆сѝ, дѡроѳе́е, тече́ньми премꙋ́драгѡ твоегѡ̀ ѧ҆зы́ка, и҆ вѣ́рныхъ мы̑сли напои́лъ є҆сѝ.

Бг҃оро́диченъ:

Ѡ҆дожди́ ми, дв҃о, молю́сѧ, ка̑пли ᲂу҆миле́нїѧ, прибы́вшꙋю мѝ скве́рнꙋ ѿмыва́ющыѧ, ꙗ҆́кѡ да сла́влю тѧ̀.

Пѣ́снь г҃. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Но́щь ѿгна́лъ є҆сѝ сꙋ́етства всѧ́кꙋ, блиста̑нїи, ѻ҆́ч҃е свѧти́телю, премꙋ́драгѡ проповѣ́данїѧ.

Чꙋдесы̀ ᲂу҆тверди́лъ є҆сѝ, и҆ свѧще́нными, мꙋ́дре, ᲂу҆чє́нїи, вѣ́рныхъ всѣ́хъ мы̑сли, ꙗ҆́кѡ па́стырь свѧще́ненъ.

Пома́за тѧ̀ гдⷭ҇ь свѧще́ннымъ, ѻ҆́ч҃е, пома́занїемъ, и҆ своеѧ̀ бжⷭ҇твенныѧ цр҃кве пастыренача́льника поста́ви.

Бг҃оро́диченъ:

Всѐ се́рдце моѐ бжⷭ҇твеннымъ свѣ́томъ просвѣтѝ, две́ре свѣ́та, грѣхо́вное ѡ҆мраче́нїе ѿгонѧ́щи.

Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:

Бжⷭ҇твенными догма̑ты при́снѡ сїѧ́ющь да́ръ ст҃ы́й тебѐ сама́го прине́слъ є҆сѝ безсме́ртномꙋ цр҃ю̀, пострада́въ, дѡроѳе́е, и҆ ѡ҆бита́еши ны́нѣ при́снѡ веселѧ́сѧ, перворо́дныхъ въ го́рнѣй митропо́лїи. ѻ҆́ч҃е преподо́бне, хрⷭ҇та̀ бг҃а молѝ, дарова́ти на́мъ ве́лїю ми́лость.

Сла́ва, и҆ ны́нѣ, бг҃оро́диченъ:

Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по рождествѣ̀ мт҃рь тѧ̀ дв҃ꙋ, ꙗ҆́кѡ пре́жде рождества̀, сохрани́въ всенепоро́чнꙋ є҆ди́нъ гдⷭ҇ь. того̀ прилѣ́жнѡ молѝ, дарова́ти на́мъ ве́лїю ми́лость.

Крⷭ҇тобг҃оро́диченъ:

Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Возноси́мꙋю ѡ҆плева́лъ є҆сѝ, преподо́бне, зи́мꙋ безбо́жїѧ, и҆ теплото́ю бжⷭ҇твеннагѡ дх҃а невреди́мо се́рдце соблю́лъ є҆сѝ.

Сокрꙋши́шасѧ, дѡроѳе́е блаже́нне, предъ лице́мъ твои́мъ го́ры нꙋ́ждныѧ дє́мѡнскїѧ, и҆ и҆ста́ѧша ѕлочести́выхъ человѣ̑къ шата̑нїѧ.

Терпѣ́лъ є҆сѝ ѡ҆скорблѧ́емь, ѿ гра́да во гра́дъ и҆згони́мь: тѣ́мже блаже́ннꙋю ᲂу҆лꙋчи́лъ є҆сѝ мꙋ́чєникъ сла́вꙋ и҆ свѣ́тлость.

Бг҃оро́диченъ:

И҆скꙋше́нїй мѧ̀ спасѝ и҆ дꙋшетлѣ́нныѧ страсте́й бꙋ́ри: ꙗ҆́кѡ да вѣ́рою ᲂу҆блажа́ю тѧ̀, прест҃а́ѧ ѻ҆трокови́це мт҃и дв҃о.

Пѣ́снь є҃. І҆рмо́съ:

Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣтѝ мѧ̀ ᲂу҆́тромъ чл҃вѣколю́бїѧ твоегѡ̀, гдⷭ҇и.

Смотрѧ́ѧ разꙋ́мнѡ воздаѧ̑нїѧ бжⷭ҇твєннаѧ, дѡроѳе́е, вели̑кїѧ бѣды̑ и҆ напа̑сти претерпѣ́лъ є҆сѝ.

Є҆ди́нствомъ бжⷭ҇тва̀ проповѣ́даѧ трⷪ҇цꙋ, дѡроѳе́е, многобо́жнагѡ неи́стовства сꙋ́етное погꙋби́лъ є҆сѝ шата́нїе.

Не поклони́всѧ, мꙋ́чениче, дѣлѡ́мъ рꙋ́къ беззако́нныхъ, терпѣ́лъ є҆сѝ и҆скꙋшє́нїѧ и҆ бѣды̑, и҆ ра̑ны, и҆ болѣ̑зни, дѡроѳе́е.

Бг҃оро́диченъ:

Восто́къ со́лнца, пре́жде денни́цы возсїѧ́вшагѡ была̀ є҆сѝ, и҆́мже свѣ́тъ сꙋ́щїи во тмѣ̀ лю́тыхъ, чⷭ҇таѧ, ви́дѣша.

Пѣ́снь ѕ҃. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ бж҃е на́шъ.

Се́рдце разжже́но дыха̑нїи дх҃а стѧжа́лъ є҆сѝ, дꙋхѡ́въ, дѡроѳе́е, сопроти́вныхъ стремле́нїе разрꙋша́ющо.

Ст҃ы́хъ житїѧ̑ свѧще́нными списа́ньми ꙗ҆ви́лъ є҆сѝ, ѻ҆́ч҃е бг҃одохнове́нне, бжⷭ҇твеннымъ ра́зꙋмомъ дꙋ́шꙋ просвѣща́ѧ.

Глагѡ́лъ твои́хъ вѣща́нїе, и҆ кра́сныхъ ᲂу҆че́нїй си́ла, всю̀ ѡ҆бтечѐ, преблаже́нне, зе́млю, бжⷭ҇твенною благода́тїю.

Бг҃оро́диченъ:

Дв҃о, є҆го́же родила̀ є҆сѝ бг҃а, чл҃вѣ́ка бы́вша, того̀ молѝ и҆зба́вити мѧ̀ ѻ҆гнѧ̀ и҆ мꙋ́ки.

Конда́къ, гла́съ є҃:

Добродѣ́тельми сїѧ́ѧ, и҆ бжⷭ҇твенными ᲂу҆чє́нїи па́че со́лнца, и҆ страда̑нїи, блаже́нне, ѡ҆блиста́лъ є҆сѝ, просвѣти́лъ є҆сѝ зе́млю, дѡроѳе́е, ѿгна́въ мглꙋ̀ многобо́жїѧ, и҆ лю̑тыѧ є҆́рєси. сегѡ̀ ра́ди па́мѧть твою̀ свѣ́тлѡ пра́зднꙋемъ.

Пѣ́снь з҃. І҆рмо́съ:

Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Ѕвѣзда̀ многосвѣ́тлаѧ ꙗ҆ви́лсѧ є҆сѝ, свѣтлостьмѝ страда́нїй твои́хъ просвѣща́ѧ дꙋ́шы вѣ́рнѡ, дѡроѳе́е, вопїю́щихъ: благослове́нъ є҆сѝ, гдⷭ҇и бж҃е, во вѣ́ки.

Стезѧ́ми пра́выми ходѧ̀, низве́рглъ є҆сѝ дє́бри льсти́вагѡ, и҆ къ пꙋтє́мъ живѡ́тнымъ наставлѧ́ѧ вопїю́щыѧ: бл҃гослове́нъ є҆сѝ, гдⷭ҇и бж҃е, во вѣ́ки.

Оу҆гаси́лъ є҆сѝ тꙋ́чами крове́й твои́хъ, всесла́вне, пе́щь преле́стнꙋю, и҆ на водѣ̀ жи́зни всели́лсѧ є҆сѝ, взыва́ѧ: благослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ:

И҆зба́ви соꙋ̑зъ грѣха̀ ѻ҆каѧ́ннꙋю мою̀ дꙋ́шꙋ, бг҃ороди́тельнице, и҆ любвѝ бж҃їей припрѧзѝ соверше́ннѣ, да вѣ́рнѡ сла́влю тѧ̀, бцⷣе, во вѣ́ки.

Пѣ́снь и҃. І҆рмо́съ:

Бг҃оглаго́ливїи ѻ҆́троцы, въ пещѝ со ѻ҆гне́мъ пла́мень попира́юще, поѧ́хꙋ: благослови́те, дѣла̀ гдⷭ҇нѧ, гдⷭ҇а.

Хва́лѧщагосѧ ѕмі́ѧ въ ѕло́бѣ, смири́всѧ ѡ҆ гдⷭ҇ѣ, ѻ҆́ч҃е, смири́лъ є҆сѝ, вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Во глꙋбо́цѣй тѧ̀ ста́рости, въ нестарѣ́ющихсѧ поко́йныхъ мѣ́стѣхъ зижди́тель вселѝ, свѧще́нный ѻ҆́ч҃е, мꙋ́ченикѡвъ ᲂу҆краше́нїе.

Житїѐ равноа́гг҃льно и҆мѣ́ѧ, со а҆́гг҃лы влⷣки твоегѡ̀ престо́лꙋ ны́нѣ предстои́ши, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Кра́снаѧ дв҃о ꙗ҆ви́ласѧ є҆сѝ, прекра́сное сло́во поро́ждши, є҆мꙋ́же пое́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃. І҆рмо́съ:

Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.

И҆спра́вилъ є҆сѝ ста́до хрⷭ҇то́во къ бжⷭ҇твєннымъ приста́нищємъ: невре́дно соблю́дъ є҆̀ ѿ бꙋ́ри сопроти́вныѧ, ꙗ҆́кѡ преизрѧ́денъ ст҃и́тель, и҆ бжⷭ҇твенныхъ, ѻ҆́ч҃е, и҆спо́лнитель, мꙋ́дре, повелѣ́нїй.

Ꙗ҆́кѡ сщ҃еннодѣ́йственникъ чи́стъ, ꙗ҆́кѡ мꙋ́ченикъ до́бль, ꙗ҆́кѡ чꙋдодѣ́йственникъ чꙋ́денъ, ꙗ҆́кѡ бж҃е́ственныхъ словопи́сецъ, ꙗ҆́кѡ вѣ́ры непоколеби́мь сто́лпъ, сла́вꙋ вѣ́чнꙋю, ѻ҆́ч҃е, ᲂу҆лꙋчи́лъ є҆сѝ.

На сꙋди́щи под̾е́мъ мнѡ́ги трꙋды̀ и҆ болѣ̑зни, къ неболѣ́зненнѣй и҆ бжⷭ҇твеннѣй жи́зни ра́дꙋѧсѧ преше́лъ є҆сѝ, ѡ҆боже́нїемъ ны́нѣ чи́стѡ прича́щсѧ, мꙋ́чениче досточꙋ́дне дѡроѳе́е.

Бг҃оза́рнаѧ па́мѧть твоѧ̀ возсїѧ̀ мі́рꙋ, ѡ҆зарѧ́ющи вѣ̑рныѧ лꙋча́ми дарова́нїй: ю҆́же сла́вѧщыѧ ѻ҆́бщники ны̀ покажѝ, ѻ҆́ч҃е, въ тебѣ̀ бж҃е́ственныѧ свѣ́тлости.

Бг҃оро́диченъ:

Носѧ́щи хрⷭ҇та̀ на рꙋка́хъ, носѧ́щаго всѧ̑ ма́нїемъ бж҃е́ственнымъ, чⷭ҇таѧ, того̀ при́снѡ молѝ, рꙋ́къ на́шихъ воздѣѧ̑нїѧ и҆спра́вити, ꙗ҆́кѡ ѳѷмїа́мъ предъ лице́мъ є҆гѡ̀.