Мѣ́сѧца тогѡ́же въ з҃-й де́нь.

Ст҃ы́хъ мч҃никъ три́десѧти и҆ тре́хъ, и҆̀же въ мелїті́нѣ:

И҆ прпⷣбнагѡ ѻ҆ц҃а̀ на́шегѡ и҆ чꙋдотво́рца ла́зарѧ, въ галїсі́йстѣй горѣ̀ пости́вшагѡсѧ.

На Гдⷭ҇и, воззва́хъ, стїхи̑ры гла́съ д҃. Поⷣ: Ꙗ҆́кѡ до́блѧ въ мч҃ницѣхъ:

Бг҃особра́нное ѡ҆полче́нїе, ꙳ свѧще́нное во́инство, ꙳ собра́нїе бжⷭ҇твенное, наро́дъ ст҃ы́й, ꙳ по́лкъ мч҃никѡвъ бг҃одохнове́нный, ꙳ кра́сное сгромажде́нїе, ꙳ неразсте́рзное споборе́нїе, ꙳ и҆́стиннѡ ꙗ҆ви́стесѧ, достосла́внїи, ꙳ и҆ вы́шнїѧ митропо́лїи досто́йнѡ жи́телє: ꙳ сегѡ̀ ра́ди до́лжнѡ ᲂу҆блажа́етесѧ.

Съ нїка́ндромъ и҆сѵ́хїа, ꙳ а҆ѳана́сїа, ма́манта, ꙳ бжⷭ҇твеннаго варахі́а и҆ каллїні́ка, ꙳ и҆ ѳеаге́нна и҆ ні́кѡна, ꙳ ло́ггїна и҆ ѳео́дѡра, ꙳ ᲂу҆алле́рїа кꙋ́пнѡ и҆ ѯанѳі́а, ꙳ ѳеодꙋ́ла и҆ каллїма́ха и҆ є҆ѵге́нїа, всѝ соше́дшесѧ, ꙳ съ бжⷭ҇твеннымъ ѳеодо́хомъ и҆ ѻ҆стрѷхі́а почти́мъ.

До́блѧго і҆е́рѡна, ꙳ сла́внаго є҆пїфа́нїа, маѯїмїа́на кꙋ́пнѡ и҆ дꙋкі́тїа, ꙳ клаѵдїа́на и҆ ѳео́фїла, ꙳ и҆ бжⷭ҇твеннаго гїга́нтїа, ꙳ и҆ дѡроѳе́а вѣ́рнѡ, и҆ ѳеодо́та воспои́мъ, ꙳ и҆ кастрі́кїа и҆ а҆нїки́тꙋ кꙋ́пнѡ и҆ ѳеме́лїа, ꙳ є҆ѵтѷхі́а же согла́снѡ, ꙳ и҆́стины свидѣ́тели.

И҆́ны стїхи̑ры прпⷣбнагѡ, гла́съ ѕ҃. Подо́бенъ: Всѐ ѿло́жше:

Всѐ ѿложи́въ страсте́й безслове́сїе, ꙳ и҆ пло́ть дꙋ́хꙋ покори́въ, ꙳ бы́лъ є҆сѝ добродѣ́тели пра́вило, мона́шествꙋющихъ ᲂу҆тверже́нїе, по́стникѡвъ ѻ҆́бразъ, прпⷣбныхъ ᲂу҆добре́нїе. ꙳ и҆ ны́нѣ неизрече́ннꙋю добро́тꙋ ꙳ зри́ши творца̀ твоегѡ̀ ꙳, пита́ѧсѧ при́снѡ добро́тами, ꙳ сꙋ́щими на нб҃сѣ́хъ, дꙋ́хомъ. ꙳ тѣ́мъ, соше́дшесѧ, ꙳ въ пѣ́снехъ пѣ̑нїи сла́дкими твою̀ честнꙋ́ю ꙳ и҆ всепра́зднственнꙋю па́мѧть пра́зднꙋемъ.

Всѐ ѿтрѧ́слъ є҆сѝ ꙳ ве́щи тѧжкобре́менное, ꙳ и҆ многомѧте́жное пло́ти волне́нїе, ꙳ ᲂу҆кроти́въ, мꙋ́дре, дыха́нїѧ, ꙳ пребы́лъ є҆сѝ страстьмѝ непрекло́ненъ, ꙳ ꙗ҆́кѡ сто́лпъ ᲂу҆крѣплѧ́емь, ꙳ дꙋхо́вными бронѧ́ми, ᲂу҆мо́мъ до́блественнымъ. ꙳ и҆ ны́нѣ бжⷭ҇твеннагѡ полꙋчѝ ꙳ вои́стиннꙋ видѣ́нїѧ и҆ свѣ́тлости, ꙳ и҆ къ немꙋ́же жела́лъ є҆сѝ, преста́вилсѧ, ꙳ наслажда́ѧсѧ є҆гѡ̀ неконе́чныѧ свѣ́тлости, ꙳ положе́нїемъ ѡ҆божа́емь.

И҆лїѝ подо́бѧсѧ, ꙳ и҆ і҆ѡа́ннꙋ свѣти́льникꙋ, ꙳ свѣ́тъ возлюби́въ, ꙳ молча́ти въ гора́хъ и҆ въ пꙋсты́нѧхъ сꙋхи́хъ, ꙳ восхожде́нїю всегда̀ поꙋча́ѧсѧ бжⷭ҇твенномꙋ, ꙳ и҆ преспѣва́ѧ добродѣ́телей пꙋте́мъ. ꙳ тѣ́мже пости́глъ є҆сѝ жела́нїе кра́йнее, премꙋ́дре, ꙳ и҆ ра́дꙋѧсѧ предстои́ши ꙳ трисїѧ́нномꙋ трⷪ҇цы свѣ́тꙋ, ꙳ ѿ негѡ́же нехода́тайственнѣ, ꙳ бжⷭ҇твеннꙋю прїе́млѧ зарю̀, ꙳ со дерзнове́нїемъ моли́сѧ ꙳ ѡ҆ дꙋша́хъ на́шихъ.

Сла́ва, гла́съ є҃:

Прпⷣбне ѻ҆́ч҃е, не да́лъ є҆сѝ сна̀ твои̑мъ ѻ҆чесє́мъ, нижѐ вѣ́ждамъ твои̑мъ дрема́нїѧ, до́ндеже дꙋ́шꙋ и҆ тѣ́ло ѿ страсте́й свободи́лъ є҆сѝ, и҆ тебѐ сама́го ᲂу҆гото́валъ є҆сѝ дх҃а жили́ще: прише́дъ бо хрⷭ҇то́съ со ѻ҆ц҃е́мъ, ѻ҆би́тель въ тебѣ̀ сотворѝ: и҆ є҆диносꙋ́щныѧ трⷪ҇цы ᲂу҆го́дникъ бы́въ, великопроповѣ́дниче ла́заре, ѻ҆́ч҃е на́шъ, моли́сѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ра́дꙋйсѧ:

А҆́гнца своего̀ а҆́гница и҆ногда̀ зрѧ́щи, къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши, ча́до моѐ сладча́йшее, хрⷭ҇тѐ; чегѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй безгрѣ́шне, многоми́лостиве гдⷭ҇и, да́ждь мѝ сло́во рабѣ̀ твое́й: сн҃е мо́й вселюбе́знѣйшїй, не пре́зри ще́дре, молча̀, тѧ̀ стра́ннѡ ро́ждшꙋю, бж҃е всеще́дре, да́рꙋѧй мі́рꙋ ве́лїю ми́лость.

На стїхо́внѣ ѻ҆ктѡ́иха. Сла́ва, гла́съ ѕ҃.

Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мже на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнѡвъ разрꙋши́лъ є҆сѝ полкѝ, а҆́гг҃лѡвъ чи́ны пости́глъ є҆сѝ, и҆́хже житїю̀ непоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:

Лю́ди беззако́ннѣйшыѧ, безъ пра́вды пригвожда́ющыѧ тѧ̀ на дре́вѣ, дв҃а и҆ чⷭ҇таѧ мт҃и твоѧ̀ зрѧ́щи, ꙗ҆́коже сѷмеѡ́нъ проречѐ, ᲂу҆тро́бою, сп҃се, ᲂу҆ѧзвлѧ́шесѧ.

Тропа́рь, гла́съ д҃:

Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.

Сла́ва, прпⷣбнагѡ, гла́съ и҃:

Бдѣ́нными моли́твами, тече́ньми сле́зными сто́лпъ ѡ҆мочи́лъ є҆сѝ, и҆ и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ па́стырь, всѣ̑мъ подаѧ̀ проще́нїе, прпⷣбне ѻ҆́ч҃е на́шъ ла́заре: моли́сѧ хрⷭ҇тꙋ̀ бг҃ꙋ, спасти́сѧ дꙋша́мъ на́шымъ.

На ᲂу҆́трени канѡ́нъ ѻ҆ктѡ́иха є҆ди́нъ, и҆ ст҃ы́хъ два̀.

Канѡ́нъ мꙋ́ченикѡвъ.

є҆гѡ́же краегране́сїе: Мꙋ̑дрымъ похвалꙋ̀ сїю̀ мч҃никѡмъ приношꙋ̀.

Гла́съ и҃. Пѣ́снь а҃. І҆рмо́съ:

Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Совокꙋ́пльшесѧ бжⷭ҇твєннымъ нбⷭ҇нымъ си́ламъ, всѣ̑мъ проси́те ѡ҆чище́нїѧ, свѣтоно́снꙋю ва́шꙋ па́мѧть похвалѧ́ющымъ, добропобѣ́днїи мч҃ницы.

Пꙋ́ть мꙋче́нїѧ свѣ́тлѡ ше́ствовати жела́юще, претерпѣ́сте крѣ́пкѡ всѐ треволне́нїе мꙋче́нїѧ, ᲂу҆крѣплѧ́еми дх҃омъ ст҃ы́мъ.

Свѣти̑льницы ꙗ҆ви́стесѧ на землѝ, многобо́жїѧ разрꙋша́юще тмꙋ̀, бжⷭ҇твеннїи страстоте́рпцы: сегѡ̀ ра́ди невече́рнїй свѣ́тъ прїе́млете.

Бг҃оро́диченъ:

Ма́нїемъ всѧ̑ содѣва́ѧй, и҆зъ тебє̀ па́че сло́ва воплоща́етсѧ, мт҃и чⷭ҇таѧ, страстоте́рпцы вѣнча́вый, побѣ́днѡ врага̀ попра́вшыѧ.

И҆́нъ канѡ́нъ прпⷣбнагѡ,

є҆гѡ́же краегране́сїе: Мольбꙋ̀ пою̀, второ́е тебѣ̀, треблаже́нне.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Грѧди́те вѣ́рнїи, дх҃омъ бжⷭ҇твеннымъ веселѧ́щесѧ вѣ́рнѡ, восхва́лимъ бжⷭ҇твеннаго ла́зарѧ, къ немꙋ̀ вопїю́ще: блаже́нне, твои́ми моли́твами бѣ́дъ и҆зба́ви ны̀.

Къ твоемꙋ̀ па́ки ѻ҆те́чествꙋ прїити́ тѧ бг҃ъ сотворѝ и҆ не хотѧ́ща: тѣ́мъ приходѧ́ща мѧ̀ при́снѡ къ страсте́мъ, спасѝ моли́твами твои́ми.

Свѣтоза́рнаѧ бг҃ода́ннаѧ любо́вь въ тебѣ̀ возсїѧ́вши бога́тнѡ, свою̀ дꙋ́шꙋ за бли́жнѧго тѧ̀ ᲂу҆се́рднѡ, бг҃оно́се, положи́ти сотворѝ.

Бг҃оро́диченъ:

Спаси́ ны, бг҃ороди́тельнице всенепоро́чнаѧ, всѧ́кагѡ гнѣ́ва и҆ скорбе́й, покланѧ́ющыѧсѧ твоемꙋ̀ ст҃о́мꙋ ѻ҆́бразꙋ, и҆ вѣ́рою бцⷣꙋ и҆сповѣ́дающыѧ тѧ̀.

Пѣ́снь г҃. І҆рмо́съ:

Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Свѧще́нными повелѣ̑нїи твои́ми свѧщє́нныѧ мч҃ники, сла́вне і҆е́рѡне, къ бжⷭ҇твенномꙋ страда́нїю ты̀ наста́вилъ є҆сѝ, и҆ неради́ти ѡ҆ мꙋ́кахъ пресла́внѡ сотвори́лъ є҆сѝ, бг҃обл҃же́нне.

Сокрꙋша́еми дре́вїемъ, стрⷭ҇ть честнꙋ́ю, ст҃і́и, пребл҃га́гѡ влⷣки и҆з̾ѡбрази́ли є҆стѐ, сокрꙋши́сте па̑гꙋбныѧ лестцы̀ тмы̀ благода́тїю вседержи́телѧ.

На гдⷭ҇а всѣ́хъ, бг҃ови́днїи мч҃ницы, возло́жше ᲂу҆пова́нїе, ѿню́дъ неподви́жими бы́сте стоѧ́нїѧ бо́льшагѡ: но зако́ннѡ бжⷭ҇твенное тече́нїе соверши́сте нра́ва пра́востїю.

Бг҃оро́диченъ:

Многоимени́таѧ ѻ҆трокови́це, ра́дꙋйсѧ, чⷭ҇таѧ влⷣчце, ꙗ҆́же неѡпи́санное сло́во поро́ждши ѡ҆пи́санно пло́тїю, є҆го́же ли́къ мꙋ́ченическїй бг҃а и҆сповѣ́даѧ, стра́ждетъ крѣпча́йше.

И҆́нъ. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Крѣ́постїю бжⷭ҇твенною, мꙋ́дре, ᲂу҆крѣплѧ́емь, и҆зба́вилсѧ є҆сѝ ѕвѣре́й свирѣ́пыхъ, тѣ́мъ моли́сѧ хрⷭ҇тꙋ̀, ѿ ѕвѣре́й мы́сленныхъ и҆зба́вити пою́щыѧ тѧ̀.

Оу҆крѣплѧ́емь хрⷭ҇то́вою си́лою, прпⷣбне, жа́ждꙋ и҆ тѧ́жесть пꙋсты́ннꙋю, и҆ скꙋ́дость поне́слъ є҆сѝ до́блественнѡ, наде́ждею неизрече́нныѧ сла́дости.

И҆збѣ́глъ є҆сѝ вражде́бныхъ напа́стей, всебл҃же́нне, а҆га́риныхъ внꙋ́кѡвъ, бжⷭ҇твенною благода́тїю покрыва́емь, и҆ мнѡ́гимъ на по́льзꙋ спаса́емь.

Бг҃оро́диченъ:

Влⷣкꙋ всѧ́ческихъ, чⷭ҇таѧ, родила̀ є҆сѝ, дв҃о, па́че сло́ва неизрече́ннѡ, є҆го́же молѝ, всепѣ́таѧ, пою́щыѧ тѧ̀ влады́чествїѧ и҆змѣни́ти страсте́й.

Конда́къ прпⷣбнагѡ, гла́съ д҃. Подо́бенъ: Ꙗ҆ви́лсѧ є҆сѝ.

Ꙗ҆́кѡ свѣти́льника превели́каго, цр҃ковь хрⷭ҇то́ва сла́витъ тѧ̀ съ весе́лїемъ ѱало́мски: тѣ́мже не преста́й молѧ́сѧ хрⷭ҇тꙋ̀, да́ти всѣ̑мъ прегрѣше́нїй проще́нїе.

Сѣда́ленъ, гла́съ д҃. Подо́бенъ: Оу҆диви́сѧ:

Мꙋ́жества крѣ́пкое показа́вше, мꙋ́дрїи, пристꙋпи́сте врагѡ́въ всеѕлѡ́бныѧ кѡ́зни, на сꙋди́щи проповѣ́давше хрⷭ҇та̀. тѣ́мъ глава́ми ᲂу҆сѣ́чени, и҆ бжⷭ҇твенною десни́цею вѣнча́стесѧ, и҆̀же къ тре́мъ десѧти́цамъ трѝ блаже́ннїи, мелїті́ны же жи́тели, на́съ вѣ́рою вы̀ чтꙋ́щыѧ, помѧни́те, честні́и мч҃ницы.

Сла́ва, прпⷣбнагѡ, гла́съ г҃. Подо́бенъ: Бжⷭ҇твенныѧ вѣ́ры.

Бжⷭ҇твенный ᲂу҆́мъ твоѐ се́рдце и҆мы́й, прпⷣбне, земна̑ѧ и҆змѣнѝ бжⷭ҇твенными и҆ стоѧ́щими, и҆ сликовствꙋ́еши а҆́гг҃лѡмъ, свѣ́та невеще́ственнагѡ наслажда́ѧсѧ, непреста́ннѡ веселѧ́сѧ: тѣ́мъ, прпⷣбне, хрⷭ҇та̀ бг҃а молѝ, дарова́ти на́мъ ве́лїю ми́лость.

И҆ ны́нѣ, бг҃оро́диченъ:

Бжⷭ҇твеннаѧ ски́нїа была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.

Крⷭ҇тобг҃оро́диченъ:

Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Зарѧ́ми бжⷭ҇твенныхъ пѡ́двигъ, всебога́тїи, вселе́нныѧ всѧ̑ концы̀ просвѣща́ете пресла́внѡ, и҆ неви́димыхъ врагѡ́въ тмꙋ̀ ѿго́ните. тѣ́мъ благочестномꙋ́дреннѡ ва́ше соверша́емъ свѣтоно́сное и҆ бжⷭ҇твенное торжество̀.

Равномꙋ́дрїи всѝ по́двигъ соверши́вше, и҆ по́чести ра́внѡ сподо́бистесѧ, да́вше крѡ́ви своѧ̑ за пострада́вшаго, и҆ бжⷭ҇твеннꙋю кро́вь и҆сточи́вшаго на дре́вѣ во́лею за на́ше спасе́нїе: сегѡ̀ ра́ди вы̀ ᲂу҆блажа́емъ.

Ны́нѣ мꙋ̑дрыѧ восхва́лимъ мч҃ники, ѳеоге́на и҆ ма́манта, і҆е́рѡна, клаѵдїа́на, ні́кѡна кꙋ́пнѡ и҆ нїка́ндра, ло́ггїна и҆ и҆сѵ́хїа, и҆ вара́хїа, каллїні́ка вели́каго, и҆ ѯанѳі́а бж҃е́ственнаго, ѳео́фїла и҆ ᲂу҆алле́рїа.

Всеꙋ́мнѡ къ подвигѡ́мъ ᲂу҆стреми́вшесѧ, содѣ́йствꙋющꙋ всѧ̑, достосла́внїи, бжⷭ҇твеннꙋю благода́ть и҆зба́вителѧ ѡ҆брѣто́сте, и҆ всѧ̑ доблемꙋ́дреннѡ претерпѣ́сте мꙋчє́нїѧ, бл҃года́рственнѡ хрⷭ҇тꙋ̀ пою́ще: си́лѣ твое́й сла́ва, человѣколю́бче.

Бг҃оро́диченъ:

Зако́на сѣ̑ни и҆ прⷪ҇ро́чєскаѧ гада̑нїѧ, тѧ̀ мт҃рь провозвѣсти́ша дре́вле бы́вшꙋ и҆зба́вителѧ: и҆́мже ны́нѣ соверше́нїе мы̀ зрѧ́ще, всенепоро́чнаѧ, согла́снѡ тѧ̀ пое́мъ, страстоте́рпцєвъ сла́во и҆ мч҃никъ ст҃ы́хъ держа́ва.

И҆́нъ. І҆рмо́съ:

Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Ꙗ҆́кѡ всѣ́хъ вре́менныхъ, прпⷣбне, пристра́стїѧ же и҆ любвѐ ѿбѣжа́въ, всю̀ къ бг҃ꙋ твою̀ наде́ждꙋ стѧжа́въ всегда̀, и҆ є҆́же стѧжа́лъ є҆сѝ, ни́щихъ рꙋ́ки прїѧ́ша.

Де́мѡнское ѕлодѣ́йство, прпⷣбне, ѿрази́въ приражє́нїи ѕвѣри́ными, некоснове́нъ ѿ сегѡ̀ ѿню́дъ пребы́лъ є҆сѝ, блаже́нне, бжⷭ҇твенною благода́тїю покрыва́емь, тѧ̀ при́снѡ во всѣ́хъ застꙋпа́ющагѡ.

Разсла́бити твою̀ крѣ́пость, прпⷣбне, вселꙋка́вый тща́шесѧ, є҆́же къ бг҃ꙋ зрѧ̀ твою̀ любо́вь и҆ благодаре́нїе: тѣ́мъ на тѧ̀ псы̀ поꙋстѝ, но во тщетꙋ̀ є҆гѡ̀ ᲂу҆хищре́нїе ѡ҆бличи́сѧ.

Бг҃оро́диченъ:

Пою́ тѧ, бцⷣе влⷣчце, и҆ вопїю́ ти: твое́ю моли́твою ѡ҆свѧтѝ, соблюда́ющи, и҆ наста́ви ко спасе́нїю мно́гими грѣхи̑ па́дающаго и҆ прилѡ́ги де́мѡнскими коле́блема.

Пѣ́снь є҃. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго. но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Мꙋ́дрыхъ страстоте́рпєцъ, маѯїмїа́на, и҆ бж҃е́ственнаго є҆ѵге́нїа, съ ѳео́дѡромъ, дꙋкі́тїа чтꙋ́ще, каллїма́ха, кꙋ́пнѡ ѳеодꙋ́ла и҆ дѡроѳе́а похва́лимъ, мꙋ́жески по́двигъ соверши́вшыѧ.

До́блїи ѻ҆рꙋ̑жницы, во́лею ᲂу҆мерщвлѧ́еми и҆ сокрꙋша́еми, безсме́ртїе вѣ́чнѡ наслѣ́доваша, и҆ въ ра́йстѣй ликꙋ́ютъ ны́нѣ широтѣ̀, блажє́нныѧ надє́жды прїи́мше.

Дрема́нїе небреже́нїѧ ѿрази́вше, всехва́льнїи, во вре́мѧ пѡ́двигъ кꙋ́пнѡ бо́дростїю бжⷭ҇твенною потеко́сте, тече́нїе бжⷭ҇твенныѧ вѣ́ры мꙋче́нїѧ, и҆ къ приста́нищꙋ небе́сномꙋ ны́нѣ прїидо́сте.

Бг҃оро́диченъ:

Свѧ́зана плени́цами мѧ̀ прегрѣше́нїй, всепѣ́таѧ влⷣчце, ᲂу҆́зы а҆́дѡвы разрѣши́вшаѧ бжⷭ҇твеннымъ твои́мъ ржⷭ҇тво́мъ, разрѣшѝ, молю́сѧ тебѣ̀, и҆ пꙋти̑ вводѧ́щыѧ къ жи́зни стꙋпа́ти поспѣшѝ.

И҆́нъ. І҆рмо́съ:

Свѣ́та пода́телю, и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.

Дꙋшѝ твоеѧ̀ тве́рдое, и҆ ра́зꙋма благостоѧ́нное, прпⷣбне, лꙋка́вый низложи́ти надѣ́ѧвсѧ, во пса̀ себѐ преложи́въ, та́кѡ прїи́де и҆скꙋси́ти тѧ̀.

Въ скꙋ́дости мно́зѣй недоꙋмѣ́нїѧ вра́гъ бы́въ ѿстꙋпѝ, ничто́же ѿню́дъ стꙋжи́вша тѧ̀, блаже́нне, зрѧ̀: па́че же благода́рственнѡ скꙋ́дость носѧ́ща.

Же́злъ си́лы, ꙗ҆́коже ѻ҆рꙋ́жїе крⷭ҇тъ, прпⷣбне, въ рꙋка́хъ всегда̀ носѧ̀, всѐ вра́жїе ко́зней дѣ́йство, ꙗ҆́кѡ пра́хъ, и҆стни́лъ є҆сѝ.

Бг҃оро́диченъ:

Ѿча́ѧвшихсѧ наде́жда, и҆ предста́тельнице вѣ́рныхъ, спаси́ мѧ, мт҃и бж҃їѧ, ѿ всѧ́кагѡ наси́лїѧ врагѡ́въ неви́димыхъ и҆ ви́димыхъ, всепѣ́таѧ.

Пѣ́снь ѕ҃. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Въ пѣ́снехъ страда́льца, ѳеодо́та, і҆ларїѡ́на, гїга́нтїа мꙋ́драго, и҆ а҆ѳана́сїа, и҆ бжⷭ҇твеннаго є҆ѵтѵ́хїа со є҆пїфа́нїемъ по до́лгꙋ ᲂу҆блажи́мъ.

Да ᲂу҆блажа́тсѧ вѣ́рнѡ, і҆е́рѡнъ и҆ дїодо́тъ, кастрі́хїй мꙋ́дрый и҆ бжⷭ҇твенный ѻ҆стрі́хїй, вели́кїй ѳеме́лїй, со а҆моні́томъ, хрⷭ҇то́вы до́блїи мч҃ницы.

Крове́й ва́шихъ тече́нїемъ, фараѡ́на неви́димаго потопи́вше со всѣ́мъ во́инствомъ, добропобѣ́днїи мч҃ницы, небеса̀ постиго́сте, и҆ перворожде́нныхъ цр҃ковь ᲂу҆краси́сте.

Бг҃оро́диченъ:

Ѻ҆рꙋ̑жїѧ вра̑жїѧ, бг҃ороди́тельнице, ѡ҆скꙋдѣ́ша, ѿне́лѣже копїе́мъ прободе́сѧ хрⷭ҇то́съ, є҆го́же родила̀ є҆сѝ, кро́вїю и҆ водо́ю ѡ҆бетша́вшыѧ человѣ́ки назида́ѧ.

И҆́нъ. І҆рмо́съ:

Ко гдⷭ҇ꙋ ѿ ки́та і҆ѡ́на возопѝ, ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.

Хра́мъ бг҃ꙋ твоѐ се́рдце хотѧ̀ ꙗ҆ви́ти, прпⷣбне, цр҃кви ѡ҆бхожда́лъ є҆сѝ, ст҃ы́хъ, ѿ ни́хже прїѧ́лъ є҆сѝ бл҃года́ть ѻ҆би́льнѡ ст҃а́гѡ дх҃а, мнѡ́гимъ человѣ́кѡмъ на ᲂу҆твержде́нїе.

Твоѐ ѻ҆ч҃ество, ꙗ҆́кѡ бога́тство тѧ̀, бг҃омꙋ́дре, многоцѣ́нное па́ки прїѧ́тъ бжⷭ҇твеннымъ сꙋдо́мъ. тѣ́мъ стра́нна мѧ̀ ѻ҆ч҃ества є҆де́мскагѡ, прпⷣбне, сꙋ́ща наслѣ́дника семꙋ̀ содѣ́лай.

Цр҃ковь тѧ̀ марі́ны дѣ́вы мч҃ницы пе́рвѡ прїѧ́тъ все́льника, въ не́йже ꙗ҆́кѡ незаходи́ма возсїѧ́лъ є҆сѝ ѕвѣзда̀, ѡ҆зарѧ́ѧ, прпⷣбне, во тмѣ̀ невѣ́дѣнїѧ спѧ́щыѧ.

Бг҃оро́диченъ:

Оу҆молѝ сн҃а твоего̀ и҆ гдⷭ҇а, дв҃о, ѡ҆ рабѣ́хъ твои́хъ, вѣ́рою честно́мꙋ ѻ҆́бразꙋ зра́ка твоегѡ̀, всенепоро́чнаѧ, покланѧ́ющихсѧ при́снѡ, и҆́бо мо́жеши.

Конда́къ, гла́съ и҃. Подо́бенъ: Ꙗ҆́кѡ нача́тки:

Ли́къ мч҃ническїй ꙗ҆́сенъ, по́лкъ свѣтоно́сенъ, соше́дъ къ на́мъ разꙋ́мнѡ, цр҃ковь дне́сь просвѣти́лъ є҆́сть чꙋ́дными зарѧ́ми. тѣ́мже пра́зднꙋюще честнꙋ́ю па́мѧть и҆́хъ, про́симъ ѿ тебє̀, сп҃се на́шъ: тѣ́хъ моли́твами ѿ бѣ́дъ и҆зба́ви на́съ, да пое́мъ тѝ: а҆ллилꙋ́їа.

Пѣ́снь з҃. І҆рмо́съ:

Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Честнꙋ́ю твою̀ рꙋ́кꙋ за и҆́стинꙋ, і҆е́рѡне сла́вне, ѿсѣ́ченꙋ зрѧ̀, благода́рствєннаѧ пѣ̑сни всеви́дцꙋ поѧ̀ взыва́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.

Высо́кимъ смы́сломъ проѡбра́зїе сострада́льцємъ бы́лъ є҆сѝ, сла́вне і҆е́рѡне, и҆ съ ни́ми вы́шнѧгѡ црⷭ҇твїѧ жре́бїй прїѧ́лъ є҆сѝ, поѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Во́ини до́блїи цр҃ѧ̀ ꙗ҆́вльшесѧ вѣ́чнꙋющагѡ, мꙋ́жества ва́шегѡ мече́мъ полкѝ лестца̀ погꙋби́ли є҆стѐ, пою́ще: ѻ҆ц҃ъ на́шихъ бж҃е, бл҃гослове́нъ є҆сѝ.

Бг҃оро́диченъ:

Врача̀ поро́ждши, дв҃о, се́рдца моегѡ̀ стра̑сти ᲂу҆врачѝ, чⷭ҇таѧ, и҆ вѣ́чнꙋющагѡ мѧ̀ мꙋче́нїѧ и҆зба́ви, къ пѣ́снехъ зовꙋ́ща: ѻ҆тє́цъ на́шихъ бж҃е, бл҃гослове́нъ є҆сѝ.

И҆́нъ. І҆рмо́съ:

Виті̑и ꙗ҆ви́шасѧ ѻ҆́троцы, любомꙋ́дрѣйшїи дре́вле, ѿ бг҃опрїѧ́тныѧ бо дꙋшѝ, бг҃осло́вѧще ᲂу҆стна́ми поѧ́хꙋ: пребжⷭ҇твенный ѻ҆ц҃є́въ и҆ на́шъ бж҃е, бл҃гослове́нъ є҆сѝ.

Трапе́зꙋ ѻ҆би́льнꙋ ᲂу҆гото́ва, и҆спо́лненꙋ благи́хъ добродѣ́телей тѝ бж҃е́ственныхъ, и҆́миже всѧ̑ пита́ѧ, и҆ пѣ́ти наꙋча́ше: ѻ҆тє́цъ на́шихъ бж҃е, бл҃гослове́нъ є҆сѝ.

Глаго́лѡмъ ᲂу҆че́нїй твои́хъ премꙋ́дрыхъ послѣ́дꙋюще лю́дїе, маловре́менныхъ всѣ́хъ любо́вь вои́стиннꙋ ᲂу҆се́рднѡ ѿложи́вше, и҆ жи́тельство съ тобо́ю ꙗ҆́кѡ бла́го, всебл҃же́нне, произво́лиша.

Ѻ҆́бразъ стѧжа́въ житїѧ̀ ты̀ сѷмеѡ́на ди́внагѡ, ꙗ҆́кѡ ка́мень а҆дама́нтъ, на столпѣ̀ безъ покро́ва стоѧ́лъ є҆сѝ, зовы́й веселѧ́сѧ: пребжⷭ҇твенный ѻ҆тцє́въ и҆ на́шъ бж҃е, бл҃гослове́нъ є҆сѝ.

Бг҃оро́диченъ:

Спаси́ мѧ ѿ сѣте́й вра́жїихъ, хода́тайствомъ твои́мъ, чⷭ҇таѧ, и҆ любвѝ коне́чнѣй бл҃га́гѡ сн҃а твоегѡ̀ привѧжѝ, ᲂу҆далѧ́ема всегда̀ ѿ негѡ̀ сластьмѝ безмѣ́стными.

Пѣ́снь и҃. І҆рмо́съ:

Побѣди́тели мꙋчи́телѧ и҆ пла́мене благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.

Оу҆мертви́вшесѧ мі́рꙋ, жи́знь бꙋ́дꙋщꙋю наслѣ́дꙋете, и҆ и҆сцѣле́нїй бл҃года́ть и҆сточа́ете пою́щымъ: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Свѣ́тлїи свѣти́льницы страда́нїй сїѧ́ньми ꙗ҆́вльшесѧ, ѡ҆блиста́ете мі́ръ, страстоно́сцы мꙋ́чєницы, вопїю́ще: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Въ темни́цꙋ вве́ржени, бжⷭ҇твенныѧ вои́стиннꙋ храни́телїе и҆́стины, и҆ воло́выми жи́лами пло́ти неми́лостивнѡ, бл҃же́ннїи, ᲂу҆ранѧ́еми, ника́коже пра́вагѡ пꙋтѝ соврати́стесѧ. тѣ́мъ побѣ̑дныѧ прїѧ́сте вѣнцы̀.

Словесы̀ ст҃ы́ми вѣ́рою просвѣща́еми, бг҃а ѻ҆ц҃а̀, и҆ сн҃а, и҆ ст҃а́го дх҃а, трⷪ҇цꙋ нераздѣ́льнꙋ и҆сповѣ́дꙋемъ, є҆ди́но црⷭ҇тво, є҆ди́но гдⷭ҇ьство, и҆ є҆ди́нꙋ вла́сть, во всѧ̑ вѣ́ки.

Бг҃оро́диченъ:

Ꙗ҆́кѡ свѧтѣ́йши а҆́гг҃лъ чⷭ҇таѧ, прїѧ́ла є҆сѝ во ст҃ы́хъ почива́ющаго бг҃а всѣ́хъ: сегѡ̀ ра́ди всѝ вѣ́рнїи пое́мъ тѧ̀, и҆ славосло́вимъ во всѧ̑ вѣ́ки.

И҆́нъ. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Навы́къ неле́стнѡ ѿ пре́жде тебє̀ пости́вшихсѧ ѻ҆тцє́въ, ѻ҆́ч҃е, по́двиги и҆ борє́нїѧ, и҆ потща́лсѧ є҆сѝ не ꙗ҆ви́тисѧ вторы́й: и҆ ꙗ҆́кѡ не то́кмѡ ꙗ҆ви́сѧ, но ᲂу҆жѐ и҆ превзы́де.

И҆спо́лнилъ є҆сѝ моли́твꙋ, є҆́юже молѧ́сѧ бг҃ꙋ дре́вле, требл҃же́нне, тво́й хлѣ́бъ всѣ̑мъ предлага́ю, глаго́лѧ: и҆ тебѣ̀ твоѧ̑ ѿ твои́хъ прино́симъ, гдⷭ҇и сла́вы, во всѧ̑ вѣ́ки.

И҆ сло́вомъ, ѻ҆́ч҃е, и҆ дѣ́ломъ ты̀ направлѧ́ѧ сꙋ́щыѧ съ тобо́ю къ бжⷭ҇твеннѣй стезѝ, са́мъ мно́жае па́че си́хъ къ се́й направлѧ́емь, и҆́мже чꙋдеса̀ соверши́лъ є҆сѝ: бг҃ъ бо моли́твами твои́ми гꙋмно̀ ᲂу҆мно́жи.

Бг҃оро́диченъ:

Да ра́дꙋетсѧ нб҃о, да весели́тсѧ и҆ землѧ̀ съ человѣ̑ки, дв҃а бо марі́а творца̀ всѣ́хъ неизрече́ннѡ родѝ, є҆мꙋ́же пои́мъ: тѧ̀ превозно́симъ, хрⷭ҇тѐ, во вѣ́ки.

Пѣ́снь ѳ҃. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Возмо́глъ є҆сѝ, си́лою бжⷭ҇твенною ᲂу҆крѣплѧ́емь, і҆е́рѡне пречꙋ́дне, многоко́зненнаго побори́ти, ᲂу҆ма̀ крѣ́постїю, и҆ приве́лъ є҆сѝ хрⷭ҇тꙋ̀ страстоте́рпцєвъ собо́ръ твои́ми поꙋче́ньми, съ ни́миже вѣ́рою тѧ̀ при́снѡ ᲂу҆бл҃жа́емъ.

Ꙗ҆ви́стесѧ во́инство честно́е, во хрⷭ҇тѣ̀ собра́но, великоимени́тїи, и҆ проти́вистесѧ ко власте́мъ мїроде́ржца: и҆ побѣди́вше и҆̀хъ ѻ҆рꙋ́жїемъ бжⷭ҇твенныѧ вѣ́ры, вѣнцы̀ взѧ́сте ѿ рꙋкѝ живонача́льныѧ, веселѧ́щесѧ.

Взыгра́й, ѽ мелїті́не! приве́дъ многочи́сленный собо́ръ вседержи́телю честны́хъ мꙋ́ченикѡвъ, и҆̀хже митропо́лїѧ вы́шнѧѧ и҆́мать, свѧще́нно тече́нїе соверши́вшихъ, и҆ со всѣ́ми вѣ́рнѡ си́хъ гра́ды ᲂу҆блажа́й всегда̀.

Сл҃нце незаходи́мое хрⷭ҇тѐ, моли́твами сла́вныхъ мꙋ́ченикѡвъ твои́хъ, соверша́ющыѧ и҆́хъ свѣтоно́сное и҆ бжⷭ҇твенное страда́нїе свѣ́тлыми зарѧ́ми просвѣтѝ и҆ ѡ҆свѧтѝ, и҆ та́мѡ ѻ҆́бщники црⷭ҇твїѧ, ꙗ҆́кѡ бг҃ъ, сподо́би.

Бг҃оро́диченъ:

Трепе́щꙋ твоегѡ̀, є҆ди́не цр҃ю̀, сꙋда̀ бꙋ́дꙋщагѡ, и҆ ᲂу҆страша́юсѧ, да не ка́кѡ въ стра́сть и҆ мꙋче́нїе вве́ргꙋсѧ: но ѡ҆чи́сти мѧ̀ ѿ всѧ́кїѧ скве́рны грѣхо́вныѧ, моли́твами пречⷭ҇тыѧ твоеѧ̀ мт҃ре, ꙗ҆́кѡ чл҃вѣколю́бецъ.

И҆́нъ. І҆рмо́съ:

Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

Лѣ́ностїю, ᲂу҆вы̀ мнѣ̀, житїѐ соверши́хъ всѐ, и҆ бою́сѧ сꙋда̀ стра́шнагѡ: но, ѽ чл҃вѣколю́бче гдⷭ҇и!. моле́нїемъ ла́зарѧ, слє́зныѧ мѝ послѝ стрꙋи̑, да тѣ́ми ѡ҆мы́ю скве́рнꙋ прегрѣше́нїй мои́хъ.

Ти́хꙋ и҆мѣ́ѧ дꙋ́шꙋ, кро́токъ же зра́къ влѣ́потꙋ и҆мѣ́лъ є҆сѝ, ѻ҆́ч҃е, и҆ ᲂу҆вѣ́тливъ ко всѣ̑мъ ве́сь ꙗ҆влѧ́ѧсѧ, стрꙋѧ́ми же твои́хъ глагѡ́лъ напаѧ́ѧ дꙋ́шы, мꙋ́дре: ꙗ҆́же тишинꙋ̀ и҆ на́мъ хрⷭ҇та̀ ᲂу҆молѝ пода́ти.

Ꙗ҆́вственнѣйшꙋ всѣ̑мъ добродѣ́тель твою̀ бжⷭ҇твеннꙋю подо́бно ꙗ҆ви́ти хотѧ̀ бг҃ъ, горѣ̀ пристꙋпи́ти тѧ̀, прпⷣбне, содѣ́ѧ къ жесто́кой, ѿ неѧ́же па́че, ѻ҆́ч҃е, лꙋчѝ ᲂу҆до́бь и҆спꙋща́ѧ житїѧ̀, ѡ҆зари́лъ є҆сѝ вселе́ннꙋю.

Бг҃оро́диченъ:

Ми́лостива тогда̀ ꙗ҆вѝ мнѣ̀ сꙋдїю̀ сн҃а твоего̀, є҆го́же родила̀ є҆сѝ безъ сѣ́мене, во вре́мѧ є҆гда̀ сѧ́детъ, ꙗ҆́коже пи́шетсѧ, на прⷭ҇то́лѣ ст҃ѣ́мъ, сꙋди́ти, ѻ҆трокови́це, всѧ̑ земны̑ѧ, ѡ҆ и҆́хже въ житїѝ безмѣ́стныхъ содѣ́ѧша.

Свѣти́ленъ. Подо́бенъ: Жєны̀ ᲂу҆слы́шите:

Ѻ҆рꙋ́жїемъ чⷭ҇тна́гѡ твоегѡ̀ крⷭ҇та̀ защити́вшесѧ страстоте́рпцы твоѝ, сло́ве, проти̑вныѧ си̑лы крѣ́пкѡ побѣди́ша, и҆ мꙋчи́телѧ посрами́ша, по тебѣ̀ пострада́ша, и҆ тебѣ̀, хрⷭ҇тѐ мо́й, всѣ́хъ цр҃ю̀, сца́рствꙋютъ кꙋ́пнѡ.

И҆ прпⷣбнагѡ. Подо́бенъ: Нб҃о ѕвѣзда́ми:

Бг҃оно́сца всѝ и҆ влⷣчнѧ подража́телѧ восхва́лимъ пѣ́сньми ла́зарѧ приснопа́мѧтнаго, де́мѡнское свирѣ́пство разори́вшаго бжⷭ҇твенною си́лою.

Бг҃оро́диченъ:

Тѧ̀ данїи́лъ прописа̀ несѣко́мꙋю го́рꙋ, ѿ неѧ́же честны́й ка́мень ѿсѣче́сѧ, сокрꙋша́ѧ і҆́дѡльскїѧ хра́мы, бг҃ороди́тельнице марі́е.

На лїтꙋргі́и, прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви: А҆пⷭ҇лъ, къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Бл҃же́нъ мꙋ́жъ, боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло і҃. Прича́стенъ: Въ па́мѧть вѣ́чнꙋю бꙋ́детъ првⷣникъ: