Мѣ́сѧца тогѡ́же въ в҃і-й де́нь.

И҆́же во ст҃ы́хъ ѻ҆ц҃а̀ на́шегѡ і҆ѡа́нна, патрїа́рха а҆леѯандрі́йскагѡ, ми́лостивагѡ:

И҆ прпⷣбнагѡ ѻ҆ц҃а̀ на́шегѡ ні́ла.

На Гдⷭ҇и, воззва́хъ, стїхи̑ры, гла́съ д҃. Поⷣ: Да́лъ є҆сѝ зна́менїе:

Расточи́въ, разда́лъ є҆сѝ ꙳ тре́бꙋющымъ хлѣ́бъ тво́й, і҆ѡа́нне чꙋ́дне, ꙳ ми́лостїю подобѧ́сѧ ꙳ ми́лостивѣйшемꙋ, преподо́бне, влⷣцѣ. ꙳ тѣ́мъ твоѧ̀ пребыва́етъ и҆́стиннѡ ꙳ во вѣ́къ па́мѧть, ст҃е ꙳, ю҆́же вѣ́рою пра́зднꙋющыѧ ꙳ твои́ми моли́твами спаса́й, ꙳ и҆скꙋше́нїй же и҆ скорбе́й, і҆ера́рше всебога́те.

Твою̀ чистотꙋ̀, ꙳ и҆ ᲂу҆ма̀ пра́вость, и҆ нра́въ бжⷭ҇твенный ꙳ ви́дѧй та̑йнаѧ ꙳ прови́дѣвъ, возво́дитъ на велича́йшїй престо́лъ, ꙳ пома́завъ мѵ́ромъ тѧ̀, мꙋ́дре, и҆ соверши́въ, ꙳ и҆ па́ствы корми̑ла ꙗ҆́вѣ врꙋчи́въ, ꙳ ю҆́же ко приста́нищꙋ напра́вилъ є҆сѝ ꙳ бжⷭ҇твеннагѡ хотѣ́нїѧ, ꙳ і҆ѡа́нне бг҃оглаго́ливе.

Всѧ̑ прошє́нїѧ ꙳ твоегѡ̀ се́рдца гдⷭ҇ь, ꙳ досточꙋ́дне, подадѐ: ꙳ всѧ̑ бо соблю́лъ є҆сѝ законоположє́нїѧ спаси́тєльнаѧ. ꙳ бг҃а бо всеконе́чнѡ, ꙳ и҆ бли́жнѧго, бг҃облаже́нне, ꙳ ꙗ҆́кѡ тебѐ сама́го возлюби́лъ є҆сѝ, ꙳ и҆ тре́бꙋющыѧ ᲂу҆дово́лилъ є҆сѝ: ꙳ сегѡ̀ ра́ди тѧ̀ дне́сь, і҆ѡа́нне, почита́емъ.

И҆́ны стїхи̑ры прпⷣбнагѡ, гла́съ и҃. Подо́бенъ: Что̀ вы̀ нарече́мъ:

Что́ тѧ ны́нѣ нарече́мъ, свѧ́те; ꙳ рѣкꙋ̀, и҆сходѧ́щꙋю ѿ мы́сленнагѡ є҆де́ма, ꙳ пото́къ ѿ бг҃а подае́мыхъ дарѡ́въ, ꙳ наводне́нїе ᲂу҆че́нїй благода́ти, ча́шꙋ мꙋ́дрости и҆ зна́нїѧ, ꙳ моле́бника крѣпча́йшаго, ꙳ ᲂу҆чи́телѧ дѣйстви́тельнѣйшаго. ꙳ молѝ спасти́сѧ дꙋша́мъ на́шымъ.

Что́ тѧ воз̾именꙋ́емъ, прпⷣбне; ꙳ земледѣ́лателѧ безсме́ртныхъ, бл҃же́нне, садѡ́въ, ꙳ садодѣ́лателѧ разꙋ́мнагѡ раѧ̀ вѣ́рныхъ, ꙳ зако́нѡвъ бг҃ода́нныхъ и҆скꙋ́снѣйшаго толко́вника, ꙳ догма́тѡвъ бг҃одꙋхо́вныхъ вѣ́дателѧ, ꙳ сказа́телѧ благоесте́ственнѣйша, ꙳ и҆ наказа́телѧ дово́льнѣйша. ꙳ молѝ спасти́сѧ дꙋша́мъ на́шымъ.

Что́ тѧ ны́нѣ нарекꙋ̀, чꙋ́дне; ᲂу҆ставополо́жника сопрꙋ́жества, ꙳ цѣломꙋ́дрїѧ прави́телѧ, ꙳ наказа́телѧ мона́шествꙋющихъ, и҆ дѣ́вства пꙋтевожда̀, ꙳ пра́веднѡ ѻ҆бои́мъ мѣ́рѧща, ꙳ ꙗ҆́кѡ и҆скꙋ́сомъ проше́дша ѻ҆боѧ̑. ꙳ мнѡ́га твоѧ̑ дѣѧ̑нїѧ, ꙳ и҆ ѡ҆ бз҃ѣ твоѐ поще́нїе: ꙳ молѝ спасти́сѧ дꙋша́мъ на́шымъ.

Сла́ва, гла́съ в҃. А҆нато́лїево:

Ми́лости и҆сто́чникъ тре́бꙋющымъ ᲂу҆множа́етъ, благосострада́тєльныѧ щедрѡ́ты, і҆ѡа́ннъ, хрⷭ҇то́въ подо́бникъ, вели́кїй па́стырь а҆леѯа́ндрѧнъ и҆ свѣти́ло. прїиди́те, насы́тимсѧ ни́щїи дꙋ́хомъ, подража́ющїи тогѡ̀ ти́хости, любоблагоꙋтро́бнымъ бо нра́вомъ хрⷭ҇та̀ стра́нствовавшаго чрезъ ни́щыѧ ᲂу҆гости́въ, ꙗ҆́кѡ дре́вле а҆враа́мъ, блаже́нства ᲂу҆досто́исѧ, и҆ со дерзнове́нїемъ мо́литсѧ, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Є҆гда̀ ѿ дре́ва:

Дре́вꙋ крⷭ҇тномꙋ тѧ̀, і҆и҃се, пригвожде́на, зрѧ́щи неискꙋсобра́чнаѧ, пла́чꙋщи гл҃го́лаше: ча́до сла́дкое, почто̀ ѡ҆ста́вилъ є҆сѝ менѐ, ро́ждшꙋю тѧ̀, є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, бжⷭ҇твєнныѧ стра̑сти твоѧ̑ сла́вѧщїи.

На стїхо́внѣ ѻ҆ктѡ́иха. Сла́ва, прпⷣбнагѡ, гла́съ и҃:

Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ ні́ле: твое́ю бо стезе́ю вои́стиннꙋ пра́вѡ ходи́ти ᲂу҆вѣ́дѣхомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Мч҃ницы твоѝ:

Тѧ̀ ви́дѧщи пригвожда́ема на крⷭ҇тѣ̀, і҆и҃се, и҆ стрⷭ҇ти прїе́млюща во́лею дв҃а и҆ мт҃и твоѧ̀, влⷣко, ᲂу҆вы̀ мнѣ̀, вопїѧ́ше, ча́до сла́дкое! ра̑ны непра́веднѡ ка́кѡ терпи́ши, врачꙋ̀, и҆сцѣли́вый человѣ́ческое неможе́нїе, и҆ ѿ тлѝ всѣ́хъ и҆зба́вивый бл҃гоꙋтро́бїемъ твои́мъ;

Тропа́рь, гла́съ и҃:

Въ терпѣ́нїи твое́мъ стѧжа́лъ є҆сѝ мздꙋ̀ твою̀, ѻ҆́ч҃е прпⷣбне, въ моли́твахъ непреста́ннѡ терпѣ́вый, ни́щыѧ возлюби́вый, и҆ сїѧ̑ ᲂу҆довли́вый: но моли́сѧ хрⷭ҇тꙋ̀ бг҃ꙋ, і҆ѡа́нне ми́лостиве блаже́нне, спасти́сѧ дꙋша́мъ на́шымъ.

Сла́ва, гла́съ то́йже:

Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдєсы̀, ні́ле, ѻ҆́ч҃е на́шъ: молѝ хрⷭ҇та̀ бг҃а спасти́сѧ дꙋша́мъ на́шымъ.

И҆ ны́нѣ, бг҃оро́диченъ.

На ᲂу҆́трени канѡ́нъ ѻ҆ктѡ́иха є҆ди́нъ, и҆ ст҃ы́хъ два̀.

Канѡ́нъ і҆ера́рха. Творе́нїе і҆ѡ́сифово.

Гла́съ и҃. Пѣ́снь а҃. І҆рмо́съ:

Посѣче́нный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.

Сострада́нїемъ ᲂу҆ма̀ просвѣща́емь, и҆ любо́вїю хрⷭ҇то́вою, ѻ҆́ч҃е, ѡ҆зарѧ́емь, ми́лостыней блиста́ѧ сїѧ́ньми, є҆ди́нагѡ ми́лостивагѡ бг҃а прїѧ́телище чистѣ́йшее, і҆ѡа́нне, бы́лъ є҆сѝ: тѣ́мъ тѧ̀ ᲂу҆блажа́емъ.

Во вѣ́къ при́снѡ пребыва̑ющаѧ смотрѧ́ѧ, мꙋ́дрымъ смы́сломъ, ѻ҆́ч҃е свѧще́ннѣйше, и҆змѣни́лъ є҆сѝ тлѣ̑ннаѧ свѣ́тлѡ нетлѣ́нными, и҆ ны́нѣ на нб҃сѣ́хъ жи́тельствꙋеши, вопїѧ̀ со безпло́тными ли̑ки: гдⷭ҇ꙋ воспои́мъ, сла́внѡ бо просла́висѧ.

Ми́лости да́тель, ѡ҆дари́въ ми́лостивное, прпⷣбне, твоѐ помышле́нїе, поми́лова мнѡ́гїѧ бжⷭ҇твеннымъ твои́мъ хода́тайствомъ, бы́лъ є҆сѝ во ᲂу҆тѣше́нїе дꙋ́шъ, ни́щихъ же промышле́нїе, і҆ѡа́нне всемꙋ́дре бг҃облаже́нне свѧще́ннѣйшїй.

Бг҃оро́диченъ:

Благослове́ннаѧ, чⷭ҇таѧ и҆ всепѣ́таѧ, є҆ди́на ро́ждшаѧ воплоще́ннаго бг҃а, приснотекꙋ́щїй и҆сто́чникъ на́мъ, надѣ́ющымсѧ на тѧ̀, и҆сцѣлє́нїѧ и҆злива́юща вѣ̑рнымъ: молѝ є҆го́же родила̀ є҆сѝ, дарова́ти мі́рꙋ ве́лїю ми́лость.

И҆́нъ канѡ́нъ прпⷣбнагѡ. Є҆гѡ́же краегране́сїе:

Напаѧ́етъ мѧ̀ ні́лъ разꙋ́мнымъ всепло́дствїемъ. Ѳеофа́ново.

Гла́съ и҃. Пѣ́снь а҃. І҆рмо́съ:

Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Напое́ньми твои́ми, бл҃же́нне, та́инственными, напаѧ́ѧ бога́тнѡ прозѧ́бшїй мо́й по́мыслъ, ꙗ҆́кѡ кла́съ пѣ́нїѧ тебѣ̀ принестѝ твои́ми моли́твами сподо́би.

Глагѡ́лъ течє́нїѧ твои́хъ, ꙗ҆́кѡ и҆зъ є҆де́ма, всебога́те ні́ле, происходѧ̑щаѧ ꙗ҆́вственнѡ, лицѐ всѐ приснотекꙋ́щее церко́вное напаѧ́ютъ.

Догма́тѡвъ и҆ слове́съ рѣка̀ твои́хъ, бг҃оглаго́ливе, сердца̀ благочести́выхъ наводнѧ́ющи напаѧ́етъ, ѕлочести́выхъ же потоплѧ́етъ собра̑нїѧ.

Бг҃оро́диченъ:

И҆зблева̀ въ слꙋ́хи є҆́ѵы ꙗ҆́дъ дꙋшетлѣ́нный гꙋби́тель и҆ вра́гъ: хрⷭ҇та́ же ро́ждши, бг҃ома́ти, тогѡ̀ вре́да и҆сцѣли́ла є҆сѝ.

Пѣ́снь г҃. І҆рмо́съ:

Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Бг҃олѣ́пна, ꙗ҆́коже ѻ҆трокови́ца, ѿ ма́слинъ вѣне́цъ носѧ́щи, ꙗ҆ви́сѧ тебѣ̀, досточꙋ́дне, ми́лостивагѡ благосострада́тельнаѧ благода́ть, привлача́щи тѧ̀ къ бжⷭ҇твеннѣй ми́лости.

На прⷭ҇то́лѣ свѧще́ннѣмъ, сꙋдо́мъ бж҃їимъ, сла́вне ѻ҆́ч҃е і҆ѡа́нне, сѣ́лъ є҆сѝ, ꙗ҆́коже а҆́гг҃лъ ты̀ пожи́лъ є҆сѝ, ми̑рныѧ возносѧ̀ сщ҃є́нныѧ жє́ртвы всеще́дромꙋ.

Мно́гое милосе́рдїе милосе́рдагѡ гдⷭ҇а, ѻ҆́ч҃е, подража́ѧ, за милосе́рдїе ѡ҆бнища́вшагѡ пло́тїю, ни́щыѧ ᲂу҆дово́лилъ є҆сѝ, стра̑нныѧ и҆ безпокрѡ́вныѧ собира́ѧ, и҆спо́лнитель повелѣ́нїй бжⷭ҇твенныхъ бы́въ.

Бг҃оро́диченъ:

Всели́всѧ въ дв҃ꙋ тѣле́снѣ, гдⷭ҇и, ꙗ҆ви́лсѧ є҆сѝ человѣ́кѡмъ, ꙗ҆́коже подоба́ше ви́дѣти тѧ̀: ю҆́же и҆ показа́лъ є҆сѝ, ꙗ҆́кѡ и҆́стиннꙋю бцⷣꙋ, вѣ̑рнымъ по́мощь, є҆ди́не чл҃вѣколю́бче.

И҆́нъ. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Дарова̑нїѧ, ѻ҆́ч҃е, дх҃а но́ситъ твоѐ помышле́нїе, лꙋка̑ваѧ помышлє́нїѧ ѿгонѧ̀.

Мѵ́ро благово́ннѣйшее, твоѧ̑ моли̑твы на́мъ вдохнꙋ́въ, свѧщеннодѣ́лателю, видѣ́нїемъ дѣ́тельнымъ пожи́въ.

И҆сточи́лъ є҆сѝ ᲂу҆чє́нїѧ ты̀ нбⷭ҇наѧ, всемꙋ́дре, ꙗ҆́кѡ ѿ и҆сто́чника, и҆ церкѡ́вныѧ пито́мцы ѡ҆богати́лъ є҆сѝ.

Бг҃оро́диченъ:

Оу҆мертвѝ мꙋдрова́нїе пло́ти на́шеѧ, пречⷭ҇таѧ, и҆сто́чникъ безсме́ртїѧ человѣ́кѡмъ и҆сточи́вшаѧ.

Конда́къ прпⷣбнагѡ, гла́съ и҃. Подо́бенъ: Взбра́нной:

Хвра̑стнаѧ страсте́й, ꙗ҆̀же ѿ тѣлесѐ, воста̑нїѧ сѣчи́тельнѡ, ні́ле блаже́нне, во бдѣ́нной твое́й ссѣ́клъ є҆сѝ моли́твѣ. но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ мѧ̀ бѣ́дъ свободѝ, да зовꙋ́ ти: ра́дꙋйсѧ, ѻ҆́ч҃е всемі́рный.

І҆́косъ:

Кто̀ земноро́дныхъ и҆зрещѝ возмо́жетъ, ні́ле, жи́тельства твоегѡ̀ страда̑нїѧ, и҆ житїѧ̀ твоегѡ̀ безмѣ̑рныѧ трꙋды̀, и҆ мнѡ́гаѧ тща̑нїѧ твоѧ̑, ꙗ҆̀же на землѝ, ꙗ҆́кѡ безпло́тный, соверши́лъ є҆сѝ; но ѻ҆ба́че зовꙋ̀: ра́дꙋйсѧ, рѣко̀ бжⷭ҇твенныхъ благода́тей: ра́дꙋйсѧ, цѣвни́це хрⷭ҇то́выхъ ᲂу҆че́нїй: ра́дꙋйсѧ, ча́ше мꙋ́дрости и҆ зна́нїѧ ра́дꙋйсѧ, воздѣ́ланїе безсме́ртныхъ насажде́нїй: ра́дꙋйсѧ, догма́те дѣ́тельнѣйшїй бг҃одохнове́нныхъ слове́съ: ра́дꙋйсѧ, зако́на бг҃ода́ннагѡ и҆скꙋ́снѣйшїй толко́вниче: ра́дꙋйсѧ, садодѣ́лателю раѧ̀ мы́сленнагѡ: ра́дꙋйсѧ, дѣ́вства храни́лище ве́лїе: ра́дꙋйсѧ, кра́снаѧ гꙋ́сль дх҃а: ра́дꙋйсѧ, страсте́й кореносѣ́чный мечꙋ̀: ра́дꙋйсѧ, пра́ведныхъ мꙋже́й высото̀: ра́дꙋйсѧ, вѣ́рныхъ земноро́дныхъ предста́телю: ра́дꙋйсѧ, ѻ҆́ч҃е всемі́рный.

Сѣда́ленъ, гла́съ и҃. Подо́бенъ: Премꙋ́дрости:

Ми́лостивенъ нра́въ прїи́мъ, благосе́рдъ ꙗ҆ви́лсѧ є҆сѝ, и҆ пода́теленъ ни́щымъ и҆ тре́бꙋющымъ, і҆ѡа́нне бг҃одохнове́нне. сегѡ̀ ра́ди зва́нїемъ дѣѧ́нїю подо́бнѡ, па́че всѣ́хъ ст҃ы́хъ, блаже́нне, ѡ҆богати́ тѧ ѕѣлѡ̀ пода́тель благи́хъ хрⷭ҇то́съ: є҆мꙋ́же, бг҃омꙋ́дре і҆ера́рше пребога́те, моли́сѧ, грѣхѡ́въ ѡ҆ставле́нїе пода́ти пра́зднꙋющымъ любо́вїю свѧтꙋ́ю па́мѧть твою̀.

Сла́ва, прпⷣбнагѡ, гла́съ то́йже. Подо́бенъ: Повелѣ́нное та́йнѡ:

Оу҆краси́въ тво́й ᲂу҆́мъ видѣ̑нїи, бг҃осло́вїѧ рѣ́ки ѿры́гнꙋлъ є҆сѝ, напаѧ́ѧ сердца̀, ні́ле бг҃оно́сне, вѣ́рою почерпа́ющихъ твои́хъ ᲂу҆че́нїй пи́во, проза́рное же и҆ чи́стое, и҆ чтꙋ́щихъ па́мѧть твою̀ свѣтоза́рнꙋю же и҆ честнꙋ́ю, преподо́бныхъ ᲂу҆добре́нїе, и҆ ѻ҆тцє́въ хвало̀.

И҆ ны́нѣ, бг҃оро́диченъ:

Ꙗ҆́же непремѣ́ннаго бг҃а поро́ждшаѧ, премѣнѧ́емое при́снѡ се́рдце моѐ грѣхо́мъ и҆ лѣ́ностїю, прило́гми льсти́вагѡ, ᲂу҆твердѝ, блага́ѧ, моли́твами мт҃рними твои́ми: ꙗ҆́кѡ да и҆ а҆́зъ благода́рнѡ сла́влю тѧ̀, бг҃ороди́тельнице марі́е, поми́лꙋй ста́до твоѐ, є҆́же стѧжа́ла є҆сѝ, всенепоро́чнаѧ.

Крⷭ҇тобг҃оро́диченъ:

И҆́же ѿ крове́й твои́хъ чⷭ҇тыхъ вопло́щшагосѧ, и҆ па́че ᲂу҆ма̀ и҆зъ тебє̀, чⷭ҇таѧ, роди́вшагосѧ, на дре́вѣ ви́сѧща средѝ ѕлодѣ́євъ зрѧ́щи, ᲂу҆тро́бою болѣ́зновала є҆сѝ, и҆ мт҃рски пла́чꙋщи вопїѧ́ла є҆сѝ: ᲂу҆вы̀ мнѣ̀, ча́до моѐ, что̀ бжⷭ҇твенное и҆ неизрече́нное строе́нїе твоѐ, и҆́мже ѡ҆живи́лъ є҆сѝ созда́нїе твоѐ; воспѣва́ю твоѐ бл҃гоꙋтро́бїе.

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Чи́стаѧ ѻ҆би́тель ꙗ҆ви́лсѧ є҆сѝ ст҃ы́ѧ трⷪ҇цы, прпⷣбне, и҆ хра́ма бжⷭ҇твеннагѡ сокро́вище, и҆ і҆ера́рхѡвъ нача́токъ.

Мно́гое милосе́рдїе твоѐ гдⷭ҇ь внима́ѧ благосе́рдый, дꙋ́шꙋ твою̀ ѡ҆свѧтѝ, і҆ѡа́нне, ѻ҆́ч҃е свѧще́ннѣйше.

За́повѣдей непосты́денъ бы́лъ є҆сѝ дѣ́латель всеще́драгѡ, и҆ и҆спо́лнилсѧ є҆сѝ благи́хъ є҆гѡ̀, въ се́лѣхъ ст҃ы́хъ водворѧ́ѧсѧ.

Бг҃оро́диченъ:

Ѡ҆чище́нїе на́шихъ да́рꙋй невѣ́дѣнїй, ꙗ҆́кѡ безгрѣ́шенъ, и҆ ᲂу҆мирѝ мі́ръ тво́й, бж҃е, моли́твами ро́ждшїѧ тѧ̀.

И҆́нъ. І҆рмо́съ то́йже.

Возведѝ, всемꙋ́дре, ѿ страсте́й мѧ̀ плѣне́нїѧ, ꙗ҆́кѡ и҆збавле́нїе и҆ цѣ́нꙋ бг҃ꙋ приносѧ̀ моли̑твы твоѧ̑.

Свѧще́ннѡ вчини́ти є҆́же ѡ҆ хрⷭ҇тѣ̀ мꙋ́дрости догма́ты, и҆скꙋси́въ поще́нїемъ себѐ, всебл҃же́нне, пред̾ѡчи́стилъ є҆сѝ.

Помышле́нїй всѧ́кое возвыше́нїе, ѻ҆́ч҃е, взима́ющеесѧ смири́лъ є҆сѝ, мно́жествомъ мꙋ́дрости твоеѧ̀ погꙋби́въ си́хъ па́мѧть.

Бг҃оро́диченъ:

Ѻ҆ц҃ꙋ̀ соприсносꙋ́щный, и҆ ꙗ҆́кѡ бг҃ъ сло́во пре́жде безпло́тное, въ послѣ̑днѧѧ воплоти́сѧ ѿ чⷭ҇тыхъ крове́й твои́хъ, всепѣ́таѧ.

Пѣ́снь є҃. І҆рмо́съ:

Ѿ но́щи невѣ́дѣнїѧ, по дꙋшелови́тельномꙋ пꙋтѝ при́снѡ блꙋдѧ́щаго, свѣ́томъ ра́зꙋма твоегѡ̀, гдⷭ҇и, преднаставлѧ́ѧ мѧ̀, на стезю̀ за́повѣдей твои́хъ напра́ви.

Оу҆мертви́вшемꙋсѧ за ми́лость ме́ртвостїю во́льною, ѻ҆́ч҃е мꙋ́дре, подо́бѧсѧ, распѧ́лсѧ є҆сѝ мі́рꙋ и҆ страсте́мъ. и҆ жи́зни премі́рныѧ сподо́билсѧ є҆сѝ, достосла́вне.

Бл҃же́нства ᲂу҆досто́илсѧ є҆сѝ, кро́токъ, сострада́тельнѣйшїй, и҆ мири́теленъ бы́въ, и҆ а҆́лчꙋщихъ хлѣ́бъ неижди́вный, и҆ ни́щымъ пода́тель, ѡ҆дѣѧ́нїе же наготствꙋ́ющымъ.

Бжⷭ҇твенными причаще́ньми, ѻ҆́ч҃е, ᲂу҆добрѧ́емь, ꙗ҆́коже а҆́гг҃лъ бг҃ꙋ непоро́чнѡ свѧще́нствовалъ є҆сѝ, вѣ̑рныѧ просвѣща́ѧ свѧще́нными ᲂу҆чє́нїи твои́ми.

Бг҃оро́диченъ:

Всѣ́хъ бг҃а безъ сѣ́мене въ свои́хъ ложесна́хъ поне́сшꙋю, плотоно́сца же на́мъ ро́ждшꙋю, пречⷭ҇тꙋю бцⷣꙋ воспѣва́емъ, ꙗ҆́кѡ спасе́нїе дꙋ́шъ на́шихъ.

И҆́нъ. І҆рмо́съ:

Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Цѣломꙋ́дреннѡ жела́ѧ, всемꙋ́дре, бжⷭ҇твенныѧ чистоты̀, ѡ҆ста́вилъ є҆сѝ всѐ житїѧ̀ пристра́стїе.

Разꙋ̑мнаѧ ты̀ вы́ше зна́нїѧ, бг҃оѧвле́нне, мы́сленнѡ пости́глъ є҆сѝ, є҆дине́нїемъ бжⷭ҇твеннымъ наꙋча́емь.

Ѻ҆́блакъ тѧ̀, тꙋ́чами зна́нїѧ, бг҃оно́сне, всѐ потоплѧ́ющїй неразꙋ́мїе, вѣ́мы.

Бг҃оро́диченъ:

Ꙗ҆́кѡ крі́нъ сїѧ́ющїй посредѣ̀ те́рнїѧ, ѡ҆брѣ́тъ жени́хъ тѧ̀, дв҃ома́ти, возлюбѝ.

Пѣ́снь ѕ҃. І҆рмо́съ:

Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Моли́твами и҆ посто́мъ ᲂу҆пражнѧ́ѧсѧ, и҆ бдѣ́ннѡ бг҃а молѧ̀, ѿкрове́нїй и҆ зрѣ́нїй бжⷭ҇твенныхъ сподо́билсѧ є҆сѝ, бг҃омꙋ́дре всебога́те, наꙋча́емь сꙋ́щымъ па́че ᲂу҆ма̀ и҆ по́мысла, мꙋ́дре, чистото́ю.

Ꙗ҆́кѡ а҆́гг҃лъ съ пло́тїю на землѝ, ѻ҆́ч҃е, пожи́лъ є҆сѝ, жє́ртвы ми̑рныѧ, безкрѡ́вныѧ вѣ́рою и҆ сокрꙋше́ннымъ се́рдцемъ и҆ дꙋ́хомъ, бл҃же́нне, творцꙋ̀ приносѧ̀, і҆ѡа́нне, ра́достнѡ.

Житїѐ твоѐ па́че со́лнца возсїѧ́вшее, милосе́рдїѧ и҆спꙋстѝ лꙋчы̀ тре́бꙋющымъ, ѿгонѧ́щыѧ те́мный ѻ҆́блакъ нищеты̀, всебога́те, грѣ́ющыѧ же мра́зомъ лю́тыхъ держи̑мыѧ, бг҃одохнове́нне.

Бг҃оро́диченъ:

Не преста́й ѡ҆ на́съ молѧ́щисѧ, прест҃а́ѧ бцⷣе дв҃о, ꙗ҆́кѡ вѣ́рныхъ ᲂу҆твержде́нїе ты̀ є҆сѝ. и҆ наде́ждею твое́ю крѣпи́мсѧ, и҆ любо́вїю тѧ̀, и҆ и҆зъ тебє̀ вопло́щшагосѧ непреста́ннѡ сла́вимъ.

И҆́нъ. І҆рмо́съ то́йже:

Мꙋ́дрости да́ромъ ᲂу҆краша́емь, и҆ житїѧ̀ свѣ́тлостїю ᲂу҆добрѧ́емь, свѧщеннодѣ́латель бжⷭ҇твенный бы́лъ є҆сѝ, зижди́телю хода́тайствꙋѧ и҆ зда́нїю, и҆ бы́лъ є҆сѝ пресвѣ́телъ и҆ ѡ҆бзо́рный, ѻ҆́ч҃е, ᲂу҆чи́тель.

Къ горѣ̀ добродѣ́телей прибли́живсѧ, и҆ бжⷭ҇твеннымъ покры́всѧ, ѻ҆́ч҃е, мра́комъ, ѿ бг҃а догма́тѡвъ скрижа̑ли бг҃опи̑санныѧ прїѧ́лъ є҆сѝ, всебога́те, и҆ вторы́й на́мъ мѡѷсе́й законополо́жникъ показа́лсѧ є҆сѝ бл҃года́ти.

Ѡ҆свѧти́въ себѐ во́лею та́инственнѡ, ꙗ҆́кѡ вольноже́ртвеннꙋю же́ртвꙋ, предстоѧ́нїемъ зижди́телю, ні́ле, и҆ видѣ̑нїи и҆ дѣѧ̑нїи ᲂу҆краша́емь, помина́й ѡ҆ на́съ, вѣ́рнѡ соверша́ющихъ па́мѧть твою̀.

Бг҃оро́диченъ:

Ви́дѣвше ѻ҆бра́зными ꙗ҆влє́нїи стра́шныхъ твои́хъ та̑инъ глꙋбинꙋ̀, ꙗ҆́кѡ бг҃ꙋ во чре́во твоѐ всели́тисѧ, бг҃оглаго́ливїи прⷪ҇ро́цы провозвѣсти́ша, всенепоро́чнаѧ, и҆ ны́нѣ мы̀ сбы́тїе ви́дѧще, сла́вимъ.

Конда́къ, гла́съ в҃. Подо́бенъ: Вы́шнихъ и҆щѧ̀:

Бога́тство твоѐ расточи́лъ є҆сѝ ᲂу҆бѡ́гимъ, и҆ нбⷭ҇ное бога́тство ны́нѣ воспрїѧ́лъ є҆сѝ, і҆ѡа́нне всемꙋ́дре. сегѡ̀ ра́ди вси́ тѧ почита́емъ, соверша́юще па́мѧть твою̀, ми́лостыни ѽ тезоимени́те!

І҆́косъ:

На ми́лость ᲂу҆пова́въ бж҃їю, і҆ѡа́нне, щедро́тами ѿ тогѡ̀ и҆ дармѝ ѡ҆богати́всѧ, ѿѻнꙋ́дꙋже ꙗ҆ви́лсѧ є҆сѝ и҆ ми́лостивъ, ꙗ҆́кѡ ѻ҆́нъ, всѧ̑ ᲂу҆щедрѧ́ѧ. тѣ́мже, мою̀ нищетꙋ̀ ᲂу҆ще́дривъ, пода́ждь мнѣ̀ бога́тство твоеѧ̀ моли́твы. и҆ а҆́лчꙋщее се́рдце моѐ и҆спо́лни глагѡ́лъ бжⷭ҇твенныхъ, бг҃омꙋ́дре, ꙗ҆́коже пре́жде а҆́лчꙋщыѧ пита́лъ є҆сѝ, ми́лостыни ѽ тезоимени́те!

Пѣ́снь з҃. І҆рмо́съ:

Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Дѣ́лы словеса̀ сп҃сѡва и҆звѣсти́лъ є҆сѝ, и҆ ᲂу҆блажа́емыхъ сочта́лсѧ є҆сѝ ли́кꙋ, ми́лостивъ бы́въ и҆ чи́стъ дꙋ́хомъ, і҆ѡа́нне бг҃оно́се.

Ме́да вкꙋ́съ сладча́йшїй преложи́сѧ во и҆скꙋше́но зла́то тебѣ̀: бога́тномꙋ бо твоемꙋ̀ внима́ѧ произволе́нїю творе́цъ, бога̑тнаѧ тебѣ̀ дадѐ воздаѧ̑нїѧ.

Свѣ́томъ трⷪ҇цы невече́рнимъ просвѣща́емь, ᲂу҆го́дниче трⷪ҇цы, чтꙋ́щыѧ тѧ̀ ны́нѣ просвѣща́еши, и҆ пою́щыѧ: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ:

Тѧ̀ ра́дость а҆пⷭ҇лѡвъ, страстоте́рпцєвъ же сла́вꙋ, бцⷣе, мо́лимъ вѣ́рнѡ: ра́дости вѣ́чныѧ сподо́би ны̀, пою́щыѧ тѧ̀ непреста́ннѡ.

И҆́нъ. І҆рмо́съ:

Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Напаѧ́емь, ѻ҆́ч҃е, тꙋ́чами небе́сными, ꙗ҆ви́лсѧ є҆сѝ многопло́денъ, плоды̀ краснѣ́йшыѧ приносѧ̀ влⷣцѣ, вѣ́рою зовꙋ́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.

Тво́й всебл҃же́нне, ѧ҆зы́къ хлѧ́би догма́тѡвъ разве́рзъ, є҆реті́ческꙋю ле́сть крѣ́пкѡ потоплѧ́етъ, вѣ̑рныѧ же наꙋча́етъ пѣ́ти: ѻ҆тє́цъ на́шихъ бж҃е, бл҃гослове́нъ є҆сѝ.

Жи́тельство а҆́гг҃льское въ тѣлесѝ, ѻ҆́ч҃е, на землѝ пожи́лъ є҆сѝ: и҆ бжⷭ҇твенныхъ видѣ́нїй го́рнихъ позо́рищъ наслажда́ѧсѧ, и҆ пое́ши: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ:

Ѿ ᲂу҆тро́бы дѣ́вственныѧ вопло́щсѧ, ꙗ҆ви́лсѧ є҆сѝ въ на́ше спасе́нїе. тѣ́мъ, тѧ̀ мт҃рь вѣ́дꙋще бцⷣꙋ, благода́рственнѡ зове́мъ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Побѣди́тели мꙋчи́телѧ и҆ пла́мене благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.

Свѣтоза́рнꙋю ѕвѣздꙋ̀ хрⷭ҇то́съ: на высотѣ̀ тѧ̀ цр҃ко́внѣй ꙗ҆ви́въ, ѻ҆́ч҃е, чрезъ тебѐ пою́щыѧ вѣ́рою просвѣща́етъ: бл҃гослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Ми́лостивъ ꙗ҆ви́лсѧ є҆сѝ, кро́токъ, благосострада́тельнѣйшъ, неѕло́бивъ, ѻ҆́ч҃е, бога́тство ни́щихъ, ᲂу҆́тварь и҆ ѡ҆дѣѧ́нїе наги́хъ, поѧ̀ вѣ́рнѡ: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Ма́рковъ престо́лъ свѧще́ннѡ ᲂу҆краси́лъ є҆сѝ дѣ́лы бжⷭ҇твенными и҆зрѧ́днѡ, ѻ҆́ч҃е: ми́лостынею же и҆ милосе́рдїемъ па́че всѣ́хъ наре́клсѧ є҆сѝ ми́лостивъ, милосе́рдїемъ возсїѧ́вшихъ ст҃ы́хъ.

Бг҃оро́диченъ:

А҆да́ма, дв҃о, па́дшагѡ, ᲂу҆́бѡ ꙗ҆ви́ласѧ є҆сѝ дщѝ, бг҃а же мт҃и, ѡ҆бно́вльшагѡ моѐ сꙋщество̀. є҆го́же пои́мъ всѧ̑ дѣла̀ гдⷭ҇а, и҆ превозно́симъ во всѧ̑ вѣ́ки.

И҆́нъ. І҆рмо́съ:

Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѻ҆́бразꙋ къ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ и҆ славосло́влѧхꙋ во всѧ̑ вѣ́ки.

Добродѣ́тель воспрїи́мъ соверше́ннꙋ, благи́хъ пе́рвое возлюби́въ, и҆ тогѡ̀ ны́нѣ блиста́ньми просвѣща́емь, зове́ши: гдⷭ҇а по́йте и҆ превозноси́те є҆го̀ во вѣ́ки.

Вѣ́дѣтельнымъ ѡ҆богати́всѧ и҆скꙋ́сствомъ, дѣ́тельное пости́глъ є҆сѝ благосла́вїе, благода́ти зари̑ посыла́ѧ вопїю́щымъ: гдⷭ҇а по́йте и҆ превозноси́те є҆го̀ во вѣ́ки.

Мїрски́хъ мѡ́лвъ ѿбѣжа́въ, молча́нїѧ приста́нище дости́глъ є҆сѝ, и҆ страсте́й прило́ги ᲂу҆мертви́лъ є҆сѝ, зовы́й: гдⷭ҇а по́йте и҆ превозноси́те є҆го̀ во вѣ́ки.

Бг҃оро́диченъ:

И҆звѣ́стнѡ вѣ́дѧще, дв҃о, ро́ждшагосѧ и҆зъ тебє̀ бг҃а сло́ва, пое́мъ тѧ̀ всеблагоче́стнѡ вѣ́рою, пѣснопою́ще: гдⷭ҇а по́йте и҆ превозноси́те є҆го̀ во вѣ́ки.

Пѣ́снь ѳ҃. І҆рмо́съ:

Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.

Се́ тѧ по сконча́нїи сре́днѧго спрїе́млетъ дво́ица ст҃ы́хъ ѻ҆тцє́въ, въ гро́бѣ свѧще́ннѣйшꙋю че́сть тебѣ̀, ѻ҆́ч҃е, даю́щи.

Ꙗ҆́кѡ ᲂу҆́тро, ꙗ҆́кѡ де́нь, ѻ҆́ч҃е і҆ѡа́нне, свѣтоза́рное твоѐ возсїѧ̀ ᲂу҆спе́нїе, просвѣща́ющее вѣ́рою тѧ̀ блажа́щыѧ.

Совокꙋпи́лсѧ є҆сѝ ликѡ́мъ а҆рхїере́євъ, прⷪ҇ро́кѡвъ, а҆по́столѡвъ и҆ мч҃никѡвъ: съ ни́миже помина́й, ѻ҆́ч҃е, восхвалѧ́ющыѧ тѧ̀.

Ра́ка, и҆дѣ́же лежа́тъ, ѻ҆́ч҃е і҆ѡа́нне, свѧщє́нныѧ твоѧ̑ и҆ ст҃ы̑ѧ мо́щи, и҆сто́чникъ чꙋде́съ сꙋ́ть къ тебѣ̀ приходѧ́щымъ.

Бг҃оро́диченъ:

Благолѣ́пнаѧ дв҃о, ѡ҆ѕло́бленнꙋю дꙋ́шꙋ мою̀ грѣхо́мъ, ᲂу҆благостѝ, бл҃га́го ро́ждшаѧ бг҃а и҆ гдⷭ҇а.

И҆́нъ. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Расто́ргша пристра́стїѧ мїрска́гѡ ᲂу҆́зы, и҆ бг҃ꙋ приближа́ющасѧ тѧ̀ зрѧ̀, ѻ҆́ч҃е, гꙋби́тель, ва̑рварскаѧ треволнє́нїѧ тебѣ̀ воздви́же, разсла́бити твою̀ мнѣ́въ крѣ́пость: бж҃е́ственнымъ же про́мысломъ тогѡ̀ ѿрази́лъ є҆сѝ кознодѣ̑йства, всебл҃же́нне.

Бога́тными сїѧ́ѧ зарѧ́ми ᲂу҆че́нїй многоѻбра́зными, ѡ҆свѣти́лъ є҆сѝ благоче́стїѧ вѣ́рою приходѧ́щихъ тебѣ̀ дꙋ́шы: и҆́бо ча́ши, всемꙋ́дре ні́ле, мꙋ́дрости чи́стѣй ᲂу҆стнѣ̀ прикоснꙋ́въ, поче́рплъ є҆сѝ ѻ҆би́льнѡ, и҆ лю́бѧщымъ препода́лъ є҆сѝ.

Ѡ҆свѧти́лъ є҆сѝ ᲂу҆се́рднѡ себѐ, ѻ҆́ч҃е, та́инственнѡ, ꙗ҆́кѡ непоро́чное заколе́нїе зижди́телю, того̀ возлюби́въ и҆́скреннѡ: є҆гѡ́же ны́нѣ прⷭ҇то́лꙋ, всебл҃же́нне ні́ле, предстоѧ̀, прилѣ́жнѡ моли́сѧ, вѣ́рою соверша́ющымъ твою̀ па́мѧть полꙋчи́ти твоеѧ̀ свѣ́тлости.

Бг҃оро́диченъ:

И҆спра́вила є҆сѝ, дв҃о, же́нское поползнове́нїе, сло́ва ро́ждши, и҆справлѧ́юща низве́ржєнныѧ, ꙗ҆́кѡ бл҃га и҆ держа́вна, си́лою, за бл҃гоꙋтро́бїѧ превозмо́гъ и҆зъ тебє̀ вопло́щшасѧ, и҆ спа́сша мі́ръ страстоꙋбі́йственными свои́ми стрⷭ҇тьмѝ.

Свѣти́ленъ. Подо́бенъ: Жєны̀ ᲂу҆слы́шите:

Ми́лость подража́ѧ бг҃а любоще́драгѡ, тре́бꙋющымъ бога́тство расточи́лъ є҆сѝ, і҆ѡа́нне: тѣ́мъ и҆ бога́тство прїѧ́лъ є҆сѝ на нб҃сѣ́хъ неистощи́мое. тогѡ̀ ра́ди ны́нѣ мо́лимсѧ, моли́сѧ непреста́ннѡ ѡ҆ хва́лѧщихъ тѧ̀.

Сла́ва, прпⷣбнагѡ. Подо́бенъ: Не́бо ѕвѣзда́ми:

А҆́гг҃льское житїѐ жела́ѧ, ᲂу҆дали́лъ є҆сѝ себѐ въ пꙋсты́ню: и҆ стра̑сти покори́въ плотскі̑ѧ, равноа́гг҃ленъ ꙗ҆ви́лсѧ є҆сѝ: ѻ҆́ч҃е на́шъ бг҃оно́се.

Бг҃оро́диченъ:

И҆́же ѿ бг҃а мі́рꙋ да́нныхъ бла̑гъ, ты̀ вина̀ є҆сѝ, бцⷣе: но и҆ ны́нѣ ми́лостива сотворѝ за ѻ҆́бщее спасе́нїе, благоꙋвѣ́тливаго бг҃а.

На стїхо́внѣ ѻ҆ктѡ́иха. Сла́ва, гла́съ ѕ҃:

Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ, тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ: де́мѡнѡвъ погꙋби́лъ є҆сѝ полкѝ, и҆ а҆́гг҃лѡвъ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:

Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное, є҆́же ви́жꙋ, та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;

На лїтꙋргі́и: бл҃жє́нна ѻ҆ктѡ́иха, на д҃. И҆ ст҃и́телѧ пѣ́снь г҃-ѧ, на д҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ ко є҆вре́ємъ, зача́ло та҃і. А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости: Сті́хъ: Зако́нъ бг҃а є҆гѡ̀ въ се́рдцѣ є҆гѡ̀. Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю бꙋ́детъ првⷣникъ: