Мѣ́сѧца тогѡ́же въ к҃є-й де́нь.

И҆̀же во ст҃ы́хъ, ѻ҆тє́цъ на́шихъ и҆ свѧщенномꙋ́чєникъ, кли́мента, па́пы ри́мскагѡ, и҆ петра̀ а҆леѯандрі́йскагѡ.

[Зрѝ] Въ се́й де́нь ѿдае́тсѧ пра́здникъ Вхо́да прест҃ы́ѧ бцⷣы.

На Гдⷭ҇и, воззва́хъ, стїхи̑ры пра́здника, гла́съ а҃. Подо́бенъ: Ѽ ди́внагѡ чꙋдесѐ!

Дне́сь вѣ́рнїи ликовствꙋ́имъ, во ѱалмѣ́хъ и҆ пѣ́снехъ гдⷭ҇еви пою́ще, и҆ чтꙋ́ще тогѡ̀ свѧще́ннꙋю сѣ́нь, ѡ҆дꙋшевле́нный кївѡ́тъ, невмѣсти́мое сло́во вмѣсти́вшꙋю: приво́дитсѧ бо гдⷭ҇еви, па́че є҆стества̀ пло́тїю младе́нствꙋющи, и҆ ст҃и́тель вели́кїй заха́рїа прїе́млетъ съ весе́лїемъ сїю̀, ꙗ҆́кѡ бж҃їе жили́ще.

Дне́сь хра́мъ ѡ҆дꙋшевле́нный ст҃ы́ѧ сла́вы, хрⷭ҇та̀ бг҃а на́шегѡ, є҆ди́на въ жена́хъ бл҃гослове́ннаѧ чⷭ҇таѧ, приво́дитсѧ въ хра́мъ зако́нный, жи́ти во ст҃ы́хъ: и҆ ра́дꙋютсѧ съ не́ю і҆ѡакі́мъ и҆ а҆́нна дꙋ́хомъ: и҆ дѣ́вственнїи ли́цы гдⷭ҇еви пою́тъ, ѱало́мски воспѣва́юще, и҆ чтꙋ́ще мт҃рь є҆гѡ̀.

Ты̀ прⷪ҇ро́кѡвъ проповѣ́данїе, а҆пⷭ҇лѡвъ сла́ва, и҆ мꙋ́ченикѡвъ похвала̀, и҆ всѣ́хъ земноро́дныхъ ѡ҆бновле́нїе, дв҃о мт҃и бж҃їѧ: тобо́ю бо бг҃ꙋ примири́хомсѧ. тѣ́мже чти́мъ твоѐ въ хра́мъ гдⷭ҇ень вхожде́нїе: и҆ со а҆́гг҃ломъ всѝ пѣ́сненнѡ, ра́дꙋйсѧ, тебѣ̀, пречⷭ҇таѧ, вопїе́мъ, твои́ми моли́твами спаса́емїи.

И҆́ны стїхи̑ры, ст҃а́гѡ кли́мента, гла́съ в҃. Поⷣ: Є҆гда̀ ѿ дре́ва:

Розга̀ лозы̀ жи́зненныѧ бы́въ, ѻ҆́ч҃е і҆ера́рше, кра̑сныѧ и҆зне́слъ є҆сѝ гро́зды дх҃омъ догма́тѡвъ, всемꙋ́дре, ка́плющыѧ всегда̀ спаси́тельное вїно̀ бжⷭ҇твеннагѡ позна́нїѧ, и҆ веселѧ́щыѧ всѣ́хъ благочести́выхъ сердца̀, и҆́стиннѡ тѧ̀ чтꙋ́щихъ, кли́менте бг҃оно́сне всеблаже́нне.

Петра̀ верхо́внагѡ ᲂу҆ч҃ни́къ, ѻ҆́ч҃е, бы́въ, на ка́мени тогѡ̀ созда́лъ є҆сѝ ꙗ҆́кѡ ка́мень честны́й тебѐ сама́го, всехва́льне, тве́рдостїю слове́съ твои́хъ всѐ разврати́лъ є҆сѝ зда́нїе многобо́жное, хра́мы же воздви́глъ є҆сѝ бжⷭ҇твєнныѧ въ че́сть трⷪ҇цы, ѡ҆ не́йже подвиза́лсѧ є҆сѝ, блаже́нне, и҆ мꙋче́нїѧ вѣне́цъ прїѧ́лъ є҆сѝ.

Ꙗ҆́коже свѣтода́тельное со́лнце ѿ за́падѡвъ возсїѧ́лъ є҆сѝ, ѻ҆́ч҃е, просвѣща́ѧ зе́млю заре́ю догма́тѡвъ твои́хъ и҆ ра́нами свѣ́тлѡ, пости́глъ же є҆сѝ страны̑ востѡ́чныѧ, требл҃же́нне, заше́лъ є҆сѝ ᲂу҆мерщвлѧ́емь, и҆ возсїѧ́лъ є҆сѝ, кли́менте, ко хрⷭ҇тꙋ̀, и҆ та́мѡ сꙋ́щими лꙋча́ми бога́тнѡ, непреста́ннѡ по бжⷭ҇твенномꙋ причаще́нїю просвѣща́емь.

Сла́ва, и҆ ны́нѣ, гла́съ и҃:

По ржⷭ҇твѣ̀ твое́мъ, бг҃оневѣ́сто влⷣчце, пришла̀ є҆сѝ въ хра́мъ гдⷭ҇ень воспита́тисѧ во ст҃а̑ѧ ст҃ы́хъ, ꙗ҆́кѡ ѡ҆свѧще́нна: тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй, пи́щꙋ тебѣ̀ приносѧ̀: нбⷭ҇наѧ всѧ̑ ᲂу҆диви́шасѧ, зрѧ́ще дх҃а ст҃а́го въ тѧ̀ все́льшасѧ. тѣ́мже, пречⷭ҇таѧ и҆ нескве́рнаѧ, ꙗ҆́же на нб҃сѝ и҆ на землѝ сла́вима, мт҃и бж҃їѧ, спасѝ ро́дъ на́шъ.

На стїхо́внѣ стїхи̑ры пра́здника, гла́съ є҃. Подо́бенъ: Ра́дꙋйсѧ:

Ра́дꙋйсѧ нб҃о и҆ землѧ̀, нб҃о ᲂу҆́мное грѧдꙋ́щее зрѧ́ще, въ бжⷭ҇твенный до́мъ воспита́тисѧ че́стнѡ, дв҃ꙋ є҆ди́нꙋ и҆ непоро́чнꙋю. къ не́йже дивѧ́сѧ заха́рїа вопїѧ́ше: две́ре гдⷭ҇нѧ, хра́ма ѿверза́ю тебѣ̀ двє́ри, ра́дꙋющисѧ въ не́мъ ликовствꙋ́й: позна́хъ бо и҆ вѣ́ровахъ, ꙗ҆́кѡ ᲂу҆жѐ и҆збавле́нїе прїи́детъ проѧвле́ннѡ і҆и҃лево, и҆ роди́тсѧ и҆зъ тебє̀ бг҃ъ сло́во, да́рꙋѧй мі́рови ве́лїю ми́лость.

Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆ и҆́скреннїѧ є҆ѧ̀ приведꙋ́тсѧ тебѣ̀.

А҆́нна, бжⷭ҇твеннаѧ благода́ть ꙗ҆́вѣ, ѿ бл҃года́ти да́ннꙋю чⷭ҇тꙋю приснодв҃ꙋ приво́дитъ съ весе́лїемъ въ хра́мъ бж҃їй, призва́вши и҆тѝ предъ не́ю ѻ҆трокови́цамъ, свѣщы̀ носѧ́щымъ, и҆ глаго́лющи: пойдѝ, ча́до, да́вшемꙋ тѧ̀ бꙋ́ди возложе́нїе, и҆ благово́нный ѳѷмїа́мъ. вни́ди въ незаходи̑маѧ, и҆ ᲂу҆вѣ́ждь та̑йны: и҆ ᲂу҆гото́висѧ бы́ти і҆и҃сово вмѣсти́лище весе́лое и҆ кра́сное, подаю́щагѡ мі́рꙋ ве́лїю ми́лость.

Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.

Внꙋ́трь въ хра́мъ бж҃їй, бг҃овмѣсти́мый хра́мъ возлага́етсѧ дв҃а всест҃а́ѧ, и҆ ѻ҆трокови̑цы є҆́й ны́нѣ свѣщы̀ носѧ́ще предхо́дѧтъ: и҆гра́етъ роди́телей сопрѧже́нїе и҆зрѧ́дное, і҆ѡакі́мъ же и҆ а҆́нна ликовствꙋ́юще, ꙗ҆́кѡ роди́ша творца̀ ро́ждшꙋю, ꙗ҆́же ликовствꙋ́ющи въ бжⷭ҇твенныхъ ски́нїихъ, и҆ пита́ема рꙋко́ю а҆́гг҃ловою, всенепоро́чнаѧ хрⷭ҇та̀ ꙗ҆ви́сѧ мт҃и, подаю́щагѡ мі́рꙋ ве́лїю ми́лость.

Сла́ва, и҆ ны́нѣ, гла́съ ѕ҃:

Дне́сь, собо́ри вѣ́рныхъ, соше́дшесѧ, дꙋхо́внѣ да торжествꙋ́имъ, и҆ бг҃оѻтрокови́цꙋ, дв҃ꙋ и҆ бцⷣꙋ, въ хра́мъ гдⷭ҇ень приводи́мꙋ, благоче́стнѡ восхва́лимъ, пред̾избра́ннꙋ ѿ всѣ́хъ родѡ́въ, во ѡ҆би́телище всѣ́хъ цр҃ѧ̀ хрⷭ҇та̀ и҆ бг҃а: дѣ̑вы, свѣщы̀ носѧ́ще, пред̾иди́те, приснодв҃ы, чтꙋ́ще честно́е происхожде́нїе: ма́тєри, печа́ль всю̀ ѿложи́вше, ра́достнѡ спослѣ́дствꙋйте мт҃ри бг҃а быва́ющей, и҆ ра́дости мі́ра хода́таицѣ. всѝ ᲂу҆́бѡ ра́достнѡ, є҆́же ра́дꙋйсѧ, со а҆́гг҃ломъ возопїи́мъ ѡ҆бра́дованнѣй, при́снѡ молѧ́щейсѧ ѡ҆ дꙋша́хъ на́шихъ.

Тропа́рь, гла́съ д҃:

Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѡ҆ на́съ: по моли́твами и҆́хъ въ ми́рѣ ᲂу҆пра́ви живо́тъ на́шъ.

Сла́ва, и҆ ны́нѣ: Тропа́рь пра́здника. Дне́сь благоволе́нїѧ: Ли́стъ рп҃г на ѡ҆б:

[Зрѝ] Подоба́етъ вѣ́дати, ꙗ҆́кѡ а҆́ще слꙋчи́тсѧ ѿда́нїе пра́здника вхо́да прест҃ы́ѧ бцⷣы въ недѣ́лю, ѡ҆ставлѧ́етсѧ вослѣ́дованїе ст҃а́гѡ петра̀, и҆ пое́тсѧ, є҆гда̀ хо́щетъ є҆кклисїа́рхъ.

Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны и҆ бцⷣы по ѻ҆бы́чаю, тропа́рь воскрⷭ҇нъ, и҆ пра́здника.

На вели́цѣй вече́рни. По ѻ҆бы́чной каѳі́смѣ, на Гдⷭ҇и, воззва́хъ, стїхи̑ры воскрⷭ҇ны г҃, и҆ ꙾восто́ченъ꙾[[꙾А҆нато́лїевъ꙾]] є҆ди́нъ, и҆ пра́здника подо́бны г҃, гла́съ а҃: Дне́сь вѣ́рнїи: И҆ ст҃а́гѡ кли́мента подо́бны г҃. Сла́ва, пра́здника, гла́съ и҃: По ржⷭ҇твѣ̀ твое́мъ: И҆ ны́нѣ, бг҃оро́диченъ пе́рвый, настоѧ́щагѡ гла́са. Вхо́дъ. Прокі́менъ, днѐ. На лїті́и стїхи̑ры пра́здника. Сла́ва, и҆ ны́нѣ, пра́здника. На стїхо́внѣ стїхи̑ры воскрⷭ҇ны. Сла́ва, и҆ ны́нѣ, пра́здника. На бл҃гослове́нїи хлѣ́бѡвъ: Бцⷣе дв҃о: три́жды. А҆ и҆дѣ́же нѣ́сть всено́щнагѡ, глаго́лемъ тропа́рь воскрⷭ҇нъ.

Сла́ва, тропа́рь кли́мента, гла́съ д҃:

И҆́же ѿ бг҃а чꙋдодѣ́йствы пресла́внѡ ᲂу҆дивлѧ́ѧ вселе́нныѧ концы̀ мі́ра, свѧще́нный страда́льче, па́че є҆стества̀ мо́рю, соста́вы вода́мъ содѣва́еши раздѣле́нїе, въ честнѣ́й па́мѧти твое́й, всегда̀ притека́ющымъ ᲂу҆се́рднѡ въ бг҃озда́ннꙋю тѝ це́рковь, чꙋдє́снымъ твои̑мъ моще́мъ: и҆ по всенаро́дномъ хожде́нїи, мо́ре во є҆ди́но тече́нїе чꙋдодѣ́тельнѣ твори́ши, кли́менте преди́вный, молѝ хрⷭ҇та̀ бг҃а спасти́сѧ дꙋша́мъ на́шымъ.

И҆ ны́нѣ, пра́здника.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды. Сла́ва, кли́мента: И҆ ны́нѣ, пра́здника. По каѳі́смахъ сѣда́льны воскрⷭ҇ны съ бг҃орѡ́дичны и҆́хъ. Полѷеле́й, и҆ тропарѝ: А҆́гг҃льскїй собо́ръ: ѵ҆пакоѝ гла́са, и҆ степє́нна: прокі́менъ, и҆ є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: ѱало́мъ н҃. и҆ стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃: и҆ бцⷣы на в҃: и҆ пра́здника пе́рвагѡ на д҃: и҆ кли́мента на д҃.

Катава́сїа: Хрⷭ҇то́съ ражда́етсѧ:

По г҃ пѣ́сни конда́къ пра́здника, и҆ і҆́косъ.

И҆ конда́къ кли́мента, гла́съ в҃. Подо́бенъ: Твє́рдыѧ:

Бжⷭ҇твеннагѡ вїногра́да свѧщенноѡдѣ́ѧнна всѣ̑мъ лоза̀ ꙗ҆ви́сѧ, ка́плющи сла́дость премꙋ́дрости, моли́твами твои́ми, всече́стне, да тебѣ̀ и҆стка́нꙋ, ꙗ҆́кѡ багрѧни́цꙋ, пѣ́снь мы́сленнꙋю принесе́мъ, кли́менте свѧ́те: спасѝ рабы̑ твоѧ̑.

И҆ сѣда́ленъ ст҃а́гѡ: Сла́ва, и҆ ны́нѣ, пра́здника, По ѕ҃ пѣ́сни конда́къ воскрⷭ҇нъ, и҆ і҆́косъ. На ѳ҃ пѣ́сни стїхосло́вимъ, Честнѣ́йшꙋю: Свѣти́ленъ воскрⷭ҇нъ. Сла́ва ст҃а́гѡ: И҆ ны́нѣ, пра́здника. На хвали́техъ стїхи̑ры воскрⷭ҇ны д҃: и҆ пра́здника со сла́внымъ на д҃, съ припѣ̑вы пра́здничными: Сла́ва, стїхи́ра є҆ѵⷢ҇льскаѧ: И҆ ны́нѣ, Преблагослове́нна є҆сѝ: Славосло́вїе вели́кое. Тропа́рь воскрⷭ҇нъ то́чїю: є҆ктєнїѝ, и҆ ѿпꙋ́стъ, и҆ ча́съ а҃. На часѣ́хъ тропа́рь воскрⷭ҇нъ: Сла́ва, пра́здника, И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ пра́здника, и҆ воскрⷭ҇нъ, глаго́лемъ премѣнѧ́юще.

На лїтꙋргі́и: Блажє́нна гла́са на ѕ҃: и҆ пра́здника пѣ́снь ѳ҃ на д҃. По вхо́дѣ тропа́рь воскрⷭ҇нъ, и҆ пра́здника, и҆ ст҃а́гѡ. Та́же конда́къ воскрⷭ҇нъ: Сла́ва, ст҃а́гѡ: И҆ ны́нѣ пра́здника. Прокі́менъ, а҆пⷭ҇лъ, а҆ллилꙋ́їа, и҆ є҆ѵⷢ҇лїе гла́са и҆ пра́здника. Прича́стенъ: Хвали́те гдⷭ҇а: и҆ пра́здника.

На ᲂу҆́трени, на Бг҃ъ гдⷭ҇ь: тропа́рь пра́здника, два́жды. Сла́ва, ст҃ы́хъ: Бж҃е ѻ҆ц҃ъ на́шихъ: И҆ ны́нѣ, пра́здника,

По а҃-мъ стїхосло́вїи, сѣда́ленъ, гла́съ а҃. Поⷣ: Ли́къ а҆́гг҃льскїй:

Пра́ведныхъ пло́дъ і҆ѡакі́ма и҆ а҆́нны прино́ситсѧ бг҃ꙋ во ст҃и́лище ст҃о́е, пло́тїю младе́нствꙋющи, пита́тельница жи́зни на́шеѧ, ю҆́же благословѝ свѧще́нный заха́рїа: сїю̀ всѝ, ꙗ҆́кѡ мт҃рь бж҃їю, вѣ́рнѡ да ᲂу҆блажи́мъ.

Сла́ва, и҆ ны́нѣ, то́йже.

По в҃-мъ стїхосло́вїи, сѣда́ленъ, гла́съ д҃. Поⷣ: Оу҆диви́сѧ і҆ѡ́сифъ:

Пре́жде зача́тїѧ, чⷭ҇таѧ, ѡ҆свѧти́ласѧ є҆сѝ бг҃ꙋ, и҆ ро́ждшисѧ на землѝ, да́ръ принесла́сѧ є҆сѝ ны́нѣ є҆мꙋ̀, и҆сполнѧ́ющи ѻ҆те́ческое ѡ҆бѣща́нїе: въ бжⷭ҇твеннѣмъ же хра́мѣ, ꙗ҆́кѡ сꙋ́щѡ бжⷭ҇твенный хра́мъ, ѿ младе́нства чи́стѣ со свѣща́ми свѣ́тлыми ѿдана̀ бы́вши, ꙗ҆ви́ласѧ є҆сѝ прїѧ́телище непристꙋ́пнагѡ и҆ бжⷭ҇твеннагѡ свѣ́та. вели́ко вои́стиннꙋ предше́ствїе твоѐ, є҆ди́на бг҃оневѣ́сто и҆ приснодв҃о.

Сла́ва, и҆ ны́нѣ, то́йже.

Та́же канѡ́нъ пра́здника, со і҆рмосо́мъ на ѕ҃:

И҆ ст҃ы́хъ ѻ҆́ба канѡ́на, на и҃. Канѡ́нъ пра́здника, гла́съ а҃.

Пѣ́снь а҃. І҆рмо́съ:

Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.

Стеце́мсѧ дне́сь бцⷣꙋ почита́юще пѣ́сньми, и҆ торжествꙋ́имъ дꙋхо́вный пра́здникъ: въ хра́мъ бо бг҃ꙋ да́ръ прино́ситсѧ.

Пѣ́сньми да воспои́мъ бцⷣы сла́вное предше́ствїе: къ хра́мꙋ бо дне́сь, ꙗ҆́кѡ хра́мъ бж҃їй, прино́ситсѧ прⷪ҇ро́чески, да́ръ многоцѣ́нный.

Трⷪ҇ченъ:

Трⷪ҇це є҆диносꙋ́щнаѧ, ѻ҆́ч҃е, и҆ сло́ве, и҆ дш҃е ст҃ы́й, тѧ̀ вѣ́рнѡ сла́вимъ, ꙗ҆́кѡ творца̀ всѣ́хъ, и҆ тебѣ̀ вопїе́мъ благоче́стнѡ: спаси́ ны, бж҃е.

Ѿ ба́гра крове́й твои́хъ червлени́цею, пречⷭ҇таѧ, ѡ҆дѣ́ѧвсѧ, проше́дъ ѡ҆бновѝ цр҃ь и҆ бг҃ъ ро́дъ ве́сь человѣ́ческїй бл҃гоꙋтро́бїемъ свои́мъ.

И҆́нъ канѡ́нъ ст҃а́гѡ кли́мента. Творе́нїе ѳеофа́ново.

Гла́съ и҃. Пѣ́снь а҃. І҆рмо́съ:

Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Ѿ петра̀ бжⷭ҇твеннагѡ наꙋчи́всѧ, а҆пⷭ҇лѡвъ верхо́внагѡ, и҆ ѿ негѡ̀ навы́къ бжⷭ҇твенное зна́нїе, ѻ҆́ч҃е, і҆́дѡльскꙋю ле́сть ѡ҆бличи́лъ є҆сѝ.

Ло́зꙋ бг҃онасажде́нꙋ на землѝ, плоды̀ добродѣ́тєльныѧ ᲂу҆че́нїй всеблагочести́выхъ, хрⷭ҇то́съ тѧ̀ предлага́етъ, и҆́стиннѡ сꙋ́щїй цвѣтꙋ́щь вїногра́дъ.

Во всѧ̑ концы̀ протечѐ вои́стиннꙋ бжⷭ҇твенныхъ повелѣ́нїй твоѐ вѣща́нїе, кли́менте мꙋ́дре, и҆ всѧ̑ просвѣтѝ трⷪ҇цꙋ бг҃осло́вити, во є҆ди́нствѣ бж҃ества̀.

Бг҃оро́диченъ:

Сѐ проречє́нїѧ прⷪ҇ро́чєскаѧ ѡ҆ тебѣ̀ прїѧ́ша коне́цъ вои́стиннꙋ: сло́во бо безъ сѣ́мене заче́нши, бг҃ороди́тельнице, пло́тїю родила̀ є҆сѝ.

И҆́нъ канѡ́нъ ст҃а́гѡ петра̀, є҆гѡ́же краегране́сїе:

Восхвалѧ́ю трибога́таго петра̀. Творе́нїе ѳеофа́ново.

Гла́съ то́йже. Пѣ́снь а҃. І҆рмо́съ:

Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Во свѣтлѣ́йшихъ селе́нїихъ житїѐ и҆мѣ́ѧ, просвѣще́нїе мѝ пода́ждь, моли́твами твои́ми, пе́тре всеблаже́нне.

Зна́нїю наꙋче́нъ, и҆ свѧще́нствомъ ᲂу҆краша́емь, всеблаже́нне пе́тре, хрⷭ҇тꙋ̀ прине́слсѧ є҆сѝ кро́вїю.

Оу҆́тварь ᲂу҆пещре́ннаѧ, ꙗ҆́коже многоцѣ́нное возложе́нїе хрⷭ҇то́вѣ цр҃кви ѿ бг҃а дарова́лсѧ є҆сѝ, блаже́нне:

Бг҃оро́диченъ:

Пречⷭ҇таѧ бцⷣе, воплоще́нное, присносꙋ́щное и҆ пребжⷭ҇твенное сло́во па́че є҆стества̀ ро́ждшꙋю пое́мъ тѧ̀.

Катава́сїа: Хрⷭ҇то́съ ражда́етсѧ:

Пѣ́снь г҃. І҆рмо́съ:

Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.

Торжествꙋ́имъ празднолю́бцы, и҆ сра́дꙋимсѧ дꙋ́хомъ, во ст҃ѣ́мъ пра́здницѣ ᲂу҆чрежда́ющесѧ дне́сь, дще́ре цр҃е́вы, и҆ мт҃ре бг҃а на́шегѡ.

І҆ѡакі́ме, ра́дꙋйсѧ дне́сь, и҆ весели́сѧ, а҆́нно, дх҃омъ, рожде́ннꙋю и҆зъ ва́съ гдⷭ҇ꙋ приводѧ́ще трилѣ́тствꙋющꙋ, ꙗ҆́кѡ ю҆́ницꙋ чи́стꙋ всенепоро́чнꙋю.

Трⷪ҇ченъ:

Свѣ́тъ ѻ҆ц҃ъ, свѣ́тъ сн҃ъ є҆гѡ̀, свѣ́тъ дх҃ъ ᲂу҆тѣ́шительный: ꙗ҆́кѡ ѿ сл҃нца бо є҆ди́нагѡ трⷪ҇ца сїѧ́ющи, бжⷭ҇твеннѡ ѡ҆зарѧ́етъ, и҆ соблюда́етъ дꙋ́шы на́шѧ.

Тѧ̀ прⷪ҇ро́цы проповѣ́даша кївѡ́тъ, чⷭ҇таѧ, ст҃ы́ни, кади́льницꙋ златꙋ́ю, и҆ свѣ́щникъ, и҆ трапе́зꙋ, и҆ мы̀ ꙗ҆́кѡ бг҃овмѣсти́мꙋю ски́нїю воспѣва́емъ тѧ̀.

И҆́нъ. І҆рмо́съ:

Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Бога́тнѡ и҆злїѧ́сѧ дх҃а благода́ть въ твоѧ̑ ᲂу҆стна̀, мꙋ́дре, є҆́юже всѧ̑ просвѣти́лъ є҆сѝ, бжⷭ҇твенными твои́ми ᲂу҆чє́нїи, и҆ хрⷭ҇тꙋ̀ приве́лъ є҆сѝ.

Ѻ҆гне́мъ воздержа́нїѧ ты̀ попали́лъ є҆сѝ страсте́й ѻ҆гнепа̑льнаѧ стремлє́нїѧ, и҆ хра́мъ себѐ соверши́въ дх҃а бжⷭ҇твеннагѡ, доблемꙋ́дренне ѻ҆́ч҃е.

На го́рꙋ бжⷭ҇твенныхъ добродѣ́телей возше́дъ, и҆ мра́комъ покры́всѧ разꙋ́мнымъ, ᲂу҆зрѣ́лъ є҆сѝ неизрече́ннꙋю въ чи́стѣй дꙋшѝ твое́й дꙋхо́внꙋю зарю̀.

Бг҃оро́диченъ:

Неизрече́ннѡ зачала̀ є҆сѝ, пречⷭ҇таѧ, сп҃са и҆ гдⷭ҇а, и҆зба́вльшаго на́съ ѿ лю́тыхъ, тѧ̀ во и҆́стинѣ призыва́ющихъ.

И҆́нъ. І҆рмо́съ:

Нѣ́сть ст҃ъ, ꙗ҆́кѡ гдⷭ҇ь, и҆ нѣ́сть првⷣнъ, ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть првⷣнъ па́че тебє̀, гдⷭ҇и.

Возше́лъ є҆сѝ ѣ҆́здѧ ꙗ҆́кѡ на колесни́цѣ, твое́ю кро́вїю, премꙋ́дре, къ нбⷭ҇нымъ, и҆дѣ́же предте́ча на́шъ хрⷭ҇то́съ вни́де, є҆ди́нъ безгрѣ́шный.

Жи́знь тлѣ́ннꙋю ѡ҆ста́вилъ є҆сѝ, и҆ жи́знь безсме́ртнꙋю ѡ҆брѣ́лъ є҆сѝ, блаже́нне, и҆дѣ́же вѣнцено́сецъ ликꙋ́еши, молѧ̀ спасти́сѧ дꙋша́мъ на́шымъ.

Ꙗ҆́коже фі́нїѯъ процвѣ́лъ є҆сѝ благопло́днѣйшїй: ꙗ҆́кѡ ма́слина плодоро́дна ꙗ҆ви́лсѧ є҆сѝ, бг҃одохнове́нне, во дво́рѣхъ гдⷭ҇нихъ, ꙗ҆́кѡ смѵ́рна и҆ лїва́нъ, и҆ ꙗ҆́кѡ мѵ́ро бл҃гово́ннѣйшее.

Бг҃оро́диченъ:

Ꙗ҆́кѡ двє́ри спаси́тєльныѧ, и҆ ра́й кра́сный, свѣ́та присносꙋ́щнагѡ ѻ҆́блакъ, сꙋ́щꙋ ст҃ꙋ́ю дв҃ꙋ воспое́мъ всѝ, глаго́люще є҆́й: ра́дꙋйсѧ.

Конда́къ гла́съ д҃. Подо́бенъ: Ꙗ҆ви́лсѧ є҆сѝ дне́сь:

Цр҃кве недви́жимїи и҆ бжⷭ҇твеннїи пѵ́ргове, благоче́стїѧ бжⷭ҇твеннїи столпѝ, вои́стиннꙋ крѣ́пцыи, кли́менте съ петро́мъ всехва́льнїи, ва́шими моли́твами соблюди́те всѧ̑.

Сѣда́ленъ кли́мента, гла́съ и҆ подо́бенъ то́йже:

Возсїѧ́въ ꙗ҆́коже сл҃нца зарѧ̀, и҆ блиста́еши, прпⷣбне, всемꙋ̀ мі́рꙋ свѣ́тлѡ, ᲂу҆чє́нїи твои́ми, бг҃огла́се кли́менте свѣтоно́сне, мꙋ́ченикѡвъ похвало̀.

Сла́ва, петра̀, гла́съ и҃. Подо́бенъ: Премꙋ́дрости:

Ѿ вы́шнѧгѡ сꙋда̀ хрⷭ҇то́ва предста́тельствова ста́дꙋ, на па́житехъ благожи́зненныхъ ᲂу҆па́слъ є҆сѝ, всемꙋ́дрыми твои́ми догма̑ты, ѿгна́въ а҆́рїа ꙗ҆́кѡ во́лка некро́ткаго, вше́дшаго въ ни́хъ безбо́жными ᲂу҆чє́нїи. тѣ́мже и҆ дꙋ́шꙋ твою̀ положи́лъ є҆сѝ за ни́хъ, па́стырь наре́клсѧ є҆сѝ, ꙗ҆́кѡ речѐ гдⷭ҇ь: і҆ера́рше пе́тре блаже́нне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

И҆ ны́нѣ, пра́здника, гла́съ д҃. Подо́бенъ: Оу҆диви́сѧ і҆ѡ́сифъ:

Непоро́чнаѧ а҆́гница, и҆ нескве́рный черто́гъ, въ до́мъ бж҃їй бцⷣа марїа́мъ съ весе́лїемъ вво́дитсѧ пресла́внѡ, ю҆́же а҆́гг҃ли бж҃їи дорѷно́сѧтъ вѣ́рнѡ, и҆ всѝ вѣ́рнїи блажа́тъ при́снѡ, и҆ благода́рственнѡ пою́тъ є҆́й непреста́ннѡ ве́лїимъ гла́сомъ: на́ша сла́ва и҆ спасе́нїе ты̀ є҆сѝ, всенепоро́чнаѧ.

Пѣ́снь д҃. І҆рмо́съ:

Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.

Прⷪ҇ро́че и҆са́їе, прорцы̀ на́мъ: дв҃а кто̀ є҆́сть, и҆мꙋ́щаѧ во чре́вѣ; ꙗ҆́же и҆зъ і҆ꙋ́дина ко́рене прозѧ́бши, и҆ ро́ждшисѧ и҆зъ дв҃да царѧ̀, сѣ́мене ст҃а́гѡ, пло́дъ бл҃госла́вный.

Начина́йте, дѣ̑вы, и҆ воспо́йте пѣ̑сни, рꙋка́ми держа́ще свѣщы̀, чⷭ҇тыѧ бцⷣы предше́ствїе хва́лѧще, ны́нѣ грѧдꙋ́щыѧ во хра́мъ бж҃їй кꙋ́пнѡ съ на́ми пра́зднꙋюще.

Трⷪ҇ченъ:

Трⷪ҇цꙋ ли́цы, є҆ди́ницꙋ ѻ҆́бразомъ благоче́стнѡ сла́вимъ бг҃а и҆́стинна, є҆го́же пою́тъ а҆́гг҃льскаѧ и҆ а҆рха̑гг҃льскаѧ чинонача̑лїѧ, ꙗ҆́кѡ тва̑ри влⷣкꙋ, и҆ человѣ́цы вѣ́рнѡ покланѧ́ющесѧ при́снѡ.

Молѝ непреста́ннѡ, прест҃а́ѧ чⷭ҇таѧ, є҆го́же пло́тїю родила̀ є҆сѝ сн҃а твоего̀ и҆ бг҃а, ѿ многоѻбра́зныхъ сѣ́тей дїа́волихъ, и҆ ѿ всѧ́кихъ и҆скꙋше́нїй находѧ́щихъ, всѧ̑ и҆зба́вити рабы̑ твоѧ̑.

И҆́нъ. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Ѿ за́пада прише́дъ, бл҃же́нне, къ восто́кꙋ, петрꙋ̀ примѣси́лсѧ є҆сѝ а҆пⷭ҇лꙋ: и҆ тогѡ̀ бжⷭ҇твенными свѣтлостьмѝ, и҆ ᲂу҆чє́нїи просвѣща́емь, съ ни́мъ возвѣща́ѧ спаси́тельное сло́во, за́паднꙋю всю̀ проте́клъ є҆сѝ странꙋ̀.

Дрꙋгі́й мѡѷсе́й, кли́менте мꙋ́дре, бы́лъ є҆сѝ, зако́ны бжⷭ҇твєнныѧ всѣ̑мъ и҆злага́ѧ, и҆ свѧщє́ннаѧ пишѧ̀ ᲂу҆чє́нїѧ, и҆ цр҃ко́вное всѐ вчинѧ́еши и҆сполне́нїе. ѿсю́дꙋ законополо́жника тѧ̀ и҆ ᲂу҆чи́телѧ всѝ и҆мꙋ́ще, вѣ́рою чти́мъ.

По́стническими пѡ́ты ѡ҆чи́стивсѧ, свѧщеннонача́льникъ, блаже́нне, ꙗ҆ви́лсѧ є҆сѝ, къ благочести́вѣй вѣ́рѣ хрⷭ҇то́вѣй всѧ̑ возводѧ̀ бжⷭ҇твенными твои́ми сказа̑нїи: пострада́въ же зако́ннѡ, подо́бнѣ болѣ́зни сплетѐ вѣне́цъ, приснопа́мѧтне.

Бг҃оро́диченъ:

Съ бг҃омъ тѧ̀ застꙋ́пницꙋ стѧжа́хомъ: ты́ бо мт҃и бж҃їѧ была̀ є҆сѝ творца̀ и҆ содѣ́телѧ, на́шъ ѻ҆́бразъ прїе́мша, пренепоро́чнаѧ, и҆ того̀ спа́сша ѿ тлѝ и҆ сме́рти, и҆ сла́вою бжⷭ҇твенною просла́вльшагѡ.

И҆́нъ. І҆рмо́съ:

И҆зъ горы̀ приѡсѣне́нныѧ, сло́ве, проро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Добродѣ́телей ше́ствовавъ стезе́ю, ѻ҆́ч҃е, пости́глъ є҆сѝ ѻ҆би́тєли вы̑шнїѧ, бг҃оно́сне, свѧще́нства пома́занїемъ ᲂу҆кра́шенъ, и҆ мꙋче́нїѧ сїѧ́ѧ кро́вїю.

Тꙋ́чами пото́кѡвъ твои́хъ крове́й, бл҃же́нне, ᲂу҆гаси́лъ є҆сѝ пе́щь пре́лести, и҆ гонѧ́щихъ погꙋби́лъ є҆сѝ мра́къ, свѧщенномꙋ́чениче достосла́вне.

Но́вый пе́тръ нѣ́кїй на́мъ ꙗ҆ви́лсѧ є҆сѝ, и҆́стиннѡ а҆пⷭ҇льскими сїѧ́ѧ дарова̑нїи, свѧщеннодѣ́тель же и҆ свидѣ́тель стрⷭ҇те́й влⷣки твоегѡ̀, всебога́те.

Бг҃оро́диченъ:

Всѣ́хъ до́брыхъ и҆сполне́нїе ро́ждши, и҆спо́лни на̑ша, дв҃о, молє́нїѧ, грѣхѡ́въ на́мъ и҆збавле́нїѧ просѧ́щи, и҆ просвѣще́нїѧ, и҆ ве́лїѧ ми́лости.

Пѣ́снь є҃. І҆рмо́съ:

Свѣ́тлый на́мъ возсїѧ́й свѣ́тъ присносꙋ́щный, ᲂу҆́треннюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ.

Да свѣтлоно́симъ, правосла́внїи всѝ, стека́ющесѧ и҆ сла́вѧще бг҃ома́терь, ꙗ҆́кѡ гдⷭ҇ꙋ дне́сь приво́дитсѧ, ꙗ҆́кѡ же́ртва благопрїѧ́тна.

Да веселѧ́тсѧ пра́ѻтцы дне́сь, влⷣчце, и҆ да ра́дꙋетсѧ ро́ждшаѧ тѧ̀ со ѻ҆тце́мъ твои́мъ, ꙗ҆́кѡ пло́дъ и҆́хъ гдⷭ҇ꙋ прино́ситсѧ.

Трⷪ҇ченъ:

Пребезнача́льное и҆ присносꙋ́щное є҆ди́но бжⷭ҇тво̀ славосло́вѧще поклони́мсѧ, тре́ми ли́цы є҆стество́мъ нераздѣ́льное, и҆ сла́вою равноче́стное.

Приста́нище благоꙋти́шное, и҆ неѡбори́мꙋю стѣ́нꙋ стѧжа́хомъ моли́твꙋ твою̀ во ѡ҆бстоѧ́нїихъ, бг҃ороди́тельнице, всегда̀ и҆збавлѧ́еми бѣ́дъ и҆ скорбе́й.

И҆́нъ. І҆рмо́съ:

Просвѣтѝ на́съ повелѣ́нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

Во свѣ́тѣ за́повѣдей ходѧ̀ гдⷭ҇нихъ, ча́до вои́стиннꙋ ꙗ҆ви́лсѧ є҆сѝ тогѡ̀, блаже́нне, нело́жное.

Всегѡ̀ на землѝ ты̀ ѿре́клсѧ є҆сѝ пристра́стїѧ, свѧщеннонача́льниче, да бꙋ́дꙋщее благосла́вїе полꙋчи́ши, и҆ свѣ́тлости сла́вы хрⷭ҇то́вы.

Мч҃ническими ᲂу҆кра́шенъ свѣтлостьмѝ, со а҆́гг҃лы ны́нѣ предстои́ши влⷣцѣ, ѡ҆ пою́щихъ моли́сѧ.

Бг҃оро́диченъ:

Мт҃и бж҃їѧ, вѣ́рою тѧ̀ пою́щыѧ ѿ бѣ́дъ и҆зба́ви моли́твами твои́ми, дв҃о, ꙗ҆́кѡ тѧ̀ предста́тельницꙋ вѣ́мы, чⷭ҇таѧ.

И҆́нъ. І҆рмо́съ:

Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

На ка́мень возше́дъ вѣ́ры, страстоте́рпче, неꙋкло́ненъ пребы́лъ є҆сѝ во и҆скꙋше́нїи сопроти́вныхъ.

Ѻ҆рꙋ́жїемъ пла́меннымъ дх҃а ст҃а́гѡ, і҆ера́рше, а҆́рїа вредосло́вца бжⷭ҇твеннымъ сꙋдо́мъ закла́лъ є҆сѝ.

Крѣ́постїю ᲂу҆крѣплѧ́емь, сла́вне, сп҃совою, вра́жїю си́лꙋ и҆ крѣ́пость попра́лъ є҆сѝ.

Бг҃оро́диченъ:

Дв҃ꙋ по ржⷭ҇твѣ̀ пое́мъ тѧ̀, бцⷣе, ты́ бо бг҃а сло́ва пло́тїю мі́рꙋ родила̀ є҆сѝ.

Пѣ́снь ѕ҃. І҆рмо́съ:

Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.

Пра́зднꙋимъ, вѣ́рнїи, пра́здникъ дꙋхо́вный мт҃ре бж҃їѧ, воспѣва́юще благоче́стнѡ: є҆́сть бо ст҃ѣ́йша нбⷭ҇ныхъ ᲂу҆мѡ́въ.

Пѣ́сньми дꙋхо́вными восхва́лимъ, вѣ́рнїи, мт҃рь свѣ́та, ꙗ҆́кѡ дне́сь на́мъ ꙗ҆ви́сѧ предходѧ́щи въ хра́мъ бж҃їй.

Трⷪ҇ченъ:

Ѻ҆ц҃ъ, и҆ сн҃ъ, и҆ дх҃ъ пра́вый, трїѷпоста́снаѧ є҆ди́нице и҆ нераздѣли́маѧ трⷪ҇це, поми́лꙋй покланѧ́ющыѧсѧ бжⷭ҇твеннѣй держа́вѣ твое́й.

Во чре́вѣ твое́мъ вмѣще́нъ, невмѣсти́мый всѣ́ми, бг҃ома́ти, бы́въ, и҆зъ тебє̀ произы́де, пречⷭ҇таѧ, сꙋгꙋ́бъ є҆стество́мъ бг҃ъ и҆ чл҃вѣ́къ.

И҆́нъ. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Ре́вностїю разжже́нъ гдⷭ҇ни любвѐ, мꙋ́дре, і҆́дѡльскꙋю ле́сть ѡ҆бличи́лъ є҆сѝ крѣ́пкѡ слове́сными противлє́нїи, и҆ чꙋде́сными ꙗ҆влє́нїи, всехва́льне.

Недрема́нно соблю́лъ є҆сѝ ѻ҆́ко се́рдца твоегѡ̀, на ѕло́бꙋ ника́коже воздрема́въ, сла́вне, бжⷭ҇твенными восхождє́нїи вчинѧ́ѧ добродѣ́телей къ верхо́вномꙋ.

Ꙗ҆́кѡ і҆ера́рхъ че́стенъ, вѧза́ти и҆ рѣши́ти прегрѣшє́нїѧ вла́сть прїи́мъ ѿ сп҃са хрⷭ҇та̀, мно́гихъ мои́хъ прегрѣше́нїй до́лгъ разрѣшѝ, возводѧ̀ къ покаѧ́нїю.

Бг҃оро́диченъ:

Твои́ми мольба́ми, чⷭ҇таѧ, бѣ́дъ и҆ напа́стей и҆схи́ти мѧ̀ лю́тыхъ, и҆ и҆зба́ви мѧ̀, молю́сѧ: ты́ бо стѣна̀ є҆сѝ неразрꙋши́ма, и҆ приста́нище и҆ покро́въ, и҆ неѡбори́мое ᲂу҆твержде́нїе.

И҆́нъ. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Цѣломꙋ́дреннѡ и҆ пра́веднѡ бг҃ꙋ ты̀ жи́тельствовавъ, коне́цъ блаже́нный ѿ негѡ̀ прїѧ́лъ є҆сѝ, всеблаже́нне пе́тре.

Всесоверше́ннꙋю же́ртвꙋ и҆ прїѧ́тнꙋ, тебѐ сама́го прине́слъ є҆сѝ, пе́тре ди́вный, же́ртва тебє̀ ра́ди бы́вшемꙋ бг҃ꙋ.

Слове́съ дх҃о́вныхъ и҆спо́лнивсѧ, дх҃омъ дви́жимь ѻ҆рга́нъ бы́лъ є҆сѝ пѣснопоѧ̀, бг҃оглаго́ливе, неизречє́ннаѧ.

Бг҃оро́диченъ:

Є҆ди́на сло́вомъ пло́тїю сло́во ро́ждшаѧ, и҆зба́ви, мо́лимсѧ, сѣте́й вра́жїихъ дꙋ́шы на́шѧ.

Конда́къ пра́здника, гла́съ д҃. Подо́бенъ: Вознесы́йсѧ:

Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, свѧще́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, благода́ть совводѧ́щи, ꙗ҆̀же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.

І҆́косъ:

Неизрече́нныхъ бж҃їихъ и҆ бжⷭ҇твенныхъ та̑инъ зрѧ̀ въ дв҃ѣ благода́ть ꙗ҆влѧ́емꙋ, и҆ и҆сполнѧ́емꙋ ꙗ҆́вственнѡ, ра́дꙋюсѧ, и҆ ѻ҆́бразъ разꙋмѣ́ти недоꙋмѣ́юсѧ, стра́нный и҆ неизрече́нный: ка́кѡ и҆збра́ннаѧ чⷭ҇таѧ, є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆жаса́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное.

Пѣ́снь з҃. І҆рмо́съ:

Пе́щь, сп҃се, ѡ҆роша́шесѧ, ѻ҆́троцы же, ликꙋ́юще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.

Ликовствꙋ́имъ празднолю́бцы дне́сь, воспои́мъ чⷭ҇тꙋю влⷣчцꙋ, і҆ѡакі́ма и҆ а҆́ннꙋ досто́йнѡ чтꙋ́ще.

Прⷪ҇ро́чествꙋй дв҃де, глаго́лѧ дх҃омъ: приведꙋ́тсѧ дѣ̑вы въ слѣ́дъ тебє̀, приведꙋ́тсѧ тебѣ̀ во хра́мъ цр҃и́цы мт҃ри.

Трⷪ҇ченъ:

Просла́вимъ трⷪ҇цꙋ нераздѣ́льнꙋю, воспои́мъ є҆ди́но бж҃ество̀, со ѻ҆ц҃е́мъ сло́во, и҆ дх҃а всест҃а́го.

Молѝ є҆го́же родила̀ є҆сѝ гдⷭ҇а, ꙗ҆́кѡ бл҃гоꙋтро́бна є҆стество́мъ сꙋ́ща, бг҃ороди́тельнице, спастѝ дꙋ́шы воспѣва́ющихъ тѧ̀.

И҆́нъ. І҆рмо́съ:

Ѻ҆́троцы благочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.

Ꙗ҆́коже ᲂу҆́тро возсїѧ́лъ є҆сѝ, просвѣща́ѧ землѝ всѧ̑ концы̀, и҆ но́щь преле́стнꙋю ѿгонѧ̀, бг҃огла́се, і҆́дѡльскагѡ безбо́жїѧ: бл҃гослове́нъ є҆сѝ, вопїѧ̀, бж҃е ѻ҆тє́цъ на́шихъ.

Всѧ̑ спастѝ хотѧ̀ бг҃ъ твои́ми моли́твами, прозрѣ́нїе дарова̀ сїсі́нїю, и҆ дꙋшѝ и҆ тѣлесѝ ѻ҆чеса̀ ѿве́рзъ, ѻ҆́ч҃е: ѿтꙋ́дꙋ просвѣща́етсѧ бжⷭ҇твенною ба́нею.

Стрꙋи̑ и҆сцѣле́нїй то́чиши, ѿ бжⷭ҇твенныѧ твоеѧ̀ ра́ки, кли́менте сла́вне: страсте́й мно́гихъ и҆збавлѧ́еши всегда̀ притека́ющыѧ къ тебѣ̀, и҆ пою́щыѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Подоба́ше безъ сѣ́мене воплоща́емомꙋ и҆зъ тебє̀ проитѝ, дв҃о пречⷭ҇таѧ: ты́ бо возрасла̀ є҆сѝ всѣ́хъ, чⷭ҇таѧ, пребо́льши. тѣ́мже тѝ непреста́ннѡ зове́мъ: благослове́нъ пло́дъ чре́ва твоегѡ̀.

И҆́нъ. І҆рмо́съ то́йже.

Житїе́мъ бг҃олѣ́пнымъ ᲂу҆кра́шенъ, и҆ бжⷭ҇твеннымъ свѣ́томъ просвѣща́емь нбⷭ҇ныхъ въ нехѡ́днаѧ вше́лъ є҆сѝ веселѧ́сѧ, и҆ вопїѧ̀, мꙋ́дре, сотво́ршемꙋ: бл҃гослове́нъ бг҃ъ ѻ҆тє́цъ на́шихъ.

Ꙗ҆́кѡ да пресвѣ́тлѡ благоꙋгоди́ши хрⷭ҇тꙋ̀ бг҃ꙋ, бг҃облаже́нне, въ рꙋ́ки беззако́нныхъ тѧ̀ сама́го пре́далъ є҆сѝ во́лею, поѧ̀, пребога́те: бл҃гослове́нъ бг҃ъ ѻ҆тє́цъ на́шихъ.

Ве́сь просвѣще́нъ, сподо́билсѧ є҆сѝ ви́дѣти хрⷭ҇та̀, тебѣ̀ показꙋ́юща свою̀ ри́зꙋ, лю́тѣ расте́рзанꙋ, и҆стка́нꙋю свы́ше, прпⷣбне, бл҃гослове́нъ є҆сѝ, вопїѧ̀, бж҃е ѻ҆тє́цъ на́шихъ.

Бг҃оро́диченъ:

Всѧ̀ ꙗ҆́кѡ чиста̀ прїѧ́ла є҆сѝ во ᲂу҆тро́бѣ твое́й сло́во воплоща́емо: но того̀ молѝ ѡ҆чи́стити мѝ прегрѣше́нїй дꙋ́шꙋ и҆ тѣ́ло, пречⷭ҇таѧ, къ тебѣ̀ чи́стою вѣ́рою прири́щꙋщагѡ.

Пѣ́снь и҃. І҆рмо́съ:

Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте свѧще́нницы, просла́вите ѻ҆́троцы, благослови́те лю́дїе, и҆ превозноси́те во всѧ̑ вѣ́ки.

Весели́тсѧ дне́сь свѣ́тлѡ і҆ѡакі́мъ, и҆ а҆́нна непоро́чнаѧ гдⷭ҇ꙋ бг҃ꙋ прино́ситъ же́ртвꙋ, да́ннꙋю є҆́й ѿ ѡ҆бѣща́нїѧ ст҃ꙋ́ю дще́рь.

Хва́лѧтсѧ ст҃і́и дв҃дъ и҆ і҆ессе́й, и҆ і҆ꙋ́да чти́тсѧ: и҆зъ ко́рене бо и҆́хъ и҆зрастѐ пло́дъ, дв҃а чⷭ҇таѧ, и҆зъ неѧ́же роди́сѧ бг҃ъ превѣ́чный.

Трⷪ҇ченъ:

Да пое́тсѧ трист҃ы́й, ѻ҆ц҃ъ, и҆ сн҃ъ, и҆ дх҃ъ ст҃ы́й, нераздѣ́льнаѧ є҆ди́ница, є҆ди́но бжⷭ҇тво̀ держа́ще дла́нїю всю̀ тва́рь, во всѧ̑ вѣ́ки.

Безнача́льное начина́етсѧ сло́во пло́тїю, роди́всѧ ꙗ҆́кѡ благоволѝ, бг҃ъ же и҆ чл҃вѣ́къ, и҆зъ ѻ҆трокови́цы дв҃ы, возсозида́ѧ ны̀ пре́жде па́дшыѧ, ра́ди кра́йнѧгѡ бл҃гоꙋтро́бїѧ.

И҆́нъ. І҆рмо́съ:

Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѻ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ и҆ славосло́влѧхꙋ во всѧ̑ вѣ́ки.

Оу҆чени́къ бы́въ петро́въ, бжⷭ҇твєнныѧ нра́вы тогѡ̀ подража́ѧ, кли́менте страда́льче, тѣ́мже и҆ престо́ла прее́мникъ и҆́стиннѡ показа́лсѧ є҆сѝ, просвѣща́ѧ всю̀ тва́рь.

Та́йнѡ ѡ҆червлени́въ твоѧ̑ ᲂу҆стна̀ ча́шею мꙋ́дрости, кли́менте, и҆зры́гнꙋлъ є҆сѝ бжⷭ҇твенныхъ ᲂу҆че́нїй пꙋчи́нꙋ, потоплѧ́ющꙋю демѡностра́шїе, дꙋша́мъ же человѣ́чєскимъ и҆сточа́ющꙋю спасе́нїе.

Ꙗ҆́кѡ пречестнꙋ́ю ᲂу҆́тварь цр҃ковь стѧжа́вши, твоѧ̑ бжⷭ҇твєннаѧ законоположє́нїѧ, ѡ҆ тебѣ̀ хва́литсѧ, и҆ всѧ̑ подвиза́етъ, твою̀ па́мѧть вѣ́рою почита́ти во всѧ̑ вѣ́ки.

Бг҃оро́диченъ:

Марі́е дв҃о бцⷣе, бг҃а сп҃са человѣ́кѡмъ ро́ждшаѧ пло́тїю, спасѝ вѣ́рою пою́щыѧ твоѐ ржⷭ҇тво̀, и҆ превозносѧ́щыѧ во всѧ̑ вѣ́ки.

И҆́нъ. І҆рмо́съ:

На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.

Жирꙋ́ющꙋю соскꙋ́талъ є҆сѝ па́гꙋбꙋ, а҆́рїева ѕлѣ́йшагѡ хꙋле́нїѧ, ѿ вѣ́рныхъ собо́рища ѿсѣ́къ, и҆ ѿгна́въ церко́вныхъ, бг҃омꙋ́дре, ѡ҆гра́дъ.

Первостоѧ́тель ли́ка а҆́гг҃льскагѡ пе́тръ ꙗ҆ви́сѧ, бжⷭ҇твенный верхо́вникъ, сто́лпъ же мꙋ́ченикѡвъ бы́лъ є҆сѝ, всемꙋ́дре пе́тре бг҃оно́се, и҆ свѧщеннодѣ́йствитель бжⷭ҇твенныхъ та́инствъ.

Наꙋчи́всѧ ѿ бжⷭ҇твеннагѡ вдохнове́нїѧ бꙋ́дꙋщихъ ра́зꙋмꙋ, бг҃оглаго́ливе, и҆ є҆́же ѿ землѝ проꙋвѣ́дѣвъ твоѐ преставле́нїе мꙋче́нїемъ, къ вы́шнихъ гдⷭ҇ꙋ сла́вы хрⷭ҇тꙋ̀ во вѣ́ки всѧ̑.

Бг҃оро́диченъ:

Во ᲂу҆тро́бꙋ дв҃ы все́льшагосѧ, и҆ ѿ неѧ̀ стра́шнѡ и҆ па́че сло́ва дре́внѧго а҆да́ма ѡ҆бно́вльшаго гдⷭ҇а, по́йте и҆ превозноси́те во всѧ̑ вѣ́ки.

На ѳ҃-й пѣ́сни Честнѣ́йшꙋю не пое́мъ, но пое́мъ припѣ́въ пра́здника.

Велича́й, дꙋшѐ моѧ̀, приведе́ннꙋю во хра́мъ гдⷭ҇ень, и҆ благослове́ннꙋю рꙋка́ми і҆ере́евыми.

Пѣ́снь ѳ҃. І҆рмо́съ:

Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.

Къ си̑мъ тропарє́мъ то́йже припѣ́въ.

И҆зъ пра́ведныхъ произы́де, і҆ѡакі́ма и҆ а҆́нны, ѡ҆бѣща́нїѧ пло́дъ, бг҃оѻтрокови́ца марі́а: и҆ ꙗ҆́кѡ кади́ло прїѧ́тное, пло́тїю младе́нствꙋющи, приво́дитсѧ во свѧти́лище ст҃о́е, ꙗ҆́кѡ ст҃а́ѧ во ст҃ы́хъ ѡ҆бита́ти.

Младе́нствꙋющꙋю є҆стество́мъ, и҆ па́че є҆стества̀ ꙗ҆́вльшꙋюсѧ мт҃рь бж҃їю, восхва́лимъ пѣ́сньми: въ хра́мъ бо зако́нный гдⷭ҇ꙋ дне́сь приво́дитсѧ, въ воню̀ благово́нїѧ пра́ведныхъ, ꙗ҆́кѡ пло́дъ дꙋхо́вный.

Трⷪ҇ченъ:

Велича́й, дꙋшѐ моѧ̀, трїѷпоста́снагѡ и҆ нераздѣ́льнагѡ бжⷭ҇тва̀ держа́вꙋ.

Трїѷпоста́сное є҆стество̀, и҆ нераздѣ́льнꙋю сла́вꙋ, и҆ въ бжⷭ҇твѣ̀ є҆ди́номъ, пое́мꙋю непреста́ннѡ на нб҃сѝ и҆ на землѝ, трⷪ҇цꙋ неразлꙋ́чнꙋю просла́вимъ, съ сн҃омъ ѻ҆ц҃ꙋ̀ и҆ дх҃ꙋ покланѧ́ющесѧ благоче́стнѡ.

Велича́й, дꙋшѐ моѧ̀, честнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ, пречⷭ҇тꙋю бцⷣꙋ.

Подъ твоѐ бл҃гоꙋтро́бїе прибѣга́ющыѧ вѣ́рнѡ, и҆ покланѧ́ющыѧсѧ бл҃гоче́стнѡ сн҃ꙋ твоемꙋ̀, дв҃о бг҃ороди́тельнице, ꙗ҆́кѡ бг҃ꙋ и҆ гдⷭ҇ꙋ мі́ра, моли́сѧ, ѿ тлѝ и҆ бѣ́дъ и҆зба́вити и҆ всѧ́ческихъ и҆скꙋше́нїй.

И҆́нъ. І҆рмо́съ:

Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Тече́нїе твоѐ соверши́въ мно́гими пѡ́двиги, и҆ несомнѣ́ннѡ соблю́дъ вѣ́рꙋ хрⷭ҇то́вꙋ, пра́веднымъ вѣнце́мъ ᲂу҆краси́лсѧ є҆сѝ.

Ꙗ҆́кѡ спа́слъ є҆сѝ ѻ҆́трока дре́вле, ᲂу҆держа́на въ мо́ри лѣ́тнымъ ѡ҆бхожде́нїемъ, мꙋ́чениче хрⷭ҇то́въ, си́це глꙋбины̀ грѣхо́вныѧ и҆ менѐ спасѝ.

Любо́вїю тѧ̀ чтꙋ́щыѧ, кли́менте страстоте́рпче, ѿ напа́стей и҆ бѣ́дъ и҆ скорбе́й спасѝ, молѧ̀ зижди́телѧ хрⷭ҇та̀.

Бг҃оро́диченъ:

Ра́дости моѐ се́рдце и҆спо́лни, дв҃о, ꙗ҆́же ра́дости прїе́мшаѧ и҆сполне́нїе, грѣхо́внꙋю печа́ль потреблѧ́ющи.

И҆́нъ. І҆рмо́съ:

Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, рождество̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.

Пред̾ѡпредѣле́ннаго свѧще́ннѡ і҆ера́ршествовати, и҆ свѧще́нства коне́цъ благосла́внѡ прїи́мша, и҆ хрⷭ҇то́вꙋ подража́вша стрⷭ҇ть, петра̀ чꙋ́днаго воспои́мъ.

Жезло́мъ ᲂу҆крѣ́пльшасѧ си́лы гдⷭ҇ни, и҆ свѧще́нствовавша, и҆ свѧще́нствованна, и҆ хрⷭ҇тꙋ̀ прине́сшагосѧ же́ртва, петра̀ бг҃оно́снаго воспои́мъ.

Всесмѣше́ннаго заре́ю трⷪ҇чною, и҆ свѣтлѣ́йшагѡ є҆ѧ̀ насла́ждшасѧ сїѧ́нїѧ, и҆ на́мъ спасе́нїѧ просѧ́ща, петра̀ бг҃опрїѧ́тнаго воспои́мъ.

Дае́ши ѻ҆би́льнѡ дꙋшѝ мое́й спасе́нїе, ꙗ҆́кѡ первосвѧще́нникъ бо и҆́маши вла́сть вѧза́ти и҆ рѣши́ти прегрѣше́нїй вины̑, твои́ми молє́нїи, свѧще́ннѣйшїй.

Бг҃оро́диченъ:

Ты̀ є҆сѝ, бцⷣе, ѻ҆рꙋ́жїе на́ше и҆ стѣна̀, ты̀ є҆сѝ застꙋпле́нїе къ тебѣ̀ прибѣга́ющихъ, тебѐ и҆ ны́нѣ на моли́твꙋ подвиза́емъ, да и҆зба́вимсѧ ѿ вра̑гъ на́шихъ.

Свѣти́ленъ. Подо́бенъ: Жєны̀ ᲂу҆слы́шите:

Ны́нѣ благонаро́читъ ꙗ҆ви́сѧ на́мъ де́нь, и҆мꙋ́щи свѧще́нныхъ преє́мникъ, свѧще́нныхъ а҆пⷭ҇лъ, петра̀ кꙋ́пнѡ и҆ кли́мента, проповѣ́дники вѣ́ры, и҆ непобѣди̑мыѧ мꙋ́ченики: и҆́хже лѣ́тнюю па́мѧть вѣ́рнѡ соверша́емъ всѝ.

Сла́ва, и҆ ны́нѣ, пра́здника:

Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ, и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ воспита́тисѧ гдⷭ҇еви.

На хвали́техъ стїхи̑ры на ѕ҃, пра́здника, г҃, гла́съ а҃.

Подо́бенъ: Нбⷭ҇ныхъ чинѡ́въ:

Свѣщенѡ́сицы дѣ̑вы, ꙳ приснодв҃ꙋ свѣ́тлѡ провожда́юще, ꙳ проро́чествꙋютъ и҆́стиннѡ дх҃омъ бꙋ́дꙋщее: ꙳ хра́мъ бо бж҃їй, бцⷣа сꙋ́щи, ꙳ въ хра́мъ со сла́вою дѣ́вственною ꙳ младе́нствꙋющи вво́дитсѧ.

Ѡ҆бѣща́нїѧ ст҃а́гѡ, и҆ пло́дъ бл҃госла́вный, ꙳ бцⷣа вои́стиннꙋ ꙗ҆ви́сѧ мі́рꙋ, ꙳ ꙗ҆́кѡ всѣ́хъ превы́шшаѧ: ꙳ ꙗ҆́же бл҃гоче́стнѡ приводи́ма въ хра́мъ бж҃їй, мл҃твꙋ ро́ждшихъ и҆сполнѧ́етъ, ꙳ соблюда́ема бжⷭ҇твеннымъ дх҃омъ.

Нбⷭ҇нымъ воспита́на, дв҃о, хлѣ́бомъ, ꙳ вѣ́рнѡ въ хра́мѣ гдⷭ҇ни, ꙳ родила̀ є҆сѝ мі́рꙋ жи́зни хлѣ́бъ сло́во, ꙳ є҆мꙋ́же, ꙗ҆́кѡ хра́мъ и҆збра́нный и҆ всенепоро́чный, ꙳ пред̾ѡбрꙋчи́ласѧ є҆сѝ дх҃омъ та́инственнѡ, ѡ҆брꙋчена̀ бг҃ꙋ и҆ ѻ҆ц҃ꙋ̀.

И҆ ст҃а́гѡ петра̀ г҃. гла́съ и҆ подо́бенъ то́йже:

Пресꙋ́щныѧ трⷪ҇цы ꙳ є҆диносꙋ́щное преѿмща́ѧ, всеблаже́нне, ꙳ ꙗ҆́кѡ несозда́нныѧ є҆ди́ницы, ꙳ а҆́рїа низложи́лъ є҆сѝ, ꙳ показа́въ на́мъ сн҃а нераздѣ́льное, ꙳ ꙗ҆́кѡ тогѡ́жде сꙋ́ща ꙳ ѻ҆ц҃ꙋ̀ и҆ дх҃ꙋ бж҃ества̀.

Гонѧ́щихъ преста̀ ᲂу҆бі́йственное стремле́нїе, ꙳ крове́й лїѧ́нїе ны́нѣ въ неѧвле́нное сконча́сѧ, ꙳ ѻ҆боѧ̑ запеча́ташасѧ, пе́тре мꙋ́дре, ꙳ свѧще́ннымъ твои́мъ свидѣ́тельствомъ, ꙳ ꙗ҆́кѡ ѻ҆́трочищꙋ мѡѷсе́евꙋ ста̀ тече́нїе, ꙳ ка́мыкомъ сепфѡ́ры и҆ногда̀.

Па́стырски пожи́въ, свѧщенномꙋ́чениче хрⷭ҇то́въ, ꙳ мꙋ́ченичєскїѧ по́двиги показа́лъ є҆сѝ до́блественнѡ, ꙳ є҆ди́нъ, чрезъ ѻ҆боѧ̑ вѣне́цъ прїе́мъ, ꙳ ѻ҆бою́дꙋ ᲂу҆краша́емь, ꙳ свѧще́нствомъ и҆ болѣ́зньми страда́льческими: ꙳ сегѡ̀ ра́ди молѝ спасти́сѧ на́мъ.

Сла́ва, гла́съ д҃. Самогла́сенъ:

Рꙋко́ю бж҃їею пома́завсѧ во і҆ере́а, верхо́внагѡ соиме́нне, и҆ дѣ́лы соприча́стниче, словє́сныѧ ѻ҆́вцы є҆ѵⷢ҇льскими препита́лъ є҆сѝ ѕла́ками, ꙗ҆́кѡ мꙋ́дръ и҆ и҆́стиненъ па́стырь, и҆ ма́рка прее́мникъ досто́йнѡ показа́лсѧ є҆сѝ, страстоте́рпческою кро́вїю вѣ́ры тече́нїе соверши́лъ є҆сѝ, ѡ҆ лю́дехъ предпоже́рсѧ, и҆ хрⷭ҇тꙋ̀ соѡбразꙋ́ѧсѧ, моли́сѧ ѡ҆ дꙋша́хъ на́шихъ.

И҆ ны́нѣ, пра́здника, гла́съ в҃:

Дне́сь въ хра́мъ приво́дитсѧ всенепоро́чнаѧ дв҃а во ѻ҆би́телище всецр҃ѧ̀ бг҃а, и҆ всеѧ̀ жи́зни на́шеѧ пита́телѧ: дне́сь чистѣ́йшаѧ ст҃ы́нѧ, ꙗ҆́кѡ трилѣ́тствꙋющаѧ ю҆́ница, во ст҃а̑ѧ ст҃ы́хъ вво́дитсѧ. то́й возопїи́мъ, ꙗ҆́кѡ а҆́гг҃лъ: ра́дꙋйсѧ, є҆ди́на въ жена́хъ бл҃гослове́ннаѧ.

Славосло́вїе вели́кое, и҆ ѿпꙋ́стъ.

На лїтꙋргі́и: бл҃жє́нна пра́здника, ѻ҆бои́хъ канѡ́нѡвъ, пѣ́снь ѳ҃, на и҃. По вхо́дѣ тропа́рь пра́здника, и҆ ст҃ы́хъ. Сла́ва, конда́къ ст҃ы́хъ: И҆ ны́нѣ, пра́здника. Прокі́менъ: Пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: Ст҃ы́хъ прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. А҆пⷭ҇лъ пра́здника, ко є҆вре́ємъ, зача́ло т҃к. И҆ ст҃ы́хъ, къ фїлїпписі́ѡмъ, зача́ло см҃ѕ. А҆ллилꙋ́їа, гла́съ и҃: Слы́ши дщѝ и҆ ви́ждь: Є҆ѵⷢ҇лїе пра́здника, лꙋкѝ, зача́ло н҃д. И҆ ст҃ы́хъ, матѳе́а, зача́ло а҃і. Прича́стенъ: Ча́шꙋ спасе́нїѧ: И҆ ст҃ы́хъ: Въ па́мѧть вѣ́чнꙋю: