Мѣ́сѧца тогѡ́же въ к҃з-й де́нь.

Ст҃а́гѡ великомч҃ника і҆а́кѡва пе́рсѧнина:

И҆ прпⷣбнагѡ ѻ҆тца̀ на́шегѡ палла́дїа:

Въ то́йже де́нь пра́зднꙋемъ по бз҃ѣ зна́менїе, бы́вшее пречⷭ҇тою бцⷣею въ вели́комъ новѣ́градѣ.

Слꙋ́жба є҆ѧ̀ пи́сана по се́й слꙋ́жбѣ.

И҆ и҆́же во ст҃ы́хъ ѻ҆ц҃а̀ на́шегѡ і҆а́кѡва є҆пі́скопа, росто́вскагѡ чꙋдотво́рца.

Слꙋ́жба є҆гѡ̀ пи́сана по слꙋ́жбѣ зна́менїѧ пречⷭ҇тыѧ бцⷣы.

На Гдⷭ҇и, воззва́хъ, стїхи̑ры мч҃ника і҆а́кѡва, на ѕ҃, гла́съ в҃.

Подо́бенъ: Є҆гда̀ ѿ дре́ва:

Мі́ра кра̑снаѧ ѡ҆ста́вивъ, ро́да свѣ́тлость, бога́тство и҆ красотꙋ̀: все́ же чꙋ́вство ѿве́ргъ, и҆ тѣ́ломъ раздроблѧ́емь, страсте́й подража́нїемъ, ра́дꙋѧсѧ послѣ́довалъ є҆сѝ хрⷭ҇тꙋ̀, і҆а́кѡве: ꙗ҆́кѡ ᲂу҆́бѡ ѻ҆́бщникъ страда́ньми сла́вы бы́лъ є҆сѝ вои́стиннꙋ и҆ црⷭ҇твїѧ ны́нѣ соприча́стникъ.

Оу҆́ды пожина́емь пло́ти, и҆ нестерпи̑мыѧ болѣ̑зни и҆ ра̑ны терпѧ̀, мч҃ниче хрⷭ҇то́въ достосла́вне і҆а́кѡве, и҆ мꙋчи́телей сꙋровство̀ попра́въ мꙋ́жественнѡ, побѣ́ды многоцѣ́нный вѣне́цъ прїѧ́лъ є҆сѝ: и҆́мже ны́нѣ ᲂу҆краша́емь, блаже́нне, бжⷭ҇твенномꙋ влⷣки твоегѡ̀ прⷭ҇то́лꙋ съ пострада́вшими съ тобо́ю предстои́ши.

И҆мѣ́ѧ дерзнове́нїе ко хрⷭ҇тꙋ̀, ѡ҆ всѣ́хъ вѣ́рою соверша́ющихъ честны́й тво́й пра́здникъ, мꙋ́чениче приснопа́мѧтне, те́плѣ предстои́ши, ѿ бѣ́дъ и҆збавлѧ́ѧ, и҆ страсте́й свобожда́ѧ, всѧ́кагѡ ѡ҆бстоѧ́нїѧ лю́тыхъ и҆з̾има́ѧ, подава́ѧ дꙋша́мъ спасе́нїе бжⷭ҇твенными твои́ми моли́твами, ꙗ҆́кѡ да свѣ̑тлыѧ твоѧ̑ по́двиги просла́вимъ.

Сла́ва, гла́съ є҃:

Оу҆диви́лъ є҆сѝ, ѽ і҆а́кѡве, въ мꙋ́кахъ всѣ́хъ долготерпѣ́въ: пе́рстѡмъ бо и҆ рꙋка́мъ, и҆ мы́шцамъ ѿсѣ́чєннымъ твои̑мъ бы́вшымъ, подо́бнѣ и҆ нога́мъ и҆ лы́стѡмъ твои̑мъ, да́же до бедрꙋ̀ претерпѣ́лъ є҆сѝ: про́чее молѧ́щꙋсѧ тебѣ̀, и҆ честнꙋ́ю главꙋ̀ твою̀ ѿсѣко́ша. мꙋ́чениче многострада́льне, ѡ҆ на́съ не преста́й хрⷭ҇тꙋ̀ молѧ́сѧ, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Ра́дꙋйсѧ:

А҆́гнца своего̀ а҆́гница и҆ногда̀ зрѧ́щи, къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши, ча́до моѐ сладча́йшее, хрⷭ҇тѐ; чесѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй безгрѣ́шне, многоми́лостиве гдⷭ҇и, да́ждь мѝ сло́во рабѣ̀ твое́й: сн҃е мо́й вселюбе́знѣйшїй, не пре́зри, ще́дре, молчѧ̀, тѧ̀ стра́ннѡ ро́ждшꙋю, бж҃е всеще́дре, да́рꙋѧй мі́рꙋ ве́лїю ми́лость.

На стїхо́внѣ ѻ҆ктѡ́иха. Сла́ва, мꙋ́ченика, гла́съ и҃. Геѡ́ргїа сѷке́лла.

Вѣ́рнѡ соше́дшесѧ дне́сь любозри́телє, ви́дите борьбꙋ̀ стра́ннꙋю и҆ размѣне́ннꙋю і҆а́кѡва, сꙋ́щагѡ ѿ персі́ды, на́мъ ѡ҆блиста́вшагѡ ꙗ҆́кѡ ѕвѣздꙋ̀, волхвѡ́мъ ꙗ҆́вльшꙋюсѧ, и҆ ко и҆́стинномꙋ позна́нїю наста́вльшꙋю: то́й бо до́блественный, внегда̀ па́дати, ра́тователи ѿража́ше, и҆ внегда̀ соста́вѡмъ ᲂу҆дѡ́въ рѣ̑занымъ бы́ти, мꙋ́чащыѧ не́мощны творѧ́ше, вы́шнимъ про́мысломъ ᲂу҆крѣплѧ́емь вопїѧ̀: а҆́ще и҆ ᲂу҆́ды моѧ̑ чꙋ́вствєнныѧ сꙋ́щыѧ сѣче́те, но и҆́мамъ хрⷭ҇та̀ разꙋ́мнѡ мѝ всѧ̑ быва́юща. тѣ́мже прови́дѧ бꙋ́дꙋщꙋю жи́знь, предлежа́щїѧ ра́ди всѣ́хъ сме́рти, ко ѻ҆́ной тща́шесѧ прейтѝ: въ не́йже и҆ водворѧ́ѧсѧ, про́ситъ на́мъ ѿ вѣнцеда́телѧ бг҃а, ѡ҆чище́нїе, просвѣще́нїе и҆ ве́лїю ми́лость, соверша́ющымъ па́мѧть є҆гѡ̀.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Ѽ пресла́внагѡ чꙋдесѐ!

Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко; ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши всѣ́мъ даѧ́й жи́знь, ꙳ бцⷣа пла́чꙋщисѧ глаго́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма ꙳ и҆зъ неѧ̀ неизрече́ннѡ возсїѧ́вшаго, ꙳ бг҃а и҆ чл҃вѣ́ка.

Тропа́рь мꙋ́ченика і҆а́кѡва, гла́съ д҃:

Мч҃никъ тво́й, гдⷭ҇и, і҆а́кѡвъ, во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.

И҆лѝ се́й, гла́съ то́йже:

Мꙋчє́нїи странноꙋжа́сными, и҆ до́блестїю терпѣ́нїѧ всѣ́хъ преꙋдиви́лъ є҆сѝ, многострада́льне: надъ ко́имждо соста́вомъ ᲂу҆десѝ рѣ́занїѧ, благода́рны мольбы̑ преди́внѣ и҆зре́клъ є҆сѝ гдⷭ҇ꙋ. тѣ́мъ во страда́нїи твое́мъ вѣне́цъ прїе́мъ, къ прⷭ҇то́лꙋ возше́лъ є҆сѝ нбⷭ҇нагѡ цр҃ѧ̀ хрⷭ҇та̀ бг҃а, і҆а́кѡве: того̀ молѝ спастѝ дꙋ́шы на́шѧ.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:

Слꙋ́жба ст҃а́гѡ палла́дїа пое́тсѧ на повече́рїи.

Канѡ́нъ, є҆гѡ́же краегране́сїе:

Твоѐ почита́ю, всебл҃же́нне ѻ҆́ч҃е, житїѐ. І҆ѡ́сифъ.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Бжⷭ҇твенными свѣтлостьмѝ ѡ҆зарѧ́емь, прпⷣбне, ѻ҆́блакъ разженѝ помышле́нїѧ моегѡ̀, ꙗ҆́кѡ да ᲂу҆зрю̀ твоѐ житїѐ свѣтоно́сное, и҆ и҆справле́нїе жи́тельства твоегѡ̀.

Оу҆́треневавъ къ бг҃ꙋ, пра́вды сл҃нцꙋ, ѿ младе́нства, всебога́те, тмы̀ и҆збѣ́глъ є҆сѝ тѣле́сныхъ страсте́й воздержа́нїемъ, и҆ да́ромъ чꙋде́съ ѡ҆богати́лсѧ є҆сѝ, прпⷣбне.

Оу҆́мнꙋю чистотꙋ̀ безстра́стїемъ стѧжа́въ, дх҃а бы́лъ є҆сѝ вмѣсти́лище, досточꙋ́дне палла́дїе всебл҃же́нне, ѻ҆тцє́въ ᲂу҆краше́нїе, свѣти́льниче всемі́рный.

Бг҃оро́диченъ:

Ты̀, є҆ди́на бг҃оневѣ́сто, въ вы́шнихъ сѣдѧ́щаго рꙋка́ми носи́ла є҆сѝ, пло́ть бы́вшаго: ты́ бо є҆сѝ прїѧ́телище досто́йно всѣ́хъ вѣкѡ́въ вседержи́телѧ.

Пѣ́снь г҃. І҆рмо́съ:

Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ, сла́вы сподо́би.

Всено́щное, ѻ҆́ч҃е, моле́нїе, бо́дреннымъ приносѧ̀ по́мысломъ бг҃ꙋ вседержи́телю, стра̑сти плотскі̑ѧ ᲂу҆спи́лъ є҆сѝ: тѣ́мже предста́тель неꙋсы́пный всѣ́хъ на́съ бы́лъ є҆сѝ.

Оу҆мертви́въ ᲂу҆́ды воздержа́нїемъ, ѡ҆живи́лъ є҆сѝ, ѻ҆́ч҃е, дꙋ́шꙋ бжⷭ҇твенными возвращє́нїи, добродѣ́тельми вжилѧ́емь, вседѣ́тельными си́лами, ѻ҆тцє́въ ѻ҆́ч҃е палла́дїе.

Вкꙋси́въ до́брагѡ бж҃їѧ глаго́ла, и҆ ра́зꙋма бжⷭ҇твеннагѡ прича́щсѧ, молчали́во соверши́въ твоѐ житїѐ, прилѣплѧ́ѧсѧ невозвра́тнѡ, преподо́бне, свѣтода́телю бг҃ꙋ на́шемꙋ.

Бг҃оро́диченъ:

Ми́лостивыми твои́ми, ѻ҆трокови́це, ка́плѧми, ᲂу҆́глїе ᲂу҆гасѝ страсте́й, марі́е неискꙋсобра́чнаѧ, и҆ ᲂу҆гаше́нный возжзѝ свѣти́льникъ се́рдца моегѡ̀, златы́й свѣти́льниче, всенепоро́чнаѧ.

Пѣ́снь д҃. І҆рмо́съ:

Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.

Си́лою же и҆ бл҃года́тїю вседѣ́тельною всѣ́хъ цр҃ѧ̀ бг҃а на́шегѡ, лꙋка́вствїѧ безпло́тныхъ вра̑гъ ѿню́дъ и҆збѣ́глъ є҆сѝ, ѻ҆́ч҃е палла́дїе бг҃одохнове́нне.

Да возра́дꙋемсѧ дꙋхо́внѣ, па́мѧть соверша́юще пра́зднственнꙋю, знаменоно́сца и҆ честна́гѡ ѻ҆тца̀ на́шегѡ, свѧще́нными тогѡ̀ мольба́ми неꙋдо́бныхъ и҆збавлѧ́еми.

Цѣле́нїе приснотекꙋ́щее твоѧ̀ ра́ка то́читъ, ѽ палла́дїе сла́вне! приходѧ́щихъ ѡ҆чища́етъ сквє́рны плотскі̑ѧ вкꙋ́пѣ и҆ дꙋшє́вныѧ, ѻ҆́ч҃е ѻ҆тцє́въ бг҃опрїѧ́тне.

И҆зба́ви ны̀, прпⷣбне, твои́ми моли́твами, всѣ́хъ собла̑знъ ѕмїи́ныхъ сѣте́й, и҆ и҆сцѣлѝ на́шѧ лю̑тыѧ недꙋ́ги, ко влⷣцѣ мольба́ми твои́ми.

Бг҃оро́диченъ:

Ꙗ҆ви́сѧ бг҃овмѣсти́маѧ вои́стиннꙋ цр҃ковь всѣ́хъ цр҃ѧ̀, пренепоро́чнаѧ бг҃ороди́тельнице. тѣ́мже благоче́стнѡ гаврїи́лово, є҆́же ра́дꙋйсѧ, вѣ́рнїи несꙋмнѣ́ннѡ прино́симъ.

Пѣ́снь є҃. І҆рмо́съ:

Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Стра̑сти пренебре́глъ є҆сѝ плотскі̑ѧ, бг҃обл҃же́нне, премно́гимъ воздержа́нїемъ. тѣ́мъ тебѣ̀ бл҃года́ть бжⷭ҇твеннаѧ дарова́сѧ, стра̑сти и҆сцѣлѧ́ти вѣ́рныхъ, ѻ҆́ч҃е, приходѧ́щихъ тѝ, ѽ палла́дїе пресла́вне!

Свѧ́то твоѐ житїѐ, всебл҃же́нне, соверши́въ, тѣ́мже и҆ ко ст҃ы̑мъ причта́лсѧ є҆сѝ, ѿ вѣ́ка бг҃ꙋ рабо́тавшымъ, всѣ́хъ ѡ҆свѧща́еши дꙋ́шы, хва́лѧщихъ твоѧ̑ честна̑ѧ чꙋдодѣѧ̑нїѧ.

Бл҃же́нъ бы́лъ є҆сѝ и҆́стиннѡ, достосла́вне: ты́ бо въ пꙋ́ть ѡ҆правда́нїй всеви́дца бг҃а ходи́лъ є҆сѝ, неѕло́бивъ и҆ кро́токъ бы́въ, и҆ восхождє́нїи до́брыми ᲂу҆краша́емь.

Бг҃оро́диченъ:

Дале́че человѣ́чество бг҃а, дв҃о, бы́сть, тебѣ́ же заче́ншей сп҃са несказа́ннѡ, бг҃ора́дованнаѧ, па́ки въ ра́й вхо́дитъ, вѣ́рою ᲂу҆блажа́ѧ тѧ̀, всепѣ́таѧ.

Пѣ́снь ѕ҃. І҆рмо́съ:

Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Чи́сто житїѐ воспрїе́мъ воздержа́нїѧ, ꙗ҆́кѡ безпло́тенъ, и҆спра́вилъ є҆сѝ стоѧ́нїе всено́щное, моли́твꙋ, мꙋ́дре, неѡскꙋ́днꙋ, вѣ́рꙋ и҆́стиннꙋю, бжⷭ҇твенное смире́нїе.

До́брыхъ видѣ̑нїи ᲂу҆краша́емь, ꙗ҆́кѡ а҆́гг҃лъ ви́дѣнъ бы́лъ є҆сѝ, въ пло́ти жи́тельствꙋѧ, и҆ преше́дъ всели́лсѧ є҆сѝ со а҆́гг҃лы, ѻ҆́ч҃е бг҃облаже́нне палла́дїе.

А҆́гг҃лы и҆мѣ́ѧ спомо́щники, де́мѡнскаѧ ѿрази́лъ є҆сѝ мечта̑нїѧ, и҆ всѧ̑ лꙋка̑вствїѧ, и҆ безъ преткнове́нїѧ проше́лъ є҆сѝ, ѽ бг҃облаже́нне! стезю̀ къ жи́зни вводѧ́щꙋю.

Бг҃оро́диченъ:

Глаго́лы, ѻ҆трокови́це всенепоро́чнаѧ, бжⷭ҇твеннагѡ гаврїи́ла ꙗ҆́кѡ ᲂу҆слы́шала є҆сѝ, сло́во зачала̀ є҆сѝ въ безсѣ́меннѣмъ чре́вѣ твое́мъ, и҆ па́че сло́ва сего̀ родила̀ є҆сѝ.

Гдⷭ҇и, поми́лꙋй, три́жды.

Сла́ва, и҆ ны́нѣ, сѣда́ленъ, гла́съ а҃. Подо́бенъ: Ка́мени запеча́танꙋ:

Мона́шествовавъ бг҃оꙋго́днѡ, бг҃оно́сне ѻ҆́ч҃е на́шъ, моли́твою и҆ посто́мъ бг҃а взыска́лъ є҆сѝ, и҆ бы́лъ є҆сѝ прїѧ́телище чи́сто дх҃а, блиста́ѧ вѣ̑рнымъ добродѣ́тєльныѧ зари̑, и҆́миже просвѣща́еши всѧ̑ чтꙋ́щыѧ тѧ̀. сла́ва просла́вльшемꙋ тѧ̀ хрⷭ҇тꙋ̀, сла́ва ᲂу҆крѣ́пльшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣле́нїе.

Пѣ́снь з҃. І҆рмо́съ:

Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Пресла́вными ᲂу҆каза̑нїи, всебога́те, чꙋде́съ, всѣ́хъ дꙋ́шы притека́ющихъ къ тебѣ̀ просвѣща́еши бл҃года́тїю вседержи́телевою, просвѣти́вшагѡ твою̀ дꙋ́шꙋ, и҆ показа́вшагѡ ю҆̀ со́лнца свѣтлѣ́йшꙋю.

Возлюби́въ соверше́ннѣйше гдⷭ҇а ᲂу҆ма̀ пра́востїю, и҆ ѿ негѡ̀, всемꙋ́дре, соверше́ннѣ возлюби́сѧ: бл҃года́ть прїѧ́лъ є҆сѝ лꙋка̑выѧ ѿгонѧ́ти дꙋ́хи, и҆ и҆сцѣлѧ́ти всѧ̑ недꙋ́ги.

Сле́зъ твои́хъ течє́нїѧ прїи́мъ всеви́децъ бг҃ъ, ᲂу҆тѣше́нїѧ а҆́гг҃льскагѡ прича́стна тѧ̀ содѣ́ла, є҆́же полꙋчи́ша бг҃ꙋ слꙋжи́вшїи пра́востїю се́рдца.

Бг҃оро́диченъ:

Ми́лостиваго ро́ждши гдⷭ҇а, є҆ди́на бг҃облагода́тнаѧ, десни́цею є҆гѡ̀, чⷭ҇таѧ, поми́ловати мо́й ᲂу҆́мъ моли́сѧ, всегда̀ лю́тѣ совраша́емый жите́йскими печа́льми.

Пѣ́снь и҃. І҆рмо́съ:

Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Си́лою бжⷭ҇твенною ѡ҆полчє́нїѧ де́мѡнскаѧ па̑гꙋбнаѧ потреби́лъ є҆сѝ: бл҃года́ть же прїѧ́лъ є҆сѝ ᲂу҆ста́вити не́мѡщи, и҆ ѿгони́ти дꙋ́хи нечи̑стыѧ, вопїѧ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Пожи́въ, всеблаже́нне, бг҃оꙋго́днѡ, пра́вєднымъ ꙗ҆́вѣ до́лжнымъ сно́мъ ны́нѣ ᲂу҆снꙋ́лъ є҆сѝ, и҆ къ неконча́емомꙋ приве́лсѧ є҆сѝ наслажде́нїю, прпⷣбне, вопїѧ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Цѣльбы̑ и҆сточа́етъ пресла́внѡ ра́ка твоѧ̀, ѻ҆́ч҃е, прири́щꙋщымъ, ᲂу҆ставлѧ́ющи недꙋ́ги, стра̑сти же и҆зсꙋша́ющи: є҆́йже покланѧ́ющесѧ, пое́мъ житїѐ твоѐ, болѣ̑зни и҆ бж҃е́ствєнныѧ по́двиги, палла́дїе бл҃же́нне, свѣти́льниче мона́шествꙋющихъ.

Бг҃оро́диченъ:

Во́дъ мѧ̀ и҆спо́лни, дв҃о, бжⷭ҇твенныхъ, ꙗ҆́же и҆сто́чникъ ро́ждшаѧ, и҆зба́ви мѧ̀ зно́ѧ грѣхо́внагѡ, и҆ къ жи́зни пꙋтево́дстви, две́ре бжⷭ҇твенныѧ жи́зни, вопїю́ща: гдⷭ҇а по́йте дѣла̀, и҆ превозноси́те є҆го̀ во вѣ́ки.

Пѣ́снь ѳ҃. І҆рмо́съ:

Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.

Возмо́гъ бж҃їею си́лою и҆ бл҃года́тїю, ѻ҆́ч҃е, побѣди́ти ѕмі́ѧ хва́лѧщасѧ безꙋ́мїемъ, и҆ па́гꙋбнꙋю главꙋ̀ є҆гѡ̀ сокрꙋши́ти, и҆ попра́въ нога́ми твои́ми. тѣ́мже соше́дшесѧ, ᲂу҆ми́льною дꙋше́ю тебѐ ᲂу҆блажа́емъ.

Ꙗ҆ви́лсѧ є҆сѝ нб҃о высото́ю жи́тельства твоегѡ̀, чꙋдесы̀. ᲂу҆добрѧ́емь, всебога́те, ꙗ҆́кѡ бжⷭ҇твенными ѕвѣзда́ми, и҆ просвѣща́еши дꙋ́шы благоче́стнѡ всегда̀ приходѧ́щихъ тебѣ̀, и҆ чтꙋ́щихъ вѣ́рою по́двиги твоѧ̑, бг҃оно́сне, свѣти́ло свѣтлѣ́йшее.

Оу҆ста́вилъ є҆сѝ страсте́й течє́нїѧ, прпⷣбне, тꙋ́чами сле́зъ твои́хъ, стрꙋи̑ притека́ющымъ чꙋде́съ то́чиши, бг҃облаже́нне: ѿрѣва́еши зно́й страсте́й всегда̀, палла́дїе сла́вне, цр҃кве честно́е ᲂу҆добре́нїе.

Процвѣ́лъ є҆сѝ ꙗ҆́вѣ ꙗ҆́кѡ ши́покъ благово́нный въ цр҃кви хрⷭ҇то́вѣ, и҆ ѡ҆благоꙋха́лъ є҆сѝ чꙋде́сными вонѧ́ми мі́ра концы̀. тѣ́мже бжⷭ҇твеннꙋю твою̀ па́мѧть торжествꙋ́емъ, въ не́йже всѣ̑мъ и҆спросѝ ѡ҆ставле́нїе, бг҃оно́сне, мно́гихъ согрѣше́нїй.

Бг҃оро́диченъ:

Свѣ́тъ и҆́же и҆зъ свѣ́та, возсїѧ̀ и҆зъ чре́ва твоегѡ̀, мт҃и приснодв҃о, и҆ пре́лести тмꙋ̀ ѿгна̀, и҆ земны̑ѧ концы̀ всѧ̑ просвѣтѝ. тѣ́мже вѣ́рою, ра́дꙋйсѧ, зове́мъ тебѣ̀, бцⷣе, прпⷣбныхъ похвало̀.

Стїхи̑ры, гла́съ а҃. Подо́бенъ: Всехва́льнїи мꙋ́чєницы:

Припѣ́въ: Прпⷣбне ѻ҆́ч҃е палла́дїе, молѝ бг҃а ѡ҆ на́съ.

Оу҆́мъ тво́й просвѣща́емь свѣ́томъ, ꙳ всебл҃же́нне палла́дїе, трисо́лнечнагѡ бжⷭ҇тва̀ ꙳ хра́мъ бы́лъ є҆сѝ чи́стый, ꙳ бжⷭ҇твєнныѧ ст҃а́гѡ дх҃а зари̑ разꙋ́мнѡ прїе́млѧ. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

А҆́гг҃лы споспѣ́шники и҆мѣ́ѧ, мꙋ́дре, ꙳ ᲂу҆крѣплѧ́ющыѧ тѧ̀, ꙳ де́мѡнскаѧ мечта̑нїѧ, ꙳ и҆ лꙋка̑ваѧ дѣѧ̑нїѧ ѿрази́лъ є҆сѝ, ѻ҆́ч҃е, ꙳ и҆ пꙋ́ть проше́лъ є҆сѝ, ꙳ вводѧ́щїй къ бжⷭ҇твенномꙋ поко́ю. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Сла́ва:

Дꙋше́вною чистото́ю, мꙋ́дре, ꙳ бг҃оно́сне сла́вне, ꙳ чи́стомꙋ ᲂу҆подо́бивсѧ бг҃ꙋ ꙳ зижди́телю твоемꙋ̀, ꙳ же́ртва жива̀ томꙋ̀ прине́слсѧ є҆сѝ, ꙳ ꙗ҆́кѡ храни́тель тогѡ̀ повелѣ́нїй. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

И҆ ны́нѣ, бг҃оро́диченъ:

Пречⷭ҇тый хра́мъ бж҃їй, ꙳ нб҃съ ши́ршїй ꙳ и҆ херꙋві̑мъ ст҃ѣ́йшїй, бг҃облагода́тнаѧ всест҃а́ѧ ѻ҆трокови́це, ꙳ ᲂу҆́мъ мо́й ѡ҆благодатѝ, ꙳ и҆ просвѣтѝ сердє́чныѧ ѻ҆́ч҃и, ꙳ подаю́щи мѝ благопрїѧ́тнымъ твои́мъ хода́тайствомъ ꙳ прегрѣше́нїй всѣ́хъ ѿпꙋще́нїе.

Крⷭ҇тобг҃оро́диченъ. Подо́бенъ: то́йже:

Дв҃а нескве́рнаѧ дре́вле, ꙳ на дре́вѣ зрѧ́щи бг҃а, ꙳ є҆го́же и҆зъ безсѣ́менна чре́ва родѝ, ꙳ не терпѧ́щи ᲂу҆тро́бнагѡ ᲂу҆ѧзвле́нїѧ, ꙳ терза́ющисѧ глаго́лаше: ꙳ ма́нїемъ содержа́й всю̀ тва́рь, ꙳ ка́кѡ, ꙗ҆́кѡ ѡ҆сꙋ́жденникъ, на крⷭ҇тѣ̀ распѧ́лсѧ є҆сѝ, ꙳ хотѧ́й спастѝ всѐ человѣ́чество;

На ᲂу҆́трени ѻ҆́ба канѡ́на ѻ҆ктѡ́иха, безъ мꙋ́ченичнѡвъ:

И҆ ст҃а́гѡ на ѕ҃, є҆гѡ́же краегране́сїе:

Пе́рсїна і҆а́кѡва пѣ́сньми мꙋ́ченика пою̀. Творе́нїе і҆ѡ́сифово.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Хрⷭ҇то́вꙋ престо́лꙋ ны́нѣ предстоѧ̀ вѣнцено́сецъ, сла́вне мꙋ́чениче і҆а́кѡве, свѣтоно́снꙋю мнѣ̀ зарю̀ и҆ благода́ть съ нб҃сѐ да́ждь моли́твами твои́ми.

Ꙗ҆́коже ᲂу҆́тро на́мъ возсїѧ́лъ є҆сѝ многосвѣ́тлое, ѿ восто́ка и҆сходѧ̀, и҆ просвѣти́лъ є҆сѝ хрⷭ҇то́вꙋ цр҃ковь свѣ́тлостїю страда́нїй, мч҃ниче і҆а́кѡве.

Ю҆́ношеское сопротивле́нїе показа́въ, ꙗ҆́кѡ побѣди́тель, сподо́билсѧ є҆сѝ по́чести, и҆ соверше́ннагѡ натрижне́нїѧ, и҆ сла́вы вѣ́чныѧ, мꙋ́чениче і҆а́кѡве.

Бг҃оро́диченъ:

Прⷪ҇ро́чєскїѧ тѧ̀ трꙋбы̑ провозвѣсти́ша, є҆́же ѡ҆ тебѣ̀ та́инство проповѣ́дающе, бцⷣе дв҃о, и҆здале́ча зрѧ́ще твоѧ̑ чꙋдеса̀.

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Бы́лъ є҆сѝ ꙗ҆́кѡ и҆збра́нна хрⷭ҇то́ва лоза̀, серпо́мъ мꙋче́нїй ѡ҆чища́ема, и҆ мно́гъ пло́дъ носѧ́щаѧ, въ точи́лѣхъ сп҃совыхъ приноси́мый.

Текꙋ́щихъ тлѣ́нное и҆ ᲂу҆доборазрѣ́шное презрѣ́лъ є҆сѝ смы́сленнѡ, вѣнцено́сче: ꙗ҆́кѡ ѻ҆строꙋ́мный же пред̾избра́лъ є҆сѝ приснопребыва́ющихъ незы́бленное.

Вѣнцы̀ тебѣ̀ свѣ́тлы, раздроблѧ́емое тѣ́ло сꙋровство́мъ мꙋчи́телей и҆схода́тайствова, і҆а́кѡве, и҆ пи́щи ра́йскїѧ наслажде́нїе.

Бг҃оро́диченъ:

Поми́ловано бы́сть ꙗ҆́вѣ ржⷭ҇тво́мъ твои́мъ бжⷭ҇твеннымъ, дв҃о, человѣ́чество, соедини́вшеесѧ по ѵ҆поста́си влⷣцѣ всѣ́хъ, бг҃оневѣ́сто.

Сѣда́ленъ, гла́съ и҃. Подо́бенъ: Премꙋ́дрости:

И҆зъ персі́ды ѕвѣздꙋ̀ новоѧвле́ннꙋю, хрⷭ҇то́съ возсїѧ̀ земны̑мъ бжⷭ҇твеннаго і҆а́кѡва, и҆ приснопа́мѧтнаго мꙋ́ченика: тогѡ̀ ра́ди пре́лести мра́къ ѿгна̀, и҆ вѣ̑рнымъ бл҃года́ть дх҃а возсїѧ̀. тѣ́мже па́мѧть є҆гѡ̀ соверша́юще вѣ́рнѡ пра́зднꙋимъ, и҆ возопїи́мъ глаго́люще: страстоте́рпче многострада́льне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Въ ти́нꙋ впа́дъ грѣхѡ́въ, и҆ нѣ́сть мнѣ̀ постоѧ́нїѧ, лю́тѣ потопи́ мѧ бꙋ́рѧ прегрѣше́нїй: но ꙗ҆́кѡ ро́ждши сло́во, є҆ди́наго человѣколю́бца, на мѧ̀ раба̀ твоего̀ при́зри, и҆ и҆зба́ви мѧ̀ всѧ́кагѡ грѣха̀, и҆ страсте́й дꙋшетлѣ́нныхъ, и҆ всѧ́кагѡ ѡ҆ѕлобле́нїѧ лꙋка́вагѡ ᲂу҆бі́йцы, бцⷣе неискꙋсомꙋ́жнаѧ: молѝ хрⷭ҇та̀ бг҃а грѣхѡ́въ ѡ҆ставле́нїе да́ти мѝ, тебе́ бо наде́ждꙋ и҆́мамъ ра́бъ тво́й.

Крⷭ҇тобг҃оро́диченъ:

Дв҃а и҆ мт҃и и҆зба́вителѧ, крⷭ҇тꙋ̀ предстоѧ́щи, болѣ́зненнѡ со слеза́ми рыда́ющи, мт҃рски вопїѧ́ше: что̀ стра́нное сїѐ, и҆ пресла́вное, сн҃е; и҆сточа́ѧй всѣ̑мъ человѣ́кѡмъ безстра́стїе, посредѣ̀ ѡ҆сꙋждє́ною на крⷭ҇тѣ̀ распѧ́лсѧ є҆сѝ, въ рє́бра пробода́емь, и҆ же́лчїю напаѧ́емь, ѿ рꙋ́къ, ꙗ҆̀же созда́лъ є҆сѝ; но воста́ни, и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєннаѧ твоѧ̑ страда̑нїѧ.

Пѣ́снь д҃. І҆рмо́съ:

Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.

Вжилѧ́емь, сла́вне, ѿ бг҃а да́ннымъ тебѣ̀ всеѻрꙋ́жїемъ, ѻ҆гнеслꙋжи́телей ле́сть всю̀ попали́лъ є҆сѝ.

Ѡ҆чище́нїе на́мъ и҆спросѝ, честнꙋ́ю твою̀ па́мѧть соверша́ющымъ, дерзнове́нїе и҆мѣ́ѧ, мꙋ́чениче і҆а́кѡве.

Текꙋ́щыѧ кро́ве то́ки ѿ твои́хъ ᲂу҆де́съ, треблаже́нне, пре́лести пла́мень ве́сь погаси́ша.

Бг҃оро́диченъ:

Оу҆пра́ви моѧ̑ помышлє́нїѧ, пречⷭ҇таѧ, къ благоти́хомꙋ приста́нищꙋ твоегѡ̀ безстра́стїѧ и҆ чистоты̀.

Пѣ́снь є҃. І҆рмо́съ:

Свѣ́та пода́телю, и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

Ꙗ҆́коже нѣ́каѧ землѧ̀ блага́ѧ, и҆ добропло́днаѧ и҆́стиннѡ бы́лъ є҆сѝ, ра́ломъ го́рькихъ мꙋ́къ раздроблѧ́емь, мꙋ́дре, многокла́сное зижди́телю приносѧ̀ земледѣ́ланїе.

Стрѣ́лы, всеизѧ́щне, разжжє́ныѧ вра̑жїѧ ᲂу҆гаси́лъ є҆сѝ кро́вїю ѿсѣ́ченыхъ твои́хъ ᲂу҆де́съ тѣле́сныхъ, треблаже́нне: наде́ждею бо ꙗ҆ви́лсѧ є҆сѝ и҆ вѣ́рою ѡ҆гражда́емь.

Всепло́дно ꙗ҆́кѡ ѻ҆вча̀ хрⷭ҇тꙋ̀, премꙋ́дре, твои̑мъ ᲂу҆десє́мъ рѣ́жємымъ лю́тѣ, побѣ́днꙋю пѣ́снь и҆ досто́йнꙋю хвалꙋ̀ на кі́йждо приноси́лъ є҆сѝ.

Дае́ши ѡ҆чище́нїе дꙋше́вныхъ мои́хъ скве́рнъ, сла́вне мꙋ́чениче хрⷭ҇то́въ, твоѧ̑ болѣ̑зни, и҆збавле́нїе подава́ѧ крове́й твоѧ̑ то́ки, всехва́льне.

Бг҃оро́диченъ:

И҆́стинствꙋющїй честно́мꙋ и҆ стра́шномꙋ ржⷭ҇твꙋ̀ твоемꙋ̀ гла́съ се́рдцемъ и҆ ѧ҆зы́комъ приносѧ́ще ꙗ҆́снѡ, тѧ̀ ны́нѣ бцⷣꙋ чⷭ҇тꙋю и҆менꙋ́емъ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Поꙋче́нїе смы́сленнѡ прїе́мъ бли́жнихъ твои́хъ, ра́дꙋѧсѧ ᲂу҆стреми́лсѧ є҆сѝ къ подвигѡ́мъ, сла́вне, и҆ вѣнцы̀ побѣ́ды прїѧ́лъ є҆сѝ.

Ꙗ҆́коже въ чꙋжде́мъ тѣлесѝ стражда̀, терпѣ́лъ є҆сѝ, мꙋ́чениче і҆а́кѡве, и҆ на ᲂу҆́ды раздроблѧ́емь, влⷣцѣ пѣ́снь возсыла́лъ є҆сѝ.

Спасе́нїѧ въ ри́зꙋ ꙗ҆́вственнѡ, и҆ весе́лїѧ ѻ҆де́ждꙋ, кро́вїю твое́ю ѡ҆багри́вшꙋюсѧ, премꙋ́дре, побѣдоно́сецъ ꙗ҆́кѡ мꙋ́ченикъ ѡ҆бле́клсѧ є҆сѝ.

Мꙋче́нїѧ преплы́тїе соверши́въ, тѣ́мже свѧщеннопобѣ́дный вѣне́цъ прїѧ́лъ є҆сѝ: и҆ ны́нѣ съ мч҃ническими чи́нми сликовствꙋ́еши досто́йнѡ, і҆а́кѡве сла́вне.

Бг҃оро́диченъ:

Неискꙋсомꙋ́жнѡ, дв҃о, родила̀ є҆сѝ, и҆ вѣ́чнꙋеши дв҃а, ꙗ҆влѧ́ющи и҆́стиннагѡ бжⷭ҇тва̀, сн҃а и҆ бг҃а твоегѡ̀ зна́мєнїѧ.

Конда́къ, гла́съ в҃. Подо́бенъ: Вы́шнихъ и҆щѧ̀:

Оу҆вѣ́ривсѧ до́брою сопрꙋ́жницею, терпѣливодꙋ́шне, и҆ стра́шнагѡ сꙋди́ща ᲂу҆боѧ́всѧ, пе́рсское повелѣ́нїе и҆ стра́хъ, і҆а́кѡве, поплева́лъ є҆сѝ, и҆ ꙗ҆ви́лсѧ є҆сѝ мꙋ́ченикъ честны́й, тѣ́ломъ ꙗ҆́кѡ розга̀ рѣ́жемь.

І҆́косъ:

Ѿ дꙋшѝ возстене́мъ всѝ, сле́зы пролива́юще, зрѧ́ще мꙋ́ченика го́рькѡ раздроблѧ́ема, подо́бнѡ псѡ́мъ рыка́ющымъ, соше́дшесѧ ᲂу҆́ды растерза́ютъ чꙋ́днагѡ и҆ до́блѧгѡ въ свидѣ́телехъ мꙋ́ченика, что̀ ᲂу҆́бѡ є҆́сть, да прирекꙋ̀; а҆́ще хо́щете, ма́лѡ пожди́те, и҆ рекꙋ̀ всѧ̑ со тща́нїемъ: ка́кѡ во є҆ди́нъ де́нь бы́сть сме́рть, тѣ́ломъ і҆а́кѡвъ ꙗ҆́кѡ розга̀ рѣ́жемь.

Пѣ́снь з҃. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Крѣ́постїю ᲂу҆́мною, терпѣ́нїемъ же дꙋше́внымъ, раздроблѧ́емꙋ, мꙋ́чениче, твоемꙋ̀ тѣ́лꙋ, непрело́женъ и҆ непрекло́ненъ бы́лъ є҆сѝ вѣ́рою ᲂу҆крѣплѧ́емь бжⷭ҇твенною, и҆ зовы́й, і҆а́кѡве: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

И҆спра́вивъ твоѧ̑ помышлє́нїѧ къ смотре́нїю вы́шнѧгѡ зва́нїѧ, и҆ мꙋ́ками ѡ҆блива́емь не потопи́лсѧ є҆сѝ: но терпѧ̀ ᲂу҆до́бнѡ ꙗ҆́звы беззако́нныхъ, и҆ разсѣка́емь, пѣ́лъ є҆сѝ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Бл҃же́нъ є҆сѝ, и҆ добро̀ тебѣ̀ є҆́сть ны́нѣ, блаже́ннѣйше, побѣди́вшꙋ тѝ неꙋкроти́мое лꙋка́вагѡ свирѣ́пство и҆ мꙋчи́телевꙋ ꙗ҆́рость, ᲂу҆се́рднѡ зовꙋ́щꙋ тѝ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Бг҃оро́диченъ:

Незаходи́магѡ свѣ́та, и҆ свѣщѝ бжⷭ҇твеннагѡ сїѧ́нїѧ, ꙗ҆ви́ласѧ є҆сѝ свѣ́щникъ златосїѧ́ющь, и҆ мі́ръ ве́сь ѡ҆зарѧ́ющь заре́ю честна́гѡ дѣ́вства, и҆ пою́щыѧ спаса́еши: бл҃гослове́ннаѧ, ꙗ҆́же бг҃а пло́тїю ро́ждшаѧ.

Пѣ́снь и҃. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Си́лою бж҃їею ᲂу҆крѣпи́всѧ, лꙋка́выхъ собѡ́рища и҆ ѡ҆полчє́нїѧ разогна́лъ є҆сѝ, блаже́нне, и҆ держа́внѡ ѿгна́въ, побѣ́ды вѣне́цъ прїѧ́лъ є҆сѝ, зовы́й: благослови́те всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те є҆го̀ во вѣ́ки.

Ѿѧ̑тїѧ ᲂу҆де́съ, ꙗ҆́кѡ приложє́нїѧ благи́хъ, мꙋ́чениче, зрѣ́лъ є҆сѝ, не ны̑нѣшнїѧ ви́дѧ бѡлѣ́зни, но бꙋ́дꙋщее смотрѧ́ѧ мꙋ́ченикѡвъ кра́сное вѣнча́нїе, ѿ пра́веднагѡ сꙋдїѝ ᲂу҆гото́ванное.

Терпѣ́нїе преесте́ственное стѧжа́въ тве́рдѡ, ꙗ҆́коже сто́лпъ пре́былъ є҆сѝ, блаже́нне, вра̑жїѧ стремлє́нїѧ безстра́шнѡ и҆ стрѣ́лы прїе́млѧ, зовы́й: благослови́те хрⷭ҇та̀ во вѣ́ки.

Оу҆стремле́нїемъ мно́гимъ тебѣ̀ приложи́всѧ началоѕло́бный вра́гъ и҆ дꙋшетлѣ́нный, и҆ мꙋчи́тели подви́гнꙋвъ низложи́ти дꙋшѝ твоеѧ̀ крѣ́пость, и҆ не возмо́же, сла́вне: во всеѻрꙋ́жїе бо хрⷭ҇то́во ѡ҆дѣ́ѧлъ є҆сѝ себѐ.

Бг҃оро́диченъ:

Безсме́ртїѧ проза́рный вѣ́мы тѧ̀ и҆сто́чникъ, бцⷣе, ꙗ҆́кѡ ро́ждшꙋю сло́во безсме́ртнаго ѻ҆ц҃а̀, всѧ̑ сме́рти и҆зба́вльшаго, превозносѧ́щыѧ є҆го̀ во вѣ́ки.

Пѣ́снь ѳ҃. І҆рмо́съ:

Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Съ мꙋ́чєники ꙗ҆́кѡ мч҃никъ сликовствꙋ́ѧ, треблаже́нне, и҆ прⷭ҇то́лꙋ предстоѧ̀ хрⷭ҇то́вꙋ, соверша́ющыѧ па́мѧть твою̀, и҆ тво́й свѣтоно́сный съ весе́лїемъ дне́сь чтꙋ́щыѧ пра́здникъ лю́тыхъ бѣ́дъ твои́ми моли́твами и҆зба́ви.

И҆дѣ́же мꙋ́ченикѡвъ собо́ри, и҆дѣ́же всѣ́хъ ст҃ы́хъ ст҃о́е ᲂу҆поко́исѧ мно́жество, и҆дѣ́же пра́ведныхъ дꙋ́си, и҆дѣ́же цр҃ковь перворожде́нныхъ, ны́нѣ на нб҃сѣ́хъ всели́лсѧ є҆сѝ вои́стиннꙋ ꙗ҆́кѡ мч҃никъ, ѽ і҆а́кѡве!

Свѣщено́сецъ предста́лъ є҆сѝ сп҃сꙋ всѣ́хъ, за него́же тѣ́ла твоегѡ̀ ᲂу҆де́съ ѿсѣче́нїе претерпѣ́лъ є҆сѝ, и҆ ѻ҆гнѧ̀ и҆ ра̑нъ и҆скꙋше́нїѧ неради́лъ є҆сѝ крѣ́пкѡ: тѣ́мже тѧ̀ всѝ вѣ́рою и҆ любо́вїю ᲂу҆блажа́емъ, і҆а́кѡве.

И҆спещре́нною баграни́цею, кровьмѝ твои́ми ѡ҆червленѣ́вшеюсѧ ны́нѣ ѡ҆дѣ́ѧнъ, со хрⷭ҇то́мъ ца́рствꙋеши, і҆а́кѡве: страстьми́ бо безстра́стїѧ ѡ҆брѣ́лъ є҆сѝ и҆сто́чникъ, є҆гѡ́же наслажда́тисѧ вѣ́чнѡ, всебл҃же́нне, сподо́билсѧ є҆сѝ.

Бг҃оро́диченъ:

Ꙗ҆́кѡ бг҃а заче́ншꙋю, и҆ бж҃їю мт҃рь бы́вшꙋю и҆́стиннѡ чⷭ҇тꙋю, тѧ̀ бцⷣꙋ сла́вимъ, веще́й є҆стествꙋ̀, зва́нїе прили́чествꙋюще ꙗ҆́снѡ, и҆ подо́бнѡ бжⷭ҇твенный тебѣ̀ гла́съ приносѧ́ще.

Свѣти́ленъ. Подо́бенъ: Дх҃омъ во ст҃и́лищи:

Ꙗ҆́кѡ ло́зꙋ ѡ҆брѣ́заемꙋ мно́гими мꙋ́ками, просла́ви гдⷭ҇и, ꙗ҆́кѡ вїногра́дъ честны́й, вїно̀ и҆сточа́ющь, ѿ и҆стѡ́чникъ крове́й твои́хъ, і҆а́кѡве страстоте́рпче, и҆ покрови́телю любо́вїю всесвѧще́ннꙋю твою̀ па́мѧть досто́йнѡ творѧ́щихъ.

Бг҃оро́диченъ:

Нѣ́сть ѿню́дъ во мнѣ̀ спасе́нїѧ, дв҃о, ꙗ҆́кѡ ѕлѣ̀ впадо́хъ во глꙋбинꙋ̀ грѣхо́внꙋю, и҆ ѡ҆жида́ю преще́нїѧ, и҆ стра́шнагѡ мꙋче́нїѧ, и҆ кѡ́злищь ча́сти, ᲂу҆ще́дри мѧ̀ пре́жде сꙋда̀, ꙗ҆́кѡ сꙋ́щи те́плое застꙋпле́нїе, бцⷣе.

На стїхо́внѣ ѻ҆ктѡ́иха. Сла́ва, ст҃а́гѡ, гла́съ в҃. Стꙋді́тово:

Терпѧ̀ въ страда́нїихъ, мꙋ́чениче і҆а́кѡве, тѣ́ло твоѐ преда́лъ є҆сѝ за хрⷭ҇та̀ бг҃а, и҆ раздроблѧ́емь рꙋ́цѣ и҆ стє́гна, и҆ мы̑шцы и҆ лы̑ста и҆ пе́рсты, и҆ коне́чное главꙋ̀ твою̀, возлетѣ́лъ є҆сѝ на нб҃са̀, сца́рствꙋѧ цр҃ю̀ всѣ́хъ. тѣ́мже, страда́льцємъ держа́внѣйше, не ѡ҆скꙋдѣва́й молѧ́сѧ спасти́сѧ дꙋша́мъ на́шымъ ѿ всѧ́кагѡ вре́да чꙋжда́гѡ.

И҆ ны́нѣ, бг҃оро́диченъ и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:

Є҆гда̀ нескве́рнаѧ а҆́гница ви́дѣ своего̀ а҆́гница, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи гл҃го́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче.

На лїтꙋргі́и прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. А҆пⷭ҇лъ ко є҆фесе́ємъ, зача́ло сл҃г. А҆ллилꙋ́їа. Мнѡ́ги скѡ́рби пра́вєднымъ: Є҆ѵⷢ҇лїе і҆ѡа́нна зача́ло н҃. Прича́стенъ: Въ па́мѧть вѣ́чнꙋю:

Слꙋ́жба зна́менїѧ прест҃ы́ѧ бцⷣы, бы́вшагѡ въ вели́комъ новѣ́градѣ.

На ма́лѣй вече́рни,

На Гдⷭ҇и, воззва́хъ, стїхи̑ры на д҃, гла́съ а҃. Поⷣ: Нбⷭ҇ныхъ чинѡ́въ:

Ны́нѣ наста̀ де́нь ра́достенъ ꙳ и҆ весе́лїѧ и҆спо́лненъ дне́сь: ꙳ ѿ скорбе́й бо премѣне́нїе, дв҃о бг҃ороди́тельнице, ꙳ зна́менїе і҆кѡ́ны твоеѧ̀, пречⷭ҇таѧ, ꙳ пра́здникъ свѣ́телъ торжествꙋ́юще зове́мъ: ꙳ влⷣчце, и҆зба́ви ѿ бѣ́дъ дꙋ́шы на̑ша.

Два́жды.

Сѐ ны́нѣ вре́мѧ благопрїѧ́тно, ꙳ сѐ ны́нѣ де́нь спасе́нїѧ, ꙳ сѐ хра́мъ пресвѣ́телъ и҆ мѣ́сто свѧще́нїѧ, ꙳ зна́менїѧ і҆кѡ́ны твоеѧ̀, пречⷭ҇таѧ, ꙳ пра́здникъ дꙋхо́внѣ соверша́юще, вопїе́мъ: ꙳ влⷣчце мт҃и хрⷭ҇та̀ бг҃а, ꙳ и҆зба́ви ѿ бѣ́дъ дꙋ́шы на́шѧ.

Чꙋ́дное ѡ҆долѣ́нїе, ꙳ и҆ зна́менїе стра́шно и҆ ве́щь пресла́внꙋю ꙳ дне́сь пра́зднꙋюще лю́дїе твоѝ, бцⷣе, ꙳ похва́льнꙋю пѣ́снь съ гаврїи́ломъ прино́симъ тѝ, глаго́люще: ꙳ ра́дꙋйсѧ, ѡ҆бра́дованнаѧ.

Сла́ва, и҆ ны́нѣ, гла́съ а҃:

Ди̑вна правосла́вныхъ торжєства̀, дне́сь сте́кшесѧ ѱалѡ́мскаѧ пѣ̑нїѧ принесе́мъ, глаго́люще: воскрⷭ҇нѝ, гдⷭ҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀: ꙗ҆́кѡ побѣ́дꙋ дарова́лъ є҆сѝ ѻ҆́бразъ пречⷭ҇тыѧ твоеѧ̀ мт҃ре, сло́ве. є҆ѧ́же моли́твами, і҆и҃се всеси́льне, спасѝ дꙋ́шы на́шѧ.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

До́мꙋ премꙋ́дрости бж҃їѧ, ꙳ чꙋ́дномꙋ ст҃и́телю, ꙳ ꙗ҆́вльсѧ свѣ́тлымъ ѻ҆́бразомъ, ꙳ дерза́ти повелѣва́етъ, ꙳ и҆ наде́жди не ѿпа́дати.

Сті́хъ: Воскреснѝ, гдⷭ҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀.

Въ хра́мъ тво́й, влⷣчце, ꙳ соше́дшесѧ наро́ди, ꙳ молѧ́шесѧ глаго́лахꙋ: ꙳ ви́ждь ѡ҆ѕлобле́нїе на́ше, ꙳ и҆ пода́ждь на́мъ по́мощь, пречⷭ҇таѧ.

Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Ви́ждь, пречⷭ҇таѧ, бѣды̑ ра̑бъ твои́хъ, ꙳ и҆ не ѿри́ни на́съ въ коне́цъ, ꙳ на твою̀ по́мощь надѣ́ющихсѧ, ꙳ да всѝ вопїе́мъ тѝ: ꙳ ра́дꙋйсѧ, ѡ҆бра́дованнаѧ.

Сла́ва, и҆ ны́нѣ, гла́съ а҃:

Стрѣло́ю стрѣли́вшихъ неразꙋ́мнѣ, ѻ҆́бразꙋ твоемꙋ̀, пречⷭ҇таѧ, бг҃ора́нною стрѣло́ю тѣ́хъ ᲂу҆ѧзвѝ, не то́кмѡ сердца̀, но и҆ дꙋ́шы: и҆ и҆сто́чникъ честны́ѧ і҆кѡ́ны твоеѧ̀, тѣ̑мъ неꙋтѣ́шимый пла́чь наведѐ, на́мъ же лю́демъ твои̑мъ ра́дость ве́лїю сотворѝ і҆кѡ́ною твое́ю, пречⷭ҇таѧ мт҃и сло́ва: є҆ѧ́же ра́ди спасѝ дꙋ́шы на́шѧ.

Тропа́рь, гла́съ д҃:

Ꙗ҆́кѡ неѡбори́мꙋю стѣ́нꙋ и҆ и҆сто́чникъ чꙋде́съ стѧжа́вше тѧ̀ рабѝ твоѝ, бцⷣе пречⷭ҇таѧ, сопроти́вныхъ ѡ҆полчє́нїѧ низлага́емъ. тѣ́мже мо́лимъ тѧ̀: ми́ръ гра́дꙋ твоемꙋ̀ да́рꙋй, и҆ дꙋша́мъ на́шымъ ве́лїю ми́лость.

На вели́цѣй вече́рни стїхологисꙋ́емъ, Бл҃же́нъ мꙋ́жъ: пе́рвый а҆нтїфѡ́нъ.

На Гдⷭ҇и, воззва́хъ, стїхи̑ры на п҃, гла́съ и҃. Самогла́сны:

Го́рдостїю за́висти распали́вшесѧ, и҆ неи́стовствомъ ѡ҆держи́ми, и҆ногда̀ ненака́заннїи, наче́нше проти̑внаѧ на гра́дъ тво́й, пречⷭ҇таѧ: но ѻ҆ба́че са́ми спѧ́ти бы́ша и҆ падо́ша, ѱало́мски, при а҆́дѣ, бг҃ороди́тельнице.

Внегда̀ ᲂу҆́бѡ мꙋ́жїе вели́кагѡ нова́града, ви́дѣвше себѐ проти́вными ѡ҆бстои́мы, ни ѿкꙋ́дꙋ же по́мощи надѣ́ющесѧ, то́кмѡ тебѣ̀, пречⷭ҇таѧ, молѧ́щесѧ, глаго́лахꙋ: ви́ждь, бцⷣе, бѣды̑ ра̑бъ твои́хъ, и҆ не ѿри́ни моле́нїѧ на́шегѡ въ коне́цъ, да разꙋмѣ́ютъ сопроти́внїи, ꙗ҆́кѡ ты̀ є҆сѝ, пречⷭ҇таѧ, застꙋпле́нїе дꙋша́мъ на́шымъ.

Ди́внꙋю гра́дꙋ твоемꙋ̀ побѣ́дꙋ дарова́ла є҆сѝ, дв҃о пречⷭ҇таѧ. ты́ бо є҆сѝ томꙋ̀ тве́рдое ѡ҆гражде́нїе, на врагѝ ᲂу҆крѣплѧ́ющи[[Исправлена опечатка оригинала: ᲂу҆крѣплѧ́ющи. Прим. orthlib]], и҆ держа́внѡ непокори̑выѧ покарѧ́ющи при́снѡ. тѣ́мже чи́стою вѣ́рою сла́вимъ тѧ̀, и҆ сн҃ꙋ твоемꙋ̀ любе́знѡ вопїе́мъ: і҆и҃се всеси́льне, спасѝ всѣ́хъ, ꙗ҆́кѡ милосе́рдъ.

Да́лъ є҆сѝ зна́менїе живо́тное, ѻ҆́бразъ, пречⷭ҇тыѧ твоеѧ̀ мт҃ре, сло́ве, ю҆́же зрѧ́ще любе́знѡ ѡ҆блобыза́емъ, и҆ ѿ сеѧ̀ ра́дости и҆спо́лнившесѧ, стра́шни врагѡ́мъ борю́щымсѧ съ на́ми ꙗ҆влѧ́емсѧ, и҆ та́инство премꙋ́дрости бж҃їѧ ви́дѣвше, хва́лимъ тѧ̀ па́че сло́ва ро́ждшагосѧ и҆зъ неѧ̀: і҆и҃се, чꙋ́днаѧ добро́то, спасѝ всѣ́хъ, ꙗ҆́кѡ милосе́рдъ.

Сла́ва, и҆ ны́нѣ, гла́съ ѕ҃:

Весели́тесѧ, лю́дїе, и҆ всѝ правосла́внїи собо́ри вели́кагѡ нова́града дне́сь, и҆ рꙋка́ми восплещи́те ꙗ҆зы́цы съ весе́лїемъ: се́ бо цр҃и́ца, цр҃ѧ̀ хрⷭ҇та̀ ро́ждшаѧ, ст҃и́телю ꙗ҆ви́сѧ чꙋ́днымъ ѻ҆́бразомъ, дерза́ти наро́дѡмъ повелѣва́ѧ, ꙗ҆́коже нѣ́кїй воево́да: въ печа́ли сꙋ́щымъ тогда̀ ра́дость сотворѝ, сопроти́вныхъ побѣди́вши. и҆ тебѣ̀, ра́дость ро́ждшей всѣ̑мъ, любо́вїю вопїе́мъ: дв҃о пречⷭ҇таѧ, молѝ спасти́сѧ дꙋша́мъ на́шымъ.

Вхо́дъ. Прокі́менъ днѐ. И҆ чтє́нїѧ. Бытїѧ̀ чте́нїе.

[Глава̀ к҃и] И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце, и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ, и҆ со́нъ ви́дѣ: И҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ, ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки. И҆ возблагословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши. И҆ возвращꙋ́ тѧ въ зе́млю сїю̀, ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ, нѣ́сть сїѐ, но до́мъ бж҃їй, и҆ сїѧ̀ врата̀ небє́снаѧ.

Прⷪ҇ро́чества і҆езекїи́лева чте́нїе.

[Глава̀ м҃г] Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ, и҆ прїимꙋ̀ вы̀, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. [м҃д] И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ заключє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ, по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ, сꙋ́щихъ къ сѣ́верꙋ, прѧ́мѡ до́мꙋ, и҆ ви́дѣхъ, и҆ сѐ и҆спо́лнь сла́вы до́мъ гдⷭ҇ень.

При́тчей чте́нїе.

[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑ созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀, и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїе бо нечести́вомꙋ, ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дрѣйшїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ. Разꙋмѣ́ти бо зако́нъ, по́мысла є҆́сть блага́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.

На лїті́и стїхи̑ры, гла́съ ѕ҃:

Ро́ги грѣ́шныхъ сотро́шасѧ, и҆ лꙋ́цы и҆́хъ сокрꙋши́шасѧ, грѣхо́вною бо тмо́ю ѻ҆́чи помрачи́вше, и҆ дрꙋ́гъ дрꙋ́га ꙗ҆́кѡ сопроти́вна зрѧ́ще, ѻ҆рꙋ́жїемъ неми́лостивнѡ себѐ ᲂу҆ѧзвлѧ́хꙋ: наро́ди же ви́дѣвше по́мощь твою̀, влⷣчце, на сопроти̑вныѧ ᲂу҆стреми́шасѧ, тебѐ на по́мощь призыва́юще.

Ꙗ҆́коже и҆ногда̀ крѣ́пкїй дв҃дъ, сопроти́вѧщагосѧ го́рдаго голїа́ѳа, си́лою сн҃а твоегѡ̀ препоѧ́савсѧ, низложѝ: та́кожде и҆ лю́дїе твоѝ, пречⷭ҇таѧ, и҆мꙋ́ще ѻ҆́бразъ тво́й честны́й, пресла́вно ѡ҆долѣ́нїе показа́ша.

Чꙋ́днаѧ побѣ́да и҆ ди́вное ѡ҆долѣ́нїе, честны́ѧ і҆кѡ́ны твоеѧ̀, пречⷭ҇таѧ мт҃и сло́ва, ᲂу҆дивлѧ́етъ ᲂу҆́мъ, и҆ ᲂу҆жаса́етъ по́мыслъ: без̾ѻрꙋ́жнїи бо ѻ҆рꙋ̑жныѧ побѣжда́хꙋ, си́лою твое́ю, дв҃о всепѣ́таѧ, и҆ посо́бїемъ бжⷭ҇твеннагѡ зра́ка твоегѡ̀, во спасе́нїе дꙋша́мъ на́шымъ.

Сла́ва, и҆ ны́нѣ, гла́съ то́йже:

Сѐ де́нь и҆збавле́нїѧ на́шегѡ наста̀, и҆ сме́рти премѣне́нїе, ра́дꙋйтесѧ собо́ри дне́сь вели́кагѡ нова́града, и҆ веселѧ́щесѧ торжествꙋ́йте: и҆̀же бо на на́съ подви́гшїисѧ, коне́чнѣ бг҃ора́нными ꙗ҆́звами ᲂу҆ѧзви́шасѧ. тѣ́мже пречⷭ҇тѣй, и҆ и҆зъ неѧ̀ нетлѣ́ннѡ воплоще́нномꙋ сло́вꙋ вопїе́мъ: і҆и҃се всеси́льне, моли́твами ро́ждшїѧ тѧ̀, спасѝ всѣ́хъ на́съ, ꙗ҆́кѡ милосе́рдъ.

На стїхо́внѣ стїхи̑ры, гла́съ а҃. Самогла́сны:

Ꙗ҆́коже дре́вле во і҆ерꙋсали́мѣ зорова́велемъ, держа́внаѧ твоѧ̀ десни́ца чꙋдодѣ́йствоваше, гдⷭ҇и, мно́жество безчи́сленное проти́вныхъ побѣдѝ: та́кожде и҆ си́хъ низложѝ прише́дшихъ разори́ти гра́дъ, є҆го́же и҆скꙋпи́лъ є҆сѝ кро́вїю твое́ю, сло́ве, да разꙋмѣ́ютъ ѿ дѣ́лъ, ꙗ҆́кѡ ты̀ и҆зба́витель съ на́ми є҆сѝ.

Сті́хъ: Воскрⷭ҇нѝ, гдⷭ҇и, въ поко́й тво́й, ты̀, и҆ кївѡ́тъ ст҃ы́ни твоеѧ̀.

Ди̑вна правосла́вныхъ торжєства̀, дне́сь сте́кшесѧ ѱало́мскаѧ пѣ̑нїѧ принесе́мъ, глаго́люще: воскрⷭ҇нѝ, гдⷭ҇и, въ поко́й тво́й, ты̀, и҆ кївѡ́тъ ст҃ы́ни твоеѧ̀, ꙗ҆́кѡ побѣ́дꙋ дарова̀ ѻ҆́бразъ пречⷭ҇тыѧ твоеѧ̀ мт҃ре, сло́ве. є҆ѧ́же моли́твами, і҆и҃се всеси́льне, спасѝ дꙋ́шы на́шѧ.

Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Стрѣло́ю стрѣли́вшихъ неразꙋ́мнѣ, ѻ҆́бразꙋ твоемꙋ̀, пречⷭ҇таѧ, бг҃ора́нною стрѣло́ю тѣ́хъ ᲂу҆ѧзвѝ, не то́кмѡ сердца̀, но и҆ дꙋ́шы, и҆ и҆сто́чникъ честны́ѧ і҆кѡ́ны твоеѧ̀. тѣ́мъ неꙋтѣ́шимый пла́чь наведѐ, на́мъ же лю́демъ твои̑мъ ра́дость ве́лїю сотворѝ і҆кѡ́на твоѧ̀, пречⷭ҇таѧ мт҃и сло́ва: є҆ѧ́же ра́ди спасѝ дꙋ́шы на́шѧ.

Сла́ва, и҆ ны́нѣ, гла́съ и҃:

Мнѧ́щесѧ непокори́вїи ѿ ѡ҆снова́нїѧ разори́ти гра́дъ тво́й, пречⷭ҇таѧ, не разꙋмѣ́вше по́мощь твою̀, влⷣчце: но си́лою твое́ю низложе́ни бы́ша, на бѣжа́нїе ᲂу҆стремлѧ́хꙋсѧ, и҆, ꙗ҆́коже ю҆́зами желѣ́зными, слѣпото́ю свѧ́зани бы́вше, и҆ мра́комъ, ꙗ҆́коже дре́вле є҆гѵ́петъ, ѡ҆б̾ѧ́ти не разꙋмѣ́вше, до́ндеже и҆ коне́чнѣ побѣжде́ни бы́ша. тѣ́мже чи́стою вѣ́рою сла́вимъ тѧ̀, и҆ сн҃ꙋ твоемꙋ̀ любе́знѡ вопїе́мъ: моли́твами ро́ждшїѧ тѧ̀, і҆и҃се всеси́льне, неизрече́ннаѧ ра́досте, сохранѧ́й гра́дъ тво́й невреди́мь, ꙗ҆́кѡ милосе́рдъ и҆ чл҃вѣколю́бецъ.

На благослове́нїи хлѣ́бѡвъ тропа́рь, гла́съ д҃: Ꙗ҆́кѡ неѡбори́мꙋю стѣ́нꙋ: три́жды. Пи́санъ на ма́лѣй вече́рни.

[Зрѝ] А҆́ще нѣ́сть бдѣ́нїѧ, глаго́лемъ тропа́рь є҆ди́ножды. А҆́ще хра́мъ пресвѧты́ѧ бцⷣы зна́менїѧ, пое́тсѧ слꙋ́жба зна́менїѧ є҆ди́нагѡ. Кромѣ́ же хра́ма пое́тсѧ слꙋ́жба зна́менїѧ, со і҆а́кѡвомъ пе́рсѧниномъ, си́це:

На ма́лѣй вече́рни, на Гдⷭ҇и, воззва́хъ, стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ: Сла́ва, и҆ ны́нѣ гла́съ, то́йже. На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: съ припѣ́вы и҆́хъ. Сла́ва, и҆ ны́нѣ, гла́съ а҃. и҆ про́чее ѻ҆бы́чное. и҆ ѿпꙋ́стъ.

На вели́цѣй вече́рни, Блаже́нъ мꙋ́жъ, а҃-й а҆нтїфѡ́нъ. На Гдⷭ҇и, воззва́хъ, стїхи̑ры на и҃: Бцⷣы, д҃, гла́съ и҃. самогла́сны: Го́рдостїю за́висти: и҆ мꙋ́ченика д҃, гла́съ в҃. Подо́бенъ: Є҆гда̀ ѿ дре́ва. Мі́ра кра̑снаѧ ѡ҆ста́вль: Сла́ва, мꙋ́ченика, гла́съ є҃: Ди́венъ бы́лъ є҆сѝ, і҆а́кѡве: И҆ ны́нѣ, бцⷣы, гла́съ ѕ҃: Весели́тесѧ лю́дїе: Вхо́дъ. Прокі́менъ днѐ. чтє́нїѧ бцⷣы г҃. На лїті́и стїхи̑ры, гла́съ ѕ҃: Ро́ги грѣ́шныхъ сотро́шасѧ: Сла́ва, и҆ ны́нѣ, гла́съ то́йже: Сѐ де́нь и҆збавле́нїѧ на́шегѡ наста̀: На стїхо́внѣ стїхи̑ры, гла́съ а҃, самогла́сны: Ꙗ҆́коже дре́вле во і҆ерⷭ҇ли́мѣ: съ припѣ́вы и҆́хъ. Сті́хъ а҃: Воскрⷭ҇нѝ, гдⷭ҇и, въ поко́й тво́й: Сті́хъ в҃: Клѧ́тсѧ гдⷭ҇ь дв҃дꙋ и҆́стиною: Сла́ва, мꙋ́ченика, гла́съ и҃: Вѣ́рнѡ соше́дшесѧ дне́сь: И҆ ны́нѣ, бцⷣы, гла́съ то́йже: Мнѧ́щесѧ непокори́вїи: Тропа́рь мꙋ́ченика, гла́съ д҃. Сла́ва, и҆ ны́нѣ, гла́съ то́йже: Ꙗ҆́кѡ неѡбори́мꙋю стѣ́нꙋ:

На ᲂу҆́трени: на Бг҃ъ гдⷭ҇ь, тропа́рь бцⷣы, два́жды: Сла́ва, мꙋ́ченика: И҆ ны́нѣ, бцⷣы. По а҃ каѳі́смѣ, и҆ по в҃, и҆ по полѷеле́и сѣда́льны бцⷣы, и҆ чте́нїе. Степє́нна, а҃ а҆нтїфѡ́нъ, д҃-гѡ гла́са. Прокі́менъ, гла́съ д҃: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ. Сті́хъ: Ѿры́гнꙋ се́рдце моѐ: Є҆ѵⷢ҇лїе лꙋкѝ, зача́ло д҃: Воста́вши марїа́мъ: По н҃- мъ ѱалмѣ̀ стїхи́ра, гла́съ ѕ҃: Весели́тесѧ, лю́дїе: пи́сана на Гдⷭ҇и, воззва́хъ, Сла́ва. Канѡ́на два̀ бцⷣы, на и҃: є҆ди́нъ, гла́съ ѕ҃: дрꙋгі́й, гла́съ и҃: и҆ мꙋ́ченика на ѕ҃, гла́съ в҃: Катава́сїа: Хрⷭ҇то́съ ражда́етсѧ: По г҃ пѣ́сни, конда́къ мꙋ́ченика, и҆ і҆́косъ, и҆ сѣда́ленъ бцⷣы, гла́съ и҃. Сла́ва, ст҃а́гѡ сѣда́ленъ, гла́съ то́йже. И҆ ны́нѣ, бцⷣы. По ѕ҃ пѣ́сни, конда́къ бцⷣы, гла́съ д҃. Подо́бенъ: Ꙗ҆ви́лсѧ є҆сѝ дне́сь: Честна́гѡ ѻ҆́браза твоегѡ̀ зна́менїе: и҆ і҆́косъ. и҆ чте́мъ про́логъ. По ѳ҃ пѣ́сни, свѣти́ленъ бцⷣы: Сла́ва, мꙋ́ченика: И҆ ны́нѣ, бцⷣы. На хвали́техъ стїхи̑ры на д҃, гла́съ ѕ҃, самогла́сны: Непоко́рствомъ ра́зꙋма: Сла́ва, мꙋ́ченика, гла́съ в҃: Терпѣ́въ въ страда́нїи, мч҃ниче: И҆ ны́нѣ, бцⷣы, гла́съ и҃: Мнѧ́щесѧ непокори́вїи: Славосло́вїе вели́кое, по трⷭ҇то́мъ тропа́рь ст҃а́гѡ: Сла́ва, и҆ ны́нѣ, бцⷣы. є҆ктєнїѝ, и҆ ѿпꙋ́стъ, и҆ ча́съ а҃. На а҃-мъ часѣ̀ тропа́рь бцⷣы: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По трⷭ҇то́мъ на всѣ́хъ часѣ́хъ конда́къ бцⷣы, непремѣ́ннѡ. И҆ соверше́нный ѿпꙋ́стъ.

На лїтꙋргі́и: блажє́нна бцⷣы, а҃-гѡ канѡ́на пѣ́снь г҃-ѧ, на д҃: в҃-гѡ канѡ́на пѣ́снь ѕ҃-ѧ, на д҃. Прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: И҆ мꙋ́ченика прокі́менъ, гла́съ, д҃: Ст҃ы̑мъ, и҆̀же сꙋ́ть на землѝ є҆гѡ̀: бцⷣы а҆пⷭ҇лъ къ є҆вре́ємъ зача́ло т҃к: Мꙋ́ченика а҆пⷭ҇лъ къ є҆фесе́ємъ, зача́ло сл҃г. А҆ллилꙋ́їа, гла́съ и҃. Слы́ши, дщѝ, и҆ ви́ждь: Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи. И҆ мꙋ́ченика, Сті́хъ: Мнѡ́ги скѡ́рби првⷣнымъ: Бцⷣы, є҆ѵⷢ҇лїе лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: Мꙋ́ченика, є҆ѵⷢ҇лїе і҆ѡа́нна, зача́ло и҃: А҆́зъ є҆́смь лоза̀ и҆́стиннаѧ: Прича́стенъ бцⷣы: Ча́шꙋ спасе́нїѧ: Мꙋ́ченика: Въ па́мѧть вѣ́чнꙋю:

Потре́бно є҆́сть вѣ́дати и҆ сѐ, ꙗ҆́кѡ а҆́ще слꙋчи́тсѧ въ недѣ́лю пра́здникъ прест҃ы́ѧ бцⷣы чⷭ҇тна́гѡ є҆ѧ̀ зна́менїѧ, и҆ ст҃а́гѡ великомꙋ́ченика і҆а́кѡва пе́рсскагѡ:

Ве́черъ, на ма́лѣй вече́рни, на Гдⷭ҇и, воззва́хъ, стїхи̑ры воскрⷭ҇ны гла́са, на д҃: Сла́ва, и҆ ны́нѣ, зна́менїѧ. На стїхо́внѣ стїхи́ра воскрⷭ҇на є҆ди́на, и҆ зна́менїѧ стїхо́вна со стїхѝ є҆ѧ̀: Сла́ва, и҆ ны́нѣ, зна́менїѧ. Та́же, Ны́нѣ ѿпꙋща́еши: и҆ по трист҃о́мъ тропа́рь воскрⷭ҇нъ: Сла́ва, и҆ ны́нѣ, зна́менїѧ. є҆ктенїа̀ ма́лаѧ: Поми́лꙋй на́съ, бж҃е: и҆ ѿпꙋ́стъ.

На вели́цѣй вече́рни: по ѻ҆бы́чномъ стїхосло́вїи, на Гдⷭ҇и, воззва́хъ, стїхи̑ры воскрⷭ҇ны трѝ, и҆ ꙾восто́ченъ꙾[[꙾А҆нато́лїевъ꙾]] є҆ди́нъ: и҆ зна́менїѧ трѝ: и҆ мꙋ́ченика і҆а́кѡва г҃. Сла́ва, зна́менїѧ. И҆ ны́нѣ, бг҃оро́диченъ пе́рвый гла́са. Чтє́нїѧ зна́менїѧ. На лїті́и стїхи̑ры зна́менїѧ. Сла́ва, мꙋ́ченика. И҆ ны́нѣ, зна́менїѧ. На стїхо́внѣ стїхи̑ры воскрⷭ҇ны. Сла́ва, і҆а́кѡва. И҆ ны́нѣ, зна́менїѧ. На благослове́нїи хлѣ́бѡвъ тропа́рь зна́менїѧ, три́жды. А҆́ще нѣ́сть бдѣ́нїѧ, глаго́лемъ тропа́рь воскрⷭ҇нъ. Сла́ва, і҆а́кѡва. И҆ ны́нѣ, зна́менїѧ.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды: Сла́ва, і҆а́кѡва, И҆ ны́нѣ, зна́менїѧ. По каѳі́смахъ сѣда́льны воскрⷭ҇ны съ бг҃оро́дичны и҆́хъ: Та́же полѷеле́й, и҆ велича́нїе пое́мъ:

Досто́йно є҆́сть блажи́ти тѧ̀, бцⷣе дв҃о, честнѣ́йшꙋю херꙋві̑мъ, и҆ сла́внѣйшꙋю безъ сравне́нїѧ серафі̑мъ. и҆лѝ: Пѣ́снь всѧ́кꙋ дꙋхо́внꙋю принесе́мъ бцⷣѣ. Ѱало́мъ и҆збра́нный: Помѧнѝ, гдⷭ҇и, дв҃да, и҆ всю̀ кро́тость є҆гѡ̀. И҆ тропарѝ: А҆́гг҃льскїй собо́ръ: И҆ сѣда́льны зна́менїѧ кꙋ́пнѡ всѧ̑ трѝ. Степє́нна, и҆ прокі́менъ гла́са. Є҆ѵⷢ҇лїе воскрⷭ҇но. Та́же, Воскрⷭ҇нїе хрⷭ҇то́во: Ѱало́мъ н҃. стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃. Зна́менїѧ є҆ди́нъ канѡ́нъ на ѕ҃. Мꙋ́ченикꙋ і҆а́кѡвꙋ, на д҃. Катава́сїа: Хрⷭ҇то́съ ражда́етсѧ: По г҃ пѣ́сни, конда́къ зна́менїѧ, и҆ мꙋ́ченика, и҆ сѣда́ленъ мꙋ́ченика. Сла́ва, и҆ ны́нѣ, зна́менїѧ. По ѕ҃-й пѣ́сни конда́къ, и҆ і҆́косъ воскрⷭ҇нъ. На ѳ҃-й пѣ́сни пое́мъ, Честнѣ́йшꙋю: Свѣти́ленъ воскрⷭ҇нъ. Сла́ва, мꙋ́ченика, И҆ ны́нѣ, зна́менїѧ. На хвали́техъ стїхи̑ры воскрⷭ҇ны д҃: и҆ зна́менїѧ со Сла́внымъ д҃, самогла́сны, гла́съ ѕ҃, со стїхѝ. Стїхи́ же глаго́лемъ: Воскрⷭ҇нѝ, гдⷭ҇и, въ поко́й тво́й: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀. Сла́ва, стїхи́ра є҆ѵⷢ҇льскаѧ. И҆ ны́нѣ: Пребл҃гослове́нна є҆сѝ: Славосло́вїе вели́кое, и҆ по трист҃о́мъ тропа́рь воскрⷭ҇нъ то́чїю. є҆ктєнїѝ, и҆ ѿпꙋ́стъ. Та́же ча́съ а҃. На а҃-мъ часѣ̀ тропа́рь воскрⷭ҇нъ. Сла́ва, зна́менїѧ. И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ зна́менїѧ, и҆ про́чее послѣ́дованїе пе́рвагѡ часа̀, и҆ ѿпꙋ́стъ. На г҃-мъ часѣ̀ тропа́рь воскрⷭ҇нъ. Сла́ва, мꙋ́ченика, И҆ ны́нѣ, бг҃оро́диченъ часѡ́въ. Та́кожде, и҆ на ѕ҃-мъ часѣ̀, и҆ на ѳ҃-мъ, глаго́лемъ тропа́рь зна́менїѧ и҆ мꙋ́ченикꙋ, премѣнѧ́юще: тропа́рь же воскрⷭ҇нъ глаго́летсѧ непремѣ́ннѡ. По Ѻ҆́ч҃е на́шъ: кондакѝ, воскрⷭ҇нъ и҆ зна́менїѧ, глаго́лемъ премѣнѧ́юще.

На лїтꙋргі́и: Блажє́нна гла́са, на ѕ҃: и҆ бцⷣы, пѣ́снь г҃-ѧ, на д҃. По вхо́дѣ, тропа́рь воскрⷭ҇нъ, и҆ зна́менїѧ, и҆ мꙋ́ченика. Конда́къ воскрⷭ҇нъ. Сла́ва, конда́къ мꙋ́ченика: И҆ ны́нѣ, зна́менїѧ. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе, и҆ прича́стенъ, пре́жде воскрⷭ҇нъ, и҆ пото́мъ бцⷣы.

На ᲂу҆́трени, на Бг҃ъ гдⷭ҇ь, тропа́рь:

Ꙗ҆́кѡ неѡбори́мꙋю стѣ́нꙋ: Три́жды.

По а҃ стїхосло́вїи сѣда́ленъ, гла́съ д҃. Поⷣ: Ꙗ҆ви́лсѧ є҆сѝ дне́сь:

Ѻ҆́чи мы́слєнныѧ ѡ҆чи́стивше, прїиди́те ли́цы вели́кагѡ нова́града дне́сь, торжествꙋ́имъ свѣ́тлѡ, чтꙋ́ще бг҃оѻтрокови́цꙋ, добро́тꙋ і҆а́кѡвлю, и҆ невѣ́стꙋ всѣ́хъ цр҃ѧ̀ хрⷭ҇та̀ бг҃а на́шегѡ: сїѧ́ бо показа́сѧ нб҃о, и҆ кра́снаѧ пала́та, и҆ хра́мъ ѡ҆дꙋшевле́нный, и҆ сеѧ̀ си́лою проти̑вныѧ побѣжда́емъ.

Сла́ва, и҆ ны́нѣ, то́йже.

По в҃ стїхосло́вїи сѣда́ленъ, гла́съ а҃. Подо́бенъ: Гро́бъ тво́й, сп҃се:

Пречⷭ҇таѧ твоѧ̀ і҆кѡ́на, бцⷣе дв҃о, врачевство̀ гра́дꙋ твоемꙋ̀ дарова́сѧ дꙋхо́вное: къ не́йже приходѧ́ще покланѧ́емсѧ и҆ чествꙋ́емъ, и҆ ѿ жела́нїѧ се́рдца цѣлꙋ́емъ, и҆сцѣле́нїй благода́ть почерпа́юще, и҆ недꙋ́гъ тѣле́сныхъ, и҆ дꙋше́вныхъ страсте́й, твои́ми моли́твами свобожда́емсѧ.

Сла́ва, и҆ ны́нѣ, то́йже:

По полѷеле́и сѣда́ленъ, гла́съ и҃. Подо́бенъ: Повелѣ́нное:

Ꙗ҆́же нб҃съ превы́шши сꙋ́щи, и҆ херꙋві̑мъ вои́стиннꙋ сла́внѣйши, и҆ всеѧ̀ тва́ри честнѣ́йши, дв҃о пречⷭ҇таѧ, дне́сь благода́рствєннаѧ рабѝ твоѝ прино́симъ ѻ҆́бразꙋ честна́гѡ твоегѡ̀ подо́бїѧ: ты́ бо стра́ннꙋю побѣ́дꙋ, и҆ ди́вное ѡ҆долѣ́нїе гра́дꙋ твоемꙋ̀ дарова́ла є҆сѝ. тѣ́мже согла́снѡ пою́ще, вопїе́мъ тѝ: влⷣчце, бцⷣе, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, тебе́ бо наде́ждꙋ и҆́мамы рабѝ твоѝ.

Сла́ва, и҆ ны́нѣ, то́йже:

Степє́нна, а҃-й а҆нтїфѡ́нъ д҃-гѡ гла́са. Прокі́менъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ. Сті́хъ: Ѿры́гнꙋ се́рдце моѐ сло́во бла́го: Всѧ́кое дыха́нїе: Є҆ѵⷢ҇лїе лꙋкѝ, зача́ло д҃: Во дни̑ ѻ҆́ны, воста́вши марїа́мъ: По н҃-мъ ѱалмѣ̀ стїхи́ра, гла́съ ѕ҃:

Весели́тесѧ лю́дїе:

Пи́сана на вели́цѣй вече́рни, на Гдⷭ҇и, воззва́хъ, Сла́вникъ канѡ́на в҃: і҆рмосы̀ пе́рвагѡ канѡ́на по два́жды: тропарѝ во ѻ҆бою̀ на в҃і.

Канѡ́нъ пе́рвый, творе́нїе свѧщенномона́ха пахѡ́мїа логоѳе́та, є҆гѡ́же краегране́сїе: Да́ждь мѝ сло́во, сло́ве бж҃їй, восхвали́ти ро́ждшꙋю тѧ̀.

Гла́съ ѕ҃. Пѣ́снь а҃. І҆рмо́съ:

Волно́ю морско́ю скры́вшаго дре́вле, гони́телѧ мꙋчи́телѧ, подъ земле́ю скры́ша спасе́нныхъ ѻ҆́троцы: но мы̀, ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ бо просла́висѧ.

Да ра́дꙋетсѧ ра́достїю бжⷭ҇твенною мно́жество нова́града дне́сь, зрѧ́ще те́плꙋю застꙋ́пницꙋ, стра́ннꙋ побѣ́дꙋ да́рꙋющꙋ на проти̑вныѧ, и҆ да пое́тъ бжⷭ҇твенными пѣ́сньми.

Ꙗ҆́коже лѣ́ствицꙋ превысокꙋ̀ зри́мъ дне́сь і҆кѡ́нꙋ твою̀, дв҃о всенепоро́чнаѧ, ю҆́же сопроти́внїи зрѧ́ще, коне́чнѣй слѣпотѣ̀ преда́шасѧ: мы́ же къ не́й вѣ́рнѣ взира́юще ѿ бѣ́дъ и҆збавлѧ́емсѧ.

Въ ржⷭ҇твѣ̀ тлѝ не прїи́мши, тлѣ́нїѧ всѣ́хъ на́съ, дв҃о, и҆змѣнѝ, печа̑ли ᲂу҆ставлѧ́ющи ма́тернимъ премѣне́нїемъ, бг҃ора́дованнаѧ.

Дрꙋгі́й канѡ́нъ. Гла́съ и҃. І҆рмо́съ:

Посѣче́нный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль, пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.

Бжⷭ҇твенныѧ си́лы же́злъ дне́сь приѡблиста́ѧ благода́тїю, и҆ свѣ́томъ безмѣ́рнымъ бж҃їе свѧ́то жили́ще, чꙋ́до па́че є҆стества̀ ѻ҆́браза твоегѡ̀, пречⷭ҇таѧ.

Ви́дѣхомъ пресла́вное дне́сь зна́менїе бы́вшее, бжⷭ҇твеннагѡ твоегѡ̀ зра́ка, мт҃и бж҃їѧ: па́че же и҆ сопроти́внїи ѻ҆́ни ꙗ҆́кѡ ви́дѧще со ѻ҆́бразомъ и҆ си́лꙋ ѿвраща́ющꙋ, а҆́бїе тѣле́сными ѻ҆чи́ма ѡ҆слѣпо́ша.

Наде́ждꙋ и҆мꙋ́ще на тебѐ, бг҃ороди́тельнице, и҆ несꙋмнѣ́ннꙋ вѣ́рꙋ гра́да сегѡ̀ наро́ди, ꙗ҆́кѡ ца́рскїй ски́птръ, тебѐ гра́дꙋ забра̑ла положи́ша, дв҃о неискꙋсобра́чнаѧ.

Ꙗ҆́коже жи́вꙋ мт҃рь сло́ва ви́дѣвше тѧ̀, сꙋемꙋ́дренныхъ многочи́сленное во́инство, ꙗ҆́коже бо́дреннаго блюсти́телѧ, на забра́лѣхъ ѡ҆бстои́мꙋ вѣ́рными, а҆́бїе рꙋ́цѣ и҆́хъ съ про́чими ᲂу҆́ды ѡ҆слабѣ́ша.

Катава́сїа: Хрⷭ҇то́съ ражда́етсѧ:

Пѣ́снь г҃. І҆рмо́съ:

Тобо́ю, хрⷭ҇тѐ, нб҃са̀ ᲂу҆твержда́єма всѧ̑, сло́во бж҃їе и҆ си́ла, и҆сповѣ́даютъ сла́вꙋ неизрече́ннꙋ, и҆ вседѣ́тельныѧ рꙋкѝ твоеѧ̀ сотворе́нїе: нѣ́сть бо прест҃ъ, ра́звѣ тебє̀, гдⷭ҇и.

Ꙗ҆́кѡ ѕвѣ́ри ᲂу҆стреми́вшесѧ на ста́до твоѐ, пречⷭ҇таѧ, но ты̀ тѣ́хъ чє́люсти сокрꙋшѝ, и҆ си́хъ не́мощны до конца̀ показа̀.

Ѻ҆́бщаго па́стырѧ влⷣкꙋ хрⷭ҇та̀ ро́ждши, дв҃о неискꙋсобра́чнаѧ, томꙋ̀ моли́сѧ, настоѧ́щагѡ гнѣ́ва и҆зба́вити на́съ, и҆ проти́вныхъ ѡ҆бстоѧ́нїѧ, влⷣчце.

Ми́лостиваѧ, ми́лостиваго ро́ждши сп҃са, ви́ждь ѡ҆ѕлобле́нїе и҆ воздыха́нїе люде́й твои́хъ, ᲂу҆скорѝ, пречⷭ҇таѧ, и҆ ᲂу҆ще́дри ны̀.

И҆́нъ. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Пе́рвѣе ᲂу҆́бѡ вседержи́тельнаѧ твоѧ̀ десни́ца, гдⷭ҇и, мѡѷсе́емъ чꙋдодѣ́йствꙋѧ, помрача́ше є҆гѵ́петъ: та́кожде и҆ здѣ̀ прише́дшыѧ разори́ти гра́дъ тво́й, ѻ҆́бразомъ мт҃ре твоеѧ̀ помрача́еши.

Ꙗ҆́коже ᲂу҆слы́ша чꙋ́дный а҆рхїепі́скопъ, ѡ҆бѣща́нїе твоѐ, бг҃ороди́тельнице, благовѣствова́ше наро́дѡмъ ра́дость, глаго́лѧ. дерза́йте, мт҃и бо бг҃а на́шегѡ съ на́ми є҆́сть.

Пресла́внꙋю побѣ́дꙋ и҆спо́лненꙋ ᲂу҆́жаса ви́дѣвше, и҆̀же тогда̀ наро́ди на сопроти̑вныѧ ѡ҆полчи́вшесѧ, и҆ а҆́бїе до конца̀ тѣ́хъ побѣди́ша.

Ны́нѣ наста̀ де́нь весе́лїѧ, зна́менїѧ і҆кѡ́ны твоеѧ̀, дв҃о бг҃ороди́тельнице, и҆ пра́здникъ свѣ́телъ, є҆го́же соверша́юще, вопїе́мъ: нѣ́сть пречⷭ҇тыѧ па́че тебє̀, бг҃оневѣ́сто.

Сѣда́ленъ, гла́съ и҃. Подо́бенъ: Премꙋ́дрости:

Ꙗ҆́же дре́вле прⷪ҇рѡ́ки проповѣ́дасѧ две́рь нбⷭ҇наѧ, неѡпали́маѧ кꙋпина̀, свѣ́щникъ многосвѣ́тлый, злата́ѧ кади́льница, рꙋ́чка и҆ же́злъ, пресла́внѡ дне́сь чꙋ́дномꙋ свѧти́телю ꙗ҆влѧ́етсѧ, наро́домъ дерза́ти повелѣва́етъ, и҆ ди́внꙋю побѣ́дꙋ показꙋ́етъ. тѣ́мже благода̑рнаѧ то́й возопїи́мъ: дв҃о бг҃ороди́тельнице, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти на́мъ: тебе́ бо и҆́мамы наде́ждꙋ рабѝ твоѝ.

Сла́ва, и҆ ны́нѣ, то́йже.

Пѣ́снь д҃. І҆рмо́съ:

Оу҆диви́сѧ твоѝ ра́зꙋмъ ѿ менє̀, ᲂу҆слы́шавшꙋ пресла̑внаѧ велѣ̑нїѧ смотрѣ́нїѧ твоегѡ̀, ᲂу҆крѣпи́сѧ же возлюбле́нїемъ твоегѡ̀ схожде́нїѧ: ты́ бо моеѧ̀ нищеты̀ не ѿве́рглсѧ є҆сѝ.

Почита́ющїй тѧ̀ гра́дъ, пречⷭ҇таѧ, и҆ по до́лгꙋ сла́вѧщїй, ѡ҆гражда́й ѿ безбо́жныхъ, чⷭ҇таѧ, и҆ноплемє́нникъ: ты́ бо томꙋ̀, пречⷭ҇таѧ, бога́тство неѿе́млемо є҆сѝ, покро́въ же и҆ сла́ва.

Мнѧ́щїисѧ, ꙗ҆́коже дре́вле і҆ерїхѡ́нъ, разори́ти гра́дъ тво́й, пречⷭ҇таѧ мт҃и сло́ва, са́ми коне́чнѣй поги́бели преда́шасѧ, си́лою и҆зъ тебє̀, воплоще́ннагѡ, влⷣчце.

При́зри, чⷭ҇таѧ, спасѝ пою́щыѧ тѧ̀, потреби́тисѧ хотѧ́щсѧ ѿ сопроти́вныхъ: тѣ́мже наше́дшагѡ преще́нїѧ и҆зба́ви, бг҃ороди́тельнице.

И҆́нъ. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Є҆гда̀ ᲂу҆слы́шаша наро́ди чꙋ́дное ѡ҆бѣща́нїе побѣ́ды, ра́достїю неизрече́нною и҆спо́лнившесѧ, и҆ ꙗ҆́коже крѣ́пка нѣ́коего храни́телѧ и҆мꙋ́ще, сопроти̑вныѧ побѣжда́хꙋ.

Многобога́тный да́ръ, и҆ неистощи́мое сокро́вище дарова́лъ є҆сѝ гра́дꙋ твоемꙋ̀, і҆кѡ́нꙋ мт҃ре твоеѧ̀, сло́ве, и҆ сеѧ̀ по́мощїю проти̑вныѧ низлага́емъ.

Въ бжⷭ҇твеннѣмъ хра́мѣ твое́мъ, бг҃ора́дованнаѧ, и҆дѣ́же чꙋдотво́рнаѧ твоѧ̀ і҆кѡ́на положена̀ бы́сть, и҆сцѣлє́нїѧ вѣ́рою приходѧ́щымъ подава́етъ.

Собо́ри вѣ́рныхъ и҆ всѧ́ко состоѧ́нїе человѣ́ческое весели́тсѧ, совокꙋ́пльшесѧ въ честнѣ́мъ хра́мѣ твое́мъ, зрѧ́ще въ не́мъ, ꙗ҆́коже пресвѣ́тлое со́лнце, честны́й ѻ҆́бразъ тво́й, влⷣчце.

Пѣ́снь є҃. І҆рмо́съ:

Сою́зомъ любвѐ свѧзꙋ́еми а҆пⷭ҇ли, влⷣчествꙋющемꙋ всѣ́ми себѐ хрⷭ҇тꙋ̀ возло́жше, кра́сны но́ги ѡ҆чища́хꙋ, благовѣствꙋ́юще всѣ̑мъ ми́ръ.

Те́плаѧ застꙋ́пница къ тебѣ̀ прибѣга́ющымъ, и҆ ненадѣ́ющымсѧ наде́жда, ви́ждь ѡ҆ѕлобле́нїе люде́й твои́хъ, и҆ пода́ждь по́мощь, пречⷭ҇таѧ.

Ꙗ҆́же ѻ҆́гнь ро́ждшаѧ бжⷭ҇твенный, дв҃о,проти́вныхъ, пречⷭ҇таѧ, моли́твою твое́ю ѻ҆гне́мъ попалѝ, ꙗ҆́кѡ мт҃и сꙋ́щи зижди́телѧ, всепѣ́таѧ.

Чтⷭ҇аѧ бг҃оневѣ́сто, недоꙋмѣ̑нныѧ лю́ди ᲂу҆ще́дри, ма́терними твои́ми мольба́ми, и҆ ꙗ҆̀же на ны̀ проти́вныхъ ѡ҆бстоѧ̑нїѧ разорѝ вско́рѣ моли́твами твои́ми.

И҆́нъ. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго. но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ.

Ꙗ҆́коже и҆ногда̀ въ црⷭ҇твꙋющымъ гра́дѣ, неи́стовѧщаго и҆ хꙋли́тсѧ, хотѧ́щаго ѻ҆́бразъ тво́й низложи́ти, того̀ а҆́бїе коне́чнѣ ᲂу҆ѧзвѝ: та́коже и҆ ны́нѣ показа́ла є҆сѝ, бг҃ороди́тельнице.

Ꙗ҆́кѡ щито́мъ ѡ҆гражда́еми непобѣди́мою твое́ю си́лою, дв҃о, проти́вныхъ побѣжда́ютъ неизрече́нное мно́жество, на тѧ̀ наде́ждꙋ и҆мꙋ́щїи лю́дїе твоѝ, всепѣ́таѧ.

Тѧ̀ бога́тство неистощи́мое и҆мꙋ́ще, и҆ и҆сцѣле́нїй и҆сто́чникъ, вѣ́рою прибѣга́ющїи хра́мꙋ твоемꙋ̀, и҆дѣ́же пребыва́етъ честны́й ѻ҆́бразъ тво́й, влⷣчце.

Пѣ́снь ѕ҃. І҆рмо́съ:

Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на: тво́й бо ѻ҆́бразъ носѧ̀, страда́вшагѡ и҆ погребе́нїю да́вшагѡсѧ, ꙗ҆́кѡ ѿ черто́га, ѿ ѕвѣ́рѧ и҆зы́де, приглаша́ше же кꙋстѡді́и, хранѧ́щїи сꙋ́єтнаѧ и҆ лѡ́жнаѧ, ми́лость сїю̀ ѡ҆ста́вили є҆стѐ.

И҆зба́ви ра́тныхъ наше́ствїѧ рабы̑ твоѧ̑, пречⷭ҇таѧ, и҆ не преда́ждь до конца̀ поги́бнꙋти наслѣ́дїю твоемꙋ̀, всепѣ́таѧ: но си́лою и҆зъ тебє̀ рожде́ннагѡ проти̑вныѧ низложѝ.

Многосогрѣ́шшихъ тебѣ̀ не пре́зри, но прїимѝ мольбꙋ̀ мт҃ре твоеѧ̀ ѡ҆ на́съ, ще́дре: да не похва́лѧтсѧ сопроти́внїи, гдѣ́ є҆́сть бг҃ъ и҆́хъ, глаго́люще: но да разꙋмѣ́ютъ всѝ, ꙗ҆́кѡ ты̀ и҆зба́витель съ на́ми є҆сѝ.

Ны́нѣ по́мощи прїи́де вре́мѧ, ны́нѣ премѣне́нїѧ потре́ба, чⷭ҇таѧ. моли́сѧ сн҃ꙋ твоемꙋ̀ и҆ бг҃ꙋ, ꙗ҆́кѡ да ᲂу҆ще́дритъ согрѣши́вшыѧ, и҆ належа́щагѡ гнѣ́ва и҆зба́витъ.

И҆́нъ. І҆рмо́съ:

Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Сꙋ́щемꙋ тогда̀ чꙋ́дномꙋ а҆рхїере́ю ꙗ҆ви́ласѧ є҆сѝ стра́ннымъ ѻ҆́бразомъ, на де́рзость подвиза́ющи: наро́ди же неизрече́нныѧ ра́дости и҆спо́лнившесѧ, ѻ҆рꙋ̑жныѧ побѣжда́хꙋ, влⷣчце.

Зна́менїе стра́шно, и҆ ве́щь пресла́внꙋ, и҆ чꙋ́дное ѡ҆долѣ́нїе дне́сь пра́зднꙋюще лю́дїе твоѝ, бцⷣе, похва̑льнаѧ ꙗ҆́кѡ досто́йной похвалы̀ прино́симъ, глаго́люще: ра́дꙋйсѧ, ѡ҆бра́дованнаѧ.

Честнꙋ́ю і҆кѡ́нꙋ твою̀ ра́достнымъ се́рдцемъ и҆ дꙋше́ю ѡ҆блобыза́емъ веселѧ́щесѧ, и҆ те́плою вѣ́рою прикаса́ющесѧ, и҆сцѣле́нїе почерпа́емъ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Честна́гѡ ѻ҆́браза твоегѡ̀ зна́менїе пра́зднꙋюще лю́дїе твоѝ, бг҃ороди́тельнице, и҆́мже ди́внꙋю побѣ́дꙋ на сопроти̑вныѧ гра́дꙋ твоемꙋ̀ дарова́ла є҆сѝ. тѣ́мже тебѣ̀ вѣ́рою взыва́емъ: ра́дꙋйсѧ, дв҃о, хрⷭ҇тїа́нъ похвало̀.

І҆́косъ:

Разрѣшѝ тмꙋ̀ мои́хъ согрѣше́нїй, во ᲂу҆мѣ̀ мое́мъ лежа́щꙋю, и҆ твои́мъ мѧ̀ свѣ́томъ просвѣтѝ, дв҃о, ꙗ҆́кѡ да возмогꙋ̀ тебѣ̀ похвалꙋ̀ принестѝ, ꙗ҆́же ѻ҆ц҃ъ восхвалѝ, и҆ дх҃ъ ст҃ы́й ѡ҆сѣнѝ, сн҃ъ же и҆ сло́во бж҃їе всели́всѧ, и҆ нетлѣ́ннѡ ѿ пречи́стою твоє́ю бокꙋ̀ проше́дъ, съ человѣ̑ки поживѐ. тѣ́мже мы̀ грѣ́шнїи и҆ недосто́йнїи рабѝ твоѝ, дне́сь соверша́юще свѧще́нное торжество̀ зна́менїѧ, бы́вшагѡ честно́ю і҆кѡ́ною твое́ю, є҆́юже пресла́внꙋю побѣ́дꙋ на проти̑вныѧ гра́дꙋ твоемꙋ̀ дарова́ла є҆сѝ: и҆ ѿ всѣ́хъ чꙋде́съ и҆спо́лнившесѧ, вмѣ́стѡ благово́нныхъ а҆рѡма̑тъ, є҆ли́кѡ возмо́жно на́мъ земны̑мъ, похва̑льнаѧ тебѣ̀ прино́симъ, глаго́люще: ра́дꙋйсѧ, бцⷣе, ра́досте а҆́гг҃лѡвъ и҆ человѣ́кѡвъ: ра́дꙋйсѧ, тве́рдаѧ наде́жда и҆ покро́ве гра́дꙋ твоемꙋ̀: ра́дꙋйсѧ, ꙗ҆́кѡ проти̑вныѧ си́лою твое́ю низлага́емъ: ра́дꙋйсѧ, ᲂу҆́мнагѡ сл҃нца мт҃и, вѣ̑рныѧ просвѣща́ющагѡ, невѣ̑рныѧ же помрача́ющагѡ: ра́дꙋйсѧ, дв҃о, хрⷭ҇тїа́нъ похвало̀.

Пѣ́снь з҃. І҆рмо́съ:

Неизрече́нное чꙋ́до, въ пещѝ и҆зба́вивый преподѡ́бныѧ ѻ҆́троки и҆зъ пла́мене, во гро́бѣ ме́ртвъ бездыха́ненъ полага́етсѧ, во спасе́нїе на́съ пою́щихъ: и҆зба́вителю бж҃е, благослове́нъ є҆сѝ.

Вои́стиннꙋ сокро́вище че́стно гра́дꙋ твоемꙋ̀, і҆кѡ́на твоѧ̀, пречⷭ҇таѧ дарова́сѧ, ю҆́же и҆ са́ми зрѧ́ще, чꙋдесѝ ᲂу҆дивлѧ́емсѧ, и҆ сн҃ꙋ твоемꙋ̀ вопїе́мъ: и҆зба́вителю бж҃е, бл҃гослове́нъ є҆сѝ.

Ꙗ҆́коже и҆ногда̀ нїнеѵі́тѧны покаѧ́нїѧ ра́ди пощади́лъ є҆сѝ, сло́ве бж҃їй, про́повѣдїю і҆ѡ́ны прⷪ҇ро́ка: та́кожде и҆ здѣ̀ показа́лъ є҆сѝ ѻ҆́бразомъ пречⷭ҇тыѧ твоеѧ̀ мт҃ре, хрⷭ҇тѐ, вопїю́щымъ: и҆зба́вителю бж҃е, бл҃гослове́нъ є҆сѝ.

Хра́мъ тѧ̀ бж҃їй, влⷣчце, вѣ́дꙋще, во ст҃ѣ́мъ хра́мѣ твое́мъ рꙋ́ки на́шѧ возно́симъ на моли́твꙋ: ви́ждь ѡ҆ѕлобле́нїе на́ше, и҆ пода́ждь на́мъ по́мощь.

И҆́нъ. І҆рмо́съ:

Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ви́ждь, пречⷭ҇таѧ, ѡ҆ѕлобле́нїе ра̑бъ твои́хъ, и҆ не ѿри́ни въ коне́цъ: твое́ бо є҆смы̀ достоѧ́нїе, и҆ твое́ю наде́ждею крѣпи́мсѧ, да всѝ вопїе́мъ тѝ: ра́дꙋйсѧ, ѡ҆бра́дованнаѧ.

Свѣтоно́снаѧ благода́ть и҆ и҆сцѣле́нїѧ дарова́нїе даде́сѧ гра́дꙋ твоемꙋ̀ ѻ҆́бразъ тво́й, пречⷭ҇таѧ: є҆го́же любе́знѡ ѡ҆блобыза́юще, весели́мсѧ.

Пѣ́снь и҃. І҆рмо́съ:

Оу҆жасни́сѧ боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ. є҆го́же, ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Собезнача́льное сло́во ѻ҆́ч҃ее, дв҃о пречⷭ҇таѧ, нетлѣ́ннѡ родила̀ є҆сѝ, и҆ ѿ сосцꙋ̀ пита́ла є҆сѝ. того̀ молѝ, бг҃ороди́тельнице, ѿ ѡ҆бстоѧ́нїѧ вра́жїѧ спастѝ пою́щыѧ тѧ̀, и҆ превозносѧ́щыѧ во вѣ́ки.

Є҆го́же прови́дѣ на престо́лѣ превзѧ́тѣмъ и҆са́їа, сего̀ въ ложесна́хъ, дв҃о, вмѣсти́ла є҆сѝ, и҆ нетлѣ́ннѡ родила̀ є҆сѝ: є҆го́же молѝ спасти́сѧ рабѡ́мъ твои̑мъ, пою́щымъ: дѣ́ти, благослови́те, свѧще́ннїи по́йте и҆ превозноси́те є҆го̀ во вѣ́ки.

Є҆ди́на сꙋ́щи бл҃га́ѧ, пребл҃го́е сло́во молѝ прилѣ́жнѡ, настоѧ́щагѡ гнѣ́ва рабѡ́мъ твои̑мъ и҆зба́витисѧ, несомнѣ́нною вѣ́рою сн҃ꙋ твоемꙋ̀ пою́щымъ: дѣ́ти, благослови́те, свѧще́ннїи по́йте и҆ превозноси́те є҆го̀ во вѣ́ки.

И҆́нъ. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Ѡ҆ всѣ́хъ наро́ди недоꙋмѣ́вшесѧ, къ тебѣ̀ прибѣга́ютъ, вопїю́ще: не преда́ждь на́съ врагѡ́мъ на́шымъ, влⷣчце бцⷣе, но держа́вною твое́ю рꙋко́ю ты̑ѧ низложѝ, да тѧ̀ непреста́ннѡ пое́мъ и҆ превозно́симъ во вѣ́ки.

Ꙗ҆́кѡ нерꙋши́мое забра́ло и҆мꙋ́ще рабѝ твоѝ і҆кѡ́нꙋ твою̀, пречⷭ҇таѧ, проти́вѧщыѧсѧ низлага́емъ, и҆ сн҃ꙋ твоемꙋ̀ вопїе́мъ: дѣ́ти, благослови́те, свѧще́нницы, воспо́йте, лю́дїе, превозноси́те є҆го̀ во вѣ́ки.

Чꙋ́дномꙋ і҆ера́рхꙋ ꙗ҆ви́ласѧ є҆сѝ, пречⷭ҇таѧ, ѻ҆́нъ же со мно́гимъ наро́домъ чꙋдесѝ ᲂу҆ди́вльсѧ, а҆́бїе съ ра́достїю ко ѻ҆́бразꙋ твоемꙋ̀ прибѣга́етъ: пода́ждь по́мощь, влⷣчце, глаго́лющымъ: дѣ́ти, благослови́те, свѧще́нницы, воспо́йте, лю́дїе, превозноси́те є҆го̀ во вѣ́ки.

Что́ ти принестѝ, пречⷭ҇таѧ, ѿ всеѧ̀ тва́ри сла́вимѣй, недоꙋмѣ́емсѧ, влⷣчце, то́чїю є҆́же гаврїи́лъ на́съ наꙋчѝ: ра́дꙋйсѧ, ѡ҆бра́дованнаѧ.

Пѣ́снь ѳ҃. І҆рмо́съ:

Стра́нствїѧ влⷣчнѧ, и҆ безсме́ртныѧ трапе́зы на го́рнѣмъ мѣ́стѣ, высо́кими ᲂу҆мы̀, вѣ́рнїи, прїиди́те наслади́мсѧ, возше́дша сло́ва, ѿ сло́ва наꙋчи́вшесѧ, є҆го́же велича́емъ.

Млⷭ҇рдымъ ѻ҆́комъ свы́ше при́зри на гра́дъ и҆ лю́ди твоѧ̑, пречⷭ҇таѧ: и҆ны́ѧ бо по́мощи не и҆́мамы, то́кмѡ тебѐ, всенепоро́чнаѧ, да тѧ̀ всѝ мт҃рь бж҃їю непреста́ннѡ велича́емъ.

Є҆ди́на ро́ждшаѧ сло́во воплоще́нное, дв҃о всепѣ́таѧ, приснотекꙋ́щїй и҆сто́чникъ и҆сцѣле́нїй и҆злива́еши вѣ́рою притека́ющымъ хра́мꙋ твоемꙋ̀, пречⷭ҇таѧ.

Сѐ рабѝ твоѝ вопїе́мъ тѝ, мт҃и бж҃їѧ: ѻ҆бы̑чныѧ ми̑лости твоѧ̑ на гра́дъ и҆ лю́ди твоѧ̑ ми́лостивнѡ показꙋ́ющи, проти́вныхъ ѡ҆бстоѧ́нїй на́съ и҆змѣнѝ, да тѧ̀ всѝ непреста́ннѡ велича́емъ.

И҆́нъ. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Сѐ вре́мѧ благопрїѧ́тно и҆ де́нь спасе́нїѧ, въ не́мже зна́менїе і҆кѡ́ны твоеѧ̀, пречⷭ҇таѧ, показа́сѧ: є҆́же пра́зднꙋюще свѣ́тлѡ, дꙋхо́внѣ торжество̀ соверша́емъ.

Ꙗ҆́кѡ бжⷭ҇твенною свѣ́тлостїю ѡ҆зарѧ́емꙋ, зри́мъ дне́сь, пречⷭ҇таѧ, і҆кѡ́нꙋ твою̀ честнꙋ́ю, є҆́йже вѣ́рою покланѧ́ющесѧ, тѧ̀ велича́емъ.

Мы̑сли ѡ҆чи́стивше празднолю́бнагѡ нова́града собо́ри, со а҆рхїере́йскимъ ли́комъ восхвали́те, па́че наде́жди по́мощь на сопроти̑вныѧ дарова́вшꙋю.

Дѣ́вства твоегѡ̀ зна́мєнїѧ невреди́мѡ сохрани́въ сло́во бж҃їе и҆зъ тебє̀ проше́дъ, сохранѝ гра́дъ тво́й невреди́мь, дв҃о всепѣ́таѧ, да тѧ̀ непреста́ннѡ велича́емъ.

Свѣти́ленъ. Подо́бенъ: Посѣти́лъ ны̀ є҆сѝ:

Возжелѣ́въ твоеѧ̀ добро́ты і҆и҃съ, пречⷭ҇таѧ, въ тѧ̀ всели́сѧ, и҆ тебѐ застꙋ́пницꙋ гра́дꙋ твоемꙋ̀ сло́во бж҃їе дарова̀: є҆го́же сохранѧ́й застꙋпле́нїемъ твои́мъ при́снѡ, ꙗ҆́кѡ да тѧ̀ ᲂу҆блажа́емъ, пренепоро́чнаѧ ѻ҆трокови́це.

Два́жды.

На хвали́техъ стїхи̑ры, на д҃, гла́съ ѕ҃. Самогла́сны:

Непоко́рствомъ ра́зꙋма и҆ го́рдостїю разже́гшесѧ ненака́заннїи, на ста́до твоѐ, пречⷭ҇таѧ, є҆́же и҆скорени́ти гра́дъ, въ не́мже пречестны́й тво́й ѻ҆́бразъ водворѧ́етсѧ. но ᲂу҆́бѡ показа́ла є҆сѝ, ꙗ҆́коже и҆ногда̀ сн҃ъ тво́й є҆вре́ємъ, досто́йнѡ въ пꙋсты́ни тѣлесы̀ па́дшымъ.

Сѐ хра́мъ пресвѣ́телъ и҆ мѣ́сто свѧще́нїѧ, и҆дѣ́же честна́ѧ і҆кѡ́на мт҃ре твоеѧ̀, сло́ве, пристꙋпи́те, человѣ́цы, и҆ и҆сцѣле́нїе почерпи́те, ꙗ҆́кѡ спасе́нїе тоѧ̀ ра́ди на́мъ дарова́сѧ, и҆ и҆збавле́нїе ѿ проти́вныхъ, потреби́те на́съ хотѧ́щихъ, но ті́и, по прⷪ҇ро́кꙋ, потреби́шасѧ.

Ꙗ҆́коже и҆ногда̀ кро́ткїй дв҃дъ проти́вѧщагосѧ го́рдаго голїа́ѳа, си́лою сн҃а твоегѡ̀ препоѧ́савсѧ, низложѝ: та́кожде и҆ лю́дїе твоѝ, пречⷭ҇таѧ, и҆мꙋ́ще ѻ҆́бразъ тво́й честны́й, пресла́внѡ ѡ҆долѣ́нїе показа́ша.

Чꙋ́днаѧ побѣ́да и҆ ди́вное ѡ҆долѣ́нїе честны́ѧ і҆кѡ́ны твоеѧ̀, пречⷭ҇таѧ мт҃и сло́ва, ᲂу҆дивлѧ́етъ ᲂу҆́мъ и҆ ᲂу҆жаса́етъ по́мыслъ: без̾ѻрꙋ́жнїи во ѻ҆рꙋ́жныхъ побѣжда́хꙋ си́лою твое́ю, дв҃о всепѣ́таѧ, и҆ посо́бїемъ бжⷭ҇твеннагѡ зра́ка твоегѡ̀, во спасе́нїе дꙋ́шъ на́шихъ.

Сла́ва, и҆ ны́нѣ, гла́съ и҃: Мнѧ́шесѧ непокори́вїи:

Пи́санъ на вели́цѣй вече́рни, на стїхо́внѣ.

Славосло́вїе вели́кое. И҆ ѿпꙋ́стъ.

На лїтꙋргі́и прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀. А҆пⷭ҇лъ ко є҆вре́ємъ, зача́ло т҃к. А҆ллилꙋ́їа, гла́съ и҃: Слы́ши дщѝ и҆ ви́ждь, и҆ приклонѝ ᲂу҆́хо твоѐ. Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи. Є҆ѵⷢ҇лїе лꙋкѝ, зача́ло н҃д. Прича́стенъ: Ча́шꙋ спасе́нїѧ прїимꙋ̀, и҆ и҆́мѧ гдⷭ҇не призовꙋ̀.

Слꙋ́жба, и҆́же во ст҃ы́хъ, ѻ҆ц҃а̀ на́шегѡ і҆а́кѡва є҆пі́скопа, росто́вскагѡ чꙋдотво́рца.

Ве́черъ, Блаже́нъ мꙋ́жъ: На Гдⷭ҇и, воззва́хъ, стїхи̑ры, гла́съ ѕ҃.

Подо́бенъ: Всѐ ѿло́жше:

Ве́сь ѡ҆свѧще́нъ, ꙳ и҆ бг҃оно́сецъ показа́лсѧ є҆сѝ, ꙳ пома́занїе бж҃їе ст҃о́е, ꙳ ст҃ы́мъ дх҃омъ ѡ҆бложе́нъ, ꙳ и҆ свѣ́тлѡ входѧ̀ вы́нꙋ во ст҃а̑ѧ ст҃ы́хъ, ꙳ бг҃онача́льными свѣтлостьмѝ ѡ҆зарѧ́емь, ꙳ и҆ бл҃года́ти причаща́ѧсѧ ꙳ спаси́тєльнымъ та́йнамъ, ꙳ ꙗ҆́кѡ и҆́стинный і҆ера́рхъ пресла́венъ, ꙳ со дерзнове́нїемъ моли́сѧ ꙳ ѡ҆ дꙋша́хъ на́шихъ.

Просвѣти́сѧ житїѐ твоѐ ꙳ добродѣ́тельными свѣтлостьмѝ, ꙳ и҆ вѣ̑рныѧ просвѣти́лъ є҆сѝ, ꙳ и҆ льстѝ тмꙋ̀ разгна́лъ є҆сѝ: ꙳ и҆́стинное бо ꙗ҆ви́лсѧ є҆сѝ ꙳ и҆ свѣтоза́рное сл҃нце, і҆ера́рше пребл҃же́нне і҆а́кѡве: ꙳ и҆ ны́нѣ всели́лсѧ є҆сѝ, ꙳ и҆дѣ́же сїѧ́етъ свѣ́тъ невече́рнїй, ꙳ сы́нъ днѐ благода́тїю дх҃а ст҃а́гѡ бы́въ. ꙳ тѣ́мже твою̀ бжⷭ҇твеннꙋю па́мѧть ꙳ и҆ свѣтоно́снꙋю, ꙳ че́стнѡ соверша́юще, приснопа́мѧтне, ꙳ любо́вїю почита́емъ.

Оу҆́мъ тво́й манове́нїемъ, є҆́же къ бг҃ꙋ, ꙳ мꙋ́дре, вѣ́рою ᲂу҆добрѧ́емь, ꙳ свѣ́телъ ꙗ҆ви́лсѧ є҆сѝ, всесла́вне, ꙳ въ ме́ртвеннѣмъ тѣ́лѣ и҆ тлѣ́ннѣмъ, ꙳ премꙋ́дре, нетлѣ́нїю поꙋчи́всѧ, ꙳ притѧжа́лъ є҆сѝ безпло́тныхъ свѣ́тлѡсти, ꙳ и҆ страсте́й внѣ̀ бы́въ, ꙳ безстра́стїемъ ᲂу҆краша́ѧсѧ, ꙳ і҆а́кѡве ѻ҆́ч҃е, і҆ера́рше премꙋ́дре, ꙳ свѣтлѣ́йшее свѣти́ло ꙳ и҆ моли́твенниче ѡ҆ чтꙋ́щихъ вѣ́рою па́мѧть твою̀.

И҆́ны стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!

Прпⷣбне ѻ҆́ч҃е і҆а́кѡве, ꙳ ты̀ є҆щѐ во ᲂу҆тро́бѣ сы́й ма́терни, ꙳ а҆рхїере́йства прозва́нїе и҆́мѧ прїи́мъ нарече́нное, ꙳ и҆змла́да хрⷭ҇та̀ возлюби́лъ є҆сѝ: ꙳ врꙋчи́всѧ же па́ствѣ слове́сныхъ ѻ҆ве́цъ, ꙳ до́брѣ па́слъ є҆сѝ цр҃ковь хрⷭ҇то́вꙋ. ꙳ тѣ́мъ пра́зднꙋемъ твоѐ ᲂу҆спе́нїе, ꙳ ра́достїю се́рдца хрⷭ҇та̀ велича́емъ, ꙳ прославлѧ́ющаго своего̀ ᲂу҆го́дника.

Прпⷣбне ѻ҆́ч҃е і҆а́кѡве, ꙳ и҆спросѝ ꙗ҆̀же къ бг҃ꙋ моли́твами твои́ми ꙳ цр҃кви ᲂу҆твержде́нїе, ꙳ і҆ера́рха покры́й моли́твою твое́ю: ꙳ благочєсти́вымъ же и҆ хрⷭ҇тѡлюби́вымъ побѣ̑ды да́рꙋй на врагѝ и҆ ѡ҆долѣ́нїе: ꙳ гра́дꙋ же твоемꙋ̀ крѣ́пкое и҆ недви́жимое ᲂу҆твержде́нїе, ꙳ и҆ вѣ̑рнымъ лю́демъ грѣхѡ́въ ѡ҆ставле́нїе и҆спросѝ, ꙳ и҆ ѡ҆ всѣ́хъ на́съ, притека́ющихъ къ ра́цѣ моще́й твои́хъ, ꙳ и҆ свѣ́тлѡ творѧ́щихъ пра́зднество ᲂу҆спе́нїѧ твоегѡ̀, ꙳ свѧ́те, помоли́сѧ.

Прпⷣбне ѻ҆́ч҃е и҆ бг҃оно́се ст҃и́телю і҆а́кѡве, ꙳ ты̀ вои́стиннꙋ ꙗ҆ви́лсѧ є҆сѝ ꙳ просвѣща́ѧ всѣ́хъ ѡ҆мрачє́ннаѧ сердца̀, ꙳ наставлѧ́ѧ на пꙋ́ть и҆́стинный. ꙳ ты̀ бы́лъ є҆сѝ ᲂу҆бѡ́гимъ и҆ сирота́мъ и҆ вдова́мъ застꙋ́пникъ, ꙳ вельмо́жамъ тве́рдое наказа́нїе, и҆ ᲂу҆твержде́нїе ꙳ всѣ̑мъ вѣ́рою притека́ющымъ ꙳ подъ кро́въ пречⷭ҇тыѧ бж҃їѧ мт҃ре. ꙳ и҆спросѝ, свѧ́те, грѣхѡ́въ ѡ҆ставле́нїе, ꙳ молѧ́сѧ за ны̀ ко влⷣцѣ.

Сла́ва, гла́съ ѕ҃:

А҆пⷭ҇лѡвъ ревни́телѧ і҆а́кѡва, преблаже́ннаго ѻ҆тца̀ и҆ ᲂу҆чи́телѧ, соше́дшесѧ дне́сь восхва́лимъ, и҆́мже хрⷭ҇та̀ бг҃а позна́хомъ. и҆ ѿ тмы̀ къ свѣ́тꙋ прибли́жившесѧ, ѻ҆́чи и҆ сердца̀ да просвѣти́мъ, и҆ въ па́мѧть є҆гѡ̀ ликовствꙋ́юще, кꙋ́пнѡ возвесели́мсѧ, ѡ҆брѣ́тше вожда̀, пра́вѡ ведꙋ́ща въ црⷭ҇твїе бж҃їе.

И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:

Вхо́дъ, прокі́менъ днѐ, и҆ чтє́нїѧ г҃, пи́саны сегѡ̀ мцⷭ҇а въ г҃і де́нь.

На лїті́и стїхи̑ры, гла́съ и҃:

Прпⷣбне ѻ҆́ч҃е і҆а́кѡве, ты̀ возше́дъ на лѣ́ствицꙋ бж҃е́ственнагѡ ра́зꙋма, и҆ къ бг҃ꙋ приближа́ѧсѧ, ᲂу҆сыне́нїѧ да́ръ ѿ негѡ̀ прїи́мъ, и҆сцѣлѧ́ѧ недꙋ́ги неисцѣ̑льныѧ, и҆ ѿгонѧ́ѧ дꙋ́хи нечи̑стыѧ. тѣ́мъ твоѐ ᲂу҆спе́нїе пра́зднꙋемъ ра́достїю се́рдца, хрⷭ҇та̀ прославлѧ́юще, велича́юща своего̀ ᲂу҆го́дника.

Гла́съ д҃:

Воззрѣ́въ неꙋкло́ннѡ на высотꙋ̀ ра́зꙋма, и҆ ᲂу҆смотри́лъ є҆сѝ безвѣ́стнѡ премꙋ́дрости глꙋбинꙋ̀, ᲂу҆чє́нїи мі́ръ ѡ҆богати́лъ є҆сѝ, ѻ҆́ч҃е, ѡ҆ на́съ при́снѡ молѝ хрⷭ҇та̀, ст҃и́телю і҆а́кѡве.

Человѣ́че бж҃їй, вѣ́рный ᲂу҆го́дниче, строи́телю тогѡ̀ та̑инъ, и҆ мꙋ́жъ жела́нїй дꙋхо́вныхъ, сто́лпе ѡ҆дꙋшевле́нный, дꙋхо́вный ѻ҆́бразъ, ꙗ҆́кѡ бжⷭ҇твенное сокро́вище, мїрскі̑ѧ цр҃кви ѡ҆брѣ́тше тѧ̀ моли́твенника ѡ҆ дꙋша́хъ на́шихъ.

Гла́съ и҃:

Ст҃и́телю і҆а́кѡве, высото́ю добродѣ́телей бж҃їе просвѣще́нїе, дх҃о́вный ѻ҆рга́не, правосла́вныхъ сла́во, ѕловѣ́рїѧ ѻ҆бличи́телю, дѣ́вственномꙋ ли́кꙋ вели́кое и҆ спасе́нное и҆ ди́вное мꙋдрова́нїе показа́лсѧ є҆сѝ.

Сла́ва, гла́съ ѕ҃:

Правосла́вныѧ вѣ́ры дꙋше́вныѧ ра́ди мꙋ́дрости ᲂу҆чи́тель ꙗ҆ви́лсѧ є҆сѝ, і҆а́кѡве бл҃же́нне, хрⷭ҇та̀ ѡ҆брѣ́тъ наста́вника, совѣ́ты ѕлосла̑вныѧ є҆реті́чєскїѧ разгна́лъ є҆сѝ. тѣ́мъ мо́лимъ тѧ̀, свѧ́те: моли́сѧ хрⷭ҇тꙋ̀ бг҃ꙋ ѡ҆ на́съ всегда̀, є҆́же ѡ҆ тебѣ̀ и҆звѣ́ствованнꙋю правосла́внꙋю вѣ́рꙋ неподви́жнꙋ сохрани́ти на́мъ, и҆ ве́лїю ми́лость и҆спросѝ, ѻ҆́ч҃е і҆а́кѡве.

И҆ ны́нѣ, бг҃оро́диченъ:

На стїхо́внѣ стїхи̑ры, гла́съ д҃. Подо́бенъ: Ꙗ҆́кѡ до́блѧ:

Зарѧ́ми дꙋхо́вными ꙳ просвѣще́нное свѣтоза́рное ꙳ со́лнце бы́лъ є҆сѝ, ꙳ ꙗ҆́коже лꙋчы̀ ᲂу҆чє́нїѧ ꙳ во всѧ̑ концы̀ простира́ѧ, ꙳ и҆ вѣ́рныхъ ѡ҆зарѧ́ѧ ꙳ и҆сполне́нїе, блаже́нне, ꙳ и҆ ѿгонѧ́ѧ тмꙋ̀, бг҃оно́се, є҆ресе́й, ꙳ си́лою ѿ дв҃ы возсїѧ́вшагѡ.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Благосказа́нїемъ слове́съ твои́хъ, ꙳ свѧще́нный і҆а́кѡве, ꙳ цр҃ковь всѧ̀ ᲂу҆краша́етсѧ, ꙳ ра́дꙋющисѧ ᲂу҆че́ньми кра́сными въ добродѣ́телехъ, ꙳ и҆ почита́етъ свѧще́нное твоѐ ꙳ преставле́нїе, пресла́вне, ꙳ свѧще́нныхъ похвало̀, ꙳ ѻ҆тцє́въ верхо́вниче, ꙳ и҆ прест҃ы́ѧ трⷪ҇цы побо́рниче.

Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ:

Ѻ҆́гненными твои́ми ᲂу҆чє́нїи ꙳ є҆ресе́й всѧ́каѧ хвра́стнаѧ ꙳ попалѧ́етсѧ ле́сть, премꙋ́дре, ꙳ разꙋ́мными глꙋбина́ми ꙳ погрꙋжа́етсѧ во́инство ꙳ неповинꙋ́ющихсѧ ѕлочести́выхъ, ꙳ свѧще́нне ѻ҆́ч҃е і҆а́кѡве, ᲂу҆чє́нїи твои́ми, и҆ ᲂу҆краша́етсѧ вѣ́рныхъ всегда̀ цр҃ковь, ꙳ велегла́снѡ чтꙋ́щихъ тѧ̀.

Сла́ва, гла́съ и҃.

И҆́же по ѻ҆́бразꙋ соблю́дъ невреди́мѡ, прпⷣбне ѻ҆́ч҃е, ѡ҆ хрⷭ҇то́вѣ ѻ҆́бразѣ проти́вꙋ ста́лъ є҆сѝ мꙋ́жески, не ᲂу҆боѧ́всѧ гноеимени́тагѡ преще́нїѧ, но дꙋхо́внымъ мече́мъ того̀ ᲂу҆би́лъ є҆сѝ. тѣ́мже дерзнове́нїе стѧжа́въ къ бг҃ꙋ, спасѝ ста́до твоѐ ѿ є҆ресе́й всѣ́хъ, і҆а́кѡве многострада́льне.

И҆ ны́нѣ, бг҃оро́диченъ. Тропа́рь, гла́съ д҃:

И҆збра́нъ ѿ ю҆́ности бг҃ови бы́въ, ст҃и́телю і҆а́кѡве, сегѡ̀ ра́ди а҆рхїере́йства са́номъ почте́нъ, ᲂу҆па́слъ є҆сѝ лю́ди, ꙗ҆̀же тебѣ̀ бг҃омъ врꙋчє́нныѧ: тѣ́мже и҆ по преставле́нїи чꙋде́съ дарова̑нїѧ ѿ бг҃а прїѧ́лъ є҆сѝ и҆сцѣлѧ́ти разли̑чныѧ недꙋ́ги: молѝ ѡ҆ на́съ, соверша́ющихъ честнꙋ́ю па́мѧть твою̀, да тебѐ непреста́ннѡ велича́емъ.

Сла́ва, и҆ ны́нѣ, бг҃оро́диченъ:

На ᲂу҆́трени, на Бг҃ъ гдⷭ҇ь, тропа́рь то́йже.

По а҃-мъ стїхосло́вїи сѣда́ленъ, гла́съ а҃. Подо́бенъ: Гро́бъ тво́й:

Слꙋжи́тель бы́въ хрⷭ҇та̀, всѧ́ческихъ влⷣки, наꙋчи́лъ є҆сѝ лю́ди, и҆ просвѣти́лъ є҆сѝ бжⷭ҇твеннымъ креще́нїемъ, къ разꙋмѣ́нїю си́хъ наставлѧ́ѧ, ст҃и́телю. тѣ́мже тѧ̀ проповѣ́дника и҆́стинна всѝ и҆менꙋ́емъ, всечестна́го ст҃и́телѧ и҆ ᲂу҆го́дника хрⷭ҇то́ва.

Два́жды.

Сла́ва, и҆ ны́нѣ, бг҃оро́диченъ:

Безневѣ́стнаѧ чⷭ҇таѧ бцⷣе дв҃о, є҆ди́на предста́тельница вѣ́рныхъ и҆ покро́въ, бѣ́дъ и҆ скорбе́й и҆ лю́тыхъ ѡ҆бстоѧ́нїй всѧ̑ и҆зба́ви, и҆̀же на тѧ̀ ᲂу҆пова́нїе и҆мꙋ́щыѧ, ѻ҆трокови́це, и҆ дꙋ́шы на́шѧ спасѝ бжⷭ҇твенными мольба́ми твои́ми.

По в҃-мъ стїхосло́вїи сѣда́ленъ, гла́съ д҃:

Ѿ ю҆́ности взе́мъ крⷭ҇тъ тво́й, благоче́стнѡ послѣ́довалъ є҆сѝ, и҆ ᲂу҆вѧди́въ плотско́е мꙋдрова́нїе воздержа́нїемъ. тѣ́мъ на а҆рхїере́йстѣмъ сѣда́лищи сѣ́дъ, возвели́чилъ є҆сѝ влⷣкꙋ, и҆ того̀ пречⷭ҇тꙋю мт҃рь, зна́меньми разли́чными твою̀ ᲂу҆краси́вшыѧ ра́кꙋ, і҆а́кѡве бг҃облаже́нне.

Два́жды.

Сла́ва, и҆ ны́нѣ, бг҃оро́диченъ:

Дв҃о всенепоро́чнаѧ, пресꙋ́щнаго бг҃а ро́ждшаѧ, со і҆ера́рхомъ і҆а́кѡвомъ того̀ непреста́ннѡ молѝ, ѡ҆ставле́нїе согрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю чтꙋ́щымъ тѧ̀ по до́лгꙋ: є҆ди́на всепѣ́таѧ.

По полѷеле́и сѣда́ленъ, гла́съ и҃. Подо́бенъ: Премꙋ́дрости:

Надъ страстьмѝ ца́рствовалъ є҆сѝ плотски́ми, і҆ера́рхъ ꙗ҆ви́всѧ бг҃оподо́бенъ: гра́дъ тво́й росто́въ ᲂу҆па́слъ є҆сѝ: креще́нїемъ же просвѣти́лъ є҆сѝ, и҆ наказа́лъ є҆сѝ сла́вити є҆ди́наго бг҃а въ тре́хъ ѵ҆поста́сехъ. тѣ́мже и҆сточа́еши и҆сцѣлє́нїѧ и҆ по кончи́нѣ вѣ́рою притека́ющымъ ко пречⷭ҇тѣй бж҃їи мт҃ри, и҆ къ ра́цѣ моще́й твои́хъ, і҆а́кѡве: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рꙋ, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.

Степє́нна, а҃-й а҆нтїфѡ́нъ д҃-гѡ гла́са. Прокі́менъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ. Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло л҃є.

По н҃-мъ ѱалмѣ̀ стїхи́ра, гла́съ ѕ҃. Самогла́сна:

Наслѣ́дниче хрⷭ҇то́въ, слꙋго̀ гдⷭ҇ень і҆а́кѡве, по и҆́мени твоемꙋ̀ та́кѡ и҆ житїѐ твоѐ: просїѧ́въ бо сѣди́нами ра́зꙋмъ, свидѣ́тельствоваше свѣ́тлость лица̀ твоегѡ̀, дꙋше́вное неѕло́бїе и҆звѣ́ствоваше кро́тость, сло́во молчали́вое, жи́знь твоѧ̀ сла́внаѧ, и҆ ᲂу҆спе́нїе со ст҃ы́ми, молѝ ѡ҆ дꙋша́хъ на́шихъ.

Канѡ́нъ бцⷣы, на ѕ҃: И҆ ст҃а́гѡ на и҃.

Гла́съ ѕ҃. Пѣ́снь а҃. І҆рмо́съ:

Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Бжⷭ҇твенными зарѧ́ми и҆ свѧще́нными свѣтосїѧ̑нїи при́снѡ мою̀ дꙋ́шꙋ ѡ҆зарѝ, тво́й, і҆ера́рше, пра́здникъ, ѻ҆́ч҃е, сла́вѧща.

Всесвѣ́тлꙋю тѧ̀ ѕвѣздꙋ̀, мы́сленное показа̀ сл҃нце свѣ́тлость твои́хъ добродѣ́телей, просвѣтѝ зе́млю, ст҃и́телю хрⷭ҇то́въ мꙋ́дре і҆а́кѡве.

Житїѐ при́снѡ ѡ҆чище́но и҆ чи́сто, и҆ скве́рнѣ несмѣ́шено ꙗ҆ви́въ, хрⷭ҇то́въ свѧще́нъ сосꙋ́дъ, премꙋ́дре, показа́лсѧ є҆сѝ на землѝ, і҆а́кѡве бл҃же́нне.

Бг҃оро́диченъ:

Со ѻ҆ц҃е́мъ сы́й є҆диноро́дный, зємны́ѧ ѡ҆божи́въ, чⷭ҇таѧ, за мнѡ́гїѧ щедрѡ́ты, ꙗ҆́кѡ бг҃ъ пребл҃гі́й.

Катава́сїа: Хрⷭ҇то́съ ражда́етсѧ:

Пѣ́снь г҃. І҆рмо́съ:

Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Сн҃ъ днѐ свѣ́та ты̀, ст҃и́телю, трꙋды̑ твои́ми ꙗ҆ви́лсѧ є҆сѝ, и҆ ꙗ҆́снѡ во свѣ́тлостехъ ны́нѣ ст҃ы́хъ сїѧ́еши бл҃года́тїю.

Проповѣ́даѧ ны́нѣ благочести́внѡ трⷪ҇цы є҆ди́но бжⷭ҇тво̀, многобо́жнꙋю ле́сть и҆скорени́лъ є҆сѝ ѿ землѝ, ꙗ҆́кѡ чⷭ҇тны́й ст҃и́тель, и҆ ꙗ҆́кѡ сло́ва и҆́стинный слꙋжи́тель.

Пꙋ́ть ѡ҆бличи́лъ є҆сѝ, мꙋ́дре, всѣ̑мъ прельщє́ннымъ нечести́вагѡ и҆скꙋше́нїѧ, и҆ приве́лъ є҆сѝ къ сло́вꙋ пастыренача́льникꙋ, ꙗ҆́кѡ па́стырь слове́сный и҆ спаси́тельный.

Бг҃оро́диченъ:

Приста́нище бꙋ́ди мѝ и҆ ѡ҆кормле́нїе, бѣ́дствꙋющꙋ страстьмѝ неѡсла́бнѡ и҆ погиба́ющꙋ, приста́нище сꙋ́щи въ мо́ри жите́йстѣмъ, є҆ди́на чⷭ҇таѧ приснодв҃о.

Сѣда́ленъ, гла́съ и҃. Подо́бенъ: Премꙋ́дрости:

Оу҆краша́ѧсѧ премꙋ́дростїю ра́зꙋма, горды́ню низложи́лъ є҆сѝ плотскі́ѧ тѧ́гости, и҆ бы́лъ є҆сѝ ѻ҆би́тель дх҃а прест҃а́гѡ, непремѣ́ннѡ простира́ѧсѧ ра́зꙋмомъ къ лю́бѧщемꙋ тѧ̀. тѣ́мъ ре́вностїю бжⷭ҇твенною разгара́ѧсѧ, сла́вне, сирота́мъ и҆ ᲂу҆бѡ́гимъ ᲂу҆твержде́нїе ꙗ҆ви́лсѧ є҆сѝ: а҆́гг҃лѡвъ собесѣ́дникъ, і҆а́кѡве, молѝ хрⷭ҇та̀ т҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆́нъ сѣда́ленъ, гла́съ д҃ Подо́бенъ: Ꙗ҆ви́лсѧ є҆сѝ дне́сь:

Правовѣ́рнѡ, прпⷣбне, цр҃ковь хрⷭ҇то́вꙋ ᲂу҆па́слъ є҆сѝ, и҆ є҆реті́чєскїѧ ѿгна́лъ є҆сѝ пле́велы, и҆ въ вы́шнихъ се́лѣхъ водворѧ́ешисѧ, пребл҃же́нне.

И҆ ны́нѣ, бг҃оро́диченъ: Ꙗ҆́кѡ всенепоро́чнаѧ: Пи́санъ въ ѕ҃і де́нь.

Пѣ́снь д҃. І҆рмо́съ:

Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Предвѣ́дый бг҃ъ, бл҃же́нне, твоеѧ̀ дꙋшѝ красотꙋ̀ и҆ ра́зꙋма чистотꙋ̀, свѧщеннопроповѣ́дника мꙋ́дра и҆ ᲂу҆чи́телѧ показа́ тѧ.

Дх҃омъ просвѣще́нъ сы́й, сꙋ́щыѧ во тмѣ̀ пре́лести просвѣща́еши, и҆ креще́нїемъ сы́ны днѐ соверша́еши, ст҃и́телю пресловꙋ́щїй.

Ѿ тмы̀ ѕвѣре́й и҆зба́вилъ є҆сѝ, ста́до твоѐ растерза́ти и҆́щꙋщихъ, и҆ ѿстꙋпи́те вѣ́ры непоро́чныѧ, ст҃и́телємъ добро́то, и҆ па́стырємъ старѣ́йшинство.

Бг҃оро́диченъ:

Разꙋ́мнѡ въ кꙋпинѣ́ тѧ ѻ҆гнепа́льнѣй мѡѷсе́й ви́дѣвъ, ꙗ҆́вственнѡ ѡ҆бразꙋ́ющей бг҃а, хотѧ́ща и҆зъ тебє̀ роди́тисѧ неизрече́ннѡ, бцⷣе приснодв҃о.

Пѣ́снь є҃. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Ст҃и́тельскꙋю твою̀ ѻ҆де́ждꙋ свѧще́ннꙋю носи́въ свѧще́ннѡ, нечести̑выѧ просвѣти́лъ є҆сѝ, честны́й ст҃и́телю: є҆ди́нство несозда́нно въ тре́хъ ли́цѣхъ, і҆а́кѡве премꙋ́дре проповѣ́далъ є҆сѝ.

Ѿ ᲂу҆́стъ во́лка мы́сленнагѡ восхи́тилъ є҆сѝ лю́ди ᲂу҆че́нїемъ, бг҃огла́се, ᲂу҆ста̀ є҆реті́чєскаѧ велерѣ̑чиваѧ, твои́ми бг҃ослѡ́вїи загради́лъ є҆сѝ, ѻ҆́ч҃е.

Ме́рзскїй низложе́нъ бы́сть твои́ми свѧще́нными словесы̀ маркїа́нъ, и҆ и҆згна́нъ бы́сть ра́ди всѧ́кагѡ безмѣ́стїѧ, ѿрыга́ѧй сквє́рны смра̑дныѧ, і҆а́кѡве пресла́вный.

Бг҃оро́диченъ:

Зако́ны є҆стества̀ пресꙋ́щный бг҃ъ ѡ҆бновлѧ́етъ, непоро́чнаѧ, и҆зъ твоеѧ̀ ᲂу҆тро́бы ражда́етсѧ, є҆ди́нъ ᲂу҆сво́ивъ всѧ́чєскаѧ во́лею.

Пѣ́снь ѕ҃. І҆рмо́съ:

Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Возвы́шено смире́нїе чистото́ю ᲂу҆ма̀, и҆ любо́вь нелицемѣ́рнꙋ, вѣ́рꙋ и҆ наде́ждꙋ и҆мѣ́ѧ и҆́стиннꙋ, і҆а́кѡве всесла́вный, трⷪ҇цы ꙗ҆ви́лсѧ є҆сѝ жили́ще.

Ны́нѣ ѿ созва́нїѧ твоегѡ̀ дх҃омъ, премꙋ́дре, и҆́же по тебѣ̀ благода́тїю слове́сныхъ ѻ҆ве́цъ, наста́вника приво́диши къ же́ртвенникꙋ, добродѣ́тели писа́нїемъ ѡ҆блиста́ема.

Вельмѝ ᲂу҆краси́вшасѧ росто́вскагѡ свѧще́нїѧ, сѣда́лищꙋ тѧ̀ ᲂу҆́читъ, прехва́льне, дх҃ъ ст҃ы́й, и҆ тебѐ па́стырѧ рꙋко́ю ст҃и́тельскою, і҆а́кѡве, соверша́етъ.

Бг҃оро́диченъ:

Две́рь бг҃облагода́тнаѧ, ѿве́рзши двє́ри нбⷭ҇ныѧ, двє́ри свѣ́та ѿве́рзи мѝ, влⷣчце, и҆ ѿ вра́тъ сме́ртныхъ свободи́ мѧ, чⷭ҇таѧ.

Конда́къ, гла́съ и҃:

Ꙗ҆́кѡ а҆рхїере́євъ сопресто́льникъ и҆ ст҃и́телємъ и҆зрѧ́дный побо́рникъ бы́лъ є҆сѝ, ст҃и́телю і҆а́кѡве: непреста́ннѡ сохранѧ́й ѻ҆те́чество твоѐ, гра́дъ же и҆ лю́ди, тебѐ вѣ́рою почита́ющыѧ, и҆ честны̑мъ моще́мъ твои̑мъ покланѧ́ющыѧсѧ, да велегла́снѡ тебѣ̀ вопїе́мъ: ра́дꙋйсѧ, і҆а́кѡве бг҃омꙋ́дре.

І҆́косъ:

И҆зъ чре́ва ма́тернѧ ѡ҆свѧще́ннаго ст҃и́телѧ гдⷭ҇нѧ хва́литъ ны́нѣ всѧ̀ страна̀ рѡссі́йскаѧ, прпⷣбнаго і҆а́кѡва, росто́вꙋ гра́дꙋ ᲂу҆твержде́нїе, бл҃года̑тныѧ да́ры прїе́мшаго бжⷭ҇твенныѧ сла́вы: къ немꙋ́же притека́юще всѝ вѣ́рою те́плою, ра́кꙋ моще́й є҆гѡ̀ любе́знѡ цѣлꙋ́емъ. тѣ́мъ и҆ а҆́зъ недосто́йный и҆ грѣ́шный надѣ́ѧсѧ на моли̑твы твоѧ̑, ст҃и́телю, ꙗ҆̀же ко влⷣцѣ и҆ пречⷭ҇тѣй є҆гѡ̀ мт҃ри, жела́ю, а҆́ки псѝ ѿ крꙋпи́цъ па́дающихъ ѿ трапе́зы госпо́дїй свои́хъ, насыще́нїе прїѧ́ти, є҆́же въ де́нь сꙋ́дный содѣ́ѧнныхъ мно́ю ѕѡ́лъ, моли́твами твои́ми, свѧ́те, проще́нїе ᲂу҆лꙋчи́ти, да велегла́снѡ тебѣ̀ вопїю̀: ра́дꙋйсѧ, і҆а́кѡве бг҃омꙋ́дре.

Пѣ́снь з҃. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Вразꙋмлѧ́лъ є҆сѝ неразꙋ̑мныѧ, ѡ҆браща́лъ є҆сѝ прельщє́нныѧ, совраща́ющыѧсѧ же, ѻ҆́ч҃е, спа́слъ є҆сѝ, и҆ бг҃ꙋ приве́лъ є҆сѝ чи́сты, томꙋ̀ пою́щыѧ благоче́стнѡ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Оу҆краси́шасѧ бжⷭ҇твеннїи твоѝ по́двиги, воплоще́нїе проповѣ́дающе неизрече́ннымъ милосе́рдїемъ возсїѧ́вшагѡ на́мъ. є҆мꙋ́же вопїе́мъ прилѣ́жнѡ: бл҃гослове́нъ бг҃ъ ѻ҆тє́цъ на́шихъ.

Ѡ҆блада́въ страстьмѝ тѣле́сными, поще́нїемъ, сла́вне, неѡблада́емь жите́йскими напа́стьми ꙗ҆ви́лсѧ є҆сѝ. ны́нѣ пое́ши при́снѡ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

И҆збавлѧ́еши дре́внѧгѡ престꙋпле́нїѧ ржⷭ҇тво́мъ твои́мъ, пречⷭ҇таѧ, хва́лимъ тѧ̀ спасе́ннїи тобо́ю, дв҃о, и҆ пою́ще вопїе́мъ тѝ: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃. І҆рмо́съ:

И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Процвѣ́лъ є҆сѝ ꙗ҆́кѡ фі́нїѯъ во дворѣ́хъ бж҃їихъ, и҆ до́лжнымъ сно́мъ преподѡ́бнымъ ᲂу҆снꙋ́лъ є҆сѝ: при́снѡ же наслажде́нїе пребжⷭ҇твенный гро́бъ тво́й, и҆ чꙋ́до ви́дѧщымъ, і҆а́кѡве проповѣ́дниче, показꙋ́еши.

Бж҃їе бо сло́во сꙋще́ственное, свѧще́ннѡ тѧ̀ и҆ ст҃и́телѧ возставлѧ́етъ, пома́зающа лю́ди, свѧщенност҃и́телю и҆ престо́льниче росто́вскїй и҆ свѣти́льниче вселе́нныѧ.

Вопло́щшагосѧ сло́ва бг҃осло́вилъ є҆сѝ: многобезслове́сїѧ бо лю́ди и҆зба́вивъ, бжⷭ҇твенъ бы́лъ є҆сѝ ᲂу҆чени́къ возсїѧ́вшагѡ, і҆а́кѡве бг҃огла́се.

Бг҃оро́диченъ:

Свѧщеннонаꙋчи́всѧ твои̑мъ та́йнамъ, прⷪ҇ро́чески бжⷭ҇твенный ли́къ, бцⷣе, и҆здале́ча ᲂу҆ви́дѣвъ, и҆ ꙗ҆́кѡ положи́въ бг҃опроповѣ́днѡ, бжⷭ҇твеннагѡ проповѣ́данїѧ ржⷭ҇тва̀ твоегѡ̀.

Пѣ́снь ѳ҃. І҆рмо́съ:

Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Ꙗ҆́кѡ свѣ́тъ, ꙗ҆́кѡ свѣ́щникъ, ꙗ҆́кѡ вели́кое со́лнце, ꙗ҆́кѡ мо́лнїѧ хрⷭ҇то́вѣ цр҃кви возсїѧ́лъ є҆сѝ, и҆ вѣ́рныхъ ра́зꙋмы просвѣти́лъ є҆сѝ, и҆ въ невечє́рнѧѧ мѣста̀ всели́лсѧ є҆сѝ, поѧ̀ трист҃ы́ми гла́сы трⷪ҇цꙋ несозда́ннꙋю.

Пло́тїю мі́ра кромѣ̀ бы́въ, ст҃и́телю, въ прекра́сныхъ чи́нѣ ѻ҆бита́ѧ, ро́да на́шегѡ ѡ҆богаща́еши творе́нїемъ свѣ́тлымъ. тѣ́мже па́мѧть твою̀ вѣ́рою соверша́емъ на землѝ, і҆а́кѡве премꙋ́дре.

Землѧ̀ тѣ́ло твоѐ блаже́нное скрыва́етъ, ꙗ҆́кѡ и҆сцѣлє́нїѧ точа́щи вѣ̑рнымъ, нб҃о же дꙋ́хъ со и҆збра́нными ѿ вѣ́ка но́ситъ, бжⷭ҇твенными сїѧ̑нїи ѡ҆заре́нъ є҆сѝ вои́стиннꙋ, ꙗ҆́кѡ всесла́вный.

Бг҃оро́диченъ:

Гла́съ а҆рха́гг҃ла гаврїи́ла прїе́мши, вели́кагѡ совѣ́та, чⷭ҇таѧ, хрⷭ҇та̀ є҆мманꙋ́ила родила̀ є҆сѝ, со а҆́гг҃лы земны̑ѧ всѧ̑ сочета́вшаго, є҆ди́на вино́вна на́шегѡ, дв҃о, бл҃же́нства.

Свѣти́ленъ. Подо́бенъ: Оу҆ченикѡ́мъ:

Чꙋ́днаго и҆ сла́внаго ст҃и́телѧ і҆а́кѡва вели́каго, прїиди́те пѣ́сньми бжⷭ҇твенными и҆ свѧще́нными похва́лимъ, ꙗ҆́кѡ росто́вꙋ предсѣда́льника и҆ а҆́гг҃льскимъ чинѡ́мъ сослꙋже́бника бы́вша.

Сла́ва, дрꙋгі́й свѣти́ленъ. Подо́бенъ: Посѣти́лъ ны̀ є҆́сть:

Сла́внѡ кра́ситсѧ дне́сь свѣтоза́рное торжество̀, и҆́же во свѣ́тѣ сла́вы бж҃їѧ предстоѧ̀, ст҃и́телю, помѧнѝ на́съ, хва́лѧщихъ твою̀ па́мѧть.

И҆ ны́нѣ, бг҃оро́диченъ:

Съ бг҃омъ ᲂу҆пова́нїе на тѧ̀ возложи́хомъ, пречⷭ҇таѧ, и҆́же и҆зъ тебє̀ проше́дшемꙋ сраспина́емсѧ хрⷭ҇тꙋ̀: твои́ми же къ немꙋ̀ моли́твами, невреди́мы да́же до конца̀ сохранѝ.

На хвали́техъ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:

На нб҃сѝ сы́й почива́ѧй веселѧ́сѧ, ꙳ молѝ за ны̀ прест҃ꙋ́ю трⷪ҇цꙋ, ꙳ ми́лость пода́ти на́мъ, ст҃и́телю, ꙳ и҆ житїѐ безгрѣ́шно: ꙳ ꙗ҆́кѡ въ тꙋ́ю вѣ́рꙋющихъ при́снѡ скѡ́рби ѿгонѧ́етъ, ꙳ и҆ недꙋ́ги и҆сцѣлѧ́етъ.

Милосе́рдїѧ твоегѡ̀ и҆сто́чникъ на́мъ да́рꙋй и҆ бл҃года́ть, ꙳ вско́рѣ ра́дости и҆спо́лни: ꙳ пода́й же цѣльбы̑ въ ско́рбехъ и҆ печа́лехъ, ꙳ молѧ̀ хрⷭ҇та̀, всесла́вне, ꙳ спастѝ всѧ̑ пою́щыѧ тѧ̀.

На весе́лїе вше́дъ нетлѣ́емое, ꙳ весе́лїе да́ти молѝ, ꙳ є҆́же спастѝ рабы̑ твоѧ̑: ꙳ мо́жеши бо, і҆а́кѡве, ꙳ въ моли́твахъ бѣды̑ всѧ̑ разгони́ти, ꙳ молѧ̀ хрⷭ҇та̀ и҆сцѣли́ти болѧ́щыѧ, ꙳ и҆ спастѝ дꙋ́шы на́шѧ.

Ѿ зако́ннагѡ ко́рене и҆зрастѐ вѣ́твь всыне́нїѧ, ꙳ вода́ми напое́нъ ꙗ҆́снѡ, і҆а́кѡве: ꙳ и҆́бо цр҃кви хрⷭ҇то́вѣ, ꙗ҆́кѡ фі́нїѯъ высокове́рхїй, ꙳ процвѣ́лъ є҆сѝ на́мъ, просвѣща́ѧ вѣ̑рныѧ. ꙳ тѣ́мъ ны́нѣ со ст҃и́тєли предстоѧ̀ прⷭ҇то́лꙋ хрⷭ҇то́вꙋ, ꙳ моли́сѧ ѡ҆ дꙋша́хъ на́шихъ.

Сла́ва, гла́съ ѕ҃:

Добродѣ́телей твои́хъ, ѻ҆́ч҃е прпⷣбне, пло́дъ просвѣти́лъ є҆́сть вѣ́рныхъ сердца̀: кто́ бо слы́шѧ безчи́сленное твоѐ смире́нїе, и҆ терпѣ́нїю не ᲂу҆диви́тсѧ, є҆́же къ ни́щымъ ти́хость, скорбѧ́щымъ ᲂу҆тѣше́нїе; всѧ̑ бг҃олѣ́пнѡ наꙋчи́лъ є҆сѝ, прпⷣбне ст҃и́телю і҆а́кѡве. и҆ ны́нѣ неꙋвѧда́емымъ вѣнце́мъ ᲂу҆вѧ́злсѧ є҆сѝ, молѝ ѡ҆ дꙋша́хъ на́шихъ.

И҆ ны́нѣ, бг҃оро́диченъ: Влⷣчце, прїимѝ:

Славосло́вїе вели́кое, и҆ ѿпꙋ́стъ. И҆ ча́съ пе́рвый.

На лїтꙋргі́и: Бл҃жє́нна, ѿ канѡ́на, пѣ́снь г҃-ѧ и҆ ѕ҃-ѧ.

Слꙋ́жба всѧ̀ ст҃и́тельскаѧ.