<<ѕ҃: 11>>
[глⷡ҇а а҃] СЛꙊ́ЖБА Ѻ҆́БЩА
пра́здникѡмъ, и҆ предпра́зднствѡмъ и҆ попра́зднствѡмъ
гдⷭ҇а на́шегѡ і҆и҃са хрⷭ҇та̀.
Ве́черъ, на Гдⷭ҇и воззва́хъ, стїхи̑ры, гла́съ ѕ҃.
Подо́бенъ: Гдⷭ҇и, ла́заревъ гро́бъ:
Гдⷭ҇и, и҆́же бж҃ество́мъ всѧ̑ и҆сполнѧ́ѧй, бл҃гостїю къ человѣ́кѡмъ
соедини́всѧ, є҆ди́нъ ѿ двою̀ неви́димь сы́й, проше́дъ ѿ чтⷭ҇ыѧ ви́димь бы́сть:
зра́ка же плотска́гѡ показꙋ́еши ѡ҆́бразъ и҆́мⷬ҇къ твоегѡ̀: въ нѧ́же прише́дше
покланѧ́емсѧ тебѣ̀ влⷣцѣ, содѣ́телѧ позна́вше мо́лимъ тѧ̀: бл҃гослове́нъ є҆сѝ,
сп҃се, поми́лꙋй на́съ. [Два́жды.]
Гдⷭ҇и, непостижи́мꙋю смотре́нїѧ твоегѡ̀ та́йнꙋ, ю҆́же ѿ вѣ́ка пронарече́ннꙋю,
прише́дый назна́менꙋеши, и҆ то̀ ᲂу҆вѣрѧ́ѧ показа́лъ є҆сѝ мі́рови бж҃е́ственное
и҆́мⷬ҇къ твоѐ, и҆ и҆спо́лнилъ є҆сѝ всѧ́чєскаѧ ра́дости, и҆ ѡ҆бнови́лъ є҆сѝ
па́ки человѣ́ческое сꙋщество̀, сп҃стѝ хотѧ̀: бл҃гослове́нъ є҆сѝ, бж҃е, поми́лꙋй
на́съ. [Два́жды.]
Гдⷭ҇и, пресла́вное соше́ствїе твоегѡ̀ млⷭ҇рдїѧ, въ вы́шнихъ живы́й въ нѣ́дрѣхъ
ѻ҆ч҃ескихъ, неѡпи́санно и҆ непостижи́мо, и҆ къ земны̑мъ прише́дъ, ви́дѣнъ бы́лъ
є҆сѝ ны́нѣ: и҆ почита́емъ пра́здникъ тво́й и҆́мⷬ҇къ, да и҆зба́виши на́съ ѿ
страсте́й є҆гѡ̀ <<ѕ҃ ѡ҆б.: 12>> ра́ди чтꙋ́щихъ тѧ̀ влⷣкꙋ, ѡ҆живи́вша ны̀
ᲂу҆ме́ршыѧ ѿ грѣ̑хъ: бл҃гослове́нъ є҆сѝ, сп҃се, поми́лꙋй на́съ. [Два́жды.]
Гдⷭ҇и, воплоти́всѧ ꙗ҆́коже восхотѣ́лъ є҆сѝ, и҆зво́лихъ нищетꙋ̀ на́шꙋ и҆
бога́тство бл҃госе́рдїѧ твоегѡ̀ показа́ти, и҆́мже мѧ̀ пе́рсть ѡ҆божи́лъ є҆сѝ.
сла́вимъ тѧ̀, чл҃вѣколю́бче, смотре́нїѧ ѡ҆́бразъ ви́дѣвше и҆́мⷬ҇къ твоегѡ̀:
си́мъ невозбра́ннѡ, є҆́же во є҆де́мъ вхо́дъ, сп҃се, да́рꙋй рабѡ́мъ твои̑мъ,
презрѧ̀ и҆̀мъ всѧ̑ согрѣшє́нїѧ. [Два́жды.]
Сла́ва, и҆ ны́нѣ, гла́съ и҃:
Влⷣко чл҃вѣколю́бче, вели́ка твоегѡ̀ смотре́нїѧ глꙋбина̀, въ ро́дъ и҆ ро́дъ
твоѐ бл҃годѣ́тельствꙋеши созда́нїе. нѣ́дръ ѻ҆ч҃ескихъ не ѿстꙋ́пль: пло́тїю
чл҃вѣ́къ ꙗ҆ви́лсѧ є҆сѝ на землѝ, прїи́де призыва́ѧ всѣ́хъ къ покаѧ́нїю: цр҃ю̀ и҆
бг҃ꙋ тебѣ̀ покланѧ́емсѧ, ꙗ҆́кѡ погꙋблѧ́еши врагѝ на́шѧ, и҆ сп҃са́еши лю́ди твоѧ̑
и҆зрѧ̑дныѧ, пра́зднꙋющыѧ чⷭ҇тно́е и҆́мⷬ҇къ твоѐ.
Прокі́менъ днѐ.
И҆схо́да чте́нїе [глава̀ к҃д].
Речѐ гдⷭ҇ь къ мѡѷсе́ю: взы́ди ко мнѣ̀ на горꙋ̀, и҆ ста́ни та́мѡ, и҆ да́мъ тѝ
скрижа̑ли ка́мєнны, зако́нъ и҆ за́пѡвѣди, ꙗ҆̀же написа́хъ, взако́нити лю́демъ.
И҆ воста́въ мѡѷсе́й, и҆ і҆исꙋ́съ предстоѧ́й є҆мꙋ̀, взыдо́ша на горꙋ̀ бж҃їю, и҆
ста́рцємъ речѐ: безмо́лвствꙋйте та́мѡ, до́ндеже возврати́мсѧ къ ва́мъ. и҆ сѐ
а҆арѡ́нъ и҆ ѡ҆́ръ съ ва́ми: а҆́ще комꙋ̀ прилꙋчи́тсѧ сꙋ́дъ, да и҆́дꙋтъ къ ни̑мъ.
И҆ взы́де мѡѷсе́й на горꙋ̀ и҆ покры̀ ѡ҆́блакъ го́рꙋ, и҆ сни́де сла́ва бж҃їѧ на
горꙋ̀ сїна́йскꙋю, и҆ покры̀ и҆ ѡ҆́блакъ ше́сть дне́й. И҆ призва̀ гдⷭ҇ь мѡѷсе́а
въ де́нь седмы́й, и҆з̾ среды̀ ѡ҆́блака. Видѣ́нїе же сла́вы гдⷭ҇ни ꙗ҆́кѡ ѻ҆́гнь
палѧ̀ на версѣ̀ горы̀, прѧ́мѡ сынѡ́въ і҆и҃левыхъ. И҆ вни́де мѡѷсе́й посредѣ̀
ѡ҆́блака, и҆ взы́де на горꙋ̀: и҆ бѣ̀ та́мѡ на горѣ̀ четы́редесѧть дне́й и҆
четы́редесѧть ноще́й.
Втора́гѡ зако́на чте́нїе [глава̀ д҃].
Речѐ мѡѷсе́й къ лю́демъ: ны́нѣ слы́ши, і҆и҃лю, ѡ҆правда̑нїѧ и҆ сꙋдьбы̑,
є҆ли̑ка а҆́зъ наꙋчꙋ̀ ва́съ дне́сь твори́ти, да жи́ви <<з҃: 13>> бꙋ́дете. И҆
сохрани́те, и҆ сотвори́те, ꙗ҆́кѡ сїѧ̀ премꙋ́дрость ва́ша, и҆ ра́зꙋмъ пред̾
всѣ́ми ꙗ҆зы́ки, є҆ли́цы а҆́ще ᲂу҆слы́шатъ ѡ҆правда̑нїѧ сїѧ̑, и҆ рекꙋ́тъ: сі́и
лю́дїе мꙋ́дри и҆ хꙋдо́жни, и҆ ꙗ҆зы́къ вели́кїй се́й, ꙗ҆́кѡ гдⷭ҇ь бг҃ъ на́шъ
є҆́сть во всѣ́хъ, и҆̀же а҆́ще того̀ призове́мъ. И҆ ны́нѣ внемли́те себѣ̀ ве́сь
до́мъ і҆и҃левъ, и҆ сохрани́те дꙋ́шы своѧ̑ ѕѣлѡ̀, и҆ не забꙋ́дите всѧ̑ словеса̀,
ꙗ҆̀же ви́дѣша ѻ҆́чи ва́ши, и҆ да не ѿстꙋ́пѧтъ ѿ серде́цъ ва́шихъ во всѧ̑ дни̑
живота̀ ва́шегѡ. И҆ приведо́сте сы́ны ва́шѧ, и҆ сы́ны сынѡ́въ ва́шихъ въ де́нь,
во́ньже ста́сте пред̾ гдⷭ҇емъ бг҃омъ въ хѡри́вѣ, въ де́нь во́ньже речѐ гдⷭ҇ь ко
мнѣ̀: соберѝ въ цр҃квь лю́ди, и҆ да ᲂу҆слы́шатъ глаго́лы моѧ̑, ꙗ҆́кѡ да
навы́кнꙋтъ боѧ́тисѧ менѐ во всѧ̑ дни̑, є҆ли́ки поживꙋ́тъ ѻ҆нѝ на землѝ, и҆ сы́ны
своѧ̑ да наꙋча́тъ. И҆ пристꙋпи́сте и҆ ста́сте под̾ горо́ю, и҆ гора̀ горѧ́ще
ѻ҆гне́мъ да́же до нб҃сѐ, тьма̀, сꙋмра́къ и҆ ды́мъ. И҆ глаго́ла гдⷭ҇ь бг҃ъ къ
ва́мъ на горѣ̀ ѿ среды̀ ѻ҆гнѧ̀: гла́съ слове́съ є҆гѡ̀ вы̀ слы́шасте, и҆ подо́бїѧ
не ви́дѣсте, но гла́съ. И҆ возвѣстѝ ва́мъ завѣ́тъ сво́й, и҆́же завѣща̀ ва́мъ
твори́ти, и҆ мнѣ̀ завѣща̀ гдⷭ҇ь во вре́мѧ ѻ҆́но, наꙋчи́ти ва́съ ѡ҆правда́нїємъ
и҆ сꙋдьба́мъ, твори́ти ва́мъ та̑ на землѝ. Глаго́ла гдⷭ҇ь къ ва́мъ на горѣ̀ въ
хѡри́вѣ, ѿ среды̀ ѻ҆гнѧ̀.
Втора́гѡ зако́на чте́нїе [глава̀ є҃].
Собра̀ мѡѷсе́й всѧ̑ лю́ди і҆и҃льтєскїѧ, и҆ речѐ къ ни̑мъ: слы́ши, і҆и҃лю,
всѣ́хъ ѡ҆правда́нїй мои́хъ, и҆ сꙋде́бъ мои́хъ, є҆ли́кѡ а҆́зъ глаго́лю во ᲂу҆́ши
ва́шѧ: во дни̑ ты̑ѧ наꙋчи́тесѧ и҆̀мъ, и҆ сохрани́ти ѧ҆̀ и҆ сотвори́ти. Гдⷭ҇ь
бг҃ъ завѣща̀ ва́мъ завѣ́тъ въ хѡри́вѣ: Не є҆ди̑нымъ ѻ҆тцє́мъ ва́шымъ завѣща̀
гдⷭ҇ь завѣ́тъ се́й, но и҆ ва́мъ. Лице́мъ къ лицꙋ̀ глаго́ла гдⷭ҇ь въ хѡри́вѣ и҆з̾
среды̀ ѻ҆гнѧ̀ на горѣ̀: А҆́зъ же стоѧ́хъ междꙋ̀ гдⷭ҇емъ и҆ ва́ми во вре́мѧ
ѻ҆́но, возвѣсти́ти ва́мъ глаго́лы гдⷭ҇ни, глаго́лѧ: А҆́зъ є҆́смь бг҃ъ тво́й,
и҆зведы́й тѧ̀ и҆з̾ землѝ є҆гѵ́петскїѧ, и҆з̾ до́мꙋ рабо́ты, не сꙋ́ть бо́зи и҆́ни
ра́звѣ менѐ: а҆́зъ бо є҆́смь гдⷭ҇ь бг҃ъ тво́й ревни́тель, творѧ̀ ми́лость
ты́сѧщами лю́бѧщымъ мѧ̀, и҆ хранѧ́щымъ за́пѡвѣди моѧ̑. И҆ <<з҃ ѡ҆б.: 14>> бы́сть
ꙗ҆́кѡ ᲂу҆слы́шасте гла́съ посредѝ ѻ҆гнѧ̀, и҆ гора̀ горѧ́ще ѻ҆гне́мъ, и҆
пристꙋпи́сте ко мнѣ̀ всѝ, и҆ реко́сте: Сѐ показа̀ гдⷭ҇ь бг҃ъ на́шъ на́мъ сла́вꙋ
свою̀, и҆ гла́съ слы́шахомъ посредѝ ѻ҆гнѧ̀: въ де́нь ѻ҆́нъ ви́дѣхомъ, ꙗ҆́кѡ
возглаго́летъ гдⷭ҇ь бг҃ъ къ человѣ́кꙋ, и҆ жи́въ бꙋ́детъ. И҆ ны́нѣ да не
ᲂу҆́мремъ, ꙗ҆́кѡ погꙋби́тъ ны̀ ѻ҆́гнь вели́кїй се́й, а҆́ще приложи́мъ послꙋ́шати
гла́съ гдⷭ҇а бг҃а на́шегѡ є҆щѐ, и҆ ᲂу҆́мремъ. Ка́ѧ бо пло́ть, и҆лѝ кто̀ слы́ша
гла́съ бг҃а глаго́люща посредѝ ѻ҆гнѧ̀, и҆ жи́въ бꙋ́детъ: И҆ слы́ша гдⷭ҇ь бг҃ъ
гла́съ слове́съ глаго́лющихъ ко мнѣ̀, и҆ рѣ́хъ къ ни̑мъ: и҆ за́пѡвѣди и҆
ѡ҆правда̑нїѧ и҆ сꙋды̀, є҆ли́кѡ заповѣ́да ва́мъ гдⷭ҇ь бг҃ъ, да ᲂу҆боите́сѧ всѣ́хъ
ѡ҆правда́нїй є҆гѡ̀, да млⷭ҇тивъ бꙋ́детъ, и҆ ᲂу҆мно́житесѧ на землѝ. Слы́ши,
і҆и҃лю, гдⷭ҇ь бг҃ъ ва́шъ, гдⷭ҇ь є҆ди́нъ є҆́сть: и҆ возлю́биши гдⷭ҇а бг҃а твоего̀
ѿ всегѡ̀ помышле́нїѧ твоегѡ̀, и҆ ѿ всегѡ̀ се́рдца твоегѡ̀, и҆ ѿ всеѧ̀ дꙋшѝ
твоеѧ̀, и҆ ѿ всеѧ̀ крѣ́пости твоеѧ̀, и҆ тогѡ̀ ᲂу҆бои́шисѧ, и҆ томꙋ̀ є҆ди́номꙋ
послꙋ́жиши, и҆ къ немꙋ̀ прилѣпи́шисѧ, и҆ и҆́менемъ є҆гѡ̀ клене́шисѧ, и҆
ᲂу҆гѡ́днаѧ є҆мꙋ̀ сотвори́ши: да добро̀ тебѣ̀ бꙋ́детъ.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
Прїи́де просвѣще́нїе, ꙳ бл҃года́ть ꙗ҆ви́сѧ, ꙳ и҆ и҆збавле́нїе наста̀, ꙳ мі́ръ
просвѣти́сѧ: ꙳ лю́дїе ра́дости и҆спо́лнитесѧ.
Сті́хъ: Бг҃ъ ѿ ю҆́га прїи́детъ и҆ ст҃ы́й ѿ горы̀ прїѡсѣне́нныѧ ча́щи.
По́йте ѻ҆те́чєствїѧ ꙗ҆зы̑къ, ꙳ хвалꙋ̀ и҆ сла́вꙋ возсыла́юще ꙳ хрⷭ҇тꙋ̀ бг҃ꙋ, ꙳
ᲂу҆се́рднѡ поспѣ́шшесѧ, ꙳ сла́вѧще и҆́мⷬ҇къ сегѡ̀.
Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ.
Сло́во ѻ҆́ч҃ее, и҆́мже всѧ̑ бы́ша, ꙳ безстра́стнѡ и҆ неизрече́ннѡ, ꙳
ѵ҆поста́сь зри́тсѧ є҆ди́на, ꙳ ѿ двою̀ є҆стествꙋ̑, ꙳ прїи́де сп҃стѝ
человѣ́чество.
Сла́ва, и҆ ны́нѣ, гла́съ и҃:
Гдⷭ҇и, и҆спо́лнити хотѧ̀ ꙗ҆̀же повелѣ́лъ є҆сѝ ѿ вѣ́ка, ѿ всеѧ̀ тва́ри
слꙋжи́тєли та́йны твоеѧ̀ прїѧ́лъ є҆сѝ: ѿ а҆́гг҃лъ гаврїи́ла: ѿ человѣ̑къ дв҃ꙋ: ѿ
нб҃съ ѕвѣздꙋ̀: ѿ землѝ го́рꙋ: ѿ пꙋсты́ни <<и҃: 15>> ꙗ҆́сли, ѿ во́дъ і҆ѻрда́нъ,
въ не́мже беззакѡ́нїѧ всѣ́хъ потреби́лъ є҆сѝ, сп҃се на́шъ, сла́ва тебѣ̀.
Тропа́рь настоѧ́щагѡ пра́здника.
А҆́ще ли нѣ́сть, глаго́ли тропа́рь, гла́съ в҃: Пречтⷭ҇омꙋ твоемꙋ̀ ѡ҆́бразꙋ:
На ᲂу҆́трени,
на Бг҃ъ гдⷭ҇ь, тропа́рь то́йже, три́жды.
По а҃-й каѳі́смѣ, сѣда́ленъ, гла́съ а҃.
Подо́бенъ: Гро́бъ тво́й:
Бл҃года́ть твоѧ̀, сп҃се, на на́съ и҆злїѧ́сѧ, ви́димꙋ бы́вшꙋ тѝ, непостижи́ме,
и҆ пре́лести тьма̀ ᲂу҆гасѐ: тѣ́мъ во свѣ́тѣ лица̀ твоегѡ̀ стѡпы̀ на́шѧ напра́ви,
да въ за́повѣдехъ твои́хъ ходѧ́ще, тебѐ сподо́бимсѧ ᲂу҆зрѣ́ти, свѣ́те
непристꙋ́пный.
Сла́ва, и҆ ны́нѣ, то́йже.
По в҃-й каѳі́смѣ, сѣда́ленъ, гла́съ є҃.
Подо́бенъ: Собезнача́льное:
Собезнача́льный сн҃ъ ѻ҆ц҃ꙋ̀ и҆ превѣ́чный, и҆ неви́димый сꙋщество́мъ, и҆
неѡсѧза́емый, под̾ лѣ́томъ бы́въ, за млⷭ҇ть неизрече́ннꙋю, ѡ҆пи́саныѧ пло́ти
твоеѧ̀, влⷣко, на́мъ ѡ҆ста́ви сла́дкое и҆з̾ѡбраже́нїе и҆́мⷬ҇къ на сп҃се́нїе
дꙋ́шъ на́шихъ.
Сла́ва, и҆ ны́нѣ, то́йже.
Велича́нїе настоѧ́щемꙋ пра́здникꙋ. По полѷеле́и сѣда́ленъ, гла́съ д҃.
Подо́бенъ: Вознесы́йсѧ:
Не ктомꙋ̀ сѣ́тованїе на лицѣ̀ а҆да́мовѣ, во а҆да́ма ѡ҆бо́лкшꙋсѧ и҆́же того̀
созда́вшемꙋ, и҆ лица̀ подо́бїемъ себѐ всѣ̑мъ ꙗ҆влѧ́ющꙋ и҆ къ любвѝ подви́жꙋщꙋ
бл҃гочести́выхъ составлє́нїѧ, є҆диногла́снѡ воспѣва́ти: сла́ва, влⷣко
чл҃вѣколю́бче кра́йнемꙋ схожде́нїю твоемꙋ̀.
Сла́ва, и҆ ны́нѣ, то́йже.
<<и҃ ѡ҆б.: 16>>
Степє́нна, д҃-гѡ гла́са, а҃-й а҆нтїфѡ́нъ.
Прокі́менъ:
Гдⷭ҇и, во свѣ́тѣ лица̀ твоегѡ̀ по́йдемъ, и҆ ѡ҆ и҆́мени твое́мъ возра́дꙋемсѧ во
вѣ́ки.
Сті́хъ: Ви́дѣша всѝ концы̀ землѝ сп҃се́нїе бг҃а на́шегѡ.
Є҆ѵⷢ҇лїе прилꙋчи́вшемꙋсѧ пра́здникꙋ. По н҃-мъ ѱалмѣ̀, стїхи́ра, гла́съ и҃:
Гдⷭ҇и, и҆спо́лнити хотѧ̀: [пи́сана на стїхо́внѣ ве́чера. Сла́ва.]
Канѡ́нъ, гла́съ д҃: і҆рмо́съ по два́жды, тропари́ же на в҃і.
Пѣ́снь а҃.
І҆рмо́съ: Наста́вльшемꙋ дре́вле і҆и҃лѧ, бѣжа́щаго ѿ рабо́ты фараѡ́новы, и҆
въ пꙋсты́ни пита́вшемꙋ, пои́мъ и҆зба́вителю бг҃ꙋ на́шемꙋ: ꙗ҆́кѡ просла́висѧ.
Въ наро́читый де́нь пра́здника на́шегѡ ѿве́рземъ ᲂу҆ста̀, человѣ́цы, и҆
ᲂу҆ѧсни́мъ ꙗ҆зы́къ, ꙗ҆вле́нїе бжⷭ҇твенное, и҆́мⷬ҇къ, хрⷭ҇та̀ бг҃а на́шегѡ
свѣ́тлѡ пою́ще: ꙗ҆́кѡ просла́висѧ.
Свѣ́тъ превѣ́чный, ѻ҆́ч҃а и҆сполнѧ́ѧ словеса̀, хотѧ̀ сказа́сти свою̀
бл҃года́ть, ѡ҆́бразъ ра́бїй прїи́мъ на́съ ра́ди, ꙗ҆ви́сѧ ѡ҆́бразомъ бжⷭ҇твеннагѡ
и҆́мⷬ҇къ своегѡ̀, свѣ́томъ ѡ҆блиста́ѧ на́съ.
Прїиди́те, всѝ, хрⷭ҇то́во и҆́мⷬ҇къ вѣ́рою пра́зднꙋемъ, и҆ разꙋ́мнѡ пѣ́нїе
предлага́юще бжⷭ҇твенное, сла́вимъ и҆ возопїе́мъ согла́снѡ: хрⷭ҇то́съ прїи́де
тє́мнымъ на ѡ҆бновле́нїе. пое́мъ є҆мꙋ̀, ꙗ҆́кѡ просла́висѧ.
Бг҃оро́диченъ: Ꙗ҆вле́нїе дне́сь бг҃овочл҃вѣ́чнагѡ ржⷭ҇тва̀, вои́стиннꙋ
позна́хомъ тобо́ю, всечтⷭ҇аѧ: и҆ чтꙋ́щїи тѧ̀ сподо́блени бы́хомъ ви́дѣти
и҆́мⷬ҇къ сн҃а твоегѡ̀, є҆го́же молѝ сп҃стѝ на́съ ѿ всѧ́кїѧ бѣ́ды.
Катава́сїа, настоѧ́щагѡ пра́здника, і҆рмосы̀, и҆лѝ сїѧ̑:
Бж҃е́ственнымъ покрове́нъ, медленоѧзы́чный мра́комъ, и҆звиті́йствова
бг҃опи́санный зако́нъ: ти́нꙋ бо ѿтрѧ́съ ѻ҆чесѐ ᲂу҆́мнагѡ, ви́дитъ сꙋ́щаго, и҆
наꙋча́етсѧ дх҃а ра́зꙋмꙋ, хвалѧ̀ бж҃е́ственными пѣ́сньми.
Пѣ́снь г҃.
І҆рмо́съ: Не мꙋ́дростїю, и҆ си́лою и҆ бога́тствомъ хва́лимсѧ, но тобо́ю
ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ, па́че тебѐ,
чл҃вѣколю́бче.
<<ѳ҃: 17>>
Влⷣко сы́й по сꙋществꙋ̀, соедини́всѧ рабѡ́мъ пло́тїю, и҆ ви́дѣнъ бы́лъ є҆сѝ,
на́мъ дѣ́тельствꙋѧ разли́чное сп҃се́нїе, хрⷭ҇тѐ, є҆́же ны́нѣ прославлѧ́емъ
и҆́мⷬ҇къ твоѐ: ꙗ҆́кѡ нѣ́сть ст҃ъ па́че тебѐ, чл҃вѣколю́бче.
Лю́дїе твоѝ, хрⷭ҇тѐ, и҆̀же въ тѧ̀ вѣ́рою просвѣще́ни, бжⷭ҇твенный тво́й
пра́здникъ и҆́мⷬ҇къ сотворѧ́ютъ свѣ́тлѡ: то́же чтꙋ́ще ѿ бѣ́дъ и҆збавлѧ́емсѧ,
и҆ црⷭ҇твїю нбⷭ҇номꙋ, сп҃се, сподо́би на́съ.
Животѐ ѵ҆поста́сный, ны́нѣ вкꙋ́шь сме́рти пло́тїю, є҆́юже живо́тъ и҆сточи́лъ
є҆сѝ мє́ртвымъ, воста́нїемъ твои́мъ, хрⷭ҇тѐ, и҆ твои́мъ и҆́мⷬ҇къ, ꙗ҆́кѡ
живота̀ хода́таѧ дарова́лъ є҆сѝ на́мъ.
Бг҃оро́диченъ: Сп҃се́нїе и҆з̾ тебѐ пре́жде въ мі́рѣ возсїѧ̀ пло́тїю, ны́нѣ
же вѣ́рныхъ тобо́ю, бг҃ома́ти, живо́тъ ꙗ҆ви́сѧ, свѣтоно́сное хрⷭ҇то́во
и҆́мⷬ҇къ, є҆гѡ́же ра́ди, бцⷣе, молѝ сн҃а твоего̀, и҆зба́вити на́съ ѿ бѣ́дъ и҆
вѣ́чнагѡ мꙋче́нїѧ.
Катава́сїа: Разве́рзе ᲂу҆тро́бы неча́дствовавшїѧ ᲂу҆́зы, доса́дꙋ же
неꙋдоботерпи́мꙋ бл҃гоча́дствꙋющїѧ, є҆ди́на мл҃тва прⷪ҇ро́чицы дре́вле а҆́нны,
носѧ́щїѧ дх҃ъ сокрꙋше́нъ, къ си́льномꙋ и҆ бг҃ꙋ ра́зꙋмѡвъ.
Сѣда́ленъ, гла́съ д҃.
Подо́бенъ: Вознесы́йсѧ на крⷭ҇тъ:
Мо́лимъ тѧ̀, влⷣко млⷭ҇тиве сп҃се, и҆зба́ви на́съ ѿ всѣ́хъ ви́димыхъ и҆
неви́димыхъ вра̑гъ, и҆ и҆ноплеме́нныхъ нахожде́нїй, и҆ всѧ́кихъ бѣ́дъ и҆
смꙋще́нїѧ, пра́зднꙋющихъ вѣ́рою и҆ любо́вїю бж҃е́ственное и҆́мⷬ҇къ, є҆гѡ́же
ра́ди сподо́би на́съ полꙋчи́ти вѣ́чныхъ бл҃ги́хъ наслажде́нїе.
Сла́ва, и҆ ны́нѣ, то́йже.
Пѣ́снь д҃.
І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебѐ
вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й гдⷭ҇и.
Свѣтоподо́бный бжⷭ҇твенный пра́здникъ, пло́тїю прибли́жшагѡсѧ чл҃вѣ́кѡмъ,
прїи́де къ новоизбра́нномꙋ і҆и҃лю, и҆ просвѣща́етъ дне́сь всегѡ̀ мі́ра концы̀
и҆́мⷬ҇къ свои́мъ: сла́ва си́лѣ твое́й гдⷭ҇и.
<<ѳ҃ ѡ҆б.: 18>>
Бг҃овидѣ́нїѧ сла́вы дре́вле твои́хъ зна́менїй сподо́бисѧ мѡѷсе́й, просїѧ́въ:
но́вый же і҆и҃ль лице́мъ ны́нѣ къ лицꙋ̀, ꙗ҆́снѡ тѧ̀ и҆зба́вителѧ зри́тъ: сла́ва
си́лѣ твое́й, гдⷭ҇и.
Ви́дите чꙋ̑днаѧ всѝ лю́дїе, дꙋхо́внѡ ны́нѣ возвесели́тесѧ, хрⷭ҇то́во пою́ще
и҆́мⷬ҇къ, и҆́же на землѝ ꙗ҆́вльшагѡсѧ человѣ́кѡмъ на сп҃се́нїе: сла́ва си́лѣ
твое́й, гдⷭ҇и.
Бг҃оро́диченъ: Пречⷭ҇таѧ бцⷣе, сп҃си́ ны къ тебѣ̀ прибѣга́ющыѧ, и҆
пра́зднꙋющыѧ сн҃а твоегѡ̀ бж҃е́ственное и҆́мⷬ҇къ и҆ всегда̀ молѝ є҆го̀,
грѣхѡ́въ проще́нїе дарова́ти на́мъ.
Катава́сїа: Цр҃ю̀ царе́й, ꙗ҆ковы́й ѿ ꙗ҆кова́гѡ є҆ди́нъ, сло́ве, произше́дый
ѿ ѻ҆ц҃а̀ безвино́внагѡ, равномо́щнаго твоего̀ дх҃а а҆пⷭ҇лѡмъ и҆́стиннѡ посла́лъ
є҆сѝ, ꙗ҆́кѡ бл҃годѣ́телѧ, пою́щымъ: сла́ва держа́вѣ твое́й, гдⷭ҇и.
Пѣ́снь є҃.
І҆рмо́съ: Ѿ свѣ́та пресѣкі́й перворо́дный свѣ́тъ, ꙗ҆́кѡ во свѣ́тѣ дѣ́ла
пою́тъ тѧ̀, хрⷭ҇тѐ, содѣ́телѧ, во свѣ́тѣ твое́мъ пꙋти̑ на́шѧ напра́ви.
Воспле́щемъ дне́сь рꙋка́ми, и҆ воскли́кнемъ гла́сомъ хвале́нїе гдⷭ҇еви: се́ бо
прїи́де и҆ ꙗ҆ви́сѧ вои́стиннꙋ, всѧ̑ просвѣща́ѧ вѣ̑рныѧ бж҃е́ственнымъ
и҆́мⷬ҇къ, пречⷭ҇тыѧ пло́ти своеѧ̀.
Просвѣти́шасѧ дне́сь правосла́вныхъ собо́ри, є҆реті́чєскаѧ же ѡ҆полчє́нїѧ
посрами́шасѧ, ви́дѧще покланѧ́емо хрⷭ҇то́во и҆́мⷬ҇къ, ѡ҆́бразомъ плотски́мъ
и҆зба́вителѧ прело́жшасѧ.
Прїи́де ᲂу҆́бѡ торжество̀, и҆ вели́каѧ та́йна ѿ лица̀ гдⷭ҇нѧ свѣ́тъ возсїѧ̀
мі́рови, бл҃гоꙋстро́енный пра́здникъ бжⷭ҇твеннагѡ и҆́мⷬ҇къ гдⷭ҇нѧ: и҆́мже бо
дарова́сѧ плѣ̑ннымъ всѣ̑мъ ми́ръ и҆ весе́лїе.
Бг҃оро́диченъ: Ѡ҆́блацы свы́ше да кропѧ́тъ сла́дость землены̑мъ, твои́мъ
хода́тайствомъ, прест҃а́ѧ дв҃о. ᲂу҆ще́дривъ мі́ръ сн҃ъ тво́й и҆ бг҃ъ на́шъ,
дне́сь, воздви́же ро́гъ хрⷭ҇тїа́нскїй: дне́сь сп҃се́нїе вѣ̑рнымъ, бж҃е́ственнымъ
и҆́мⷬ҇къ свои́мъ дарова̀.
Катава́сїа: Рѣши́тельное ѡ҆чище́нїе грѣхѡ́въ, ѻ҆гнедохнове́ннꙋю прїими́те
дх҃а ро́сꙋ, ѽ ча̑да свѣтоѡбра̑знаѧ, церкѡ́внаѧ! ны́нѣ ѿ сїѡ́на бо и҆зы́де
зако́нъ, ѧ҆зыкоѻгнеѡбра́знаѧ дх҃а бл҃года́ть.
<<і҃: 19>>
Пѣ́снь ѕ҃.
І҆рмо́съ: Бж҃е́ственное сїѐ и҆ всечⷭ҇тно́е соверша́юще пра́зднество,
бг҃омꙋ́дрїи, бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а
сла́вимъ.
Возсїѧ̀ живо́тъ мє́ртвымъ, и҆ свѣ́тъ ᲂу҆жѐ слѣпы̑мъ прише́ствова, и҆ лю́тѣ
немощны̑мъ врачевство̀ ѿве́рзесѧ: и҆ всѣ̑мъ сп҃се́нїе прибли́жисѧ, свѣтоно́снымъ
и҆́мⷬ҇къ хрⷭ҇то́вымъ.
Да пра́зднствꙋетъ всѧ́къ ра́зꙋмъ, ны́нѣ ꙗ҆́снѡ ви́дѧ невеще́ственный
пра́здникъ бжⷭ҇твеннагѡ и҆́мⷬ҇къ, и҆́же просвѣще́нїе и҆сточа́етъ
покланѧ́ющымсѧ є҆мꙋ̀.
Гдⷭ҇и, ви́дѧще тѧ̀, нб҃са̀ повѣ́даютъ сла́вꙋ твою̀, і҆и҃се хрⷭ҇тѐ, всѧ̑
вѣ̑рныѧ твоѧ̑ созыва́ютъ воспѣва́ти бж҃е́ственное и҆́мⷬ҇къ твоѐ, грѧдꙋ́щихъ къ
позна́нїю и҆́стиннагѡ покаѧ́нїѧ.
Бг҃оро́диченъ: Бж҃їѧ мт҃и, ꙗ҆ви́сѧ страна́мъ зна́менїе, и҆ зна́емое
сп҃се́нїе, чтⷭ҇аѧ дв҃о, свѣ́томъ сн҃а твоегѡ̀ чтⷭ҇на́гѡ и҆́мⷬ҇къ, то́же молѝ
сп҃стѝ на́съ помина́ющихъ тѧ̀, и҆ и҆зба́ви бѣ́дъ и҆ пога́ныхъ нахожде́нїѧ,
мл҃твами твои́ми.
Катава́сїа: Ѡ҆чище́нїе на́мъ, хрⷭ҇тѐ, и҆ сп҃се́нїе, влⷣко, возсїѧ́лъ є҆сѝ ѿ
дв҃ы: да ꙗ҆́кѡ прⷪ҇ро́ка ѿ ѕвѣ́рѧ морска́гѡ пе́рсей і҆ѡ́нꙋ, ѿ тлѝ и҆схи́тиши
всего̀ а҆да́ма, всеро́дна па́дшаго.
Конда́къ пра́здника.
А҆́ще ли нѣ́сть, глаго́ли се́й конда́къ, гла́съ в҃:
Неизрече́ннагѡ и҆ бж҃е́ственнагѡ твоегѡ̀ къ человѣ́кѡмъ смотре́нїѧ,
неѡпи́санное сло́во ѻ҆́ч҃ее, и҆ ѡ҆́бразъ непи́санный и҆ бг҃опи́санный,
побѣди́теленъ вѣ́дѧще нело́жнагѡ твоегѡ̀ воплоще́нїѧ, почита́емъ того̀
лобыза́юще.
І҆́косъ: Оу҆вѣрѧ́ѧ и҆ чл҃вѣ́кѡмъ гдⷭ҇ь вочл҃вѣ́ченїѧ своегѡ̀ та́йнꙋ, са́мъ
ѡ҆писꙋ́етсѧ бг҃омꙋ́жнымъ свои́мъ ѡ҆́бразомъ, и҆ первоѡбра́зное ᲂу҆́бѡ
посажда́етъ на прⷭ҇то́лѣ ѻ҆́ч҃и, покланѧ́тисѧ ѿ безпло́тныхъ а҆́гг҃лъ: подо́бїю
же первоѡбра́знагѡ и҆ на́мъ дарова̀ покланѧ́тисѧ. є҆го́же ѡ҆б̾има́юще дꙋше́ю и҆
се́рдцемъ, почита́емъ того̀ лобыза́юще.
Пѣ́снь з҃.
І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень
попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
<<і҃ ѡ҆б.: 20>>
Всѧ́къ гра́дъ и҆ страна̀ сра́дꙋетсѧ, пра́зднꙋѧ вѣ́рнѡ съ но́вымъ сїѡ́номъ,
цр҃ь во є҆гѡ̀ сла́вы хрⷭ҇то́съ прише́лъ є҆́сть ѡ҆́бразомъ чтⷭ҇на́гѡ пра́здника
своегѡ̀ и҆́мⷬ҇къ, и҆ сп҃са́ѧ покланѧ́ющихсѧ є҆мꙋ̀ и҆ вопїю́щихъ: ѻ҆тє́цъ
на́шихъ бж҃е, бл҃гослове́нъ є҆сѝ.
Бг҃огла́сныхъ прⷪ҇рѡ́къ рече́нїе и҆спо́лнисѧ бжⷭ҇твенными писа́ньми: ны́нѣ бо
ви́дѣхомъ сбытїѐ и҆́мⷬ҇къ хрⷭ҇то́вымъ просвѣща́етсѧ мі́ръ, и҆ свѣтоза́рнымъ
сїѧ́нїемъ сп҃са́етъ пою́щихъ: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ: Веселѧ́тсѧ съ земны́ми нбⷭ҇наѧ, и҆ сра́дꙋетсѧ всѣ́хъ ст҃ы́хъ
мно́жество, бога́тїи и҆ ᲂу҆бо́зїи пра́зднꙋемъ. сѐ ᲂу҆́бѡ ᲂу҆гото́ва просвѣще́нїе
на́мъ хрⷭ҇то́съ, и҆з̾ѡбраже́нїе пра́здника своегѡ̀, бл҃годѣ́тельное подо́бїе,
є҆́же прїѧ́тъ ѿ дв҃ы.
Катава́сїа: Согла́снаѧ возшꙋмѣ̀ ѻ҆рга́нскаѧ пѣ́снь, почита́ти
златосотворе́нный бездꙋ́шный и҆стꙋка́нъ: ᲂу҆тѣ́шителева же свѣтоно́снаѧ блгⷣть
почествꙋ́етъ, є҆́же вопи́ти: трⷪ҇це є҆ди́наѧ, равноси́льнаѧ, безнача́льнаѧ,
бл҃гослове́нна є҆сѝ.
Пѣ́снь и҃.
І҆рмо́съ: Въ вавѷлѡ́нѣ ѻ҆́троцы бж҃е́ственною распала́еми ре́вностїю,
мꙋчи́телѧ и҆ пла́мене преще́нїе мꙋ́жески попра́ша, и҆ посредѣ̀ ѻ҆гнѧ̀ вве́ржени
ѡ҆роша́еми поѧ́хꙋ: бл҃гослови́те, всѧ̑ дѣ́ла гдⷭ҇нѧ, гдⷭ҇а.
Соверше́нъ сы́й по сꙋществꙋ̀ бг҃ъ, и҆ чл҃вѣ́къ ви́дѣнъ бы́сть соверше́нъ,
сп҃са́ѧ по ѻ҆боемꙋ̀ своѧ̑ вои́стиннꙋ свѡ́йства, ꙗ҆́кѡ бг҃ъ плотско́е ᲂу҆вѣрѧ́ѧ
бж҃е́ственное и҆́мⷬ҇къ, є҆мꙋ́же покланѧ́ющесѧ пое́мъ: бл҃гослови́те, всѧ̑
дѣла̀ гдⷭ҇нѧ, гдⷭ҇а.
Вознесѝ ро́гъ, бж҃їй сло́ве, и҆сповѣ́дающихъ тѧ̀ бг҃а и҆ человѣ́ка, и҆
сла́вѧщихъ и҆́мⷬ҇къ твоѐ, и҆́мже живо́тъ вѣ́чный всѣ̑мъ дарова́лъ є҆сѝ
вѣ̑рнымъ, и҆ разрꙋшѝ пога̑нскаѧ шата̑нїѧ твоеѧ̀ ненави́дѧщихъ бж҃е́ственныѧ
си́лы.
Свѣ́титсѧ но́вый зако́нъ, и҆ цр҃ковь ᲂу҆краша́етсѧ: сла́вы бо твоеѧ̀
бжⷭ҇твенныѧ свѣ́тъ возсїѧ́лъ є҆сѝ, хрⷭ҇тѐ бж҃е, свѣтоподо́бное лицѐ твоѐ ꙗ҆ви́лъ
и҆́мⷬ҇къ твои́мъ, на сп҃се́нїе лю́демъ твои̑мъ, тебѣ̀ вопїю́щымъ:
бл҃гослови́те, всѧ̑ дѣла̀ гдⷭ҇нѧ, гдⷭ҇а.
<<а҃і: 21>>
Бг҃оро́диченъ: Па́дшымъ возста́нїе, ᲂу҆ныва́ющымъ ра́дованїе, и҆ заблꙋ́ждшымъ
наста́внице, болѧ́щымъ и҆сцѣле́нїе, и҆ всѣ̑мъ хрⷭ҇тїа́нѡмъ сп҃се́нїе, соблюдѝ
на́съ, гпⷭ҇жѐ бцⷣе, чтꙋ́щихъ и҆́мⷬ҇къ сн҃а твоегѡ̀: молѝ є҆го̀, и҆зба́вити
на́съ и҆ноплеме́нныхъ нахожде́нїй.
Катава́сїа: Разрѣша́етъ ᲂу҆́зы, и҆ ѡ҆роша́етъ пла́мень, трисвѣ́тлый
бг҃онача́лїѧ ѡ҆́бразъ, пою́тъ ѻ҆́троцы: бл҃гослови́тъ же є҆ди́наго сп҃са и҆
вседѣ́телѧ, ꙗ҆́кѡ бл҃годѣ́телѧ, сотворе́наѧ всѧ́ческаѧ тва́рь.
Пѣ́снь ѳ҃.
І҆рмо́съ: Ржⷭ҇тво̀ твоѐ нетлѣ́нно ꙗ҆ви́сѧ, бг҃ъ и҆з̾ бокꙋ̀ твое́ю про́йде,
ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ. тѧ̀, бцⷣе, тѣ́мъ
всѝ велича́емъ.
Пое́мъ бг҃ꙋ пѣ́снь бл҃года́рнꙋю, и҆зво́лившемꙋ бога́тство превели́кое пода́ти
на́мъ: крѣ́пкое во бране́хъ ᲂу҆твержде́нїе бж҃е́ственныѧ пло́ти своеѧ̀
и҆́мⷬ҇къ, то́же чтꙋ́ще вѣ́рнїи, тебѐ велича́емъ.
Ѽ па́че ᲂу҆ма̀ чꙋде́съ твои́хъ, гдⷭ҇и, и҆̀хже сотвори́лъ є҆сѝ на́мъ на тѧ̀
надѣ́ющымсѧ, ꙗ҆́кѡ бо и҆мѣ̀ и҆́мⷬ҇къ, неизрече́но и҆ стра́шно всѣ̑мъ показа́въ
и҆з̾ѡбраже́нїе: є҆го́же чтꙋ́щыѧ и҆зба́ви ѿ всѧ́кагѡ гнѣ́ва и҆ паде́нїѧ.
Ѽ сло́во бж҃їе, мꙋ́дрость и҆ си́ла, и҆ ѡ҆́бразъ ѻ҆ч҃ь! ѽ бж҃е разꙋмѣва́емый!
твоегѡ̀ пра́здника и҆́мⷬ҇къ свѣ́тлое торжество̀ на́съ сподо́би соверши́ти, во
свѣ́тѣ до́брыхъ дѣ́лъ, дꙋхо́внѡ велича́ющихъ.
Бг҃оро́диченъ: Вои́стиннꙋ высота̀ твоѧ̀ та́йны бж҃їѧ пречⷭ҇таѧ, и҆ глꙋбина̀
неизрече́ннаѧ премꙋ́дрости бж҃їѧ: ꙗ҆́кѡ бо несказа́ннѡ и҆з̾ тебѐ роди́сѧ
вы́шнїй, и҆ неви́димый ви́димь бы́сть, плотски́мъ свои́мъ и҆́мⷬ҇къ, мы́ же
вѣ́рнїи покланѧ́ющесѧ є҆мꙋ̀, тѧ̀ велича́емъ.
Катава́сїа: Ра́дꙋйсѧ, цр҃и́це, мт҃родѣ́вственнаѧ сла́во: всѧ́ка бо
ᲂу҆добоѡбраща́тєльнаѧ бл҃гоглагѡ́ливаѧ ᲂу҆ста̀ виті́йствовати не мо́гꙋтъ, тебѣ̀
пѣ́ти досто́йнѡ: и҆з̾ꙋмѣва́етъ же ᲂу҆́мъ всѧ́къ твоѐ ржⷭ҇тво̀ разꙋмѣ́ти. тѣ́мже
тѧ̀ согла́снѡ сла́вимъ.
<<а҃і ѡ҆б.: 22>>
Свѣти́ленъ.
Подо́бенъ: Жєны̀, ᲂу҆слы́шите:
Та́инство превели́кое и҆ а҆́гг҃лѡмъ несказа́нное, ѻ҆́ч҃имъ бл҃говоле́нїемъ, и҆
дх҃а ст҃а́гѡ дѣ́йствїемъ, прⷪ҇ро́чествѡмъ совершє́нїѧ и҆спо́лнишасѧ: сло́во
безнача́льное нача́ло прїи́мъ, ꙗ҆́кѡ человѣ́къ ѿ дв҃ы роди́сѧ, на сп҃се́нрїе
мі́ра и҆ человѣ́кѡмъ на и҆збавле́нїе. [Три́жды.]
На хвали́техъ стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Прїиди́те, всѝ, ꙳ хрⷭ҇то́во и҆́мⷬ҇къ вѣ́рнѡ пра́зднꙋемъ, ꙳ и҆ разꙋ́мнѡ
пѣ́нїе предлага́емъ, ꙳ глаго́люще бжⷭ҇твенное славосло́вїе, ꙳ возопїе́мъ
согла́снѡ: ꙳ прїи́де хрⷭ҇то́съ, сп҃се́нїе зємны́мъ и҆ ѡ҆бновле́нїе. [Два́жды.]
Прїиди́те пра́зднственными пѣ́сньми, ꙳ и҆ мы́сленною пра́востїю, хрⷭ҇то́во
и҆́мⷬ҇къ сла́вимъ: ꙳ ѻ҆ц҃ꙋ́ бо и҆ дх҃ꙋ ст҃о́мꙋ се́й равноче́стенъ, ꙳ за
млⷭ҇рдїе своѐ ѡ҆бо́лксѧ ꙳ въ на́ше смѣше́нїе. ꙳ є҆го́же несказа́ннѡ со а҆́гг҃лы
пра́зднꙋемъ.
Въ кѷмва́лѣхъ ᲂу҆сты̀ возгласи́мъ, ꙳ и҆ въ пѣ́снехъ воскли́кнемъ, ꙳ хрⷭ҇то́во
и҆́мⷬ҇къ показа́сѧ. ꙳ прⷪ҇ро́чєскаѧ проповѣ̑данїѧ коне́цъ прїѧ́ша: ꙳ є҆го́же
бо реко́ша пло́тїю къ человѣ́кѡмъ ꙗ҆ви́тисѧ, ꙳ на сп҃се́нїе на́мъ и҆ на
ѡ҆бновле́нїе.
Сла́ва, и҆ ны́нѣ, гла́съ а҃. Самогла́сенъ:
Прїиди́те пра́зднꙋимъ, лю́дїе, хрⷭ҇то́во и҆́мⷬ҇къ, впери́мъ ᲂу҆́мъ и҆
чꙋ̑вства, и҆ ᲂу҆́зримъ ѿ дв҃ы чтⷭ҇ыѧ пло́ть прїи́мшаго, соверше́нна сн҃а сꙋ́ща,
того́же въ бжⷭ҇твѣ̀ и҆ чл҃вѣ́чествѣ, тѣ́мже зове́мъ: ст҃ы́й бж҃е, ѻ҆́ч҃е
безнача́льный: ст҃ы́й крѣ́пкїй, сн҃е воплоще́йсѧ: ст҃ы́й безсме́ртный,
ᲂу҆тѣ́шителю дш҃е, трⷪ҇це ст҃а́ѧ, сла́ва тебѣ̀.
Славосло́вїе вели́кое. И҆ ѿпꙋ́стъ.
На лїтꙋргі́и, бл҃жє́нна ѿ канѡ́на, пѣ́снь г҃-ѧ и҆ ѕ҃-ѧ.