<<ѻ҃ѳ ѡ҆б.: 158>>

[глⷡ҇а д҃і] СЛꙊ́ЖБА Ѻ҆́БЩА

мч҃нкꙋ є҆ди́номꙋ.

Ве́чера,

на Гдⷭ҇и воззва́хъ, стїхи̑ры, гла́съ а҃.

Подо́бенъ: Всехва́льнїи мч҃нцы:

Серде́чною пра́востїю, ꙳ бг҃а неѡб̾име́ннаго, ꙳ разꙋмѣ́въ всечтⷭ҇не, ꙳ въ того̀ вѣ́ровалъ є҆сѝ несꙋмнѣ́ннѡ бл҃же́нне, ꙳ соблю́дъ неизречє́ннаѧ є҆гѡ̀ повелѣ̑нїѧ спаси́тєльнаѧ, ꙳ и҆зѧ́щнѣ премꙋ́дре ꙳ пострада́въ терпѣли́внѡ, црⷭ҇тво воспрїѧ́лъ є҆сѝ недви́жимое.

Кро́вїю твое́ю честно́ю ꙳ зе́млю ѡ҆ст҃и́лъ є҆сѝ, ꙳ и҆ сквє́рныѧ крѡ́ви ᲂу҆праздни́лъ є҆сѝ, ꙳ принѡси́мыѧ бѣсѡ́мъ беззако́ннѡ, ꙳ и҆ вѣне́цъ нетлѣ́нный прїѧ́лъ є҆сѝ, ꙳ на версѣ̀ твое́мъ всечтⷭ҇не. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.

Ѡ҆сщ҃а́еми є҆смы̀, ꙳ твоѧ̑ сщ҃є́ннаѧ борє́нїѧ и҆ по́двиги сла́вѧщїи ꙳ мч҃нче всечтⷭ҇не, и҆́мⷬ҇къ, ꙳ и҆́миже сограждани́нъ а҆́гг҃лѡмъ бы́лъ є҆сѝ, ꙳ и҆ всѣ̑мъ стрⷭ҇тоте́рпцємъ соприча́стникъ. ꙳ съ ни́миже моли́сѧ, ꙳ дарова́ти дꙋша́мъ на́шымъ ми́ръ и҆ ве́лїю млⷭ҇ть.

Сла́ва, и҆ ны́нѣ, бг҃оро́диченъ:

Оу҆вы̀ мнѣ̀, что̀ бꙋ́дꙋ, ᲂу҆́мъ и҆ дꙋ́шꙋ и҆ тѣ́ло ѡ҆скверни́въ прегрѣше́ньми, что̀ сотворю̀, ка́кѡ же и҆збѣ́гꙋ пла́мене нестерпи́магѡ, нерѣши́мыхъ ᲂу҆́зъ и҆ вѣ́чныхъ; но ѽ всенепоро́чнаѧ, пре́жде конца̀ молѝ сн҃а твоего̀, пода́ти мѝ ѡ҆ставле́нїе.

Крⷭ҇тобг҃оро́диченъ: Своего̀ а҆́гнца, а҆́гница и҆ непоро́чнаѧ влⷣчца, на крⷭ҇тѣ̀ ꙗ҆́кѡ ви́дѣвши, ви́да не и҆мꙋ́ща нижѐ добро́ты, <<п҃: 159>> ᲂу҆вы̀ мнѣ̀ рыда́ющи глаго́лаше: гдѣ̀ добро́та твоѧ̀ за́йде сладча́йшїй, гдѣ̀ бл҃голѣ́пїе, гдѣ̀ бл҃года́ть блиста́ющаѧ зра́ка твоегѡ̀, сн҃е мо́й вселюбе́знѣйшїй;

А҆́ще и҆́мать самогла́сенъ. Сла́ва, гла́съ ѕ҃:

Дне́сь вселе́ннаѧ всѧ̀ страстоно́сца просвѣща́етсѧ зарѧ́ми, и҆ бж҃їѧ цр҃ковь цвѣты̑ ᲂу҆краша́ема мч҃нче, и҆́мⷬ҇къ, вопїе́тъ тѝ: ᲂу҆го́дниче хрⷭ҇то́въ, и҆ предста́телю теплѣ́йшїй, не преста́й моли́ти ѡ҆ всѣ́хъ рабѣ́хъ твои́хъ.

И҆ ны́нѣ бг҃оро́диченъ:

Бг҃а и҆з̾ тебѐ воплоти́вшагосѧ разꙋмѣ́хомъ, бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.

Крⷭ҇тобг҃оро́диченъ:

Подо́бенъ: Всю̀ ѿложи́вше:

А҆́гнца своего̀, а҆́гница нескве́рнаѧ дре́вле, и҆ непоро́чнаѧ влⷣчца, на крⷭ҇тъ воздвиза́ема ꙗ҆́кѡ ви́дѣ, мт҃рски восклица́ше, и҆ ᲂу҆дивлѧ́ющисѧ вопїѧ́ше: что̀ видѣ́нїе сїѐ, ча́до сла́дкое, но́вое и҆ пресла́вное, ка́кѡ лю́дїе неблагода́рнїи сꙋди́щꙋ пїла́товꙋ предаю́тъ тѧ̀, и҆ ѡ҆сꙋжда́ютъ сме́ртїю живота̀ всѣ́хъ, но пою̀ твоѐ неизрече́нное сло́ве схожде́нїе.

А҆́ще пра́зднꙋеши съ полѷеле́емъ, глаго́ли бг҃оро́диченъ: воскрⷭ҇ный:

Кто̀ тебѐ не ᲂу҆бл҃жи́тъ:

Вхо́дъ. Прокі́менъ днѐ.

Чтє́нїѧ мч҃нчєскаѧ, [пи̑сана въ концѣ̀ кни́ги сеѧ̀].

На стїхо́внѣ стїхи̑ры, гла́съ д҃.

Подо́бенъ: Ꙗ҆́кѡ до́блѧ:

Многоѡбра́зными мꙋчє́нїи, ꙳ лю́тый мꙋчи́тель ка́знемъ ѕлы̑мъ преда́въ казни́ти ꙳ многострада́льное и҆ многотерпѣли́вое тѣ́ло твоѐ, ꙳ бг҃омы́сленне, и҆́мⷬ҇къ, ꙳ не ѿве́рглсѧ є҆сѝ хрⷭ҇та̀, ꙳ ни кꙋмі́рѡмъ поже́рлъ є҆сѝ: ꙳ но терпѣ́лъ є҆сѝ ꙗ҆́кѡ и҆но́мꙋ стра́ждꙋщꙋ, ꙳ ѡ҆жида́ѧ бꙋ́дꙋщагѡ воздаѧ́нїѧ ꙳ и҆ безсме́ртнагѡ бг҃осло́вїѧ.

Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆̀же въ лїва́нѣ, ᲂу҆мно́житсѧ.

<<п҃ ѡ҆б.: 160>>

Воздви́женъ и҆ стрꙋ́жемь, ꙳ и҆ ка́менїемъ посыпа́емь ꙳ и҆ желѣ́зомъ ᲂу҆ранѧ́емь, ꙳ и҆ мече́мъ скончава́емь, ꙳ непрекло́ненъ пребы́лъ є҆сѝ, ꙳ на ка́мени ᲂу҆́мнѣмъ ꙳ дꙋ́шꙋ твою̀ водрꙋзи́въ. ꙳ и҆ сегѡ̀ ра́ди а҆́гг҃льскимъ ликѡ́мъ сочета́лсѧ є҆сѝ, ꙳ свѣ́та невече́рнѧгѡ сподоблѧ́емь.

Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.

И҆сцѣле́нїе дарова́нїй ꙳ жела́ющымъ, и҆сточа́ютъ сла́вне, твоѧ̑ мо́щи, ꙳ потоплѧ́ютъ стра̑сти, ꙳ и҆ недꙋ́ги, и҆́мⷬ҇къ, ꙳ и҆ разорѧ́ютъ лꙋка́выхъ де́монѡвъ толпы̑: ꙳ напаѧ́ютъ же вѣ́рныхъ сердца̀, ꙳ прозѧба̑ющаѧ добродѣ́телей ꙳ плоды̀ бж҃е́ствєнныѧ, ꙳ и҆ бл҃гоче́стїѧ разꙋмѣ́нїе.

Сла́ва, гла́съ ѕ҃:

Прїиди́те мч҃нколю́бцы всѝ, хрⷭ҇то́ва стрⷭ҇тоте́рпца тече́нїе соверши́вша, бл҃гоче́стнѡ просла́вимъ, и҆́мⷬ҇къ, сла́внаго: се́й бо ѕмі́евꙋ главꙋ̀ сокрꙋшѝ, и҆ кро́вїю зе́млю ѡ҆ст҃ѝ, ѿ сꙋ́щихъ здѣ̀ преста́висѧ къ вѣ́чнымъ жили́щємъ: и҆ ѿ вседержи́тельныѧ рꙋкѝ подвигѡ́въ по́честь прїѧ́тъ, про́ситъ ѡ҆чище́нїѧ дꙋша́мъ на́шымъ и҆ ве́лїѧ млⷭ҇ти.

И҆ ны́нѣ, бг҃оро́диченъ:

Бцⷣе, ты̀ є҆сѝ лоза̀ и҆́стиннаѧ:

Крⷭ҇тобг҃оро́диченъ: Пречⷭ҇таѧ ꙗ҆́кѡ ви́дѣ тѧ̀ на крⷭ҇тѣ̀ повѣ́шена, пла́чꙋщи вопїѧ́ше мт҃рски: бж҃е мо́й, сладча́йшее ча́до моѐ, ка́кѡ терпи́ши стра́сть поно́снꙋю;

Тропа́рь во ᲂу҆ста́вѣ.

А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:

Мч҃нкъ тво́й гдⷭ҇и, и҆́мⷬ҇къ, во страда́нїи свое́мъ вѣне́цъ прїѧ́тъ нетлѣ́нный ѿ тебѐ бг҃а на́шегѡ: и҆мѣ́ѧй во крѣ́пость твою̀, мꙋчи́телей низложѝ, сокрꙋшѝ и҆ де́монѡвъ немѡщны́ѧ де́рзѡсти, тогѡ̀ мл҃твами сп҃сѝ дꙋ́шы на́шѧ.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

<<п҃а: 161>>

На ᲂу҆́трени,

на Бг҃ъ гдⷭ҇ь, тропа́рь то́йже.

По а҃-й каѳі́смѣ сѣда́ленъ, гла́съ а҃.

Подо́бенъ: Ли́къ а҆́гг҃льскїй:

Во́инство є҆́же на землѝ возненави́дѣвъ мч҃нче, ю҆́же на нб҃сѣ́хъ возжела́лъ є҆сѝ сла́вꙋ, и҆ бѡлѣ́зни претерпѣ́лъ є҆сѝ, и҆ нꙋ́жнꙋю сме́рть: тѣ́мже дне́сь всест҃ꙋ́ю твою̀ па́мѧть пра́зднꙋемъ, хрⷭ҇тꙋ̀ приносѧ́ще хвалꙋ̀, пребл҃же́нне, и҆́мⷬ҇къ. [Два́жды.]

Сла́ва, и҆ ны́нѣ, бг҃оро́диченъ:

Мт҃рь тѧ̀ бж҃їю и҆ дв҃ꙋ мо́лимъ всѝ вои́стиннꙋ, въ щедрѡ́ты твоѧ̑ вопїе́мъ, любо́вїю прибѣга́юще къ твое́й бл҃гости: тѧ́ бо и҆́мамы грѣ́шнїи застꙋ́пницꙋ, и҆ тебѐ стѧжа́хомъ въ напа́стехъ сп҃се́нїе, є҆ди́нꙋ пречтⷭ҇ꙋю.

По в҃-й каѳі́смѣ сѣда́ленъ, гла́съ д҃.

Подо́бенъ: Ꙗ҆ви́лсѧ є҆сѝ дне́сь:

Тече́нїе соверши́въ и҆́стинное, мꙋчи́телей всю̀ крѣ́пость побѣди́лъ є҆сѝ, и҆ прїѧ́лъ є҆сѝ вѣне́цъ ѿ рꙋкѝ вседержи́телѧ, и҆́мⷬ҇къ, всечтⷭ҇не, и҆ показа́лсѧ є҆сѝ а҆́гг҃лѡмъ соприча́стникъ. [Два́жды.]

Сла́ва, и҆ ны́нѣ, бг҃оро́диченъ:

Сло́во ѻ҆́ч҃ее, хрⷭ҇та̀ бг҃а на́шего, ѿ тебѐ воплоти́вшагосѧ позна́хомъ бцⷣе дв҃о, є҆ди́на чⷭ҇таѧ, є҆ди́на бл҃гослове́ннаѧ: тѣ́мъ непреста́ннѡ тѧ̀ воспѣва́юще велича́емъ.

По Хвали́те и҆́мѧ гдⷭ҇не:

Припѣ́въ:

Велича́емъ тѧ̀ стрⷭ҇тоте́рпче ст҃ы́й, и҆́мⷬ҇къ, и҆ чте́мъ чтⷭ҇на̑ѧ страда̑нїѧ твоѧ̑, ꙗ҆̀же за хрⷭ҇та̀ претерпѣ́лъ є҆сѝ.

Ѱало́мъ и҆збра́нный: Бг҃ъ на́мъ прибѣ́жище и҆ си́ла:

По полѷеле́и, сѣда́ленъ, гла́съ д҃:

Во́ина хрⷭ҇то́ва непобѣди́маго, побѣди́телѧ на врагѝ до́блѧго, въ вели́кихъ чꙋдесѣ́хъ возсїѧ́вшаго, при́снѡ всѝ восхва́лимъ вѣ́рою, и҆́мⷬ҇къ, стрⷭ҇тоте́рпца: то́читъ бо цѣльбы̑ притека́ющымъ <<п҃а ѡ҆б.: 162>> съ вѣ́рою, и҆ ᲂу҆толѧ́етъ стра̑сти лю̑тыѧ, и҆ сꙋ́щыѧ въ ско́рбехъ человѣ́ки застꙋпа́етъ. [Два́жды.]

Сла́ва, и҆ ны́нѣ, бг҃оро́диченъ:

Стѣна̀ непобѣди́маѧ на́мъ хрⷭ҇тїа́нѡмъ є҆сѝ бцⷣе дв҃о, къ тебѣ́ бо прибѣга́юще невреди́ми пребыва́емъ, и҆ па́ки согрѣша́юще, и҆́мамы тѧ̀ мл҃твенницꙋ. тѣ́мъ бл҃годарѧ́ще вопїе́мъ тѝ: ра́дꙋйсѧ бл҃года́тнаѧ, гдⷭ҇ь съ тобо́ю.

Степє́нна, а҃-й а҆нтїфѡ́нъ, д҃-гѡ гла́са.

Прокі́менъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ ᲂу҆мно́житсѧ.

Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.

Всѧ́кое дыха́нїе:

Є҆ѵⷢ҇лїе, мч҃нческое, [пи́сано въ концѣ̀ кни́ги сеѧ̀.]

По н҃ ѱалмѣ̀ стїхи́ра, гла́съ ѕ҃:

Дне́сь вселе́ннаѧ всѧ̀: [пи́сана на вече́рни]

Канѡ́нъ. Гла́съ є҃.

Пѣ́снь а҃.

І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни, мы́шцею высо́кою хрⷭ҇то́съ и҆стрѧсѐ, і҆и҃лѧ же сп҃сѐ, побѣ́днꙋю пѣ́снь пою́ща.

Прⷭ҇то́лꙋ бж҃їю предстоѧ̀ бг҃обл҃же́нне со дерзнове́нїемъ, ꙗ҆́кѡ страда́лецъ непобѣди́мь, любо́вїю соверша́ющихъ твоѐ ст҃о́е страда́нїе, мл҃твами твои́ми сохранѧ́й.

И҆мѣ́ѧй въ дꙋшѝ твое́й, ст҃е, во́дꙋ жи́вꙋ пребыва́ющꙋ, мꙋ̑тныѧ ѕлѡ́бныѧ пото́ки и҆зсꙋши́лъ є҆сѝ всесла́вне, бл҃года́тїю сп҃совою ᲂу҆крѣплѧ́емь бг҃обл҃же́нне.

Си́лою бж҃їею ᲂу҆крѣплѧ́емь бг҃обл҃же́нне, возмо́глъ є҆сѝ вра̑жїѧ возношє́нїѧ сокрꙋши́ти, и҆ бы́лъ є҆сѝ побѣдоно́сецъ и҆зрѧ́денъ, и҆ вы́шнѧгѡ гра́да граждани́нъ.

Бг҃оро́диченъ: Ꙗ҆вѝ млⷭ҇рдїе твоѐ гпⷭ҇жѐ пречтⷭ҇аѧ, на мнѣ̀ ѻ҆каѧ́ннѣмъ, прилѣ́жнѡ къ сн҃ꙋ твоемꙋ̀ прест҃а́ѧ молѧ́щисѧ, да и҆збꙋ́демъ ѻ҆гнѧ̀ вѣ́чнагѡ твои́ми мл҃твами.

<<п҃в: 163>>

Пѣ́снь г҃.

І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.

Ѿ ка́ла страсте́й мꙋ́дре ᲂу҆далѧ́ѧсѧ, и҆ бг҃ꙋ приближа́ѧсѧ бж҃е́ственными чистота́ми, бжⷭ҇твенное прїѧ́тъ просвѣще́нїе, показꙋ́ющагѡ тѧ̀ сн҃а свѣ́тꙋ достосла́вне, ꙗ҆́кѡ дѣ́ло свѣ́та дѣ́лающаго.

Во́инство земно́е и҆ вели́кꙋю сла́вꙋ, нивочто́же вмѣни́лъ є҆сѝ бг҃обл҃же́нне: тѣ́мъ в̾во́инилсѧ є҆сѝ хрⷭ҇тꙋ̀, и҆ ликѡ́мъ мч҃нчєскимъ причте́нъ бы́лъ є҆сѝ, веселѧ́сѧ мч҃нче бг҃оно́се бл҃же́нне, и҆́мⷬ҇къ.

Стєзѝ ше́ствїѧ твоегѡ̀ досточꙋ́дне, напра́вишасѧ на пꙋ́ть ми́ренъ, въ црⷭ҇твїе бж҃їе входѧ̀, въ ра́йскꙋю широтꙋ̀, и҆ въ поко́й вѣ́чнꙋющїй сла́вне.

Бг҃оро́диченъ: Влⷣкꙋ и҆ творца̀ всѣ́хъ тва́рей ро́ждши, ꙗ҆ви́ласѧ є҆сѝ влⷣце чтⷭ҇аѧ херꙋві̑мъ и҆ серафі̑мъ чтⷭ҇нѣ́йши: тѣ́мже тѧ̀ всѝ ро́ди по до́лгꙋ ᲂу҆бл҃жа́емъ.

Сѣда́ленъ, гла́съ є҃.

Подо́бенъ: Собезнача́льное сло́во:

Добродѣ́тельными свѣтлостьмѝ просвѣща́емь, и҆ мꙋче́нїѧ свѣ́томъ ᲂу҆краша́емь, па́че со́лнца премꙋ́дре, сїѧ́еши тве́рдѣ, и҆ просвѣща́еши вои́стиннꙋ, творѧ́щихъ вѣ́рнѡ па́мѧть твою̀ свѣтоно́снꙋю, пресла́вный стрⷭ҇тоте́рпче, и҆́мⷬ҇къ, покланѧ́ющихсѧ моще́мъ твои̑мъ сп҃са́й.

Сла́ва, и҆ ны́нѣ, бг҃оро́диченъ:

Оу҆жа́сно чꙋ́до зача́тїѧ, и҆ несказа́ненъ ѡ҆́бразъ ржⷭ҇тва̀, въ тебѣ̀ позна́сѧ чи́стаѧ приснодв҃о, ᲂу҆жаса́етъ мо́й ᲂу҆́мъ, и҆ ᲂу҆дивлѧ́етъ по́мыслъ. сла́ва твоѧ̀ бцⷣе, всѣ̑мъ простре́сѧ во сп҃се́нїе дꙋ́шъ на́шихъ.

Крⷭ҇тобг҃оро́диченъ: Крⷭ҇то́мъ сн҃а твоегѡ̀ бг҃обл҃года́тнаѧ, і҆́дѡльскаѧ пре́лесть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ: сегѡ̀ ра́ди вѣ́рнїи по до́лгꙋ тѧ̀ при́снѡ пое́мъ и҆ бл҃гослови́мъ, и҆ бцⷣꙋ вои́стиннꙋ и҆сповѣ́дающе тѧ̀ велича́емъ.

<<п҃в ѡ҆б.: 164>>

Пѣ́снь д҃.

І҆рмо́съ: Бж҃е́ственное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.

Любо́вїю и҆ наде́ждею ко гдⷭ҇ꙋ ᲂу҆краша́емь премꙋ́дре, мч҃нчески просвѣти́лсѧ є҆сѝ пребл҃же́нне, и҆ а҆́гг҃лѡмъ сограждани́нъ бы́лъ є҆сѝ пресла́вне.

Бы́лъ є҆сѝ недви́жимь и҆ непрекло́ненъ, во и҆згна́нїи живѧ́й свои́хъ себѣ̀ лиша́емь, влⷣки ра́ди всѣ́хъ бг҃а бг҃обл҃же́нне премꙋ́дре.

До́брѣ подвиза́всѧ сла́вне, добро́тами мч҃нческими ᲂу҆кра́шенъ, прише́лъ є҆сѝ къ неви̑димымъ добро́тамъ, пожина́ѧ трꙋдѡ́въ твои́хъ по́чєсти.

Бг҃оро́диченъ: И҆́же горѣ̀ со ѻ҆ц҃е́мъ разꙋмѣва́емый, до́лꙋ на́съ ра́ди воплоща́етсѧ и҆з̾ тебѐ, всенепоро́чнаѧ влⷣчце, премно́жествомъ бл҃госе́рдїѧ, є҆ди́нъ бл҃гі́й чл҃вѣколю́бецъ.

Пѣ́снь є҃.

І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.

Закѡ́ны ᲂу҆крѣплѧ́емь вседержи́телевыми, совѣ́ты беззако́нныхъ ѿрази́лъ є҆сѝ, и҆ зако́ннѡ пострада́въ, нетлѣ́нїѧ вѣне́цъ мч҃нче, прїѧ́лъ є҆сѝ.

Оу҆́глїе ле́сти ᲂу҆гаси́лъ є҆сѝ премꙋ́дре, крове́й твои́хъ стрꙋѧ́ми: и҆ ны́нѣ и҆сточа́ѧ цѣлє́бныѧ во́ды, пла́мень болѣ́зни ѿго́ниши бж҃їею бл҃года́тїю.

Возмо́глъ є҆сѝ мч҃нче, въ не́мощи плотстѣ́й ѕмі́ѧ многоко́зненнаго погꙋби́ти: и҆ сегѡ̀ мнѡ́гїѧ пре́лести мꙋ́дре бл҃года́тїю низве́рглъ є҆сѝ.

Бг҃оро́диченъ: Оу҆мертвѝ пренепоро́чнаѧ дв҃о, молю́ тѧ, пло́ти моеѧ̀ дꙋшетлѣ́нныѧ стра̑сти, ро́ждшаѧ пло́тїю безстра́стїѧ и҆сто́чника, хрⷭ҇та̀ бг҃а.

Пѣ́снь ѕ҃.

І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведѝ мѧ̀, ꙗ҆́кѡ бл҃гоꙋтро́бенъ.

<<п҃г: 165>>

Ста́лъ є҆сѝ на сꙋди́щи законопрестꙋ́пныхъ мч҃нче хрⷭ҇то́въ, и҆́мⷬ҇къ, и҆ ле́сть всю̀ и҆скорени́лъ є҆сѝ, сꙋди́мь бы́лъ є҆сѝ хрⷭ҇та̀ ра́ди, и҆ мꙋжемꙋ́дреннѣ ѡ҆бличи́лъ є҆сѝ.

Оу҆кра́шенъ бы́въ премꙋ́дре, мч҃нче хрⷭ҇то́въ, бж҃е́ственными добро́тами во страда́нїи твое́мъ: тѣ́мже тѧ̀ просвѣтѝ хрⷭ҇то́съ, и҆ нетлѣ́ненъ пребы́лъ є҆сѝ.

Кро́вїю зе́млю ѡ҆ст҃и́лъ є҆сѝ, нб҃о же дꙋше́ю сщ҃е́нною ѡ҆зари́лъ є҆сѝ пребл҃же́нне, и҆ ли́ки мч҃нчєскїѧ весе́лїѧ и҆спо́лнилъ є҆сѝ.

Бг҃оро́диченъ: Наꙋче́нъ бы́въ дх҃омъ прⷪ҇ро́къ, две́рь тѧ̀ прови́дѣ, є҆́юже бг҃ъ про́йде воплоща́емь, ѡ҆ста́вль па́ки запеча́танꙋ пренепоро́чнаѧ.

Конда́къ во ᲂу҆ста́вѣ.

А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃.

Подо́бенъ: Вы́шнихъ и҆щѧ̀:

Ѕвѣзда̀ свѣ́тлаѧ ꙗ҆ви́лсѧ є҆сѝ, непреле́стнаѧ мі́рови, сл҃нце хрⷭ҇та̀ возвѣща́ющи, зарѧ́ми твои́ми стрⷭ҇тоте́рпче, и҆́мⷬ҇къ, и҆ пре́лесть погаси́лъ є҆сѝ всю̀: на́мъ же подае́ши свѣ́тъ, молѧ́сѧ непреста́ннѡ ѡ҆ всѣ́хъ на́съ.

І҆́косъ: Пѣ́нїе мѝ да́рꙋй бж҃е мо́й, воспѣва́ти и҆ глаго́лати, и҆ почита́ти по́двиги стрⷭ҇тоте́рпца твоегѡ̀ и҆ мч҃нка, ꙗ҆́кѡ да бл҃госочета́ннѡ восхвалю̀ до́блѧго во страда́нїи, и҆́мⷬ҇къ, побѣди́телѧ въ страсте́хъ бы́вша всегда̀, вели́каго во бл҃гоче́стїи, и҆ въ ли́цѣ мч҃нкъ возсїѧ́вшаго: въ ни́хже пое́тъ непреста́ннѡ хрⷭ҇та̀, со мно́жествомъ а҆́гг҃льскимъ премꙋ́дрый, прїе́млѧ свы́ше бжⷭ҇твенное ѡ҆сїѧ́нїе, и҆ молѧ̀ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Преносѧ́ще страда́льческое тѣ́ло твоѐ наро́ди любочести́вїи многострада́льне и҆ премꙋ́дре, вопїѧ́хꙋ бл҃года́рственнѡ: бл҃гослове́нъ бг҃ъ ѻ҆тє́цъ на́шихъ.

<<п҃г ѡ҆б.: 166>>

Разори́лъ є҆сѝ бж҃їею бл҃года́тїю є҆́ллинскаѧ приношє́нїѧ, и҆ разрѣши́всѧ бл҃же́нне, сою̑зъ тѣле́сныхъ, мꙋче́нїемъ сконча́лсѧ є҆сѝ за хрⷭ҇та̀, зако́ннѡ пострада́въ.

Ꙗ҆́коже на колесни́цꙋ всѣ́лъ є҆сѝ на кро́вь твою̀, стрⷭ҇тоте́рпче достохва́льне, и҆ ра́дꙋѧсѧ восте́клъ є҆сѝ въ премі̑рнаѧ покѡ́ища.

Бг҃оро́диченъ: Сла́ва всѣ̑мъ є҆сѝ, чⷭ҇таѧ, и҆ ᲂу҆твержде́нїе и҆сповѣ́дающымъ тѧ̀ всенепоро́чнаѧ мт҃рь бг҃ꙋ, проше́дшемꙋ и҆з̾ чре́ва твоегѡ̀ па́че є҆стества̀.

Пѣ́снь и҃.

І҆рмо́съ: Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.

І҆ерⷭ҇ли́ма вы́шнѧгѡ наслѣ́дникъ бы́лъ є҆сѝ, ᲂу҆́меръ во и҆згна́нїи премꙋ́дре, поѧ̀ непреста́ннѡ: дѣла̀ всѧ̑каѧ гдⷭ҇а по́йте, и҆ превозноси́те є҆го̀ во вѣ́ки.

Приложи́вшꙋсѧ тѝ печа́лемъ мнѡ́гимъ бл҃же́нне, и҆ ны́нѣ безпеча́льное житїѐ прїѧ́тъ тѧ̀, и҆дѣ́же зове́ши: дѣла̀ всѧ̑каѧ гдⷭ҇а по́йте, и҆ превозноси́те є҆го̀ во вѣ́ки.

Возмо́глъ є҆сѝ бж҃їею вседѣ́тельною си́лою, є҆́ллинскїѧ пре́лєсти, и҆ вселꙋка́вное мꙋдрова́нїе, мч҃нче, погꙋби́ти, и҆ вѣне́цъ нетлѣ́нный ѿ всѣ́хъ влⷣки прїѧ́ти.

Бг҃оро́диченъ: Пло́ть и҆з̾ тебѐ чⷭ҇таѧ, воспрїѧ́тъ всеще́дрое сло́во, и҆ человѣ́кѡмъ приедини́сѧ: того̀ прест҃а́ѧ молѝ, пло́ти моеѧ̀ двиза̑нїѧ ᲂу҆мертви́ти, и҆ сп҃стѝ дꙋ́шꙋ мою̀.

Пѣ́снь ѳ҃.

І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.

Прїиди́те соше́дшесѧ вѣ́рнїи, пребл҃же́ннагѡ и҆ сщ҃е́ннагѡ мч҃нка хрⷭ҇то́ва, и҆́мⷬ҇къ, сщ҃е́нное торжество̀ соверши́мъ дне́сь: страда́льчески бо всѧ̑ вра̑жїѧ мно́жєства бж҃е́ственною си́лою побѣди́лъ є҆́сть.

Оу҆кра́шенъ бы́лъ є҆сѝ сла́вне мꙋче́нїѧ бж҃їими добро́тами, и҆ возше́лъ є҆сѝ ꙗ҆́кѡ на ѻ҆́гненнѣй колесни́цѣ, твое́ю кро́вїю <<п҃д: 167>> веселѧ́сѧ, въ нб҃са̀ приспѣ́лъ є҆сѝ, взира́ти добро́тꙋ неизрече́ннꙋю сп҃са на́шегѡ.

Во́инъ и҆зрѧ́денъ хрⷭ҇та̀ бг҃а, и҆ до́блїй показа́лсѧ є҆сѝ страда́лецъ: тѣ́мже ны́нѣ живе́ши въ вы́шнемъ црⷭ҇твїи, побѣ́днымъ вѣнце́мъ ᲂу҆вѧ́зсѧ пресла́внѡ стрⷭ҇тоте́рпче всехва́льне.

Бг҃оро́диченъ: Просвѣще́нїе ро́ждши хрⷭ҇та̀ сꙋ́щымъ во тьмѣ̀, ѡ҆слѣпле́ннꙋю дꙋ́шꙋ мою̀ просвѣтѝ, и҆ да́рꙋй мѝ ше́ствовати по стезѧ́мъ ведꙋ́щымъ въ живо́тъ прест҃а́ѧ, наста́внице всѣ̑мъ пою́щымъ тѧ̀.

Свѣти́ленъ.

Ꙗ҆́коже со́лнце свѣтоно́сно, чꙋде́сными зарѧ́ми наставлѧ́еши всю̀ тва́рь, пресла́вне и҆́мⷬ҇къ, стрⷭ҇тоте́рпче. тѣ́мже твою̀ соверша́юще па́мѧть, про́симъ ѿ бѣ́дъ всѧ̑ и҆зба́вити воскрⷭ҇шаго и҆з̾ гро́ба.

Бг҃оро́диченъ: Держа́внымъ твои́мъ покро́вомъ чтⷭ҇аѧ, на́съ рабѡ́въ твои́хъ ѿ навѣ́та вра́жїѧ сохранѧ́й всегда̀ неврє́дны: тѧ́ бо є҆ди́нꙋ стѧжа́хомъ прибѣ́жище въ бѣда́хъ.

На хвали́техъ стїхи̑ры, гла́съ д҃.

Подо́бенъ: Зва́нный свы́ше:

Восхвалѧ́ютъ лю́дїе ѱалмы̀, ꙳ вкꙋ́пѣ и҆ пѣ́сньми ꙳ твою̀ сла́внꙋю па́мѧть, и҆́мⷬ҇къ, ꙳ ꙗ҆́кѡ бл҃голѣ́пна бо возсїѧ̀ и҆ свѣтоно́сна, ꙳ ᲂу҆кра́шена сла́вою и҆ бл҃года́тїю. ꙳ тѣ́мже и҆гра́ютъ ны́нѣ а҆́гг҃льстїи чи́ни, ꙳ хва́лѧтъ же мч҃нцы со а҆пⷭ҇лы, ꙳ твои́хъ пѡ́двигъ мч҃нче страда̑нїѧ, ꙳ и҆ воспѣва́ютъ просла́вльшаго тѧ̀, ꙳ сп҃са хрⷭ҇та̀ бг҃а на́шего, ꙳ є҆го́же молѝ, ꙳ сп҃стѝ и҆ просвѣти́ти дꙋ́шы на́шѧ. [Два́жды.]

Ѡ҆блече́нъ во хрⷭ҇то́во всеѻрꙋ́жїе, ꙳ ѡ҆брѣ́лсѧ є҆сѝ, и҆́мⷬ҇къ ꙳ не и҆́щꙋщымъ тебѐ: ꙳ ты́ бо за хрⷭ҇та̀ ѻ҆гне́мъ распала́емь, ꙳ и҆ рꙋга́ѧсѧ богѡ́въ сꙋ́етныхъ ꙳ безбо́жномꙋ сверѣ́пствꙋ, ꙳ тогда̀ беззакѡ́ннымъ взыва́лъ є҆сѝ: ꙳ во́инствꙋю хрⷭ҇тꙋ̀ моемꙋ̀ цр҃ю̀, ꙳ ни ѕвѣ́рїе, ни коле́са, ни и҆́на мꙋ́ка, ꙳ менѐ разлꙋчи́ти возмо́гꙋтъ когда̀ любвѐ хрⷭ҇та̀ моегѡ̀. є҆го́же молѝ, сп҃стѝ и҆ просвѣти́ти дꙋ́шы на́шѧ.

<<п҃д ѡ҆б.: 168>>

Небре́гъ ѡ҆ сосꙋдѣ́хъ многоѡбра́зныхъ, ꙳ и҆ ѡ҆ разли́чныхъ мꙋ́кахъ, ꙳ и҆ ѡ҆ ѻ҆рꙋ́жїѧхъ стра́шныхъ, ꙳ вѣнцено́сче и҆́мⷬ҇къ, ꙳ бл҃гоче́стїѧ тече́нїе мч҃нчески сконча́лъ є҆сѝ: тѣ́мже пресвѣ́тлꙋю па́мѧть твою̀, ꙳ цвѣ́ты пѣ́сненными вѣнча́емъ, ꙳ и҆ чтⷭ҇ны̑ѧ твоѧ̑ мо́щи ѡ҆блобыза́емъ вѣ́рою. но ꙗ҆́кѡ прⷭ҇то́лꙋ предстоѧ̀ влⷣки, хрⷭ҇та̀ бг҃а на́шегѡ, молѝ непреста́ннѡ сп҃сти́сѧ дꙋша́мъ на́шымъ.

Сла́ва, гла́съ а҃:

Мч҃нкѡвъ похвало̀, свѣ́тлы возста́вивъ побѣ́ды на ле́сть, тѣле́снꙋю сла́вꙋ твои́мъ раче́нїемъ пребл҃же́нне, но́сиши вездѣ̀ кро́ткѡ, ꙗ҆́кѡ побѣди́тель, и҆́мⷬ҇къ, и҆ ны́нѣ возста́ви ѿ грѣхопаде́нїй вѣ́рою чтꙋ́щихъ па́мѧть твою̀.

И҆ ны́нѣ, бг҃оро́диченъ:

Ра́дꙋйсѧ бцⷣе дв҃о, ꙗ҆́кѡ родила̀ є҆сѝ цр҃ѧ̀ нбⷭ҇наго, сп҃са и҆ просвѣти́телѧ дꙋ́шъ на́шихъ.

Крⷭ҇тобг҃оро́диченъ.

Подо́бенъ: Всехва́льнїи мч҃нцы:

Своего̀ а҆́гнца, ꙳ а҆́гница и҆ непоро́чнаѧ влⷣчца, на крⷭ҇тѣ̀ ꙗ҆́кѡ ви́дѣвши ꙳ ви́да не и҆мꙋ́ща, нижѐ добро́ты, ꙳ ᲂу҆вы̀ мнѣ̀, рыдаю́щи глаго́лаше: ꙳ гдѣ̀ добро́та твоѧ̀ за́йде сладча́йшїй; гдѣ̀ благолѣ́пїе, гдѣ̀ бл҃года́ть блиста́ющаѧ зра́ка твоегѡ̀, ꙳ сн҃е мо́й вселюбе́знѣйшїй;

А҆́ще и҆́мать на стїхо́внѣ Сла́вꙋ: и҆ ты̀ глаго́ли вече́рнїй,

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.