<<рл҃д ѡ҆б.: 268>>

[глⷡ҇а к҃д] СЛꙊ́ЖБА Ѻ҆́БЩА

прпⷣбномч҃нцѣ є҆ди́ной.

Ве́чера,

на Гдⷭ҇и воззва́хъ, стїхи̑ры, гла́съ и҃.

Подо́бенъ: Что̀ вы̀ нарече́мъ ст҃і́и:

Мч҃нце стрⷭ҇тоте́рпице всехва́льнаѧ, и҆́мⷬ҇къ, ꙳ воздержа́нїемъ стра̑сти низложи́вши плѡтскі́ѧ, ꙳ страда́нїемъ ѕмі́ѧ ᲂу҆мертви́ла є҆сѝ врага̀, ꙳ а҆́гг҃лы ᲂу҆диви́вши болѣ́зньми твои́ми, ꙳ человѣ́ки ѡ҆бвесели́вши страда̑нїи твои́ми: ꙳ и҆́нокинѧмъ ᲂу҆добре́нїе ꙳ и҆ дѣ́вства сосꙋ́дъ, ꙳ молѝ сп҃стѝ и҆ просвѣти́ти дꙋ́шы на́шѧ.

Что̀ тѧ̀ воз̾именꙋ́емъ сла́внаѧ; ꙳ дѣ́вства добро́тами невѣ́стꙋ просїѧ́вшꙋ хрⷭ҇то́вꙋ, ꙳ дще́рь и҆збра́ннꙋ, вы́шнѧгѡ і҆ерⷭ҇ли́ма жи́тельницꙋ, ꙳ а҆́гг҃лѡмъ собесѣ́дницꙋ, ꙳ черто́га мы́сленнагѡ наслажда́ющꙋсѧ. ꙳ и҆́мⷬ҇къ, многострада́льнаѧ, ꙳ молѝ сп҃стѝ и҆ просвѣти́ти дꙋ́шы на́шѧ.

Терпѣ́ла є҆сѝ зꙋбѡ́въ и҆скорене́нїе, ꙳ рꙋ́къ ѿсѣче́нїе, и҆ но́гъ и҆ сосцє́въ, ꙳ ссѣка́ема на ᲂу҆́ды ѿ беззако́нныхъ мꙋчи́телей, ꙳ къ добро́тѣ жениха̀ взира́ющи, ꙳ и҆ болѣ̑зни па́че є҆стества̀ терпѧ́щи, ꙳ и҆́мⷬ҇къ, многострада́льнаѧ, ꙳ невѣ́сто хрⷭ҇то́ва нетлѣ́ннаѧ. ꙳ молѝ сп҃стѝ и҆ просвѣти́ти дꙋ́шы на́шѧ.

Сла́ва, и҆ ны́нѣ, бг҃оро́диченъ:

Что̀ твои́хъ добро́тъ чꙋ́днѣе пречⷭ҇таѧ; ꙳ и҆сцѣлѧ́еши недꙋгꙋ́ющыѧ, ꙳ и҆ и҆збавлѧ́еши ѿ страсте́й, ꙳ и҆ ѿго́ниши борю́щихъ безбѡ́жныѧ прило́ги: ꙳ ѿ бѣ́дъ и҆збавлѧ́еши пою́щыѧ тѧ̀, ꙳ скѡ́рби ᲂу҆толѧ́еши мл҃твою твое́ю. ꙳ ра́дости лꙋ́чшїѧ дв҃о, хода́тай бꙋ́ди рабѡ́въ твои́хъ, ꙳ молѧ́щихсѧ сп҃стѝ дꙋ́шы на́шѧ.

<<рл҃є: 269>>

Крⷭ҇тобг҃оро́диченъ: А҆́гница а҆́гнца ꙗ҆́кѡ ви́дѣ ꙳ на дре́вѣ просте́рта во́лею крⷭ҇тнѣмъ, ꙳ вопїѧ́ше мт҃рски, ꙳ болѣ́знꙋющи съ пла́чемъ: ꙳ сн҃е мо́й, что̀ стра́нное сїѐ видѣ́нїе; ꙳ всѣ̑мъ жи́знь даѧ́й ꙗ҆́кѡ бг҃ъ, ꙳ ка́кѡ ᲂу҆мерщвлѧ́ешисѧ долготерпѣли́ве, ꙳ земны̑мъ подаѧ̀ воскрⷭ҇нїе; ꙳ сла́влю твоѐ бж҃е мо́й, вели́кое снисхожде́нїе.

А҆́ще и҆́мать самогла́сенъ, Сла́ва, гла́съ в҃:

Во гла́сѣ ра́дованїѧ, и҆ во ѱалмѣ́хъ восклица́нїѧ, воспои́мъ прпⷣбномч҃нцꙋ, и҆́мⷬ҇къ, ꙗ҆́кѡ низложѝ на зе́млю і҆́дѡльскꙋю пре́лесть, и҆ сопроти́внаго врага̀ мꙋ́жески под̾ но́зѣ своѝ подложѝ. тѣ́мже и҆ сконча́вшисѧ на нб҃са̀ возлетѣ̀, на главѣ̀ вѣне́цъ носѧ́щи, и҆ взыва́ющи: къ тебѣ̀ женишѐ мо́й, жела́ю, и҆ жела́нїѧ любо́вь и҆мꙋ́щи, но тебѣ̀ пло́ть мою̀ на мꙋ̑ки преда́хъ. да вселю́сѧ ᲂу҆́бѡ въ чтⷭ҇на̑ѧ селє́нїѧ, и҆дѣ́же є҆́сть веселѧ́щихсѧ жили́ще.

И҆ ны́нѣ, бг҃оро́диченъ:

На тѧ̀ ᲂу҆пова́нїе бцⷣе, возложи́хомъ, ча́ѧнїѧ да не ѿпаде́мъ: сп҃сѝ на́съ ѿ бѣ́дъ, помо́щнице недоꙋмѣ́ємымъ, и҆ сопроти́вныхъ совѣ́ты разорѝ: ты́ бо на́ше сп҃се́нїе бл҃гослове́ннаѧ.

Крⷭ҇тобг҃оро́диченъ: Є҆гда̀ нескве́рнаѧ а҆́гница, ви́дѣ своего̀ а҆́гнца на заколе́нїе ꙗ҆́кѡ чл҃вѣ́ка во́лею влеко́ма, рыда́ющи глаго́лаше: безча́дствовати мѧ̀ ны́нѣ тщи́шисѧ хрⷭ҇тѐ, тебѐ ро́ждшꙋю, что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость чл҃вѣколю́бче.

А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Пре́йде сѣ́нь:

Вхо́дъ. Прокі́менъ днѐ.

Чтє́нїѧ г҃, мч҃нчєскаѧ, [пи̑сана въ концѣ̀ кни́ги сеѧ̀.]

На стїхо́внѣ стїхи̑ры, гла́съ д҃:

Подо́бенъ: Да́лъ є҆сѝ зна́менїе:

Страда́нїе претерпѣ́ла є҆сѝ, ꙳ твои́мъ боре́нїемъ, ꙳ сꙋгꙋ́бо, и҆́мⷬ҇къ, всехва́льнаѧ, ꙳ по́томъ воздержа́нїѧ, мꙋче́нїѧ кро́вь <<рл҃є ѡ҆б.: 270>> смѣси́вши прпⷣбнаѧ: ꙳ тѣ́мже и҆ вѣне́цъ сꙋгꙋ́бъ бл҃года́тель тебѣ̀ дарова̀, ꙳ къ немꙋ́же возшла̀ є҆сѝ и҆спещре́на свѣ́тлѡ, ꙳ ꙗ҆́кѡ дѣ́ва всенепоро́чнаѧ, ꙳ и҆ ꙗ҆́кѡ мч҃нца непобѣди́маѧ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Добро́та тѣлесѐ, ꙳ и҆ красота̀ бж҃е́ственнаѧ дꙋшѝ твоеѧ̀ стеко́шасѧ, ꙳ ꙗ҆́кѡ крі́нъ просїѧ́ла є҆сѝ ꙳ во ѻ҆би́телехъ прпⷣбныхъ ᲂу҆бѣле́на, ꙳ и҆ кро́вными то́ки ѡ҆багре́на, ꙳ невѣ́сто всенепоро́чнаѧ, и҆́мⷬ҇къ, ꙳ тѣ́мже тѧ̀ и҆ нбⷭ҇ный кра́сный прїѧ́тъ невѣ́стникъ ꙳ въ черто́гъ неразори́мый, ꙳ ꙗ҆́кѡ дѣ́вꙋ и҆ мч҃нцꙋ.

Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

Ѻ҆́крестъ тебѐ прїи́де, ꙳ и҆́мⷬ҇къ, всехва́льнаѧ, ꙳ и҆збавлѧ́ѧй тѧ̀ а҆́гг҃лъ: ꙳ ѿ младе́нства бо ꙗ҆ви́ласѧ є҆сѝ гдⷭ҇а боѧ́щисѧ, ꙳ и҆ возложена̀ ꙗ҆́кѡ возложе́нїе честно́е, ꙳ соблюде́ное вседержи́телю. ꙳ тѣ́мже попра́ла є҆сѝ мꙋчи́телево безꙋ́мїе крѣ́пкѡ, ꙳ и҆ востекла̀ є҆сѝ ко хрⷭ҇тꙋ̀ женихꙋ̀ твоемꙋ̀.

Сла́ва, гла́съ ѕ҃:

Ѡ҆деснꙋ́ю сп҃са предста́ла є҆сѝ дв҃о, стрⷭ҇тоте́рпице и҆ мч҃нце, и҆́мⷬ҇къ, ѡ҆дѣ́ѧна добродѣ́тельми непобѣжде́на, и҆ преꙋкра́шена є҆ле́емъ чистоты̀, и҆ кро́вїю страда́нїѧ, и҆ вопїю́щи къ немꙋ̀ ра́достнѡ: свѣщꙋ̀ держа́щи, въ воню̀ мѵ́ра твоегѡ̀ теко́хъ хрⷭ҇тѐ бж҃е: ꙗ҆́кѡ ᲂу҆ѧзви́хсѧ твое́ю любо́вїю а҆́зъ, не ѿлꙋчѝ менѐ женишѐ нбⷭ҇ный. тоѧ̀ мл҃твами низпослѝ на́мъ всеси́льне сп҃се, млⷭ҇ти твоѧ̑.

И҆ ны́нѣ, бг҃оро́диченъ:

Ѻ҆́ко се́рдца моегѡ̀ воспꙋща́ю къ тебѣ̀ влⷣчце, не пре́зри ма́лагѡ моегѡ̀ воздыха́нїѧ въ ча́съ, є҆гда̀ сꙋ́дитъ сн҃ъ тво́й мі́рꙋ: бꙋ́ди мѝ покро́въ и҆ помо́щница.

Крⷭ҇тобг҃оро́диченъ: Ви́дѧщи тѧ̀ распина́ема хрⷭ҇тѐ, тебѐ ро́ждшаѧ вопїѧ́ше: что̀ стра́нное є҆́же ви́жꙋ та́инство, сн҃е мо́й, ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;

Тропа́рь, гла́съ д҃:

А҆́гница твоѧ̀ і҆и҃се, и҆́мⷬ҇къ, зове́тъ ве́лїимъ гла́сомъ: тебѐ женишѐ мо́й люблю̀, и҆ тебѐ и҆́щꙋщи страда́льчествꙋю, и҆ <<рл҃ѕ: 271>> сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебѐ ра́ди, ꙗ҆́кѡ да ца́рствꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. тоѧ̀ мл҃твами ꙗ҆́кѡ млⷭ҇тивъ, сп҃сѝ дꙋ́шы на́шѧ.

Сла́ва, и҆ ны́нѣ, бг҃оро́диченъ и҆лѝ крⷭ҇тобг҃оро́диченъ.

На ᲂу҆́трени,

на Бг҃ъ гдⷭ҇ь, тропа́рь то́йже.

По а҃-й каѳі́смѣ сѣда́ленъ, гла́съ и҃.

Подо́бенъ: Премꙋ́дрости:

Воздержа́нїѧ росо́ю погаси́ла є҆сѝ пла́мень страсте́й ю҆́ношески, ѻ҆гне́мъ же крове́й твои́хъ всю̀ пре́лесть попали́ла є҆сѝ, и҆ женихꙋ̀ сло́вꙋ ꙗ҆́кѡ да́ръ принесла̀ є҆сѝ честно́е дѣ́вство и҆ до́блественное страда́нїе. тѣ́мже въ черто́гъ введе́ тѧ сла́вы свѣ́тлѣ до́бльствовавшꙋю, и҆ ѕмі́ѧ попра́вшꙋю, и҆́мⷬ҇къ, многострада́льнаѧ. молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть твою̀. [Два́жды.]

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безсѣ́меннѡ ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тебѣ̀ бж҃ества̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мже а҆́гг҃льскїй собо́ръ и҆ человѣ́ческїй ро́дъ досто́йнѡ сла́вимъ всест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, досто́йнѡ пою́щымъ сла́вꙋ твою̀.

По в҃-й каѳі́смѣ сѣда́ленъ, гла́съ а҃.

Подо́бенъ: Гро́бъ тво́й:

Пе́рвѣе поще́нїе, второ́е же кро́вь мꙋче́нїѧ, ꙗ҆́кѡ а҆лава́стръ мѵ́ра, за любо́вь принесла̀ є҆сѝ хрⷭ҇тꙋ̀ женихꙋ̀ твоемꙋ̀: мздꙋ́ же прїѧ́ла є҆сѝ ѿ негѡ̀ досточꙋ́днаѧ мч҃нце, и҆́мⷬ҇къ, вѣне́цъ <<рл҃ѕ ѡ҆б.: 272>> бж҃е́ственный и҆ нетлѣ́нный, и҆ и҆сцѣле́нїй бл҃года́ть си́лою дꙋхо́вною. [Два́жды.]

Сла́ва, и҆ ны́нѣ, бг҃оро́диченъ:

Безневѣ́стнаѧ чⷭ҇таѧ дв҃о бцⷣе, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, лю́тыхъ ѡ҆бстоѧ́нїй всѧ̑ и҆зба́ви, на тѧ̀ наде́ждꙋ ѻ҆трокови́це и҆мꙋ́щыѧ, и҆ дꙋ́шы на́шѧ сп҃сѝ бж҃е́ственными мольба́ми твои́ми.

По Хвали́те и҆́мѧ гдⷭ҇не:

Припѣ́въ:

Велича́емъ тѧ̀ стрⷭ҇тоте́рпице ст҃а̑ѧ, и҆́мⷬ҇къ, и҆ чте́мъ ст҃ꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего.

Ѱало́мъ и҆збра́нный: Бг҃ъ на́мъ прибѣ́жище и҆ си́ла:

По полѷеле́и сѣда́ленъ, гла́съ и҃.

Подо́бенъ: Премꙋ́дрости:

Дꙋ́шꙋ свѧза́вши любо́вїю хрⷭ҇то́вою, тлѣ́ннаѧ же и҆ вре́мєннаѧ мч҃нце мꙋ́драѧ забве́нїемъ преминꙋ́ла є҆сѝ, ꙗ҆́кѡ сло́ва ᲂу҆чени́ца сла́внаѧ: по́стнически пе́рвѣе стра̑сти ᲂу҆мертви́вши, страда́льчески второ́е льсти́ваго посрами́ла є҆сѝ. тѣ́мже и҆ зижди́телѧ сꙋгꙋ́багѡ дерзнове́нїѧ сподо́биласѧ є҆сѝ прпⷣбнаѧ, ꙗ҆́кѡ тогѡ̀ послꙋ́шавши, и҆́мⷬ҇къ, пребога́таѧ. молѝ хрⷭ҇та̀ бг҃а согрѣше́нїй ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть твою̀. [Два́жды.]

Сла́ва, и҆ ны́нѣ, бг҃оро́диченъ:

Ꙗ҆́кѡ всенепоро́чнаѧ невѣ́сто творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ всепѣ́таѧ, беззако́нїѧ мѧ̀ сꙋ́ща скве́рно жили́ще, и҆ де́монѡвъ и҆гра́лище въ ра́зꙋмѣ бы́вша, потщи́сѧ и҆ си́хъ ѕлодѣ́йствїѧ мѧ̀ и҆зба́вити, свѣ́тло жили́ще добродѣ́тельми содѣ́лавши. свѣтода́тельнаѧ и҆ нетлѣ́ннаѧ, разженѝ ѻ҆́блакъ страсте́й и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ мл҃твами твои́ми.

Степє́нна, а҃-й а҆нтїфѡ́нъ д҃-гѡ гла́са.

Прокі́менъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

<<рл҃з: 273>>

Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.

Всѧ́кое дыха́нїе:

Є҆ѵⷢ҇лїе, [пи́сано въ концѣ̀ кни́ги сеѧ̀.]

По н҃-мъ ѱалмѣ̀ стїхи́ра:

Ѡ҆деснꙋ́ю сп҃са: [пи́сана ве́чера на стїхо́внѣ.]

Канѡ́нъ, гла́съ и҃.

Пѣ́снь а҃.

І҆рмо́съ: Пои́мъ гдⷭ҇ви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Сїю̀ свѣтоно́снꙋю па́мѧть твою̀ почита́ющемꙋ, бг҃омꙋ́драѧ, просвѣще́нїе мѝ пода́ждь, дꙋшѝ моеѧ̀ тьмꙋ̀ ѿгонѧ́ющи.

Всю̀ ѿ пеле́нъ тебѐ самꙋ́ю возложи́ла є҆сѝ зижди́телю твоемꙋ̀, и҆́мⷬ҇къ, и҆ ѻ҆гне́мъ воздержа́нїѧ тѣлє́сныѧ стра̑сти попали́ла є҆сѝ.

Къ высотѣ̀ мꙋче́нїѧ, мч҃нце, возшла̀ є҆сѝ, не пощадѣ́вши пло́ти, и҆ черто́гѡвъ мы́сленныхъ ꙗ҆́кѡ дв҃а сподо́биласѧ є҆сѝ.

Бг҃оро́диченъ: Тѧ̀ нб҃омѣ́рнꙋю лѣ́ствицꙋ, на не́йже бг҃ъ ᲂу҆тверди́сѧ, человѣ́ки нбⷭ҇ны содѣ́ловавъ, ѻ҆трокови́це почита́емъ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Стоѧ́ла є҆сѝ пред̾ сꙋди́щемъ мꙋчи́телѧ, сла́внаѧ, и҆́мⷬ҇къ, хрⷭ҇та̀ творца̀ всѣ́хъ и҆ влⷣкꙋ, бг҃а сло́ва проповѣ́дающи.

Добро́та серде́чнаѧ ви́димымъ зра́комъ сла́внаѧ, и҆́мⷬ҇къ, и҆зда́вшисѧ, тѧ̀ краснѣ́йшꙋю зрѧ́щымъ ꙗ҆ви́ла є҆́сть.

Бога́тство неистощи́мо и҆сцѣле́нїй тебѣ̀ подадѐ ѻ҆трокови́це хрⷭ҇то́съ, є҆гѡ́же нищетꙋ̀ во́льнѡ возлюби́ла є҆сѝ.

Бг҃оро́диченъ: Ве́щь грѣхѡ́въ мои́хъ, твои́хъ мл҃твъ ѻ҆гне́мъ попалѝ мт҃и свѣ́та, ро́сꙋ мѝ бж҃е́ственнꙋю ѡ҆ставле́нїѧ носѧ́щи.

Сѣда́ленъ, гла́съ а҃.

А҆́гница слове́снаѧ а҆́гнцꙋ и҆ па́стырю принесла́сѧ є҆сѝ поще́нїемъ, мꙋче́нїемъ же тече́нїе сконча́вши, и҆ вѣ́рꙋ соблю́дши, и҆́мⷬ҇къ: тѣ́мже дне́сь ра́достїю соверша́емъ досточꙋ́днаѧ, сщ҃е́ннꙋю твою̀ па́мѧть, хрⷭ҇та̀ сла́вѧще.

<<рл҃з ѡ҆б.: 274>>

Сла́ва, и҆ ны́нѣ, бг҃оро́диченъ:

Мл҃твы твои́хъ ра̑бъ прїимѝ, бцⷣе, и҆ и҆зба́ви на́съ ѿ всѧ́кїѧ бѣды̀, ꙗ҆́кѡ ро́ждшаѧ хрⷭ҇та̀ сп҃са, и҆зба́вителѧ дꙋ́шъ на́шихъ.

Крⷭ҇тобг҃оро́диченъ: Твоѐ предста́тельство и҆мꙋ́ще пречⷭ҇таѧ, и҆ твои́ми мл҃твами лю́тыхъ и҆збавлѧ́еми, крⷭ҇то́мъ сн҃а твоегѡ̀ вездѣ̀ соблюда́еми, по до́лгꙋ тѧ̀ всѝ бл҃гоче́стнѡ велича́емъ.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Тѧ̀ и҆́го легча́йшее хрⷭ҇то́во мч҃нце поне́сшꙋю ѿ ю҆́ности, тѧ́жкое бре́мѧ носи́ти, пребеззако́ннꙋющїи ѡ҆сꙋди́ша.

Ка̑пли крове́й твои́хъ многобо́жїѧ погаси́ша ᲂу҆́глїе, лꙋчи́ же чꙋде́съ твои́хъ, и҆́мⷬ҇къ, страсте́й ве́щь попали́ша.

Вы́ше землѝ взе́мсѧ тво́й ѻ҆́гнь, къ пе́рсемъ мч҃нце возгнѣти́сѧ, возгнѣща́ѧ твоѐ раче́нїе, є҆́же ко влⷣцѣ дв҃о.

Бг҃оро́диченъ: По ржⷭ҇твѣ̀ пребыла̀ є҆сѝ нетлѣ́нна дв҃о, ꙗ҆́коже пре́жде ржⷭ҇тва̀: ю҆́на бо младе́нца родила̀ є҆сѝ, пре́жде вѣ̑къ познава́ема.

Пѣ́снь є҃.

І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.

Неизнꙋре́нна ѻ҆гне́мъ веще́ственнымъ ꙗ҆ви́ласѧ є҆сѝ мч҃нце, и҆́мⷬ҇къ, ѻ҆́гнь бо тѧ̀ серде́чный бжⷭ҇твенныѧ любвѐ ѡ҆роша́ше.

Оу҆даре́ньми лица̀ мч҃нце, и҆́мⷬ҇къ, ᲂу҆краси́вшисѧ, врагѡ́въ ѿрази́ла є҆сѝ ме́рзкое неразꙋ́мїе.

Протѧже́на на дре́вѣ бг҃омꙋ́драѧ, и҆́мⷬ҇къ, любо́вїю жениха̀ твоегѡ̀ бжⷭ҇твеннꙋю стра́сть ѡ҆бразова́ла є҆сѝ.

Бг҃оро́диченъ: Пое́мъ тѧ̀ всепѣ́таѧ влⷣчце бцⷣе: бг҃а бо препѣ́таго пло́тїю родила̀ є҆сѝ пречⷭ҇таѧ.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Сокрꙋша́емо тѣ́ло ра́нами, ꙗ҆влѧ́ше пра́вость твоеѧ̀ со́вѣсти стрⷭ҇тоте́рпице и҆́мⷬ҇къ, ко хрⷭ҇тꙋ̀ бг҃ꙋ на́шемꙋ.

<<рл҃и: 275>>

Ви́сѧщи высокѡ̀, ра̑ны мч҃нце терпѧ́щи, и҆ неꙋѧ́звеннѡ хранѧ́щи дꙋшѝ бл҃горо́дїе, и҆́мⷬ҇къ, достохва́льнаѧ.

Терпѧ́ше сосцє́въ ѿрѣ́занїе прпⷣбнаѧ, вѣ̑рныѧ млеко́мъ бж҃е́ственнагѡ раче́нїѧ пита́ющи, сла́внаѧ.

Бг҃оро́диченъ: Чл҃вѣколю́бца ро́ждши бг҃а, бг҃олюби́ваѧ влⷣчце, того̀ молѝ, гее́нны ѻ҆гнѧ̀ и҆зба́витисѧ на́мъ.

Конда́къ, гла́съ д҃.

Подо́бенъ: Ско́рѡ предварѝ:

Бжⷭ҇твеннаѧ па́мѧть твоѧ̀, и҆́мⷬ҇къ, дне́сь возсїѧ́вши ꙗ҆ви́сѧ мі́рови ꙗ҆́кѡ со́лнце, сказꙋ́ющи житїѐ твоѐ: ты́ бо воздержа́нїемъ плотска̑ѧ двиза̑нїѧ разо́рши, и҆ страда́нїѧ кро́вїю ᲂу҆невѣ́стиласѧ є҆сѝ хрⷭ҇то́ви. тѣ́мже хва́лѧщыѧ тѧ̀ и҆зба́ви ѿ всѧ́кихъ ѕѡ́лъ, да зове́мъ тѝ: ра́дꙋйсѧ, мт҃и прпⷣбнаѧ.

І҆́косъ: Ѿве́рзи мѝ ᲂу҆стнѣ̀ пребл҃же́ннаѧ, бг҃опрїѧ́тными твои́ми мл҃твами, предстоѧ́щи бг҃ꙋ всесла́внаѧ прпⷣбномч҃нце, да воспою̀ бж҃е́ственное твоѐ житїѐ, и҆ возглаго́лю досто́йнѡ страда̑нїѧ твоѧ̑, ꙗ҆̀же на землѝ те́плою любо́вїю соверши́ла є҆сѝ, и҆ мч҃нца была̀ є҆сѝ непобѣди́ма: воздержа́нїѧ вѣ́рою и҆спра́вила є҆сѝ бдѣ́нїе, и҆ чистотꙋ̀ возлюби́ла є҆сѝ. тѣ́мже хва́лѧщыѧ тѧ̀ и҆зба́ви ѿ всѣ́хъ ѕѡ́лъ, да зове́мъ тѝ: ра́дꙋйсѧ, мт҃и прпⷣбнаѧ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки.

Шꙋ́мъ гла́са пра́зднꙋющихъ и҆дѣ́же є҆́сть, ликꙋ́еши стрⷭ҇тоте́рпице, и҆́мⷬ҇къ, съ дв҃ами бг҃ꙋ зижди́телю пѣснопою́щи: бл҃гослове́нъ є҆сѝ гдⷭ҇и бж҃е во вѣ́ки.

Оу҆́ды сокрꙋша́емы зрѧ́щи, и҆́мⷬ҇къ, и҆ ногте́й и҆стерза́нїе терпѧ́щи, принесла́сѧ є҆сѝ бг҃ꙋ же́ртва, пѣснопою́щи: бл҃гослове́нъ є҆сѝ гдⷭ҇и бж҃е во вѣ́ки.

Ꙗ҆ви́ласѧ є҆сѝ ꙗ҆́кѡ лоза̀ бг҃омꙋ́драѧ, и҆́мⷬ҇къ, рꙋ́цѣ и҆ но́зѣ <<рл҃и ѡ҆б.: 276>> ꙗ҆́кѡ вѣ̑тви рѣ́жемы, и҆ на́мъ мы́сленно вїно̀ и҆сточа́ющи, сердца̀ ᲂу҆тѣша́ющее, и҆ страсте́й ѿрѣва́ющее пїѧ́нство.

Бг҃оро́диченъ: Во всего̀ человѣ́ка ѡ҆бле́ксѧ нескве́рный, кромѣ̀ грѣха̀, и҆з̾ ᲂу҆тро́бы твоеѧ̀, чⷭ҇таѧ, про́йде плотоно́сецъ: є҆го́же ᲂу҆молѝ, вѣ́рою тѧ̀ че́ствꙋющыѧ сп҃стѝ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

Ю҆́ношески до́бльствовавши стрⷭ҇тоно́сице всехва́льнаѧ, на пре́лесть воздви́гла є҆сѝ побѣ̑ды: рꙋ́къ бо лишє́нїѧ и҆ но́гъ терпѣ́ла є҆сѝ, сосцє́въ же и҆ зꙋбѡ́въ твои́хъ и҆скорене́нїе, мч҃нце претерпѣ́ла є҆сѝ, въ ра́дости пѣснопою́щи: лю́дїе превозноси́те хрⷭ҇та̀ во вѣ́ки.

Всесвѣтла̀ ꙗ҆́кѡ со́лнце дѣ́вства свѣтлостьмѝ, и҆ мꙋче́нїѧ добро́тами ѡ҆блиста́ла є҆сѝ, и҆ мі́ръ просвѣти́ла є҆сѝ свѣтолꙋ́чными сїѧ̑нїи твоегѡ̀ терпѣ́нїѧ, стрⷭ҇тоте́рпице, вопїю́щи: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те хрⷭ҇та̀ во вѣ́ки.

Ѡ҆скверне́ннꙋю страстьмѝ дꙋ́шꙋ мою̀, бг҃оневѣ́сто, и҆ ѡ҆черне́нꙋю прилѡ́ги ѕмі́а, твои́ми мольба́ми ѿ лю́тыхъ ѡ҆чи́сти и҆ свѣ́тлымъ ѡ҆сѣне́нїемъ твои́мъ мч҃нце, и҆́мⷬ҇къ, ѡ҆зарѝ вопи́ти: сщ҃е́нницы по́йте, лю́дїе превозноси́те хрⷭ҇та̀ во вѣ́ки.

Бг҃оро́диченъ: Тѧ̀ чтⷭ҇ꙋю и҆ непоро́чнꙋю, дв҃а жела́ющи, непоро́чнѡ и҆ тѣ́ло и҆ дꙋ́шꙋ соблюдѐ, страсте́й подпалє́нїѧ терпѣ́нїемъ и҆спепели́вши, и҆скꙋшє́нїѧ же мно́гихъ претерпѣ́вши мꙋ́къ: и҆ ны́нѣ въ нбⷭ҇ныхъ черто́зѣхъ ликꙋ́етъ съ тобо́ю, веселѧ́щисѧ во всѧ̑ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйше нб҃съ: тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.

<<рл҃ѳ: 277>>

На дре́вѣ повѣ́шена была̀ є҆сѝ, сло́ва бж҃їѧ ѡ҆бразꙋ́ющи стрⷭ҇ть бл҃же́ннꙋю, и҆ ѿсѣче́нїе терпѣ́ла є҆сѝ рꙋ́къ твои́хъ и҆ но́гъ, зꙋбѡ́въ и҆скорене́нїе, ѧ҆зы́ка же ѿрѣ́занїе и҆ сосцє́въ, чтⷭ҇аѧ, и҆́мⷬ҇къ, мона́шествꙋющихъ сла́во и҆ мч҃нкѡвъ ᲂу҆краше́нїе.

Ꙗ҆́кѡ невѣ́ста ᲂу҆краси́ласѧ є҆сѝ добро́тою, ѡ҆брꙋчи́вшисѧ женихꙋ̀ страда́ньми добротво́рными: внꙋ́трь же черто́гѡвъ свѣтови́дныхъ ꙗ҆́кѡ и҆збра́ннаѧ всели́ласѧ є҆сѝ, носѧ́щи свѣщꙋ̀ дв҃ственнꙋю. и҆ ны́нѣ црⷭ҇твꙋеши съ живꙋ́щими во вѣ́ки, и҆́мⷬ҇къ, сїѧ́ющи.

И҆ска́паютъ болѣ́зни твоѧ̑ сла́дость, грѣха̀ го́ресть ѿе́млющꙋ: ра́ка же то́читъ и҆сцѣле́нїй рѣ́ки, и҆ потоплѧ́етъ всѧ̑ стра̑сти и҆ недꙋ́ги лю̑тыѧ, въ сла́вꙋ сп҃совꙋ, чтⷭ҇на́ѧ, и҆́мⷬ҇къ, и҆̀же по достоѧ́нїю тѧ̀ сла́вѧтъ.

Бг҃оро́диченъ: Поне́сшаго тѧ̀ пло́ть ѿ жены̀, ꙗ҆́кѡ позна̀ мч҃нца твоѧ̀ гдⷭ҇и, дѣ́вственными ᲂу҆кра́шена лꙋча́ми, и҆ мꙋче́нїѧ кро́вїю ѡ҆багрена̀ тебѣ̀ бг҃ꙋ, въ слѣ́дъ мт҃ре твоеѧ̀ сла́внѡ приведе́сѧ, ꙗ҆́кѡ црⷭ҇твꙋющемꙋ тва́рїю.

Свѣти́ленъ.

И҆сцѣлє́нїѧ и҆сточа́еши ꙗ҆́кѡ рѣка̀, вѣ́рою притека́ющымъ къ твое́й честнѣ́й ра́цѣ, и҆́мⷬ҇къ, бг҃ови́днаѧ, дѣ́вства сосꙋ́де, и҆ цвѣ́те є҆стества̀ кра́сный, дщѝ цр҃е́ва, внꙋ́трь и҆мꙋ́щаѧ бж҃е́ственныѧ сла́вы бл҃же́нство.

Бг҃оро́диченъ: Премꙋ́дрость ѵ҆поста́снꙋю, и҆ сло́во пресꙋ́щное, и҆ врача̀ дꙋ́шъ и҆ тѣле́съ ро́ждшаѧ, гноє́нїѧ и҆ ра̑ны дꙋшѝ моеѧ̀ и҆сцѣлѝ лю̑тыѧ и҆ вре́мєнныѧ, и҆ се́рдца моегѡ̀ ᲂу҆ста́ви болѣ́знь дв҃о.

На хвали́техъ стїхи̑ры, гла́съ и҃.

Подо́бенъ: Ѽ пресла́внагѡ чꙋдесѐ!

Мі́ра ѡ҆ста́вльши красотꙋ̀, ꙳ дꙋшѝ бл҃горо́дїе ꙳ бл҃горо́дїѧ свы́ше ꙳ добро́тами ᲂу҆ѧсни́ла є҆сѝ, ꙳ и҆́мⷬ҇къ, всехва́льнаѧ, ꙳ ѡ҆́браза бл҃года́ть немꙋ́тнꙋ житїе́мъ сохра́нши, ꙳ мч҃нце непобѣди́маѧ, ꙳ дѣ́вства забра́ло бг҃ови́дно, ꙳ и҆ цвѣ́те є҆стества̀ всебл҃горо́днѣйшїй. [Два́жды.]

<<рл҃ѳ ѡ҆б.: 278>>

Сло́вомъ и҆ житїе́мъ и҆ бл҃года́тїю, ꙳ и҆ терпѣ́нїемъ дꙋшѝ ᲂу҆краси́вшисѧ, ꙳ привела̀ є҆сѝ страда́лєцъ во́инства, ꙳ и҆ дѣ́въ собо́ръ ꙳ ѿ дв҃ы возсїѧ́вшемꙋ, ꙳ и҆ свидѣ́тельства ꙗ҆́вѣ ѿве́рзшемꙋ всѣ̑мъ вхо́дъ, ꙳ и҆́мⷬ҇къ, всемꙋ́драѧ. ꙳ съ ни́ми же и҆ ны́нѣ сего̀ ᲂу҆молѝ, ꙳ сп҃стѝ ста́до твоѐ.

Пра́вды строи́тель, ꙳ тѧ̀ ꙗ҆́кѡ дѣ́вꙋ чи́стꙋ, ꙳ и҆ ꙗ҆́кѡ сла́внꙋ мч҃нцꙋ, ꙳ сꙋгꙋ́быми вѣнцы̀ ꙳ бг҃олѣ́пнѡ ᲂу҆красѝ, ꙳ красе́нъ черто́гъ тебѣ̀ дарова́въ, ꙳ свѣтоѧвле́ньми просвѣще́нный: ꙳ и҆дѣ́же все́льшисѧ, вѣ́чнꙋющимъ невѣ́сто хрⷭ҇то́ва ꙳ ны́нѣ бл҃же́нствомъ ꙗ҆́вѣ ѡ҆богати́ласѧ є҆сѝ.

Сла́ва, гла́съ д҃, самогла́сенъ:

Стрꙋ́жемꙋ тѣлесѝ твоемꙋ̀, дꙋшѝ свѣ́тлаѧ добро́та ꙗ҆влѧ́шесѧ краснѣ́йши, прпⷣбнаѧ мч҃нце мꙋ́драѧ и҆ пребога́таѧ, по́стницъ добро́то, стрⷭ҇тоте́рпицъ похвало̀, чꙋде́съ же приснотекꙋ́щїй и҆сто́чниче, и҆ дꙋхѡ́въ нечи́стыхъ прогони́тельнице, и҆ мл҃твеннице за чтꙋ́щихъ па́мѧть твою̀.

И҆ ны́нѣ, бг҃оро́диченъ:

Тѧ̀ стѣ́нꙋ стѧжа́хомъ бцⷣе пречⷭ҇таѧ, и҆ бл҃гоꙋти́шное приста́нище, и҆ ᲂу҆твержде́нїе: тѣ́мже моли́сѧ, и҆́же въ житїѝ ѡ҆бꙋрева́ема, ѡ҆кормѝ, и҆ сп҃си́ мѧ.

Крⷭ҇тобг҃оро́диченъ:

Подо́бенъ: Зва́нный свы́ше:

Не рыда́й менѐ мт҃и, ꙳ зрѧ́щи на дре́вѣ ви́сѧща твоего̀ сн҃а и҆ бг҃а, ꙳ над̾ вода́ми повѣ́сившаго зе́млю неде́ржнѡ, ꙳ и҆ всю̀ тва́рь созда́вшаго: ꙳ востанꙋ́ бо и҆ просла́влюсѧ, ꙳ и҆ а҆́дѡва ца̑рства сокрꙋшꙋ̀ крѣ́постїю, ꙳ и҆ погꙋблю̀ тогѡ̀ си́лꙋ, ꙳ и҆ ᲂу҆́зники и҆зба́влю ѿ тогѡ̀ ѕлодѣ́йства, ꙳ ꙗ҆́кѡ бл҃гоꙋтро́бенъ, ꙳ и҆ ѻ҆ц҃ꙋ̀ моемꙋ̀ приведꙋ̀, ꙳ ꙗ҆́кѡ человѣколю́бецъ.

А҆́ще и҆́мать на стїхо́внѣ Сла́вꙋ, глаго́ли вече́рнїй:

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.