<<рѻ҃и ѡ҆б.: 356>>
[глⷡ҇а л҃] БГ҃ОРО́ДИЧНЫ ВОСКРⷭ҇НЫ
на ѻ҆́смь гласѡ́въ, пое́мїи ве́черъ на Гдⷭ҇и воззва́хъ, и҆ на стїхо́внахъ,
и҆̀же ѿ а҆лфави̑тъ.
Гла́съ а҃.
На Гдⷭ҇и воззва́хъ, бг҃оро́диченъ:
Всемі́рнꙋю сла́вꙋ ѿ человѣ̑къ прозѧ́бшꙋю, и҆ влⷣкꙋ ро́ждшꙋю, нбⷭ҇нꙋю две́рь
воспои́мъ мр҃і́ю дв҃ꙋ, безпло́тныхъ пѣ́снь, и҆ вѣ́рныхъ ᲂу҆добре́нїе. сїѧ́ бо
ꙗ҆ви́сѧ нб҃о, и҆ хра́мъ бж҃ества̀. сїѧ̀ прегражде́нїе вражды̀ разрꙋши́вши, ми́ръ
введѐ, и҆ црⷭ҇твїе ѿве́рзе. сїю̀ ᲂу҆́бѡ и҆мꙋ́ще вѣ́ры ᲂу҆твержде́нїе, побо́рника
и҆́мамы и҆з̾ неѧ̀ ро́ждшагосѧ гдⷭ҇а. дерза́йте ᲂу҆̀бо, дерза́йте лю́дїе бж҃їи:
и҆́бо то́й побѣди́тъ врагѝ, ꙗ҆́кѡ всеси́ленъ.
На стїхо́внѣ бг҃оро́диченъ:
Сѐ и҆спо́лнисѧ и҆са́їино прорече́нїе: дв҃а бо родила̀ є҆сѝ, и҆ по ржⷭ҇твѣ̀
ꙗ҆́кѡ пре́жде ржⷭ҇тва̀ пребыла̀ є҆сѝ. бг҃ъ бо бѣ̀ рожде́йсѧ, тѣ́мже и҆
є҆стєства̀ новопресѣчѐ. но, ѽ бг҃омт҃и! молє́нїѧ твои́хъ рабѡ́въ, въ твое́мъ
хра́мѣ приноси̑маѧ тебѣ̀, не пре́зри: но ꙗ҆́кѡ бл҃гоꙋтро́бнаго твои́ма рꙋка́ма
носѧ́щи, на твоѧ̑ рабы̑ ᲂу҆млⷭ҇рдисѧ, и҆ молѝ сп҃сти́сѧ дꙋша́мъ на́шымъ.
Гла́съ в҃.
На Гдⷭ҇и воззва́хъ, бг҃оро́диченъ:
Пре́йде сѣ́нь зако́ннаѧ бл҃года́ти прише́дши: ꙗ҆́коже бо кꙋпина̀ не сгара́ше
ѡ҆палѧ́ема, та́кѡ дв҃а родила̀ є҆сѝ, и҆ дв҃а пребыла̀ є҆сѝ. вмѣ́стѡ столпа̀
ѻ҆́гненнагѡ, првⷣное возсїѧ̀ сл҃нце: вмѣ́стѡ мѡѷсе́а, хрⷭ҇то́съ сп҃се́нїе дꙋ́шъ
на́шихъ.
<<р҃п: 359>>
На стїхо́внѣ бг҃оро́диченъ:
Ѽ чꙋдесѐ но́вагѡ всѣ́хъ дре́внихъ чꙋде́съ! кто́ бо позна̀ мт҃рь без̾ мꙋ́жа
ро́ждшꙋю, и҆ на рꙋкꙋ̀ носѧ́щꙋю, всю̀ тва́рь содержа́щаго, бж҃їе є҆́сть
и҆зволе́нїе ро́ждшеесѧ: є҆го́же ꙗ҆́кѡ млⷣнца пречⷭ҇таѧ, твои́ма рꙋка́ма
носи́вшаѧ, и҆ мт҃рне дерзнове́нїе къ немꙋ̀ и҆мꙋ́щаѧ, не преста́й молѧ́щи ѡ҆
чтꙋ́щихъ тѧ̀, ᲂу҆ще́дрити и҆ сп҃стѝ дꙋ́шы на́шѧ.
Гла́съ г҃.
На Гдⷭ҇и воззва́хъ, бг҃оро́диченъ:
Ка́кѡ не диви́мсѧ бг҃омꙋ́жномꙋ ржⷭ҇твꙋ̀ твоемꙋ̀ пречⷭ҇тна́ѧ, и҆скꙋше́нїѧ бо
мꙋ́жескагѡ не прїе́мши всенепоро́чнаѧ, родила̀ є҆сѝ без̾ ѻ҆ц҃а̀ сн҃а пло́тїю,
пре́жде вѣ̑къ ѿ ѻ҆ц҃а̀ рожде́ннаго без̾ мт҃ре, ника́коже претерпѣ́вшаго
и҆змѣне́нїѧ, и҆лѝ смѣше́нїѧ, и҆лѝ раздѣле́нїѧ: но ѻ҆бою̀ сꙋществꙋ̑ сво́йство
цѣ́ло сохра́ншаго. тѣ́мже, мт҃и дв҃о влⷣчце, того̀ молѝ сп҃сти́сѧ дꙋша́мъ,
правосла́внѡ бцⷣꙋ и҆сповѣ́дающихъ тѧ̀.
На стїхо́внѣ бг҃оро́диченъ:
Без̾ сѣ́мене ѿ бж҃е́ственнагѡ дх҃а, во́лею же ѻ҆́ч҃ею зачала̀ є҆сѝ сн҃а бж҃їѧ,
ѿ ѻ҆ц҃а̀ без̾ мт҃ре пре́жде вѣ̑къ сꙋ́ща: на́съ же ра́ди, и҆з̾ тебѐ без̾ ѻ҆ц҃а̀
бы́вша, пло́тїю родила̀ є҆сѝ и҆ млⷣнца млеко́мъ пита́ла є҆сѝ. тѣ́мже не преста́й
моли́ти, и҆зба́витисѧ ѿ бѣ́дъ дꙋша́мъ на́шымъ.
Гла́съ д҃.
На Гдⷭ҇и воззва́хъ, бг҃оро́диченъ:
И҆́же тебѐ ра́ди бг҃оѻте́цъ прⷪ҇ро́къ дв҃дъ, пѣ́сненнѡ ѿ тебѣ̀ провозгласѝ,
вели̑чїѧ тебѣ̀ сотво́ршемꙋ: предста̀ цр҃и́ца ѡ҆ деснꙋ́ю тебѐ. тѧ́ бо мт҃рь,
хода́таицꙋ живота̀ показа̀, без̾ ѻ҆ц҃а̀ и҆з̾ тебѐ вочл҃вѣ́читисѧ бл҃говоли́вый
бг҃ъ, да сво́й па́ки ѡ҆бнови́тъ ѡ҆́бразъ, и҆стлѣ́вшїй страстьмѝ и҆ заблꙋ́ждшее
горохи́щное ѡ҆брѣ́тъ ѻ҆вча̀, на ра́мо воспрїи́мъ, ко ѻ҆ц҃ꙋ̀ <<р҃п ѡ҆б.: 360>>
принесе́тъ и҆ своемꙋ̀ хотѣ́нїю, съ нбⷭ҇ными совокꙋпи́тъ си́лами, и҆ сп҃се́тъ,
бцⷣе, мі́ръ, хрⷭ҇то́съ и҆мѣ́ѧй ве́лїю и҆ бога́тꙋю млⷭ҇ть.
На стїхо́внѣ бг҃оро́диченъ:
При́зри на молє́нїѧ твои́хъ ра̑бъ, всенепоро́чнаѧ, ᲂу҆толѧ́ющи лю̑таѧ на ны̀
воста̑нїѧ, всѧ́кїѧ ско́рби на́съ и҆змѣнѧ́ющи: тѧ́ бо є҆ди́нꙋ, тве́рдое и҆
и҆звѣ́стное ᲂу҆твержде́нїе и҆́мамы, и҆ твоѐ предста́тельство стѧжа́хомъ, да не
постыди́мсѧ, влⷣчце, тѧ̀ призыва́ющїи, потщи́сѧ на ᲂу҆моле́нїе тебѣ̀ вѣ́рнѡ
вопїю́щихъ: ра́дꙋйсѧ, влⷣчце, всѣ́хъ по́моще, ра́досте и҆ покро́ве, и҆ сп҃се́нїе
дꙋ́шъ на́шихъ.
Гла́съ є҃.
На Гдⷭ҇и воззва́хъ, бг҃оро́диченъ:
Въ чермнѣ́мъ мо́ри, неискꙋсобра́чныѧ невѣ́сты ѡ҆́бразъ написа́сѧ и҆ногда̀.
та́мѡ мѡѷсе́й раздѣли́тель воды̀: здѣ́ же гаврїи́лъ, слꙋжи́тель чꙋдесѐ. тогда̀
глꙋбинꙋ̀ ше́ствова немо́креннѡ і҆и҃ль: ны́нѣ же хрⷭ҇та̀ родѝ безсѣ́меннѡ дв҃а.
мо́ре по проше́ствїи і҆и҃левѣ пребы́сть непрохо́дно: непоро́чнаѧ по ржⷭ҇твѣ̀
є҆мманꙋ́илевѣ пребы́сть нетлѣ́нна. сы́й и҆ пре́жде сы́й, ꙗ҆вле́йсѧ ꙗ҆́кѡ
чл҃вѣ́къ, бж҃е, поми́лꙋй на́съ.
На стїхо́внѣ бг҃оро́диченъ:
Хра́мъ и҆ две́рь є҆сѝ, пала́та и҆ прⷭ҇то́лъ цр҃е́въ, дв҃о всечⷭ҇тна́ѧ, є҆́юже
и҆зба́витель мо́й, хрⷭ҇то́съ гдⷭ҇ь, во тьмѣ̀ спѧ́щымъ ꙗ҆ви́сѧ, сл҃нце сы́й
пра́вды, просвѣти́ти хотѧ̀ ꙗ҆̀же созда̀ по ѡ҆́бразꙋ своемꙋ̀, рꙋко́ю свое́ю.
тѣ́мже, всепѣ́таѧ, ꙗ҆́кѡ мт҃рне дерзнове́нїе къ немꙋ̀ стѧжа́вшаѧ, непреста́ннѡ
молѝ сп҃сти́сѧ дꙋша́мъ на́шымъ.
Гла́съ ѕ҃.
На Гдⷭ҇и воззва́хъ, бг҃оро́диченъ:
Кто̀ тебѐ не ᲂу҆бл҃жи́тъ, прест҃а́ѧ дв҃о; кто́ ли не воспое́тъ твоегѡ̀
пречⷭ҇тагѡ ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый <<рп҃а: 361>> сн҃ъ
є҆диноро́дный, то́йже ѿ тебѐ чⷭ҇тыѧ про́йде, неизрече́ннѡ вопло́щьсѧ,
є҆стество́мъ бг҃ъ сы́й, и҆ є҆стество́мъ бы́въ чл҃вѣ́къ на́съ ра́ди, не во двою̀
лицꙋ̑ раздѣлѧ́емый, но во двою̀ є҆стествꙋ̑ несли́тнѡ познава́емый. того̀ молѝ
чⷭ҇таѧ всебл҃же́ннаѧ, поми́ловатисѧ дꙋша́мъ на́шымъ.
На стїхо́внѣ бг҃оро́диченъ:
Творе́цъ и҆ и҆зба́витель мо́й пречⷭ҇таѧ, хрⷭ҇то́съ гдⷭ҇ь, и҆з̾ твои́хъ
ложе́снъ проше́дъ, въ мѧ̀ ѡ҆болкі́йсѧ, пе́рвыѧ клѧ́твы а҆да́ма свободѝ. тѣ́мже
тѝ всечⷭ҇таѧ, ꙗ҆́кѡ бж҃їи мт҃ри же и҆ дв҃ѣ вои́стиннꙋ, вопїе́мъ немо́лчнѡ:
ра́дꙋйсѧ а҆́гг҃льски, ра́дꙋйсѧ влⷣчце, предста́тельство и҆ покро́ве, и҆
сп҃се́нїе дꙋ́шъ на́шихъ.
Гла́съ з҃.
На Гдⷭ҇и воззва́хъ, бг҃оро́диченъ:
Мт҃и ᲂу҆́бѡ позна́ласѧ є҆сѝ, па́че є҆стества̀ бцⷣе, пребыла́ же є҆сѝ дв҃а,
па́че сло́ва и҆ ра́зꙋма: и҆ чꙋдесѐ ржⷭ҇тва̀ твоегѡ̀, сказа́ти ꙗ҆зы́къ не
мо́жетъ, пресла́внꙋ бо сꙋ́щꙋ зача́тїю чⷭ҇таѧ, непости́женъ є҆́сть ѡ҆́бразъ
рожде́нїѧ: и҆дѣ́же бо хо́щетъ бг҃ъ, побѣжда́етсѧ є҆стества̀ чи́нъ. тѣ́мже тѧ̀
всѝ мт҃рь бж҃їю вѣ́дꙋще, мо́лимъ ти сѧ прилѣ́жнѡ: молѝ сп҃сти́сѧ дꙋша́мъ
на́шымъ.
На стїхо́внѣ бг҃оро́диченъ:
Под̾ кро́въ тво́й влⷣчце, всѝ земноро́днїи прибѣга́юще, вопїе́мъ тѝ: бцⷣе,
ᲂу҆пова́нїе на́ше, и҆зба́ви ны̀ ѿ безмѣ́рныхъ прегрѣше́нїй, и҆ сп҃сѝ дꙋ́шы
на́шѧ.
Гла́съ и҃.
На Гдⷭ҇и воззва́хъ, бг҃оро́диченъ:
Цр҃ь нбⷭ҇ный за чл҃вѣколю́бїе на землѝ ꙗ҆ви́сѧ, и҆ съ человѣ́ки поживѐ: ѿ дв҃ы
во чтⷭ҇ыѧ пло́ть прїе́мый, и҆ и҆з̾ <<рп҃а ѡ҆б.: 362>> неѧ̀ проше́дый съ
воспрїѧ́тїемъ, є҆ди́нъ є҆́сть сн҃ъ, сꙋгꙋ́бъ є҆стество́мъ, но не ѵ҆поста́сїю.
тѣ́мже соверше́нна того̀ бг҃а, и҆ соверше́нна чл҃вѣ́ка вои́стиннꙋ проповѣ́дающе,
и҆сповѣ́дꙋемъ хрⷭ҇та̀ бг҃а на́шего. є҆го́же молѝ, мт҃и безневѣ́стнаѧ,
поми́ловатисѧ дꙋша́мъ на́шымъ.
На стїхо́внѣ бг҃оро́диченъ:
Безневѣ́стнаѧ дв҃о, ꙗ҆́же бг҃а неизрече́ннѡ заче́нши пло́тїю, мт҃и бг҃а
вы́шнѧгѡ, твои́хъ рабѡ́въ мольбы̑ прїимѝ всенепоро́чнаѧ, всѣ̑мъ подаю́щи
ѡ҆чище́нїе прегрѣше́нїй: ны́нѣ на̑ша молє́нїѧ прїе́млющи, молѝ сп҃сти́сѧ всѣ̑мъ
на́мъ.