<<с҃: 399>>

[глⷡ҇а л҃в] ѾПꙊСТИ́ТЕЛЬНІИ ВОСКРⷭ҇НЫ, Ѻ҆СМЍ ГЛАСѠ́ВЪ,

съ бг҃оро́дичны, и҆ ѵ҆пакоѝ и҆́хъ, и҆ кондакѝ.

Гла́съ а҃.

Тропа́рь:

Ка́мени запеча́танꙋ ѿ і҆ꙋдє́й, и҆ во́инѡмъ стрегꙋ́щымъ пречⷭ҇тое тѣ́ло твоѐ, воскрⷭ҇лъ є҆сѝ тридне́вный сп҃се, да́рꙋѧй мі́рови жи́знь. сегѡ̀ ра́ди си̑лы нбⷭ҇ныѧ вопїѧ́хꙋ тѝ жизнода́вче: сла́ва воскрⷭ҇нїю твоемꙋ̀ хрⷭ҇тѐ, сла́ва црⷭ҇твїю твоемꙋ̀. сла́ва смотре́нїю твоемꙋ̀, є҆ди́не чл҃вѣколю́бче.

Бг҃оро́диченъ:

Гаврїи́лꙋ вѣща́вшꙋ тебѣ̀ дв҃о, ра́дꙋйсѧ, со гла́сомъ воплоща́шесѧ всѣ́хъ влⷣка, въ тебѣ̀ ст҃ѣ́мъ кївѡ́тѣ, ꙗ҆́коже речѐ првⷣный дв҃дъ: ꙗ҆ви́ласѧ є҆сѝ ши́ршаѧ нб҃съ, поноси́вши зижди́телѧ твоего̀. сла́ва все́льшемꙋсѧ въ тѧ̀: сла́ва проше́дшемꙋ и҆з̾ тебѐ: сла́ва свободи́вшемꙋ на́съ ржⷭ҇тво́мъ твои́мъ.

Ѵ҆пакоѝ:

Разбо́йничо покаѧ́нїе ра́й ѡ҆кра́де, пла́чь же мѷроно́сицъ ра́дость возвѣстѝ, ꙗ҆́кѡ воскрⷭ҇лъ є҆сѝ хрⷭ҇тѐ бж҃е, подаѧ́й мі́рови ве́лїю млⷭ҇ть.

Конда́къ:

Подо́бенъ: Є҆гда̀ прїи́деши:

Воскрⷭ҇лъ є҆сѝ ꙗ҆́кѡ бг҃ъ и҆з̾ гро́ба во сла́вѣ, и҆ мі́ръ совоскр҃си́лъ є҆сѝ, и҆ є҆стество̀ человѣ́ческое ꙗ҆́кѡ бг҃а воспѣва́етъ тѧ̀, и҆ сме́рть и҆счезѐ, а҆да́мъ же ликꙋ́етъ влⷣко: є҆́ѵа ны́нѣ ѿ <<с҃ ѡ҆б.: 400>> ᲂу҆́зъ и҆збавлѧ́ема, ра́дꙋетсѧ зовꙋ́щи: ты̀ є҆сѝ и҆́же всѣ̑мъ подаѧ̀ хрⷭ҇тѐ воскрⷭ҇нїе.

Гла́съ в҃.

Тропа́рь:

Є҆гда̀ снизше́лъ є҆сѝ къ сме́рти животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бжⷭ҇тва̀: є҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче хрⷭ҇тѐ бж҃е на́шъ, сла́ва тебѣ̀.

Бг҃оро́диченъ:

Всѧ̑ па́че смы́сла, всѧ̑ пресла̑внаѧ твоѧ̑ бцⷣе та̑инства, чистотѣ̀ запеча́танной, и҆ дѣ́вствꙋ храни́мꙋ, мт҃и позна́ласѧ є҆сѝ нело́жна, бг҃а ро́ждши и҆́стиннаго: того̀ молѝ сп҃сти́сѧ дꙋша́мъ на́шымъ.

Ѵ҆пакоѝ:

По стрⷭ҇ти ше́дше во гро́бъ жєны̀, во є҆́же пома́зати тѣ́ло твоѐ хрⷭ҇тѐ бж҃е, ви́дѣша а҆́гг҃лы во гро́бѣ, и҆ ᲂу҆жасо́шасѧ: гла́съ бо слы́шахꙋ ѿ ни́хъ, ꙗ҆́кѡ воскр҃се гдⷭ҇ь, да́рꙋѧй мі́рови ве́лїю млⷭ҇ть.

Конда́къ:

Воскрⷭ҇лъ є҆сѝ ѿ гро́ба всеси́льне сп҃се: и҆ а҆́дъ ви́дѣвъ чꙋ́до ᲂу҆жасе́сѧ, и҆ ме́ртвїи воста́ша, тва́рь же ви́дѧщи, сра́дꙋетсѧ тебѣ̀, и҆ а҆да́мъ свесели́тсѧ, и҆ мі́ръ сп҃се мо́й, воспѣва́етъ тѧ̀ при́снѡ.

Гла́съ г҃.

Тропа́рь:

Да веселѧ́тсѧ нбⷭ҇наѧ, да ра́дꙋютсѧ земна̑ѧ, ꙗ҆́кѡ сотворѝ держа́вꙋ мы́шцею свое́ю гдⷭ҇ь, попра̀ сме́ртїю сме́рть, пе́рвенецъ ме́ртвыхъ бы́сть: и҆з̾ чре́ва а҆́дова и҆зба́ви на́съ, и҆ подадѐ мі́рови ве́лїю млⷭ҇ть.

Бг҃оро́диченъ:

Тѧ̀ хода́тайствовавшꙋю сп҃се́нїе ро́да на́шегѡ, воспѣва́емъ бцⷣе дв҃о: пло́тїю бо ѿ тебѐ воспрїѧ́тою сн҃ъ тво́й и҆ бг҃ъ <<с҃а: 401>> на́шъ, крⷭ҇то́мъ воспрїи́мъ стра́сть, и҆зба́ви на́съ ѿ тлѝ, ꙗ҆́кѡ чл҃вѣколю́бецъ.

Ѵ҆пакоѝ:

Оу҆дивлѧ́ѧ видѣ́нїемъ, ѡ҆роша́ѧ глаго́ланїи, блиста́ѧйсѧ а҆́гг҃лъ мѷроно́сицамъ глаго́лаше: что̀ жива́го и҆́щете во гро́бѣ; воста̀ и҆стощи́вый гро́бы: тлѝ премѣни́телѧ разꙋмѣ́йте непремѣ́ннаго. рцы́те бг҃ови: ко́ль стра̑шна дѣла̀ твоѧ̑, ꙗ҆́кѡ ро́дъ спа́слъ є҆сѝ человѣ́ческїй.

Конда́къ:

Подо́бенъ: Дв҃а дне́сь:

Воскрⷭ҇лъ є҆сѝ дне́сь и҆з̾ гро́ба ще́дре, и҆ на́съ возве́лъ є҆сѝ ѿ вра́тъ сме́ртныхъ. дне́сь а҆да́мъ ликꙋ́етъ, и҆ ра́дꙋетсѧ є҆́ѵа, вкꙋ́пѣ же и҆ проро́цы съ патрїа́рхи воспѣва́ютъ непреста́ннѡ бж҃е́ственнꙋю держа́вꙋ вла́сти твоеѧ̀.

Гла́съ д҃.

Тропа́рь:

Свѣ́тлꙋю воскрⷭ҇нїѧ про́повѣдь ѿ а҆́гг҃ла ᲂу҆вѣ́дѣвшѧ гдⷭ҇ни ᲂу҆ч҃нцы, и҆ пра́дѣднее ѡ҆сꙋжде́нїе ѿве́ргше, а҆пⷭ҇лѡмъ хва́лѧщесѧ глаго́лахꙋ: и҆спрове́ржесѧ сме́рть, воскр҃се хрⷭ҇то́съ бг҃ъ, да́рꙋѧй мі́рови ве́лїю млⷭ҇ть.

Бг҃оро́диченъ:

Є҆́же ѿ вѣ́ка ᲂу҆тае́ное, и҆ а҆́гг҃лѡмъ несвѣ́домое та́инство, тобо́ю бцⷣе сꙋ́щымъ на землѝ ꙗ҆ви́сѧ бг҃ъ, въ несли́тномъ соедине́нїи воплоща́емь, и҆ крⷭ҇тъ во́лею на́съ ра́ди воспрїи́мъ: и҆́мже воскр҃си́въ первозда́ннаго, сп҃се ѿ сме́рти дꙋ́шы на́шѧ.

Ѵ҆пакоѝ:

Ꙗ҆̀же твоегѡ̀ пресла́внагѡ воста́нїѧ, предте́кшыѧ мѷронѡ́сицы, а҆пⷭ҇лѡмъ проповѣ́дахꙋ хрⷭ҇тѐ, воскрⷭ҇лъ є҆сѝ ꙗ҆́кѡ бг҃ъ, подаѧ́й мі́рови ве́лїю млⷭ҇ть.

Конда́къ.

Подо́бенъ: Ꙗ҆ви́лсѧ є҆сѝ дне́сь:

Сп҃съ и҆ и҆зба́витель мо́й, и҆з̾ гро́ба ꙗ҆́кѡ бг҃ъ, воскр҃сѝ ѿ <<с҃а ѡ҆б.: 402>> ᲂу҆́зъ земнорѡ́дныѧ: и҆ врата̀ а҆́дѡва сокрꙋшѝ, и҆ ꙗ҆́кѡ влⷣка воскр҃се тридне́венъ.

Гла́съ є҃.

Тропа́рь:

Собезнача́льное сло́во ѻ҆ц҃ꙋ̀, и҆ дх҃ови, ѿ дв҃ы ро́ждшеесѧ на сп҃се́нїе на́ше, воспои́мъ вѣ́рнїи и҆ поклони́мсѧ, ꙗ҆́кѡ бл҃говолѝ пло́тїю взы́ти на крⷭ҇тъ, и҆ сме́рть претерпѣ́ти, и҆ воскр҃си́ти ᲂу҆ме́ршыѧ, сла́внымъ воскрⷭ҇нїемъ свои́мъ.

Бг҃оро́диченъ:

Ра́дꙋйсѧ, две́ре гдⷭ҇нѧ непроходи́маѧ: ра́дꙋйсѧ стѣно̀, и҆ покро́ве притека́ющихъ къ тебѣ̀: ра́дꙋйсѧ, неѡбꙋрева́емое приста́нище, и҆ неискꙋсобра́чнаѧ, ро́ждшаѧ пло́тїю творца̀ твоего̀ и҆ бг҃а: молѧ́щи не ѡ҆скꙋдѣва́й ѡ҆ воспѣва́ющихъ, и҆ кла́нѧющихсѧ ржⷭ҇твꙋ̀ твоемꙋ̀.

Ѵ҆пакоѝ:

А҆́гг҃льскимъ зра́комъ ᲂу҆́мъ смꙋща́ющыѧ, и҆ бж҃е́ственнымъ воста́нїемъ дꙋше́ю просвѣща́емыѧ, мѷронѡ́сицы а҆пⷭ҇лѡмъ бл҃говѣствова́хꙋ: возвѣсти́те во ꙗ҆зы́цѣхъ воскрⷭ҇нїе, гдⷭ҇ꙋ содѣ́йствꙋющꙋ чꙋдесы̀, подаю́щемꙋ на́мъ ве́лїю млⷭ҇ть.

Конда́къ:

Подо́бенъ: Собезнача́льное сло́во:

Ко а҆́дꙋ сп҃се мо́й соше́лъ є҆сѝ, и҆ врата̀ сокрꙋши́вый ꙗ҆́кѡ всеси́ленъ, ᲂу҆ме́ршихъ ꙗ҆́кѡ созда́тель совоскр҃си́лъ є҆сѝ, и҆ сме́рти жа́ло сокрꙋши́лъ є҆сѝ, и҆ а҆да́мъ ѿ клѧ́твы и҆зба́вленъ бы́сть, чл҃вѣколю́бче. тѣ́мже всѝ зове́мъ: сп҃сѝ на́съ гдⷭ҇и.

Гла́съ ѕ҃.

Тропа́рь:

А҆́гг҃льскїѧ си̑лы на гро́бѣ твое́мъ, и҆ стрегꙋ́щїи ѡ҆мертвѣ́ша, и҆ стоѧ́ше марі́а во гро́бѣ, и҆́щꙋщи пречⷭ҇тагѡ тѣ́ла твоегѡ̀. плѣни́лъ є҆сѝ а҆́дъ, не и҆скꙋси́всѧ ѿ негѡ̀: срѣ́тилъ є҆сѝ дв҃ꙋ, да́рꙋѧй живо́тъ. воскр҃сы́й и҆з̾ ме́ртвыхъ, гдⷭ҇и, сла́ва тебѣ̀.

<<с҃в: 403>>

Бг҃оро́диченъ:

Бл҃гослове́ннꙋю нарекі́й твою̀ мт҃рь, прише́лъ є҆сѝ на стрⷭ҇ть во́льнымъ хотѣ́нїемъ, возсїѧ́въ на крⷭ҇тѣ̀, взыска́ти хотѧ̀ а҆да́ма, глаго́лѧ а҆́гг҃лѡмъ: сра́дꙋйтесѧ мнѣ̀, ꙗ҆́кѡ ѡ҆брѣ́тесѧ поги́бшаѧ дра́хма. всѧ̑ мꙋ́дрѣ ᲂу҆стро́ивый бж҃е на́шъ, сла́ва тебѣ̀.

Ѵ҆пакоѝ:

Во́льною и҆ животворѧ́щею твое́ю сме́ртїю хрⷭ҇тѐ, врата̀ а҆́дѡва сокрꙋши́въ ꙗ҆́кѡ бг҃ъ, ѿве́рзлъ є҆сѝ на́мъ дре́внїй ра́й, и҆ воскр҃съ и҆з̾ ме́ртвыхъ, и҆зба́вилъ є҆сѝ ѿ тлѣ́нїѧ живо́тъ на́шъ.

Конда́къ:

Живонача́льною дла́нїю, ᲂу҆ме́ршыѧ ѿ мра́чныхъ ᲂу҆до́лїй жизнода́вецъ воскр҃си́въ всѣ́хъ хрⷭ҇то́съ бг҃ъ, воскрⷭ҇нїе подадѐ человѣ́ческомꙋ ро́дꙋ: є҆́сть бо всѣ́хъ сп҃си́тель, воскрⷭ҇нїе и҆ живо́тъ, и҆ бг҃ъ всѣ́хъ.

Гла́съ з҃.

Тропа́рь:

Разрꙋши́лъ є҆сѝ крⷭ҇то́мъ твои́мъ сме́рть, ѿве́рзлъ є҆сѝ разбо́йникꙋ ра́й, мѷроно́сицамъ пла́чь преложи́лъ є҆сѝ, и҆ а҆пⷭ҇лѡмъ проповѣ́дати повелѣ́лъ є҆сѝ: ꙗ҆́кѡ воскрⷭ҇лъ є҆сѝ хрⷭ҇тѐ бж҃е, да́рꙋѧй мі́рови ве́лїю млⷭ҇ть.

Бг҃оро́диченъ:

Ꙗ҆́кѡ на́шегѡ воскрⷭ҇нїѧ сокро́вище, на тѧ̀ надѣ́ющыѧсѧ всепѣ́таѧ, ѿ ро́ва и҆ глꙋбины̀ прегрѣше́нїй возведѝ: ты́ бо пови̑нныѧ грѣхꙋ̀ спасла̀ є҆сѝ, ро́ждшаѧ сп҃се́нїе на́ше: ꙗ҆́же пре́жде ржⷭ҇тва̀ дв҃а, и҆ въ ржⷭ҇твѣ̀ дв҃а, и҆ по ржⷭ҇твѣ̀ па́ки пребыва́еши дв҃а.

Ѵ҆пакоѝ:

И҆́же на́шъ зра́къ воспрїе́мый, и҆ претерпѣ́вый крⷭ҇тъ пло́тски, сп҃си́ мѧ воскрⷭ҇нїемъ твои́мъ хрⷭ҇тѐ бж҃е, ꙗ҆́кѡ чл҃вѣколю́бецъ.

Конда́къ:

Не ктомꙋ̀ держа́ва сме́ртнаѧ возмо́жетъ держа́ти человѣ́ки: хрⷭ҇то́съ во сни́де сокрꙋша́ѧ и҆ разорѧ́ѧ си̑лы є҆ѧ̀. свѧзꙋ́емь <<с҃в ѡ҆б.: 404>> быва́етъ а҆́дъ, прⷪ҇ро́цы согла́снѡ ра́дꙋютсѧ: предста̀, глаго́люще, сп҃съ сꙋ́щымъ въ вѣ́рѣ: и҆зыди́те вѣ́рнїи въ воскрⷭ҇нїе.

Гла́съ и҃.

Тропа́рь:

Съ высоты̀ снизше́лъ є҆сѝ бл҃гоꙋтро́бне, погребе́нїе прїѧ́лъ є҆сѝ тридне́вное, да на́съ свободи́ши страсте́й: животѐ и҆ воскрⷭ҇нїе на́ше, гдⷭ҇и, сла́ва тебѣ̀.

Бг҃оро́диченъ:

И҆́же на́съ ра́ди рожде́йсѧ: [Ли́стъ р҃л, на ѡ҆боро́тѣ.]

Ѵ҆пакоѝ:

Мѷронѡ́сицы жизнода́вца предстоѧ́щыѧ гро́бꙋ, влⷣкꙋ и҆ска́хꙋ въ ме́ртвыхъ безсме́ртнаго, и҆ ра́дость бл҃говѣ́щенїѧ ѿ а҆́гг҃ла прїе́мшыѧ, а҆пⷭ҇лѡмъ возвѣща́хꙋ: ꙗ҆́кѡ воскр҃се хрⷭ҇то́съ бг҃ъ, подаѧ́й мі́рови ве́лїю млⷭ҇ть.

Конда́къ:

Подо́бенъ: Ꙗ҆́кѡ нача́тки:

Воскр҃съ и҆з̾ гро́ба, ᲂу҆ме́ршыѧ воздви́глъ є҆сѝ, и҆ а҆да́ма воскр҃си́лъ є҆сѝ, и҆ є҆́ѵа ликꙋ́етъ во твое́мъ воскрⷭ҇нїи: и҆ мїрсті́и концы̀ торжествꙋ́ютъ, є҆́же и҆з̾ ме́ртвыхъ воста́нїемъ твои́мъ, многомлⷭ҇тиве.