Пᲂдᲂба́етъ вѣ́дати , кᲂгда̀ пᲂю́тсѧ тро́ичны дневні́и , на и҃ мь гласо́въ . пᲂю́тсѧ во ст҃ы́и вели́кїи по́стъ , и҆ в̾ про́чїѧ пᲂсты̀ . є҆гда̀ пᲂе́тсѧ , а҆ллилꙋ́їѧ , в̾ мѣ́стѡ бг҃ъ гдⷭ҇ь ,= и҆ мы̀ , пᲂе́мъ на́ гласъ , тро́ична , а҆ллилꙋ́їю , на́ ѻ҆ба ли́ка , є҃ ю , =в̾ настᲂѧ́щїи гла́съ , ѻ҆кта́ѧ . а҃ , ли́къ , гⷤ . а҆ в҃ , двⷤа .

сти́хъ , а҃ . ѿ́ нᲂщи ᲂу҆́тренюетъ дх҃ъ мо́й к̾ тебѣ̀ бж҃е . сти́хъ , в҃ . пра́вдѣ наꙋчи́тесѧ живꙋ́щїи на землѝ . сти́хъ , г҃ . прилᲂжѝ и҆́мъ ѕла̀ гдⷭ҇и , прилᲂжѝ ѕла̀ сла́внымъ землѝ . сти́хъ , д҃ . та́кѡ бы́хᲂмъ вᲂзлю́бленнᲂмꙋ твᲂемꙋ̀ . и҆ пᲂко́емждо стисѣ̀ пᲂе́тсѧ , а҆ллилꙋ́їѧ , гⷤ . и҆ пᲂси́хъ , пᲂе́мъ тро́ичны . и҆ пѣве́цъ , сла́ва . и҆ мы̀ , в҃ , тро́иченъ . и҆ пѣве́цъ , и҆ ны́нѣ . и҆ мы̀ , г҃ , тро́иченъ . та́же , тро́ичны . гла́съ , а҃ . Плᲂтьски́ми ѡ҆бразᲂва́нїи , беспло́тныхъ си́лъ , к̾ мы́сленᲂмꙋ и҆ невеще́ственᲂмꙋ вᲂзвᲂди́ ми ᲂу҆мꙋ̀ , и҆ трист҃ꙋ́ю пѣ́снь , трисᲂста́внагѡ бжⷭ҇тва̀ прїе́мще зарю̀ , херꙋви́мски вᲂпїе́мъ , ст҃ъ , ст҃ъ , ст҃ъ є҆сѝ бж҃е , застꙋпле́нїемъ беспло́тныхъ твᲂи́хъ , пᲂми́лꙋй на́съ . сла́ва . Со всѣ́ми нбⷭ҇ными си́лами , херꙋви́мски и҆́же в̾ вы́шнихъ вᲂпїе́мъ , трист҃ꙋ́ю вᲂз̾сыла́юще хвалꙋ̀ , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ , пᲂми́лꙋй на́съ .= и҆ ны́нѣ . В=ᲂста́вше ѿ сна̀ припа́даемъ тѝ бл҃же , и҆ а҆́нг҃льскꙋю пѣ́снь прино́симъ тѝ си́льне , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , а҃ . И҆́же свѣ́тъ вᲂсїѧ́выи гдⷭ҇и , дш҃ꙋ мᲂю̀ ѡ҆чи́сти ѿ всѧ́кᲂгѡ грѣха̀ , застꙋпле́нїемъ беспло́тныхъ твᲂи́хъ , пᲂми́лꙋй на́съ .

сла́ва , то́йже . а҆ кᲂне́цъ : мл҃твами всѣ́хъ ст҃ы́хъ твᲂи́хъ , пᲂми́лꙋй на́съ .

и҆ =нн҃ѣ , то́йже . а҆= кᲂне́цъ : бцⷣы ра́ди пᲂми́лꙋй на́съ .

пᲂтᲂмꙋ́ же гл҃и , и҆ в̾ про́чїѧ днѝ , ᲂу҆ всѣ́хъ стихо́въ ᲂу҆ свѣти́ленъ . дᲂсто́итъ же гл҃ати . во всѧ̀ седми́цы , на а҃ мъ , тро́ичнѣ , в̾ пᲂнедѣ́льникъ кᲂне́цъ : застꙋпле́нїемъ беспло́тныхъ твᲂи́хъ , пᲂми́лꙋй на́съ . во вто́рникъ кᲂне́цъ : прⷣтчи ра́ди , пᲂми́лꙋй на́съ . въ сре́дꙋ же , и҆ в̾ пѧто́къ кᲂне́цъ : си́лᲂю крⷭ҇та̀ прест҃а́гѡ сᲂхранѝ на́съ гдⷭ҇и . въ четверто́къ кᲂне́цъ : мл҃твами а҆пⷭ҇лъ твᲂи́хъ , пᲂми́лꙋй на́съ .

тро́ичны . гла́съ , в҃ . Несᲂзда́ннᲂе є҆стество̀ всѣ́хъ сᲂдѣ́телю ᲂу҆сты̀ на́ша ѿве́рзи , ꙗ҆́кѡ да вᲂзвѣсти́мъ хвалꙋ̀ твᲂю̀ вᲂпїю́ще , ст҃ъ , ст҃ъ , ст҃ъ є҆сѝ бж҃е . сла́ва . Вы́шнимъ си́ламъ пᲂдо́бѧщесѧ земні́и , пᲂбѣ́днꙋю пѣ́снь прино́симъ тѝ бл҃же , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ пᲂми́лꙋй на́съ . и҆ ны́нѣ . Ѿ ѻ҆дра̀ и҆ сна̀ вᲂздви́глъ мѧ̀ є҆сѝ гдⷭ҇и , ᲂу҆́мъ мо́й прᲂсвѣтѝ и҆ срⷣце , и҆ ᲂу҆стнѣ̀ мᲂѝ ѿве́рзи , пѣ́ти тѧ ст҃а́ѧ трⷪ҇це , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , в҃ . Свѣ́тъ тво́й приснᲂсꙋ́щныи пᲂслѝ гдⷭ҇и , и҆ прᲂсвѣтѝ ѻ҆́чи та́йнѣй срⷣца мᲂегѡ̀ , застꙋпле́нїемъ беспло́тныхъ твᲂи́хъ , и҆ спасѝ на́съ .

тро́ичны . гла́съ , г҃ . Ѻ҆ц҃а без̾нача́льна , и҆ сн҃а сᲂбез̾нача́льна , и҆ дх҃а сᲂприснᲂсꙋ́щна , бжⷭ҇тво̀ є҆ди́но , херꙋви́мски бг҃ᲂсло́вѧще вᲂпїе́мъ , ст҃ъ , ст҃ъ , ст҃ъ є҆сѝ бж҃е . сла́ва . Трⷪ҇це є҆динᲂсꙋ́щнаѧ , и҆ нераздѣ́льнаѧ є҆ди́нице трисᲂста́внаѧ , и҆ сᲂприснᲂсꙋ́щнаѧ , тебѣ̀ ꙗ҆́кѡ бг҃ꙋ а҆́нг҃льскꙋю пѣ́снь вᲂпїе́мъ , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ пᲂми́лꙋй на́съ . и҆ ны́нѣ . Внеза́пꙋ сꙋдїѧ̀ прїи́детъ , и҆ кᲂго́ждо дѣѧ́нїѧ ѡ҆бнажа́тсѧ , но со́ страхᲂмъ вᲂз̾зᲂве́мъ в̾ пᲂлꙋ́нᲂщи , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , г҃ . Пᲂслѝ свѣ́тъ тво́й хрⷭ҇тѐ бж҃е , и҆ прᲂсвѣтѝ срⷣце мᲂѐ . застꙋпле́нїемъ беспло́тныхъ твᲂи́хъ , пᲂми́лꙋй и҆ спаси́ мѧ .

тро́ичны . гла́съ , д҃ . Без̾нача́льнаго ти ѻ҆ц҃а , и҆ тебѐ хрⷭ҇тѐ бж҃е , и҆ прест҃ы́и тво́й дх҃ъ , херꙋви́мски славᲂсло́вити дерза́юще гл҃емъ , ст҃ъ , ст҃ъ , ст҃ъ є҆сѝ бж҃е . сла́ва . Ꙗ҆́кѡ чи́ни ны́нѣ а҆́нг҃льстїи на́ нб҃сѣхъ , и҆ сᲂстᲂѧ́нїѧ на землѝ чл҃ческаѧ со́ страхᲂмъ , пᲂбѣ́днꙋю пѣ́снь прино́симъ тѝ бла́же , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ пᲂми́лꙋй на́съ . и҆ ны́нѣ . Оу҆́мныхъ твᲂи́хъ слꙋ́гъ , прино́симъ ти ме́ртвенїи пѣ́снь , и҆ дерза́юще гл҃емъ , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , д҃ . И҆́же свѣ́тъ вᲂсїѧ́выи ми́рꙋ свᲂемꙋ̀ , во тмѣ̀ дш҃ꙋ мᲂю̀ ѡ҆держи́мꙋю ѿ всѧ́кᲂгѡ грѣха̀ ѡ҆чи́сти , застꙋпле́нїемъ беспло́тныхъ твᲂи́хъ , и҆ спаси́ мѧ .

тро́ичны . гла́съ , є҃ . Пѣ́нїю вре́мѧ и҆ мл҃твѣ ча́съ прилѣ́жнѡ вᲂзᲂпїе́мъ є҆ди́нᲂмꙋ бг҃ꙋ , ст҃ъ , ст҃ъ , ст҃ъ є҆сѝ бж҃е . сла́ва . Ѻ҆бразᲂва́ти смѣ́юще ᲂу҆́мнаѧ твᲂѧ̀ во́инства , трⷪ҇це без̾нача́льнаѧ , ᲂу҆сты̀ недᲂсто́йными вᲂпїе́мъ тѝ , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ пᲂми́лꙋй на́съ . и҆ ны́нѣ . Во ᲂу҆тро́бꙋ дв҃ческꙋю вмѣ́щьсѧ , и҆ нѣ́дръ ѻ҆те́ческихъ не ѿлꙋ́чьсѧ , со а҆́нг҃лы и҆ на́съ прїимѝ хрⷭ҇тѐ бж҃е вᲂпїю́щихъ тѝ , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , є҃ . Свѣтᲂда́вче гдⷭ҇и пᲂслѝ свѣ́тъ тво́й , и҆ прᲂсвѣтѝ срⷣце мᲂѐ , мл҃твами беспло́тныхъ твᲂи́хъ и҆ спаси́ мѧ .

тро́ичны . гла́съ , ѕ҃ . Беспло́тными ᲂу҆сты̀ , немо́лчными славᲂслᲂвле́нїи , шестᲂкри́льнїи пᲂю́тъ тѝ , трист҃ꙋ́ю пѣ́снь бж҃е на́шъ . и҆ мы̀ и҆́же на землѝ недᲂсто́йными ᲂу҆стна́ми хвалꙋ́ ти вᲂз̾сыла́емъ , ст҃ъ , ст҃ъ , ст҃ъ є҆сѝ бж҃е . сла́ва . Пред̾стᲂѧ́ще со́ страхᲂмъ херꙋви́ми , и҆ ᲂу҆жаса́ющесѧ с̾ тре́петᲂмъ серафи́ми , трист҃ꙋ́ю пѣ́снь прино́сѧтъ немо́лчнымъ гла́сᲂмъ . с̾ ни́ми же и҆ мы̀ грѣ́шнїи вᲂпїе́мъ , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ пᲂми́лꙋй на́съ . и҆ ны́нѣ . Трⷪ҇цꙋ є҆ди́ницꙋ бжⷭ҇тво́мъ , неслїѧ́ннымъ є҆ди́нствᲂмъ прᲂсла́вимъ , и҆ а҆́нг҃льскꙋю пѣ́снь вᲂзᲂпїе́мъ , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , ѕ҃ . Застꙋпле́нїемъ гдⷭ҇и беспло́тныхъ , низ̾пᲂслѝ дш҃а́мъ на́шимъ свѣ́тъ тво́й приснᲂсꙋ́щныи .

тро́ичны . гла́съ , з҃ . Непристꙋ́пнᲂмꙋ бжⷭ҇тво́мъ и҆́же во є҆ди́нствѣ трⷪ҇цѣ , серафи́мскꙋю трист҃ꙋ́ю вᲂз̾сыла́юще пѣ́снь , и҆ со́ страхᲂмъ вᲂпїе́мъ , ст҃ъ , ст҃ъ , ст҃ъ є҆сѝ бж҃е . сла́ва . Ꙗ҆́кѡ со́нъ лѣ́нᲂстныи ѿве́ргши дш҃е мᲂѧ̀ , и҆справле́нїе к̾ вᲂста́нїю пᲂкажѝ сꙋдїѝ , и҆ со́ страхᲂмъ вᲂзᲂпі́й , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ пᲂми́лꙋй на́съ . и҆ ны́нѣ . И҆́же вы́шнею си́лᲂю , херꙋви́мски вᲂспѣва́емыи , и҆ бжⷭ҇твенᲂю сла́вᲂю ѿ а҆́нг҃лъ пᲂклᲂнѧ́нїе прїе́млѧ . прїимѝ и҆ на́съ грѣ́шныхъ со ᲂу҆миле́нїемъ , вᲂпїю́щихъ тѝ , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , з҃ . Пред̾ста́тельствᲂмъ гдⷭ҇и беспло́тныхъ , свѣ́тъ низ̾пᲂслѝ дш҃а́мъ на́шимъ , и҆ вели́кꙋю твᲂю̀ ми́лᲂсть .

тро́ичны . гла́съ , и҃ . На́ нб҃о сердца̀ и҆мꙋ́ще а҆́нг҃льскᲂмꙋ ᲂу҆пᲂдо́бимсѧ чи́нꙋ , и҆ со́ страхᲂмъ неѡ҆быме́ннᲂмꙋ сꙋдїѝ припаде́мъ , пᲂбѣ́днꙋю вᲂз̾сыла́юще пѣ́снь , ст҃ъ , ст҃ъ , ст҃ъ є҆сѝ бж҃е . сла́ва . Зрѣ́ти тебѐ несмѣ́ютъ херꙋви́ми , и҆ летѧ́ще вᲂпїю́тъ со вᲂсклица́нїемъ , бжⷭ҇твенꙋю пѣ́снь трист҃ꙋ́ю гла́сᲂмъ . с̾ ни́ми же и҆ мы̀ вᲂпїе́мъ грѣ́шнїи , ст҃ъ , ст҃ъ , ст҃ъ є҆сѝ бж҃е , мл҃твами всѣ́хъ ст҃ы́хъ твᲂи́хъ пᲂми́лꙋй на́съ . и҆ ны́нѣ . Смирѧ́еми мно́жествᲂмъ прегрѣше́нїи на́шихъ , и҆ несмѣ́юще в̾зира́ти на высᲂтꙋ̀ нбⷭ҇нꙋю , дꙋ́ши съ тѣ́лᲂмъ прекло́нше , и҆ со а҆́нг҃лы вᲂпїе́мъ тѝ , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ .

Свѣти́ленъ . гла́съ , и҃ . Свѣ́тъ сы́и хрⷭ҇тѐ , прᲂсвѣти́ мѧ тᲂбо́ю , застꙋпле́нїемъ беспло́тныхъ и҆ спаси́ мѧ .