Припѣ́вы , григо́рїѧ синаи́та . пѣва́емы по всѧ̀ вᲂскрⷭ҇нїѧ , по тро́ичнᲂмъ кано́нѣ , вмѣ́сто дᲂсто́йна . Дᲂсто́йнѡ є҆́сть бг҃ᲂлѣ́пнѡ , є҆́же сла́вити тѧ̀ трⷪ҇це ст҃а́ѧ , неѡ҆быме́ннаго и҆ пресꙋ́щнаго , и҆ всебл҃га́го бг҃а на́шегѡ . ю҆́же пᲂю́тъ всѝ земнᲂро́днїи , и҆ славᲂсло́вѧтъ си́лы нбⷭ҇ныѧ . є҆́же ѿ всѣ́хъ вѣ́рнѡ пᲂклᲂнѧ́емꙋю , є҆ди́ницꙋ по сꙋществꙋ̀ трїипᲂста́снꙋю . Гдⷭ҇ᲂнача́льнꙋю херꙋви́мъ , и҆ бг҃ᲂнача́льнꙋю без̾ раз̾сꙋжде́нїѧ серафи́мъ , ю҆́же нераздѣ́льнꙋ трⷪ҇цꙋ во є҆ди́ницѣ , сꙋ́щеє бг҃ᲂнача́лїе , тѧ̀ велича́емъ . Ѻ҆ц҃ꙋ без̾нача́льнꙋ , и҆ бг҃ꙋ сᲂбез̾нача́льнꙋ сло́вꙋ со́ дх҃ᲂмъ , пᲂклᲂнѧ́юсѧ , неразлꙋ́чнꙋ є҆ди́нꙋ сᲂє҆динѧ́емꙋ по сꙋществꙋ̀ , тричи́сленꙋю є҆ди́ницꙋ , вѣ́рᲂю сла́вимъ . Вᲂспᲂе́мъ всѝ бг҃ᲂлѣ́пнѡ , пѣ́сньми бжⷭ҇твеными , ѻ҆ц҃а же и҆ сн҃а , и҆ дх҃а бжⷭ҇твенаго , трисᲂста́внᲂе є҆стество̀ , є҆ди́но црⷭ҇тво же и҆ гдⷭ҇ьство . Лꙋчеза́рныѧ твᲂѧ̀ мо́лнїи вᲂсїѧ́й ми бж҃е мо́й , трисᲂста́вне вседержи́телю , и҆ до́мъ мѧ пᲂкажѝ твᲂеѧ̀ непристꙋ́пныѧ сла́вы , свѣ́телъ и҆ свѣтᲂно́сенъ и҆ неи҆змѣ́ненъ . Дᲂсто́йнѡ є҆́сть ꙗ҆́кѡ вᲂи́стинꙋ сла́вити тѧ̀ бг҃а сло́ва , є҆го́же трепе́щꙋтъ и҆ ᲂу҆жаса́ютсѧ херꙋви́ми , и҆ славᲂсло́вѧтъ си́лы нбⷭ҇ныѧ , и҆́же ѿ дв҃ы неи҆зрече́нно вᲂпло́щшагᲂсѧ хрⷭ҇та̀ жизнᲂда́вца , со́ страхᲂмъ прᲂсла́вимъ . сла́ва . Ѻ҆́ч҃е вседержи́телю , сло́ве бж҃їи , всест҃ы́и дш҃е , є҆ди́на си́ла и҆ ѻ҆́бразъ , є҆ди́но црⷭ҇тво и҆ бжⷭ҇тво̀ и҆ вла́сть , пᲂми́лꙋй и҆ спасѝ пᲂклᲂнѧ́ющихсѧ тѝ .= пᲂкло́н̾ до землѝ .=

и҆ ны́нѣ . И҆з̾ ме́ртвыхъ ви́дѣвши твᲂегѡ̀ сн҃а пречⷭ҇таѧ дв҃о , вᲂскрⷭ҇ша бг҃ᲂлѣ́пнѡ . ра́дᲂсти не и҆зрече́нныѧ тва́рь и҆спᲂлнѧ́шесѧ , тᲂго̀ сла́вѧще тебѐ велича́емъ .

та́же , трⷭ҇то́е , и҆ по ѻ҆́ч҃е на́шъ . кᲂнда́къ гла́сꙋ . та́же , гдⷭ҇и пᲂми́лꙋй , м҃ . сла́ва , и҆ ны́нѣ . честнѣ́йшꙋю херꙋви́мъ . и҆́менемъ гдⷭ҇нимъ бл҃гᲂслᲂвѝ ѻ҆́ч҃е . і҆єре́й , гл҃етъ : бж҃е ᲂу҆ще́дри ны , и҆ бл҃гᲂслᲂви́ ны , прᲂсвѣтѝ лицѐ твᲂѐ на ны̀ , и҆ пᲂми́лꙋй ны .

Мл҃тва , ст҃ѣ́й и҆ живᲂнача́льнѣй трⷪ҇цѣ ,

твᲂре́нїе ма́рка и҆́нᲂка .

Всемᲂгꙋ́щаѧ и҆ живᲂтвᲂрѧ́щаѧ ст҃а́ѧ трⷪ҇це , и҆ свѣтᲂнача́льнаѧ , ꙗ҆́же ми́рнꙋю всѧ́кꙋю и҆ преми́рнꙋю тва́рь , за є҆ди́нꙋ бл҃гᲂсть ѿ несꙋ́щихъ приведы́и , и҆ прᲂмышлѧ́ѧ и҆ сᲂдержа́щи , и҆́же по про́чихъ твᲂи́хъ не и҆зрече́нныхъ ѡ҆ земно́мъ ро́дѣ бл҃гᲂдѣѧ́нїихъ , и҆ пᲂкаѧ́нїе на́мъ ра́ди плᲂтьска́гѡ немᲂже́нїѧ до сме́рти дарᲂва́выи , не ѡ҆ста́ви на́съ ѡ҆каѧ́нныхъ в̾ лꙋка́выхъ на́шихъ дѣѧ́нїихъ ᲂу҆мретѝ , нижѐ ѕлᲂнача́льникꙋ и҆ зави́стцꙋ и҆ гꙋби́телю , пᲂсмѣ́шьство бы́ти . зри́ши бо бл҃гᲂсе́рде , є҆ли́къ ᲂу҆́бѡ ѻ҆́нᲂгѡ на на́съ навѣ́тъ и҆ вражда̀ , є҆ли́ко же и҆ на́ше страстᲂва́нїе и҆ сла́бᲂсть и҆ небреже́нїе . но не ѡ҆скꙋ́дныѧ тѝ бл҃гᲂсти сᲂдѣ́лай на на́съ , мо́лимъ на всѧ́кїи де́нь и҆ ча́съ прᲂгнѣ́вающїи тѧ̀ , чⷭ҇тны́хъ и҆ живᲂтво́рныхъ запᲂвѣде́й престꙋпле́нїемъ . и҆ всѧ̀ ᲂу҆́бѡ всегѡ̀ преше́дшагѡ живᲂта̀ на́шегѡ , и҆ до ны́нѣшнѧгѡ часа̀ сᲂгрѣше́ннаѧ на́ми , в̾ дѣѧ́нїихъ , и҆лѝ глаго́ланїихъ и҆лѝ въ пᲂмышле́нїихъ , ѡ҆ста́ви и҆ прᲂстѝ . спᲂдо́би же на́съ , про́чеє скᲂнча́ти житїѐ в̾ пᲂкаѧ́нїи , и҆ ᲂу҆миле́нїи , и҆ сᲂблюде́нїи ст҃ы́хъ твᲂи́хъ пᲂвелѣ́нїи . а҆́ще ᲂу҆́бѡ сла́дᲂстїю прельсти́вшесѧ , мнᲂгᲂѡ҆бра́знѣ сᲂгрѣши́хᲂмъ . и҆лѝ мирски́ми пᲂхᲂтьмѝ непᲂле́зными и҆ вре́дными ѡ҆бᲂльсти́вшесѧ препрᲂвᲂди́хᲂмъ . а҆́ще гнѣ́вᲂмъ и҆ ꙗ҆́рᲂстїю пᲂд̾ви́гшесѧ без̾слᲂве́снᲂю , кᲂго̀ бра́та на́шегѡ ѡ҆скᲂрби́хᲂмъ . а҆́ще ꙗ҆зы́кᲂмъ не и҆збѣ́жныхъ и҆ стрᲂпо́тныхъ и҆ крѣ́пкихъ сѣте́й ѡ҆бъѧ́хᲂмсѧ . а҆́ще ко́имъ чꙋ́вствъ на́шихъ , и҆лѝ всѣ́ми во́лею и҆лѝ нево́лею , вѣ́дꙋще и҆лѝ невѣ́дꙋще , ѿ вᲂсхище́нїѧ и҆лѝ пᲂꙋче́нїѧ безꙋ́мно пᲂпᲂлзо́хᲂмсѧ . а҆́ще же лꙋка́выми по́мыслы и҆ сꙋ́етными со́вѣсть ѡ҆скверни́хᲂмъ . а҆́ще ли ко́имъ дрꙋги́мъ ѻ҆́бразᲂмъ прегрѣши́хᲂмъ , ѿ пред̾прїѧ́тїѧ и҆ ѡ҆бы́чаѧ тᲂми́ми ѕла́гѡ , прᲂстѝ на́мъ и҆ ѡ҆ста́ви всѧ̀ всеще́дре , пребл҃же и҆ мнᲂгᲂмлⷭ҇тиве . и҆ да́рꙋй на́мъ про́чеє бо́дрᲂсть и҆ си́лꙋ , во є҆́же твᲂри́ти во́лю твᲂю̀ бл҃гꙋ , и҆ бл҃гᲂꙋго́днꙋ и҆ сᲂверше́нꙋ , да нᲂщна́гѡ и҆ мра́чнагѡ ѕла̀ , свѣтᲂви́днымъ пᲂкаѧ́нїемъ премѣ́ньшесѧ . и҆ ꙗ҆́кѡ во́ дне бл҃гᲂѡ҆бра́знѡ хᲂдѧ́ще , и҆ ѡ҆чище́ни ѡ҆бъѧви́мсѧ чл҃кᲂлю́бїю твᲂемꙋ̀ недᲂсто́йнїи , вᲂспѣва́юще тѧ̀ и҆ велича́юще во́ вѣки , а҆ми́нь .