Въ недѣ́лю , ве́черъ . на́ гдⷭ҇и вᲂзва́хъ , стⷯры , пᲂкаѧ́нны . гла́съ , а҃ . поⷣ . прехва́льнїи мчн҃цы . запѣ́въ : ꙗ҆́кѡ ѿ тебѐ ѡ҆чище́нїе є҆́сть . Ѻ҆́ч҃е пребл҃гі́и ,꙳ свᲂегѡ̀ сн҃а пᲂсла́лъ є҆сѝ ꙳ пребл҃га́гѡ гдⷭ҇а ,꙳ блꙋ́днагѡ сы́на на ра́мо взѧ́ти ,꙳ ꙗ҆́кѡ заблꙋ́ждьшеє ѻ҆вча̀ ,꙳ вᲂз̾вестѝ и҆ в̾вестѝ тᲂго̀ ꙳ ѿ ню́дꙋ же и҆спадѐ ,꙳ во ѻ҆гра́дꙋ а҆́нг҃лъ ст҃ы́хъ твᲂи́хъ ꙳ непреле́стныхъ си́лъ .

ᲂу҆пᲂва̀ дꙋша̀ мᲂѧ̀ на́ гдⷭ҇а . Ѻ҆́ч҃е пребл҃гі́и ,꙳ мно́гᲂю пᲂдви́жимь ꙳ свᲂе́ю бл҃гᲂсты́нею ,꙳ приве́дъ ꙗ҆́кѡ бг҃ъ ѿ несꙋ́щихъ всѧ́ческаѧ ,꙳ пᲂслѣди́ же со́здавъ чл҃ка рꙋко́ю свᲂе́ю ꙳ по ѻ҆́бразꙋ свᲂемꙋ̀ ꙳ є҆го́же преслꙋ́шавша ,꙳ да́ннꙋю за́пᲂвѣдь є҆мꙋ̀ ,꙳ назда́лъ є҆сѝ ꙗ҆́кѡ чл҃кᲂлю́бецъ .

да ᲂу҆пᲂва́етъ і҆и҃ль на́ гдⷭ҇а . Чл҃кᲂлю́бче гдⷭ҇и ,꙳ сн҃ъ сы́и ,꙳ всеи́стинныи нбⷭ҇нагѡ рᲂди́телѧ ,꙳ ꙗ҆ви́лсѧ є҆сѝ по на́съ сы́и сн҃ъ чл҃чь ,꙳ да мѧ̀ челᲂвѣ́ка ꙳ ле́стїю прельще́на ѕмїи́нᲂю ,꙳ ꙗ҆́кᲂже ѻ҆вча̀ ꙳ на ра́мꙋ свᲂе́ю взе́мъ ,꙳ вᲂзведе́ши во ѡ҆гра́дꙋ небе́снꙋю .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стихѣ́ры , беспло́тнымъ . поⷣ , то́йже . запѣ́в̾ : ѿ всѣ́хъ без̾зако́нїи є҆гѡ̀ . Беспло́тнїи а҆́нг҃ли ,꙳ бж҃їю престо́лꙋ пред̾стᲂѧ́щїи ,꙳ и҆ ѿ нꙋ́дными свѣтлᲂстьмѝ ꙳ ѡ҆блистава́еми ,꙳ и҆ свѣтᲂли́тїи вѣ́чными сїѧ́юще ,꙳ и҆ свѣ́ти быва́юще втᲂрі́и ,꙳ хрⷭ҇тꙋ̀ мᲂли́тесѧ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю ми́лᲂсть .

пᲂхвали́те є҆гѡ̀ всѝ лю́дїє . Беспло́тнїи а҆́нг҃ли ꙳ живо́тъ вᲂи́стинꙋ без̾сме́ртныи ,꙳ ѿ пе́рваго прїе́мше живᲂта̀ всебᲂга́тїи ,꙳ прⷭ҇нᲂсꙋ́щныѧ ꙳ и҆ чи́стыѧ сла́вы ,꙳ зри́тели вы̀ всегда̀ пᲂказꙋ́етесѧ .꙳ свѣ́та и҆спᲂлнѧ́еми ,꙳ и҆ свѣщѝ сᲂѡбраща́емїи ꙳ сᲂвᲂкꙋпле́нїемъ и҆менꙋ́етесѧ .

и҆ и҆́стина гдⷭ҇нѧ пребыва́етъ во́ вѣки . А҆рха́нг҃ли , а҆́нг҃ли ꙳ нача́ла , прⷭ҇то́ли , гдⷭ҇ьствїѧ ,꙳ серафи́ми шестᲂкрила́тїи ,꙳ и҆ мнᲂгᲂѡчи́тїи херꙋви́ми бжⷭ҇твенїи ,꙳ премꙋ́дрᲂсти сᲂсꙋ́ди ,꙳ си́лы , вла́сти бжⷭ҇твенѣйшїи ,꙳ хрⷭ҇то́ви мᲂли́тесѧ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю млⷭ҇ть .

сла́ва , и҆ ны́нѣ , боⷢ҇ . Чи́стᲂе бж҃їе жили́ще ꙳ бы́вши чи́стаѧ ,꙳ со беспло́тными мᲂли́сѧ ,꙳ чи́стѣ сᲂверши́ти мѝ ꙳ пꙋ́ть жите́йскїи ,꙳ ꙗ҆́кѡ да непредвари́тъ ꙳ ве́черъ сме́ртныи негᲂто́ва ,꙳ и҆ ѿ́слетъ мѧ в̾ пла́мень ѻ҆́гненыи мꙋ́читисѧ .꙳ но ты́ мѧ ѿ сегѡ̀ и҆схитѝ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , пᲂкаѧ́нны . гла́съ , а҃ . Ꙗ҆́кѡ пꙋчи́на ве́лїѧ сᲂгрѣше́нїи мᲂи́хъ сп҃се , и҆ лю́тѣ пᲂгрꙋжа́юсѧ без̾зако́нїи мᲂи́ми , да́ждь ми рꙋ́кꙋ и҆ спаси́ мѧ , ꙗ҆́кѡ петро́ви бж҃е , и҆ пᲂми́лꙋй мѧ .

сти́хъ : к̾ тебѣ̀ вᲂзведо́хъ . Ꙗ҆́кѡ пᲂмышле́нїи ѕлы́ми и҆ дѣ́лы , ѡ҆сꙋди́хсѧ сп҃се , мы́сль мнѣ̀ да́рꙋй ѡ҆браще́нїѧ бж҃е , да зᲂвꙋ́ ти , спаси́ мѧ бл҃гᲂда́телю бл҃гі́и , и҆ пᲂми́лꙋй мѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . Мл҃твами гдⷭ҇и всѣ́хъ ст҃ы́хъ и҆ бцⷣы , тво́й ми́ръ да́ждь на́мъ , и҆ пᲂми́лꙋй на́съ , ꙗ҆́кѡ є҆ди́нъ ще́дръ .

сла́ва , и҆ ны́нѣ , боⷢ҇ . Небе́снымъ чинѡ́мъ ра́дᲂванїе ,꙳ и҆ на землѝ чл҃кѡмъ ,꙳ крѣ́пкаѧ пᲂмо́щнице пречⷭ҇таѧ дв҃о , ꙳ спаси́ ны и҆́же к̾ тебѣ̀ прибѣга́ющихъ ,꙳ ꙗ҆́кѡ на тѧ̀ ᲂу҆пᲂва́нїе ꙳ съ бг҃ᲂмъ бцⷣе вᲂз̾лᲂжи́хᲂмъ .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ нлⷣю , на па́вечерницѣ . кано́нъ , прест҃ѣ́й бцⷣѣ .

глаⷭ҇ , а҃ . пѣ́снь , а҃ . і҆рмоⷭ҇ . Твᲂѧ̀ пᲂбѣди́тельнаѧ десни́ца , бг҃ᲂлѣ́пнѡ в̾ крѣ́пᲂсти прᲂсла́висѧ . та́ бо без̾сме́ртне всемᲂгꙋ́щаѧ прᲂти́вныѧ сᲂтрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши . запѣ́въ : прест҃а́ѧ гжⷭ҇е бцⷣе спасѝ на́съ . Не и҆з̾гл҃анно зачала̀ є҆сѝ бг҃а , и҆ па́че є҆стества̀ рᲂдила̀ є҆сѝ влⷣчце пречⷭ҇таѧ , землены́ѧ ѿ прегрѣше́нїи и҆змѣ́ньшагѡ . тѣ́мже мᲂлю́ тѧ , мно́гихъ мѧ̀ прегрѣше́нїи и҆зба́ви . Пꙋчи́нᲂю пᲂгрꙋжа́емь бѣда́ми грѣхо́въ , не и҆зᲂчте́нныхъ скᲂрбе́й . но ѡ҆кᲂрмле́нїемъ твᲂи́мъ си́льнымъ , и҆ мл҃твᲂю всенепᲂро́чнаѧ , к̾ тишинѣ̀ бжⷭ҇твенѣй пᲂкаѧ́нїѧ напра́ви . сла́ва . Всеѧ̀ мᲂеѧ̀ жи́зни пред̾ста́тельнице , ѿ бѣ́дъ мно́гихъ и҆збавлѧ́ющи мѧ̀ , и҆ бл҃гᲂда́рственыи гла́съ вᲂспѣва́ю ти бцⷣе чⷭ҇таѧ . и҆ бꙋ́дꙋщїѧ мѧ и҆схи́ти мꙋ́ки . и҆ ны́нѣ . Ѡ҆бстᲂѧ́тельнаѧ нахᲂжде́нїѧ , и҆ напа́стей бꙋ́рю ᲂу҆тᲂлѝ , мт҃и всенепᲂро́чнаѧ , и҆зба́вителѧ и҆ зижди́телѧ и҆ бг҃а на́шегѡ , бл҃гᲂда́ть спасе́нїѧ и҆ ѡ҆чище́нїе ми пᲂдаю́щи .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немᲂщно́е , и҆ млⷭ҇тивно внѐ ѡ҆бᲂлкі́исѧ , препᲂѧ́ши мѧ с̾вы́ше си́лᲂю , вᲂспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃кᲂлю́бче . Видѣ́нїе ѻ҆́браза твᲂегѡ̀ пречⷭ҇тагѡ , а҆́нг҃лѡмъ ᲂу҆́бѡ сла́дᲂстно , чл҃кѡмъ же є҆́сть спаси́тельно , дꙋхᲂво́мъ же лꙋка́вствїѧ стра́шно . є҆́же вѣ́рᲂю пᲂчита́юще и҆ цѣлꙋ́юще бцⷣе , дш҃и прᲂсвѣща́емъ . Крᲂвьмѝ и҆з̾ тебѐ дв҃ческими , пло́ть свᲂю̀ ѡ҆блᲂжѝ сᲂзда́тель и҆ гдⷭ҇ь . є҆го́же мᲂлѝ всенепᲂро́чнаѧ , растлѣ́вша мѧ без̾мѣ́стными дѣѧ́ньми , ᲂу҆ще́дрити за неи҆зрече́ннꙋю млⷭ҇ть . сла́ва . Жи́зни стѧжа́въ тѧ̀ храни́тельницꙋ , и҆ стѣ́нꙋ непребᲂри́мꙋ . и҆ по кᲂнчи́нѣ пᲂкро́въ тѧ̀ ѡ҆брѣстѝ , и҆ застꙋ́пницꙋ непᲂбѣди́мꙋ к̾ бг҃ꙋ в̾вᲂдѧ́щꙋ , и҆ живо́тъ пᲂдаю́щꙋ вѣ́чныи , и҆ сла́вꙋ пренепᲂро́чнаѧ . и҆ ны́нѣ . Зача́тїе без̾ сѣ́менно чⷭ҇таѧ , и҆ ржⷭ҇тво̀ нетлѣ́нно , бг҃ъ бо бѣ̀ ꙗ҆́вѣ рᲂжде́исѧ , челᲂвѣ́ческагѡ є҆стества̀ паде́нїе призыва́ѧ . тѣ́мже бцⷣꙋ тѧ̀ и҆́стиннꙋю и҆ сꙋ́щꙋю вᲂспѣва́емъ .

пѣ́снь , д҃ . і҆рмо́съ . Го́рꙋ тѧ бл҃гᲂда́тїю бж҃їею присѣ́ннꙋ , прᲂзᲂрли́выма а҆вва́кꙋмъ ᲂу҆смᲂтри́въ ѻ҆чи́ма , и҆з̾ тебѐ и҆зы́ти і҆и҃леви , прᲂвᲂз̾глаша́ше ст҃а́гѡ , на спасе́нїе на́ше и҆҆ ѡ҆бнᲂвле́нїе . Не ᲂу҆держа́ннᲂе стремле́нїе к̾ ѕлꙋ̀ влече́тъ мѧ , дѣ́йствїемъ врага̀ , и҆ ѻ҆бы́чаемъ лꙋка́вымъ , пᲂмᲂзи́ ми влⷣчце , да не дᲂкᲂнца̀ всепа́гꙋбныи нападе́тъ на мѧ̀ , сме́ртїю вᲂз̾бранѧ́ѧ ми пᲂкаѧ́нїе . Всѐ вре́мѧ живᲂта̀ мᲂегѡ̀ и҆з̾жи́хъ въ блꙋдѣ́хъ ѕлы́хъ , и҆ ꙗ҆́звахъ лю́тыхъ , и҆ ны́нѣ ведꙋ́тъ во тмꙋ̀ смире́ннꙋю дꙋ́шꙋ мᲂю̀ си́хъ дѣ́лателѧ , бг҃ᲂрᲂди́тельнице дв҃о пᲂмᲂзи́ ми . сла́ва . Оу҆слы́ши гла́съ мо́й бᲂлѣ́зненыи всенепᲂро́чнаѧ , и҆́же и҆з̾ глꙋбины̀ дш҃и привнᲂша́ю стᲂна́ньми , и҆ разрѣше́нїе пᲂда́ждь ми дᲂлго́въ , и҆́же сᲂдѣ́ѧхъ ѡ҆каѧ́нныи , мы́слїю и҆ нра́вᲂмъ несмы́сленымъ . и҆ ны́нѣ . Влⷣчце ми́рꙋ бцⷣе пᲂмᲂзи́ ми , прелꙋка́выи вра́гъ пᲂглᲂща́етъ мѧ ѕѣ́льнѣ , лю́тыми вᲂспᲂмина́ньми и҆ пᲂмышле́ньми , и҆́же ѿ́ бг҃а мѧ разлꙋча́ютъ . не ѡ҆ста́ви ᲂу҆́бѡ менѐ , нижѐ пре́зри .

пѣ́снь , є҃ . і҆рмо́съ . Прᲂсвѣще́й сїѧ́нїемъ прише́ствїѧ твᲂегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ кᲂнцы̀ , срⷣца̀ прᲂсвѣтѝ свѣ́тᲂмъ твᲂегѡ̀ бг҃ᲂразꙋ́мїѧ , правᲂвѣ́рнѡ хва́лѧщимъ тѧ . Сѐ гᲂто́вꙋ ко спасе́нїю по́мᲂщь стѧжа́хъ , сегѡ̀ ра́ди тебѣ̀ припа́даю , и҆ зᲂвꙋ̀ со слеза́ми , бцⷣе и҆зба́ви мѧ ѿ стрѣ́лъ чꙋжа́го , и҆ бꙋ́дꙋщаго и҆стѧза́нїѧ . Ты̀ крѣ́пᲂсть мᲂѧ̀ , ты̀ пᲂхвала̀ и҆ ра́дᲂванїе , и҆ храни́тельница ми є҆сѝ , и҆ застꙋпле́нїе , и҆ прибѣ́жище , и҆ пред̾ста́тельница непᲂбѣди́ма , прест҃а́ѧ бцⷣе дв҃о . тѣ́мже спасѝ раба̀ свᲂегѡ̀ . сла́ва . Ѡ҆скве́рньшꙋюсѧ ѡ҆каѧ́ннꙋю ми дꙋ́шꙋ стрⷭ҇тьмѝ , ѡ҆крᲂпле́нїемъ бжⷭ҇твеныѧ ти мᲂли́твы ѡ҆чи́сти , бцⷣе пречⷭ҇таѧ , пᲂдаю́щи спасе́нїѧ сѝ свѣ́тлꙋю ѻ҆де́ждꙋ . и҆ ны́нѣ . Въ жи́зни мᲂе́й тве́рдᲂе ми ѡ҆кᲂрмле́нїе сꙋ́щи , тревᲂлне́нїѧ и҆збавлѧ́ющи мно́гихъ ѡ҆бстᲂѧ́нїи , и҆ во и҆схо́дѣ мᲂе́мъ мᲂлю́ тѧ , пред̾ста́ни ми , спаса́ющи мт҃и хрⷭ҇та̀ бг҃а .

пѣ́снь , ѕ҃ . і҆рмо́съ . Ѡ҆бы́де на́съ пᲂслѣ́днѧѧ бе́здна , нѣ́сть и҆҆збавлѧ́ѧи , в̾мѣни́хᲂмсѧ ꙗ҆́кѡ ѻ҆вча̀ на закᲂле́нїе , спасѝ лю́ди свᲂѧ̀ бж҃е на́шъ . ты́ бо крѣ́пᲂсть немᲂщны́мъ и҆҆ и҆҆справле́нїе . Без̾невѣ́стнаѧ бг҃ᲂрᲂди́тельнице пречи́стаѧ , рꙋ́кꙋ твᲂю̀ прᲂстри́ ми , и҆ и҆схи́ти и҆з̾ глꙋбины̀ ѕо́лъ и҆́хже безꙋ́мїемъ и҆схᲂда́таихъ , мᲂе́й дш҃и стра́стнѣй преѡ҆каѧ́нныи . Вᲂста́ни чⷭ҇таѧ на́ пᲂмᲂщь рабꙋ̀ твᲂемꙋ̀ и҆мꙋ́щемꙋ наде́ждꙋ свᲂю̀ с̾ бг҃ᲂмъ , к̾ твᲂемꙋ̀ застꙋпле́нїю непᲂбѣди́мᲂмꙋ , да не вра́гъ вᲂзмо́гъ , во́зметъ и҆ пᲂгꙋби́тъ мѧ . сла́ва . Бᲂлѧ́щимъ цѣли́телѧ , па́дающимъ вᲂста́нїе , сᲂгрѣша́ющимъ ѡ҆чище́нїе , бцⷣе тебѐ мᲂлю̀ , со слеза́ми припа́даю и҆ зᲂвꙋ́ ти , ꙗ҆́кѡ си́льна сама́ мѧ спасѝ пᲂгиба́ющагѡ . и҆ ны́нѣ . Пᲂми́лꙋй чⷭ҇таѧ смире́ннꙋю ми дш҃ꙋ , пред̾варѝ и҆ вᲂсхи́ти , и҆ зе́млющи ю҆̀ ѿ лꙋка́вагѡ , тщи́тбᲂсѧ в̾ про́пасть пᲂсла́ти ю҆̀ , ѕлы́хъ ра́ди , и҆́хже лѣ́нᲂсть мно́гаѧ сᲂдѣ́ла .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , а҃ . Мᲂли́твеницꙋ к̾ бг҃ꙋ стѧжа́хᲂмъ тѧ̀ всѝ , чⷭ҇таѧ притѣка́емъ в̾ цр҃кᲂвь твᲂю̀ ст҃ꙋ́ю , прᲂсѧ́ще по́мᲂщи ѿ тебѐ при́снѡ дв҃о . и҆зба́ви ᲂу҆́бѡ на́съ ѿ бѣсо́вскїѧ ѕло́бы и҆ мꙋче́нїѧ , и҆ ѡ҆сꙋжде́нїѧ страшна́гѡ , тѧ̀ блажа́щихъ .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смᲂтрѧ́емъ вѣ́рнїи , ꙗ҆́кᲂже бо ѻ҆́трᲂки спасѐ трѝ превᲂзнᲂша́емыи , ми́ръ ѡ҆бнᲂви́лъ є҆́сть , во́ чревѣ твᲂе́мъ сᲂверше́нъ , вᲂсхвалѧ́емыи ѻ҆ц҃е́мъ бг҃ъ и҆҆ препрᲂсла́вленъ . Бжⷭ҇твенаѧ ски́нїѧ влⷣцѣ бы́сть , ꙗ҆́кѡ заче́нши во́ чревѣ , и҆ ро́ждьши сегѡ̀ пло́тїю , є҆ди́на непᲂро́чнаѧ . тѣ́мже на́съ и҆зба́ви , страсте́й и҆ бᲂлѣ́зней , и҆ скᲂрбе́й и҆ дᲂлго́въ , и҆́бо и҆́маши крѣ́пᲂсть и҆ си́лꙋ мно́гꙋ . Оу҆ста́ви чⷭ҇таѧ бᲂлѣ́знь нестерпи́мꙋю , преѡ҆каѧ́нныѧ ми дш҃и , ра́дᲂсть ми и҆́стиннꙋю влⷣчце пᲂдаю́щи , рѣша́щи прегрѣше́нїи мᲂи́хъ мно́гихъ мꙋ́тнꙋю вᲂлнꙋ̀ , ты́ бо ми є҆сѝ прибѣ́жище и҆ и҆збавле́нїе . сла́ва . Всѐ на тѧ̀ ᲂу҆пᲂва́нїе пᲂлᲂжи́хъ спасе́нїѧ мᲂегѡ̀ . тѧ́ бо стѧжа́хъ по́мᲂщь , и҆ непᲂбᲂри́мъ сто́лпъ и҆ ᲂу҆тверже́нїе , и҆ тве́рдᲂсти и҆звѣще́нїе . и҆ тᲂбо́ю црⷭ҇тво пᲂлꙋчи́ти надѣ́юсѧ влⷣчце . и҆ ны́нѣ . Вᲂсто́къ сл҃нца бы́сть сла́вы влⷣчце чⷭ҇таѧ , тᲂбо́ю бо ꙗ҆вле́исѧ , всѧ̀ свᲂбᲂдѝ тмы̀ и҆ невѣ́дѣнїѧ , и҆ смра́дныхъ прегрѣше́нїи . тѣ́мже вᲂпїю́ ти , внѣ́шнїѧ мѧ̀ тмы̀ свᲂбᲂдѝ .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́кᲂже в̾гᲂрни́лѣ дᲂбро́тᲂю бл҃гᲂче́стїѧ , чистѣ́е зла́та блеща́хꙋсѧ гл҃юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . Страсте́й смꙋще́нїе , лю́тѣ ѡ҆скᲂрблѧ́етъ дш҃ꙋ мᲂю̀ бцⷣе . тишины́ же и҆ ми́ра ꙗ҆́же вино́вника чи́стаѧ , и҆ пᲂда́телѧ ро́ждьши , в̾ ми́рнѣ ᲂу҆стрᲂе́нїи сᲂблюда́ющи , ти́хᲂстныѧ мѧ̀ и҆спо́лни ра́дᲂсти и҆ весе́лїѧ . Спасе́нїю хᲂда́таица на́мъ ꙗ҆ви́сѧ бцⷣе , ро́ждьшаѧ сп҃са и҆ влⷣкꙋ всѧ́ческимъ . тѣ́мже мᲂлю́ тѧ , спасе́нїю спᲂдо́би смире́нꙋю мᲂю̀ дш҃ꙋ . пѣснᲂсло́вити тѧ̀ вѣ́рнѡ во всѧ̀ вѣ́ки . сла́ва . И҆́же зижди́телѧ всѣ́мъ и҆ бг҃а , не и҆з̾гл҃аннѡ заче́нши , спаси́ мѧ ѿ тлѝ , и҆ всѧ́кᲂгѡ и҆скꙋше́нїѧ . и҆ да́рꙋй вᲂпи́ти при́снѡ , блгⷭ҇ви́те всѧ̀ дѣ́ла гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . и҆ нн҃ѣ . Всѧ́ческимъ зижди́телѧ и҆ бг҃а , рᲂдила̀ є҆сѝ дв҃о . є҆го́же мᲂлѝ , дарᲂва́ти прегрѣше́ней ѡ҆чище́нїе , и҆ скᲂрбе́й и҆збавле́нїе и҆ напа́стей , и҆ вѣ́чнагѡ ѻ҆гнѧ̀ и҆ ѡ҆сꙋжде́нїѧ , славᲂсло́вѧщимъ непреста́ннѡ твᲂю̀ сла́вꙋ .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твᲂегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Мт҃и бж҃їѧ всенепᲂро́чнаѧ , ми́лᲂстивнꙋю сѝ ᲂу҆тро́бꙋ мнѣ̀ ѿве́рзи . и҆ ѿ ᲂу҆́стъ мы́сленагѡ во́лка и҆зба́ви мѧ , и҆́щꙋщагѡ пᲂгꙋби́ти и҆ раз̾тли́ти мѧ . пᲂми́лꙋй мᲂлю́ тѧ , невᲂз̾вратѝ менѐ пᲂсра́млена раба̀ твᲂегѡ̀ . Всеѧ́ ми жи́зни бꙋ́ди пред̾ста́тельница , и҆ тве́рдᲂе застꙋпле́нїе , и҆ и҆зба́ви мѧ̀ всечⷭ҇таѧ ѿ мно́гихъ напа́стей и҆ печа́лей , и҆ вра́гъ ꙗ҆зыкᲂбо́лїѧ . но и҆ ѻ҆гнѧ̀ вѣ́чнаго и҆зба́ви мѧ̀ . сла́ва . Є҆ди́на бᲂлѧ́щимъ пᲂсѣще́нїе , є҆ди́на па́дшимъ и҆справле́нїе влⷣчце , є҆ди́на к̾ бг҃ꙋ рꙋкᲂво́дница и҆ вхо́дъ , є҆ди́на хᲂда́таице вѣ́чныхъ бл҃гъ , пᲂми́лꙋй мѧ̀ є҆ди́наго , и҆́же па́че всѣ́хъ сᲂгрѣши́вшагѡ . и҆ ны́нѣ . Прїимѝ мᲂю̀ сле́знꙋю ны́нѣ мл҃твꙋ , и҆ пᲂда́ждь мѝ ѡ҆ставле́нїе сᲂгрѣше́нїй , мно́гихъ и҆ ѕлы́хъ , и҆́хже сᲂгрѣши́хъ , бцⷣе всепѣ́таѧ влⷣчце . до кᲂнца́ бо пᲂгиба́ю , ѿ без̾мѣ́рнагѡ ѿча́ѧнїѧ . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ пᲂнедѣ́льникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , а҃ . Въ без̾зако́нїихъ за́чатъ є҆́смь а҆́зъ блꙋ́дныи , несмѣ́ю взира́ти на высᲂтꙋ̀ нбⷭ҇нꙋю . но дерза́ѧ на чл҃кᲂлю́бїе зᲂвꙋ́ ти , бж҃е ѡ҆чи́сти мѧ грѣ́шнагѡ , и҆ спаси́ мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . А҆́ще пра́ведникъ є҆два̀ спасе́тсѧ , а҆́зъ же грѣ́шныи гдѣ̀ ꙗ҆влю́сѧ , и҆́же тѧгᲂты̀ и҆ ва́ра дневна́го непᲂне́сшїи ; но с̾ нае́мники є҆ди́наго на́ десѧте часа̀ , причти́ мѧ бж҃е , и҆ пᲂми́лꙋй мѧ̀ . сла́ва , и҆ нн҃ѣ , боⷢ҇ . Чꙋ́до чꙋдесе́мъ ѡ҆бра́дᲂваннаѧ , в̾ тебѣ̀ зрѧ́щи тва́рь ра́дꙋетсѧ , зача́тъ бо без̾ сѣ́мене , и҆ рᲂдила̀ є҆сѝ не и҆зрече́ннѡ . є҆го́же чинᲂнача́лїѧ а҆́нг҃льскаѧ зрѣ́ти немо́гꙋтъ . тᲂго̀ бцⷣе мᲂлѝ , спасти́сѧ дш҃а́мъ на́шимъ .

по в҃ , стихᲂло́гїи . сѣда́ленъ , гла́с̾ , а҃ . Ѡ҆бъѧ́тїѧ ѻ҆́ч҃а ѿве́рсти ми пᲂтщи́сѧ , блꙋ́днѣ бо и҆зжи́хъ мᲂѐ житїѐ , но на бᲂга́тство не и҆зживꙋ́щеє взира́ю щедро́тъ твᲂи́хъ сп҃се , ны́нѣ ѡ҆бнища́вшеє мѝ срⷣце непре́зри . тебѣ́ бо гдⷭ҇и ᲂу҆миле́нїемъ зᲂвꙋ̀ , сᲂгрѣши́хъ ѻ҆́ч҃е на́ нб҃о и҆ пред̾тᲂбо́ю . сти́х̾ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Страда́нїѧ пᲂхвало́ю , и҆ вѣне́чнᲂю по́честїю , сла́внїи страстᲂте́рпцы ѡ҆дѣ́ѧвшесѧ тᲂбо́ю гдⷭ҇и . терпѣ́нїемъ ᲂу҆́бѡ ра́нъ , без̾зако́нныхъ пᲂбѣди́ша , и҆ си́лᲂю бжⷭ҇твенᲂю ѿ небе́съ пᲂбѣ́дꙋ прїѧ́ша . тѣ́хъ мл҃твами , и҆ на́съ свᲂбᲂдѝ ѿ неви́димаго врага̀ , сп҃се и҆ спасѝ на́съ . сла́ва , и҆ ны́нѣ , боⷢ҇ . И҆звѣ́стнаѧ пред̾ста́тельнице и҆ пᲂмо́щнице всѣ́мъ , ᲂу҆пᲂва́нїе непᲂкᲂлѣби́мᲂе , и҆ застꙋ́пнице ми́рꙋ , пᲂми́лꙋй на́съ ꙗ҆́кѡ блага̀ , и҆ да́рꙋй сᲂгрѣше́нїемъ ѡ҆чище́нїе , и҆ дш҃а́мъ спасе́нїе , и҆ на пᲂкаѧ́нїѧ стезѝ наста́ви . к̾ тебѣ́ бо прибѣга́емъ вѣ́рᲂю , и҆ тебѐ мо́лимъ те́плѣ , и҆ про́симъ любо́вїю , не ѿста́ви ѿ на́съ ми́лᲂсти твᲂеѧ̀ .

по г҃ , стихᲂло́гїи . сѣда́ленъ , гла́съ , а҃ . Сꙋди́ще твᲂѐ стра́шно , и҆ сꙋ́дъ пра́веденъ , дѣла́ же мᲂѧ̀ лю́та . но ты̀ са́мъ млⷭ҇тиве пред̾вари́въ мѧ спасѝ , и҆ мꙋ́ки свᲂбᲂдѝ , и҆ и҆зба́ви влⷣко шꙋ́ихъ ча́сти , и҆ спᲂдо́би мѧ ѡ҆деснꙋ́ю тебѐ ста́ти сꙋдїѐ пра́ведныи . сла́ва , и҆ ны́нѣ , боⷢ҇ . Без̾невѣ́стнаѧ чи́стаѧ бцⷣе дв҃о , є҆҆ди́на вѣ́рнымъ пред̾ста́тельнице и҆ пᲂкро́ве , ѿ бѣ́дъ и҆ скᲂрбе́й и҆ лю́тыхъ ѡ҆бстᲂѧ́нїи всѣ́хъ и҆зба́ви , и҆́же на тѧ̀ наде́жꙋ ѻ҆трᲂкᲂви́це и҆мꙋ́щихъ . и҆ дш҃а на́ша спасѝ , бжⷭ҇твеными мл҃твами свᲂи́ми .

Въ пᲂнедѣ́льникъ , кано́нъ пᲂкаѧ́ненъ . гла́съ , а҃ . пѣ́снь , а҃ . і҆рмо́съ . Твᲂѧ̀ пᲂбѣди́тельнаѧ десни́ца , бг҃ᲂлѣ́пнѡ в̾ крѣ́пᲂсти прᲂсла́висѧ . та́ бо без̾сме́ртне всемᲂгꙋ́щаѧ прᲂти́вныѧ сᲂтрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши . запѣ́въ : сла́ва тебѣ̀ бж҃е на́шъ , сла́ва тебѣ̀ . Грѣхо́въ мᲂи́хъ ᲂу҆мнᲂже́нїе пᲂтребѝ , по мно́жествꙋ хрⷭ҇тѐ млⷭ҇тей твᲂи́хъ мᲂлю́тисѧ . и҆ мы́сль ѡ҆браще́нїѧ ми да́рꙋй , да прᲂславлѧ́ю и҆́же па́че ᲂу҆ма̀ твᲂю̀ бл҃гᲂсты́ню . Ꙗ҆ви́лсѧ є҆сѝ за милᲂсе́рдїе щедро́тъ , на землѝ вᲂплᲂща́емь челᲂвѣ́къ . тѣ́мже па́че челᲂвѣ́ка сло́ве бж҃їи сᲂгрѣши́вша , прїими́ мѧ нн҃ѣ , с̾ пᲂкаѧ́нїемъ щедро́тамъ твᲂи́мъ припа́дающагѡ . запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Ме́ртвᲂсти пᲂдо́бѧщесѧ хрⷭ҇та̀ , во́лею пᲂстрада́вшагѡ всехва́льнїи , стра́сти претерпѣ́сте мнᲂгᲂви́дныѧ и҆ сме́рть , при́снѡ сла́внїи . тѣ́мже без̾сме́ртнᲂе житїѐ ᲂу҆лꙋчи́сте мч҃нцы . мⷱ҇ꙋ . Ѻ҆́гнь любвѐ бжⷭ҇твеныѧ , пресла́вно внꙋ́трь нᲂсѧ́ще ст҃і́и , ѻ҆гнѧ̀ не ᲂу҆бᲂѧ́стесѧ , но те́плѣ бᲂлѣ́зни пᲂдъѧ́сте , мнᲂгᲂбо́жїѧ ле́сть всѧ́кꙋ пᲂпали́сте . боⷢ҇ . Чи́нᲂве беспло́тныхъ , с̾ на́ми вᲂспѣва́ютъ тѧ̀ дв҃о всепѣ́таѧ . не ѡ҆быме́ннаго бо во́чревѣ твᲂе́мъ вᲂплᲂще́нна рᲂдила̀ є҆сѝ , пребы́вши дв҃ᲂю ꙗ҆́кᲂже и҆ пре́жде ржⷭ҇тва̀ , бг҃ᲂневѣ́сто .

дрꙋгі́и кано́нъ , беспло́тнымъ . і҆рмо́съ , то́йже . =запѣ́въ : ст҃і́и а҆рха́нг҃ли и҆ а҆́нг҃ли , мᲂли́те бг҃а ѡ҆ на́съ . Прⷭ҇то́лꙋ пред̾стᲂѧ́ще свѣ́тлѡ влⷣчнемꙋ , пречи́стїи а҆́нг҃ли , ѻ҆ц҃ꙋ сᲂбез̾нача́льна , и҆ тᲂго̀ вели́кагѡ сᲂвѣ́та а҆́нг҃ла , сло́во ми вдᲂхнꙋ́ти ва́съ пᲂю́щꙋ мᲂли́тесѧ . =двⷤа . Зерца́ла свѣ́та бг҃ᲂнача́льнагѡ , и҆ трисл҃нечныѧ зарѝ сїѧ́нїе , в̾ себѣ̀ прїе́млюща по є҆ли́кꙋ пᲂсти́жнѡ , а҆́нг҃льскїѧ чи́ны пе́рвѣе ᲂу҆мы́сливъ , ᲂу҆́мъ бжⷭ҇твеныи сᲂста́вивъ . боⷢ҇ . Оу҆краси́выи ꙗ҆́кѡ бг҃ъ чинᲂнача́лїѧ вы́шнихъ си́лъ , во́ чрево твᲂѐ бцⷣе не и҆скꙋсᲂбра́чнᲂе всели́сѧ , херꙋви́мъ вы́шшеє , и҆ пло́ть непремѣ́нна бы́сть .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немᲂщно́е , и҆ млⷭ҇тивно внѐ ѡ҆бᲂлкі́исѧ , препᲂѧ́ши мѧ с̾вы́ше си́лᲂю , вᲂспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃кᲂлю́бче . Вᲂзни́кни грѧдѝ ѽ дꙋшѐ , и҆ вᲂзᲂпі́и сᲂгрѣши́хъ , є҆ди́нᲂмꙋ свѣ́дꙋщемꙋ всѧ̀ та́йнаѧ твᲂѧ̀ , и҆ пᲂкаѧ́нїѧ плᲂды̀ пᲂкажѝ , ꙗ҆́кѡ да ᲂу҆ще́дритъ тѧ̀ ще́дрыи гдⷭ҇ь , и҆ ѻ҆гнѧ̀ вѣ́чнагѡ и҆зба́витъ . Ѡ҆чи́сти є҆ди́не бл҃же , ѡ҆чи́сти и҆ спаси́ мѧ . ꙗ҆́кѡ мыта́рь со́ страхᲂмъ вᲂпїю́ ти , мно́жество грѣхо́въ влекі́и с̾ сᲂбо́ю . и҆ преклᲂнѧ́емъ є҆́смь тѧгᲂто́ю прегрѣше́нїи , и҆ стꙋда̀ без̾мѣ́рнагѡ и҆спᲂлнѧ́юсѧ . мⷱ҇ꙋ . Мꙋ́дрᲂстїю и҆ ра́зꙋмᲂмъ и҆́стиннымъ мч҃нцы прᲂсвѣща́еми , є҆́ллинскꙋю мꙋ́дрᲂсть ѡ҆бꙋи́ша , мꙋ́дрᲂстнꙋю же ѕло́бꙋ разрꙋши́ша . и҆ крѣ́пкѡ пᲂстрада́вше , дᲂсто́йнѣ вᲂспрїѧ́ша пᲂбѣ́ды вѣнцы̀ ра́дꙋющесѧ . мⷱ҇ꙋ . Є҆ди́ницꙋ є҆стество́мъ , трⷪ҇цꙋ же ли́цы , страда́льцы и҆спᲂвѣ́дающе . пре́лести же мнᲂгᲂбо́жїѧ , бжⷭ҇твенᲂю вѣ́рᲂю пᲂтреби́сте , и҆ свѣти́льницы ꙗ҆́вльшесѧ , всѣ́хъ ѡ҆зарѧ́юще срⷣца̀ , зарѧ́ми бл҃гᲂда́тными . боⷢ҇ . Ст҃а́ѧ бг҃ᲂневѣ́сто чи́стаѧ , ст҃а́гѡ рᲂдила̀ є҆сѝ , во ст҃ы́хъ пᲂчива́ющагѡ , сн҃а и҆ сло́ва ѻ҆ц҃ꙋ сᲂбез̾нача́льнагѡ , ѡ҆сщ҃а́ющагѡ ст҃ы́мъ дх҃ᲂмъ , и҆́же тᲂго̀ бл҃гᲂче́стнѡ ѡ҆сщ҃а́ющихъ .

и҆́нъ і҆рмо́съ , то́йже . Свѣ́тꙋ бг҃ᲂдѣ́тельнᲂмꙋ , серафи́ми и҆́скренно приближа́ющесѧ . и҆ мно́жицею тᲂго̀ насыща́еми , первᲂда́тными сїѧ́ньми , первᲂдѣ́тельно свѣ́тѧтсѧ . и҆ ꙗ҆́кѡ свѣ́ти втᲂрі́и быва́ютъ пᲂлᲂже́нїемъ ѡ҆бᲂжа́еми . двⷤа . А҆́нг҃льскꙋю свѣ́тлᲂсть , пѣ́ти ᲂу҆се́рднѡ жела́юще , ꙗ҆́же тѣ́хъ ра́ди ѿ́ бг҃а по́мᲂщь пᲂдае́мꙋю вѣ́рнїи про́симъ . да ᲂу҆ма̀ чистᲂто́ю , и҆ чи́стыми ᲂу҆сты̀ , ѡ҆бнᲂви́мсѧ си́хъ сїѧ́нїемъ . боⷢ҇ . Оу҆ма̀ пресꙋ́щественагѡ , ви́дѣти спᲂдᲂблѧ́емъ ꙗ҆́кѡ в̾ зерца́лѣ , гаврїи́лъ ра́дᲂваненъ гла́съ принесѐ тебѣ̀ дв҃це всепѣ́таѧ . сло́ва зача́тїе ꙗ҆́вѣ вᲂзвѣща́ѧи , не и҆зрече́ннᲂе ржⷭ҇тво̀ прᲂпᲂвѣ́даѧ .

пѣ́снь , д҃ . і҆рмо́съ . Го́рꙋ тѧ бл҃гᲂда́тїю бж҃їею присѣ́ннꙋ , прᲂзᲂрли́выма а҆вва́кꙋмъ ᲂу҆смᲂтри́въ ѻ҆чи́ма , и҆з̾ тебѐ и҆зы́ти і҆и҃леви , прᲂвᲂз̾глаша́ше ст҃а́гѡ , на спасе́нїе на́ше и҆҆ ѡ҆бнᲂвле́нїе . Кᲂмꙋ́ тѧ дꙋшѐ мᲂѧ̀ ѡ҆каѧ́ннаѧ ᲂу҆пᲂдо́блю , дѣ́лающи лю́таѧ , и҆ невᲂзлю́бльши бл҃ги́хъ . ѡ҆брати́сѧ вᲂзᲂпі́и ко и҆́же тебѐ ра́ди ѡ҆бнища́вшемꙋ во́лею , срⷣцевѣ́дче ѡ҆чи́стивъ спаси́ мѧ .= Нарекі́и пᲂкаѧ́нїе хрⷭ҇тѐ ѡ҆браща́ющимсѧ , є҆́же ми пᲂда́ждь і҆с҃е , пре́жде кᲂнца̀ житїю̀ . даѧ́ми ᲂу҆миле́нїе и҆ вᲂздыха́нїе , ꙗ҆́кᲂже блꙋдни́цѣ пе́рвѣе , лᲂбыза́ющеи но́зѣ твᲂѝ влⷣко . =мⷱ҇ꙋ . Вѡ́дъ дх҃о́вныхъ и҆спо́лньшесѧ мч҃нцы вᲂды̀ жи́вы рѣ́ки ꙗ҆ви́шасѧ , манᲂве́нїемъ бжⷭ҇твенымъ , и҆ пре́лести и҆з̾сꙋши́ша мꙋ́тныѧ ꙗ҆́вѣ пᲂто́ки сла́внїи , и҆ вѣ́рныхъ срⷣца̀ напᲂи́ша . мⷱ҇ꙋ . Вельмѝ пᲂдви́гшесѧ бжⷭ҇твенїи мч҃нцы , ѻ҆гнѧ̀ ᲂу҆́бѡ и҆ меча̀ и҆ лю́тыхъ всѣ́хъ претерпѣ́сте тᲂмле́нїи . тѣ́хъ мᲂле́нїемъ сло́ве бж҃їи , вели́кихъ и҆зба́ви мꙋ́къ , и҆́же вседꙋ́шно тѣ́хъ бл҃жа́щїѧ . боⷢ҇ . И҆́же дре́вле и҆з̾ ѻ҆ц҃а нерᲂжде́нна , сн҃ъ рᲂжде́исѧ , и҆ ржⷭ҇тво̀ прїѧ́тъ лѣ́тно . и҆з̾ тебѐ дв҃о вᲂпло́щьсѧ , мнᲂгᲂлѣ́тнꙋю бра́нь земны́хъ , ѿѧ́ти хᲂтѧ̀ бл҃гᲂꙋтро́бныи , и҆́же дне́й и҆ лѣ́тъ превы́шши сы́и .

и҆́нъ і҆рмо́съ , то́йже . Престо́ли пе́рвꙋю и҆спᲂлнѧ́юще красᲂтꙋ̀ , и҆ херꙋви́ми и҆ серафи́ми , бжⷭ҇твеными зарѧ́ми , и҆́скренно свѣ́тѧтсѧ , бг҃ᲂдѣ́льнагѡ сщ҃еннᲂнача́лїѧ прїе́млюще , и҆́же пᲂю́тъ , сла́ва си́лѣ твᲂе́й гдⷭ҇и . двⷤа . Пᲂю́тъ трисл҃нечнᲂе є҆ди́нство бжⷭ҇тва̀ , тро́йческими сщ҃е́нствы непреста́нными гла́сы ꙗ҆влѧ́юще серафи́ми , пречⷭ҇тᲂе бг҃ᲂсло́вїѧ та́инство , и҆ правᲂсла́внѣй вѣ́рѣ наꙋча́юще . боⷢ҇ . И҆́же всѧ́кагѡ є҆стества̀ превы́шши разꙋмѣва́емъ , па́че ᲂу҆ма̀ бг҃ᲂнача́льнымъ зда́нїемъ вᲂи́стинꙋ , на землѝ сᲂверша́ѧ та́инство , дв҃ствеными ѡ҆заре́нно свѣтлᲂстьмѝ , в̾ твᲂѐ чре́во всели́сѧ пречи́стаѧ .

пѣ́снь , є҃ . і҆рмо́съ . Прᲂсвѣще́й сїѧ́нїемъ прише́ствїѧ твᲂегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ кᲂнцы̀ , срⷣца̀ прᲂсвѣтѝ свѣ́тᲂмъ твᲂегѡ̀ бг҃ᲂразꙋ́мїѧ , правᲂвѣ́рнѡ хва́лѧщимъ тѧ . Впадо́хъ в̾ стра́сти тлѣ́нїѧ , и҆ бᲂю́сѧ твᲂегѡ̀ пра́веднагѡ сꙋди́ща , пра́ведныи гдⷭ҇и . тѣ́мже мᲂлю́тисѧ , ᲂу҆крѣпи́ мѧ твᲂри́ти дѣ́ланїѧ бл҃га́ѧ , ѡ҆правда́ющаѧ мѧ . Без̾вѣ́стнаѧ и҆ та́йнаѧ срⷣца мᲂегѡ̀ ты̀ вѣ́си бж҃е мо́й и҆ зижди́телю гдⷭ҇и , не ѡ҆сꙋдѝ ᲂу҆́бѡ менѐ в̾ ча́съ сꙋда̀ , внегда̀ прїи́деши сꙋди́ти всѧ́ческимъ .= мⷱ҇ꙋ . Ст҃і́и причаща́ющесѧ ѻ҆гне́ви , раз̾жже́нїе пᲂказᲂва́хꙋ , є҆́же ѡ҆́ бз҃ѣ тѣ́хъ вᲂз̾любле́нїѧ . тѣ́мже и҆ прᲂхлажда́еми бг҃ᲂно́сцы , ча́ѧнїемъ бꙋ́дꙋщихъ веселѧ́хꙋсѧ . =мⷱ҇ꙋ . Оу҆крѣплѧ́еми бꙋ́дꙋщихъ бл҃гъ наде́жею мч҃нцы , пᲂдъѧ́ша растерза́нїѧ ᲂу҆до́въ терпѣли́вѣйше , и҆ мнᲂгᲂко́зненагѡ жи́лами свᲂи́ми , не ѡ҆сла́бленымъ терпѣ́нїемъ ᲂу҆дави́ша . боⷢ҇ . Виті́йствꙋющаѧ ᲂу҆ста̀ , невᲂзмо́гꙋтъ ржⷭ҇тва̀ твᲂегѡ̀ ѻ҆трᲂкᲂви́це , неи҆зрече́ннᲂе пᲂвѣ́дати та́инство . не ѡ҆бъи҆ме́ннаго бо ро́ждьши , и҆ на рꙋкꙋ̀ свᲂе́ю но́сиши , и҆́же рꙋко́ю сᲂдержа́щаго всѧ́ческаѧ .

и҆́нъ і҆рмо́съ , то́йже . Любвѐ бжⷭ҇твеныѧ ѻ҆гне́мъ распала́ема , гдⷭ҇ьствїѧ , и҆ вла́сти и҆ си́лы , чи́нѡве втᲂрі́и , немо́лчными ᲂу҆сты̀ бг҃ᲂнача́льнѡ пѣснᲂсло́вѧтъ , є҆ди́но сꙋщество̀ и҆ си́лꙋ . двⷤа . Вчинѧ́ютсѧ а҆рха́нг҃льстїи чи́нѡве дх҃ᲂмъ , и҆ а҆́нг҃лѡмъ и҆ нача́лѡмъ , съ без̾ чи́слеными во́инствы , є҆ди́но трисᲂста́внᲂе прᲂсвѣти́тельнᲂе сꙋщество̀ честѝ , пресщ҃е́ннѡ ᲂу҆чи́ми сꙋ́ть . боⷢ҇ . Оу҆краси́сѧ па́че всѧ́кагѡ а҆́нг҃льскагѡ бл҃гᲂлѣ́пїѧ , а҆́нг҃лѡмъ твᲂрца̀ заче́нши гдⷭ҇а , бг҃ᲂмт҃и пречⷭ҇таѧ , прїѧ́тїемъ пло́ти ѡ҆дш҃евле́ныѧ , вᲂплᲂще́ннагѡ всенепᲂро́чнаѧ .

пѣ́снь , ѕ҃ . і҆рмо́съ . Ѡ҆бы́де на́съ пᲂслѣ́днѧѧ бе́здна , нѣ́сть и҆҆збавлѧ́ѧи , в̾мѣни́хᲂмсѧ ꙗ҆́кѡ ѻ҆вча̀ на закᲂле́нїе , спасѝ лю́ди свᲂѧ̀ бж҃е на́шъ . ты́ бо крѣ́пᲂсть немᲂщны́мъ и҆҆ и҆҆справле́нїе . Сы́и вра́чь хрⷭ҇тѐ , и҆сцѣлѝ стрⷭ҇ти срⷣца мᲂегѡ̀ , и҆ ѡ҆мы́и мѧ ѿ всѧ́кїѧ скве́рны , стрꙋѧ́ми і҆с҃е мо́й млⷭ҇тей твᲂи́хъ , да пᲂю̀ и҆ велича́ю бл҃гᲂꙋтро́бїе твᲂѐ . Блꙋдѧ́ща мѧ на пꙋте́хъ пᲂги́бели , и҆ в̾ ро́въ сᲂгрѣше́нїи впа́дающа мѧ ѡ҆братѝ хрⷭ҇тѐ , и҆ к̾ незаблꙋ́днѣй стезѝ наведѝ , твᲂи́хъ честны́хъ ѡ҆правда́нїи , ꙗ҆́кѡ да сла́влю тѧ̀ . мⷱ҇ꙋ . Ка́менїе вᲂи́стинꙋ мнᲂгᲂцѣ́ннᲂе , ка́менїемъ пᲂсыпа́еми , не ѿверго́шасѧ ка́мене жи́зненагѡ , нижѐ и҆стꙋка́ннᲂмꙋ ка́менїю пᲂжро́ша , сла́внїи вѣнцено́сцы гдⷭ҇ни мч҃нцы . мⷱ҇ꙋ . Ѡ҆бно́вльше дꙋ́ши ра́лᲂмъ вѣ́ры , и҆ кла́съ мч҃нцы страда́нїѧ , дх҃ᲂмъ бжⷭ҇твенымъ стᲂри́чныи вᲂзрасти́ша , и҆ пи́щи бжⷭ҇твенѣй спᲂдо́бишасѧ . боⷢ҇ . Ѻ҆́гненыхъ слꙋ́гъ , ѻ҆́гнь рᲂди́вши , ꙗ҆ви́ласѧ є҆сѝ всенепᲂро́чнаѧ , и҆ тва́ри всѧ́кїѧ вᲂи́стинꙋ , пречⷭ҇таѧ дв҃о преи҆мꙋ́щи , в̾ жена́хъ бл҃гᲂслᲂве́наѧ бг҃ᲂра́дᲂваннаѧ .

и҆́нъ і҆рмо́съ , то́йже . Чи́ни беспло́тныхъ гдⷭ҇и , прⷭ҇то́лꙋ пред̾стᲂѧ́ще сла́вы твᲂеѧ̀ чл҃кᲂлю́бче , гла́сы непреста́нными тѧ̀ пᲂчита́ютъ . ты́ бо крѣ́пᲂсть є҆сѝ тѣ́хъ и҆ пѣ́нїе . вⷤ . Лица̀ твᲂегѡ̀ зрѧ́ще а҆́нг҃ли , дᲂбро́ты па́че сло́ва , пребжⷭ҇твенагѡ бл҃гᲂлѣ́пїѧ , твᲂи́ми пребжⷭ҇твеными зарѧ́ми прᲂсвѣща́ютсѧ . ты́ бо тѣ́хъ и҆ свѣ́тъ є҆сѝ и҆ ра́дᲂванїе . боⷢ҇ . Вᲂплᲂти́сѧ и҆́же пре́жде сы́и беспло́тнᲂе сло́во , и҆з̾ тебѐ пречⷭ҇таѧ , и҆́же всѧ́ческаѧ во́лею сᲂтвᲂре́и , и҆ и҆́же беспло́тныхъ во́инства приведы́и , ѿ небы́тїѧ ꙗ҆́кѡ всеси́ленъ .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смᲂтрѧ́емъ вѣ́рнїи , ꙗ҆́кᲂже бо ѻ҆́трᲂки спасѐ трѝ превᲂзнᲂша́емыи , ми́ръ ѡ҆бнᲂви́лъ є҆́сть , во́ чревѣ твᲂе́мъ сᲂверше́нъ , вᲂсхвалѧ́емыи ѻ҆ц҃е́мъ бг҃ъ и҆҆ препрᲂсла́вленъ . Львы̀ дре́вле данїи́лъ ᲂу҆крᲂтѝ , препᲂѧ́савсѧ дᲂбрᲂдѣ́телїю . тᲂмꙋ̀ пᲂревнꙋ́й ѽ дш҃е , к̾ бг҃ꙋ взира́й при́снѡ , и҆ рыка́ющаго всегда̀ ꙗ҆́кѡ льва̀ , и҆ ѡ҆бъѧ́ти хᲂтѧ́ща тѧ , без̾дѣ́льна сᲂтвᲂрѝ є҆гѡ̀ . Премно́жествᲂмъ блꙋда̀ , гдⷭ҇и , дш҃ꙋ мᲂю̀ ѡ҆скверни́хъ лю́тѣ . премно́гꙋю же ᲂу҆́бѡ хрⷭ҇тѐ и҆мы́и бл҃гᲂсты́ню , прїимѝ ꙗ҆́кѡ блꙋ́днаго , и҆ пᲂю́ща мѧ̀ ᲂу҆ще́дри , вᲂспѣ́тыи ѻ҆ц҃е́мъ бж҃е бл҃гᲂслᲂве́нъ є҆сѝ . мⷱ҇ꙋ . Зако́нᲂмъ хрⷭ҇то́вымъ крѣ́пкѡ ᲂу҆крѣплѧ́еми , без̾зако́нныхъ лꙋка́выѧ ко́зни мꙋ́жествено низ̾лᲂжи́ша , непᲂбѣди́мїи мч҃нцы . зако́нно же скᲂнча́вшесѧ вᲂспѣва́ютъ , препѣ́тыи ѻ҆ц҃е́мъ бг҃ъ бл҃гᲂслᲂве́нъ є҆сѝ . мⷱ҇ꙋ . Бг҃ᲂза́рнїи гдⷭ҇ни мч҃нцы , распала́еми свѣ́тᲂмъ тро́йческимъ ꙗ҆́вѣ , мꙋче́нїѧ тмꙋ̀ , и҆ пре́лести мглꙋ̀ разрꙋши́ша пᲂю́ще , вᲂспѣ́тыи ѻ҆ц҃е́мъ бг҃ъ бл҃гᲂслᲂве́нъ є҆сѝ . боⷢ҇ . Зако́ни є҆стества̀ ѡ҆ тебѣ̀ ѡ҆бнᲂвлѧ́ютсѧ . и҆́бо закᲂнᲂда́вца хрⷭ҇та̀ , крᲂмѣ̀ зако́нъ плᲂтьски́хъ рᲂдила̀ є҆сѝ , всенепᲂро́чнаѧ . всѣ́мъ и҆збавле́нїе закᲂнᲂпᲂлага́юща , пᲂю́щимъ , вᲂспѣ́тыи ѻ҆ц҃е́мъ бг҃ъ блгⷭ҇ве́нъ є҆сѝ .

и҆́нъ і҆рмо́съ , то́йже . Без̾нача́ленъ свѣ́тъ сы́и влⷣко , ѿ свѣ́та вᲂсїѧ́въ ѻ҆ц҃а , а҆́нг҃льскаѧ во́инства свѣ́ты сᲂверши́лъ є҆сѝ . зерца́ла прїе́млющаѧ , блиста́нїѧ незахᲂди́маго , вᲂспѣ́тыи , ѻ҆ц҃е́мъ бг҃ъ бл҃гᲂслᲂве́нъ є҆сѝ . Ро́дъ чл҃ческъ , ꙗ҆́кѡ всѣ́хъ гдⷭ҇ь приставле́нїемъ а҆́нг҃льскимъ ꙗ҆́вѣ спаса́еши . си́хъ бо пред̾ста́вилъ є҆сѝ всѣ́мъ вѣ́рꙋющимъ , и҆ правᲂсла́внѡ пᲂю́щимъ тѧ̀ , хвали́маго ѻ҆ц҃е́мъ бг҃а , и҆ препрᲂсла́влена . Ꙗ҆зы́къ и҆ ᲂу҆́мъ немо́жетъ влⷣко твᲂи́хъ чꙋде́съ и҆з̾рещѝ , и҆ дѣ́лᲂмъ бл҃гᲂлѣ́пїе . ты́ бо прᲂсвѣти́лъ є҆сѝ всѧ́кᲂю красᲂто́ю , нбⷭ҇ныѧ си́лы , вᲂспѣ́тыи ѻ҆ц҃е́мъ бг҃ъ , блгⷭ҇ве́нъ є҆сѝ . боⷢ҇ . И҆з̾ тебѐ чⷭ҇таѧ сн҃ъ вᲂплᲂти́сѧ , и҆́же пре́жде без̾ мт҃ре и҆з̾ ѻ҆ц҃а , и҆ без̾ ѻ҆ц҃а по на́съ , на́съ ра́ди бы́въ . є҆мꙋ́же ны́нѣ слꙋ́жатъ , беспло́тныхъ чи́нѡве , ꙗ҆́кѡ хвали́мᲂмꙋ ѻ҆ц҃е́мъ бг҃ꙋ и҆ препрᲂсла́вленꙋ .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́кᲂже в̾гᲂрни́лѣ дᲂбро́тᲂю бл҃гᲂче́стїѧ , чистѣ́е зла́та блеща́хꙋсѧ гл҃юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . И҆зба́вителю мо́й бл҃гᲂꙋтро́бне хрⷭ҇тѐ , ны́нѣ ѡ҆держа́щїѧ мѧ̀ мглы̀ грѣхо́вныѧ , и҆ всѣ́хъ и҆скꙋше́нїи и҆зба́ви вᲂпїю́ща , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки . Є҆гда̀ хо́щеши прїитѝ хрⷭ҇тѐ во сла́вѣ , сꙋди́ти ми́рꙋ , стᲂѧ́нїю и҆з̾бра́нныхъ ти причтѝ и҆ менѐ , вᲂпїю́ща и҆ гл҃юща , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки . мⷱ҇ꙋ . Къ землѝ хрⷭ҇то́вѣ ст҃і́и мч҃нцы мꙋ́дрѣ преи҆до́сте . на земли́ бо вельмѝ пᲂдви́гшесѧ , нбⷭ҇нꙋю жи́знь вᲂспрїѧ́сте пᲂю́ще , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки . мⷱ҇ꙋ . Сᲂвле́кшесѧ тѣ́ла ме́ртвенагѡ , во ѻ҆де́жꙋ без̾сме́ртнꙋю свы́ше ꙗ҆́вѣ , ꙗ҆́кѡ пᲂбѣдᲂно́сцы ѡ҆блеко́стесѧ , хрⷭ҇то́ви в̾зыва́юще мч҃нцы , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки . боⷢ҇ . Сщ҃е́нныхъ тѧ гла́сы , и҆з̾ дале́ча прᲂвᲂзвѣсти́ша пречⷭ҇таѧ , бы́ти тебѣ̀ мт҃ри , всѧ̀ сᲂтво́ршемꙋ бг҃ꙋ . є҆мꙋ́же пᲂе́мъ , бл҃гᲂслᲂви́те всѧ̀ дѣ́ла гдⷭ҇а , по́йте и҆ превᲂзнᲂси́те є҆гѡ̀ во́ вѣки .

и҆́нъ і҆рмо́съ , то́йже . Прᲂсвѣще́нымъ бли́зъ свѣ́та , а҆́нг҃льскимъ во́инствᲂмъ , зарѧ́ми трисл҃нечныѧ красᲂты̀ , вѣ́рнїи ᲂу҆пᲂдо́бльшесѧ пᲂе́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки . Ꙗ҆́кѡ и҆сто́чникъ всѧ́кагѡ дᲂбра̀ , бг҃ᲂнача́льнѡ приво́дитъ бжⷭ҇твенаѧ си́ла . свѣ́ты втᲂры́ѧ , свѣ́тъ пе́рвыи прїе́млюща , и҆ вᲂпїю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки . Оу҆́мъ пе́рвыи сᲂдѣ́теленъ , преми́рныѧ ᲂу҆мы̀ а҆́нг҃льскїѧ , пресꙋ́щно сᲂста́вивъ себѣ̀ , ꙗ҆́вѣ приближа́ющасѧ и҆ вᲂпїю́ща , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . боⷢ҇ . Па́че сло́ва и҆́же и҆з̾ ѻ҆ц҃а рᲂжде́нна пре́жде вѣ́къ , не и҆зрече́ннѡ вᲂплᲂще́нна , рᲂдила̀ є҆сѝ на́мъ дв҃о всенепᲂро́чнаѧ . є҆мꙋ́же вᲂпїе́мъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . та́же , пѣ́снь бцⷣѣ . вели́читъ дш҃а мᲂѧ̀ .= и҆ =пᲂкло́ны .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твᲂегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Ꙗ҆́кᲂже хананѣ́ѧ вᲂпїю́ ти , пᲂми́лꙋй мѧ сло́ве . дш҃ꙋ бо и҆́мамъ бѣсо́вскими нанесе́нїи бѣ́дствꙋющꙋ , и҆ безꙋ́мно без̾зако́ннаѧ дѣ́лающꙋю , и҆ нечꙋ́вствꙋющꙋю бжⷭ҇твенагѡ ти стра́ха дᲂлгᲂтерпѣли́ве . Пᲂста́ви гдⷭ҇и на ка́мени пᲂвелѣ́нїи твᲂи́хъ , дꙋшѝ мᲂеѧ̀ плеснѣ̀ , и҆ без̾стꙋ́днѡ запѧ́ти мѧ хᲂтѧ́ща , запнѝ ѕмі́ѧ , и҆ и҆зба́ви мѧ сегѡ̀ ѕлᲂдѣѧ́нїѧ , ꙗ҆́кѡ бл҃гъ и҆ мнᲂгᲂмлⷭ҇тивъ . мⷱ҇ꙋ . Преше́дше про́чеє мч҃нцы , напа́стей во́дꙋ непᲂстᲂѧ́ннꙋю , и҆ ра́нъ лю́тыхъ тᲂмле́нїѧ . к̾ приста́нищꙋ ꙗ҆́вѣ дᲂидо́ша вы́шнѧгѡ црⷭ҇твїѧ , бжⷭ҇твеныѧ тишины̀ наслажда́ющесѧ . мⷱ҇ꙋ . Свѣ́та невече́рнѧго , мч҃нцы свѣтᲂви́дни бы́ти спᲂдо́бистесѧ , и҆ в̾ цр҃кви первᲂро́дныхъ , со а҆́нг҃льскими ли́ки вᲂдвᲂрѧ́етесѧ , с̾ ни́ми же живᲂда́вца ѡ҆ на́съ мᲂли́те . боⷢ҇ . Но́сиши и҆́же всѧ̀ нᲂсѧ́щаго , и҆ дᲂи́ши всѣ́мъ пи́щꙋ даю́щаго , ве́лїе и҆ стра́шно и҆́же па́че ᲂу҆ма̀ твᲂѐ та́инство , кᲂвче́же честна́гѡ сщ҃е́нства дв҃о бцⷣе . тѣ́мже тѧ̀ вѣ́рᲂю ᲂу҆блажа́емъ .

и҆́нъ і҆рмо́съ , то́йже . Прича́стники не и҆зрече́ннѣй сла́вѣ , беспло́тныѧ ᲂу҆мы̀ сп҃се сᲂтвᲂри́лъ є҆сѝ . и҆ ны́нѣ тѣ́хъ ра́ди лю́ди свᲂѧ̀ сᲂхранѝ , и҆́же к̾ тебѣ̀ вѣ́рᲂю и҆ любо́вїю прибѣга́ющихъ , да тѧ̀ влⷣко непреста́ннѡ велича́емъ . Пᲂсыла́еши твᲂегѡ̀ смире́нїѧ а҆́нг҃ла вседержи́телю , сᲂблюда́юща ста́до твᲂѐ , смире́нїѧ бо и҆ любвѐ ты̀ вина̀ є҆сѝ , и҆ бл҃гᲂмꙋ́дренꙋю вѣ́рꙋ сᲂхранѧ́юща , и҆ всѧ̀ є҆́реси твᲂе́ю си́лᲂю разᲂрѧ́юща . Ве́сь сла́дᲂсть вᲂспѣва́емыи , нбⷭ҇нꙋю сла́дᲂстнꙋю свѣ́тлᲂсть , насадѝ в̾ цр҃квахъ твᲂи́хъ влⷣко , и҆ бл҃гᲂчи́ннᲂе ᲂу҆стрᲂе́нїе пᲂда́ждь , да тѧ̀ спаси́телѧ непреста́ннѡ велича́емъ . боⷢ҇ . Чи́ни а҆́нг҃льстїи пречⷭ҇таѧ , нн҃ѣ немо́лчнѡ твᲂѐ ржⷭ҇тво̀ сла́вѧтъ . в̾ чинꙋ́ бо стᲂѧ́тъ в̾зира́юще , весе́лїѧ є҆гѡ̀ насыща́ющесѧ , и҆ тѧ̀ бцⷣе непреста́ннѡ велича́юще .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , пᲂкаѧ́нны . гла́съ , а҃ . И҆́нъ вѣ́къ тебѐ дꙋшѐ ѡ҆жида́етъ , и҆ сꙋдїѧ̀ хо́щетъ твᲂѧ̀ ѡ҆бличи́ти та́йнаѧ и҆ лю́таѧ , непребꙋ́ди ᲂу҆́бѡ в̾ ни́хъ , но пред̾варѝ вᲂпїю́щи сꙋдїѝ , бж҃е ѡ҆чи́сти мѧ и҆ спаси́ мѧ .

сти́хъ : и҆спо́лнихᲂмсѧ за ᲂу҆́тра . Неи҆скꙋсѝ менѐ сп҃се мо́й , лѣ́нᲂстїю грѣхо́внᲂю ѡ҆держи́ма . но вᲂз̾дви́гни ми пᲂмышле́нїе к̾ пᲂкаѧ́нїю , и҆ твᲂегѡ̀ винᲂгра́да дѣ́лателѧ и҆скꙋ́сна ꙗ҆ви́ мѧ . да́рꙋй ми є҆ди́наго на́ десѧте часа̀ мздꙋ̀ , и҆ ве́лїю ми́лᲂсть .

сти́хъ : и҆ бꙋ́ди свѣ́тлᲂсть . мⷱ҇ꙋ . Стрⷭ҇тᲂте́рпцы хрⷭ҇то́вы , прїиди́те лю́дїє всѝ пᲂчте́мъ , пѣ́ньми и҆ пѣ́сньми дх҃о́вными . прᲂсвѣ́щники ми́рꙋ , и҆ прᲂпᲂвѣ́дники вѣ́ры , и҆сто́чники при́снѡ текꙋ́щїѧ , и҆з̾ ни́хже и҆стᲂча́ютсѧ вѣ́рнымъ и҆сцѣле́нїѧ . тѣ́хъ мл҃твами хрⷭ҇тѐ бж҃е на́шъ , ми́ръ да́рꙋй всемꙋ̀ ми́рꙋ , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ , боⷢ҇ . Грѣ́шныхъ мл҃твы прїе́млющи , и҆ скᲂрбѧ́щихъ вᲂздыха́нїѧ непрезира́ющи . мᲂлѝ и҆́же ѿ чи́стᲂю бо́кꙋ твᲂе́ю сн҃а свᲂегѡ̀ , спасти́сѧ на́мъ прест҃а́ѧ дв҃о .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ . во́гласъ трᲂпарѧ̀ . пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .

Въ пᲂнедѣ́льникъ , бл҃же́нны . гла́съ , а҃ .

Снѣ́ди ра́ди и҆зведѐ и҆з̾раѧ̀ вра́гъ а҆да́ма , крⷭ҇та́ же ра́ди разбо́йника в̾ведѐ хрⷭ҇то́съ во́нь , пᲂмѧни́ мѧ вᲂпїю́ща , є҆гда̀ прїи́деши во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Оу҆миле́нїѧ и҆сто́чникъ мѝ да́рꙋй , млрⷭ҇дїѧ твᲂегѡ̀ хрⷭ҇тѐ бж҃е , всѧ́кихъ мѧ скве́рнъ ѕлы́хъ и҆ без̾мѣ́рныхъ ѡ҆чи́сти , и҆ црⷭ҇твїѧ твᲂегѡ̀ бл҃гᲂдѣ́телю прича́стника мѧ̀ сᲂтвᲂрѝ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . А҆́нг҃лъ твᲂи́хъ чи́ны в̾ мᲂле́нїе хрⷭ҇тѐ приво́димъ ти , спасѝ и҆ ᲂу҆ще́дри на́съ тѣ́хъ ра́ди , ꙗ҆́кѡ пребл҃гъ , всѧ̀ презира́ѧ на́ша сᲂгрѣше́нїѧ , ꙗ҆́же в̾вѣ́дѣнїи , и҆ не в̾вѣ́дѣнїи .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Крᲂве́й ва́шихъ ст҃і́и тече́нїемъ , мы́сленагѡ фараѡ́на пᲂтᲂпи́сте ꙗ҆́вѣ , нн҃ѣ же и҆стᲂча́ете чꙋде́съ стрꙋѝ . пꙋчи́нꙋ и҆з̾сꙋша́юще бᲂлѣ́зней . тѣ́мже бл҃жи́ми є҆стѐ .

сла́ва . Пѣ́снь трист҃ꙋ́ю вѣ́рнїи гла́сᲂмъ со а҆́нг҃лы вᲂзᲂпїе́мъ , ст҃ъ є҆сѝ ѻ҆́ч҃е с̾ сн҃ᲂмъ же и҆ дх҃ᲂмъ , спасѝ на́съ вᲂпїю́щихъ тѝ , є҆динᲂсꙋ́щнаѧ трⷪ҇це , є҆ди́нице бж҃е .

и҆ ны́нѣ . Ро́ждьшаѧ свѣ́тъ незахᲂди́мыи , всенепᲂро́чнаѧ , ѡ҆мраче́нꙋю мѝ при́снѡ бѣсо́вскими прило́ги , дш҃ꙋ прᲂсвѣтѝ , и҆ ѻ҆гнѧ̀ бꙋ́дꙋщагѡ прест҃а́ѧ и҆схи́ти .