Въ нлⷣю , ве́черъ . на гдⷭ҇и вᲂзва́хъ , стихѣ́ры пᲂкаѧ́нны . гла́съ , г҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . В=ельмѝ сᲂгрѣша́юща мѧ , и҆ тебѐ ѡ҆гᲂрчева́юща бл҃га́го влⷣкꙋ , и҆ ми́лᲂстива є҆стество́мъ , ѡ҆браща́ющасѧ ꙗ҆́кѡ блꙋ́днаго прїими́ мѧ , и҆ є҆ди́наго ѿ нае́мникъ твᲂи́хъ сᲂтвᲂри́ мѧ нбⷭ҇ныи ѻ҆́ч҃е .

ᲂу҆пᲂва̀ дꙋша̀ мᲂѧ̀ на́ гдⷭ҇а . Лѣ́нᲂстїю житїѧ̀ мѣ́рꙋ преи҆до́хъ , и҆ к̾ кᲂнцꙋ̀ ᲂу҆́же ѡ҆каѧ́нныи прибли́жихсѧ , непᲂмышлѧ́ю ждꙋ́щаго мѧ сꙋда̀ , и҆ ѿ́ бг҃а ѿпаде́нїе . но ѡ҆брати́въ мѧ сп҃се , си́хъ всѣ́хъ и҆схи́ти .

да ᲂу҆пᲂва́етъ і҆и҃ль на́ гдⷭ҇а . Гее́нны и҆ зꙋ́бнагѡ скре́жета , и҆зба́ви гдⷭ҇и , смире́нꙋю мᲂю̀ дш҃ꙋ , и҆ всѧ́кᲂгѡ и҆но́гѡ тᲂмле́нїѧ вѣ́чнагѡ пребл҃гі́и . ꙗ҆́кѡ да вѣ́рᲂю тѧ пᲂю̀ , ми́лᲂстиваго бг҃а , и҆ чл҃кᲂлю́бца є҆стество́мъ .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стихѣ́ры , ст҃ы́мъ беспло́тнымъ а҆́нг҃лѡмъ . гла́съ , г҃ . =запѣ́въ : ѿ всѣ́хъ без̾зако́нїи є҆гѡ̀ . Л=и́ки беспло́тныхъ гдⷭ҇и сᲂста́вилъ є҆сѝ , бᲂга́тство ꙗ҆влѧ́ѧ всѣ́мъ свᲂеѧ̀ бл҃гᲂсти . и҆ приведѐ ѿ небы́тїѧ во є҆́же бы́ти , и҆́же па́че ᲂу҆ма̀ сла́вꙋ твᲂю̀ нн҃ѣ сла́вѧщихъ , гла́сы немо́лчными .

пᲂхвали́те є҆гѡ̀ всѝ лю́дїє . Ве́лїѧ а҆́нг҃лъ твᲂи́хъ хрⷭ҇тѐ си́ла , без̾тѣле́сни бо сꙋ́ще , ми́ръ прᲂти́чꙋтъ , сᲂхранѧю́ще цр҃кви си́лᲂю , и҆́же ѿ тебѐ влⷣко . и҆ тебѣ̀ мо́лѧтсѧ ѡ҆ вселе́ннѣй .

и҆ и҆́стина гдⷭ҇нѧ пребыва́етъ во́ вѣки . Дᲂбро́тꙋ трисл҃нечнꙋю є҆ди́нственꙋю твᲂю̀ , зрѧ́ще си́лы тебѣ̀ слꙋжа́щїѧ , ꙗ҆влѧ́ютъ втᲂры́ѧ свѣ́тлᲂсти сꙋ́щимъ в̾ ми́рѣ . и҆ ѻ҆́бщно сїѧ́юще , пᲂдаю́тъ на́мъ бжⷭ҇твеныѧ свѣ́тлᲂсти .

сла́ва , и҆ нн҃ѣ , боⷢ҇ . Всѣ́ми владѧ́щїѧ тварьмѝ пречⷭ҇таѧ , лю́тѣ ѡ҆блада́ема страстьмѝ ᲂу҆ма̀ мᲂегѡ̀ , свᲂбᲂдѝ те́плымъ си пред̾ста́тельствᲂмъ , и҆ мт҃рьнею мл҃твᲂю , и҆ пᲂрабо́ти мѧ сн҃ꙋ и҆ бг҃ꙋ твᲂемꙋ̀ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , пᲂкаѧ́нны . гла́съ , г҃ . Вече́рнюю пѣ́снь , прино́симъ ти хрⷭ҇тѐ с̾ кади́лᲂмъ , и҆ пѣ́ньми дꙋхо́вными , пᲂми́лꙋй и҆ спасѝ дш҃а на́ша .

сти́хъ : к̾ тебѣ̀ вᲂзведо́хъ . Спаси́ мѧ гдⷭ҇и бж҃е мо́й , ты́ бо всѣ́мъ є҆сѝ спасе́нїе , бꙋ́рѧ мѧ страсте́й смꙋща́етъ , и҆ бре́мѧ без̾зако́нїи мᲂи́хъ пᲂгрꙋжа́етъ мѧ . да́ждь ми рꙋ́кꙋ по́мᲂщи , и҆ к̾ свѣ́тꙋ вᲂз̾веди́ мѧ ᲂу҆миле́нїѧ , ꙗ҆́кѡ є҆ди́нъ милᲂсе́рдъ и҆ чл҃кᲂлю́бецъ .

сти́хъ : пᲂми́лꙋй на́съ гдⷭ҇и . мⷱ҇ꙋ . Ве́лїѧ крⷭ҇та̀ твᲂегѡ̀ гдⷭ҇и си́ла , вᲂдрꙋзи́бᲂсѧ на мѣ́стѣ , и҆ дѣ́йствꙋетъ в̾ ми́рѣ . и҆ пᲂказа̀ ѿ рыбаре́й а҆пⷭ҇лы , и҆ ѿ ꙗ҆зы́къ мч҃нки , да мо́лѧтсѧ ѡ҆ дш҃а́хъ на́шихъ .

сла́ва , и҆ ны́нѣ , боⷢ҇ . Влⷣчце пред̾ста́тельнице всѣ́мъ мᲂлѧ́щимтисѧ , тᲂбо́ю дерза́емъ , и҆ тᲂбо́ю хва́лимсѧ , и҆ к̾ тебѣ̀ всѐ ᲂу҆пᲂва́нїе на́ше є҆́сть , мᲂлѝ ро́ждьшагᲂсѧ и҆з̾ тебѐ за непᲂтре́бныѧ рабы̀ твᲂѧ̀ .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ нлⷣю , на па́вечерницѣ . кано́нъ , прест҃ѣ́й бцⷣѣ . гла́съ , г҃ . пѣ́снь , а҃ . і҆рмо́съ . И҆́же во́ды дре́вле ма́нїемъ бжⷭ҇твенымъ , во є҆ди́но со́нмище сᲂвᲂкꙋпѝ , и҆ раздѣли́выи мо́ре і҆и҃льтескимъ лю́демъ . сѐ бг҃ъ на́шъ препрᲂсла́вленъ сы́и , тᲂго̀ є҆ди́нагѡ вᲂспᲂе́мъ , ꙗ҆́кѡ прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Великᲂимени́таѧ є҆ди́на , прест҃а́ѧ дв҃о мр҃і́е , херꙋви́мъ сла́внѣйшаѧ , дв҃дᲂва дщѝ , и҆ дᲂбро́та і҆а́кѡвлѧ мт҃и бг҃а на́шегѡ , вᲂз̾вели́чисѧ ѕѣлѡ̀ сла́ва твᲂѧ̀ , и҆ вси́ тѧ вѣ́рᲂю сла́вимъ . Прᲂпе́ньшаго , сло́вᲂмъ не́бо , ꙗ҆́кѡ ко́жꙋ , нажребѧ́ти напи́саннаго , свᲂи́ма рꙋка́ма ꙗ҆́кѡ челᲂвѣ́ка нᲂси́ла є҆сѝ . сегѡ̀ ᲂу҆́бѡ мᲂлѝ , неи҆змѣ́ннѡ чи́стаѧ , страсте́й без̾слᲂве́сїѧ дш҃ꙋ мᲂю̀ и҆зба́вити ѿ всѧ́кїѧ ско́рби . сла́ва . Ꙗ҆́же пре́же всѣ́хъ вѣ́къ прᲂнарече́наѧ дв҃о цр҃ѧ сла́вы , пᲂрфи́ра пречⷭ҇таѧ , в̾ ню́же ѡ҆бо́лксѧ в̾ пᲂслѣ́днѧѧ времена̀ , пᲂкры̀ ко́жныѧ ри́зы а҆да́ма пра́ѻ҆ц҃а , и҆ менѐ нн҃ѣ пᲂкры́й . и҆ ны́нѣ . Тлю̀ твᲂрѧ́щїи дре́вле грѣ́хъ , ро́дꙋ чл҃ческᲂмꙋ , дв҃о хрⷭ҇та̀ ро́ждьшаѧ непᲂстᲂѧ́ннаго ѻ҆гнѧ̀ , сїю̀ и҆з̾сꙋши́ла є҆сѝ . тѣ́мже страсте́й пᲂто́ки дш҃и мᲂеѧ̀ и҆з̾сꙋшѝ твᲂи́ми мл҃твами .

пѣ́снь , г҃ . і҆рмо́съ . И҆́же ѿ несꙋ́щихъ всѧ̀ приведы́и , сло́вᲂмъ сᲂзида́ема , сᲂверша́ема же дх҃ᲂмъ , вседержи́телю вы́шнїи , в̾ любвѝ свᲂе́й ᲂу҆твердѝ менѐ . И҆́же ѻ҆́гненымъ влⷣчествᲂмъ , влⷣка и҆ гдⷭ҇ь , тво́й сн҃ъ нарече́сѧ чⷭ҇таѧ . тѣ́мже и҆зба́ви мѧ влⷣчце , стрⷭ҇тны́хъ рабо́тъ , твᲂи́ми мл҃твами . Ѿ бꙋ́ри плᲂтьски́хъ мѧ страсте́й , пречⷭ҇таѧ и҆зба́ви раба̀ твᲂегѡ̀ ско́рѡ , ти́шинꙋ ро́ждьшаѧ спасе́нїю , и҆ и҆сто́чникъ без̾стрⷭ҇тїѧ . сла́ва . Свѣ́та незахᲂди́маго , свѣти́льникъ свѣтᲂза́ренъ бы́сть пречⷭ҇таѧ , и҆ ми́ръ прᲂсвѣти́ла є҆сѝ . тѣ́мже зарѧ́ми твᲂи́ми дш҃и мᲂеѧ̀ разᲂрѝ ѻ҆́блакъ . и҆ нн҃ѣ . Ме́ртва мѧ сꙋ́ща дш҃е́ю , ѿ мно́жества ѕлы́хъ страсте́й ѡ҆живᲂтвᲂрѝ влⷣчце , ро́ждьшаѧ живᲂда́вца хрⷭ҇та̀ несказа́ннѡ .

пѣ́снь , д҃ . і҆рмо́съ . Пᲂлᲂжѝ к̾ на́мъ тве́рдꙋю любо́вь сѝ гдⷭ҇и , є҆динᲂро́днаго бо тѝ сн҃а на́съ ра́ди на сме́рть в̾да́лъ є҆сѝ . тѣ́мже тѝ вᲂпїе́мъ вᲂсхвалѧ́юще , сла́ва си́лѣ твᲂе́й . Прїи́де на мѧ̀ плᲂтьска́гѡ мꙋдрᲂва́нїѧ бра́нь , и҆ плѣнѧ́етъ мѝ дш҃ꙋ . но и҆́же всѧ́къ ᲂу҆́мъ преи҆мꙋ́щїи ми́ра ро́ждьшаѧ , тво́й ми́ръ влⷣчце пᲂда́ждь ми . Ми́рѡ ᲂу҆́мнᲂе и҆́з̾ чрева и҆стᲂчи́ла є҆сѝ ми́рᲂви . тѣ́мже ѿ скве́рнъ страсте́й дш҃ꙋ мᲂю̀ свᲂбᲂдѝ . и҆ да́ждь ми пречⷭ҇таѧ без̾стрⷭ҇тїѧ ми́рѡ , твᲂи́ми мл҃твами . сла́ва . Ста́мнꙋ тѧ̀ ѕлатꙋ́ю , жи́зни ма́ннꙋ нᲂси́вшꙋю бг҃ᲂмꙋ́жнагѡ хрⷭ҇та̀ ꙗ҆́вѣ , вѣ́дыи мᲂлю̀ , накᲂрмѝ дш҃ꙋ мᲂю̀ та́ющꙋю гла́дᲂмъ , и҆ пᲂто́кᲂмъ напо́й дꙋ́ха . и҆ ны́нѣ . Є҆́вва ᲂу҆́бѡ пре́жде не ᲂу҆держа́ннѡ в̾ведѐ сме́рть , ты́ же дв҃ствᲂмъ чи́стымъ , и҆́стиннꙋю жи́знь в̾ведѐ . тѣ́мже сме́рти мѧ грѣхо́вныѧ и҆зба́ви , твᲂи́ми мл҃твами .

пѣ́снь , є҃ . і҆рмо́с̾ . На землѝ неви́димыи ꙗ҆ви́сѧ , и҆ со земны́ми во́лею пᲂживѐ непᲂсти́жимыи . и҆ к̾ тебѣ̀ ᲂу҆́треннююще , вᲂспѣва́емъ тѧ чл҃кᲂлю́бче . И҆збавле́нїе на́мъ бы́въ сн҃ъ тво́й дв҃о , всѧ̀ ѿ тлѝ и҆зба́ви . тѣ́мже и҆зба́ви мѧ плᲂтьска́гѡ мꙋдрᲂва́нїѧ , и҆ стрⷭ҇те́й настᲂѧ́нїѧ . Ѻ҆гне́мъ твᲂи́хъ мл҃твъ бцⷣе , страстны́хъ пᲂмышле́нїи те́рнїе всѐ пᲂпалѝ , ꙗ҆́же клѣща̀ ᲂу҆́глѧ , чл҃ка ѡ҆чи́стившаѧ . сла́ва . Ты̀ бж҃їѧ бы́сть ю҆́ница , на́съ ра́ди пᲂжре́нагѡ чл҃кᲂлю́бно , бжⷭ҇твенагѡ ю҆нца̀ , є҆го́же бжⷭ҇твенᲂю кро́вїю , срⷣце мᲂѐ ѡ҆чи́сти . и҆ нн҃ѣ . Кра́снꙋю пре́жде стѧжа́хъ дᲂбрᲂдѣ́телей ѻ҆де́ждꙋ , є҆ѧ́же сᲂвлеко́хсѧ лѣ́нᲂстїю мᲂе́ю . ты́ же дв҃о ны́нѣ мѧ ѡ҆блецы̀ въ свѣ́тлѣйшꙋ , твᲂи́ми мл҃твами .

пѣ́снь , ѕ҃ . і҆рмо́с̾ . Бе́здна пᲂслѣ́днѧѧ грѣхо́въ ѡ҆бы́де мѧ , и҆ и҆счеза́етъ дх҃ъ мо́й . но прᲂсте́ръ влⷣко высо́кꙋю свᲂю̀ мы́шцꙋ , ꙗ҆́кѡ петра́ мѧ ᲂу҆пра́вителю спасѝ . Пᲂкᲂлеба́ша хра́мъ дш҃и мᲂеѧ̀ , ѕло́бы лю́таѧ кᲂва́рства . но ꙗ҆́кѡ ᲂу҆тверди́вшаго зе́млю на вᲂда́хъ хрⷭ҇та̀ пᲂро́ждьшаѧ , твᲂи́ми мл҃твами ᲂу҆твердѝ . Раз̾рѣши́ла є҆сѝ до́лгъ земнᲂро́дныхъ , би́сера мнᲂгᲂцѣ́ннаго ро́ждьши . тѣ́мже раз̾рѣшѝ пречⷭ҇таѧ вско́рѣ , плѣни́цы прегрѣше́нїи мᲂи́хъ и҆ страсте́й и҆ скᲂрбе́й . сла́ва . Дадѐ вѣ́рнымъ тѧ прибѣ́жище , и҆ бжⷭ҇твеныи пᲂкро́въ , рᲂжде́исѧ и҆з̾ лᲂже́снъ твᲂи́хъ бг҃ъ пребл҃гі́и . тѣ́мже пречⷭ҇таѧ и҆ менѐ пᲂкры́й твᲂи́ма дла́ньма и҆ сᲂблюдѝ . и҆ нн҃ѣ . Вᲂлна́ми житїѧ̀ ᲂу҆мᲂвре́дно , а҆́зъ ѡ҆каѧ́нныи ча́сто пᲂгрꙋжа́емь , и҆ рабо́тами вра́жїѧ ми всегда̀ ѡ҆бꙋрева́емь , ны́нѣ зᲂвꙋ́ ти бцⷣе пᲂмᲂзи́ ми .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , г҃ . Бжⷭ҇твенаѧ бы́сть сѣ́нь сло́ва , є҆ди́на пречⷭ҇таѧ дв҃о мт҃и . чистᲂто́ю а҆́нг҃лы преше́дшаѧ , па́че всѣ́хъ бы́вша мѧ̀ ѡ҆скверне́на плᲂтьски́ми прегрѣше́нїи , ѡ҆чи́стивши мл҃твами сѝ бж҃їими вᲂда́ми , пᲂда́ющи чⷭ҇таѧ ве́лїю млⷭ҇ть .

пѣ́снь , з҃ . і҆рмоⷭ҇ . Ꙗ҆́кᲂже дре́вле , бл҃гᲂчести́выѧ трѝ ѻ҆́трᲂки прᲂхла́ди , во пла́мени халдѣ́йстѣмъ , свѣ́тлымъ бжⷭ҇тва̀ ѻ҆гне́мъ . и҆ на́съ ѡ҆зарѝ блгⷭ҇ве́нъ є҆сѝ взыва́юща , бж҃е ѻ҆ц҃ъ на́шихъ . Сᲂбо́ри лꙋка́выхъ бѣсо́въ ѡ҆быдо́ша мѧ , и҆ плᲂтьсті́и со́нми страсте́й . но ꙗ҆́кѡ крѣ́пкагѡ во бранѣ́хъ хрⷭ҇та̀ ро́ждьшаѧ , и҆зба́ви мѧ часты́хъ печа́лей , и҆ лю́тыхъ напа́данїи . Є҆ди́ныи херꙋви́мскимъ сꙋщество́мъ непристꙋ́пныи , и҆ стра́шенъ а҆́нг҃льскимъ чино́мъ , всели́сѧ в̾ тѧ̀ чи́стаѧ и҆ на́съ ѡ҆бнᲂвѝ . тѣ́мже пᲂкажи́ мѧ влⷣчце стра́шна неви́димымъ врагѡ́мъ . сла́ва . Ра́й слᲂве́сенъ дв҃о ты̀ бы́сть , прᲂзѧ́бшїи дре́во жи́зни . є҆го́же прича́щьсѧ а҆да́мъ , сме́ртнаго плᲂда̀ и҆зба́висѧ . тѣ́мже и҆ менѐ ны́нѣ ᲂу҆сладѝ , и҆ страсте́й и҆зба́ви вкꙋше́нїѧ . и҆ ны́нѣ . Ка́ла мѧ страсте́й тѣле́снагѡ и҆зба́ви , и҆ и҆скꙋше́нїи бѣсо́вскихъ , ꙗ҆́же и҆зба́вителѧ ро́ждьшаѧ чл҃кѡмъ вы́шнѧгѡ селе́нїѧ , и҆ хра́мъ ѡ҆сщ҃е́нъ , бг҃а ѻ҆ц҃ъ на́шихъ .

пѣ́снь , и҃ . і҆рмо́съ . Въ непᲂстᲂѧ́ннѣмъ ѻ҆гнѝ сᲂвᲂкꙋ́пльшесѧ , и҆́же бл҃гᲂче́стїѧ пред̾стᲂѧ́ще ю҆́нᲂши , пла́менѣмъ же неврежде́ни , бжⷭ҇твеннꙋю пѣ́снь пᲂѧ́хꙋ , блгⷭ҇ви́те всѧ́каѧ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Ѻ҆́блакъ свѣ́та свѣти́ла сᲂтво́ршемꙋ в̾ ми́рѣ ве́лїѧ дневна́ѧ , нᲂщно́е же всѧ́ко пᲂмраче́нїе разᲂрѝ , твᲂи́ми зарѧ́ми , всѣ́хъ стрⷭ҇те́й и҆ прегрѣше́нїи мᲂи́хъ , и҆ пᲂкажи́ мѧ сн҃а свѣ́тꙋ бг҃ᲂрᲂди́тельнице . Съ нб҃сѐ сᲂше́дшимъ дᲂжде́мъ во́ чрево твᲂѐ бцⷣе , дш҃ꙋ мᲂю̀ и҆ срⷣце мᲂѐ прᲂсвѣтѝ и҆ ѡ҆рᲂсѝ , и҆ пла́мень ᲂу҆гасѝ страсте́й и҆ скᲂрбе́й , да тѧ̀ сла́влю те́плѣ во всѧ̀ вѣ́ки . сла́ва . Неи҆з̾гл҃аннѡ чⷭ҇таѧ премꙋ́дрᲂсть бж҃їю , и҆́же всѧ̀ ѿ несꙋ́щихъ нбⷭ҇нᲂе и҆ земно́е є҆стество̀ сᲂвᲂкꙋ́пльшꙋю , ты̀ рᲂдила̀ є҆сѝ . є҆ѧ́же сло́вᲂмъ , да́ждь ми мꙋ́дрᲂсть и҆ ра́зꙋмъ , ꙗ҆́кѡ да вᲂспᲂю́ ти ꙗ҆́вѣ бжⷭ҇твенᲂе ржⷭ҇тво̀ . и҆ ны́нѣ . Ѻ҆рᲂси́тисѧ влⷣчце ми́рꙋ , твᲂи́ми мл҃твами дш҃и мᲂе́й и҆ тѣ́лꙋ , вᲂпїю̀ и҆ мᲂлю́сѧ , и҆ бᲂлѣ́зней грѣхо́вныхъ и҆ страсте́й ѕло́бы , и҆зба́витисѧ вско́рѣ . ты́ бо є҆сѝ всѣ́мъ чл҃кѡмъ и҆сцѣле́нїе .

пѣ́снь , ѳ҃ . і҆рмо́съ . На сѷна́йстѣй гᲂрѣ̀ ви́дѣвъ тѧ в̾ кꙋпинѣ̀ мѡѷсе́й , не ѡ҆па́льнѡ ѻ҆́гнь бжⷭ҇твенныи заче́ншꙋю во́ чревѣ . данїи́лъ же тѧ ви́дѣ го́рꙋ непресѣ́ченꙋ . же́ѕлъ прᲂзѧ́бшїи и҆са́їѧ взыва́ше , ѿ ко́рене дв҃дᲂва . Пᲂста́въ хрⷭ҇тꙋ̀ бг҃ᲂтка́нъ ꙗ҆ви́сѧ , ѿ него́ же ѻ҆де́ждꙋ пло́ть бг҃ᲂнача́льнѣйшꙋ , дх҃ъ и҆з̾ ѡ҆блечѐ . ѡ҆блецы̀ ᲂу҆́бѡ менѐ во ѻ҆де́ждꙋ цѣлᲂмꙋ́дрїѧ , чи́стаѧ твᲂи́ми мл҃твами . Мы́сленыи винᲂгра́де , и҆зрасти́вшїи на́мъ гро́здъ бжⷭ҇твеныи , ѿ него́ же напᲂѧ́емсѧ вᲂдо́ю нетлѣ́нїѧ , и҆стᲂчи́ ми дш҃и ᲂу҆миле́нїе , и҆ вино̀ ѡ҆чище́нїѧ , твᲂи́ми мᲂльба́ми . сла́ва . Чи́стыи и҆ ст҃ы́и черто́же , и҆́мже є҆стество́мъ бг҃ъ , чл҃кѡмъ ᲂу҆невѣ́сти є҆стество̀ , мᲂлю́ тѧ сᲂвᲂкꙋпи́ мѧ твᲂемꙋ̀ сн҃ꙋ , и҆ присво́й бжⷭ҇твенᲂю жи́знїю , твᲂи́ми мᲂльба́ми . и҆ нн҃ѣ . Па́жить тлѣ́нїѧ чл҃ческагѡ сꙋщества̀ , нетлѣ́нїѧ и҆сто́чникъ хрⷭ҇та̀ ро́ждьши , дв҃о претвᲂри́ла є҆сѝ ᲂу҆мертви́ ми ᲂу҆́бѡ страсте́мъ ѡ҆палѧ́ющеє , и҆ бꙋ́рнᲂе стремле́нїе , твᲂи́ми мᲂльба́ми . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ пᲂнедѣ́льникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , г҃ . Живꙋ́щи на землѝ дш҃е мᲂѧ̀ пᲂка́йсѧ , пе́рсть бо во́ грᲂбѣ непᲂе́тъ , ни ѿ прегрѣше́нїи и҆збавлѧ́етъ . вᲂзᲂпі́й хрⷭ҇тꙋ̀ бг҃ꙋ , срⷣцевѣ́дче сᲂгрѣши́хъ ти , пре́же да́же не ѡ҆сꙋ́диши мѧ̀ , пᲂщади́ мѧ бж҃е и҆ пᲂми́лꙋй мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Дᲂко́лѣ дш҃е мᲂѧ̀ пребыва́еши в̾ сᲂгрѣше́нїихъ ; дᲂко́лѣ прїе́млеши пᲂкаѧ́нїю презрѣ́нїе ; прїимѝ во ᲂу҆мѣ̀ сꙋ́дъ грѧдꙋ́щїи , и҆ вᲂзᲂпі́й гдⷭ҇ви , сᲂгрѣши́хъ без̾грѣ́шне , пᲂми́лꙋй мѧ . сла́ва , и҆ ны́нѣ , боⷢ҇ . Красᲂтѣ̀ дв҃ства твᲂегѡ̀ . и҆ пресвѣ́тлѣй чистᲂтѣ̀ твᲂе́й , гаврїи́лъ дивѧ́сѧ вᲂпїѧ́ше ти бцⷣе , кꙋ́ю ти принесꙋ̀ пᲂхвалꙋ̀ дᲂсто́йнꙋ ; что́ же нарекꙋ́ тѧ ; недᲂвѣ́мъ и҆ чꙋждꙋ́сѧ . тѣ́мже ꙗ҆́кѡ пᲂвелѣ́нно ми є҆́сть вᲂпїю́ ти , ра́дꙋисѧ ѡ҆бра́дᲂваннаѧ .

по в҃ , стихᲂло́гїи . сѣда́льны , гла́съ , г҃ . На стра́шнѣмъ сꙋди́щи , без̾сᲂпе́рникъ ѡ҆блича́юсѧ , и҆ без̾ свидѣ́тель ѡ҆сꙋжда́юсѧ . кни́ги бо со́вѣстныѧ раз̾гиба́ютсѧ , и҆ дѣ́ла та́йнаѧ ѿкрыва́ютсѧ . тѣ́мже пре́же да́же ᲂу҆́бѡ во ѻ҆́нᲂмъ всенаро́днᲂмъ пᲂзо́рищи , хо́щеши и҆спыта́ти ꙗ҆́же мно́ю сᲂдѣ́ѧннаѧ , бж҃е ѡ҆чи́сти мѧ и҆ спаси́ мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Глꙋбинꙋ̀ сᲂгрѣше́нїи мᲂи́хъ , ты̀ свѣ́си гдⷭ҇и , да́ждь ми рꙋ́кꙋ по́мᲂщи ꙗ҆́кᲂже петрꙋ̀ и҆ спаси́ мѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Бл҃гᲂдꙋ́шнᲂе терпѣ́нїѧ ва́шегѡ , пᲂбѣдѝ кᲂва́рства ѕлᲂнача́льнагѡ врага̀ , стрⷭ҇тᲂте́рпцы прехва́льнїи . сегѡ̀ ра́ди вѣ́чнᲂмꙋ спᲂдо́бистесѧ бл҃же́нствꙋ . но мᲂли́тесѧ гдⷭ҇ви , хрⷭ҇тᲂлюби́выхъ люде́й ста́до спастѝ , свидѣ́телїе сꙋ́ще и҆́стинѣ . сла́ва , и҆ нн҃ѣ , боⷢ҇ . Ра́дꙋисѧ дв҃о мт҃и гᲂро̀ ст҃а́ѧ , є҆де́мскїи раю̀ , и҆з̾ неѧ́же рᲂди́сѧ хрⷭ҇то́съ бг҃ъ без̾сѣ́меннᲂе сло́во , и҆́мже жи́знь ми́рᲂви прᲂзѧбѐ .

по г҃ , стихᲂло́гїи . сѣда́ленъ , гла́съ , г҃ . Є҆гда̀ сꙋди́щꙋ твᲂемꙋ̀ не ᲂу҆мы́тнᲂмꙋ , и҆ бжⷭ҇твенᲂмꙋ сꙋдꙋ̀ пред̾ста́немъ , и҆ си́лы нбⷭ҇ныѧ с̾ тре́петᲂмъ тебѣ̀ пред̾ста́нꙋтъ , ка́кѡ тᲂгда̀ тебѣ̀ ꙗ҆влю́сѧ , ѽ сꙋдїѐ пра́веднѣйшїи , дѣла̀ ѡ҆сꙋжде́нїю и҆ ѻ҆гню̀ и҆мѣ́ю дᲂсто́йна , а҆́нг҃лъ твᲂи́хъ мᲂли́твами пᲂщади́ мѧ тᲂгда̀ и҆ спаси́ мѧ . сла́ва , и҆ ны́нѣ , боⷢ҇ . Ꙗ҆́кѡ невᲂздѣ́ланнаѧ дв҃о лᲂза̀ , кра́снѣйшїи гро́здъ прᲂзѧбла̀ є҆сѝ , и҆стᲂча́ющь на́мъ вино̀ спасе́нїѧ , и҆́же всѣ́хъ веселѧ́щеє дш҃а же и҆ тѣлеса̀ . тѣ́мже ꙗ҆́кѡ винꙋ́ тѧ до́брымъ блажа́ще при́снѡ , со а҆́нг҃лѡмъ вᲂпїе́мъ ти , ра́дꙋисѧ бл҃гᲂда́тнаѧ .

Кано́нъ пᲂкаѧ́нныи , ко́ гдⷭ҇ꙋ на́шемꙋ і҆с҃ꙋ хрⷭ҇тꙋ̀ , и҆ ст҃ы́мъ є҆гѡ̀ мч҃нкѡмъ . твᲂре́нїе , ки́ръ і҆ѡ́сифᲂво . гла́съ , г҃ . пѣ́снь , а҃ . і҆рмо́съ . Фараѡ́не ѻ҆рꙋ́жїе глꙋбино́ю пᲂкры́въ гдⷭ҇и , мо́ре раз̾ве́ргъ є҆сѝ , и҆ спасѐ пѣ́сньми пᲂю́щїѧ тѧ̀ , лю́ди і҆и҃льтескїѧ . запѣ́въ : сла́ва тебѣ̀ бж҃е на́шъ , сла́ва тебѣ̀ . Прегрѣше́нїи тмы̀ и҆зба́ви мѧ̀ без̾грѣ́шне , ꙗ҆́же безꙋма̀ сᲂдѣ́ѧхъ , пᲂдаѧ́ ми сле́зы ᲂу҆миле́нїѧ ꙗ҆́кᲂже и҆нᲂгда̀ блꙋдни́цѣ . Бы́вша мѧ верте́пъ раз̾бо́йникѡмъ , без̾мѣ́стными дѣѧ́нїи , дᲂбрᲂдѣ́тельми ꙗ҆вѝ чл҃кᲂлю́бче хра́мъ сво́й , и҆́же во́лею рᲂжде́исѧ в̾ вертьпѣ̀ . запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Ѡ҆кᲂрмле́нїемъ дх҃а бжⷭ҇твенагѡ , претеко́сте мꙋче́нїи бꙋ́рю , бг҃ᲂдᲂхнᲂве́ннїи мч҃нцы , и҆ в̾ бжⷭ҇твенᲂе дᲂи҆до́сте приста́нище . мⷱ҇ꙋ . Прᲂсвѣти́вшесѧ бл҃гᲂда́тїю дх҃а мч҃нцы , тмы̀ глꙋбо́кїѧ и҆дᲂлᲂбѣ́сїѧ ᲂу҆бѣжа́сте , ра́дꙋетесѧ прехва́льнїи . боⷢ҇ . Всест҃а́ѧ и҆ пречⷭ҇таѧ грѣ́шнымъ пᲂмо́щнице , па́дающимъ и҆справле́нїе , пᲂкаѧ́нїе мѝ да́ждь мл҃твами сѝ мнᲂгᲂсᲂгрѣши́вшемꙋ .

дрꙋгі́и , кано́нъ , ст҃ы́мъ беспло́тнымъ а҆́нг҃лѡмъ . твᲂре́нїе ѳеѡ́фанᲂво . і҆рмо́съ . Пѣ́снь но́вꙋ . запѣ́въ : ст҃і́и а҆рха́нг҃ли и҆ а҆́нг҃ли , мᲂли́те бг҃а ѡ҆ на́съ . Без̾нача́ленъ свѣ́тъ и҆ пᲂда́теленъ свѣтᲂѧвле́нїѧ свᲂегѡ̀ , сы́и хрⷭ҇тѐ бж҃е , мᲂѐ пᲂмышле́нїе прᲂсвѣтѝ наи́тїемъ твᲂи́хъ си́лъ . Ра́дꙋющесѧ а҆нг҃лᲂлѣ́пнѡ , всебᲂга́тымъ прича́стїемъ а҆́нг҃льстїи ли́цы , твᲂи́ми сп҃се кра́сными сїѧ́нїи , та́йнѡ ѡ҆блиста́ютсѧ . Ꙗ҆́кѡ бл҃гі́и живᲂтво́рецъ , бл҃гᲂдѣ́тельныи дх҃ъ и҆схᲂдѧ́и ѿ ѻ҆ц҃а , нбⷭ҇ныѧ си́лы ᲂу҆твердѝ не прикᲂснᲂве́нными бжⷭ҇твеными бл҃гᲂда́тьми . боⷢ҇ . Чинᲂнача́льниче бж҃їи гаврїи́ле , беспло́тныхъ лико́въ , и҆ ны́нѣ пребᲂга́те гла́съ ра́дᲂстенъ ѡ҆бра́дᲂваннѣй вᲂзᲂпи́выи , ра́дꙋисѧ всенепᲂро́чнаѧ .

пѣ́снь , г҃ . і҆рмо́съ . Оу҆твердѝ менѐ гдⷭ҇и , є҆ди́не мнᲂгᲂмлⷭ҇тиве , и҆ прᲂстри́ ми рꙋ́кꙋ ꙗ҆́кѡ петро́ви , и҆ спаси́ мѧ . Ꙗ҆́кᲂже петра̀ пᲂгрꙋжа́ема спа́слъ є҆сѝ чл҃кᲂлю́бче , та́ко же и҆ менѐ , и҆з̾ глꙋбины̀ прегрѣше́нїи мᲂи́хъ вᲂзведѝ . Оу҆мертви́ мѧ льсти́выи , страстьмѝ ᲂу҆би́въ . ты́ же мѧ живᲂда́вче , пᲂкаѧ́нїѧ ѻ҆бразы̀ ѡ҆живѝ . мⷱ҇ꙋ . Ѻ҆гне́мъ веще́ственымъ мч҃нцы , без̾ пра́вды ѡ҆палѧ́еми , невеще́ственѣ , веще́ственымъ вᲂспали́стесѧ жела́нїемъ . мⷱ҇ꙋ . Мч҃нцы растерза́еми , растерза́нїѧ и҆ лᲂвле́нїѧ пᲂгꙋби́ша льсти́вагѡ , и҆ вѣнце́мъ спᲂдо́бишасѧ . боⷢ҇ . Мр҃і́е гдⷭ҇ᲂимени́таѧ , мно́гими ѡ҆блада́ема мѧ̀ , страстьмѝ дш҃етлѣ́нными , свᲂбᲂдѝ мл҃твами сѝ .

и҆́нъ , і҆рмо́съ . Лꙋ́къ сᲂкрꙋши́лъ . Стрꙋѝ текꙋ́щїѧ и҆ рѣ́ки бл҃гᲂсти , ꙗ҆ви́лъ є҆сѝ бл҃гі́и а҆́нг҃льскїѧ ли́ки , и҆ та́йнѡ твᲂе́ю заре́ю сїѧ́ющихъ . Да пᲂка́жеши ꙗ҆́вѣ , сᲂкро́вища бᲂга́тства свᲂегѡ̀ , и҆ крѣ́пᲂстїю влⷣко хрⷭ҇тѐ , твᲂе́й сла́вѣ пѣвцы̀ манᲂве́нїемъ приве́лъ є҆сѝ . Съ тре́петᲂмъ тебѣ̀ слꙋже́бнѣ , а҆́нг҃льскїѧ свѣ́тлᲂсти пред̾стᲂѧ́ще , пᲂю́тъ при́снѡ твᲂю̀ си́лꙋ хрⷭ҇тѐ не и҆зрече́ннѡ си́льнꙋю . боⷢ҇ . Всегѡ̀ прїѧ́тъ и҆з̾ тебѐ не и҆змѣ́ннѡ чл҃ка , и҆́же влⷣка всемꙋ̀ семꙋ̀ бг҃ᲂмт҃и , и҆ тебѐ и҆сто́чника бл҃гᲂда́ти ꙗ҆ви́лъ є҆́сть .

пѣ́снь , д҃ . і҆рмо́съ . Є҆да̀ в̾ рѣка́хъ прᲂгнѣ́ваешисѧ гдⷭ҇и . є҆да̀ в̾ рѣка́хъ ꙗ҆́рᲂсть твᲂѧ̀ , лѝ в̾ мо́ри ᲂу҆стремле́нїе твᲂѐ . Разрѣшѝ сᲂꙋ́зы страсте́й мᲂи́хъ гдⷭ҇и , пᲂкаѧ́нїемъ мѧ̀ свѧза́въ , и҆ прича́стника ꙗ҆вѝ бл҃ги́хъ твᲂи́хъ . Вᲂсїѧ́й ми свѣ́тъ пᲂкаѧ́нїѧ ѻ҆́бразы , сл҃нце сы́и хрⷭ҇тѐ , ѕѡ́лъ мᲂи́хъ ѿгᲂнѧ̀ но́щь глꙋбо́кꙋю . мⷱ҇ꙋ . Ꙗ҆ви́стесѧ мꙋ́дрїи страда́льцы , ꙗ҆́кᲂже ᲂу҆́глїе ве́щь без̾бо́жїѧ пᲂпалѧ́юще , и҆ сꙋ́щїѧ во тмѣ̀ прᲂсвѣща́юще . мⷱ҇ꙋ . Ме́ртвᲂсти хрⷭ҇то́вѣ ᲂу҆пᲂдо́бистесѧ мч҃нцы , бᲂлѣ́знемъ примѣси́вшесѧ разли́чнымъ , тѣ́мже бжⷭ҇твенꙋю жи́знь наслѣ́дᲂвасте . боⷢ҇ . Да́ждь мѝ чи́стаѧ и҆́стиннᲂе пᲂкаѧ́нїе , ᲂу҆ти́ши страсте́й мᲂи́хъ мᲂлвꙋ̀ , сᲂгрѣша́ющимъ пред̾ста́тельнице .

и҆́нъ , і҆рмо́с̾ . Стра́шнꙋ и҆ неи҆зрече́ннꙋ . Ѻ҆́блацы и҆́же трисл҃нечнᲂе сїѧ́нїе прїе́млюще , пᲂдава́ете бжⷭ҇твенымъ хᲂтѣ́нїемъ , трⷪ҇ческᲂе ᲂу҆краше́нїе , ѡ҆кᲂрмлѧ́еми си́лᲂю зижди́телѧ . Въ ми́ръ пᲂсыла́ютсѧ к̾ хᲂтѧ́щимъ вѣ́рᲂвати тебѣ̀ , ꙗ҆́кᲂже храни́телїе спасе́нїю бл҃гᲂчести́вымъ а҆́нг҃ли , сᲂблюда́юще спа́се рабы̀ твᲂѧ̀ . Прᲂсвѣща́ютсѧ та́йнѡ а҆́нг҃ли , чи́стымъ приближе́нїемъ , и҆ бг҃ᲂнача́льнымъ твᲂи́мъ ѡ҆сїѧ́нїемъ , си́лѣ твᲂе́й сла́ва зᲂвꙋ́ще , чл҃кᲂлю́бче . боⷢ҇ . Ра́бски мᲂле́бникъ ны́нѣ прихᲂждꙋ̀ , в̾ кро́въ тво́й пренепᲂро́чнаѧ , и҆зба́ви мѧ бг҃ᲂрᲂди́тельнице страсте́й смꙋще́нїѧ , ꙗ҆́же без̾стра́стїю вино́внаго ро́ждьшаѧ .

пѣ́снь , є҃ . і҆рмо́съ . Свѣ́тᲂмъ твᲂи́мъ невече́рнимъ хрⷭ҇тѐ , ѡ҆зарѝ бж҃е смире́ннꙋю мᲂю̀ дш҃ꙋ , и҆ наста́ви на стра́хъ тво́й , занѐ свѣ́тъ пᲂвелѣ́нїѧ твᲂѧ̀ . Непᲂста́ви менѐ на́га ѿ дѣ́лъ до́брыхъ , на сꙋди́щи твᲂе́мъ чл҃кᲂлю́бче , но во ѻ҆де́ждꙋ бжⷭ҇твеныхъ дѣѧ́нїи ѻ҆блецы̀ пᲂкаѧ́нїемъ . Оу҆ꙗ҆́звихсѧ ѻ҆рꙋ́жїемъ страсте́й , и҆ в̾ ро́въ ѿчаѧ́нїѧ впадо́хъ , непре́зри влⷣко , но и҆сцѣли́ мѧ ѡ҆браще́нїѧ бы́лїемъ . мⷱ҇ꙋ . И҆ нᲂгᲂтьмѝ стрꙋ́жеми лю́тѣ , и҆ мече́мъ страда́льцы ᲂу҆бива́еми , и҆ ра́нами скᲂнчава́еми , непᲂклᲂни́сте и҆стꙋка́ннымъ кᲂлѣ́ней . мⷱ҇ꙋ . Ми́ръ страда́ньми ва́шими красꙋ́етсѧ прⷭ҇нѡ , ст҃і́и мч҃нцы , преми́рнᲂе ꙗ҆́кѡ ѡ҆брѣто́сте пребыва́нїе со а҆́нг҃лы . боⷢ҇ . Ꙗ҆́же є҆ди́на сло́во на землѝ пло́тїю сло́во ро́ждьши , и҆ дв҃ствꙋеши , без̾слᲂве́сныхъ мѧ и҆зба́ви дѣѧ́нїи , ꙗ҆́кѡ да слᲂвесы̀ честны́ми вᲂспѣва́ю тебѐ .

и҆́нъ , і҆рмо́съ . На землѝ неви́димыи . Со ѻ҆ц҃е́мъ сн҃а и҆ дх҃а , трисїѧ́ннымъ свѣ́тᲂмъ прᲂсвѣ́щшесѧ вѣ́рнїи , вᲂспᲂе́мъ є҆ди́но бжⷭ҇тво̀ , со а҆́нг҃льскими во́инствы . двⷤа . Є҆ди́но нача́ло пребез̾нача́льнᲂе честѝ серафи́ми ᲂу҆ча́тъ , вᲂпїю́ще гла́съ трист҃ы́и ꙗ҆́вѣ , дх҃ᲂмъ прᲂсвѣща́еми бжⷭ҇тва̀ . боⷢ҇ . Без̾ сѣ́мене ѻ҆трᲂкᲂви́це тебѣ̀ а҆рха́нг҃лъ гаврїи́лъ , рᲂди́ти живᲂда́вца бл҃гᲂвѣстѝ , бцⷣе всечⷭ҇таѧ съ нб҃сѐ сᲂше́дъ .

пѣ́снь , ѕ҃ . і҆рмо́съ . И҆́же на кᲂнчи́нѣ вѣко́мъ дᲂше́дша млрⷭ҇де , и҆ бꙋ́рными напа́стьми пᲂгрѧ́знꙋти хᲂтѧ́ща , вᲂпїю́ща непре́зри спасѝ сп҃се , ꙗ҆́кᲂже спасѐ ѿ ѕвѣ́рѧ прᲂро́ка . Превᲂзне́ссѧ мы́слїю , ꙗ҆́кᲂже дре́внїи фарисе́й , прегрѣше́нїемъ низ̾падо́хсѧ лю́тѣ , и҆ зрѧ́ мѧ льсти́выи , весели́тсѧ хрⷭ҇тѐ . и҆́же смири́выи сегѡ̀ крⷭ҇то́мъ , смири́вшасѧ ны́нѣ , ᲂу҆ще́дри мѧ . Грѣхᲂлюби́въ в̾ житїѝ бы́въ , ꙗ҆́кᲂже и҆́нъ никто́же влⷣко , и҆ и҆з̾жи́хъ твᲂѐ дᲂлгᲂтерпѣ́нїе ѡ҆каѧ́нныи , и҆ є҆ще́ же нечꙋ́вственъ . но ѡ҆брати́ мѧ твᲂи́мъ бл҃гᲂꙋтро́бїемъ . мⷱ҇ꙋ . Ꙗ҆́рᲂстнымъ прᲂизвᲂле́нїемъ , закᲂнᲂпрестꙋ́пницы бг҃ᲂмꙋ́дреныхъ ѡ҆сꙋжда́юще ѻ҆гне́мъ и҆ сᲂжже́нїемъ и҆ прᲂбᲂде́ньми , ѕла́та свѣтлѣ́йше ꙗ҆́кѡ вᲂи́стинꙋ пᲂказа́ша , и҆ хрⷭ҇тꙋ̀ наслѣ́дники . мⷱ҇ꙋ . Сꙋди́ще и҆спо́лнь бᲂре́нїѧ , и҆ по́двига превели́ка , и҆ па́че є҆стества̀ ра́ны преше́дше , пᲂбѣди́сте кнѧ́зѧ тмы̀ , и҆ ѿ́ бг҃а прїѧ́сте страда́льцы вѣнцы̀ . боⷢ҇ . Кᲂвче́гъ завѣ́та , ст҃ꙋ́ю вᲂи́стинꙋ трапе́зꙋ , ѡ҆чисти́лище на́ше , цр҃кᲂвь бж҃їю ѡ҆дш҃е́вленꙋю , всезлаты́и свѣ́щникъ , и҆́стиннꙋю мт҃рь зижди́телѧ вᲂспѣва́емъ .

и҆́нъ , і҆рмо́съ . Селе́нїе і҆ѡ́на .= Пе́рвᲂе и҆ вседѣ́тельнᲂе бг҃ᲂнача́лїѧ сїѧ́нїе , а҆рха́нг҃ли и҆ а҆́нг҃ли , си́льнѡ пᲂю́тъ зᲂвꙋ́ще , с̾ нача́лы и҆ властьмѝ , и҆ си́лами , гла́сы немо́лчными гдⷭ҇и . =двⷤа . И҆́же ми́ръ ᲂу҆́мныи , всѧ́цѣмъ слꙋже́нїемъ по́чинꙋ ᲂу҆краше́и неви́диме . семꙋ̀ ᲂу҆пᲂдᲂблѧ́тисѧ бл҃гᲂчи́нїю , честнꙋ́ю цр҃кᲂвь спᲂдо́би . боⷢ҇ . И҆сцѣле́нїемъ тѧ и҆сто́чникъ приснᲂтекꙋ́щь , и҆́же в̾ тѧ̀ все́льшеєсѧ сло́во пᲂказа̀ , мᲂеѧ̀ ᲂу҆́бѡ дш҃и ꙗ҆́звы , бцⷣе дв҃о и҆сцѣлѝ .

пѣ́снь , з҃ . і҆рмо́съ . Трїѐ ѻ҆́трᲂцы в̾ пещѝ трⷪ҇цꙋ прᲂѡбрази́вше , преще́нїе ѻ҆́гненнᲂе пᲂпра́вше , хва́лѧще пᲂѧ́хꙋ , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Вре́мѧ твᲂѐ скᲂнчава́етсѧ ѽ дш҃е , придве́рехъ и҆схо́дъ , пᲂкаѧ́нїѧ ᲂу҆́бѡ плᲂды̀ пᲂкажѝ . пре́жде да́же две́ри незатвᲂрѧ́тсѧ , вᲂзᲂпі́й хрⷭ҇тꙋ̀ , гдⷭ҇и спаси́ мѧ . Ѻ҆бнᲂви́мъ срⷣца̀ , ра́лᲂмъ и҆́стиннагѡ ра́зꙋма , пᲂкаѧ́нїѧ пшени́цꙋ сѣ́юще , ꙗ҆́кѡ да по́жнемъ кла́сы пра́вды , ѡ҆ хрⷭ҇тѐ вᲂз̾дѣ́латели дꙋ́шъ на́шихъ . мⷱ҇ꙋ . Свѣти́ла бл҃гᲂче́стїѧ , нече́стїю сᲂпрᲂтивᲂбᲂрцы̀ , ни́щимъ ѡ҆бᲂга́тителїе гдⷭ҇ни мч҃нцы , преѡ҆каѧ́ннꙋю ми дш҃ꙋ , лише́ннꙋю , дᲂбрᲂдѣ́телей ѡ҆бᲂга́тите . мⷱ҇ꙋ . И҆́же спасы́и мытарѧ̀ и҆з̾ глꙋбины̀ вᲂз̾дᲂхнꙋ́вша , ма́лᲂе ми вᲂз̾дыха́нїе прїимѝ , и҆ спаси́ мѧ , стрⷭ҇тᲂте́рпецъ ра́ди , прᲂсла́вльшихъ тѧ̀ хрⷭ҇тѐ свᲂи́ми ᲂу҆́ды . боⷢ҇ . И҆сто́чниче ꙗ҆́же во́дꙋ ѡ҆ставле́нїѧ и҆стᲂча́ющи , тече́нїѧ мᲂи́хъ прегрѣше́нїи и҆з̾сꙋшѝ , пᲂдаю́щи ми тꙋ́чꙋ сле́зъ , да тѧ̀ при́снѡ ꙗ҆́кѡ бцⷣꙋ пᲂю̀ .

и҆́нъ , і҆рмо́съ . Го́рдыи мꙋчи́тель . Тве́рдымъ ᲂу҆мо́мъ и҆ до́блественымъ ѻ҆́кᲂмъ , зрѧ́ще пе́рвꙋю свѣ́тлᲂсть , прича́стїемъ быва́ете свѣ́ти втᲂрі́и , бл҃гᲂслᲂве́нъ є҆сѝ зᲂвꙋ́ще гдⷭ҇и бж҃е во́ вѣки . двⷤа . Не ᲂу҆кло́ннымъ жела́нїемъ , и҆ не и҆з̾да́тельнᲂю любо́вїю вᲂди́ми сꙋ́ще , дᲂбро́тами зижди́телѧ , пᲂлᲂже́ни бы́сте свѣти́ла втᲂра́ѧ , ли́цы а҆́нг҃льстїи бл҃гᲂслᲂве́нъ є҆сѝ зᲂвꙋ́ще гдⷭ҇и бж҃е во́ вѣки . боⷢ҇ . Вᲂплᲂще́ннѡ рᲂдила̀ є҆сѝ бцⷣе сло́во без̾нача́льнᲂе , и҆́же и҆з̾ ѻ҆ц҃а без̾ мт҃ре , первᲂвѣ́чнᲂе бжⷭ҇твенымъ ржⷭ҇тво́мъ , блгⷭ҇ве́нъ влⷣчце пло́дъ твᲂегѡ̀ чре́ва .

пѣ́снь , и҃ . і҆рмо́съ . Сᲂше́дшагѡ со ѻ҆́трᲂки є҆вре́йскими в̾ пла́мень бж҃їею си́лᲂю , ꙗ҆́вльшасѧ гдⷭ҇а , сщ҃е́ннїи хвали́те , и҆ превᲂзнᲂси́те є҆гѡ̀ во́ вѣки . Ѿ пᲂсмѣ́шьства ха́мъ , ѻ҆те́ческимъ ѿвѣща́нїемъ ра́бъ бы́сть . что̀ сᲂтвᲂри́ши дш҃е мᲂѧ̀ , пᲂрабᲂти́вшисѧ страсте́мъ и҆ без̾чи́ннѡ смѣю́щисѧ , и҆ нестыди́шисѧ нбⷭ҇нагѡ ѻ҆ц҃а . Враждᲂва́въ ка́инъ безꙋ́мнѡ , братᲂꙋбі́ица бы́сть , семꙋ̀ пᲂдо́бна ꙗ҆́вльшисѧ . и҆ не и҆но́го ᲂу҆би́вши , но себѐ са́мꙋю дш҃е мᲂѧ̀ , сластᲂлю́бїемъ и҆ пре́лестьми житїѧ̀ . мⷱ҇ꙋ . И҆збра́ннᲂе би́серїе гдⷭ҇не , сᲂсꙋ́ды честны́ѧ , свѣтѧ́щїѧсѧ свѣщѝ̀ , заре́ю бжⷭ҇твеныѧ бл҃гᲂда́ти хрⷭ҇то́вы стрⷭ҇тᲂте́рпцы , вѣ́рᲂю сᲂше́дшесѧ пᲂчте́мъ дᲂсто́йнѡ . мⷱ҇ꙋ . И҆́же мꙋ́дрыхъ стрⷭ҇тᲂте́рпецъ кро́вь , па́че кади́ла прїе́мъ сло́ве . тѣ́хъ мᲂльба́ми , и҆́же пᲂкаѧ́нїемъ к̾ тебѣ̀ припа́дающихъ спасѝ ꙗ҆́кѡ є҆ди́нъ млⷭ҇тивъ . боⷢ҇ . Недꙋ́гᲂмъ мно́гагѡ грѣха̀ , ко а҆́дꙋ ны́нѣ прибли́жихсѧ . премно́гᲂе млрⷭ҇дїе ѻ҆трᲂкᲂви́це и҆мꙋ́щаѧ , ꙗ҆́кѡ бг҃а бл҃гᲂꙋтро́бнаго ро́ждьши не и҆з̾рече́нно , ᲂу҆ще́дривъ спаси́ мѧ .

и҆́нъ , і҆рмо́съ . Веще́ственна ѻ҆гнѧ̀ . Ꙗ҆́кѡ всѣ́хъ сᲂдѣ́тель , а҆́нг҃лы ᲂу҆мы́слилъ є҆сѝ , и҆ пред̾ста́шати стра́хᲂмъ зᲂвꙋ́ще , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Прича́стїемъ бжⷭ҇твенагѡ ѻ҆гнѧ̀ , ꙗ҆́кᲂже пла́мень бы́вше нбⷭ҇ныѧ ᲂу҆мы̀ зᲂвꙋ́тъ , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Невеще́ственыѧ и҆ ᲂу҆́мныѧ а҆́нг҃лы пре́жде сᲂста́вилъ є҆сѝ ви́димыхъ всѣ́хъ , непреста́ннѡ тебѣ̀ зᲂвꙋ́ща , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . боⷢ҇ . Сло́во ѻ҆́ч҃еє , па́че сло́ва вᲂплᲂще́нно бг҃ᲂрᲂди́тельнице дв҃о рᲂдила̀ є҆сѝ . є҆го́же пᲂе́мъ , всѧ̀ дѣ́ла непреста́ннѡ ꙗ҆́кѡ гдⷭ҇а , и҆ превᲂзно́симъ во всѧ̀ вѣ́ки . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́съ . На сѷна́йстѣй гᲂрѣ̀ ви́дѣвъ тѧ в̾ кꙋпинѣ̀ мѡѷсе́й , не ѡ҆па́льнѡ ѻ҆́гнь бжⷭ҇твенныи заче́ншꙋю во́ чревѣ . данїи́лъ же тѧ ви́дѣ го́рꙋ непресѣ́ченꙋ . же́ѕлъ прᲂзѧ́бшїи и҆са́їѧ взыва́ше , ѿ ко́рене дв҃дᲂва . І҆а́кѡвъ пе́рвенство прїѧ́тъ , ра́ди вᲂз̾держа́нїѧ и҆нᲂгда̀ , и҆са́въ же старѣ́йшинство ѿдадѐ не ᲂу҆держа́въ чре́во . ко́ль ѕло̀ не вᲂз̾держа́нїе , и҆ ко́ль вели́ко вᲂз̾держа́нїе ; бѣжѝ непᲂдо́бїѧ , вᲂз̾любѝ ѽ дш҃е до́брыхъ присвᲂе́нїе . Ꙗ҆́кѡ мно́го претерпѣ́въ непᲂро́чныи і҆́ѡвъ , вѣнча́сѧ и҆скꙋше́нїи бо стеко́шасѧ пᲂто́цы , и҆ непᲂкᲂлѣба́ша є҆мꙋ̀ серде́чнагѡ стᲂлпа̀ , тᲂмꙋ̀ ревнꙋ́й всегда̀ , непрело́жна пребыва́ющи ѽ дш҃е , лꙋка́вагѡ кᲂзньмѝ . мⷱ҇ꙋ . Ѻ҆бᲂстри́вшесѧ ѻ҆гне́мъ бжⷭ҇твенагѡ дх҃а , мечѝ ꙗ҆ви́стесѧ ꙗ҆́вѣ , сѣкꙋ́ще пᲂлкѝ прᲂти́вныѧ , страстᲂно́сцы хрⷭ҇то́вы . и҆ ве́лїѧми бѣда́ми прᲂславлѧ́еми , вѣнча́стесѧ всеси́льнᲂю рꙋко́ю всѣ́хъ цр҃ѧ . мⷱ҇ꙋ . Мно́жество мч҃нкъ непᲂро́чнᲂе , без̾мѣ́рныхъ мᲂи́хъ ѕѡ́лъ мно́жество ѡ҆чи́сти ти , мᲂли́те влⷣкꙋ и҆ бг҃а , и҆́же ва́ша без̾чи́сленыѧ трꙋды̀ прїе́мшаго , и҆ со беспло́тными во́инствы ва́съ сᲂчта́вшаго . боⷢ҇ . Свѣ́тлаѧ пᲂла́та влⷣчнѧѧ , хра́мъ пᲂкажи́ мѧ свѣ́тꙋ . непрᲂхᲂди́маѧ две́ре , ѿве́рзи ми пᲂкаѧ́нїѧ пꙋ́ть . землѐ ст҃а́ѧ , к̾ земли́ мѧ кро́ткихъ наста́ви влⷣчце , всѧ́кᲂго мѧ влⷣчества страсте́й ꙗ҆вѝ свᲂбо́дна .

и҆́нъ , і҆рмо́съ . И҆́же сла́дкᲂю . И҆́же свѣ́тꙋ вели́кᲂмꙋ и҆ пе́рвᲂмꙋ нн҃ѣ пред̾стᲂѧ́ще ли́цы , мл҃твеницы си́льнѣйшїи , бы́сте ѡ҆ всѣ́хъ на́съ . тѣ́мже ва́съ ꙗ҆́кѡ си́льныѧ ѽ бжⷭ҇твенїи а҆́нг҃ли бж҃їи , велича́юще сла́вимъ . двⷤа . Равнᲂси́льнꙋю трⷪ҇цꙋ сла́вити спᲂдо́бльшесѧ ꙗ҆́снѡ , и҆ сеѧ̀ сїѧ́нїемъ пе́рвѣе ѡ҆сщ҃а́еми , ѡ҆свѣти́тисѧ втᲂры́мъ сїѧ́нїемъ спᲂдо́бите и҆ на́съ , и҆́же ва́съ сла́вѧщихъ . боⷢ҇ . Тѧ̀ и҆́же на́шегѡ спасе́нїѧ ѡ҆снᲂва́нїе , всѝ свѣ́мы . твᲂе́ бо всечⷭ҇тᲂе ржⷭ҇тво̀ спасло̀ є҆́сть , кро́вїю бг҃ᲂдѣ́тельнᲂю , пᲂю́щїѧ тѧ̀ бцⷣе , и҆ вѣ́рнѡ сла́вѧщїѧ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , г҃ . Раз̾сѣ́ѧннагѡ мѝ ᲂу҆ма̀ сᲂберѝ гдⷭ҇и , и҆ ѡ҆лѧденѣ́вшеє срⷣце мᲂѐ ѡ҆чи́сти , ꙗ҆́кѡ петрꙋ̀ даѧ́ми пᲂкаѧ́нїе , ꙗ҆́кѡ мытарю̀ вᲂз̾дыха́нїе , и҆ ꙗ҆́кᲂже блꙋдни́цѣ сле́зы . да ве́лїемъ гла́сᲂмъ зᲂвꙋ́ ти , бж҃е ѡ҆чи́сти мѧ , ꙗ҆́кѡ є҆ди́нъ млрⷭ҇дъ и҆ чл҃кᲂлю́бецъ .

сти́хъ : и҆спо́лнихᲂмсѧ за ᲂу҆́тра . Мно́жицею пѣ́нїе сᲂдѣва́ѧи , ѡ҆брѣто́хсѧ грѣхѝ скᲂнчава́ѧ . ѧ҆зы́кᲂмъ ᲂу҆́бѡ пѣ́нїе вѣща́ю , дш҃е́ю же непᲂдо́бнаѧ пᲂмышлѧ́ѧ . но ѻ҆бᲂѐ и҆спра́ви хрⷭ҇тѐ бж҃е пᲂкаѧ́нїемъ , и҆ пᲂми́лꙋй мѧ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Ст҃ы́хъ страстᲂте́рпецъ па́мѧть , прїидѣ́те лю́дїє всѝ пᲂчте́мъ , ꙗ҆́кѡ пᲂзо́ръ ᲂу҆́бѡ бы́ша а҆́нг҃лѡмъ и҆ чл҃кѡмъ . пᲂбѣ́ды вѣнцы̀ ѿ хрⷭ҇та̀ прїѧ́ша , и҆ мо́лѧтсѧ ѡ҆ дш҃а́хъ на́шихъ .

сла́ва , и҆ ны́нѣ , боⷢ҇ . Ст҃а чⷭ҇таѧ первᲂпᲂхвало̀ сꙋ́щи нбⷭ҇нымъ чинѡ́мъ . а҆пⷭ҇лѡмъ пѣ́нїе , и҆ пррⷪ҇кѡмъ събытїѐ . влⷣчце прїимѝ мл҃твы на́ша .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ . во́гласъ трᲂпарѧ̀ . пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .

Въ пᲂнедѣ́льникъ , бл҃же́нны . гла́съ , г҃ .

Ѿве́ргшаго хрⷭ҇тѐ за́пᲂвѣдь твᲂю̀ пра́ѻ҆ц҃а а҆да́ма , и҆з̾ раѧ̀ и҆з̾гна́лъ є҆сѝ . разбо́йника же ще́дре , и҆спᲂвѣ́давша тѧ̀ на крⷭ҇тѣ̀ , во́нь всели́лъ є҆сѝ , зᲂвꙋ́ща , пᲂмѧни́ мѧ сп҃се во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ѕѡ́лъ мᲂи́хъ мно́жество , по мно́жествꙋ млⷭ҇ти твᲂеѧ̀ хрⷭ҇тѐ презрѣ́въ спаси́ мѧ . и҆ в̾ дн҃ь сꙋ́дныи , и҆зба́ви ѿ вѣ́чнагѡ мꙋче́нїѧ ꙗ҆́кѡ бг҃ъ , ꙗ҆́кѡ да пѣснᲂсло́влю твᲂю̀ бл҃гᲂсты́ню .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Херꙋви́ми и҆ серафи́ми , прⷭ҇то́ли , а҆рха́нг҃ли , си́лы , и҆ нача́ла , и҆ гдⷭ҇ьствїѧ , а҆́нг҃ли и҆ вла́сти всѧ̀ , мᲂли́тесѧ сᲂдѣ́телю , тᲂгда̀ презрѣ́ти мᲂѧ̀ сᲂгрѣше́нїѧ , є҆гда̀ хо́щетъ сꙋди́ти тва́ри , ꙗ҆́кѡ чл҃кᲂлю́бецъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ѿ крᲂве́й сщ҃е́нныхъ багрѧни́цꙋ ѡ҆мᲂчи́вше хрⷭ҇то́вы страда́льцы , цр҃е́ви си́ламъ , съ црⷭ҇твᲂвати вᲂи́стинꙋ спᲂдо́бишасѧ бг҃ᲂлѣ́пнѡ , и҆ на́мъ про́сѧтъ прегрѣше́нїемъ ѡ҆ставле́нїе , и҆́же дᲂсто́йнѡ тѣ́хъ всегда̀ пᲂчита́ющимъ .

сла́ва . Трисᲂста́внᲂе є҆ди́но бжⷭ҇тво̀ , пᲂю́ще бл҃гᲂчⷭ҇тнѡ вѣ́рнїи , ѻ҆ц҃а , и҆ сло́ва , и҆ ст҃а́гѡ ᲂу҆тѣ́шительнаго дх҃а , а҆́нг҃льски вᲂзᲂпїе́мъ вѣ́рнїи немо́лчнѡ , ст҃ъ , ст҃ъ , ст҃ъ є҆сѝ бж҃е , спаса́ѧи ми́ръ .

и҆ ны́нѣ . Ꙗ҆́же свѣ́тъ ѿ́ свѣта рᲂди́вши ѻ҆́блаче свѣ́тлыи , ѡ҆мраче́наго мѧ̀ страстьмѝ и҆ сластьмѝ житїѧ̀ , свѣ́тᲂмъ прᲂсвѣти́вши и҆спра́ви чи́стаѧ , и҆ ᲂу҆лꙋчи́ти сла́вꙋ спᲂдо́би , є҆ѧ́же пᲂлꙋчи́ша ны́нѣ , и҆́же до́брѣ пᲂжи́вшїи .