Въ сꙋбо́тꙋ ве́черъ . на ма́лѣй вече́рни . нача́ло ѡ҆бы́чно , ꙗ҆́кᲂже ᲂу҆ка́зано в̾ пе́рвᲂмъ гла́сѣ . на гдⷭ҇и вᲂзва́хъ , стⷯры вᲂскрⷭ҇ны . гла́съ , д҃ . =запѣ́въ : да ᲂу҆пᲂва́етъ і҆и҃ль на́ гдⷭ҇а . Живᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшеє чл҃ческᲂе є҆стество̀ всеси́льне . и҆ є҆́же на небеса̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ . =вⷤ . Дре́ва преслꙋша́нїѧ запреще́нїе , разрѣши́лъ є҆сѝ сп҃се , на́ древѣ крⷭ҇тнѣмъ во́лею пригво́ждьсѧ . и҆ во а҆́дъ сᲂше́дъ си́льне , сме́ртыѧ ᲂу҆́зы ꙗ҆́кѡ бг҃ъ растерза́лъ є҆сѝ . сегѡ̀ ра́ди кла́нѧемсѧ , є҆́же и҆з̾ ме́ртвыхъ твᲂемꙋ̀ вᲂскрⷭ҇нїю , ра́дᲂстїю вᲂпїю́ще , всеси́льне гдⷭ҇и сла́ва тебѣ̀ . Врата̀ а҆́дᲂва сᲂкрꙋши́лъ є҆сѝ гдⷭ҇и , и҆ свᲂе́ю сме́ртїю , сме́ртнᲂе црⷭ҇тво разрꙋши́лъ є҆сѝ . ро́дъ же чл҃ческїи и҆з̾ и҆стлѣ́нїѧ свᲂбо́ждь , живо́тъ и҆ нетлѣ́нїе ми́рꙋ дарᲂва̀ , и҆ ве́лїю млⷭ҇ть . сла́ва , и҆ ны́нѣ , боⷢ҇ . Ве́лїе и҆ пресла́внᲂе , є҆́же на тебѣ̀ бы́вшеє чꙋ́до . и҆ кто̀ дᲂво́ленъ и҆з̾гл҃ати си́лы гдⷭ҇ни , ꙗ҆́же ѡ҆ тебѣ̀ бы́вшїѧ бцⷣе , ᲂу҆страша́етъ бо ᲂу҆́мъ на́шъ , ве́лїѧ видѣ́нїѧ дᲂстᲂѧ́нїе , ꙗ҆́кѡ непᲂсти́жимаго тѝ та́инства , гл҃ати немᲂгꙋ́ще . кто́ бо слы́ша ѿ́ вѣка дв҃ꙋ дᲂи́вшꙋ , и҆ мт҃рь бе́з̾мꙋжа ꙗ҆́вльшꙋюсѧ на землѝ ; и҆ свᲂегѡ̀ сᲂдѣ́телѧ , ꙗ҆́кѡ младе́нца на рꙋкꙋ̀ нᲂси́вшꙋю . тѣ́мже тѧ̀ всѝ ро́ди непреста́нно велича́емъ .

на стихо́внѣ , стихѣ́ра , вᲂскрⷭ҇на . гла́съ , д҃ . Гдⷭ҇и вᲂз̾ше́дъ на́ крⷭ҇тъ , пра́дѣднюю клѧ́твꙋ на́шꙋ ѡ҆чи́стилъ є҆сѝ . и҆ сᲂше́дъ во а҆́дъ , вѣ́чныѧ ᲂу҆́зники свᲂбᲂди́лъ є҆сѝ , нетлѣ́нїе да́рꙋѧ чл҃ческᲂмꙋ ро́дꙋ . сегѡ̀ ра́ди пᲂю́ще сла́вимъ , живᲂтвᲂрѧ́щеє и҆ спасе́ннᲂе твᲂѐ вᲂскрⷭ҇нїе .

и҆́ны стⷯры , прест҃ѣ́й бцⷣѣ . гла́съ , то́йже . поⷣ , зва́нныи свы́ше .= сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . И҆́=же бл҃гᲂче́стнѡ пᲂклᲂнѧ́ющихсѧ твᲂемꙋ̀ ржⷭ҇твꙋ̀ , ѿ всѧ́каго спасѝ навѣ́та вра́жїѧ , бг҃ᲂрᲂди́тельнице всенепᲂро́чнаѧ , ꙗ҆́кѡ пред̾ста́тельница ро́дꙋ на́шемꙋ . пᲂлꙋчи́вше тѧ ᲂу҆́бѡ ны́нѣ по́мᲂщь , всѝ стѧжа́хᲂмъ прибѣ́жище же и҆ ᲂу҆тверже́нїе , и҆ хᲂда́таицꙋ ко влⷣцѣ хрⷭ҇тꙋ̀ бг҃ꙋ . є҆го́же мᲂлѝ , дарᲂва́ти смире́нїе ми́рᲂви мо́лимсѧ , и҆ прегрѣше́нїе разрѣше́нїе , притека́ющимъ к̾ кро́вꙋ твᲂемꙋ̀ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . Сѐ стрꙋ́пы ѡ҆бнажа́ю ти дш҃и мᲂеѧ̀ , и҆ пᲂказꙋ́ю ти бѣ́днаѧ сᲂкрꙋше́нїѧ , ꙗ҆́же разбо́йницы налᲂжи́ша ми , лꙋка́вными по́мыслы , и҆ бѣсо́вскими крамᲂла́ми , влⷣчце пренепᲂро́чнаѧ , цѣли́телѧ дш҃а́мъ и҆ тѣ́лᲂмъ ро́ждьшаѧ , и҆сцѣле́нїе мѝ пᲂда́ждь си́хъ пᲂнᲂше́нїемъ , прᲂстира́ющи ма́сло милᲂсе́рдїѧ свᲂегѡ̀ и҆ бл҃гᲂсть , к̾ бл҃гᲂдᲂсто́инствꙋ , спасе́нїѧ и҆ и҆збавле́нїѧ .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Нескры́ю ѡ҆каѧ́нныи бѣды̀ мᲂеѧ̀ , ꙗ҆́кѡ всѧ̀ притѧжа́хъ , ꙗ҆́же ненави́дитъ бг҃ъ , пло́ть ѡ҆скверни́хъ , и҆ дх҃ъ мо́й , и҆ ᲂу҆́мнаѧ пᲂмышле́нїѧ , непᲂдо́бными дѣ́лы и҆ слᲂвесы̀ скве́рными . ꙗ҆зы́кѡмъ ѡ҆сꙋжда́ю сᲂгрѣша́ющихъ , са́мъ же лю́тѣйшаѧ дѣ́лаю . бг҃ᲂрᲂди́тельнице всѣ́хъ ми да́ждь си́хъ и҆справле́нїе , да и҆стрезви́всѧ ѕлы́хъ мᲂи́хъ ѡ҆бы́чай , припа́даю и҆ пла́чꙋсѧ , ѡ҆ ни́хже бѣ́дно сᲂдѣ́ѧхъ в̾ жи́зни мᲂе́й хᲂжде́нїемъ .

сла́ва , и҆ нн҃ѣ , боⷢ҇ . Грѣхѝ ꙗ҆́же сᲂдѣ́ѧхъ вѣ́си и҆ без̾зако́нїѧ мᲂѧ̀ , и҆́ми же пᲂпеко́хсѧ . и҆ сегѡ̀ ра́ди припа́даю ти , пᲂми́лꙋй мѧ мт҃и бж҃їѧ всенепᲂро́чнаѧ влⷣчце . не ѿри́ни ᲂу҆́бѡ менѐ , нижѐ пᲂсрами́ мѧ , грѣ́шникᲂмъ пᲂмо́щнице . смире́ннᲂе ми и҆ ѡ҆мраче́ннᲂе срⷣце прᲂсвѣтѝ . слеза́ми ѡ҆чи́сти и҆ пла́чемъ и҆ стᲂна́нїемъ , и҆ по́мыслы ᲂу҆миле́нїѧ , да и҆з̾бѣ́гнꙋ ѻ҆гнѧ̀ непᲂстᲂѧ́ннагѡ и҆ черве́й . пре́жде кᲂнца̀ ᲂу҆́бѡ всестрастна́ѧ дш҃е , ᲂу҆скᲂрѝ и҆ пᲂка́йсѧ те́плѣ , и҆ слезѧ́щи зᲂвѝ , бцⷣе ты́ мѧ ᲂу҆ще́дри .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . є҆ктенїѧ̀ , и҆ =ѿпꙋ́стъ .

ВЪ СУБО́ТУ НА ВЕЛИ́ЦѢЙ ВЕЧЕ́РНИ

нача́ло твᲂри́мъ все́й вече́рнѣй слꙋ́жбѣ , ꙗ҆́кᲂже ᲂу҆ка́зано , въ а҃ мъ гла́сѣ . на́ гдⷭ҇и вᲂзва́хъ , стⷯры вᲂскрⷭ҇ны . гла́съ , д҃ . твᲂре́нїе , і҆ѡа́нна дамаски́на . и҆ пᲂе́мъ , стихѡ́въ , і҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . Ж=ивᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшеє чл҃ческᲂе є҆стество̀ всеси́льне . и҆ є҆́же на небеса̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Дре́ва преслꙋша́нїѧ запреще́нїе , разрѣши́лъ є҆сѝ сп҃се , на́ древѣ крⷭ҇тнѣмъ во́лею пригво́ждьсѧ . и҆ во а҆́дъ сᲂше́дъ си́льне , сме́ртыѧ ᲂу҆́зы ꙗ҆́кѡ бг҃ъ растерза́лъ є҆сѝ . сегѡ̀ ра́ди кла́нѧемсѧ , є҆́же и҆з̾ ме́ртвыхъ твᲂемꙋ̀ вᲂскрⷭ҇нїю , ра́дᲂстїю вᲂпїю́ще , всеси́льне гдⷭ҇и сла́ва тебѣ̀ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Врата̀ а҆́дᲂва сᲂкрꙋши́лъ є҆сѝ гдⷭ҇и , и҆ свᲂе́ю сме́ртїю , сме́ртнᲂе црⷭ҇тво разрꙋши́лъ є҆сѝ . ро́дъ же чл҃ческїи и҆з̾ и҆стлѣ́нїѧ свᲂбо́ждь , живо́тъ и҆ нетлѣ́нїе ми́рꙋ дарᲂва̀ , и҆ ве́лїю млⷭ҇ть .

и҆́ны стⷯры , твᲂре́нїе а҆нато́лїѧ , патрїа́рха цр҃ѧ гра́да . =запѣ́в̾ : бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . П=рїидѣ́те лю́дїє вᲂспᲂе́мъ сп҃сᲂво тридне́внᲂе вᲂста́нїе , и҆́мже и҆зба́вихᲂмсѧ ѿ а҆́дᲂвыхъ нерѣши́мыхъ ᲂу҆́зъ . нетлѣ́нїе и҆ жи́знь всѝ вᲂспрїѧ́хᲂмъ зᲂвꙋ́ще , распны́исѧ и҆ пᲂгребы́исѧ и҆ вᲂскр҃сы́и , спасѝ на́съ вᲂскрⷭ҇нїемъ сѝ , є҆ди́не чл҃кᲂлю́бче .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . А҆́нг҃ли и҆ чл҃цы сп҃се , твᲂѐ пᲂю́тъ тридне́внᲂе вᲂста́нїе , и҆́мже ѡ҆зари́шасѧ вселе́нныѧ кᲂнцы̀ . и҆ ѿ рабо́ты вра́жїѧ , всѝ и҆зба́вихᲂмсѧ зᲂвꙋ́ще , живᲂтво́рче всеси́льне сп҃се , спасѝ на́съ вᲂскрⷭ҇нїемъ сѝ , є҆ди́не чл҃кᲂлю́бче .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Врата̀ мѣ́днаѧ сᲂкрꙋши́лъ є҆сѝ , и҆ вереѝ сте́рлъ є҆сѝ хрⷭ҇тѐ бж҃е , и҆ ро́дъ чл҃ческїи па́дшїи вᲂскр҃си́лъ є҆сѝ . сегѡ̀ ра́ди сᲂгла́снѡ вᲂпїе́мъ ти , вᲂскр҃сы́и и҆з̾ ме́ртвыхъ , гдⷭ҇и сла́ва тебѣ̀ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Гдⷭ҇и , є҆́же ѿ ѻ҆ц҃а твᲂѐ ржⷭ҇тво̀ , без̾лѣ́тно є҆́сть и҆ сᲂприснᲂсꙋ́щно . и҆ є҆́же ѿ дв҃ы вᲂплᲂще́нїе , неи҆зрече́ннѡ чл҃кѡмъ и҆ несказа́ннѡ . и҆ є҆́же во а҆́дъ сше́ствїе , стра́шнѡ дїа́вᲂлꙋ и҆ а҆́ггелѡмъ є҆гѡ̀ . сме́рть бо пᲂпра́въ , тридне́вно вᲂскр҃се , нетлѣ́нїе пᲂдаѧ̀ чл҃кѡмъ , и҆ ве́лїю млⷭ҇ть .

та́же , в̾ =минѣ́и , стихѣ́ры , ст҃о́мꙋ . сла́ва , ст҃о́мꙋ , а҆́ще и҆́мать . а҆́ще ли нѝ . сла́ва , и҆ нн҃ѣ , боⷢ҇ , гла́сꙋ . =и҆́ны , стⷯры , бцⷣѣ , пᲂе́мъ и҆́хъ и҆дѣ́же нѣ́сть минѣ́и . твᲂре́нїе , па́вла а҆мᲂре́йскагѡ . гла́съ , и҃ . =запѣ́въ : ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Т=ебѐ вѣ́рнымъ пᲂкро́въ пᲂказа̀ , и҆́же всѧ́ческихъ бг҃ъ , вᲂпло́щьсѧ ѿ крᲂве́й твᲂи́хъ бцⷣе всечⷭ҇таѧ . и҆ пред̾ста́тельницꙋ и҆ пᲂбо́рницꙋ , сꙋ́щимъ в̾ нꙋ́ждахъ и҆ ѡ҆бстᲂѧ́нїихъ , и҆ в̾ бꙋ́ри приста́нище бл҃гᲂꙋти́шнᲂе . ты̀ ᲂу҆́бѡ спасѝ ѿ всѧ́кїѧ ско́рби и҆ тꙋгѝ , всѣ́хъ притека́ющихъ , к̾ бжⷭ҇твенᲂмꙋ пᲂкро́вꙋ твᲂемꙋ̀ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїє . Да прᲂславлѧ́ю и҆ пᲂчита́ю , да чтꙋ̀ и҆ пᲂю̀ , да вᲂспѣва́ю всегда̀ твᲂѐ бжⷭ҇твенᲂе и҆́мѧ , пребл҃же́ннаѧ влⷣчце , да мѧ̀ неѡ҆ста́виши враго́мъ ра́дᲂванїе бы́ти , пᲂкро́вꙋ твᲂемꙋ̀ притека́ющаго , но кри́лы честны́хъ мл҃твъ твᲂи́хъ всегда̀ цѣ́ла мѧ сᲂхранѝ , ѿ всѣ́хъ и҆скꙋше́нїй .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Ра́дꙋисѧ бг҃ᲂмт҃и пречⷭ҇таѧ . ра́дꙋисѧ вѣ́рнымъ наде́жде , ра́дꙋисѧ ми́рꙋ ѡ҆чище́нїе . ра́дꙋисѧ и҆збавлѧ́ющаѧ всѧ́кихъ скᲂрбе́й рабы̀ свᲂѧ̀ , ꙗ҆́же сме́рти разрꙋши́тельнице . ра́дꙋисѧ живᲂтᲂно́снаѧ , ра́дꙋисѧ ᲂу҆тѣ́шительнице . ра́дꙋисѧ застꙋ́пнице , ра́дꙋисѧ прибѣ́жище .

сла́ва , и҆ ны́нѣ , боⷢ҇ . гла́съ , д҃ . И҆́же тебѐ ра́ди бг҃ᲂѻ҆ц҃ъ прᲂро́къ давы́дъ , пѣ́сненно ѡ҆ тебѣ̀ прᲂвᲂз̾гласѝ , вели́чїѧ ти сᲂтво́ршꙋ , пред̾ста̀ цр҃ца ѡ҆деснꙋ́ю тебѐ , тебе́ бо мт҃рь хᲂда́тайцꙋ живᲂтꙋ̀ пᲂказа̀ , и҆́же без̾ ѻ҆ц҃а и҆з̾ тебѐ вᲂчл҃читисѧ бл҃гᲂи҆зво́ли бг҃ъ , да сво́й па́ки ѡ҆бнᲂви́тъ ѻ҆́бразъ и҆стлѣ́вшїи страстьмѝ , и҆ заблꙋ́ждьшеє вᲂлкᲂхи́щнᲂе ѻ҆вча̀ ѡ҆брѣ́тъ , на ра́мо вᲂспрїи́мъ , ко ѻ҆ц҃ꙋ принесѐ , и҆ к̾ свᲂемꙋ̀ хᲂтѣ́нїю , с̾ нбⷭ҇ными сᲂвᲂкꙋпи́тъ си́лами . и҆ спасе́тъ бцⷣею ми́ръ хрⷭ҇то́съ , и҆мѣ́ѧи ве́лїю и҆ бᲂга́тꙋю млⷭ҇ть .

та́же , вы́хᲂдъ съ кади́лᲂмъ .= и҆ с=вѣ́те ти́хїи . прᲂки́менъ , дню̀ , =и҆ =є҆ктенїѧ̀ .

на стихо́внѣ , стⷯра , вᲂскрⷭ҇на . гла́съ , д҃ . Гдⷭ҇и вᲂз̾ше́дъ на́ крⷭ҇тъ , пра́дѣднюю клѧ́твꙋ на́шꙋ ѡ҆чи́стилъ є҆сѝ . и҆ сᲂше́дъ во а҆́дъ , вѣ́чныѧ ᲂу҆́зники свᲂбᲂди́лъ є҆сѝ , нетлѣ́нїе да́рꙋѧ чл҃ческᲂмꙋ ро́дꙋ . сегѡ̀ ра́ди пᲂю́ще сла́вимъ , живᲂтвᲂрѧ́щеє и҆ спасе́ннᲂе твᲂѐ вᲂскрⷭ҇нїе .

и҆́ны , стⷯры , а҆́зъ вѣ́ди . сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Пᲂвѣ́шенъ на́ древѣ є҆ди́не си́льне , всю̀ тва́рь пᲂкᲂлѣба́лъ є҆сѝ , пᲂлᲂжи́вжесѧ во́ грᲂбѣ , живꙋ́щїѧ во грᲂбѣ́хъ вᲂскр҃си́лъ є҆сѝ , нетлѣ́нїе и҆ жи́знь да́рꙋѧ чл҃ческᲂмꙋ ро́дꙋ . тѣ́мже пᲂю́ще сла́вимъ тридне́внᲂе твᲂѐ вᲂста́нїе .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Лю́дїє пребез̾зако́ннїи хрⷭ҇тѐ , тебѐ преда́вше пила́тꙋ , распѧ́ти ѡ҆сꙋди́ша , неразꙋ́мнїи ѡ҆ бл҃гᲂдѣѧ́нїи ꙗ҆́вльшесѧ . но во́лею претерпѣ́въ пᲂгребе́нїе самᲂвла́стно , тридне́вно є҆сѝ вᲂскр҃слъ ꙗ҆́кѡ бг҃ъ , да́рꙋѧ на́мъ без̾кᲂне́чныи живо́тъ , и҆ ве́лїю млⷭ҇ть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Со слеза́ми жены̀ дᲂше́дше гро́ба , тебѐ и҆ска́хꙋ . не ѡ҆брѣ́тше же , рыда́юще с̾ пла́чемъ вᲂпїѧ́хꙋ глаго́люще , ᲂу҆вы̀ на́мъ сп҃се на́шъ цр҃ю всѣ́хъ , ка́кѡ ᲂу҆кра́денъ бы́сть ; ко́еже мѣ́сто держи́тъ , живᲂно́снᲂе тѣ́ло твᲂѐ ; а҆́нг҃лъ же к̾ ни́мъ ѿвѣща̀ , непла́чите речѐ , но ше́дше прᲂпᲂвѣ́дите , ꙗ҆́кѡ вᲂскр҃се гдⷭ҇ь , пᲂдаѧ̀ на́мъ ра́дᲂсть , ꙗ҆́кѡ є҆ди́нъ милᲂсе́рдъ .

сла́ва . самᲂгла́снꙋ стⷯрꙋ , ст҃о́мꙋ , а҆́ще и҆́мать . и҆ ны́нѣ , боⷢ҇ , прѧ́мѡ гла́сꙋ , стⷯры , дᲂгма́тикъ пᲂслѣ́днїи . а҆́ще ли не и҆́мать : сла́ва , и҆ нн҃ѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ на ны̀ ѡ҆бстᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мᲂли́твꙋ тебѣ̀ вᲂпїю́щихъ , ра́дꙋйсѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , гла́съ , д҃ . свѣ́тлꙋю вᲂскрⷭ҇нїѧ .= сла́ва , и҆ нн҃ѣ , боⷢ҇ , пи́санъ , на ᲂу҆́трени . та́же , ѿ=пꙋ́стъ .

Въ сꙋбо́тꙋ на па́вечерницѣ , нача́ло ѡ҆бы́чно , ꙗ҆́кᲂже ᲂу҆ка́зано , в̾ пе́рвᲂмъ гла́сѣ . Кано́нъ , прест҃ѣ́й бцⷣѣ . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡбра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть . запѣ́въ : прест҃а́ѧ гжⷭ҇е бцⷣе спасѝ на́съ . Ꙗ҆́же є҆ди́на в̾ напа́стѣхъ и҆ ско́рбѣхъ защища́ющи , и҆́же пᲂд̾ кро́въ тво́й пречⷭ҇таѧ , прибѣга́ющаго те́плѣ , прїимѝ ꙗ҆́кѡ пребл҃га , є҆́же ѿ срⷣца мᲂегѡ̀ мᲂле́нїе . Приста́нище невла́емо ѡ҆брѣ́тъ тѧ неразꙋ́мныи , напа́стныѧ же и҆ нꙋ́жныѧ прило́ги ѿрѣва́ѧ , и҆ бл҃гᲂда́рнᲂе пᲂю́ ти вᲂспѣва́нїе , бг҃ᲂмꙋ́жнаѧ рᲂди́тельнице . сла́ва . Млⷭ҇тивнымъ и҆ кро́ткимъ сѝ ѻ҆́кᲂмъ бг҃ᲂрᲂди́тельнице зрѧ́щи мѧ , во ѡ҆бстᲂѧ́нїи же и҆ ско́рби ѡ҆держи́ма , вско́рѣ свᲂбᲂдѝ . тѧ́ бо призыва́ю на́ пᲂмᲂщь . и҆ нн҃ѣ . Преклᲂне́на мѧ влⷣчце скᲂрбьмѝ нꙋ́жными лю́тѣ , ꙗ҆́кѡ млⷭ҇тива є҆ди́на бл҃га́ѧ пред̾ста́тельница рабо́мъ сѝ , рꙋ́кꙋ мᲂльбы̀ прᲂстрѝ , и҆ лю́тыхъ бѣ́дъ и҆зба́ви мѧ .

пѣ́снь , г҃ . і҆рмо́съ . Лꙋ́къ си́льныхъ и҆знемо́же , а҆ не́мᲂщнїи препᲂѧ́сашасѧ си́лᲂю . сегѡ̀ ра́ди вᲂз̾весели́сѧ , ѡ҆́ гдⷭ҇ѣ срⷣце мᲂѐ . Ѻ҆рꙋ́жїе крѣ́пко , и҆ стѣ́нꙋ тѧ̀ стѧжа́въ а҆́зъ , пᲂбѣжда́ю сᲂпрᲂти́вныхъ пᲂлкѝ , и҆ пᲂю̀ вели́чїѧ твᲂѧ̀ бцⷣе неи҆скꙋсᲂбра́чнаѧ . Пе́щь разᲂрѧ́еши печа́лемъ , и҆ пᲂгаша́еши ѿча́ѧнїѧ зно́й . кто́ бо та́кѡ ꙗ҆́кᲂже ты̀ дв҃о бцⷣе , ᲂу҆пᲂва́нїе на́ше . сла́ва . Внꙋшѝ гла́съ раба̀ твᲂегѡ̀ , твᲂеѧ̀ тре́бꙋюща по́мᲂщи бг҃ᲂмт҃и . ᲂу҆пᲂва́нїе мᲂѐ ᲂу҆слы́ши мѧ , и҆ напа́стей мѧ и҆схи́ти . и҆ ны́нѣ . Прїи́де ѿ прегрѣше́нїи мно́жествъ мꙋчи́тельство на́мъ , нᲂсѧ̀ сме́рть па́гꙋбнꙋю , но спасѝ свᲂѧ̀ рабы̀ бцⷣе , ты́ бо мо́жеши .

пѣ́снь , д҃ . і҆рмо́с̾ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Пᲂбѣ́ждьши враждꙋ́ющїѧ мнѣ̀ всꙋ́е , ꙗ҆́кѡ дш҃ꙋ мᲂю̀ тща́щесѧ лю́тѣ прїѧ́ти , сᲂхрани́ мѧ влⷣчце , пᲂми́лꙋй и҆ спасѝ , к̾ тебѣ́ бо прибѣга́ю ра́бъ тво́й . И҆збавлѧ́ющи мѧ̀ ѿ ꙗ҆зы́ка льстивᲂглаго́лива , бл҃га́ѧ застꙋ́пнице мᲂѧ̀ , без̾па́кᲂстна пᲂкажѝ и҆ жите́йскихъ дѣѧ́нїи , мно́го бо мо́жеши ꙗ҆́кѡ зижди́телѧ мт҃и сꙋ́щи . сла́ва . Без̾бᲂлѣ́зненꙋ вѣ́дыи тѧ̀ цѣле́бницꙋ немᲂщны́и , дх҃ᲂмъ и҆ ᲂу҆сты̀ зᲂвꙋ̀ , и҆сцѣли́ мѧ влⷣчце , пᲂми́лꙋй и҆ спасѝ , к̾ тебѣ́ бо прибѣга́ю ра́бъ тво́й . и҆ нн҃ѣ . Неѡ҆ста́ви менѐ напа́стемъ пре́данꙋ бы́ти , мт҃и бг҃а на́шегѡ , но ѿ всѧ́кїѧ ско́рби и҆ ѕло́бы чл҃чи , сᲂхранѝ неврежде́на , ты́ бо є҆сѝ пᲂмо́щница всѣ́мъ на́мъ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . И҆спра́ви чⷭ҇таѧ мл҃твꙋ раба̀ твᲂегѡ̀ ко́ гдⷭ҇ꙋ сн҃ꙋ твᲂемꙋ̀ , да ѡ҆брѧ́щꙋ разрѣше́нїе , мно́гимъ мᲂи́мъ прегрѣше́нїемъ . И҆зба́ви мѧ стрⷭ҇те́й и҆ бѣ́дъ , бг҃ᲂневѣ́сто , тѧ́ бо пᲂлᲂжѝ бг҃ъ ѡ҆чище́нїе вᲂи́стинꙋ мᲂемꙋ̀ смире́нїю . сла́ва . Пᲂкро́въ мо́й ты̀ є҆сѝ , и҆ прⷭ҇нᲂе хвале́нїе ѽ влⷣчце бцⷣе , непрезира́еши бо ника́кᲂже , и҆́же к̾ тебѣ̀ прибѣга́ющихъ . и҆ ны́нѣ . Пᲂми́лꙋй чи́стаѧ чтꙋ́щихъ ржⷭ҇тво̀ твᲂѐ , и҆ и҆зба́ви мꙋчи́тельства , и҆ го́рести чл҃ческїѧ , и҆́бо и҆́маши є҆́же мᲂщѝ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Крѣ́пᲂсть ми сама̀ є҆сѝ пречⷭ҇таѧ влⷣчце , во ѡ҆брѣ́тшихъ мѧ ѕѣлѡ̀ , ненача́ѧнныхъ ско́рбехъ , и҆ вᲂпїю́ ти , ꙗ҆́кѡ ве́лїѧ є҆сѝ пᲂкрᲂви́тельница рабꙋ̀ твᲂемꙋ̀ . И҆сцѣлѝ дш҃е́вныѧ ми ꙗ҆́звы пречⷭ҇таѧ , застꙋпи́ мѧ дв҃це , и҆ и҆зба́ви ѿ ѡ҆клевета́нїѧ и҆ навѣ́та , и҆ раз̾враще́нїѧ непра́ведна раба̀ твᲂегѡ̀ . сла́ва . Сᲂкрꙋшѝ и҆́же на мѧ̀ прⷭ҇нѡ прибѣга́ющаго к̾ тебѣ̀ , навѣ́тники непра́ведныѧ , и҆ неѡ҆ста́ви менѐ пᲂги́бнꙋти , ꙗ҆́кѡ всѧ̀ тебѣ̀ вᲂзмо́жна чи́стаѧ , ꙗ҆́кѡ бг҃ᲂѻ҆трᲂкᲂви́цѣ . и҆ ны́нѣ . Пᲂбѣдѝ дш҃и мᲂеѧ̀ свирѣ́пꙋю вᲂлнꙋ̀ , ꙗ҆́кѡ мно́жество прегрѣше́нїи , и҆ напа́стей и҆ скᲂрбе́й влⷣчце вᲂста́ша на мѧ̀ , но сама́ мѧ спасѝ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , д҃ . Мно́гими прегрѣше́нїи , а҆́зъ блꙋ́дныи ᲂу҆́мъ пᲂмрачи́въ , вᲂпїю̀ твᲂемꙋ̀ крѣ́пкᲂмꙋ застꙋпле́нїю бцⷣе , прᲂсвѣтѝ дш҃и мᲂеѧ̀ зѣ́ницы , вᲂсїѧ́й ми пᲂкаѧ́нїѧ свѣ́тлꙋю зарю̀ , и҆ ѡ҆блецы́ мѧ во ѻ҆рꙋ́жїе свѣ́та бг҃ᲂрᲂди́тельнице чⷭ҇таѧ .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и ᲂу҆би́въ , ꙗ҆́же без̾ пра́вды пра́ведныѧ ᲂу҆лᲂвлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . И҆́же ѿ а҆га́рѧнъ наси́лᲂванїе , ско́ро пᲂтре́бльши , мече́мъ мᲂли́твъ твᲂи́хъ мр҃і́е , лю́ди же и҆ ста́до свᲂѐ сᲂхранѝ , сн҃ꙋ твᲂемꙋ̀ зᲂвꙋ́щихъ , бж҃е ѻ҆ц҃ъ на́шихъ блгⷭ҇ве́нъ є҆сѝ . Равнᲂлѣ́пнаѧ ски́нїе , прїими́ мѧ к̾ тебѣ̀ прибѣга́ющаго , да непрїи́метъ мѧ вра́гъ пᲂгꙋби́ти хᲂтѧ̀ , зᲂвꙋ́щаго , превᲂзнᲂси́мыи бж҃е ѻ҆ц҃ъ на́шихъ бл҃гᲂслᲂве́нъ є҆сѝ . сла́ва . Бг҃ᲂрᲂди́тельнице мр҃і́е , пред̾варѝ раба̀ твᲂегѡ̀ вско́рѣ , в̾ тревᲂлне́нїихъ напа́стей пᲂтᲂплѧ́ема , и҆ неи҆мꙋ́щаго по́мᲂщи . зᲂвꙋ̀ ᲂу҆́бѡ , ᲂу҆пᲂва́нїе кᲂнце́мъ пᲂми́лꙋй мѧ̀ . и҆ ны́нѣ . Чл҃ческїѧ по́мыслы ꙗ҆́кѡ грѣхо́мъ вино́вны , ны́нѣ бцⷣе бл҃га́ѧ разᲂрѝ бжⷭ҇твеными тѝ мл҃твами , и҆ рабы̀ твᲂѧ̀ и҆зба́ви , бᲂлѣ́зненыѧ напа́сти , и҆ всѧ́кᲂгѡ вре́да .

пѣ́снь , и҃ . і҆рмо́с̾ . И҆зба́вителю всѣ́хъ всеси́льне , пᲂсредѣ̀ пла́мене бл҃гᲂче́ствᲂвавшїѧ сше́дъ ѡ҆рᲂси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гᲂслᲂви́те гдⷭ҇нѧ гдⷭ҇а . На́йде на ны̀ ꙗ҆зы́къ без̾зако́ненъ , хвалѧ́сѧ пᲂгꙋби́ти слꙋжи́тели твᲂѧ̀ . є҆го́же пᲂтре́бльши пречⷭ҇таѧ , взыва́ющїѧ пᲂкры́й , всѧ̀ дѣ́ла блгⷭ҇ви́те гдⷭ҇нѧ гдⷭ҇а . Мно́гїѧ твᲂѧ̀ щедро́ты , млⷭ҇тивнѡ на́съ спаса́ютъ , є҆ди́на бг҃ᲂмт҃и , ѿ грѣхо́внагѡ сꙋда̀ , и҆ разли́чныхъ напа́стей . ты́ бо ро́ждьши бг҃а , ми́лꙋеши ми́ръ є҆гѡ̀ . сла́ва . Ꙗ҆́кѡ ты́ ми є҆сѝ крѣ́пᲂсть и҆ по́мᲂщь , небᲂю́сѧ вра́гъ негᲂдᲂва́нїѧ . но пᲂю́ тѧ влⷣчце , и҆ вᲂпїю̀ сн҃ꙋ твᲂемꙋ̀ , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а . и҆ нн҃ѣ . На мᲂльбꙋ̀ мᲂю̀ ны́нѣ ᲂу҆милᲂсе́рдисѧ , и҆ ра́дᲂсть в̾ печа́ли мѣ́стѡ да́рꙋй мѝ . да пᲂю́ тѧ влⷣчце , и҆ вᲂпїю̀ сн҃ꙋ твᲂемꙋ̀ , всѧ̀ дѣ́ла бл҃гᲂслᲂви́те гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Є҆́вва ᲂу҆́бѡ недꙋ́гᲂмъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прᲂзѧбе́нїемъ прижи́тїѧ твᲂегѡ̀ , ми́рᲂви бл҃гᲂслᲂве́нїе прᲂцвѣла̀ є҆сѝ . тѣ́мъ тѧ̀ всѝ велича́емъ . Ѻ҆рꙋ́жїе ᲂу҆́бѡ на ны̀ ѡ҆бᲂстри́въ , сᲂвѣщава́етъ льсти́выи а҆ра́влѧнинъ без̾зако́нныи . ты́ же дв҃о бцⷣе си́лᲂю крⷭ҇та̀ и҆ мл҃твъ твᲂи́хъ , вᲂѡ҆рꙋжа́еши на́нь рабы̀ твᲂѧ̀ . тѣ́мже прᲂпᲂвѣ́даемъ сла́вꙋ твᲂю̀ . Крѣ́пᲂсть ᲂу҆́бо тᲂбо́ю на врагѝ даде́сѧ влⷣчце , и҆ и҆збавле́нїе мѝ ѿ бѣ́дъ . что́же а҆́зъ тебѣ̀ принесꙋ̀ ; недᲂвѣ́де , ѻ҆ба́че є҆́же и҆́мамъ бл҃гᲂдаре́нїе принᲂша́ю ти , прїимѝ сїѐ ны́нѣ и҆ спаси́ мѧ . сла́ва . Ѽ мт҃и всѧ́ческихъ твᲂрца̀ всесвѣ́тлаѧ , печа́льныхъ ᲂу҆тѣ́ха , пᲂтᲂплѧ́емымъ пред̾ста́тельнице , и҆ пренемᲂга́ющимсѧ застꙋ́пнице , до живᲂта̀ мᲂегѡ̀ ты́ мѧ сᲂхранѝ . и҆ нн҃ѣ . Оу҆тѣшьнѧ́ема мѧ̀ грѣхѝ мно́гими и҆ бѣда́ми , непре́зри менѐ всепѣ́таѧ ны́нѣ , тебѣ̀ хвале́нїѧ же́ртвꙋ принᲂшꙋ̀ , прилѣ́жнѡ взыва́ѧ тѝ , ст҃а́ѧ бцⷣе пᲂмᲂзи́ ми . тѧ́ бо сла́влѧ пѣ́снь скᲂнчева́ю .

та́же , дᲂсто́йно є҆́сть . трⷭ҇то́е , и҆ по ѻ҆́ч҃е на́шъ , кᲂнда́къ , гла́сꙋ . гдⷭ҇и пᲂми́лꙋй , м҃ . про́чеє , ѡ҆бы́чно . та́же , ѿпꙋ́стъ . и҆ прᲂще́нїе .

Въ недѣ́лю , пᲂлꙋ́нᲂщница , вᲂскрⷭ҇на . нача́ло ѡ҆бы́чно , ꙗ҆́кᲂже ᲂу҆ка́зано , в̾ пе́рвᲂмъ гла́сѣ . =Кано́нъ , ст҃ѣ́й живᲂнача́льнѣй трⷪ҇цѣ . є҆мꙋ́же краегране́сїе , четве́ртᲂе пѣ́нїе бг҃ꙋ . твᲂре́нїе митрᲂфа́на , патрїа́рха цр҃ѧ гра́да . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡбра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть . =запѣ́въ : прест҃а́ѧ трⷪ҇це бж҃е на́шъ сла́ва тебѣ̀ . Трⷪ҇цꙋ бг҃ᲂнача́льнꙋю да прᲂсла́вимъ сᲂста́вы , є҆ди́нственᲂе же є҆стество̀ трїе́хъ , сᲂприснᲂсꙋ́щнꙋю сᲂпресто́льнꙋю . ю҆́же мᲂлѧ́ще гл҃емъ , спасѝ и҆́же вѣ́рᲂю тебѐ чтꙋ́щихъ . Пᲂма́засѧ ѿ ѻ҆ц҃а дх҃ᲂмъ ра́дᲂсти , бг҃ᲂдѣ́льнымъ є҆ле́ѡмъ , сн҃ъ , и҆ челᲂвѣ́къ бы́сть , и҆ є҆ди́нᲂгѡ бжⷭ҇тва̀ , трисᲂста́внᲂе наꙋчи́лъ є҆́сть . сла́ва . Дᲂбро́тꙋ непристꙋ́пныѧ сла́вы твᲂеѧ̀ , є҆ди́нице трисл҃нечнаѧ , серафи́ми нетерпѧ́ще зрѣ́ти , спᲂкрыва́ютсѧ кри́лы , и҆ трист҃ы́ми пѣ́сньми непреста́ннѡ тебѐ сла́вѧтъ . и҆ ны́нѣ . Неи҆зрече́ннѡ твᲂрца̀ всѣ́хъ рᲂдила̀ є҆сѝ пречⷭ҇таѧ , и҆збавлѧ́ющаго дре́внїѧ клѧ́твы челᲂвѣ́ки , и҆ сме́ртныѧ тлѝ . и҆ тᲂбо́ю пᲂзна́хᲂмъ , є҆ди́нагѡ бг҃а трисᲂста́внагѡ .

пѣ́снь , г҃ . і҆рмо́съ . Немꙋ́дрᲂстїю ни си́лᲂю , ни бᲂга́тствᲂмъ хва́лимсѧ , но твᲂе́ю ѻ҆́ч҃ею сᲂста́внᲂю мꙋ́дрᲂстїю бж҃їею . ꙗ҆́кѡ нѣ́сть ст҃а па́че тебѐ чл҃кᲂлю́бче . Си́лꙋ свы́ше ст҃ы́мъ твᲂи́мъ пре́жде а҆пⷭ҇лѡмъ , ꙗ҆́кѡ пᲂсла́лъ є҆сѝ хрⷭ҇тѐ , ѿ ѻ҆ц҃а ᲂу҆тѣ́шителѧ , є҆ди́но ꙗ҆ви́лъ є҆сѝ є҆стество̀ трисл҃нечнᲂе . Патрїа́рхꙋ а҆враа́мꙋ , є҆гда̀ ꙗ҆ви́сѧ во ѻ҆́бразѣ мꙋ́жестѣ , тро́ичнаѧ є҆ди́нице , непремѣ́ннᲂе пᲂказа́ла є҆сѝ твᲂеѧ̀ бл҃гᲂсти гдⷭ҇ьства . сла́ва . И҆́же в̾ ли́цѣхъ трїе́хъ , є҆ди́нъ бг҃ъ вѣ́рꙋемыи , неѡ҆пи́санъ ꙗ҆́вѣ , недᲂмы́слимыи всѣ́ми , и҆зба́ви дш҃а на́ша ѿ всѧ́кїѧ ско́рби . и҆ ны́нѣ . Наста́вльшесѧ сн҃а твᲂегѡ̀ премꙋ́дрыми приведе́ньми , є҆ди́нственᲂе и҆ трисвѣ́тлᲂе бг҃ᲂнача́лїе сла́вимъ , и҆ тебѐ блажи́мъ при́снѡ дв҃ꙋю .

Гдⷭ҇и пᲂми́лꙋй ,= гⷤ . сѣда́ленъ , гла́съ , д҃ . И҆́же є҆ди́нымъ манᲂве́нїемъ , и҆ пречⷭ҇тымъ сᲂвѣ́тᲂмъ ѻ҆ц҃а твᲂегѡ̀ и҆ дх҃а , со́здалъ є҆сѝ всѧ́ческаѧ , хрⷭ҇тѐ мнᲂгᲂми́лᲂстиве , распѧ́тїе прїѧ́тъ за́ рᲂдъ чл҃ческїи . тѣ́мже бл҃гᲂдарѧ́ще вᲂспѣва́емъ вᲂпїю́ще , пᲂми́лꙋй ста́до свᲂѐ , є҆ди́не чл҃кᲂлю́бче . =сла́ва , и҆ ны́нѣ , боⷢ҇ . Пᲂе́мъ тѧ̀ бг҃ᲂневѣ́сто мт҃и хрⷭ҇та̀ бг҃а , сла́вѧще ржⷭ҇тво̀ твᲂѐ непᲂсти́жимᲂе , и҆́мже и҆зба́вихᲂмсѧ пре́лести дїа́вᲂльскїѧ , и҆ всѣ́хъ напа́стей , влⷣчце бцⷣе . тѣ́мже вѣ́рᲂю вᲂпїе́мъ тѝ , пᲂми́лꙋй ста́до свᲂѐ , є҆ди́на всепѣ́таѧ .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Пресꙋ́щнꙋю трⷪ҇цꙋ , во є҆ди́ницѣ бжⷭ҇тва̀ и҆ гдⷭ҇ᲂнача́лїѧ , с̾ серафи́ми тебѐ сла́вимъ , ꙗ҆́кѡ нераздѣ́льно є҆стество̀ , ꙗ҆́кѡ несли́тно , ꙗ҆́кѡ равнᲂмо́щно сла́вᲂю , бж҃е непᲂсти́жиме . Раздѣле́на сꙋ́ща неи҆зрече́ннѡ , ли́цы бжⷭ҇тва̀ , и҆ сᲂєдинѧ́ема держа́вᲂю вкꙋ́пѣ є҆ди́нымъ гдⷭ҇ьствᲂмъ , беспредѣ́льна , є҆ди́на неѡ҆пи́сана , вᲂспѣва́емъ тѧ̀ твᲂрца̀ всеѧ̀ тва́ри . сла́ва . Оу҆́мъ без̾нача́льныи , сло́во рᲂдѝ неи҆з̾гл҃анно , и҆ бжⷭ҇твеныи дх҃ъ , равнᲂмо́щныи и҆спꙋстѝ . и҆ сегѡ̀ ра́ди трⷪ҇цꙋ є҆динᲂсꙋ́щнꙋю , вᲂспѣва́емъ тѧ̀ твᲂрца̀ всеѧ̀ тва́ри . и҆ ны́нѣ . Ви́димъ быва́ѧ дре́вними ѻ҆бра́знѡ пред̾вᲂзвѣсти́ло є҆́сть , є҆́же ѿ тебѐ дв҃о вᲂплᲂще́нїе , сло́во , но пᲂслѣ́жде ꙗ҆́вльсѧ чл҃кѡмъ , по и҆́стинѣ трисᲂста́вно є҆динᲂнача́лїе ꙗ҆вѝ .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бо бракᲂнеи҆скꙋси́маѧ дв҃це , прїѧ́тъ во ᲂу҆тро́бѣ надо всѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . Разꙋмѣ́вше ѿ вѣ́ры вседѣ́тельнагѡ бжⷭ҇тва̀ , є҆ди́но ᲂу҆́бѡ непристꙋ́пно сꙋщество̀ , три́же сᲂста́вы живᲂнача́льны сра́слены пᲂе́мъ , ѻ҆ц҃а и҆ сн҃а и҆ дх҃а ст҃а́гѡ , сᲂприснᲂсꙋ́щнᲂе бытїѐ . Свѣ́те трисл҃нечне , сꙋ́щественагѡ свѣ́та твᲂегѡ̀ вᲂсїѧ́й ми , є҆ди́нственᲂе бжⷭ҇тво̀ , несᲂзда́ннᲂе є҆стество̀ , свѣтᲂдѣ́йственыи и҆сто́чниче , всѧ́кїѧ свѣтᲂда́тельныѧ зарѝ , да сᲂзерца́ю твᲂю̀ дᲂбро́тꙋ неи҆зрече́ннꙋю . сла́ва . Ꙗ҆́кѡ є҆ди́нꙋ сꙋ́щꙋ сᲂдѣ́телю всѧ́ческихъ , и҆ сᲂдержи́телю , и҆ ко́рмчїи всепремꙋ́дрꙋ вᲂи́стинꙋ , и҆ жи́зни пᲂда́телю , вᲂпїе́мъ тѝ вѣ́рнѡ , влⷣко трисл҃нечне , пᲂю́щихъ тѧ̀ сᲂблюдѝ . и҆ ны́нѣ . Ѡ҆бᲂжи́ти хᲂтѧ̀ дре́вле и҆стлѣ́вшаго чл҃ка , є҆го́же за бл҃гᲂсть со́здавъ , сн҃ъ тво́й дв҃о , и҆ пᲂказа́въ ѻ҆́бразъ бжⷭ҇твенагѡ зра́ка , чл҃къ бы́сть и҆з̾ тебѐ , и҆ є҆ди́но трисл҃нечно бг҃ᲂнача́лїе прᲂпᲂвѣ́да .

пѣ́снь , ѕ҃ . і҆рмо́съ . Вᲂзᲂпи́лъ прᲂѡбразꙋ́ѧ пᲂгребе́нїе тридне́внᲂе , пррⷪ҇къ і҆ѡ́на в̾ ки́тѣ бг҃ꙋ мᲂлѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Ꙗ҆вѝ ѻ҆ц҃ъ и҆з̾глаго́лѧ сн҃ᲂвство̀ , и҆ дх҃ъ , ви́димъ хрⷭ҇тꙋ̀ крⷭ҇ти́вшꙋсѧ . сегѡ̀ ра́ди є҆ди́но тро́ично бг҃ᲂнача́лїе сла́вимъ . Ꙗ҆́кѡ ви́дѣвъ тѧ̀ трист҃ы́ми гла́сы вᲂспѣва́ема и҆са́їѧ , на высо́цѣ престо́лѣ сѣдѧ́ща тро́ичныи пᲂказа̀ є҆ди́нагѡ бг҃ᲂнача́лїѧ сᲂста́въ . сла́ва . Вᲂзвы́шено се́рдце пᲂкажѝ и҆ на́съ ра́бъ твᲂи́хъ , высо́кїи цр҃ю трисᲂста́вне , да твᲂеѧ̀ сла́вы зри́мъ ꙗ҆́снѡ свѣ́тлᲂсть . и҆ ны́нѣ . Сᲂгрѣши́хъ , но тебѐ не ѿстꙋпи́хъ ѡ҆каѧ́нныи . ᲂу҆ще́дри мѧ трисᲂста́вне є҆ди́но бжⷭ҇тво̀ честно́е , и҆ лю́таго мѧ̀ и҆зба́ви ѡ҆сꙋже́нїѧ , мᲂльба́ми бг҃ᲂѻ҆трᲂкᲂви́цы .

Гдⷭ҇и пᲂми́лꙋй ,= гⷤ . сѣда́ленъ , гла́съ , д҃ . Непᲂсти́жимыи бж҃е и҆ непристꙋ́пныи . и҆́же є҆ди́нъ є҆стество́мъ бл҃гъ же и҆ млрⷭ҇дъ , ѻ҆́ч҃е и҆ сн҃е и҆ д́ш҃е всест҃ы́и , сᲂблюдѝ и҆ ѡ҆ст҃ѝ , и҆́же вѣ́рᲂю вᲂпїю́щихъ в̾ цр҃кви ст҃ѣ́й твᲂе́й , в̾ нᲂщѝ и҆ во́ дни , и҆ непреда́ждь на́съ влⷣко враго́мъ , и҆́щꙋщимъ на́шꙋ пᲂги́бель . =сла́ва , и҆ ны́нѣ , боⷢ҇ . Непремᲂлчи́мъ при́снѡ дв҃о , бл҃гᲂда́рнѡ вᲂспѣва́ти ѿ срⷣца рабѝ твᲂѝ , твᲂѧ̀ млⷭ҇ти влⷣчце , зᲂвꙋ́ще и҆ гл҃юще , прест҃а́ѧ дв҃о пред̾варѝ и҆ и҆зба́ви , ѿ вра́гъ неви́димыхъ и҆ бѣ́дъ и҆ всѧ́кᲂгѡ преще́нїѧ . ты́ бо є҆сѝ на́ше застꙋпле́нїе .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , бл҃гᲂслᲂве́нъ є҆сѝ в̾ цр҃кви сла́вы твᲂеѧ̀ гдⷭ҇и . Въ чинꙋ̀ пᲂста́вленымъ небе́снымъ є҆стества́мъ , и҆ ᲂу҆́мнымъ чино́мъ правᲂсла́вныхъ всѝ земнᲂро́днїи пᲂдража́юще сла́вимъ є҆ди́но бжⷭ҇тво̀ в̾ трїе́хъ равнᲂдѣ́тельныхъ сᲂста́вѣхъ . Рѣ́чи ст҃ы́хъ прᲂро́къ , тѧ̀ дре́вле ѻ҆бра́знѡ є҆ди́наго прᲂѧви́ша вѣкѡ́въ всѣ́хъ твᲂри́тельна , неи҆зрече́нна бг҃а и҆ гдⷭ҇а , бг҃ᲂнача́льными тремѝ сᲂста́вы . сла́ва . Сла́вᲂю и҆ че́стїю пᲂклᲂнѧ́емсѧ трⷪ҇цѣ пресᲂверше́нѣй , во є҆ди́нᲂй во́ли тремѝ сли́чїи . є҆ю́же сᲂстᲂи́тсѧ тва́рь всѧ̀ блюдо́ма , вᲂста́нїемъ хрⷭ҇та̀ бл҃гᲂслᲂве́нагѡ бг҃а . и҆ ны́нѣ . И҆́же по сꙋществꙋ̀ неви́димᲂе сло́во , и҆ вседѣ́тельнᲂе , ꙗ҆ви́лсѧ є҆сѝ чл҃кѡмъ , ѿ чи́стыѧ бг҃ᲂмт҃ре челᲂвѣ́къ , чл҃ка призыва́ѧ к̾ прича́стїю хрⷭ҇тѐ твᲂегѡ̀ бжⷭ҇тва̀ .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Свѣ́те є҆ди́нственыи и҆ трисїѧ́нныи , сꙋщество̀ без̾нача́льнᲂе , дᲂбро́то недᲂвѣ́дᲂмаѧ , в̾ срⷣцы мᲂе́мъ всели́сѧ , и҆ хра́мъ твᲂегѡ̀ бжⷭ҇тва̀ свѣтᲂви́денъ и҆ чи́стъ пᲂкажи́ мѧ , зᲂвꙋ́ща , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Ѿ разли́чныхъ мѧ̀ страсте́й , ѡ҆мраче́нїѧ и҆ прегрѣше́нїѧ и҆зба́ви , трⷪ҇це нераздѣ́льнаѧ , є҆ди́нице несли́тнаѧ , и҆ ѡ҆зарѝ лꙋча́ми твᲂи́ми бг҃ᲂдѣ́тельными , да зрю̀ твᲂю̀ сла́вꙋ , и҆ вᲂспѣва́ю тѧ̀ сла́вы гдⷭ҇а . сла́ва . Кто̀ и҆зрещѝ мо́жетъ , и҆лѝ разꙋмѣ́ти бг҃а кᲂгда̀ в̾ сꙋществѣ̀ бж҃їи ; є҆го́же ни а҆́нг҃ли всѝ , ни а҆рха́нг҃ли мо́гꙋтъ и҆спᲂвѣ́дати дᲂсто́йнѡ . ты́ бо и҆зше́дъ ѿ сꙋщества̀ ѻ҆́ч҃а , разᲂрѝ врага̀ вᲂста́нїемъ свᲂи́мъ . и҆ ны́нѣ . Оу҆́мъ ᲂу҆́бѡ нерᲂжде́нныи ѻ҆ц҃ъ , и҆ сло́во сᲂѡ҆бра́знѡ , и҆ дх҃ъ сᲂпрⷭ҇то́ленъ . сꙋщество̀ . си́ла , бытїѐ . пресꙋ́щнаѧ неи҆зрече́ннаѧ , великᲂдѣ́йственаѧ трⷪ҇це є҆ди́нице , сᲂблюда́й ста́до свᲂѐ , мл҃твами бцⷣы ꙗ҆́кѡ є҆ди́нъ чл҃кᲂлю́бецъ .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋисѧ пребл҃же́ннаѧ , бцⷣе чи́стаѧ прⷭ҇нѡ дв҃о . Всѐ к̾ тебѣ̀ ны́нѣ дви́жꙋ срⷣце мᲂѐ и҆ мы́сль , и҆ пред̾лᲂже́нїѧ же всеѧ̀ дш҃и и҆ тѣ́ла , сᲂдѣ́телю и҆ и҆зба́вителю мᲂемꙋ̀ , є҆динᲂвла́стне трисвѣ́тле , и҆ вᲂпїю́ ти , спаси́ мѧ раба̀ твᲂегѡ̀ , ѿ напа́стей всѧ́кихъ и҆ скᲂрбе́й . Вᲂзвы́си на́шъ ᲂу҆́мъ и҆ мы́сль к̾ тебѣ̀ вы́шнемꙋ , ѻ҆́ч҃е , сло́ве , ᲂу҆тѣ́шителю , во́ свѣтѣ живы́и непристꙋ́пнѣмъ , сла́вы сл҃нце свѣтᲂде́ржче , прᲂсвѣтѝ твᲂи́ми сїѧ́ньми пречⷭ҇тыми , всегда̀ сла́вити тѧ̀ є҆динᲂнача́льнаго бг҃а трисᲂста́внаго .= сла́ва . Є҆ди́нъ свѣ́тъ в̾ тре́хъ со́бствѣхъ , ли́цы раздѣлѧ́емъ , ѻ҆ц҃ъ и҆ сн҃ъ и҆ дх҃ъ ст҃ы́и , и҆́ми же всѧ̀ тва́рь сᲂстᲂи́тсѧ . ю҆́же ѡ҆бнᲂвлѧ́ѧ сн҃ъ , сни́де и҆ пᲂстрада́въ вᲂскр҃се тридне́внѡ . =и҆ нн҃ѣ . Спасѝ и҆́же в̾ тѧ̀ вѣ́рꙋющїѧ гдⷭ҇и , и҆ прᲂпᲂвѣ́дающихъ без̾нача́льнаго приснᲂсꙋ́щеє сꙋщество̀ є҆ди́но , три́же ли́ца бг҃ᲂнача́льна и҆ сᲂѡбра́зна твᲂегѡ̀ гдⷭ҇ьствїѧ , и҆ бжⷭ҇твенѣй сла́вѣ спᲂдо́би , мᲂльба́ми чⷭ҇тыѧ бг҃ᲂмт҃ре .

пᲂсе́м̾ , припѣ́вы , григо́рїѧ синаи́та . дᲂсто́йно є҆́сть бг҃ᲂлѣ́пнѡ є҆́же сла́вити тѧ̀ трⷪ҇це ст҃а́ѧ . и҆ мл҃тва , всемᲂгꙋ́щаѧ и҆ живᲂтвᲂрѧ́щаѧ ст҃а́ѧ трⷪ҇це . пи́сано , на пᲂслѣдѝ в̾ кни́зѣ се́й .

Въ нлⷣю на ᲂу҆́тренѣй слꙋ́жбѣ . нача́ло и҆ всѐ вᲂслѣ́дᲂванїе твᲂри́мъ , ꙗ҆́кᲂже ᲂу҆ка́зано въ пе́рвᲂмъ гла́сѣ . та́же , по є҆ѯа̀ ѱл҃мѣ́хъ . на бг҃ъ гдⷭ҇ь . трᲂпа́рь , вᲂскрⷭ҇нъ . гла́съ , д҃ . Свѣ́тлꙋю вᲂскрⷭ҇нїѧ про́пᲂвѣдь , ѿ а҆́нг҃ла ᲂу҆вѣ́дѣвше гдⷭ҇ни ᲂу҆чени́цы , и҆ пра́дѣднеє ѡ҆сꙋжде́нїе ѿве́ргше , а҆пⷭ҇лѡмъ хва́лѧщесѧ глаго́лахꙋ , и҆спрᲂве́ржесѧ сме́рть , вᲂскр҃се хрⷭ҇то́съ бг҃ъ , да́рꙋѧ ми́рᲂви ве́лїю млⷭ҇ть . двⷤа .

сла́ва , ст҃о́мꙋ , и҆́же тᲂго̀ днѐ .= и҆ ны́нѣ , боⷢ҇ . по́ гласꙋ трᲂпарѧ̀ ст҃а́гѡ . =а҆́ще ли не и҆́мать , то̀ глаго́лемъ : сла́ва , и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша .

по а҃ , стихᲂло́гїи . сѣда́ленъ , вᲂскрⷭ҇нъ . гла́съ , д҃ . Вᲂзрѣ́вше на гро́бныи в̾хо́дъ и҆ пла́мене а҆́нг҃льскагѡ нетерпѧ́ще мѷрᲂно́сицы , с̾ тре́петᲂмъ дивлѧ́хꙋсѧ гл҃юще , є҆да̀ ᲂу҆кра́десѧ ѿве́рзыи разбо́йникꙋ ра́й ; є҆да́ли вᲂста̀ , и҆́же пре́жде стра́сти прᲂпᲂвѣ́давыи вᲂста́нїе ; вᲂи́стинꙋ вᲂскр҃се хрⷭ҇то́съ , и҆ сꙋ́щимъ во а҆́дѣ пᲂдаѧ̀ живо́тъ и҆ вᲂскрⷭ҇нїе . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Вᲂзрѣ́вше на гро́бныи в̾хо́дъ и҆ пла́мене а҆́нг҃льскагѡ нетерпѧ́ще мѷрᲂно́сицы , с̾ тре́петᲂмъ дивлѧ́хꙋсѧ гл҃юще , є҆да̀ ᲂу҆кра́десѧ ѿве́рзыи разбо́йникꙋ ра́й ; є҆да́ли вᲂста̀ , и҆́же пре́жде стра́сти прᲂпᲂвѣ́давыи вᲂста́нїе ; вᲂи́стинꙋ вᲂскр҃се хрⷭ҇то́съ , и҆ сꙋ́щимъ во а҆́дѣ пᲂдаѧ̀ живо́тъ и҆ вᲂскрⷭ҇нїе . сла́ва , и҆ ны́нѣ , боⷢ҇ . Тебѐ велича́емъ бцⷣе вᲂпїю́ще , ты̀ є҆сѝ гᲂра̀ , ѿ неѧ́ же неи҆зрече́ннѡ ѿсѣче́сѧ ка́мень , и҆ врата̀ а҆́дᲂва сᲂкрꙋшѝ .

по в҃ , стихᲂло́гїи . сѣда́ленъ , гла́съ , д҃ . Свᲂе́ю во́лею распѧ́тїе претерпѣ́лъ є҆сѝ сп҃се , и҆ во́ грᲂбѣ но́вѣ чл҃цы пᲂлᲂжи́ша тѧ̀ ме́ртвенїи , и҆́же сло́вᲂмъ кᲂнцы̀ сᲂста́вльшаго . тѣ́мже свѧ́занъ бы́сть чꙋ́ждїи , и҆ сме́рть лю́то плѣнѧ́шесѧ . и҆ сꙋ́щїи во а҆́дѣ всѝ взыва́хꙋ , живᲂно́снᲂмꙋ вᲂста́нїю твᲂемꙋ̀ , хрⷭ҇то́съ вᲂскр҃се жизнᲂда́вецъ , пребыва́ѧи во́ вѣки . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . Свᲂе́ю во́лею распѧ́тїе претерпѣ́лъ є҆сѝ сп҃се , и҆ во́ грᲂбѣ но́вѣ чл҃цы пᲂлᲂжи́ша тѧ̀ ме́ртвенїи , и҆́же сло́вᲂмъ кᲂнцы̀ сᲂста́вльшаго . тѣ́мже свѧ́занъ бы́сть чꙋ́ждїи , и҆ сме́рть лю́то плѣнѧ́шесѧ . и҆ сꙋ́щїи во а҆́дѣ всѝ взыва́хꙋ , живᲂно́снᲂмꙋ вᲂста́нїю твᲂемꙋ̀ , хрⷭ҇то́съ вᲂскр҃се жизнᲂда́вецъ , пребыва́ѧи во́ вѣки . сла́ва , и҆ нн҃ѣ , боⷢ҇ . Оу҆диви́сѧ і҆ѡ́сифъ па́че є҆сте́ственᲂе зрѧ̀ , и҆ внима́ше мы́слїю рꙋно́внагѡ дᲂждѧ̀ , в̾ без̾сѣ́меннѣмъ зача́тїи твᲂе́мъ бцⷣе . кꙋпинꙋ̀ ѻ҆гне́мъ неѡ҆палѧ́емꙋ , же́злъ а҆аро́нѡвъ прᲂзѧ́бшїи . и҆ свидѣ́тельствꙋетъ ꙗ҆́кѡ ѡ҆брꙋ́чникъ тво́й и҆ храни́тель , сщ҃е́нникѡмъ вᲂпїѧ́ше , дв҃аѧ ражда́етъ , и҆ по ржⷭ҇твѣ̀ па́ки дв҃ᲂю пребꙋ́детъ .

та́же , кафи́сма : бл҃же́ни непᲂро́чнїи .= пᲂсе́мъ , трᲂпарѝ : а҆́нг҃льскїи сᲂбо́ръ . пи́саны , в̾ кᲂнцѣ̀ кни́ги сеѧ̀ . =та́же , і҆єре́й гл҃етъ , є҆ктенїю̀ ма́лꙋю . по вᲂз̾гла́сѣ , и҆пако́й . И҆́же твᲂегѡ̀ пресла́внагѡ вᲂста́нїѧ , пред̾те́кше мѷрᲂно́сицы , а҆пⷭ҇лѡмъ бл҃гᲂвѣствᲂва́хꙋ , ꙗ҆́кѡ вᲂскр҃се ꙗ҆́кѡ бг҃ъ , пᲂдаѧ̀ ми́рᲂви ве́лїю млⷭ҇ть .

степе́нны . гла́съ , д҃ . а҆нтифѡ́нъ , а҃ . пᲂе́мъ по два́жды . Ѿ ю҆́нᲂсти мᲂеѧ̀ мно́зи бо́рютъ мѧ стрⷭ҇ти , но са́мъ мѧ̀ застꙋпѝ , и҆ спаси́ мѧ сп҃се . Ненави́дѧщїи сїѡ́на , пᲂсра́мѧтсѧ ѿ́ гдⷭ҇а . ꙗ҆́кѡ трава́ бо ѻ҆́гневи бꙋ́дꙋтъ и҆з̾со́хшаѧ . Ст҃ы́мъ дх҃ᲂмъ всѧ́ка дш҃а живи́тсѧ , и҆ чистᲂто́ю вᲂзвыша́етсѧ , свѣтлѣ́етсѧ тро́йческимъ є҆ди́нствᲂмъ , сщ҃еннᲂта́йнѡ .

а҆нтифо́нъ , в҃ . Вᲂзва́хъ ти гдⷭ҇и те́плѣ , и҆з̾ глꙋбины̀ дш҃и мᲂеѧ̀ , и҆ мнѣ̀ да бꙋ́дꙋтъ на пᲂслꙋша́нїе бжⷭ҇твеннїи твᲂѝ ᲂу҆́ши . На́ гдⷭ҇а ᲂу҆пᲂва́нїе всѧ́къ кто̀ стѧжа́въ , вы́шши є҆́сть всѣ́хъ скᲂрбѧ́щихъ . Ст҃ы́мъ дх҃ᲂмъ то́чатсѧ бл҃гᲂда́тныѧ во́ды , напаѧ́юще всѧ́кꙋ тва́рь на ѡ҆живле́нїе .

а҆нтифо́нъ , г҃ . Срⷣце мᲂѐ к̾ тебѣ̀ сло́ве да вᲂз̾вы́ситсѧ , и҆ ничто́же да не ᲂу҆слади́тмисѧ , ѿ мирски́хъ красо́тъ на сла́бᲂсть . Къ мт҃ри свᲂе́й ꙗ҆́кᲂже и҆́мать кто̀ любо́вь , ко́ гдⷭ҇ꙋ теплѣ́йше любле́нїе до́лжни є҆смы̀ и҆мѣ́ти . Ст҃ы́мъ дх҃ᲂмъ , бг҃ᲂразꙋ́мїѧ бᲂга́тство , бг҃ᲂвидѣ́нїѧ и҆ премꙋ́дрᲂсть . всѧ́ бо си́мъ ѻ҆те́ческаѧ пᲂвелѣ́нїѧ , сло́во ѿкрыва́етъ .

і҆єре́й , глаго́летъ : во́нмемъ .= ми́ръ всѣ́мъ . премꙋ́дрᲂсть . прᲂки́менъ , ѱало́мъ , дв҃дᲂвъ . Вᲂскрⷭ҇нѝ гдⷭ҇и пᲂмᲂзѝ на́мъ , и҆ и҆зба́ви на́съ и҆́мене твᲂегѡ̀ ра́ди . =сти́хъ : бж҃е ᲂу҆ши́ма на́шима ᲂу҆слы́шахᲂмъ , и҆ ѻ҆ц҃ы на́ши вᲂз̾вѣсти́ша на́мъ . і҆єре́й : ꙗ҆́кѡ ст҃ъ є҆сѝ гдⷭ҇и . та́же : Всѧ́ко дыха́нїе да хва́литъ гдⷭ҇а . сти́хъ : хвали́те бг҃а во ст҃ы́хъ є҆гѡ̀ , хвали́те є҆гѡ̀ во ᲂу҆тверже́нїи си́лъ є҆гѡ̀ . і҆єре́й : и҆ =ѡ҆спᲂдо́битисѧ на́мъ дᲂсто́йнѡ пᲂслꙋ́шати ст҃а́гѡ є҆ѵⷢ҇а́лїѧ . =пᲂе́мъ : Гдⷭ҇и пᲂми́лꙋй , гⷤ . і҆єре́й : премꙋ́дрᲂсть , про́сти ᲂу҆слы́шимъ ст҃а́гѡ є҆ѵⷢ҇а́лїѧ . і҆єре́й , глаго́летъ , є҆ѵⷢ҇а́лїе рѧ́дꙋ . вᲂскрⷭ҇нїе хрⷭ҇то́во , аⷤ . та́же , ѱл҃о́мъ , н҃ . пᲂми́лꙋй мѧ бж҃е . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .= и҆ нн҃ѣ . мл҃твъ ра́ди бцⷣы , ми́лᲂстиве ѡ҆чи́сти мно́жество сᲂгрѣше́нїи на́шихъ . =та́же , пᲂми́лꙋй мѧ бж҃е по вели́цѣй млⷭ҇ти твᲂе́й пᲂмно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й . стⷯра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю млⷭ҇ть . і҆єре́й , гл҃етъ : спасѝ бж҃е лю́ди . пᲂе́мъ : Гдⷭ҇и пᲂми́лꙋй , ві҃ . і҆єре́й , вᲂз̾гла́съ : ми́лᲂстїю и҆ щедро́тами . Кано́нъ , вᲂскрⷭ҇нъ . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡбра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть . запѣ́въ : сла́ва гдⷭ҇и вᲂскрⷭ҇нїю твᲂемꙋ̀ . Вᲂздви́жесѧ на пречи́стѣмъ дре́вѣ крⷭ҇тнѣмъ влⷣко , на́ше ѿпаде́нїе и҆справлѧ́ѧ , дре́внеє и҆сцѣлѧ́ѧ всегꙋби́тельство , ꙗ҆́кѡ бл҃гъ и҆ всеси́ленъ . Во́ грᲂбѣ с̾ пло́тїю , во а҆́дѣ же с̾ дш҃е́ю ꙗ҆́кѡ бг҃ъ , в̾ раи́ же с̾ разбо́йникᲂмъ , и҆ на престо́лѣ сы́и хрⷭ҇тѐ со ѻ҆ц҃е́мъ и҆ дх҃ᲂмъ , всѧ̀ и҆спᲂлнѧ́ѧ неѡ҆пи́санныи . боⷢ҇ . Без̾ сѣ́мене ѻ҆́ч҃ею во́лею , ѿ бжⷭ҇твенагѡ дх҃а , бж҃їѧ зача́тъ сн҃а , и҆ пло́тїю рᲂдила̀ є҆сѝ пречⷭ҇таѧ , и҆́же и҆з̾ ѻ҆ц҃а без̾ мт҃ре , на́съ же ра́ди и҆з̾ тебѐ без̾ ѻ҆ц҃а .

Дрꙋгі́и кано́нъ , крⷭ҇тᲂвᲂскрⷭ҇нъ . і҆рмо́съ . Ѿве́рзꙋ ᲂу҆ста̀ мᲂѧ̀ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ и҆ вᲂскрⷭ҇нїю . И҆сцѣли́въ сᲂкрꙋше́нїѧ чл҃чества гдⷭ҇и , бжⷭ҇твенᲂю сѝ кро́вїю ѡ҆бнᲂви́лъ є҆сѝ то̀ . и҆ сᲂкрꙋши́лъ є҆сѝ си́льнагѡ в̾ крѣ́пᲂсти , и҆́же дре́вле сᲂкрꙋши́вшаго твᲂѐ сᲂзда́нїе . Мертвеце́мъ вᲂста́нїе , ᲂу҆мерщве́нїѧ ра́ди бы́сть . крѣ́пᲂсть бо ѿѧ́тсѧ ᲂу҆мерщве́нїю , бра́вшисѧ с̾ жи́знїю вѣ́чнᲂю , и҆́же всѣ́ми сᲂвлады́чествꙋющимъ вᲂплᲂще́ннымъ бг҃ᲂмъ . боⷢ҇ . Красе́нъ превы́шши нбⷭ҇ныхъ си́лъ , бжⷭ҇твеныи тво́й бы́сть хра́мъ ѡ҆дш҃евле́ныи , во ᲂу҆тро́бѣ пᲂнᲂси́вшаѧ бг҃а на́шегѡ дв҃о , гᲂро̀ ст҃а́ѧ .

и҆́нъ кано́нъ , прест҃ѣ́й бцⷣѣ . і҆рмо́с̾ . Тристᲂѧ́ща крѣ́пкїи . запѣ́въ : прест҃а́ѧ гжⷭ҇е бцⷣе спасѝ на́съ . Сᲂтрѧсо́шасѧ лю́дїє , и҆ смꙋти́шасѧ ꙗ҆зы́цы , црⷭ҇твїѧ держа́внаѧ ᲂу҆клᲂни́шасѧ чи́стаѧ , ѿ́ страха ржⷭ҇тва́ ти . прїи́де цр҃ь мо́й , и҆ низ̾лᲂжѝ мꙋчи́телѧ , и҆ ми́ръ ѿ тлѝ и҆зба́ви . Жили́ще свᲂѐ живы́и в̾ вы́шнихъ , к̾ чл҃кѡмъ сше́дъ ѡ҆ст҃ѝ хрⷭ҇то́съ , и҆ непᲂкᲂлѣби́мо ꙗ҆вѝ , є҆ди́на бо зижди́телѧ ро́ждьши , и҆ по ржⷭ҇твѣ̀ дв҃ственыи сᲂсꙋ́дъ сᲂблюдѐ .

и҆́нъ , кано́нъ , в̾ минѣ́и , ст҃о́мꙋ .

катава́сїѧ , по ᲂу҆ста́вꙋ .

пѣ́снь , г҃ . і҆рмоⷭ҇ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Дре́во живо́тнᲂе , мы́сленыи и҆́стинныи винᲂгра́дъ , на́ древѣ ви́ситъ , всѣ́мъ и҆стᲂча́ѧ нетлѣ́нїе . Ꙗ҆́кѡ вели́къ , ꙗ҆́кѡ стра́шенъ , а҆́дᲂво низ̾лᲂжѝ велича́нїе , и҆ ꙗ҆́кѡ бг҃ъ нетлѣ́ненъ , ны́нѣ пло́тьски вᲂскр҃се . боⷢ҇ . Ты̀ є҆ди́на сꙋ́щимъ на землѝ , бл҃ги́мъ хᲂда́таица , ꙗ҆́же па́че є҆стества̀ , мт҃и бж҃їѧ была̀ є҆сѝ . тѣ́мже тѝ ра́дꙋисѧ вᲂпїе́мъ .

и҆́нъ , і҆рмо́съ . Твᲂѧ̀ пѣвцы̀ бцⷣе . Ꙗ҆́дᲂмъ и҆спо́лненыи ѕмі́й , в̾ менѐ зꙋ́бы вᲂнзѐ сп҃се , и҆́хже вседержи́телю гдⷭ҇и , гвᲂздьмѝ рꙋкꙋ̀ свᲂе́ю сᲂкрꙋши́лъ є҆сѝ , ꙗ҆́кѡ нѣ́сть ст҃а во ст҃ы́хъ , па́че тебѐ гдⷭ҇и . Ви́дѣнъ бы́сть чл҃кᲂлю́бче во́лею , во́ грᲂбѣ ме́ртвъ живᲂтво́рче , и҆ врата̀ разве́рглъ є҆сѝ а҆́дᲂва , и҆́же ѿ́ вѣка дш҃а́мъ . ꙗ҆́кѡ нѣ́сть ст҃а во ст҃ы́хъ , па́че тебѐ гдⷭ҇и . боⷢ҇ . Неѡ҆ра́нна бразда̀ ꙗ҆ви́ласѧ є҆сѝ , кла́са живо́тнаго ро́ждьши , и҆́же всѣ́мъ причаща́ющимсѧ без̾сме́ртїю хᲂда́таѧ , и҆́же во ст҃ы́хъ ст҃а́гѡ , ст҃о пᲂчива́ющаго .

и҆́нъ , і҆рмо́съ . Съ высᲂты̀ сни́де . Ѡ҆чища́етсѧ земны́хъ сꙋщество̀ , тᲂбо́ю присᲂвᲂкꙋ́пльшесѧ , нестерпи́мᲂмꙋ бжⷭ҇твенᲂмꙋ ѻ҆гню̀ . ꙗ҆́кѡ в̾ та́йнѣ пречⷭ҇таѧ дв҃о , в̾ тебѣ̀ хлѣ́бъ и҆спе́кшїисѧ , и҆́же и҆ тебѐ неврежде́нꙋ сᲂхра́ньшемꙋ . Что̀ сїѧ̀ ꙗ҆́же вᲂи́стинꙋ бли́зъ бг҃а ; ꙗ҆́кѡ превᲂзше́дши всѧ̀ а҆́нг҃льскїѧ чи́ны , є҆ди́на дᲂбро́тᲂю дв҃ства сїѧ́ющи , ꙗ҆́кѡ мт҃и сꙋ́щи вседержи́телѧ .

і҆єре́й гл҃етъ , є҆ктенїю̀ ма́лꙋю . та́же : кᲂнда́къ , и҆ и҆́кᲂсъ , и҆ сѣда́лен̾ , в̾ минѣ́и , ст҃о́мꙋ . а҆́ще є҆́сть .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Без̾грѣ́шнаго сме́рть вкꙋси́вши , живᲂтвᲂрѧ́щагѡ тѣ́ла твᲂегѡ̀ влⷣко дᲂсто́йнѡ ᲂу҆мертви́сѧ . мы́ же ти вᲂпїе́мъ , сла́ва си́лѣ твᲂе́й гдⷭ҇и . Прише́лъ є҆сѝ стрⷭ҇ти мᲂѧ̀ и҆сцѣлѧ́ѧ , на крⷭ҇тѣ̀ стра́ждꙋщи пречⷭ҇тѣй пло́ти твᲂе́й , в̾ ню́ же во́лею ѡ҆блече́сѧ . тѣ́мже ти взыва́емъ , сла́ва си́лѣ твᲂе́й гдⷭ҇и . боⷢ҇ . Неи҆скꙋсᲂбра́чнѡ рᲂдила̀ є҆сѝ гдⷭ҇а ѽ дв҃о , и҆ по ржⷭ҇твѣ̀ ꙗ҆ви́сѧ па́ки дв҃ствꙋющи . тѣ́мже немо́лчными гла́сы , є҆́же ра́дꙋисѧ тебѣ̀ влⷣчце , вѣ́рᲂю несꙋмѣ́ннᲂю вᲂпїе́мъ .

и҆́нъ , і҆рмо́съ . Неи҆зслѣ́днᲂмꙋ бж҃їю . Взако́ненъ сы́и і҆зра́иль , тебѐ хрⷭ҇тѐ взако́нившаго бг҃а неразꙋмѣ̀ . но ꙗ҆́кѡ без̾зако́нника престꙋпа́юща зако́нъ , на крⷭ҇тѣ̀ пригвᲂздѝ , и҆́же закᲂнᲂпᲂлᲂже́нїѧ недᲂсто́йныи . Ѡ҆бᲂже́наѧ твᲂѧ̀ сп҃се дш҃а , а҆́дᲂва сᲂкро́вища плѣни́вши , и҆ ꙗ҆́же ѿ́ вѣка вᲂздви́же дꙋ́ши , живᲂно́снᲂе же тѣ́ло , всѣ́мъ нетлѣ́нїе и҆стᲂчѝ . боⷢ҇ . Тебѐ прⷭ҇нѡ дв҃ꙋю , вᲂи́стинꙋ є҆ди́нꙋ бцⷣꙋ сла́вимъ , ю҆́же преѡ҆бразᲂва́ше бг҃ᲂви́дцꙋ мѡѷсе́ю , неѡ҆па́льнѡ кꙋпина̀ ѻ҆гню̀ примѣси́вшисѧ , пречⷭ҇таѧ .

и҆́нъ і҆рмо́съ , то́йже . Пᲂживѐ съ чл҃ки , ви́димъ бы́сть неви́димыи , в̾ зра́цѣ сы́и непᲂсти́жимагѡ бжⷭ҇тва̀ . и҆ вᲂѡ҆бра́жсѧ и҆з̾ тебѐ дв҃о , ѿ чꙋжа́гѡ спастѝ вѣ́дѧщихъ тѧ̀ чⷭ҇тꙋю бг҃ᲂрᲂди́тельницꙋ . Прїѧ́тъ веще́ственѣ дв҃аѧ невеще́ственаго , пᲂсредѣ̀ ве́щи млⷣнца ѿ неѧ̀ бы́вша . тѣ́мже ны́нѣ во двᲂю̀ сꙋществꙋ̀ пᲂзнава́етсѧ плᲂтᲂно́сецъ бг҃ъ , и҆ зе́менъ превы́ше сꙋщества̀ . Въ ржⷭ҇твѣ́ тѧ дв҃ꙋ сᲂхранѝ и҆́же в̾ тѧ̀ все́льсѧ , и҆ ро́ждьсѧ без̾ сѣ́мене сло́во и҆ бг҃ъ пребы́сть , и҆ по ржⷭ҇твѣ̀ па́ки ꙗ҆вѝ дв҃ꙋ , ꙗ҆́кѡ влⷣка и҆ зижди́тель .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Ты̀ гдⷭ҇и к̾ землѝ млⷭ҇тивнѡ сше́лъ є҆сѝ . ты̀ вᲂзне́слъ є҆сѝ па́дшеєсѧ чл҃ческᲂе сꙋщество̀ , на́ древѣ вᲂздвиза́емъ . Ты̀ взѧ́тъ ми хрⷭ҇тѐ прегрѣше́нїемъ ѡ҆сꙋжде́нїе . ты̀ разрѣши́лъ є҆сѝ бᲂлѣ́зни сме́ртныѧ ще́дре , бжⷭ҇твенымъ вᲂскрⷭ҇нїемъ сѝ . боⷢ҇ . Тѧ̀ ѻ҆рꙋ́жїе непᲂбѣди́мᲂе , на врагѝ пред̾лага́емъ . тѧ̀ ᲂу҆тверже́нїе и҆ наде́ждꙋ на́шемꙋ спасе́нїю , бг҃ᲂневѣ́сто стѧжа́хᲂмъ .

и҆́нъ , і҆рмо́съ . Оу҆диви́шасѧ всѧ́ческаѧ . Прїѧ́тъ тѧ̀ всегѡ̀ ᲂу҆сты̀ а҆́дъ безꙋ́мныи , на крⷭ҇тѣ́ бо пригвᲂжде́на тѧ̀ ви́дѣвъ , и҆ кᲂпїе́мъ прᲂбᲂде́на , без̾ дыха́нїѧ жива́го бг҃а , про́ста вмѣнѧ́ше челᲂвѣ́ка . ᲂу҆разꙋмѣ́въ же , и҆скꙋси́въ крѣ́пᲂсть твᲂегѡ̀ бжⷭ҇тва̀ . Разᲂре́нꙋю цр҃кᲂвь чл҃кᲂлю́бче , твᲂегѡ̀ тѣлесѐ , гро́бъ раздѣлѝ и҆ а҆́дъ , нево́лею а҆́бїе ѻ҆́ба и҆стѧза́етасѧ , ѻ҆́въ ᲂу҆́бѡ ст҃ы́хъ твᲂи́хъ дꙋ́ши , тѣлеса́ же дрꙋгі́и , сᲂвᲂзсыла́юще без̾сме́ртне . боⷢ҇ . Сѐ ны́нѣ и҆спо́лнисѧ прⷪ҇ро́ка прᲂрече́нїе . ты́ бо неи҆скꙋсᲂбра́чнаѧ дв҃це , прїѧ́тъ во ᲂу҆тро́бѣ и҆́же надᲂвсѣ́ми бг҃а , и҆ рᲂдила̀ є҆сѝ без̾лѣ́тнаго сн҃а , всѣ́мъ вᲂспѣва́ющимъ тѧ ми́ръ пᲂдава́юща .

и҆́нъ , і҆рмо́съ . Ны́нѣ вᲂста́нꙋ . До́мъ сла́вы , и҆ го́рꙋ бж҃їю ст҃ꙋ́ю , невѣ́стꙋ , черто́гъ , хра́мъ сщ҃е́нїѧ , ѡ҆брѣ́тъ тѧ̀ чи́стꙋю сн҃ъ бж҃їи и҆ в̾ тебѣ̀ по́живъ , и҆ ра́й пи́щныи прⷭ҇нᲂсꙋ́щныи на́мъ сᲂдѣ́ла . Пло́ть ѿ крᲂве́й дв҃ческихъ прїѧ́лъ є҆сѝ хрⷭ҇тѐ , без̾сѣ́меннꙋ пречи́стꙋ и҆ сᲂста́внꙋ , слᲂве́снꙋ и҆ ᲂу҆́мнꙋ и҆ ѡ҆дш҃евле́нꙋ , дѣ́йственꙋ же во́лею , самᲂвла́стнымъ влⷣчествᲂмъ . Мꙋчи́телей ра́зꙋмъ , дв҃ственᲂе пᲂсрамѝ чре́во . млⷣнцъ бо ꙗ҆́звꙋ и҆спыта̀ рꙋко́ю , а҆́спиднꙋю дш҃егꙋ́бнꙋю , и҆ ѿстꙋ́пника го́рдаго низ̾ло́жь , вѣ́рнымъ по́д̾ нᲂзѣ пᲂкᲂрѝ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Вᲂзше́лъ є҆сѝ на́ крⷭ҇тъ хрⷭ҇тѐ , си́лᲂю препᲂѧ́савсѧ , и҆ сᲂпле́тсѧ с̾ мꙋчи́телемъ , ꙗ҆́кѡ бг҃ъ с̾ высᲂты̀ тᲂго̀ све́рже . а҆да́ма же непᲂбѣди́мᲂю си́лᲂю вᲂскр҃си́лъ є҆сѝ . Вᲂскр҃съ блиста́ѧ красно̀ и҆́з̾ грᲂба хрⷭ҇тѐ , и҆ разгна́лъ є҆сѝ всѧ̀ врагѝ бжⷭ҇твенᲂю си́лᲂю . и҆ всѧ̀ ꙗ҆́кѡ бг҃ъ весе́лїѧ и҆спо́лнилъ є҆сѝ . боⷢ҇ . Ѽ чꙋ́до , и҆́же всѣ́хъ чꙋде́съ нᲂвѣ́йшеє ; ꙗ҆́кѡ дв҃аѧ во ᲂу҆тро́бѣ , и҆́же всѧ́ческаѧ сᲂдержа́щаго сло́вᲂмъ , неи҆скꙋсᲂмꙋ́жнѡ заче́ньши , и҆ нетѣ́снѡ вмѣсти́вши .

и҆́нъ , і҆рмо́съ . Прїидо́хъ во глꙋбины̀ . Ѿве́рзе гᲂрта́нь сво́й а҆́дъ , и҆ разши́ри безꙋ́мныи , и҆ пᲂжрѐ менѐ и҆ дш҃ꙋ . но ты̀ хрⷭ҇тѐ сᲂше́дъ , вᲂзве́лъ є҆сѝ дш҃ꙋ мᲂю̀ ꙗ҆́кѡ чл҃кᲂлю́бецъ . Пᲂги́бе сме́ртїю сме́рть , ᲂу҆ме́рыи бо вᲂскр҃се , нетлѣ́нїе мнѣ̀ да́рꙋѧ . ꙗ҆́вльжесѧ жена́мъ , прᲂвѣща̀ ра́дᲂсть без̾сме́ртныи . боⷢ҇ . Нестерпи́магѡ бжⷭ҇тва̀ вмѣсти́лище , чи́стᲂе чре́во твᲂѐ ꙗ҆ви́сѧ ѽ бг҃ᲂмт҃и , є҆го́же бе́з̾ страха небе́снїи чи́нᲂве зрѣ́ти немо́гꙋтъ .

и҆́нъ і҆рмо́съ , то́йже . Дре́вле ᲂу҆́бѡ прельсти́ мѧ ѕмі́й , и҆ ᲂу҆мᲂри́ мѧ ра́ди пра́матере мᲂеѧ̀ є҆́ввы . ны́нѣ же чⷭ҇таѧ сᲂзда́выи мѧ , тебѐ ра́ди ѿ и҆стлѣ́нїѧ вᲂзва̀ . Бе́здна бе́зднꙋ тѧ̀ неи҆з̾глаго́ланнꙋю , бл҃гᲂꙋтро́бїѧ ѻ҆трᲂкᲂви́це , и҆збра́ннꙋю пᲂказа̀ чꙋде́съ . и҆́бо и҆з̾ тебѐ мо́лнїѧ бжⷭ҇тва̀ би́серъ хрⷭ҇то́съ вᲂсїѧ̀ .

і҆єре́й гл҃етъ , є҆ктенїю̀ ма́лꙋю .

кᲂнда́къ , вᲂскрⷭ҇нъ . Сп҃съ и҆ и҆зба́витель мо́й , и҆́з̾ грᲂба ꙗ҆́кѡ бг҃ъ вᲂскр҃си́въ ѿ ᲂу҆́зъ земнᲂро́дныѧ . и҆ врата̀ а҆́дᲂва сᲂкрꙋши́въ , и҆ ꙗ҆́кѡ влⷣка вᲂскр҃се тридне́венъ . и҆́кᲂсъ . Вᲂскрⷭ҇шаго и҆з̾ ме́ртвыхъ хрⷭ҇та̀ жизнᲂда́вца тридне́вно и҆́з̾ грᲂба , и҆ врата̀ сме́ртнаѧ дне́сь сᲂкрꙋ́шшаго си́лᲂю свᲂе́ю , и҆ а҆́да ᲂу҆мертви́вшаго , и҆ жа́ло сме́ртнᲂе сте́ршаго , и҆ а҆да́ма съ є҆́ввᲂю свᲂбᲂди́вшаго , вᲂспᲂе́мъ всѝ земнᲂро́днїи бл҃гᲂда́рственѡ , вᲂпїю́ще хвалꙋ̀ прилѣ́жнѡ . то́й бо ꙗ҆́кѡ є҆ди́нъ крѣ́пкїи бг҃ъ и҆ влⷣка , вᲂскр҃се тридне́венъ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Къ нетлѣ́нїю чл҃чество вᲂзведено̀ бы́сть , бжⷭ҇твенᲂю и҆змᲂве́но кро́вїю хрⷭ҇то́вᲂю , бл҃гᲂда́рнѡ вᲂспѣва́ющеє , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Ꙗ҆́кѡ живᲂно́сецъ , ꙗ҆́кѡ раѧ̀ ѕѣлѡ̀ краснѣ́йши вᲂи́стинꙋ , и҆ всѧ́кᲂгѡ черто́га ца́рска , ꙗ҆ви́сѧ свѣтлѣ́йши хрⷭ҇тѐ гро́бъ тво́й , и҆сто́чникъ на́шемꙋ вᲂскрⷭ҇нїю . боⷢ҇ . И҆́же вы́шнѧго ѡ҆сщ҃е́нно бжⷭ҇твенᲂе селе́нїе , ра́дꙋисѧ . тᲂбо́ю бо ра́дᲂсть дана̀ бы́сть бцⷣе вᲂпїю́щимъ ти , бл҃гᲂслᲂве́на ты̀ в̾ жена́хъ пренепᲂро́чнаѧ влⷣчце .

и҆́нъ , і҆рмо́съ . Непᲂслꙋжи́ша тва́ри . Смири́лъ є҆сѝ на́ древѣ вᲂздвиза́емъ , ѻ҆́ко высо́кᲂе и҆ превᲂзнесе́нꙋю гᲂрды́ню на́ землю , низ̾лᲂжи́въ , и҆ спа́слъ є҆сѝ чл҃ка , препѣ́тыи ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . Си́лᲂю твᲂе́ю , ро́гъ на́шъ вᲂзвы́си слꙋжа́щихъ ти , вᲂскр҃сы́и и҆з̾ ме́ртвыхъ , и҆ мнᲂгᲂчл҃чнᲂе а҆́дᲂво и҆стᲂщи́въ бᲂга́тство , препѣ́тыи ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ . трⷪ҇ченъ . Рече́нїемъ бжⷭ҇твенымъ пᲂслѣ́дꙋюще , сла́вимъ є҆ди́но бжⷭ҇тво̀ , ꙗ҆́кѡ в̾ трїе́хъ свѣ́тѣхъ неслїѧ́нно непресѣко́мо , и҆ сᲂєдине́нъ пла́мень , вѣ́чныи прᲂсвѣща́ющїи всю̀ тва́рь зᲂвꙋ́щꙋю . препѣ́тыи ѻ҆ц҃е́мъ гдⷭ҇ь и҆ бг҃ъ бл҃гᲂслᲂве́нъ є҆сѝ .

и҆́нъ , і҆рмо́съ . Ю҆́нᲂщи трѝ в̾ вавилѡ́нѣ .= Привлачи́тъ мѧ к̾ пѣ́нїю любы̀ дв҃ственаѧ , ѻ҆́гнь и҆́же в̾ срⷣцы мᲂе́мъ , вᲂпи́ти мт҃ри и҆ дв҃цѣ , бл҃гᲂслᲂве́наѧ гдⷭ҇ь си́ламъ с̾ тᲂбо́ю . Превы́шши тваре́й всѣ́хъ є҆сѝ бцⷣе , ꙗ҆́кѡ твᲂрца̀ ро́ждьши и҆ гдⷭ҇а . тѣ́мже тѝ вᲂпїю̀ , блгⷭ҇ве́наѧ гдⷭ҇ь си́ламъ с̾ тᲂбо́ю . =трⷪ҇ченъ . Гдⷭ҇ьство є҆ди́но чтꙋ̀ в̾ трїе́хъ сщ҃е́нїихъ нераздѣ́льно , и҆ пᲂю̀ трисᲂста́внᲂе є҆стество̀ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Рꙋ́цѣ прᲂсте́ръ на крⷭ҇тѣ̀ , ꙗ҆зы́ки всѧ̀ к̾ себѣ̀ сᲂбра̀ , є҆ди́нꙋ ꙗ҆ви́лъ є҆сѝ цр҃кᲂвь влⷣко , вᲂспѣва́ющимъ тѧ̀ земны́мъ и҆ нбⷭ҇нымъ , сᲂгла́снѡ пᲂю́щимъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Бѣлᲂѡбра́зенъ ꙗ҆ви́сѧ жена́мъ , неприкᲂснᲂве́ннымъ свѣ́тᲂмъ ѡ҆блистава́емь , и҆́же вᲂскрⷭ҇нїѧ а҆́нг҃лъ , что̀ жива́гѡ во́ грᲂбѣ вᲂпїѧ̀ и҆́щете ꙗ҆́кѡ ме́ртва ; вᲂи́стинꙋ вᲂста̀ хрⷭ҇то́съ . є҆мꙋ́же пᲂе́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Ты̀ є҆ди́на во всѣ́хъ рᲂдѣ́хъ дв҃о пречⷭ҇таѧ , мт҃и ꙗ҆ви́сѧ бг҃ꙋ . ты́ же бжⷭ҇твꙋ̀ бы́сть жили́ще , всенепᲂро́чнаѧ , не ѡ҆па́льшисѧ ѻ҆гне́мъ непристꙋ́пнагѡ свѣ́та . тѣ́мже вси́ тѧ бл҃гᲂслᲂви́мъ мр҃і́е бг҃ᲂневѣ́стнаѧ .

и҆́нъ , і҆рмо́съ . Ѻ҆́трᲂки бл҃гᲂчести́выѧ в̾ пещѝ . Непра́веднᲂе ви́дѧщи закᲂле́нїе твᲂѐ , тва́рь ѡ҆мрачи́сѧ рыда́ше . земли́ бо смꙋща́ющисѧ , и҆ сл҃нце ѡ҆блече́сѧ во́ мракъ ꙗ҆́кѡ в̾ ри́зꙋ чернꙋ̀ . мы́ же тѧ̀ хрⷭ҇тѐ вᲂспѣва́емъ , и҆ превᲂзно́симъ во всѧ̀ вѣ́ки . И҆́же сше́дыи со мно́ю да́же до а҆́да , и҆ всѣ́мъ пꙋ́ть сᲂтвᲂри́лъ є҆сѝ вᲂскрⷭ҇нїе . а҆́бїе же взы́де нᲂсѧ́ мѧ на ра́мꙋ свᲂе́ю , и҆ ко ѻ҆ц҃ꙋ прине́слъ є҆сѝ . тѣ́мже зᲂвꙋ́ ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . трⷪ҇ченъ . Оу҆ма̀ пе́рваго и҆ вино́вна всѣ́мъ , ѻ҆ц҃а є҆ди́нᲂгѡ , вины̀ неи҆мꙋ́ща сла́вимъ , сло́вꙋ тѧ̀ прᲂпᲂвѣ́дающе без̾нача́льна рᲂди́телѧ , и҆ пред̾лᲂжи́телѧ дх҃ꙋ , бг҃а же и҆ сᲂдѣ́телѧ всѣ́мъ . трⷪ҇цѣ сра́сленѣй пᲂкланѧ́емсѧ , и҆ превᲂзно́симъ во́ вѣки .

и҆́нъ , і҆рмо́съ . И҆зба́вителю всѣ́хъ .= Ѿ= ребра̀ а҆да́мᲂва сᲂзда́выи тѧ̀ , ѿ твᲂегѡ̀ дв҃ства вᲂплᲂща́етсѧ , и҆́же всѣ́хъ вина̀ . є҆мꙋ́же вᲂспѣва́юще вᲂпїе́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Въ сѣ́ни а҆враа́мъ ᲂу҆зрѣ̀ , є҆́же в̾ тебѣ̀ бцⷣе та́инство , сн҃а бо твᲂегѡ̀ беспло́тнаго прїѧ́тъ , пᲂѧ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Равнᲂчи́сленыѧ трⷪ҇цы , спасѐ , твᲂегѡ̀ дв҃ства пред̾вᲂѡбраже́нїе . дв҃ственымъ бо тѣ́лᲂмъ пᲂпра́вше пла́мень ѻ҆́трᲂцы , вᲂпїю́ще , блгⷭ҇ви́те всѧ̀ дѣ́ла гдⷭ҇нѧ гдⷭ҇а .

по и҃ пѣ́сни , пᲂе́мъ : Хва́лимъ , блгⷭ҇ви́мъ , кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . і҆рмо́с̾ катава́сїи , и҆ твᲂри́мъ пᲂкло́н̾ . пᲂе́мъ , пѣ́снь бцⷣѣ . вели́читъ дш҃а мᲂѧ̀ гдⷭ҇а . =и҆ =пᲂе́мъ , честнѣ́йшꙋю херꙋви́мъ , на ко́йждо сти́хъ , на́ ѻ҆ба ли́ка . =и҆ =твᲂри́мъ пᲂкло́ны .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Всего́ мѧ вᲂспрїѧ́тъ сп҃се , в̾ сᲂвᲂкꙋпле́нїи нераздѣ́льнѣ . всемꙋ́ ми да́рꙋй бж҃е мо́й спасе́нїе , ра́ди стрⷭ҇ти твᲂеѧ̀ хрⷭ҇тѐ , ю҆́же на крⷭ҇тѣ̀ претерпѣ́лъ є҆сѝ тѣле́снѣ , бл҃гᲂꙋтро́бїѧ ра́ди . Твᲂѝ ᲂу҆ченицы̀ зрѧ́ще , ѿве́рзена гро́ба твᲂегѡ̀ , и҆ бг҃ᲂно́сныѧ плащани́цы и҆спра́жнены , вᲂскрⷭ҇нїемъ тѝ , со а҆́нг҃лѡмъ гл҃ахꙋ , вᲂи́стинꙋ вᲂста̀ гдⷭ҇ь . трⷪ҇ченъ . Є҆ди́нство ᲂу҆́бѡ бжⷭ҇твенᲂе сꙋщество̀ , но сᲂста́вми трⷪ҇цꙋ , всѝ вѣ́рнїи вᲂсхва́лимъ , в̾ неслїѧ́нныхъ сᲂста́вѣхъ ; ѻ҆ц҃а пребез̾нача́льна , сн҃а и҆ дх҃а всест҃а́гѡ .

и҆́нъ , і҆рмо́съ . Всѧ́къ зе́менъ . Льсти́вно пᲂпᲂлзнꙋ́въ ѕмі́й ѿ є҆де́ма , пᲂдъѧ́тъ мѧ плѣне́на , ꙗ҆́кᲂже младе́нца . на кра́нїевѣ же на тве́рдѣмъ ка́мени разрази́въ сегѡ̀ , вседержи́тель гдⷭ҇ь . пи́щи же мнѣ̀ а҆́бїе вхо́дъ , дре́ва ра́ди крⷭ҇тнагѡ ѿве́рзлъ є҆́сть . Пᲂлᲂжи́въ крѣ́пкаѧ врагꙋ̀ ᲂу҆тверже́нїѧ , ны́нѣ в̾ запꙋстѣ́нїе , всеси́льнᲂю же рꙋко́ю бᲂга́тство є҆гѡ̀ расхити́въ хрⷭ҇тѐ , и҆з̾ бᲂкꙋ̀ а҆́да вᲂскр҃си́лъ мѧ є҆сѝ . и҆ и҆́же дре́вле без̾мѣ́рнѡ хва́лѧщагᲂсѧ , ꙗ҆́кѡ смѣ́хꙋ нарꙋга́ема ꙗ҆ви́лъ є҆сѝ . Прїидѝ хрⷭ҇тѐ , ни́щихъ люде́й твᲂи́хъ ѡ҆ѕлᲂбле́нїѧ пᲂсѣща́ѧ . млⷭ҇тивнᲂю же и҆ держа́внᲂю дла́нїю , ᲂу҆крѣпѝ держа́вꙋ на́шꙋ на хꙋ́льныѧ врагѝ , и҆зима́ти твᲂѐ и҆зрѧ́днᲂе дᲂстᲂѧ́нїе , ꙗ҆́кѡ чл҃кᲂлю́бецъ .

и҆́нъ , і҆рмо́съ . Та́йна бж҃їѧ . Зри́мъ ꙗ҆́кѡ кри́нъ тѧ пречⷭ҇тꙋю , чистᲂто́ю ѡ҆дѣ́ѧнꙋ , бжⷭ҇твенымъ дх҃ᲂмъ , пᲂсредѣ̀ те́рнїѧ сїѧ́ющꙋю , и҆ бл҃гᲂꙋха́нїѧ и҆спᲂлнѧ́ющꙋю , и҆́же тебѐ и҆́скрено велича́ющихъ . Тлѣ́нно прїе́мъ земно́е є҆стество̀ , и҆з̾ твᲂегѡ̀ всенепᲂро́чнаѧ чре́ва нетлѣ́нныи , в̾ себѣ̀ пᲂказа̀ нетлѣ́ннѡ , за бл҃гᲂꙋтро́бїе . тѣ́мже тѧ̀ ꙗ҆́кѡ бцⷣꙋ велича́емъ . И҆́же всѣ́ми владѧ́щаѧ тварьмѝ , лю́демъ сѝ да́рꙋй пᲂбѣ́днᲂе ѡ҆дᲂлѣ́нїе , непᲂкᲂри́ваго пᲂд̾ло́жши по́д̾ нᲂзѣ цр҃е́ви , да тѧ̀ ꙗ҆́кѡ бцⷣꙋ велича́емъ .

та́же , дᲂсто́йно є҆́сть .= пᲂсе́м̾ , є҆ктенїѧ̀ ма́лаѧ . та́же : ст҃ъ гдⷭ҇ь бг҃ъ на́шъ . =сти́хъ : ꙗ҆́кѡ ст҃ъ гдⷭ҇ь бг҃ъ на́шъ . сти́хъ : надᲂвсѣ́ми людьмѝ бг҃ъ на́шъ . пᲂсе́мъ , свѣти́ленъ , вᲂскрⷭ҇нъ . сла́ва , ст҃о́мꙋ , а҆́ще є҆́сть . и҆ нн҃ѣ , боⷢ҇ , вᲂскрⷭ҇нъ . =и҆ =ѱалмы̀ , ѡ҆бы́чны .

на хвали́тѣхъ , стихѣ́ры , вᲂскрⷭ҇ны . гла́съ , д҃ . =запѣ́въ : хвали́те бг҃а во ст҃ы́хъ є҆гѡ̀ . И҆́=же распѧ́тїе претерпѣ́выи и҆ сме́рть , и҆ вᲂскр҃сы́и и҆з̾ ме́ртвыхъ всемᲂгі́и гдⷭ҇и , сла́вимъ твᲂѐ вᲂскрⷭ҇нїе .

хвали́те є҆гѡ̀ во ᲂу҆тверже́нїи си́лъ є҆гѡ̀ . Крⷭ҇то́мъ твᲂи́мъ хрⷭ҇тѐ , ѿ дре́внїѧ клѧ́твы свᲂбᲂди́лъ є҆сѝ на́съ , и҆ сме́ртїю свᲂе́ю , и҆́же є҆стество̀ на́ше мꙋча́щаго дїа́вᲂла ᲂу҆праздни́лъ є҆сѝ . вᲂскрⷭ҇нїемъ же свᲂи́мъ , ра́дᲂсти всѧ́ческаѧ и҆спо́лнилъ є҆сѝ . тѣ́мже вᲂпїе́мъ ти , вᲂскр҃сы́и и҆з̾ ме́ртвыхъ , гдⷭ҇и сла́ва тебѣ̀ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Твᲂи́мъ крⷭ҇то́мъ хрⷭ҇тѐ сп҃се , наста́ви на́съ на и҆́стинꙋ твᲂю̀ , и҆ и҆зба́ви ны̀ ѿ сѣ́ти вра́жїѧ . вᲂскр҃сы́и и҆з̾ ме́ртвыхъ , вᲂста́ви на́съ па́дшїѧсѧ грѣхо́мъ , прᲂсте́ръ рꙋ́кꙋ свᲂю̀ чл҃кᲂлю́бче гдⷭ҇и , мл҃твами ст҃ы́хъ твᲂи́хъ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Ѻ҆те́ческихъ си нѣ́дръ не ѿлꙋ́чьсѧ є҆динᲂро́днᲂе сло́во бж҃їе , прїи́де на́ землю за чл҃кᲂлю́бїе , челᲂвѣ́къ бы́въ непрело́женъ . и҆ распѧ́тїе и҆ сме́рть претерпѣ́лъ є҆сѝ пло́тїю , без̾стра́стныи бжⷭ҇тво́мъ . вᲂскр҃съ же и҆з̾ ме́ртвыхъ , без̾сме́ртїе по́далъ є҆сѝ ро́дꙋ чл҃ческᲂмꙋ , ꙗ҆́кѡ є҆ди́нъ всеси́ленъ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Сме́рть и҆зво́лилъ є҆сѝ пло́тїю , на́мъ без̾сме́ртїе хᲂда́тайствꙋѧ сп҃се . и҆ во́ грᲂбъ всели́сѧ , да на́съ ѿ а҆́да свᲂбᲂди́ши , сᲂвᲂскреси́въ с̾ сᲂбо́ю . пᲂстрада̀ ᲂу҆́бѡ ꙗ҆́кѡ челᲂвѣ́къ , но вᲂскр҃се ꙗ҆́кѡ бг҃ъ . сегѡ̀ ра́ди вᲂпїе́мъ , сла́ва тебѣ̀ живᲂда́вче гдⷭ҇и , є҆ди́не чл҃кᲂлю́бче .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Ка́менїе распада́шесѧ сп҃се , є҆гда̀ на ло́бнѣмъ крⷭ҇тъ тво́й вᲂдрꙋже́нъ бы́сть . ᲂу҆страши́шасѧ а҆́дᲂвы вра́тарїе , є҆гда̀ во́ грᲂбѣ ꙗ҆́кѡ мертве́цъ пᲂлᲂже́нъ бы́сть . и҆́бо сме́ртнꙋю ᲂу҆праздни́лъ є҆сѝ крѣ́пᲂсть , ме́ртвымъ всѣ́мъ нетлѣ́нїе по́далъ є҆сѝ , вᲂскрⷭ҇нїемъ твᲂи́мъ хрⷭ҇тѐ . жизнᲂда́вче гдⷭ҇и сла́ва тебѣ̀ .

вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Вᲂжделѣ́ша жены̀ ви́дѣти твᲂѐ вᲂскрⷭ҇нїе хрⷭ҇тѐ бж҃е , прїи́де пред̾вари́вши ма́рїѧ магдалы́нѧ , ѡ҆брѣ́те ка́мень ѿвале́нъ ѿ́ грᲂба , и҆ а҆́нг҃ла сѣдѧ́ща и҆ глаго́люща , что̀ и҆́щете жива́гѡ с̾ ме́ртвыми ; вᲂскр҃се ꙗ҆́кѡ бг҃ъ , да спасе́тъ всѧ́ческаѧ , тᲂмꙋ̀ пᲂклᲂни́мсѧ .

и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Гдѣ̀ є҆́сть і҆с҃ъ , є҆го́же вмѣни́сте стрещѝ ; рцы́те і҆ꙋде́и , гдѣ̀ є҆́сть є҆го́же пᲂлᲂжи́сте во́ грᲂбѣ ; ка́мень запечатлѣ́вше . дади́те мертвеца̀ , и҆́же живᲂта̀ ѿве́ргшїисѧ . дади́те пᲂгребе́наго , и҆лѝ вѣ́рꙋйте вᲂскрⷭ҇шемꙋ . а҆́ще и҆ вы̀ ᲂу҆мᲂлчитѐ гдⷭ҇не вᲂста́нїе , ка́менїе вᲂзᲂпїе́тъ , па́че же ѿвале́ныи ѿ́ грᲂба . вели́каѧ твᲂѧ̀ ми́лᲂсть , ве́лїе та́инство смᲂтре́нїѧ твᲂегѡ̀ , сп҃се на́шъ сла́ва тебѣ̀ .

сла́ва , стихѣ́ра є҆ѵⷢ҇а́льскаѧ .= и҆ ны́нѣ . гла́съ , в҃ . пребл҃гᲂслᲂве́на є҆сѝ бцⷣе . Славᲂсло́вїе вели́кᲂе . =та́же , трᲂпа́рь . Вᲂскр҃съ и҆́з̾ грᲂба и҆ ᲂу҆́зы растерза́въ , разрꙋши́лъ є҆сѝ гдⷭ҇и сме́рти ѡ҆сꙋже́нїе , и҆ всѧ̀ ѿ сѣ́ти непрїѧ́зненыѧ и҆зба́вль . ꙗ҆вѝ себѐ а҆пⷭ҇лѡмъ свᲂи́мъ , и҆ пᲂсла́въ и҆́хъ на́ прᲂпᲂвѣдь , и҆ тѣ́ми ми́ръ сво́й по́далъ є҆сѝ вселе́ннѣй , є҆ди́не мнᲂгᲂми́лᲂстиве . пᲂсе́мъ , є҆ктенїѝ . и҆ ѿпꙋ́стъ . та́же , ча́съ , а҃ . ѱалмы̀ , ѡ҆бы́чны . и҆ кᲂне́чныи ѿпꙋ́стъ .

Въ нлⷣю , бл҃же́нны . гла́съ , д҃ .

Дре́ва ра́ди а҆да́мъ раѧ̀ бы́сть и҆з̾селе́нъ , дре́ва же ра́ди крⷭ҇тнагѡ разбо́йникъ в̾ ра́й всели́сѧ . ѻ҆́въ ᲂу҆́бѡ вкꙋ́шъ , за́пᲂвѣдь престꙋпѝ сᲂтво́ршагѡ и҆̀ . ѻ҆́въ же сраспина́емь , бг҃а тѧ̀ и҆спᲂвѣ́да таѧ́щагᲂсѧ , пᲂмѧни́ мѧ вᲂпїѧ̀ , во црⷭ҇твїи сѝ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Крⷭ҇тъ хрⷭ҇то́въ , въ пᲂмышле́нїи всѝ и҆мꙋ́ще , жите́йскїѧ сла́сти ᲂу҆мертви́ти всѝ пᲂтщи́мсѧ , цр҃кᲂвь дꙋ́ши на́ши ст҃о́мꙋ дх҃ꙋ сᲂтвᲂрѧ́юще . гла́съ разбо́йника бл҃гᲂнра́внагѡ , вѣ́рнїи к̾ немꙋ̀ вᲂз̾сыла́емъ , пᲂмѧнѝ и҆ на́съ сп҃се во црⷭ҇твїи сѝ .

бл҃же́ни мирᲂтво́рцы ,꙳ ꙗ҆́кѡ ті́и сы́нᲂве бж҃їи нарекꙋ́тсѧ . Вᲂскрⷭ҇шаго и҆з̾ ме́ртвыхъ , и҆ а҆́дᲂвꙋ держа́вꙋ плѣни́вшаго , и҆ ꙗ҆́вльшагᲂсѧ жена́мъ мѷрᲂно́сицамъ , и҆ ра́дꙋйтесѧ вᲂзᲂпи́вшаго и҆́мъ , вѣ́рнїи ᲂу҆мо́лимъ ѿ и҆стлѣ́нїѧ и҆зба́вити чл҃чество . зᲂвꙋ́ще всегда̀ к̾ немꙋ̀ , разбо́йника бл҃гᲂразꙋ́мнагѡ гла́сᲂмъ , пᲂмѧнѝ и҆ на́съ во црⷭ҇твїи сѝ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . На́ грᲂбъ тво́й хрⷭ҇тѐ , мѷрᲂно́сицы прїидо́ша пᲂма́зати тѧ̀ , и҆ не ѡ҆брѣ́тше бл҃же , живᲂно́снᲂе и҆ пречи́стᲂе тѣ́ло твᲂѐ , недᲂмышлѧ́хꙋсѧ , и҆ со слеза́ми рыда́юще , и҆ска́хꙋ тебѐ . ви́дѣвше же влⷣко тебѐ люби́маго , вᲂпїѧ́хꙋ ти , пᲂмѧнѝ и҆ на́съ во црⷭ҇твїи сѝ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Вᲂи́стинꙋ вᲂскр҃се хрⷭ҇то́съ , и҆ свидѣ́тельствꙋетъ гро́бъ , к̾ ва́мъ закᲂнᲂпрестꙋ́пницы . и҆́бо гро́бнаѧ свᲂѧ̀ ѡ҆ста́вль , вᲂскр҃се тридне́вно . ка́мень запечатлѣ́сѧ , и҆ пре́д̾ грᲂбѡмъ стра́жїе пред̾стᲂѧ́хꙋ . а҆́дъ плѣни́сѧ , сме́рть ᲂу҆мертви́сѧ . не ᲂу҆кра́денъ бы́сть хрⷭ҇то́съ . вѣ́рꙋйте с̾ на́ми вᲂскрⷭ҇нїю є҆гѡ̀ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Прише́дъ ко ᲂу҆ченикѡ́мъ , и҆ ми́ръ си́мъ да́рꙋѧ , и҆ невѣ́рꙋюща ѳѡмꙋ̀ , ꙗ҆́звъ пᲂказа́нїемъ ᲂу҆вѣрѧ́ѧ , и҆ всѧ̀ кᲂнцы̀ вᲂз̾дви́глъ є҆сѝ гдⷭ҇и сла́вити тѧ . и҆ ны́нѣ ᲂу҆мᲂле́нъ быва́ѧ , спаса́й влⷣко зᲂвꙋ́щихъ , пᲂмѧнѝ на́съ во црⷭ҇твїи сѝ .

сла́ва . Ѻ҆ц҃а , и҆ сн҃а , и҆ дх҃а ст҃а́гѡ , всѝ є҆динᲂмꙋ́дренѡ вѣ́рнїи славᲂсло́вити дᲂсто́йнѡ пᲂмо́лимсѧ . є҆ди́нство бжⷭ҇тва̀ , в̾ трїе́хъ сꙋ́ще сᲂста́вѣхъ несмѣ́сно пребыва́ющеє , про́сто , нераздѣ́льно , и҆ неприкᲂснᲂве́нно . и҆́мже и҆збавлѧ́емсѧ ѿ ѻ҆́гненагѡ мꙋче́нїѧ .

и҆ ны́нѣ . Мт҃рь твᲂю̀ хрⷭ҇тѐ , ю҆́же пло́тїю без̾ сѣ́мене ро́ждьшꙋю тѧ̀ , и҆ дв҃ꙋю вᲂи́стинꙋ и҆ по ржⷭ҇твѣ̀ пребы́вшꙋ нетлѣ́ннꙋ , сїю́ ти прино́симъ в̾ мл҃твꙋ , влⷣко мнᲂгᲂмлⷭ҇тиве , сᲂгрѣше́нїемъ прᲂще́нїе дарᲂва́ти , всегда̀ вᲂпїю́щимъ вѣ́рнѡ . ра́дꙋисѧ ᲂу҆́бѡ вᲂи́стинꙋ сᲂкро́вище жи́зненᲂе .