Глас 4 среда

Во вто́рникъ ве́черъ , на гдⷭ҇и вᲂзва́хъ , стⷯры крⷭ҇тны . гла́съ , д҃ . пᲂдо́бен̾ . ꙗ҆́кѡ до́блѧ . запѣ́в̾ : ꙗ҆́кѡ ѿ тебѐ ѡ҆чище́нїе є҆́сть . На крⷭ҇тъ вᲂз̾двиза́емь ,꙳ и҆ кᲂпїе́мъ прᲂбᲂда́емь ,꙳ и҆ пе́рсты ѡ҆крᲂвавлѧ́емь влⷣко ,꙳ свᲂбᲂжде́нїе пᲂд̾писа́лъ є҆сѝ на́мъ пребл҃гі́и ,꙳ рꙋкᲂписа́нїе а҆да́ма ꙳ прарᲂди́телѧ раз̾стерза́въ ,꙳ и҆ свᲂбᲂди́лъ є҆сѝ чл҃ческᲂе сꙋщество̀ .꙳ сегѡ̀ ра́ди вᲂспѣва́емъ ще́дре ,꙳ ю҆́же па́че ᲂу҆ма̀ ꙳ твᲂю̀ бл҃гᲂсты́ню .

ᲂу҆пᲂва̀ дш҃а мᲂѧ̀ на́ гдⷭ҇а . Вᲂспѣва́емъ твᲂѧ̀ страда́нїѧ ꙳ влⷣко і҆с҃е ,꙳ крⷭ҇тъ кᲂпїе́ же и҆ тро́сть ,꙳ гꙋ́бꙋ и҆ гво́здїѧ , бїе́нїѧ ,꙳ багрѧни́цꙋ и҆ вѣне́цъ ѿ те́рнїѧ ,꙳ ѡ҆плева́нїе же и҆ пᲂрꙋга́нїѧ ,꙳ и҆́хже претерпѣ́лъ є҆сѝ во́лею ,꙳ велича́ю ти неѕло́биве ,꙳ є҆ди́не живᲂда́вче дᲂлгᲂтерпѣ́нїе ,꙳ и҆ вѣ́рᲂю славᲂсло́влю тѧ чл҃кᲂлю́бче .

да ᲂу҆пᲂва́етъ і҆зра́иль на́ гдⷭ҇а . Крⷭ҇тꙋ̀ твᲂемꙋ̀ честно́мꙋ ꙳ пᲂклᲂнѧ́юсѧ пребл҃гі́и ,꙳ любо́вїю лᲂбыза́ѧ ,꙳ и҆ сла́влю твᲂѐ є҆́же па́че ᲂу҆ма̀ сᲂше́ствїе .꙳ без̾мѣ́рнꙋю млⷭ҇ть .꙳ неи҆зрече́нныѧ щедро́ты .꙳ бᲂга́тꙋю бл҃гᲂсты́ню .꙳ є҆ѧ́же ра́ди спа́слъ є҆сѝ чл҃ческᲂе сꙋщество̀ ,꙳ сᲂдержи́мо бы́вшеє во тмѣ̀ прегрѣше́нїи .꙳ сла́ва хрⷭ҇тѐ распѧ́тїю твᲂемꙋ̀ .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стихѣ́ры , к̾ прест҃ѣ́й бцⷣѣ . гла́съ , и҆ пᲂдо́бенъ , то́йже . =запѣ́въ : ѿ всѣ́хъ без̾зако́нїи є҆гѡ̀ . Н=а крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжда́ема тѧ гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ что̀ видѣ́нїе сѐ взыва́ше ,꙳ сн҃е вᲂжделѣ́нныи ,꙳ сїѧ́ ти непᲂкᲂри́выи со́нмъ ,꙳ вᲂздае́тъ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ ;꙳ но сла́ва неи҆зрече́ннᲂмꙋ ꙳ схᲂжде́нїю твᲂемꙋ̀ влⷣко .

пᲂхвали́те є҆гѡ̀ всѝ лю́дїє . А҆́гньца и҆ па́стырѧ тѧ ,꙳ на́ древѣ ꙗ҆́кѡ ви́дѣ ,꙳ а҆́гница ро́ждьшаѧ рыда́ше ,꙳ и҆ мт҃рьски тебѣ̀ вѣща́ше ,꙳ сн҃е любе́знѣйшїи ,꙳ ка́кѡ на́ древо крⷭ҇тнᲂе ꙳ вᲂз̾дви́жесѧ дᲂлгᲂтерпѣли́ве ;꙳ ка́кѡ рꙋ́цѣ и҆ но́зѣ твᲂѝ сло́ве ,꙳ пригвᲂзди́шасѧ ѿ без̾зако́нныхъ ,꙳ и҆ кро́вь свᲂю̀ и҆злїѧ́лъ є҆сѝ влⷣко .

и҆ и҆́стина гдⷭ҇нѧ пребыва́етъ во́ вѣки . Ꙗ҆́кѡ ви́дѣ тѧ гдⷭ҇и ,꙳ дв҃аѧ и҆ мт҃и твᲂѧ̀ ,꙳ на крⷭ҇тѣ̀ пᲂвѣ́шена дивлѧ́шесѧ ,꙳ и҆ взира́ющи гл҃аше ,꙳ что́ ти вᲂзда́ша ,꙳ и҆́же мно́гихъ твᲂи́хъ дарѡ́въ ꙳ насла́ждьшїисѧ влⷣко ,꙳ но мᲂлю́сѧ не ѡ҆ста́ви менѐ є҆ди́нꙋ в̾ ми́рѣ .꙳ но пᲂтщи́сѧ вᲂскрⷭ҇нꙋ́ ти ,꙳ сᲂвᲂставлѧ́ѧ пра́ѻ҆ц҃а .

сла́ва , и҆ нн҃ѣ , крⷭ҇тᲂбоⷢ҇ . поⷣ . и҆́же зва́ныи с̾вы́ше . Нерыда́й менѐ мт҃и , ꙳ зрѧ́щи на́ древѣ пᲂвѣ́шена свᲂегѡ̀ сн҃а и҆ бг҃а ,꙳ и҆́же на вᲂда́хъ пᲂвѣ́сившаго зе́млю ,꙳ и҆ всю̀ тва́рь сᲂдѣ́лавшаго .꙳ сѐ вᲂскрⷭ҇нꙋ и҆ прᲂсла́влюсѧ .꙳ и҆ а҆́дᲂва црⷭ҇твїѧ сᲂкрꙋшꙋ̀ крѣ́пᲂстїю ,꙳ и҆ пᲂгꙋблю̀ тᲂго̀ си́лꙋ .꙳ и҆ свѧ́заныѧ и҆зба́влю ѿ ѕлᲂдѣ́йства є҆гѡ̀ ,꙳ ꙗ҆́кѡ бл҃гᲂꙋтро́бенъ .꙳ и҆ ѻ҆ц҃ꙋ свᲂемꙋ̀ приведꙋ̀ ꙳ ꙗ҆́кѡ чл҃кᲂлю́бецъ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , крⷭ҇тны . гла́съ , д҃ . Ѻ҆рꙋ́жїе непᲂбѣди́мᲂе хрⷭ҇тѐ , крⷭ҇тъ тво́й да́лъ є҆сѝ на́мъ , и҆ си́мъ пᲂбѣжда́емъ прило́ги чꙋжа́гѡ .

сти́хъ : к̾ тебѣ̀ вᲂзведо́хъ ѻ҆́чи мᲂѝ . Всегда̀ и҆мꙋ́ще хрⷭ҇тѐ крⷭ҇тъ тво́й на́ пᲂмᲂщь , сѣ́ти вра́жїѧ ᲂу҆до́бь пᲂпира́емъ .

сти́хъ : пᲂми́лꙋй на́съ гдⷭ҇и . мⷱ҇ꙋ . И҆мꙋ́ще дерзнᲂве́нїе к̾ сп҃сꙋ ст҃і́и , мᲂли́те непреста́ннѡ за ны̀ грѣ́шныѧ . ѡ҆ставле́нїе прегрѣше́нїемъ прᲂсѧ́ще , и҆ дш҃а́мъ на́шимъ ве́лїю млⷭ҇ть .

сла́ва , и҆ ны́нѣ , крⷭ҇тᲂбоⷢ҇ . поⷣ . ꙗ҆́кѡ до́блѧ .= Р=аспина́ема хрⷭ҇та̀ чл҃кᲂлю́бца ,꙳ ви́дѧщи пречⷭ҇таѧ ,꙳ и҆ ре́бра и҆скᲂпᲂва́ема кᲂпїе́мъ ,꙳ пла́чꙋщи вᲂпїѧ́ше ,꙳ что̀ сѐ сн҃е мо́й ;꙳ что́ ти без̾благᲂда́тнїи лю́дїє вᲂз̾да́ша ,꙳ за ꙗ҆́же сᲂтвᲂри́лъ є҆сѝ до́браѧ и҆́мъ .꙳ и҆ тщи́шисѧ без̾ча́дствᲂвати мѧ вселюбе́знѣйшїи ;꙳ ᲂу҆дивлѧ́юсѧ бл҃гᲂꙋтро́бне ,꙳ твᲂемꙋ̀ во́льнᲂмꙋ распѧ́тїю .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Во вто́рникъ на па́вечерницѣ , кано́нъ прест҃ѣ́й бцⷣѣ . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ . запѣ́въ : прест҃а́ѧ гжⷭ҇е бцⷣе спасѝ на́съ . Неи҆з̾мѣ́рнꙋю бж҃їю мꙋ́дрᲂсть и҆ си́лꙋ ро́ждьши пренепᲂро́чнаѧ , хрⷭ҇та̀ без̾ сѣ́мене пло́тїю , держа́вꙋ крѣ́пᲂсти и҆ бжⷭ҇твенᲂе вели́чїе стѧжа̀ ржⷭ҇тво́мъ свᲂи́мъ бг҃ᲂрᲂди́тельнице . Ѽ па́че ᲂу҆ма̀ ржⷭ҇тво́ ти пречⷭ҇таѧ , и҆́мже ѡ҆бᲂгати́сѧ земны́хъ мно́жество нетлѣ́нїемъ , и҆ тѧ̀ ны́нѣ бл҃жи́тъ дᲂсто́йнѡ , хᲂда́таицꙋ ѡ҆бнᲂвле́нїѧ . сла́ва . Бᲂлѧ́ща и҆сцѣлѝ , дш҃е́ю и҆ тѣ́лᲂмъ дв҃це раба̀ твᲂегѡ̀ ѡ҆сѣне́нїемъ твᲂи́мъ . тѧ́ бо пред̾ста́тельницꙋ всѣ́мъ сꙋ́щимъ в̾ печа́ли пᲂзна́хъ , ꙗ҆́кѡ ро́ждьшꙋ спасе́нїе на́ше . и҆ нн҃ѣ . Лю́тѣ пᲂгрꙋжа́емꙋ в̾ пꙋчи́нѣ скᲂрбе́й , и҆ бꙋ́рею без̾мѣ́рныхъ ѡ҆бстᲂѧ́нїи , спасе́нїе прᲂсте́рши ми рꙋ́кꙋ , и҆зведѝ влⷣчце и҆з̾ глꙋбины̀ ѕѡ́лъ .

пѣ́снь , г҃ . і҆рмо́съ . Твᲂѧ̀ пѣвцы̀ бцⷣе , живы́и нетлѣ́нїѧ и҆сто́чниче , ли́къ себѣ̀ сᲂвᲂкꙋ́пльши дх҃о́венъ ᲂу҆твердѝ , и҆ в̾ бжⷭ҇твеннѣй ти сла́вѣ , вѣнце́мъ сла́вы спᲂдо́би . Крᲂпи́ши и҆сцѣле́нїемъ стрꙋѝ , бᲂлѧ́щимъ дв҃о всю́дꙋ , тѧ́ бо и҆сто́чника пᲂказа̀ млрⷭ҇дїѧ влⷣчце , и҆́же млⷭ҇ти гдⷭ҇ь и҆з̾ тебѐ рᲂжде́исѧ па́че ᲂу҆ма̀ . Красе́нъ черто́гъ бжⷭ҇твенᲂмꙋ сло́вꙋ , и҆ бжⷭ҇твеныи невѣ́стникъ вы́ше є҆стества̀ дв҃о мт҃и бы́сть . тѣ́мже млⷭ҇ти твᲂи́хъ щедро́тъ ѿве́рзи ми , ко спасе́нїю вᲂз̾вᲂдѧ́щи . сла́ва . Оу҆мертви́сѧ всѧ̀ крѣ́пᲂсть мᲂѧ̀ ѿ мно́жества без̾мѣ́рныхъ ѕѡ́лъ . мно́гими ᲂу҆́бѡ скᲂрбьмѝ ѿча́ѧхсѧ , пᲂмᲂзи́ ми бцⷣе , ꙗ҆́же жи́знь ро́ждьшаѧ , и҆ пла́чꙋщимъ ᲂу҆тѣше́нїе . и҆ ны́нѣ . Пᲂми́лꙋй є҆ди́на бг҃ᲂмт҃и , пᲂми́лꙋй , и҆ ᲂу҆ще́дри дш҃ꙋ мᲂю̀ ѡ҆каѧ́ннꙋю , пᲂтᲂплѧ́емꙋю бѣсы̀ лꙋка́выми и҆ страстьмѝ . и҆ пре́жде вре́мене сме́рти мᲂеѧ̀ , сїю̀ ѡ҆чи́стити ᲂу҆милᲂсе́рдисѧ .

пѣ́снь , д҃ . і҆рмо́с̾ . Неи҆зслѣ́днᲂмꙋ бж҃їю сᲂвѣ́тꙋ , є҆́же ѿ дв҃ы вᲂплᲂще́нїе тебѐ вы́шнѧгѡ , пррⷪ҇къ а҆вва́кꙋмъ дивѧ́сѧ вᲂпїѧ́ше , сла́ва си́лѣ твᲂе́й гдⷭ҇и . Ко́рене и҆ чре́слъ тѧ цр҃ьскихъ , всѣ́хъ цр҃ь ꙗ҆́кѡ сꙋ́щꙋ вᲂз̾желѣ́въ , вы́шшꙋ херꙋви́мъ и҆ серафи́мъ сᲂдѣ́ла , ве́сь бцⷣе все́льсѧ в̾ тѧ̀ . Челᲂвѣ́ческагѡ ра́ди пᲂрᲂжде́нїѧ , сᲂдѣ́тель вᲂплᲂща́емь и҆з̾ тебѐ рᲂди́сѧ , и҆ пред̾ста́тельницꙋ нело́жнꙋ хрⷭ҇тїа́нѡмъ тѧ пᲂказа̀ . тѣ́мже к̾ твᲂемꙋ̀ кро́вꙋ прибѣга́ю чи́стаѧ . сла́ва . Кро́въ и҆ застꙋпле́нїе и҆ прибѣ́жище бꙋ́ди ми дв҃о рабꙋ̀ твᲂемꙋ̀ , и҆ и҆сцѣли́ мѧ ѿ без̾мѣ́рныхъ ѕѡ́лъ вᲂспѣва́ти тѧ пречⷭ҇таѧ . сла́ва неи҆зрече́ннᲂмꙋ ржⷭ҇твꙋ̀ твᲂемꙋ̀ . и҆ нн҃ѣ . Недᲂꙋмѣ́юсѧ и҆ слезю̀ , и҆ стᲂню̀ ѿ страстны́хъ мᲂи́хъ пᲂмышле́нїи , тѧ̀ мᲂлю̀ ꙗ҆́кѡ є҆сѝ и҆сто́чникъ млⷭ҇ти , ѿ бᲂле́зней мᲂи́хъ и҆зба́ви мѧ , ведꙋ́щи к̾ бжⷭ҇твенᲂмꙋ ᲂу҆миле́нїю .

пѣ́снь , є҃ . і҆рмо́съ . Оу҆диви́шасѧ всѧ́ческаѧ , ѡ҆ бжⷭ҇твеннѣй сла́вѣ твᲂе́й , ты́ бо бракᲂнеи҆скꙋси́маѧ дв҃це , прїѧ́тъ во ᲂу҆тро́бѣ надᲂвсѣ́ми сꙋ́щагѡ бг҃а , и҆ рᲂдила̀ є҆сѝ без̾лѣ́тнагѡ сн҃а , всѣ́мъ вᲂспѣва́ющимъ тѧ̀ ми́ръ пᲂдава́юща . И҆сцѣле́нїемъ во́ды то́чиши прⷭ҇нѡ дв҃о , всѣ́мъ бᲂлѧ́щимъ , ꙗ҆́кѡ ѻ҆́блакъ ѡ҆дш҃евле́нъ сы́и цр҃ѧ хрⷭ҇та̀ . тѣ́мже мᲂлю́ тѧ прилѣ́жнѡ , ро́сꙋ и҆сцѣле́нїѧ ми бᲂлѧ́щемꙋ низ̾пᲂслѝ . Непреста́й мᲂлѧ́щи є҆го́же рᲂдѝ бг҃ᲂневѣ́сто дв҃о , ꙗ҆́кѡ сп҃са и҆ влⷣкꙋ , разрѣше́нїе ми да́ждь скᲂрбе́й и҆ бᲂлѣ́знемъ , и҆ к̾ ра́дᲂсти нетлѣ́ннѣй мѧ вᲂзведѝ , прᲂща́ѧ ми прегрѣше́нїѧ . сла́ва . Оу҆пᲂва́нїе ми є҆сѝ пречⷭ҇таѧ , и҆ спасе́нїю пᲂхвала̀ . тѣ́мже прибѣга́ю ти к̾ пᲂкро́вꙋ , негнꙋша́йсѧ менѐ , грѣхѝ мно́гими и҆ бᲂлѣ́зньми ско́рбными ны́нѣ пᲂглᲂще́ннаго , но пред̾варѝ и҆ спаси́ мѧ . и҆ ны́нѣ . Гро́здъ зрѣ́лыи ка́кѡ на́ древѣ ви́сиши ; сл҃нце сла́вѣ ка́кѡ вᲂз̾дви́жесѧ , свѣ́тъ сл҃нцꙋ пᲂмрачи́выи в̾ стрⷭ҇ти свᲂе́й , сп҃се ро́ждьшаѧ тѧ а҆́гница дре́вле вᲂпїѧ́ше ти мт҃рьски вᲂсклица́ющи .

пѣ́снь , ѕ҃ . і҆рмо́съ . Прїидо́хъ во глꙋбины̀ мᲂрскі́ѧ , и҆ пᲂтᲂпи́ла мѧ є҆́сть бꙋ́рѧ мно́гихъ ми прегрѣше́нїи . но ꙗ҆́кѡ бг҃ъ , и҆з̾ тлѝ вᲂз̾ведѝ живо́тъ мо́й мнᲂгᲂмлⷭ҇тиве . Зра́къ вᲂспрїѧ́тъ ра́бїи ѿ тебѐ дв҃о , всѣ́хъ цр҃ь и҆ бг҃ъ на́шъ , и҆ вы́шшꙋ тѧ ꙗ҆́кѡ бцⷣꙋ пᲂказа̀ , херꙋви́мъ и҆ стра́шныхъ серафи́мъ . Ꙗ҆́же є҆ди́на ро́ждьши бж҃їю жи́знь , и҆ всѣ́мъ спасе́нїе даю́щи , ѿча́ѧнна мѧ сꙋ́ща спасе́нїю спᲂдо́би , и҆ страсте́мъ мᲂи́мъ вᲂста́нїе пресѣцы̀ . сла́ва . Твᲂю̀ пᲂда́ждь по́мᲂщь и҆ и҆зба́ви мѧ бѣ́дъ и҆ скᲂрбе́й , свᲂбᲂжда́ющи мѧ напа́стей и҆ прегрѣше́нїи мᲂи́хъ , ꙗ҆́же всѣ́хъ ро́ждьшаѧ и҆збавле́нїе . и҆ ны́нѣ . Ѡ҆ тебѣ̀ дв҃о хва́лимсѧ , и҆ тᲂбо́ю лю́тыхъ и҆збавлѧ́емсѧ , надѣ́ѧнїемъ твᲂи́мъ нахᲂжде́нїѧ небᲂи́мсѧ ѕлᲂчести́выхъ ва́рваръ , вᲂспѣва́ющїи тѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , д҃ . Дв҃о всенепᲂро́чнаѧ мт҃и хрⷭ҇та̀ бг҃а , ѻ҆рꙋ́жїе про́йде твᲂю̀ ст҃ꙋ́ю дш҃ꙋ , є҆гда̀ распина́ема ᲂу҆зрѣ̀ во́лею сн҃а и҆ бг҃а свᲂегѡ̀ . є҆го́же пребл҃гᲂслᲂве́ннаѧ мᲂлѧ́щи непреста́й , прᲂще́нїе сᲂгрѣше́нїемъ на́мъ дарᲂва́ти .

пѣ́снь , з҃ . і҆рмо́съ . Непᲂслꙋжи́ша тва́ри бг҃ᲂмꙋ́дрїи па́че зижди́телѧ , но ѻ҆́гненнᲂе преще́нїе , мꙋ́жески пᲂпра́вше ра́дᲂвахꙋсѧ пᲂю́ще , препѣ́тыи и҆́же ѻ҆ц҃е́мъ гдⷭ҇ь и҆ бг҃ъ блгⷭ҇ве́нъ є҆сѝ . И҆́з̾сше ꙗ҆́кѡ скꙋде́ль стрⷭ҇тьмѝ всѧ̀ крѣ́пᲂсть мᲂѧ̀ , и҆ сѐ а҆́дꙋ прибли́жихсѧ , ѿ ᲂу҆́зъ всепа́гꙋбныхъ . пред̾варѝ мт҃и бж҃їѧ , и҆ и҆схитѝ ѿ ѡ҆держа́щихъ печа́лей , рꙋко́ю млⷭ҇ти твᲂеѧ̀ . Растерза́емѣ ᲂу҆тро́бѣ мᲂе́й , ѿ ѕлѡ́бъ мнᲂгᲂѡ҆бра́зныхъ , и҆ є҆́же в̾ житїѝ растерза́юсѧ , мно́жествᲂмъ прегрѣше́нїи и҆ бᲂлѣ́зней мᲂи́хъ . но и҆зба́ви мѧ ѿ ѻ҆бᲂи́хъ пречⷭ҇таѧ , жи́знь на́мъ ро́ждьшаѧ . сла́ва . Ца́рства хрⷭ҇то́ва всеще́драгѡ , дв҃о пречⷭ҇таѧ ѿве́рсти ми ꙗ҆́кѡ бл҃га́ѧ спᲂдо́би . и҆ бᲂлѣ́зней дш҃етлѣ́нныхъ , и҆ нахᲂжде́нїи и҆зба́вити , твᲂи́ми мл҃твами бл҃гᲂслᲂве́наѧ . и҆ ны́нѣ . Ѻ҆бᲂщре́ны бᲂлѣ́зни ра́намъ мᲂи́мъ , ѿ без̾мѣ́рныхъ ми прегрѣше́нїи , ведꙋ́тъ в̾ сме́рть дш҃е́внꙋю и҆ тѣле́снꙋю . но и҆схити́ мѧ влⷣчце , ꙗ҆́кѡ си́льна , всѧ́кихъ скᲂрбе́й и҆ недꙋ́гъ .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Пе́щь страсте́й тернᲂно́сныхъ стѧжа́хъ , и҆ жа́лᲂмъ си́хъ прᲂбᲂда́емь є҆́смь . тѣ́мже ѿча́ѧхсѧ , ᲂу҆́зами пᲂдавлѧ́емь є҆́смь и҆ напа́стьми , пречⷭ҇таѧ мт҃и хрⷭ҇та̀ бг҃а , ѿ ни́хже мѧ и҆збавлѧ́ющи , пᲂда́ждь всѣ́хъ прегрѣше́нїи прᲂще́нїе , твᲂи́ми мл҃твами . Свѣ́щниче свѣ́та трисо́лнечнагѡ сꙋ́щи , заре́ю бл҃гᲂꙋтро́бїѧ твᲂегѡ̀ , тмꙋ̀ ѿи҆мѝ прегрѣше́нїемъ мᲂи́мъ бг҃ᲂрᲂди́тельнице . и҆збавле́нїе нꙋ́жнымъ бᲂлѣ́знемъ пᲂдаю́щи , вѣ́рᲂю пᲂю́щемꙋ , и҆ превᲂзнᲂсѧ́щемꙋ пречⷭ҇тᲂе твᲂѐ ржⷭ҇тво̀ . сла́ва . Ве́сь все́льсѧ во́ чрево твᲂѐ , не и҆з̾гл҃аннѡ вᲂплᲂти́сѧ пресꙋ́щныи бг҃ъ прⷭ҇нѡ дв҃о , ми́рꙋ застꙋ́пницꙋ тѧ и҆ ѻ҆́бщꙋ по́мᲂщь сᲂдѣ́лавъ . тѣ́мже мᲂлю̀ и҆зба́витисѧ лю́тыхъ страсте́й мᲂи́хъ , и҆ ᲂу҆́зъ прегрѣше́нїи . и҆ ны́нѣ . Въ ча́съ дв҃о кᲂнчи́ны мᲂеѧ̀ , рꙋкѝ бѣсо́вскїѧ и҆ ѡ҆сꙋжде́нїѧ , и҆ ѿвѣ́та , и҆ стра́шнагѡ и҆спыта́нїѧ , и҆ мыта́рствъ го́рькихъ , и҆ кнѧ́зѧ лю́тагѡ и҆ ѻ҆гнѧ̀ вѣ́чнагѡ и҆схити́ мѧ бг҃ᲂмт҃и .

пѣ́снь , ѳ҃ . і҆рмо́съ . Всѧ́къ зе́менъ , да взыгра́етсѧ дх҃ᲂмъ прᲂсвѣща́емъ . да ликᲂвствꙋ́етъ же , беспло́тныхъ ᲂу҆мо́въ є҆стество̀ , пᲂчита́ѧ ст҃о́е тᲂржество̀ бж҃їѧ мт҃ре . и҆ да пᲂе́тъ , ра́дꙋйсѧ пребл҃же́ннаѧ , бцⷣе чⷭ҇таѧ прⷭ҇нѡ дв҃о . Ро́дъ земны́и вᲂз̾несе́сѧ ржⷭ҇тво́мъ ти , сынᲂпᲂлᲂже́нїе взе́мъ , бжⷭ҇твенымъ сᲂвᲂкꙋпле́нїемъ , и҆ сликꙋ́етъ нбⷭ҇нᲂе мно́жество , со земны́ми пᲂю́ще тѧ дᲂстᲂдо́лжнѡ чⷭ҇таѧ , ꙗ҆́кѡ мт҃рь сꙋ́щꙋ бг҃а на́шегѡ , и҆ ми́рꙋ всемꙋ̀ прибѣ́жище . Ве́сь бы́въ ѿ ню́дъ стѧ́гнꙋтъ грѣхѝ мᲂи́ми , ѿ без̾мѣ́рныхъ ра́нъ и҆ бᲂлѣ́зней , твᲂю̀ по́мᲂщь призыва́ю влⷣчце и҆ застꙋпле́нїе . є҆́же пᲂда́ждь всѣ́хъ и҆збавлѧ́ющи мѧ , лю́тыхъ бѣ́дъ и҆ скᲂрбе́й . сла́ва . Пѣ́нїе с̾ пѣ́снїю , и҆ хвале́нїе сплете́нїѧ , ны́нѣ ѿ бᲂлѣ́знены дш҃и принᲂша́ю с̾ любо́вїю , тебѣ̀ ро́ждьшѣй є҆стество́мъ хрⷭ҇та̀ бг҃а . є҆го́же бл҃гᲂпребы́тна прїе́мъ , и҆ прᲂше́нїѧ мᲂѧ̀ бцⷣе всѧ̀ и҆спо́лньши , мл҃твами твᲂи́ми сᲂблюдѝ . и҆ ны́нѣ . Прᲂсвѣтѝ чи́стаѧ бг҃ᲂрᲂди́тельнице дш҃и мᲂеѧ̀ ѻ҆́чи , да непᲂсти́гнетъ менѐ грѣхо́внаѧ тма̀ тѧ́жкаѧ , нижѐ глꙋбина̀ пᲂкры́етъ мѧ ѿча́ѧнїѧ . но сама́ мѧ спасѝ и҆ ѡ҆кᲂрмѝ , пред̾ста́тельнице вѣ́рнымъ непᲂсты́днаѧ . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , д҃ . И҆скꙋпи́лъ ны є҆сѝ ѿ клѧ́твы зако́нныѧ , чⷭ҇тно́ю сѝ кро́вїю , на крⷭ҇тѣ̀ пригво́ждьсѧ , и҆ кᲂпїе́мъ прᲂбᲂде́сѧ , без̾смр҃тїе и҆стᲂчи́лъ є҆сѝ на́мъ , сп҃се на́шъ сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂдно́жїю но́гꙋ є҆гѡ̀ ꙗ҆́кѡ ст҃о є҆́сть . На крⷭ҇тѣ́ тѧ сп҃се пригвᲂзди́ша і҆ꙋде́и , и҆́мже ѿ и҆стлѣ́нїѧ на́съ призва̀ хрⷭ҇тѐ бж҃е на́шъ , прᲂсте́рлъ є҆сѝ дла́ни на не́мъ во́лею свᲂе́ю , кᲂпїе́мъ же в̾ ре́бра свᲂѧ̀ прїѧ́лъ є҆сѝ прᲂбᲂсти́сѧ , мно́жествᲂмъ щедро́тъ твᲂи́хъ , є҆ди́не чл҃кᲂлю́бче . сла́ва , и҆ нн҃ѣ , крⷭ҇тᲂбоⷢ҇ . Непᲂро́чнаѧ мт҃и твᲂѧ̀ хрⷭ҇тѐ , ꙗ҆́кѡ ᲂу҆зрѣ̀ на крⷭ҇тѣ́ тѧ вᲂзвыша́ема , рыда́ющи мт҃рьски такᲂва́ѧ вѣща́ше , что̀ но́вᲂе и҆ стра́ннᲂе сїѐ чꙋ́до сн҃е мо́й ; ка́кѡ без̾зако́нныи со́нмъ , ко крⷭ҇тꙋ́ тѧ пригвᲂжда́етъ всѣ́хъ жи́знь , свѣ́те мо́й сладча́йшїи .

по в҃ , стихᲂло́гїи . сѣда́льны , гла́съ , д҃ . Ско́рѡ пред̾варѝ пре́жде да́же непᲂрабо́тимсѧ , врази́ бо хꙋ́лѧтъ тѧ̀ , и҆ претѧ́тъ на́мъ хрⷭ҇тѐ бж҃е . но пᲂгꙋбѝ крⷭ҇то́мъ свᲂи́мъ бᲂрю́щихсѧ с̾ на́ми , да разꙋмѣ́ютъ кᲂли́кѡ мо́жетъ правᲂсла́вныхъ вѣ́ра , мл҃твами бцⷣы є҆ди́не чл҃кᲂлю́бче .= сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . На крⷭ҇тѣ̀ пригво́ждьсѧ на ло́бнѣмъ во́лею свᲂе́ю , мᲂю̀ дре́внюю ꙗ҆́звꙋ грѣхо́внꙋю и҆сцѣли́лъ є҆сѝ влⷣко , мно́гїѧ ра́ди бл҃гᲂсты́ни , ꙗ҆́кѡ пᲂлᲂжи́сѧ хᲂтѣ́нїемъ чл҃кᲂлю́бче сп҃се на́шъ , за́ рᲂдъ чл҃ческїи , и҆ ѿ ре́бръ свᲂи́хъ и҆ска́палъ є҆сѝ кро́вь и҆ во́дꙋ , и҆́же вѣ́рᲂю пᲂю́щимъ тѧ̀ . =сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Си́лᲂю крⷭ҇тнᲂю пᲂдви́гшесѧ до́брѣ , сᲂпᲂста́та врага̀ низ̾лᲂжи́сте крѣ́пкѡ , терпѣ́нїемъ ва́шимъ ст҃і́и стрⷭ҇тᲂно́сцы . тѣ́мже честны́ѧ сᲂверша́юще вѣ́рнѡ па́мѧти ва́ша , ѡ҆сщ҃а́емсѧ дѣ́йствᲂмъ и҆ бл҃гᲂда́тїю дх҃а всест҃а́гѡ , мл҃твами ва́шими , сщ҃е́ннїи хрⷭ҇то́вы ѻ҆рꙋ́жницы ѡ҆́ мирѣ сп҃сꙋ мᲂли́тесѧ . сла́ва , и҆ ны́нѣ , крⷭ҇тᲂбоⷢ҇ . Дв҃аѧ и҆ а҆́гница ви́дѣвши на крⷭ҇тѣ̀ , и҆́же без̾ сѣ́мене и҆з̾ неѧ̀ а҆́гньца ро́ждьшагᲂсѧ , и҆ кᲂпїе́мъ прᲂбᲂде́на , и҆ печа́лїю ᲂу҆ѧ́звена стрѣла́ми , вᲂпїѧ́ше бᲂлѣ́зненѡ вᲂсклица́ющи , что̀ но́вᲂе та́инство ка́кѡ ᲂу҆мира́еши , и҆́же живᲂтꙋ̀ є҆ди́нъ гдⷭ҇ь ; тѣ́мже вᲂскр҃снѝ , па́дшаго сᲂвᲂздвиза́ѧ пра́ѻ҆ц҃а .

по г҃ , стихᲂло́гїи . сѣда́ленъ , гла́съ , д҃ . На́ древѣ разꙋмѣ́въ тѧ̀ пᲂвѣ́шена сл҃нца пра́веднагѡ хрⷭ҇тѐ , со́лнце свѣ́тъ пᲂмрачѝ , тва́рь же пᲂдвиза́шесѧ . и҆ ме́ртвїи ꙗ҆́кѡ ѿ сна̀ ско́рѡ и҆з̾ грѡ́бъ вᲂста́хꙋ сло́ве , бжⷭ҇твенꙋю пѣснᲂсла́вѧще держа́вꙋ сла́вы твᲂеѧ̀ . сла́ва , и҆ ны́нѣ , крⷭ҇тᲂбоⷢ҇ . Дв҃о всенепᲂро́чнаѧ мт҃и хрⷭ҇та̀ бг҃а , ѻ҆рꙋ́жїе про́йде твᲂю̀ всест҃ꙋ́ю дш҃ꙋ , є҆гда̀ распина́ема ви́дѣла є҆сѝ во́лею сн҃а свᲂегѡ̀ и҆ бг҃а , є҆го́же преблгⷭ҇ве́наѧ мᲂлѧ́щи непреста́й , прᲂще́нїе сᲂгрѣше́нїемъ на́мъ дарᲂва́ти .

Кано́нъ , чⷭ҇тно́мꙋ и҆ живᲂтвᲂрѧ́щемꙋ крⷭ҇тꙋ̀ . и҆ ст҃ы́мъ мч҃нкѡмъ . твᲂре́нїе і҆ѡ́сифᲂво . є҆мꙋ́же краегране́сїе сицево̀ . крⷭ҇тъ є҆́сть ѻ҆рꙋ́жїе во спасе́нїе . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡбра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть . запѣ́в̾ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . Прᲂпны́и нб҃о , распрᲂсте́рлъ є҆сѝ і҆с҃е дла́ни свᲂѝ , ꙗ҆зы́ки дале́че сꙋ́щїѧ ѿ тебѐ ꙗ҆́кѡ бл҃гъ и҆ милᲂсе́рдъ свѣ́тлѡ к̾ себѣ̀ призыва́ѧ . Крⷭ҇то́мъ твᲂи́мъ хрⷭ҇тѐ мо́й сло́ве ѡ҆гради́ мѧ , ꙗ҆́кѡ да не бꙋ́дꙋ ᲂу҆лᲂвле́нїе во́лкꙋ , и҆́же мᲂю̀ и҆́щꙋщꙋ пᲂги́бель , и҆ по всѧ̀ днѝ сѣ́ти мнѣ̀ и҆ лᲂвле́нїѧ гᲂто́вѧщꙋ . запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Бᲂлѣ́зньми свᲂи́ми мч҃нцы бᲂлѣ́знемъ всѣ́мъ хᲂда́таѧ низ̾лᲂжи́сте . и҆ ны́нѣ наслѣ́дᲂвасте небᲂлѣ́зненꙋю жи́знь , и҆ всѧ́кꙋ бᲂлѣ́знь ѡ҆блегчева́ете бл҃же́ннїи всегда̀ , ѿ дꙋ́шъ и҆ тѣле́съ на́шихъ . мⷱ҇ꙋ . Нерѣши́мыми ᲂу҆́зами , вы̀ ст҃і́и свѧза́сте мнᲂгᲂко́зненаго , за хрⷭ҇та̀ вѧ́жеми мꙋ́дрїи , свѧза́вшагᲂсѧ во́лею , и҆ всѧ́кꙋю пре́лесть разрꙋши́вша . тѣ́мже дᲂсто́йнѡ ᲂу҆бл҃жа́етесѧ . боⷢ҇ . Дв҃ᲂю по ржⷭ҇твѣ̀ пребы́сть , бг҃а бо рᲂдила̀ є҆сѝ пречⷭ҇таѧ , вᲂз̾дви́жена на крⷭ҇тѣ̀ , и҆ земны́ѧ сᲂвᲂз̾дви́гшаго , тѣ́мже тѧ̀ всѝ вѣ́рнїи велегла́снѡ ᲂу҆бл҃жа́емъ .

Дрꙋгі́и кано́нъ , прест҃ѣ́й бцⷣѣ . є҆мꙋ́же краегране́сїе , сицево̀ . бцⷣѣ дв҃ѣй мᲂльбꙋ̀ принᲂша́ю . і҆рмо́съ , то́йже . =запѣ́въ : прест҃а́ѧ гжⷭ҇е бцⷣе спасѝ на́съ . Ꙗ҆́кѡ сꙋ́щи чистѣ́йша пречⷭ҇таѧ всѧ́кїѧ тва́ри , и҆́же не чи́стыми страстьмѝ , лю́тѣ ѡ҆скверне́нᲂе се́рдце мᲂѐ , чи́стᲂю мл҃твᲂю си бг҃ᲂрᲂди́тельнице ѡ҆чи́сти . =двⷤа . Сле́зъ и҆ вᲂздыха́нїи и҆зба́ви мѧ пред̾лежа́щихъ ми , в̾ бꙋ́дꙋщемъ стра́шнѣмъ сꙋдѣ̀ , бг҃ᲂпрїѧ́тными мл҃твами сѝ дв҃о мт҃и пречⷭ҇таѧ , є҆́же к̾ зижди́телю и҆ бг҃ꙋ на́шемꙋ . Ꙗ҆́кᲂже є҆ди́на и҆́же па́че ᲂу҆ма̀ , ржⷭ҇тво́мъ си свᲂбᲂди́ла є҆сѝ ѿ клѧ́твы ро́дъ челᲂвѣ́ческїи , плᲂтьски́ми страстьмѝ пᲂрабᲂще́на мѧ , пречⷭ҇таѧ свᲂи́ми мᲂльба́ми свᲂбᲂдѝ .

пѣ́снь , г҃ . і҆рмоⷭ҇ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Вᲂз̾двиза́емь на крⷭ҇тъ , низ̾ве́рженныѧ во тлю̀ вᲂз̾не́слъ є҆сѝ хрⷭ҇тѐ бж҃е на́шъ , и҆ врага̀ с̾ве́рглъ є҆сѝ влⷣко хрⷭ҇тѐ бж҃е на́шъ . Кᲂпїѐ вра́жїе притꙋпи́сѧ , тебѣ̀ прᲂбᲂде́нꙋ в̾ ре́бра сло́во ѻ҆́ч҃еє сᲂста́внᲂе , и҆ є҆де́мъ ѿве́рзесѧ . мⷱ҇ꙋ . Ѻ҆́гнеными рѣ́ки , преле́стныѧ рѣ́ки ᲂу҆крᲂти́ша мч҃нцы , и҆ пла́мень ᲂу҆гаси́ша мнᲂгᲂбо́жїѧ . мⷱ҇ꙋ . Распина́еми и҆ нᲂгᲂтьмѝ стрꙋ́жеми хрⷭ҇то́вы мч҃нцы , врагѡ́въ и҆ ѕмі́ѧ мече́мъ терпѣ́нїѧ закла́сте . боⷢ҇ . Непᲂро́чнаѧ а҆́гница , ви́дѧщи тѧ влⷣко вᲂз̾дви́жена на крⷭ҇тѣ̀ , плаче́внѡ рыда́ющи , пᲂѧ́ше держа́вꙋ твᲂю̀ .

и҆́нъ , і҆рмо́съ . Немꙋ́дрᲂстїю ни си́лᲂю . Превы́шшꙋю херꙋви́мъ мᲂлю̀ тебѐ влⷣчце , низ̾па́дшаго ми ᲂу҆ма̀ напа́стьми ѕмі́евыми , страсте́й тѣле́сныхъ пᲂкажѝ вы́шша . двⷤа . Во и҆спыта́нїи стра́шнѣмъ є҆гда̀ хо́щетъ мѧ гдⷭ҇ь ѡ҆сꙋди́ти , мнᲂгᲂсᲂгрѣши́вшаго , да ѡ҆брѧ́щꙋ тѧ всенепᲂро́чнаѧ , и҆збавлѧ́ющꙋю мѧ ѡ҆сꙋжде́нїѧ . Щедро́тами свᲂи́ми , немилᲂсе́рдныѧ ми нра́вы прелᲂжѝ , млⷭ҇тїю си хрⷭ҇тѐ . и҆ неми́лᲂстива мѧ сꙋ́ща спасѝ , мᲂльба́ми ро́ждьшїѧ тѧ̀ .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Вᲂз̾дви́жена тѧ на́ древо хᲂтѣ́нїемъ сл҃нца сла́вы , смᲂтрѧ́ѧ сл҃нце , тмо́ю ѡ҆блече́сѧ , и҆ ка́менїе распада́шесѧ , и҆ цр҃ко́внаѧ за́вѣса раз̾дра́сѧ . Распина́емꙋ тебѣ̀ сп҃се и҆ кᲂпїе́мъ прᲂбᲂда́емꙋ , ѡ҆браща́ющеєсѧ ѻ҆рꙋ́жїе даѧ́ше плещѝ , пᲂвелѣ́нїемъ твᲂи́мъ гдⷭ҇и . разбо́йникꙋ бл҃гᲂнра́внᲂмꙋ , пѣснᲂсла́вѧщꙋ держа́вꙋ твᲂю̀ . мⷱ҇ꙋ . Ѻ҆гража́еми ѻ҆рꙋ́жїемъ крⷭ҇та̀ твᲂегѡ̀ стрⷭ҇тᲂте́рпцы твᲂѝ гдⷭ҇и , не ᲂу҆ѧ́звени ꙗ҆ви́шасѧ стрѣло́ю ѕло́бы , и҆ стѣ́ны разᲂри́ша и҆дᲂлᲂбѣ́сїѧ не ᲂу҆тверже́нныѧ . мⷱ҇ꙋ . Ꙗ҆́кᲂже ѻ҆вча́та непᲂро́чнаѧ , и҆ же́ртвы и҆ принᲂше́нїѧ всесᲂжже́нїѧ цѣ́лы , и҆́же за милᲂсе́рдїе ѡ҆бнища́вшемꙋ гдⷭ҇ви мч҃нцы приведо́стесѧ , бᲂлѣ́знемъ вᲂздаѧ́нїѧ прїе́млюще . боⷢ҇ . Ꙗ҆́же без̾лѣ́тнаго в̾ лѣ́то пᲂро́ждьши , и҆ дв҃ство непᲂро́чно є҆ди́на стѧжа́вши , на́ древо вᲂз̾дви́жена ꙗ҆́кѡ ви́дѣвши гдⷭ҇а бᲂлѣ́зньми дш҃ꙋ си раздѣлѧ́ше .

и҆́нъ і҆рмо́съ , то́йже . Сщ҃е́нїѧ сꙋ́щи бжⷭ҇твенагѡ мѣ́сто , и҆стᲂчи́вшемꙋсѧ на бл҃гᲂдѣѧ́нїе свᲂемꙋ̀ сᲂзда́нїю пречⷭ҇таѧ , дш҃ꙋ мᲂю̀ ѡ҆ст҃ѝ , и҆ пᲂмышле́нїѧ прᲂсвѣтѝ . двⷤа . Вѣ́емо вѣ́трᲂмъ ѕло́бы пᲂмышле́нїе мᲂѐ , и҆ лѣ́нᲂстїю всѐ пᲂгрꙋжа́емо , мл҃твами си ᲂу҆твердѝ влⷣчце , и҆ ѿ нападе́нїи и҆схитѝ . Пᲂла́тꙋ цр҃е́вꙋ нбⷭ҇нꙋю ѡ҆дш҃евле́нꙋю , нн҃ѣ мᲂлю́ тѧ дв҃о , до́мъ ст҃ы́ѧ трⷪ҇цы мл҃твами сѝ пᲂкажи́ мѧ , верте́пъ разбо́йникѡмъ пребыва́ющаго .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Прᲂбᲂде́нᲂмъ ти ре́брᲂмъ , нетлѣ́нїѧ и҆стᲂча́еши мнѣ̀ стрꙋѝ бжⷭ҇твеныѧ ѽ влⷣко , и҆́же ребра̀ престꙋпле́нїемъ , в̾ тлѣ́нїе пᲂпо́лзшемꙋсѧ . Честны́и крⷭ҇тъ тво́й на врагѝ є҆́сть пᲂбѣ́да , є҆го́же да́лъ є҆сѝ на́мъ сло́ве , и҆ дш҃а́мъ во спасе́нїе , вѣ́рᲂю вᲂспѣва́ющимъ тѧ̀ . мⷱ҇ꙋ . Со ѻ҆́гнеными слꙋжи́тельми ме́ртвенїи ны́нѣ сᲂвᲂкꙋпи́шасѧ , ѻ҆́гнь веще́ственыи прᲂше́дше вели́кихъ мꙋ́къ , ꙗ҆́кѡ мч҃нцы пресвѣ́тлїи . мⷱ҇ꙋ . Рꙋши́мѣ пло́ти , мно́гими страда́ньми , неразрꙋше́на к̾ зижди́телю дш҃е́внаѧ ᲂу҆твержа́шесѧ мч҃нкѡмъ любо́вь . боⷢ҇ . И҆́же є҆ди́нъ бл҃гі́и , в̾ше́дыи во́ чрево твᲂѐ нетлѣ́ннᲂе пречⷭ҇таѧ , вᲂплᲂща́емь ꙗ҆ви́сѧ и҆ ра́спѧтъ , ꙗ҆́кѡ да ѿ и҆стлѣ́нїѧ на́съ и҆зба́витъ .

и҆́нъ , і҆рмо́съ . Нечести́вїи не ᲂу҆́зрѧтъ . А҆́гнице ро́ждьшаѧ а҆́гньца бж҃їѧ , дш҃ꙋ мᲂю̀ взыщѝ прельще́нꙋю , навѣ́тᲂмъ ѕмїи́нымъ . и҆ на гᲂра́хъ влⷣчце , заблꙋжа́емꙋю престꙋпле́нїемъ . Те́плᲂю мл҃твᲂю си мра́зᲂмъ лю́тымъ пᲂмерза́емꙋю дш҃ꙋ мᲂю̀ , к̾ теплᲂтѣ̀ зижди́телѧ бжⷭ҇твеныѧ любвѐ , бл҃гᲂче́стнѡ спᲂдви́гни бцⷣе при́снѡ дв҃о . И҆́же до́браѧ и҆ непᲂро́чнаѧ в̾ жена́хъ чи́стаѧ , ѡ҆каѧ́ннꙋю ми дш҃ꙋ стра́стнагѡ пᲂро́ка свᲂбᲂдѝ , и҆ чи́стѣ пᲂжи́ти ми мл҃твами сѝ ᲂу҆стро́й . Дш҃ꙋ мᲂю̀ сᲂхранѝ ꙗ҆́кѡ зѣ́ницꙋ ѻ҆́ка , пᲂд̾ кро́вᲂмъ крилꙋ̀ твᲂе́ю бл҃га́ѧ пречⷭ҇таѧ , и҆ ѿ дꙋхѡ́въ лꙋка́вствїѧ , тᲂмле́нїѧ и҆ мꙋче́нїѧ и҆зба́ви мѧ̀ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Всѧ́кїѧ вы́ше че́сти , пребо́льшїи сы́и , ѡ҆бесче́ститисѧ претерпѣ̀ , ꙗ҆́кѡ да мѧ̀ ѕлѣ̀ ѡ҆бесче́стившагᲂсѧ пᲂчте́ши , и҆ крⷭ҇то́мъ спасе́ши чл҃кᲂлю́бче . На́ древо вᲂзнᲂси́мь и҆ ме́ртвъ ᲂу҆́бѡ бы́лъ є҆сѝ гдⷭ҇и , ᲂу҆мертви́телѧ же сᲂтвᲂри́въ ме́ртва дш҃и мᲂеѧ̀ , и҆ всѧ́кᲂгѡ и҆спо́лнена стꙋда̀ . ны́нѣ же тво́рче мо́й пᲂю̀ твᲂю̀ си́лꙋ . мⷱ҇ꙋ . Оу҆ѧ́звенъ бы́сть ᲂу҆ѧзви́выи ва́съ вселꙋка́выи , не и҆сцѣ́льными мꙋ́ками , и҆ нᲂга́ми ва́шими мч҃нцы низ̾лᲂжи́сѧ , и҆ зри́мь є҆́сть ѿ всѣ́хъ нарꙋга́емь . мⷱ҇ꙋ . И҆сцѣле́нїѧ и҆стᲂча́етъ , мч҃нческихъ мᲂще́й пра́хъ лежа́щїи во́ грᲂбѣ . и҆ ꙗ҆́кᲂже пра́хъ бѣ́сᲂвы раз̾рꙋша́етъ , и҆ раз̾ли́чныѧ и҆сцѣлѧ́етъ чл҃кѡмъ бᲂлѣ́зни . боⷢ҇ . Гвᲂздьми́ тѧ без̾зако́нныи сᲂбо́ръ пригвᲂздѝ на крⷭ҇тѣ̀ , и҆ печа́ли ны́нѣ ѻ҆рꙋ́жїемъ , свᲂѐ срⷣце растерза́ю ѽ сн҃е мо́й . дв҃аѧ вᲂпїѧ́ше слезѧ́щи .

и҆́нъ і҆рмо́съ , то́йже . Сме́рти пᲂтреби́тель бы́сть ржⷭ҇тво̀ твᲂѐ дв҃о , ᲂу҆мира́ющимъ же живо́тъ и҆ и҆збавле́нїе . сегѡ̀ ра́ди мᲂлю́ тѧ дш҃ꙋ мᲂю̀ ᲂу҆мерщве́ннꙋю вᲂскресѝ . Прᲂстрѝ мнѣ̀ по́мᲂщи рꙋ́кꙋ чл҃кᲂлю́бче , в̾ пꙋчи́нѣ жите́йстѣй ѡ҆бꙋрева́емꙋ , мᲂльба́ми мт҃ре твᲂеѧ̀ , и҆ вы́шнихъ не и҆сче́тныхъ си́лъ . Село̀ ꙗ҆́же бжⷭ҇твеныи вᲂз̾расти́вшаѧ кла́съ , ѡ҆сла́бленꙋю дш҃ꙋ мᲂю̀ , и҆ гла́дᲂмъ бжⷭ҇твеныхъ дѣѧ́нїи и҆ста́емꙋю непре́зри , но напита́й бж҃їею бл҃гᲂда́тїю . Оу҆спѝ страстна́ѧ двиза́нїѧ тѣлесѝ , и҆ взыгра́нїѧ мᲂѧ̀ плᲂтьска́ѧ ᲂу҆мꙋ̀ пᲂвинѝ ꙗ҆́кᲂже жребѧ̀ , ᲂу҆спи́вши чⷭ҇таѧ сно́мъ твᲂи́хъ мᲂли́твъ .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Распѧ́тсѧ хᲂтѧ́и на́ древѣ на́гъ , без̾сме́ртныи є҆ди́не , ѡ҆блача́ѧи не́бо ѻ҆́блаки . и҆ и҆́же дре́вле пра́ѻ҆ц҃а ѡ҆бнажи́вшаго , ѻ҆бле́клъ є҆сѝ в̾ стꙋ́дъ вѣ́чныи . На крⷭ҇тъ вᲂз̾несе́сѧ . и҆ пады́и а҆да́мъ вᲂста́лъ є҆́сть . кᲂпїе́мъ прᲂбᲂде́нъ бы́сть в̾ ре́бра влⷣко , и҆ ꙗ҆́звꙋ сме́ртнꙋю прїѧ́тъ мнᲂгᲂко́зненныи . бл҃гᲂслᲂве́на держа́ва твᲂѧ̀ гдⷭ҇и . мⷱ҇ꙋ . Краснѣ́йше кра́снѣйшемꙋ сло́вꙋ сᲂє҆динѧ́еми всехва́льнїи страда́льцы , и҆ ми́ра ѿ ню́дъ ѿлꙋчи́стесѧ , вѧ́жеми и҆ сᲂкрꙋша́еми , и҆ врагꙋ̀ при́снѡ запина́юще . мⷱ҇ꙋ . Стѣна́мъ преле́стнымъ ᲂу҆тверже́нїѧ низ̾лᲂжи́сте , бжⷭ҇твеными страда́ньми сла́внїи страда́льцы . и҆ вѣ́рнымъ стѣна̀ ꙗ҆ви́стесѧ и҆ храни́лища , и҆́же ва́съ бл҃гᲂче́стнѡ бл҃жа́щимъ . боⷢ҇ . И҆́же в̾ пещѝ ро́сꙋ ꙗ҆́вльшꙋсѧ хрⷭ҇та̀ бг҃а ѻ҆трᲂкᲂви́це , ника́кᲂже ѡ҆па́льша чре́во твᲂѐ , ви́дѧщи пᲂвѣ́шена на́ древѣ , сла́влѧше є҆́же па́че ᲂу҆ма̀ тᲂго̀ сᲂше́ствїе .

и҆́нъ і҆рмо́съ , то́йже . Бжⷭ҇твенаѧ гᲂро̀ , ѻ҆трᲂкᲂви́це , ѿ неѧ́же ка́мень ѿсѣче́сѧ , сᲂкрꙋши́выи стᲂлпы̀ и҆́дᲂльскїѧ , дш҃и мᲂеѧ̀ и҆стꙋка́ннаѧ , и҆ се́рдцемъ мᲂегѡ̀ ѡ҆камене́ннᲂе ѿженѝ недᲂꙋмѣ́нїе . Непᲂкᲂлѣба́сѧ ѻ҆трᲂкᲂви́це ꙗ҆́кᲂже прїе́мши пᲂсредѣ̀ себѐ , и҆́же призрѣ́нїемъ кᲂле́блющаго зе́млю , и҆ ꙗ҆́же на не́й , є҆гда̀ хо́щетъ . тѣ́мже ᲂу҆тверди́ мѧ , и҆́же прило́ги вра́жїими кᲂле́блемаго . Низ̾лага́ющи ми плᲂтьска́ѧ мꙋдрᲂва́нїѧ , всего́ мѧ бцⷣе пᲂкажѝ дх҃о́вна дᲂбрᲂдѣ́тельми ᲂу҆кра́шена , є҆го́же вселꙋка́выи сластьмѝ не красᲂто́ю пᲂмрачѝ . Бжⷭ҇твеныи ѻ҆кри́нъ милᲂсе́рдїѧ и҆ бл҃гᲂсти , и҆стᲂчи́ ми ѡ҆би́льнѡ , бᲂга́тство твᲂи́хъ щедро́тъ , и҆ скве́рнꙋ прегрѣше́нїи мᲂи́хъ ѿмыва́ющи , и҆ плᲂтьско́е ᲂу҆гасѝ раз̾жже́нїе .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Прᲂсте́ръ дла́ни на крⷭ҇тѣ̀ влⷣко , рꙋкѝ неᲂу҆держа́нныѧ хᲂтѧ̀ и҆сцѣли́ти прегрѣше́нїѧ . гвᲂздьми́ же пригвᲂзди́лсѧ є҆сѝ гдⷭ҇и , ве́сь ра́зꙋмъ первᲂзда́ннагѡ ѿє҆́млѧ страстны́и . пᲂю́щꙋ бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Раз̾дира́етсѧ рꙋкᲂписа́нїе первᲂзда́ннагѡ а҆да́ма , прᲂбᲂде́нїемъ бжⷭ҇твеныхъ ре́бръ твᲂи́хъ . ка́плѧми же кро́ве влⷣко ѡ҆сщ҃а́етсѧ всѧ̀ землѧ̀ , во гласѣ́хъ бл҃гᲂдаре́нїѧ при́снѡ зᲂвꙋ́щи , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . мⷱ҇ꙋ . Стᲂѧ́хꙋ пᲂсредѣ̀ ѻ҆гнѧ̀ , ꙗ҆́кᲂже ѡ҆рᲂша́еми и҆ неѡ҆палѧ́еми , всесла́внїи мч҃нцы , и҆ ѻ҆́трᲂческꙋю вᲂспѣва́юще в̾ сᲂгла́сїи та́йнѣмъ , вᲂи́стинꙋ бжⷭ҇твенꙋю пѣ́снь . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . мⷱ҇ꙋ . Непᲂстᲂѧ́нныи терпѧ́ще ѻ҆́гнь прᲂи҆звᲂле́нїемъ , тмо́ю мꙋ́къ неприлᲂжи́стесѧ къ сꙋетѣ̀ мч҃нцы , но ѡ҆́ бз҃ѣ ᲂу҆крѣплѧ́еми , притеко́сте к̾ свѣ́тꙋ незахᲂди́мᲂмꙋ . вᲂпїю́ще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Оу҆мерщвлѧ́ема зрѧ́щи хрⷭ҇та̀ мнᲂгᲂпѣ́таѧ влⷣчце , и҆ ᲂу҆мертви́вшаго чл҃ки ᲂу҆мерщвлѧ́юща врага̀ , ꙗ҆́кѡ влⷣкꙋ пᲂѧ́ше пла́чꙋщи , и҆ дᲂлгᲂтерпѣ́нїю є҆гѡ̀ дивѧ́щисѧ вᲂпїѧ́ше . ᲂу҆вы̀ мнѣ̀ ка́кѡ ᲂу҆мира́еши сн҃е , живᲂтѐ без̾сме́ртныи .

и҆́нъ і҆рмо́съ , то́йже . Зрѣ́лъ пло́дъ рᲂдила̀ є҆сѝ влⷣчце , ѿ него́ же сме́рть ꙗ҆́дши пᲂги́бе . тѣ́мже зᲂвꙋ́ ти , плᲂдо́мъ грѣха̀ ᲂу҆мерщве́ннаго мѧ льсти́внѡ , ѡ҆живѝ пᲂю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Оу҆спѝ пᲂд̾виже́нїе страстно́е мы́сли мᲂе́й , не ᲂу҆сы́пнᲂю си мл҃твᲂю пречⷭ҇таѧ влⷣчце , и҆ вᲂста́ви ѿ сна̀ лѣ́нᲂстнагѡ пѣ́ти в̾ бо́дрᲂсти дш҃и , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Расто́ргни прегрѣше́нїи мᲂи́хъ плени́цꙋ , и҆ тѣле́снаѧ вᲂста́нїѧ ᲂу҆ти́ши бцⷣе , лꙋка́вствїѧ же пᲂсѣцы̀ ᲂу҆мышле́нїѧ , и҆ ѡ҆чи́сти ѿ та́йныхъ пᲂмышле́нїи , ско́рѡ раба̀ твᲂегѡ̀ , всѣ́мъ вѣ́рнымъ пред̾ста́тельнице и҆ и҆збавле́нїе . Небᲂи́шисѧ ѡ҆каѧ́ннаѧ дш҃е , та́мѡ клеветни́къ , клеве́щꙋщихъ твᲂѧ̀ ѕла́ѧ дѣѧ́нїѧ бесчи́сленаѧ . сегѡ̀ ра́ди пᲂка́йсѧ ко пребл҃го́мꙋ , и҆ спᲂсо́бницꙋ є҆ди́нꙋ пречⷭ҇тꙋю прїимѝ , та́ бо є҆́сть чл҃кѡмъ прибѣ́жище . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Сѐ жи́знь пᲂвѣ́шена на крⷭ҇тѣ̀ всѣ́мъ ꙗ҆ви́сѧ , сл҃нце тᲂго̀ нетерпѧ́щи лꙋчѝ ѡ҆ставлѧ́етъ , и҆ землѧ̀ кᲂле́блетсѧ , и҆ пᲂмышле́нїѧ ᲂу҆твержа́ютсѧ на бл҃гᲂче́стїи и҆ чистᲂтѣ̀ . Ѽ ка́кѡ тѧ̀ закᲂнᲂда́вца без̾зако́нныи сᲂбо́ръ ѡ҆сꙋжда́етъ , і҆с҃е мо́й на́ древѣ ᲂу҆́мрети , живᲂта̀ всѣ́хъ сꙋ́ща и҆ гдⷭ҇а . и҆ ра́ди стрⷭ҇те́й всѣ́мъ чл҃кѡмъ и҆стᲂча́юще без̾стра́стїе . мⷱ҇ꙋ . Оу҆сты̀ ва́шими блгⷭ҇ве́нными , прᲂпᲂвѣ́дасте всемꙋ́дренѡ вᲂплᲂще́нїе сло́ва бж҃їѧ пᲂсредѣ̀ закᲂнᲂпрестꙋ́пныхъ вра́гъ , всехва́льнїи , и҆ сщ҃е́нно пᲂстрада́вше , пᲂбѣ́ды вѣнцы̀ вѣнча́стесѧ . мⷱ҇ꙋ . Ꙗ҆́кѡ свѣ́тлѡ дневны́ѧ ѕвѣ́зды , всю̀ тва́рь ѡ҆зарѧ́ете страда́нїи , сщ҃е́нными блиста́нїи , и҆ и҆сцѣле́нїи бжⷭ҇твеными свѣтлᲂстьмѝ , и҆ страсте́й разᲂрѧ́ете но́щь глꙋбо́кꙋю бжⷭ҇твенїи мч҃нцы . боⷢ҇ . Прᲂсвѣтѝ чи́стаѧ дш҃ꙋ мᲂю̀ , ѿ грѣхѡ́въ ѡ҆мраче́нꙋю , и҆ ѿженѝ ѕѡ́лъ мᲂи́хъ ѻ҆́блаки , свѣ́та ѻ҆́блаче , ꙗ҆́же пᲂмрачи́вшеєсѧ сл҃нце дре́вле ви́дѣвши , внегда̀ распѧ́тисѧ без̾сме́ртнᲂмꙋ .

и҆́нъ і҆рмо́съ , то́йже . Расто́ргни сᲂꙋ́зъ ѕѡ́лъ мᲂи́хъ , бжⷭ҇твенымъ кᲂпїе́мъ сн҃а твᲂегѡ̀ , и҆ разрѣшѝ ѡ҆каѧ́ннꙋю ми дш҃ꙋ , ѡ҆кᲂва́ннꙋю и҆ бѣ́дствꙋющꙋю , и҆ к̾ любвѝ привѧжѝ , дв҃о мт҃и бг҃а на́шегѡ . И҆́же нб҃съ ши́ршаѧ дв҃о , ᲂу҆тѣсне́нᲂе ми срⷣце всѧ́кимъ лꙋка́вымъ дѣѧ́нїемъ , к̾ ширᲂтѣ̀ без̾стра́стїѧ вᲂзведѝ , тѣ́снᲂю стезе́ю хᲂди́ти мѧ ᲂу҆крѣплѧ́ющи всегда̀ . Да тѧ̀ сла́влю дв҃о , вᲂи́стинꙋ сла́внꙋю , всѧ́кагѡ без̾слᲂве́сїѧ грѣхо́внаго и҆зба́ви мѧ , и҆ сла́вѣ нбⷭ҇нѣй прича́стника сᲂтвᲂрѝ , прибѣга́ющаго к̾ млⷭ҇ти твᲂе́й . Оу҆крᲂтѝ сᲂвѣ́ты всѧ̀ и҆́же на ны̀ вᲂѡ҆рꙋже́ныхъ , мт҃и бг҃а вы́шнѧгѡ , ра́дᲂсти же и҆спо́лни ᲂу҆пᲂва́ющихъ на тѧ̀ , да ᲂу҆се́рднѡ всѝ твᲂѐ прᲂпᲂвѣ́мы застꙋпле́нїе .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , крⷭ҇тны . гла́съ , д҃ . Стѣна̀ бꙋ́ди на́мъ крⷭ҇тъ тво́й , і҆с҃е сп҃се на́шъ , и҆но́го бо ᲂу҆пᲂва́нїѧ вѣ́рнїи не и҆́мамы , то́чїю тебѐ , и҆́же на не́мъ пло́тїю пригво́ждьшагᲂсѧ , и҆ пᲂдаю́ща на́мъ ве́лїю млⷭ҇ть .

сти́хъ : и҆спо́лнихᲂмсѧ за ᲂу҆́тра . поⷣ . Да́лъ є҆сѝ зна́менїе ,꙳ бᲂѧ́щимсѧ тебѐ гдⷭ҇и ,꙳ крⷭ҇тъ тво́й чⷭ҇тны́и ,꙳ и҆́мже пᲂсрами́лъ є҆сѝ ,꙳ нача́ла тмы̀ и҆ вла́сти ,꙳ и҆ вᲂз̾ве́лъ є҆сѝ на́съ ꙳ на пе́рвᲂе бл҃же́нство .꙳ тѣ́мже тѝ чл҃кᲂлю́бнᲂе смᲂтре́нїе сла́вимъ ,꙳ і҆с҃е всеси́льне ꙳ сп҃се дш҃а́мъ на́шимъ .

сти́хъ : и҆ бꙋ́ди свѣ́тлᲂсть гдⷭ҇а . мⷱ҇ꙋ . Ка́кᲂсѧ ва́шимъ не ᲂу҆диви́мъ ,꙳ пᲂдвигѡ́мъ ст҃і́и мч҃нцы ,꙳ ꙗ҆́кѡ тѣ́лᲂмъ ᲂу҆мира́ющимъ ,꙳ ѻ҆блᲂже́ни ,꙳ беспло́тныѧ врагѝ пᲂбѣди́сте .꙳ не ᲂу҆страши́ша ва́съ мꙋчи́тельскаѧ преще́нїѧ .꙳ не ᲂу҆жаси́ша ва́съ мꙋ́къ прилᲂже́нїѧ .꙳ вᲂи́стинꙋ дᲂсто́йнѡ ꙳ ѿ хрⷭ҇та̀ прᲂсла́вистесѧ .

сла́ва , и҆ нн҃ѣ , крⷭ҇тᲂбоⷢ҇ . Распина́ема ви́дѧщи ,꙳ хрⷭ҇та̀ пречⷭ҇таѧ влⷣчце ,꙳ и҆ ᲂу҆мерщвѧ́юща льсти́ваго ,꙳ вᲂсклица́ше го́рцѣ взыва́ющꙋ ,꙳ и҆́же и҆з̾ ᲂу҆тро́бы тᲂѧ̀ прᲂи҆з̾ше́дшꙋ ,꙳ и҆ дᲂлгᲂтерпѣ́нїю є҆гѡ̀ дивѧ́щисѧ взыва́ше ,꙳ ча́до мᲂѐ любе́знѣйшеє ,꙳ незабꙋ́ди рабꙋ̀ твᲂю̀ ,꙳ незакᲂснѝ чл҃кᲂлю́бче ꙳ мᲂѐ ᲂу҆тѣше́нїе .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ ны́нѣ , крⷭ҇тᲂбоⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .

Въ сре́дꙋ , бл҃же́нны . гла́съ , д҃ .

Дре́ва ра́ди а҆да́мъ раѧ̀ бы́сть и҆з̾селе́нъ , дре́ва же ра́ди крⷭ҇тнагѡ разбо́йникъ в̾ ра́й всели́сѧ . ѻ҆́въ ᲂу҆́бѡ вкꙋ́шъ , за́пᲂвѣдь престꙋпѝ сᲂтво́ршагѡ и҆̀ . ѻ҆́въ же сраспина́емь , бг҃а тѧ̀ и҆спᲂвѣ́да таѧ́щагᲂсѧ , пᲂмѧни́ мѧ вᲂпїѧ̀ , во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Пригвᲂзди́сѧ на крⷭ҇тѣ̀ , мно́гїѧ ра́ди хрⷭ҇тѐ бл҃гᲂсти . прᲂбᲂде́нъ бы́сть в̾ ре́бра , два̀ и҆сто́чника и҆стᲂчи́лъ є҆сѝ ѡ҆ставле́нїѧ . землѧ́ же нетерпѧ́щи зрѣ́ти дерзнᲂве́нїѧ трѧса́шесѧ . ка́менїе распада́шесѧ , ᲂу҆гаса́ше сл҃нце , кᲂлеба́хꙋсѧ го́ры и҆ хо́лми . сла́ва держа́вѣ твᲂе́й .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Прᲂсте́ртыѧ дре́вле не ᲂу҆держа́нно к̾ дре́вꙋ снѣ́днᲂмꙋ пра́ѻ҆ч҃и рꙋ́цѣ , и҆спра́вилъ є҆сѝ хрⷭ҇тѐ пᲂпᲂлзе́нїе . распрᲂстре́сѧ во́лею , и҆ свᲂѝ пригвᲂзди́лъ є҆сѝ рꙋ́цѣ дᲂлгᲂтерпѣли́ве , за без̾мѣ́рнꙋю бл҃гᲂсты́ню , сᲂзда́выи чл҃ка рꙋко́ю . сла́ва и҆́же па́че ᲂу҆ма̀ бл҃гᲂꙋтро́бїю твᲂемꙋ̀ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ѡ҆небеси́вше зе́млю ст҃і́и пресвѣ́тлыми сїѧ́нїи по́двигъ чⷭ҇тны́хъ , и҆́ми же тмꙋ̀ всю̀ разᲂри́сте сꙋ́етства , и҆ к̾ свѣ́тꙋ незахᲂди́мᲂмꙋ всели́стесѧ , прича́стїемъ ѡ҆бᲂжа́еми , и҆ всѣ́мъ ѡ҆зарѧ́ете свѣ́тъ разꙋ́мныи , и҆́же ва́съ по́ дᲂлгꙋ ᲂу҆бл҃жа́ющимъ .

сла́ва . Пᲂхвалꙋ̀ и҆ сла́вꙋ и҆ че́сть , всевино́внѣй трⷪ҇цѣ пᲂдава́емъ , и҆ трист҃ы́ми гла́сы а҆́нг҃льскꙋю пѣ́снь принᲂсѧ́ще , ѻ҆ц҃ꙋ без̾нача́льнꙋ , и҆ сн҃ꙋ и҆ дх҃ꙋ , взыва́емъ разбо́йника бл҃гᲂразꙋ́мнагѡ гла́съ , вᲂспѣва́юще и҆ вᲂпїю́ще є҆́й , пᲂмѧнѝ на́съ во црⷭ҇твїи си .

и҆ нн҃ѣ . Вᲂз̾дви́жена на крⷭ҇тѣ̀ во́лею , ви́дѧщи пречⷭ҇таѧ сн҃а свᲂегѡ̀ и҆ бг҃а , дивѧ́щисѧ пла́чꙋщи гл҃аше , и҆́же всѧ́ческаѧ ᲂу҆до́брившемꙋ , гдѣ̀ за́йде дᲂбро́та твᲂѧ̀ гдⷭ҇и ; что̀ сїѧ̀ небл҃гᲂда́рныи тебѣ̀ вᲂздадѐ сᲂбо́ръ , в̾мѣ́стѡ бл҃ги́хъ пᲂю̀ па́че ᲂу҆ма̀ твᲂю̀ бл҃гᲂсты́ню .

<< Previous

Contents

Next >>