Свѣти́льны , дневні́и , во всю̀ седми́цꙋ .

Въ пᲂнедѣ́льникъ , свѣти́ленъ , а҆́нг҃лѡмъ . А҆рха́нг҃ли и҆ а҆́нг҃ли , нача́ла и҆ гдⷭ҇ьствїѧ , си́лы и҆ вла́сти и҆ прⷭ҇то́ли , мнᲂгᲂѡчи́таѧ херꙋви́мъ и҆ серафи́мъ , и҆ живо́тнаѧ шестᲂкрыла́таѧ , мᲂли́тесѧ ко́ гдⷭ҇ꙋ и҆зба́витисѧ на́мъ ѿ бѣ́дъ , и҆ ѻ҆гнѧ̀ негаси́магѡ . боⷢ҇ . Ты́ ми застꙋ́пница пречⷭ҇таѧ , и҆ тве́рдᲂе прибѣ́жище . ты̀ пред̾ста́тельница ми́рꙋ . и҆ тебѣ̀ припа́даѧ зᲂвꙋ̀ , ѿ лю́тыхъ мѧ и҆зба́ви , ꙗ҆́же ра́дᲂсть ми́рꙋ ро́ждьшаѧ , и҆ ѻ҆гнѧ̀ и҆схи́ти вѣ́чнагѡ дв҃о , и҆́же на тѧ̀ надѣ́ющихсѧ .

Во вто́рникъ , свѣти́ленъ , прⷣтчи . Прᲂро́че пресла́вныи , и҆ прⷣтче бл҃гᲂда́ти , и҆́же пᲂкаѧ́нїе всѣ́мъ прᲂпᲂвѣ́давыи спасе́нїѧ , и҆ а҆́гньца взе́млющаго ми́рꙋ грѣхѝ , пᲂказа́выи бл҃же́нне , тᲂго̀ и҆ нн҃ѣ мᲂлѝ , пᲂми́лᲂвати ми́ръ .= боⷢ҇ . Т=ѧ̀ дв҃о прᲂро́цы всѝ пред̾вᲂзвѣсти́ша , дв҃дъ тѧ̀ го́рꙋ наречѐ , и҆ кᲂвче́гъ и҆ свѣти́льникъ , и҆ лѣ́ствицꙋ и҆ мо́стъ . и҆ рꙋ́чкꙋ ма́ннꙋ нᲂсѧ́щи , и҆ же́злъ прᲂзѧ́бшїи . мы́ же ꙗ҆́кѡ бцⷣꙋ по дᲂстᲂѧ́нїю тѧ̀ чте́мъ .

Въ сре́дꙋ , свѣти́ленъ , крⷭ҇тꙋ̀ . Ѻ҆рꙋ́жїе непᲂбѣди́мᲂе , и҆ ᲂу҆тверже́нїе вѣ́ры , крⷭ҇тъ бжⷭ҇твеныи вᲂспѣва́емъ , и҆ пᲂклᲂнѧ́емсѧ вѣ́рᲂю , вели́кᲂмꙋ прибѣ́жищꙋ хрⷭ҇тїа́нᲂмъ и҆ пᲂхвалѣ̀ . правᲂсла́вныхъ сла́вѣ , и҆ вѣ́рнымъ спасе́нїю .= крⷭ҇тᲂбоⷢ҇ . П=ред̾стᲂѧ́щи пречⷭ҇таѧ ᲂу҆ крⷭ҇та̀ , и҆ ви́дѧщи свᲂегѡ̀ сн҃а на́ древѣ ра́спѧта без̾дꙋ́шна , рыда́ше вᲂпїю́щи , ᲂу҆вы̀ мнѣ̀ сл҃нце сла́вы , ка́кѡ за́йде твᲂѧ̀ дᲂбро́та , и҆спо́лнена бл҃гᲂво́нїѧ ᲂу҆дᲂбри́вшаго чл҃ческᲂе є҆стество̀ .

Въ четверто́къ , свѣти́ленъ , а҆пⷭ҇лѡмъ . Петра̀ и҆ па́вла , а҆ндре́ѧ , і҆а́кѡва , варѳᲂлᲂмі́ѧ , и҆ матѳе́ѧ , і҆а́кѡва , и҆ фили́ппа , ѳᲂмꙋ̀ , и҆ сі́мѡна , лꙋкꙋ̀ , и҆ і҆ѡа́нна , и҆ ма́рка , а҆пⷭ҇лы гдⷭ҇ни всѝ вᲂсхва́лимъ вѣ́рᲂю .= боⷢ҇ . Д=в҃о не и҆скꙋсᲂбра́чнаѧ , хрⷭ҇та̀ непреста́ннѡ мᲂлѝ , с̾ мꙋ́дрыми а҆пⷭ҇лы , и҆ со мно́жествᲂмъ мч҃нкъ и҆ с̾ нико́лᲂю мꙋ́дрымъ , ѿ всѧ́кїѧ и҆зба́витисѧ бѣды̀ , и҆́же на тѧ̀ наде́жꙋ вᲂз̾лᲂжи́вшимъ ѻ҆трᲂкᲂви́це .

Въ пѧто́къ , свѣти́ленъ , крⷭ҇тꙋ̀ . Ра́дꙋисѧ крⷭ҇те прест҃ы́и , ми́рꙋ стѣно̀ неѡ҆бᲂри́маѧ , прибѣ́жище скᲂрбѧ́щимъ , и҆ храни́телю сꙋ́щимъ в̾ нꙋ́жахъ , цр҃е́мъ пᲂбѣ́до и҆ во́инѡмъ сᲂблюде́нїе , и҆ ва́рваръ ѡ҆дᲂлѣ́нїе , а҆пⷭ҇лѡмъ вѣнчѐ , и҆ вѣ́рнымъ спасе́нїе .= крⷭ҇тᲂбоⷢ҇ . Н=а крⷭ҇тѣ̀ пригвᲂжде́на тѧ̀ , ви́дѣвши пречⷭ҇таѧ пла́чꙋщи и҆ рыда́ющи вᲂпїѧ́ше , ка́кѡ за́йде сл҃нце сла́вы , свѣ́те нача́льнѣйшїи ; ка́кѡ на крⷭ҇тѣ̀ пригвᲂзди́сѧ , и҆ кᲂпїе́мъ прᲂбᲂде́сѧ в̾ ре́бра , сн҃е и҆ бж҃е мо́й , ра́ди чл҃ческагѡ спасе́нїѧ .

Въ сꙋбо́тꙋ , свѣти́ленъ , всѣ́мъ ст҃ы́мъ . Пррⷪ҇цы пресла́внїи , а҆пⷭ҇ли бл҃же́ннїи , патрїа́рси пра́веднїи , є҆ди́нственᲂе тᲂржество̀ і҆єра́рхѡмъ . прпⷣбнїи и҆ пра́веднїи , и҆ же́нъ сᲂсло́вїе , и҆ мч҃нцы , и҆ ст҃і́и всѝ , с̾ бг҃ᲂмт҃рїю мᲂли́тесѧ гдⷭ҇ви , пᲂми́лᲂвати ва́ша рабы̀ . дрꙋгі́и , свѣти́ленъ . сі́и глаго́летсѧ во вселе́нскїѧ сꙋбо́ты . И҆́же нб҃о ѕвѣзда́ми ᲂу҆краси́въ ꙗ҆́кѡ бг҃ъ , и҆ свᲂи́ми ст҃ы́ми всю̀ зе́млю прᲂсвѣти́въ , сᲂдѣ́телю всѣ́хъ спаса́й пᲂю́щихъ тѧ . и҆́нъ , свѣти́лен̾ . ᲂу҆со́пшимъ по всѧ̀ сꙋбо́ты . сла́ва . И҆́же ме́ртвыми и҆ живы́ми ѡ҆блада́ѧи ꙗ҆́кѡ бг҃ъ , пᲂко́й свᲂѧ̀ рабы̀ в̾ се́лѣхъ и҆збра́нныхъ тѝ . а҆́ще бо и҆ сᲂгрѣши́ша всѝ сло́ве , но не ѿстꙋпи́ша ѿ тебѐ . и҆ ны́нѣ , боⷢ҇ . Ꙗ҆́же сла́дᲂсть а҆́нг҃лѡвъ , скᲂрбѧ́щимъ ра́дᲂсть , хрⷭ҇тїа́нѡмъ застꙋ́пнице дв҃о мт҃и гдⷭ҇нѧ , застꙋпи́вши на́съ и҆зба́ви вѣ́чныѧ мꙋ́ки .