Трᲂпарѝ , пѣва́емїи по непᲂро́чнахъ , во всѧ̀ вᲂскрⷭ҇нїѧ . гла́съ , є҃ . припѣ́вы : бл҃гᲂслᲂве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . А҆́нг҃льскїи сᲂбо́ръ ᲂу҆диви́сѧ , зрѧ̀ тебѐ въ ме́ртвыхъ вмѣ́ньшасѧ . сме́ртнꙋю же сп҃се крѣ́пᲂсть разо́рша , и҆ съ сᲂбо́ю а҆да́ма вᲂз̾дви́гша , и҆ ѿ а҆́да всѧ̀ свᲂбо́ждьша .= бл҃гᲂслᲂве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . Пᲂчто̀ мѵ́ро , съ млⷭ҇тивыми слеза́ми , ѽ ᲂу҆чн҃цы и҆злива́ете , блиста́ѧсѧ на́ грᲂбѣ а҆́нг҃лъ , мѷрᲂно́сицамъ вѣща́ше , ви́дите вы̀ гро́бъ то́щъ и҆ разꙋмѣ́йте , сп҃съ бо вᲂскре́се ѿ́ грᲂба . =бл҃гᲂслᲂве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . Ѕѣлѡ̀ ра́но , мѷрᲂно́сицы теча́хꙋ , на́ грᲂбъ рыда́юще . но пред̾ста̀ к̾ ни́мъ а҆́нг҃лъ и҆ речѐ , рыда́нїю вре́мѧ преста̀ непла́читесѧ . вᲂскрⷭ҇нїе же а҆пⷭ҇лѡмъ рцѣ́те .= бл҃гᲂслᲂве́нъ є҆сѝ гдⷭ҇и , наꙋчѝ на́съ ѡ҆правда́нїемъ твᲂи́мъ . Мѷрᲂно́сицы жены̀ , съ мѵ́рᲂмъ прише́дше , ко́ грᲂбꙋ твᲂемꙋ̀ сп҃се рыда́юще . а҆́нг҃лꙋ же к̾ ни́мъ вѣща́ющꙋ , что̀ с̾ ме́ртвыми жива́гѡ пᲂмышлѧ́ете ; и҆́бо ꙗ҆́кѡ бг҃ъ вᲂскр҃се ѿ́ грᲂба . =сла́ва . Пᲂклᲂни́мсѧ ѻ҆ц҃ꙋ , и҆ тᲂго̀ сн҃ᲂви и҆ ст҃о́мꙋ дх҃ꙋ , ст҃ѣ́й трⷪ҇цѣ во є҆ди́нᲂмъ сꙋществѣ̀ , с̾ серафи́ми зᲂвꙋ́ще , ст҃ъ , ст҃ъ , ст҃ъ є҆сѝ гдⷭ҇и . и҆ ны́нѣ . Жизнᲂда́вца ро́ждьши , ѿ грѣха̀ дв҃це а҆да́ма и҆зба́вила є҆сѝ . ра́дᲂсть же є҆́ввѣ , в̾ печа́ли мѣ́сто дарᲂва̀ , ѿпа́дшей жи́зни . тѣ́мъ па́ки к̾ то́й вᲂзво́дитъ , и҆з̾ тебѐ вᲂплᲂти́выисѧ бг҃ъ и҆ чл҃къ . А҆ллилꙋ́їѧ , а҆ллилꙋ́їѧ , сла́ва тебѣ̀ бж҃е , гⷤ .

По є҆ѵⷢ҇а́лїи гл҃емъ , трᲂпа́рь . Вᲂскрⷭ҇нїе хрⷭ҇то́во ви́дѣвше , пᲂклᲂни́мсѧ ст҃о́мꙋ гдⷭ҇ꙋ і҆с҃ꙋ , є҆ди́нᲂмꙋ без̾грѣ́шнᲂмꙋ , крⷭ҇тꙋ̀ твᲂемꙋ̀ пᲂклᲂнѧ́емсѧ хрⷭ҇тѐ , и҆ ст҃о́е вᲂскрⷭ҇нїе твᲂѐ пᲂе́мъ и҆ сла́вимъ . ты́ бо є҆сѝ бг҃ъ на́шъ , ра́зве бо тебѐ и҆но́го незна́емъ , и҆́мѧ твᲂѐ нарица́емъ . прїиди́те всѝ вѣ́рнїи , пᲂклᲂни́мсѧ ст҃о́мꙋ хрⷭ҇то́вꙋ вᲂскрⷭ҇нїю , се́бо прїи́де крⷭ҇та̀ ра́ди ра́дᲂсть всемꙋ̀ ми́рꙋ , всегда̀ бл҃гᲂслᲂви́мъ гдⷭ҇а , и҆ пᲂе́мъ вᲂскрⷭ҇нїе є҆гѡ̀ , распѧ́тїе бо претерпѐ , и҆ сме́ртїю сме́рть разрꙋшѝ .

По всѧ̀ нлⷣи , на сла́вахъ . стⷯра є҆ѵⷢ҇а́льскаѧ .

и҆ ны́нѣ , боⷢ҇ . гла́съ , в҃ . Преблгⷭ҇ве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ и҆зво́ливыи та́кѡ .

=на ᲂу҆́трени , є҆ѵⷢ҇а́лїе , вᲂскрⷭ҇но . ѿ матѳе́ѧ . заⷱ҇ , рѕ҃і . во́ =времѧ ѻ҆́но , є҆ди́нїи на́ десѧте ᲂу҆ченицы̀ , и҆до́ша в̾ галиле́ю , в̾ го́рꙋ , а҆́мᲂже пᲂвелѣ̀ и҆́мъ і҆с҃ъ . и҆ ви́дѣвше є҆гѡ̀ пᲂклᲂни́шасѧ є҆мꙋ̀ . ѻ҆́ви же ᲂу҆сꙋмнѣ́шасѧ . и҆ пристꙋ́пль і҆с҃ъ , речѐ и҆́мъ , гл҃ѧ , да́стмисѧ всѧ́ка вла́сть , на́ нб҃си и҆ на землѝ . ше́дше наꙋчи́те всѧ̀ ꙗ҆зы́ки , крⷭ҇тѧ́ще и҆́хъ во́ и҆мѧ ѻ҆ц҃а и҆ сн҃а и҆ ст҃а́гѡ дх҃а , ᲂу҆ча́ще и҆́хъ блюстѝ всѧ̀ , є҆ли́ка запᲂвѣ́дахъ ва́мъ . и҆ сѐ а҆́зъ с̾ ва́ми є҆́смь всѧ̀ днѝ , до скᲂнча́нїѧ вѣ́ка , а҆ми́нь .

во всѧ̀ вᲂскрⷭ҇нїѧ . а҆пⷭ҇лъ , к̾ кᲂри́нфᲂмъ . заⷱ҇ , рн҃и . Бра́тїе , сказꙋ́ю ва́мъ бл҃гᲂвѣствᲂва́нїе , є҆́же бл҃гᲂвѣсти́хъ ва́мъ , є҆́же и҆ прїѧ́сте . в̾ не́мже и҆ стᲂитѐ , и҆́мже и҆ спаса́етесѧ . ка́цѣмъ сло́вᲂмъ бл҃гᲂвѣсти́хъ ва́мъ , а҆́ще сᲂдержитѐ , ра́звѣ а҆́ще не всꙋ́е вѣ́рᲂвасте . преда́хъ бо ва́мъ и҆спе́рва , є҆́же и҆ прїѧ́хъ . ꙗ҆́кѡ хрⷭ҇то́съ ᲂу҆́мре грѣ́хъ на́шихъ ра́ди по писа́нїихъ . и҆ ꙗ҆́кѡ пᲂгребе́нъ бы́сть , и҆ ꙗ҆́кѡ вᲂста̀ в̾ тре́тїи дн҃ь , по писа́нїихъ . и҆ ꙗ҆́кѡ ꙗ҆ви́сѧ ки́ѳѣ , та́же є҆ди́нᲂмꙋ на́ десѧте . пᲂто́мъ же ꙗ҆ви́сѧ бо́лѣ пѧті́й сѡ́тъ бра́тїѧмъ є҆ди́нᲂю , ѿ ни́хже мнᲂжа́йшїи пребыва́ютъ до се́лѣ , нѣ́цыи же и҆ пᲂчи́ша . пᲂто́мъ же ꙗ҆ви́сѧ і҆а́кѡвꙋ , та́же а҆пⷭ҇лѡмъ всѣ́мъ . по́слѣ же всѣ́хъ , ꙗ҆́кѡ нѣ́кᲂемꙋ и҆́звергꙋ ꙗ҆ви́сѧ и҆ мнѣ̀ , а҆́зъ бо є҆́смь мні́и а҆пⷭ҇лѡвъ , и҆́же нѣ́смь дᲂсто́инъ нарещи́сѧ а҆пⷭ҇лъ , занѐ гᲂни́хъ цр҃кᲂвь бж҃їю . бл҃гᲂда́тїю же бж҃їею є҆́смь , є҆́же є҆́смь , и҆ бл҃гᲂда́ть є҆гѡ̀ ꙗ҆́же во мнѣ̀ , нетща̀ бы́сть , но па́че всѣ́хъ и҆́хъ пᲂтрꙋди́хсѧ . не а҆́зъ же , но бл҃гᲂда́ть бж҃їѧ ꙗ҆́же со мно́ю . а҆́ще ᲂу҆́бѡ а҆́зъ , а҆́ще ли ѻ҆нѝ , та́кѡ прᲂпᲂвѣ́даемъ , и҆ та́кѡ вѣ́рᲂвасте .

по всѧ̀ вᲂскрⷭ҇нїѧ . є҆ѵⷢ҇а́лїе , ѿ матѳе́ѧ . заⷱ҇ , ѻ҃з . Речѐ гдⷭ҇ь при́тчꙋ сїю̀ , ᲂу҆пᲂдо́бисѧ црⷭ҇твїе нбⷭ҇нᲂе чл҃кꙋ цр҃ю , и҆́же вᲂсхᲂтѣ̀ стѧза́тисѧ ѡ҆ слᲂвесѝ с̾ рабы̀ свᲂи́ми . наче́ншꙋ же є҆мꙋ̀ стѧза́тисѧ , приведо́ша є҆мꙋ̀ є҆ди́нᲂгѡ дᲂлжника̀ тмо́ю тала́нтъ . не и҆мꙋ́щꙋ же є҆мꙋ̀ вᲂз̾да́ти , пᲂвелѣ̀ є҆гѡ̀ гдⷭ҇ь є҆гѡ̀ прᲂда́ти , и҆ женꙋ̀ є҆гѡ̀ и҆ ча́да , и҆ всѧ̀ є҆ли́ка и҆мѧ́ше , и҆ ѿда́ти . па́дъ ᲂу҆́бѡ ра́бъ то́й , кла́нѧшесѧ є҆мꙋ̀ гл҃ѧ , гдⷭ҇и , пᲂтерпѝ на мнѣ̀ , и҆ всѧ́ ти вᲂзда́мъ . млрⷭ҇дᲂвавъ же гдⷭ҇ь раба̀ тᲂго̀ , прᲂстѝ є҆гѡ̀ , и҆ до́лгъ ѿпꙋстѝ є҆мꙋ̀ . и҆з̾ше́дъ же ра́бъ то́й , ѡ҆брѣ́те є҆ди́нᲂгѡ клевре́тъ свᲂи́хъ , и҆́же бѣ̀ до́лженъ є҆мꙋ̀ сто̀ пѣ́нѧзь . и҆ є҆́мъ є҆гѡ̀ давлѧ́ше гл҃ѧ , ѿда́ждь мѝ и҆́мже мѝ є҆сѝ до́лженъ . па́дъ ᲂу҆́бѡ клевре́тъ є҆гѡ̀ на́ нᲂзѣ є҆гѡ̀ , мᲂлѧ́ше є҆гѡ̀ гл҃ѧ , пᲂтерпѝ на мнѣ̀ и҆ всѧ̀ вᲂз̾да́мъ тѝ . ѻ҆́нъ же нехᲂтѧ́ше , но ве́дъ всадѝ є҆гѡ̀ в̾ темни́цꙋ , до́ндеже вᲂз̾да́стъ дᲂлжно́е . ви́дѣвше же клевре́ти є҆гѡ̀ бы́вшаѧ , с̾жа́лиша сѝ ѕѣлѡ̀ , и҆ прише́дше сказа́ша гᲂспᲂди́нꙋ свᲂемꙋ̀ , всѧ̀ бы́вшаѧ . тᲂгда̀ призва́въ є҆гѡ̀ гᲂспᲂди́нъ є҆гѡ̀ , гл҃а є҆мꙋ̀ , ра́бе лꙋка́выи , ве́сь до́лгъ ѻ҆́нъ ѿпꙋсти́хъ тебѣ̀ , пᲂне́же ᲂу҆мᲂли́ мѧ , непᲂдᲂба́ше ли и҆ тебѣ̀ пᲂми́лᲂвати клевре́та свᲂегѡ̀ , ꙗ҆́кᲂже и҆ а҆́зъ тѧ пᲂми́лᲂвахъ . и҆ прᲂгнѣ́вавсѧ гдⷭ҇ь є҆гѡ̀ , предадѐ є҆гѡ̀ мꙋчи́телемъ , до́ндеже вᲂз̾да́стъ ве́сь до́лгъ сво́й . та́кѡ и҆ ѻ҆ц҃ъ мо́й нбⷭ҇ныи сᲂтвᲂри́тъ ва́мъ , а҆́ще не ѿпꙋститѐ ко́ждо бра́тꙋ свᲂемꙋ̀ , ѿ серде́цъ ва́шихъ прегрѣше́нїѧ и҆́хъ .

по всѧ̀ днѝ . а҆пⷭ҇лъ , к̾ кᲂри́нфᲂмъ . заⷱ҇ , рп҃в . Бра́тїе , вы̀ є҆стѐ цр҃кви бг҃а жи́ва , ꙗ҆́кᲂже речѐ бг҃ъ , ꙗ҆́кѡ вселю́сѧ в̾ ни́хъ и҆ пᲂхᲂжꙋ̀ , и҆ бꙋ́дꙋ и҆́мъ бг҃ъ , и҆ ті́и бꙋ́дꙋтъ мнѣ̀ лю́дїє . тѣ́мже и҆зы́дите ѿ среды̀ и҆́хъ , и҆ ѿлꙋчи́тесѧ глаго́летъ гдⷭ҇ь , и҆ нечистᲂтѣ̀ неприкаса́йтесѧ , и҆ а҆́зъ прїимꙋ̀ ва́съ , и҆ бꙋ́дꙋ ва́мъ во ѻ҆ц҃ъ , и҆ вы̀ бꙋ́дете мнѣ̀ в̾ сн҃ы и҆ дще́ри , гл҃етъ гдⷭ҇ь вседержи́тель . сицева̀ ᲂу҆́бѡ и҆мꙋ́ще ѡ҆бѣтᲂва́нїѧ ѽ вᲂзлю́бленїи , ѡ҆чи́стимъ себѐ , ѿ всѧ́кїѧ скве́рны пло́ти и҆ дꙋ́ха , твᲂрѧ́ще ст҃ы́ню в̾ стра́сѣ бж҃їи .

по всѧ̀ днѝ . є҆ѵⷢ҇а́лїе , ѿ матѳе́ѧ . заⷱ҇ , м҃г . Речѐ гдⷭ҇ь свᲂи́мъ ᲂу҆ченикѡ́мъ , всѧ̀ мнѣ̀ предана̀ сꙋ́ть ѻ҆ц҃е́мъ мᲂи́мъ . и҆ никто́же зна́етъ сн҃а , то́кмѡ ѻ҆ц҃ъ . ни ѻ҆ц҃а кто̀ зна́етъ , то́кмѡ сн҃ъ , и҆ є҆мꙋ́же а҆́ще во́литъ сн҃ъ ѿкры́ти . прїиди́те ко мнѣ̀ всѝ трꙋжда́ющїисѧ и҆ ѡ҆бремене́нїи , и҆ а҆́зъ пᲂко́ю вы̀ . вᲂзми́те и҆́го мᲂѐ на себѐ , и҆ наꙋчи́тесѧ ѿ менѐ , ꙗ҆́кѡ кро́тᲂкъ є҆́смь , и҆ смире́нъ срⷣцемъ , и҆ ѡ҆брѧ́щете пᲂко́й дш҃а́мъ ва́шимъ . и҆́го бо мᲂѐ бла́го , и҆ бре́мѧ мᲂѐ легко̀ є҆́сть .

по всѧ̀ сꙋбо́ты . а҆пⷭ҇лъ , к̾ сᲂлꙋ́нѧнᲂмъ . заⷱ҇ , с҃о . Бра́тїе , невелю̀ ва́мъ неразꙋмѣва́ти ѡ҆ ᲂу҆ме́ршихъ , да нескᲂрби́те , ꙗ҆́кᲂже и҆ про́чїи не и҆мꙋ́щїи ᲂу҆пᲂва́нїѧ . а҆́ще бо вѣ́рꙋемъ ꙗ҆́кѡ і҆с҃ъ ᲂу҆́мре и҆ вᲂскр҃се , та́кѡ и҆ бг҃ъ ᲂу҆ме́ршїѧ ѡ҆ і҆с҃ѣ приведе́тъ с̾ ни́мъ . сїе́ бо ва́мъ глаго́лемъ слᲂвесе́мъ гдⷭ҇нимъ , ꙗ҆́кѡ мы̀ живꙋ́щїи ѡ҆ста́вшїи в̾ прише́ствїе гдⷭ҇не , не и҆́мамы пред̾вари́ти ᲂу҆ме́ршихъ . ꙗ҆́кѡ са́мъ гдⷭ҇ь в̾ пᲂвелѣ́нїи , во́ гласѣ а҆рха́нг҃лѡвѣ , и҆ в̾ трꙋбѣ̀ бж҃їи сни́детъ с̾ нб҃сѐ , и҆ ме́ртвїи ѡ҆ хрⷭ҇тѐ вᲂскрⷭ҇нꙋтъ пе́рвѣе , пᲂто́мъ же мы̀ живꙋ́щїи ѡ҆ста́вшїи , кꙋ́пнѡ с̾ ни́ми вᲂсхище́ни бꙋ́демъ на ѻ҆́блацѣхъ , в̾ срѣ́тенїе гдⷭ҇не на вᲂздꙋ́сѣ , и҆ та́кѡ всегда̀ с̾ гдⷭ҇емъ бꙋ́демъ .

по всѧ̀ сꙋбо́ты . є҆ѵⷢ҇а́лїе , ѿ і҆ѡа́нна . заⷱ҇ , к҃а . Речѐ гдⷭ҇ь к̾ прише́дшимъ к̾ немꙋ̀ і҆ꙋде́ѡмъ . а҆́зъ є҆́смь хлѣ́бъ живо́тныи , грѧды́и ко мнѣ̀ не и҆́мать в̾залка́тисѧ , и҆ вѣ́рꙋѧи в̾ мѧ̀ , не и҆́мать в̾жада́тисѧ ни кᲂгда́ же . но рѣ́хъ ва́мъ , ꙗ҆́кѡ и҆ ви́дѣсте мѧ и҆ невѣ́рꙋете . всѐ є҆́же да́стъ мнѣ̀ ѻ҆ц҃ъ , ко мнѣ̀ прїи́детъ , и҆ грѧдꙋ́щагѡ ко мнѣ̀ не и҆жденꙋ̀ во́нъ . ꙗ҆́кѡ снидо́хъ с̾ небесѐ , не да твᲂрю̀ во́лю мᲂю̀ , но во́лю пᲂсла́вшаго мѧ ѻ҆ц҃а . се́же є҆́сть во́лѧ пᲂсла́вшаго мѧ ѻ҆ц҃а , да всѐ є҆́же да́стъ ми непᲂгꙋблю̀ ѿ негѡ̀ , но вᲂскрешꙋ̀ є҆̀ в̾ пᲂслѣ́днїи дн҃ь .