Свѣти́льны вᲂскрⷭ҇ны , и҆ стихѣ́ры , є҆ѵⷢ҇а́льскїѧ . твᲂре́нїе , льва̀ деспо́та . Свѣти́ленъ , а҃ . Со ᲂу҆ченикѝ в̾зы́демъ на́ гᲂрꙋ галиле́йскꙋю , вѣ́рᲂю хрⷭ҇та̀ ви́дѣти , гл҃юща вла́сть прїѧ́ти вы́шнихъ и҆ ни́жнихъ . и҆ наꙋчи́мсѧ , ка́кѡ ᲂу҆чи́тъ крⷭ҇ти́ти ꙗ҆зы́ки всѧ̀ , во́ и҆мѧ ѻ҆ц҃а и҆ сн҃а , и҆ ст҃а́гѡ дх҃а , и҆ спребыва́ти со ᲂу҆ченикѝ , ꙗ҆́кᲂже ѡ҆бѣща́сѧ , до скᲂнча́нїѧ вѣ́ка . боⷢ҇ . И҆́же в̾ вы́шнихъ сла́вимаго бжⷭ҇твенѣ , ѿ а҆́нг҃лъ , и҆ ѿ нѣ́дръ ѻ҆те́ческихъ пречⷭ҇таѧ не ѿстꙋ́пльша не и҆зрече́ннѡ , и҆ с̾ ни́жними пᲂжи́вша , ты̀ сегѡ̀ прїе́мши спасе́нїю бы́сть хᲂда́таица , ѿ чи́стыхъ бо крᲂве́й твᲂи́хъ , и҆зба́вителю па́че сло́ва пло́ть взаи́мъ да́вши . є҆го́же мᲂлѝ , и҆збавле́нїе рабѡ́мъ твᲂи́мъ пᲂда́ти прегрѣше́нїемъ .

С=тихѣ́ра , а҃ гѡ , є҆ѵⷢ҇а́лїѧ . гла́съ , а҃ . на́ =гᲂрꙋ ᲂу҆ченикѡ́мъ и҆дꙋ́щимъ , за земно́е вᲂзнесе́нїе , пред̾ста̀ гдⷭ҇ь , и҆ пᲂклᲂни́шасѧ є҆мꙋ̀ . и҆ в̾ да́ннꙋю вла́сть всю́дꙋ наꙋчи́вше , въ пᲂд̾нбⷭ҇нꙋю пᲂсыла́ютсѧ , прᲂпᲂвѣ́дати є҆́же и҆з̾ ме́ртвыхъ вᲂскрⷭ҇нїе , и҆ є҆́же на нб҃са̀ вᲂзнесе́нїе . и҆́мже и҆ вѣ́чнѣ с̾пребыва́ти нело́жныи ѡ҆бѣща́сѧ хрⷭ҇то́съ бг҃ъ , и҆ сп҃съ дш҃а́мъ на́шимъ .

Свѣти́ленъ , в҃ . Ка́мень ви́дѣвше ѿвале́нъ мѷрᲂно́сицы , ра́дᲂвахꙋсѧ . ви́дѣша бо ю҆́нᲂшꙋ сѣдѧ́ща на́ грᲂбѣ , и҆ то́й тѣ́мъ речѐ , сѐ хрⷭ҇то́съ вᲂста́лъ є҆́сть . рцы́те ᲂу҆́бѡ петро́ви ᲂу҆чн҃кѡ́мъ , на́ гᲂрꙋ приспѣ́йте галиле́йскꙋю , та́мѡ ва́мъ ꙗ҆ви́тсѧ . ꙗ҆́кᲂже пре́жде речѐ дрꙋгѡ́мъ . боⷢ҇ . Вᲂсїѧ́выи сл҃нце и҆́з̾ грᲂба дне́сь , ꙗ҆́кѡ жени́хъ ѿ черто́га , и҆́же а҆́да плѣни́выи , и҆ сме́рть ᲂу҆праздни́выи , тебѐ ро́ждьшїѧ мл҃твами хрⷭ҇тѐ , свѣ́тъ на́мъ пᲂслѝ . свѣ́тъ прᲂсвѣща́ѧи срⷣца̀ и҆ дш҃а . свѣ́тъ в̾вᲂдѧ̀ во всѣ́хъ на́съ , и҆ наставлѧ́ѧ на стезѝ пᲂвелѣ́нїи твᲂи́хъ , и҆ на пꙋ́ть смире́нїѧ .

Стихѣ́ра , в҃ гѡ , є҆ѵⷢ҇а́лїѧ . гла́съ , в҃ . Съ ми́рᲂмъ прише́дшимъ , є҆́же с̾ мр҃і́ею жена́мъ , и҆ недᲂмышлѧ́ющимсѧ , ка́кѡ бы и҆́мъ ᲂу҆лꙋчи́ти хᲂтѣ́нїе . ꙗ҆ви́сѧ ка́мень ѿвале́нъ , и҆ бжⷭ҇твеныи ю҆́нᲂша , раз̾стила́ѧ мѧте́жь и҆́хъ дꙋ́шъ , вᲂста́ бо речѐ і҆с҃ъ гдⷭ҇ь . тѣ́мъ прᲂпᲂвѣ́дите прᲂпᲂвѣ́дникѡмъ є҆гѡ̀ ᲂу҆чн҃кѡ́мъ , в̾ галиле́ю тещѝ , и҆ ви́дѣти є҆гѡ̀ вᲂскр҃сша и҆з̾ ме́ртвыхъ , ꙗ҆́кѡ жизнᲂда́вца и҆ гдⷭ҇а .

Свѣти́ленъ , г҃ . Ꙗ҆́кѡ хрⷭ҇то́съ вᲂскр҃се , никто́же да не невѣ́рꙋй , пᲂказа́сѧ ᲂу҆́бѡ ма́рїи . пᲂто́мъ же ꙗ҆ви́сѧ , на село̀ и҆дꙋ́щима двѣма̀ . ᲂу҆ченикѡ́мъ же па́ки ꙗ҆ви́сѧ , вᲂзлежа́щимъ є҆ди́нᲂмꙋ на́ десѧте , и҆́хже и҆ креща́ти пᲂсла́въ , и҆ на нб҃са̀ вᲂзнесе́сѧ , ѿ ню́дꙋ же и҆ сни́де , ᲂу҆твержа́ѧ прᲂпᲂвѣ́данїе мно́гими зна́меньми . боⷢ҇ . Сꙋ́ществеными сво́йствы сн҃ъ тво́й дв҃це , мр҃твъ ꙗ҆́кѡ ѿ сна̀ вᲂз̾бнꙋвъ , и҆ ꙗ҆́кѡ бг҃ъ вᲂскр҃се , и҆стлѣ́нїѧ бо невѣ́дѧше . є҆го́же при́снѡ чⷭ҇таѧ мᲂлѝ , лю́демъ и҆ ста́дꙋ твᲂемꙋ̀ , свѣ́тъ , пᲂсла́ти . ѿ дневна́го же и҆ нᲂщна́гѡ претыка́нїѧ спастѝ , и҆́же со ѻ҆ц҃е́мъ и҆ со́ дх҃ᲂмъ , є҆ди́нᲂмꙋ бг҃ꙋ пᲂклᲂнѧ́ющихсѧ .

Стихѣ́ра , г҃ гѡ , є҆ѵⷢ҇а́лїѧ . гла́съ , г҃ . Магдалы́ни ма́рїи , сп҃сᲂво бл҃гᲂвѣствꙋ́ющи є҆́же и҆з̾ ме́ртвыхъ вᲂскрⷭ҇нїе и҆ ꙗ҆вле́нїе , невѣ́рꙋющїи ᲂу҆ченицы̀ , пᲂнᲂси́ми бы́ша ѡ҆ жестᲂсе́рдїихъ . но зна́менїи напо́лнившесѧ и҆ чꙋде́съ , к̾ прᲂпᲂвѣ́данїю пᲂсыла́ютсѧ . и҆ ты̀ ᲂу҆́бѡ гдⷭ҇и , к̾ нача́льнᲂмꙋ свѣ́тꙋ вᲂзнесе́сѧ ѻ҆ц҃ꙋ , ѻ҆ни́же прᲂпᲂвѣ́даша всю́дꙋ сло́во , чꙋдесы̀ вѣ́рꙋеми . и҆ тѣ́мъ прᲂсвѣти́вшесѧ и҆́хъ ра́ди , сла́вимъ твᲂѐ є҆́же и҆з̾ ме́ртвыхъ вᲂскрⷭ҇нїе , чл҃кᲂлю́бче гдⷭ҇и .

Свѣти́ленъ , д҃ . Дᲂбрᲂдѣ́тельми прᲂсвѣти́вшесѧ , ви́димъ пред̾стᲂѧ́ща в̾ живᲂно́снѣмъ гро́бѣ , мꙋ́жа блеща́щасѧ ри́зами , и҆ с̾ мѷрᲂно́сицами прекло́ньшими лица̀ свᲂѧ̀ на́ землю , и҆́же небесы̀ ѡ҆блада́ющаго вᲂскрⷭ҇нїю да наꙋчи́мсѧ , и҆ к̾ живᲂно́снᲂмꙋ гро́бꙋ пᲂтеце́мъ с̾ петро́мъ , и҆ сᲂдѣ́ѧннᲂмꙋ ᲂу҆ди́вльшесѧ , пребꙋ́демъ хрⷭ҇та̀ ви́дѣти . =боⷢ҇ . во́ =чрево твᲂѐ гдⷭ҇ь вᲂпло́щьсѧ , пᲂги́бшаго ми́ра ѿ тлѝ призва́ти вᲂсхᲂтѣ́въ , ꙗ҆́кᲂже вѣ́сть всели́сѧ в̾ тѧ̀ бцⷣе . спасе́нїе же всѝ ѡ҆брѣ́тше , вᲂпїе́мъ ти ꙗ҆́кѡ а҆́нг҃лъ , ра́дꙋисѧ є҆ди́на чи́стаѧ в̾ жена́хъ всѣ́хъ бл҃гᲂслᲂве́наѧ , спасе́нїе бо рᲂдила̀ є҆сѝ , все́й вселе́ннѣй .

Стихѣ́ра , д҃ гѡ , є҆ѵⷢ҇а́лїѧ . гла́съ , д҃ . Оу҆́тренѧѧ бѣ̀ ра́нѡ , и҆ жены̀ прїидо́ша на́ грᲂбъ тво́й хрⷭ҇тѐ , но тѣ́ло не ѡ҆брѣ́тесѧ люби́мᲂе и҆́ми . тѣ́мъ недᲂмы́слѧщимсѧ и҆́мъ , и҆́же блеща́щимисѧ ри́зами пред̾ста́вшїи гл҃ахꙋ , что̀ жива́го с̾ ме́ртвыми и҆́щете ; вᲂста̀ ꙗ҆́кᲂже речѐ пре́жде , что̀ непо́мните гл҃ъ є҆гѡ̀ ; и҆́мже вѣ́рᲂвавше , ви́дѣннаѧ прᲂпᲂвѣ́дахꙋ , но мнѧ́шесѧ лжа̀ бл҃гᲂвѣ́щенїе , та́кѡ бы́ша є҆щѐ со́нни ᲂу҆чн҃цы̀ . но пе́тръ течѐ и҆ ви́дѣвъ , и҆ прᲂсла́ви твᲂѧ̀ в̾ себѣ̀ чꙋдеса̀ .

Свѣти́ленъ , є҃ . Живо́тъ и҆ пꙋ́ть хрⷭ҇то́съ , вᲂста̀ и҆з̾ ме́ртвыхъ , клеѡ́пѣ и҆ лꙋцѣ̀ в̾ пꙋ́ть сше́ствꙋѧ , и҆́маже и҆ пᲂзна́сѧ во є҆ммаꙋ́сѣ , в̾ прелᲂмле́нїи хлѣ́ба . є҆ю́же дш҃а и҆ срⷣца̀ гᲂрѧ́ща бѧ́хꙋ , є҆гда̀ тѣ́ма гл҃аше на пꙋтѝ , и҆ писа́нїе ска́зᲂваше ꙗ҆́же пᲂстрада̀ . и҆ и҆́маже зᲂво́мъ , ꙗ҆ви́жесѧ и҆ петро́ви . боⷢ҇ . Твᲂре́цъ сᲂзда́нїѧ и҆ гдⷭ҇ь и҆ бг҃ъ всѧ́ческимъ , пло́ть земнꙋ́ю прїе́мъ ѿ чи́стыхъ крᲂве́й твᲂи́хъ всепѣ́таѧ бцⷣе , и҆ и҆стлѣ́вшеє мѝ є҆стество̀ но́во сᲂдѣ́ла па́ки , ꙗ҆́кᲂже пре́жде ржⷭ҇тва̀ ѡ҆ста́вль по ржⷭ҇твѣ̀ . тѣ́мже тѧ̀ вѣ́рᲂю всѝ вᲂсхвалѧ́емъ зᲂвꙋ́ще , ра́дꙋисѧ ми́рᲂви сла́ва .

Стихѣ́ра , є҃ гѡ , є҆ѵⷢ҇а́лїѧ . гла́съ , є҃ . Ѽ премꙋ́дрыхъ сꙋде́бъ твᲂи́хъ хрⷭ҇тѐ , ка́кѡ петрꙋ̀ ᲂу҆́бѡ ри́зами є҆ди́нѣми , в̾да́лъ є҆сѝ разꙋмѣ́ти твᲂѐ вᲂскрⷭ҇нїе ; лꙋцѣ́ же и҆ клеѡ́пѣ въ пꙋ́ть сᲂше́ствꙋѧ гл҃еши , и҆ глаго́лѧ , неско́рѡ себѐ ꙗ҆влѧ́еши . тѣ́мъ и҆ пᲂнᲂси́мъ быва́ѧ , ꙗ҆́кѡ є҆ди́нъ прише́льствꙋѧи во і҆єрⷭ҇ли́мъ , и҆ несвѣ́дыи в̾ кᲂне́цъ сᲂвѣ́та є҆ю̀ . но и҆́же всѧ̀ к̾ сᲂзда́нїю на по́льзꙋ стро́ѧ , и҆ ꙗ҆́же ѡ҆ тебѣ̀ пррⷪ҇чествїѧ ѿкры́лъ є҆сѝ , и҆ во бл҃гᲂслᲂве́нїи хлѣ́ба пᲂзна́сѧ и҆́ма . є҆ю́же и҆ пре́жде тᲂго̀ срⷣца̀ , к̾ пᲂзна́нїю твᲂемꙋ̀ распала́стасѧ . и҆́же и҆ ᲂу҆ченико́мъ со́бранᲂмъ , ᲂу҆́же ꙗ҆́снѡ прᲂпᲂвѣ́даста твᲂѐ вᲂскрⷭ҇нїе . и҆́мже пᲂми́лꙋй на́съ .

Свѣти́ленъ , ѕ҃ . Пᲂказа́лсѧ є҆сѝ сп҃се ꙗ҆́кѡ чл҃къ по сꙋществꙋ̀ , и҆ пᲂсредѣ̀ ста́въ вᲂскр҃сыи ѿ́ грᲂба , и҆ пи́щꙋ сᲂв̾кꙋси́въ , ᲂу҆ча́ше креще́нїю пᲂкаѧ́нїѧ . а҆́бїе же к̾ нбⷭ҇нᲂмꙋ вᲂзнесе́сѧ ѻ҆ц҃ꙋ , и҆ ᲂу҆ченико́мъ пᲂсла́ти ᲂу҆тѣ́шителѧ ѡ҆бѣща́сѧ . пребжⷭ҇твене чл҃кᲂлю́бче , сла́ва твᲂемꙋ̀ вᲂста́нїю . боⷢ҇ . Свᲂегѡ̀ сн҃а ꙗ҆́кѡ ви́дѣвши ѿ ме́ртвыхъ вᲂста́вша , ра́дᲂсти и҆спо́лнисѧ пречⷭ҇таѧ , и҆ не и҆зрече́ннᲂе сегѡ̀ вᲂспѣва́ше бл҃гᲂꙋтро́бїе , ꙗ҆́кѡ ѿ ѻ҆те́ческихъ нѣ́дръ не ѿстꙋ́пль . и҆ ѿ тебѐ вᲂсїѧ́въ всѣ́хъ ѿ и҆стлѣ́нїѧ стрⷭ҇тїю разрѣшѝ крⷭ҇тнᲂю , и҆ к̾ живᲂтꙋ̀ вᲂзведѐ свᲂегѡ̀ ра́ди млрⷭ҇дїѧ .

Стихѣ́ра , ѕ҃ гѡ , є҆ѵⷢ҇а́лїѧ . гла́съ , ѕ҃ . Вᲂи́стинꙋ ми́ръ ты̀ хрⷭ҇тѐ , к̾ челᲂвѣ́кѡмъ бж҃їи ми́ръ сво́й пᲂдава́ѧ , по вᲂскрⷭ҇нїи ᲂу҆чн҃кѡ́мъ , пристра́шны пᲂказа́лъ є҆сѝ и҆́хъ , мнѧ́щимъ дꙋ́хъ ви́дѣти . но ᲂу҆тиши́лъ є҆сѝ мѧте́жь дꙋ́шъ и҆́хъ , пᲂказа́въ и҆́мъ рꙋ́цѣ и҆ но́зѣ свᲂѝ . ѻ҆ба́че невѣ́рꙋющимъ и҆́мъ є҆щѐ , бра́шна в̾кꙋше́нїемъ , и҆ ᲂу҆че́нїи вᲂспᲂмина́нїемъ , ѿве́рзлъ є҆сѝ и҆́мъ ᲂу҆́мъ разꙋмѣ́ти писа́нїѧ . и҆́мже и҆ ѻ҆те́ческᲂе ѡ҆бѣтᲂва́нїе ѡ҆бѣща́въ , и҆ бл҃гᲂслᲂви́въ и҆́хъ в̾зы́де на́ нб҃о . тѣ́мже с̾ ни́ми пᲂкланѧ́емсѧ тѝ , гдⷭ҇и сла́ва тебѣ̀ .

Свѣти́ленъ , з҃ . Ꙗ҆́кѡ взѧ́ша гдⷭ҇а ма́рїѧ речѐ , ко́ грᲂбꙋ те́кши , сі́мѡнъ пе́тръ , и҆ дрꙋгі́и ᲂу҆чени́къ хрⷭ҇то́въ , є҆го́же люблѧ́ше , теча́ста же ѻ҆́ба в̾кꙋ́пѣ , и҆ ѡ҆брѣто́ста ри́зы внꙋ́трь лежа́ща є҆ди́ны , и҆ главны́и сꙋда́рь бѧ́ще крᲂмѣ̀ си́хъ . тѣ́мъ па́ки ᲂу҆мᲂлча́ша , до́ндеже хрⷭ҇та̀ ви́дѣша . боⷢ҇ . Пᲂю̀ твᲂю̀ без̾чи́сленꙋю млⷭ҇ть сп҃се мо́й , ꙗ҆́кѡ себѐ и҆злїѧ́лъ є҆сѝ , пᲂнестѝ и҆ спастѝ є҆стество̀ земны́хъ пᲂги́бшеє . и҆ бг҃ъ сы́и и҆зво́лилъ є҆сѝ ѿ чи́стыѧ бг҃ᲂѻ҆трᲂкᲂви́цы по мнѣ̀ бы́ти , и҆ сни́ти во а҆́дъ , и҆ ѿ тꙋ́дꙋ мѧ̀ и҆звестѝ . є҆ѧ́же мл҃твами гдⷭ҇и спасѝ дш҃а на́ша .

Стихѣ́ра , з҃ гѡ , є҆ѵⷢ҇а́лїѧ . гла́съ , з҃ . Сѐ тма̀ и҆ ра́нѡ , и҆ что̀ ᲂу҆́ грᲂба ма́рїе стᲂи́ши , мно́гꙋ тмꙋ̀ и҆мꙋ́щи в̾ ра́зꙋмѣ , в̾ не́мже гдѣ̀ пᲂлᲂже́нъ бы́сть вᲂпрᲂша́ше і҆с҃а ; но ви́ждь сри́щꙋщасѧ ᲂу҆ченикѝ , ка́кѡ ри́зами и҆ сꙋдаре́мъ вᲂскрⷭ҇нїе ѡ҆брѣто́ша , и҆ вᲂспᲂмѧнꙋ́ша ꙗ҆́же ѡ҆ си́хъ писа́нїѧ . и҆́миже , с̾ ни́ми и҆ мы̀ вѣ́рᲂвавше , вᲂспѣва́емъ тѧ̀ жизнᲂда́вца хрⷭ҇та̀ .

Свѣти́ленъ , и҃ . Два̀ а҆́нг҃ла ви́дѣвши внꙋ́трь гро́ба ма́рїѧ , дивлѧ́шесѧ , и҆ хрⷭ҇та̀ незна́ющи , ꙗ҆́кѡ вертᲂгра́дарѧ вᲂпрᲂша́ше , гдⷭ҇и гдѣ̀ пᲂлᲂжи́лъ є҆сѝ , тѣ́ло гдⷭ҇а мᲂегѡ̀ ; зва́нїемъ же сегѡ̀ пᲂзна́вши , бы́ти самᲂго̀ сп҃са , слы́ша глаго́люща , неприкаса́йсѧ мнѣ̀ , ко ѻ҆ц҃ꙋ бо вᲂсхᲂждꙋ̀ , рцы̀ бра́тїи мᲂе́й . боⷢ҇ . Без̾сѣ́менно зача́тїе , и҆ не и҆зрече́нно ржⷭ҇тво̀ , кто̀ сказа́ти вᲂз̾мо́жетъ , ꙗ҆́кѡ дв҃аѧ и҆ мт҃и твᲂѧ̀ пᲂказа́сѧ бг҃ᲂрᲂди́тельнице ; є҆ди́ныи ꙗ҆́кᲂже и҆зво́ли , за млрⷭ҇дїе не и҆з̾глаго́ланнᲂе затвᲂре́нꙋ ѡ҆ста́ви . и҆ сегѡ̀ ра́ди па́ки дре́внюю дае́тъ сла́вꙋ , вᲂзвᲂдѧ̀ ѿ пе́рвагѡ паде́нїѧ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

Стихѣ́ра , и҃ гѡ , є҆ѵⷢ҇а́лїѧ . гла́съ , и҃ . Ма́рїины сле́зы не безꙋма̀ прᲂлива́ютсѧ те́плѣ , сѝ ᲂу҆́бѡ спᲂдо́бисѧ и҆ ᲂу҆че́нїи а҆́нг҃льскихъ , и҆ ѻ҆́бразꙋ самᲂгѡ̀ і҆с҃а . но є҆щѐ земна́ѧ мы́слитъ , ꙗ҆́кѡ жена̀ немᲂщна̀ , тѣ́мъ и҆ ѿсыла́етсѧ неприкаса́тисѧ хрⷭ҇тꙋ̀ . но ѻ҆ба́че прᲂпᲂвѣ́дница пᲂсыла́етсѧ твᲂи́мъ ᲂу҆ченикѡ́мъ , и҆́мже и҆ бл҃гᲂвѣ́щенїе нᲂсѧ́щи , є҆́же ко ѻ҆те́ческᲂмꙋ жре́бїю всхо́дъ вᲂз̾вѣща́ющи тво́й . с̾ не́юже спᲂдо́би и҆ на́съ ꙗ҆вле́нїѧ твᲂегѡ̀ влⷣко гдⷭ҇и .

Свѣти́ленъ , ѳ҃ . Затвᲂре́нымъ влⷣко две́ремъ , ꙗ҆́кѡ вни́де , а҆пⷭ҇лы и҆спо́лнилъ дх҃а прест҃а́гѡ , ми́рнѡ дꙋ́нꙋвъ , и҆́мже вѧза́ти и҆ раз̾рѣша́ти грѣхѝ ре́клъ є҆сѝ . и҆ по ѻ҆сми́ же па́ки дне́хъ , твᲂѧ̀ ре́бра и҆ рꙋ́цѣ ѳѡмѣ̀ пᲂказа́лъ є҆сѝ . с̾ ни́мже вᲂпїе́мъ , гдⷭ҇ь и҆ бг҃ъ ты̀ є҆сѝ . боⷢ҇ . Вᲂскрⷭ҇шаго гдⷭ҇а тридне́вно и҆́з̾ грᲂба , дв҃о мт҃и пречⷭ҇таѧ мᲂлѝ ѡ҆ пᲂю́щихъ тѧ и҆ любо́вїю блажа́щихъ , тебе́ бо и҆́мамы всѝ прибѣ́жище спасе́нїѧ , и҆ хᲂда́таицꙋ к̾ тᲂмꙋ̀ , дᲂстᲂѧ́нїе бо твᲂѐ и҆ рабы̀ є҆смы̀ влⷣчце , и҆ к̾ твᲂемꙋ̀ застꙋпле́нїю всегда̀ в̾зира́емъ .

Стихѣ́ра , ѳ҃ гѡ , є҆ѵⷢ҇а́лїѧ . гла́съ , є҃ . Ꙗ҆́кѡ в̾ пᲂслѣ́днѧѧ времена̀ , та́кᲂже и҆ в̾ ве́черъ сꙋбо́тныи , пред̾ста́лъ є҆сѝ дрꙋго́мъ сѝ хрⷭ҇тѐ , затвᲂре́нᲂмъ бо в̾хо́дᲂмъ две́рнымъ , и҆ чꙋдесе́мъ чꙋ́до и҆звѣстꙋ́еши , є҆́же и҆з̾ ме́ртвыхъ твᲂѐ вᲂскрⷭ҇нїе . но и҆спо́лнилъ є҆сѝ ра́дᲂсти ᲂу҆ченикѝ , и҆ дх҃а ст҃а́гѡ по́далъ є҆сѝ и҆́мъ , и҆ ѻ҆́бласть в̾да́лъ ѡ҆ставле́нїю грѣхо́мъ , и҆ ѳѡмы̀ не ѡ҆ста́вилъ є҆сѝ пᲂгрꙋжа́тисѧ в̾ невѣ́рьствїи бꙋ́ри . тѣ́мъ пᲂда́ждь и҆ на́мъ ра́зꙋмъ и҆́стинныи , и҆ ѡ҆ставле́нїе прегрѣше́нїемъ бл҃гᲂсе́рде гдⷭ҇и .

Свѣти́ленъ , і҃ . Тиверїа́дскᲂе мо́ре , с̾ дѣтьмѝ зеведе́ѡвыми , и҆ нафана́илъ с̾ петро́мъ , и҆ с̾ дрꙋги́ма двѣма̀ дре́вле , и҆ ѳѡмꙋ̀ и҆мѧ́ше на́ лᲂвѣ . и҆́же хрⷭ҇то́вымъ пᲂвелѣ́нїемъ ѡ҆деснꙋ́ю в̾ве́ргше мре́жꙋ , мно́жество и҆звлеко́ша ры́бъ , є҆го́же пе́тръ пᲂзна́въ к̾ немꙋ̀ брᲂдѧ́ше . сѐ ᲂу҆́же трети́цею ꙗ҆ви́всѧ , и҆ хлѣ́бъ пᲂказа̀ и҆ ры́бꙋ на ᲂу҆́глехъ . боⷢ҇ . Свᲂегѡ̀ сн҃а ꙗ҆́кѡ ви́дѣла є҆сѝ , вᲂста́вша и҆з̾ ме́ртвыхъ тридне́вно , бг҃ᲂневѣ́сто всест҃а́ѧ дв҃о , всѧ́кꙋ ско́рбь ѿлᲂжѝ , є҆мꙋ́же пре́жде пред̾стᲂѧ́щи , стра́жꙋща сегѡ̀ зрѧ́ше . и҆ ра́дᲂсти и҆спо́лнившисѧ , со ᲂу҆ченикѝ тᲂгда̀ вᲂскрⷭ҇нїе є҆гѡ̀ вᲂспѣва́ше . тѣ́мже спасѝ и҆́же бцⷣꙋ и҆спᲂвѣ́дающихъ тѧ̀ .

Стихѣ́ра , і҃ гѡ , є҆ѵⷢ҇а́лїѧ . гла́съ , ѕ҃ . По є҆́же во а҆́дъ сᲂше́ствїи , и҆ є҆́же и҆з̾ ме́ртвыхъ вᲂскрⷭ҇нїи , скᲂрбѧ́ще ꙗ҆́кᲂже дᲂсто́ѧше , ѡ҆ раз̾лꙋче́нїи твᲂе́мъ хрⷭ҇тѐ ᲂу҆ченицы̀ , на дѣ́ло ᲂу҆бѣди́шасѧ , и҆ па́ки кᲂра́бль и҆ мре́жа , и҆ ло́ва ни ма́ла . но ты̀ сп҃се ꙗ҆ви́всѧ ꙗ҆́кѡ влⷣка всѣ́хъ , ѡ҆деснꙋ́ю пᲂвелѣва́еши мре́жꙋ вᲂврещѝ . и҆ бы́сть сло́во дѣ́лᲂмъ вско́рѣ , и҆ мно́жество ры́бъ мно́гѡ . и҆ ве́черѧ стра́нна гᲂто́ва на землѝ , є҆ѧ́же причасти́вшимсѧ тᲂгда̀ твᲂи́мъ ᲂу҆ченикѡ́мъ . и҆ на́съ ны́нѣ разꙋ́мнѡ спᲂдо́би насы́титисѧ чл҃кᲂлю́бче гдⷭ҇и .

Свѣти́ленъ , а҃і . По бжⷭ҇твенᲂмъ вᲂста́нїи , три́щи петро́ви речѐ гдⷭ҇ь лю́бишили мѧ̀ ; и҆ свᲂи́мъ ѻ҆вца́мъ пред̾лага́етъ пастыренача́льника . и҆ ꙗ҆́кᲂже ви́дѣвъ є҆го́же люблѧ́ше і҆с҃ъ , вᲂслѣ́дъ грѧдꙋ́ща , вᲂпрᲂша́ше влⷣкꙋ , се́йже что̀ ; а҆́ще хᲂщꙋ̀ , речѐ , пребыва́ти семꙋ̀ , до́ндеже и҆ па́ки прїидꙋ̀ , что̀ є҆́сть тебѣ̀ дрꙋ́же пе́тре . боⷢ҇ . Дв҃о не и҆скꙋсᲂбра́чнаѧ , ро́ждьшаѧ без̾ сѣ́мене , и҆́же ѻ҆ц҃ꙋ сᲂбез̾нача́льнаго , дх҃а всест҃агѡ бл҃гᲂвᲂле́нїемъ . и҆́же сме́ртїю , а҆́дᲂвꙋ всю̀ си́лꙋ крѣ́пᲂстїю сте́ршагѡ , и҆ сᲂкрꙋ́шша бѣсо́вскїѧ ко́зни , и҆ невре́дны всѣ́хъ сᲂблюда́юща ѿ си́хъ вреже́нїѧ , влⷣчце прест҃а́ѧ ѻ҆трᲂкᲂви́це .

Стихѣ́ра , а҃і гѡ , є҆ѵⷢ҇а́лїѧ . глаⷭ҇ , и҃ . Ꙗ҆влѧ́ѧ себѐ ᲂу҆ченикѡ́мъ сп҃се по вᲂскрⷭ҇нїи , сі́мѡнꙋ в̾да́лъ є҆сѝ , ѻ҆ве́цъ па́ствꙋ за любо́внᲂе вᲂздаѧ́нїе , є҆́же ѡ҆ па́ствѣ пᲂпече́нїѧ и҆ща̀ . тѣ́мже глаго́лалъ є҆сѝ , а҆́ще лю́биши мѧ пе́тре , пасѝ а҆́гньцы мᲂѧ̀ , пасѝ ѻ҆́вцы мᲂѧ̀ . ѻ҆́нъ же а҆́бїе пᲂказꙋ́ѧ дрꙋгᲂлю́бнᲂе , ѡ҆ дрꙋзѣ́мъ ᲂу҆ченицѣ̀ вᲂпрᲂша́ше . є҆ю́же мл҃твами хрⷭ҇тѐ , ста́до си сᲂхранѧ́й ѿ во́лкъ гꙋбѧ́щихъ є҆̀ .